Semantic search
t0.smw_id AS id,
t0.smw_title AS t,
t0.smw_namespace AS ns,
t0.smw_iw AS iw,
t0.smw_subobject AS so,
t0.smw_sortkey AS sortkey, t0.smw_sort
FROM
`smw_object_ids` AS t0
INNER JOIN
(`smw_fpt_inst` AS t2
INNER JOIN
`t3` AS t3 ON t2.o_id=t3.id
INNER JOIN
`smw_di_number` AS t4 ON t2.s_id=t4.s_id) ON t0.smw_id=t2.s_id
WHERE
(
(t4.p_id=9223)
)
AND t0.smw_iw!=':smw'
AND t0.smw_iw!=':smw-delete'
AND t0.smw_iw!=':smw-redi'
ORDER BY
t0.smw_sort ASC
LIMIT
55
OFFSET
50
ID | select_type | table | type | possible_keys | key | key_len | ref | rows | filtered | Extra |
---|---|---|---|---|---|---|---|---|---|---|
1 | SIMPLE | t3 | ALL | PRIMARY | 3 | Using temporary; Using filesort | ||||
1 | SIMPLE | t2 | ref | s_id, o_id, s_id_2, o_id_2 | o_id_2 | 5 | wiki.t3.id | 3 | Using index | |
1 | SIMPLE | t0 | eq_ref | PRIMARY, smw_id, smw_iw, smw_iw_2 | PRIMARY | 4 | wiki.t2.s_id | 1 | Using where | |
1 | SIMPLE | t4 | ref | s_id, p_id, p_id_2, s_id_2 | s_id | 8 | wiki.t2.s_id, const | 1 | Using index; Distinct |
- Temporary table t3
Recursively computed hierarchy for element(s) (545).
SELECT s_id FROM `smw_fpt_subc` WHERE o_id=545 LIMIT 1
Query-Depth:1
༄༅། །བདེ་མཆོག་སྙན་བརྒྱུད་ཀྱི་རྫོགས་རིམ་སྟེང་སྒོ་རྣམ་པར་གྲོལ་བའི་ཆོས་དྲུག་གི་ཁྲིད་ཡིག་བཞུགས་སོ༎ ༎
༄༅། བདེ་མཆོག་སྙན་བརྒྱུད་རས་ཆུང་ལུགས་ཀྱི་ཐུན་མོང་ཕྱི་དཀྱིལ་བརྒྱད་ལས་ཡུམ་བཀའ་བསྡུས་པ་ལྷན་ཅིག་སྐྱེས་མའི་སྒྲུབ་དཀྱིལ་དབང་ཆོག་དང་བཅས་པ་པདྨ་རཱ་གའི་བུམ་བཟང་ཞེས་བྱ་བ་བཞུགས་སོ། །
བདེ་མཆོག་ཐུན་མོང་བའི་དབང་ལྷ་བཅུ་གསུམ་མའི་དཀྱིལ་འཁོར་དུ་བསྐུར་བ་
༄༅། །བཀའ་བབས་དྲུག་ལྡན་གྱི་འཁྲིད་ཡིག་འཕགས་ཡུལ་གྲུབ་པའི་ཞལ་ལུང་ཞེས་བྱ་བ་བཞུགས་སོ༎ ༎
༄༅། །བཀའ་བབས་དྲུག་ལྡན་གྱི་ཟབ་ཁྲིད་བརྒྱུད་པའི་གསོལ་འདེབས་མུ་ཏིག་ཕྲེང་བ་ཞེས་བྱ་བ་བཞུགས་སོ།
བཀའ་བརྒྱུད་རིན་པོ་ཆེའི་ཉམས་ཀྱི་ཕྲེང་བ་བཞུགས་སོ།
བཀའ་བརྒྱུད་ཚོགས་ལས་
@#/_bka' gdams lha bzhi'i khrid kyi yi ge mdo sngags lam gyi bcud 'dus zhes bya ba bzhugs so//_//
༄༅༅། །བཀའ་གདམས་ལྷ་བཞིའི་རྗེས་གནང་རྩ་བའི་ཕྱག་ལེན་བསླད་མེད་སྒྲུབ་ཐབས་རིན་འབྱུང་ལས་ཁོལ་དུ་ཕྱུངས་པ་བཞུགས་སོ།
༄༅། །བཀའ་གདམས་ཐིག་ལེ་བཅུ་དྲུག་གི་སྒྲུབ་ཐབས་དབང་བསྐུར་བའི་ཆོ་ག་བཀླག་ཆོག་ཏུ་བསྡེབས་པ་ཐུགས་རྗེ་རྣམ་པར་རོལ་པའི་རྒྱན་ཅེས་བྱ་བ་བཞུགས་སོ༎
༄༅། །བཀའ་གདམས་ཐིག་ལེ་བཅུ་དྲུག་གི་ཟབ་ཁྲིད་ཀྱི་རིམ་པ་སྙིང་པོར་དྲིལ་བ་གྲུབ་གཉིས་མཆོག་སྦྱིན་ཅེས་བྱ་བ་བཞུགས་སོ། །
༄༅། །བཀའ་སྲུང་ཨེ་ཀ་ཛཱ་ཊི་སྡེ་བདུན་གྱི་རྗེས་གནང་བཞུགས་སོ༎
༄༅། །དཔལ་རྡོ་རྗེ་ནག་པོ་ཆེན་པོ་གུར་མགོན་ལྷ་བརྒྱད་ཀྱི་སྒྲུབ་ཐབས་རྗེས་གནང་དང་བཅས་པ་གཟི་བརྗིད་སྟོབས་འབར་ཅེས་བྱ་བ་བཞུགས་སོ༎ ༎
།བཀའ་ཡང་དག་པའི་ཚད་མ་ཞེས་བྱ་བ་མཁའ་འགྲོ་མའི་མན་ངག་བཞུགས་སོ།
།བླ་མ་གསེར་གླིང་པས་ཇོ་བོ་ལ་མཐའ་འཁོབ་འདུལ་བའི་ཆོས་སུ་གནོང་བ་བཞུགས་སོ།
}}
༄༅། །བླ་མ་ཕྱི་ནང་གསང་བར་སྒྲུབ་པའི་གཞུང་བཞུགས་སོ། །
༄༅། །བླ་མ་རྡོ་རྗེ་འཆང་གྲུབ་ཐོབ་བརྒྱད་ཅུ་རྩ་བཞིའི་བྱིན་རླབས་ལྷན་ཅིག་ཏུ་བྱ་བའི་ཚུལ་དངོས་གྲུབ་ཆུ་རྒྱུན་བཞུགས། །
༅། །བླ་མ་ཚེ་ལྷ་རྣམ་གསུམ་གྱི་རྣལ་འབྱོར་དང་རྗེས་སུ་འབྲེལ་བར་ཚོགས་གཉིས་སྤེལ་བའི་ཆོ་ག་འཆི་མེད་གྲུབ་པའི་དགའ་སྟོན་ཅེས་བྱ་བ་བཞུགས་སོ། །
།བླ་མའི་རྣལ་འབྱོར་བཞུགས་སོ།
༄༅། །བླ་མའི་རྣལ་འབྱོར་སྐབས་བླ་མ་བརྒྱུད་པའི་ཁ་སྐོང་ནི།
༄༅། །བླ་མེད་ལྷན་སྐྱེས་རྣམ་བཞིའི་རྫོགས་རིམ་སྙིང་པོ་དོན་གྱི་ཕྲེང་བ་ཞེས་བྱ་བ་བཞུགས་སོ། །ཨུ་པ་དེ་ཤ་གམྦྷི་ར།
༄༅། །བླ་མེད་སྔགས་ཆོས་ཀྱི་སྙིང་པོའི་བཅུད་ལེན་ལམ་ཟབ་བདུད་རྩིའི་ཐིག་ལེ་ཞེས་བྱ་བ་བཞུགས་སོ༎ ༎
༄༅། །བློ་སྦྱོང་བརྒྱུད་པའི་གསོལ་འདེབས་དད་པའི་གདུང་སེལ་ཞེས་བྱ་བ་བཞུགས་སོ༎
༄། །བློ་སྦྱོང་དོན་བདུན་མའི་འགྲེལ་པ་བཞུགས་སོ།།
༄། །ཐེག་པ་ཆེན་པོ་བློ་སྦྱོང་དོན་བདུན་མའི་ཁྲིད་ཡིག་བློ་དམན་འཇུག་བདེར་བཀོད་པ་བྱང་ཆུབ་གཞུང་ལམ་ཞེས་བྱ་བ་བཞུགས་སོ༎
༄། །བློ་སྦྱོང་གྱེར་བསྒོམ་རྡོ་རྗེའི་གླུ་ཞེས་བྱ་བ་བཞུགས་སོ༎
༄། །བློ་སྦྱོང་མཚོན་ཆའི་འཁོར་ལོ་ཞེས་བྱ་བ་བཞུགས་སོ།།
༄། བློ་སྦྱོང་རྨ་བྱ་དུག་འཇོམས་ཞེས་བྱ་བ་བཞུགས་སོ།
།བློ་སྦྱོང་སེམས་དཔའི་རིམ་ས་བ་ལས་བཟློག་ཕྱོག་གཉེན་པོའི་ཆོས་བཞུགས་སོ།
༄༅། །བློ་སྦྱོང་སྨོན་ལམ་བྱང་སེམས་རྒྱ་མཚོའི་འཇུག་ངོགས་ཞེས་བྱ་བ་བཞུགས་སོ།
།བློ་སྦྱོང་ཐུན་བརྒྱད་མ་ལགས་སོ།
བློ་སྦྱོང་ཚིག་རྐང་བརྒྱད་མ་ལོ་རྒྱུས་དང་བཅས་པ་བཞུགས།
བློ་སྦྱོང་ཞེན་པ་བཞི་བྲལ་གྱི་ཁྲིད་ཡིག་བྱང་སེམས་ཀུན་དགའ་ལེགས་རིན་གྱིས་མཛད་པའི་འཆད་ཐབས་ནོར་བུ་ཀེ་ཏ་ཀའི་དོ་ཤལ་ཅེས་བྱ་བ་བཞུགས་སོ།
བོ་དོང་ལུགས་ཀྱི་ཕྱག་རྒྱ་ཆེན་པོ་ཟབ་གསལ་གྱི་རིང་བརྒྱུད་གསོལ་འདེབས་ཡེ་ཤེས་མཆོག་སྩོལ་ཅེས་བྱ་བ་བཞུགས་སོ།
༄༅། །བོ་དོང་རས་ཆེན་དཔལ་འབྱོར་བཟང་པོའི་ལུགས་ཀྱི་གཏུམ་མོ་ཞག་བདུན་མའི་ཁྲིད་ཡིག་བླ་མའི་ཞལ་ལུང་ཞེས་བྱ་བ་བཞུགས་སོ༎ ༎
༄༅། །བརྡའ་དོན་གསལ་བའི་ཁྲིད་ཡིག་བདག་ཆེན་རྡོ་རྗེ་འཆང་གིས་མཛད་པ་བཞུགས་སོ༎
༄༅། །དཔལ་ལྡན་ཤངས་པ་བཀའ་བརྒྱུད་ཀྱི་ངོ་མཚར་རིན་ཆེན་བརྒྱུད་པའི་རྣམ་ཐར་ལ་གསོལ་བ་འདེབས་པ་ཨུ་དུམ་ཝ་རའི་ཕྲེང་བ་ཞེས་བྱ་བ་བཞུགས་སོ༎ ༎
བསམ་གྱིས་མི་ཁྱབ་པ་རྣམ་པ་ལྔ་ལས།
བསམ་ཀྱིས་མི་ཁྱབ་པའི་རིམ་པའི་མན་ངག་ཅེས་བྱ་བ།
༄༅། བསྙེན་སྒྲུབ་ཀྱི་འབྲེལ་བཤད་ཡིད་བཞིན་ནོར་བུ་བཞུགས།
༄༅། །བསྙེན་སྒྲུབ་ཀྱི་ཁྲིད་ཡིག་བཞུགས་སོ༎ ༎
༄༅། །བསྟན་སྲུང་གཙོ་མོ་དུད་པའི་སོལ་བ་མའི་སྒྲུབ་ཐབས་རྗེས་གནང་དང་བཅས་པ་བཞུགས་སོ༎ ༎
༄༅། །དཔལ་ལྡན་མར་མེ་མཛད་ཀྱི་བསྟན་སྲུང་ཁྱད་པར་དུ་འཕགས་པ་མགོན་པོ་གྲི་གུག་མའི་སྒྲུབ་ཐབས་རྗེས་གནང་དང་བཅས་པ་གདུག་པ་ཀུན་འཇོམས་ཞེས་བྱ་བ་བཞུགས་སོ༎ ༎
༄༅། །དཔལ་བདེ་མཆོག་སྙན་བརྒྱུད་ལས། བུམ་དབང་དང་འབྲེལ་བའི་ཉམས་ལེན་ཐུན་མོང་ཡིད་བཞིན་ནོར་བུའི་ཁྲིད་ཡིག་རྗེ་མི་ལས་མཛད་པ་བཞུགས་སོ།
@#/_/byang chub kyi sems kun byed rgyal po'i don khrid rin chen gru bo zhes bya ba bzhugs/
༄། །བྱང་ཆུབ་ལམ་གྱི་རིམ་པ་ཉམས་སུ་ལེན་ཚུལ་གྱི་ཕྱག་བཞེས་སྙིང་པོར་དྲིལ་བ་བཞུགས་སོ༎
བྱང་ཆུབ་ལམ་གྱི་རིམ་པ་ཉམས་སུ་ལེན་ཚུལ་གྱི་ཕྱག་བཞེས་སྙིང་པོར་དྲིལ་བ་བཞུགས་སོ། །
ཨོཾ་སྭསྟི་སིདྡྷཾ། །འདིར་བྱང་ཆུབ་ལམ་གྱི་རིམ་པ་ཉམས་སུ་ལེན་པའི་སྐབས་སུ་ངག་འདོན་སོགས་ཇི་ལྟར་བྱ་བའི་ཕྱག་བཞེས་མདོ་ཙམ་བཀོད་པ་ལ་གཉིས། ཐུན་གྱི་ངོ་བོ་ལ་ཇི་ལྟར་བྱ་བའི་ཚུལ་དང༌། ཐུན་མཚམས་སུ་ཇི་ལྟར་བྱ་བའི་ཚུལ་ལོ། །དང་པོ་ལ་གསུམ། སྦྱོར་བ། དངོས་གཞི། རྗེས་སོ། །དང་བོ་ལ་དྲུག །གནས་ཁང་བྱི་དོར་བྱས་ལ་སྐུ་གསུང་ཐུགས་ཀྱི་རྟེན་དགྲམ་པ། མཆོད་པ་གཡོ་མེད་ཅིང་བཀོད་པས་མཛེས་པར་བཤམ་པ། སྟན་བདེ་བ་ལ་བསམ་གཏན་གྱི་སྤྱོད་ལམ་གྱིས་འཁོད་ནས་སྐྱབས་འགྲོ་སེམས་སྐྱེད་རྒྱུད་དང་འདྲེས་ངེས་སུ་བྱ་བ། ཚོགས་ཞིང་གསལ་གདབ་པ། བསགས་སྦྱོང་གི་གནད་བསྡུས་པའི་ཡན་ལག་བདུན་པས་རྒྱུད་སྦྱོང་བ། དམིགས་པ་གསལ་བར་བྱས་ཤིང་མཎྜལ་ཕུལ་ཏེ་དོན་ཆེན་པོ་གསུམ་གྱིས་གསོལ་བ་གདབ་པའོ། །དེ་ལ་སྦྱོར་ཆོས་དང་པོ་གཉིས་ཁྲིད་ཡིག་དང་ཕྱག་བཞེས་ལས་ཇི་ལྟར་འབྱུང་བ་བཞིན་ཉམས་སུ་བསྟར་བའི་རྗེས། སྦྱོར་ཆོས་གསུམ་པ་ནི། བསམ་གཏན་དང་རྗེས་སུ་མཐུན་པའི་གདན་ལ་ལུས་གནད་སྐྱིལ་ཀྲུང་དྲང་བོར་བསྲང༌། །ངག་གནད་རླུང་ཕྱི་ནང་དུ་རང་བཞིན་གྱིས་རྒྱུ་བ་ཉེར་གཅིག་གི་བར་དུ་མ་འཁྲུལ་བར་བགྲང་ལ་ཡིད་གཏད་དེ་རླུང་ཆོམ་ལ་ཕབ། ཁྱད་པར་སེམས་ཀྱི་གནད་མི་དགེ་བ་དང་ལུང་མ་བསྟན་དུ་མ་སོང་བར་ངེས་འབྱུང་དང༌། བྱང་
ཆུབ་ཀྱི་སེམས་སྒོ་དུ་མ་ནས་ཡིད་ལ་བྱས་ཏེ་དགེ་སེམས་ཁྱད་པར་ཅན་གྱི་ངང༌། སྐྱབས་ཡུལ་གསལ་བཏབ་ལ་སྐྱབས་སུ་འགྲོ་བ་ནི། བདག་དང་འགྲོ་བ་ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད་དུས་འདི་ནས་བཟུང་སྟེ་བྱང་ཆུབ་སྙིང་བོ་ལ་མཆིས་ཀྱི་བར་དུ་དཔལ་ལྡན་བླ་མ་དམ་པ་རྣམས་ལ་སྐྱབས་སུ་མཆིའོ། །སངས་རྒྱས་བཅོམ་ལྡན་འདས་རྣམས་ལ་སྐྱབས་སུ་མཆིའོ། །དམ་པའི་ཆོས་རྣམས་ལ་སྐྱབས་སུ་མཆིའོ། །འཕགས་པའི་དགེ་འདུན་རྣམས་ལ་སྐྱབས་སུ་མཆིའོ། །ཞེས་ཅི་ནུས་ཀྱི་མཐར་ཐལ་མོ་སྦྱར་ཏེ། བླ་མ་དང་དཀོན་མཆོག་རིན་པོ་ཆེ་རྣམ་པ་གསུམ་ལ་སྐྱབས་སུ་མཆིའོ། །ཁྱེད་རྣམས་ཀྱིས་བདག་རྒྱུད་བྱིན་གྱིས་བརླབ་ཏུ་གསོལ། ཁྱད་པར་དུ་ཡང་སྐྱེས་བུ་གསུམ་གྱི་ལམ་གྱི་རིམ་པ་མྱུར་དུ་རྒྱུད་ལ་སྐྱེ་བར་བྱིན་གྱིས་བརླབ་ཏུ་གསོལ། ཞེས་བདུན་དང་ཉེར་གཅིག་སོགས་དད་མོས་ཤུགས་དྲག་པོས་གསོལ་བ་གདབ། སེམས་བསྐྱེད་པ་ནི། བདག་གིས་སེམས་ཅན་ཐམས་ཅད་ཀྱི་དོན་དུ་རྫོགས་པའི་སངས་རྒྱས་ཀྱི་གོ་འཕང་ཐོབ་པར་བྱ། དེའི་ཆེད་དུ་སྐྱེས་བུ་གསུམ་གྱི་ལམ་གྱི་རིམ་པ་ཉམས་སུ་བླང་བར་བགྱིའོ། །ཞེས་པའི་དོན་ཡིད་ལ་དྲན་བཞིན་པའི་ངང་ནས་ཚིག་ངག་ཏུ་ལན་གསུམ་མམ་བདུན་གང་ཡང་རུང་བ་བརྗོད་དོ། །བསྡུ་ན། །སངས་རྒྱས་ཆོས་དང་ཚོགས་ཀྱི་མཆོག་རྣམས་ལ། །
བྱང་ཆུབ་བར་དུ་བདག་ནི་སྐྱབས་སུ་མཆི། །བདག་གིས་སྦྱིན་སོགས་བགྱིས་པའི་བསོད་ནམས་ཀྱིས། །འགྲོ་ལ་ཕན་ཕྱིར་སངས་རྒྱས་འགྲུབ་པར་ཤོག །ཅེས་སྐྱབས་སེམས་སྦྲག་མར་བགྱིས་ཀྱང་རུང་ངོ། །བཞི་པ་ནི། ཐོག་མར་གནས་ཁང་དང་མཆོད་པའི་ཡོ་བྱད་ལ་དམིགས་ཏེ་སྨན་བླ་དང་གནས་བརྟན་གྱི་ཆོ་ག་སོགས་ལས་འབྱུང་བ་ལྟར་བྱིན་རླབས་བཞི་སྐོར་རྒྱས་པར་བྱ་བའམ། དེ་ཙམ་མི་ནུས་ན། དཀོན་མཆོག་གསུམ་གྱི་བདེན་པ་དང༌། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་བྱིན་གྱིས་རླབས་དང༌། ཚོགས་གཉིས་ཡོངས་སུ་རྫོགས་པའི་མངའ་ཐང་ཆེན་པོ་དང༌། ཆོས་ཀྱི་དབྱིངས་རྣམ་པར་དག་ཅིང་བསམ་གྱིས་མི་ཁྱབ་པའི་སྟོབས་ཀྱིས་དེང་འདིར་ཁོར་ཡུག་གི་ས་གཞི་འདི་དག་བཅོམ་ལྡན་འོད་དཔག་མེད་ཀྱི་ཞིང་གི་བཀོད་པའི་ཡོན་ཏན་ཕུན་སུམ་ཚོགས་པའི་རྒྱན་ཐམས་ཅད་ཀྱིས་བརྒྱན་པ་མཛེས་ཤིང་ཡིད་དུ་འོང་བར་གྱུར་པའི་གཞིར། གཞལ་མེད་ཁང་རིན་པོ་ཆེ་སྣ་བདུན་མཆོག་ཏུ་འབར་བ་བཀོད་པ་ལེགས་པས་མཛེས་ཤིང་ལྷུན་སྟུག་པ་ཡངས་ཤིང་རྒྱ་ཆེ་བའི་དབུས་སུ། རིན་པོ་ཆེ་སྣ་ཚོགས་ལས་གྲུབ་པའི་ཁྲི་སེང་གེ་ཆེན་པོ་བརྒྱད་ཀྱིས་བཏེགས་པའི་སྟེང་དུ་པདྨ་དང་ཟླ་བའི་གདན། མཐའ་བསྐོར་ཀུན་ཏུ་སེང་ཁྲི་པད་ཟླའི་གདན་གྲངས་མེད་པ་དང༌། ཕྱི་ནང་ཀུན་ཏུའང་ཆ་རིགས་དང་འཚམས་པར་ལྷ་དང་མིའི་ཡོ་བྱད་དམ་པ་ཞལ་ཟས་དང༌། ན་བཟའ་དང༌། རོལ་མོ་ལ་སོགས་པ་ཕུལ་དུ་ཕྱིན་པ་སྣ་ཚོགས་པ་ཕུང་པོ་གསུམ་པའི་མདོ་དང༌། བཟང་བོ་སྤྱོད་པའི་སྨོན་ལམ་ལས་བྱུང་བའི་མཆོད་པའི་སྤྲིན་རྒྱ་མཚོ་ཐམས་ཅད་ཀྱིས་རྒྱས་པར་གང་ཞིང་རྒྱུན་བཀླུབས་པ་དང་ལྡན་པ་འབྱུང་བར་གྱུར་ཅིག །ཐམས་ཅད་དུ་ཡང་ས་གཞི་དག །གསེག་མ་ལ་སོགས་མེད་པ་དང༌། །ལག་མཐིལ་ལྟར་མཉམ་བཻཌཱུརྻའི། །རང་བཞིན་འཇམ་པོར་གནས་གྱུར་ཅིག །ཅེས་དང༌། ན་མོ་བྷ་ག་བ་ཏེ་བཛྲ་སཱ་ར་པྲ་མརྡྷ་ནེ། ཏ་ཐཱ་ག་ཏཱ་ཡ། ཨཱརྷ་ཏེ་ས་མྱ་ཀྶཾ་བུདྡྷཱ་ཡ་
ཏདྱ་ཐཱ། ཨོཾ་བཛྲེ་བཛྲེ། མ་ཧཱ་བཛྲེ། མ་ཧཱ་ཏེ་ཛོ་བཛྲོ། མ་ཧཱ་བིདྱཱ་བཛྲེ། མ་ཧཱ་བོ་དྷི་ཙིཏྟ་བཛྲེ། མ་ཧཱ་བོ་དྷི་ཙིཏྟ་མཎྜོ་པ་སཾ་ཀྲ་མ་ཎ་བཛྲེ། སརྦ་ཀརྨ་ཨཱ་བ་ར་ཎ་བི་ཤོ་དྷ་ན་བཛྲེ་སྭཱ་ཧཱ། ཞེས་མཆོད་པའི་སྤྲིན་གྱི་གཟུངས་ལན་གསུམ་དང༌། སླར་ཡང༌། དཀོན་མཆོག་གསུམ་གྱི་བདེན་པ་དང༌། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་བྱིན་གྱིས་རླབས་དང༌། ཚོགས་གཉིས་ཡོངས་སུ་རྫོགས་པའི་མངའ་ཐང་ཆེན་པོ་དང༌། ཆོས་ཀྱི་དབྱིངས་རྣམ་པར་དག་ཅིང་བསམ་གྱིས་མི་ཁྱབ་པའི་སྟོབས་ཀྱིས་དེ་བཞིན་དུ་གྱུར་ཅིག་ཅེས་བདེན་པའི་སྟོབས་བརྗོད། དེ་ནས་འདུན་པ་རྩེ་གཅིག་པས་སྤོས་བཏུལ་ཞིང་སྙན་པའི་དབྱངས་དང་བཅས་པས། །རྣམ་དག་ཆོས་ཀྱི་དབྱིངས་ལས་མ་གཡོས་ཀྱང༌། །ཐུགས་རྗེ་ཚད་མེད་འགྲོ་ལ་ཕྱོགས་བཅུར་གཟིགས། །རྒྱལ་བ་ཀུན་གྱི་ཕྲིན་ལས་རྒྱས་མཛད་པ། །དུས་གསུམ་བླ་མ་འཁོར་བཅས་འདིར་གཤེགས་ཤིང༌། །མ་ལུས་སེམས་ཅན་ཀུན་གྱི་མགོན་གྱུར་ཅིང༌། །བདུད་སྡེ་དཔུང་བཅས་མི་བཟད་འཇོམས་མཛད་ལྷ། །དངོས་རྣམས་མ་ལུས་ཇི་བཞིན་མཁྱེན་གྱུར་པའི། །བཅོམ་ལྡན་འཁོར་བཅས་གནས་འདིར་གཤེགས་སུ་གསོལ། །བཅོམ་ལྡན་བསྐལ་པ་གྲངས་མེད་དུ་མ་རུ། །འགྲོ་ལ་བརྩེ་ཕྱིར་ཐུགས་རྗེ་རྣམ་སྦྱངས་ཤིང༌། །སྨོན་ལམ་རྒྱ་ཆེན་དགོངས་པ་ཡོངས་རྫོགས་པའི། །ཁྱེད་བཞེད་འགྲོ་དོན་མཛད་དུས་འདི་ལགས་ན། །དེ་ཕྱིར་ཆོས་དབྱིངས་ཕོ་བྲང་ལྷུན་གྲུབ་ནས། །རྫུ་འཕྲུལ་བྱིན་རླབས་སྣ་ཚོགས་སྟོན་མཛད་ཅིང༌། །མཐའ་ཡས་སེམས་ཅན་ཚོགས་རྣམས་བསྒྲལ་བའི་ཕྱིར། །ཡོངས་བདག་འཁོར་དང་བཅས་ཏེ་གཤེགས་སུ་གསོལ། །ཞེས་གསོལ་བ་བཏབ་པས། ཆོས་འདི་སྟོན་པའི་དྲིན་ཅན་རྩ་བའི་བླ་མ་དང་གཉིས་སུ་མེད་པའི་སྟོན་པ་མཉམ་མེད་ཤཱཀྱའི་རྒྱལ་པོ་ལ་རྒྱ་ཆེན་སྤྱོད་བརྒྱུད་དང་ཟབ་མོ་
ལྟ་བརྒྱུད་ཀྱི་བླ་མ་རྣམས་ཀྱིས་བསྐོར་བ། དེའི་མཐར་ཐེག་པ་གསུམ་གྱི་སློབ་པ་དང་མི་སློབ་པའི་དགེ་འདུན་སྤྲིན་གྱི་ཕུང་པོ་འཁྲིགས་པ་ལྟ་བུས་བསྐོར་ཏེ་མ་ག་དྷཱ་བཟང་མོའི་གཏམ་རྒྱུད་ལས་ཇི་ལྟར་འབྱུང་བ་བཞིན་བྱོན་ནས་སྟན་བཤམ་པ་རྣམས་ལ་བཞུགས་པར་མོས། ཁྲུས་ཁང་བསྐྱེད་པ་ནི། །ཁྲུས་ཀྱི་ཁང་བ་ཤིན་ཏུ་དྲི་ཞིམ་པ། །ཤེལ་གྱི་ས་གཞི་གསལ་ཞིང་འཚེར་བ་བསྟར། །རིན་ཆེན་འབར་བའི་ཀ་བ་ཡིད་འོང་ལྡན། །མུ་ཏིག་འོད་ཆགས་བླ་རེ་བྲེས་པ་དེར། །ཁྲུས་གསོལ་པ་ནི། ཇི་ལྟར་བལྟམས་པ་ཙམ་གྱིས་ནི། ལྷ་རྣམས་ཀྱིས་ནི་ཁྲུས་གསོལ་ལྟར། །ལྷ་ཡི་ཆུ་ནི་དག་པ་ཡིས། །དེ་བཞིན་བདག་གིས་སྐུ་ཁྲུས་གསོལ། །རྒྱལ་བའི་སྐུ་གསུང་ཐུགས་ལ་ཉོན་མོངས་མི་མངའ་ཡང༌། །སེམས་ཅན་ལུས་ངག་ཡིད་གསུམ་སྒྲིབ་པ་སྦྱོང་སླད་དུ། །རྒྱལ་བའི་སྐུ་གསུང་ཐུགས་ལ་ཁྲུས་ཆབ་འདི་གསོལ་བས། །སེམས་ཅན་ལུས་ངག་ཡིད་གསུམ་སྒྲིབ་པ་དག་གྱུར་ཅིག །ཅེས་དང༌། སྤྲོ་ན། འདི་ནི་སྦྱིན་པའི་རང་བཞིན་ཆུ། །སེར་སྣའི་དྲི་མ་སྦྱོང་མཛད་པ། །གཏོང་བ་དྲི་ཡིས་ལེགས་བསྒོས་ཆུ། །ཁྲུས་ལེགས་མཛད་ལ་སྐུ་ཁྲུས་གསོལ། ཞེས་སོགས་པར་ཕྱིན་དྲུག་གི་ཚིག་བཅད་ཀྱང་བརྗོད། སྐུ་ཕྱི་བ་ནི། དེ་དག་སྐུ་ལ་མཚུངས་པ་མེད་པའི་གོས། །གཙང་ལ་དྲི་རབ་བགོས་པས་སྐུ་ཕྱིའོ། །བྱུགས་པ་འབུལ་བ་ནི། །སྟོང་གསུམ་ཀུན་ཏུ་དྲི་ངད་ལྡང་བ་ཡི། །དྲི་མཆོག་རྣམས་ཀྱིས་ཐུབ་དབང་རྣམས་ཀྱི་སྐུ། །གསེར་སྦྱངས་བཙོ་མ་བྱི་དོར་བྱས་པ་ལྟར། །འོད་ཆགས་འབར་བ་དེ་དག་བྱུགས་པར་བགྱི། །ན་བཟའ་འབུལ་བ་ནི། །སྲབ་འཇམ་ཡང་བ་ལྷ་ཡི་གོས། །མི་བསྐྱོད་རྡོ་རྗེའི་སྐུ་བརྙེས་ལ། །མི་ཕྱེད་དད་པས་བདག་འབུལ་ན། །བདག་ཀྱང་རྡོ་རྗེའི་སྐུ་ཐོབ་ཤོག། ཅེས་བརྗོད། འདི་རྣམས་ལམ་ཁྲིད་འཇམ་དཔལ་ཞལ་ལུང་གི་ཚིག་ཟིན་དངོས་བསྟན་ལྟར་བྲིས་པ་ཡིན་ལ། ན་བཟའ་དང་རྒྱན་
འབུལ་བ། །དེ་ནས་དེ་ལ་ཁ་དོག་ལེགས་སྒྱུར་བའི། ཞེས་སོགས་སྤྱོད་འཇུག་ལྟར་བགྱིས་པས་ཀྱང་རུང་བས་མཚོན་རྒྱས་བསྡུས་སྐབས་དང་སྦྱར་བར་བྱའོ། །དེ་ནས། །བདག་དང་འགྲོ་ལ་ཐུགས་བརྩེའི་ཕྱིར། །ཉིད་ཀྱི་རྫུ་འཕྲུལ་མཐུ་ཡིས་ནི། །ཇི་སྲིད་མཆོད་པ་བདག་བགྱིད་ན། །དེ་སྲིད་བཅོམ་ལྡན་བཞུགས་སུ་གསོལ། ཞེས་བརྗོད་པས་ཚོགས་ཀྱི་ཞིང་དུ་དགྱེས་བཞིན་པས་བརྟན་པར་བཞུགས་པར་བསམ་མོ། །ལྔ་པ་ནི། དེ་ནས་བསགས་སྦྱོང་གི་གནད་བསྡུས་པའི་ཡན་ལག་བདུན་པའི་ཐོག་མར་ཕྱག་འཚལ་བ་ནི། སྐྱབས་ཡུལ་གྱི་དམིགས་པ་རྣམས་མ་དོར་བའི་ངང་ནས་ལངས་ལ་དངོས་སུ་ཕྱག་འཚལ་བ་དང་བཅས་ཏེ། །འདྲེན་པ་མཉམ་མེད་སྟོན་པ་བཅོམ་ལྡན་འདས། །རྒྱལ་ཚབ་དམ་པ་རྗེ་བཙུན་མི་ཕམ་མགོན། རྒྱལ་བས་ལུང་བསྟན་འཕགས་པ་ཐོགས་མེད་ཞབས། །སངས་རྒྱས་བྱང་སེམས་གསུམ་ལ་ཕྱག་འཚལ་ལོ། །ཞེས་སོགས་འོག་ནས་འབྱུང་བའི་གསོལ་འདེབས་ཉིད་ཕྱག་འཚལ་དུ་བསྒྱུར་བ་དང༌། ཇི་སྙེད་སུ་དག་སོགས་ནས། །བདག་གིས་བསྟོད་ཅེས་པའི་བར་བྱ། མཆོད་པའི་སྐབས་འདིར་ཐོག་མར་མཎྜལ་འབུལ་བར་གསུང་ནའང༌། ལམ་རིམ་ཆེན་པོར་ས་བཅད་ལོགས་སུ་མཛད་པ་ལྟར་འོག་ཏུ་གསལ། ཉེར་སྤྱོད་འབུལ་བ་ནི་ཐལ་མོ་སྦྱར་ཏེ། མཆོད་ཡོན་ཕལ་ཆེར་མཆོད་ཡོན་བླ་བྲེ་དང༌། །མཆོད་ཡོན་བཀོད་པའི་འོད་ཟེར་རབ་བཀྱེ་སྟེ། །མཆོད་ཡོན་སྣ་ཚོགས་ཀུན་ཏུ་བཀྲམ་བྱས་ནས། །བདག་ཉིད་ཆེན་པོ་རྒྱལ་བ་སྲས་བཅས་མཆོད། དེ་བཞིན་དུ། ཞབས་བསིལ། མེ་ཏོག། བདུག་སྤོས། མར་མེ། དྲི་མཆོག །ཞལ་ཟས། སིལ་སྙན་ཞེས་སྦྱར་བ་དང༌། འདོད་ཡོན་ལྔ་དང༌། རྒྱལ་སྲིད་སྣ་བདུན་སོགས་ཀྱང་འབུལ་བར་གསུངས་པས། སྤྲོ་ན་ཚིགས་བཅད་རྒྱས་པ་གཞན་ཇི་ལྟར་འོས་པ་དང༌། བསྡུ་ན། ཕྱོགས་
དུས་ཀུན་ན་གཟུགས་སྒྲ་དྲི་རོ་དང༌། །རེག་བྱའི་ཁྱད་པར་ཕུན་སུམ་ཚོགས་པ་རྣམས། །མོས་བློས་རྒྱལ་བ་སྲས་བཅས་ལ་འབུལ་ན། །བཞེས་ཤིག་བླ་མེད་གྲུབ་མཆོག་སྩལ་དུ་གསོལ། །མི་དབང་རིན་ཆེན་སྣ་བདུན་འདི་དག་ནི། སངས་རྒྱས་སྲས་དང་བཅས་པ་མ་ལུས་ལ། །བཤམས་ཤིང་ཡིད་ཀྱིས་སྤྲུལ་ཏེ་ཕུལ་བ་ཡིས། །འགྲོ་བ་མི་ཟད་གཏེར་ལ་སྤྱོད་པར་ཤོག །ལྷ་ཡི་དབང་པོ་ལྷ་མིན་གཡུལ་རྒྱལ་ནས། བཀྲ་ཤིས་ལྷ་མོ་བརྒྱད་ཀྱིས་མཆོད་པ་ལྟར། །རྒྱལ་བ་རྣམས་དང་རྒྱལ་བའི་སྲས་རྣམས་ལ། །བཀྲ་ཤིས་རྫས་བརྒྱད་དག་གིས་མཆོད་པར་བགྱི། ཞེས་ཕུལ། གཞན་ཡང་སྤྱོད་འཇུག་ལས་འབྱུང་བའི་མཆོད་ཕྲེང་སོགས་ཇི་ལྟར་འོས་པ་སྦྱར། བསྡུ་ན། མེ་ཏོག་དམ་པ་ནས། ཕྱག་འཚལ་མཆོད་པར་བགྱི། ཞེས་པའི་བར་གྱིས་འཐུས། དེ་ནས་ཡན་ལག་ལྷག་མ་རྣམས་ནི། འདོད་ཆགས་ཞེ་སྡང་གཏི་མུག་དབང་གིས་ནི། །ཞེས་སོགས་ནས། བྱང་ཆུབ་ཕྱིར་བསྔོའོ་ཞེས་པའི་བར་བཟང་སྤྱོད་ནས་འབྱུང་བ་ལྟར་བྱའོ། །དྲུག་པ་ནི། མཎྜལ་གྱི་གཞི་དང༌། ཚོམ་བུ་དགོད་པའི་འབྲུ། དྲི་བཟང་གི་ཆུ་སོགས་སྟ་གོན་བྱས་ལ། ཐོག་མར་མཎྜལ་ལེགས་པར་ཕྱི་ཞིང་དྲི་བཟང་གི་ཆུས་བརླན། དེ་ནས་ལུས་ཀྱི་ལས་སུ་ཚོམ་བུ་དགོད་པ། ངག་གི་ལས་སུ་ཚིག་བརྗོད་པ། ཡིད་ཀྱི་ལས་སུ་དམིགས་རྣམ་ཡིད་ལ་བྱ་བ་སྟེ་སྒོ་གསུམ་འཇུག་པ་གཅིག་པས་མཎྜལ་ཚོམ་བུ་སོ་བདུན་མའམ། ཉེར་གསུམ་མོ། །བདུན་མ་སོགས་ཅི་རིགས་པ་མ་ཚང་བ་མེད་པ་འདི་ཉིད་ཅེས་པའི་བར་སྤྱི་ལྟར་ལ། བླ་མ་དང་དཀོན་མཆོག་རིན་པོ་ཆེ་རྣམ་པ་གསུམ་ལ་འབུལ་བར་བགྱིའོ། །ཐུགས་རྗེས་འགྲོ་བའི་དོན་དུ་བཞེས་སུ་གསོལ། །བཞེས་ནས་བྱིན་གྱིས་བརླབ་ཏུ་གསོལ་ཞེས་པ་ཙམ་མམ། སྤྲོ་ན། བཞེས་ནས་བདག་གི་རྒྱུད་ཀྱི་ཐེག་པ་ཆེན་པོའི་ལམ་སྒྲུབ་པ་དང་འགལ་བའི་
ཕྱིན་ཅི་ལོག་གི་བློ་སྣ་མཐའ་དག་མྱུར་དུ་འགག་པར་བྱིན་གྱིས་བརླབ་ཏུ་གསོལ། །བྱང་ཆུབ་ཀྱི་སེམས་རིན་པོ་ཆེ་རྣམ་པ་གཉིས་སོགས་རྟོགས་པའི་ཡོན་ཏན་ཁྱད་པར་ཅན་མྱུར་དུ་སྐྱེ་བར་བྱིན་གྱིས་བརླབ་ཏུ་གསོལ། ཕྱི་ནང་གི་བར་དུ་གཅོད་པ་ཐམས་ཅད་ཉེ་བར་ཞི་བར་བྱིན་གྱིས་བརླབ་ཏུ་གསོལ། ཅེས་དོན་ཆེན་པོ་གསུམ་གྱི་སྒོ་ནས་གསོལ་བ་གདབ། དེ་ནས་སླར་ཡང་མོས་གུས་གདུང་ཤུགས་དྲག་ཏུ་བསྐྱེད་ལ་ལམ་འདིའི་བླ་མ་བརྒྱུད་པ་ལ་གསོལ་བ་འདེབས་པར་བྱ་སྟེ། །ཐོག་མར་རྒྱ་ཆེན་སྤྱོད་པའི་བརྒྱུད་པ་ལ་གསོལ་བ་འདེབས་པ་ནི། །འདྲེན་པ་མཉམ་མེད་སྟོན་པ་བཅོམ་ལྡན་འདས། །རྒྱལ་ཚབ་དམ་པ་རྗེ་བཙུན་མི་ཕམ་མགོན། །རྒྱལ་བས་ལུང་བསྟན་འཕགས་པ་ཐོགས་མེད་ཞབས། །སངས་རྒྱས་བྱང་སེམས་གསུམ་ལ་གསོལ་བ་འདེབས། །འཛམ་གླིང་མཁས་པའི་གཙུག་རྒྱན་དབྱིག་གི་གཉེན། །དབུ་མའི་ལམ་བརྙེས་འཕགས་པ་རྣམ་གྲོལ་སྡེ། །དད་པའི་སར་གནས་བཙུན་པ་རྣམ་གྲོལ་སྡེ། །འཇིག་རྟེན་མིག་འབྱེད་གསུམ་ལ་གསོལ་བ་འདེབས། །རྨད་བྱུང་ངོ་མཚར་གནས་གྱུར་མཆོག་གི་སྡེ། །ཟབ་མོའི་ལམ་གྱིས་རྒྱུད་སྦྱངས་དུལ་བའི་སྡེ། །རླབས་ཆེན་སྤྱོད་པའི་གཏེར་གྱུར་རྣམ་སྣང་མཛད། །འགྲོ་བའི་རྩ་ལག་གསུམ་ལ༴། །ལམ་མཆོག་ཤེར་ཕྱིན་རྒྱས་མཛད་སེང་བཟང་ཞབས། །རྒྱལ་བའི་མན་ངག་ཀུན་འཛིན་ཀུ་སཱ་ལི། །འགྲོ་ཀུན་བརྩེ་བས་རྗེས་འཛིན་དགེ་བ་ཅན། །འགྲོ་བའི་དེད་དཔོན་གསུམ་ལ༴། །བྱང་ཆུབ་ཐུགས་ལ་མངའ་བརྙེས་གསེར་གླིང་པ། །ཤིང་རྟ་ཆེན་པོའི་སྲོལ་འཛིན་མར་མེ་མཛད། །ལམ་བཟང་གསལ་མཛད་སྟོན་པ་རིན་པོ་ཆེ། །བསྟན་པའི་སྲོག་ཤིང་གསུམ་ལ༴༌།རྣལ་འབྱོར་དབང་ཕྱུག་དཔལ་ལྡན་དགོན་པ་བ། །ཟབ་མོའི་ཏིང་འཛིན་བརྟན་པའི་སྣེ་ཟུར་བ། །འདུལ་བའི་སྡེ་སྣོད་ཀུན་འཛིན་ཐག་མ་བ། །མཐའ་འཁོབ་སྒྲོན་
མེ་གསུམ་ལ། །བརྩོན་པས་སྒྲུབ་པ་ལྷུར་ལེན་ནམ་སེང་ཞབས། །དམ་པས་བྱིན་བརླབས་ནམ་མཁའ་རྒྱལ་པོ་དང༌། །འཇིག་རྟེན་ཆོས་བརྒྱད་སྤངས་པའི་སེང་གེ་བཟང༌། །རྒྱལ་སྲས་བཟང་པོའི་ཞབས་ལ༴༌། །བྱང་ཆུབ་ཐུགས་རྗེས་འགྲོ་ཀུན་བུ་བཞིན་གཟིགས། །ལྷག་པའི་ལྷ་ཡིས་རྗེས་བཟུང་བྱིན་གྱིས་བརླབས། །སྙིགས་དུས་འགྲོ་བ་འདྲེན་པའི་བཤེས་གཉེན་མཆོག །ནམ་མཁའ་རྒྱལ་མཚན་ཞབས་ལ༴། །དམིགས་མེད་བརྩེ་བའི་གཏེར་ཆེན་སྤྱན་རས་གཟིགས། །དྲི་མེད་མཁྱེན་པའི་དབང་པོ་འཇམ་པའི་དབྱངས། །གངས་ཅན་མཁས་པའི་གཙུག་རྒྱན་ཙོང་ཁ་པ། །བློ་བཟང་གྲགས་པའི་ཞབས་ལ༴། ༈ །མཁས་གྲུབ་ཆེན་པོ་ཤེས་རབ་སེང་གེའི་ཞབས། །ཐམས་ཅད་མཁྱེན་དངོས་དགེ་འདུན་གྲུབ་པ་དང༌། །སྐུ་གསུམ་གོ་འཕང་མངོན་གྱུར་ནོར་བུ་བཟང༌། །དཔལ་ལྡན་བླ་མ་གསུམ་ལ།༴ །དབྱངས་ཅན་བཞད་པ་དགེ་འདུན་རྒྱ་མཚོའི་སྡེ། །སྨྲ་བའི་ཉི་མ་དགེ་ལེགས་དཔལ་བཟང་པོ། །མཁས་གྲུབ་ལྷ་བཙུན་བསོད་ནམས་དཔལ་བཟང་སྟེ། །བཤེས་གཉེན་དམ་པ་གསུམ་ལ༴། །ཕྱག་ན་པདྨ་བསོད་ནམས་རྒྱ་མཚོའི་ཞབས། །ཟབ་དོན་གདམས་པའི་བཀའ་བབས་ཆོས་དཔལ་བཟང༌། །རིགས་ཀུན་བདག་པོ་དཔལ་འབྱོར་ལྷུན་གྲུབ་ཞབས། །མཁས་གྲུབ་ཆེན་པོ་གསུམ་ལ༴། །བཀའ་དྲིན་མཉམ་མེད་ཤྲཱི་བྷཱུ་ཏིའི་མཚན། །ངག་གི་དབང་ཕྱུག་བློ་བཟང་རྒྱ་མཚོའི་སྡེ། །འཇམ་དཔལ་དབྱངས་དངོས་ངག་དབང་དཔལ་བཟང་པོ། །རྣམ་འདྲེན་དམ་པ་གསུམ་ལ༴། །བཤེས་གཉེན་དམ་པ་བྱམས་པ་ཆོས་ལྡན་དང༌། །རྩ་བའི་བླ་མ་དགེ་ལེགས་རྒྱ་མཚོའི་སྡེ། །བསྟན་པའི་སྲོག་ཤིང་ངག་དབང་བྱམས་པའི་དཔལ། །སྙིགས་དུས་འགྲོ་འདྲེན་གསུམ་ལ༴། །མཁས་བཙུན་གྲུབ་བརྙེས་བྱམས་པ་སྨོན་ལམ་དང༌། །ཡེ་ཤེས་མཆོག་གཟིགས་བསྟན་པ་རབ་རྒྱས་ཞབས། །སྨྲ་བའི་དབང་ཕྱུག་ངག་
དབང་ཆོས་འཕེལ་ཏེ། །ལུང་རྟོགས་མཛོད་འཛིན་གསུམ་ལ༴། །བྱམས་པའི་དཔལ་མངའ་དམིགས་མེད་ཐུགས་རྗེའི་གཏེར། །མཁྱེན་པས་ཆོས་ཀུན་དེ་ཉིད་རབ་ཏུ་གཟིགས། །ཕུན་ཚོགས་སྐུ་བཞིའི་བདག་ཉིད་བླ་མ་ལྷས། །རྗེས་བཟུང་བཤེས་གཉེན་དམ་པར་གསོལ་བ་འདེབས། །རབ་འབྱམས་གསུང་རབ་ཀུན་ལ་བལྟ་བའི་མིག །སྐལ་བཟང་ཐར་བར་བགྲོད་པའི་འཇུག་ངོགས་མཆོག །བརྩེ་བས་བསྐྱོད་པའི་ཐབས་མཁས་མཛད་པ་ཡིས། །གསལ་མཛད་བཤེས་གཉེན་རྣམས་ལ་གསོལ་བ་འདེབས། ཞེས་དང༌། ཟབ་མོ་ལྷ་བའི་བརྒྱུད་པའི་གསོལ་འདེབས་ནི། །སྨྲ་བ་ཟླ་མེད་འདྲེན་མཆོག་ཤཱཀྱའི་ཏོག །རྒྱལ་བའི་མཁྱེན་རབ་ཀུན་བསྡུས་འཇམ་པའི་དབྱངས། །ཟབ་མོའི་དོན་གཟིགས་འཕགས་མཆོག་ཀླུ་སྒྲུབ་ཞབས། །སྨྲ་བའི་གཙུག་རྒྱན་གསུམ་ལ་གསོལ་བ་འདེབས། །འཕགས་པའི་དགོངས་པ་གསལ་མཛད་ཟླ་བ་གྲགས། །དེ་སྲས་ཐུ་བོ་རིག་པའི་ཁུ་བྱུག་དང༌། རྒྱལ་སྲས་རིག་པའི་ཁུ་བྱུག་གཉིས་པའི་ཞབས། །རིག་པའི་དབང་ཕྱུག་གསུམ་ལ༴། །རྟེན་འབྲེལ་ཟབ་མོ་ཇི་བཞིན་གཟིགས་པ་ཡི། །ཤིང་རྟ་ཆེན་པོའི་སྲོལ་འཛིན་མར་མེ་མཛད། །ལམ་བཟང་གསལ་མཛད་སྟོན་པ་རིན་པོ་ཆེ། །འཛམ་གླིང་རྒྱན་གྱུར་གཉིས་ལ༴། །རྒྱལ་བའི་གདུང་འཚོབ་བཤེས་གཉེན་པོ་ཏོ་བ། །རྣམ་དཔྱོད་འགྲན་ཟླ་བྲལ་བའི་ཤ་ར་བ། །བྱང་ཆུབ་ཐུགས་ཀྱི་བཀའ་བབས་འཆད་ཁ་བ། །འགྲོ་བའི་རེ་སྐོང་གསུམ་ལ༴། །ལུང་རྟོགས་མངའ་བདག་བྱང་སེམས་སྤྱིལ་བུ་བ། །དྲི་མེད་ལུང་གི་དབང་ཕྱུག་མཁས་པའི་གཙོ། །ཁམས་གསུམ་འགྲོ་བའི་མགོན་པོ་རིན་པོ་ཆེ། །གནས་བརྟན་ཆེན་པོ་གསུམ་ལ༴། །རྣམ་དག་ཚུལ་ཁྲིམས་ངད་ལྗང་ཟངས་ཆེན་པ། །འདུལ་བ་འབུམ་སྡེའི་མངའ་བདག་མཚོ་སྣ་པ། །ཆོས་མངོན་རྒྱ་མཚོའི་མཐར་སོན་མོན་གྲབ་པ། །འགྲོ་བའི་
འདྲེན་པ་གསུམ་ལ། །ཟབ་ཅིང་རྒྱ་ཆེའི་ཆོས་ལ་མངའ་བརྙེས་པས། །སྐལ་ལྡན་འགྲོ་བ་ཀུན་གྱི་སྐྱབས་སུ་གྱུར། །ཕྲིན་ལས་བཟང་པོས་བསྟན་པ་རྒྱས་མཛད་པ། །རྗེ་བཙུན་བླ་མའི་ཞབས་ལ༴། །བློ་གྲོས་ཁང་བཟང་བསླབ་གསུམ་ནོར་གྱིས་ཕྱུག །བཟང་པོའི་ཕྲིན་ལས་གདུལ་བྱའི་དཔལ་དུ་ཤར། །གྲགས་པའི་འོད་ཟེར་འཛམ་གླིང་ཕྱོགས་བཅུར་འཕྲོ། །བློ་བཟང་གྲགས་པའི་ཞབས་ལ༴། །མཁས་གྲུབ་ཆེན་པོ་ཤེས་རབ་སེང་གེའི་ཞབས། ཞེས་སོགས་མན་གོང་ལྟར་རོ། །དེ་ཡོད་འདིའི་རིག་པའི་ཁུ་བྱུག་གཉིས་པ་ཡན་ཆད་ནི་ཟབ་མོ་ལྟ་བའི་སྒོས་བརྒྱུད་དངོས་ཡིན་ལ། དེ་མན་ཆད་བརྒྱུད་སྲོལ་གཉིས་ཀ་ཆུ་བོ་གཅིག་འདྲེས་སུ་གྱུར་པས་བརྒྱུད་པ་ཐ་དད་མེད་མོད། འོན་ཀྱང་རྗེ་རིན་པོ་ཆེས་ལམ་རིམ་ཆེན་མོར། རྗེ་བཙུན་དམ་པ་ནམ་མཁའི་མཚན་ཅན་ལས་དགོན་པ་བ་ནས་སྣེའུ་ཟུར་པ་ལ་བརྒྱུད་པ་དང༌། སྤྱན་སྔ་བ་ནས་བརྒྱུད་པའི་ལམ་གྱི་རིམ་པ་ཐོས་ཤིང༌། རྗེ་བཙུན་དམ་པ་བཟང་པོའི་མཐའ་ཅན་ལས། པོ་ཏོ་བ་ནས་ཤ་ར་བ་ལ་བརྒྱུད་པ་དང༌། པོ་ཏོ་བ་ནས་དོལ་པ་ལ་བརྒྱུད་པའི་ལམ་གྱི་རིམ་པ་ཐོབ་ཅེས་གསུངས་པ་ལྟར། བྲ་གོར་མཁན་ཆེན་ཆོས་སྐྱབས་བཟང་བོ་ལས་གསན་པའི་བརྒྱུད་པའི་ཁྱད་པར་རོ། །ཡང་ན་སྟོན་པ་རིན་པོ་ཆེའི་རྗེས་སུ། །གྲུབ་པའི་དབང་ཕྱུག་ཆེན་པོ་ཚུལ་ཁྲིམས་འབར། །བཤེས་གཉེན་ཚུལ་བཞིན་བསྟེན་མཛད་གཞོན་ནུ་འོད། །ཐེག་མཆོག་ལམ་གྱིས་རྒྱུད་སྦྱོང་སྒྱེར་སྒོམ་ཞབས། །རྒྱལ་བའི་སྲས་པོ་གསུམ་ལ། །རྨད་བྱུང་ཡོན་ཏན་མཛོད་འཛིན་སངས་རྒྱས་དབོན། །དམ་པས་བྱིན་བརླབས་ནམ་མཁའ་རྒྱལ་བོ་དང༌། ནམ་མཁའ་རྒྱལ་མཚན་ཞབས་ལ༴། །བློ་གྲོས་ཁང་བཟང་སོགས་གོང་བཞིན་ནོ། །དེ་ལྟར་རྩ་བརྒྱུད་ཀྱི་བླ་མ་རྣམས་ཀྱི་མཚན་ནས་སྨོས་ཏེ་དད་མོས་དྲག་པོས་གསོལ་བ་གདབ་པའི་མཐར་ལམ་གྱི་རིམ་པའི་མངོན་རྟོགས་རྒྱུད་ལ་སྐྱེ་བའི་
སླད་དུ་གསོལ་བ་འདེབས་པ་ནི། །ཡོན་ཏན་ཀུན་གྱི་གཞིར་གྱུར་དྲིན་ཅན་རྗེ། །ཚུལ་བཞིན་བསྟེན་པ་ལམ་གྱི་རྩ་བ་རུ། །ལེགས་པར་མཐོང་ནས་འབད་པ་དུ་མ་ཡིས། །གུས་པོ་ཆེན་པོས་བསྟེན་པར་བྱིན་གྱིས་རློབས། ལན་ཅིག་རྙེད་པའི་དལ་བའི་རྟེན་བཟང་འདི། །ཤིན་ཏུ་རྙེད་དཀའ་དོན་ཆེ་ཤེས་གྱུར་ནས། །ཉིན་མཚན་ཀུན་ཏུ་སྙིང་པོ་ལེན་པའི་བློ། །རྒྱུན་ཆད་མེད་པར་སྐྱེ་བར་བྱིན་གྱིས་རློབས། །ལུས་སྲོག་གཡོ་བ་ཆུ་ཡི་ཆུ་བུར་བཞིན། །མྱུར་དུ་འཇིག་པའི་འཆི་བ་དྲན་པ་དང༌། །ཤི་བའི་རྗེས་སུ་ལུས་དང་གྲིབ་མ་བཞིན། །དཀར་ནག་ལས་འབྲས་ཕྱི་བཞིན་འབྲང་བ་ལ། །ངེས་པ་བརྟན་པོ་རྙེད་ནས་ཉེས་པའི་ཚོགས། །ཕྲ་ཞིང་ཕྲ་བ་རྣམས་ཀྱང་སྤོང་བ་དང༌། །དགེ་ཚོགས་མཐའ་དག་སྒྲུབ་པར་བྱེད་པ་ལ། རྟག་ཏུ་བག་དང་ལྡན་པར་བྱིན་གྱིས་རློབས། །སྤྱོད་པས་མི་ངོམས་སྡུག་བསྔལ་ཀུན་གྱི་སྒོ། །ཡིད་བརྟན་མི་རུང་སྲིད་པའི་ཕུན་ཚོགས་ཀྱི། །ཉེས་དམིགས་རིག་ནས་ཐར་པའི་བདེ་བ་ལ། །དོན་གཉེར་ཆེན་པོ་སྐྱེ་བར༴། །རྣམ་དག་བསམ་པ་དེ་ཡིས་དྲངས་པ་ཡི། །དྲན་དང་ཤེས་བཞིན་བག་ཡོད་ཆེན་པོ་ཡིས། །བསྟན་པའི་རྩ་བ་སོ་སོ་ཐར་པ་ལ། །སྒྲུབ་པ་སྙིང་བོར་བྱེད་པར༴། །རང་ཉིད་སྲིད་མཚོར་ལྟུང་བ་ཇི་བཞིན་དུ། །མར་གྱུར་འགྲོ་བ་ཀུན་ཀྱང་དེ་འདྲ་བར། །མཐོང་ནས་འགྲོ་བ་སྒྲོལ་བའི་ཁུར་ཁྱེར་བའི། །བྱང་ཆུབ་སེམས་མཆོག་འབྱོངས་པར༴། །སེམས་ཙམ་བསྐྱེད་ཀྱང་ཚུལ་ཁྲིམས་རྣམ་གསུམ་ལ། །གོམས་པ་མེད་ན་བྱང་ཆུབ་མི་འགྲུབ་པ། །ལེགས་པར་མཐོང་ནས་རྒྱལ་སྲས་སྡོམ་པ་ལ། །བརྩོན་པ་དྲག་པོས་སློབ་པར༴། །ལོག་པའི་ཡུལ་ལ་གཡེང་བ་ཞི་བྱེད་ཅིང༌། །ཡང་དག་དོན་ལ་ཚུལ་བཞིན་དཔྱད་པ་ཡི། །ཞི་གནས་ལྷག་མཐོང་ཟུང་དུ་འབྲེལ་བའི་ལམ། །མྱུར་དུ་རྒྱུད་ལ་སྐྱེ་བར༴། །ཐུན་མོངས་ལམ་སྦྱངས་སྣོད་དུ་གྱུར་པ་ན། །ཐེག་པ་ཀུན་གྱི་མཆོག་གྱུར་རྡོ་རྗེའི་ཐེག །སྐལ་
བཟང་སྐྱེ་བོའི་འཇུག་ངོགས་དམ་པ་དེར། །བདེ་བླག་ཉིད་དུ་འཇུག་པར་བྱིན་གྱིས་རློབས། །དེ་ཚེ་དངོས་གྲུབ་རྣམ་གཉིས་འགྲུབ་པའི་གཞི། །རྣམ་དག་དམ་ཚིག་སྡོམ་པར་གསུངས་པ་ལ། །བཅོས་མ་མིན་པའི་ངེས་པ་རྙེད་གྱུར་ནས། །སྲོག་དང་བསྡོས་ཏེ་བསྲུང་པར༴། །དེ་ནས་རྒྱུད་སྡེའི་སྙིང་པོ་རིམ་གཉིས་ཀྱི། །གནད་རྣམས་ཇི་བཞིན་རྟོགས་ནས་བརྩོན་པ་ཡིས། །ཐུན་བཞིའི་རྣལ་འབྱོར་སྤྱོད་ལས་མི་གཡེལ་བར། །དམ་པའི་གསུང་བཞིན་སྒྲུབ་པར་བྱིན་གྱིས་རློབས། །དེ་ལྟར་ལམ་བཟང་སྟོན་པའི་བཤེས་གཉེན་དང༌། །ཚུལ་བཞིན་སྒྲུབ་པའི་གྲོགས་རྣམས་ཞབས་བརྟན་ཅིང༌། །ཕྱི་དང་ནང་གི་བར་དུ་གཅོད་པའི་ཚོགས། །ཉེ་བར་ཞི་བར་བྱིན་གྱིས་བརླབ་ཏུ་གསོལ། །སྐྱེ་བ་ཀུན་ཏུ་ཡང་དག་བླ་མ་དང༌། །འབྲལ་མེད་ཆོས་ཀྱི་དཔལ་ལ་ལོངས་སྤྱོད་ཅིང༌། །ས་དང་ལམ་གྱི་ཡོན་ཏན་རབ་རྫོགས་ནས། །རྡོ་རྗེ་འཆང་གི་གོ་འཕང་མྱུར་ཐོབ་ཤོག །ཅེས་པའི་ཚིག་དོན་ཡིད་ལ་དྲན་བཞིན་དུ་ཕུར་ཚུགས་སུ་གསོལ་བ་གདབ་བོ། །དེ་ནས་སྤྱིར་དོན་ཆེན་པོ་གསུམ་གྱི་སྒོ་ནས་གསོལ་བ་གདབ་ཚུལ་སྔར་ལྟར་ལ། བྱེ་བྲག་བཤེས་གཉེན་བསྟེན་ཚུལ་ཁོ་ན་བསྒོམ་པའི་སྐབས་ཀྱི་དབང་དུ་བྱས་ན་མཎྜལ་གྱི་གསོལ་འདེབས་དང༌། སྐབས་འདིར་ཡང༌། བདག་གི་རྒྱུད་ལ་ལམ་གྱི་རྩ་བ་བཤེས་གཉེན་བསྟེན་ཚུལ་གྱི་རྟོགས་པ་དང་འགལ་བའི་ཕྱིན་ཅི་ལོག་གི་བློ་སྣ་མཐའ་དག་མྱུར་དུ་འགག་པར་བྱིན་གྱིས་བརླབ་ཏུ་གསོལ། བཤེས་གཉེན་བསྟེན་ཚུལ་གྱི་རྟོགས་པ་ཁྱད་པར་ཅན་རྒྱུད་ལ་སྐྱེ་བར་བྱིན་གྱིས་བརླབ་ཏུ་གསོལ། ཕྱི་ནང་གི་བར་དུ་གཅོད་པ་ཐམས་ཅད་ཉེ་བར་ཞི་བར་བྱིན་གྱིས་བརླབ་ཏུ་གསོལ། ཞེས་ངག་ཏུ་བརྗོད་པའམ་ཡིད་ཀྱིས་བསམ་སྟེ་དམིགས་ཕུལ་བའི་གསོལ་འདེབས་བློ་སྣ་འགྱུར་ངེས་པ་བྱ། མཐར་ཚོགས་ཞིང་རྣམས་ཀྱི་སྐུ་ལས་བདུད་རྩི་སྣ་ལྔ་འོད་ཟེར་གྱི་རྒྱུན་དང་བཅས་པ་བྱུང༌། རང་གཞན་སེམས་ཅན་ཐམས་ཅད་ཀྱི་ལུས་སེམས་ལ་
ཞུགས་པས་ཚེ་འཁོར་བ་ཐོག་མ་མེད་པ་ནས་བསགས་པའི་སྡིག་སྒྲིབ་སྤྱི་དང༌། ཁྱད་པར་དངོས་གཞིའི་ལམ་གྱི་རྟོགས་པ་ཁྱད་པར་ཅན་སྐྱེ་བ་ལ་གེགས་བྱེད་ཀྱི་སྡིག་སྒྲིབ་ཐམས་ཅད་སྦྱངས། ལུས་དྭངས་གསལ་འོད་ཀྱི་རང་བཞིན་ཅན་དུ་གྱུར། །ཚེ་དང་བསོད་ནམས་ལུང་རྟོགས་ཀྱི་ཡོན་ཏན་ཐམས་ཅད་འཕེལ་ཞིང་རྒྱས། ཁྱད་པར་དུའང་དངོས་གཞིའི་ལམ་གྱི་རྟོགས་པ་རྩོལ་བ་མེད་པར་ངང་ངམ་ཤུགས་ཀྱི་སྐྱེ་བའི་རྟེན་འབྲེལ་བསྒྲིགས་ཤིང་བྱིན་གྱིས་བརླབས་པར་བསམ་མོ། །གཉིས་པ་དངོས་གཞི་ལ་གཉིས། ལམ་གྱི་རྩ་བ་བཤེས་གཉེན་བསྟེན་ཚུལ་དང༌། བསྟེན་ནས་བློ་ཇི་ལྟར་སྦྱང་བའི་ཚུལ་ལོ། །གཉིས་པ་ལ་གཉིས། དེ་ལ་རྟེན་ལ་སྙིང་བོ་བླང་བར་བསྐུལ་བ་དང༌། སྙིང་པོ་ཇི་ལྟར་ལེན་པའི་ཚུལ་ལོ། །དེའི་ཕྱི་མ་ལ་གསུམ། སྐྱེས་བུ་ཆུང་ངུ་དང་ཐུན་མོང་བའི་ལམ་གྱི་རིམ་པ་ལ་བློ་སྦྱོང་བ། སྐྱེས་བུ་ཆེན་པོའི་ལམ་གྱི་རིམ་པ་ལ་བློ་སྦྱོང་བ་སྟེ། དེ་ལྟ་བུའི་ཚུལ་རྣམས་ཁྲིད་ཡིག་ལས་ཇི་ལྟར་འབྱུང་བ་བཞིན་དཔྱད་སྒོམ་དང༌། འཇོག་སྒོམ་ཇི་ལྟར་རིགས་པས་ཉམས་སུ་བླངས་སྐབས་སུ་བླ་མ་དང་ལྷག་པའི་ལྷ་ལ་གསོལ་བ་བཏབ་ཅིང་བདུད་རྩི་འབེབས་སྦྱོང་གི་དམིགས་པའང་བྱ། དེ་ཡང་བཤེས་གཉེན་བསྟེན་པ་ནས་བྱང་ཆུབ་ཀྱི་སེམས་བསྒོམ་པའི་བར་རྣམས་དཔྱད་སྒོམ་གཙོ་ཆེ་བ་དང་ཞི་གནས་སོགས་འཇོག་སྒོམ་གཙོ་ཆེ་ཡང༌། དཔེར་ན་བཤེས་གཉེན་བསྟེན་པའི་ཆོས་སྐོར་ལྟ་བུའི་ཚེ་བླ་མའི་ཡོན་ཏན་བསམ་པ་སོགས་དཔྱད་སྒོམ་དང༌། དེའི་མཐར་རྟོག་པ་གཞན་རྣམས་བག་ལ་ཞ་སྟེ་དད་པ་རྩེ་གཅིག་ཏུ་གནས་པ་ནི་འཇོག་སྒོམ་དང༌། ཞི་གནས་སྒོམ་ཚུལ་གྱི་གནད་ལ་ཡང་ཡང་སེམས་པ་ནི་དཔྱད་སྒོམ་དང༌། རྩེ་གཅིག་ཏུ་གནས་པ་ནི་འཇོག་སྒོམ་ཡིན་པས་གནད་དེ་དག་གོ་བར་བྱས་ཏེ་སོ་སོའི་མྱོང་བ་མ་སྐྱེས་ཀྱི་བར་དུ་ཉམས་སུ་ལེན་པ་དང༌། རྒྱུན་དུའང་
ལམ་རིམ་བསྡུས་དོན་གྱི་ཚིགས་སུ་བཅད་པ་ལྟ་བུ་ངག་ཏུ་བརྗོད་ཅིང་དོན་ཡིད་ལ་བསམ་སྟེ་བཤར་སྒོམ་གྱི་ཚུལ་དུ་བསྐྱང་བས་ཀྱང་དལ་བའི་རྟེན་ལ་སྙིང་བོ་ལེན་པའི་ཐབས་མཁས་ལ་སྒོ་དུ་མ་ནས་བརྩོན་པར་བྱའོ། །གསུམ་པ་ནི། ཐུན་དེ་ལས་ལངས་པར་བརྩམ་པ་ན། སྤྲོ་ཞིང་ནུས་ན་སླར་ཡང་ཡན་ལག་བདུན་པ་མཎྜལ་དང་བཅས་པ་ཕུལ་ཞིང་གསོལ་བ་ཤུགས་དྲག་ཏུ་གདབ། གང་ལྟར་ཡང་ཚོགས་ཞིང་རྣམས་རྟེན་ཡོད་ན་རྟེན་དང་དབྱེར་མེད་དུ་བཞུགས་པར་བསམ། ཡང་ན་རང་བཞིན་གྱི་གནས་སུ་གཤེགས་པའམ་མི་དམིགས་པར་བསམ་པས་ཀྱང་རུང༌། ཐུན་གཅིག་ཏུ་ཉམས་ལེན་བྱས་པ་ལས་བྱུང་བའི་དགེ་བའི་རྩ་བས་མཚོན། དུས་གསུམ་དུ་བསགས་དང་བསགས་པར་གྱུར་བའི་དགེ་ཚོགས་ཐམས་ཅད་རང་གཞན་སེམས་ཅན་ཐམས་ཅད་རྣམ་པ་ཐམས་ཅད་མཁྱེན་པ་རྫོགས་པའི་སངས་རྒྱས་ཀྱི་གོ་འཕང་ཐོབ་པའི་རྒྱུ་ཁོ་ནར་བསྔོ་ཞིང༌། དེ་ལྟར་བསྔོས་པ་ལ་བརྟེན་ནས་ལམ་གྱི་རྩ་བ་བཤེས་གཉེན་བསྟེན་ཚུལ་གྱིས་མཚོན་ཏེ། དངོས་གཞིའི་ཉམས་ལེན་གྱིས་སྣ་དྲངས་ཏེ་སེམས་ཅན་ཐམས་ཅད་ཀྱི་རྒྱུད་ལ་བྱང་ཆུབ་ཀྱི་སེམས་རིན་པོ་ཆེ་རྣམ་པ་གཉིས་བཅོས་མ་མ་ཡིན་པར་སྐྱེས་པའི་མཐུས། རང་གཞན་ཐམས་ཅད་གནས་སྐབས་དང་མཐར་ཐུག་གི་ཕན་པ་དང་བདེ་བའི་དོན་ཐམས་ཅད་ཡིད་བཞིན་དུ་འགྲུབ་པར་ཤོག་ཅིག་སྙམ་དུ། བཟང་པོ་སྤྱོད་པ་ལ་སོགས་པའི་སྨོན་ལམ་རྒྱས་པའམ། དེ་ཙམ་མི་ནུས་ན། །འཇམ་དཔལ་དཔའ་བོས་ཇི་ལྟར་མཁྱེན་པ་དང༌། །ཀུན་ཏུ་བཟང་བོ་དེ་ཡང་དེ་བཞིན་ཏེ། །དེ་དག་ཀུན་གྱི་རྗེས་སུ་བདག་སློབ་ཅིང༌། །དགེ་བ་འདི་དག་ཐམས་ཅད་རབ་ཏུ་བསྔོ། །དུས་གསུམ་གཤེགས་པ་རྒྱལ་བ་ཐམས་ཅད་ཀྱིས། །བསྔོ་བ་གང་ལ་མཆོག་ཏུ་བསྔགས་པ་དེས། །བདག་གི་དགེ་བའི་རྩ་བ་འདི་ཀུན་ཀྱང༌། །བཟང་པོ་སྤྱོད་ཕྱིར་རབ་ཏུ་བསྔོ་བར་བགྱི། །ཞེས་བསྔོ་བ་དང༌།
དགེ་བ་འདི་ཡིས་སྐྱེ་བོ་ཀུན། །བསོད་ནམས་ཡེ་ཤེས་ཚོགས་རྫོགས་ཤིང༌། །བསོད་ནམས་ཡེ་ཤེས་ལས་བྱུང་བའི། །དམ་པ་གཉིས་སྐུ་ཐོབ་པར་ཤོག །བྱང་ཆུབ་སེམས་ནི་རིན་པོ་ཆེ། །མ་སྐྱེས་པ་རྣམས་སྐྱེས་གྱུར་ཅིག །སྐྱེས་པ་ཉམས་པ་མེད་པ་དང༌། །གོང་ནས་གོང་དུ་འཕེལ་བར་ཤོག །བྱང་ཆུབ་སེམས་དང་མི་འབྲལ་ཞིང༌། །བྱང་ཆུབ་སྤྱོད་ལ་གཞོལ་བ་དང༌། སངས་རྒྱས་རྣམས་ཀྱིས་ཡོངས་བཟུང་ཞིང༌། །བདུད་ཀྱི་ལས་རྣམས་སྤོང་བར་ཤོག །བྱང་ཆུབ་སེམས་དཔའ་རྣམས་ཀྱིས་ནི། །འགྲོ་དོན་ཐུགས་ལ་དགོངས་འགྲུབ་ཤོག །མགོན་པོ་ཡིས་ནི་གང་དགོས་པ། །སེམས་ཅན་རྣམས་ལ་དེ་འབྱོར་ཤོག །སེམས་ཅན་ཐམས་ཅད་བདེ་དང་ལྡན་གྱུར་ཅིག །ངན་འགྲོ་ཐམས་ཅད་རྟག་ཏུ་སྟོངས་པར་ཤོག །བྱང་ཆུབ་སེམས་དཔའ་གང་དག་སར་བཞུགས་པ། །དེ་དག་ཀུན་གྱི་སྨོན་ལམ་འགྲུབ་པར་ཤོག །ཅེས་དང༌། །དེར་ནི་རིང་དུ་འབད་ལས་ཚོགས་གཉིས་ནི། །མཁའ་ལྟར་ཡངས་པ་གང་ཞིག་བསགས་པ་དེས། །བློ་མིག་མ་རིག་གིས་ལྡོངས་འགྲོ་བ་ཀུན། །རྣམ་འདྲེན་རྒྱལ་བའི་དབང་པོར་བདག་གྱུར་ཅིག །དེར་མ་སོན་པའི་ཚེ་རབས་ཀུན་ཏུ་ཡང༌། །འཇམ་པའི་དབྱངས་ཀྱིས་བརྩེ་བས་རྗེས་བཟུང་སྟེ། །བསྟན་པའི་རིམ་པ་ཀུན་ཚང་ལམ་གྱི་མཆོག །རྙེད་ནས་སྒྲུབ་པས་རྒྱལ་རྣམས་མཉེས་བྱེད་ཤོག །རང་གིས་ཇི་བཞིན་རྟོགས་པའི་ལམ་གྱི་གནད། །ཤུགས་དྲག་བརྩེ་བས་དྲངས་པའི་ཐབས་མཁས་ཀྱིས། །འགྲོ་བའི་ཡིད་ཀྱི་མུན་པ་བསལ་བྱས་ནས། །རྒྱལ་བའི་བསྟན་པ་ཡུན་རིང་འཛིན་གྱུར་ཅིག །བསྟན་པ་རིན་ཆེན་མཆོག་གིས་མ་ཁྱབ་པའམ། །ཁྱབ་ཀྱང་ཉམས་པར་གྱུར་པའི་ཕྱོགས་དེར་ནི། །སྙིང་རྗེ་ཆེན་པོས་ཡིད་རབ་བསྐྱོད་པ་ཡིས། །ཕན་བདེའི་གཏེར་དེ་གསལ་བར་བྱེད་པར་ཤོག །
སྲས་བཅས་རྒྱལ་བའི་རྨད་བྱུང་ཕྲིན་ལས་ལམ། །ལེགས་གྲུབ་བྱང་ཆུབ་ལམ་གྱི་རིམ་པས་ཀྱང༌། །ཐར་འདོད་རྣམས་ཀྱི་ཡིད་ལ་དཔལ་སྟེར་ཞིང༌། །རྒྱལ་བའི་མཛད་པ་རིང་དུ་སྐྱོང་གྱུར་ཅིག །ལམ་བཟང་སྒྲུབ་པའི་མཐུན་རྐྱེན་སྒྲུབ་བྱེད་ཅིང༌། །འགལ་རྐྱེན་སེལ་བྱེད་མི་དང་མི་མིན་ཀྱང༌། །ཚེ་རབས་ཀུན་ཏུ་རྒྱལ་བས་བསྔགས་པ་ཡི། །རྣམ་དག་ལམ་དང་འབྲལ་བར་མ་གྱུར་ཅིག །གང་ཚེ་ཐེག་པ་མཆོག་ལ་ཆོས་སྤྱོད་བཅུས། །ཚུལ་བཞིན་སྒྲུབ་ལ་བརྩོན་པ་དེ་ཡི་ཚེ། མཐུ་ལྡན་རྣམས་ཀྱིས་རྟག་ཏུ་གྲོགས་བྱེད་ཅིང༌། །བཀྲ་ཤིས་རྒྱ་མཚོས་ཕྱོགས་ཀུན་ཁྱབ་གྱུར་ཅིག །ཅེས་འདུན་པ་རྩེ་གཅིག་པས་བརྗོད་ཅིང་སྤྱོད་ལམ་ལ་འཇུག་གོ། གཉིས་པ་ཐུན་མཚམས་སུ་ཇི་ལྟར་བྱ་བ་ནི། ཐུན་གྱི་དངོས་གཞིའི་སྐབས་སུ་གང་ཉམས་སུ་བླངས་པའི་ཉམས་མྱོང་གི་རྩི་དང་མ་བྲལ་བར་དྲན་པ་དང༌། ཤེས་བཞིན་དང༌། བག་ཡོད་པས་ཀུན་ནས་བསླངས་ཏེ་སྤྱོད་ལམ་ཐམས་ཅད་མི་དགེ་བ་དང༌། ལུང་མ་བསྟན་གྱི་དབང་དུ་མ་སོང་པར། དགེ་བའི་རྩ་བ་འབའ་ཞིག་གིས་དུས་འདའ་བར་བྱ་སྟེ། བཤེས་གཉེན་བསྟེན་ཚུལ་གྱི་སྐབས་ལ་མཚོན་ན། དེ་ཉིད་སྟོན་པའི་མདོ་དང་བསྟན་བཅོས་རྣམས་དང༌། ཁྱད་པར་ལམ་རིམ་ཆེ་ཆུང་གི་བཤེས་གཉེན་བསྟེན་ཚུལ་གྱི་སྐབས་རྣམས་ཡང་དང་ཡང་དུ་བལྟ་ཞིང་ཚིག་ཏུའང་བརྗོད་ལ་ངེས་ཤེས་བསྐྱེད། །ད་རེས་ཐེག་པ་ཆེན་པོའི་དགེ་བའི་བཤེས་གཉེན་འདི་ལྟ་བུ་རྙེད་པའི་སྐབས་སུ། ཐེ་ཚོམ་དང༌། མཉམ་འགྲོགས་དང༌། ལེ་ལོ་སོགས་ཀྱི་དབང་དུ་མ་སོང་བར་བསམ་སྦྱོར་གཉིས་ཀའི་སྒོ་ནས་ཚུལ་བཞིན་དུ་བསྟེན་པར་བགྱིའོ་སྙམ་པ་ཡིད་ལ་བསམ། ངག་ཏུ་བརྗོད། ལག་ལེན་ལ་ཐེབས་པར་བྱ་བས་མཚོན་ཏེ་ཤེས་པར་བྱའོ། །དེ་ལྟར་སྐྱེས་བུ་གསུམ་གྱི་ལམ་རིམ་ཇི་ལྟར་ཉམས་སུ་ལེན་
པའི་ཕྱག་བཞེས་ཀྱིས་བཅད་ལམ་རིམ་ཆེན་མོ་གཙོ་བོར་བཏོན། ངག་འདོན་ཕལ་ཆེར་འཇམ་དཔལ་ཞལ་ལུང་གི་དཀྱུས་བཞིན་དང༌། བླ་མ་དམ་པའི་ཞལ་ལུང་སྙིང་བོར་དྲིལ་བ་འདི་ཡང༌། འཛམ་གླིང་ན་ཡོངས་སུ་གྲགས་པའི་ཤིང་རྟ་ཆེན་པོ་རྣམས་དང་མཁྱེན་རྟོགས་དབྱེར་མི་ཕྱེད་པ་རྗེ་བཙུན་བླ་མ་ངག་གི་དབང་ཕྱུག་བྱམས་པ་ཕུན་ཚོགས་དཔལ་བཟང་པོའི་བཀའ་དྲིན་ལས། ལམ་འདིའི་འཁྲིད་རིམ་མདོ་ཙམ་ཐོས་པའི་སྐལ་པ་བཟང་པོ་ཅན་མཉྫུ་གྷོ་ཥས་བྲིས་པ་དགེ་ལེགས་ཀྱི་སྣང་བས་འཇིག་རྟེན་གསུམ་ན་ཕན་བདེའི་པདྨོ་དུས་རྟག་ཏུ་རྒྱས་པར་གྱུར་ཅིག །མངྒ་ལཾ། བྷ་བ་ཏུ།། །།
༄༅། །བྱང་ཆུབ་ལམ་གྱི་རིམ་པའི་འཁྲིད་གསེར་གྱི་ཡང་ཞུན་ཞེས་བྱ་བ་བཞུགས་སོ༎
བྱང་ཆུབ་ལམ་གྱི་རིམ་པའི་འཁྲིད་གསེར་གྱི་ཡང་ཞུན་ཞེས་བྱ་བ་བཞུགས་སོ། །
རྗེ་བཙུན་བླ་མ་སྐྱབས་གསུམ་ཀུན་འདུས་ཀྱི་བདག་ཉིད་ཆེན་པོ་གང་དེའི་ཞབས་ལ་གུས་པ་ཆེན་པོས་ཕྱག་འཚལ་ཞིང་སྐྱབས་སུ་མཆིའོ། །བྱིན་གྱིས་བརླབ་ཏུ་གསོལ། དེ་ལ་འདིར་དལ་འབྱོར་གྱི་རྟེན་ལ་སྙིང་བོ་ལེན་བར་འདོད་པའི་སྐྱེས་བུ་རྣམས་ཀྱིས་ཉམས་སུ་བླང་བར་བྱ་བ་ནི། རྒྱལ་བའི་གསུང་རབ་ཐམས་ཅད་ཀྱི་སྙིང་བོ། །དུས་གསུམ་འཕགས་པ་ཐམས་ཅད་ཀྱི་བགྲོད་པ་གཅིག་པའི་ལམ། ཤིང་རྟ་ཆེན་པོ་ཀླུ་སྒྲུབ་དང་ཐོགས་མེད་གཉིས་ཀྱི་ལམ་སྲོལ། རྣམ་པ་ཐམས་ཅད་མཁྱེན་པའི་སར་འགྲོ་བའི་སྐྱེ་བོ་མཆོག་གི་ཆོས་ལུགས། སྐྱེས་བུ་གསུམ་གྱིས་ཉམས་སུ་བླང་བྱའི་རིམ་པ་ཐམས་ཅད་མ་ཚང་བ་མེད་པ་བསྡུས་པ། བྱང་ཆུབ་ལམ་གྱི་རིམ་བཞེས་བྱ་བ་འདི་ཉིད་ཡིན་ལ། འདི་ལ་ཐོག་མར་ཉམས་སུ་བླང་བྱའི་ཆོས་ཁུངས་བཙུན་ཁྱད་པར་དུ་འཕགས་པ་ཞིག་ཡིན་པ་དང༌། །ཁུངས་བཙུན་པ་ནས་བྱུང་བའི་ཆོས་དེ་ཡང༌། །ཕྱོགས་རེ་ཙམ་མ་ཡིན་པའི་ལམ་གྱི་ལུས་ཡོངས་སུ་རྫོགས་ཤིང་ཆ་ཚང་ལ་མ་ནོར་བ་ཞིག་དགོས་པ་ཡིན་ལ། ད་རེས་བདག་གིས་ཉམས་སུ་བླང་བྱའི་ལམ་གྱི་རིམ་པ་འདི་ནི་ཡང་དག་པར་རྫོགས་པའི་སངས་རྒྱས་ནས་བཟུང་ཀླུ་སྒྲུབ་ཐོགས་མེད་གཉིས་ལས་རིམ་བཞིན་བརྒྱུད་པས་ཁུངས་བཙུན་པ་ཡིན་ཞིང༌། ཁུངས་བཙུན་དེ་རྣམས་ལས་བརྒྱུད་པའི་ཆོས་ཀྱི་རིམ་པ་འདིས་སྐྱེ་རྒུ་རྣམས་ཀྱི་འདོད་དོན་མ་ལུས་པ་བདེ་བླག་ཏུ་སྐོང་པས་
ན་རིན་པོ་ཆེ་དབང་གི་རྒྱལ་པོ་ལྟ་བུ་དང༌། ཐེག་པ་ཆེ་ཆུང་གི་གཞུང་ལུགས་བཟང་པོ་མ་ལུས་པའི་ལེགས་བཤད་ཀྱི་ཆུ་བོ་འདུ་བས་ན་རྒྱ་མཚོ་ཆེན་པོ་ལྟ་བུ་དང༌། མདོ་སྔགས་ཀྱི་གནད་བསྡུས་ནས་སྟོན་པས་བརྗོད་བྱ་ཡོངས་སུ་རྫོགས་པ་དང༌། སེམས་འདུལ་བའི་རིམ་པ་གཙོ་བོར་བྱས་པས་ཉམས་སུ་ལེན་བདེ་བ་དང༌། ཀླུ་སྒྲུབ་ཀྱི་ལུགས་ལ་མཁས་པའི་རིག་པའི་ཁུ་བྱུག་དང༌། ཐོགས་མེད་ཀྱི་ལུགས་ལ་མཁས་པའི་གསེར་གླིང་པའི་གདམས་པས་བརྒྱན་པ་ཡིན་པས་འདི་ལྟ་བུ་ལ་ཉན་བསམ་སྒོམ་གསུམ་བྱེད་དུ་ཡོང་པ་ནི་བདག་སྐལ་བ་བཟང་ལ། རང་རེའི་བླ་མའི་གསུང་མགུར་ལས་ཀྱང༌། འཛམ་གླིང་མཁས་པ་ཡོངས་ཀྱི་གཙུག་གི་རྒྱན། །སྙན་པའི་བ་དན་འགྲོ་ལ་ལྷང་ངེ་བ། །ཀླུ་སྒྲུབ་ཐོགས་མེད་གཉིས་ལས་རིམ་བཞིན་དུ། །ལེགས་བརྒྱུད་བྱང་ཆུབ་ལམ་གྱི་རིམ་པ་ནི། །སྐྱེ་རྒུའི་འདོད་དོན་མ་ལུས་སྐོང་བས་ན། །གདམས་པ་རིན་ཆེན་དབང་གི་རྒྱལ་པོ་སྟེ། །གཞུང་བཟང་སྟོང་གི་ཆུ་བོ་འདུས་པའི་ཕྱིར། །དཔལ་ལྡན་ལེགས་པར་བཤད་པའི་རྒྱ་མཚོའང་ཡིན། ཞེས་གསུངས་སོ། །དེས་ན་གདམས་པ་འདི་གཞན་ལས་ཁྱད་པར་འཕགས་པའི་ཆེ་བ་བཞི་དང་ལྡན་པ་ཡིན་ཏེ། གདམས་པ་འདི་ལ་བརྟེན་ནས་རྒྱལ་བའི་གསུང་རབ་ཇི་སྙེད་པ་ཐམས་ཅད་ལས་ཁ་ཅིག་ལམ་གྱི་གཙོ་བོ། །ཁ་ཅིག་ལམ་གྱི་ཡན་ལག་
སྟོན་བྱེད་དུ་ཤེས་ནས་དངོས་དང་བརྒྱུད་པ་ཅི་རིགས་པའི་སྒོ་ནས་གང་ཟག་རང་ཉིད་ལྟ་བུ་གཅིག་འཚང་རྒྱ་བའི་ཆ་རྐྱེན་དུ་གོ་བས་བསྟན་པ་ཐམས་ཅད་འགལ་མེད་དུ་རྟོགས་པའི་ཆེ་བ། མདོ་སྔགས་ཀྱི་གསུང་རབ་དང་དེའི་དགོངས་འགྲེལ་གྱི་བསྟན་བཅོས་ཚད་ལྡན་རྣམས་ཕྱིའི་གོ་རྒྱ་གཅོད་པའི་བཤད་ཆོས་ཙམ་དང༌། ཉམས་སུ་ལེན་རྒྱུའི་སྙིང་བོ་ཡན་ལག་དེ་རྣམས་ལས་གཞན་ན་ཡོད་པར་འཛིན་པའི་ལོག་རྟོག་རྣམས་ལྷག་མ་མེད་པར་ལོག་ནས་གསུང་རབ་དགོངས་འགྲེལ་དང་བཅས་པའི་བརྗོད་བྱ་མཐའ་དག་བཤེས་གཉེན་བསྟེན་ཚུལ་ནས་ཞི་ལྷག་གི་བར་གྱི་ལམ་གྱི་རིམ་པར་བསྡུས་ནས་དེ་དག་གི་གདམས་པའི་མཐིལ་དུ་བཟུང་སྟེ་བརྗོད་བྱའི་དོན་གྱི་དཔྱད་སྒོམ་དགོས་པ་ལ་དཔྱད་སྒོམ། འཇོག་སྒོམ་དགོས་པ་ལ་འཇོག་སྒོམ་བྱེད་པའི་ཉམས་ལེན་སྟོན་པའི་གདམས་ངག་ཏུ་གོ་བར་འགྱུར་བས་ན་གསུང་རབ་ཐམས་ཅད་གདམས་ངག་ཏུ་འཆར་བའི་ཆེ་བ། དེ་ལྟར་གསུང་རབ་དགོངས་འགྲེལ་དང་བཅས་པའི་གཞུང་ཆེ་བ་རྣམས་གདམས་པའི་མཆོག་ཡིན་ཡང༌། བདག་ལྟ་བུའི་རྒྱ་ཆེན་པོའི་གསུང་རབ་ཀྱི་དོན་ལ་མ་སྦྱངས་པའི་གང་ཟག་ལས་དང་པོ་པ་རྣམས་ཀྱིས་དམ་པའི་མན་ངག་ལ་མ་བརྟེན་པར་གཞུང་ཆེན་མོ་དེ་དག་གི་དོན་ལ་ཐོས་བསམ་གྱིས་ཞུགས་ཀྱང་དགོངས་དོན་ཇི་ལྟ་བ་བཞིན་མི་རྙེད་པའམ། རྙེད་ཀྱང་དུས་རྒྱུན་རིང་ཞིང་ཚེགས་ཤིན་ཏུ་ཆེ་བ་ལ་ལྟོས་དགོས། བླ་མ་དམ་པའི་མན་ངག་ལམ་སྒྲོན་ནི་བྱང་ཆུབ་ལམ་རིམ་ཉིད་ལྟ་བུ་ལ་བརྟེན་ནས་གཞུང་ཆེན་པོ་རྣམས་ཀྱི་དོན་ཚེགས་མེད་པར་རྙེད་པས་ན་རྒྱལ་བའི་དགོངས་པ་བདེ་བླག་ཏུ་རྙེད་པའི་ཆོ་པ། དེ་ལྟར་རྙེད་པའི་ཚེ་སངས་རྒྱས་ཀྱི་བཀའ་ཐམས་ཅད་དངོས་དང་བརྒྱུད་པའི་སྒོ་ནས་འཚང་རྒྱ་བའི་ཐབས་སྟོན་བར་གོ་བས། འགའ་ཞིག་འཚང་རྒྱ་བའི་ཐབས་སྟོན་པར་བཟུང་ནས་སློབ་དགོས་པ་དང༌། འགའ་ཞིག་འཚང་རྒྱ་བའི་གེགས་སུ་བཟུང་ནས་དོར་བྱར་བྱེད་པ་
ཆོས་སྤོང་གི་ལས་ཡིན་པས་གདམས་པ་འདི་ལ་བརྟེན་ནས་སྔར་བཤད་པ་ལྟར་བསྟན་པ་ཐམས་ཅད་འགལ་མེད་དུ་རྟོགས་པའི་ངེས་པ་རྙེད་པ་ཙམ་གྱིས་དེ་ལྟ་བུའི་ཆོས་སྤང་གི་ཉེས་སྤྱོད་ཆེན་པོ་རང་འགགས་སུ་འགྱུར་བའི་ཆེ་བ་རྣམས་དང་ལྡན་པའི་ཕྱིར། དེ་ལྟར་ན་གསུང་རབ་ཀྱི་དོན་ལ་དཔྱོད་པའི་རྣམ་དཔྱོད་དང་ལྡན་པའམ། ལྡན་པར་འདོད་ན་ནི་རྒྱ་བོད་ཀྱི་མཁས་པའི་སྐྱེ་བོ་སྐལ་ལྡན་དུ་མས་བསྟེན་ཅིང་ཐུགས་ཉམས་སུ་བཞེས་པའི་གདམས་པ་མཆོག་ཏུ་གྱུར་བ་སྐྱེས་བུ་གསུམ་གྱི་ལམ་གྱི་རིམ་པ་འདིས་ཡིད་རང་དབང་མེད་པར་ཕྲོག་འཕྲོག་སྟེ་ཉན་བསམ་སྒོམ་པ་ལ་འཇུག་རིགས་ཏེ། གདམས་པ་དེ་ཉིད་གོང་དུ་བཤད་པ་ལྟར་གྱི་ཆེ་བ་བཞི་དང་ལྡན་པས་སོ། །རྗེ་བླ་མས་ཀྱང༌། བསྟན་པ་ཐམས་ཅད་འགལ་མེད་རྟོགས་པ་དང༌། །གསུང་རབ་མ་ལུས་གདམས་པར་འཆར་བ་དང༌། །རྒྱལ་བའི་དགོངས་པ་བདེ་བླག་རྙེད་པ་དང༌། །ཉེས་སྤྱོད་ཆེན་པོའི་གཡང་ས་ལས་ཀྱང་སྲུང༌། །དེ་ཕྱིར་རྒྱ་བོད་མཁས་པའི་སྐྱེ་བོ་ནི། །སྐལ་ལྡན་དུ་མས་བསྟེན་པའི་གདམས་པ་མཆོག །སྐྱེས་བུ་གསུམ་གྱི་ལམ་གྱི་རིམ་པ་ཡིས། །ཡིད་རབ་མི་འཕྲོག་དཔྱོད་ལྡན་སུ་ཞིག་ཡོད། ཅེས་གསུངས་པས་སོ། །དེ་ལྟ་བུའི་ཆེ་བ་དང་ལྡན་པའི་གདམས་པ་རྒྱལ་བའི་གསུང་རབ་ཀུན་གྱི་སྙིང་བོ་ཕྱོགས་གཅིག་ཏུ་བསྡུས་པ་སྐྱེས་བུ་གསུམ་གྱི་ལམ་གྱི་རིམ་པའི་ཚུལ་འདི་ཡོངས་སུ་རྫོགས་པ་ལྟ་ཅི་སྨོས། ཐུན་རེ་ཙམ་ཕྱིན་ཅི་མ་ལོག་པར་སྟན་ཅིང་བཤད་པའི་ཕན་ཡོན་བསམས་ཏེ། སྙོན་པ་དང་ཆོས་ལ་རིམ་གྲོ་བསྐྱེད། བསམ་སྦྱོར་རྣམ་དག་གི་སྒོ་ནས་སྣོད་ལྡན་གྱི་གང་ཟག་ལ་ཕྱིན་ཅི་མ་ལོག་པར་སྟོན་པ་ལས་དམ་ཆོས་ཚུལ་བཞིན་བཤད་པའི་ཕན་ཡོན་རླབས་ཆེན་པོ་སྡུད་པ་དང༌། ཉན་ཚུལ་ཕྱིན་ཅི་མ་ལོག་པར་སྣོད་ཀྱི་སྐྱོན་གསུམ་སྤང་བ་དང་འདུ་ཤེས་དྲུག་བསྟེན་པ་སོགས་ཀྱི་སྒོ་ནས་ཉན་པ་ལ་དམ་
ཆོས་ཐོས་པའི་ཕན་ཡོན་རླབས་ཆེན་སྡུད་པ་དེ་འབྱུང་བར་ངེས་པས། ཉན་བཤད་ཚུལ་བཞིན་དུ་བྱེད་པ་ལ་འབད་པར་བྱ་རིགས་ཤིང་བྱེད་དགོས་ཏེ། རྗེ་བླ་མས། གསུང་རབ་ཀུན་གྱི་སྙིང་བོ་བསྡུ་བ། །ཚུལ་འདི་ཐུན་རེ་སྟན་དང་ཉན་པས་ཀྱང༌། །དམ་ཆོས་འཆད་དང་ཐོས་པའི་ཕན་ཡོན་ཚོགས། །རླབས་ཆེན་སྡུད་པར་ངེས་པས་དེ་དོན་བསམ། ཞེས་གསུངས་པས་སོ། །འོ་ན་དེ་ལྟ་བུའི་གདམས་པ་ཚུལ་བཞིན་དུ་ཉན་པ་ལ་ཕན་ཡོན་རླབས་ཆེན་འབྱུང་བ་དེ་ལྟ་ན། གདམས་པ་ཁྱད་པར་ཅན་དེ་གང་ཟག་ཇི་ལྟ་བུ་ཞིག་ལས་ཉན་དགོས་སྙམ་ན། སྤྱིར་དམ་པའི་ཆོས་མཉན་པར་འོས་པའི་བཤེས་གཉེན་ལ་ཐེག་པ་ཆེ་ཆུང་དང་མདོ་སྔགས་ཀྱི་སྐབས་ལས་བཤེས་གཉེན་གྱི་མཚན་ཉིད་མི་འདྲ་བ་མང་དུ་གསུངས་ཀྱང༌། གདམས་པ་རིན་པོ་ཆེ་འདི་ལྟ་བུའི་བཀའ་དྲིན་ནོད་པའི་དགེ་བའི་བཤེས་གཉེན་ནི་མདོ་སྡེ་རྒྱན་ལས་བཤད་པ་ལྟར་ལ། དུལ་བ་ཚུལ་ཁྲིམས་ཀྱི་བསླབ་པ། ཞི་བ་ཏིང་ངེ་འཛིན་གྱི་བསླབ་པ། ཉེ་བར་ཞི་བ་ཤེས་རབ་གྱི་བསླབ་པ་སྟེ། བསླབ་པ་གསུམ་གྱི་སྒོ་ནས་རྒྱུད་དུལ་བར་བྱས་པའི་རྟོགས་པའི་ཡོན་ཏན་དང༌། སྡེ་སྣོད་གསུམ་ལ་སོགས་པ་མང་དུ་ཐོས་པ་ལུང་གི་ཡོན་ཏན་དང༌། དེ་ཁོ་ན་ཉིད་རབ་ཏུ་རྟོགས་པའི་ཤེས་རབ་དང་ལྡན་པ། སློབ་མ་ལས་ཡོན་ཏན་ལྷག་པ་སྟེ། ཆོས་སྨྲ་བ་པོ་རང་གིས་ཐོབ་པའི་ཡོན་ཏན་དྲུག་དང༌། ལམ་ལ་ཇི་ལྟར་དཀྲི་བའི་རིམ་པ་ལ་མཁས་ཤིང་དོན་གདུལ་བྱའི་རྣ་བར་སྐྱེལ་བའི་སྨྲ་མཁས་པ། རྙེད་བཀུར་སོགས་ལ་མི་ལྟ་བར་སྙིང་རྗེས་ཀུན་ནས་བསླང་སྟེ་ཆོས་སྟོན་པས་ཀུན་སློང་དག་པ་བརྩེ་བ་དང༌། ཆོས་བཤད་པ་སོགས་ཀྱི་གཞན་དོན་ལ་སྤྲོ་བའི་བརྩོན་པ་དང་བཅས་པ་དང༌། འཆད་པའི་དཀའ་སྤྱད་དང༌། འཁོར་གྱིས་ལོག་སྒྲུབ་མི་བཟོད་པའི་རྟོག་པ་སྤངས་ཏེ་གཞན་
རྗེས་སུ་འཛིན་པའི་ཡོན་ཏན་བཞི་དང་ལྡན་པ་སྟེ་ཆོས་བཅུ་ལྡན་ཞིག་བརྟེན་ནས་ཐེག་ཆེན་གྱི་གདམས་པ་དང་རྗེས་སུ་བསྟན་པ་ནོད་པར་བྱ་ཞིང༌། ཉན་པ་པོའི་གང་ཟག་ཀྱང་སྤྱིར་གཟུ་བོར་གནས་པ། ལམ་ཡང་དག་པ་དེ་ལ་ལྟར་སྣང་གི་རྣམ་དབྱེ་འབྱེད་པའི་བློ་དང་ལྡན་པ། ལམ་ཡང་དག་དོན་དུ་གཉེར་བ་གསུམ། དེའི་སྟེང་དུ་ཆོས་དང་ཆོས་སྨྲ་བ་ལ་གུས་པ་སྟེ་བཞི་ལྡན་དགོས་ལ། ཁྱད་པར་ལམ་འདི་ལྟ་བུ་ལ་དཀྲི་རུང་བའི་སློབ་མ་མཚན་ཉིད་དང་ལྡན་པ་ལ་ཆོས་ལ་དོན་གཉེར་ཆེ་བ། ཉན་པའི་ཚེ་ཡིད་ལ་ལེགས་པར་གཏོད་པ། ཆོས་དང་ཆོས་སྨྲ་བ་ལ་དད་གུས་ཆེ་བ། ཉེས་བཤད་དོར་ནས་ལེགས་བཤད་འཛིན་པའི་ཆོས་བཞི་ལྡན་དང༌། དེའི་མཐུན་རྐྱེན་བློ་དང་ལྡན་པ། འགལ་རྐྱེན་འདིར་བ་གཟུར་གནས་ཏེ་དྲུག་ལྡན་དུ་བྱ་དགོས་པས་རང་ཡང་ལམ་འདི་སྟོན་པ་པོ་བྱེད་འདོད་ན་བཤེས་གཉེན་གྱི་མཚན་ཉིད་དང་ལྡན་པ་ལ་འབད། ཉན་པའི་ཚེ་ཉན་པ་པོའི་མཚན་ཉིད་དང་ལྡན་པ་ལ་བསླབ་བོ། །དགེ་བའི་བཤེས་གཉེན་མཚན་ཉིད་དང་ལྡན་པ་ཞིག་ལས་གདམས་ངག་སྐྱེས་བུ་གསུམ་གྱི་ལམ་གྱི་རིམ་པ་ཚུལ་བཞིན་ཉན་ནས་ཉམས་སུ་ཇི་ལྟར་ལེན་པའི་ཚུལ་ནི། དང་པོར་གནས་ཡིད་དང་མཐུན་པར་དཀོན་མཆོག་གི་རྟེན་བཀྲམ། མཆོད་པ་གཡོ་མེད་པར་ལེགས་པར་བཤམ། སྟན་བདེ་བ་ལ་སྐྱིལ་ཀྲུང་བཅས་བསམ་པ་ཐག་པ་ནས་བློ་ལྟོས་བཀལ་བའི་སྐྱབས་འགྲོ་རྒྱུད་དང་འདྲེས་པ་མང་དུ་བྱས། ཚད་མེད་པ་བཞི་བསྒོམ། སངས་རྒྱས་ཆོས་དང་ཚོགས་ཀྱི་མཆོག་རྣམས་ལ། ཞེས་སོགས་ཀྱིས་སེམས་བསྐྱེད། ཨོཾ་སྭ་བྷཱ་ཝས་ཆོས་ཐམས་ཅད་རང་བཞིན་གྱིས་མ་གྲུབ་པས་སྟོང་བའི་སྟོང་པ་ཉིད་དུ་གྱུར། སྟོང་པའི་ངང་ལས་མདུན་གྱི་ནམ་མཁར་སེང་གེ་ཆེན་པོ་བརྒྱད་ཀྱིས་བཏེགས་པའི་རིན་པོ་ཆེའི་ཁྲི་ཡངས་ཤིང་རྒྱ་ཆེ་བའི་སྟེང་དུ་སྣ་ཚོགས་པདྨ་དང་ཟླ་བའི་གདན་གྱི་སྟེང་དུ་རང་ལ་ལམ་འདི་སྟོན་པའི་བླ་
མ་དང་དབྱེར་མེད་པའི་བདག་གི་སྟོན་པ་ལ་རྒྱ་ཆེན་སྤྱོད་བརྒྱུད་དང་ཟབ་མོ་ལྟ་བརྒྱུད་ཀྱི་བླ་མས་བསྐོར་བ་དང༌། དེའི་མཐར་ཕྱོགས་བཅུའི་སངས་རྒྱས་བྱང་སེམས་ཉན་ཐོས་རང་རྒྱལ། དཔའ་བོ་མཁའ་འགྲོ་བཀའ་སྲུང་དམ་ཅན་རྒྱ་མཚོའི་ཚོགས་ཀྱིས་བསྐོར་བ་སྤྱན་དྲངས་ནས་བཞུགས་པར་གྱུར། །རྣམ་དག་ཆོས་ཀྱི་དབྱིངས་ལས་མ་གཡོས་ཀྱང༌། །ཐུགས་རྗེས་ཚད་མེད་འགྲོ་ལ་ཕྱོགས་བཅུར་གཟིགས། །རྒྱལ་བ་ཀུན་གྱི་ཕྲིན་ལས་རྒྱས་མཛད་པའི། །དུས་གསུམ་བླ་མ་འཁོར་བཅས་གཤེགས་སུ་གསོལ། །མ་ལུས་སེམས་ཅན་ཀུན་གྱི་མགོན་གྱུར་ཅིང༌། ཞེས་སོགས་ཀྱིས་སྤྱན་དྲངས། །ཁྲུས་ཀྱི་ཁང་པ་ཤིན་ཏུ་དྲི་ཞིམ་པ། ཞེས་སོགས་ཀྱིས་ཁྲུས་ཁང་བསྐྱེད་པ། ཁྲུས་གསོལ་བ། སྐུ་དཔྱི་བ། ན་བཟའ་དང་རྒྱན་འབུལ་བ། བདག་དང་འགྲོལ་སོགས་ཀྱིས་མཆོད་པ། ཚོགས་ཀྱི་ཞིང་དུ་བཞུགས་སུ་གསོལ་བ་རྣམས་སྤྱོད་འཇུག་ནས་འབྱུང་བ་ལྟར་བྱ། དེ་ནས་བསགས་སྦྱོང་གི་གནད་བསྡུས་པ་ཡན་ལག་བདུན་པ་བྱ་བ་ནི་ཐོག་མར། སངས་རྒྱས་ཐམས་ཅད་འདུས་པའི་སྐུ། ཞེས་སོགས་དང༌། །ཐུགས་རྗེ་ཆེན་པོ་བདེ་གཤེགས་རྡོ་རྗེ་འཆང༌། །མཆོག་གཟིགས་ཏེ་ལོ་པ་དང་ཞེས་སོགས་ཀྱིས་ཉམས་ལེན་བྱིན་རླབས་བརྒྱུད་པ་དང༌། །བྱམས་པ་ཐོགས་མེད་དབྱིག་གཉེན་རྣམ་གྲོལ་སྡེ། ཞེས་སོགས་ཀྱིས་རྒྱ་ཆེན་སྤྱོད་བརྒྱུད་དང༌། ཡོད་མེད་ཕྱོགས་འཇིག་རྒྱལ་སྲས་ཀླུ་སྒྲུབ་དང༌། ཞེས་སོགས་ཀྱིས་ཟབ་མོ་ལྟ་བརྒྱུད། རྒྱལ་བའི་མདུན་ན་ཞེས་སོགས་ཀྱིས་ཇོ་བོ། ཡོངས་ཀྱི་དགེ་བའི་བཤེས་གཉེན་ཞེས་སོགས་ཀྱིས་འབྲོམ། དམིགས་མེད་བརྩེ་བའི་གཏེར་ཆེན་སྤྱན་རས་གཟིགས། ཅེས་སོགས་ཀྱིས་རྗེ་དང༌། རླབས་ཆེན་ཤེས་རབ་བཟང་པོའི་ལུས་སྟོབས་རྒྱས། ཅེས་སོགས་དང༌། རིག་གྲོལ་ཕུན་ཚོགས་ཅེས་སོགས་དང༌། དགོས་འདོད་ཀུན་འབྱུང་ཞེས་སོགས་དང༌། གང་ལ་བདག་
ཅག་རིག་པ་བསླབ་པ་དང༌། ཞེས་སོགས་དང༌། སྟོན་པ་བླ་མེད་སངས་རྒྱས་རིན་པོ་ཆེ། ཞེས་སོགས་དང༌། ཐབས་མཁས་ཐུགས་རྗེས་ཤཱཀྱའི་རིགས་སུ་འཁྲུངས། ཅེས་སོགས་དང༌། ཇི་སྙེད་སུ་དག་ཅེས་པ་ནས། ཕྱག་འཚལ་མཆོད་པར་བགྱི། ཞེས་པའི་བར་བྱ། དེ་ནས་མཎྜལ་རྒྱས་བསྡུས་གང་ཡང་རུང་བ་དང༌། དེ་ལས་གཞན་ཡང་མཆོད་པའི་ཚོགས། ཞེས་པ་ནས། སྤྲིན་རྣམས་སོ་སོར་གནས་གྱུར་ཅིག །ཅེས་པའི་བར་དང༌། སྤྱི་བཤགས་ཚར་གསུམ་བྱས། འདོད་ཆགས་ཞེ་སྡང་གཏི་མུག་དབང་གིས་ནི། ཞེས་པ་ནས། བྱང་ཆུབ་ཕྱིར་བསྔོའོ། །ཞེས་པའི་བར་བྱ། དེ་ནས་ལམ་རིམ་གསོལ་འདེབས་ལམ་མཆོག་སྒོ་འབྱེད་གདངས་ཡིད་འཁྲུལ་པ་དང་བཅས་ཏེ་གདོན། དེ་ནས་མཆོད་ཡུལ་རྣམས་རང་བཞིན་གྱི་གནས་སུ་གཤེགས་ཞེས་གཤེགས་གསོལ་བྱ། ཐུན་བཞིའམ་དྲུག་ཏུ་ཉམས་སུ་ལེན་ན་ཐུན་ཐ་མ་ལ་གཤེགས་གསོལ་བྱ། དེ་ནི་བཤེས་གཉེན་བསྟེན་ཚུལ་གྱི་སྔོན་འགྲོའོ། །བསྟེན་ཚུལ་དངོས་ནི་དཔྱད་སྒོམ་གྱི་སྒོ་ནས་བསྒོམ་པར་བྱ་སྟེ། དེ་ཡང་བདག་གི་དཔལ་ལྡན་བླ་མ་འདི་རྣམས་དངོས་གྲུབ་ཀྱི་རྩ་བ། འདི་ཕྱིའི་ལེགས་ཚོགས་ཐམས་ཅད་ཀྱི་འབྱུང་གནས་ཡིན། སྨན་པ་དང་ནད་པ་བཞིན་དུ་བླ་མས་སྡུག་བསྔལ་གྱི་ནད་སེལ་བས་སྐུ་དྲིན་ཆེ། འཁོར་བ་ཐོག་མ་མེད་པ་ནས་ད་བར་འཁོར་བར་གཏན་འཁྱམས་བྱས་པ་བཤེས་གཉེན་དེ་དང་མ་མཇལ་བའམ། མཇལ་ཀྱང་དེའི་བཀའ་བཞིན་མ་བསྒྲུབས་པས་ལན། ད་ནི་ངས་བླ་མ་ཅི་མཉེས་བྱེད་དགོས། ཟས་ནོར་གྱིས་འགྲངས་ནས་སྐྱིད་རྒྱགས་པའི་སྐབས་སུ་གསེར་སྦྲམ་ལག་པས་ཐེག་ཚད་བྱིན་པ་ལས་ལྟོག་གྲིར་འཆི་ལ་ཁད་ལ་ཟས་ཕོར་གང་སྟེར་བ་དྲིན་ཆེ་བ་བཞིན། ང་ལ་ནི་རིམ་ལྔ་ལས། འདི་ནི་རང་བྱུང་བཅོམ་ལྡན་འདས། །ལྷག་པའི་ལྷ་ནི་གཅིག་པུ་ཉིད། །མན་ངག་རབ་ཏུ་སྟེར་བའི་ཕྱིར། །རྡོ་རྗེ་སློབ་དཔོན་དེ་བས་ལྷག །ཅེས་གསུངས་པ་ལྟར་སངས་
རྒྱས་རྣམས་ལས་ཀྱང་བླ་མ་འདི་བཀའ་དྲིན་ཆེ་ངེས་བསམ། སྔོན་བདག་ཅག་གི་སྟོན་པས། །སྐྱེ་བ་ཡོད་ན་འཆི་བ་ཡོད། །འགོག་པ་འདི་ནི་བདེ་བ་ཡིན། ཞེས་པའི་ཚིགས་བཅད་ཕྱེད་ཙམ་དང༌། ཚིགས་བཅད་རེ་ཙམ་གསན་པའི་བླ་མ་ལ་བཀའ་དྲིན་བསབས་པའམ། བླ་མ་དེ་མཉེས་པར་བྱ་བའི་ཕྱིར་གསེར་སྲང་འབུམ་ཕྲག་ཕུལ་བ་དང༌། རྒྱལ་བོའི་སྲས་དང་བཙུན་མོ་ལ་སོགས་པ་ཆེས་ཕོངས་པ་ཕུལ་བ། སྐུ་ལུས་ལ་མར་མེ་སྟོང་བཙུགས་པ་སོགས་ལུས་ལོངས་སྤྱོད་ཐམས་ཅད་གཏོང་བར་མཛད་འདུག །བདག་ཀྱང་སྟོན་པ་དེའི་རྗེས་འཇུག་ཡིན་ཞིང༌། ད་ལྟའི་བླ་མ་རྣམས་ལ་ཆོས་ཚད་མེད་པ་ཉན་ཡོད་པས་བཀའ་དྲིན་ཚད་མེད་ཨང༌། གལ་ཏེ་ད་ལྟའི་བླ་མ་སྐུ་ཡོན་ཆེ་བ་ཡིན་ན་བཀའ་དྲིན་རེ་ཙམ་འཁུར། དེ་མིན་ཅིར་ཡང་མི་རྩི་བའི་ཁར། ངས་ཆོས་ཉན་ཡོད་ཟེར་ཕར་དགྱེན་པ་བྱེད་པར་འདུག་སྟེ། དེ་ནི་མ་གོ་བ་ཤིན་ཏུ་ཆེ་བ་ཡིན་ཏེ། དཔེར་ན་ཕ་མ་ལ་ཡོན་ཏན་མེད་ཀྱང་དྲིན་ལེགས་པར་འཁུར་དགོས་ཤིང་ཁུར་ན་ཕན་ཡོན་དང་མ་ཁུར་ན་ཉེས་དམིགས་ཆེ་བ་བཞིན་དུ་བླ་མ་ལའང་ཆེ་ངེས་པ་ཡིན་ནོ། །ད་ལྟ་ནོར་ཅུང་ཟད་རེ་བྱིན་པ་ལ་ཡང་དྲིན་ཆེ་ཟེར་ན། བླ་མས་ཚེ་འདི་ཕྱི་ཐམས་ཅད་ཀྱི་བདེ་བ་ལ་སྦྱར་བ་ཡིན། ལེགས་པར་བརྟགས་ན་ཡ་གི་སངས་རྒྱས་བྱང་སེམས་ནས་ཁྱིམ་པ་རྣམས་ཀྱི་བར་ཐམས་ཅད་ལ་བླ་མ་མཉེས་པར་བྱས་མ་བྱས་ཀྱིས་སྐྱིད་སྡུག་གི་ཁྱད་པར་མངོན་དུ་མཐོང་བ་དང༌། །དེར་མ་ཟད་བླ་མས་ཚེ་གཅིག་ལ་སངས་རྒྱས་ལ་བཀོད་པ་ཡང་མང་དུ་བྱུང༌། ངས་ཀྱང་བླ་མ་ལ་མཆོད་པ་གསུམ་གྱིས་མཉེས་པར་བྱས་ནས་སངས་རྒྱས་མྱུར་དུ་འཐོབ་ངེས། དེས་ན་བླ་མའི་བཀའ་དྲིན་ནི་བསམ་གྱིས་མི་ཁྱབ་པས་བཀའ་དྲིན་ཅན་གྱི་བླ་མ་མཉེས་པ་གལ་ཆེ་སྟེ། ཚེ་ཕྱི་མ་རྣམས་སུ་བཤེས་གཉེན་དམ་པ་དང་མཇལ་ཞིང་རྗེས་སུ་འཛིན་པ་ཡང་ད་ལྟ་ཆོས་འབྲེལ་ཡོད་པའི་བླ་མ་རྣམས་མཉེས་པར་བྱེད་པ་ཁོ་ན་ལ་རག་ལས་པས་བཤེས་གཉེན་བསྟེན་ཚུལ་མ་འཆུགས་པ་གཅིག་མི་བྱེད་པའི་ཐབས་
རང་མི་འདུག་ཨང༌། མདོ་བསྟན་བཅོས་ཐམས་ཅད་ལས་ཀྱང༌། བླ་མ་རྣམས་མཉེས་པར་སྒྲུབས་ཤིག་ཅེས་ཡང་ཡང་གསུངས་ཤིང༌། དེ་ངེད་རང་ལ་མི་འདོད་གདམ་ཁར་མ་གྱོད་བཀལ་བ་ནི་མིན། བསོད་ནམས་མི་འདོད་བ་ནི་སུ་ཡང་མེད། བསོད་ནམས་གསོག་པའི་ཞིང་ནི་བླ་མ་ལས་ལྷག་པ་མེད་པར་མདོ་རྒྱུད་བསྟན་བཅོས་ཀུན་ནས་གསུངས། མཉེས་པ་སྒྲུབ་པའང་བླ་མ་ལ་སྐྱོན་རྟོག་གི་བློ་ཡེམ་ཤོར་བའི་ཅི་མཛད་ལེགས་པར་ལྟ་བའི་སྒོ་ནས་དད་པ་ཁ་ཙམ་མིན་བར་སྙིང་ཁོང་རུས་པའི་དཀྱིལ་ནས་བསྒོམ་སྟེ། མཚན་ཐོས་པའམ་བླ་མ་དེ་དྲན་པ་ཙམ་གྱིས་ལུས་ཀྱི་བ་སྤུ་གཡོ། །མིག་ནས་མཆི་མ་འཛག་པ་སོགས་མ་བྱུང་གི་བར་དུ་བསྒོམ། དེ་ཡང་སྤྱིར་སེམས་ཅན་གང་གི་སྐྱོན་པའང་རྟོག་ཏུ་མི་རུང་བར་རྒྱལ་བ་སྲས་བཅས་ཀྱིས་གསུངས་ན་བླ་མ་ལ་ལྟ་ཅི་སྨོས། སྐྱོན་ཡོད་པ་ལྟར་སྣང་ཡང་ང་རང་སྣང་བ་མ་དག་པ་ཡིན། བླ་མ་ལ་དེ་ལྟ་བུའི་སྐྱོན་ག་ལ་མངའ། སྔོན་འཕགས་པ་ཐོགས་མེད་ཀྱིས་བྱམས་པ་བསྒྲུབ་པས་ཁྱི་མོ་སྨད་ཁོག་འབུས་གང་བར་གཟིགས་པ་དང༌། ནཱ་རོ་པས་ཏིལློ་པ་ཉ་གསོན་སྲེག་བྱེད་པར་གཟིགས་པ་སོགས་དང༌། ཡབ་སྲས་མཇལ་བའི་མདོ་སོགས་ལས་སངས་རྒྱས་ཀྱིས་བདུད་སྤྲུལ་ནས་སེམས་ཅན་གྱི་དོན་མཛད་པར་ཡང་བཤད། དེས་ན་བླ་མ་ལ་སྐྱོན་ག་ལ་ཡོད། སངས་རྒྱས་དངོས་ཡིན་ངེས་སྙམ་དུ་བསམ། དེ་ལྟ་མིན་པར་བླ་མ་ལ་སྐྱོན་རྟོག་གི་སྒོ་ནས་བརྙས་སྨད་སོགས་བྱས་ན་ནི་གསང་འདུས་རྩ་རྒྱུད་དང་བླ་མ་ལྔ་བཅུ་པ་སོགས་ལས་སྡིག་པ་གང་ལས་ཆེས་ཆེ་བའི་སྡིག་པ་བཤད་ཡོད། དེས་ན་བདག་གིས་འབྲོམ་སྟོན་པའི་རྣམ་མཐར་ལྟར་བླ་མ་མང་པོ་ཚོམ་ཚོམ་དུ་མི་འཚོལ། གང་ལ་བླ་མ་བཅོལ་བ་དེ་སྲོག་དང་བསྡོས་ནས་མ་གུས་པའི་བསམ་པ་གཏན་ནས་མ་སྐྱེས་པར་བྱེད་དགོས་ཨང་སྙམ་དུ་བསྒོམ་མོ། །རྗེ་བླ་མས་ཀྱང༌། ད་ནས་འདི་ཕྱིའི་ལེགས་
ཚོགས་ཇི་སྙེད་བའི། །རྟེན་འབྲེལ་ལེགས་པར་འགྲིགས་པའི་རྩ་བ་ནི། །ལམ་སྟོན་བཤེས་གཉེན་དམ་པ་འབད་པ་ཡིས། །བསམ་དང་སྦྱོར་བས་ཚུལ་བཞིན་བསྟེན་པ་རུ། །མཐོང་ནས་སྲོག་གི་ཕྱིར་ཡང་མི་གཏོང་བར། །བཀའ་བཞིན་སྒྲུབ་པའི་མཆོད་པས་མཉེས་པར་བྱ། །རྣལ་འབྱོར་ངས་ཀྱང་ཉམས་ལེན་དེ་ལྟར་བྱས། །ཐར་འདོད་ཁྱོད་ཀྱང་དེ་བཞིན་བསྐྱང་འཚལ་ལོ། །ཞེས་བརྩེ་བ་ཆེན་པོས་གདམས་པར་མཛད་དོ། །འོ་ན་ལམ་སྟོན་པའི་བཤེས་གཉེན་དེ་ལྟར་འབད་པས་བསྟེན་ཅིང་བཀའ་བཞིན་སྒྲུབ་པའི་མཆོད་པས་མཉེས་པར་བྱ་དགོས་ན་བཀའ་ཇི་ལྟར་བསྒྲུབ་སྙམ་ན། བཤེས་གཉེན་དེས་ཇི་ལྟར་གདམས་པའི་དམ་པའི་ཆོས་ཚུལ་བཞིན་དུ་ཉམས་སུ་བླངས་ཏེ། རྒྱུ་དང་འབྲས་བུའི་སྒོ་ནས་ཤིན་ཏུ་རྙེད་དཀའ་ཞིང༌། རྙེད་ན་དོན་ཆེ་བའི་དལ་འབྱོར་ཡིད་བཞིན་གྱི་ནོར་བུ་ལས་ལྷག་པ་འདི་དོན་ལྡན་དུ་བྱེད་པ་ལས་ལྷག་པའི་བཀའ་བཞིན་བསྒྲུབ་པའི་མཆོད་པ་གཞན་མི་འདུག་པས་དེས་ན་སོར་མོ་གསུམ་ཁར་བཅུག་ནས་མི་ལུས་ལན་ཅིག་ཐོབ་པ་འདི་སྟོང་ལོག་ཏུ་མ་སོང་བ་ཞིག་མ་བྱས་ན་ངའི་སྙིང་རུལ་བ་དང་འདྲ། ཚེ་འདིའི་དགྲ་འདུལ་གཉེན་སྐྱོང་གཞན་དོན་གྲུབ་པ་ཞིག་དང༌། རྙེད་བཀུར་སོགས་དོན་གཉེར་གྱི་བསམ་པས་ཀུན་ནས་བསླངས་ཏེ་ཆོས་འཆད་ཉན། བསླབ་པའི་སྲུང་སྡོམ་སོགས་ཆོས་བརྒྱད་དཀར་ནག་ཁྲ་གསུམ་པོ་འདི་བཙན་ཆོད་དུ་བཞག་ནས་མི་རྟག་པ་བསྒོམ་པ་སོགས་ཀྱི་ཁ་ཞེ་མཐུན་ངེས་ཀྱི་ཆོས་ཤིག་ཉམས་སུ་མ་བླངས་ན་འདུན་མ་ཉེས་ཚབ་གཞན་ལས་ཆེ། རྟེན་འདི་ལ་རང་གིས་རང་ལ་མི་ཁྲེལ་བའི་ཆོས་རྣམ་དག་ཉམས་སུ་བླངས་ན་ནི་ནམ་བཞག་གཏན་གྱི་འདུན་མའི་རྐང་ཚུགས་ཏེ་ལེགས་ཚབ་གཞན་ལས་ཆེ་བ་འདུག །དེས་ནངས་ཁེ་ཆུང་ལ་ཉེན་ཆེ་བའི་འཇིག་རྟེན་གྱི་བྱ་བ་སྙིང་བོ་མེད་པའི་སྦུན་པ་འཕྱར་བ་འདི་ལས་ལྡོག་སྟེ། མི་ལུས་འདི་དོན་ལྡན་འཆི་ཁར་འགྱོད་མི་དགོས་པའི་སྙིང་པོ་
ལོན་པ་ཞིག་བྱས། དེ་ཡང་ད་ལྟ་ཉིད་དུ་བྱེད་སྙམ་པའི་སྒོ་ནས་དལ་འབྱོར་ལ་སྙིང་བོ་ལེན་འདོད་སྐོམ་པས་གདུངས་པ་ཆུ་དོན་དུ་གཉེར་བ་ལྟར་བསྒོམ་པར་བྱ་ཞིང༌། རྗེ་བླ་མས་ཀྱང༌། དལ་བའི་རྟེན་འདི་ཡིད་བཞིན་ནོར་ལས་ལྷག །འདི་འདྲ་རྙེད་པ་ད་རེས་ཙམ་ཞིག་ཡིན། །རྙེད་དཀའ་འཇིག་སླ་ནམ་མཁའི་གློག་དང་འདྲ། །ཚུལ་འདི་བསམ་ནས་འཇིག་རྟེན་བྱ་བ་ཀུན། །སྤུན་པ་འཕྱར་བ་བཞིན་དུ་རྟོགས་གྱུར་ནས། །ཉིན་མཚན་ཀུན་ཏུ་སྙིང་བོ་ལེན་པ་དགོས། ཞེས་ཀྱང་གསུང་ཡོད་ཨང་སྙམ་དུ་བསམ། འོ་ན་དལ་འབྱོར་གྱི་རྟེན་ལ་སྙིང་བོ་ལེན་དགོས་ན་སྙིང་བོ་ཇི་ལྟར་ལེན་དགོས་སྙམ་ན་འདི་ལ་གཉིས་གསུངས་པའི། དང་བོ་ལམ་སྤྱིའི་རྣམ་བཞག་བསྐྱེད་ཚུལ་འདི་ལ་གོ་བ་ཆགས་པ་ཤིན་ཏུ་གལ་ཆེ་བས་ཅུང་ཟད་བཤད་ན་འདི་ལ་སྐྱེས་བུ་གསུམ་གྱི་ལམ་དུ་གསུང་རབ་ཐམས་ཅད་འདུས་པའི་ཚུལ། སྐྱེས་བུ་གསུམ་གྱི་སྒོ་ནས་འཁྲིད་པའི་རྒྱུ་མཚན་བསྟན་པའོ། །དང་བོ་ནི། སངས་རྒྱས་དང་བོར་ཐུགས་བསྐྱེད་པ་བར་དུ་ཚོགས་བསགས་པ་ཐ་མར་སངས་རྒྱས་པ་ཐམས་ཅད་སེམས་ཅན་གྱི་དོན། ཆོས་གསུངས་པ་ཐམས་ཅད་ཀྱང་སེམས་ཅན་གྱི་དོན་ཁོ་ན་ཡིན་ལ། བསྒྲུབ་བྱ་སེམས་ཅན་གྱི་དོན་ལ་གནས་སྐབས་མངོན་མཐོ་དང་མཐར་ཐུག་ངེས་ལེགས་གཉིས་ལས། དང་བོ་སྒྲུབ་ཚུལ་ལས་བརྩམས་ཏེ་གསུང་པ་ཐམས་ཅད་སྐྱེས་བུ་ཆུང་ངུ་དངོས་སམ་ཆུང་ངུ་དང་ཐུན་མོང་པའི་ཆོས་སྐོར་དུ་འདུས་ཏེ། སྐྱེས་བུ་ཆུང་ངུའི་ཁྱད་པར་ནི་ལམ་སྒྲོན་ལས། གང་ཞིག་ཐབས་ནི་གང་དག་གིས། །འཁོར་བའི་བདེ་བ་ཙམ་དག་ལ། །རང་ཉིད་དོན་དུ་གཉེར་བྱེད་པ། །དེ་ནི་སྐྱེས་བུ་ཐ་མར་ཤེས། ཞེས་གསུངས་པ་ལྟར་ཚེ་འདི་ལ་ཆེད་ཆེར་མི་བྱེད་པར་ཕྱི་མར་མཐོ་རིས་ཀྱི་བདེ་བ་དོན་དུ་གཉེར་ཞིང་དེའི་རྒྱུ་ཉམས་སུ་ལེན་པ་ཞིག་ལ་འཇོག །ངེས་ལེགས་ལ་འཁོར་བ་ལས་གྲོལ་བ་
ཙམ་གྱི་ཐར་བ་དང་ཐམས་ཅད་མཁྱེན་པ་གཉིས་ལས། དང་བོ་སྒྲུབ་པ་ལས་བརྩམས་ཏེ་གསུངས་པ་ཐམས་ཅད་སྐྱེས་བུ་འབྲིང་དངོས་སམ་དེ་དང་ཐུན་མོང་གི་ཆོས་སྐོར་དུ་འདུས་ཏེ། ལམ་སྒྲོན་དུ་སྲིད་པའི་བདེ་ལས་རྒྱབ་ཕྱོགས་ཤིང༌། །སྡིག་པའི་ལས་ལས་བཟློག་བདག་ཉིད། །གང་ཞིག་རང་ཞི་ཙམ་དོན་གཉེར། །སྐྱེས་བུ་དེ་ནི་འབྲིང་ཞེས་བྱ། ཞེས་གསུངས་པ་ལྟར་སྐྱེས་བུ་འབྲིང་ཙམ་ནི། འཁོར་བའི་ཕུན་ཚོགས་ལ་རྒྱབ་ཀྱིས་ཕྱོགས་ནས་འཁོར་བ་སྤངས་པའི་བདེ་བ་ཙམ་རང་དོན་དུ་འཐོབ་བྱར་བྱས་ཏེ་དེའི་ཕྱིར་དུ་བསླབ་པ་གསུམ་ཉམས་སུ་ལེན་པ་ལ་འཇུག་པ་ཞིག་ལ་འཇོག །ཐམས་ཅད་མཁྱེན་པའི་གོ་འཕང་སྒྲུབ་པའི་ཐབས་ལ་ཡང་གསང་སྔགས་དང་ཕར་ཕྱིན་ཐེག་པ་གཉིས་སུ་ཡོད་པ། གཉིས་ཀ་ཡང་སྐྱེས་བུ་ཆེན་པོའི་ཆོས་སྐོར་དུ་འདུས་ཏེ། སྐྱེས་བུ་ཆེན་པོ་དེ་ལ་ལམ་སྒྲོན་ལས། རང་རྒྱུད་གཏོགས་པའི་སྡུག་བསྔལ་གྱིས། །གང་ཞིག་གཞན་གྱི་སྡུག་བསྔལ་ཀུན། །ཡང་དག་ཟད་པར་ཀུན་ནས་འདོད། །སྐྱེས་བུ་དེ་ནི་མཆོག་ཡིན་ནོ། །ཞེས་གསུངས་པ་ལྟར་སྙིང་རྗེ་ཆེན་པོའི་གཞན་དབང་དུ་གྱུར་བས་སེམས་ཅན་གཞན་གྱི་སྡུག་བསྔལ་ཀུན་ཟད་པར་བྱ་བའི་ཕྱིར་དུ་སངས་རྒྱས་ཐོབ་བྱར་བྱས་ཏེ་ཕར་ཕྱིན་དྲུག་དང་རིམ་གཉིས་ལ་སློབ་པ་ཞིག་ལ་འཇོག་པའི་ཕྱིར་རོ། །གཉིས་པ་སྐྱེས་བུ་གསུམ་གྱི་སྒོ་ནས་འཁྲིད་པའི་རྒྱུ་མཚན་བསྟན་པ་ནི་དེ་ལྟར་སྐྱེས་བུ་གསུམ་དུ་བཤད་ཀྱང་སྐབས་འདིར་སྐྱེས་བུ་ཆེན་པོའི་ལམ་དུ་འཁྲིད་པའི་ཡན་ལག་ཏུ་འོག་མ་གཉིས་ཀྱང་འཁྱེར་ཤེས་དགོས་ལ། དེ་ཡང་སྲིད་པའི་ཕུན་ཚོགས་ཙམ་ལ་ཐོབ་བྱར་བྱེད་པའི་སྐྱེས་བུ་ཆུང་ངུ་ཙམ་དང༌། འཁོར་བ་ལས་ཐར་བ་ཙམ་རང་དོན་དུ་ཐོབ་བྱར་བྱེད་པའི་སྐྱེས་བུ་འབྲིང་ཙམ་གྱི་ལམ་དུ་འཁྲིད་པ་མ་ཡིན་གྱི། །དེ་གཉིས་དང་ཐུན་མོང་བའི་ལམ་འགའ་ཞིག་སྐྱེས་བུ་ཆེན་པོའི་ལམ་ལ་འཁྲིད་པའི་སྔོན་འགྲོར་བྱས་ནས་དངོས་གཞི་སྐྱེས་བུ་ཆེན་པོའི་ལམ་དུ་འཁྲིད་པ་ཡིན་
ལ། དེ་ལྟར་བྱེད་དགོས་པའི་རྒྱུ་མཚན་ནི་ཐེག་ཆེན་དུ་འཇུག་པའི་སྒོ་ནི་བྱང་ཆུབ་མཆོག་ཏུ་སེམས་བསྐྱེད་པ་ལས་གཞན་མེད་པས་བྱང་ཆུབ་ཏུ་སེམས་བསྐྱེད་དགོས། དེ་ལ་སྔོན་དུ་སེམས་བསྐྱེད་ཀྱི་ཕན་ཡོན་བསམ་སྟེ་སྤྲོ་ཤུགས་འཕེལ་བ་དགོས། སེམས་བསྐྱེད་ཀྱི་ཕན་ཡོན་ཀྱང་བསྡུ་ན་གནས་སྐབས་ཀྱི་དང་མཐར་ཐུག་གི་ཕན་ཡོན་གཉིས་ལས་གནས་སྐབས་མངོན་མཐོའི་བདེ་འབྲས་ཀྱང་སེམས་བསྐྱེད་ལ་བརྟེན་ནས་བདེ་བླག་ཏུ་འགྲུབ་པ། མཐར་ཐུག་ཐམས་ཅད་མཁྱེན་པའི་གོ་འཕང་ཡང་སེམས་བསྐྱེད་ལ་བརྟེན་ནས་འབྱུང་བས་བྱང་ཆུབ་ཏུ་སེམས་བསྐྱེད་དགོས་ལ། དེ་ལ་ཡང་སེམས་ཅན་སྡུག་བསྔལ་གྱིས་མནར་བ་མི་བཟོད་པའི་སྙིང་རྗེ་ཆེན་པོ་སྔོན་དུ་འགྲོ་དགོས། དེ་ལ་ཡང་རང་སྡུག་བསྔལ་གྱིས་མནར་བ་ལ་མི་འདོད་པའི་བློ་ཤུགས་དྲག་གཅིག་དགོས་པས་ཐོག་མར་ཆུང་ངུའི་སྐབས་ཀྱི་རང་ལ་ངན་སོང་གི་སྡུག་བསྔལ་གྱིས་མནར་ཚུལ་བསམ་ནས་དེ་ལས་ཐར་འདོད་ཀྱི་བློ་དང༌། འབྲིང་གི་སྐབས་སུ་མཐོ་རིས་ན་ཡང་བདེ་བ་རང་མཚན་པ་མེད་ཚུལ་བསམ་ནས་འཁོར་བ་མཐའ་དག་ལས་ངེས་པར་འབྱུང་བའི་བློ་བསྐྱེད། དེ་ནས་རང་ཉམས་ལ་དཔག་ནས་མ་རྒན་སེམས་ཅན་ཐམས་ཅད་སྡུག་བསྔལ་གྱིས་མནར་བ་ལ་སྒྲོལ་འདོད་ཀྱི་བྱམས་སྙིང་རྗེ་བྱང་ཆུབ་ཀྱི་སེམས་བསྐྱེད་པར་བྱེད་དགོས་པས་ན་ཆུང་འབྲིང་དང་ཐུན་མོང་པའི་བློ་སྦྱོང་བ་ཆེན་པོའི་ལམ་དུ་འཁྲིད་པའི་ཐབས་མཆོག་ཏུ་འགྱུར་བ་ཡིན་པས་སོ། །གཉིས་པ་སྙིང་བོ་ལེན་ཚུལ་དངོས་ལ་གསུམ་ཡོད་པའི་དང་བོ་ཆུང་ངུ་དང་ཐུན་མོང་བའི་ལམ་ལ་བློ་སྦྱོང་ཚུལ་ནི་བློ་ནང་དུ་ཧྲིལ་ཏེ་བཀུག་ནས། གལ་ཏེ་མི་ལུས་རིན་པོ་ཆེ་རྙེད་དཀའ་ཞིང་རྙེད་ན་དོན་ཆེ་བ་འདི་འདྲ་ཐོབ་འདུག་སྟེ་འདི་ཡུན་རིང་དུ་མི་གནས། ངེས་པར་འཆི། དེ་ཡང་གང་ཙམ་ན་འཆི་ངེས་པ་མི་འདུག་པས་ད་ལྟ་ཉིད་དུ་སྙིང་བོ་ལེན་པ་ལ་འབད་དགོས། དེ་ཡང་དེ་སྔ་ཕན་དྲག་ཞན་འབྲིང་གསུམ་འདི་ཙམ་ཞིག་ཁྲོམ་འུར་པ་
བཞིན་དུ་འཆི་བདག་གིས་བཅོམ། ང་དེ་སྔ་ཕན་མ་ཤི་བ་དེ་ཡང་ཁར་རྗེ་རེ་ཆེན་སྙམ་སྙིང་ཆ་སྟོང་སྟོང་བ། ས་གཅིག་ཏུ་སྡོད་མི་ཚུགས་པ་ཙམ་གྱི་བློ་ཞིག་བསྙེད་ལ། རྡོར་ལོངས་སྤྱོད་གཉེན་ཉེ་བ་སུ་གང་དང་ཡང་འགྲོག་དབང་མེད་པར་དེ་རྣམས་ཀྱི་ཆེད་དུ་བསགས་པའི་སྡིག་པ་དེ་ཁྱེར་ནས་འགྲོ་དགོས་པ་འདི་འདྲ་ནི་ཡ་ཆ་སྙམ་པ་བྱ། ཚེ་འདི་སྣང་གི་བཟའ་དགའ་འཐུང་སྐྱིད། མི་ནོར་ཟས་གསུམ་སོགས་གང་སོང་སོང་སོང་ད་ངས་ཚེ་ལྷག་གང་ཡོད་འདི་ལ་ཆོས་གཤའ་མ་ཞིག་བྱེད། དེ་ཡང་དེ་རིང་ཉིད་ནས་བྱེད་དགོས་སྙམ་པ་བྱའོ། །འོ་ན་འཆི་བའི་ཚེ་ཆོས་མ་གཏོགས་གང་གིས་ཀྱང་མི་ཕན་ན། ཤི་བའི་ཚེ་ཆོས་ཀྱིས་ཇི་ལྟར་ཕན། ཆོས་མིན་གྱིས་ཇི་ལྟར་གནོད་སྙམ་ན། ངེད་རང་ཤི་ནས་ཀྱང་མེད་པར་མི་འགྲོ་བར་སྐྱེ་བ་ཞིག་ནི་བླང་དགོས་ཏེ་སྐྱེ་བ་ཡང་བདེ་འགྲོ་དང་ངན་འགྲོ་གང་རུང་ལས་མ་འདས། དེ་ཡང་ལས་ཀྱི་དབང་མ་གཏོགས་རང་དབང་ནི་མེད། ལས་དཀར་ནག་གིས་ཇི་ལྟར་འཕངས་པ་བཞིན་སྐྱེ་དགོས་ལ། དེ་ཡོད་པའི་ཚེ་དགེ་སེམས་མངོན་དུ་གྱུར་ན་ཕྱི་མ་བདེ་འགྲོར་སྐྱེ། དེའི་ཚེ་མི་དགེ་བའི་སེམས་མངོན་དུ་གྱུར་ན་ཕྱི་མ་ངན་འགྲོ་གསུམ་གང་རུང་དུ་སྐྱེས་ནས་སྡུག་བསྔལ་དྲག་པོ་མྱོང་དགོས། ངན་འགྲོ་ན་སྡུག་བསྔལ་ཇི་ལྟར་ཡོང་ན། མགོན་པོ་ཀླུ་སྒྲུབ་ཀྱིས། རབ་ཏུ་ཚ་ཞིང་གྲང་བ་ཡི། །དམྱལ་བ་ཉི་མ་གཅིག་བཞིན་དྲན། །བཀྲེས་སྐོམ་དག་གི་རིང་པ་ཡི། །ཡི་དྭགས་དག་ཀྱང་དྲན་པར་བྱ། །རྨོངས་པའི་སྡུག་བསྔལ་རབ་མང་བའི། །བྱོལ་སོང་བལྟ་ཞིང་དྲན་པར་བྱ། །དེ་རྒྱུ་རྣམ་སྤངས་བདེ་རྒྱུ་སྦྱང༌། །འཐོབ་དཀའ་འཛམ་གླིང་མི་ཡི་ལུས། །དེ་ཐོབ་དུས་སུ་ངན་སོང་རྒྱུ། །རབ་ཏུ་བསྒྲིམས་ཏེ་བཅད་པར་བྱ། ཞེས་གསུངས་པ་ལྟར་དམྱལ་བ་རྣམས་ལ་ཚ་གྲང་གི་སྡུག་བསྔལ་བཟོད་པར་མི་ནུས་པ་ཡོད། ཡི་དྭགས་རྣམས་བཀྲེས་སྐོམ་གྱི་སྡུག་བསྔལ་བསྲན་མི་ནུས་པ། དུད་འགྲོ་རྣམས་ལ་གཅིག་
ལ་གཅིག་ཟ་གླེན་ལྐུགས་སོགས་ཀྱི་སྡུག་བསྔལ་བཟོད་པར་མི་ནུས་པ་ཡོད། ད་ལྟ་མེ་མ་མུར་དུ་ལག་པ་བཅུག་ནས་ཡུད་ཙམ་སྡོད་པ་དང༌། དགུན་གྲང་བ་སྒང་ལ་གོས་མེད་པར་ཞག་གཅིག་ཙམ་སྡོད་པ་དང༌། ཞག་ཁ་ཡར་ཟས་གང་ཡང་མེད་པར་སྡོད་པ་དང༌། ལུས་ལ་སྦྲང་བུ་སོགས་ཀྱིས་སོ་བཏབ་པ་ཙམ་ཡང་བཟོད་པར་དཀའ་ན་ཚ་གྲང་གི་དམྱལ་བ་ཡི་དགས་དུད་འགྲོ་གཅིག་གིས་གཅིག་གསོན་པོར་མིད་པའི་སྡུག་བསྔལ་སོགས་བདག་གིས་ཇི་ལྟར་བཟོད་སྙམ་དུ་ད་ལྟའི་ཉམས་ལ་དཔག་ནས་ཤིན་ཏུ་འཇིགས་ཤིང་སྐྲག་པའི་ཡིད་ཀྱི་འགྱུར་བ་མ་ཐོན་བར་དུ་བསྒོམ་ཞིང༌། དེས་ན་བདག་གིས་དལ་བའི་རྟེན་བཟང་པོ་ཐོབ་པའི་དུས་འདིར་ངན་སོང་གི་རྒྱུ་སྤོང་བ་དང་བདེ་འགྲོའི་རྒྱུ་ལ་འབད་པའི་སྒོ་ནས་ངན་སོང་དུ་མི་སྐྱེ་བའི་ཐབས་ལ་འབད་པར་བྱའོ་སྙམ་དུ་བསྒོམ། འོ་ན་ངན་སོང་དུ་མི་སྐྱེ་བའི་ཐབས་ལ་ཇི་ལྟར་འབད་སྙམ་ན་གོང་དུ་བཤད་པ་ལྟར་ངན་སོང་གི་སྡུག་བསྔལ་གྱིས་འཇིགས་པ་དང༌། འཇིགས་པ་དེ་ལས་སྐྱོབ་པའི་ནུས་པ་དཀོན་མཆོག་གསུམ་ལ་ཡོད་པར་ཤེས་ནས་དཀོན་མཆོག་རིན་པོ་ཆེ་རྣམ་པ་གསུམ་ལ་སྙིང་ཐག་པ་ནས་སྐྱབས་སུ་འགྲོ་བར་བྱ་ལ། དཀོན་མཆོག་གསུམ་གྱིས་ངན་སོང་གི་འཇིགས་པ་ལས་སྐྱོབ་ནུས་པ་ཡང་ཡིན་ཏེ། སངས་རྒྱས་དཀོན་མཆོག་དེ་རང་འཇིགས་པ་ཐམས་ཅད་ལས་གྲོལ། །གཞན་འཇིགས་པ་ཐམས་ཅད་ལས་སྐྱོབ་པའི་ཐབས་ལ་མཁས། ཀུན་ལ་ཐུགས་རྗེ་ཆེན་པོ་ཉེ་རིང་མེད་པར་འཇུག །ཕན་བཏགས་མ་བཏགས་ཐམས་ཅད་ཀྱི་དོན་མཛད་པས་སྐྱབས་སུ་འོས་ཤིང༌། དེས་ཆོས་དང་དགེ་འདུན་ཡང་མཚན་ནུས་ལ། །དེས་ན་ཕྱི་རོལ་བའི་སྟོན་པ་དང་ཆོས་དང་དགེ་འདུན་ལ་ཡོན་ཏན་དེ་དག་གང་ཡང་མེད་པས་སྐྱབས་སུ་མི་འོས། དཀོན་མཆོག་གསུམ་ལ་ཡོན་ཏན་དེ་ལྟར་ཡོད་པས་སྐྱབས་སུ་འགྲོ་བར་འོས་སོ། །སྐྱབས་སུ་ཇི་ལྟར་འགྲོ་ན། རྐང་གཉིས་རྣམས་ཀྱི་
མཆོག་སངས་རྒྱས་ལ་སྐྱབས་སུ་མཆིའོ། །བདག་འཁོར་བ་དང་ངན་སོང་གི་སྡུག་བསྔལ་ལས་སྒྲོལ་བའི་སྟོན་པ་མཛད་དུ་གསོལ། འདོད་ཆགས་དང་བྲལ་བ་རྣམས་ཀྱི་མཆོག་ཆོས་ལ་སྐྱབས་སུ་མཆིའོ། །བདག་འཁོར་བ་དང་ངན་སོང་གི་འཇིགས་པ་ལས་སྒྲོལ་བའི་སྐྱབས་དངོས་མཛད་དུ་གསོལ། ཚོགས་རྣམས་ཀྱི་མཆོག་དགེ་འདུན་ལ་སྐྱབས་སུ་མཆིའོ། །བདག་འཁོར་བ་དང་ངན་སོང་གི་སྡུག་བསྔལ་ལས་སྒྲོལ་བའི་གྲོགས་མཛད་དུ་གསོལ། ཞེས་སྙིང་ཐག་པ་ནས་བློ་ལིངས་བློས་བསླངས་ཏེ་བཀལ་བའི་སྐྱབས་འགྲོ་བྱ། དེ་ལྟར་སྐྱབས་སུ་སོང་ནས་བསླབ་བྱ་ལ་མ་བསླབས་ན་སྐྱབས་འགྲོ་ལས་ཉམས་པར་འགྱུར་བས་བསླབ་བྱ་ལ་སློབ་དགོས། དེ་ཡང་བདག་སངས་རྒྱས་ལ་སྐྱབས་སུ་སོང་ན་འཇིག་རྟེན་པའི་ལྷ་དྲག་པོ་ཁྱབ་འཇུག་སོགས་ལ་སྐྱབས་སུ་མི་འཛིན། སངས་རྒྱས་ཀྱི་སྐུ་གཟུགས་ལ་ཡང་སངས་རྒྱས་དངོས་ཀྱི་འདུ་ཤེས་བྱས་ཏེ་གུས་པར་བྱ། བདག་ཆོས་ལ་སྐྱབས་སུ་སོང་ནས་སེམས་ཅན་ལ་འཚེ་བ་མི་བྱ། ཡི་གེ་ན་གཅིག་ཡན་ཆད་ལ་མ་གུས་པ་སྤངས་ཏེ་གུས་པར་བྱ། བདག་དགེ་འདུན་དཀོན་མཆོག་ལ་སྐྱབས་སུ་སོང་ནས་མུ་སྟེགས་སམ་སྡིག་གྲོགས་དང་འགྲོགས་འདྲིས་མི་བྱ། ཐ་ན་སེར་མ་གྱོན་པ་ཙམ་ལ་ཡང་མ་གུས་པ་སྤངས་ཏེ་གུས་པར་བྱའོ། །གཞན་ཡང་ཕན་བདེ་དགེ་ལེགས་ཐམས་ཅད་དཀོན་མཆོག་གི་བཀའ་དྲིན་དུ་ཤེས་པར་བྱས་ཏེ་བཟའ་བཏུང་གི་ཕུང་སོགས་ཀྱིས་དཀོན་མཆོག་ལ་མཆོད་པ་དང༌། འཕྲལ་དང་ཕུག་གི་དོན་ཐམས་ཅད་དཀོན་མཆོག་གསུམ་ལ་གསོལ་བ་བཏབ་ནས་བྱེད་ཀྱི་ཕལ་པའི་མོ་བོན་སད་སུད་ལ་མི་བརྟེན། རང་གི་ནུས་པ་གང་ཡོད་ཀྱིས་སེམས་ཅན་གཞན་དཀོན་མཆོག་ལ་སྐྱབས་སུ་འགྲོ་བ་ལ་དགོད། སྲོག་གི་ཕྱིར་ཡང་དཀོན་མཆོག་མི་གཏོང་ཞིང༌། དེ་གཏོང་པའི་ཚིག་ཙམ་ཡང་མ་ཤོར་བ་བྱེད་དགོས་ཡང་སྙམ་པར་བྱས་ནས་ཉིན་ལན་གསུམ་མཚན་ལན་
གསུམ་དུ་བསམས་ལ། ཡོན་ཏན་ཤེས་པ། ཁྱད་པར་ཤེས་པ། ཁས་བླངས་པ་གཞན་དུ་མི་སྨྲ་བའི་སྒོ་ནས་ཉིན་ལན་གསུམ་མཚན་ལན་གསུམ་དུ་བསམ་པ་ཐག་པ་ནས་སྐྱབས་འགྲོ་བྱའོ། །འོ་ན་དཀོན་མཆོག་གསུམ་ལ་སྐྱབས་སུ་སོང་བས་ངན་སོང་གི་སྡུག་བསྔལ་ལས་སྐྱོབ་ནུས་མོད། མཐོ་རིས་ཀྱི་འཇིག་རྟེན་ཇི་ལྟ་བུ་སྒྲུབ་སྙམ་ན། དེ་ཡང་དཀར་ནག་གི་ལས་འབྲས་བསམ་སྟེ་དགེ་སྡིག་གི་ལས་སོ་སོར་ངེས་པ་དང༌། འཕེལ་ཆེ་བ་ལས་མ་བྱས་པ་དང་མི་འཕྲད་པ་ལས་བྱས་པ་ཆུད་མི་ཟ་བ་སོགས་ཀྱི་ཚུལ་བསམ་སྟེ་དགེ་སྡིག་གི་བླང་དོར་ཚུལ་བཞིན་དུ་བྱེད་དགོས་ལ། དེ་ཡང་དངོས་སྟོབས་ཀྱི་རིགས་པས་ངེས་མི་ནུས་པས། ཏིང་ངེ་འཛིན་གྱི་རྒྱལ་བོ་ལས། །ཟླ་བ་སྐར་མར་བཅས་པ་གནས་ལྷུང་ཞིང༌། །རི་དང་གྲོང་དང་བཅས་པའི་ས་ཞིག་ལ། །ནམ་མཁའི་ཁམས་ནི་རྣམ་པ་གཞན་གྱུར་ཀྱང༌། །ཁྱོད་ནི་མི་བདེན་པ་ཡི་ཚིག་མི་གསུང༌། ཞེས་གསུངས་པ་ལྟར་སངས་རྒྱས་ཀྱི་གསུང་ལ་ཞེ་ཐག་པ་ནས་ཡིད་ཆེས་རྙེད་པར་བྱས་ནས། །མི་དགེ་བ་ལས་སྡུག་བསྔལ་འབྱུང༌། །དེ་ལས་ཇི་ལྟར་ངེས་ཐར་ཞེས། །ཉིན་མཚན་ཀུན་ཏུ་བདག་གིས་ནི། །འདི་ཉིད་འབའ་ཞིག་བསམ་པའི་རིགས། །ཞེས་དང༌། །དགེ་བའི་ཕྱོགས་རྣམས་ཐམས་ཅད་ཀྱི། །རྩ་བ་མོས་པར་ཐུབ་པས་གསུངས། །དེའི་ཡང་རྩ་བ་རྟག་ཏུ་ནི། །རྣམ་སྨིན་འབྲས་བུ་སྒོམ་པའོ། །ཞེས་གསུངས་པ་ལྟར། སྤྱིར་མི་དགེ་བ་མཐའ་དག་སྤངས། ཁྱད་པར་སྒོ་གསུམ་གྱི་མི་དགེ་བ་བཅུ་ཆེ་འབྲིང་ཆུང་ངུར་སྤྱོད་པའི་རྣམ་སྨིན་ངན་སོང་དུ་སྐྱེ་བ། རྒྱུ་མཐུན་དང་བདག་འབྲས་སོགས་ཡིད་དུ་མི་འོང་བ་འབྱིན་ཚུལ་བསམས་ལ། བདེན་པ་པོའི་ལེའུ་ལས། རྒྱལ་བོ་ཁྱོད་ནི་སྲོག་གཅོད་མ་མཛད་ཅིག །སྐྱེ་བོ་ཀུན་ལ་སྲོག་ནི་རབ་ཏུ་ཕོངས། །དེ་བས་ཡུན་རིང་ཚེ་བསྲིང་སུ་འདོད་པ། །ཡིད་ཀྱིས་སུ་ལའང་སྲོག་
གཅོད་མི་བསམ་མོ། །ཞེས་གསུངས་པ་ལྟར་སྲོག་གཅོད་པ་སོགས་ཀྱི་ཁ་ན་མ་ཐོ་བ་རྣམས་ལ་ཀུན་སློང་ཙམ་ཡང་མི་རྒྱུ་བར་སྡོམ་སེམས་མང་དུ་བསྟེན། སྲོག་གཅོད་སྤོང་པ་སོགས་དགེ་བ་མཐའ་དག་ལ་འབད་ནས་སྒྲུབ་དགོས་ཨང༌། རྗེ་བླ་མས་ཀྱང༌། ཤི་ནས་ངན་འགྲོར་མི་སྐྱེའི་གདིང་མེད་ཅིང༌། །དེ་ཡི་འཇིགས་སྐྱོབ་དཀོན་མཆོག་གསུམ་དུ་ངེས། །དེ་ཕྱིར་སྐྱབས་འགྲོ་ཤིན་ཏུ་བསྟེན་པ་དང༌། །དེ་ཡི་བསླབ་བྱ་ཉམས་པ་མེད་པར་བྱ། །དེ་ཡང་དཀར་ནག་ལས་འབྲས་ལེགས་བསམ་སྟེ། །བླང་དོར་ཚུལ་བཞིན་སྒྲུབ་ལ་རག་ལས་སོ། །ཞེས་གསུངས། དེ་ཡང་མི་དགེ་བཅུ་སྤོང་གི་ཚུལ་ཁྲིམས་བསྲུངས་པས་རྟེན་བཟང་པོ་རྙེད་མོད་ཀྱང་ལམ་མཆོག་རྣམ་མཁྱེན་སྒྲུབ་པ་ལ་རིགས་མཐོ་ཞིང་གཟུགས་བཟང་བ་སོགས་ཀྱི་རྣམ་སྨིན་གྱི་ཡོན་ཏན་བརྒྱད་དང་ལྡན་པ་ཞིག་སྒྲུབ་དགོས་པས་དེའི་རྒྱུ་སེམས་ཅན་གཞན་ལ་འཚེ་བ་སྤོང་བ། མར་མེ་དང་གོས་གསར་པ་སོགས་སྦྱིན་པ། ང་རྒྱལ་བཅོམ་ནས་གཞན་ལ་གུས་པར་བྱ་བ་སོགས་ལ་དྲན་ཤེས་བསྟེན་ནས་ལག་ཏུ་ལེན་དགོས། འོན་ཀྱང་ཉོན་མོངས་མང་བ་སོགས་ཀྱིས་གལ་ཏེ་སྡིག་ལྟུང་གིས་གོས་ན། དེ་ཇི་མི་སྙམ་པར་མི་འཇོག་པར་ལྟུང་བ་རྣམས་སྐབས་དང་བསྟུན་པའི་ཕྱིར་བཅོས་དང༌། སྡིག་པ་རྣམས་སྟོབས་བཞི་ཚང་བའི་སྒོ་ནས་བཤགས་པར་བྱས་ལ། སྒོ་གསུམ་སྡིག་ལྟུང་གིས་མ་གོས་པ་ལ་འབད་པར་བྱ་དགོས་ཏེ། རྗེ་བླ་མས་ཀྱང༌། ལམ་མཆོག་སྒྲུབ་ལ་མཚན་ཉིད་ཚང་བའི་རྟེན། །མ་རེད་པར་དུས་ཚོད་མི་འོང་པས། །དེ་ཡི་མ་ཚང་མེད་པའི་རྒྱུ་ལ་བསླབ། །སྒོ་གསུམ་སྡིག་ལྟུང་དྲི་མས་སྦགས་པ་འདི། །ལྷག་པར་ལས་སྒྲིབ་སྦྱོང་བ་གནད་ཆེ་བས། །རྒྱུན་དུ་སྟོབས་བཞི་ཚང་བ་བསྟེན་པ་གཅེས། ཞེས་གསུངས་པས་སོ། །དེ་ལྟར་བསྒོམས་པས་ཚེ་འདི་ལ་བློ་ལོག་སྟེ་ཚེ་ཕྱི་མའི་ཕུན་ཚོགས་དོན་གཉེར་གྱི་
བློ་བཅོས་མིན་ནམ་སྐྱེས་པ་ན་སྐྱེས་བུ་ཆུང་ངུའི་ལམ་ལ་བློ་སྦྱོངས་པའི་ལག་རྗེས་བྱུང་བ་ཡིན་ནོ། །གཉིས་པ་སྐྱེས་བུ་འབྲིང་དང་ཐུན་མོང་བའི་ལམ་ལ་བློ་སྦྱང་བ་ནི། དེ་ལྟར་མི་དགེ་བཅུ་སྤངས་ཤིང་དགེ་བཅུ་ཉམས་སུ་བླངས་པས་མཐོ་རིས་ཀྱི་རྟེན་ཁྱད་པར་ཅན་ཞིག་འཐོབ་མོད་ཀྱང་འཁོར་བའི་སྡུག་བསྔལ་ལས་མ་འདས་པས། དེས་ན་སྡུག་བསྔལ་མཐའ་དག་སྤངས་པའི་ཐར་བ་ཞིག་ཐོབ་དགོས་སོ། །འོ་ན་འཁོར་བ་མཐའ་དག་སྡུག་བསྔལ་གྱི་རང་བཞིན་ཇི་ལྟར་ཡིན་སྙམ་ན། ངན་སོང་གསུམ་ནི་སྔར་བཤད་པ་ལྟར་ཡིན་ལ། དེ་ཡང་སྐབས་འདིར་ཅུང་ཟད་ཁྱད་པར་བཏོན་ནས་བསམ་དགོས་པ་ནི་ངན་སོང་སོ་སོའི་སྡུག་བསྔལ་བསམ་ནས་དེའི་རྗེས་ལ། འདི་ལྟ་བུའི་སྡུག་བསྔལ་དར་དྲག་ལ་རྒྱུན་རིང་བ་འདི་བདག་གིས་བཟོད་ཐབས་མི་འདུག་པས་འདིས་མཚོན་པའི་འཁོར་བའི་སྡུག་བསྔལ་སྤངས་པའི་ཐར་བ་ཅི་ནས་ཀྱང་ཐོབ་པར་བྱ་སྙམ་དུ་བསམ། ངན་སོང་ལས་གཞན་པའི་འཁོར་བ་མཐོ་དམན་མཐའ་དག་ཀྱང་སྡུག་བསྔལ་གྱི་རང་བཞིན་ལས་མ་འདས་ཏེ། མི་རྣམས་ལ་ནི་སྐྱེ་བ་ན་མའི་མངལ་མུན་ནག་དྲི་ང་བ་ལྗན་ལྗིན་མང་བ་སོགས་ཀྱིས་སྡུག་བསྔལ་ཞིང༌། སྐྱེ་བ་ན་ཞག་བདུན་ཕྲག་སོ་བརྒྱད་པ་ལ་སྔོན་ལས་ཀྱི་རང་གིས་བདས་ཏེ་འཇུར་མིག་ལ་འདྲེན་པའམ། ཏིལ་བཙིར་བ་ལྟར་ཤིན་ཏུ་སྡུག་བསྔལ་བ་དང༌། བཙས་ནས་ཀྱང་ཤིན་ཏུ་འཇམ་པའི་གདན་ལ་བཞག་ཀྱང་ཚེར་མའི་ཁྲོད་དུ་ལྷུང་བ་ལྟ་བུའི་སྡུག་བསྔལ་བཟོད་ཐབས་མེད་པ་ཉམས་སུ་མྱོང་བས་ན་སྐྱེ་བའི་སྡུག་བསྔལ་དེ་ལྟ་བུ་ཡོད། བཙས་ནས་ལུས་ལང་ཚོ་དར་ལ་བབ་པར་གྱུར་བ་ནི་རིམ་པས་སྐེད་པ་ནི་གཞུ་ལྟར་དགུག །མགོ་བོ་ནི་སྤྲ་བའི་མེ་ཏོག་ལྟར་དཀར། དཔྲལ་བ་ནི་གྲས་སྟན་ལྟར་གཉེར་མས་ཁེངས། སྡོད་པའི་ཚེ་སྐྱ་ཐག་ཆད་པ་ལྟ་བུ། ལྡང་བའི་ཚེ་ཤིང་ཆ་གནམ་དུ་འདོན་པ་འདྲ་བ། སྨྲ་ནི་ལྕེ་རྡིབ། །
འགྲོ་ན་ལུས་འབུབ་འཁྱོར། མིག་རྣ་སོགས་ཀྱིས་ཡུལ་གསལ་བར་མི་མཐོང༌། ལུས་ཀྱི་མདངས་ཉམས་པ་ནི་རོ་ལྟ་བུ། དྲན་པ་ཉམས་པས་བརྗེད་ངེས་ཆེ། བཟའ་བཏུང་སོགས་འཇུ་དཀའ་ཞིང་ཇི་ལྟར་འདོད་པ་བཞིན་ལོངས་སྤྱོད་མི་ནུས། ཚེ་ཕལ་ཆེར་ཟད་པས་འཆི་བ་ལ་མྱུར་དུ་ཕྱོགས་པའི་རྒ་བའི་སྡུག་བསྔལ་དང༌། ལུས་ཀྱི་འབྱུང་བ་ཆ་མ་སྙོམས་པར་འཁྲུགས་ཏེ་ན་བའི་ཚེ་ཕྱིའི་པགས་པ་སྐམ། ནང་གི་ཤ་ཞུ། བཟའ་བཏུང་ཡིད་དུ་འོང་བ་རྣམས་ནང་ལ་ཕོག་དོག་པ་སྤང་དགོས། །ཡིད་དུ་མི་འོང་བའི་བཟའ་བཏུང་སྨན་ལ་སོགས་པ་མི་འདོད་བཞིན་བསྟན་དགོས། གཏར་སྲེག་སོགས་ཀྱི་དཔྱད་རྩུབ་མོ་རྣམས་བསྟེན་དགོས། ནད་མི་འཚོ་བར་དོགས་ནས་སྡུག་བསྔལ་དཔག་ཏུ་མེད་པ་མྱོང་དགོས་པ་ན་བའི་སྡུག་བསྔལ། འཆི་ངེས་བའི་ནད་དྲག་པོས་ཐེབས་ན་འཆི་བར་ཤེས། སྔར་བྱས་ཀྱི་ལས་ངན་རྣམས་ལ་ནི་འགྱོད་མི་ཚེ་སྟོང་ཟད་དུ་སོང་བ་ནི་དྲན། ལུས་ལོངས་སྤྱོད་གཉེན་བཤེས་འཁོར་གཡོག་རྣམས་འབྲལ་བ་ནི་ཤེས། ཁ་ནི་བསྐམས། མཆུ་ནི་བརྫེས། །སྣ་ནི་ཞོམ། མིག་ནི་ཀོང་དམར་པོར་སོང༌། དབུགས་ནི་བརྩེགས། ངན་སོང་གི་སྡུག་བསྔལ་དྲག་པོས་ནི་འཇིགས། མི་འདོད་བཞིན་དུ་འཆི་དགོས་པའི་སྡུག་བསྔལ། རེས་འགའ་ཆོམ་རྐུན་སོགས་དགྲ་མི་སྡུག་པ་དང་ཕྲད་ནས་ཟས་ནོར་ཐམས་ཅད་བཅོམ། ལུས་ལ་མཚོན་དང་དབྱུག་པ་སོགས་ཀྱིས་བསྣུན། རེས་རྒྱལ་པོ་སོགས་ཀྱི་ཆད་ལས་མི་འདྲ་བ་སྣ་ཚོགས་ཀྱིས་མནར་བ་དང༌། ཡང་ན་གཏམ་ངན་ཐོས་པ་སོགས་ཀྱི་མི་སྡུག་པ་དང་ཕྲད་པའི་སྡུག་བསྔལ། ཟས་ནོར་སོགས་བདེ་སྡུག་གཏམ་ངན་ཁྱད་དུ་བསད་ནས་བསྒྲུབས་པ་རྣམས་དང་སྙིང་ཉེ་བ་སོགས་ཡིད་དུ་འོང་བ་དང་མི་འདོད་བཞིན་དུ་འབྲལ་བའི་སྡུག་བསྔལ། འདོད་པ་བཙལ་ཡང་མ་རྙེད་པའི་སྡུག་བསྔལ་ནི་ཁྱིམ་པ་ལྟ་བུ་ལ་ཞིང་ལས་ལ་འབད་ཀྱང་ཐན་པ་སད་
སེར་སོགས་ཀྱིས་ལོ་ཏོག་འདོད་པ་བཞིན་མ་གྲུབ་པ། གྲུ་གཅོད་པའི་ཚེ་རླུང་ལ་སོགས་པས་མ་རུངས་པར་གྱུར་པ། ཚོང་པ་ཡིན་ན་ཚོང་ཟོང་བརླག་པ་ཁེ་སྤོགས་མ་བྱུང་བ་སོགས་དང༌། རབ་བྱུང་རྣམས་ལ་ནི་ཁས་བླངས་པའི་ཚུལ་ཁྲིམས་མགོ་མ་ཐོན་པ་སོགས་གང་རེ་བ་དེ་མ་ཐོབ་པའི་སྡུག་བསྔལ། ཉེར་ལེན་གྱི་ཕུང་པོ་འདི་བླངས་ཙམ་གྱིས་ཚེ་འདིར་ན་རྒ་འཆི་བ་སོགས་སྡུག་བསྔལ་གྱི་རྟེན་བྱེད། ཚེ་ཕྱི་མའི་སྡུག་བསྔལ་རྣམས་འདྲེན་པར་བྱེད། སྡུག་བསྔལ་དང་འགྱུར་བའི་སྡུག་བསྔལ་གཉིས་ཀྱི་སྣོད་དུ་གྱུར་བ་དང༌། ངོ་བོ་ཁྱབ་པ་འདུ་བྱེད་ཀྱི་སྡུག་བསྔལ་གྱི་རང་བཞིན་ཡིན་པས་སྡུག་བསྔལ་བའི་རང་བཞིན་མ་གཏོགས་བདེ་བའི་རང་བཞིན་ཅུང་ཟད་ཀྱང་མི་འདུག་གོ། །ལྷ་མིན་ནི་ལུས་བཅད་དྲལ་སོགས་ཀྱི་སྡུག་བསྔལ་ཤིན་ཏུ་རྩུབ་པ་ལས་མ་འདས། འདོད་ལྷ་རྣམས་ལ་ནི་འཆི་ལྟས་ལྔས་ཟིན་པ་ན་དམྱལ་བའི་སྡུག་བསྔལ་ལས་ཆེས་ཆེ་བའི་སྡུག་བསྔལ་དང༌། སྤ་བཀོང་བ་དང༌། གནས་ནས་སྐྲོད་པ་སོགས་སྡུག་བསྔལ་དཔག་ཏུ་མེད་པ་ཡོང༌། །ཁམས་གོང་མའི་ལྷ་སོ་སྐྱེལ་སྡུག་བསྔལ་གྱི་སྡུག་བསྔལ་མངོན་གྱུར་མེད་ཀྱང༌། བསམ་གཏན་གསུམ་པ་མན་ཆད་ལ་འགྱུར་བའི་སྡུག་བསྔལ་དང༌། བསམ་གཏན་བཞི་པ་དང་གཟུགས་མེད་ཁམས་སུ་ནི་ཁྱབ་པ་འདུ་བྱེད་ཀྱི་སྡུག་བསྔལ་ཕོལ་མིག་ཀུན་ནས་ཚ་བ་ལྟ་བུའི་སྡུག་བསྔལ་ལས་མ་འདས་འདུག་པས་འཁོར་བ་སྤྱི་བྱེ་བྲག་གི་སྡུག་བསྔལ་འདི་རྣམས་སྤངས་པའི་ཐར་བའི་གོ་འཕང་ཅི་ནས་ཀྱང་ཐོབ་པར་བྱེད་དགོས་སོ། །དེ་ཡང་རྒྱུ་མེད་རྐྱེན་མེད་དུ་མི་འཐོབ་པས་ཐར་བ་ཐོབ་བྱེད་ཀྱི་ཐབས་བསླབ་པ་གསུམ་ལ་ཚུལ་བཞིན་དུ་བསླབ་པར་བྱ་དགོས། དེ་ཡང་བསླབ་པ་གཞན་གཉིས་ཀྱི་གཞི་རྟེན་མེད་མི་རུང་ལྷག་པ་ཚུལ་ཁྲིམས་ཀྱི་བསླབ་པ་ལ་བསླབ་དགོས། དེ་ཡང་མི་ཤེས་པ་སོགས་ལྟུང་བ་འབྱུང་བའི་རྒྱུ་རྣམས་ལ་དྲན་ཤེས་ཀྱི་ལེགས་
པར་བརྟགས་ནས་དང་པོར་ལྟུང་བ་མི་འབྱུང་བ་ཞིག་བྱེད། གལ་ཏེ་བྱུང་ཡང་ལྟུང་བ་དང་རྒྱུན་རིང་དུ་མི་འགྲོགས་པར་བཤགས་སྡོམ་ཚུལ་བཞིན་དུ་བྱེད་དགོས། དེས་ན་ཉོན་མོངས་པ་གང་ཆེ་བ་དེའི་གཉེན་པོ་འབད་ནས་བསྒོམས་ཏེ་ལྟུང་བས་མ་གོས་པར་བྱེད་ཅིང་ལས་དང་བྱ་བ་ཅི་བྱེད་ཀྱང་སྟོན་པའི་བཀའ་དང་མི་འགལ་བར་རང་ལ་མི་ཁྲེལ་བ་ཞིག་བྱེད་དགོས་ཨང༌། རྗེ་བླ་མས་ཀྱང༌། །སྡུག་བདེན་ཉེས་དམིགས་བསམ་ལ་མ་འབད་ན། །ཐར་བ་དོན་གཉེར་ཇི་བཞིན་མི་སྐྱོ་ཞིང༌། །ཀུན་འབྱུང་འཁོར་བའི་འཇུག་རིམ་མ་བསམ་ན། །འཁོར་བའི་རྩ་བ་གཅོད་ཚུལ་མི་ཤེས་པས། །སྲིད་ལས་ངེས་འབྱུང་སྐྱོ་ཤས་བསྟེན་པ་དང༌། །འཁོར་བར་གང་གིས་བཅིངས་པ་ཤེས་པ་གཅེས། ཞེས་གསུངས་གདའོ། །དེས་ན་འཁོར་བ་མཐའ་དག་ལ་མེ་འབར་བའི་ཁྱིམ་དུ་ཚུད་པའི་མི་ཞིག་ཁྱིམ་དེ་ལས་ཐར་འདོད་ཡོད་པ་ལྟ་བུའི་འཁོར་བ་ལས་བློ་ལོག་པའི་བློ་སྐྱེས་པ་ན་སྐྱེས་བུ་འབྲིང་གི་ལམ་ལ་བློ་སྦྱངས་པའི་ལག་རྗེས་བྱུང་བ་ཡིན་ནོ། །གསུམ་པ་སྐྱེས་བུ་ཆེན་པོའི་ལམ་ལ་བློ་སྦྱོང་བ་ནི། དེ་ལྟར་ལམ་བསླབ་པ་གསུམ་ཉམས་སུ་བླངས་པས་ཐར་བའི་གོ་འཕང་ཙམ་ཐོབ་ཀྱང༌། དེ་ཙམ་གྱིས་མི་ཆོག་སྟེ། ཐར་བ་ཙམ་ཐོབ་ཕྱིན་ཆད་འཁོར་བར་འཁྱམས་མི་དགོས་ཀྱང་སྐྱོན་ཕྱོགས་རེ་ཙམ་སྤངས་པ་དང་ཡོན་ཏན་ཕྱོགས་རེ་རྫོགས་པ་ཡིན་པས་རང་དོན་མཐར་ཕྱིན་མ་ཐོབ། དེའི་གནད་ཀྱིས་གཞན་དོན་ཡང་ཉི་ཚེ་བ་ལས་མི་འགྲུབ། དེས་ན་དོན་གཉིས་མཐར་ཕྱིན་གྱི་སངས་རྒྱས་ཀྱི་གོ་འཕང་ཞིག་ཐོབ་པར་བྱེད་དགོས་པར་འདུག་གོ། །སངས་རྒྱས་དེ་ཡང་རང་ཉིད་རྐྱང་པའི་ཕྱིར་མིན་གྱི། སེམས་ཅན་ཐམས་ཅད་ཀྱི་ཕྱིར་དོན་དུ་གཉེར་བ་ཞིག་དགོས་ཏེ། རང་སྡུག་བསྔལ་གྱི་རྒྱ་མཚོར་ལྷུང་བ་བཞིན་དུ་སེམས་ཅན་རྣམས་ཀྱང་སྡུག་བསྔལ་གྱིས་མནར་བས་ཉམ་ཐག་པ་ཤ་སྟག་ཡིན་ཞིང༌། སེམས་ཅན་རྣམས་རང་གི་ཕ་མར་མ་གྱུར་བ་གཅིག་ཀྱང་མེད།
དེ་ཡང་ལན་གྲངས་དཔག་ཏུ་མེད་པར་བྱས་ཤིང་དྲིན་གྱིས་བསྐྱངས་པའི་དྲིན་ཅན་འབའ་ཞིག་ཡིན་པས་དྲིན་ཅན་དེ་རྣམས་སྡུག་བསྔལ་ལས་བསྒྲལ་ཏེ། མི་གནས་པའི་མྱང་འདས་བླ་ན་མེད་པའི་གོ་འཕང་ལ་དགོད་པའི་ཕྱིར་དུ་བྱང་ཆུབ་ཀྱི་མཆོག་ཏུ་སེམས་བསྐྱེད་པར་བྱའོ། །དེ་ཡང་རྒྱུ་འབྲས་མན་ངག་བདུན་གྱི་སྒོ་ནས་སེམས་བསྐྱེད་དགོས་ཏེ། རྒྱུ་འབྲས་བདུན་ཡང་སེམས་ཅན་ཐམས་ཅན་མར་ཤེས་པ་ལས་དེ་ཐམས་ཅད་ཀྱི་དྲིན་དྲན་པ་འབྱུང༌། དེ་ལས་དྲིན་གཟོ། དེ་ལས་ཡིད་འོང་གི་བློ། དེ་ལས་ལྷག་བསམ་འདྲེན་ནུས་པའི་བྱམས་པ་དང་སྙིང་རྗེ། དེ་ལས་ལྷག་བསམ་རྣམ་དག །དེ་ལས་བྱང་ཆུབ་ཀྱི་སེམས། དེ་ལས་རྣམས་མཁྱེན་འབྱུང་བའི་ཕྲུགས་བདུན་ཡོད་ལ། དེ་དག་གི་སྔོན་དུ་ཡང་སེམས་ཅན་ཐམས་ཅད་ལ་སེམས་སྙོམས་པའི་གཏང་སྙོམས་སྒོམ་དགོས་ཏེ། སེམས་ཅན་རྣམས་ལ་ཉེ་རིང་བར་མ་ཕྱོགས་སུ་ལྟུང་བ་ཡོད་ན་སེམས་ཅན་རྣམས་ལ་མར་ཤེས་ཀྱི་བློ་མཚན་ཉིད་ཚང་བ་མི་སྐྱེ། བྱམས་སྙིང་རྗེ་ཅུང་ཟད་སྐྱེ་བ་ཡང་ཕྱོགས་རིས་ཅན་དུ་འགྲོ། །དེས་ན་ཐོག་མར་བཏང་སྙོམས་སྒོམ་དགོས། །དེའི་ཚུལ་ཡང་ཚེ་འདིར་ཕན་གནོད་གང་ཡང་མ་བྱས་པའི་བར་མའི་སེམས་ཅན་དུ་མ་ལ་དམིགས་ནས། འདི་དག་གི་ངོས་ནས་བདེ་བ་འདོད་སྡུག་བསྔལ་མི་འདོད་པར་ཡང་མཚུངས་ཤིང༌། རང་གི་ངོས་ནས་འདི་རྣམས་རང་གི་ཕ་མ་བྱས་པའི་གཉེན་ཤ་སྟག་ཡིན་པས་འགའ་རེ་ཉེ་བར་བཟུང་ཕན་འདོགས་འགའ་རེ་རིང་བར་བཟུང་ནས་གནོད་པ་སྐྱེལ་བའི་ཆ་གཉིས་མི་བྱ་བར་འདི་ཐམས་ཅད་ལ་སེམས་མཉམ་པར་བྱའོ་སྙམ་དུ་བསྒོམ། དེ་ནས་ཚེ་འདིའི་གཉེན་ཉེ་བ་རྣམས་དང༌། དེ་ནས་ཚེ་འདིར་གནོད་པ་བྱས་པའི་སེམས་ཅན་རྣམས་ལའང་མཉམ་པར་བྱ། དེ་ལས་སེམས་ཅན་ཐམས་ཅད་ལ་སེམས་སྙོམས་པའི་བཏང་སྙོམས་བསྐྱེད་པར་བྱའོ། །དེ་སྐྱེས་པ་དང་འཁོར་བ་ལ་ཐོག་མཐའ་མེད་པས་ན་བདག་
གི་སྐྱེ་བ་ལའང་ཐོག་མཐའ་མེད། དེའི་གནད་ཀྱིས་གནས་འདི་ལྟ་བུར་མ་སྐྱེས་ཞེས་བྱ་བའམ། སེམས་ཅན་འདི་འདྲ་ཞིག་གིས་བདག་གིས་མ་བྱས་ཞེས་བྱ་བ་གཅིག་ཀྱང་མེད། བྱས་པ་ལ་གྲངས་ཀྱིས་ཀྱང་མི་ཆོད། དེས་ན་སྐྱེ་ཤི་འཕོས་པས་ངོ་མ་ཤེས་པ་མ་གཏོགས་སེམས་ཅན་གྱི་ཁམས་ན་རང་གི་ཕ་མར་མ་གྱུར་པ་གཅིག་ཀྱང་མེད། ཕ་མར་གྱུར་རེས་ཀྱི་ཚེ་འདིའི་མ་དང་འདྲ་བར་དྲིན་གྱིས་བསྐྱངས་པའི་དྲིན་ཅན་ཤ་སྟག་ཡིན། ཚེ་འདིའི་མས་དྲིན་གྱིས་ཇི་ལྟར་བསྐྱངས་ན། བདག་གི་ད་ལྟའི་མ་འདིས་མངལ་དུ་ཡོད་བའི་ཚེ་བདག་ལ་གནོད་ཀྱིས་དོགས་གཡོར་བཟོ་བ་སོགས་ཀྱིས་བསྐྱངས། བཙས་ནས་ནི་འཇམ་པའི་གོས་སྟན་ལ་བཞག །སོར་མོ་བཅུའི་ཁ་ལ་བླངས། བྱམས་པའི་མིག་གིས་བལྟས། དགའ་བའི་འཛུམ་གྱིས་བསུས། བརྩེ་བས་ནུ་ཞོ་བསྣན། ཤའི་དྲོད་ལ་བཅར། ཟས་ལྕེས་བསྙོད། སྣབས་ཁས་ཕྱིས། མི་གཙང་བ་ལག་པས་ཕྱིས། མ་རང་ཉིད་སྲོག་ལ་ཐུག་པ་བས་ཀྱང་བུ་དག་ཅུང་ཟད་ན་བ་སྡུག་པར་བྱས། དཀའ་ལས་སྐྱིད་སྡུག་ཐམས་ཅད་ཁྱད་དུ་བསད་ནས་བསྒྲུབས་པའི་ནོར་དངོས་པོ་རང་གིས་བེད་གཅོད་མ་ནུས་པ་རྣམས་བདག་ལ་སྦྱིན། མདོར་ན་མ་རང་གི་འཁོས་དང་བསྟུན་བའི་གནོད་འཚེ་ལས་བསྐྱབས། ཕན་བཏགས་པའི་དྲིན་ཅན་ཡིན་སྙམ་པའི་བློ་བརྩེ་ཡམ་ཡམ་པ་བྱ། དེ་ནས་ཚེ་འདིའི་ཕ་ལ་སོགས་པའི་གཉེན་ཉེ་བ་རྣམས་དང༌། དེ་ནས་བར་མ་རྣམས་དང༌། དེ་ནས་ཚེ་འདིར་གནོད་པ་བསྐྱལ་བའི་སེམས་ཅན་ལ་དམིགས་ནས་འདི་རྣམས་ཀྱིས་བདག་གི་མ་བྱས་པ་གྲངས་ཀྱིས་མི་ཆོད། དེ་ཡང་མིའི་རྟེན་ལ་མ་བྱས་པ་གྲངས་ཀྱིས་མི་ཆོད་ཅིང༌། མ་ནམ་བྱས་རེས་ཀྱི་ཚེ་འདིའི་མ་བཞིན་དུ་གནོད་པ་ལས་བསྐྱབས། ཕན་ཚད་མེད་པ་བཏགས་པའི་དྲིན་ཅན་ཡིན་ནོ། །དེ་ལྟར་ལན་གྲངས་ཚད་མེད་པར་དྲིན་གྱིས་བསྐྱོངས་པའི་མ་རྣམས་ཉོན་མོངས་པའི་གདོན་གྱིས་སེམས་དཀྲུགས་པས་དེ་དག་
རང་དབང་མེད་པར་སྨྱོ། །གཏི་མུག་གིས་ཤེས་རབ་མིག་ལྡོངས་པས་མངོན་མཐོ་ངེས་ལེགས་ཀྱི་ལམ་བལྟ་བའི་མིག་དང་ནི་བྲལ། ཐར་བའི་གྲོང་དུ་འཁྲིད་པའི་བཤེས་གཉེན་གྱི་ལོང་འཁྲིད་པ་ནི་མེད། སྐད་ཅིག་རེ་རེ་ཞིང་ཉེས་སྤྱོད་ཀྱིས་དབྱེན་བཅོས་ནས་གོམ་འགྲོས་འཁྱོར་བ་དང་ངན་སོང་གི་གཡང་ས་ཉམ་ང་བ་ལ་འགྲིམ་པས་སྡུག་བསྔལ་ཞིང་ཉམ་ཐག་པ་འདི་རྣམས་བུ་བདག་ལ་མི་རེ་ན་སུ་ལ་རེ། མ་དེ་སྡུག་བསྔལ་ལས་སྒྲོལ་བ་ཡང་བདག་ལ་མི་འབབ་ན་སུ་ལ་འབབ། དྲིན་ཅན་གྱི་མ་རྣམས་ཡལ་བར་དོར་ནས་རང་གཅིག་པུ་འཁོར་བ་ལས་ཅི་ཐར་བྱེད་ན་དེ་ལས། ཁྲེལ་དང་ངོ་ཚ་ཆེ་བ་མི་འོང༌། དེས་ན་མ་རྣམས་ཀྱིས་འཁོར་བའི་བདེ་འབྲས་ཚངས་པ་དང་བརྒྱ་བྱིན་སོགས་ཇི་སྙེད་ཅིག་ཐོབ་ཀྱང་རྟག་མ་ཐུབ། དེ་བདག་གིས་རང་ཡལ་བར་དོར་ནས་ནམ་མཁའ་དང་མཉམ་པའི་སེམས་ཅན་ཐམས་ཅད་འཁོར་བའི་སྡུག་བསྔལ་ལས་བསྒྲལ་ཏེ་ཐར་བ་བླ་ན་མེད་པའི་བདེ་བ་ལ་ཅི་ནས་ཀྱང་དགོད་པར་བྱའོ། །དེས་ན་བདེ་བས་ཕོངས་པའི་མ་རྒན་འདི་རྣམས་ཐམས་ཅད་བདེ་བ་དང་ཕྲད་ན་ཅི་མ་རུང༌། བདེ་བ་དང་ཕྲད་པར་གྱུར་ཅིག །ཅི་ནས་ཀྱང་བདེ་བ་དང་ཕྲད་པར་བྱའོ། །སྡུག་བསྔལ་གྱིས་མནར་བའི་མ་རྒན་སེམས་ཅན་འདི་ཐམས་ཅད་སྡུག་བསྔལ་དང་བྲལ་ན་ཅི་མ་རུང༌། སྡུག་བསྔལ་དང་བྲལ་བར་གྱུར་ཅིག །སྡུག་བསྔལ་དང་བྲལ་བར་བྱའོ། །དེ་ཡང་བདག་གིས་བྱའོ། །འོ་ན་དེའི་ནུས་པ་ཁྱོད་ལ་ཡོད་དམ་སྙམ་ན། དེ་ལྟ་ན་བདག་ལ་སེམས་ཅན་ཐམས་ཅད་ལྟ་ཞོག་སེམས་ཅན་གཅིག་ཙམ་ཡང་འཁོར་བའི་སྡུག་བསྔལ་ལས་བསྒྲལ་ནས་བདེ་བ་བླ་ན་མེད་པ་ལ་འགོད་པའི་ནུས་པ་མི་འདུག །དེ་ལྟར་དམ་བཅའ་ཞིག་ནི་བྱས། ད་དམ་བཅའ་དེ་ཡལ་བར་དོར་ན་ངན་སོང་དུ་ལྟུང་བར་འགྱུར་བས། །དེས་ན་སེམས་ཅན་ཐམས་ཅད་སྡུག་བསྔལ་
ལས་སྒྲོལ་བ་དང་བདེ་བ་བླ་ན་མེད་པ་ལ་འགོད་ནུས་པ་སངས་རྒྱས་མ་གཏོགས་གཞན་ན་མི་འདུག་པས་བདག་གིས་སེམས་ཅན་ཐམས་ཅད་སྡུག་བསྔལ་མཐའ་དག་ལས་བསྐྱབ་ནས་བླ་ན་མེད་པའི་བདེ་བ་ལ་འགོད་པའི་དོན་དུ་ཡང་དག་པར་རྫོགས་པའི་སངས་རྒྱས་ཀྱི་གོ་འཕང་ཅི་ནས་ཀྱང་ཐོབ་པར་བྱའོ་སྙམ་དུ་བསམ། དེ་ལྟར་སྨོན་པ་ཙམ་གྱིས་མི་ཆོག་པས་བསམ་པ་སེམས་བསྐྱེད་དེ་ཚེ་འདིར་མི་ཉམས་པའི་བྱང་སེམས་བསྐྱེད་ལ་སྤྲོ་ཤུགས་འཕེལ་བའི་ཕྱིར་དུ་ཕན་ཡོན་བསམ་པ་ལ་བསླབ་པ། སེམས་བསྐྱེད་དངོས་འཕེལ་བའི་ཕྱིར་དུ་ལན་དྲུག་ཏུ་བསྐྱེད་པ་ལ་བསླབ་པ། གང་གི་དོན་དུ་སེམས་བསྐྱེད་པའི་སེམས་ཅན་བློས་མི་སྤོང་བ་ལ་བསླབ་པ། ཚོགས་བསགས་པ་བསླབ་པ་དང་བཞི་ལས། དང་པོ་ནི། བྱང་ཆུབ་ཏུ་སེམས་བསྐྱེད་པ་ཙམ་གྱིས་ལྷ་མི་ཐམས་ཅད་ཀྱིས་མཆོད་པའི་གནས་སུ་འགྱུར། ཉན་རང་དགྲ་བཅོམ་རྣམས་ཀྱང་རིགས་ཀྱི་སྒོ་ནས་ཟིལ་གྱིས་གནོན། རིམ་པ་ལ་སོགས་པའི་ནད་དང་གདོན་གྱིས་མི་ཚུགས་ཤིང༌། ཞི་སོགས་ཀྱི་ལས་ཚོགས་རྣམས་ཀྱང་ཚེགས་མེད་དུ་འགྲུབ། ངན་སོང་ལ་སོགས་པར་མི་སྐྱེ། སྐྱེས་ཀྱང་མྱུར་དུ་ཐར། སྡིག་པ་སྟོབས་ཅན་ཤིན་ཏུ་མི་བཟད་པ་ཡང་མྱུར་དུ་འཇོམས། བྱང་ཆུབ་ཏུ་སེམས་བསྐྱེད་པའི་ཕན་ཡོན་གཟུགས་སུ་གྲུབ་ན་ནི་ནམ་མཁར་མི་ཤོང་བར་བཤད་པས་སེམས་འདི་མི་ཉམས་པར་གོང་འཕེལ་དུ་བྱེད་དགོས་སྙམ་དུ་བསམ། གཉིས་པ་ནི། བདག་གིས་བྱང་ཆུབ་ཀྱི་སེམས་འདི་བར་མ་དོར་བཏང་ན་ཕས་ཕམ་ལས་ཀྱང་རྣམ་སྨིན་ལྕི་བས་སངས་རྒྱས་མ་ཐོབ་བར་མི་གཏོང་ཞིང༌། ཉིན་ལན་གསུམ་མཚན་ལན་གསུམ་དུ། སངས་རྒྱས་ཆོས་དང་ཚོགས་ཀྱི་མཆོག་རྣམས་ལ། །བྱང་ཆུབ་བར་དུ་བདག་ནི་སྐྱབས་སུ་མཆི། །བདག་གིས་སྦྱིན་སོགས་བགྱིས་པ་འདི་དག་གིས། །འགྲོ་ལ་ཕན་ཕྱིར་
སངས་རྒྱས་འགྲུབ་པར་ཤོག །ཅེས་པ་ལན་གསུམ་གསུམ་གྱིས་སེམས་བསྐྱེད་པར་བྱའོ། །གསུམ་པ་ནི། བདག་གིས་སེམས་ཅན་གྱི་དོན་དུ་བྱང་ཆུབ་ཀྱི་སེམས་བསྐྱེད་པ་ཡིན་པས་སེམས་ཅན་གྱི་ངོས་ནས་མི་འདྲ་བ་ཅི་བྱུང་ཡང་བདག་རང་གི་ངོས་ནས་སེམས་ཅན་ཐམས་ཅད་ནམ་དུའང་བློས་མི་སྤང་སྙམ་པར་བྱའོ། །བཞི་པ་ནི། བྱང་ཆུབ་ཀྱི་སེམས་ལན་ཅིག་བསྐྱེད་པ་འདི་མི་ཉམས་ཤིང་གོང་དུ་འཕེལ་བའི་ཕྱིར་དུ་དཀོན་མཆོག་མཆོད་པ་སོགས་ཚོགས་རྒྱ་ཆེན་པོ་ལ་བསླབ་པར་བྱའོ། །སྐྱེ་བ་གཞན་དུ་ཡང་བྱང་ཆུབ་ཀྱི་སེམས་དེ་དང་མི་འབྲལ་བའི་རྒྱུར་ནི་ནག་པོའི་ཆོས་བཞི་སྤོང་བ་དང༌། དཀར་པོའི་ཆོས་བཞི་བསྟེན་པ་ལ་བསླབ་དགོས་པའི། ནག་པོའི་ཆོས་བཞི་ནི། དང་པོ་མཁན་པོ་དང་བླ་མ་སོགས་ཡོན་གནས་གང་ཡང་རུང་བ་ལ་རྫུན་གྱིས་དབུ་སྐོར་ཐབས་བྱེད་པ་ནག་ཆོས་ཡིན་པས་དེ་འདྲ་གཏན་མི་བྱ་ཞིང་དེའི་གཉེན་པོར་སེམས་ཅན་སུ་ལའང་སྲོག་གམ་བཞད་གད་ཀྱི་ཕྱིར་ཡང་རྫུན་མི་སྨྲ། །ནག་ཆོས་གཉིས་པ་གཞན་དགེ་བ་བསྒྲུབས་ནས་མི་འགྱོད་པ་ལ་འགྱོད་དུ་གཞུག་པ་སྟེ། དེ་ལྟ་བུ་གཏན་ནས་མི་བྱ་ཞིང༌། དེའི་གཉེན་པོར་རང་གིས་སྨིན་པར་བྱ་བའི་གདུལ་བྱ་སྣོད་དུ་རུང་ན་ཐེག་དམན་ལ་མི་དགོད་པར་ཐེག་ཆེན་ལ་དགོད་པར་བྱའོ། །ནག་ཆོས་གསུམ་པ་ཐེག་པ་ཆེན་པོར་སེམས་བསྐྱེད་པའི་གང་ཟག་ལ་ཞེ་སྡང་གིས་མི་སྙན་པ་བརྗོད་པ་སྟེ། དེ་འདྲ་གཏན་མི་བྱ་ཞིང་དེའི་གཉེན་པོར་ཐེག་ཆེན་གྱི་གང་ཟག་ལ་སྟོན་པའི་འདུ་ཤེས་བསྐྱེད། སྐབས་སུ་བབ་ན་དོན་ལ་གནས་པའི་བསྔགས་པ་བརྗོད་ཅིང་སེམས་ཅན་ཐམས་ཅད་ལ་ཡང་དག་སྣང་སྦྱང་བར་བྱའོ། །ནག་ཆོས་བཞི་པ་ནི་སེམས་ཅན་ལ་གཡོ་སྒྱུས་སྤྱོད་པར་བྱེད་པ་སྟེ། དེ་འདྲ་ནམ་ཡང་མི་བྱ་ཞིང་སེམས་ཅན་རྣམས་ལ་དྲང་པོའི་བསམ་པ་བྱའོ། །རྗེ་བླ་མས་ཀྱང༌། སེམས་བསྐྱེད་ཐེག་ཆེན་
ལམ་གྱི་གཞུང་ཤིང་སྟེ། །རླབས་ཆེན་སྤྱོད་པ་རྣམས་ཀྱི་གཞི་དང་རྟེན། །ཚོགས་གཉིས་ཀུན་ལ་གསེར་འགྱུར་རྩི་ལྟ་བུ། །རབ་འབྱམས་དགེ་ཚོགས་སྡུད་བའི་བསོད་ནམས་གཏེར། །དེ་ལྟར་ཤེས་ནས་རྒྱལ་སྲས་དཔའ་བོ་རྣམས། །རིན་ཆེན་སེམས་མཆོག་ཐུགས་དམ་མཐིལ་དུ་འཛིན། ཞེས་གསུངས། འོ་ན་སྨོན་སེམས་ལ་བསླབ་པ་ཙམ་གྱིས་ཆོག་གམ་སྙམ་ན། དེ་ཙམ་གྱིས་མི་ཆོག །དེའི་སྟེང་དུ་འཇུག་སྡོམ་བླངས་ནས་རྒྱལ་སྲས་ཀྱི་སྤྱོད་པ་རླབས་པོ་ཆེ་ལ་བསླབ་དགོས་ཤིང༌། དེ་ཡང་རང་རྒྱུད་སྨིན་བྱེད་ཕར་ཕྱིན་དྲུག་དང༌། གཞན་རྒྱུད་སྨིན་བྱེད་པ་བསྡུ་བའི་དངོས་པོ་བཞི་ལ་བསླབ་དགོས་པའི་དང་བོ་ལ་དྲུག་ཡོད་པ་ལས་སྦྱིན་པ་ལ་བསླབ་ཚུལ་ནི་སེམས་ཅན་ཐམས་ཅད་ཀྱི་ཕྱིར་དུ་སངས་རྒྱས་ཐོབ་པར་བྱའོ་སྙམ་པའི་བསམ་པ་དེས་ཀུན་ནས་བསླངས་ཏེ་དམ་པའི་ཆོས་ཀྱིས་ཕོངས་པ་ཐམས་ཅད་ལ་དམ་པའི་ཆོས་ཕྱིན་ཅི་མ་ལོག་པ་བསྟན། རྒྱལ་བོ་དང་དམག་ལ་སོགས་པའི་འཇིགས་པ་དང༌། འདྲེ་གཅན་གཟན་སྦྲུལ་ལ་སོགས་པའི་སེམས་ཡོད་ཀྱི་འཇིགས་པ་དང༌། མེ་ཆུ་སོགས་སེམས་མེད་ཀྱི་འཇིགས་པ་རྣམས་ལས་བསྐྱབས། བཟའ་བཏུང་མལ་སྟན་ན་བའི་གསོས་སྨན་སོགས་ནོར་གྱིས་ཕོངས་པ་རྣམས་ལ་དེ་དག་ཕོངས་མེད་དུ་སྦྱིན། མདོར་ན་ལུས་ལོངས་སྤྱོད་དུས་གསུམ་དུ་བསགས་པའི་དགེ་རྩ་ཐམས་ཅད་ཕོངས་མེད་དུ་གཏོང་ངོ༌། དེ་ལྟར་ཡང་རྗེ་བླ་མས། སྦྱིན་པ་འགྲོ་བའི་རེ་སྐོང་ཡིད་བཞིན་ནོར། །སེར་སྣའི་མདུད་པ་གཅོད་པའི་མཚོན་ཆ་མཆོག །མ་ཞུམ་སྙིང་སྟོབས་སྐྱེད་པའི་རྒྱལ་སྲས་སྤྱོད། །སྙན་པའི་གྲགས་པ་ཕྱོགས་བཅུར་སྒྲོག་པའི་གཞི། །དེ་ལྟར་ཤེས་རབ་ལུས་དང་ལོངས་སྤྱོད་དགེ། །ཡོངས་སུ་གཏོང་བའི་ལམ་བཟང་མཁས་པས་བསྟེན། ཞེས་གསུངས། གཉིས་པ་ཚུལ་ཁྲིམས་ལ་བསླབ་ཚུལ་ནི། སེམས་ཅན་གྱི་དོན་དུ་སངས་རྒྱས་ཐོབ་པར་བྱ། དེའི་ཕྱིར་དུ་དྲན་ཤེས་བཞིན་ངོ་ཚ་ཁྲེལ་
ཡོད་ཀྱི་བསམ་པ་ནོར་བྱས་ལ་མི་དགེ་བ་སྲོག་ལ་བབ་ཀྱང་མི་བྱ་ཞིང༌། དེ་ལྟར་ཉེས་སྤྱོད་སྡོམ་པའི་ཚུལ་ཁྲིམས་དེ་ལ་བརྟེན་ནས་ཕར་ཕྱིན་དྲུག་གོང་འཕེལ་དུ་བྱེད་དགོས། །དེ་གཉིས་ལ་བརྟེན་ནས་སེམས་ཅན་གྱི་དོན་ལ་ཁ་ན་མ་ཐོ་བ་མེད་པར་བསྒྲུབས་ཏེ་ཚུལ་ཁྲིམས་གསུམ་ལ་བསླབ་པར་བྱ་སྟེ། རྗེ་བླ་མས། ཚུལ་ཁྲིམས་ཉེས་སྤྱོད་དྲི་མ་འཁྲུད་པའི་ཆུ། །ཉོན་མོངས་ཚ་གདུང་སེལ་བ་ཟླ་བའི་འོད། །སྐྱེ་རྒུའི་དབུས་ན་ལྷུན་པོ་ལྟ་བུར་བརྗིད། །སྟོབས་ཀྱིས་བསྡིགས་པ་མེད་པར་འགྲོ་ཀུན་འདུད། །དེ་ལྟར་ཤེས་ནས་ཡང་དག་བསླབས་པའི་ཁྲིམས། །དམ་པ་རྣམས་ཀྱིས་མིག་བཞིན་བསྲུང་བར་མཛོད། ཅེས་གདམས། བཟོད་པ་ལ་བསླབ་ཚུལ་ལ། གཞན་གྱིས་རང་ལ་གནོད་པ་བྱས་པ་ལ་ཁྲོ་བར་མི་འོས་ཏེ། གཞན་གྱིས་གནོད་པ་བྱས་པ་དེ་སྔར་རང་གིས་ཁོ་ལ་གནོད་པ་བསྐྱལ་བའི་ལེ་ལན་ཡིན་ཞིང༌། ཁོ་རང་ལའང་ཁོང་ཁྲོས་རང་དབང་མེད་པར་བྱས་པ་ཡིན་པས་གནོད་ལན་བྱེད་མི་རུང༌། ཁོང་ཁྲོ་སྐད་ཅིག་གིས་ཀྱང་བསྐལ་པ་མང་པོར་བསགས་པའི་གཞི་གསུམ་གྱི་དགེ་རྩ་རྣམས་འཇོམས་པར་འདུག་པས་བདག་གིས་ཁོང་ཁྲོའི་བསམ་པ་ཡིད་ཀྱི་དགུ་ལའང་མི་བྱ་ཨང་སྙམ་པ་གནོད་པ་ལ་ཇི་མི་སྙམ་པའི་བཟོད་པ་དང༌། གཞན་གྱིས་བདག་ལ་གནོད་པ་བྱས་ནས་སྡུག་བསྔལ་དྲག་པོ་མྱོང་བས་ནི་ང་རྒྱལ་དང་དྲེགས་པ་སོགས་སེལ། འཁོར་བ་ལས་ངེས་པར་འབྱུང་བའི་བློ་སྐྱེ། སྡུག་བསྔལ་མི་འདོད་པ་བྱང་བ་ན། དེ་མི་དགེ་བ་ལས་བྱུང་བ་ཡིན་པས་རྒྱུ་མེད་ན་འབྲས་བུ་ག་ལ་འབྱུང་སྙམ་དུ་མི་དགེ་བ་ལ་བློ་མི་འཇུག །གཞན་གྱིས་གནོད་པ་བྱས་པ་ལ་བཟོད་པ་བསམས་པས་ཕྱིན་དྲུག་གཞན་རྣམས་ཀྱང་རྫོགས་ནས་འཚང་རྒྱ་བས་གནོད་བྱེད་པ་བཟོད་པ་བསྒོམ་པའི་གདམས་ངག་སྟེར་བའི་བླ་མ་ལྟ་བུར་མཐོང་ནས་དྲིན་ཆེ་བའི་བློ་སྐྱེད་པ་སྡུག་བསྔལ་དང་ལེན་གྱི་བཟོད་པ་དང༌། དཀོན་མཆོག་
གསུམ་དང་སངས་རྒྱས་བྱང་སེམས་ཀྱི་མཐུ་བསམ་གྱིས་མི་ཁྱབ་པ་མཐོང་སྟེ་རྒྱལ་སྲས་ཀྱི་སྤྱོད་པ་དང་བདག་མེད་པའི་དོན་ལ་མོས་པའི་སྒོ་ནས་དེ་རྣམས་ལ་སློབ་འདོད་ཆོས་ལ་ངེས་སེམས་ཀྱི་བཟོད་པ་སྟེ་བཟོད་པའི་ཉམས་ལེན་ཞེ་ཐག་པ་ནས་བྱེད་དགོས་ཏེ། །རྗེ་བླ་མས། བཟོད་པ་སྟོབས་ལྡན་རྣམས་ལ་རྒྱན་གྱི་མཆོག །ཉོན་མོངས་གདུང་བའི་དཀའ་ཐུབ་ཀུན་གྱི་ཕུལ། །ཞེ་སྡང་ལག་འགྲོའི་དགྲ་ལ་ནམ་མཁའ་ལྡིང༌། །ཚིག་རྩུབ་མཚོན་ལ་སྲ་བའི་གོ་ཆ་ཡིན། །དེ་ལྟར་ཤེས་ནས་བཟོད་མཆོག་གོ་ཆ་ལ། །རྣམ་པ་སྣ་ཚོགས་ཚུལ་གྱིས་གོམས་པར་མཛོད། ཅེས་གསུངས་སོ། །བཞི་པ་བརྩོན་འགྲུས་ལ་བསླབ་ཚུལ་ནི། སྒོ་གསུམ་གྱི་སྙོམས་ལས་ངང་འཁྲིག་པ་དང་གཉིད་ཀྱི་བདེ་བ་སོགས་བདེ་བ་དམན་པ་ལ་སྲེད་པས་འཁོར་བ་ལ་སྐྱེ་བ་མ་བསྒོམས་པ་ལས་ལེ་ལོ་སྐྱེ་བས་ལེ་ལོའི་རྒྱུ་དེ་རྣམས་སྤངས་ཏེ་ལུས་ངག་ཡིད་གསུམ་དགེ་བའི་བྱ་བ་འབའ་ཞིག་གིས་འཁོལ་དགོས། དེ་ཡང་སེམས་ཅན་གཅིག་ཙམ་གྱི་སྡུག་བསྔལ་སེལ་བའི་ཕྱིར་དུ་ཡང་དཀའ་སྤྱད་ལུས་སྲོག་ལ་མིག་ལྟ་སྙམ་པ་གོ་ཆའི་བརྩོན་འགྲུས། དེ་ལ་བརྟེན་ནས་ཕར་ཕྱིན་དྲུག་ཉམས་ལེན་གོང་འཕེལ་དུ་བྱེད་པ་དགེ་བ་ཆོས་སྡུད་ཀྱི་བརྩོན་འགྲུས། དེ་གཉིས་ཀྱི་སྒོ་ནས་ཁ་ན་མ་ཐོ་བ་མེད་པས་སེམས་ཅན་གྱི་དོན་འབད་ནས་བྱེད་པ་སེམས་ཅན་དོན་བྱེད་ཀྱི་བརྩོན་འགྲུས་ལ་འབད་དགོས་ཏེ། རྗེ་བླ་མས། མི་ལྡོག་བརྟན་པའི་བརྩོན་འགྲུས་གོ་བགོས་ན། །ལུང་རྟོགས་ཡོན་ཏན་ཡར་ངོའི་ཟླ་བཞིན་འཕེལ། །སྤྱོད་ལམ་ཐམས་ཅད་དོན་དང་ལྡན་པར་འགྱུར། །གང་བརྩམས་ལས་ཀྱི་མཐའ་རྣམས་ཡིད་བཞིན་འགྲུབ། དེ་ལྟར་ཤེས་ནས་ལེ་ལོ་ཀུན་སེལ་བའི། །རླབས་ཆེན་བརྩོན་འགྲུས་རྒྱལ་སྲས་རྣམས་ཀྱིས་བརྩམ། ཞེས་གསུངས་སོ། །ལྔ་པ་བསམ་གཏན་ལ་བསླབ་ཚུལ་ནི། སེམས་བསྐྱེད་ཀྱིས་ཀུན་ནས་བསླངས་ཏེ་འཇིག་
རྟེན་དང་འཇིག་རྟེན་ལས་འདས་པའི་བསམ་གཏན་གཉིས་དང༌། ཕྱོགས་ཀྱི་དབྱེ་བས་ཞི་གནས་དང་ལྷག་མཐོང་ཞི་ལྷག་ཟུང་འབྲེལ་གྱི་བསམ་གཏན་གསུམ་དང༌། བྱེད་ལས་ཀྱི་སྒོ་ནས་མཐོང་ཆོས་ཚེ་འདི་ལ་ལུས་སེམས་བདེ་བར་གནས་པའི་བསམ་གཏན། མངོན་ཤེས་ལ་སོགས་ཡོན་ཏན་གོང་མ་མངོན་པར་སྒྲུབ་པའི་བསམ་གཏན། སེམས་ཅན་གྱི་དོན་སྒྲུབ་པའི་བསམ་གཏན་དང་གསུམ་སྟེ། དེ་རྣམས་ལ་བྱིང་རྒོད་དང་བྲལ་བར་བསླབ་པར་བྱ་དགོས་ཏེ། རྗེ་བླ་མས། བསམ་གཏན་སེམས་ལ་དབང་སྒྱུར་རྒྱལ་བོ་སྟེ། །གཞག་ན་གཡོ་མེད་རི་ཡི་དབང་བོ་བཞིན། །བཏང་ན་དགེ་བའི་དམིགས་པ་ཀུན་ལ་འཇུག །ལུས་སེམས་ལས་སུ་རུང་བའི་བདེ་ཆེན་འདྲེན། །དེ་ལྟར་ཤེས་ནས་རྣལ་འབྱོར་དབང་བོ་རྣམས། །ནམ་གཡེང་དགྲ་འཇོམས་ཏིང་འཛིན་རྒྱུན་དུ་བསྟེན། ཞེས་གསུངས། དྲུག་པ་ཤེས་རབ་ལ་བསླབ་ཚུལ་ནི། སེམས་བསྐྱེད་ཀྱིས་ཀུན་ནས་བསླངས་ཏེ། སྲིད་པའི་རྩ་བ་དྲུང་ནས་འབྱིན་བྱེད་དེ་ཁོ་ན་ཉིད་ཀྱི་དོན་རྟོགས་པ་དོན་དམ་རྟོགས་པའི་ཤེས་རབ་དང༌། ཀུན་རྫོབ་རྟོགས་པའི་ཤེས་རབ་དང༌། དེ་གཉིས་ཀྱིས་སེམས་ཅན་གྱི་དོན་བྱེད་པའི་ཤེས་རབ་རྣམས་ལ་བསླབ་པར་བྱ་དགོས་ཏེ། རྗེ་བླ་མས། ཤེས་རབ་ཟབ་མོའི་དེ་ཉིད་ལྟ་བའི་མིག །སྲིད་པའི་རྩ་བ་དྲུང་ནས་འབྱིན་པའི་ལམ། །གསུང་རབ་ཀུན་ལས་བསྔགས་པའི་ཡོན་ཏན་གཏེར། །གཏི་མུག་མུན་སེལ་སྒྲོན་མེ་མཆོག་ཏུ་གྲགས། །དེ་ལྟར་ཤེས་ནས་ཐར་འདོད་མཁས་པ་ཡིས། །ལམ་དེ་འབད་པ་དུ་མས་བསྐྱེད་པར་མཛད། །ཅེས་གསུངས་སོ། །གཉིས་པ་གཞན་རྒྱུད་སྨིན་བྱེད་བསྡུ་བ་བཞི་ལ་བསླབ་ཚུལ་ནི། སེམས་ཅན་གྱི་དོན་དུ་སངས་རྒྱས་ཐོབ་པར་བྱ་སྙམ་པའི་བསམ་པ་དེས་ཀུན་ནས་བསླངས་ཏེ་ཐོག་མར་ཟང་ཟིང་གི་སྦྱིན་པས་སེམས་ཅན་རྣམས་འཁོར་དུ་བསྡུས། དེ་
ནས་སེམས་ཅན་རྣམས་དགའ་བའི་ཕྱིར་དུ་བཞིན་མདངས་གསལ་བ་སྔོན་དུ་བཏང་སྟེ་ཕེབས་པར་སྨྲ་བས་བག་ཕབ། དེ་ནས་ཕར་ཕྱིན་དྲུག་གི་གཏམ་ལ་སོགས་པ་ཆོས་སྙན་པར་སྨྲ་བ་དང༌། དེ་ནས་ཆོས་བསྟན་པ་ལྟར་དོན་ཉམས་སུ་ལེན་དུ་འཇུག་པའི་དོན་སྤྱོད་པ་དང༌། དེ་ནས་གཞན་ཇི་ལྟར་ཉམས་སུ་ལེན་དུ་བཅུག་པ་ལྟར་རང་ཉིད་ཀྱང་ཕར་ཕྱིན་དྲུག་ཉམས་སུ་ལན་པའི་དོན་མཐུན་པ་སྟེ། གཞན་དོན་སྒྲུབ་པའི་ཐབས་ཟབ་མོ་འདི་རྣམས་ལ་ཅི་ནས་ཀྱང་བསླབ་པར་བྱ་ལ། དེས་ན་བདག་འཛིན་འཁོར་བའི་རྩ་བ་ཡིན་པས་དེ་དང་འཛིན་སྟངས་དངོས་སུ་འགལ་བའི་ལམ་སྒོམ་པ་མེད་པར་རྩེ་གཅིག་པའི་བསམ་གཏན་ཙམ་གྱིས་འཁོར་བའི་རྩ་བ་གཅོད་མི་ནུས་ཤིང་དམིགས་པ་ལས་མི་གཡོ་བར་རྩེ་གཅིག་ཏུ་གནས་པའི་ཞི་གནས་མེད་པར་བདེན་མེད་རྟོགས་པའི་ཤེས་རབ་ཙམ་གྱིས་ཇི་ཙམ་དཔྱད་ཀྱང་ཉོན་མོངས་ཟློག་མི་ནུས་ཏེ། ཉོན་མོངས་སྤངས་པའི་ཐར་བ་ཐོབ་པ་ལ་སྟོང་བ་ཉིད་ཀྱི་དོན་ཕྱིན་ཅི་མ་ལོག་པའི་ཡིན་ལུགས་ཕུ་ཐག་ཆོད་པར་རྟོགས་པའི་ལྟ་བ་དེ་དམིགས་པ་ལ་གཡོ་བ་མེད་པའི་ཞི་གནས་ཀྱི་རྟ་ལ་བསྐྱོན་ནས་རྟག་ཆད་ཀྱི་མཐའ་དང་བྲལ་བའི་དབུ་མའི་རིག་པ་གཏན་ཚིགས་ཆེན་པོ་བཞིའི་མཚོན་རྣོན་པོ་མཐར་འཛིན་གྱི་དམིགས་གཏད་ཐམས་ཅད་འཇིག་པར་བྱེད་པའི་དེ་ཁོ་ན་ཉིད་ཀྱི་དོན་ལ་ཚུལ་བཞིན་དུ་སྤྱོད་པའི་ཤེས་རབ་ཀྱིས་དེ་ཁོ་ན་ཉིད་རྟོགས་པའི་བློ་གྲོས་རྒྱས་པར་མཛད་དགོས་པའི་ཕྱིར། །རྗེ་བླ་མས། རྩེ་གཅིག་བསམ་གཏན་ཙམ་ལ་འཁོར་བ་ཡི། །རྩ་བ་གཅོད་པའི་ནུས་པ་མ་མཐོང་ཞིང༌། །ཞི་གནས་ལམ་དང་བྲལ་བའི་ཤེས་རབ་ཀྱིས། །ཇི་ཙམ་དཔྱད་ཀྱང་ཉོན་མོངས་མི་ཟློག་པས། །ཡིན་ལུགས་ཕུ་ཐག་ཆོད་པའི་ཤེས་རབ་དེ། །གཡོ་མེད་ཞི་གནས་རྟ་ལ་བསྐྱོན་ནས་ནི། །མཐའ་བྲལ་དབུ་མའི་དམིགས་པའི་མཚོན་རྣོན་གྱིས། །མཐར་འཛིན་དམིགས་གཏད་ཐམས་ཅད་འཇིག་བྱེད་པ།
ཚུལ་བཞིན་དཔྱོད་པའི་ཡངས་པའི་ཤེས་རབ་ཀྱིས། །དེ་ཉིད་རྟོགས་པའི་བློ་གྲོས་རྒྱས་པར་མཛད། །ཅེས་གསུངས། དེ་ནས་དམིགས་པ་ལ་རྩེ་གཅིག་ཏུ་གཡོ་བ་མེད་པར་འཇོག་པ་ལས་ཞི་གནས་ཀྱི་ཏིང་ངེ་འཛིན་འགྲུབ་པར་མ་ཟད། རྩེ་གཅིག་པའི་ཏིང་ངེ་འཛིན་ལ་གནས་པའི་ངང་ནས་དེ་ཁོ་ན་ཉིད་ཀྱི་དོན་ལ་ཚུལ་བཞིན་དུ་དཔྱོད་པའི་སོ་སོར་རྟོག་པའི་ཤེས་རབ་ཀྱིས་དཔྱད་པས་ཀྱང་ཡིན་ལུགས་སྟོང་བ་ཉིད་ཀྱི་དོན་ལ་གཡོ་བ་མེད་པར་ཤིན་ཏུ་བརྟན་པའི་ཏིང་ངེ་འཛིན་བསྐྱེད་པར་མཐོང་ནས་ཞི་ལྷག་ཟུང་དུ་འབྲེལ་བ་སྒྲུབ་པ་ལ་བརྩོན་པ་ཡ་མཚན་པ་ཡིན་ནོ་སྙམ་དུ་སྨོན་ལམ་གྱི་ཡུལ་དུ་བྱས་ནས་བག་ཆགས་འཇོག་པ་ལ་འབད་དེ། རྗེ་བླ་མས། རྩེ་གཅིག་བསྒོམས་པས་ཏིང་འཛིན་འགྲུབ་པར་ནི། །སྨོས་པར་ཅི་འཚལ་ཚུལ་བཞིན་དཔྱོད་པ་ཡི། །སོ་སོར་རྟོག་པ་ཡིས་ཀྱང་ཡིན་ལུགས་ལ། །གཡོ་མེད་ཤིན་ཏུ་བརྟན་པར་གནས་པ་ཡི། །ཏིང་འཛིན་བསྐྱེད་པར་མཐོང་ནས་ཞི་ལྷག་གཉིས། །ཟུང་འབྲེལ་སྒྲུབ་ལའང་བརྩོན་རྣམས་ཡ་མཚན་ནོ། །ཞེས་གསུངས། དེ་ལྟ་བུའི་ཞི་ལྷག་ཟུང་འབྲེལ་ལ་མཉམ་པར་བཞག་པའི་ནམ་མཁའ་ལྟ་བུ་སྤྲོས་པའི་མཐའ་ཐམས་ཅད་དང་བྲལ་བའི་སྟོང་ཉིད་ལ་རྩེ་གཅིག་ཏུ་མཉམ་པར་བཞག་ནས་དེ་ལས་ལངས་པའི་རྗེས་ཐོབ་ཏུ་རང་བཞིན་གྱིས་མ་གྲུབ་ཀྱང་དེ་ལྟར་སྣང་བའི་སྒྱུ་མ་ལྟ་བུའི་སྟོང་པ་ཉིད་བསྒོམས་ནས་སྙིང་རྗེ་དང་བྱང་ཆུབ་ཀྱི་སེམས་ཀྱིས་ཟིན་པའི་ཐབས་ཤེས་ཟུང་དུ་འབྲེལ་བའི་ཉམས་ལེན་གྱིས་རྒྱལ་སྲས་ཀྱི་སྤྱོད་པའི་ཕ་རོལ་ཏུ་འགྲོ་བ་ནི་ཤིན་ཏུ་བསྔགས་པར་འོས་ལ། དེ་ལྟར་རྟོགས་ནས་ཐབས་ཤེས་ཡ་བྲལ་བའི་ལམ་ཕྱོགས་རེ་བས་ཚིམ་པ་མེད་པར་ཐབས་ཤེས་ཟུང་འབྲེལ་གྱི་ལམ་ལ་རྟོག་པ་སྐལ་བཟང་རྣམས་ཀྱི་ལུགས་ཡིན་པས་དེ་ལྟར་འབད་དགོས་ཏེ། རྗེ་བླ་མས། མཉམ་བཞག་ནམ་མཁའ་ལྟ་བུའི་
སྟོང་ཉིད་དང༌། །རྗེས་ཐོབ་སྒྱུ་མ་ལྟ་བུའི་སྟོང་བ་གཉིས། །བསྒོམས་པས་ཐབས་ཤེས་ཟུང་དུ་འབྲེལ་བ་ཡིས། །རྒྱལ་སྲས་སྤྱོད་པའི་ཕ་རོལ་འགྲོ་བ་བསྔགས། །དེ་ལྟར་རྟོགས་ནས་ཕྱོགས་རེའི་ལམ་གྱིས་ནི། །ཚིམ་པ་མེད་པ་སྐལ་བཟང་རྣམས་ཀྱི་ལུགས། །ཞེས་གསུངས། དེ་ལྟར་མདོ་སྔགས་ཐུན་མོང་བའི་ལམ་རྣམས་ལ་ལེགས་པར་བསླབས་ནས་གདོན་མི་ཟ་བར་སྔགས་ལ་འཇུག་པར་བྱེད་དགོས་ལ། འཇུག་ཚུལ་ནི། ཐོག་མར་རྡོ་རྗེ་སློབ་དཔོན་མཚན་ཉིད་དང་ལྡན་པ་ཞིག་ལས་རྒྱུད་སྡེ་ནས་བཤད་པ་ལྟར་གྱི་དབང་གིས་རྒྱུད་སྨིན་པར་བྱས། དེའི་ཁས་བླངས་པའང་དམ་ཚིག་དང་སྡོམ་པ་ཚུལ་བཞིན་བསྲུངས་ཏེ་རྒྱུད་སྡེ་འོག་མ་གསུམ་ལྟར་ན་མཚན་བཅས་དང་མཚན་མེད་ཀྱི་རྣལ་འབྱོར་ལ་བསླབས་ཤིང༌། གོང་མ་ལྟར་ན་རིམ་གཉིས་ཀྱི་རྣལ་འབྱོར་ལ་རིམ་ཅན་དུ་བསླབས་པས་མདོ་སྔགས་ཀྱི་ལམ་གྱི་གནད་ཐམས་ཅད་བསྡུས་པའི་ལམ་གྱི་ལུས་ཡོངས་སུ་རྫོགས་པ་ལ་བསླབ་པར་འགྱུར་བས་དལ་འབྱོར་ཐོབ་པ་དོན་ལྡན་དུ་བྱས་པ་ཡིན་ཞིང༌། ཚུལ་དེ་ལྟ་བུའི་སྒོ་ནས་རྒྱལ་བའི་བསྟན་པ་རིན་པོ་ཆེ་རང་གཞན་གྱི་རྒྱུད་ལ་སོན་ཨང༌། རྗེ་བླ་མས་ཀྱང་དེ་ལྟར་དུ་ཐུགས་ཉམས་སུ་བཞེས། བདག་སོགས་རྗེས་འཇུག་རྣམས་ལའང་ཚུལ་དེ་བཞིན་དུ་ཉམས་སུ་ལོངས་ཞིག་ཅེས་གདམས་པར་མཛད་པ་ཡིན་སྙམ་དུ་རྗེ་བླ་མ་མདུན་དུ་བསྒོམས་ནས་གསུང་ལྷང་ལྷང་དགྱེས་བཞིན་གདམས་པར་བསམས་ལ་དངོས་སུ་རང་རང་ཡིད་འགུལ་བའི་སྒོ་ནས་གདོན་པར་བྱའོ། །དེ་ལྟར་ཡང་རྗེ་བླ་མས། དེ་ལྟར་རྒྱུད་དེ་འབྲས་བུའི་ཐེག་ཆེན་གྱི། །ལམ་མཆོག་གཉིས་ཀར་དགོས་པའི་ཐུན་མོང་ལམ། །ཇི་བཞིན་བསྐྱེད་ནས་མཁས་པའི་དེད་དཔོན་གྱི། །མགོན་ལ་བརྟེན་ནས་རྒྱུད་སྡེའི་རྒྱ་མཚོ་ཆེར། །ཞུགས་ནས་ཡོངས་རྫོགས་མན་ངག་བསྟེན་པ་དེས། །དལ་འབྱོར་ཐོབ་པ་དོན་དང་
ལྡན་པར་བྱས། །རྣལ་འབྱོར་ངས་ཀྱང་ཉམས་ལེན་དེ་ལྟར་བགྱིས། །ཐར་འདོད་ཁྱེད་ཀྱང་དེ་བཞིན་བསྐྱང་འཚལ་ལོ། །རང་གི་ཡིད་ལ་གོམས་པར་བྱ་ཕྱིར་དང༌། །སྐལ་བཟང་གཞན་ལའང་ཕན་པར་བྱ་བའི་ཕྱིར། །རྒྱལ་བ་དགྱེས་པའི་ཡོངས་སུ་རྫོགས་པའི་ལམ། །གོ་སླའི་ངག་གིས་བཤད་པའི་དགེ་བ་དེས། །འགྲོ་བ་ཀུན་ཀྱང་རྣམ་དག་ལམ་བཟང་དང༌། །འབྲལ་མེད་གྱུར་ཅིག་ཅེས་ནི་སྨོན་ལམ་འདེབས། །རྣལ་འབྱོར་ངས་ཀྱང་སྨོན་ལམ་དེ་ལྟར་བཏབ། །ཐར་འདོད་ཁྱེད་ཀྱང་དེ་བཞིན་འདེབས་འཚལ་ལོ། །ཞེས་གསུངས་གདམས་བྱུང་སྙམ་པའི་སྒོ་ནས། །དེང་ནས་བརྩམས་ཏེ་ཚེ་རབས་ཀུན་ཏུ་བདག །ཁྱོད་ཞབས་པདྨོ་གུས་པས་མཆོད་པ་དང༌། །ཁྱོད་གསུང་ཉན་ཅིང་སྒོ་གསུམ་བྱ་བ་ཀུན། །ཁྱོད་མཉེས་འབའ་ཞིག་སྒྲུབ་པར་བྱིན་གྱིས་རློབས། ཞེས་སོགས་དང༌། ཚེ་རབས་ཀུན་ཏུ་རྒྱལ་བ་ཙོང་ཁ་པས། །ཞེས་སོགས་ཀྱིས་བསྔོ་བ་བསམ་པ་ཐག་པ་ནས་བྱའོ། །ཇོ་བོ་མར་མེ་མཛད་དང་ཙོང་ཁ་པའི། །གདམས་པའི་ཉིང་ཁུ་བྱང་ཆུབ་ལམ་རིམ་གྱི། །ལམ་གྱི་གནད་བསྡུས་མ་ནོར་གདམས་པ་འདིས། །འགྲོ་ཀུན་རྒྱལ་བ་དགྱེས་པའི་ལམ་བགྲོད་ཤོག །སྐྱེས་བུ་གསུམ་གྱི་ལམ་གྱི་རིམ་པའི་འཁྲིད་བདུད་རྩི་གསེར་གྱི་ཡང་ཞུན་ཞེས་བགྱི་བ་རྗེ་བླ་མའི་ཉམས་མགུར་དང་སྦྱར་ནས་འཁྱེར་བདེ་བར་བཀོད་པ་འདི་ནི་བསྟན་པའི་གསལ་བྱེད་ཆེན་པོ་ལུགས་འདི་ལ་ཤིན་ཏུ་མོས་ཤིང་དོན་དུ་གཉེར་བ། ཀུན་མཁྱེན་ཆེན་པོ་ཤེས་རབ་དཔལ་བཟང་གི་གདན་ས་བ་ཆེན་པོ་མདོ་སྟོང་ཆོས་རྗེས་གསོལ་བ་ནན་ཆེར་བསྐུལ་བ་ལ་བརྟེན་ནས། ན་ཚོད་ཕྲ་མོ་ནས་རྗེ་བླ་མས་བྱིན་གྱིས་བརླབས་པའི་མཚན་མ་ཐོབ་པ། ཤཱཀྱའི་དགེ་སློང་ཆོས་སྨྲ་བའི་བཙུན་པ་བསོད་ནམས་རྒྱ་མཚོས་དཔལ་ལྡན་འབྲས་སྤུངས་ཆོས་ཀྱི་སྡེ་ཆེན་པོའི་གཟིམ་ཁང་དགའ་ལྡན་ཕོ་བྲང་གི་ཉི་འོད་
རྣམ་པར་འཁྱིལ་བར་སྦྱར་བ་འདིས་ཀྱང་བསྟན་པའི་སྙིང་པོ་ཕྱོགས་དུས་ཀུན་ཏུ་རྒྱས་པར་བྱེད་ནུས་པར་གྱུར་ཅིག །བཀྲ་ཤིས་པར་ཤོག །
བྱང་ཆུབ་ལམ་གྱི་རིམ་པའི་ཁྲིད་ཡིག་ཐམས་ཅད་མཁྱེན་པར་བགྲོད་པའི་བདེ་ལམ་ཞེས་བྱ་བ་བཞུགས་སོ༎
བྱང་ཆུབ་ལམ་གྱི་རིམ་པའི་ཁྲིད་ཡིག་ཐམས་ཅད་མཁྱེན་པར་བགྲོད་པའི་བདེ་ལམ་ཞེས་བྱ་བ་བཞུགས་སོ། །
རྗེ་བཙུན་བླ་མ་དམ་པ་ཐུབ་དབང་རྡོ་རྗེ་འཆང་དང་དབྱེར་མ་མཆིས་པའི་ཞབས་ལ་དུས་ཐམས་ཅད་དུ་ཕྱག་འཚལ་ལོ། །བརྩེ་བ་ཆེན་པོས་རྗེས་སུ་བཟུང་དུ་གསོལ། །འདིར་སྐལ་ལྡན་གྱི་སྐྱེས་བུ་སངས་རྒྱས་ཀྱི་སར་བགྲོད་པར་བྱེད་པའི་ཐབས་ཟབ་མོ་བྱང་ཆུབ་ལམ་གྱི་རིམ་པའི་ཁྲིད་ལ་གཉིས། ལམ་གྱི་རྩ་བ་བཤེས་གཉེན་བསྟེན་པའི་ཚུལ་དང༌། བསྟེན་ནས་བློ་ཇི་ལྟར་སྦྱང་བའི་རིམ་པའོ། །དང་པོ་ལ་གཉིས། ཐུན་གྱི་ངོ་བོ་ལ་ཇི་ལྟར་བྱ་བ་དང༌། ཐུན་མཚམས་སུ་ཇི་ལྟར་བྱ་བའི་ཚུལ་ལོ། །དང་པོ་ལ། སྦྱོར་དངོས་མཇུག་གསུམ་ལས། དང་པོ་སྦྱོར་བ་ནི། ཡིད་མཐུན་གྱི་གནས་སུ་བདེ་བའི་སྟན་ལ་ལུས་འདུག་ལུགས་བརྒྱད་དམ་སྤྱོད་ལམ་གང་བདེར་གནས་ནས། རང་རྒྱུད་ལ་ལེགས་པར་བརྟགས་ཏེ། དགེ་སེམས་ཁྱད་པར་ཅན་གྱི་ངང་ནས། རང་གི་མདུན་གྱི་ཐད་དྲང་གི་ནམ་མཁའི་གནས་སུ་སེང་གེ་ཆེན་པོ་བརྒྱད་ཀྱིས་བཏེགས་པའི་རིན་པོ་ཆེའི་ཁྲི་མཐོ་ཞིང་ཡངས་པའི་སྟེང་ཁར། སྣ་ཚོགས་པད་ཟླ་ཉི་མའི་དཀྱིལ་འཁོར་གྱི་གདན་ལ་ངོ་བོར་རང་གི་དྲིན་ཅན་རྩ་བའི་བླ་མ་ཡིན་པ་ལ། རྣམ་པ་རྒྱལ་བ་ཤཱ་ཀྱ་ཐུབ་པ་སྐུ་མདོག་གསེར་བཙོ་མ་ལྟ་བུ། དབུ་གཙུག་ཏོར་དང་ལྡན་པ། ཞལ་གཅིག་ཕྱག་གཉིས་ཀྱི་གཡས་ས་གནོན་དང༌། གཡོན་མཉམ་བཞག་གི་སྟེང་ན་བདུད་རྩིས་གང་བའི་ལྷུང་བཟེད་བསྣམས་པ་
སྐུ་ལ་ཆོས་གོས་ངུར་སྨྲིག་གི་མདོག་ཅན་གསུམ་མཛེས་པར་གསོལ་བ། མཚན་དཔེས་བརྒྱན་པའི་དྭངས་གསལ་འོད་ཀྱི་རང་བཞིན་ཅན། སྐུ་ལས་སྐྱེས་པའི་འོད་ཀྱི་ཕུང་པོའི་དཀྱིལ་ན་ཞབས་གཉིས་རྡོ་རྗེ་སྐྱིལ་ཀྲུང་གིས་བཞུགས་པ། དེ་ཉིད་ཀྱི་མཐའ་བསྐོར་དུ་དངོས་དང་བརྒྱུད་པའི་བླ་མ་ཡི་དམ་སངས་རྒྱས་བྱང་སེམས་དཔའ་བོ་དཔའ་མོ་བསྟན་སྲུང་ཡེ་ཤེས་པའི་ཚོགས་རྣམས་ཀྱིས་བསྐོར་ནས་བཞུགས་པ། དེ་དག་རང་རང་གི་མདུན་ན་གདན་ཁྲི་ཕུན་སུམ་ཚོགས་པ་ལ་རང་རང་གིས་གསུངས་པའི་ལུང་གི་ཆོས་རྣམས་འོད་ཀྱི་རང་བཞིན་ཅན་གྱི་པུསྟིའི་རྣམ་པར་ཡོད་པ། ཚོགས་ཞིང་རྣམས་ཀྱང་རང་ཉིད་ལ་དགྱེས་པའི་ཚུལ་དང༌། རང་ཉིད་ཀྱང་ཚོགས་ཞིང་རྣམས་ཀྱི་ཡོན་ཏན་དང་ཐུགས་རྗེ་དྲན་པའི་དད་པ་ཆེན་པོའི་ངང་ནས་འདི་ལྟར་བསམ་སྟེ། བདག་དང་མ་སེམས་ཅན་ཐམས་ཅད་ཀྱིས་ཐོག་མ་མེད་པ་ནས་ད་ལྟའི་བར་དུ། སྤྱིར་འཁོར་བ་དང་ཁྱད་པར་ངན་སོང་གསུམ་གྱི་སྡུག་བསྔལ་སྣ་ཚོགས་ཞིག་མྱོང་འདུག་ཏུ་ཟིན་ཀྱང༌། ད་དུང་སྡུག་བསྔལ་གྱི་གཏིང་དང་མཐའ་མངོན་པར་དཀའ་བར་འདུག་དེས་ན་ད་རེས་རྙེད་པར་དཀའ་ཞིང་རྙེད་ན་དོན་ཆེ་བའི་མི་ལུས་ཁྱད་ཅན་ཐོབ་པའི་དུས་འདིར། འཁོར་བའི་སྡུག་བསྔལ་ཐམས་ཅད་སྤངས་པའི་ཐར་པ་མཆོག་བླ་མས་སངས་རྒྱས་ཀྱི་གོ་འཕང་ཞིག་ད་ལྟ་ཉིད་དུ་ཐོབ་པར་མ་བྱས་
ན། སླར་ཡང་སྤྱིར་འཁོར་བ་དང་ཁྱད་པར་ངན་སོང་གསུམ་གྱི་སྡུག་བསྔལ་ཅི་རིགས་པ་ཞིག་མྱོང་དགོས་པ་འདུག །དེས་ན་སྡུག་བསྔལ་དེ་དག་ལས་སྐྱོབ་པའི་ནུས་པ་མདུན་ན་བཞུགས་པའི་བླ་མ་དཀོན་མཆོག་གསུམ་ལ་ཡོད་པས། བདག་གིས་མ་སེམས་ཅན་ཐམས་ཅད་ཀྱི་དོན་དུ་ཡང་དག་པར་རྫོགས་པའི་སངས་རྒྱས་ཀྱི་གོ་འཕང་རིན་པོ་ཆེ་ཅི་ནས་ཀྱང་ཐོབ་པར་བྱ། དེའི་ཕྱིར་དུ་བླ་མ་དཀོན་མཆོག་གསུམ་ལ་སྙིང་ཐག་པ་ནས་སྐྱབས་སུ་འགྲོ་བར་བྱའོ་སྙམ་དུ་བསམ་ལ། སྐྱབས་འགྲོ་སེམས་བསྐྱེད་ཚད་མེད་བཞི་བསྒོམ་པ་སྔོན་དུ་བཏང་ནས། ཁྱད་པར་མ་སེམས་ཅན་ཐམས་ཅད་ཀྱི་དོན་དུ་མྱུར་བ་མྱུར་བར་ཡང་དག་པར་རྫོགས་པའི་སངས་ཀྱི་གོ་འཕང་རིན་པོ་ཆེ་ཅི་ནས་ཀྱང་ཐོབ་པར་བྱ། དེའི་ཕྱིར་དུ་ལམ་ཟབ་མོ་བླ་མ་ལྷའི་རྣལ་འབྱོར་གྱི་སྒོ་ནས་བྱང་ཆུབ་ལམ་གྱི་རིམ་པའི་ཁྲིད་བསྒོམ་པ་ལ་འཇུག་པར་བགྱིའོ་སྙམ་པ་བདུན་ནམ་ཉེར་གཅིག་སོགས་བྱའོ། །དེ་ནས་རང་གི་མདུན་གྱི་ཐད་དྲང་གི་ནམ་མཁའི་གནས་སུ་སེང་གེ་ཆེན་པོ་བརྒྱད་ཀྱིས་བཏེགས་པའི་རིན་པོ་ཆེའི་ཁྲི་མཐོ་ཞིང་ཡངས་པའི་སྟེང་ཁར། སྣ་ཚོགས་པད་ཟླ་ཉི་མའི་དཀྱིལ་འཁོར་གྱི་གདན་ལ་ངོ་བོ་རང་གི་དྲིན་ཅན་རྩ་བའི་བླ་མ་ཡིན་པ་ལ། རྣམ་པ་རྒྱལ་བ་ཤཱཀྱ་ཐུབ་པ་སྐུ་མདོག་གསེར་གཙོ་མ་ལྟ་བུ། ཞེས་པ་ནས་རྡོ་རྗེ་སྐྱིལ་ཀྲུང་གིས་བཞུགས་པ། དེ་ཉིད་ཀྱི་སྟེང་གི་རྒྱབ་ལ་ཕྱོགས་པར་སྣ་ཚོགས་པད་ཟླ་ཉི་མའི་དཀྱིལ་འཁོར་གྱི་གདན་ལ། རྒྱལ་བ་རྡོ་རྗེ་འཆང་ལ་ཉམས་ལེན་བྱིན་རླབས་བརྒྱད་པའི་བླ་མ་རྣམས་ཀྱིས་བསྐོར་ནས་བཞུགས་པ། གཡས་ཕྱོགས་སུ་རྗེ་བཙུན་བྱམས་པ་ལ་རྒྱ་ཆེན་སྤྱོད་བརྒྱུད་ཀྱི་བླ་མ་རྣམས་ཀྱིས་བསྐོར་ནས་བཞུགས་པ། གཡོན་ཕྱོགས་སུ་རྗེ་བཙུན་འཇམ་དབྱངས་ལ་ཟབ་མོ་ལྟ་བརྒྱུད་ཀྱི་བླ་མ་རྣམས་ཀྱིས་བསྐོར་ནས་བཞུགས་པ། མདུན་དུ་དྲིན་ཅན་རྩ་བའི་བླ་མ་ལ་ཆོས་འབྲེལ་ཡོད་པའི་བླ་མ་རྣམས་ཀྱིས་བསྐོར་ནས་
བཞུགས་པ་དེ་དག་གི་མཐའ་བསྐོར་དུ་ཡི་དམ་སངས་རྒྱས་བྱང་སེམས་དཔའ་བོ་དཔའ་མོ་བསྟན་སྲུང་ཡེ་ཤེས་པའི་ཚོགས་རྣམས་ཀྱིས་བསྐོར་ནས་བཞུགས་པ། དེ་དག་རང་རང་གི་མདུན་ན་གདན་ཁྲི་ཕུན་སུམ་ཚོགས་པ་ལ་རང་རང་གིས་གསུངས་པའི་ལུང་གི་ཆོས་རྣམས་འོད་ཀྱི་རང་བཞིན་ཅན་གྱི་པུསྟིའི་རྣམ་པར་ཡོད་པ། དེ་དག་གི་ཕྱི་རོལ་དུ་གང་ལ་གང་འདུལ་གྱི་སྤྲུལ་བའི་བཀོད་པ་བསམ་གྱིས་མི་ཁྱབ་པ་ཕྱོགས་བཅུར་འཕྲོ་བའི་གཙོ་འཁོར་ཐམས་ཅད་ཀྱི་སྤྱི་བོར་ཨོཾ་དཀར་པོ། མགྲིན་པར་ཨཱཿདམར་པོ། ཐུགས་ཀར་ཧཱུྃ་སྔོན་པོ། ལྟེ་བར་སྭ་སེར་པོ། གསང་བར་ཧཱ་ལྗང་གུ་འོད་ཟེར་ལྔ་འཕྲོ་བ། བླ་མ་ཐུབ་པའི་དབང་པོའི་ཐུགས་ཀའི་ཧཱུྃ་ལས་འོད་ཟེར་ཕྱོགས་བཅུར་འཕྲོས་པས། རང་བཞིན་གྱི་གནས་ནས་བསྒོམ་པ་དང་འདྲ་བའི་ཡེ་ཤེས་པ་སྤྱན་དྲངས། དམ་ཚིག་པ་སོ་སོ་ལ་ཐིམ་པས་སྐྱབས་གནས་ཀུན་འདུས་པའི་བདག་ཉིད་དུ་མོས་ནས། ཡན་ལག་བདུན་པ་མཎྜལ་དང་བཅས་པ་ཕུལ་ཏེ། གསོལ་བ་འདེབས་པ་མན་ངག་བཞིན་རྒྱུད་དང་འདྲེས་ངེས་པ་བྱའོ། །དེ་ནས་བླ་མ་ཐུབ་པའི་དབང་པོའི་ཐུགས་ཀའི་ཧཱུྃ་ལས་འོད་ཟེར་འཕྲོས་པས། མཐའ་བསྐོར་ན་བཞུགས་པའི་ཞི་ཁྲོ་རབ་འབྱམས་ཐམས་ཅད་ལ་ཕོག་པས། དེ་རྣམས་འོད་ཀྱི་རྣམ་པར་བསྡུས་ནས་ཐུབ་པའི་དབང་བོ་ལ་ཐིམ་ཞིང༌། ཐུབ་པའི་དབང་བོ་ཡང་རང་གི་སྤྱི་བོའི་རྩ་བའི་བླ་མ་ལ་ཐིམ། དེ་ཉིད་ཡོངས་སུ་གྱུར་པ་ལས་རང་གི་སྤྱི་བོར་སེང་ཁྲི་པད་ཟླ་ཉི་མའི་དཀྱིལ་འཁོར་གྱི་གདན་ལ། ངོ་བོ་རང་གི་དྲིན་ཅན་རྩ་བའི་བླ་མ་ཡིན་པ་ལ། རྣམ་པ་རྒྱལ་བ་ཤཱཀྱ་ཐུབ་པ་ཞེས་པ་ནས། རྡོ་རྗེ་སྐྱིལ་ཀྲུང་གིས་བཞུགས་པ་ལ་དམིགས་ནས། ཡན་ལག་བདུན་པ་མཎྜལ་དང་བཅས་པ་མདོར་བསྡུས་ཕུལ་བའི་རྗེས་སུ། རང་དང་རང་གི་མཐའ་བསྐོར་ན་གནས་པའི་མ་སེམས་ཅན་ཐམས་ཅད་ཀྱིས་མགྲིན་
གཅིག་ཏུ་གསོལ་བ་འདེབས་པར་བསམས་ལ། །སྐུ་བཞིའི་བདག་ཉིད་བླ་མ་ལྷག་པའི་ལྷ། །ཐུབ་དབང་རྡོ་རྗེ་འཆང་ལ་གསོལ་བ་འདེབས། །སྒྲིབ་བྲལ་ཆོས་སྐུའི་བདག་ཉིད་བླ་མ་ལྷ། །ཐུབ་དབང་རྡོ་རྗེ་འཆང་ལ་གསོལ་བ་འདེབས། །བདེ་ཆེན་ལོངས་སྐུའི་བདག་ཉིད་བླ་མ་ལྷ། །ཐུབ་དབང་རྡོ་རྗེ་འཆང་ལ༴ །སྣ་ཚོགས་སྤྲུལ་སྐུའི་བདག་ཉིད་བླ་མ་ལྷ། །ཐུབ་དབང་རྡོ་རྗེ་འཆང་ལ༴ །བླ་མ་ཀུན་འདུས་བླ་མ་ལྷག་པའི་ལྷ། །ཐུབ་དབང་རྡོ་རྗེ་འཆང་ལ༴ །ཡི་དམ་ཀུན་འདུས་བླ་མ་ལྷག་པའི་ལྷ། །ཐུབ་དབང་རྡོ་རྗེ་འཆང་ལ༴ །སངས་རྒྱས་ཀུན་འདུས་བླ་མ་ལྷག་པའི་ལྷ། །ཐུབ་དབང་༴ །དམ་ཆོས་ཀུན་འདུས་བླ་མ་ལྷག་པའི་ལྷ། །ཐུབ་དབང་རྡོ་རྗེ༴ །མཁའ་འགྲོ་ཀུན་འདུས་བླ་མ་ལྷག་པའི་ལྷ། །ཐུབ་དབང་༴ །ཆོས་སྐྱོང་ཀུན་འདུས་བླ་མ་ལྷག་པའི་ལྷ། །ཐུབ་དབང་༴་ཁྱད་པར༴ །སྐྱབས་གནས་ཀུན་འདུས་བླ་མ་ལྷག་པའི་ལྷ། །ཐུབ་དབང་རྡོ་རྗེ་འཆང་ལ་གསོལ་བ་འདེབས། བདག་དང་མ་སེམས་ཅན་ཐམས་ཅད་འཁོར་བར་སྐྱེས་ནས་ཡུན་རིང་ལ་ཤུགས་དྲག་པའི་སྡུག་བསྔལ་སྣ་ཚོགས་པ་ཞིག་མྱོང་བ་འདི། དགེ་བའི་བཤེས་གཉེན་བསམ་སྦྱོར་གཉིས་ཀྱིས་ཚུལ་བཞིན་དུ་མ་བསྟེན་པས་ལན་པར་འདུག་པས། ད་བདག་དང་མ་སེམས་ཅན་ཐམས་ཅད་ཀྱིས་དགེ་བའི་བཤེས་གཉེན་བསམ་སྦྱོར་གཉིས་ཀྱི་སྒོ་ནས་ཚུལ་བཞིན་ཏུ་བསྟེན་ནུས་པར་བླ་མ་ལྷས་བྱིན་གྱིས་བརླབ་ཏུ་གསོལ། །ཞེས་གསོལ་བ་བཏབ་པས་སྤྱི་བོའི་བླ་མ་ལྷའི་སྐུའི་ཆ་ལས་བདུད་རྩི་སྣ་ལྔ་འོད་ཟེར་དང་བཅས་པའི་རྒྱུན་བབས། རང་གཞན་སེམས་ཅན་ཐམས་ཅད་ཀྱི་ལུས་སེམས་ལ་ཞུགས་པས། ཐོག་མེད་ནས་བསགས་པའི་སྡིག་སྒྲིབ་ཐམས་ཅད་དང༌། ཁྱད་པར་དགེ་བའི་བཤེས་གཉེན་བསམ་སྦྱོར་གཉིས་ཀྱིས་ཚུལ་བཞིན་དུ་བསྟེན་ནུས་པ་ལ་གེགས་བྱེད་ཀྱི་སྡིག་སྒྲིབ་ནད་གདོན་དང་བཅས་པ་ཐམས་ཅད་སྦྱངས།
ལུས་དྭངས་གསལ་འོད་ཀྱི་རང་བཞིན་ཅན་དུ་གྱུར། །ཚེ་དང་བསོད་ནམས་ལ་སོགས་པའི་ཡོན་ཏན་ཐམས་ཅད་འཕེལ་ཞིང་རྒྱས། ཁྱད་པར་དགེ་བའི་བཤེས་གཉེན་བསམ་སྦྱོར་གཉིས་ཀྱིས་ཚུལ་བཞིན་དུ་བསྟེན་པར་ནུས་པའི་རྟོགས་པ་ཁྱད་པར་ཅན་རང་གཞན་གྱི་རྒྱུད་ལ་སྐྱེས་པར་བསམ་མོ། །གཉིས་པ་དངོས་གཞི་ལ་གཉིས། བསམ་པས་བསྟེན་ཚུལ་དང༌། སྦྱོར་བས་བསྟེན་ཚུལ་ལོ། །དང་པོ་ལ་གཉིས། རྩ་བ་དང་པོ་སྦྱང་བ་དང༌། བཀའ་དྲིན་རྗེས་སུ་དྲན་ཏེ་གུས་པར་བྱ་བའོ། །དང་བོ་ནི། བླ་མ་ཐུབ་པའི་དབང་བོའི་ཐུགས་ཀ་ནས་རང་ལ་དངོས་སུ་ཆོས་འབྲེལ་ཡོད་པའི་བླ་མ་རྣམས་སྤྲོས་ཏེ། མདུན་གྱི་ནམ་མཁར་བཞུགས་པ་ལ་དམིགས་ནས་བདག་གི་དགེ་བའི་བཤེས་གཉེན་འདི་རྣམས་སངས་རྒྱས་དངོས་ཡིན་ཏེ། ཡང་དག་པར་རྫོགས་པའི་སངས་རྒྱས་ཀྱིས་རྒྱུད་སྡེ་རིན་པོ་ཆེ་རྣམས་སུ་རྒྱལ་བ་རྡོ་རྗེ་འཆང་གིས་སྙིགས་མའི་དུས་སུ་དགེ་བའི་བཤེས་གཉེན་གྱི་སྐུའི་རྣམ་པར་བསྟན་ནས་འགྲོ་བའི་དོན་མཛད་པར་གསུངས་པ་བཞིན་དུ། བདག་གི་དགེ་བའི་བཤེས་གཉེན་འདི་རྣམས་ཀྱང་སྐུའི་རྣམ་པ་ཐ་དད་དུ་བསྟན་པ་ཙམ་མ་གཏོགས། རྒྱལ་བ་རྡོ་རྗེ་འཆང་གིས་བདག་ཅག་སངས་རྒྱས་དངོས་སུ་མཐོང་བའི་སྐལ་བ་མེད་པ་རྣམས་རྗེས་སུ་བཟུང་བའི་ཕྱིར་དུ་དགེ་བའི་བཤེས་གཉེན་གྱི་སྐུའི་རྣམ་པར་བསྟན་པ་ཡིན་པར་འདུག་པས་སོ། །དེས་ནད་བདག་དང་སེམས་ཅན་ཐམས་ཅད་ཀྱིས་དགེ་བའི་བཤེས་གཉེན་འདི་རྣམས་ཐུབ་དབང་རྡོ་རྗེ་འཆང་དངོས་སུ་མཐོང་བར་བླ་མ་ལྷས་བྱིན་གྱིས་བརླབ་ཏུ་གསོལ། ཞེས་གསོལ་བ་བཏབ་པས། སྤྱི་བོའི་བླ་མ་ལྷའི་སྐུའི་ཆ་ལས་བདུད་རྩི་སྣ་ལྔ་འོད་ཟེར། རང་གཞན་སེམས་ཅན་ཐམས་ཅད་ཀྱི་ལུས་སེམས་ལ་ཞུགས་པས། དེ་དང་དེའི་གེགས་བྱེད་སྦྱངས། དེ་དང་དེའི་རྟོགས་པ་ཁྱད་པར་ཅན་རང་གཞན་གྱི་རྒྱུད་
ལ་སྐྱེས་བར་བསམ་མོ། །འོ་ན་སངས་རྒྱས་ནི་སྐྱོན་ཀུན་ཟད་ཡོན་ཏན་ཀུན་ལྡན་ཡིན་ལ། བདག་གི་དགེ་བའི་བཤེས་གཉེན་འདི་རྣམས་ལ་དུག་གསུམ་གྱིས་ཀུན་ནས་བསླངས་པའི་སྐྱོན་འདི་དང་འདི་ལྟ་བུ་འདུག་པས་སངས་རྒྱས་རང་མ་ཡིན་ནོ་སྙམ་ན། དེ་ནི་རང་གི་སྣང་བ་མ་དག་པའི་དབང་གིས་ཡིན་ཏེ། སྔོན་ཡང་རང་ཉིད་སྣང་བ་མ་དག་པའི་དབང་གིས་ལེགས་པའི་ཀརྨས། སྟོན་པ་སངས་རྒྱས་ཀྱི་མཛད་པ་ཐམས་ཅད་ཟོག་འབའ་ཞིག་ཏུ་མཐོང་བ་དང༌། །ཐོགས་མེད་ཀྱིས་རྗེ་བཙུན་བྱམས་པ་ཁྱི་མོར་མཐོང་བ་དང༌། མཻ་ཏྲི་པས་རྣལ་འབྱོར་གྱི་དབང་ཕྱུག་ཤ་ཝ་རི་པ་ཕག་གསོད་པ་སོགས་མི་འཚམ་པ་བྱེད་པར་མཐོང་བ་བཞིན་དུ། བདག་གི་དགེ་བའི་བཤེས་གཉེན་འདི་རྣམས་ལ་སྐྱོན་དེ་ཡོད་ནས་སྣང་བ་མ་ཡིན་གྱི། །རང་ཉིད་སྣང་བ་མ་དག་པའི་དབང་གིས་ཡིན་པས། དེས་ན་བདག་དང་སེམས་ཅན་ཐམས་ཅད་ཀྱི་རྒྱུད་ལ་དགེ་བའི་བཤེས་གཉེན་འདི་རྣམས་ལ་སྐྱོན་རྟོག་གི་བློ་སྐད་ཅིག་ཙམ་ཡང་མི་སྐྱེ་ཞིང༌། ཅི་མཛད་ཡོན་ཏན་དུ་མཐོང་བའི་དད་པ་ཆེན་པོ་བདེ་བླག་ཏུ་སྐྱེ་བར་བླ་མ་ལྷས་བྱིན་གྱིས་བརླབ་ཏུ་གསོལ། ཞེས་གསོལ་བ་བཏབ་པས། སྤྱི་བོའི་བླ་མ་ལྷའི་སྐུའི་ཆ་ལས་བདུད་རྩི་སྣ་ལྔ་འོད་ཟེར། རང་གཞན་སེམས་ཅན་ཐམས་ཅད་ཀྱི་ལུས་སེམས་ལ་ཞུགས་པས། དེ་དང་དེའི་གེགས་བྱེད་སྦྱངས། དེ་དང་དེའི་རྟོགས་པ་ཁྱད་པར་ཅན་རང་གཞན་གྱི་རྒྱུད་ལ་སྐྱེས་པར་བསམ་མོ། །གཉིས་པ་ནི། རང་གི་མདུན་དུ་དགེ་བའི་བཤེས་གཉེན་རྣམས་གསལ་བར་དམིགས་ནས། དགེ་བའི་བཤེས་གཉེན་འདི་རྣམས་བདག་ལ་བཀའ་དྲིན་ཤིན་ཏུ་ཆེ་སྟེ། བདག་གིས་འཁོར་བ་དང་ངན་སོང་གི་སྡུག་བསྔལ་མཐའ་དག་སྤངས་པའི་ཐར་པ་མཆོག་ཡང་དག་པར་རྫོགས་པའི་སངས་རྒྱས་ཀྱི་གོ་འཕང་རིན་པོ་ཆེ་བདེ་བླག་ཏུ་སྟེར་བར་བྱེད་པའི་ལམ་ཟབ་མོ་ཁོང་དུ་ཆུད་པ་འདི།
དགེ་བའི་བཤེས་གཉེན་འདི་རྣམས་ཀྱི་བཀའ་དྲིན་ཡིན་པས། དེས་ན་བདག་དང་མ་སེམས་ཅན་ཐམས་ཅད་ཀྱི་རྒྱུད་ལ་དགེ་བའི་བཤེས་གཉེན་འདི་རྣམས་ཀྱི་བཀའ་དྲིན་རྗེས་སུ་དྲན་པའི་གུས་པ་ཆེན་པོ་བདེ་བླག་ཏུ་སྐྱེ་བར་བླ་མ་ལྷས་བྱིན་གྱིས་བརླབ་ཏུ་གསོལ། ཞེས་གསོལ་བ་བཏབ་པས། སྤྱི་བོའི་བླ་མ་ལྷའི་སྐུའི་ཆ་ལས་བདུད་རྩི་སྣ་ལྔ་འོད་ཟེར། རང་གཞན་སེམས་ཅན་ཐམས་ཅད་ཀྱི་ལུས་སེམས་ལ་ཞུགས་པས། དེ་དང་དེའི་གེགས་བྱེད་སྦྱངས། དེ་དང་དེའི་རྟོགས་པ་ཁྱད་པར་ཅན་རང་གཞན་གྱི་རྒྱུད་ལ་སྐྱེས་པར་བསམ་མོ། །གཉིས་པ་སྦྱོར་བས་བསྟེན་ཚུལ་ནི། དགེ་བའི་བཤེས་གཉེན་རྣམས་མདུན་དུ་གསལ་བཞིན་པའི་ངང་ནས་བདག་གིས་སངས་རྒྱས་དངོས་ཀྱི་དགེ་བའི་བཤེས་གཉེན་འདི་རྣམས་ཀྱི་ཕྱིར་དུ་ལུས་སྲོག་ལོངས་སྤྱོད་ལ་སོགས་པ་ལྟོས་པ་མེད་པར་གཏོང་ཞིང༌། ཁྱད་པར་བཀའ་བཞིན་བསྒྲུབ་པའི་མཆོད་པས་མཉེས་པར་བྱའོ། །དེ་ལྟར་བྱེད་ནུས་པར་བླ་མ་ལྷས་བྱིན་གྱིས་བརླབ་ཏུ་གསོལ། ཞེས་གསོལ་བ་བཏབ་པས། སྤྱི་བོའི་བླ་མ་ལྷའི་སྐུའི་ཆ་བྱད་ལས་བདུད་རྩི་སྣ་ལྔ༴་རང་གཞན་སེམས་ཅན་ཐམས་ཅད་ཀྱི་ལུས་སེམས་ལ་ཞུགས་པས། དེ་དང་དེའི་གེགས་སྦྱངས། དེ་དང་དེའི་རྟོགས་པ་ཁྱད་པར་ཅན་རང་གཞན་གྱི་རྒྱུད་ལ་སྐྱེས་པར་བསམ་མོ། །གསུམ་པ་མཇུག་ཏུ་ཇི་ལྟར་བྱ་བའི་ཚུལ་ནི། སྤྱི་བོར་བླ་མ་ལྷ་བསྒོམ་བཞིན་པའི་ངང་ནས་གསོལ་བ་འདེབས་པ་དང༌། སྔགས་འདྲེན་པ་དང༌། དེ་ལས་བྱུང་བའི་དགེ་རྩ་རྣམས་རང་གཞན་གྱི་གནས་སྐབས་དང་མཐར་ཐུག་གི་སྨོན་གནས་སུ་འདུན་པ་དྲག་པོས་བསྔོ་བར་བྱའོ། །གཉིས་པ་ཐུན་མཚམས་སུ་ཇི་ལྟར་བྱ་བའི་ཚུལ་ནི། ཐུན་མཚམས་སུ་ཡང་དགེ་བའི་བཤེས་གཉེན་བསྟེན་ཚུལ་སྟོན་པའི་གསུང་རབ་དགོངས་འགྲེལ་དང་བཅས་པ་ལྟ་བ་དང༌། དྲན་ཤེས་དང་ལྡན་པའི་སྒོ་ནས་
དབང་བོའི་སྒོ་སྡོམ་པ་དང༌། ཟས་ཀྱི་ཚོད་རིག་པ་དང༌། མི་ཉལ་བར་རྣལ་འབྱོར་ལ་བརྩོན་ཞིང༌། ཉལ་བའི་ཚེ་ཇི་ལྟར་བྱ་བ་དང༌། ཁྲུས་དང་ཁ་ཟས་ཀྱི་རྣལ་འབྱོར་ལ་བརྩོན་པར་བྱེད་པའོ། །གཉིས་པ་བསྟེན་ནས་བློ་ཇི་ལྟར་སྦྱང་བའི་རིམས་པ་ལ་གཉིས། དལ་འབྱོར་ལ་སྙིང་བོ་བླང་བའི་ཕྱིར་དུ་བསྐུལ་བ་དང༌། སྙིང་བོ་ཇི་ལྟར་ལེན་པའི་ཚུལ་ལོ། །དང་བོ་ལ་གཉིས། ཐུན་གྱི་ངོ་བོ་ལ་ཇི་ལྟར་བྱ་བ་དང༌། ཐུན་མཚམས་སུ་ཇི་ལྟར་བྱ་བའོ། །དང་བོ་ལ་སྦྱོར་དངོས་མཇུག་གསུམ་ལས། དང་བོ་ནི། སྐྱབས་གནས་ཀུན་འདུས་བླ་མ་ལྷག་པའི་ལྷ། ཐུབ་དབང་རྡོ་རྗེ་འཆང་ལ་གསོལ་བ་འདེབས། ཞེས་པ་ཡན་ཆད་སྔར་བཞིན་ཡིན་ལ། དེ་ནས་བདག་དང་མ་སེམས་ཅན་ཐམས་ཅད་འཁོར་བར་སྐྱེས་ནས་ཡུན་རིང་ལ་ཤུགས་དྲག་པའི་འཁོར་བའི་སྡུག་བསྔལ་སྣ་ཚོགས་ཞིག་མྱོང་བ་འདི། དལ་འབྱོར་དོན་ཆེ་རྙེད་དཀའི་རྟོགས་པ་ཁྱད་པར་ཅན་རྒྱུད་ལ་མ་སྐྱེས་པས་ལེན་པར་འདུག་པས། དེ་བདག་དང་མ་སེམས་ཅན་ཐམས་ཅད་ཀྱི་རྒྱུད་ལ་དལ་འབྱོར་དོན་ཆེ་རྙེད་དཀའི་རྟོགས་པ་ཁྱད་པར་ཅན་སྐྱེ་བར་བླ་མ་ལྷས་བྱིན་གྱིས་བརླབ་ཏུ་གསོལ། །ཞེས་གསོལ་བ་བཏབ་པས། །སྤྱི་བོའི་བླ་མ་ལྷའི་སྐུའི་ཆ་ལས་བདུད་རྩི་སྣ་ལྔ་འོད་ཟེར་རང་གཞན་སེམས་ཅན་ཐམས་ཅད་ཀྱི་ལུས་སེམས་ལ་ཞུགས་པས། ཐོག་མེད་ནས་བསགས་པའི་སྡིག་སྒྲིབ་ཐམས་ཅད་དང༌། ཁྱད་པར་དལ་འབྱོར་དོན་ཆེ་རྙེད་དཀའི་རྟོགས་པ་ཁྱད་པར་ཅན་སྐྱེ་བ་ལ་གེགས་བྱེད་ཀྱི་སྡིག་སྒྲིབ་སྦྱངས། ལུས་དྭངས་གསལ་འོད་ཀྱི་རང་བཞིན་ཅན་དུ་གྱུར། ཚེ་དང་བསོད་ནམས་ལ་སོགས་པའི་ཡོན་ཏན་ཐམས་ཅད་འཕེལ་ཞིང་རྒྱས། ཁྱད་པར་དལ་འབྱོར་དོན་ཆེ་རྙེད་དཀའི་རྟོགས་པ་ཁྱད་པར་ཅན་རང་གཞན་གྱི་རྒྱུད་ལ་སྐྱེས་པར་བསམ་མོ། །གཉིས་པ་དངོས་གཞི་ལ་གཉིས། དལ་འབྱོར་དོན་ཆེ་བར་བསམ་པ་དང༌། རྙེད་པར་དཀའ་བ་བསམ་པའོ། །དང་བོ་ནི། སྤྱི་བོར་བླ་མ་ལྷ་
བསྒོམ་བཞིན་པའི་ངང་ནས་འདི་ལྟར་བསམས་ཏེ་དམ་པའི་ཆོས་སྒྲུབ་པ་ལ་ཁོམས་པས་དལ་བ་དང༌། ཆོས་སྒྲུབ་པའི་ཕྱི་ནང་གི་ཆ་རྐྱེན་ཚང་པས་འབྱོར་བ་ཞེས་བྱ། མདོར་ན་རང་ཅག་རྣམས་ཀྱིས་ཐོབ་པའི་དལ་འབྱོར་གྱི་རྟེན་འདི་དོན་ཤིན་ཏུ་ཆེ་སྟེ་འདི་ལ་བརྟེན་ནས་མངོན་མཐོའི་ལུས་ལོངས་སྤྱོད་ཕུན་སུམ་ཚོགས་པའི་རྒྱུ་སྦྱིན་པ། ཚུལ་ཁྲིམས། བཟོད་པ་སོགས་ཀྱང་སྒྲུབ་ནུས་ལ། ཁྱད་པར་རྟེན་འདི་ལ་སྡོམ་པ་གསུམ་ག་སྐྱེ་ཞིང༌། སྙིགས་དུས་ཀྱི་ཚེ་ཐུང་བ་ཅིག་ལས་སངས་རྒྱས་ཀྱི་གོ་འཕང་ཡང་བདེ་བླག་ཏུ་སྒྲུབ་ནུས་པས་སོ། །དེས་ན་རྙེད་པར་དཀའ་ཞིང་རྙེད་ན་དོན་ཆེ་བའི་དལ་འབྱོར་ཚང་བའི་རྟེན་འདི་དོན་མེད་དུ་མི་བཏང་བར་སྙིང་པོ་ཅིག་བླང་བར་བྱའོ། །དེ་ལྟར་བྱེད་ནུས་པར་བླ་མ་ལྷས་བྱིན་གྱིས་བརླབ་ཏུ་གསོལ། ཞེས་གསོལ་བ་བཏབ་པས། སྤྱི་བོའི་བླ་མ་ལྷའི་སྐུའི་ཆ་ལས་བདུད་རྩིས་སྣ་ལྔ་འོད་ཟེར། རང་གཞན་སེམས་ཅན་ཐམས་ཅད་ཀྱི་ལུས་སེམས་ལ་ཞུགས་པས། དེ་དང་དེའི་གེགས་བྱེད་སྦྱངས། །དེ་དང་དེའི་རྟོགས་པ་ཁྱད་པར་ཅན་རང་གཞན་གྱི་རྒྱུད་ལ་སྐྱེས་པར་བསམ་མོ། །གཉིས་པ་རྙེད་པར་དཀའ་བ་བསམ་པ་ནི། སྤྱི་བོར་བླ་མ་ལྷ་བསྒོམ་བཞིན་པའི་ངང་ནས་འདི་ལྟར་བསམ་སྟེ། དལ་འབྱོར་ཐོབ་པ་འདི་དོན་ཆེ་བར་མ་ཟད་རྙེད་ཀྱང་ཤིན་ཏུ་དཀའ་སྟེ། མི་ལ་སོགས་པའི་འགྲོ་བ་ཕལ་ཆེར་མི་དགེ་བ་བཅུ་ལ་སོགས་པ་ཤས་ཆེར་སྤྱོད་ལ། དེ་དག་གིས་ཀྱང་དལ་འབྱོར་ཐོབ་པའི་གེགས་བྱེད་ཅིང༌། ཁྱད་པར་དལ་འབྱོར་ཚང་བའི་རྟེན་རྣམ་པར་དག་པ་ཐོབ་པ་ལ་ཚུལ་ཁྲིམས་རྣམ་པར་དག་པས་གཞི་བཟུང༌། སྦྱིན་སོགས་ཀྱིས་གྲོགས་བྱས། སྨོན་ལམ་དྲི་མ་མེད་པས་མཚམས་སྦྱར་བ་སོགས་དགོས་ན་རྒྱུ་དེ་ལྟ་བུ་སྒྲུབ་པ་ཡང་ཤིན་ཏུ་ཉུང་བ་དང༌། དུད་འགྲོ་ལ་སོགས་པའི་ངན་འགྲོ་ལ་ལྟོས་ན་བདེ་འགྲོ་ཙམ་ཐོབ་པ་སྲིད་མཐར་སྣང་ལ། བདེ་འགྲོ་ལ་ལྟོས་ན་དལ་འབྱོར་ཚང་བའི་རྟེན་ཐོབ་པ་འདི་ཉིན་མོའི་སྐར་མ་ལྟ་
བུར་ཤིན་ཏུ་དཀོན་པའི་ཕྱིར། དེས་ན་རྙེད་པར་དཀའ་ཞིང་རྙེད་ན་དོན་ཆེ་བའི་དལ་འབྱོར་ཚང་བའི་རྟེན་ལན་ཅིག་ཐོབ་པ་འདི། དོན་མེད་དུ་མི་བཏང་བར་སྙིང་བོ་གཅིག་བླང་བར་བྱའོ། །སྙིང་བོ་ལེན་པའི་ཚུལ་ཡང་བླ་མ་སངས་རྒྱས་འབྲལ་མེད་དུ་བསྟེན་ནས། དེས་བསྟན་པའི་ཐེག་པ་མཆོག་གི་གདམས་པའི་སྙིང་བོ་ཉམས་སུ་བླངས་ཏེ། ཚེ་གཅིག་ཉིད་ལ་སངས་རྒྱས་ཀྱི་གོ་འཕང་བདེ་བླག་ཏུ་ཐོབ་པར་བྱའོ། །དེ་ལྟར་བྱེད་ནུས་པ་བླ་མ་ལྷས་བྱིན་གྱིས་བརླབ་ཏུ་གསོལ། ཞེས་གསོལ་བ་བཏབ་པས། སྤྱི་བོའི་བླ་མ་ལྷའི་སྐུའི་ཆ་ལས་བདུད་རྩི་སྣ་ལྔ་འོད་ཟེར། རང་གཞན་སེམས་ཅན་ཐམས་ཅད་ཀྱི་ལུས་སེམས་ལ་ཞུགས་པས། དེ་དང་དེའི་གེགས་བྱེད་སྦྱངས། དེ་དང་དེའི་རྟོགས་པ་ཁྱད་པར་ཅན་རང་གཞན་གྱི་རྒྱུད་ལ་སྐྱེས་པར་བསམ་མོ། །གསུམ་པ་མཇུག་ཏུ་ཇི་ལྟར་བྱ་བ་ནི་སྔར་བཞིན་ཡིན་ལ། གཉིས་པ་ཐུན་མཚམས་སུ་དལ་འབྱོར་གྱི་ཆོས་སྐོར་སྟོན་པའི་གསུང་རབ་དགོངས་འགྲེལ་དང་བཅས་པ་ལ་བལྟ་བ་སོགས་ནི་སྔར་བཞིན་ནོ། །གཉིས་པ་སྙིང་པོ་ཇི་ལྟར་ལེན་པའི་ཚུལ་ལ་གསུམ། སྐྱེས་བུ་ཆུང་ངུ་དང་ཐུན་མོང་བའི་ལམ་གྱི་རིམ་པ་ལ་བློ་སྦྱང་བ། སྐྱེས་བུ་འབྲིང་དང་ཐུན་མོང་བའི་ལམ་གྱི་རིམ་པ་ལ་བློ་སྦྱོང་བ། སྐྱེས་བུ་ཆེན་པོའི་ལམ་གྱི་རིམ་པ་ལ་བློ་སྦྱང་བའོ། །དང་པོ་ལ་གཉིས། ཐུན་གྱི་ངོ་བོ་ལ་ཇི་ལྟར་བྱ་བ་དང༌། ཐུན་མཚམས་སུ་ཇི་ལྟར་བྱ་བའོ། །དང་པོ་ལ་སྦྱོར་དངོས་མཇུག་གསུམ་ལས། དང་པོ་ནི། སྐྱབས་གནས་ཀུན་འདུས་བླ་མ་ལྷག་པའི་ལྷ། །ཐུབ་དབང་རྡོ་རྗེ་འཆང་ལ་གསོལ་བ་འདེབས། །ཞེས་པ་ཡན་ཆད་སྔར་བཞིན་ཡིན་ལ། དེ་ནས་བདག་དང་མ་སེམས་ཅན་ཐམས་ཅད་འཁོར་བར་སྐྱེས་ནས་ཡུན་རིང་ཕ་ཤུགས་དྲག་པའི་སྡུག་བསྔལ་སྣ་ཚོགས་པ་ཞིག་མྱོང་བ་འདི་ཉིད། འཆི་བ་མི་རྟག་པ་མ་བསམས་ཤིང༌། ངན་འགྲོའི་སྡུག་བསྔལ་གྱིས་འཇིགས་ནས་དཀོན་མཆོག་གསུམ་ལ་སྙིང་ནས་སྐྱབས་སུ་
མ་སོང་བ་དང༌། ལས་འབྲས་ལ་ཡིད་ཆེས་ཀྱི་དད་པ་བསྐྱེད་ནས། དཀར་ནག་གི་ལས་འབྲས་ལ་བླང་དོར་ཚུལ་བཞིན་མ་བྱས་པས་ལན་པར་འདུག་པས་ད་བདག་དང་མ་སེམས་ཅན་ཐམས་ཅད་ཀྱི་རྒྱུད་ལ་འཆི་བ་མི་རྟག་དྲན་པ་དང༌། ངན་འགྲོའི་སྡུག་བསྔལ་གྱིས་འཇིགས་ནས་དཀོན་མཆོག་གསུམ་ལ་སྙིང་ནས་སྐྱབས་སུ་འགྲོ་ཞིང་ལས་འབྲས་ལ་ཡིད་ཆེས་ཀྱི་དད་པ་སྐྱེས་ནས་སྡིག་སྤོང་དགེ་བ་ཚུལ་བཞིན་སྒྲུབ་ནུས་པར་བླ་མ་ལྷས་བྱིན་གྱིས་བརླབ་ཏུ་གསོལ། ཞེས་གསོལ་བ་བཏབ་པས། སྤྱི་བོའི་བླ་མ་ལྷའི་སྐུའི་ཆ་ལས་བདུད་རྩི་སྣ་ལྔ་འོད་ཟེར། རང་གཞན་སེམས་ཅན་ཐམས་ཅད་ཀྱི་ལུས་སེམས་ལ་ཞུགས་པས། ཐོག་མེད་ནས་བསགས་པའི་སྡིག་སྒྲིབ་ཐམས་ཅད་དང༌། ཁྱད་པར་དེ་དང་དེའི་རྟོགས་པ་ཁྱད་པར་ཅན་སྐྱེ་བ་ལ་གེགས་བྱེད། ལུས་དྭངས་གསལ་འོད་ཀྱི་རང་བཞིན་ཅན་དུ་གྱུར། ཚེ་དང་བསོད་ནམས་ལ་སོགས་པའི་ཡོན་ཏན་ཐམས་ཅད་འཕེལ་ཞིང་རྒྱས། དེ་དང་དེའི་རྟོགས་པ་ཁྱད་པར་ཅན་རང་གཞན་གྱི་རྒྱུད་ལ་སྐྱེས་པར་བསམ་མོ། །གཉིས་པ་དངོས་གཞི་ལ་བཞི། འཆི་བ་མི་རྟག་པ་བསམ་པ། ངན་འགྲོའི་སྡུག་བསྔལ་བསམ་པ། དཀོན་མཆོག་གསུམ་ལ་སྐྱབས་འགྲོ་སྦྱང་བ། ལས་འབྲས་ལ་ཡིད་ཆེས་ཀྱི་དད་པ་བསྐྱེད་པའོ། །དང་བོ་ནི། སྤྱི་བོར་བླ་མ་ལྷ་བསྒོམ་བཞིན་པའི་ངང་ནས་འདི་ལྟར་བསམ་སྟེ། རྙེད་པར་དཀའ་ཞིང་རྙེད་ན་དོན་ཆེ་བའི་དལ་འབྱོར་གྱི་རྟེན་འདི་མྱུར་དུ་འཇིག་སྟེ། འཆི་བདག་ངེས་པར་འོངས་ལ། དེ་ཡང་ཕྱི་ནང་གི་རྐྱེན་གང་གིས་ཀྱང་བཟློག་ཏུ་མེད་པ་དང༌། ཚེ་ལ་སྣོན་པ་མེད་ཅིང༌། འབྲིང་བྱེད་བར་མ་ཆད་དང་བཅས་པ་དང༌། གསོན་པའི་ཚེ་ཡང་ཆོས་བྱ་ལོངས་མེད་པ་ངེས་པར་འཆི། །འཆི་བར་མ་ཟད་ནམ་འཆི་ལའང་ངེས་པ་མེད་དེ། རང་ཅག་འཛམ་བུ་གླིང་པའི་ཚེ་ལ་ངེས་པ་མེད་པ་དང༌། འཆི་རྐྱེན་ཤིན་ཏུ་
མང་ཞིང་གསོན་པའི་རྐྱེན་ཉུང་བ་དང༌། ལུས་ཆུའི་སྦུ་བ་ལྟ་བུར་ཉམས་ཆུང་བས་ནམ་འཆི་ལ་ངེས་པ་མེད། འཆི་བའི་ཚེ་ཆོས་མ་གཏོགས་གང་གིས་ཀྱང་ཕན་པ་མེད་དེ། གཉེན་བཤེས་བརྩེ་གདུང་ཇི་ལྟར་ཆེ་བས་མཐའ་བསྐོར་ཀྱང་གཅིག་ཀྱང་ཁྲིད་ས་མེད། ཡིད་དུ་འོང་བའི་ནོར་གྱི་ཕུང་པོ་ཇི་སྙེད་ཅིག་ཡོད་ཀྱང་རྡུལ་ཕྲན་ཙམ་ཡང་ཁྱེར་དུ་མེད། ལྷན་ཅིག་སྐྱེས་པའི་ཤ་རུས་ཀྱང་འབྲལ་དགོས་ན་ཚེ་འདིའི་ཕུན་ཚོགས་ལ་ཆགས་པས་ཅི་ཞིག་བྱ། འཆི་བའི་དགྲ་ནི་ངེས་པར་འོང་ཞིང་ནམ་འོང་ལ་ངེས་པ་མེད། དེ་རིང་རང་ཡང་འཆི་ཉེན་ཡོད་པས་འཆི་གྲབས་ཤིག་བྱ་དགོས་པར་འདུག །འཆི་གྲབས་ཀྱང་ཚེ་འདིའི་ཕུན་ཚོགས་ཐམས་ཅད་ལ་མ་ཆགས་པར་ཆོས་རྣམ་དག་ཞིག་ད་ལྟ་ཉིད་དུ་བྱའོ། །དེ་ལྟར་བྱེད་ནུས་པར་བླ་མ་ལྷས་བྱིན་གྱིས་བརླབ་ཏུ་གསོལ། ཞེས་གསོལ་བ་བཏབ་པས་སྤྱི་བོའི་བླ་མ་ལྷའི་སྐུའི་ཆ་ལས་བདུད་རྩི་སྣ་ལྔ་འོད་ཟེར་དང་བཅས་པའི་རྒྱུན་བབས། རང་གཞན་སེམས་ཅན་ཐམས་ཅད་ཀྱི་ལུས་སེམས་ལ་ཞུགས་པས། དེ་དང་དེའི་གེགས་བྱེད་སྦྱངས། དེ་དང་དེའི་རྟོགས་པ་ཁྱད་པར་ཅན་རང་གཞན་གྱི་རྒྱུད་ལ་སྐྱེས་པར་བསམ་མོ། །གཉིས་པ་ནི། སྤྱི་བོར་བླ་མ་ལྷ་བསྒོམ་བཞིན་པའི་ངང་ནས་འདི་ལྟར་བསམ་སྟེ། རྙེད་པར་དཀའ་ཞིང་རྙེད་ན་དོན་ཆེ་བའི་དལ་འབྱོར་ཚང་བའི་རྟེན་འདི་ཡང་མྱུར་དུ་འཇིག་ཅིང༌། ཞིག་པའི་འོག་ཏུ་མེད་དེ་མི་འགྲོ་བར་སྐྱེ་བ་ཞིག་བླང་དགོས་ལ། སྐྱེས་ཡང་ངན་འགྲོ་དང་བདེ་འགྲོ་གཉིས་ལས་མ་འདས་ཤིང༌། གལ་སྟེ་ངན་འགྲོར་སྐྱེས་ན་དམྱལ་བ་པ་རྣམས་ལ་ཚ་གྲང་དང་དེས་མཚོན་པའི་སྡུག་བསྔལ། ཡི་དྭགས་ལ་བཀྲེས་སྐོམ་དང་དེས་མཚོན་པའི་སྡུག་བསྔལ། དུད་འགྲོ་རྣམས་ལ་གླེན་ཞིང་གཏི་མུག་པ་དང་གཅིག་ལ་གཅིག་ཟ་བའི་སྡུག་བསྔལ་བསམ་གྱིས་མི་ཁྱབ་པ་ཡོད་དེ། དེས་ན་འདི་ལྟ་བུའི་ངན་འགྲོའི་སྡུག་བསྔལ་བཟོད་བླག་མི་
འདུག་པས། རྙེད་པར་དཀའ་ཞིང་རྙེད་ན་དོན་ཆེ་བའི་དལ་འབྱོར་ཚང་བའི་རྟེན་ཐོབ་པའི་དུས་འདིར། ངན་འགྲོའི་སྡུག་བསྔལ་མཐའ་དག་སྤངས་པའི་བླ་མ་སངས་རྒྱས་ཀྱི་གོ་འཕང་ཞིག་ཐོབ་པར་བྱའོ། །དེ་ལྟར་བྱེད་ནུས་པར་བླ་མ་ལྷས་བྱིན་གྱིས། ཞེས་གསོལ་བ་བཏབ་པས། སྤྱི་བོའི་བླ་མ་ལྷའི་སྐུའི་ཆ་ལས་བདུད་རྩི་སྣ་ལྔ་འོད་ཟེར་དང་བཅས་པའི་རྒྱུན་བབས། རང་གཞན་སེམས་ཅན་ཐམས་ཅད་ཀྱི་ལུས་སེམས་ལ་ཞུགས་པས། དེ་དང་དེའི་གེགས་བྱེད་སྦྱངས། དེ་དང་དེའི་རྟོགས་པ་ཁྱད་པར་ཅན་རང་གཞན་གྱི་རྒྱུད་ལ་སྐྱེས་པར་བསམ་མོ། །གསུམ་པ་ན། སྤྱི་བོའི་བླ་མ་ལྷའི་སྐུའི་ཆ་ལས་བླ་མ་ཡི་དམ་དཀོན་མཆོག་གསུམ་དཔའ་བོ་དཔའ་མོ་ཆོས་སྐྱོང་སྲུང་མའི་ཚོགས་ནམ་མཁའ་གང་བ་སྤྲོས་ཏེ། སྤྱི་བོའི་བླ་མ་ལྷའི་སྐུའི་མཐའ་བསྐོར་དུ་བཞུགས་པའི་སྐྱབས་ཡུལ་གསལ་ལེགས་པར་བཏབ། དེ་དག་གི་སྐུ་གསུང་ཐུགས་ཡོན་ཏན་ཕྲིན་ལས་དང་བཅས་པའི་ཡོན་ཏན་ཕྲིན་ལས་དྲན་བཞིན་པས། བདག་དང་མ་སེམས་ཅན་ཐམས་ཅད་འཁོར་བ་དང་ངན་འགྲོའི་འཇིགས་པ་ལས་ད་ལྟ་ཉིད་དུ་བསྐྱབ་ཏུ་གསོལ་སྙམ་པའི་འདུན་པ་དང་ལྡན་པས། བླ་མ་ཡི་དམ་དཀོན་མཆོག་གསུམ་ལ་སྐྱབས་སུ་མཆི། ཞེས་པའི་སྐྱབས་འགྲོ་ལན་བརྒྱ་སྟོང་ཁྲི་འབུམ་སོགས་བྱ་ཞིང༌། དཀོན་མཆོག་གསུམ་ལ་སྐྱབས་སུ་སོང་བས་གནས་སྐབས་དང་མཐར་ཐུག་གི་ཕན་ཡོན་ཤེས་པའི་སྒོ་ནས་སྐྱབས་འགྲོའི་བསླབ་བྱ་རྣམས་ལ་ཚུལ་བཞིན་དུ་བསླབ་པར་བྱའོ། །བཞི་པ་ནི། སྤྱི་བོར་བླ་མ་ལྷ་བསྒོམ་བཞིན་པའི་ངང་ནས་འདི་ལྟར་བསམ་སྟེ། རྒྱལ་བའི་གསུང་རབ་ལས། རྒྱུ་དགེ་བ་སྤྱད་པ་ལ་བརྟེན་ནས་འབྲས་བུ་བདེ་བ་ཁོ་ན་འབྱུང་ཞིང་སྡུག་བསྔལ་མི་འབྱུང༌། རྒྱུ་མི་དགེ་བ་སྤྱད་པ་ལ་བརྟེན་ནས་འབྲས་བུ་སྡུག་བསྔལ་ཁོ་ན་འབྱུང་ཞིང་བདེ་བ་མི་འབྱུང་རྒྱུ་དགེ་སྡིག་གཉིས་
ཆུང་ངུ་ལས་མ་སྤྱད་ཀྱང༌། གེགས་བྱེད་དང་མ་ཕྲད་ན་འབྲས་བུ་ཤིན་ཏུ་ཆེ་བ་འབྱུང༌། རྒྱུ་དགེ་སྡིག་གཉིས་མ་སྦྱང་ན་འབྲས་བུ་བདེ་སྡུག་མྱོང་བ་མེད་ཅིང་རྒྱུ་དགེ་སྡིག་གཉིས་སྤྱད་པ་གེགས་བྱེད་དང་མ་ཕྲད་ན། ལས་བྱས་པ་ཆུད་མི་ཟ་བས་འབྲས་བུ་བདེ་སྡུག་གཉིས་ངེས་པར་འབྱིན། དེ་ཡང་ཞིང་དང༌། བསམ་པ་དང༌། དངོས་པོ་དང་རྟེན་གྱི་སྒོ་ནས་སྟོབས་ཆེ་བར་གསུངས་པ་ལ་ཡིད་ཆེས་ཀྱི་དད་པ་བསྐྱེད་ནས། དགེ་བ་བཅུ་ལ་སོགས་པའི་དགེ་བ་ཕྲ་མོ་ནས་བསྒྲུབ་ཅིང༌། མི་དགེ་བ་བཅུ་ལ་སོགས་པའི་མི་དགེ་བ་ཕྲ་མོས་ཀྱང་སྒོ་གསུམ་ལ་མ་གོས་པའི་བླང་དོར་ལ་འབད་པར་བྱའོ། །དེ་ལྟར་བྱེད་ནུས་པར་བླ་མ་ལྷས་བྱིན་གྱིས་བརླབ་ཏུ་གསོལ། ཞེས་གསོལ་བ་བཏབ་པས། སྤྱི་བོའི་བླ་མ་ལྷའི་སྐུའི་ཆ་ལས་བདུད་རྩི་སྣ་ལྔ་འོད་ཟེར་དང་བཅས་པའི་རྒྱུན་བབས། རང་གཞན་སེམས་ཅན་ཐམས་ཅད་ཀྱི་ལུས་སེམས་ལ་ཞུགས་པས། དེ་དང་དེའི་གེགས་བྱེད་སྦྱངས། དེ་དང་དེའི་རྟོགས་པ་ཁྱད་པར་ཅན་རང་གཞན་གྱི་རྒྱུད་ལ་སྐྱེས་པར་བསམ་མོ། །དེ་ལྟར་འབད་ཀྱང་གཉེན་པོ་སྟོབས་ཆུང༌། ཉོན་མོང་སྟོབས་ཆེ་བས་མི་དགེ་བས་གོས་ན་སྟོབས་བཞིའི་བཤགས་སྡོམ་ལ་འབད་པར་བྱའོ། །གསུམ་པ་མཇུག་ཏུ་ཇི་ལྟར་བྱ་བ་ནི་སྔར་བཞིན་ཡིན་ལ། །གཉིས་པ་ཐུན་མཚམས་སུ་ཡང་སྐྱེས་བུ་ཆུང་ངུ་དང་ཐུན་མོང་བའི་ཆོས་སྐོར་སྟོན་པའི་གསུང་རབ་དགོངས་འགྲེལ་དང་བཅས་པ་བལྟ་བ་སོག་སྔར་བཞིན་ནོ། སྐྱེས་བུ་ཆུང་ངུ་དང་ཐུན་མོང་བའི་ལམ་གྱི་རིམ་པ་ལ་བློ་སྦྱང་བ་བཤད་ཟིན་ཏོ། །གཉིས་པ་སྐྱེས་བུ་འབྲིང་དང་ཐུན་མོང་བའི་ལམ་གྱི་རིམ་པ་ལ་བློ་སྦྱོང་བ་ལ་གཉིས། ཐར་པ་དོན་གཉེར་གྱི་བློ་བསྐྱེད་པ་དང༌། ཐར་པ་འགྲོ་བའི་ལམ་གྱི་རང་བཞིན་གཏན་ལ་དབབ་པའོ། །དང་པོ་ལ་གཉིས། ཐུན་གྱི་ངོ་བོ་ལ་ཇི་ལྟར་བྱ་བ་དང༌། ཐུན་མཚམས་སུ་ཇི་ལྟར་བྱ་བའི་ཚུལ་ལོ། །དང་པོ་ལ་སྦྱོར་དངོས་མཇུག་གསུམ་ལས། དང་པོ་སྦྱོར་བ་ནི། སྐྱབས་
གནས་ཀུན་འདུས་བླ་མ་ལྷག་པའི་ལྷ། །ཐུབ་དབང་རྡོ་རྗེ་འཆང་ལ་གསོལ་བ་འདེབས། ཞེས་པ་ཡན་ཆད་སྔར་བཞིན་ཡིན་ལ། དེ་ནས་བདག་དང་མ་སེམས་ཅན་ཐམས་ཅད་འཁོར་བར་སྐྱེས་ནས་ཡུན་རིང་ལ་ཤུགས་དྲག་པའི་སྡུག་བསྔལ་སྣ་ཚོགས་ཞིག་མྱོང་བ་འདི། །འཁོར་བ་མཐའ་དག་སྡུག་བསྔལ་གྱི་རང་བཞིན་དུ་ཤེས་ནས་དེ་ལས་ཐར་འདོད་ཀྱི་བློ་ཤུགས་དྲག་མ་སྐྱེས་པས་ལན་བར་འདུག་པས་ད་བདག་དང་མ་སེམས་ཅན་ཐམས་ཅད་ཀྱི་རྒྱུད་ལ་འཁོར་བ་མཐའ་དག་སྡུག་བསྔལ་གྱི་རང་བཞིན་ཏུ་ཤེས་ནས་དེ་ལས་ཐར་འདོད་ཀྱི་བློ་ཤུགས་དྲག་སྐྱེ་བར་བླ་མ་ལྷས་བྱིན་གྱིས་བརླབ་ཏུ་གསོལ། ཞེས་གསོལ་བ་བཏབ་པས། སྤྱི་བོའི་བླ་མ་ལྷའི་སྐུའི་ཆ་ལས་བདུད་རྩི་སྣ་ལྔ་འོད་ཟེར་དང་བཅས་པའི་རྒྱུན་བབས། རང་གཞན་སེམས་ཅན་ཐམས་ཅད་ཀྱི་ལུས་སེམས་ལ་ཞུགས་ནས། ཐོག་མེད་ནས་བསགས་པའི་སྡིག་སྒྲིབ་ཐམས་ཅད་དང༌། ཁྱད་པར་འཁོར་བ་མཐའ་དག་སྡུག་བསྔལ་གྱི་རང་བཞིན་དུ་ཤེས་ནས་དེ་ལས་ཐར་འདོད་ཀྱི་བློ་ཤུགས་དྲག་སྐྱེ་བ་ལ་གེགས་བྱེད། ལུས་དྭངས་གསལ་འོད་ཀྱི་རང་བཞིན་ཅན་དུ་གྱུར། ཚེ་དང་བསོད་ནམས་ལ་སོགས་པའི་ཡོན་ཏན་ཐམས་ཅད་འཕེལ་ཞིང་རྒྱས། ཁྱད་པར་འཁོར་བ་མཐའ་དག་སྡུག་བསྔལ་གྱི་རང་བཞིན་དུ་ཤེས་ནས་དེ་ལས་ཐར་འདོད་ཀྱི་བློ་ཤུགས་དྲག་རང་གཞན་གྱི་རྒྱུད་ལ་སྐྱེས་པར་བསམ་མོ། །གཉིས་པ་དངོས་གཞི་ལ་གཉིས། འཁོར་བ་སྤྱིའི་སྡུག་བསྔལ་བསམ་པ་དང༌། སོ་སོའི་སྡུག་བསྔལ་བསམ་པའོ། །དང་པོ་ནི། སྤྱི་བོར་བླ་མ་ལྷ་བསྒོམ་བཞིན་པའི་ངང་ནས་འདི་ལྟར་བསམ་སྟེ། བདག་གིས་མི་དགེ་བཅུ་སྤོང་བའི་ཚུལ་ཁྲིམས་ལ་ཚུལ་བཞིན་དུ་བསླབ་པས། ངན་འགྲོའི་སྡུག་བསྔལ་ལས་འདས་པའི་བདེ་འགྲོའི་གོ་འཕང་ཞིག་ཐོབ་ཀྱང༌། སྡུག་བསྔལ་རྩ་བ་ནས་སྤངས་པའི་ཐར་པ་ཞིག་མ་ཐོབ་ན་བདེ་བའི་སྐབས་སྐད་ཅིག་ཀྱང་མི་འདུག་སྟེ། དཔེར་ན་མི་ནག་ཅན་ཞིག་ཟླ་བ་
གཅིག་ནས་གསོད་པར་ངེས་ལ། དེའི་བར་དུ་ཡང་ཉི་མ་རེ་རེ་བཞིན་ཁྲིམས་ཀྱི་ལ་ཐིགས་དང༌། དབྱུག་པས་བསྣུན་པ་སོགས་ཀྱི་སྡུག་བསྔལ་དྲག་པོ་མྱོང་བ་ལ། འགའ་ཞིག་གིས་ངོ་ཆེན་སོགས་ཀྱིས་ད་ལྟ་དབྱུག་པས་བསྣུན་པའི་སྡུག་བསྔལ་མེད་ཀྱང་དེ་ནི་ཉི་མ་རེ་རེ་བཞིན་གསོད་པའི་སྡུག་བསྔལ་ལ་ཇེ་ཉེར་འགྲོ་བས་བདེ་བའི་བློ་ཅུང་ཟད་ཀྱང་མེད་པ་བཞིན་དུ། སྡུག་བསྔལ་རྩ་བ་ནས་སྤངས་པའི་ཐར་བ་མ་ཐོབ་ཕྱིན། བདེ་འགྲོའི་གོ་འཕང་ཅི་འདྲ་ཞིག་ཐོབ་ཀྱང་སར་བྱས་ཀྱི་ལས་བཟང་པོའི་འཕེན་པ་ཟད་ནས་ངན་སོང་གསུམ་དུ་ལྟུང་སྟེ། ཡུན་རིང་ལ་ཤུགས་དྲག་པའི་སྡུག་བསྔལ་སྣ་ཚོགས་པ་ཞིག་མྱོང་དགོས་པར་འདུག །གཞན་ཡང་འཁོར་བ་འདིར་ལས་ཉོན་གྱི་དབང་གིས་སྐྱེ་བ་ཞིག་བླངས་ཕྱིན་ཆད་སྡུག་བསྔལ་གྱི་རང་བཞིན་ལས་མ་འདས་ཏེ། དགྲ་གཉེན་དུ་འགྱུར་བ་དང༌། གཉེན་ཡང་དགྲར་འགྱུར་བས་ཕན་གནོད་བྱེད་པ་ལ་ཡིད་བརྟེན་ནི་མེད། འཁོར་བའི་བདེ་བ་ཅི་ཙམ་སྤྱད་ཀྱང་ངོམས་པའི་མཐའ་མེད་པར་མ་ཟད་ཆགས་པ་རྒྱས་པར་བྱས་ཏེ་སྡུག་བསྔལ་མི་བཟད་པ་དུ་མ་ནི་འདྲེན་པར་བྱེད། ལུས་བཟང་པོ་ཅི་ཙམ་ཐོབ་ཀྱང་ཡང་དང་ཡང་དུ་འདོར་དགོས་པས་ལུས་ཐོབ་པ་ལ་ཡིད་བརྟེན་ནི་མེད། ཐོག་མ་མེད་པ་ནས་ཡང་དང་ཡང་དུ་ཉིང་མཚམས་སྦྱར་བས་སྐྱེ་བའི་མཐའ་མངོན་པ་ནི་མེད། འཁོར་བའི་ཕུན་ཚོགས་ཇི་ཙམ་ཐོབ་ཀྱང་མཐར་ངེས་པར་འདོར་དགོས་པས་ཕུན་ཚོགས་ཐོབ་པ་ལ་ཡིད་བརྟེན་ནི་མེད། རང་ཉིད་གཅིག་པུར་གྲོགས་མེད་པར་འཇིག་རྟེན་ཕ་རོལ་ཏུ་འགྲོ་དགོས་པས་གྲོགས་ལ་ཡིད་བརྟེན་ནི་མེད། དེས་ན་བདག་གིས་རྙེད་པར་དཀའ་ཞིང་རྙེད་ན་དོན་ཆེ་བའི་དལ་འབྱོར་ཐོབ་པའི་དུས་འདིར། འཁོར་བའི་སྡུག་བསྔལ་མཐའ་དག་སྤངས་པའི་བླ་མ་སངས་རྒྱས་ཀྱི་གོ་འཕང་རིན་པོ་ཆེ་ཅི་ནས་ཀྱང་ཐོབ་པར་བྱའོ། །དེ་ལྟར་བྱེད་ནུས་པར་བླ་མ་ལྷས་བྱིན་གྱིས་བརླབ་ཏུ་གསོལ། ཞེས་གསོལ་བ་བཏབ་པས། སྤྱི་བོའི་བླ་མ་ལྷའི་སྐུའི་ཆ་ལས་བདུད་རྩི་སྣ་ལྔ་འོད་ཟེར་དང་བཅས་པའི་རྒྱུན་
བབས། རང་གཞན་སེམས་ཅན་ཐམས་ཅད་ཀྱི་ལུས་སེམས་ལ་ཞུགས་པས། དེ་དང་དེའི་གེགས་བྱེད་སྦྱངས། དེ་དང་དེའི་རྟོགས་པ་ཁྱད་པ་ཅན་རང་གཞན་གྱི་རྒྱུད་ལ་སྐྱེས་པར་བསམ་མོ། །གཉིས་པ་འཁོར་བ་སོ་སོའི་སྡུག་བསྔལ་བསམ་པ་ནི། སྤྱི་བོར་བླ་མ་ལྷ་བསྒོམ་བཞིན་པའི་ངང་ནས་འདི་ལྟར་བསམ་སྟེ། ཉེར་ལེན་གྱི་ཕུང་པོ་ཞིག་གྲུབ་ཕྱིན་ཆད་སྡུག་བསྔལ་གྱི་རང་བཞིན་ལས་མ་འདས་ཏེ། ངན་སོང་གསུམ་ལྟ་སྨོས་ཀྱང་ཅི་དགོས། མིའི་ཉེར་ལེན་གྱི་ཕུང་བོ་གྲུབ་པ་ལ་བརྟེན་ནས། བཀྲེས་སྐོམ་དང༌། ཚོལ་ཁྲོ་དང༌། གཉེན་སྡུག་པ་དང་བྲལ་བ་དང༌། དགྲ་མི་སྡུག་པ་དང་ཕྲད་པ་དང༌། འདོད་པའི་དངོས་པོ་བཙལ་ཀྱང་མི་རྙེད་ཅིང༌། མི་འདོད་པའི་དངོས་པོ་ཐོག་ཏུ་བབས་པ་དང༌། སྐྱེ་རྒ་ན་འཆི་སོགས་ཀྱི་སྡུག་བསྔལ་མྱོང༌། ལྷ་མ་ཡིན་གྱི་ཉེར་ལེན་གྱི་ཕུང་པོ་སྒྲུབ་པ་ལ་བརྟེན་ནས། ལྷའི་དཔལ་འབྱོར་མི་བཟོད་པའི་ཕྲག་དོག་གིས་ཡིད་གདུང་བའི་སྡུག་བསྔལ་དང༌། དེ་ལ་བརྟེན་ནས་ལུས་ཐོག་ཏུ་བབས་པའི་སྡུག་བསྔལ་མྱོང༌། །འདོད་ལྷའི་ཉེར་ལེན་གྱི་ཕུང་བོ་གྲུབ་པ་ལ་བརྟེན་ནས་ལྷ་མ་ཡིན་རྣམས་དང་འཐབ་པ་ན་ཡན་ལག་བཅད་པ་དང༌། ལུས་འདྲལ་བ་དང༌། གསོད་པ་སོགས་ཀྱི་སྡུག་བསྔལ་དང༌། མི་འདོད་བཞིན་དུ་འཆི་ལྟས་ལྔ་ཕོག་སྟེ། ལྷའི་དཔལ་འབྱོར་དང་བྲལ་ནས། ངན་སོང་གི་སྡུག་བསྔལ་མྱོང་དགོས་པར་ཤེས་པའི་སྡུག་བསྔལ་དང༌། ཁམས་གོང་མ་གཉིས་ཀྱི་ཉེར་ལེན་གྱི་ཕུང་པོ་གྲུབ་ཀྱང་གནས་པས་རང་དབང་མ་ཐོབ་པས། སྔར་གྱི་ལས་བཟང་པོའི་འཕེན་པ་ཟད་ནས་ངན་སོང་དུ་ལྟུང་བའི་སྡུག་བསྔལ་དཔག་ཏུ་མེད་པ་ཡོད། མདོར་ན་ཉེར་ལེན་གྱི་ཕུང་པོ་འདིས་ཚེ་འདིའི་སྐྱེ་རྒ་ན་འཆི་སོགས་ཀྱི་རྟེན་བྱེད་ཅིང༌། སྡུག་བསྔལ་གྱི་སྡུག་བསྔལ་དང་འགྱུར་བའི་སྡུག་བསྔལ་གཉིས་འདི་ཕྱི་གཉིས་ཀར་འདྲེན་པ་བྱེད། ཉེར་ལེན་གྱི་ཕུང་བོ་རང་གྲུབ་ཙམ་ནས་ལས་
ཉོན་གྱི་གཞན་དབང་ཅན་གྱི་འདུ་བྱེད་ཀྱི་ཕུང་བོའི་རང་བཞིན་ཅན་དུ་གྲུབ་པ་ཡིན་ནོ། །དེ་ཡན་ཉེར་ལེན་གྱི་ཕུང་པོའི་རང་བཞིན་ཅན་གྱི་འཁོར་བ་ལས་གྲོལ་བའི་བླ་མ་སངས་རྒྱས་ཀྱི་གོ་འཕང་ཅི་ནས་ཀྱང་ཐོབ་པར་བྱའོ། །དེ་ལྟར་བྱེད་ནུས་པར་བླ་མ་ལྷས་བྱིན་གྱིས་བརླབ་ཏུ་གསོལ། ཞེས་གསོལ་བ་བཏབ་པས། སྤྱི་བོའི་བླ་མ་ལྷའི་སྐུ་ལས་བདུད་རྩི་སྣ་ལྔ་འོད་ཟེར་དང་བཅས་པའི་རྒྱུན་བབས། རང་གཞན་སེམས་ཅན་ཐམས་ཅད་ཀྱི་ལུས་སེམས་ལ་ཞུགས་པས། དེ་དང་དེའི་གེགས་བྱེད་སྦྱངས། དེ་དང་དེའི་རྟོགས་པ་ཁྱད་པར་ཅན་རང་གཞན་གྱི་རྒྱུད་ལ་སྐྱེས་པར་བསམ་མོ། །གསུམ་པ་མཇུག་ཏུ་ཇི་ལྟར་བྱ་བ་ནི་སྔར་བཞིན་ཡིན་ལ། གཉིས་པ་ཐུན་མཚམས་སུ་ཡང་འཁོར་བ་མཐའ་དག་སྡུག་བསྔལ་གྱི་རང་བཞིན་ཅན་དུ་སྟོན་པའི་གསུང་རབ་དགོངས་འགྲེལ་དང་བཅས་པ་ལྟ་བ་སོགས་ནི་སྔར་བཞིན་ནོ། །གཉིས་པ་ཐར་བར་འགྲོ་བའི་ལམ་གྱི་རང་བཞིན་གཏན་ལ་དབབ་པ་ལ་གཉིས། ཐུན་གྱི་ངོ་བོ་ལ་ཇི་ལྟར་བྱ་བ་དང༌། ཐུན་མཚམས་སུ་ཇི་ལྟར་བྱ་བའི་ཚུལ་ལོ། །དང་བོ་ལ་སྦྱོར་དངོས་མཇུག་གསུམ་ལས། དང་བོ་སྦྱོར་བ་ནི། སྐྱབས་གནས་ཀུན་འདུས་བླ་མ་ལྷག་པའི་ལྷ། །ཐུབ་དབང་རྡོ་རྗེ་འཆང་ལ་གསོལ་བ་འདེབས། ཞེས་པ་ཡན་ཆད་སྔར་བཞིན་ཡིན་ལ། དེ་ནས་བདག་དང་མ་སེམས་ཅན་ཐམས་ཅད་འཁོར་བར་སྐྱེས་ནས་ཡུན་རིང་ལ་ཤུགས་དྲག་པའི་སྡུག་བསྔལ་སྣ་ཚོགས་པ་ཞིག་མྱོང་བ་འདི་ཐར་པ་དོན་གཉེར་གྱི་བློ་བསྐྱེད་ནས་ལམ་བསླབ་པ་གསུམ་ལ་ཚུལ་བཞིན་མ་བསླབས་པས་ལན་པར་འདུག་པས། ད་བདག་དང་མ་སེམས་ཅན་ཐམས་ཅད་ཀྱིས་ཐར་བ་དོན་གཉེར་གྱི་བློ་བསྐྱེད་ནས་ལམ་བསླབ་པ་གསུམ་ལ་ཚུལ་བཞིན་སློབ་ནུས་པར་བྱིན་གྱིས་བརླབ་ཏུ་གསོལ། ཞེས་གསོལ་བ་བཏབ་པས། སྤྱི་བོའི་བླ་མ་ལྷའི་སྐུའི་ཆ་ལས་བདུད་རྩི་སྣ་ལྔ་འོད་ཟེར་དང་བཅས་པའི་རྒྱུན་བབས། རང་གཞན་སེམས་
ཅན་ཐམས་ཅད་ཀྱི་ལུས་སེམས་ལ་ཞུགས་པས། ཐོག་མེད་ནས་བསགས་པའི་སྡིག་སྒྲིབ་ཐམས་ཅད་དང༌། ཁྱད་པར་ཐར་པ་དོན་གཉེར་གྱི་བློ་བསྐྱེད་ནས་ལམ་བསླབ་པ་གསུམ་ལ་ཚུལ་བཞིན་དུ་སློབ་པ་ལ་གེགས་བྱེད། ལུས་དྭངས་གསལ་འོད་ཀྱི་རང་བཞིན་ཅན་དུ་གྱུར། ཚེ་དང་བསོད་ནམས་ལ་སོགས་པའི་ཡོན་ཏན་ཐམས་ཅད་འཕེལ་ཞིང་རྒྱས། ཁྱད་པར་ཐར་བ་དོན་གཉེར་གྱི་བློ་བསྐྱེད་ནས་ལམ་བསླབ་པ་གསུམ་ལ་ཚུལ་བཞིན་སློབ་པའི་རྟོགས་པ་ཁྱད་པར་ཅན་རང་གཞན་གྱི་རྒྱུད་ལ་སྐྱེས་པར་བསམ་མོ། །གཉིས་པ་དངོས་གཞི་ནི། སྤྱི་བོར་བླ་མ་ལྷ་བསྒོམ་བཞིན་པའི་ངང་ནས་འདི་ལྟར་བསམ་སྟེ། ཤེས་པ་ཁོ་རང་གི་ངོས་ནས་ལུང་མ་བསྟན་ཡིན་པ་ལ། དང་པོར་བདག་དང་བདག་གི་བ་ལ་དམིགས་ནས་རང་བཞིན་གྱིས་གྲུབ་པའི་བློ་སྐྱེ། དེས་བདག་ཏུ་བཟུང་བ་ལ་བརྟེན་ནས། རང་ཕྱོགས་ལ་ཆགས་པ་དང༌། གཞན་ཕྱོགས་ལ་སྡང་བ་དང༌། གཞན་ལས་མཆོག་འཛིན་གྱི་ང་རྒྱལ་ལ་སོགས་པའི་ལྟ་ལོག་རྣམས་སྐྱེ། དེ་ལ་བརྟེན་ནས་བདག་མེད་པ་སྟོན་པའི་སྟོན་པ་དང༌། དེས་བསྟན་པའི་ལས་འབྲས་དང༌། བདེན་བཞི་དང༌། དཀོན་མཆོག་གསུམ་སོགས་མེད་པར་འཛིན་པའི་ལོག་ལྟ་དང་ཐེ་ཚོམ་རྣམས་སྐྱེ། དེ་ལ་བརྟེན་ནས་ཉོན་མོངས་པ་གཞན་རྣམས་རྒྱས། དེའི་དབང་གིས་ལས་བསགས་ནས། འཁོར་བར་མི་འདོད་བཞིན་དུ་སྡུག་བསྔལ་སྣ་ཚོགས་མྱོང་བ་འདི་བྱུང་འདུག །དེས་ན་སྡུག་བསྔལ་ཐམས་ཅད་ཀྱི་རྩ་བ་མཐར་གཏུགས་ན་མ་རིག་པར་འདུག་པས། འཁོར་བའི་སྡུག་བསྔལ་ཐམས་ཅད་རྩ་བ་ནས་སྤངས་པའི་བླ་མ་སངས་རྒྱས་ཀྱི་གོ་འཕང་ཞིག་ཅི་ནས་ཀྱང་ཐོབ་པར་བྱ། དེའི་ཕྱིར་དུ་ལམ་བསླབ་པ་རིན་པོ་ཆེ་གསུམ་ལ་ཚུལ་བཞིན་དུ་བསླབ་པར་བྱའོ། །ཁྱད་པར་བསྲུངས་ན་ཕན་ཡོན་ཆེ་ཞིང་མ་བསྲུང་ན་ཉེས་དམིགས་ཤིན་ཏུ་ཆེ་བར་འདུག་པས། བདག་གིས་ཇི་ལྟར་ཁས་བླངས་པའི་ཚུལ་ཁྲིམས་
སྲོག་གི་ཕྱིར་ཡང་མི་བཏང་བར་ཚུལ་བཞིན་དུ་བསྲུང་བར་བྱའོ། །དེ་ཡང་མི་ཤེས་པ་ལྟུང་བ་འབྱུང་བའི་སྒོ་ཡིན་པས་དེའི་གཉེན་པོར་བསླབ་བྱ་རྣམས་ཉན་ནས་ཤེས་པར་བྱ། མ་གུས་པ་ལྟུང་བ་འབྱུང་བའི་སྒོ་ཡིན་པས། དེའི་གཉེན་པོར་སྟོན་པ་དང༌། དེས་བཅས་པའི་བསླབ་པ་དང༌། བསླབ་པ་དེ་ལ་ཚུལ་བཞིན་དུ་སློབ་པའི་གྲོགས་ཚངས་པ་མཚུངས་པར་སྤྱོད་པ་རྣམས་ལ་གུས་པར་བྱ། བག་མེད་པ་ལྟུང་བ་འབྱུང་བའི་སྒོ་ཡིན་པས་དེའི་གཉེན་པོར་དྲན་ཤེས་ངོ་ཚ་ཁྲེལ་ཡོད་པ་སྐྱེས་ནས་བག་དང་ལྡན་པར་བྱ། ཉོན་མོངས་པ་མང་བ་ལྟུང་བ་འབྱུང་བའི་སྒོ་ཡིན་པས། འདོད་ཆགས་ཀྱི་གཉེན་པོར་མི་སྡུག་པ་དང༌། ཞེ་སྡང་གི་གཉེན་པོར་བྱམས་པ་དང༌། གཏི་མུག་གི་གཉེན་པོར་རྟེན་ཅིང་འབྲེལ་བར་འབྱུང་བ་སོགས་བསྒོམས་ནས། ཉེས་པ་རྣམས་ཀྱིས་མ་གོས་པའི་ཚུལ་ཁྲིམས་རྣམ་པར་དག་པ་ལ་ཚུལ་བཞིན་དུ་བསླབ་པར་བྱའོ། །དེ་ལྟར་བྱེད་ནུས་པར་བླ་མ་ལྷས་བྱིན་གྱིས་བརླབ་ཏུ་གསོལ། ཞེས་གསོལ་བ་བཏབ་པས། སྤྱི་བོའི་བླ་མ་ལྷའི་སྐུའི་ཆ་ལས་བདུད་རྩི་སྣ་ལྔ་འོད་ཟེར་དང་བཅས་པའི་རྒྱུན་བབས། རང་གཞན་སེམས་ཅན་ཐམས་ཅད་ཀྱི་ལུས་སེམས་ལ་ཞུགས་པས། དེ་དང་དེའི་གེགས་བྱེད་སྦྱངས། དེ་དང་དེའི་རྟོགས་པ་ཁྱད་པར་ཅན་རང་གཞན་གྱི་རྒྱུད་ལ་སྐྱེས་པར་བསམ་མོ། །གསུམ་པ་མཇུག་ཏུ་ཇི་ལྟར་བྱ་བ་ནི་སྔར་བཞིན་ཡིན་ལ། གཉིས་པ་ཐུན་མཚམས་སུ་སོ་སོར་ཐར་བའི་དབང་དུ་བྱས་པའི་བསླབ་བྱ་རྣམས་བལྟ་བ་སོགས་ནི་སྔར་བཞིན་ནོ། །སྐྱེས་བུ་འབྲིང་དང་ཐུན་མོང་བའི་ལམ་གྱི་རིམ་པ་ལ་བློ་སྦྱོང་བ་བཤད་ཟིན་ཏོ། །གསུམ་པ་སྐྱེས་བུ་ཆེན་པོའི་ལམ་གྱི་རིམ་པ་ལ་བློ་སྦྱང་བ་ལ་གཉིས། བྱང་ཆུབ་ཏུ་སེམས་བསྐྱེད་ཚུལ་དང༌། སེམས་བསྐྱེད་ནས་སྤྱོད་པ་ལ་བསླབ་ཚུལ་ལོ། །དང་བོ་ལ་གཉིས། །བྱང་ཆུབ་ཏུ་སེམས་བསྐྱེད་པ་དངོས་དང༌། སེམས་བསྐྱེད་ཆོ་གས་བཟུང་བའི་ཚུལ་ལོ། །དང་བོ་ལ་གཉིས། རྒྱུ་འབྲས་མན་ངག་བདུན་གྱི་སྒོ་ནས་
བྱང་ཆུབ་ཏུ་སེམས་བསྐྱེད་ཚུལ་དང༌། བདག་གཞན་མཉམ་བརྗེའི་སྒོ་ནས་བྱང་ཆུབ་ཏུ་སེམས་བསྐྱེད་ཚུལ་ལོ། །དང་པོ་ནི། སྔོན་དུ་སེམས་ཅན་ཐམས་ཅད་ལ་སེམས་སྙོམས་པ་བསྒྲུབས་ཏེ། མར་ཤེས་ནས་བྱང་ཆུབ་ཀྱི་སེམས་ཀྱི་བར་བསྒོམ་པ་ཡིན་པས་འདི་ལ་གཉིས། ཐུན་གྱི་ངོ་བོ་ལ་ཇི་ལྟར་བྱ་བ་དང༌། ཐུན་མཚམས་སུ་ཇི་ལྟར་བྱ་བའི་ཚུལ་ལོ། །དང་པོ་ལ་སྦྱོར་དངོས་མཇུག་གསུམ་ལས། དང་པོ་སྦྱོར་བ་ནི། སྐྱབས་གནས་ཀུན་འདུས་བླ་མ་ལྷག་པའི་ལྷ། །ཐུབ་དབང་རྡོ་རྗེ་འཆང་ལ་གསོལ་བ་འདེབས། ཞེས་པ་ཡན་ཆད་སྔར་བཞིན་ཡིན་ལ། བདག་དང་མ་སེམས་ཅན་ཐམས་ཅད་ཀྱི་རྒྱུད་ལ། སེམས་ཅན་ཐམས་ཅད་ལ་ཉེ་རིང་ཆག་སྡང་དང་བྲལ་བའི་སེམས་སྙོམས་པ་དང་མར་ཤེས་དྲིན་དྲན་དྲིན་གཟོ་བྱམས་སྙིང་རྗེ་བྱང་ཆུབ་ཀྱི་སེམས་ཀྱི་རྟོགས་པ་ཁྱད་པར་ཅན་སྐྱེ་བར་བླ་མ་ལྷས་བྱིན་གྱིས་བརླབ་ཏུ་གསོལ། ཞེས་གསོལ་བ་བཏབ་པས། སྤྱི་བོའི་བླ་མ་ལྷའི་སྐུའི་ཆ་ལས་བདུད་རྩི་སྣ་ལྔ་འོད་ཟེར་དང་བཅས། རང་གཞན་སེམས་ཅན་ཐམས་ཅད་ཀྱི་ལུས་སེམས་ལ་ཞུགས་པས། ཐོགས་མེད་ནས་བསགས་པའི་སྡིག་སྒྲིབ་ཐམས་ཅད་དང༌། ཁྱད་པར་སེམས་ཅན་ཐམས་ཅད་ལ་ཉེ་རིང་ཆགས་སྡང་དང་བྲལ་བའི་སེམས་སྙོམས་པ་སོགས་སྐྱེ་བ་ལ་གེགས་བྱེད། ལུས་དྭངས་གསལ་འོད་ཀྱི་རང་བཞིན་ཅན་ཏུ་གྱུར། ཚེ་དང་བསོད་ནམས་ལ་སོགས་པའི་ཡོན་ཏན་ཐམས་ཅད་འཕེལ་ཞིང་རྒྱས། ཁྱད་པར་སེམས་ཅན་ཐམས་ཅད་ལ་ཉེ་རིང་ཆགས་སྡང་དང་བྲལ་བའི་སེམས་སྙོམས་པ་སོགས་ཀྱི་རྟོགས་པ་ཁྱད་པར་ཅན་རང་གཞན་གྱི་རྒྱུད་ལ་སྐྱེས་པར་བསམ་མོ། །གཉིས་པ་དངོས་གཞི་ནི། སྤྱི་བོར་བླ་མ་ལྷ་བསྒོམ་བཞིན་པའི་ངང་ནས། ཕན་གནོད་གང་ཡང་མ་བྱས་པའི་བར་མའི་སེམས་ཅན་གཅིག་མདུན་དུ་གསལ་བར་དམིགས་ནས། །འདིའི་ངོས་ནས་བདེ་བ་འདོད་ཅིང་སྡུག་བསྔལ་མི་འདོད་བས་རེས་འགའ་ནི་ཉེ་བར་
བཟུང་ནས་ཕན་འདོགས་པ་དང༌། རེས་འགའ་ནི་རིང་བར་བཟུང་ནས་གནོད་པ་སྐྱེལ་བའི་ཆ་གཉིས་མི་བྱ་བར་ཉེ་རིང་ཆགས་སྡང་དང་བྲལ་བའི་སེམས་སྙོམས་པ་ཞིག་བྱའོ། །དེ་ལྟར་བྱེད་ནུས་པར་བླ་མ་ལྷས་བྱིན་གྱིས་བརླབ་ཏུ་གསོལ། ཞེས་སོགས་དང༌། དེ་ལ་སེམས་སྙོམས་པ་ན་ཡིད་དུ་འོང་ངེས་ཤེས་པའི་སེམས་ཅན་གཅིག་མདུན་དུ་གསལ་བར་དམིགས་ནས་སེམས་སྙོམས་པ་སྒོམ་པར་བྱེད། དེ་ལ་སེམས་མི་སྙོམས་པ་ནི་ཆགས་པའི་དབང་གིས་ཡིན་པར་འདུག །སྔར་ཡང་ཡིད་དུ་འོང་བ་ལ་སྲེད་པས་ཀ་འཁོར་བར་སྐྱེས་པ་ཡིན་སྙམ་དུ་སྲེད་པ་བཀག་ནས་སྒོམ་པར་བྱེད། དེ་ལ་སེམས་སྙོམས་པ་ན་ཡིད་དུ་མི་འོང་ངེས་ཤེས་པའི་སེམས་ཅན་གཅིག་མདུན་དུ་གསལ་བར་དམིགས་ནས་སེམས་སྙོམས་པ་སྒོམ་པར་བྱེད། དེ་ལ་སེམས་མི་སྙོམས་པ་ནི་རང་གི་བློས་མཐའ་གཅིག་ཏུ་མི་མཐུན་པར་བཟུང་བས་ཞེ་སྡང་སྐྱེས་པ་ཡིན། དེ་ལ་སེམས་མ་སྙོམས་ན་བྱང་ཆུབ་ཀྱི་སེམས་སྐྱེ་བའི་གནས་མེད་སྙམ་དུ་ཞེ་སྡང་བཀག་ནས་སྒོམ་པར་བྱེད། དེ་ལ་སེམས་སྙོམས་པ་ན་མ་ལྟ་བུའི་ཆེས་ཡིད་དུ་འོང་བའི་སེམས་ཅན་གཅིག་དང་དགྲ་ལྟ་བུའི་ཆེས་ཡིད་དུ་མི་འོང་བའི་སེམས་ཅན་གཅིག་སྟེ་གཉིས་མདུན་དུ་གསལ་བར་དམིགས་ནས། འདི་གཉིས་ཀྱི་ངོས་ནས་བདེ་བ་འདོད་ཅིང༌། སྡུག་བསྔལ་མི་འདོད་པར་མཚུངས་ལ། རང་གི་ངོས་ནས་ནི་ད་ལྟ་གཉེན་དུ་བཟུང་བ་འདིས་ཀྱང་འཁོར་བ་ཐོག་མ་མེད་པ་ནས་དགྲའི་གཙོ་བོ་བྱས་པ་ལ་གྲངས་ཀྱིས་མི་ཆོད། ད་ལྟ་དགྲར་བཟུང་བ་འདིས་ཀྱང་འཁོར་བ་ཐོག་མ་མེད་པ་ནས་མ་བྱས་ཏེ་བརྩེ་བས་བསྐྱངས་པ་ལ་གྲངས་ཀྱིས་མི་ཆོད་པས། གང་ལ་ནི་ཆགས་པར་བྱ། གང་ལ་ནི་སྡང་བར་བྱ། ཉེ་རིང་ཆགས་སྡང་དང་བྲལ་བའི་སེམས་སྙོམས་པ་ཞིག་བྱའོ། །དེ་ལྟར་བྱེད་ནུས་པར་བླ་མ་ལྷས་བྱིན་གྱིས་བརླབ་ཏུ་གསོལ། ཞེས་སོགས་དང༌། དེ་ལ་སེམས་སྙོམས་པ་ན་སེམས་ཅན་ཐམས་ཅད་ལ་
སེམས་སྙོམས་པ་སྒོམ་པར་བྱེད། དེའི་ཚུལ་ནི་སེམས་ཅན་ཐམས་ཅད་ཀྱི་ངོས་ནས་བདེ་བ་འདོད་ཅིང༌། སྡུག་བསྔལ་མི་འདོད་པར་མཚུངས། རང་གི་ངོས་ནས་ནི་སེམས་ཅན་ཐམས་ཅད་གཉེན་ཡིན་པས་འགའ་ཞིག་ལ་ཉེ་བར་བཟུང་ནས་ཕན་འདོགས་པ་དང༌། འགའ་ཞིག་ལ་རིང་བར་བཟུང་ནས་གནོད་པ་སྐྱེལ་བའི་ཆ་གཉིས་མི་བྱ་བར་ཉེ་རིང་ཆགས་སྡང་དང་བྲལ་བའི་སེམས་སྙོམས་པ་ཞིག་བྱའོ། །དེ་ལྟར་བྱེད་ནུས་པར་བླ་མ་ལྷས་བྱིན་གྱིས་བརླབ་ཏུ་གསོལ། །ཞེས་སོགས་དང༌། དེ་རྗེས་མར་ཤེས་ནས་བྱང་ཆུབ་ཀྱི་སེམས་ཀྱི་བར་སྒོམ་ཚུལ་ནི། སྤྱི་བོར་བླ་མ་ལྷ་བསྒོམ་བཞིན་པའི་ངང་ནས་འདི་ལྟར་བསམ་སྟེ། འོ་ན་སེམས་ཅན་ཐམས་ཅད་བདག་གི་གཉེན་ཡིན་པའི་རྒྱུ་མཚན་ཇི་ལྟར་ཡིན་ཞེན་འཁོར་བ་ལ་ཐོག་མ་མེད་པས་བདག་གིས་སྐྱེ་བ་ལ་ཡང་ཐོག་མ་མེད་ཅིང༌། སྐྱེ་བ་གཅིག་ནས་གཅིག་ཏུ་བརྒྱུད་དེ་ཡུལ་ཕྱོགས་དང་ས་ཕྱོགས་འདིར་མ་སྐྱེས་བྱ་བ་གཅིག་ཀྱང་མེད། སྐྱེས་པ་ལ་གྲངས་ཀྱིས་མི་ཆོད། སེམས་ཅན་འདིའི་ལུས་མ་བླངས་བྱ་བ་གཅིག་ཀྱང་མེད། བླངས་པ་ལ་གྲངས་ཀྱིས་མི་ཆོད། སེམས་ཅན་འདིས་བདག་གི་མ་མ་བྱས་བྱ་བ་གཅིག་ཀྱང་མེད། བྱས་པ་ལ་གྲངས་ཀྱིས་མི་ཆོད། སེམས་ཅན་རེ་རེ་ནས་ཀྱང་མིའི་རྟེན་ལ་བདག་གིས་མ་མ་བྱས་བྱ་བ་གཅིག་ཀྱང་མེད། བྱས་པ་ལ་གྲངས་ཀྱིས་མི་ཆོད་ཅིང་ད་དུང་ཡང་བྱེད་པར་འགྱུར། དེས་ན་དྲིན་གྱིས་བསྐྱངས་པའི་མ་ཅིས་ཀྱང་ཡིན་སྙམ་དུ་བསམ་མོ། །འོ་ན་སེམས་ཅན་ལ་གྲངས་མེད་པས་སེམས་ཅན་ཐམས་ཅད་བདག་གི་མ་མ་ཡིན་ནོ་སྙམ་ན་སེམས་ཅན་ལ་གྲངས་མེད་པས་བདག་གི་མ་མ་ཡིན་པར་མི་འགྱུར་ཏེ། སེམས་ཅན་ལ་གྲངས་མེད་པ་བཞིན་དུ་བདག་གི་སྐྱེ་བ་ལ་ཡང་གྲངས་མེད་པས་སེམས་ཅན་ཐམས་ཅད་བདག་གི་མ་ཡིན་སྙམ་དུ་བསམ། གལ་ཏེ་བདག་དང་སེམས་ཅན་ཐམས་ཅད་ཕན་ཚུན་ངོ་མི་
ཤེས་པས་བདག་གི་མ་མ་ཡིན་ནོ་སྙམ་ན། བདག་དང་སེམས་ཅན་ཐམས་ཅད་ཕན་ཚུན་ངོ་མི་ཤེས་པས་བདག་གི་མ་མ་ཡིན་པར་མི་འགྱུར་ཏེ། ཚེ་འདིར་ཡང་མ་བུ་ཕན་ཚུན་ངོ་མི་ཤེས་པ་དུ་མ་འདུག་པས་སོ་སྙམ་དུ་བསམ། གཞན་ཡང་སེམས་ཅན་ཐམས་ཅད་བདག་གི་ཚེ་རབས་སྔ་མའི་མ་ཡིན་ཀྱང་འདས་ཟིན་པས་མ་ཡིན་པ་མི་འཐད་དོ་སྙམ་ན། འོ་ན་ཁ་སང་གི་དུས་ཀྱི་མ་དེ་དེ་རིང་གི་དུས་སུ་འདས་ཟིན་པས་མ་མ་ཡིན་པར་འགྱུར་ཏེ། དེས་ན་ཁ་སང་གི་དུས་ཀྱི་མ་དང་དེ་རིང་གི་དུས་ཀྱི་མ་གཉིས་མ་ཡིན་པ་ལ་ཡང་ཁྱད་པར་མེད། དྲིན་གྱིས་བསྐྱངས་པ་ལ་ཡང་ཁྱད་པར་མེད་པ་བཞིན་དུ། ཚེ་རབས་སྔ་མའི་མ་དང་ཚེ་འདིའི་མ་གཉིས་ཀྱང་མ་ཡིན་པ་ལ་ཡང་ཁྱད་པར་མེད། དྲིན་གྱིས་བསྐྱངས་པ་ལ་ཡང་ཁྱད་པར་མེད་པས་སེམས་ཅན་ཐམས་ཅད་བདག་གི་མ་ཅིས་ཀྱང་ཡིན་སྙམ་དུ་བསམ། དེ་ལ་མྱོང་བ་ཐོན་པ་ན་དྲིན་བསམ་པ་ནི། སྤྱི་བོར་བླ་མ་ལྷ་བསྒོམ་བཞིན་པའི་ངང་ནས་རང་གི་ཚེ་འདིའི་མ་གཞོན་པའི་གནས་སྐབས་མ་ཡིན་པ་རྒན་པའི་གནས་སྐབས་ཀྱི་རྣམ་པ་གསལ་བ་གཅིག་མདུན་དུ་བསྒོམས་ནས་འདི་ལྟར་བསམ་སྟེ། བདག་གི་མ་འདིས་ཚེ་འདི་ཁོ་ནར་མ་ཟད་ཚེ་རབས་ཐོག་མ་མེད་པ་ནས་བདག་གི་མ་བགྲང་ལས་འདས་པ་བྱེད་བྱེད་པ་གཅིག་ཡིན་ཁྱད་པར་ཚེ་འདིར་ཡང་དང་པོར་མངལ་དུ་བརྩེ་བས་བསྐྱངས། བཙས་པའི་ཚེ་འཇམ་པའི་སྟན་ལ་བཞག །སོར་མོ་བཅུའི་རྩེ་ལ་གཡེང༌། ཤའི་དྲོད་ལ་སྦྱར། བརྩེ་བའི་འཛུམ་གྱིས་བསུས། དགའ་བའི་མིག་གིས་བལྟས། སྣབས་ཁས་ཕྱིས། མི་གཙང་བ་ལག་པས་ཕྱིས། མ་རང་སྲོག་ལ་བབས་པ་ལྟ་བུའི་སྡུག་བསྔལ་བྱུང་བ་ལས། བདག་ཅུང་ཟད་ན་བ་ལ་སྡུག་བསྔལ་ཆེ་བར་བྱས། སྡིག་སྡུག་གཏམ་ངན་རང་སྲོག་ལའང་མ་བལྟས་པ་ཤ་ཐང་ཐང་དུ་བསྒྲུབས་པའི་ཟས་ནོར་ཐམས་ཅད་བདག་ལ་བརྩེ་བས་ཕོག །མ་རང་གི་འབྱོར་འཁོས་དང་བསྟུན་པའི་
ཕན་པ་དང་བདེ་བ་ཚད་མེད་པ་བསྒྲུབས། གནོད་པ་དང་སྡུག་བསྔལ་ཚད་མེད་པ་ལས་བསྐྱབས་པས་དྲིན་ཤིན་ཏུ་ཆེ་སྙམ་དུ་བསམ། དེ་ལ་མྱོང་བ་ཐོན་པ་ན་ཕ་ལ་སོགས་པའི་གཉེན་གཞན་རྣམས་ལ་སྒོམ། །དེའི་ཚུལ་ནི་ཕ་ལ་སོགས་པའི་རྣམ་པ་གསལ་བར་དམིགས་ནས། འདིས་ཚེ་རབས་ཐོག་མ་མེད་པ་ནས་བདག་གི་མ་བྱས་པ་བགྲང་ལས་འདས་ཤིང༌། མ་ནམ་བྱས་པའི་ཚེ་ཚེ་འདིའི་མས་ཇི་ལྟར་དྲིན་གྱིས་བསྐྱངས་པ་བཞིན་ཏུ་དྲིན་གྱིས་བསྐྱངས་པས་དྲིན་ཤིན་ཏུ་ཆེ་སྙམ་དུ་བསམ། དེ་ལ་མྱོང་བ་ཐོན་པ་ན་བར་མའི་སེམས་ཅན་ཐམས་ཅད་ལ་བསྒོམ། །དེའི་ཚུལ་ནི་བར་མའི་སེམས་ཅན་རྣམས་མདུན་དུ་གསལ་བར་དམིགས་ནས། ད་ལྟ་བདག་དང་འདི་རྣམས་གང་ཡང་འབྲེལ་མེད་འདྲ་འདྲ་ཞིག་འདུག་མོད། འདི་རྣམས་ཀྱིས་ཚེ་རབས་ཐོག་མ་མེད་པ་ནས་བདག་གི་མ་བྱས་པ་བགྲང་ལས་འདས་ཤིང༌། མ་ནམ་བྱས་པའི་ཚེ་ཚེ་འདིའི་མས་ཇི་ལྟར་དྲིན་གྱིས་བསྐྱངས་པ་བཞིན་དུ་དྲིན་གྱིས་བསྐྱངས་པས་དྲིན་ཤིན་ཏུ་ཆེ་སྙམ་དུ་བསམ། དེ་ལ་མྱོང་བ་ཐོན་པ་ན་དགྲ་ལ་བསྒོམ། དེའི་ཚུལ་ནི་དགྲའི་རྣམ་པ་མདུན་དུ་གསལ་པ་ལ་དམིགས་ནས། ད་ལྟ་འདི་དགྲར་བཟུང་བས་ཅི་ཞིག་བྱ། འདིས་ཚེ་རབས་ཐོག་མ་མེད་པ་ནས་བདག་གི་མ་བྱས་པ་བགྲང་ལས་འདས་ཤིང༌། མ་ནམ་བྱས་པའི་ཚེ་ཕན་པ་དང་བདེ་བ་ཚད་མེད་པར་བསྒྲུབས། གནོད་པ་དང་སྡུག་བསྔལ་ཚད་མེད་པ་ལས་བསྐྱབས། ཁྱད་པར་བདག་གིས་འདི་མེད་ན་ཅུང་ཟད་ཀྱང་སྡོད་མི་ཚུགས་པ་དང༌། འདིས་ཀྱང་བདག་མེད་ན་ཅུང་ཟད་ཀྱང་སྡོད་མི་ཚུགས་པ་ལྟ་བུའི་ཡིད་བཅུགས་པ་བགྲང་ལས་འདས་པ་བྱས། ད་ལྟ་གནས་སྐབས་འདི་འདྲར་གྱུར་པ་ལས་ངན་པའི་དབང་གིས་ཡིན་འདུག །གཞན་དུ་ན་དྲིན་གྱིས་བསྐྱངས་པའི་མ་ཤ་སྟག་ཡིན་སྙམ་དུ་བསམ། དེ་ལ་མྱོང་བ་ཐོན་པ་ན་སེམས་ཅན་ཐམས་
ཅད་ཀྱི་དྲིན་བསམ་མོ། །དེ་ལྟར་དྲིན་བསམས་ནས་དྲིན་གཟོ་སྒོམ་ཚུལ་ནི། སྤྱི་བོར་བླ་མ་ལྷ་བསྒོམ་བཞིན་པའི་ངང་ནས་འདི་ལྟར་བསམ་སྟེ། ཐོག་མ་མེད་པ་ནས་དྲིན་གྱིས་བསྐྱངས་པའི་མ་རྣམས་ཉོན་མོངས་པའི་གདོན་གྱིས་སེམས་དཀྲུགས་པས་ན་ཤེས་པ་ལ་རང་དབང་མ་ཐོབ་པར་སྨྱོ། མངོན་མཐོ་དང་ངེས་ལེགས་ཀྱི་ལམ་ལྟ་བའི་མིག་དང་ནི་བྲལ། དགེ་བའི་བཤེས་གཉེན་གྱི་ལོང་ཁྲིད་ནི་མེད། སྐད་ཅིག་རེ་རེར་ཉེས་སྤྱོད་ཀྱིས་དབྱེ་ན་སྤྱོད་པས་ནི་བརྡེག་འཆའ། །སྤྱིར་འཁོར་བ་དང་ཁྱད་པར་ངན་འགྲོ་འཇིགས་སུ་རུང་བའི་གཡང་ས་འགྲིམ་པ་རྣམས་ཡལ་བར་དོར་ན་ཁྲེལ་ཤིན་ཏུ་ཆེ་བས་བདག་གིས་དྲིན་ལན་དུ་འཁོར་བའི་སྡུག་བསྔལ་ལས་བསྒྲལ་ནས་ཐར་བའི་བདེ་བ་ལ་དགོད་པར་བྱའོ། །དེ་ལྟར་བྱེད་ནུས་པར་བླ་མ་ལྷས་བྱིན་གྱིས་བརླབ་ཏུ་གསོལ། ཞེས་སོགས་དང༌། དེ་ནས་བྱམས་པ་སྒོམ་ཚུལ་ནི། རང་གི་མ་ལྟ་བུ་ཡིད་དུ་གང་གཅགས་པ་ཅིག་ལ་དམིགས་ནས། འདི་ལ་ཟག་མེད་ཀྱི་བདེ་བ་ག་ལ་ཡོད། ཟག་བཅས་ཀྱི་བདེ་བ་ཙམ་ཡང་མི་འདུག །ད་ལྟ་བདེ་བར་རློམས་པ་འདི་དག་སྡུག་བསྔལ་དུ་འགྱུར་ནས་འགྲོ། བདེ་བ་ཞིག་འདོད་ན་འབད་འབད་དུང་དུང་བྱས་ཀྱང་ཕྱི་མར་ངན་སོང་གི་སྡུག་བསྔལ་གྱི་རྒྱུ་བྱེད། ཚེ་འདིར་ཡང་ངལ་ཞིང་དུབ་པས་སྡུག་བསྔལ་བར་བྱེད་པ་མ་གཏོགས། ཡང་དག་པའི་བདེ་བ་ཞིག་གཏན་ནས་མི་འདུག །དེས་ན་འདི་ཉིད་བདེ་བ་དང་བདེ་བའི་རྒྱུ་ཐམས་ཅད་དང་ལྡན་ན་ཅི་མ་རུང༌། བདེ་བ་དང་བདེ་བའི་རྒྱུ་དང་ལྡན་པར་གྱུར་ཅིག །བདེ་བ་དང་བདེ་བའི་རྒྱུ་དང་ལྡན་པར་བྱའོ། །དེ་ལྟར་བྱེད་ནུས་པར་བླ་མ་ལྷས་བྱིན་གྱིས་བརླབ་ཏུ་གསོལ། ཞེས་སོགས་དང༌། དེ་ལ་མྱོང་བ་ཐོན་པ་ན་ཕ་ལ་སོགས་པའི་གཉེན་གཞན་རྣམས་དང༌། བར་མའི་སེམས་ཅན་རྣམས་དང༌། དགྲ་རྣམས་དང༌། མཐར་སེམས་ཅན་ཐམས་ཅད་ལ་དམིགས་ནས་སྔར་བཞིན་བསྒོམ།
དེ་ནས་སྙིང་རྗེ་སྒོམ་ཚུལ་ནི། སྤྱི་བོར་བླ་མ་ལྷ་བསྒོམ་བཞིན་པའི་ངང་ནས། ཐོག་མར་བཤན་པས་གསོད་བཞིན་པའི་ལུག་ལྟ་བུའི་སྡུག་བསྔལ་གྱིས་ཉམ་ཐག་པའི་འགྲོ་བ་རྣམས་ལ་བསྒོམ། དེའི་ཚུལ་ནི་མདུན་དུ་དེའི་རྣམ་པ་གསལ་བར་དམིགས་ནས། ཡན་ལག་རྣམས་ནི་བཅིངས། བྲང་གི་པགས་པ་ནི་བཤགས། བཤན་པའི་ལག་པ་ཁོང་བར་བཅུག་པས་སྲོག་ལ་འབབས་པ་ནི་མངོན་སུམ་དུ་ཤེས། མིག་བཤན་པའི་གདོང་ལ་རིག་རིག་ཏུ་བལྟ་ཞིང༌། སྡུག་བསྔལ་གྱིས་ཉམ་ཐག་པའི་ཚུལ་བསམས་ནས། དེས་ན་འདི་ཉིད་སྡུག་བསྔལ་དང་སྡུག་བསྔལ་གྱི་རྒྱུ་ཐམས་ཅད་དང་བྲལ་ན་ཅི་མ་རུང༌། སྡུག་བསྔལ་དང་སྡུག་བསྔལ་གྱི་རྒྱུ་ཐམས་ཅད་དང་བྲལ་བར་གྱུར་ཅིག །སྡུག་བསྔལ་དང་སྡུག་བསྔལ་གྱི་རྒྱུ་ཐམས་ཅད་དང་བྲལ་བར་བྱའོ། །དེ་ལྟར་བྱེད་ནུས་པར་བླ་མ་ལྷས་བྱིན་གྱིས་བརླབ་ཏུ་གསོལ། ཞེས་སོགས་དང༌། དེ་ལ་མྱོང་བ་ཐོན་པ་ན་དགེ་འདུན་གྱི་དཀོར་ལ་བག་མེད་དུ་སྤྱོད་པ་དང༌། ཚུལ་འཆལ་དང༌། ཆོས་སྤོང་མཁན་དང༌། ལོག་ལྟ་ཅན་དང་སེམས་ཅན་ལ་འཚེ་ཞིང་སྡིག་པ་མི་དགེ་བ་སྣ་ཚོགས་བྱེད་པ་ལ་སྐྱེན་སྐྱེན་པོར་བྱེད་པའི་འགྲོ་བ་རྣམས་ལ་དམིགས་ནས་བསྒོམ། དེའི་ཚུལ་ནི་དེ་དག་གི་རྣམ་པ་མདུན་དུ་གསལ་བར་དམིགས་ནས། ད་ལྟ་འདི་དག་གི་བྱེད་སྤྱོད་འདི་འདྲ་ན། ཚེ་འདིར་ཡང་བདེ་བ་ནི་མི་འདུག །ཤི་མ་ཐག་ཏུ་ནི་ངན་སོང་དུ་སྐྱེ་བ་ལ་ཐེ་ཚོམ་མེད། དེར་སྐྱེས་ན་ཡུན་རིང་ལ་ཤུགས་དྲག་པའི་སྡུག་བསྔལ་སྣ་ཚོགས་པ་ཞིག་མྱོང་དགོས་པ་འདུག །དེས་ན་འདི་དག་སྡུག་བསྔལ་དང་སྡུག་བསྔལ་གྱི་རྒྱུ་ཐམས་ཅད་དང་བྲལ་ན་ཅི་མ་རུང༌། སྡུག་བསྔལ་དང་སྡུག་བསྔལ་གྱི་རྒྱུ་ཐམས་ཅད་དང་བྲལ་བར་གྱུར་ཅིག །སྡུག་བསྔལ་དང་སྡུག་བསྔལ་གྱི་རྒྱུ་ཐམས་ཅད་དང་བྲལ་བར་བྱའོ། །དེ་ལྟར་བྱེད་ནུས་པར་བླ་མ་ལྷས་བྱིན་
གྱིས་བརླབ་ཏུ་གསོལ། ཞེས་སོགས་དང༌། དེ་ལ་མྱོང་བ་ཐོན་པ་ནམ་ལ་སོགས་པའི་གཉེན་རྣམས་མདུན་དུ་གསལ་བར་དམིགས་ནས། འདི་ཉིད་ཚེ་འདིའི་འབད་འབད་དུང་དུང་གིས་དགྲ་གཉེན་གྱི་གསོ་ཚིས་བྱེད་བྱེད་ནས་སྡུག་བསྔལ་གྱི་སྡུག་བསྔལ་དང༌། འགྱུར་བའི་སྡུག་བསྔལ་གཉིས་ཀྱིས་གདུང་ནས་བདེ་བའི་སྐབས་ཅུང་ཟད་ཀྱང་མི་འདུག །ཚེ་འདིར་ཡང་བྱ་བ་ངན་པས་བྲེལ་ནས་དགེ་བའི་བློ་མ་སྐྱེས་པས། ཤི་མ་ཐག་ཏུ་ངན་སོང་དུ་སྐྱེས་ནས་ཡུན་རིང་ལ་ཤུགས་དྲག་པའི་སྡུག་བསྔལ་སྣ་ཚོགས་པ་ཞིག་མྱོང་དགོས་པ་འདུག །དེས་ན་འདི་དག་སྡུག་བསྔལ་དང་སྡུག་བསྔལ་གྱི་རྒྱུ་ཐམས་ཅད་དང་བྲལ་ན་ཅི་མ་རུང༌། སྡུག་བསྔལ་དང་སྡུག་བསྔལ་གྱི་རྒྱུ་ཐམས་ཅད་དང་བྲལ་བར་གྱུར་ཅིག །སྡུག་བསྔལ་དང་སྡུག་བསྔལ་གྱི་རྒྱུ་ཐམས་ཅད་དང་བྲལ་བར་བྱའོ། །དེ་ལྟར་བྱེད་ནུས་པར་བླ་མ་ལྷས་བྱིན་གྱིས་བརླབ་ཏུ་གསོལ། ཞེས་སོགས་དང༌། དེ་ལ་མྱོང་བ་ཐོན་པ་ན་བར་མའི་སེམས་ཅན་དང༌། དགྲ་དང༌། མཐར་སེམས་ཅན་ཐམས་ཅད་ཀྱི་བར་སྔར་བཞིན་སྒོམ་མོ། །དེ་ལྟར་བྱམས་པ་དང་སྙིང་རྗེ་ལ་ཡིད་འགྱུར་བའི་མྱོང་བ་ཐོན་པ་ན་ལྷག་བསམ་སྒོམ་ཚུལ་ནི་སྤྱི་བོར་བླ་མ་ལྷ་བསྒོམ་བཞིན་པའི་ངང་ནས་འདི་ལྟར་བསམ་སྟེ། སྡུག་བསྔལ་གྱིས་མནར་ཞིང་བདེ་བས་ཕོངས་པའི་སེམས་ཅན་ཐམས་ཅད་སྡུག་བསྔལ་དང་སྡུག་བསྔལ་གྱི་རྒྱུ་དང་བྲལ་བ་ཞིག་བདག་གིས་བྱའོ། །བདེ་བ་དང་བདེ་བའི་རྒྱུ་དང་ཕྲད་པ་ཞིག་བདག་གིས་བྱའོ། །ཁྱད་པར་མ་སེམས་ཅན་ཐམས་ཅད་ཀྱིས་སྒྲིབ་གཉིས་བག་ཆགས་དང་བཅས་པ་སྤངས་པའི་ཡང་དག་པར་རྫོགས་པའི་སངས་རྒྱས་ཀྱི་གོ་འཕང་ཐོབ་པ་ཞིག་བདག་གིས་བྱའོ། །དེ་ལྟར་བྱེད་ནུས་པ་བླ་མ་ལྷས་བྱིན་གྱིས་བརླབ་ཏུ་གསོལ། ཞེས་སོགས་དང༌། དེ་ནས་བྱང་ཆུབ་ཀྱི་སེམས་སྒོམ་ཚུལ་ནི། སྤྱི་བོར་བླ་མ་ལྷ་བསྒོམ་བཞིན་པའི་ངང་ནས་འདི་ལྟར་བསམ་སྟེ། འོ་ན་ཁྱོད་ལ་སེམས་ཅན་
ཐམས་ཅད་རྫོགས་པའི་སངས་རྒྱས་ཀྱི་གོ་འཕང་ལ་འགོད་པའི་ནུས་པ་ཡོད་དམ་ཞེ་ན། ད་ལྟ་ནི་སེམས་ཅན་གཅིག་ཀྱང་རྫོགས་པའི་སངས་རྒྱས་ཀྱི་ས་ལ་འགོད་པའི་ནུས་པ་མི་འདུག །དེར་མ་ཟད་དགྲ་བཅོམ་པ་གཉིས་ཀྱི་གོ་འཕང་ཐོབ་ཀྱང་སེམས་ཅན་གྱི་དོན་ཉི་ཚེ་བ་མ་གཏོགས། སེམས་ཅན་ཐམས་ཅད་རྫོགས་པའི་སངས་རྒྱས་ཀྱི་གོ་འཕང་ལ་འགོད་པའི་ནུས་པ་མེད། དེ་ལྟ་བུའི་ནུས་པ་སུ་ལ་ཡོད་ན། ཡང་དག་པར་རྫོགས་པའི་སངས་རྒྱས་ལ་ཡོད་དེ། ཁོང་གི་སྐུའི་ཡོན་ཏན་མཚན་དཔེ་གསལ་རྫོགས་ཀྱིས་སྤྲས་པ། གསུང་གི་ཡོན་ཏན་འབད་རྩོལ་མེད་པར་ཡན་ལག་དྲུག་ཅུ་དང་ལྡན་པའི་གསུང་དབྱངས་སྐད་ཅིག་རེ་རེས་ཀྱང་སེམས་ཅན་ཐམས་ཅད་ཀྱི་རང་རང་གི་སྐད་དུ་ཆོས་སྟོན་པར་ནུས་པ། །ཐུགས་ཀྱི་ཡོན་ཏན་ཤེས་བྱ་ཇི་ལྟ་བ་དང་ཇི་སྙེད་པ་ཐམས་ཅད་མངོན་སུམ་དུ་གཟིགས་ཤིང༌། །སེམས་ཅན་ཐམས་ཅད་ལམ་བུ་གཅིག་པ་ལ་བརྩེ་བ་ལྟར་ཐུགས་རྗེ་ཆེན་པོ་ཉེ་རིང་མེད་པར་འཇུག་པས་གདུལ་བའི་དུས་ལས་སྐད་ཅིག་ཀྱང་མི་འདའ་བ། ཕྲིན་ལས་འབད་མེད་ལྷུན་གྱིས་གྲུབ་ཅིང༌། སྐུ་གསུང་ཐུགས་ཀྱི་འོད་ཟེར་རེ་རེ་ཙམ་སྤྲོས་པས་ཀྱང་སེམས་ཅན་དཔག་ཏུ་མེད་པ་ཐམས་ཅད་མཁྱེན་པའི་གོ་འཕང་ལ་འགོད་ནུས་པ་ལ་སོགས་པ། མདོར་ན་ཡོན་ཏན་གྱི་རིགས་ཐམས་ཅད་དང་ལྡན་ཞིང༌། སྐྱོན་གྱི་རིགས་ཐམས་ཅད་དང་བྲལ་བ་ནི་ཡང་དག་པར་རྫོགས་པའི་སངས་རྒྱས་ཁོ་ན་ཡིན། དེས་ན་རང་གཞན་གཉིས་ཀའི་དོན་མཐར་ཕྱིན་པ་ཞིག་བྱེད་ན་དེ་ལྟ་བུའི་སངས་རྒྱས་ཀྱི་གོ་འཕང་ཞིག་ཐོབ་དགོས་པ་འདུག་པས། བདག་གིས་མ་སེམས་ཅན་ཐམས་ཅད་ཀྱི་དོན་དུ་མྱུར་པ་མྱུར་བར་ཡང་དག་པར་རྫོགས་པའི་སངས་རྒྱས་ཀྱི་གོ་འཕང་རིན་པོ་ཆེ་ཅི་ནས་ཀྱང་ཐོབ་པར་བྱའོ། །དེ་ལྟར་བྱེད་ནུས་པར་བླ་མ་ལྷས་བྱིན་གྱིས་བརླབ་ཏུ་གསོལ། ཞེས་གསོལ་བ་བཏབ་པས། སྤྱི་བོའི་བླ་མ་ལྷའི་སྐུ་ལས་སྐུ་གཉིས་
པ་ཞིག་མར་མེ་གཅིག་ལས་གཉིས་ཆད་གྱི་ཚུལ་དུ་བྱུང་ནས་རང་ལ་ཐིམ་པས། སེང་གེ་ཆེན་པོ་བརྒྱད་ཀྱིས་གཏེགས་པའི་རིན་པོ་ཆེའི་ཁྲི་མཐོ་ཞིང་ཡངས་པའི་སྟེང་ཁར་སྣ་ཚོགས་པད་ཟླ་ཉི་མའི་དཀྱིལ་འཁོར་གྱི་གདན་ལ་རང་ཉིད་རྒྱལ་བ་ཤཱཀྱ་ཐུབ་པ། ཞེས་པ་ནས། རྡོ་རྗེ་སྐྱིལ་ཀྲུང་གིས་བཞུགས་པར་གྱུར་བའི་མོས་པ་བྱེད། རང་ཐུབ་པའི་དབང་བོར་གསལ་བའི་ངང་ནས་ལུས་ལོངས་སྤྱོད་དགེ་རྩ་དང་བཅས་པ་བདུད་རྩི་སྣ་ལྔ་འོད་ཟེར་དང་བཅས་པའི་རྣམ་པར་སྤྲོས་ནས་སེམས་ཅན་ཐམས་ཅད་ལ་བཏང་བས། སེམས་ཅན་ཐམས་ཅད་ཀྱིས་མངོན་མཐོ་ངེས་ལེགས་ཀྱི་བདེ་བ་ཕུན་སུམ་ཚོགས་པ་ཐོབ་པའི་མོས་པ་བྱེད་དོ། །གསུམ་པ་མཇུག་ཏུ་ཇི་ལྟར་བྱ་བ་ནི་སྔར་བཞིན་ཡིན་ལ། གཉིས་པ་ཐུན་མཚམས་སུ་ཡང་བྱམས་སྙིང་རྗེ་བྱང་ཆུབ་ཀྱི་སེམས་ཀྱི་རྣམ་བཞག་སྟོན་པའི་གསུང་རབ་དགོངས་འགྲེལ་ངང་བཅས་པ་བལྟ་བ་སོགས་སྔར་བཞིན་ནོ། །གཉིས་པ་ནི། སྔོན་དུ་སེམས་ཅན་ཐམས་ཅད་ལ་སེམས་སྙོམས་པའི་བཏང་སྙོམས་དང་མར་ཤེས་དྲིན་དྲན་གསུམ་སྒོམ་པ་སྔོན་དུ་བཏང་སྟེ། རང་གི་མཐའ་བསྐོར་དུ་སེམས་ཅན་ཐམས་ཅད་གསལ་བར་དམིགས་ནས། རང་གི་བློ་ཡུལ་དུ་རང་གཞན་གཉིས་གང་གཅེས་པར་འཛིན། གང་ཡལ་བར་འདོར་སྙམ་དུ་བརྟགས་པ་ན། རང་གཅེས་པར་འཛིན་ཅིང་གཞན་ཡལ་བ་འདོར་བའི་བློ་དང་ངམ་ཤུགས་ཀྱིས་སྐྱེལ། དེའི་ཚེ་འདི་ལྟར་བསམ་སྟེ་རང་གཅེས་པར་བཟུང་ནས་གཞན་ཡལ་བར་འདོར་མི་རིགས་ཏེ། རང་གཞན་གཉིས་ཀ་བདེ་བ་འདོད་ཅིང་སྡུག་བསྔལ་མི་འདོད་པར་མཚུངས་པའི་ཕྱིར། དེས་ན་རང་གཅེས་པར་འཛིན་པ་བཞིན་དུ་གཞན་གཅེས་པར་འཛིན་དགོས་ཏེ། གཞན་གྱིས་རང་གཅེས་པར་བཟུང་ན་རང་དགའ་བ་བཞིན་དུ། རང་གིས་ཀྱང་གཞན་གཅེས་པར་བཟུང་ན་གཞན་དགའ་བར་འགྱུར་བས་སོ། །གཞན་ཡང་རང་
ཉིད་ཕུན་སུམ་ཚོགས་པ་གཅིག་བྱེད་པར་འདོད་ནས་འཁོར་བ་ཐོག་མ་མེད་པ་ནས། རང་གཅེས་པར་བཟུང་བས་རང་གཞན་གྱི་དོན་གང་ཡང་མ་གྲུབ་པར་མ་ཟད། སྡུག་བསྔལ་སྣ་ཚོགས་ཞིག་མྱོང་བར་འདུག་དེས་ན་རང་གཅེས་པར་འཛིན་པ་ནི་འཁོར་བ་དང་ངན་སོང་གི་སྡུག་བསྔལ་ལ་སོགས་པའི་རྒུད་པ་ཀུན་གྱི་གནས་སུ་འདུག་པས། རང་གཅེས་འཛིན་མ་སྐྱེས་པ་མི་བསྐྱེད་པ་དང༌། སྐྱེས་པ་རྣམས་སྤོང་བར་བྱེད། གཞན་གཅེས་པར་འཛིན་པ་ནི་ཡོན་ཏན་ཐམས་ཅད་ཀྱི་འབྱུང་གནས་སུ་འདུག་པས་གཞན་གཅེས་འཛིན་ནམ་སྐྱེས་པ་གསར་དུ་བསྐྱེད་པ་དང༌། སྐྱེས་ཟིན་རྣམས་གོང་འཕེལ་དུ་བྱའོ། །དེ་ལྟར་བྱེད་ནུས་པར་བླ་མ་ལྷས་བྱིན་གྱིས་བརླབ་ཏུ་གསོལ། ཞེས་སོགས་དང༌། །མདོར་ན་ཐུབ་པའི་དབང་པོས་རང་ཡལ་བར་དོར་ནས་གཞན་གཅེས་པར་བཟུང་སྟེ། གཞན་གྱི་དོན་འབའ་ཞིག་མཛད་པས་མངོན་པར་རྫོགས་པར་སངས་རྒྱས་པ་ཡིན། བདག་གིས་ཀྱང་དེ་ལྟར་བྱས་ནས་ཆེས་སྔ་བར་འཚང་རྒྱ་བ་ལ། དེ་ལྟར་མ་བྱས་པས་ད་ལྟའི་བར་དུ་འཁོར་བར་འཁྱམས། ད་ཡང་རང་གཅེས་འཛིན་ཁོང་ན་གནས་ཕྱིན་ཆད་གཞན་གཅེས་འཛིན་གསར་དུ་མི་སྐྱེ་ཞིང༌། སྐྱེས་ཀྱང་རྒྱུན་མཐུད་མི་ཐུབ་པར་འདུག་པས། རང་གཅེས་པར་བཟུང་ནས་གཞན་ཡལ་བར་འདོར་བའི་བློ་སྐད་ཅིག་ཀྱང་མི་སྐྱེ་ཅིང༌། རང་ཡལ་བདོར་ནས་གཞན་གཅེས་པར་བཟུང་སྟེ། གཞན་གྱི་སྡུག་བསྔལ་དང་སྡིག་པ་ཐམས་ཅད་བདག་གི་རྒྱུད་སྟེང་དུ་བླངས། བདག་གི་བདེ་དགེ་ཐམས་ཅད་གཞན་ལ་བཏང་བས། གཞན་སེམས་ཅན་ཐམས་ཅད་སྡུག་བསྔལ་དང་བྲལ་ཞིང༌། བདེ་བ་ཕུན་སུམ་ཚོགས་པ་དང་ལྡན་པ་ཅིག་བདག་གིས་བྱའོ། །དེ་ཡང་ད་ལྟ་ནི་བདག་ལ་དེ་ལྟ་བུའི་ནུས་པ་མི་འདུག །ནུས་པ་སུ་ལ་ཡོད་ན་ཡང་དག་པར་རྫོགས་པའི་སངས་རྒྱས་ལ་ཡོད་པས། བདག་གིས་
སེམས་ཅན་ཐམས་ཅད་ཀྱི་དོན་དུ་ཡང་དག་པར་རྫོགས་པའི་སངས་རྒྱས་ཀྱི་གོ་འཕང་ཐོབ་པར་བྱའོ། །དེ་ལྟར་བྱེད་ནུས་པར་བླ་མ་ལྷས་བྱིན་གྱིས་བརླབ་ཏུ་གསོལ། ཞེས་སོགས་དང༌། གཉིས་པ་སེམས་བསྐྱེད་ཆོ་གས་བཟུང་ཚུལ་ལ་གཉིས། །སྡོམ་པ་མ་ཐོབ་པ་ཐོབ་པར་བྱ་བ་དང༌། ཐོབ་པ་མི་ཉམས་པར་བསྲུང་ཚུལ་ལོ། །དང་པོ་ནི། ལམ་རིམ་དུ་སྨོན་འཇུག་རིམ་ཅན་དུ་ལེན་པའི་དབང་དུ་མཛད་ཀྱང༌། ཞི་བ་ལྷའི་ལུགས་ལྟར་ཅིག་ཅར་དུ་བྱས་ན་འཇུག་པ་བདེ་བས་དེའི་ཚུལ་ནི། སྔོན་འགྲོའི་རིམ་པ་སྤྱི་དང་ཁྱད་པར་བཤེས་གཉེན་བསྟེན་ཚུལ་ནས་བྱང་ཆུབ་ཀྱི་སེམས་ཀྱི་བར་གྱི་དངོས་གཞིའི་དམིགས་པ་རྒྱུད་དང་འདྲེས་པར་སྐྱོངས་པའི་འོག་ཏུ། སྤྱི་བོར་བླ་མ་ལྷ་བསྒོམ་བཞིན་པའི་ངང་ནས་མ་སེམས་ཅན་ཐམས་ཅད་ཀྱི་དོན་དུ་མྱུར་དུ་ཡང་དག་པར་རྫོགས་པའི་སངས་རྒྱས་ཀྱི་གོ་འཕང་ཐོབ་པར་བྱ། དེའི་ཕྱིར་དུ་དུས་འདི་ནས་བཟུང་སྟེ་ཇི་སྲིད་བྱང་ཆུབ་སྙིང་པོ་ལ་མཆིས་ཀྱི་བར་དུ་རྒྱལ་བའི་སྲས་ཀྱི་སྡོམ་པ་བཟུང་ནས་སྤྱོད་པ་རླབས་པོ་ཆེ་རྣམས་ལ་སློབ་ཅིང༌། སེམས་ཅན་ཐམས་ཅད་ཀྱི་དོན་དུ་སངས་རྒྱས་ཐོབ་པར་བྱའོ་སྙམ་པའི་སེམས་འདི་ཡང་སངས་རྒྱས་མ་ཐོབ་ཀྱི་བར་དུ་བཟུང་བར་བྱའོ་སྙམ་དུ་བསམས་ལ། བླ་མ་ཐུབ་བའི་དབང་པོའི་རྗེས་སུ་ཟློས་པར་མོས་ནས། །སངས་རྒྱས་བྱང་ཆུབ་སེམས་དཔའ་ཀུན། །བདག་ལ་དགོངས་པར་མཛད་དུ་གསོལ། ཇི་ལྟར་སྔོན་གྱི་བདེ་གཤེགས་ཀྱིས། །བྱང་ཆུབ་ཐུགས་ནི་བསྐྱེད་པ་དང༌། །བྱང་ཆུབ་སེམས་དཔའི་བསླབ་པ་ལ། །རིམ་པ་བཞིན་དུ་གནས་པ་ལྟར། །བདག་ཀྱང་འགྲོ་ལ་ཕན་དོན་དུ། །བྱང་ཆུབ་སེམས་ནི་བསྐྱེད་བགྱི་ཞིང༌། །བྱང་ཆུབ་སེམས་དཔའི་བསླབ་པ་ལ། །རིམ་པ་བཞིན་ཏུ་བསླབ་པར་བགྱི། ཞེས་ལན་གསུམ་བརྗོད་པས་བྱང་ཆུབ་སེམས་དཔའི་སྡོམ་པ་ཐོབ་པའི་མོས་པ་བྱེད་དོ། །དེ་ནས། དེང་དུས་བདག་ཚེ་འབྲས་བུ་ཡོད། །མི་ཡི་
སྲིད་པ་ལེགས་པར་ཐོབ། །དེ་རིང་སངས་རྒྱས་རིགས་སུ་སྐྱེས། །སངས་རྒྱས་སྲས་སུ་ད་གྱུར་ཏོ། །ད་ནི་བདག་གིས་ཅི་ནས་ཀྱང༌། །རིགས་དང་མཐུན་པའི་ལས་བརྩམས་ཏེ། །སྐྱོན་མེད་བཙུན་པའི་རིགས་འདི་ལ། །རྙོག་པར་མི་འགྱུར་དེ་ལྟར་བྱ། ཞེས་སྤྲོ་བ་བསྐྱེད་དོ། །གཉིས་པ་ཐོབ་པ་མི་ཉམས་པར་བསྲུང་ཚུལ་ནི། སྤྱི་བོར་བླ་མ་ལྷ་བསྒོམ་བཞིན་པའི་ངང་ནས། མ་སེམས་ཅན་ཐམས་ཅད་ཀྱི་དོན་དུ་མྱུར་དུ་ཡང་དག་པར་རྫོགས་པའི་སངས་རྒྱས་ཀྱི་གོ་འཕང་ཐོབ་པར་བྱ། དེའི་ཕྱིར་དུ་བྱང་ཆུབ་སེམས་ཀྱི་ཕན་ཡོན་བསམས་ནས། ཉིན་ལན་གསུམ་མཚན་ལན་གསུམ་དུ་བྱང་ཆུབ་ཀྱི་སེམས་བཟུང་ཞིང༌། སེམས་ཅན་གྱི་ངོས་ནས་བྱེད་སྤྱོད་ཅི་འདྲ་ནའང་བདག་གི་ངོས་ནས་སེམས་ཅན་གཅིག་ཀྱང་བློས་མི་སྤོང༌། སེམས་བསྐྱེད་འཕེལ་བའི་ཕྱིར་དུ་དཀོན་མཆོག་མཆོད་པ་ལ་སོགས་པའི་ཚོགས་གཉིས་གསོག་པ་ལ་བརྩོན་པར་བྱའོ། །གཞན་ཡང་བླ་མ་སོགས་ལ་ཀུ་རེ་དང་བཞད་གད་ཀྱི་ཕྱིར་དུ་ཡང་བརྫུན་གྱིས་དབུ་བསྐོར་བ་དང༌། གཞན་དགེ་བ་བྱེད་པ་ལ་འགྱོད་པ་བསྐྱེད་པ་དང༌། ཐེག་ཆེན་ལ་ཞུགས་པའི་བྱང་སེམས་ལ་ཞེ་སྡང་གིས་མི་སྙན་པར་སྨྲ་བ་དང༌། ལྷག་བསམ་མ་ཡིན་པས་གཡོ་སྒྱུ་བྱེད་པ་སྟེ། ནག་པོའི་ཆོས་བཞི་ལ་སོགས་པ་སེམས་བསྐྱེད་ཉམས་པའི་རྒྱུ་རྣམས་སྤོང་བ་དང༌། དཀར་བོའི་ཆོས་བཞི་བསྟེན་པ་ལ་སོགས་པའི་སེམས་བསྐྱེད་འཕེལ་བའི་རྒྱུ་རྣམས་ལ་ཚུལ་བཞིན་དུ་བསླབ་པར་བྱའོ། །མདོར་ན་རྩ་ལྟུང་བཅོ་བརྒྱད་དང་ཉེས་བྱས་བཞི་བཅུ་ཞེ་དྲུག་གི་ཉེས་པས་ནམ་ཡང་མགོས་པའི་བྱང་ཆུབ་སེམས་དཔའི་སྡོམ་པ་རྣམ་པར་དག་པ་སྲོག་དང་བསྡོས་ཏེ་ཇི་སྲིད་བྱང་ཆུབ་སྙིང་པོ་ལ་མཆིས་ཀྱི་བར་དུ་བསྲུང་བར་བྱའོ། །དེ་ལྟར་བསྲུང་ནུས་པར་བླ་མ་ལྷས་བྱིན་གྱིས་བརླབ་ཏུ་གསོལ། གཉིས་པ་སེམས་བསྐྱེད་
ནས་སྤྱོད་པ་ལ་བསླབ་ཚུལ་ལ་གཉིས། རྒྱལ་བའི་སྲས་ཀྱི་སྤྱོད་པ་སྤྱི་ལ་བསླབ་ཚུལ་དང༌། ཁྱད་པར་ཕར་ཕྱིན་ཐ་མ་གཉིས་ལ་སློབ་ཚུལ་ལོ། །དང་པོ་ལ་གཉིས། ཐུན་གྱི་ངོ་བོ་ལ་ཇི་ལྟར་བྱ་བ་དང༌། ཐུན་མཚམས་སུ་ཇི་ལྟར་བྱ་བའི་ཚུལ་ལོ། །དང་པོ་ལ་སྦྱོར་དངོས་མཇུག་གསུམ་ལས། སྐྱབས་གནས་ཀུན་འདུས་བླ་མ་ལྷག་པའི་ལྷ། །ཐུབ་དབང་རྡོ་རྗེ་འཆང་ལ་གསོལ་བ་འདེབས། ཞེས་པ་ཡན་ཆད་སྔར་བཞིན་ཡིན་ལ། དེ་ནས་བདག་དང་མ་སེམས་ཅན་ཐམས་ཅད་ཀྱིས་ཟབ་པ་དང་རྒྱ་ཆེ་བའི་རྒྱལ་བའི་སྲས་ཀྱི་སྤྱོད་པ་བརླབས་པོ་ཆེ་རྣམས་ལ་ཚུལ་བཞིན་དུ་བསླབ་ནུས་པའི་བླ་མ་ལྷས་བྱིན་གྱིས་བརླབ་ཏུ་གསོལ། ཞེས་སོགས་དང༌། གཉིས་པ་དངོས་གཞི་ལ་རང་རྒྱུད་སྨིན་བྱེད་ཕར་ཕྱིན་དྲུག་དང༌། གཞན་རྒྱུད་སྨིན་བྱེད་བསྡུ་བཞིའི་ཉམས་ལེན་གཉིས་ལས། །དང་བོ་ནི། སྤྱི་བོར་བླ་མ་ལྷ་བསྒོམ་བཞིན་པའི་ངང༌། མ་སེམས་ཅན་ཐམས་ཅད་ཀྱི་དོན་དུ་མྱུར་དུ་ཡང་དག་པར་རྫོགས་པའི་སངས་རྒྱས་ཀྱི་གོ་འཕང་ཐོབ་པར་བྱ། དེའི་ཕྱིར་དུ་རྙེད་བསྐུར་དང་གྲགས་པ་སོགས་ལ་མི་ལྟ་བར་ཆོས་ཀྱིས་ཕོངས་པའི་སེམས་ཅན་རྣམས་ལ་དམ་པའི་ཆོས་ཅི་ནུས་སུ་སྟོན་པར་བྱེད་པ་ཆོས་ཀྱི་སྦྱིན་པ་དང༌། མི་དང་མི་མ་ཡིན་དང་འབྱུང་བས་གནོད་པའི་སེམས་ཅན་རྣམས་འཇིགས་པ་དེ་དག་ལས་སྐྱོབ་པར་བྱེད་པ་མི་འཇིགས་པའི་སྦྱིན་པ་དང༌། དབུལ་ཞིང་ཕོངས་པའི་སེམས་ཅན་རྣམས་ལ་ལན་དང་རྣམ་པར་སྨིན་པ་ལ་རེ་བ་མེད་པར་སེར་སྣ་སྤངས་ཏེ། ཇི་ལྟར་འོས་པའི་ཡོ་བྱད་གཏོང་བར་བྱེད་ཟང་ཟིང་གི་སྦྱིན་པ་སྟེ། སྦྱིན་པ་རྣམ་པ་གསུམ་གྱི་ཉམས་ལེན་ལ་ཚུལ་བཞིན་དུ་བསླབ་པར་བྱའོ། །མདོར་ན་མ་སེམས་ཅན་ཐམས་ཅད་ཀྱི་དོན་དུ་མྱུར་དུ་ཡང་དག་པར་རྫོགས་པའི་སངས་རྒྱས་ཀྱི་གོ་འཕང་ཐོབ་པར་བྱ། དེའི་ཕྱིར་དུ་བདག་གི་ལུས་ལོངས་སྤྱོད་དགེ་རྩ་དང་བཅས་པ་སེམས་ཅན་ཐམས་ཅད་ལ་ཕོངས་པ་མེད་པར་བཏང་བར་བྱའོ། །དེ་ལྟར་བྱེད་ནུས་པར་བླ་མ་ལྷས་བྱིན་གྱིས་བརླབ་ཏུ་
གསོལ། ཞེས་གཏོང་སེམས་སྤེལ་བའི་སྦྱིན་པ་ནི་སྦྱིན་པའི་ཉམས་ལེན་ཡིན་ནོ། །དེ་ནས་ཚུལ་ཁྲིམས་ཀྱི་ཉམས་ལེན་ནི། སྤྱི་བོར་བླ་མ་ལྷ་བསྒོམ་བཞིན་པའི་ངང་ནས། མ་སེམས་ཅན་ཐམས་ཅད་ཀྱི་དོན་དུ་མྱུར་དུ་ཡང་དག་པར་རྫོགས་པའི་སངས་རྒྱས་ཀྱི་གོ་འཕང་ཐོབ་པར་བྱ། དེའི་ཕྱིར་དུ་མི་དགེ་བ་བཅུ་སྤོང་བ་ལ་སོགས་པ་ཇི་ལྟར་ཁས་བླངས་པའི་སྡོམ་པ་དང་འགལ་བའི་ཉེས་སྤྱོད་རྣམས་སྤངས་ནས། སྦྱིན་སོགས་ཕར་ཕྱིན་དྲུག་དང༌། ཚུལ་ཁྲིམས་ལ་སོགས་པའི་དགེ་བ་རྣམ་པར་དག་པ་རང་རྒྱུད་ལ་མ་སྐྱེས་པ་བསྐྱེད། སྐྱེས་པ་རྣམས་གོང་འཕེལ་དུ་བྱས་ཏེ། སེམས་ཅན་ཐམས་ཅད་ཀྱང་ཚུལ་ཁྲིམས་ལ་སོགས་པའི་དགེ་བ་རྣམ་པར་དག་པ་ལ་སྦྱར་ནས་སྨིན་གྲོལ་གྱི་ལམ་ལ་དགོད་པར་བྱའོ། །དེ་ལྟར་བྱེད་ནུས་པར་བླ་མ་ལྷས་བྱིན་གྱིས། ཞེས་སོགས་དང༌། དེ་ནས་བཟོད་པའི་ཉམས་ལེན་ནི། སྤྱི་བོར་བླ་མ་ལྷ་བསྒོམ་བཞིན་པའི་ངང་ནས། མ་སེམས་ཅན་ཐམས་ཅད་ཀྱི་དོན་དུ་མྱུར་དུ་ཡང་དག་པར་རྫོགས་པའི་སངས་རྒྱས་ཀྱི་གོ་འཕང་ཐོབ་པར་བྱ། དེའི་ཕྱིར་དུ་སེམས་ཅན་ཐམས་ཅད་དགྲར་ལངས་ཀྱང་ཁྲོ་བའི་སེམས་སྐད་ཅིག་ཀྱང་མི་བསྐྱེད་པར་གནོད་ལན་དུ་ཕན་པ་བསྒྲུབས་ཏེ། རང་གཞན་གྱི་རྒྱུད་ལ་བཟོད་པའི་ཕར་ཕྱིན་ལ་སོགས་པའི་སངས་རྒྱས་ཀྱི་ཆོས་རྣམས་ཡོངས་སུ་རྫོགས་པར་བྱའོ། །གཞན་ཡང་ཟས་ནོར་དང་གནས་མལ་སོགས་ཀྱིས་ཕོངས་པ་དང༌། ན་ཚ་སོགས་མི་འདོད་པའི་སྡུག་བསྔལ་ཐོག་ཏུ་བབས་པའི་ཚེ་སྡུག་བསྔལ་འདི་ལྟར་མྱོང་བ་སྔར་ལས་ངན་བསགས་པའི་འབྲས་བུ་ཡིན། འདི་ལ་བརྟེན་ནས་ལས་ངན་མང་པོ་དག་འགྲོ་བས་མི་འདོད་རྒྱུ་མི་འདུག་ཅིང་ཁྱད་པར་ཆོས་ཕྱིར་སྡུག་བསྔལ་བྱུང་བ་ལ་བཟོད་བསྲན་སྐྱེད་པ་ལ་བརྟེན་ནས་ཐམས་ཅད་མཁྱེན་པའི་ལམ་ལ་ཉེ་བར་འགྱུར་བས་སྡུག་བསྔལ་འདི་དག་དང་དུ་བླངས་ཏེ། རང་གཞན་གྱི་འཁོར་བ་དང་ངན་སོང་གི་སྡུག་
བསྔལ་རྒྱུན་བཅད་པར་བྱའོ། །གཞན་ཡང་དཀར་ནག་གི་ལས་ཀྱི་རྣམ་པར་སྨིན་པ་དང༌། དཀོན་མཆོག་གསུམ་གྱི་བྱིན་རླབས་དང༌། སངས་རྒྱས་དང་བྱང་ཆུབ་སེམས་དཔའ་བདག་ཉིད་ཆེན་པོ་རྣམས་ཀྱི་མཐུ་བསམ་གྱིས་མི་ཁྱབ་པ་དང༌། བླ་ན་མེད་པའི་བྱང་ཆུབ་དང༌། གསུང་རབ་ཡན་ལག་བཅུ་གཉིས་དང་བྱང་ཆུབ་སེམས་དཔའི་བསླབ་པའི་གནས་རྣམས་ལ་མོས་པ་བསྐྱེད་ན་འབྲས་བུ་ཤིན་ཏུ་ཆེ་བས། དེ་ལ་མོས་པར་བྱས་ནས་བླ་ན་མེད་པའི་བྱང་ཆུབ་ཐོབ་པའི་ཕྱིར་དུ་གསུང་རབ་ཡན་ལག་བཅུ་གཉིས་ཀྱི་བརྗོད་བྱའི་དོན་བྱང་ཆུབ་སེམས་དཔའི་བསླབ་པའི་གནས་རྣམས་ལ་ཚུལ་བཞིན་ཏུ་བསླབ་པར་བྱའོ། །དེ་ལྟར་བྱེད་ནུས་པར་བླ་མ་ལྷས་བྱིན་གྱིས་བརླབ་ཏུ་གསོལ། ཞེས་སོགས་དང༌། དེ་ནས་བརྩོན་འགྲུས་ཀྱི་ཉམས་ལེན་ནི་སྤྱི་བོར་བླ་མ་ལྔ་བསྒོམ་པའི་ངང༌། མ་སེམས་ཅན་ཐམས་ཅད་ཀྱི་དོན་དུ་མྱུར་དུ་ཡང་དག་པར་རྫོགས་པའི་སངས་རྒྱས་ཀྱི་གོ་འཕང་ཐོབ་པར་བྱ། དེའི་ཕྱིར་དུ་མཚན་དཔེ་ལ་སོགས་པ་སངས་རྒྱས་ཀྱི་ཆོས་རེ་རེ་བསྒྲུབ་པ་དང༌། སྦྱིན་པ་ལ་སོགས་པ་བྱང་ཆུབ་སེམས་དཔའི་ཆོས་རེ་རེ་བསྒྲུབ་པའི་ཕྱིར་དུ་བསྐལ་བ་འབུམ་ཕྲག་རེ་རེ་མནར་མེད་དུ་གནས་ནས་སངས་རྒྱས་ཀྱི་གོ་འཕང་བསྒྲུབ་དགོས་ནའང་བརྩོན་པ་མི་འདོར་ཞིང་སྤྲོ་བ་བསྐྱེད་ནས། ཟབ་པ་དང་རྒྱ་ཆེ་བའི་ཆོས་རང་རྒྱུད་ལ་སྡུད་པ་བྱེད་ཅིང༌། གཞན་ཡང་དགེ་བའི་ལམ་ལ་བཀོད་ནས་བླ་ན་མེད་པའི་བྱང་ཆུབ་ཐོབ་པར་བྱའོ། །དེ་ལྟར་བྱེད་ནུས་པར་བླ་མ་ལྷས་བྱིན་གྱིས་བརླབ་ཏུ་གསོལ། ཞེས་སོགས་དང༌། དེ་ནས་བསམ་གཏན་གྱི་ཉམས་ལེན་ནི། སྤྱི་བོར་བླ་མ་ལྷ་བསྒོམ་བཞིན་པའི་ངང༌། མ་སེམས་ཅན་ཐམས་ཅད་ཀྱི་དོན་དུ་མྱུར་དུ་ཡང་དག་པར་རྫོགས་པའི་སངས་རྒྱས་ཀྱི་གོ་འཕང་ཐོབ་པར་བྱ། དེའི་ཕྱིར་དུ་ངོ་བོའི་སྒོ་ནས་འཇིག་རྟེན་དང༌། འཇིག་རྟེན་ལས་འདས་པའི་བསམ་གཏན། ཕྱོགས་ཀྱི་སྒོ་ནས་ཞི་གནས་དང༌། ལྷག་མཐོང་དང༌། དེ་གཉིས་ཟུང་དུ་འབྲེལ་
བའི་བསམ་གཏན། བྱེད་ལས་ཀྱི་སྒོ་ནས་ཚེ་འདིར་ལུས་སེམས་བདེ་བར་གནས་པའི་བསམ་གཏན། ཡོན་ཏན་གྱི་རྟེན་བྱེད་པའི་བསམ་གཏན། སེམས་ཅན་གྱི་དོན་བྱེད་པའི་བསམ་གཏན་ཏེ། རྒྱལ་བའི་སྲས་ཀྱི་བསམ་གཏན་རྣམ་པ་ཐམས་ཅད་པ་རྣམས་ལ་བསླབ་པར་བྱའོ། །དེ་ལྟར་བྱེད་ནུས་པར་བླ་མ་ལྷས་བྱིན་གྱིས་བརླབ་ཏུ་གསོལ། ཞེས་སོགས་དང༌། དེ་ནས་ཤེས་རབ་ཀྱི་ཉམས་ལེན་ནི། སྤྱི་བོར་བླ་མ་ལྷ་བསྒོམ་བཞིན་པའི་ངང༌། མ་སེམས་ཅན་ཐམས་ཅད་ཀྱི་དོན་དུ་ཡང་དག་པར་རྫོགས་པའི་སངས་རྒྱས་ཀྱི་གོ་འཕང་ཐོབ་པར་བྱ། དེའི་ཕྱིར་དུ་གནས་ལུགས་རིག་པ་དོན་དམ་རྟོགས་པའི་ཤེས་རབ། གནས་ལྔ་རིག་པ་ཀུན་རྫོབ་རྟོགས་པའི་ཤེས་རབ། སེམས་ཅན་གྱི་དོན་བྱ་ཚུལ་རྟོགས་པའི་ཤེས་རབ་སྟེ། རྒྱལ་བའི་སྲས་ཀྱི་ཤེས་རབ་རྣམ་པ་ཐམས་ཅད་པ་ལ་བསླབ་པར་བྱའོ། །དེ་ལྟར་བྱེད་ནུས་པར་བླ་མ་ལྷས་བྱིན་གྱིས་བརླབ་ཏུ་གསོལ། ཞེས་སོགས་དང༌། གཉིས་པ་གཞན་རྒྱུད་སྨིན་པར་བྱེད་པ་བསྡུ་བཞིའི་ཉམས་ལེན་ནི། སྤྱི་བོར་བླ་མ་ལྷ་བསྒོམ་བཞིན་པའི་ངང༌། མ་སེམས་ཅན་ཐམས་ཅད་ཀྱི་དོན་དུ་མྱུར་དུ་ཡང་དག་པར་རྫོགས་པའི་སངས་རྒྱས་ཀྱི་གོ་འཕང་ཐོབ་པར་བྱ། དེའི་ཕྱིར་དུ་སེམས་ཅན་ཐམས་ཅད་སྦྱིན་པས་འཁོར་དུ་བསྡུས་ཏེ་ཚར་བཅད་རྗེས་འཛིན་གྱི་སྒོ་ནས་ཆོས་སྟོན་པའི་སྙན་པར་སྨྲ་བ་དང༌། ཆོས་བསྟན་པའི་དོན་ཉམས་སུ་ལེན་དུ་འཇུག་པའི་དོན་སྤྱོད་པ་དང༌། གཞན་ལ་བསྟན་པ་ལྟར་རང་གིས་ཀྱང་ཉམས་སུ་ལོན་པའི་དོན་མཐུན་པ་སྟེ། གཞན་དོན་བྱེད་པའི་ཐབས་བཟང་པོ་འདི་རྣམས་ལ་བརྟེན་ནས་སེམས་ཅན་ཐམས་ཅད་སྨིན་གྲོལ་གྱི་ལམ་ལ་དགོད་པར་བྱའོ། །དེ་ལྟར་བྱེད་ནུས་པར་བླ་མ་ལྷས་བྱིན་གྱིས་བརླབ་ཏུ་གསོལ། གསུམ་པ་ན་མཇུག་ཏུ་ཇི་ལྟར་བྱ་བ་ནི་སྔར་བཞིན་ནོ། །གཉིས་པ་ཐུན་མཚམས་སུ་ཡང་ཟབ་པ་དང་རྒྱ་ཆེ་བའི་རྒྱལ་བའི་སྲས་ཀྱི་སྤྱོད་པ་རླབས་
པོ་ཆེ་རྣམས་སྟོན་པའི་གསུང་རབ་དགོངས་འགྲེལ་དང་བཅས་པ་བལྟ་བ་སོགས་སྔར་བཞིན་ནོ། །གཉིས་པ་ཕར་ཕྱིན་ཐ་མ་གཉིས་ལ་བསླབ་ཚུལ་ལ་གཉིས། བསམ་གཏན་གྱི་ངོ་བོ་ཞི་གནས་ལ་བསླབ་ཚུལ་དང༌། །ཤེས་རབ་ཀྱི་ངོ་བོ་ལྷག་མཐོང་ལ་བསླབ་ཚུལ་ལོ། །དང་པོ་ལ་གཉིས། ཐུན་གྱི་ངོ་བོ་ལ་ཇི་ལྟར་བྱ་བ་དང༌། ཐུན་མཚམས་སུ་ཇི་ལྟར་བྱ་བའི་ཚུལ་ལོ། །དང་པོ་ལ་སྦྱོར་དངོས་མཇུག་གསུམ་ལས། དང་པོ་ནི། སྔོན་འགྲོའི་རིམ་པ་སྤྱི་དང༌། ཁྱད་པར་སྐྱེས་བུ་ཆུང་འབྲིང་གི་བསམ་པ་སྦྱོང་བ་དང་ས་བཟང་ཞིང་གྲོགས་བཟང་བའི་ཡིད་མཐུན་གྱི་དབེན་པའི་གནས་སུ། ཚུལ་ཁྲིམས་རྣམ་པར་དག་པ་ལ་གནས་ནས། སྐྱེ་བོ་མང་པོ་དང་འགྲོགས་འདྲིས་ཧ་ཅང་ཆེ་བ་དང༌། འདོད་པ་ལ་འདུན་པའི་རྣམ་རྟོག་རགས་པ་རྣམས་སྤངས་ཏེ། འདོད་ཆུང་ཆོག་ཤེས་ལ་གནས་ནས་སྟན་བདེ་བ་ལ་ལུས་དྲང་བོར་བསྲང༌། རྐང་པ་རྡོ་རྗེའི་སྐྱིལ་ཀྲུང་དང༌། ལག་པ་གཉིས་མཉམ་བཞག་གི་ཕྱག་རྒྱ་བཅས། རླུང་ཆམ་ལ་འབེབས་པ་སོགས་ཞི་གནས་བསྒྲུབ་པའི་རྒྱུ་ཚོགས་བསྟེན་པ་སྔོན་དུ་བཏང་ནས། དངོས་གཞི་ལ་ཞི་གནས་བསྒྲུབ་པའི་དམིགས་རྟེན་དུ་མ་ཞིག་གསུངས་ཀྱང་གཙོ་བོར་སངས་རྒྱས་རྗེས་སུ་དྲན་པའི་མཆོག་ཏུ་འགྱུར་བ་དང༌། སྔགས་ཀྱི་ལྷའི་རྣལ་འབྱོར་སྒོམ་པའི་སྣོད་རུང་དུ་འགྱུར་བ་སོགས་དགོས་པ་དུ་མ་ཡོད་པས་ལྷའི་སྐུ་ལ་དམིགས་པ་ལེགས་ལ། དེའི་ཚུལ་ནི་སྤྱི་བོའི་བླ་མ་ལྷའི་ཐུགས་ཀ་ནས་འོད་ཟེར་སྡོམ་གྱི་བ་ཐག་ལྟ་བུའི་སྣེ་མོར། སྣ་ཚོགས་པདྨ་དང་ཟླ་བའི་གདན་ལ་རྒྱལ་བ་ཤཱཀྱ་ཐུབ་པ་སྐུ་མདོག་གསེར་བཙོ་མ་ལྟ་བུ་ཞེས་པ་ནས། རྡོ་རྗེ་སྐྱིལ་ཀྲུང་གིས་བཞུགས་པ། རྒྱ་སྲན་གྱི་འབྲུ་ཆད་ཙམ་ཞིག་སྤྲོས་ནས་རང་གི་ལྟེ་བའི་ཐད་ཀྱི་མདུན་གྱི་ནམ་མཁར་བཞུགས་པ་ལ་སེམས་རྩེ་གཅིག་ཏུ་བསྒོམ་པའམ། ཡང་ན་སྤྱི་བོའི་བླ་མ་ལྷ་ལས་བླ་མ་གཉིས་པ་ཞིག་མར་མེ་གཅིག་ལས་གཉིས་ཆད་ཀྱི་
ཚུལ་དུ་བྱུང་ནས་རང་ལ་ཐིམ་པས། སེང་གེ་ཆེན་པོ་བརྒྱད་ཀྱིས་བཏེགས་པའི་རིན་པོ་ཆེའི་ཁྲི་མཐོ་ཞིང་ཡངས་པའི་སྟེང་ཁར་སྣ་ཚོགས་པད་ཟླ་ཉི་མའི་དཀྱིལ་འཁོར་གྱི་གདན་ལ། རང་ཉིད་རྒྱལ་བ་ཤཱཀྱ་ཐུབ་པ། །ཞེས་པ་ནས། རྡོ་རྗེ་སྐྱིལ་ཀྲུང་གིས་བཞུགས་པ། ནམ་མཁའི་འཇའ་ཚོན་ལྟ་བུ་སྣང་ལ་རང་བཞིན་མེད་པ་ལ་སེམས་རྩེ་གཅིག་ཏུ་དམིགས་ནས་བསྒོམ་པར་བྱའོ། །དེའི་ཚེ་སེར་པོ་སྒོམ་འདོད་པ་ལ་དམར་བོ་སོགས་འཆར་བ་དང༌། བཞུགས་པའི་རྣམ་པ་སྒོམ་འདོད་པ་ལ་བཞེངས་པའི་རྣམ་པ་འཆར་བ་དང༌། གཅིག་སྒོམ་འདོད་པ་དུ་མ་འཆར་བ་སོགས་བྱུང་ན་དེ་དག་གི་རྗེས་སུ་མི་འབྲང་བར་རྩ་བའི་དམིགས་རྟེན་ལ་སེམས་རྩེ་གཅིག་ཏུ་དམིགས་ནས་སྒོམ། དང་བོ་ནས་དྭངས་གསལ་འོད་ཀྱི་རང་བཞིན་ཅན་གྱི་གསལ་པོ་རང་མ་བྱུང་ཡང་སྐུའི་དོན་སྤྱི་ཆ་ཕྱེད་ཙམ་གསལ་བ་ལ་སེམས་རྩེ་གཅིག་ཏུ་དམིགས་ནས་སྒོམ་པར་བྱེད། དེ་ཡང་ཐུན་འདི་ཙམ་གྱི་བར་ལ་བྱིང་རྒོད་གཏན་ནས་མ་བྱུང་བ་ཅིག་བྱེད་ཅིང༌། གལ་ཏེ་བྱུང་ན་དེ་མ་ཐག་ཏུ་ཤེས་པར་བྱས་ཏེ་སྤོང་སྙམ་པའི་འདུན་པ་དྲག་པོ་བཏང་ནས་སེམས་དམིགས་རྟེན་ལ་རྩེ་གཅིག་ཏུ་གཏད་པ་དེ་ཉིད་བློའི་ཡུལ་དུ་མ་བརྗེད་པར་དྲན་ཙམ་དྲན་ཙམ་བྱས་ནས། བློ་དེའི་རྒྱུན་སྐྱོང་བ་ནི་ལས་དང་པོ་པས་སེམས་གནས་སྒྲུབ་པའི་ཐབས་དམ་པའོ། །མདོར་ན་ཏིང་ངེ་འཛིན་རྣམ་པར་དག་པ་གཅིག་སྒོམ་ན། ཉེས་པ་ལྔ་སྤངས་འདུ་བྱེད་བརྒྱད། །བསྟེན་པའི་རྒྱུ་ལས་བྱུང་བའོ། །ཞེས་གསུངས་པ་ལྟར། ཉེས་པ་ལྔ་སྤོང་བའི་གཉེན་པོ་འདུ་བྱེད་བརྒྱད་བསྟེན་པའི་སྒོ་ནས་བསྒྲུབ་དགོས་ཏེ། དེ་ཡང་ཏིང་ངེ་འཛིན་ལ་སྦྱོར་བའི་ཚེ་ལེ་ལོ་ཉེས་པ་ཡིན་པས། དེའི་གཉེན་པོ་བཞི་སྟེ། ཏིང་ངེ་འཛིན་གྱི་ཡོན་ཏན་མཐོང་བའི་དད་པ་དང༌། ཏིང་ངེ་འཛིན་ལ་དོན་གཉེར་གྱི་འདུན་པ་དང༌། ཏིང་ངེ་འཛིན་ལ་རྩོལ་བའི་བརྩོན་འགྲུས་དང༌། རྩོལ་བའི་འབྲས་བུ་ཤིན་སྦྱངས་སོ། །ཏིང་ངེ་འཛིན་ལ་བརྩོན་པའི་ཚེ་གདམས་ངག་བརྗེད་པ་ཉེས་པ་ཡིན་པས་དེའི་
གཉེན་པོ་དྲན་པ་སྟེ། དྲན་པ་ཡང་དམིགས་རྟེན་མ་བརྗེད་པ་གཅིག་པུས་མི་ཆོག་གི། སེམས་དམིགས་རྟེན་ལ་རྩེ་གཅིག་ཏུ་དམིགས་ནས་རིག་པ་ངར་ལྡན་དུ་བྱས་པའི་ངེས་ཤེས་དམ་སྦྲིང་ངེ་བ་དང་ལྡན་པའོ། །ཏིང་ངེ་འཛིན་ལ་མཉམ་པར་བཞག་པའི་ཚེ་བྱིང་རྒོད་གཉིས་ཉེས་པ་ཡིན་པས་དེའི་གཉེན་པོ་ཤེས་བཞིན་ཏེ། དེ་ཡང་ཤེས་བཞིན་གྱིས་བྱིང་རྒོད་འབྱུང་མི་འབྱུང་ལེགས་པར་བརྟགས་པས། བློ་རབ་ཀྱིས་བྱིང་རྒོད་འབྱུང་བའི་མགོ་རྩོམ་པ་ན་དེ་ཤེས་ནས་སྤོང་ནས་ལ། འབྲིང་གིས་བྱུང་མ་ཐག་དང༌། ཐ་མས་ཀྱང་བྱིང་རྒོད་བྱུང་ནས་རིང་པོ་མ་ལོན་པར་ཤེས་ནས་སྤོང་དགོས་སོ། །འོ་ན་རྨུགས་པ་དང་བྱིང་རྒོད་གཉིས་ཀྱི་ཁྱད་པར་ཇི་ལྟ་བུ་ཞེ་ན། དམིགས་རྟེན་མི་གསལ་བའི་ལུས་སེམས་ལྕི་བའི་རྣམ་པ་ཅན་ནི་རྨུགས་པ་ཡིན་ལ། སེམས་ལ་མུན་པ་བབས་པ་ལྟ་བུ་དང༌། སེམས་དམིགས་རྟེན་ལས་གཞན་དུ་མི་འཕྲོ་ཡང༌། དྭངས་ཆ་དང་གསལ་ཆ་མེད་པར་དྲན་པའི་ཤུགས་ཞན་དུ་སོང་བ་ནི་བྱིང་བ་རགས་པ་དང༌། དྭངས་ཆ་དང་གསལ་ཆ་ཡོད་ཀྱང་དམིགས་རྟེན་ངེས་པའི་ངེས་ཤེས་དམ་སྤྲིང་ངེ་བ་ལས་ཅུང་ཟད་ཞན་དུ་སོང་བ་ནི་བྱིང་བ་ཕྲ་མོ་ཡིན་ལ། དེ་དག་གི་གཉེན་པོར་དཀོན་མཆོག་གསུམ་གྱི་ཡོན་ཏན་སེམས་པ་དང༌། སྣང་བའི་མཚན་མ་ཡིད་ལ་བྱེད་པ་དང༌། རླུང་སེམས་ནམ་མཁའ་དང་བསྲེ་བའི་གདམས་ངག་རྣམས་བྱའོ། །སེམས་དམིགས་རྟེན་ལ་གཡོ་མེད་མི་གནས་པར་ཅུང་ཟད་འཕྲོ་བ་ནི་རྒོད་པ་ཕྲ་མོ་ཡིན་ལ། དེའི་གཉེན་པོར་དྲན་ཤེས་བསྟེན་ནས་བསྒོམས་པར་བྱའོ། །དྲན་ཤེས་བསྟེན་ཀྱང་མི་གནས་པར་ཆགས་ཡུལ་རྣམས་ལ་འཕྲོ་བ་ནི་རྒོད་པ་རགས་པ་ཡིན་ལ། དེའི་གཉེན་པོར་མི་རྟག་པ་དང༌། ངན་སོང་གསུམ་དང༌། འཁོར་བའི་སྡུག་བསྔལ་སྒོམ་པ་དང༌། རྒོད་པ་བཙན་ཐབས་སུ་གཅོད་པའི་གདམས་ངག་རྣམས་བྱའོ། །བྱིང་རྒོད་གཉིས་བྱུང་བའི་ཚེ་འདུ་མི་བྱེད་པ་ཉེས་པ་ཡིན་པས། དེའི་གཉེན་པོར་བྱིང་རྒོད་བྱུང་མ་ཐག་ཏུ་རིག་པར་བྱས་ནས་
སྤོང་བའི་འདུ་བྱེད་བསྟེན་པར་བྱེད། དེ་ཡང་སེམས་དམིགས་རྟེན་ལ་ཆེས་ཆེར་བསྒྲིམས་པའི་རིག་པ་ངར་ལྡན་དུ་བྱས་ན་གསལ་ཆ་ཡོད་ཀྱང༌། རྒོད་ཤས་ཆེ་བས་གནས་ཆ་རྙེད་དཀའ་ལ། ཆེར་མ་བསྒྲིམས་པར་གློང་ཀློང་ན་གནས་ཆ་ཡོད་ཀྱང་བྱིང་ཤས་ཆེ་ཞིང་གསལ་ཆ་རྙེད་དཀའ་བས། དེས་ན་རང་ཉམས་ལ་དཔག་སྟེ་རིག་པ་འཕང་འདི་ཙམ་ཞིག་བསྟོད་ན་རྒོད་པ་སྐྱེ་བར་འདུག་སྙམ་པ་ལས་ཅུང་ཟད་གློད། འདི་ཙམ་དུ་བཞག་ན་བྱིང་བ་སྐྱེ་བར་འདུག་སྙམ་པ་ལས་ཅུང་ཟད་འཕང་བསྟོད་ན་རན་པར་འགྱུར་བས། དེ་གཉིས་ཀྱི་མཚམས་སུ་འཕྲོ་རྒོད་ལས་སེམས་གླན་ཏེ་གནས་ཆ་ཚོལ། གནས་ཆ་ནམ་བྱུང་རེས་ཀྱིས་བྱིང་ཟོན་བྱས་ནས་རིག་པ་ངར་དང་ལྡན་པའི་གསལ་ཆ་འདོན། །དེ་གཉིས་རེས་མོས་སུ་བྱས་ནས་བསྐྱངས་པས་ཏིང་ངེ་འཛིན་སྐྱོན་མེད་འགྲུབ་ཀྱི། ངེས་ཤེས་ཀྱི་འཛིན་སྟངས་ངར་ལྡན་དུ་བྱས་པའི་གསལ་ཆ་མེད་པའི་དྭངས་པ་ཙམ་ལ་ཡིད་བརྟན་མི་བྱའོ། །དེ་ལྟར་བྱིང་རྒོད་ཕྲ་མོ་ཡང་ཆོད་ནས་སེམས་ཏིང་ངེ་འཛིན་ལ་རྒྱུན་ཆགས་སུ་འཇུག་པའི་ཚེ་འདུ་བྱེད་པ་ཉེས་པ་ཡིན་པས། དེའི་གཉེན་པོར་བྱིང་རྒོད་ཀྱི་གཉེན་པོ་འདུ་མི་བྱེད་པར། བཏང་སྙོམས་སུ་གློད་ནས་འཇོག་པའོ། །དེ་ལྟ་བུའི་ཚུལ་གྱིས་ལེགས་པར་བསྐྱངས་པས་སེམས་གནས་པ་དགུ་རིམ་གྱིས་ཐོབ་ནས་ལུས་སེམས་ཤིན་སྦྱངས་དང་བཅས་པའི་ཞི་གནས་འགྲུབ་པར་འགྱུར་རོ། །གསུམ་པ་མཇུག་ཏུ་ཇི་ལྟར་བྱ་བ་ནི་སྔར་བཞིན་ནོ། །གཉིས་པ་ཐུན་མཚམས་སུ་ཡང་ཞི་གནས་ཀྱི་རྣམ་བཞག་སྟོན་པའི་གསུང་རབ་དགོངས་འགྲེལ་དང་བཅས་པ་བལྟ་བ་སོགས་ནི་སྔར་བཞིན་ནོ། །གཉིས་པ་ཤེས་རབ་ཀྱི་ངོ་བོ་ལྷག་མཐོང་ལ་བསླབ་ཚུལ་ལ་གཉིས། ཐུན་གྱི་ངོ་བོ་ལ་ཇི་ལྟ་བྱ་བ་དང༌། ཐུན་མཚམས་སུ་ཇི་ལྟར་བྱ་བའི་ཚུལ་ལོ། །དང་པོ་ལ་སྦྱོར་དངོས་མཇུག་གསུམ་ལས། དང་པོ་ནི། ཞི་གནས་ཀྱི་སྐབས་སུ་བཤད་པ་དང་འདྲ་
ལ། ཁྱད་པར་དགེ་བའི་བཤེས་གཉེན་མཁས་པ་ཚུལ་བཞིན་དུ་བསྟེན་པ་ལས་ལྷག་མཐོང་གི་གདམས་ངག་ཉན་པ་དང༌། བླ་མ་དང་ལྷག་པའི་ལྷ་དབྱེར་མེད་དུ་བྱས་ནས་གདུང་ཤུགས་དྲག་པོས་གསོལ་བ་འདེབས་པ་དང༌། བསགས་སྦྱོང་ལ་འབད་པ་སོགས་གསུམ་བསྒྲིལ་དུ་བྱེད་པ་ནི་ལྟ་བ་རྟོགས་པའི་སྔོན་འགྲོར་མེད་མི་རུང་བ་ཡིན་ནོ། །གཉིས་པ་དངོས་གཞི་ལ་གཉིས། གང་ཟག་གི་བདག་མེད་གཏན་ལ་ཕབ་ནས་བསྒོམ་པའི་ཚུལ་དང༌། ཆོས་ཀྱི་བདག་མེད་གཏན་ལ་ཕབ་ནས་སྒོམ་པའི་ཚུལ་ལོ། །དང་པོ་ནི། རྒྱལ་བའི་གསུང་རབ་རྣམས་ལས་བདག་མེད་གཏན་ལ་འབེབས་པའི་རིགས་པའི་རྣམ་གྲངས་མཐའ་ཡས་པ་ཞིག་གསུངས་ཀྱང༌། ལས་དང་པོ་པ་རྣམས་ཀྱིས་གནད་བཞིའི་སྒོ་ནས་གཏན་ལ་ཕབ་ན་འཆར་སླ་བས། །དེའི་ཚུལ་ནི་རང་ཅག་རྣམས་གཉིད་འཐུག་པོ་ལོག་བཞིན་པའི་གནས་སྐབས་ཚུན་ཆད་དུ། ངང་སྙམ་དུ་སྙིང་གི་དཀྱིལ་དུ་དམ་སྦྲང་སྦྲིང་བློས་འཛིན་པ་ནི་ངར་འཛིན་ལྷན་སྐྱེས་ཡིན་ལ། དེ་ཡང་རང་གིས་ཉེས་པ་དེ་ལྟ་བུ་མ་བྱས་པ་ལ། གཞན་ཞིག་གིས་ཁྱོད་ཀྱིས་ཉེས་པ་འདི་དང་འདི་ལྟ་བུ་ཞིག་བྱས་སོ་ཞེས་བསྙོན་བཙུགས་པ་ན། ངས་ཉེས་པ་འདི་ལྟ་བུ་མ་བྱས་པ་ལ་བསྙོན་འདི་འདྲ་བ་ཞིག་འཛུགས་པ། ངང་སྙམ་དུ་སྙིང་གི་དཀྱིལ་དུ་དམ་སྦྲིང་སྦྲིང་འཆར་བ་ལྟ་བུའི་ཚེ། ངར་འཛིན་ལྷན་སྐྱེས་ཀྱི་ངའི་འཛིན་ཚུལ་གསལ་བར་ཡོད་པས། དེའི་དུས་སུ་ཤེས་པའི་ཆ་ཤས་ཕྲ་མོ་ཞིག་གིས་བློ་དེས་ང་གང་དུ་བཟུང༌། ཚུལ་ཇི་ལྟར་དུ་བཟུང་བརྟག་པར་བྱའོ། །དེ་ཡང་བློ་ཕྱི་མ་དེ་ཤུགས་ཆེས་ན་བློ་སྔ་མ་དེ་ཡལ་ནས་སྟོང་སང་ཞིག་མ་གཏོགས་གང་ཡང་མི་ཡོང་བས་ཤེས་པ་བྱིངས་ངའོ་སྙམ་པའི་བློ་དེའི་ངོ་བོར་བྲེང་ཆགས་སུ་བསྐྱེད་ནས། ཤེས་པའི་ཆ་ཤས་ཕྲ་མོ་ཞིག་གིས་བརྟག་དགོས་ལ། དེ་ལྟར་བརྟགས་པའི་ཚེ། ངར་འཛིན་ལྷན་སྐྱེས་ཀྱིས་ང་གང་དུ་བཟུང་བའི་གནས་
ནི། རང་གི་ཕུང་བོ་ལྔའམ་ལུས་སེམས་གཉིས་ལས་དོན་གཞན་དུ་མ་ཡིན་ཅིང༌། ཕུང་པོ་ལྔ་རེ་རེ་བ་དང་ལུས་སེམས་གཉིས་རེ་རེ་བའི་སྟེང་དུ་ཡང་མ་ཡིན་ཀྱང༌། ཕུང་བོ་ལྔ་ཚོགས་ཙམ་པའམ་ལུས་སེམས་གཉིས་ཚོགས་ཙམ་པའི་ལམ་མེ་བ་དེའི་སྟེང་དུ་རྟོག་པས་བཏགས་པ་ཙམ་མ་ཡིན་པར། དང་པོ་ནས་ཚུགས་ཐུབ་ཏུ་གྲུབ་པའི་ང་ཞིག་ཡོད་པར་འཛིན་པ་ནི། ངར་འཛིན་ལྷན་སྐྱེས་ཀྱིས་ངའི་འཛིན་ཚུལ་ཡིན་ལ་དེའི་འཛིན་སྟངས་ཀྱི་ཡུལ་གྱི་ང་དེ་འགོག་རྒྱུའི་དགག་བྱ་ཡིན་པས། གཞན་གྱིས་བཤད་པའི་གོ་བ་དང༌། ཚིག་སྤྱི་ཙམ་མ་ཡིན་པར་རང་གི་རྒྱུད་སྟེང་དུ་ཚུལ་དེ་ཉིད་རྗེན་ཆེར་གྱིས་ངེས་པར་བྱ་སྟེ། དེ་ནི་གནད་དང་པོ་དགག་བྱའི་སྣང་ཚུལ་ངེས་པའི་གནད་དོ། །གཉིས་པ་ཁྱབ་པ་ངེས་པའི་གནད་ནི། ངའོ་སྙམ་དུ་སྙིང་གི་དཀྱིལ་དུ་དམ་སྦྲིང་སྦྲིང་དུ་འཛིན་པའི་བློ་དེས་བཟུང་བའི་ང་དེ། རང་གི་ཕུང་བོ་ལྔའི་སྟེང་ན་ཡོད་ན། ང་དེ་ཕུང་བོ་ལྔ་དང་གཅིག་ཏུ་ཡོད་དམ་ཐ་དད་དུ་ཡོད། ཡོད་ཚུལ་དེ་གཉིས་ལས་གཞན་པའི་ཡོད་ཚུལ་ཕུང་གསུམ་པ་གཏན་མི་སྲིད་དེ། ཆོས་གང་དང་གང་ཡིན་ཀྱང་ཡང་ན་གཅིག་གི་རྣམ་པར་ཡོད་དགོས། ཡང་ན་དུ་མའི་རྣམ་པར་ཡོད་དགོས་ལ། ཡོད་ཚུལ་དེ་གཉིས་ལས་གཞན་པའི་ཡོད་ཚུལ་ཕུང་གསུམ་པ་གཏན་མི་སྲིད་སྙམ་དུ་ཐག་བཅད་པར་བྱའོ། །གསུམ་པ་བདེན་པའི་གཅིག་བྲལ་ངེས་པའི་གནད་ནི། །དེ་ལྟར་བཟུང་བའི་ང་དེ་ཕུང་པོ་ལྔ་དང་གཅིག་ཏུ་ཡོད་དོ་སྙམ་ན། གང་ཟག་གཅིག་ལ་ཕུང་པོ་ལྔ་ཡོད་པ་བཞིན་དུ། ང་ཡང་རྒྱུད་ཐ་དད་པར་ལྔ་ཡོད་པར་འགྱུར་བ་དང༌། ཡང་ན་ང་གཅིག་ཡིན་པ་བཞིན་དུ། ཕུང་བོ་ལྔ་ཡང་ཆ་མེད་གཅིག་ཏུ་འགྱུར་བ་སོགས་ཀྱི་ཉེས་པ་དུ་མ་ཡོད་པས། དེ་ལྟར་བཟུང་བའི་ང་དེ་ཕུང་བོ་ལྔ་དང་གཅིག་མ་ཡིན་སྙམ་དུ་བསམ། གཞན་ཡང་དེ་ལྟར་བཟུང་བ་ལྟར་གྱི་ང་དེ་ཕུང་པོ་ལྔ་དང་གཅིག་ཏུ་གྲུབ་ན་ཕུང་
པོ་ལྔ་སྐྱེ་འཇིག་བྱེད་པ་བཞིན་དུ་བློ་དེས་བཟུང་བ་ལྟར་གྱི་ཚུགས་ཐུབ་ཏུ་གྲུབ་པའི་ང་དེ་ཡང་སྐྱེ་འཇིག་བྱེད་པར་འགྱུར་ལ། དེ་ལྟར་ན་སྐྱེ་འཇིག་བྱེད་པའི་ང་དེའི་སྐད་ཅིག་སྔ་ཕྱི་རྣམས་གཅིག་ཏུ་གྲུབ་བམ་ཐ་དད་དུ་གྲུབ། གཅིག་ཏུ་གྲུབ་ན་ཚེ་སྔ་ཕྱིའི་ང་དང་ཚེ་འདིའི་ང་གསུམ་ཆ་མེད་ཅིག་ཏུ་འགྱུར་ལ། ཐ་དད་དུ་གྲུབ་ན། སྤྱིར་ཐ་དད་ཙམ་ལ་འབྲེལ་མེད་ཐ་དད་ཡིན་མི་དགོས་ཀྱང༌། རང་བཞིན་གྱིས་གྲུབ་པའི་ཐ་དད་ཡིན་ན་འབྲེལ་པ་གཏན་ནས་མེད་པའི་ཐ་དད་ཡིན་དགོས་པས། ཚེ་སྔ་ཕྱིའི་ང་དང་ཚེ་འདིའི་ང་གསུམ་འབྲེལ་པ་གཏན་ནས་མེད་བའི་ཐ་དད་དུ་འགྱུར་བས། ལས་མ་བྱས་པ་དང་འཕྲད་ཅིང་ལས་བྱས་པ་ཆུད་ཟ་བ་སོགས་ཀྱི་ཉེས་པ་དུ་མ་ཡོད་པས། དེ་ལྟ་བུའི་ང་དེའི་སྐད་ཅིག་སྔ་ཕྱི་རྣམས་ཐ་དད་མ་ཡིན་ལ། དེས་ན་བློ་དེས་བཟུང་བ་ལྟར་གྱི་ང་དེ་ཕུང་བོ་ལྔ་དང་གཅིག་ཏུ་མ་གྲུབ་བོ་སྙམ་དུ་བསམ། གཞན་ཡང་དེ་ལྟར་བཟུང་བའི་ང་དེ་ཕུང་པོ་བ་དང་གཅིག་ཏུ་གྲུབ་ན། བདེན་པར་གྲུབ་པའི་གཅིག་ཡིན་པས་ཆ་ཐམས་ཅད་ནས་ཐམས་ཅད་དུ་གཅིག་ཏུ་འགྱུར་ལ། དེ་ལྟར་ན་ངའམ་བདག་ཕུང་བོ་ལྔ་ཉེ་བར་ལེན་པ་པོ་དང༌། ཕུང་བོ་ལྔའམ་བདག་གིས་ཉེ་བར་བླང་བྱ་མ་ཡིན་པ་སོགས་ཀྱི་ཉེས་པ་དུ་མ་ཡོད་པས། དེ་ལྟར་བཟུང་བའི་ང་དེ་ཕུང་བོ་ལྔ་དང་གཅིག་ཏུ་མ་གྲུབ་པར་བསམ་མོ། །བཞི་པ་བདེན་པའི་དུ་བྲལ་ངེས་པའི་གནད་ནི། དེ་ལྟར་བཟུང་བའི་ང་དེ་ཕུང་བོ་ལྔའི་སྟེང་དུ་གཅིག་ཏུ་མ་གྲུབ་ཀྱང༌། ཕུང་བོ་ལྔའི་སྟེང་དུ་ཐ་དད་དུ་གྲུབ་བོ་སྙམ་ན། ཕུང་བོ་ལྔ་ཡང་གཟུགས་ཀྱི་ཕུང་པོ་ལ་སོགས་པ་རེ་རེ་ནས་བསལ་བའི་རྗེས་སུ། འདི་རྣམ་ཤེས་ཀྱི་ཕུང་པོའོ། །ཞེས་ཟུར་དུ་ངོས་འཛིན་རྒྱུ་ཡོད་པ་བཞིན་དུ། གཟུགས་ཕུང་སོགས་རེ་རེ་ནས་བསལ་བའི་འོག་ཏུ་དེ་ལྟར་བཟུང་བའི་ང་དེ་འདིའོ། །ཞེས་ཐ་དད་དུ་ངོས་འཛིན་རྒྱུ་དགོས་པ་ལས་དེ་ལྟར་མི་འདུག་པས། དེ་ལྟར་བཟུང་བའི་ང་དེ་ཕུང་
པོ་ལྔ་དང་ཐ་དད་དུ་མ་གྲུབ་སྙམ་དུ་བསམ། དེ་ལྟར་གནད་བཞིའི་དཔྱད་པ་བྱས་པ་ལ་བརྟེན་ནས་ངར་འཛིན་ལྷན་སྐྱེས་ཀྱི་ང་བཟུང་བ་ལྟར་གྱི་ང་མེད་པར་ངེས་པ་ནས། ངེས་ཤེས་དེ་ཉིད་ཀྱི་རྒྱུན་བྱིང་རྒོད་དང་བྲལ་བར་རྩེ་གཅིག་ཏུ་བསྐྱང་བར་བྱའོ། །དེ་ཡང་ངེས་ཤེས་དེ་ཉིད་ཤུགས་ཅུང་ཟད་ཆུང་ངུ་སོང་བ་ན་ལས་དང་པོ་བ་རྣམས་ཀྱིས་སྔར་ལྟར་གནད་བཞིའི་དཔྱད་པ་བྱས་པ་ལ་བརྟེན་ནས། བདེན་མེད་ཀྱི་ངེས་ཤེས་འདྲེན་པར་བྱེད་ལ། བློ་མཐོ་བ་རྣམས་ཀྱིས་ནི་ངར་འཛིན་ལྷན་སྐྱེས་ལ་ང་ཇི་ལྟར་སྣང་བ་ལྟར་གྲུབ་མ་གྲུབ་དཔྱད་པ་བྱས་པ་ལ་བརྟེན་ནས། གནད་བཞིའི་དཔྱད་པ་བྱས་པ་དང་འདྲ་བར་བདེན་མེད་ཀྱི་ངེས་ཤེས་འདྲེན་པས། དེའི་ཚེ་ངེས་ངོར་ང་རང་བཞིན་མེད་པར་ངེས་པའི་ངེས་ཤེས་དམ་སྦྲིང་ངེ་བ་དང༌། སྣང་ངོར་དགག་བྱ་བདེན་གྲུབ་བཀག་ཙམ་གྱི་སྟོང་སང་ངེ་བའི་ཁྱད་པར་གཉིས་ལྡན་དུ་བྱས་ནས་རྩེ་གཅིག་ཏུ་སྐྱོང་བ་ནི་མཉམ་བཞག་ནམ་མཁའ་ལྟ་བུའི་སྐྱོང་ཚུལ་ལོ། །རྗེས་ཐོབ་ཏུ་ང་ལ་སོགས་པའི་ཆོས་ཐམས་ཅད་སྒྱུ་མ་ལྟ་བུའི་རྣམ་རོལ་དུ་བསྒོམ་པར་བྱ་སྟེ། དེ་ཡང་མཉམ་བཞག་ཏུ་བདེན་མེད་ཀྱི་ངེས་ཤེས་ཤུགས་དྲག་པོ་དྲངས་པ་ལ་བརྟེན་ནས། རྗེས་ཐོབ་ཏུ་གང་ཤར་ཐམས་ཅད་སྣང་ཡང་བདེན་མེད་བརྫུན་པ་སྒྱུ་མ་ལྟ་བུའི་རྣམ་རོལ་ཏུ་འཆར་བ་ལ་བསླབ་པར་བྱའོ། །གཉིས་པ་ཆོས་ཀྱི་བདག་མེད་གཏན་ལ་ཕབ་ནས་སྒོམ་ཚུལ་ལ་གཉིས། འདུས་བྱས་རང་བཞིན་མེད་པར་གཏན་ལ་ཕབ་ནས་སྒོམ་ཚུལ་དང༌། འདུས་མ་བྱས་རང་བཞིན་མེད་པར་གཏན་ལ་ཕབ་ནས་སྒོམ་ཚུལ་ལོ། །དང་བོ་ལ་བེམ་ཤེས་ལྡན་མིན་འདུ་བྱེད་གསུམ་ལས། དང་བོ་ལུས་ལྟ་བུ་ལ་མཚོན་ན་དེ་ཡང་ཤ་རུས་གདོས་བཅས་ཀྱི་ཡན་ལག་ལྔ་ཚོགས་ཙམ་གྱི་ལུས་འདིའི་སྟེང་དུ། རྟོག་པས་བཏགས་པ་ཙམ་མ་ཡིན་པར་ཚུགས་ཐུབ་ཏུ་གྲུབ་པའི་ལུས་ཡོ་རེ་བ་ཞིག་ཡོད་པར་རང་ཅག་རྣམས་
ལ་བསྙོན་མེད་དུ་འཆར་བ་ནི་དགག་བྱའི་སྣང་ཚུལ་ཡིན་ལ། དེ་ལྟ་བུའི་ལུས་དེ་ཤ་རུས་གདོས་བཅས་ཀྱི་ཡན་ལག་ལྔ་ཚོགས་ཙམ་གྱི་ལུས་འདིའི་སྟེང་དུ་ཡོད་ན་ཤ་རུས་གདོས་བཅས་ཀྱི་ཡན་ལག་ལྔ་ཚོགས་ཙམ་གྱི་ལུས་འདི་དང་གཅིག་ཏུ་གྲུབ་བམ་ཐ་དད་དུ་གྲུབ། གཅིག་ཏུ་གྲུབ་ན་ཤ་རུས་གདོས་བཅས་ཀྱི་ཡན་ལག་ལྔ་ཚོགས་ཙམ་གྱི་ལུས་འདི་ཕ་མའི་ཁུ་ཁྲག་ལས་གྲུབ་པ་ཡིན་པས། རྣམ་ཤེས་འཇུག་པའི་གཞིར་གྱུར་པའི་ཁུ་ཁྲག་གི་ཐིག་པ་དེ་ཡང་ཤ་རུས་གདོས་བཅས་ཀྱི་ཡན་ལག་ལྔ་ཚོགས་ཙམ་གྱི་ལུས་སུ་འགྱུར་བ་དང༌། ཡན་ལག་ལྔ་ཡོད་པ་བཞིན་དུ་ལུས་ཀྱང་ཡན་ལག་ལྔར་ཚོགས་པའི་ལུས་ལྔར་འགྱུར་ལ། ཐ་དད་དུ་གྲུབ་ན་མགོ་ལ་སོགས་པའི་ཡན་ལག་རེ་རེ་ནས་བསལ་བའི་རྗེས་སུ། ལུས་དེ་འདིའོ་ཞེས་བསྟན་རྒྱུ་དགོས་པ་ལས་དེ་ལྟར་མི་འདུག་པས། དེ་ལྟ་བུའི་ལུས་གཏན་ནས་མེད་སྙམ་དུ་ངེས་ཤེས་དྲངས་ནས་བསྐྱང་བར་བྱའོ། །གཉིས་པ་དེ་རིང་གི་ཤེས་པ་ལྟ་བུ་ལ་མཚོན་ན། དེ་རིང་གི་སྔ་དྲོའི་ཤེས་པ་དང་དེ་རིང་གི་ཕྱི་དྲོའི་ཤེས་པ་གཉིས་ཀྱི་སྟེང་དུ་རྟོག་པས་བཏགས་པ་ཙམ་མ་ཡིན་པར་རང་ངོས་ནས་གྲུབ་པའི་དེ་རིང་གི་ཤེས་པ་ཞིག་ཡོད་ན། དེ་རིང་གི་སྔ་དྲོའི་ཤེས་པ་དང་དེ་རིང་གི་ཕྱི་དྲོའི་ཤེས་པ་གཉིས་གཅིག་ཏུ་གྲུབ་བམ་ཐ་དད་དུ་གྲུབ། གཅིག་ཏུ་གྲུབ་ན་དེ་རིང་གི་སྔ་དྲོའི་ཤེས་པའི་སྟེང་དུ་དེ་རིང་གི་ཕྱི་དྲོའི་ཤེས་པ་ཡོད་པར་འགྱུར་ལ། ཐ་དད་དུ་གྲུབ་ན་དེ་རིང་གི་སྔ་དྲོའི་ཤེས་པ་དང༌། དེ་རིང་གི་ཕྱི་དྲོའི་ཤེས་པ་གཉིས་རེ་རེ་ནས་བསལ་བའི་རྗེས་སུ། དེ་རིང་གི་ཤེས་པ་དེ་འདིའོ་ཞེས་བསྟན་རྒྱུ་དགོས་པ་ལས་དེ་ལྟར་མི་འདུག་པས། དེ་ལྟ་བུའི་ཤེས་པ་གཏན་ནས་མེད་སྙམ་དུ་ངེས་ཤེས་དྲངས་ནས་སྔར་ལྟར་སྒོམ་པར་བྱེད་དོ། །གསུམ་པ་དུས་ལོ་གཅིག་ལྟ་བུ་ལ་མཚོན་ན། ལོའི་གདགས་གཞི་ཟླ་བ་བཅུ་གཉིས་པོའི་སྟེང་དུ་རྟོག་པས་བཏགས་པ་ཙམ་མ་ཡིན་པར། རང་ངོས་
ནས་གྲུབ་པའི་ལོ་ཞིག་ཡོད་ན་ཟླ་བ་བཅུ་གཉིས་པོ་དང་གཅིག་ཏུ་གྲུབ་བམ་ཐ་དད་དུ་གྲུབ་གཅིག་ཏུ་གྲུབ་ན་ཟླ་བ་བཅུ་གཉིས་ཡོད་པ་བཞིན་དུ་ལོ་ཡང་བཅུ་གཉིས་སུ་འགྱུར་ལ། ཐ་དད་དུ་གྲུབ་ན་ཟླ་བ་བཅུ་གཉིས་པོ་རེ་རེ་ནས་བསལ་བའི་རྗེས་སུ། ལོ་དེ་འདིའོ་ཞེས་བསྟན་རྒྱུ་དགོས་པ་ལས། དེ་ལྟར་མི་འདུག་པས། དེ་ལྟ་བུའི་ལོ་གཏན་མི་འདུག་སྙམ་དུ་ངེས་ཤེས་དྲངས་ནས་སྔར་ལྟར་བསྐྱང་བར་བྱའོ། །གཉིས་པ་འདུས་མ་བྱས་རང་བཞིན་མེད་པར་གཏན་ལ་ཕབ་ནས་སྒོམ་ཚུལ་ནི། དེ་ཡང་ནམ་མཁའ་ལྟ་བུ་ལ་མཚོན་ན་ཕྱོགས་དང་ཕྱོགས་མཚམས་ཀྱི་ནམ་མཁའི་ཆ་དུ་མ་ཞིག་ཡོད་པས། དེ་རྣམས་དང་གཅིག་ཏུ་གྲུབ་བམ་ཐ་དད་དུ་གྲུབ་དཔྱད་དེ་བདེན་མེད་ཀྱི་ངེས་ཤེས་དྲངས་ནས་སྔར་ལྟར་སྒོམ་པར་བྱེད་དོ། །མདོར་ན་ང་དང་ཕུང་པོ་དང་རི་རབ་ཁང་ཁྱིམ་ལ་སོགས་པ་འཁོར་འདས་ཀྱི་ཆོས་ཐམས་ཅད་རྟོག་པས་བཏགས་པ་ཙམ་མ་ཡིན་པར། རང་ངོས་ནས་གྲུབ་པ་རྡུལ་ཙམ་ཡང་མེད་པར་ངེས་པའི་ངེས་ཤེས་དེ་ཉིད་རྩེ་གཅིག་ཏུ་སྐྱོང་བ་མཉམ་བཞག་ནམ་མཁའ་ལྟ་བུ་དང༌། རྗེས་ཐོབ་ཏུ་ཡུལ་སྣང་ཐམས་ཅད་རྒྱུ་རྐྱེན་ཚོགས་པ་ལ་བརྟེན་ནས་བྱུང་བའི་བདེན་མེད་བརྫུན་པའི་རང་བཞིན་དུ་ཤེས་པའི་རྗེས་ཐོབ་སྒྱུ་མའི་རྣལ་འབྱོར་གཉིས་ལེགས་པར་བསྐྱངས་པ་ལ་བརྟེན་ནས། དཔྱད་པ་བྱས་སྟོབས་ཀྱིས་དྲངས་པའི་ལུས་སེམས་ཤིན་སྦྱངས་ཀྱི་བདེ་བས་ཟིན་པའི་མཉམ་བཞག་དེ་ཉིད་ལྷག་མཐོང་མཚན་ཉིད་པར་འཇོག་པ་ཡིན་ནོ། །གསུམ་པ་མཇུག་ཏུ་ཇི་ལྟར་བྱ་བ་ནི་སྔར་བཞིན་ཡིན་ལ། གཉིས་པ་ཐུན་མཚམས་སུ་ཡང་ལྷག་མཐོང་གི་རྣམ་བཞག་སྟོན་པའི་གསུང་རབ་དགོངས་འགྲེལ་དང་བཅས་པ་བལྟ་བ་སོགས་སྔར་བཞིན་ནོ། །དེ་ལྟར་ལ་མཐུན་མོང་བས་རྒྱུད་སྦྱངས་ནས་ངེས་པར་རྡོ་རྗེ་ཐེག་པ་ལ་འཇུག་དགོས་ཏེ། ལམ་དེ་ལ་བརྟེན་ནས་བསྐལ་པ་གྲངས་མེད་པ་གསུམ་ལ་མི་ལྟོས་
པར་ཚོགས་གཉིས་བདེ་བླག་ཏུ་རྫོགས་པར་འགྱུར་བས་སོ། །དེ་ཡང་བཤེས་གཉེན་བསྟེན་ཚུལ་ནས་ཞི་གནས་དང་ལྷག་མཐོང་གི་བར་རྣམས་མྱོང་ཁྲིད་དུ་བྱས་ཏེ། ཉིན་རེ་བཞིན་དུ་ཐུན་བཞིའམ་མ་མཐའ་ཐུན་ཅིག་ཏུ་ཡང་བྱས་ཏེ། ལམ་གྱི་རིམ་པ་རྣམས་ལ་ཡིད་འགྱུར་བའི་མྱོང་བ་འདོན་པར་བྱེད་པ་ནི་དལ་བའི་རྟེན་ལ་སྙིང་པོ་ལེན་པར་བྱེད་པའི་ཐབས་མཆོག་ཏུ་གྱུར་པ་ཡིན་ནོ། །མཉམ་མེད་བུ་རམ་ཤིང་བའི་དགོངས་པའི་དོན། །དཔལ་ལྡན་མར་མེ་མཛད་དཔལ་ཡབ་སྲས་དང༌། །བློ་བཟང་རྒྱལ་བ་གཉིས་པས་གསལ་མཛད་པ། །མདོར་བསྡུས་ཉམས་ལེན་རིམ་པར་བསྒྲིགས་པ་འདི། །སྐལ་བཟང་ཐར་བར་བགྲོད་པའི་ཆ་རྐྱེན་ཏུ། །ཆོས་ཀྱི་རྒྱལ་མཚན་ཞེས་བྱས་ལེགས་པར་བསྡེབས། །དགེ་བ་འདི་ཡིས་བདག་གཞན་འགྲོ་བ་རྣམས། །སྐྱེས་བུ་གསུམ་གྱི་ཉམས་ལེན་མཐར་ཕྱིན་ཤོག །ཅེས་བྱང་ཆུབ་ལམ་གྱི་རིམ་པའི་དམར་ཁྲིད་ཐམས་ཅད་མཁྱེན་པར་བགྲོད་པའི་བདེ་ལམ་ཞེས་བྱ་བ་འདི། ཆོས་སྨྲ་བ་བློ་བཟང་ཆོས་ཀྱི་རྒྱལ་མཚན་གྱིས་དབྱར་ཆོས་ཞིག་ལ་དགེ་འདུན་འདུས་པ་རྒྱ་མཚོའི་ཚོགས་ལ་ཟིན་ཐུན་དུ་བསྩལ་བ་ཟིན་བྲིས་སུ་བཏབ་པ་ལས་སླར་རང་གི་མིག་ལམ་དུ་ཕབ་ནས་ཞུས་དག་བགྱིས་པའོ། །འདིས་ཀྱང་བསྟན་པ་རིན་པོ་ཆེ་མི་ནུབ་པའི་རྒྱལ་མཚན་དུ་གྱུར་ཅིག །
༄། །བྱང་ཆུབ་ལམ་གྱི་རིམ་པའི་ཉམས་ལེན་བསྡུས་དོན་གྱི་ཚིགས་སུ་བཅད་པ་བཞུགས་སོ༎ ༎
- ↑ ངོ་བོ་ཉིད། ལམ་གྲུབ་མཐའ་ལ་སོགས་པ་སྣ་ཚོགས་སུ་སྣང་ཡང་།
- ↑ རང་རེའི་རིའི་རྩེ་མོ་ཁོ་ན་ནས་འཆར་བས།
- ↑ སེམས་ངོ་བོ་ཉིད།
- ↑ རང་རང་གི་གཞུང་ལུགས་ཀྱིས་བསྐྱེད་པའི།
- ↑ རང་རང་གི་ཐུབ་མཐའ་བདེན་པ།
- ↑ རྒྱུ་དངོས་པོའ་ཆོས་མིན་མ་སེམས་མ་གྲུབ་པས།
- ↑ ངེས་འགྲེ།
- ↑ སེམས་ལ་ཆ་ཤས་མེད་པས།
- ↑ ངོ་བོ་ཉིད་སྦྱངས་པས་བཟང་དུ་མི་འགྲོ་བས།
- ↑ འཁོར་འདས་ཀྱི་ཆོས་ལ་ཁྱད་པར་མེད་པའོ།
- ↑ ཞེན་ནམ་སྒྲོ་བཏགས་ན།
- ↑ བྱིང་རྒོད་ཀྱི་རྐྱེན་གྱིས་འཇིག །གཟུགས་བརྙན་སོགས་ཀྱིས་མཚོན། རྟོག་པ་སྤངས་ཤིང་མི་རྟོག་པ་སྐྱེ་བོགས་འབྱིན་གྱིས་གོང་ནས་གོང་དུ་སྦྱང་དུ་རུང་། རྟུན་པ་ཅན་ཚེ་གཅིག་གིས་འབྲས་བུ་ཐོབ། འབྲིང་བར་དོར། ཐ་མ་སྐྱེ་བ་བདུན་ནམ་བཅུ་དྲུག་ཚུན་ཆད་ཀྱིས་ཐོབ་ཏུ་ཡོད་དོ།
- ↑ ཉམས་མྱོང་དབང་གསུམ་པ་སོགས་ཀྱིས།
- ↑ དུས་གསུམ་དུ་མི་འགྱུར་བས།
- ↑ མ་བཅོས་པའི་དོན་གྱི་ན།
- ↑ ཡེ་ནས་གནས་པས་ན།
- ↑ འཁོར་འདས་ཐམས་ ཤོག་ལྷེ་༡༡༧༽ ཅད་ལ་བཟང་ངན་མེད་པར་ཁྱབ་པའི་དོན་གྱིས་ན།
- ↑ འཁོར་འདས་ཀྱི་འབྲས་བུ་བྱེད་པ་ཡིན་པས་ན།
- ↑ དེ་བཞིན་ཉིད་རྟོགས་པ་ལ་སོགས་པ་ལ་རིམ་གྱིས་སྦྱར།
- ↑ འདི་ནས་ལམ་སྣ་ཟིན་པས་གསུངས།
- ↑ རང་བཞིན་བསམ་མི་ཁྱབ། སྟོང་ཉིད་ངོ་བོ་ཉིད་ཟུང་འཇུག་གཉིས་མེད་སྟོང་པ་ཉིད།
- ↑ ཐབས་བསམ་མི་ཁྱབ་གསུམ་ནི་བསམ་གྱིས་མི་ཁྱབ་པའོ།
- ↑ དེ་ནི་ཆོས་ཐམས་ཅད་ཀྱི་བབས་སམ་རྟོགས་པའི་ཕྱག་སྟེ། རང་གི་རིག་པའི་ཡེ་ཤེས་ནི། །ལེགས་མཐོང་གང་ཡིན་འདིར་ཕྱག་ཡིན།
- ↑ ཡང་དག་སྤོང་བ་
- ↑ རྒྱུ་རྒྱུད་
- ↑ དང་པོ་རྟེན་གསུངས།
- ↑ Nitartha International suggests this should be corrected to འམ་