Wylie:Bcom ldan 'das mgon po tshe dpag med yon tan gyi khrid 'chi med rdo rje'i sku sgrub par byed pa

From gDams Ngag mDzod
Revision as of 17:28, 14 April 2022 by MortO (talk | contribs)
(diff) ← Older revision | Latest revision (diff) | Newer revision → (diff)
Jump to navigation Jump to search


Upload a file
Click the picture above to view the original manuscript.

བཅོམ་ལྡན་འདས་མགོན་པོ་ཚེ་དཔག་མེད་ཡོན་ཏན་གྱི་ཁྲིད་འཆི་མེད་རྡོ་རྗེའི་སྐུ་ ་ ་ ་
bcom ldan 'das mgon po tshe dpag med yon tan gyi khrid 'chi med rdo rje'i sku sgrub par byed pa
Accomplishing the Immortal Vajra Body: The Instructions of the Lord Protector Amitāyus, the Deity Related to Enlightened Qualities

Damngak Dzö Volume 16 (མ་) / Pages 427-445 / Folios 1a1 to 10a7
Translation's Introduction by Gethin, S.

Amitāyus (Tshe dpag med), the buddha of infinite life, is an aspect of Buddha Amitābha (’Od dpag med), the buddha of infinite light, and as his name suggests, he is associated with practices that promote longevity. In these instructions, both names are used to refer to the same deity.


Property "Author" has a restricted application area and cannot be used as annotation property by a user.


[edit]
XXX བཅོམ་ལྡན་འདས་མགོན་པོ་ཚེ་དཔག་མེད་ཡོན་ཏན་གྱི་ཁྲིད་འཆི་མེད་རྡོ་རྗེའི་སྐུ་སྒྲུབ་པར་བྱེད་པ་བཞུགས་སོ། །
XXX རིན་ཆེན་བྱེ་བས་ཀུན་ནས་བརྒྱན་པའི་སྐུ། པདྨ་རཱ་གའི་ལྷུན་པོ་ལྟར་བརྗིད་ཅིང༌། །ཐུན་མཚམས་ཉི་མ་འབུམ་གྱི་གཟི་འོད་ཅན། འདྲེན་པ་འོད་དཔག་མེད་ལ་ཕྱག་འཚལ་ལོ། །ཆུ་སྐྱེས་ཟླ་བའི་སྐྱིལ་ཀྲུང་མཛོད་འཛིན་ཅིང༌། །མཉམ་བཞག་སྟེང་ན་བུམ་བཟང་བདུད་རྩིས་བཀང༌། །འཛུམ་བཅས་ཞི་བའི་ཞལ་བསྟན་མཚན་དཔེས་བརྒྱན། །མགོན་པོ་འོད་དཔག་མེད་དེས་བདག་སྐྱོངས་ཤིག །མགོན་པོ་དེ་ཡི་ཡེ་ཤེས་འོད་བྱེད་པས། །དཔལ་ལྡན་མི་ཏྲའི་འདབ་སྟོང་ཡོངས་རྒྱས་ཤིང༌། །མན་ངག་སྦྲང་རྩིའི་དགའ་སྟོན་གཅིག་བརྒྱུད་དུ། །མཁས་ལ་དབང་བ་ཤྲཱི་པུ་ཏྲས་སོ། །དེ་ནས་དེ་ཡི་བུམ་བཟང་བདུད་རྩིའི་མཆོག །གང་བྱོས་ཚུལ་དུ་གྲགས་པའི་མཚན་ཅན་ལ། །ལེགས་པར་བརྒྱུད་པའི་བདུད་རྩིའི་སྦྲང་རྒྱུན་ནི། །བདག་གིས་འཐུང་བས་བརྒྱུད་ཀྱི་བདུད་རྩི་བལྟམས། །ཞེས་བྱའོ། །དེ་ཡང་འདིར་བཅོམ་ལྡན་འདས་མགོན་པོ་ཚེ་དཔག་མེད་
XXX ཡོན་ཏན་གྱི་ཁྲིད། འཆི་མེད་རྡོ་རྗེའི་སྐུ་སྒྲུབ་པར་བྱེད་པ་ལ་དོན་རྣམ་པ་བཞི་སྟེ། དང་པོ་གདམས་པའི་འདིའི་བརྒྱུད་པའི་བྱུང་ཚུལ་ནི། རྣལ་འབྱོར་གྱི་དབང་ཕྱུག་མི་ཏྲ་ཛཱ་ཀིས། སོ་ས་གླིང་གི་དུར་ཁྲོད་དུ་ཐུགས་དམ་ལྷ་ལྔ་བསྒྲུབས་པས། དེ་དག་གིས་ཞལ་མངོན་སུམ་དུ་གཟིགས་ཤིང༌། སོ་སོའི་ཁྲིད་ཀྱི་རིམ་པ་གསུངས་ནས། །མི་རབས་བདུན་གྱི་བར་དུ་བདག་ཅག་གིས་བྱིན་གྱིས་བརླབས་པའི་གང་ཟག་ལས་ཅན་ཤ་སྟག་འབྱུང་ངོ་ཞེས་གསུངས་པ་ཡིན་ནོ། །དེ་ནས་གདམས་པ་གཅིག་བརྒྱུད་དུ་བཅོམ་ལྡན་འདས་མགོན་པོ་ཚེ་དཔག་མེད་ཀྱིས་མི་ཏྲ་ཛཱ་ཀི་ལ་གསུངས། དེས་པཎྜིཏ་ཤྲཱི་པུ་ཏྲ་ལ། དེས་གྲགས་པ་རིན་ཆེན་ལ། དེས་བུདྡྷ་ཤྲི་ལའོ། །དེ་དག་གིས་བརྒྱུད་པའི་བྱུང་ཚུལ་སོངས་ནས། གཉིས་པ་སྔོན་འགྲོ་ལ་གཉིས། ཐུན་མོང་གི་སྔོན་འགྲོ་དང༌། ཁྱད་པར་གྱི་སྔོན་འགྲོའོ། །དང་པོ་ཐུན་མོང་གི་སྔོན་འགྲོ་ནི། དལ་འབྱོར་རྙེད་པར་དཀའ་བ། འཆི་བ་མི་རྟག་
XXX པ། ལས་རྒྱུ་འབྲས་ཀྱི་དོན་བསམ་པ་འཁོར་བའི་ཉེས་དམིགས་བསྒོམས་པ་སྟེ་བཞི་ནི་ཐུན་མོང་གི་སྔོན་འགྲོའོ། །གཉིས་པ་ཁྱད་པར་གྱི་སྔོན་འགྲོ་ལ་བཞི། དང་པོ་ཅི་བྱས་ཐར་པའི་ལམ་དུ་འགྲོ་བར་བྱེད་པ་སྐྱབས་འགྲོ་སེམས་བསྐྱེད་ཀྱི་ཁྲིད་ནི། རང་གི་སྤྱི་གཙུག་གི་ནམ་མཁར་རིན་པོ་ཆེ་དུ་མ་ལས་གྲུབ་པའི་ཁྲི་ཡངས་ཤིང་རྒྱ་ཆེ་བ། རྨ་བྱས་བཏེགས་པའི་སྟེང་དུ། རབ་རྒྱས་པདྨ་འབུམ་ལྡན་དང་ཟླ་བའི་སྟེང་དུ་རང་གི་རྩ་བའི་བླ་མ་འོད་དཔག་མེད་ཀྱི་རྣམ་པ་ཅན། ལོངས་སྤྱོད་རྫོགས་པའི་སྐུའི་ཆ་ལུགས་ཀྱིས་གནས་པ་ལ་བཀའ་བརྒྱུད་བླ་མས་བསྐོར་བ། མདུན་དུ་ཡི་དམ་རྒྱ་མཚོ། གཡས་སུ་སངས་རྒྱས་རྒྱ་མཚོ། རྒྱབ་ཏུ་གསུང་རབ་རྒྱ་མཚོ། གཡོན་དུ་དགེ་འདུན་རྒྱ་མཚོ། འོག་ཏུ་མཁའ་འགྲོ་ཆོས་སྐྱོང་རྒྱ་མཚོས་གང་ཞིང༌། ཕྱོགས་དང་ཕྱོགས་མཚམས་ཐམས་ཅད་སངས་རྒྱས་དང་བྱང་ཆུབ་སེམས་དཔའ་ཐམས་ཅད་སྤྲིན་ཕུང་འཐིབས་པ་ལྟར་གཏིབས་པའི་སྐྱབས་ཞབས་ན། བདག་དང་མཐའ་ཡས་པའི་སེམས་ཅན་ཐམས་ཅད་ཚུད་པར་བསམ་ཞིང༌། ཐམས་ཅད་མོས་པ་དང་ལྡན་པས་སྐྱབས་འགྲོ་ཀུ་དི་རི་རི་བྱེད་པར་བསྒོམས་ལ། སྐྱབས་སུ་འགྲོ་བར་བྱའོ། །བྱང་ཆུབ་མཆོག་ཏུ་སེམས་བསྐྱེད་དོ། །མཐར་དེ་དག་འོད་དུ་ཞུ་ནས་རང་ལ་ཐིམ་པས། ལུས་ངག་ཡིད་གསུམ་མ་བཅོས་པར་རྟོག་མེད་དུ་ཕྱམ་མེ་བ། འཛིན་མེད་དུ་ཤིག་གེ་བ། གསལ་སྟོང་དུས་ས་ལེ་བ། ཕྱག་རྒྱ་ཆེན་པོའི་ངང་ལ་བཞག་པ་ནི་དོན་གྱི་སྐྱབས་འགྲོའོ། །གཉིས་པ་སྡིག་སྒྲིབ་དག་བྱེད་ཧྲཱིཿཡིག་བཞི་སྦྱོར་གྱི་ཁྲིད་ནི། རང་གི་སྤྱི་བོའི་ཧྲཱིཿཡིག་དམར་པོ་ཚེག་དྲག་དང་བཅས་པ་ལ་བདུད་རྩི་འོ་མའི་རྒྱུན་ལྟ་བུ་དཀར་ནར་ར་ར་བབས་པས། ལུས་ཀྱི་ནང་
XXX གི་ནད་གདོན་སྡིག་སྒྲིབ་ཐམས་ཅད་དུད་ཁུ་སོལ་ཁུའི་རྣམ་པར་དེད་ནས། རྩ་སྒོ་ཆུ་སྒོ་སེན་མོའི་བར་ནས་བུད་དེ། ས་རིམ་པ་དགུའི་ཞབས་སུ་སོང་ཞིང༌། ལུས་ཐམས་ཅད་ཡེ་ཤེས་ཀྱི་བདུད་རྩིས་དཀར་ལྟེམ་གྱིས་གང་བར་བསྒོམ་པ་ནི་སྡིག་པ་དག་བྱེད་ཀྱི་སྦྱོར་བའོ། །གཉིས་པ་ནད་དག་པར་བྱེད་པའི་སྦྱོར་བ་ནི། ཚད་པའི་ནད་ལ་བདུད་རྩི་གངས་ཆུ་དང༌། ག་བུར་གྱི་ཆུ་ལྟ་བུ་བསིལ་བའི་རང་བཞིན་ཅན། གྲང་བའི་ནད་ལ་བདུད་རྩི་ཁྲོ་ཆུ་ཁོལ་མ་ལྟ་བུ་ཚ་བའི་ངད་དང་ལྡན་པ། འདུས་པའི་ནད་ལ་ཞུན་མར་ལྟ་བུ་བདོ་བའི་རང་བཞིན་ཅན་བབས་པས་ནད་ཐམས་ཅད་ཞི་བར་བསྒོམ་མོ། །གསུམ་པ་གདོན་དག་པར་བྱེད་པའི་སྦྱོར་བ་ནི་ཧྲཱིཿཡིག་ལས་རྟ་མགྲིན་སྐུ་ཆུང་ལ་ཡན་ལག་དོད་པ། ཕྱག་མཚན་དང་བཅས་པ། མེ་དཔུང་འབར་ཞིང་མང་པོ་བྱུང་ནས་ལུས་ཀྱི་ནང་གང་གདོན་ཐམས་ཅད་བསྲེག་བཅོམ་ནས། རྩ་སྒོ་ཆུ་སྒོ་བ་སྤུའི་སྒོ་རྣམས་ནས། སྡོམ་དང་སྡིག་པའི་རྣམ་པར་བུད་པར་བསྒོམ་མོ། །བཞི་པོ་འོད་ཟེར་གྱི་སྦྱོར་བ་བྱེད་པ་ནི་ཧྲཱིཿཡིག་ལས་འོད་ཟེར་ཁ་དོག་སྣ་ལྔ་དང་ལྡན་པས། ཉི་མ་སྟོང་གི་འོད་ལྟ་བུ་འཕྲོས། ལུས་ཀྱི་ནང་གང་ནས། ནད་གདོན་སྡིག་སྒྲིབ་ཐམས་ཅད་སྦྱངས་ཤིང་ཕྱི་རོལ་ཏུ་འཕྲོས་པས་སེམས་ཅན་ཐམས་ཅད་ཀྱི་ནད་གདོན་སྡིག་སྒྲིབ་རྣམས་སྦྱངས་བར་བསྒོམ། དེ་དག་གི་སྐབས་སུ་ངག་ཏུ་ཧྲཱིཿཞེས་འདོན་པར་བྱའོ། །མཐར་རང་ལུས་འོད་དུ་ཞུ་ནས་ཧྲཱིཿལ་ཐིམ། ཧྲཱིཿནམ་མཁའ་ལ་འཇའ་ཡལ་བ་ལྟར་དམིགས་མེད་ཀྱི་ངང་ལ། ལུས་གནད་ལྟ་སྟངས་དང་ལྡན་པར་བཞག་པ་ནི་དོན་གྱི་གཤགས་པའོ། །གསུམ་པ་ཚོགས་གཉིས་རྫོགས་པར་བྱེད་པ་མཎྜལ་
XXX གྱི་ཁྲིད་ནི་གཉིས་ཏེ། དང་པོ་སྒྲུབ་པའི་མཎྜལ་ནི། གླིང་བཞི་གླིང་ཕྲན་བརྒྱད་ཀྱིས་བསྐོར་བའི་རི་བོ་མཆོག་རབ་ཀྱི་སྟེང་དུ། རིན་པོ་ཆེ་སྣ་ཚོགས་ལས་གྲུབ་པའི་གཞལ་ཡས་ཁང་གི་ནང་དུ། སྐྱབས་སུ་འགྲོ་བའི་དམིགས་ཡུལ་བསྒོམས་པ་ལྟར་བསྐྱེད་ལ་མེ་ཏོག་གི་ཚོམ་བུ་བཀོད། དེ་ནས་མཎྜལ་གཉིས་ཡོད་ན་དེ་ཉིད་དུ་བཞག་ལ། མཆོད་པའི་མཎྜལ་མདུན་དུ་མཆོད། གཉིས་མེད་ན། ལྷ་དེ་དག་བར་སྣང་ལ་བཏེགས་ལ། སྒྲུབ་པའི་མཎྜལ་བསྒྲུབ་སྟེ། རི་རབ་གླིང་བཞི། རྒྱལ་སྲིད་སྣ་བདུན། བཀྲ་ཤིས་རྟགས་བརྒྱད་ཕྱི་ནང་གི་མཆོད་པའི་ལྷ་མོ་དུ་མ་བློས་སྤྲུལ་ནས། མཎྜལ་སྤྱི་ལྟར་ལན་ཉི་ཤུ་རྩ་གཅིག་གི་བར་དུ་འབུལ་ལོ། །དེས་ནི་བསོད་ནམས་ཀྱི་ཚོགས་རྫོགས་པར་བྱེད་དོ། །མཐར་མཆོད་ཡུལ་གྱི་ལྷ་རྣམས་འོད་དུ་ཞུ་ནས་རང་ལ་ཐིམ་པས་རང་གི་ལུས་ངག་ཡིད་གསུམ་དབྱེར་མེད་དུ་མ་བཅོས་པའི་ངང་ལ་མཉམ་པར་བཞག་གོ །དེ་ནི་ཡེ་ཤེས་ཀྱི་ཚོགས་སོ། །བཞི་པ་བྱིན་རླབས་མྱུར་དུ་འཇུག་པར་བྱེད་པ་བླ་མའི་རྣལ་འབྱོར་གྱི་ཁྲིད་ནི། རང་གི་སྤྱི་བོའི་གཙུག་ཏུ་རིན་པོ་ཆེ་དུ་མ་ལས་གྲུབ་པའི་ཁྲི་ཡངས་ཤིང་རྒྱ་ཆེ་བའི་སྟེང་དུ། སྣ་ཚོགས་པདྨ་འབུམ་ལྡན་དང་ཟླ་བའི་དཀྱིལ་འཁོར་གྱི་སྟེང་དུ་རྩ་བའི་བླ་མ་འོད་དཔག་མེད་ལོངས་སྤྱོད་རྫོགས་སྐུའི་ཆ་ལུགས་སུ་བཞུགས་པ། དེའི་སྤྱི་བོར་པཎ་ཆེན་ཤྲཱི་པུཏྲ། དེའི་སྤྱི་བོར་གྲུབ་ཐོབ་མིཏྲ་ཛྭ་ཀི གཡས་ཌཱ་མ་རུ། གཡོན་དྲིལ་བུ། སྤྱན་ནམ་མཁར་གཟིགས་པ། སྐུ་ལ་རས་ཀྱི་ཨངྒ་རག་སྨད་གཡོགས་ཅན། རུས་པའི་རྒྱན་དྲུག་འཁྲོལ་བ། དེའི་སྤྱི་བོར་སྤྱན་རས་གཟིགས་ཞལ་གཅིག་ཕྱག་བཞི་པ། རིན་པོ་ཆེའི་རྒྱན་གྱིས་བརྒྱན་
XXX པ། བླ་མ་དེ་དག་འཇའ་འོད་ཀྱི་དབུས་ན་སྐུ་གཟི་མདངས་དང་བཅས་པ། གསུང་ཚངས་དབྱངས་དང་བཅས་པ། ཐུགས་བྱིན་རླབས་དང་བཅས་པའི་རང་བཞིན་དུ་བཞུགས་པའི་སྤྱི་བོར་ཨོཾ་དཀར་པོ། མགྲིན་པར་ཨཱཿདམར་པོ། སྙིང་ཁར་ཧཱུྃ་མཐིང་ཁ། ལྟེ་བར་ཧོ་སེར་པོ་ལས་འོད་འཕྲོས་པས། ཕྱོགས་བཅུའི་རྩ་བརྒྱུད་ཀྱི་བླ་མ་རྣམས་དང༌། ཡི་དམ་དཀོན་མཆོག་གསུམ། མཁའ་འགྲོ་ཆོས་སྐྱོང་ཐམས་ཅད་འོད་ཟེར་གྱིས་སྤྱན་དྲངས་ནས། བླ་མ་དེའི་སྐུ་གསུང་ཐུགས་ཀྱི་སྤྱི་བོ། མགྲིན་པ། སྙིང་ཁ། ལྟེ་བ། གསང་གནས་རྣམས་སུ་ཐིམ་པར་བསྒོམ། བླ་མ་ཀུན་འདུས་ཀྱི་ངོ་བོར་བསམ་ལ་མཎྜལ་ཕུལ། གསོལ་བ་གདབ་ནས་དབང་བསྐུར་ཞུ་བ་ནི་བཞི་ལས། དང་པོ་འོད་ཟེར་གྱི་སྦྱོང་བ་ནི། བླ་མ་རྣམས་ཀྱི་སྤྱི་བོར་ཨོཾ་དཀར་པོ། མགྲིན་པར་ཨཱཿདམར་པོ། སྙིང་ཁར་ཧཱུྃ་ཡིག་སྔོན་པོ། ལྟེ་བར་ཧོ་ཡིག་སེར་པོ་བཞི་ལས་འོད་ཟེར་རིམ་པ་བཞིན་དུ་དཀར་དམར་མཐིང་སེར་ཕྱུང་ནས། རང་གི་གནས་བཞིར་ཕོག་པས། གནས་སྐབས་བཞིའི་སྒྲིབ་པ་ཐམས་ཅད་སྦྱོང་ནས་དབང་བཞི་ཐོབ་པར་བསྒོམ་མོ། །བླ་མའི་གནས་བཞིའི་ཡི་གེ་བཞི་ལས། བདུད་རྩི་འོ་མའི་རྒྱུན་ལྟ་བུ་དང༌། པདྨ་རཱ་ག་ཞུ་བའི་རྒྱུན་ལྟ་བུ་དང༌། མཐོན་མཐིང་ཞུ་བ་ལྟ་བུ་དང༌། གསེར་ཞུན་ལྟ་བུ་བཞི་བྱུང་ནས། རིམ་གྱིས་རང་གི་སྤྱི་བོ་ཚངས་བུག་ནས་ཞུགས། ལུས་ཀྱི་ནང་གང༌། སྒྲིབ་པ་བཞི་དག །དགའ་བ་བཞིའི་ཡེ་ཤེས། དབང་བཞི་ཐོབ། སྐུ་བཞི་མངོན་དུ་བྱས་པར་བསྒོམ་མོ། །གསུམ་པ་ཡིག་འབྲུ་བརྟན་པར་བྱེད་པ་ནི། ཡིག་འབྲུ་བཞི་
XXX རིམ་གྱིས་གདན་དང་བཅས་པ་རྦད་ཀྱིས་ཆད་ནས་རང་གི་གནས་བཞིར་ཐིམ་པར་བསྒོམ་མོ། །དེས་ཀྱང་སྒྲིབ་པ་བཞི་དག །དགའ་བ་བཞི་སྐྱེས། དབང་བཞི་བརྟན། སྐུ་བཞི་མངོན་དུ་བྱས་པར་བསྒོམ་མོ། །བཞི་པ་ཡོངས་རྫོགས་ཀྱི་དབང་ནི། བརྒྱུད་པའི་བླ་མ་རྣམས་རིམ་གྱིས་འོད་དུ་ཞུ་ནས་རྩ་བའི་བླ་མ་ལ་ཐིམ། རྩ་བའི་བླ་མ་འོད་དུ་ཞུ་ནས་རང་ལ་ཐིམ་པས། བླ་མའི་སྐུ་གསུང་ཐུགས་དང་རང་གི་ལུས་ངག་ཡིད་གསུམ་དབྱེར་མེད་དུ་གྱུར་ནས། སེམས་ཉིད་མ་བཅོས་པའི་ངང་ལ་ལྷོད་ཀྱིས་གློད་ལ་རིག་པ་རྟོག་མེད་འཛིན་མེད་དུ་ཤིག་གེ་བཞག་གོ །དེ་ནི་བླ་མེད་དོན་གྱི་རྣལ་འབྱོར་རོ། །གསུམ་པ་བསྐྱེད་པའི་རིམ་པའི་ཁྲིད་ལ་བཞི་སྟེ། དང་པོ་སྲུང་བའི་འཁོར་ལོ་བསྒོམ་པ་ནི། སྟོང་པའི་ངང་ལས་ཧཱུྃ་ལས་སྣ་ཚོགས་རྡོ་རྗེ་རྒྱ་གྲམ་གྱི་ལྟེ་བར་ཧྲཱིཿས་མཚན་པ། དེ་ལས་འོད་འཕྲོས། འོག་རྡོ་རྗེ་ས་གཞི། ཕྱོགས་རྡོ་རྗེའི་ར་བ་དང་དྲྭ་བ། སྟེང་རྡོ་རྗེའི་གུར་དང་བླ་རེ། ཕྱི་རོལ་མཚོན་ཆ་སྣ་ཚོགས་ཀྱིས་གང་ཞིང༌། ཡེ་ཤེས་ཀྱི་མེ་འབར་བའི་རང་བཞིན་དུ་གྱུར། དེའི་དབུས་སུ་ཧྲཱིཿལས་རང་ཉིད་རྟ་མགྲིན་དམར་པོ་ཞལ་གཅིག་ཕྱག་གཉིས། ཞབས་གཉིས་པད་ཉིའི་གདན་ལ་བརྐྱང་བསྐུམ་གྱིས་བཞུགས་པ། ཕྱག་གཡས་བེ་ཅོན་ནམ་མཁར་གདེངས་པ། གཡོན་པ་སྡིགས་མཛུབ་ཐུགས་ཀར་བསྒྲེངས་པ། ཞལ་གདངས་ཤིང་ལྗགས་འདྲིལ་བ། རྣོ་ཞིང་དཀར་བའི་མཆེ་བ་བཞི་གཙིགས་པ། སྤྱན་གསུམ་དམར་ལ་གཡོ་བ། སྨིན་མ་དབུ་སྐྲ་འབར་བ། སྤྱི་གཙུག་རྟ་མགོ་ལྗང་ཞུར་རྔོག་མ་ལེ་བརྒན་མེ་ལྟར་འབར་བ། སྟག་གི་པགས་པའི་ཤམ་ཐབས་ཅན། སྦྲུལ་དང་རིན་པོ་ཆེ་དུ་མས་བརྒྱན་པ།
XXX བསྐལ་པའི་མེ་ཆེན་འབར་བའི་དབུས་ན་བཞུགས་པར་བསམ་ལ། སྐུ་དེ་ལས་དེ་ལྟ་བུའི་ཁྲོ་ཆུང་དཔག་ཏུ་མེད་པ་འཕྲོས་ནས། གདོན་བགེགས་ཐམས་ཅད་བཅོམ་ཞིང་བསྲེགས་ནས། སྲུང་འཁོར་གྱི་ཕྱི་རོལ་དུ། ཞལ་ཕྱིར་གཟིགས་ནས་བར་ཆད་བསྲུང་བའི་ཚུལ་དུ་ཐམ་འགགས་སུ་བཞུགས་པ། གཞན་རྣམས་ཞལ་ནང་དུ་གཟིགས་ནས། བསྲུང་བར་མཛད་ཅིང་ཐམ་འགགས་སུ་བཞུགས་པར་བསྒོམ་པ་ནི། སྲུང་འཁོར་གྱི་ཁྲིད་རིམ་མོ། །གཉིས་པ་དངོས་གཞིའི་སྒོ་ནས་འཆི་མེད་རྡོ་རྗེའི་ཚེ་བསྒྲུབ་པའི་ཁྲིད་ནི། ཚད་མེད་བཞི་སྔོན་དུ་འགྲོ་བས། རང་ཐ་མལ་པར་གནས་པའི་ལུས་ཀྱི་ནང་སྟོང་དམར་སེང་བ་བསྒོམ། སྤྱི་བོར་རིན་པོ་ཆེ་དུ་མ་ལས་གྲུབ་པའི་ཁྲི་ཡངས་ཤིང་རྒྱ་ཆེ་བའི་སྟེང་དུ། པདྨ་འབུམ་ལྡན་དང་ཟླ་བའི་དཀྱིལ་འཁོར་གྱི་སྟེང་དུ་ཧྲཱིཿལས་འོད་འཕྲོས། དོན་གཉིས་བྱས་ཚུལ་འདུས་ཡོངས་སུ་གྱུར་པ་ལས་བཅོམ་ལྡན་འདས་མགོན་པོ་ཚེ་དཔག་མེད་སྐུ་མདོག་པདྨ་རཱ་ག་ལྟར་དམར་བ། ཞབས་རྡོ་རྗེ་སྐྱིལ་ཀྲུང་ཅན། ཕྱག་གཉིས་མཉམ་བཞག་གི་སྟེང་ན། འཆི་མེད་རྡོ་རྗེའི་ཚེའི་བུམ་པ་ཡེ་ཤེས་ཀྱི་བདུད་རྩིས་བཀང་བ་འཛིན་པ། སྤྱན་དཀྱུས་དང་སྨིན་དཀྱུས་རིང་ཞིང༌། མཛོད་སྤུ་དཀར་པོས་བརྒྱན་པ། དབུ་སྐྲ་རལ་པའི་ཐོར་ཅོག་དང་ཅོད་པན་ཅན། རིན་པོ་ཆེ་སྣ་ལྔའི་རྩེ་ཕྲན་དང་སྙན་ཆ། མགུལ་རྒྱན་དང་ཕྱག་གདུབ། འོག་པག་དང་ཞབས་གདུབ། དར་གྱི་ཅོད་པན་དང་མུ་ཏིག་སྣ་ལྔས་བརྒྱན་པ། མཚན་བཟང་པོ་སུམ་ཅུ་རྩ་གཉིས་དང༌། དཔེ་བྱད་བཟང་པོ་བརྒྱད་ཅུས་མཛེས་པ། འཇིག་རྟེན་གྱི་ཁམས་ཐམས་ཅད་འོད་ཟེར་གྱིས་སྣང་བར་བྱེད་པའི་བདག་
XXX ཉིད་དུ་བསམ་ལ། དེའི་སྤྱི་བོར་ཨོཾ་དཀར་པོ། མགྲིན་པར་ཨཱ་དམར་པོ། ཐུགས་ཁར་ཧཱུྃ་སྔོན་པོ་གསུམ་ལས་འོད་འཕྲོས། ཚེ་དཔག་མེད་ལ་ཕྱོགས་བཅུའི་རྒྱལ་བ་སྲས་བཅས་ཀྱིས་བསྐོར་བ་སྤྱན་དྲངས་ལ། ཚེ་དཔག་མེད་དེ་ལ་དབྱེར་མེད་དུ་ཐིམ་པར་བསྒོམ། བཅོམ་ལྡན་འདས་ཀྱི་ཕྱག་གི་བུམ་པའི་དབུས་སུ་ཧྲཱིཿདམར་པོ་ཚེག་དྲག་དང་བཅས་པ་ལས་འོད་ཟེར་ཕྱོགས་བཅུར་འཕྲོས། ཕྱོགས་བཅུའི་རྒྱལ་བ་སྲས་དང་བཅས་པ་ཐམས་ཅད་ལ་མཆོད་པའི་སྤྲིན་ཕུང་དུ་མས་མཆོད། དེ་དག་གི་རྡོ་རྗེའི་ཚེ་དང་བསོད་ནམས། དཔལ་དང་གཟི་བརྗིད་སྐུ་གསུང་ཐུགས་ཡོན་ཏན་ཕྲིན་ལས་ཡེ་ཤེས་ཐམས་ཅད་འོད་ཟེར་གྱིས་བསྡུས་ནས། བུམ་ནང་གི་ཧྲཱིཿལ་ཐིམ་པར་བསྒོམ། སླར་ཡང་ལྕགས་ཀྱུ་དང་ཞགས་པ་ལྟ་བུའི་འོད་ཟེར་སྣ་ལྔ་ཕྱོགས་བཅུར་འཕྲོས་པས། ཕྱོགས་བཅུའི་ལྷ་དང་ཀླུ་དང༌། གནོད་སྦྱིན་དང༌། དྲི་ཟ་དང༌། ལྷ་མ་ཡིན་དང༌། ནམ་མཁའ་ལྡིང་དང༌། མིའམ་ཅི་དང༌། ལྟོ་འཕྱེ་ལ་སོགས་ཏེ། སེམས་ཅན་ཐམས་ཅད་ལ་ཕོག་དེ་དག་འོད་དཔག་མེད་ཀྱི་གོ་འཕང་ལ་བཀོད། དེ་དག་གི་ཚེ་དང་བསོད་ནམས། དཔལ་དང་འབྱོར་པ། གྲགས་པ་དང་ཡེ་ཤེས་ཡོན་ཏན་ཐམས་ཅད་འོད་ཟེར་གྱིས་བསྡུས་ནས་བུམ་ནང་གི་ཧྲཱིཿལ་ཐིམ་པར་བསྒོམ། ཡང་འོད་ཟེར་འཕྲོས་ནས་ཕྱོགས་བཅུའི་ས་ཆུ་མེ་རླུང༌། ནམ་མཁའ། ཉི་ཟླ་དང༌། དཔག་བསམ་གྱི་ཤིང༌། ནོར་བུ་རིན་པོ་ཆེ་སྣ་ལྔ་ལ་སོགས་པ་འབྱུང་བའི་བཅུད་ཐམས་ཅད་དང་ནུས་པ། བཀྲག་དང་གཟི་མདངས། འོད་དང་ཡོན་ཏན་ཐམས་ཅད་ཧྲཱིཿལ་ཐིམ་པར་བསྒོམ། དེ་ནས་བཅོམ་ལྡན་འདས་ལ་སྤྲུལ་པའི་མཆོད་པས་མཆོད་ལ། གསོལ་
XXX བ་བཏབ་པ་ནི། བཅོམ་ལྡན་འདས་འོད་དཔག་མེད་ཀྱིས་བདག་དང་སེམས་ཅན་ཐམས་ཅད་ལ། སྐུ་གསུང་ཐུགས་ཡོན་ཏན་ཕྲིན་ལས་ཚེ་དང་ཡེ་ཤེས་ཀྱིས་དབང་བསྐུར་ཞིང༌། དངོས་གྲུབ་སྩལ་དུ་གསོལ། ཞེས་གསོལ་བ་བཏབ་པས། བུམ་པའི་ནང་ནས་བདུད་རྩིའི་རྒྱུན་འོ་མ་ལྟ་བུ་སྤྱི་བོ་ཚངས་པའི་བུ་ག་ནས་མར་བབས་པ་ལ་རིག་པ་གཏད་ནས། རླུང་རོ་ལན་གསུམ་བུས་ལ། རླུང་ཚུར་རྔུབ་པ་དང༌། སྟབས་སུ་མཆིལ་མ་ཞིག་མིད་བཏང་ལ། རླུང་དེ་ལྟེ་བར་མནན་ནས་འོག་རླུང་འཐེན་ལ་བུམ་པ་ཅན་བཟུང་ལ། བདུད་རྩིའི་རྒྱུན་གྱིས་གསང་གནས་ཡན་ཆད་དཀར་ལྟེམ་གྱིས་གང་བར་བསམ་ལ། དམིགས་པ་ཐེབས་རེ་བྱ། དེ་བཞིན་དུ་ལྟེ་བ། སྙིང་ཁ། མགྲིན་པ། སྤྱི་བོ་མན་ཆད་དཀར་ལྟེམ་གྱིས་གང་བར་བསམ་ལ། དམིགས་པ་ཐེབས་རེ་བྱ་གསུངས། དེ་ལྟར་དམིགས་ཐེབས་རྒྱས་པ་བསྒོམ། འབྱོང་ན་རླུང་ཐེབས་རེ་དང་རྩ་འཁོར་གང་བའི་དམིགས་པ་སྦྲག་ནས། དམིགས་པ་ཐེབས་གཅིག་ལ་རྩ་འཁོར་ལྔ་ལྔ་གང་བར་ཡང་ཡང་བསྒོམ། ཡང་དམིགས་ཐེབས་ལྷག་མ་བཞི་ནི། འོད་དཔག་མེད་བསྐྱེད་ཅིང་བུམ་ནང་གི་ཧྲཱིཿལས་འོད་ཟེར་སྤྲོ་བསྡུ་བྱེད་པ་གོང་དང་འདྲ་བ་ལ། བདུད་རྩིའི་རྒྱུན་དམར་པོ་པདྨ་རཱ་ག་ཞུ་བ་ལྟ་བུ་དང༌། སྔོན་པོ་བཻཌཱུརྻ་ཞུན་མ་ལྟ་བུ་དང༌། སེར་པོ་གསེར་ཞུན་མ་ལྟ་བུ་དང༌། ལྗང་ཁུ་མར་གད་ལྟ་བུ་དང་ལྔ་པོ་སྤྱི་གཙུག་ཚངས་བུག་ནས་མར་བབས་པར་བསམས་ལ་རླུང་རོ་ལན་གསུམ་བསལ་ནས་མཆིལ་མ་ཞིག་མིད། དེ་ལྟེ་བའི་འོག་ཏུ་བསྒྱུར་ལ་སྟེང་རླུང་ཆིལ་གྱིས་མནན། འོག་རླུང་ཡར་འཐེན་ལ་བུམ་པ་ཅན་བཟུང༌།
XXX བདུད་རྩི་ལྔ་པོས་གསང་གནས་གང་བ་དང༌། ལྟེ་བ། སྙིང་ཁ། མགྲིན་པ། སྤྱི་བོར་གང་བར་བསྒོམ། རྒྱས་པར་བྱེད་ན་དམིགས་ཐེབས་རེ་རེ་བྱས། མ་འབྱོང་ན་དམིགས་ཐེབས་རེས་བདུད་རྩི་ཁ་དོག་རེ་རྫོགས་པར་བྱེད། དེས་བདུད་རྩི་དམར་པོ་རྒྱུན་བབས་པས་ལུས་ཐམས་ཅད་དམར་ལྟེམ་གྱིས་གང་བར་བསམ། དེ་བཞིན་སྔོན་པོ་དང་སེར་པོ། ལྗང་ཁུའི་བདུད་རྩིའི་རྒྱན་བབས་པའི་ཚེ་སོ་སོའི་ཁ་དོག་ལྟར། རང་ལུས་ཀྱང་འོད་དཔག་མེད་རིགས་ལྔའི་རྣམ་པར་གསལ་ཞིང༌། འཆི་མེད་རྡོ་རྗེའི་ཚེ་ཐོབ་སྙམ་དུ་བསྒོམ། དེ་དག་རྫོགས་ནས་འོད་དཔག་མེད་འོད་ཞུ་ནས་རང་ལ་ཐིམ་པས། ལུས་ཀྱི་ནང་ཐམས་ཅད་འོད་དཔག་མེད་ཡུངས་འབྲུ་ཙམ་གྱིས་ཐམ་འགགས་སུ་གང་ཞིང༌། ཕྱི་རོལ་བ་སྤུའི་རྩ་བ་ཐམས་ཅད་ཀྱང་སྐུ་གང་བར་བསྒོམ་ལ། ལུས་ངག་ཡིད་གསུམ་མ་བཅོས་པའི་ངང་ལ་བཞག་གོ །གཉིས་པ་གསུང་གི་སྒོ་ནས་འཆི་མེད་གསུང་བསྒྲུབ་པའི་ཁྲིད་ནི། རང་གི་སྤྱི་བོར་ཤེལ་ཕོར་ཡུ་བ་ཅན། ཐེམ་ཞབས་སུ་ཡོད་པ་ལྟ་བུ། ཁ་གྱེན་དུ་གདེང་བའི་དབུས་སུ་ཡི་གེ་ཨཱཿདཀར་པོ་ལས་འོད་ཟེར་ལྕགས་ཀྱུ་དང་ཞགས་པ་ལྟ་བུར་ཕྱོགས་བཅུར་འཕྲོས། སངས་རྒྱས་སྲས་བཅས་མཆོད་ཅིང༌། སླར་དེ་དག་ཚེ་དང་བསོད་ནམས་བསྡུས། རིགས་དྲུག་གི་སེམས་ཅན་ལ་ཕོག །འོད་དཔག་མེད་ཀྱི་ས་ལ་བཀོད་ནས་དེ་དག་གི་ཚེ་དང་བསོད་ནམས། འབྱུང་བའི་བཅུད་བསྡུ་བ་རྣམས་ཀྱི་དམིགས་པ་གོང་དང་འདྲ་ལ། དེ་བཞིན་དུ་གོང་ལྟར་གསོལ་བ་བཏབ་པས། ཨཱཿལས་བདུད་རྩིའི་རྒྱུན་དཀར་པོ་ཐེམ་བུ་རྡོལ་བ་ལྟར་བབས་པས་གསང་གནས་ཕྱིན་གང༌། དེ་བཞིན་དུ་
XXX ལྟེ་བ། སྙིང་ཁ། མགྲིན་པ། སྤྱི་བོ་རྣམས་གང་བར་བསམ་ཞིང༌། འཇམ་རླུང་མཆིལ་མ་དང་བཅས་པ་སྟབས་སུ་ལྟེ་འོག་ཏུ་མནན། འོག་རླུང་ཡར་འཐེན་ནས་བུམ་པ་ཅན་བཟུང༌། དམིགས་པ་གཉིས་ནི། ཨཱཿལས་བདུད་རྩིའི་རྒྱུན་དམར་པོ་བབས་པར་བསམ་ལ་རླུང་སྔར་དང་འདྲ། རྩ་འཁོར་ལྔ་རིམ་གྱིས་གང་བར་བསྒོམ་ལ། རླུང་བཟུང་བ་དང་དམིགས་པ་སྟབས་སུ་བྱའོ། །མཐར་འཇོག་པའི་ཚེ། ཨཱཿདཀར་པོ་ལས་ཨཱཿ་དཀར་པོ་ཆར་བབས་པ་ལྟར་ཆད་ནས། ལུས་ཀྱི་ནང་ཐམས་ཅད་ཨཱཿས་ཐམ་འགགས་སུ་གྱུར་ནས་ཕྱི་རོལ་བ་སྤུའི་རྩ་བ་ཐམས་ཅད་ལས་ཀྱང་ཨཱཿས་གང་བར་བསམ་ལ་ངག་ཏུ་ཨཱཿཞེས་བརྗོད་ཀྱང་རུང་གསུངས་སོ། །མཐར་ལུས་ངག་ཡིད་གསུམ་མ་བཅོས་པའི་ངང་ལ་མཉམ་པར་བཞག་གོ །གསུམ་པ་ཐུགས་ཀྱི་སྒོ་ནས་འཆི་མེད་རྡོ་རྗེའི་ཚེ་བསྒྲུབ་པའི་ཁྲིད་ནི། རང་ལུས་ཐ་མལ་བར། སྟོང་ར་དམར་སེང་བསྒོམ་པའི་སྤྱི་བོར་པདྨ་དམར་པོ་འདབ་མ་བརྒྱད་པའི་ཟེའུ་འབྲུའི་སྟེང་དུ། ཐིག་ལེ་དམར་ལ་འཚེར་བ། སྣུམ་ལ་འདྲིལ་བ། དེ་ལས་འོད་ཟེར་ལྕགས་ཀྱུ་དང་ཞགས་པ་ལྟ་བུ་ཕྱོགས་བཅུར་འཕྲོས། ཕྱོགས་བཅུའི་རྒྱལ་བ་སྲས་བཅས་མཆོད། དེ་དག་གི་ཚེ་དང་བསོད་ནམས་འབྱུང་བའི་བཅུད་བསྡུ་བའི་དམིགས་པ་རྣམས་སྐུའི་ཁྲིད་དང་མཚུངས་ཤིང༌། སླར་གསོལ་འདེབས་གོང་དང་མཚུངས་སོ། །དེ་ནས་རླུང་རོ་ལན་གསུམ་འབུད་ལ། དམིགས་པ་བསྒོམ་པ་ནི། ཐིག་ལེ་ལས་བདུད་རྩིའི་རྒྱུན་དམར་ན་རང་བྱུང་བས། གསང་གནས་ཕྱིན་གང༌། དེ་བཞིན་དུ་ལྟེ་བ་དང༌། སྙིང་ཁ། མགྲིན་པ། སྤྱི་བོ་རྣམས་སུ་རིམ་
XXX གྱིས་གང་བར་བསྒོམ་ལ། འཇམ་རླུང་མཆིལ་མ་དང་སྟབས་སུ་ལྟེ་འོག་ཏུ་མནན། འོག་རླུང་འཐེན་པ་བུམ་པ་ཅན་བཟུང་ངོ༌། །མཐར་ཐིག་ལེ་ལ་ཐིག་ལེ་དཔག་ཏུ་མེད་པ་ཆད་ནས། ཆར་བབས་པ་ལྟར་ལུས་ཀྱི་ནང་ཐམས་ཅད་གང༌། ཐིག་ལེ་དམར་པོས་ཐམ་འགགས་སུ་གང་བར་བསྒོམ། ཕྱི་རོལ་བ་སྤུའི་རྩ་བ་ཐམས་ཅད་ཀྱང་ཐིག་ལེ་དམར་པོས་ཐམ་འགགས་སུ་གང་བར་བསམ་ལ་ལུས་ངག་ཡིད་གསུམ་མ་བཅོས་པའི་ངང་ལ་མཉམ་པར་བཞག་གོ །བཞི་པ་རྫོགས་རིམ་ལ་གསུམ་སྟེ། ཞི་གནས། ལྷག་མཐོང༌། འཕོ་བའོ། །དང་པོ་ཞི་གནས་ཀྱི་དོན་ལ་བཞི་སྟེ། དང་པོ་ཕྱི་ཡུལ་ལ་སེམས་བཟུང་བ་ལ་གཉིས་ཏེ། དང་པོ་མ་དག་པ་ཀ་བ་བུམ་པ་སོགས་ལ་སེམས་བཟུང་བ་ནི་མདུན་དུ་ཀ་བ། བུམ་པ། ཤིང་བུ། རྡེའུ་ལ་སོགས་པ་གང་ཡང་རུང་བ་ཞིག་ལ། ལུས་གནད་ལྟ་སྟངས་དང་བཅས་ལ་མ་ཡེངས་པར་སེམས་བཟུང༌། དེ་ལ་ཡེངས་སུ་ཡང་མི་འཇུག །རྟོག་པ་ཡང་མི་འགྱེད་དོ། །དེ་བཞིན་དུ་བྱིང་རྒོད་བྱུང་ན་སྟེང་འོག་ཏུ་སེམས་འཛིན་པ་དང༌། གཡས་གཡོན་དུའང་ཤེས་པར་བྱའོ། །གཉིས་པ་དག་པ་རྒྱལ་བའི་སྐུ་ལ་སེམས་བཟུང་བ་ནི། མདུན་དུ་འོད་དཔག་མེད་ཀྱི་སྐུ་གཟུགས་བཞག་པའམ། མེད་ན་བསྒོམ་ལ། དེ་ལ་རྟོག་པ་ཡང་མི་སྤྲོ། ཡེངས་སུ་ཡང་མི་འཇུག་གོ །དེ་ཐོག་ཏུ་མ་ཡེངས་ཙམ་དུ་གློད་ནས་འཇོག་པ་ནི་རྒྱལ་བའི་སྐུ་ལ་སེམས་འཛིན་པའོ། །གཉིས་པ་ནང་ན་སེམས་བཟུང་བ་ལ་ཡང་གཉིས་ཏེ། དང་པོ་མ་དག་པའི་ཐིག་ལེ་ལ་སེམས་བཟུང་བ་ནི། རང་གི་སྙིང་ཁང་ཐིག་ལེ་དཀར་ལ་འཚེར་བ། སྲན་འབྲུ་ཙམ་ལ་སེམས་བཟུང་བའོ། །
XXX གཉིས་པ་དག་པ་རྒྱལ་བའི་སྐུ་ལ་སེམས་བཟུང་བ་ནི། རང་གི་སྙིང་ཁར་པད་ཟླའི་སྟེང་དུ། འོད་དཔག་མེད་ཚོན་གང་བ་འོད་ཟེར་དང་བཅས་པ་ཞིག་ལ་སེམས་བཟུང་བའོ། །བྱིང་རྒོད་བྱུང་ན་གོང་བཞིན་བྱའོ། །གསུམ་པ་རྟོག་པ་ལ་སེམས་བཟུང་བ་ནི། རྣམ་པར་རྟོག་པ་ཐོལ་གྱིས་སྐྱེས་པ་ངོས་བཟུང་ནས་རྟོག་པ་དེ་ཉིད་ལ་ཅེར་ཅེར་བལྟས་པ་ན་འཛིན་མེད་དུ་ཞིག་ནས་རིག་སྟོང་དུ་གསལ་གསལ་འཆར་བ་སྟེ། རྣམ་རྟོག་གང་སྐྱེས་པ་དེ་ཉིད་ལ་གཏད་ནས་བསྒོམ། དེས་ནི་རྟོག་པ་མ་སྤངས་ལམ་དུ་ཁྱེར་བ་མན་ངག་གོ །བཞི་པ་འབྲས་བུའི་ཞི་གནས་མཐར་ཐུག་རྟོག་མེད་ལ་སེམས་བཟུང་བ་ནི། གནས་དབེན་པར་མུན་ཁང་གི་ནང་དུ་འབོལ་བའི་གདན་ལ། ལུས་རྣམ་སྣང་གི་ཆོས་བདུན་དང་ལྡན་པས། མིག་ནམ་མཁར་ཧད་དེ་གཏད་ལ། ཡིད་ལ་ཅི་ཡང་མི་བྱེད་པར་ནམ་མཁའ་སྟོང་པའི་ངང་ལ་མ་བཅོས་པ་རྟོག་མེད་དུ་གསལ་ལེ་ཧྲིག་གེ་མཉམ་པར་འཇོག་པ་ནི། རྟོག་མེད་ལ་སེམས་འཛིན་པའོ། །དེ་དག་གིས་ཞི་གནས་སོང་བའོ། །གཉིས་པ་ལྷག་མཐོང་ལ་དོན་གསུམ་སྟེ། དང་པོ་ལྷག་མཐོང་གི་རྒྱུ་ལ་རྣམ་པར་བརྟག་ཅིང་དཔྱད་པ་ནི། འདི་ལྟར་བདག་གི་སེམས་འདི་གང་ནས་བྱུང་ཞིང་གང་དུ་གནས། གང་དུ་འགྲོ་བར་འགྱུར། ཞེས་སྐྱེ་འགག་གནས་གསུམ་གྱི་ངོ་བོ་ལ་བརྟག་ཅིང་དཔྱད། འབྱུང་བ་ལྔ་རང་ལུས་ལས་བྱུང་ངམ་སྙམ་དུ་བརྟག་ཅིང་དཔྱད་པར་བྱའོ། །གཞན་ཡང་སེམས་ལ་ཁ་དོག་དཀར་དམར་སྔོ་སེར་ལྗང་ཁུ་ལ་སོགས་པའི་ཁ་དོག་ཡོད་པ་ཞིག་གམ། འོན་ཏེ་མེད་པ་ཞིག་སྙམ་དུ་བརྟག་ཅིང་དཔྱད། གང་དུ་བདག་གི་སེམས་ནི་ས་ཆུ་
XXX མེ་རླུང་ནམ་མཁའི་དབྱིབས་སམ། ཟླུམ་པོ། གྲུ་བཞི། ཟླ་གམ། གྲུ་གསུམ། ནར་མོ། འཇོང་མོ་ལ་སོགས་པའི་དབྱིབས་སུ་གྲུབ་པ་ཞིག་ཡིན་ནམ། དབྱིབས་མེད་པ་ཞིག་ཡིན། ཅེས་བརྟག་ཅིང་དཔྱད། སེམས་ལས་རྣམ་པར་རྟོག་པ་ལོག་ཅིག་ཡིན། འོན་ཏེ་རྣམ་པར་རྟོག་པ་སེམས་ཡིན་ཅེས་བརྟག་ཅིང་དཔྱད་པར་བྱའོ། །ཕྱི་རོལ་གྱི་སྣང་བ་འདི་སེམས་ལས་བྱུང་ངམ། འོན་ཏེ་སེམས་ལས་ཕྱི་རོལ་གྱི་སྣང་བ་བྱུང་ཞེས་བརྟག་ཅིང་དཔྱད་པར་བྱའོ། །སླར་ཡང་བརྟག་མཁན་གྱི་སེམས་ལ་ཡང་བརྟག་ཅིང་དཔྱད་དེ། སེམས་འདི་ཉིད་ཀྱང་ཡོད་པ་ཞིག་གམ་འོན་ཏེ་མེད་པ་ཞིག །གསལ་བ་ཞིག་གམ་འོན་ཏེ་མི་གསལ་བ་ཞིག །བདེ་བ་ཞིག་གམ་འོན་ཏེ་སྡུག་བསྔལ་བ་ཞིག །རྟག་པ་ཞིག་གམ་འོན་ཏེ་མི་རྟག་པ་ཞིག །སྣང་བ་ཞིག་གམ་འོན་ཏེ་མི་སྣང་བ་ཞིག །རིག་པ་ཞིག་གམ་འོན་ཏེ་མ་རིག་པ་ཞིག །བདག་ཡོད་པ་ཞིག་གམ་འོན་ཏེ་བདག་མེད་པ་ཞིག་ཅེས་བརྟག་ཅིང་དཔྱད་པར་བྱའོ། །དེའི་ཚེ་སེམས་ཀྱི་ངོ་བོ་སྟོང་པ་ནམ་མཁའ་ལྟ་བུ་ལ་རང་བཞིན་འོད་གསལ་ཞིང༌། རིག་པ་འགག་མེད་ཅིར་ཡང་འཆར་ཞིང་སྣང་བ་འདི། སྐྱེ་བ་མེད་པར་རོ་མཉམ། གནས་པ་མེད་པར་རོ་མཉམ། འགགས་པ་མེད་པར་རོ་མཉམ་ཞིང༌། གསལ་རིག་སྟོང་གསུམ་སྣང་སྟོང་དབྱེར་མེད་པ། བློ་འདས་ནམ་མཁའ་ལྟ་བུའི་དོན་མཐོང་ན་དེ་ཁོ་ན་ཉིད་དོ་ཞེས། གཞི་ལམ་འབྲས་བུའི་ཡོན་ཏན་ཐམས་ཅད་རྫོགས་པར་ངོ་སྤྲད་པར་བྱའོ། །གཉིས་པ་ལམ་གྱི་ལྷག་མཐོང་ཅིག་ཅར་དུ་ཉམས་སུ་བླངས་པར་བྱ་བ་ནི། སེམས་ཉིད་སྐྱེ་འགག་གནས་གསུམ་གྱི་མཐའ་
XXX དང་བྲལ་བ་བདག་དང་བདག་གིར་འཛིན་པ་མཚན་མའི་གཟུང་འཛིན་དང་བྲལ་ཞིང༌། མཐོང་བྱ་མཐོང་བྱེད་མེད་པ། ངོ་བོ་སྟོང་ཞིང་རང་བཞིན་གསལ་བ། རྣམ་པ་འགག་མེད་ཀྱི་རིག་པ་ཡུལ་མེད་དུ་མར་གསལ་ཞིང་སྣང་བ་བཅོས་བསླད་གྱིས་མ་གོས་པས་གསལ་ལེ་བ། རང་ངོ་རང་གིས་ཤེས་པས་ཧྲིག་གེ་བ། རྣམ་རྟོག་གཟུང་འཛིན་གྱིས་མ་གོས་པས་རྗེན་ནེ་བ། རིག་པ་ལ་བཟོ་བཅོས་མ་བྱས་པ་ཐ་མལ་གྱི་ཤེས་པ། རྣམ་རྟོག་ལུ་རྒྱུད་དུ་སྙིང་མི་འཇུག་པས་སོ་མ་ཞེས་བྱ་སྟེ། ལྷག་མཐོང་གི་ངོ་བོ་ཉམས་སུ་བླངས་བྱའི་དངོས་གཞིར་ངོ་སྤྲད་པར་བྱའོ། །གསུམ་པ་འབྲས་བུའི་མཐར་ཐུག་ཞི་ལྷག་ཟུང་འཇུག་ཉམས་སུ་བླང་བར་བྱ་བ་ནི། དེ་ཡང་མོས་གུས་བླ་མའི་རྣལ་འབྱོར་ལ་སེམས་གནས་པ་ཞི་གནས་ཡིན་ལ། ངོ་བོ་སྟོང་ཞིང་གྲུབ་པ་མེད་པར་མཐོང་བ་ནི་ལྷག་མཐོང་ངོ༌། །བསྐྱེད་རིམ་ཆུ་ཟླ་ལྟ་བུ་ལ་སེམས་གནས་པ་ནི་ཞི་གནས་ཡིན་ལ། ངོ་བོ་སྟོང་པ་སྐྱེ་འགག་གནས་གསུམ་དང་བྲལ་བ་ནི་ལྷག་མཐོང་ངོ༌། །སེམས་ཅན་ཐམས་ཅད་ལ་ཁྱབ་པའི་བྱམས་པ་དང་སྙིང་རྗེའི་དམིགས་པ་ལ་སེམས་གནས་པ་ནི་ཞི་གནས་ཡིན་ལ། རང་བཞིན་སྟོང་པ་ཉིད་ལ་སེམས་གནས་པ་ནི་ལྷག་མཐོང་ངོ༌། །ཐབས་བསོད་ནམས་ཀྱི་ཚོགས་སྒྱུ་མ་ལྟ་བུ་ལ་སེམས་གནས་པ་ཞི་གནས་ཡིན་ལ། དེ་དག་རང་བཞིན་མེད་པ་སྟོང་པ་ཉིད་དུ་མཐོང་བ་ནི་ལྷག་མཐོང་ངོ༌། །སྣང་བ་ཐམས་ཅད་སེམས་ཀྱི་རང་གཟུགས་ཆུ་ཟླ་ལྟ་བུ་ལ་སེམས་གནས་པ་ཞི་གནས་ཡིན་ལ། དེ་དག་རྗེན་ནེ་བ་སྐྱེ་མེད་ཆུ་ཟླ་ལྟ་བུ་མཐོང་བ་ལྷག་མཐོང་ངོ༌། །སེམས་ཀྱི་རང་བཞིན་འོད་གསལ་བར་སེམས་གནས་པ་ཞི་གནས། ངོ་བོ་སྤྲོས་བྲལ་གསལ་
XXX སྟོང་སྐྱེ་མེད་དུ་མཐོང་བ་ལྷག་མཐོང་ངོ༌། །བཅོས་བསླད་དང་བྲལ་བའི་རིག་པ་སོ་མ་ལ་སེམས་གནས་པ་ཞི་གནས། བདག་མེད་རིག་སྟོང་དབྱེར་མེད་དུ་མཐོང་བ་ལྷག་མཐོང་ངོ༌། །མདོར་ན་ཆུ་ཟླ་དང་མེ་ལོང་གི་གཟུགས་བརྙན་དང་བྲག་ཅ་ལྟར་སྣང་བ་ལས་གཞན་པའི་སྟོང་པ་མེད། སྟོང་པ་ལས་གཞན་པའི་སྣང་བ་མེད། སྣང་སྟོང་དབྱེར་མེད་ནམ་མཁའ་ལ་འཇའ་ཤར་བ་ལྟ་བུར་རྟོགས་ནས་དེའི་ངང་ལ་གནས་ཤིང༌། གཉིས་འཛིན་མཐའ་དག་སངས་ནས། རང་རིག་ཡེ་ཤེས་རྒྱས་པ་ལ་སངས་རྒྱས་ཤེས་བྱའོ། །ཟུང་འཇུག་ཅེས་ཀྱང་བྱ་སྟེ། མཐར་ཐུག་པའི་དོན་ནོ། །དེ་དག་ནི་ལྷག་མཐོང་ངོ༌། །གསུམ་པ་འཆི་ཁ་འཕོ་བའི་གདམས་ངག་ལ་དོན་གཉིས་ཏེ། དང་པོ་སྦྱང་བ་དང་གཉིས་པ་ལས་ལ་སྦྱར་བའོ། །དང་པོ་ནི་རང་གི་ལུས་སྟོང་རང་བསྒོམ་ལ། ལུས་ཀྱི་དབུས་སུ་རྩ་དབུ་མ་ཕྱི་དཀར་ལ་ནང་དམར་བ། ཁོང་སྟོང་སྦ་ལྕག་ཙམ། མར་སྣེ་ཕཊ་ཀྱིས་བཀག་པ། ཡར་སྣེ་ཚངས་བུག་རྒྱ་མཐོང་ཁ་བྱེ་བ་ལྟར་གསལ་ཧ་རེ་ཡོད་པ་བསམ་པའི་སྤྱི་བོའི་ཐད་ཀྱི་ནམ་མཁར་འདོམ་གང་ཙམ་གྱི་ཐད་སོར། སངས་རྒྱས་ཀྱི་ཞིང་ཁམས་རྣམ་པར་དག་པ། བདེ་བ་ཅན་གྱི་ཞིང་གི་བཀོད་པ་རྫོགས་པའི་དབུས་སུ། རིན་པོ་ཆེའི་ཁྲི་པདྨས་བཏེགས་པའི་སྟེང་དུ། རང་གི་རྩ་བའི་བླ་མ་འོད་དཔག་མེད་ལོངས་སྤྱོད་རྫོགས་པའི་ཆ་ལུགས་སུ་བཞུགས་པ་ལ། འཁོར་ཕྱོགས་བཅུའི་རྒྱལ་བ་སྲས་བཅས་ཀྱིས་བསྐོར་བ། མཚོ་དྭངས་པ་ལ་ཟླ་བ་ཤར་བ་ལྟ་བུ་གསལ་བར་བསྐྱེད། དེ་ནས་རང་གི་སེམས་ཀྱི་ངོ་བོ་ལྟེ་འོག་ཏུ་ཐིག་ལེ་དཀར་དམར་གཉིས་སུ་བསམ་ལ། ཐིག་ལེ་དཀར་པོ་དེས་དམར་པོ་ལ་བསྐོར་བ་གསུམ་བྱས་ནས། སྐར་མདའ་འཕང་
XXX བ་ལྟར་སྐྱ་རྩེར་གྱིས་སྤྱི་བོར་ཐོན་པར་བསམ་ལ། འོད་དཔག་མེད་ཀྱི་ཐུགས་ཁར་རེག་པ་རེ་བྱས་པར་བསམ། དེའི་ཚེ་ངག་ཏུ་ཧིཀ་ཅེས་བརྗོད། ཡང་ཀ་ཞེས་བརྗོད་པས་ཕྱིར་བབས་ནས། ཐིག་ལེ་དམར་པོ་ལ་བསྐོར་བ་གསུམ་བྱས་སླར་ཡང་ཧིག་ཅེས་བརྗོད་པས། ཡར་ལ་སྔར་བཞིན་འཁོར་བར་བསྒོམ། དེ་བཞིན་ཡར་འགྲོ་མར་འགྲོ་གཅིག་ཏུ་བརྩིས་ནས་ཐུན་རེ་ལ་བརྒྱ་རྩ་བརྒྱད་དང༌། སྟོང་རྩ་ལ་སོགས་པ་མ་འབྱོངས་བར་དུ་སྦྱོང༌། གཉིས་པ་ནི། འཆི་བའི་རྟགས་ཚང་ནས། ཞེན་ཆགས་མཐའ་དག་སྤང་ལ། སེམས་མ་ཡེངས་པར་བྱམས་སྙིང་རྗེ་སྔོན་དུ་འགྲོ་བས་སྤྱི་བོར་བླ་མ་གསལ་གདབ། ལུས་ཀྱི་དབུས་སུ་རྩ་གསལ་གདབ་ནས། ཐིག་ལེ་གཉིས་པོ་གཅིག་ཏུ་གྱུར་པར་བསམ་ལ། ཧིཀ་ཅེས་རླུང་སེམས་སྤྱི་བོར་དྲག་ཏུ་གཏད་པའི་སྦྱོར་བས་རིག་པ་སྐར་མདའ་བཏང་བ་ལྟར། འོད་དཔག་མེད་ཀྱི་ཐུགས་ཀར་འཕོ་མ་ཐུབ་ཀྱི་བར་དུ་རིག་པ་བ་རྩེ་གཅིག་ཏུ་ཡང་ནས་ཡང་དུ་དམིགས་པ་བསྒོམ་མོ། །དེ་ནས་བླ་མ་འོད་དཔག་མེད་བདེ་བ་ཅན་དུ་བྱོན་པར་བསམ་མོ། །དེས་ངེས་པར་བདེ་བ་ཅན་ཏུ་འཕོ་བར་འགྱུར་རོ། །དེ་ལྟར་ལེགས་པར་བཤད་པའི་རིན་ཆེན་གྲུ། །རབ་འབྱོར་ཡིད་བཞིན་དགོས་འདོད་ཀུན་འབྱུང་བ། །མན་ངག་སྙིང་པོ་བླ་མས་གསུངས་པ་བཞིན། །བྲིས་པའི་དགེ་བས་འགྲོ་ཀུན་སངས་རྒྱས་ཤོག །ཚེ་དཔག་མེད་ཡོན་ཏན་གྱི་ཁྲིད་འཆི་མེད་རྡོ་རྗེའི་སྐུ་བསྒྲུབ་པ་ཞེས་བྱ་བ། བླ་མའི་ཞལ་ནས་གསུངས་པ་ལྟར་རྣལ་འབྱོར་པ་འོད་དཔག་རྡོ་རྗེས་ཡི་གེར་བཀོད་པའོ།། །།ཤུབྷཾ།


XXX bcom ldan 'das mgon po tshe dpag med yon tan gyi khrid 'chi med rdo rje'i sku sgrub par byed pa bzhugs so/ /
XXX rin chen bye bas kun nas brgyan pa'i sku/_pad+ma rA ga'i lhun po ltar brjid cing*/ /thun mtshams nyi ma 'bum gyi gzi 'od can/_'dren pa 'od dpag med la phyag 'tshal lo/ /chu skyes zla ba'i skyil krung mdzod 'dzin cing*/ /mnyam bzhag steng na bum bzang bdud rtsis bkang*/ /'dzum bcas zhi ba'i zhal bstan mtshan dpes brgyan/ /mgon po 'od dpag med des bdag skyongs shig_/mgon po de yi ye shes 'od byed pas/ /dpal ldan mi tra'i 'dab stong yongs rgyas shing*/ /man ngag sbrang rtsi'i dga' ston gcig brgyud du/ /mkhas la dbang ba shrI pu tras so/ /de nas de yi bum bzang bdud rtsi'i mchog_/gang byos tshul du grags pa'i mtshan can la/ /legs par brgyud pa'i bdud rtsi'i sbrang rgyun ni/ /bdag gis 'thung bas brgyud kyi bdud rtsi bltams/ /zhes bya'o/ /de yang 'dir bcom ldan 'das mgon po tshe dpag med
XXX yon tan gyi khrid/_'chi med rdo rje'i sku sgrub par byed pa la don rnam pa bzhi ste/_dang po gdams pa'i 'di'i brgyud pa'i byung tshul ni/_rnal 'byor gyi dbang phyug mi tra dzA kis/_so sa gling gi dur khrod du thugs dam lha lnga bsgrubs pas/_de dag gis zhal mngon sum du gzigs shing*/_so so'i khrid kyi rim pa gsungs nas/ /mi rabs bdun gyi bar du bdag cag gis byin gyis brlabs pa'i gang zag las can sha stag 'byung ngo zhes gsungs pa yin no/ /de nas gdams pa gcig brgyud du bcom ldan 'das mgon po tshe dpag med kyis mi tra dzA ki la gsungs/_des paN+Dita shrI pu tra la/_des grags pa rin chen la/_des bud+d+ha shri la'o/ /de dag gis brgyud pa'i byung tshul songs nas/_gnyis pa sngon 'gro la gnyis/_thun mong gi sngon 'gro dang*/_khyad par gyi sngon 'gro'o/ /dang po thun mong gi sngon 'gro ni/_dal 'byor rnyed par dka' ba/_'chi ba mi rtag
XXX pa/_las rgyu 'bras kyi don bsam pa 'khor ba'i nyes dmigs bsgoms pa ste bzhi ni thun mong gi sngon 'gro'o/ /gnyis pa khyad par gyi sngon 'gro la bzhi/_dang po ci byas thar pa'i lam du 'gro bar byed pa skyabs 'gro sems bskyed kyi khrid ni/_rang gi spyi gtsug gi nam mkhar rin po che du ma las grub pa'i khri yangs shing rgya che ba/_rma byas btegs pa'i steng du/_rab rgyas pad+ma 'bum ldan dang zla ba'i steng du rang gi rtsa ba'i bla ma 'od dpag med kyi rnam pa can/_longs spyod rdzogs pa'i sku'i cha lugs kyis gnas pa la bka' brgyud bla mas bskor ba/_mdun du yi dam rgya mtsho/_g.yas su sangs rgyas rgya mtsho/_rgyab tu gsung rab rgya mtsho/_g.yon du dge 'dun rgya mtsho/_'og tu mkha' 'gro chos skyong rgya mtshos gang zhing*/_phyogs dang phyogs mtshams thams cad sangs rgyas dang byang chub sems dpa' thams cad sprin phung 'thibs pa ltar gtibs pa'i skyabs zhabs na/_bdag dang mtha' yas pa'i sems can thams cad tshud par bsam zhing*/_thams cad mos pa dang ldan pas skyabs 'gro ku di ri ri byed par bsgoms la/_skyabs su 'gro bar bya'o/ /byang chub mchog tu sems bskyed do/ /mthar de dag 'od du zhu nas rang la thim pas/_lus ngag yid gsum ma bcos par rtog med du phyam me ba/_'dzin med du shig ge ba/_gsal stong dus sa le ba/_phyag rgya chen po'i ngang la bzhag pa ni don gyi skyabs 'gro'o/ /gnyis pa sdig sgrib dag byed hrIHyig bzhi sbyor gyi khrid ni/_rang gi spyi bo'i hrIHyig dmar po tsheg drag dang bcas pa la bdud rtsi 'o ma'i rgyun lta bu dkar nar ra ra babs pas/_lus kyi nang
XXX gi nad gdon sdig sgrib thams cad dud khu sol khu'i rnam par ded nas/_rtsa sgo chu sgo sen mo'i bar nas bud de/_sa rim pa dgu'i zhabs su song zhing*/_lus thams cad ye shes kyi bdud rtsis dkar ltem gyis gang bar bsgom pa ni sdig pa dag byed kyi sbyor ba'o/ /gnyis pa nad dag par byed pa'i sbyor ba ni/_tshad pa'i nad la bdud rtsi gangs chu dang*/_ga bur gyi chu lta bu bsil ba'i rang bzhin can/_grang ba'i nad la bdud rtsi khro chu khol ma lta bu tsha ba'i ngad dang ldan pa/_'dus pa'i nad la zhun mar lta bu bdo ba'i rang bzhin can babs pas nad thams cad zhi bar bsgom mo/ /gsum pa gdon dag par byed pa'i sbyor ba ni hrIHyig las rta mgrin sku chung la yan lag dod pa/_phyag mtshan dang bcas pa/_me dpung 'bar zhing mang po byung nas lus kyi nang gang gdon thams cad bsreg bcom nas/_rtsa sgo chu sgo ba spu'i sgo rnams nas/_sdom dang sdig pa'i rnam par bud par bsgom mo/ /bzhi po 'od zer gyi sbyor ba byed pa ni hrIHyig las 'od zer kha dog sna lnga dang ldan pas/_nyi ma stong gi 'od lta bu 'phros/_lus kyi nang gang nas/_nad gdon sdig sgrib thams cad sbyangs shing phyi rol tu 'phros pas sems can thams cad kyi nad gdon sdig sgrib rnams sbyangs bar bsgom/_de dag gi skabs su ngag tu hrIHzhes 'don par bya'o/ /mthar rang lus 'od du zhu nas hrIHla thim/_hrIHnam mkha' la 'ja' yal ba ltar dmigs med kyi ngang la/_lus gnad lta stangs dang ldan par bzhag pa ni don gyi gshags pa'o/ /gsum pa tshogs gnyis rdzogs par byed pa maN+Dal
XXX gyi khrid ni gnyis te/_dang po sgrub pa'i maN+Dal ni/_gling bzhi gling phran brgyad kyis bskor ba'i ri bo mchog rab kyi steng du/_rin po che sna tshogs las grub pa'i gzhal yas khang gi nang du/_skyabs su 'gro ba'i dmigs yul bsgoms pa ltar bskyed la me tog gi tshom bu bkod/_de nas maN+Dal gnyis yod na de nyid du bzhag la/_mchod pa'i maN+Dal mdun du mchod/_gnyis med na/_lha de dag bar snang la btegs la/_sgrub pa'i maN+Dal bsgrub ste/_ri rab gling bzhi/_rgyal srid sna bdun/_bkra shis rtags brgyad phyi nang gi mchod pa'i lha mo du ma blos sprul nas/_maN+Dal spyi ltar lan nyi shu rtsa gcig gi bar du 'bul lo/ /des ni bsod nams kyi tshogs rdzogs par byed do/ /mthar mchod yul gyi lha rnams 'od du zhu nas rang la thim pas rang gi lus ngag yid gsum dbyer med du ma bcos pa'i ngang la mnyam par bzhag go_/de ni ye shes kyi tshogs so/ /bzhi pa byin rlabs myur du 'jug par byed pa bla ma'i rnal 'byor gyi khrid ni/_rang gi spyi bo'i gtsug tu rin po che du ma las grub pa'i khri yangs shing rgya che ba'i steng du/_sna tshogs pad+ma 'bum ldan dang zla ba'i dkyil 'khor gyi steng du rtsa ba'i bla ma 'od dpag med longs spyod rdzogs sku'i cha lugs su bzhugs pa/_de'i spyi bor paN chen shrI putra/_de'i spyi bor grub thob mitra dz+wa ki_g.yas DA ma ru/_g.yon dril bu/_spyan nam mkhar gzigs pa/_sku la ras kyi ang+ga rag smad g.yogs can/_rus pa'i rgyan drug 'khrol ba/_de'i spyi bor spyan ras gzigs zhal gcig phyag bzhi pa/_rin po che'i rgyan gyis brgyan
XXX pa/_bla ma de dag 'ja' 'od kyi dbus na sku gzi mdangs dang bcas pa/_gsung tshangs dbyangs dang bcas pa/_thugs byin rlabs dang bcas pa'i rang bzhin du bzhugs pa'i spyi bor oM dkar po/_mgrin par AHdmar po/_snying khar hU~M mthing kha/_lte bar ho ser po las 'od 'phros pas/_phyogs bcu'i rtsa brgyud kyi bla ma rnams dang*/_yi dam dkon mchog gsum/_mkha' 'gro chos skyong thams cad 'od zer gyis spyan drangs nas/_bla ma de'i sku gsung thugs kyi spyi bo/_mgrin pa/_snying kha/_lte ba/_gsang gnas rnams su thim par bsgom/_bla ma kun 'dus kyi ngo bor bsam la maN+Dal phul/_gsol ba gdab nas dbang bskur zhu ba ni bzhi las/_dang po 'od zer gyi sbyong ba ni/_bla ma rnams kyi spyi bor oM dkar po/_mgrin par AHdmar po/_snying khar hU~M yig sngon po/_lte bar ho yig ser po bzhi las 'od zer rim pa bzhin du dkar dmar mthing ser phyung nas/_rang gi gnas bzhir phog pas/_gnas skabs bzhi'i sgrib pa thams cad sbyong nas dbang bzhi thob par bsgom mo/ /bla ma'i gnas bzhi'i yi ge bzhi las/_bdud rtsi 'o ma'i rgyun lta bu dang*/_pad+ma rA ga zhu ba'i rgyun lta bu dang*/_mthon mthing zhu ba lta bu dang*/_gser zhun lta bu bzhi byung nas/_rim gyis rang gi spyi bo tshangs bug nas zhugs/_lus kyi nang gang*/_sgrib pa bzhi dag_/dga' ba bzhi'i ye shes/_dbang bzhi thob/_sku bzhi mngon du byas par bsgom mo/ /gsum pa yig 'bru brtan par byed pa ni/_yig 'bru bzhi
XXX rim gyis gdan dang bcas pa rbad kyis chad nas rang gi gnas bzhir thim par bsgom mo/ /des kyang sgrib pa bzhi dag_/dga' ba bzhi skyes/_dbang bzhi brtan/_sku bzhi mngon du byas par bsgom mo/ /bzhi pa yongs rdzogs kyi dbang ni/_brgyud pa'i bla ma rnams rim gyis 'od du zhu nas rtsa ba'i bla ma la thim/_rtsa ba'i bla ma 'od du zhu nas rang la thim pas/_bla ma'i sku gsung thugs dang rang gi lus ngag yid gsum dbyer med du gyur nas/_sems nyid ma bcos pa'i ngang la lhod kyis glod la rig pa rtog med 'dzin med du shig ge bzhag go_/de ni bla med don gyi rnal 'byor ro/ /gsum pa bskyed pa'i rim pa'i khrid la bzhi ste/_dang po srung ba'i 'khor lo bsgom pa ni/_stong pa'i ngang las hU~M las sna tshogs rdo rje rgya gram gyi lte bar hrIHsa mtshan pa/_de las 'od 'phros/_'og rdo rje sa gzhi/_phyogs rdo rje'i ra ba dang drwa ba/_steng rdo rje'i gur dang bla re/_phyi rol mtshon cha sna tshogs kyis gang zhing*/_ye shes kyi me 'bar ba'i rang bzhin du gyur/_de'i dbus su hrIHlas rang nyid rta mgrin dmar po zhal gcig phyag gnyis/_zhabs gnyis pad nyi'i gdan la brkyang bskum gyis bzhugs pa/_phyag g.yas be con nam mkhar gdengs pa/_g.yon pa sdigs mdzub thugs kar bsgrengs pa/_zhal gdangs shing ljags 'dril ba/_rno zhing dkar ba'i mche ba bzhi gtsigs pa/_spyan gsum dmar la g.yo ba/_smin ma dbu skra 'bar ba/_spyi gtsug rta mgo ljang zhur rngog ma le brgan me ltar 'bar ba/_stag gi pags pa'i sham thabs can/_sbrul dang rin po che du mas brgyan pa/
XXX bskal pa'i me chen 'bar ba'i dbus na bzhugs par bsam la/_sku de las de lta bu'i khro chung dpag tu med pa 'phros nas/_gdon bgegs thams cad bcom zhing bsregs nas/_srung 'khor gyi phyi rol du/_zhal phyir gzigs nas bar chad bsrung ba'i tshul du tham 'gags su bzhugs pa/_gzhan rnams zhal nang du gzigs nas/_bsrung bar mdzad cing tham 'gags su bzhugs par bsgom pa ni/_srung 'khor gyi khrid rim mo/ /gnyis pa dngos gzhi'i sgo nas 'chi med rdo rje'i tshe bsgrub pa'i khrid ni/_tshad med bzhi sngon du 'gro bas/_rang tha mal par gnas pa'i lus kyi nang stong dmar seng ba bsgom/_spyi bor rin po che du ma las grub pa'i khri yangs shing rgya che ba'i steng du/_pad+ma 'bum ldan dang zla ba'i dkyil 'khor gyi steng du hrIHlas 'od 'phros/_don gnyis byas tshul 'dus yongs su gyur pa las bcom ldan 'das mgon po tshe dpag med sku mdog pad+ma rA ga ltar dmar ba/_zhabs rdo rje skyil krung can/_phyag gnyis mnyam bzhag gi steng na/_'chi med rdo rje'i tshe'i bum pa ye shes kyi bdud rtsis bkang ba 'dzin pa/_spyan dkyus dang smin dkyus ring zhing*/_mdzod spu dkar pos brgyan pa/_dbu skra ral pa'i thor cog dang cod pan can/_rin po che sna lnga'i rtse phran dang snyan cha/_mgul rgyan dang phyag gdub/_'og pag dang zhabs gdub/_dar gyi cod pan dang mu tig sna lngas brgyan pa/_mtshan bzang po sum cu rtsa gnyis dang*/_dpe byad bzang po brgyad cus mdzes pa/_'jig rten gyi khams thams cad 'od zer gyis snang bar byed pa'i bdag
XXX nyid du bsam la/_de'i spyi bor oM dkar po/_mgrin par A dmar po/_thugs khar hU~M sngon po gsum las 'od 'phros/_tshe dpag med la phyogs bcu'i rgyal ba sras bcas kyis bskor ba spyan drangs la/_tshe dpag med de la dbyer med du thim par bsgom/_bcom ldan 'das kyi phyag gi bum pa'i dbus su hrIHdmar po tsheg drag dang bcas pa las 'od zer phyogs bcur 'phros/_phyogs bcu'i rgyal ba sras dang bcas pa thams cad la mchod pa'i sprin phung du mas mchod/_de dag gi rdo rje'i tshe dang bsod nams/_dpal dang gzi brjid sku gsung thugs yon tan phrin las ye shes thams cad 'od zer gyis bsdus nas/_bum nang gi hrIHla thim par bsgom/_slar yang lcags kyu dang zhags pa lta bu'i 'od zer sna lnga phyogs bcur 'phros pas/_phyogs bcu'i lha dang klu dang*/_gnod sbyin dang*/_dri za dang*/_lha ma yin dang*/_nam mkha' lding dang*/_mi'am ci dang*/_lto 'phye la sogs te/_sems can thams cad la phog de dag 'od dpag med kyi go 'phang la bkod/_de dag gi tshe dang bsod nams/_dpal dang 'byor pa/_grags pa dang ye shes yon tan thams cad 'od zer gyis bsdus nas bum nang gi hrIHla thim par bsgom/_yang 'od zer 'phros nas phyogs bcu'i sa chu me rlung*/_nam mkha'/_nyi zla dang*/_dpag bsam gyi shing*/_nor bu rin po che sna lnga la sogs pa 'byung ba'i bcud thams cad dang nus pa/_bkrag dang gzi mdangs/_'od dang yon tan thams cad hrIHla thim par bsgom/_de nas bcom ldan 'das la sprul pa'i mchod pas mchod la/_gsol
XXX ba btab pa ni/_bcom ldan 'das 'od dpag med kyis bdag dang sems can thams cad la/_sku gsung thugs yon tan phrin las tshe dang ye shes kyis dbang bskur zhing*/_dngos grub stsal du gsol/_zhes gsol ba btab pas/_bum pa'i nang nas bdud rtsi'i rgyun 'o ma lta bu spyi bo tshangs pa'i bu ga nas mar babs pa la rig pa gtad nas/_rlung ro lan gsum bus la/_rlung tshur rngub pa dang*/_stabs su mchil ma zhig mid btang la/_rlung de lte bar mnan nas 'og rlung 'then la bum pa can bzung la/_bdud rtsi'i rgyun gyis gsang gnas yan chad dkar ltem gyis gang bar bsam la/_dmigs pa thebs re bya/_de bzhin du lte ba/_snying kha/_mgrin pa/_spyi bo man chad dkar ltem gyis gang bar bsam la/_dmigs pa thebs re bya gsungs/_de ltar dmigs thebs rgyas pa bsgom/_'byong na rlung thebs re dang rtsa 'khor gang ba'i dmigs pa sbrag nas/_dmigs pa thebs gcig la rtsa 'khor lnga lnga gang bar yang yang bsgom/_yang dmigs thebs lhag ma bzhi ni/_'od dpag med bskyed cing bum nang gi hrIHlas 'od zer spro bsdu byed pa gong dang 'dra ba la/_bdud rtsi'i rgyun dmar po pad+ma rA ga zhu ba lta bu dang*/_sngon po baiDUr+Ya zhun ma lta bu dang*/_ser po gser zhun ma lta bu dang*/_ljang khu mar gad lta bu dang lnga po spyi gtsug tshangs bug nas mar babs par bsams la rlung ro lan gsum bsal nas mchil ma zhig mid/_de lte ba'i 'og tu bsgyur la steng rlung chil gyis mnan/_'og rlung yar 'then la bum pa can bzung*/
XXX bdud rtsi lnga pos gsang gnas gang ba dang*/_lte ba/_snying kha/_mgrin pa/_spyi bor gang bar bsgom/_rgyas par byed na dmigs thebs re re byas/_ma 'byong na dmigs thebs res bdud rtsi kha dog re rdzogs par byed/_des bdud rtsi dmar po rgyun babs pas lus thams cad dmar ltem gyis gang bar bsam/_de bzhin sngon po dang ser po/_ljang khu'i bdud rtsi'i rgyan babs pa'i tshe so so'i kha dog ltar/_rang lus kyang 'od dpag med rigs lnga'i rnam par gsal zhing*/_'chi med rdo rje'i tshe thob snyam du bsgom/_de dag rdzogs nas 'od dpag med 'od zhu nas rang la thim pas/_lus kyi nang thams cad 'od dpag med yungs 'bru tsam gyis tham 'gags su gang zhing*/_phyi rol ba spu'i rtsa ba thams cad kyang sku gang bar bsgom la/_lus ngag yid gsum ma bcos pa'i ngang la bzhag go_/gnyis pa gsung gi sgo nas 'chi med gsung bsgrub pa'i khrid ni/_rang gi spyi bor shel phor yu ba can/_them zhabs su yod pa lta bu/_kha gyen du gdeng ba'i dbus su yi ge AHdkar po las 'od zer lcags kyu dang zhags pa lta bur phyogs bcur 'phros/_sangs rgyas sras bcas mchod cing*/_slar de dag tshe dang bsod nams bsdus/_rigs drug gi sems can la phog_/'od dpag med kyi sa la bkod nas de dag gi tshe dang bsod nams/_'byung ba'i bcud bsdu ba rnams kyi dmigs pa gong dang 'dra la/_de bzhin du gong ltar gsol ba btab pas/_AHlas bdud rtsi'i rgyun dkar po them bu rdol ba ltar babs pas gsang gnas phyin gang*/_de bzhin du
XXX lte ba/_snying kha/_mgrin pa/_spyi bo rnams gang bar bsam zhing*/_'jam rlung mchil ma dang bcas pa stabs su lte 'og tu mnan/_'og rlung yar 'then nas bum pa can bzung*/_dmigs pa gnyis ni/_AHlas bdud rtsi'i rgyun dmar po babs par bsam la rlung sngar dang 'dra/_rtsa 'khor lnga rim gyis gang bar bsgom la/_rlung bzung ba dang dmigs pa stabs su bya'o/ /mthar 'jog pa'i tshe/_AHdkar po las AH dkar po char babs pa ltar chad nas/_lus kyi nang thams cad AHsa tham 'gags su gyur nas phyi rol ba spu'i rtsa ba thams cad las kyang AHsa gang bar bsam la ngag tu AHzhes brjod kyang rung gsungs so/ /mthar lus ngag yid gsum ma bcos pa'i ngang la mnyam par bzhag go_/gsum pa thugs kyi sgo nas 'chi med rdo rje'i tshe bsgrub pa'i khrid ni/_rang lus tha mal bar/_stong ra dmar seng bsgom pa'i spyi bor pad+ma dmar po 'dab ma brgyad pa'i ze'u 'bru'i steng du/_thig le dmar la 'tsher ba/_snum la 'dril ba/_de las 'od zer lcags kyu dang zhags pa lta bu phyogs bcur 'phros/_phyogs bcu'i rgyal ba sras bcas mchod/_de dag gi tshe dang bsod nams 'byung ba'i bcud bsdu ba'i dmigs pa rnams sku'i khrid dang mtshungs shing*/_slar gsol 'debs gong dang mtshungs so/ /de nas rlung ro lan gsum 'bud la/_dmigs pa bsgom pa ni/_thig le las bdud rtsi'i rgyun dmar na rang byung bas/_gsang gnas phyin gang*/_de bzhin du lte ba dang*/_snying kha/_mgrin pa/_spyi bo rnams su rim
XXX gyis gang bar bsgom la/_'jam rlung mchil ma dang stabs su lte 'og tu mnan/_'og rlung 'then pa bum pa can bzung ngo*/ /mthar thig le la thig le dpag tu med pa chad nas/_char babs pa ltar lus kyi nang thams cad gang*/_thig le dmar pos tham 'gags su gang bar bsgom/_phyi rol ba spu'i rtsa ba thams cad kyang thig le dmar pos tham 'gags su gang bar bsam la lus ngag yid gsum ma bcos pa'i ngang la mnyam par bzhag go_/bzhi pa rdzogs rim la gsum ste/_zhi gnas/_lhag mthong*/_'pho ba'o/ /dang po zhi gnas kyi don la bzhi ste/_dang po phyi yul la sems bzung ba la gnyis te/_dang po ma dag pa ka ba bum pa sogs la sems bzung ba ni mdun du ka ba/_bum pa/_shing bu/_rde'u la sogs pa gang yang rung ba zhig la/_lus gnad lta stangs dang bcas la ma yengs par sems bzung*/_de la yengs su yang mi 'jug_/rtog pa yang mi 'gyed do/ /de bzhin du bying rgod byung na steng 'og tu sems 'dzin pa dang*/_g.yas g.yon du'ang shes par bya'o/ /gnyis pa dag pa rgyal ba'i sku la sems bzung ba ni/_mdun du 'od dpag med kyi sku gzugs bzhag pa'am/_med na bsgom la/_de la rtog pa yang mi spro/_yengs su yang mi 'jug go_/de thog tu ma yengs tsam du glod nas 'jog pa ni rgyal ba'i sku la sems 'dzin pa'o/ /gnyis pa nang na sems bzung ba la yang gnyis te/_dang po ma dag pa'i thig le la sems bzung ba ni/_rang gi snying khang thig le dkar la 'tsher ba/_sran 'bru tsam la sems bzung ba'o/ /
XXX gnyis pa dag pa rgyal ba'i sku la sems bzung ba ni/_rang gi snying khar pad zla'i steng du/_'od dpag med tshon gang ba 'od zer dang bcas pa zhig la sems bzung ba'o/ /bying rgod byung na gong bzhin bya'o/ /gsum pa rtog pa la sems bzung ba ni/_rnam par rtog pa thol gyis skyes pa ngos bzung nas rtog pa de nyid la cer cer bltas pa na 'dzin med du zhig nas rig stong du gsal gsal 'char ba ste/_rnam rtog gang skyes pa de nyid la gtad nas bsgom/_des ni rtog pa ma spangs lam du khyer ba man ngag go_/bzhi pa 'bras bu'i zhi gnas mthar thug rtog med la sems bzung ba ni/_gnas dben par mun khang gi nang du 'bol ba'i gdan la/_lus rnam snang gi chos bdun dang ldan pas/_mig nam mkhar had de gtad la/_yid la ci yang mi byed par nam mkha' stong pa'i ngang la ma bcos pa rtog med du gsal le hrig ge mnyam par 'jog pa ni/_rtog med la sems 'dzin pa'o/ /de dag gis zhi gnas song ba'o/ /gnyis pa lhag mthong la don gsum ste/_dang po lhag mthong gi rgyu la rnam par brtag cing dpyad pa ni/_'di ltar bdag gi sems 'di gang nas byung zhing gang du gnas/_gang du 'gro bar 'gyur/_zhes skye 'gag gnas gsum gyi ngo bo la brtag cing dpyad/_'byung ba lnga rang lus las byung ngam snyam du brtag cing dpyad par bya'o/ /gzhan yang sems la kha dog dkar dmar sngo ser ljang khu la sogs pa'i kha dog yod pa zhig gam/_'on te med pa zhig snyam du brtag cing dpyad/_gang du bdag gi sems ni sa chu
XXX me rlung nam mkha'i dbyibs sam/_zlum po/_gru bzhi/_zla gam/_gru gsum/_nar mo/_'jong mo la sogs pa'i dbyibs su grub pa zhig yin nam/_dbyibs med pa zhig yin/_ces brtag cing dpyad/_sems las rnam par rtog pa log cig yin/_'on te rnam par rtog pa sems yin ces brtag cing dpyad par bya'o/ /phyi rol gyi snang ba 'di sems las byung ngam/_'on te sems las phyi rol gyi snang ba byung zhes brtag cing dpyad par bya'o/ /slar yang brtag mkhan gyi sems la yang brtag cing dpyad de/_sems 'di nyid kyang yod pa zhig gam 'on te med pa zhig_/gsal ba zhig gam 'on te mi gsal ba zhig_/bde ba zhig gam 'on te sdug bsngal ba zhig_/rtag pa zhig gam 'on te mi rtag pa zhig_/snang ba zhig gam 'on te mi snang ba zhig_/rig pa zhig gam 'on te ma rig pa zhig_/bdag yod pa zhig gam 'on te bdag med pa zhig ces brtag cing dpyad par bya'o/ /de'i tshe sems kyi ngo bo stong pa nam mkha' lta bu la rang bzhin 'od gsal zhing*/_rig pa 'gag med cir yang 'char zhing snang ba 'di/_skye ba med par ro mnyam/_gnas pa med par ro mnyam/_'gags pa med par ro mnyam zhing*/_gsal rig stong gsum snang stong dbyer med pa/_blo 'das nam mkha' lta bu'i don mthong na de kho na nyid do zhes/_gzhi lam 'bras bu'i yon tan thams cad rdzogs par ngo sprad par bya'o/ /gnyis pa lam gyi lhag mthong cig car du nyams su blangs par bya ba ni/_sems nyid skye 'gag gnas gsum gyi mtha'
XXX dang bral ba bdag dang bdag gir 'dzin pa mtshan ma'i gzung 'dzin dang bral zhing*/_mthong bya mthong byed med pa/_ngo bo stong zhing rang bzhin gsal ba/_rnam pa 'gag med kyi rig pa yul med du mar gsal zhing snang ba bcos bslad gyis ma gos pas gsal le ba/_rang ngo rang gis shes pas hrig ge ba/_rnam rtog gzung 'dzin gyis ma gos pas rjen ne ba/_rig pa la bzo bcos ma byas pa tha mal gyi shes pa/_rnam rtog lu rgyud du snying mi 'jug pas so ma zhes bya ste/_lhag mthong gi ngo bo nyams su blangs bya'i dngos gzhir ngo sprad par bya'o/ /gsum pa 'bras bu'i mthar thug zhi lhag zung 'jug nyams su blang bar bya ba ni/_de yang mos gus bla ma'i rnal 'byor la sems gnas pa zhi gnas yin la/_ngo bo stong zhing grub pa med par mthong ba ni lhag mthong ngo*/ /bskyed rim chu zla lta bu la sems gnas pa ni zhi gnas yin la/_ngo bo stong pa skye 'gag gnas gsum dang bral ba ni lhag mthong ngo*/ /sems can thams cad la khyab pa'i byams pa dang snying rje'i dmigs pa la sems gnas pa ni zhi gnas yin la/_rang bzhin stong pa nyid la sems gnas pa ni lhag mthong ngo*/ /thabs bsod nams kyi tshogs sgyu ma lta bu la sems gnas pa zhi gnas yin la/_de dag rang bzhin med pa stong pa nyid du mthong ba ni lhag mthong ngo*/ /snang ba thams cad sems kyi rang gzugs chu zla lta bu la sems gnas pa zhi gnas yin la/_de dag rjen ne ba skye med chu zla lta bu mthong ba lhag mthong ngo*/ /sems kyi rang bzhin 'od gsal bar sems gnas pa zhi gnas/_ngo bo spros bral gsal
XXX stong skye med du mthong ba lhag mthong ngo*/ /bcos bslad dang bral ba'i rig pa so ma la sems gnas pa zhi gnas/_bdag med rig stong dbyer med du mthong ba lhag mthong ngo*/ /mdor na chu zla dang me long gi gzugs brnyan dang brag ca ltar snang ba las gzhan pa'i stong pa med/_stong pa las gzhan pa'i snang ba med/_snang stong dbyer med nam mkha' la 'ja' shar ba lta bur rtogs nas de'i ngang la gnas shing*/_gnyis 'dzin mtha' dag sangs nas/_rang rig ye shes rgyas pa la sangs rgyas shes bya'o/ /zung 'jug ces kyang bya ste/_mthar thug pa'i don no/ /de dag ni lhag mthong ngo*/ /gsum pa 'chi kha 'pho ba'i gdams ngag la don gnyis te/_dang po sbyang ba dang gnyis pa las la sbyar ba'o/ /dang po ni rang gi lus stong rang bsgom la/_lus kyi dbus su rtsa dbu ma phyi dkar la nang dmar ba/_khong stong sba lcag tsam/_mar sne phaT kyis bkag pa/_yar sne tshangs bug rgya mthong kha bye ba ltar gsal ha re yod pa bsam pa'i spyi bo'i thad kyi nam mkhar 'dom gang tsam gyi thad sor/_sangs rgyas kyi zhing khams rnam par dag pa/_bde ba can gyi zhing gi bkod pa rdzogs pa'i dbus su/_rin po che'i khri pad+mas btegs pa'i steng du/_rang gi rtsa ba'i bla ma 'od dpag med longs spyod rdzogs pa'i cha lugs su bzhugs pa la/_'khor phyogs bcu'i rgyal ba sras bcas kyis bskor ba/_mtsho dwangs pa la zla ba shar ba lta bu gsal bar bskyed/_de nas rang gi sems kyi ngo bo lte 'og tu thig le dkar dmar gnyis su bsam la/_thig le dkar po des dmar po la bskor ba gsum byas nas/_skar mda' 'phang
XXX ba ltar skya rtser gyis spyi bor thon par bsam la/_'od dpag med kyi thugs khar reg pa re byas par bsam/_de'i tshe ngag tu hika ces brjod/_yang ka zhes brjod pas phyir babs nas/_thig le dmar po la bskor ba gsum byas slar yang hig ces brjod pas/_yar la sngar bzhin 'khor bar bsgom/_de bzhin yar 'gro mar 'gro gcig tu brtsis nas thun re la brgya rtsa brgyad dang*/_stong rtsa la sogs pa ma 'byongs bar du sbyong*/_gnyis pa ni/_'chi ba'i rtags tshang nas/_zhen chags mtha' dag spang la/_sems ma yengs par byams snying rje sngon du 'gro bas spyi bor bla ma gsal gdab/_lus kyi dbus su rtsa gsal gdab nas/_thig le gnyis po gcig tu gyur par bsam la/_hika ces rlung sems spyi bor drag tu gtad pa'i sbyor bas rig pa skar mda' btang ba ltar/_'od dpag med kyi thugs kar 'pho ma thub kyi bar du rig pa ba rtse gcig tu yang nas yang du dmigs pa bsgom mo/ /de nas bla ma 'od dpag med bde ba can du byon par bsam mo/ /des nges par bde ba can tu 'pho bar 'gyur ro/ /de ltar legs par bshad pa'i rin chen gru/ /rab 'byor yid bzhin dgos 'dod kun 'byung ba/ /man ngag snying po bla mas gsungs pa bzhin/ /bris pa'i dge bas 'gro kun sangs rgyas shog_/tshe dpag med yon tan gyi khrid 'chi med rdo rje'i sku bsgrub pa zhes bya ba/_bla ma'i zhal nas gsungs pa ltar rnal 'byor pa 'od dpag rdo rjes yi ger bkod pa'o// //shub+haM/


Footnotes[edit]



Research Information
Translator's notes
Note from Ringu Tulku
Tse-Pa-Me Instructions Called: " Accomplishing the Deathless Vajra Body" (Quality Instructions) by Eupa Dorje.
Notes on the text itself
Notes on authorship
Notes on individuals related to text
Other notes
Genre from Richard Barron's Catalog
Instruction manual
Genre from dkar chag
khrid phran
BDRC Link
VolumeI1CZ3979
BDRC Content Information
No note on contents


Related Content
Recensions
Other Translations
Commentary(s) of this Text in the DNZ
Text(s) in the DNZ of which this is a commentary
Related Western Publications
Related Tibetan Publications
Other Information

Information about Unicode Tibetan and the digitization of this text

As the only available unicode Tibetan text at the time, Nitartha International's version of the Paro Edition of the gdams ngag mdzod is provided here. However, note that it has not been thoroughly edited and that there may also be mistakes introduced through the conversion process. Eventually we will provide a fully edited version of the entire Shechen Edition, entered and edited multiple times by Pulahari Monastery in Nepal, but as of fall 2017 that project has not been finished. Note that the folio numbers that appear throughout were added by Nitartha Input Center at the time of input.

Provided by Nitartha International Document Input Center. Many thanks to Lama Tenam and Gerry Wiener for help with fonts and conversion.

View JSON

JSON Export