Wylie:'jam dpal dbyangs sku'i khrid shes rab 'phel byed ye shes rgyan gyi 'khor lo

From gDams Ngag mDzod
Revision as of 17:24, 14 April 2022 by MortO (talk | contribs)
(diff) ← Older revision | Latest revision (diff) | Newer revision → (diff)
Jump to navigation Jump to search


Upload a file
Click the picture above to view the original manuscript.

འཇམ་དཔལ་དབྱངས་སྐུའི་ཁྲིད་ཤེས་རབ་འཕེལ་བྱེད་ཡེ་ཤེས་རྒྱན་གྱི་འཁོར་ལོ་
'jam dpal dbyangs sku'i khrid shes rab 'phel byed ye shes rgyan gyi 'khor lo
The Wheel of Ornaments of Gnosis That Makes Wisdom Grow: The Instructions of Mañjushrī, the Deity Related to the Enlightened Body

Damngak Dzö Volume 16 (མ་) / Pages 377-397 / Folios 1a1 to 11a3


Property "Author" has a restricted application area and cannot be used as annotation property by a user.


[edit]
XXX འཇམ་དཔལ་དབྱངས་སྐུའི་ཁྲིད་ཤེས་རབ་འཕེལ་བྱེད་ཡེ་ཤེས་རྒྱན་གྱི་འཁོར་ལོ་བཞུགས་སོ། །
XXX བླ་མ་དང་མགོན་པོ་འཇམ་དཔལ་དབྱངས་ལ་གུས་པས་ཕྱག་འཚལ་ལོ། །འདིར་བཅོམ་ལྡན་འདས་འཇམ་དཔལ་དབྱངས་ཀྱི་ཁྲིད་ཀྱི་རིམ་པ་འདི་ལ་དོན་གསུམ་སྟེ། སྔོན་འགྲོ་དང་དངོས་གཞི་རྗེས་སོ། །དང་པོ་ལ་གསུམ་སྟེ། བླ་མ་བརྒྱུད་པའི་ལོ་རྒྱུས་དང༌། ཐུམ་མོང་གི་སྔོན་འགྲོ་དང༌། ཁྱད་པར་གྱི་སྔོན་འགྲོ་བཞི་དང་གསུམ་ལས། དང་པོ་རྗེ་བཙུན་འཇམ་པའི་དབྱངས་ཀྱི་ཁྲིད་བྱུང་ཚུལ་ཡང༌། སོ་ས་གླིང་གི་དུར་ཁྲོད་དུ། དཔལ་གྲུབ་ཐོབ་ཆེན་པོ་མི་ཏྲ་ཛྭ་ཀིས་ཡི་དམ་གྱི་ལྷ་ལྔ་བསྒྲུབས་པས། ལྷ་དེ་དག་སོ་སོའི་ཞལ་བསྟན་ནས། རང་རང་གི་ཁྲིད་ཀྱི་རིམ་པ་བསྟན་པ་ནི། འཇམ་དཔལ་དབྱངས་སྐུའི་ཁྲིད་ཤེས་རབ་འཕེལ་བར་བྱེད་པ་ཡེ་ཤེས་རྒྱན་གྱི་འཁོར་ལོ། །སྤྱན་རས་གཟིགས་གསུང་གི་ཁྲིད་བྱང་ཆུབ་ལམ་གྱི་རིམ་པ་ཡོངས་སུ་སྡུད་པ་བདུད་རྩིའི་དགའ་སྟོན་དང༌། ཕྱག་ན་རྡོ་རྗེ་ཐུགས་ཀྱི་ཁྲིད་བདུད་དཔུང་འཇོམས་བྱེད་འོད་ཟེར་
XXX རྒྱས་པ། ཚེ་དཔག་མེད་ཡོན་ཏན་གྱི་ཁྲིད་འཆི་མེད་རྡོ་རྗེའི་སྐུ་སྒྲུབ་པ། སྒྲོལ་མ་འཇིགས་པ་བརྒྱད་སྐྱོབ་ཀྱི་ཁྲིད་འཁོར་བའི་འཕྲང་སྒྲོལ་ཕྲིན་ལས་ལྷུན་གྲུབ། ཛམ་བྷ་ལ་སེར་པོའི་ཁྲིད་དངོས་གྲུབ་ཆར་འབེབས་ཞེས་བྱ་བ་སྟེ། ཁྲིད་དྲུག་པོ་དེ་དག་ལྷ་སོ་སོའི་ཞལ་ནས་རང་རང་གི་སྒོ་ཁྲིད་དྲུག་པོ་འདི་དག་གསུངས་ཏེ། ཁྲིད་འདི་དག་ཉམས་སུ་ལོང་ལ་གཞན་ལའང་གཅིག་བརྒྱུད་དུ་སྟོན་ཅིག་དང༌། མི་རབས་བདུན་གྱི་བར་དུ་བྱིན་རླབས་ཆེན་པོ་འབྱུང་སྟེ། ཁྲིད་འདི་དག་བསྒོམ་པའི་རྣལ་འབྱོར་པ་དེ་དག །བདག་ཅག་རྣམས་ཀྱིས་བྱིན་གྱིས་བརླབས་པའི་གང་ཟག་ཤ་སྟག་ཡིན་ནོ་ཞེས་ལུང་བསྟན་པའོ། །གྲུབ་ཆེན་གྱིས་པཎྜི་ཏ་ཤྲཱི་པུ་ཏྲ་ལ། དེས་རྗེ་བཙུན་གྷིརྟི་རཏྣ་ལ། དེས་བདག་ལ་གནང་བའོ། །དང་པོ་ནི། དལ་འབྱོར་རྙེད་དཀའ། འཆི་བ་མི་རྟག་པ། ལས་རྒྱུ་འབྲས། འཁོར་བའི་ཉེས་དམིགས་བསྒོམ་པ། ཐུན་མོང་གི་ཁྲིད་རྣམས་
XXX སྤྱི་དང་མཐུན། གཉིས་པ་ཁྱད་པར་གྱི་སྔོན་འགྲོ་ལ། ཅི་བྱས་བྱང་ཆུབ་ཀྱི་ལམ་དུ་འགྲོ་བར་བྱེད་པ་སྐྱབས་འགྲོ་སེམས་བསྐྱེད་ཀྱི་ཁྲིད། སྡིག་སྒྲིབ་དག་པར་བྱེད་པ་རྡོ་རྗེ་སེམས་དཔའི་བསྒོམ་བཟླས་ཀྱི་ཁྲིད། ཚོགས་གཉིས་རྫོགས་པར་བྱེད་པ་མཎྜལ་གྱི་ཁྲིད། བྱིན་རླབས་འཇུག་པར་བྱེད་པ་བླ་མའི་རྣལ་འབྱོར་གྱི་ཁྲིད་ནི། བླ་མ་འཇམ་དཔལ་དབྱངས་ཀྱི་ངོ་བོ་བསྒོམ་ལ་གསོལ་བ་གདབ་བོ། །གཉིས་པ་དངོས་གཞི་ལ་གཉིས་ཏེ། བསྐྱེད་རིམ་གྱི་ཁྲིད། རྫོགས་རིམ་གྱི་ཁྲིད་དོ། །དང་པོ་ལ་བཞི་སྟེ། མངོན་རྟོགས་བསྒོམ་པའི་ཁྲིད་དང༌། སྣང་བ་སྐུའི་ཁྲིད། འཇམ་དཔལ་དབྱངས་རིགས་ལྔའི་འོད་ཟེར་སྤྲོ་བསྡུས་སྤྲུལ་པའི་སྐུ་ངོ་སྤྲོད་པའི་ཁྲིད། གྲགས་པ་གསུང་གི་ཁྲིད། རྗེ་བཙུན་ངག་གི་དབང་ཕྱུག་ཏུ་བསྒོམ་ཞིང་མཚན་ཡིག་འབྲུ་སྤྲོ་བསྡུ་ལ་བརྟེན་ནས་ལོངས་སྐུར་ངོ་སྤྲོད་པའི་ཁྲིད། དྲན་རྟོག་ཐུགས་ཀྱི་ཁྲིད། རང་ཉིད་འཇིགས་བྱེད་དུ་བསྒོམ་ཞིང༌། འཇིགས་བྱེད་གནས་ལྔར་བཀོད་ནས་དུག་ལྔ་རང་སར་དག་ནས་ཡེ་ཤེས་ལྔ་རྒྱས་བྱེད་ཆོས་སྐུར་ངོ་སྤྲོད་པའི་ཁྲིད་དང་བཞིའོ། །དང་པོ་ནི། དབེན་པའི་གནས་སུ་ཚངས་པའི་རྒྱུ་བཞི་སྔོན་དུ་འགྲོ་བས། སྭ་བྷ་ཝས་སྟོང་པ་ཉིད་དུ་བསྒོམ། སྟོང་པའི་ངང་ལས། ཕྱི་སྣོད་ཐམས་ཅད་འཇམ་དཔལ་དབྱངས་ཀྱི་ཞིང་གི་བཀོད་པ། རིན་པོ་ཆེ་སྣ་ལྔ་ལས་གྲུབ་པའི་ས་གཞི། མནན་ན་ནེམ་བྱེད་པ། བཏེག་ན་འཕར་བར་བྱེད་པ། རིན་པོ་ཆེ་དུ་མ་ལས་གྲུབ་པའི་ལྗོན་ཤིང་དྲིལ་བུ་གཡེར་ཁས་སྦྲེལ་བ། བྱ་སྣ་ཚོགས་དང་བཅས་པ། ཐམས་ཅད་ཀྱང་དམ་པའི་ཆོས་ཀྱི་སྒྲ་སྒྲོགས་པ། བདུད་རྩི་དང་སྤོས་ཆུ་ཡན་
XXX ལག་བརྒྱད་ལྡན་རྣམས་ཀྱང་ཤེས་རབ་ཀྱི་ཕ་རོལ་ཏུ་ཕྱིན་པའི་སྒྲ་སྒྲོགས་པ་ལ་སོགས། མདོར་ན་སངས་རྒྱས་ཀྱི་ཞིང་ཁམས་རྣམ་པར་དག་པའི་དབུས་སུ། རིན་པོ་ཆེ་དུ་མ་ལས་གྲུབ་པའི་ཁྲིའི་སྟེང་དུ་སྣ་ཚོགས་པདྨ་འབུམ་ལྡན་གྱི་དབུས་སུ། ཨ་ལས་ཟླ་བའི་དཀྱིལ་འཁོར་གྱི་སྟེང་དུ་དྷཱིཿཡིག་གསེར་ཞུན་མའི་མདོག་ཅན། དེ་ལས་འོད་ཟེར་སྣ་ལྔ་ཕྱོགས་བཅུར་འཕྲོས། འཕགས་པ་མཆོད། སེམས་ཅན་རྣམས་ཀྱི་སྒྲིབ་པ་སྦྱངས། ཚུར་འདུས་དྷཱིཿལ་ཐིམ། དེ་ཡོངས་སུ་གྱུར་པ་ལས། རང་ཉིད་རྗེ་བཙུན་འཇམ་དཔལ་དབྱངས་སྐུ་མདོག་དམར་སེར་གུར་གུམ་གཞོན་ནུའི་མདོག་ཅན། ཞལ་གཅིག་ཕྱག་གཉིས་ཞབས་རྡོ་རྗེའི་དཀྱིལ་ཀྲུང་དུ་བཞུགས་པ། དར་སྣ་ལྔས་སྨད་གཡོགས་ཅན། ཕྱག་གཡས་ཤེས་རབ་ཀྱི་རལ་གྲི་ཀླད་ལ་བསྐོར་བ་ལ་ཤེས་རབ་ཀྱི་མེ་འབར་ཞིང་ཚ་ཚ་འཕྲོ་བས་བརྒྱན་པ། གཡོན་ཨུཏྤལ་སྙན་གྱི་ཐད་ཀར་རྒྱས་པའི་སྟེང་དུ་ཤེས་རབ་ཀྱི་པོ་ཏིས་བརྒྱན་པའི་ཡུ་བ་མཐེབ་སྲིན་གྱིས་ཐུགས་ཀར་འཛིན་པ། ཞལ་འཛུམ་པ། སྨིན་དཀྱུས་སྤྱན་དཀྱུས་ཤངས་དཀྱུས་རིང་བ། དཔྲལ་བ་ཡངས་པ་མཛོད་སྤུ་དཀར་པོས་བརྒྱན་པ། དབུ་སྐྲ་རལ་པའི་ཅོད་པན་སྤྱི་བོར་བཅིངས་ཤིང༌། ལྷག་མའི་ཟར་བུ་རྐེད་སོར་སླེབས་པ། གཞོན་ནུ་ལང་ཚོ་དང་ལྡན་པ། མཚན་བཟང་པོ་སུམ་ཅུ་རྩ་གཉིས་དང་ལྡན་ཅིང༌། དཔེ་བྱད་བཟང་པོ་བརྒྱད་ཅུས་ཀུན་ནས་མཛེས་པ། འོད་ཟེར་སྣ་ལྔ་འཁྲིགས་པའི་དབུས་ན་བཞུགས་པའི་སྤྱི་བོར་ཨོཾ་དཀར་པོ། མགྲིན་པར་ཨཱཿདམར་པོ། སྙིང་ཀར་ཧཱུྃ་མཐིང་ཀ་ལས་འོད་ཟེར་འཕྲོས་པས། རང་ལྟ་བུའི་ཡེ་ཤེས་པ་
XXX སྤྱན་དྲངས་ལ་དབྱེར་མེད་དུ་བསྟིམ། སླར་འོད་ཟེར་འཕྲོས་རིགས་ལྔ་ཡབ་ཡུམ་འཁོར་བཅས་སྤྱན་དྲངས་ནས། དབང་བསྐུར། སྡིག་སྒྲིབ་དག །བདུད་རྩིའི་ལྷག་མ་ཡར་ལུད་པ་ལས་སྤྱི་བོར་རྣམ་སྣང་ལ་སོགས་རིགས་ལྔས་དབུ་བརྒྱན། སྙིང་གར་པདྨ་དམར་པོ་དང་ཟླ་བའི་སྟེང་དུ། ཡི་གེ་དྷཱིཿལ། ཨོཾ་ཨ་ར་པ་ཙ་ན་དྷཱིཿན་མཿ ཅེས་པས་བསྐོར་བ་ལས་འོད་ཟེར་འཕྲོས། ཕྱི་སྣོད་ལ་ཕོག་པས་སངས་རྒྱས་ཀྱི་ཞིང་ཁམས་སུ་སྦྱངས། ནང་བཅུད་ཀྱི་སེམས་ཅན་ལ་ཕོག །ཐམས་ཅད་འཇམ་དཔལ་དབྱངས་སུ་གྱུར། དེ་དག་ཐམས་ཅད་ཀྱི་ཞལ་ནས་སྔགས་འདྲེན་པར་བསྒོམས་ལ་བསྙེན་པ་བསྐྱལ་ལོ། །མཐར་དེ་དག་ཐམས་ཅད་འོད་དུ་ཞུ་ནས་རང་ལ་ཐིམ། རང་སྙིང་ཁའི་དྷཱིཿལ་ཐིམ། དྷཱིཿནམ་མཁའ་ལ་འཇའ་ཡལ་བ་ལྟར་གྱུར་པར་བསམ་ལ་དམིགས་མེད་ཀྱི་ངང་ལ་བཞག་གོ །གཉིས་པ་ནི། རང་ཉིད་མངོན་བྱང་ལྔས་གོང་ལྟར་དུ་འཇམ་དཔལ་དུ་བསྐྱེད་པའི་སྤྱི་བོ། །མགྲིན་པ། སྙིང་ཁ། ལྟེ་བ། གསང་གནས་ལྔར། པད་ཟླའི་སྟེང་དུ་དྷཱིཿཡིག་དཀར་དམར་མཐིང་སེར་ལྗང་ཁུ་ལས་བྱུང་བའི་འཇམ་དབྱངས་དཀར་དམར་སྔོ་སེར་ལྗང་གུ། ཞལ་གཅིག་ཕྱག་གཉིས་ཞབས་གཉིས་རྡོ་རྗེ་སྐྱིལ་ཀྲུང་དང༌། ཕྱག་གཡས་རལ་གྲི་ཀླད་ལ་བསྐོར་བ། གཡོན་ཨུཏྤ་ལའི་ཡུ་བ་ཐུགས་ཀར་འཛིན་པ། ཞལ་འཛུམ་པ། སྨིན་དཀྱུས་དང་སྤྱན་དཀྱུས་ཤངས་དཀྱུས་རིང་ཞིང༌། དཔྲལ་བ་ཡངས་པ། མཛོད་སྤུ་དཀར་པོས་བརྒྱན་པ། དབུ་སྐྲ་རལ་པའི་ཅོད་པན་ལ་རིན་པོ་ཆེ་འབུམ་གྱིས་བརྒྱན་པ། འོད་གསལ་བའི་རང་བཞིན་ཅན། གསལ་ཞིང་སྟོང་ལ་མེ་ལོང་ནང་གི་
XXX གཟུགས་བརྙན་ལྟ་བུར་བསྒོམ་པར་བྱའོ། །དེ་དག་གི་སྤྱི་མགྲིན་སྙིང་ཁར་ཡིག་འབྲུ་གསུམ་བཀོད་ལ། དེ་ལས་འོད་ཟེར་འཕྲོས། རང་ལྟ་བུའི་ཡེ་ཤེས་པ་གཞུག་ཅིང་དབང་བསྐུར་བ་གོང་ལྟར་རོ། །དེ་དག་གི་ཐུགས་ཀར་ཡང་པད་ཟླའི་སྟེང་དུ་དྷཱིཿཡིག་དཀར་དམར་སྔོ་སེར་ལྗང་ཁུ་ལས་འོད་ཟེར་ཕྱོགས་བཅུར་འཕྲོས། ཕྱོགས་བཅུའི་རྒྱལ་བ་སྲས་ཀྱིས་སྐུ་གསུང་ཐུགས་ཡོན་ཏན་ཕྲིན་ལས་ཀྱི་མཐུ་སྟོབས་རྒྱས་པར་བྱས། མཆོད་པའི་སྤྲིན་ཕུང་རྣམས་ཀྱིས་མཆོད། ཕྱོགས་བཅུའི་རྒྱལ་བ་སྲས་བཅས་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་ཐམས་ཅད་ཀྱི་བྱིན་རླབས་དང༌། ཡེ་ཤེས་དང་མཁྱེན་རབ་ཀྱི་ནུས་པ་ཐམས་ཅད་འོད་ཟེར་དཀར་དམར་མཐིང་སེར་ལྗང་གུའི་དབྱིབས་ཅན་དུ་སྤྱན་དྲངས་ནས། རང་གི་སྤྱི་མགྲིན་སྙིང་ཁ་ལྟེ་བ་གསང་གནས་ཀྱི་འཇམ་དབྱངས་རིགས་ལྔ་ལ་ཐིམ་པས། སྐུ་གསུང་ཐུགས་ཡོན་ཏན་ཕྲིན་ལས་དང༌། ཆོས་དབྱིངས་ཡེ་ཤེས། སོར་རྟོགས། མེ་ལོང༌། མཉམ་ཉིད། བྱ་གྲུབ་ཡེ་ཤེས་རྣམས་ཀྱི་ཡོན་ཏན་མངོན་དུ་བྱས་པར་བསྒོམ། སླར་ཡང་གནས་ལྔའི་འཇམ་དབྱངས་ལྔ་ལས། སྔར་ལྟར་འོད་ཟེར་ལྔ་འཕྲོས། ཕྱོགས་བཅུའི་རིགས་དྲུག་གི་སེམས་ཅན་ཐམས་ཅད་ཀྱི་ལུས་ངག་ཡིད་གསུམ་ལ་ཕོག་པ། གཏི་མུག །འདོད་ཆགས། ཞེ་སྡང༌། ང་རྒྱལ། ཕྲག་དོག་སྟེ་དུག་ལྔ་སྦྱངས། རྣམ་སྣང༌། འོད་དཔག་མེད། མི་བསྐྱོད་པ། རིན་འབྱུང༌། དོན་གྲུབ། འཇམ་དབྱངས་ཀྱི་ས་ལ་བཀོད། ཆོས་དབྱིངས། སོར་རྟོགས། མེ་ལོང༌། མཉམ་ཉིད། བྱ་གྲུབ་སྟེ་ཡེ་ཤེས་ལྔ་མངོན་དུ་
XXX བྱས་ནས། དེ་དག་གི་སྐུ་གསུང་ཐུགས་ཡོན་ཏན་ཕྲིན་ལས་ཀྱི་ནུས་པ་ཐམས་ཅད་ཡེ་ཤེས་དང་ཤེས་རབ་ཀྱི་ངོ་བོ་ཐམས་ཅད་འོད་ཟེར་དཀར་དམར་མཐིང་སེར་ལྗ་ཁུའི་དབྱིབས་ཅན་དུ་བསྡུས་ནས། རང་གི་གནས་ལྔར་ཐིམ་པར་བསམ། དེ་དག་གི་གནས་སྐབས་སུ་འོད་ཟེར་ཕར་གཏོང་བའི་ཚེ། རླུང་ཡང་ཕྱིར་གཏོང་ངོ༌། །ཡོན་ཏན་ཚུར་བསྡུ་བའི་ཚེ། རླུང་ཡང་ནང་དུ་བུམ་པ་ཅན་ཡུན་རིང་དུ་བཟུང་ནས་མནན་པ་ནི་མན་ངག་གོ །གསུམ་པ་ནི། སྟོང་པའི་ངང་ལས་རབ་རྒྱས་པད་ཟླའི་སྟེང་དུ། ས་ལས་སེང་གེ་སྔོན་པོ་གདོང་ཐུར་ལ་ཕྱོགས་པའི་སྟེང་དུ། ཟླ་བའི་དཀྱིལ་འཁོར་གྱི་དབུས་སུ་དྷཱིཿཡིག་དམར་སེར་ལས་འོད་འཕྲོས། འཕགས་པ་མཆོད། སེམས་ཅན་གྱི་དོན་བྱས། ཚུར་འདུས་ཡོངས་སུ་གྱུར་པ་ལས། རང་ཉིད་རྗེ་བཙུན་ངག་གི་དབང་ཕྱུག་སྐུ་མདོག་པདྨ་རཱ་ག་ལྟར་དམར་བའི་མདངས་དང་ལྡན་པ། ཞབས་གཉིས་རྒྱལ་པོ་རོལ་པའི་སྟབས་ཀྱིས་བཞུགས་པ། དར་སྣ་ལྔའི་ཤམ་ཐབས་ཅན། ཕྱག་གཉིས་ཆོས་སྟོན་པའི་ཕྱག་རྒྱ་མཛད་ཅིང༌། གཡས་པའི་མཐེབ་མཛུབ་གཉིས་ཀྱིས་པདྨ་རལ་གྲིས་མཚན་པའི་ཡུ་བ་འཛིན་པ། གཡོན་པའི་མཐེབ་མཛུབ་གཉིས་ཀྱིས་ཨུཏྤ་ལའི་སྟེང་ན་རིན་པོ་ཆེའི་གླེགས་བམ་འཛིན་པ། ཞལ་འཛུམ་པ། སྤྱན་དཀྱུས་དང་སྨིན་དཀྱུས་རིང་ཞིང༌། མཛོད་སྤུ་དཀར་པོས་མཛེས་པ། དབུ་སྐྲ་རལ་པའི་ཐོར་ཅོག་ཕྱེད་བཅིངས་ཤིང༌། ཕྱེད་གྲོལ་བས་རྐེད་སོར་སླེབས་པའི་ཟར་བུ་གྱེན་དུ་འདྲིལ་བ། མེ་ཏོག་གི་ཕྲེང་བས་སྐྲ་བཅིངས་དང༌། རིན་པོ་ཆེ་དུ་མ་དང༌། མུ་ཏིག་སྣ་ལྔའི་ཆུན་པོས་རབ་ཏུ་བརྒྱན་ཅིང༌། དར་གྱི་ཅོད་པན་གྱིས་མཛེས་པར་བརྒྱན་པའི་
XXX བདག་ཉིད་ཅན་དུ་གསལ་བར་བསྒོམ། དེའི་སྤྱི་མགྲིན་སྙིང་ཁར་ཨོཾ་ཨཱཿཧཱུྃ་ལས་འོད་འཕྲོས་པས། རང་ལྟ་བུའི་ཡེ་ཤེས་པ་སྤྱན་དྲངས་ལ་བསྟིམ། སླར་རིགས་ལྔ་སྤྱན་དྲངས་ལ་དབང་བསྐུར། རྣམ་སྣང་གིས་དབུར་བརྒྱན་པར་བསམ། བཅོམ་ལྡན་འདས་དེའི་སྤྱི་བོར། མགྲིན་པ། ལྟེ་བ། གསང་གནས་ལྔར། འཇའ་ཚོན་གྱིས་འོད་བསྐོར་བའི་དབུས་སུ། པད་ཟླའི་གདན་སྟེང་དུ་རིན་པོ་ཆེའི་པོ་ཏི་ཤེས་རབ་ཀྱི་རལ་གྲི་མེ་འབར་བས་མཚན་པ། ཡུ་བ་དྷཱིཿདང་བཅས་པ། པོ་ཏིའི་སྟེང་ན་རལ་གྲི་གྱེན་ལ་ལང་བའོ། །སྤྱི་བོར་ཤེས་རབ་ཀྱི་རལ་གྲི་དཀར་པོ། དེ་བཞིན་དུ་མགྲིན་པར་དམར་པོ། སྙིང་ཁར་སྔོན་པོ། ལྟེ་བར་སེར་པོ། གསང་གནས་སུ་ལྗང་ཁུ་ལྔ་ལ་ཡི་གེ་དྷཱིཿདཀར་དམར་སྔོ་སེར་ལྗང་ཁུས་མཚན་པ་ལས་འོད་འཕྲོས། ཕྱོགས་བཅུའི་སངས་རྒྱས་ཐམས་ཅད་མཆོད་པའི་སྤྲིན་གྱིས་མཆོད། དེ་དག་གི་སྐུ་གསུང་ཐུགས་ཡོན་ཏན་ཕྲིན་ལས་ཀྱི་ཡེ་ཤེས་ཀྱི་སྣང་བ་རྒྱས་པར་བྱས། སེམས་ཅན་ཐམས་ཅད་ལ་ཕོག །མི་ཤེས་པའི་མུན་པ་མཐའ་དག་དང་དུག་ལྔ་སྦྱངས། འཇམ་དབྱངས་རིགས་ལྔའི་གོ་འཕང་ལ་བཀོད། ཡེ་ཤེས་ལྔའི་སྣང་བ་རྒྱས་པར་བསམ་པ་ནི། རླུང་ཕྱིར་འགྲོ་བའི་ཚེ་དམིགས་པ་བཟུང་བའོ། །རླུང་ཚུར་རྔུབ་པའི་ཚེ། སངས་རྒྱས་བྱང་སེམས་ཐམས་ཅད་རིགས་ལྔ་འཇམ་དབྱངས་སུ་གནས་པའི་སྐུ་གསུང་ཐུགས་ཡོན་ཏན་ཕྲིན་ལས་ཀྱི་བྱིན་རླབས། ཡེ་ཤེས་དང་ཡོན་ཏན། མཁྱེན་བརྩེ་ནུས་པ། འཆད་རྩོད་རྩོམ་གསུམ་མི་བརྗེད་པའི་གཟུངས་ཀྱི་སྒོ་དང་བཅས་པའི་ཤེས་རབ་དང་ནུས་པ་ཐམས་ཅད་འོད་ཟེར་དཀར་
XXX དམར་མཐིང་སེར་ལྗང་ཁུའི་དབྱིབས་ཅན་དུ་བསྡུས་ནས། རང་གི་གནས་ལྔའི་འཇམ་དབྱངས་གྱི་ངོ་བོ་ཕྱག་མཚན་ལ་ཐིམ་པར་བསམ་ལ་རླུང་འཛིན། དེས་རང་བཞིན་ཡེ་ཤེས་ལྔ་དང་ལྡན་ཅིང༌། འཆད་རྩོད་རྩོམ་འཛིན་མི་བརྗེད་པའི་གཟུངས་དང་བཅས་པའི་ཤེས་རབ་ཀྱི་སྒོ་དང་ནུས་པ་རྣམས་ཐིམ་པར་བསྒོམ་ལ་རླུང་བཟུང༌། དེས་རང་ཉིད་ཡེ་ཤེས་ལྔ་དང་ལྡན་ཅིང༌། འཆད་རྩོད་རྩོམ་འཛིན་མི་བརྗེད་པའི་གཟུངས་དང་བཅས་པའི་ཤེས་རབ་ཀྱི་སྣང་བ་རྒྱས་ཤིང༌། འཇམ་དབྱངས་ཀྱི་གོ་འཕང་མངོན་དུ་བྱས་པར་བསྒོམ་མོ། །མཐར་ནི་སྣོད་བཅུད་རང་ལ་བསྡུ། ཐིག་ལེ་དང་ཕྱག་མཚན་ལ་ཡང་མས་རིམ་གྱིས་སྤྱི་བོར་ཐིམ། རང་ལུས་ཀྱང་སྤྱི་བོའི་ཕྱག་མཚན་ལ་ཐིམ། དེ་འཇའ་འོད་དུ་ཡལ་ནས། ནམ་མཁའ་གང་བར་བསམ་ལ་དམིགས་མེད་ཀྱི་ངང་ལ་བཞག་གོ །དེ་ནི་གསུང་ལོངས་སྐུར་མངོན་དུ་བྱེད་པའི་ཁྲིད་དོ། །གསུམ་པ་ནི། མངོན་བྱང་ལྔས། རང་ཉིད་འཇམ་དབྱངས་གསལ་བར་བསྒོམ། དེ་ཡོངས་སུ་གྱུར་པ་ལས། པད་ཉི་རོའི་སྟེང་དུ། རང་ཉིད་རྡོ་རྗེ་འཇིགས་བྱེད་སྐུ་མདོག་མཐིང་ནག་ཞལ་གཅིག་ཕྱག་གཉིས། ཞབས་གཡས་བརྐྱང་གཡོན་བསྐུམ་པ། མི་མགོ་དང་རུས་པས་བརྒྱན་པ། ལིང་ག་གྱེན་ལ་འགྲེང་བ། གསུས་ཁྱིམ་ཆེ་བ། ཕྱག་གཉིས་ཐུགས་ཁར་གྲི་གུག་ཐོད་ཁྲག་བསྣོལ་ཐབས་སུ་འཛིན་པ། ཞལ་མ་ཧེ་རབ་ཏུ་ཁྲོས་པའི་གདོང་པ་ཅན། ལྗགས་འདྲིལ་ཞིང་མཆེ་བ་གཙིགས་པ། སྤྱན་གསུམ་དམར་ཞིང་གཡོ་བ། རྭ་རྣོན་པོ་སྔོ་ཟངས་ཟངས་པ་ལ་རུས་པའི་རྒྱན་དྲུག་ཁྲོལ་བ། དབུ་སྐྲ་ཁམས་སེར་གྱེན་དུ་འཁྱིལ་པའི་དབུས་སུ། འཇམ་དབྱངས་ཞལ་གསེར་
XXX གྱི་མདོག་ཅན་ཞི་བའི་ཚུལ་ཅན། སྐུ་སྟོད་ལ་གླང་ཆེན་གྱི་སྟོད་གཡོགས་ཅན་སྦྲུལ་ནག་རབ་ཏུ་འཇིགས་པས་སེ་རལ་ཁར་བརྒྱན་ཅིང༌། མི་མགོ་ལྔ་བཅུས་དོ་ཤལ། ཐོད་སྐམ་ལྔ་དང་རིན་པོ་ཆེས་དབུ་ལ་བརྒྱན་པ། གཞན་ཡང་རིན་པོ་ཆེ་དང་རུས་པའི་རྒྱན་དྲུག་གིས་བརྒྱན་པ། ཧ་ཧ་དང་ཧཱུྃ་ཧཱུྃ་གི་གད་རྒྱངས་འབྲུག་ལྟར་སྒྲོགས་ཤིང༌། སྲིད་པ་གསུམ་པོ་སྐད་ཅིག་གིས་འཇིགས་པར་བྱེད་པའི་བདག་ཉིད་དུ་བསྒོམ་པར་བྱའོ། །དེའི་སྤྱི་མགྲིན་སྙིང་ཁ་ལྟེ་བ་གསང་གནས་ལྔར་པད་ཉིའི་སྟེང་དུ། ཨོཾ་ཨཱཿཧཱུྃ་ཏྲཱཾ་ཧྲཱིཿལྔ་ཞུ་བ་ལས་བྱུང་བའི་བཅོམ་ལྡན་འདས་གཏི་མུག་གཤིན་རྗེ་གཤེད་དཀར་པོ་སྤྱི་བོར། འདོད་ཆགས་གཤིན་རྗེ་གཤེད་དམར་པོ་མགྲིན་པར། ཞེ་སྡང་གཤིན་རྗེ་གཤེད་ནག་པོ་སྙིང་ཁ། སེར་སྣ་གཤིན་རྗེ་གཤེད་སེར་པོ་ལྟེ་བ། ཕྲག་དོག་གཤིན་རྗེ་གཤེད་ལྗང་ཁུ་གསང་གནས་རྣམས་སུ་བསྐྱེད་དེ། དེ་དག་གཙོ་བོའི་ཆ་ལུགས་ཇི་ལྟ་བ་བཞིན་ལ། ཕྱག་གཡས་པ་རྣམས་ཀྱིས་འཁོར་ལོས་མཚན་པའི་གྲི་གུག་དང༌། དེ་བཞིན་དུ་པདྨ། རྡོ་རྗེ་དང༌། ནོར་བུ། རྒྱ་གྲམ་གྱིས་མཚན་པའི་གྲི་གུག་འཛིན་པར་བསྒོམ་པའི་སྙིང་ཁར་པད་ཉིའི་སྟེང་དུ། འཁོར་ལོ། པདྨ། རྡོ་རྗེ། ནོར་བུ། རལ་གྲི་ལྔ། ཨོཾ་ཨཱཿཧཱུྃ་ཏྲཱཾ་ཧྲཱིཿལྔས་མཚན་པ་ལས། འོད་ཟེར་དཀར་དམར་སེར་ལྗང་ཁུ་ལྔ་འཕྲོས། ཕྱོགས་བཅུའི་སངས་རྒྱས་སྲས་བཅས་མཆོད། སྐུ་གསུང་ཐུགས་ཡོན་ཏན་ཕྲིན་ལས་ཀྱི་མཐུ་སྟོབས་རྒྱས་པར་བྱས། སླར་ཕྱོགས་བཅུའི་རིགས་དྲུག་རྣམས་ལ་ཕོག །རིགས་དྲུག་གི་གཏི་མུག །འདོད་ཆགས། ཞེ་སྡང༌། ང་རྒྱལ། ཕྲག་དོག་ལྔ་སྦྱངས། གཏི་མུག་
XXX གཤིན་རྗེ་གཤེད་དང༌། འདོད་ཆགས་གཤིན་རྗེ་གཤེད་དང༌། ཞེ་སྡང་གཤིན་རྗེ་གཤེད་དང། ང་རྒྱལ་གཤིན་རྗེ་གཤེད་དང༌། ཕྲག་དོག་གཤིན་རྗེ་གཤེད་ཀྱི་གོ་འཕང་ལ་བཀོད། ཆོས་དབྱིངས་ཡེ་ཤེས། སོར་རྟོགས། མེ་ལོང༌། མཉམ་ཉིད། བྱ་གྲུབ་ཡེ་ཤེས་མངོན་དུ་བྱས་པར་བསྒོམ་ལ་རླུང་ཕྱིར་གཏོང༌། ཚུར་བསྡུས་པའི་ཚེ། དེ་དག་གི་སྐུ་གསུང་ཐུགས་ཡོན་ཏན་ཕྲིན་ལས་ཀྱི་བྱིན་རླབས་ཐམས་ཅད་སྐུ་ལྔ་ཡེ་ཤེས་མཁྱེན་བརྩེ་མཐུ་སྟོབས་ཐམས་ཅད། འོད་ཟེར་དཀར་དམར་མཐིང་སེར་ལྗང་ཁུའི་དབྱིབས་ཅན་དུ་བསྡུས་ནས། སྤྱི་མགྲིན་སྙིང་ཁ་ལྟེ་བ་གསང་གནས་ལྔར་ཐིམ་པར་བསམ་ལ། རང་ལ་སྐུ་གསུང་ཐུགས་ཡོན་ཏན་ཕྲིན་ལས་སྐུ་ལྔ་ཡེ་ཤེས་མཁྱེན་བརྩེ་ནུས་པ་མཐུ་སྟོབས་ཐམས་ཅད་ཀྱི་བྱིན་རླབས་ཞུགས་པས། རང་ཉིད་གཤིན་རྗེ་གཤེད་རིགས་ལྔའི་གོ་འཕང་མངོན་དུ་གྱུར་པར་བསྒོམ་ལ་རླུང་བུམ་པ་ཅན་བཟུང་སྐབས་སུ་མཚན་སྔགས་སམ། ཨོཾ་ཡ་མ་རཱ་ཛ་ཧཱུྃ་ཕཊ། ཨོཾ་ཧྲཱིཿཥྚིཿཝི་ཀྲྀ་ཏཱ་ནན་ཧཱུྃ་ཕཊ། ཅེས་སྙིང་པོའམ། སྔགས་རིང་ཡང་བགྲང་ངོ་གསུངས། མཐར་གསང་གནས་ཀྱི་ལས་ཀྱི་གཤིན་རྗེ་གཤེད་ལྟེ་བར་ཐིམ། དེ་སྙིང་གར་ཐིམ། དེ་མགྲིན་པར་ཐིམ། དེ་སྤྱི་བོར་ཐིམ། དེ་ནམ་མཁའ་ལ་འཇའ་ཡལ་བ་ལྟར། གསལ་སྟོང་མཐའ་དབུས་མེད་པ། སྐྱེ་འགག་གནས་གསུམ་དང་བྲལ་བ་ཉི་མ་ཕྱེད་ཀྱི་ནམ་མཁའ་གཡའ་དག་པ་ལྟར། །གསལ་སྟོང་སྤྲོས་པ་ཐམས་ཅད་དང་བྲལ་བའི་ངང་ལ་སེམས་མ་བཅོས་པར་མཉམ་པར་བཞག་པར་བྱའོ། །དེ་ནི་ཐུགས་འཇིགས་བྱེད་རིགས་ལྔ་བསྒོམ་པའི་ཁྲིད་ཀྱི་རིམ་པའོ། །གཉིས་པ་དོན་དམ་རྫོགས་པའི་རིམ་
XXX པ་ལ་བཞི་སྟེ། ཞི་གནས། ལྷག་མཐོང༌། ཟུང་འཇུག །འཕོ་བ། བར་དོའོ། །དང་པོ་ཞི་གནས་ལ་ཡང་དོན་གསུམ་སྟེ། མཚན་མ་ལ་བརྟེན་པའི་ཞི་གནས་དང༌། རྟོག་པ་ལ་སེམས་གཏད་པའི་ཞི་གནས་དང༌། རྟོག་མེད་དུ་འཇོག་པའི་ཞི་གནས་དང་གསུམ་མོ། །དང་པོ་ལ་གཉིས་ཏེ། ཕྱི་ལ་སེམས་བཟུང་བ་དང༌། ནང་ལ་སེམས་བཟུང་བའོ། །དང་པོ་ལ་གཉིས་ཏེ། མ་དག་པ་དང་དག་པའོ། །དང་པོ་ནི། ལུས་རྣམ་སྣང་གི་ཆོས་བདུན་དང་ལྡན་པར་བྱས་ལ། རང་གི་མདུན་དུ། ཀ་བ། བུམ་པ། མར་མེ། ཤིང་བུ། རྡེའུ་ལ་སོགས་པ་གང་མཐོང་བའི་མཚན་མ་ཞིག་ལ། ལུས་གནད་ལྟ་སྟངས་དང་བཅས་པས་སེམས་བཟུང༌། དེ་ལ་ཡེངས་སུ་ཡང་མི་འཇུག །རྟོག་པར་ཡང་མི་འགྱེད་པར། དེ་ཐོག་ཏུ་ལྷོད་དེ་གློད་ལ་མ་བཅོས་པར་རྟོག་མེད་དུ་བཞག །དེ་ལ་བྱིངས་རྒོད་བྱུང་ན་སྟེང་འོག་དང་གཡས་གཡོན་དུ་སེམས་འཛིན་པའང་ཤེས་པར་བྱའོ། །གཉིས་པ་དག་པ་རྒྱལ་བའི་སྐུ་ལ་སེམས་འཛིན་པ་ནི། རང་གི་མདུན་དུ་འཇམ་དབྱངས་ཀྱི་སྐུ་གཟུགས་བཞག་པའམ། མེད་ན་བསྒོམ་ལ། དེ་ལ་རྟོག་པ་ཡང་མི་སྤྲོ། ཡེངས་སུ་ཡང་མི་འཇུག །དེ་ཐོག་ཏུ་མ་ཡེངས་ཙམ་དུ་གློད་ནས་འཇོག་པ་ནི་དག་པ་རྒྱལ་བའི་སྐུ་ལ་སེམས་འཛིན་པའོ། །གཉིས་པ་ནང་ན་སེམས་འཛིན་པ་ལ་གཉིས། མ་དག་པ་དང་དག་པའོ། །དང་པོ་མ་དག་པ་ཐིག་ལེ་ལ་སེམས་བཟུང་བ་ནི། རང་གི་སྙིང་ཁར་ཐིག་ལེ་དུད་ཁ་འོད་ཟེར་འཕྲོ་བ་སྲན་འབྲུ་ཙམ་ཞིག་བསྒོམ་ལ། དེ་ལ་ཡེངས་སུ་ཡང་མི་འཇུག་རྟོག་པ་ཡང་མི་འགྱེད་པར་སེམས་བཟུང་ངོ༌། །གཉིས་པ་
XXX དག་པ་རྒྱལ་བའི་སྐུ་ལ་སེམས་བཟུང་བ་ནི། རང་གི་སྙིང་ཁར་པད་ཉིའི་སྟེང་དུ་འཇམ་དབྱངས་སྐུ་ཚོན་གང་བ་ལ་སེམས་བཟུང་ངོ༌། །དེ་ལ་ཡེངས་སུ་ཡང་མི་འཇུག་རྟོག་པ་ཡང་མི་འགྱེད་པར་མ་ཡེངས་ཙམ་དུ་སེམས་བཟུང་ངོ༌། །གཉིས་པ་རྟོག་པ་ལ་སེམས་འཛིན་པ་ནི། རྣམ་པར་རྟོག་པ་ཐོལ་གྱིས་སྐྱེས་པའི་དུས་ངོས་བཟུང་ནས། རྟོག་མེད་ཀྱི་མིག་གིས་ལྷང་ལྷང་བལྟས་ལས། འཛིན་མེད་དུ་ཞིག་ནས། རང་རིག་གསལ་སྟོང་ཡུལ་མེད་དུ་གསལ་གསལ་འཆར་བར་འགྱུར། རྣམ་རྟོག་གང་སྐྱེས་པའི་ངོ་བོ་ལ་གཏད་ནས། རང་ངོ་རང་གིས་ཤེས་པར་བྱས་ལ་བསྐྱང་ངོ༌། །དེ་ནི་རྟོག་པ་ལ་སེམས་བཟུང་བའོ། །གསུམ་པ། མི་རྟོག་པ་ལ་སེམས་བཟུང་བ་ནི། ལུས་རྣམ་སྣང་གི་ཆོས་བདུན་དང་ལྡན་པར་བྱས་ལ། མིག་ནམ་མཁར་གཏད་དེ། འདས་མ་འོངས་ད་ལྟར་གྱི་རྟོག་པའི་རྒྱུ་འགྲུལ་ཐམས་ཅད་རྦད་ཆོད་ལ་གཏོང་ལ། ཡིད་ལ་ཅི་ཡང་མི་བསམས་པར་སྟོང་གསལ་མཐའ་དབུས་མེད་པར། སེམས་ཉིད་མ་བཅོས་པ་རྟོག་མེད་དུ་གསལ་ལེ་ཧྲིག་གེ་པར་མཉམ་པར་བཞག་པར་བྱའོ། །དེས་བདེ་གསལ་མི་རྟོག་པའི་ཞི་གནས་ཀྱི་ཏིང་ངེ་འཛིན་སྐྱེ་བར་འགྱུར་རོ། །གཉིས་པ་ལྷག་མཐོང་ལ་དོན་གསུམ་སྟེ། དང་པོ་རྒྱུའི་ལྷག་མཐོང་སེམས་ལ་རྣམ་པར་བརྟག་ཅིང་དཔྱད་པ་ནི། བདག་གི་སེམས་འདི་གང་ནས་བྱུང་ཞིང་གང་དུ་གནས། གང་དུ་འགྲོ་བར་འགྱུར་ཞེས་སྐྱེ་འགག་གནས་གསུམ་གྱི་ངོ་བོ་ལ་བརྟག་ཅིང༌། འབྱུང་བ་ལྔ་རང་ལུས་ལ་སྐྱེས་སམ་འཆིའམ་སྙམ་དུ་བརྟག གཞན་ཡང་སེམས་ལ་ཁ་དོག་དཀར་དམར་སྔོ་སེར་ལྗང་ཁུ་ལ་སོགས་པའི་ཁ་དོག་ཡོད་པ་ཞིག་གམ། འོན་ཏེ་མེད་པ་ཞིག་སྙམ་དུ་བརྟག་
XXX ཅིང་དཔྱད། གང་དུ་བདག་གི་སེམས་ནི་ས་ཆུ་མེ་རླུང་ནམ་མཁའི་དབྱིབས་སམ། ཟླུམ་པོ། གྲུ་བཞི། ཟླ་གམ། གྲུ་གསུམ། ནར་མོ། འཇོང་མོ་ལ་སོགས་པའི་དབྱིབས་སུ་གྲུབ་པ་ཞིག་ཡིན་ནམ། གཅིག་ཡིན་ནམ། དུ་མ་ཡིན་སྙམ་དུ་བརྟག །སེམས་ལས་རྣམ་པར་རྟོག་པ་གཞན་ཅིག་ཡིན་ནམ། འོན་ཏེ་རྣམ་པར་རྟོག་པ་སེམས་ཡིན་ཞེས་བརྟག །གཞན་ཡང་ཕྱི་རོལ་གྱི་སྣང་བ་ལས་སེམས་བྱུང་ངམ། འོན་ཏེ་སེམས་ལས་ཕྱི་རོལ་གྱི་སྣང་བ་བྱུང་སྙོམ་དུ་བརྟག་ཅིང་དཔྱད། སླར་བརྟག་མཁན་གྱི་སེམས་ལ་ཡང་སེམས་ཀྱིས་བརྟག་ཅིང་དཔྱད། སེམས་དེ་ཉིད་ཡོད་པ་ཞིག་གམ། འོན་ཏེ་མེད་པ་ཞིག་གསལ་བ་ཞིག་གམ། འོན་ཏེ་མི་གསལ་བ་ཞིག །བདེ་བ་ཞིག་གམ་འོན་ཏེ་སྡུག་བསྔལ་བ་ཞིག །རྟག་པ་ཞིག་གམ་འོན་ཏེ་མི་རྟག་པ་ཞིག །སྣང་བ་ཞིག་གམ་འོན་ཏེ་མི་སྣང་བ་ཞིག །རིག་པ་ཞིག་གམ་འོན་ཏེ་མ་རིག་པ་ཞིག །བདག་ཡོད་པ་ཞིག་གམ་བདག་མེད་པ་ཞིག་ཅེས་བརྟག་ཅིག་དཔྱད་དུ་གཞུག་གོ །དེའི་ཚེ་སེམས་ཀྱི་ངོ་བོ་སྐྱེ་འགག་གནས་གསུམ་དང་བྲལ་བ། ངོ་བོ་སྟོང་པ་ཉིད་ནམ་མཁའ་ལྟ་བུ། རང་བཞིན་གྱིས་འོད་གསལ་བ། རིག་པ་འགག་མེད་ཅིར་ཡང་འཆར་ཞིང་སྣང་བ་འདི་ཐམས་ཅད་སྐྱེ་བ་མེད་པར་རོ་མཉམ། གནས་པ་མེད་པ་དང་འགག་པ་མེད་པར་རོ་མཉམ་ཞིང༌། བརྟག་ཅིང་དཔྱད་པས་གསལ་རིག་སྣང་སྟོང་གཉིས་དབྱེར་མེད་པ་བློ་འདས་ནམ་མཁའ་ལྟ་བུའི་དོན་མཐོང་ནས། དེ་ཁོ་ན་ཉིད་དོ་ཞེས་གཞི་ལམ་འབྲས་བུའི་ཡོན་ཏན་ཐམས་ཅད་སེམས་ཉིད་རྟོགས་པའི་སྟེང་ན་ཚང་བར་ངོ་སྤྲད། གཉིས་པ་ལམ་གྱི་ལྷག་མཐོང་ཐ་
XXX མལ་གྱི་ཤེས་པ་སོ་མ་ཅིག་ཅར་དུ་ངོ་སྤྲོད་ཅིང་ཉམས་སུ་བླངས་པར་བྱ་བ་ནི། སེམས་ཉིད་ཡོད་མེད་སྐྱེ་འགག་གནས་གསུམ་གྱི་འཛིན་པའི་མཐའ་དང་བྲལ་བ། བདག་དང་བདག་གིར་འཛིན་པའི་མཚན་མའི་གཟུང་འཛིན་ལས་འགྲོལ་ཞིང༌། མཐོང་བྱ་མཐོང་བྱེད་དང་བྲལ་བ། ངོ་བོ་སྟོང་པ་རང་བཞིན་གསལ་བ། རྣམ་པ་འགག་མེད་ཀྱི་རིག་པ་དུ་མར་གསལ་ཅིང་སྣང་བ། བཅོས་བསླད་མ་བྱས་པས་མ་བཅོས་པ། རང་བཞིན་གྱིས་འོད་གསལ་བས་སལ་ལེ་བ། རང་ངོ་རང་གིས་ཤེས་པས་ཧྲིག་གེ་བ། རྣམ་རྟོག་གཟུང་འཛིན་གྱིས་མ་གོས་པས་རྗེན་ནེ་བ། གང་ཡང་མི་བསྒོམ་པའི་ཡིད་བྱེད་དང་བྲལ་བ། སེམས་ཉིད་ལ་བཟོ་བཅོས་མ་བྱས་པས་ལྷུག་པ། གང་ཤར་ངོས་བཟུང་དང་བྲལ་བས་འཛིན་མེད། འཛིན་མེད་རང་བབ་ཏུ་རང་ལུགས་མ་བཅོས་པར་འཇོག་པ་ཐ་མལ་གྱི་ཤེས་པ། རྣམ་རྟོག་ལུ་གུ་རྒྱུད་ཉིད་དུ་མི་འཇུག་པས་སོ་མ་ཞེས་བྱ་སྟེ། ལྷག་མཐོང་གི་དངོས་གཞིར་ཉམས་སུ་བླང་བྱར་ངོ་སྤྲད་དོ། །གསུམ་པ། མཐར་ཐུག་གི་ལྷག་མཐོང་ཞི་ལྷག་ཟུང་འཇུག་ཏུ་ཉམས་སུ་བླངས་པར་བྱ་སྟེ། སེམས་སྐྱེ་འགག་གནས་གསུམ་དང་བྲལ་བ། གསལ་རིག་སྟོང་གསུམ་དབྱེར་མེད་པ་མ་བཅོས་པའི་ངང་ལ་འཇོག་པ་ནི་ཞི་གནས། དེའི་རང་བཞིན་མཐོང་ཞིང་ཤེས་པ་ནི་ལྷག་མཐོང་ཡིན། དེ་ཡང་སེམས་ཉིད་མཐའ་གཉིས་དང་བྲལ་བ་ནི། གནས་ལུགས་ཀྱི་ཞི་ལྷག་ཟུང་འཇུག་སྟེ། སེམས་ཉིད་སྐྱེ་བ་མེད་པས་རྟག་པའི་མཐའ་དང་བྲལ། འགག་པ་མེད་པས་ཆད་པའི་མཐའ་དང་བྲལ། ཁ་དོག་དང་དབྱིབས་སུ་གྲུབ་པ་མེད་པས་རྟག་པའི་མཐའ་དང་བྲལ། རྩལ་སྣང་སྣ་ཚོགས་སུ་ཤར་བས་ཆད་པའི་མཐའ་
XXX དང་བྲལ། རང་བཞིན་སྟོང་པ་ཉིད་དུ་གནས་པས་རྟག་པའི་མཐའ་དང་བྲལ། སྣ་ཚོགས་དུ་མར་རིག་ཅིང་གསལ་བས་ཆད་པའི་མཐའ་དང་བྲལ། དེས་ན་རྟག་ཆད་མཚན་འཛིན་ལས་འདས་པ། གསལ་རིག་སྟོང་གསུམ་དབྱེར་མེད་པ་ཟུང་འཇུག་ཏུ་ཉམས་སུ་ལེན་པའི་ཚུལ་ནི། སེམས་ཀྱི་ངོ་བོ་རང་གིས་རང་ལ་ཅེར་གྱིས་བལྟས་པའི་ཚེ། གཟུང་འཛིན་མཐའ་དག་དང་བྲལ་བ། བདེ་གསལ་མི་རྟོག་པའི་ངང་ལ་གནས་པ་ནི་ཞི་གནས་ཡིན་ལ། ངོ་བོ་རང་བཞིན་གྱིས་རྣམ་པར་དག་པ་མཐོང་བ་ནི་ལྷག་མཐོང་ངོ༌། །བླ་མའི་མོས་གུས་ལ་སེམས་གནས་པ་ནི་ཞི་གནས་ཡིན་ལ། དེའི་ངོ་བོ་སྟོང་ཉིད་བློ་འདས་སུ་མཐོང་བ་ནི་ལྷག་མཐོང་ངོ༌། །བསྐྱེད་རིམ་ཆུ་ཟླ་ལྟ་བུ་ལ་སེམས་གནས་པ་ཞི་གནས། ངོ་བོ་སྟོང་ཉིད་སྐྱེ་འགག་གནས་གསུམ་དང་བྲལ་བར་མཐོང་བ་ནི་ལྷག་མཐོང་ངོ༌། །སེམས་ཅན་ཐམས་ཅད་ལ་ཁྱབ་པའི་བྱམས་པ་དང་སྙིང་རྗེའི་དམིགས་པ་ལ་སེམས་གནས་པ་ཞི་གནས། རང་བཞིན་སྟོང་པ་ཉིད་དུ་མཐོང་བ་ནི་ལྷག་མཐོང་ངོ༌། །ཐབས་བསོད་ནམས་ཀྱི་ཚོགས་སྒྱུ་མ་ལྟ་བུ་ལ་སེམས་གནས་ཤིང་དེ་དག་རང་བཞིན་མེད་པ་སྟོང་པ་ཉིད་དུ་མཐོང་བ་ནི་ལྷག་མཐོང་ངོ༌། །གཞན་དུ་བདེ་བ་ཆེན་པོ་ལ་སེམས་གནས་ཤིང་དེ་ཉིད་ཞེན་མེད་སྟོང་པ་ཉིད་དུ་མཐོང་བ་ལྷག་མཐོང༌། སྣང་བ་ཐམས་ཅད་སེམས་སྣང་ཆུ་ཟླ་ལྟ་བུ་སྣང་སྟོང་དབྱེར་མེད་ལ་སེམས་གནས་ཤིང༌། དེ་དག་རྟེན་འབྲེལ་སྐྱེ་མེད་ཆུ་ཟླ་ལྟར་མཐོང་བ་ནི་ལྷག་མཐོང་ངོ༌། །བཅོས་བསླད་དང་བྲལ་པའི་རིག་པ་སོ་མ་ལ་སེམས་གནས་ཤིང༌། བདག་མེད་རིག་སྟོང་ཡུལ་མེད་དུ་མཐོང་བ་ནི་ལྷག་
XXX མཐོང་ངོ༌། །མདོར་ན་ཆུ་ཟླ་དང་མེ་ལོང་གི་གཟུགས་བརྙན་དང་བྲག་ཅ་ལྟར་སྣང་བ་ལས་གཞན་པའི་སྟོང་པ་མེད། སྟོང་པ་ལས་གཞན་པའི་སྣང་བ་མེད། དེས་ན་སྣང་སྟོང་སྐྱེ་མེད་ནམ་མཁའ་ལ་འཇའ་ཤར་བ་ལྟར་རྟོགས་ནས། དེའི་ངང་ལ་གནས་ཤིང༌། སེམས་ཉིད་རང་ངོ་མཐོང་བ་ནི་ལྷག་མཐོང་སྟེ། ཞི་ལྷག་ཟུང་འཇུག་གོ །དེ་ནི་སེམས་ཉིད་སྐུ་གསུམ་དབྱེར་མེད་ཀྱི་ངོ་བོར་ཡེ་ནས་བཞུགས་པའི་དོན་ནོ། །གཉིས་འཛིན་མཐའ་དག་སངས་ནས་རང་རིག་ཡེ་ཤེས་རྒྱས་པས། སངས་རྒྱས་ཞེས་ཏེ་དེ་ཉིད་འཇམ་དཔལ་གཞོན་ནུར་གྱུར་པ་ཡང་ཡིན་ཏེ། དུག་ལྔ་དག་པས་འཇམ་དཔལ་ཞེས་བྱའོ། །ཞི་ལྷག་ཟུག་འཇུག་གི་ཚོགས་གཉིས་ཀྱི་དཔལ་དང་ལྡན་པས་དཔལ་ཞེས་བྱ་ལ། གཞོན་ནུའི་གཟུགས་སྐུ་མཚན་དཔེས་བརྒྱན་པ་དང༌། ཆོས་སྐུ་ལ་སྐྱེ་འཆི་མེད་པའོ། །དེ་ཉིད་སེམས་ཉིད་སྐུ་གསུམ་གྱི་ངོ་བོར་ཡེ་ནས་བཞུགས་པའི་དོན་ཏེ། དེ་ལྟར་སྐུ་གསུམ་ཡེ་ཤེས་ལྔ་ལ་སོགས་པའི་ལམ་དང་འབྲས་བུས་བསྡུས་པའི་ཡོན་ཏན་ཐམས་ཅད་སེམས་ལ་རྫོགས་པར་ངོ་སྤྲད་པར་བྱའོ། །གསུམ་པ་འཆི་ཁ་འཕོ་བའི་གདམས་ངག་ལ་གཉིས་ཏེ། དང་པོ་སྦྱོང་བ། གཉིས་པ་ལས་ལ་སྦྱར་བའོ། །དང་པོ་ནི་རང་ཉིད་འཇམ་དབྱངས་སུ་བསྐྱེད་པའི་གནས་ལྔར། འཇམ་དབྱངས་རིགས་ལྔ་བསྐྱེད་པའི་འོད་ཟེར་སྤྲོ་བསྡུ་བྱ། དེ་ནས་གསང་གནས་ཀྱི་འཇམ་དབྱངས་ཐིག་ལེ་ལྔར་ཁུར་ཞུ་ནས་ལྟེ་བའི་འཇམ་དབྱངས་ལ་ཐིམ། དེ་ཐིག་ལེ་སེར་པོར་གྱུར་ནས་སྙིང་ཁའི་འཇམ་དབྱངས་ལ་ཐིམ། དེ་སྔོན་པོར་གྱུར་ནས་མགྲིན་པའི་འཇམ་དབྱངས་ལ་ཐིམ། དེ་དམར་པོར་གྱུར་ནས་སྤྱི་
XXX བོའི་འཇམ་དབྱངས་ལ་ཐིམ། དེ་དཀར་པོར་གྱུར་ནས་ཚངས་བུག་རྒྱ་མཐོང་ཁ་བྱེ་བ་ལྟ་བུའི་ནང་ནས་དོན་ནས། སྟེང་གི་ནམ་མཁར་རིན་པོ་ཆེའི་ཁྲི་པད་ཟླ་བརྩེགས་པའི་སྟེང་དུ་འཇམ་དབྱངས་གནས་པའི་ཐུགས་ཁར་འཁོར་ནས། སླར་སྤྱི་བོ་ནས་མར་ཞུགས་ནས་རང་རང་གི་གནས་སུ་འཇམ་དབྱངས་རིགས་ལྔར་གྱུར་པར་བསྒོམ་ནས་རླུང་འཛིན་ཅིང་སྦྱང་ངོ༌། །གཉིས་པ་ལས་ལ་སྦྱར་བ་ནི་འཆི་རྟགས་ཚང་བའི་ཚེ་འཇིག་རྟེན་གྱི་ཞེན་ཆགས་ཐམས་ཅད་སྤང་ལ། འཇམ་དབྱངས་རིགས་ལྔ་ཐིག་ལེ་ལྗང་སེར་སྔོན་པོ་དཀར་པོ་ལྔར་གྱུར་པ་གསང་གནས་ནས་ཡར་རིམ་པ་ལྟར། ལྟེ་བ་སྙིང་ཁ་མགྲིན་པ་སྤྱི་བོའི་ཐིག་ལེ་ལ་ཐིམ། དེ་ཚངས་བུག་ནས་ཐོན་ནས་ནམ་མཁར་ཡལ་ཏེ། ནམ་མཁའི་ཐམས་ཅད་འཇའ་ཚོན་གྱིས་ཁྲིགས་ཀྱིས་ཁེངས་པར་བསམ་ལ། མི་དམིགས་པའི་ངང་ལ་བཞག་གོ །དེ་ནི་འཕོ་བ་འཇའ་ཚོན་མ་ཞེས་བྱའོ། །བཞི་པ་བར་དོའི་ཁྲིད་ལ་དོན་གསུམ་སྟེ། དང་པོ་སྦྱང་བ་ནི། བསྐྱེད་རྫོགས་གཉིས་ཀྱི་སྒོ་ནས་སྦྱང་བའོ། །དེ་ཡང་འདུན་པ་ནི། བདག་ཤི་བ་ཡིན། འདི་བར་དོ་ཡིན། བར་དོའི་ལུས་ལ་བདེན་པ་མེད་སྙམ་དུ་ངེས་པར་བྱས་ལ། ཕྱི་སྣོད་ཐམས་ཅད་འཇམ་དབྱངས་ཀྱི་ཞིང་གི་བཀོད་པར་བསྒོམ། རང་དང་སེམས་ཅན་ཐམས་ཅད་འཇམ་དབྱངས་སུ་བསྒོམ། གནས་ལྔར་རིགས་ལྔ་བསྐྱེད་ལ་འོད་ཟེར་སྤྲོ་བསྡུའི་ཁྲིད་ལྟར་བསྒོམ། མཐར་དེ་དག་སྒྱུ་མ་དང་རྨི་ལམ་ཆུ་ཟླ་ལྟར་གསལ་སྟོང་སྐྱེ་མེད་བློ་འདས་ཡིད་ལ་མི་བྱེད་པའི་ངང་ལ་མཉམ་པར་
XXX བཞག་པ་ནི་རྫོགས་རིམ་གྱི་སྒོ་ནས་སྦྱང་བའོ། །གཉིས་པ་ནི། འཆི་བའི་ཚེ་ས་ཆུ་ལ་ཐིམ་པའི་རྟགས་སུ་ལུས་ལྕི། ཆུ་མེ་ལ་ཐིམ་པའི་རྟགས་སུ་ཁ་སྣ་སྐམ། མེ་རླུང་ལ་ཐིམ་པའི་རྟགས་སུ་དྲོད་མཐའ་ནས་སྡུད། རླུང་ནམ་མཁར་ཐིམ་པའི་རྟགས་སུ་ཕྱི་དབུགས་ཆད། ནམ་མཁར་རྣམ་པར་ཤེས་པ་ལ་ཐིམ་པའི་རྟགས་སུ་དར་གཅིག་བརྒྱལ། དེ་དག་གི་སྐབས་སུ་རིམ་པ་ལྟར་ནང་རྟགས་འཆར་བ་ནི། དུ་བ། སྨིག་རྒྱུ། མེ་ཁྱེར། མར་མེ། སྤྲིན་མེད་ནམ་མཁའ་ལ་སོགས་འཆར་བར་འགྱུར་རོ། །དེ་ནས་ཕ་ལས་ཐོབ་པའི་བྱང་སེམས་ཐུར་དུ་ལྷུང་བས་དཀར་ལམ་འབྱུང༌། མ་ལས་ཐོབ་པའི་རཀྟ་གྱེན་དུ་འདྲིལ་བས་དམར་ལམ་འབྱུང༌། སྙིང་ཁར་དབུ་མའི་ནང་དུ་བྱང་སེམས་དཀར་དམར་ནོར་རྒྱལ་གྱི་རླུང་དང་བཅས་པ་དབུ་མར་ཞག་གཅིག་བར་དུ་བདེ་གསལ་མི་རྟོག་པའི་ངང་དུ་གནས་པར་འགྱུར་ཏེ། དེ་ཉིད་རང་ངོ་ཤེས་ན་སྐད་ཅིག་གཅིག་གིས་རྫོགས་སངས་རྒྱས་པར་འགྱུར་རོ། །གསུམ་པ་སྲིད་པ་བར་དོ་ལ་འཕོས་ན། སྣང་བ་ཐམས་ཅད་འཇམ་དབྱངས་ཀྱི་ཞིང་གི་བཀོད་པར་བསྒོམ། བདག་དང་སེམས་ཐམས་ཅད་འཇམ་དབྱངས་སུ་བསྒོམ། བདག་གི་གནས་ལྔར་རིགས་ལྔ་བཀོད་ལ་འོད་ཟེར་སྤྲོ་བསྡུ་བྱ། སྒྲ་ཐམས་ཅད་སྔགས་སྒྲར་བསྒོམ། དྲན་རྟོག་ཐམས་ཅད་ཆོས་སྐུ་སྐྱེ་མེད་དུ་རང་ངོ་ཤེས་པར་བྱ། །འོག་མིན་ནམ། བདེ་བ་ཅན་དུ་རྫུ་འཕྲུལ་གྱིས་འགྲོ་བའི་འདུན་པ་ཡང་ཡང་གཏད། དེར་བར་དོར་འཇམ་དབྱངས་ལོངས་རྫོགས་པའི་སྐུ་འགྲུབ་ནས། ལོངས་སྤྱོད་རྫོགས་པའི་ཞིང་ཁམས་འཛིན་
XXX པར་འགྱུར་རོ། །དགེ་བའི་ནོར་འཛིན་རབ་ཏུ་རྒྱས་པའི་མཐུས། ཨུཏྤལ་རྣམ་རོལ་ས་བཅུ་རབ་རྫོགས་ནས། །མཚུངས་མེད་བཅོམ་ལྡན་འཇམ་དཔལ་དབྱངས་ལྟ་བུར། །བདག་ཀྱང་འགྲོ་བའི་མགོན་དུ་འགྱུར་བར་ཤོག །བཅོམ་ལྡན་འདས་འཇམ་དཔལ་དབྱངས་སྐུའི་ཁྲིད་ཀྱི་རིམ་པ། ཤེས་རབ་འཕེལ་བར་བྱེད་པ། ཡེ་ཤེས་སྣང་བ་རྒྱན་གྱི་འཁོར་ལོ་ཞེས་བྱ་བ། མན་ངག་སྙན་བརྒྱུད་དུ་གནས་པ་ལ་ཤིན་ཏུ་བརྗེད་པར་ཕོངས་པའི་ཕྱིར་རྣལ་འབྱོར་པ་འོད་དཔག་རྡོ་རྗེ་ཡི་གེར་བཀོད་པ་རྫོགས་སོ།། །།དགེའོ། །


XXX 'jam dpal dbyangs sku'i khrid shes rab 'phel byed ye shes rgyan gyi 'khor lo bzhugs so/ /
XXX bla ma dang mgon po 'jam dpal dbyangs la gus pas phyag 'tshal lo/ /'dir bcom ldan 'das 'jam dpal dbyangs kyi khrid kyi rim pa 'di la don gsum ste/_sngon 'gro dang dngos gzhi rjes so/ /dang po la gsum ste/_bla ma brgyud pa'i lo rgyus dang*/_thum mong gi sngon 'gro dang*/_khyad par gyi sngon 'gro bzhi dang gsum las/_dang po rje btsun 'jam pa'i dbyangs kyi khrid byung tshul yang*/_so sa gling gi dur khrod du/_dpal grub thob chen po mi tra dz+wa kis yi dam gyi lha lnga bsgrubs pas/_lha de dag so so'i zhal bstan nas/_rang rang gi khrid kyi rim pa bstan pa ni/_'jam dpal dbyangs sku'i khrid shes rab 'phel bar byed pa ye shes rgyan gyi 'khor lo/ /spyan ras gzigs gsung gi khrid byang chub lam gyi rim pa yongs su sdud pa bdud rtsi'i dga' ston dang*/_phyag na rdo rje thugs kyi khrid bdud dpung 'joms byed 'od zer
XXX rgyas pa/_tshe dpag med yon tan gyi khrid 'chi med rdo rje'i sku sgrub pa/_sgrol ma 'jigs pa brgyad skyob kyi khrid 'khor ba'i 'phrang sgrol phrin las lhun grub/_dzam b+ha la ser po'i khrid dngos grub char 'bebs zhes bya ba ste/_khrid drug po de dag lha so so'i zhal nas rang rang gi sgo khrid drug po 'di dag gsungs te/_khrid 'di dag nyams su long la gzhan la'ang gcig brgyud du ston cig dang*/_mi rabs bdun gyi bar du byin rlabs chen po 'byung ste/_khrid 'di dag bsgom pa'i rnal 'byor pa de dag_/bdag cag rnams kyis byin gyis brlabs pa'i gang zag sha stag yin no zhes lung bstan pa'o/ /grub chen gyis paN+Di ta shrI pu tra la/_des rje btsun g+hirti rat+na la/_des bdag la gnang ba'o/ /dang po ni/_dal 'byor rnyed dka'/_'chi ba mi rtag pa/_las rgyu 'bras/_'khor ba'i nyes dmigs bsgom pa/_thun mong gi khrid rnams
XXX spyi dang mthun/_gnyis pa khyad par gyi sngon 'gro la/_ci byas byang chub kyi lam du 'gro bar byed pa skyabs 'gro sems bskyed kyi khrid/_sdig sgrib dag par byed pa rdo rje sems dpa'i bsgom bzlas kyi khrid/_tshogs gnyis rdzogs par byed pa maN+Dal gyi khrid/_byin rlabs 'jug par byed pa bla ma'i rnal 'byor gyi khrid ni/_bla ma 'jam dpal dbyangs kyi ngo bo bsgom la gsol ba gdab bo/ /gnyis pa dngos gzhi la gnyis te/_bskyed rim gyi khrid/_rdzogs rim gyi khrid do/ /dang po la bzhi ste/_mngon rtogs bsgom pa'i khrid dang*/_snang ba sku'i khrid/_'jam dpal dbyangs rigs lnga'i 'od zer spro bsdus sprul pa'i sku ngo sprod pa'i khrid/_grags pa gsung gi khrid/_rje btsun ngag gi dbang phyug tu bsgom zhing mtshan yig 'bru spro bsdu la brten nas longs skur ngo sprod pa'i khrid/_dran rtog thugs kyi khrid/_rang nyid 'jigs byed du bsgom zhing*/_'jigs byed gnas lngar bkod nas dug lnga rang sar dag nas ye shes lnga rgyas byed chos skur ngo sprod pa'i khrid dang bzhi'o/ /dang po ni/_dben pa'i gnas su tshangs pa'i rgyu bzhi sngon du 'gro bas/_swa b+ha was stong pa nyid du bsgom/_stong pa'i ngang las/_phyi snod thams cad 'jam dpal dbyangs kyi zhing gi bkod pa/_rin po che sna lnga las grub pa'i sa gzhi/_mnan na nem byed pa/_bteg na 'phar bar byed pa/_rin po che du ma las grub pa'i ljon shing dril bu g.yer khas sbrel ba/_bya sna tshogs dang bcas pa/_thams cad kyang dam pa'i chos kyi sgra sgrogs pa/_bdud rtsi dang spos chu yan
XXX lag brgyad ldan rnams kyang shes rab kyi pha rol tu phyin pa'i sgra sgrogs pa la sogs/_mdor na sangs rgyas kyi zhing khams rnam par dag pa'i dbus su/_rin po che du ma las grub pa'i khri'i steng du sna tshogs pad+ma 'bum ldan gyi dbus su/_a las zla ba'i dkyil 'khor gyi steng du d+hIHyig gser zhun ma'i mdog can/_de las 'od zer sna lnga phyogs bcur 'phros/_'phags pa mchod/_sems can rnams kyi sgrib pa sbyangs/_tshur 'dus d+hIHla thim/_de yongs su gyur pa las/_rang nyid rje btsun 'jam dpal dbyangs sku mdog dmar ser gur gum gzhon nu'i mdog can/_zhal gcig phyag gnyis zhabs rdo rje'i dkyil krung du bzhugs pa/_dar sna lngas smad g.yogs can/_phyag g.yas shes rab kyi ral gri klad la bskor ba la shes rab kyi me 'bar zhing tsha tsha 'phro bas brgyan pa/_g.yon ut+pal snyan gyi thad kar rgyas pa'i steng du shes rab kyi po tis brgyan pa'i yu ba mtheb srin gyis thugs kar 'dzin pa/_zhal 'dzum pa/_smin dkyus spyan dkyus shangs dkyus ring ba/_dpral ba yangs pa mdzod spu dkar pos brgyan pa/_dbu skra ral pa'i cod pan spyi bor bcings shing*/_lhag ma'i zar bu rked sor slebs pa/_gzhon nu lang tsho dang ldan pa/_mtshan bzang po sum cu rtsa gnyis dang ldan cing*/_dpe byad bzang po brgyad cus kun nas mdzes pa/_'od zer sna lnga 'khrigs pa'i dbus na bzhugs pa'i spyi bor oM dkar po/_mgrin par AHdmar po/_snying kar hU~M mthing ka las 'od zer 'phros pas/_rang lta bu'i ye shes pa
XXX spyan drangs la dbyer med du bstim/_slar 'od zer 'phros rigs lnga yab yum 'khor bcas spyan drangs nas/_dbang bskur/_sdig sgrib dag_/bdud rtsi'i lhag ma yar lud pa las spyi bor rnam snang la sogs rigs lngas dbu brgyan/_snying gar pad+ma dmar po dang zla ba'i steng du/_yi ge d+hIHla/_oM a ra pa tsa na d+hIHna maH_ces pas bskor ba las 'od zer 'phros/_phyi snod la phog pas sangs rgyas kyi zhing khams su sbyangs/_nang bcud kyi sems can la phog_/thams cad 'jam dpal dbyangs su gyur/_de dag thams cad kyi zhal nas sngags 'dren par bsgoms la bsnyen pa bskyal lo/ /mthar de dag thams cad 'od du zhu nas rang la thim/_rang snying kha'i d+hIHla thim/_d+hIHnam mkha' la 'ja' yal ba ltar gyur par bsam la dmigs med kyi ngang la bzhag go_/gnyis pa ni/_rang nyid mngon byang lngas gong ltar du 'jam dpal du bskyed pa'i spyi bo/ /mgrin pa/_snying kha/_lte ba/_gsang gnas lngar/_pad zla'i steng du d+hIHyig dkar dmar mthing ser ljang khu las byung ba'i 'jam dbyangs dkar dmar sngo ser ljang gu/_zhal gcig phyag gnyis zhabs gnyis rdo rje skyil krung dang*/_phyag g.yas ral gri klad la bskor ba/_g.yon ut+pa la'i yu ba thugs kar 'dzin pa/_zhal 'dzum pa/_smin dkyus dang spyan dkyus shangs dkyus ring zhing*/_dpral ba yangs pa/_mdzod spu dkar pos brgyan pa/_dbu skra ral pa'i cod pan la rin po che 'bum gyis brgyan pa/_'od gsal ba'i rang bzhin can/_gsal zhing stong la me long nang gi
XXX gzugs brnyan lta bur bsgom par bya'o/ /de dag gi spyi mgrin snying khar yig 'bru gsum bkod la/_de las 'od zer 'phros/_rang lta bu'i ye shes pa gzhug cing dbang bskur ba gong ltar ro/ /de dag gi thugs kar yang pad zla'i steng du d+hIHyig dkar dmar sngo ser ljang khu las 'od zer phyogs bcur 'phros/_phyogs bcu'i rgyal ba sras kyis sku gsung thugs yon tan phrin las kyi mthu stobs rgyas par byas/_mchod pa'i sprin phung rnams kyis mchod/_phyogs bcu'i rgyal ba sras bcas thams cad kyi sku gsung thugs yon tan phrin las thams cad kyi byin rlabs dang*/_ye shes dang mkhyen rab kyi nus pa thams cad 'od zer dkar dmar mthing ser ljang gu'i dbyibs can du spyan drangs nas/_rang gi spyi mgrin snying kha lte ba gsang gnas kyi 'jam dbyangs rigs lnga la thim pas/_sku gsung thugs yon tan phrin las dang*/_chos dbyings ye shes/_sor rtogs/_me long*/_mnyam nyid/_bya grub ye shes rnams kyi yon tan mngon du byas par bsgom/_slar yang gnas lnga'i 'jam dbyangs lnga las/_sngar ltar 'od zer lnga 'phros/_phyogs bcu'i rigs drug gi sems can thams cad kyi lus ngag yid gsum la phog pa/_gti mug_/'dod chags/_zhe sdang*/_nga rgyal/_phrag dog ste dug lnga sbyangs/_rnam snang*/_'od dpag med/_mi bskyod pa/_rin 'byung*/_don grub/_'jam dbyangs kyi sa la bkod/_chos dbyings/_sor rtogs/_me long*/_mnyam nyid/_bya grub ste ye shes lnga mngon du
XXX byas nas/_de dag gi sku gsung thugs yon tan phrin las kyi nus pa thams cad ye shes dang shes rab kyi ngo bo thams cad 'od zer dkar dmar mthing ser lja khu'i dbyibs can du bsdus nas/_rang gi gnas lngar thim par bsam/_de dag gi gnas skabs su 'od zer phar gtong ba'i tshe/_rlung yang phyir gtong ngo*/ /yon tan tshur bsdu ba'i tshe/_rlung yang nang du bum pa can yun ring du bzung nas mnan pa ni man ngag go_/gsum pa ni/_stong pa'i ngang las rab rgyas pad zla'i steng du/_sa las seng ge sngon po gdong thur la phyogs pa'i steng du/_zla ba'i dkyil 'khor gyi dbus su d+hIHyig dmar ser las 'od 'phros/_'phags pa mchod/_sems can gyi don byas/_tshur 'dus yongs su gyur pa las/_rang nyid rje btsun ngag gi dbang phyug sku mdog pad+ma rA ga ltar dmar ba'i mdangs dang ldan pa/_zhabs gnyis rgyal po rol pa'i stabs kyis bzhugs pa/_dar sna lnga'i sham thabs can/_phyag gnyis chos ston pa'i phyag rgya mdzad cing*/_g.yas pa'i mtheb mdzub gnyis kyis pad+ma ral gris mtshan pa'i yu ba 'dzin pa/_g.yon pa'i mtheb mdzub gnyis kyis ut+pa la'i steng na rin po che'i glegs bam 'dzin pa/_zhal 'dzum pa/_spyan dkyus dang smin dkyus ring zhing*/_mdzod spu dkar pos mdzes pa/_dbu skra ral pa'i thor cog phyed bcings shing*/_phyed grol bas rked sor slebs pa'i zar bu gyen du 'dril ba/_me tog gi phreng bas skra bcings dang*/_rin po che du ma dang*/_mu tig sna lnga'i chun pos rab tu brgyan cing*/_dar gyi cod pan gyis mdzes par brgyan pa'i
XXX bdag nyid can du gsal bar bsgom/_de'i spyi mgrin snying khar oM AHhU~M las 'od 'phros pas/_rang lta bu'i ye shes pa spyan drangs la bstim/_slar rigs lnga spyan drangs la dbang bskur/_rnam snang gis dbur brgyan par bsam/_bcom ldan 'das de'i spyi bor/_mgrin pa/_lte ba/_gsang gnas lngar/_'ja' tshon gyis 'od bskor ba'i dbus su/_pad zla'i gdan steng du rin po che'i po ti shes rab kyi ral gri me 'bar bas mtshan pa/_yu ba d+hIHdang bcas pa/_po ti'i steng na ral gri gyen la lang ba'o/ /spyi bor shes rab kyi ral gri dkar po/_de bzhin du mgrin par dmar po/_snying khar sngon po/_lte bar ser po/_gsang gnas su ljang khu lnga la yi ge d+hIHdkar dmar sngo ser ljang khus mtshan pa las 'od 'phros/_phyogs bcu'i sangs rgyas thams cad mchod pa'i sprin gyis mchod/_de dag gi sku gsung thugs yon tan phrin las kyi ye shes kyi snang ba rgyas par byas/_sems can thams cad la phog_/mi shes pa'i mun pa mtha' dag dang dug lnga sbyangs/_'jam dbyangs rigs lnga'i go 'phang la bkod/_ye shes lnga'i snang ba rgyas par bsam pa ni/_rlung phyir 'gro ba'i tshe dmigs pa bzung ba'o/ /rlung tshur rngub pa'i tshe/_sangs rgyas byang sems thams cad rigs lnga 'jam dbyangs su gnas pa'i sku gsung thugs yon tan phrin las kyi byin rlabs/_ye shes dang yon tan/_mkhyen brtse nus pa/_'chad rtsod rtsom gsum mi brjed pa'i gzungs kyi sgo dang bcas pa'i shes rab dang nus pa thams cad 'od zer dkar
XXX dmar mthing ser ljang khu'i dbyibs can du bsdus nas/_rang gi gnas lnga'i 'jam dbyangs gyi ngo bo phyag mtshan la thim par bsam la rlung 'dzin/_des rang bzhin ye shes lnga dang ldan cing*/_'chad rtsod rtsom 'dzin mi brjed pa'i gzungs dang bcas pa'i shes rab kyi sgo dang nus pa rnams thim par bsgom la rlung bzung*/_des rang nyid ye shes lnga dang ldan cing*/_'chad rtsod rtsom 'dzin mi brjed pa'i gzungs dang bcas pa'i shes rab kyi snang ba rgyas shing*/_'jam dbyangs kyi go 'phang mngon du byas par bsgom mo/ /mthar ni snod bcud rang la bsdu/_thig le dang phyag mtshan la yang mas rim gyis spyi bor thim/_rang lus kyang spyi bo'i phyag mtshan la thim/_de 'ja' 'od du yal nas/_nam mkha' gang bar bsam la dmigs med kyi ngang la bzhag go_/de ni gsung longs skur mngon du byed pa'i khrid do/ /gsum pa ni/_mngon byang lngas/_rang nyid 'jam dbyangs gsal bar bsgom/_de yongs su gyur pa las/_pad nyi ro'i steng du/_rang nyid rdo rje 'jigs byed sku mdog mthing nag zhal gcig phyag gnyis/_zhabs g.yas brkyang g.yon bskum pa/_mi mgo dang rus pas brgyan pa/_ling ga gyen la 'greng ba/_gsus khyim che ba/_phyag gnyis thugs khar gri gug thod khrag bsnol thabs su 'dzin pa/_zhal ma he rab tu khros pa'i gdong pa can/_ljags 'dril zhing mche ba gtsigs pa/_spyan gsum dmar zhing g.yo ba/_rwa rnon po sngo zangs zangs pa la rus pa'i rgyan drug khrol ba/_dbu skra khams ser gyen du 'khyil pa'i dbus su/_'jam dbyangs zhal gser
XXX gyi mdog can zhi ba'i tshul can/_sku stod la glang chen gyi stod g.yogs can sbrul nag rab tu 'jigs pas se ral khar brgyan cing*/_mi mgo lnga bcus do shal/_thod skam lnga dang rin po ches dbu la brgyan pa/_gzhan yang rin po che dang rus pa'i rgyan drug gis brgyan pa/_ha ha dang hU~M hU~M gi gad rgyangs 'brug ltar sgrogs shing*/_srid pa gsum po skad cig gis 'jigs par byed pa'i bdag nyid du bsgom par bya'o/ /de'i spyi mgrin snying kha lte ba gsang gnas lngar pad nyi'i steng du/_oM AHhU~M trAM hrIHlnga zhu ba las byung ba'i bcom ldan 'das gti mug gshin rje gshed dkar po spyi bor/_'dod chags gshin rje gshed dmar po mgrin par/_zhe sdang gshin rje gshed nag po snying kha/_ser sna gshin rje gshed ser po lte ba/_phrag dog gshin rje gshed ljang khu gsang gnas rnams su bskyed de/_de dag gtso bo'i cha lugs ji lta ba bzhin la/_phyag g.yas pa rnams kyis 'khor los mtshan pa'i gri gug dang*/_de bzhin du pad+ma/_rdo rje dang*/_nor bu/_rgya gram gyis mtshan pa'i gri gug 'dzin par bsgom pa'i snying khar pad nyi'i steng du/_'khor lo/_pad+ma/_rdo rje/_nor bu/_ral gri lnga/_oM AHhU~M trAM hrIHlngas mtshan pa las/_'od zer dkar dmar ser ljang khu lnga 'phros/_phyogs bcu'i sangs rgyas sras bcas mchod/_sku gsung thugs yon tan phrin las kyi mthu stobs rgyas par byas/_slar phyogs bcu'i rigs drug rnams la phog_/rigs drug gi gti mug_/'dod chags/_zhe sdang*/_nga rgyal/_phrag dog lnga sbyangs/_gti mug
XXX gshin rje gshed dang*/_'dod chags gshin rje gshed dang*/_zhe sdang gshin rje gshed dang/_nga rgyal gshin rje gshed dang*/_phrag dog gshin rje gshed kyi go 'phang la bkod/_chos dbyings ye shes/_sor rtogs/_me long*/_mnyam nyid/_bya grub ye shes mngon du byas par bsgom la rlung phyir gtong*/_tshur bsdus pa'i tshe/_de dag gi sku gsung thugs yon tan phrin las kyi byin rlabs thams cad sku lnga ye shes mkhyen brtse mthu stobs thams cad/_'od zer dkar dmar mthing ser ljang khu'i dbyibs can du bsdus nas/_spyi mgrin snying kha lte ba gsang gnas lngar thim par bsam la/_rang la sku gsung thugs yon tan phrin las sku lnga ye shes mkhyen brtse nus pa mthu stobs thams cad kyi byin rlabs zhugs pas/_rang nyid gshin rje gshed rigs lnga'i go 'phang mngon du gyur par bsgom la rlung bum pa can bzung skabs su mtshan sngags sam/_oM ya ma rA dza hU~M phaT/_oM hrIHSh+TiHwi kr-i tA nan hU~M phaT/_ces snying po'am/_sngags ring yang bgrang ngo gsungs/_mthar gsang gnas kyi las kyi gshin rje gshed lte bar thim/_de snying gar thim/_de mgrin par thim/_de spyi bor thim/_de nam mkha' la 'ja' yal ba ltar/_gsal stong mtha' dbus med pa/_skye 'gag gnas gsum dang bral ba nyi ma phyed kyi nam mkha' g.ya' dag pa ltar/ /gsal stong spros pa thams cad dang bral ba'i ngang la sems ma bcos par mnyam par bzhag par bya'o/ /de ni thugs 'jigs byed rigs lnga bsgom pa'i khrid kyi rim pa'o/ /gnyis pa don dam rdzogs pa'i rim
XXX pa la bzhi ste/_zhi gnas/_lhag mthong*/_zung 'jug_/'pho ba/_bar do'o/ /dang po zhi gnas la yang don gsum ste/_mtshan ma la brten pa'i zhi gnas dang*/_rtog pa la sems gtad pa'i zhi gnas dang*/_rtog med du 'jog pa'i zhi gnas dang gsum mo/ /dang po la gnyis te/_phyi la sems bzung ba dang*/_nang la sems bzung ba'o/ /dang po la gnyis te/_ma dag pa dang dag pa'o/ /dang po ni/_lus rnam snang gi chos bdun dang ldan par byas la/_rang gi mdun du/_ka ba/_bum pa/_mar me/_shing bu/_rde'u la sogs pa gang mthong ba'i mtshan ma zhig la/_lus gnad lta stangs dang bcas pas sems bzung*/_de la yengs su yang mi 'jug_/rtog par yang mi 'gyed par/_de thog tu lhod de glod la ma bcos par rtog med du bzhag_/de la byings rgod byung na steng 'og dang g.yas g.yon du sems 'dzin pa'ang shes par bya'o/ /gnyis pa dag pa rgyal ba'i sku la sems 'dzin pa ni/_rang gi mdun du 'jam dbyangs kyi sku gzugs bzhag pa'am/_med na bsgom la/_de la rtog pa yang mi spro/_yengs su yang mi 'jug_/de thog tu ma yengs tsam du glod nas 'jog pa ni dag pa rgyal ba'i sku la sems 'dzin pa'o/ /gnyis pa nang na sems 'dzin pa la gnyis/_ma dag pa dang dag pa'o/ /dang po ma dag pa thig le la sems bzung ba ni/_rang gi snying khar thig le dud kha 'od zer 'phro ba sran 'bru tsam zhig bsgom la/_de la yengs su yang mi 'jug rtog pa yang mi 'gyed par sems bzung ngo*/ /gnyis pa
XXX dag pa rgyal ba'i sku la sems bzung ba ni/_rang gi snying khar pad nyi'i steng du 'jam dbyangs sku tshon gang ba la sems bzung ngo*/ /de la yengs su yang mi 'jug rtog pa yang mi 'gyed par ma yengs tsam du sems bzung ngo*/ /gnyis pa rtog pa la sems 'dzin pa ni/_rnam par rtog pa thol gyis skyes pa'i dus ngos bzung nas/_rtog med kyi mig gis lhang lhang bltas las/_'dzin med du zhig nas/_rang rig gsal stong yul med du gsal gsal 'char bar 'gyur/_rnam rtog gang skyes pa'i ngo bo la gtad nas/_rang ngo rang gis shes par byas la bskyang ngo*/ /de ni rtog pa la sems bzung ba'o/ /gsum pa/_mi rtog pa la sems bzung ba ni/_lus rnam snang gi chos bdun dang ldan par byas la/_mig nam mkhar gtad de/_'das ma 'ongs da ltar gyi rtog pa'i rgyu 'grul thams cad rbad chod la gtong la/_yid la ci yang mi bsams par stong gsal mtha' dbus med par/_sems nyid ma bcos pa rtog med du gsal le hrig ge par mnyam par bzhag par bya'o/ /des bde gsal mi rtog pa'i zhi gnas kyi ting nge 'dzin skye bar 'gyur ro/ /gnyis pa lhag mthong la don gsum ste/_dang po rgyu'i lhag mthong sems la rnam par brtag cing dpyad pa ni/_bdag gi sems 'di gang nas byung zhing gang du gnas/_gang du 'gro bar 'gyur zhes skye 'gag gnas gsum gyi ngo bo la brtag cing*/_'byung ba lnga rang lus la skyes sam 'chi'am snyam du brtag_gzhan yang sems la kha dog dkar dmar sngo ser ljang khu la sogs pa'i kha dog yod pa zhig gam/_'on te med pa zhig snyam du brtag
XXX cing dpyad/_gang du bdag gi sems ni sa chu me rlung nam mkha'i dbyibs sam/_zlum po/_gru bzhi/_zla gam/_gru gsum/_nar mo/_'jong mo la sogs pa'i dbyibs su grub pa zhig yin nam/_gcig yin nam/_du ma yin snyam du brtag_/sems las rnam par rtog pa gzhan cig yin nam/_'on te rnam par rtog pa sems yin zhes brtag_/gzhan yang phyi rol gyi snang ba las sems byung ngam/_'on te sems las phyi rol gyi snang ba byung snyom du brtag cing dpyad/_slar brtag mkhan gyi sems la yang sems kyis brtag cing dpyad/_sems de nyid yod pa zhig gam/_'on te med pa zhig gsal ba zhig gam/_'on te mi gsal ba zhig_/bde ba zhig gam 'on te sdug bsngal ba zhig_/rtag pa zhig gam 'on te mi rtag pa zhig_/snang ba zhig gam 'on te mi snang ba zhig_/rig pa zhig gam 'on te ma rig pa zhig_/bdag yod pa zhig gam bdag med pa zhig ces brtag cig dpyad du gzhug go_/de'i tshe sems kyi ngo bo skye 'gag gnas gsum dang bral ba/_ngo bo stong pa nyid nam mkha' lta bu/_rang bzhin gyis 'od gsal ba/_rig pa 'gag med cir yang 'char zhing snang ba 'di thams cad skye ba med par ro mnyam/_gnas pa med pa dang 'gag pa med par ro mnyam zhing*/_brtag cing dpyad pas gsal rig snang stong gnyis dbyer med pa blo 'das nam mkha' lta bu'i don mthong nas/_de kho na nyid do zhes gzhi lam 'bras bu'i yon tan thams cad sems nyid rtogs pa'i steng na tshang bar ngo sprad/_gnyis pa lam gyi lhag mthong tha
XXX mal gyi shes pa so ma cig car du ngo sprod cing nyams su blangs par bya ba ni/_sems nyid yod med skye 'gag gnas gsum gyi 'dzin pa'i mtha' dang bral ba/_bdag dang bdag gir 'dzin pa'i mtshan ma'i gzung 'dzin las 'grol zhing*/_mthong bya mthong byed dang bral ba/_ngo bo stong pa rang bzhin gsal ba/_rnam pa 'gag med kyi rig pa du mar gsal cing snang ba/_bcos bslad ma byas pas ma bcos pa/_rang bzhin gyis 'od gsal bas sal le ba/_rang ngo rang gis shes pas hrig ge ba/_rnam rtog gzung 'dzin gyis ma gos pas rjen ne ba/_gang yang mi bsgom pa'i yid byed dang bral ba/_sems nyid la bzo bcos ma byas pas lhug pa/_gang shar ngos bzung dang bral bas 'dzin med/_'dzin med rang bab tu rang lugs ma bcos par 'jog pa tha mal gyi shes pa/_rnam rtog lu gu rgyud nyid du mi 'jug pas so ma zhes bya ste/_lhag mthong gi dngos gzhir nyams su blang byar ngo sprad do/ /gsum pa/_mthar thug gi lhag mthong zhi lhag zung 'jug tu nyams su blangs par bya ste/_sems skye 'gag gnas gsum dang bral ba/_gsal rig stong gsum dbyer med pa ma bcos pa'i ngang la 'jog pa ni zhi gnas/_de'i rang bzhin mthong zhing shes pa ni lhag mthong yin/_de yang sems nyid mtha' gnyis dang bral ba ni/_gnas lugs kyi zhi lhag zung 'jug ste/_sems nyid skye ba med pas rtag pa'i mtha' dang bral/_'gag pa med pas chad pa'i mtha' dang bral/_kha dog dang dbyibs su grub pa med pas rtag pa'i mtha' dang bral/_rtsal snang sna tshogs su shar bas chad pa'i mtha'
XXX dang bral/_rang bzhin stong pa nyid du gnas pas rtag pa'i mtha' dang bral/_sna tshogs du mar rig cing gsal bas chad pa'i mtha' dang bral/_des na rtag chad mtshan 'dzin las 'das pa/_gsal rig stong gsum dbyer med pa zung 'jug tu nyams su len pa'i tshul ni/_sems kyi ngo bo rang gis rang la cer gyis bltas pa'i tshe/_gzung 'dzin mtha' dag dang bral ba/_bde gsal mi rtog pa'i ngang la gnas pa ni zhi gnas yin la/_ngo bo rang bzhin gyis rnam par dag pa mthong ba ni lhag mthong ngo*/ /bla ma'i mos gus la sems gnas pa ni zhi gnas yin la/_de'i ngo bo stong nyid blo 'das su mthong ba ni lhag mthong ngo*/ /bskyed rim chu zla lta bu la sems gnas pa zhi gnas/_ngo bo stong nyid skye 'gag gnas gsum dang bral bar mthong ba ni lhag mthong ngo*/ /sems can thams cad la khyab pa'i byams pa dang snying rje'i dmigs pa la sems gnas pa zhi gnas/_rang bzhin stong pa nyid du mthong ba ni lhag mthong ngo*/ /thabs bsod nams kyi tshogs sgyu ma lta bu la sems gnas shing de dag rang bzhin med pa stong pa nyid du mthong ba ni lhag mthong ngo*/ /gzhan du bde ba chen po la sems gnas shing de nyid zhen med stong pa nyid du mthong ba lhag mthong*/_snang ba thams cad sems snang chu zla lta bu snang stong dbyer med la sems gnas shing*/_de dag rten 'brel skye med chu zla ltar mthong ba ni lhag mthong ngo*/ /bcos bslad dang bral pa'i rig pa so ma la sems gnas shing*/_bdag med rig stong yul med du mthong ba ni lhag
XXX mthong ngo*/ /mdor na chu zla dang me long gi gzugs brnyan dang brag ca ltar snang ba las gzhan pa'i stong pa med/_stong pa las gzhan pa'i snang ba med/_des na snang stong skye med nam mkha' la 'ja' shar ba ltar rtogs nas/_de'i ngang la gnas shing*/_sems nyid rang ngo mthong ba ni lhag mthong ste/_zhi lhag zung 'jug go_/de ni sems nyid sku gsum dbyer med kyi ngo bor ye nas bzhugs pa'i don no/ /gnyis 'dzin mtha' dag sangs nas rang rig ye shes rgyas pas/_sangs rgyas zhes te de nyid 'jam dpal gzhon nur gyur pa yang yin te/_dug lnga dag pas 'jam dpal zhes bya'o/ /zhi lhag zug 'jug gi tshogs gnyis kyi dpal dang ldan pas dpal zhes bya la/_gzhon nu'i gzugs sku mtshan dpes brgyan pa dang*/_chos sku la skye 'chi med pa'o/ /de nyid sems nyid sku gsum gyi ngo bor ye nas bzhugs pa'i don te/_de ltar sku gsum ye shes lnga la sogs pa'i lam dang 'bras bus bsdus pa'i yon tan thams cad sems la rdzogs par ngo sprad par bya'o/ /gsum pa 'chi kha 'pho ba'i gdams ngag la gnyis te/_dang po sbyong ba/_gnyis pa las la sbyar ba'o/ /dang po ni rang nyid 'jam dbyangs su bskyed pa'i gnas lngar/_'jam dbyangs rigs lnga bskyed pa'i 'od zer spro bsdu bya/_de nas gsang gnas kyi 'jam dbyangs thig le lngar khur zhu nas lte ba'i 'jam dbyangs la thim/_de thig le ser por gyur nas snying kha'i 'jam dbyangs la thim/_de sngon por gyur nas mgrin pa'i 'jam dbyangs la thim/_de dmar por gyur nas spyi
XXX bo'i 'jam dbyangs la thim/_de dkar por gyur nas tshangs bug rgya mthong kha bye ba lta bu'i nang nas don nas/_steng gi nam mkhar rin po che'i khri pad zla brtsegs pa'i steng du 'jam dbyangs gnas pa'i thugs khar 'khor nas/_slar spyi bo nas mar zhugs nas rang rang gi gnas su 'jam dbyangs rigs lngar gyur par bsgom nas rlung 'dzin cing sbyang ngo*/ /gnyis pa las la sbyar ba ni 'chi rtags tshang ba'i tshe 'jig rten gyi zhen chags thams cad spang la/_'jam dbyangs rigs lnga thig le ljang ser sngon po dkar po lngar gyur pa gsang gnas nas yar rim pa ltar/_lte ba snying kha mgrin pa spyi bo'i thig le la thim/_de tshangs bug nas thon nas nam mkhar yal te/_nam mkha'i thams cad 'ja' tshon gyis khrigs kyis khengs par bsam la/_mi dmigs pa'i ngang la bzhag go_/de ni 'pho ba 'ja' tshon ma zhes bya'o/ /bzhi pa bar do'i khrid la don gsum ste/_dang po sbyang ba ni/_bskyed rdzogs gnyis kyi sgo nas sbyang ba'o/ /de yang 'dun pa ni/_bdag shi ba yin/_'di bar do yin/_bar do'i lus la bden pa med snyam du nges par byas la/_phyi snod thams cad 'jam dbyangs kyi zhing gi bkod par bsgom/_rang dang sems can thams cad 'jam dbyangs su bsgom/_gnas lngar rigs lnga bskyed la 'od zer spro bsdu'i khrid ltar bsgom/_mthar de dag sgyu ma dang rmi lam chu zla ltar gsal stong skye med blo 'das yid la mi byed pa'i ngang la mnyam par
XXX bzhag pa ni rdzogs rim gyi sgo nas sbyang ba'o/ /gnyis pa ni/_'chi ba'i tshe sa chu la thim pa'i rtags su lus lci/_chu me la thim pa'i rtags su kha sna skam/_me rlung la thim pa'i rtags su drod mtha' nas sdud/_rlung nam mkhar thim pa'i rtags su phyi dbugs chad/_nam mkhar rnam par shes pa la thim pa'i rtags su dar gcig brgyal/_de dag gi skabs su rim pa ltar nang rtags 'char ba ni/_du ba/_smig rgyu/_me khyer/_mar me/_sprin med nam mkha' la sogs 'char bar 'gyur ro/ /de nas pha las thob pa'i byang sems thur du lhung bas dkar lam 'byung*/_ma las thob pa'i rak+ta gyen du 'dril bas dmar lam 'byung*/_snying khar dbu ma'i nang du byang sems dkar dmar nor rgyal gyi rlung dang bcas pa dbu mar zhag gcig bar du bde gsal mi rtog pa'i ngang du gnas par 'gyur te/_de nyid rang ngo shes na skad cig gcig gis rdzogs sangs rgyas par 'gyur ro/ /gsum pa srid pa bar do la 'phos na/_snang ba thams cad 'jam dbyangs kyi zhing gi bkod par bsgom/_bdag dang sems thams cad 'jam dbyangs su bsgom/_bdag gi gnas lngar rigs lnga bkod la 'od zer spro bsdu bya/_sgra thams cad sngags sgrar bsgom/_dran rtog thams cad chos sku skye med du rang ngo shes par bya/ /'og min nam/_bde ba can du rdzu 'phrul gyis 'gro ba'i 'dun pa yang yang gtad/_der bar dor 'jam dbyangs longs rdzogs pa'i sku 'grub nas/_longs spyod rdzogs pa'i zhing khams 'dzin
XXX par 'gyur ro/ /dge ba'i nor 'dzin rab tu rgyas pa'i mthus/_ut+pal rnam rol sa bcu rab rdzogs nas/ /mtshungs med bcom ldan 'jam dpal dbyangs lta bur/ /bdag kyang 'gro ba'i mgon du 'gyur bar shog_/bcom ldan 'das 'jam dpal dbyangs sku'i khrid kyi rim pa/_shes rab 'phel bar byed pa/_ye shes snang ba rgyan gyi 'khor lo zhes bya ba/_man ngag snyan brgyud du gnas pa la shin tu brjed par phongs pa'i phyir rnal 'byor pa 'od dpag rdo rje yi ger bkod pa rdzogs so// //dge'o/ /


Footnotes[edit]



Research Information
Translator's notes
Note from Ringu Tulku
The Instructions on the Jambeyang Practice to Increase Wisdom Called: "The Wheel Ornament of Wisdom" (Rupa instructions) by Eupa Dorje.
Notes on the text itself
Notes on authorship
Notes on individuals related to text
Other notes
Genre from Richard Barron's Catalog
Instruction manual
Genre from dkar chag
khrid phran
BDRC Link
VolumeI1CZ3979
BDRC Content Information
No note on contents


Related Content
Recensions
Other Translations
Commentary(s) of this Text in the DNZ
Text(s) in the DNZ of which this is a commentary
Related Western Publications
Related Tibetan Publications
Other Information

Information about Unicode Tibetan and the digitization of this text

As the only available unicode Tibetan text at the time, Nitartha International's version of the Paro Edition of the gdams ngag mdzod is provided here. However, note that it has not been thoroughly edited and that there may also be mistakes introduced through the conversion process. Eventually we will provide a fully edited version of the entire Shechen Edition, entered and edited multiple times by Pulahari Monastery in Nepal, but as of fall 2017 that project has not been finished. Note that the folio numbers that appear throughout were added by Nitartha Input Center at the time of input.

Provided by Nitartha International Document Input Center. Many thanks to Lama Tenam and Gerry Wiener for help with fonts and conversion.

View JSON

JSON Export