Wylie:Grub mchog spyi la brten pa'i bla ma'i rnal 'byor rgya gar lugs dngos grub thig le 'khyil pa

From gDams Ngag mDzod
Revision as of 16:38, 14 April 2022 by MortO (talk | contribs)
(diff) ← Older revision | Latest revision (diff) | Newer revision → (diff)
Jump to navigation Jump to search


Upload a file
Click the picture above to view the original manuscript.

གྲུབ་མཆོག་སྤྱི་ལ་བརྟེན་པའི་བླ་མའི་རྣལ་འབྱོར་རྒྱ་གར་ལུགས་དངོས་གྲུབ་ཐིག་ལེ་འཁྱིལ་པ་
grub mchog spyi la brten pa'i bla ma'i rnal 'byor rgya gar lugs dngos grub thig le 'khyil pa

Damngak Dzö Volume 16 (མ་) / Pages 133-148 / Folios 1a1 to 8b3


Property "Author" has a restricted application area and cannot be used as annotation property by a user.


[edit]
XXX ༄༅། །གྲུབ་མཆོག་སྤྱི་ལ་བརྟེན་པའི་བླ་མའི་རྣལ་འབྱོར་རྒྱ་གར་ལུགས་དངོས་གྲུབ་ཐིག་ལེ་འཁྱིལ་བ་བཞུགས་སོ། །
XXX ༄༅༅། །ན་མོ་གུ་རུ་མ་ཧཱ་སིདྡྷི་ལ་བྡྷེ་བྷྱཿ རྣམ་རྟོག་ལ་བརྟེན་མི་རྟོག་བརྙེས། །མི་རྟོག་ཁོང་ནས་ཡེ་ཤེས་ཤར། །ཟུང་འཇུག་གྲུབ་པ་མཆོག་རྣམས་དང༌། །དབྱེར་མེད་རྡོ་རྗེ་འཛིན་ལ་འདུད། །བླ་མའི་རིམ་པ་ལས་འོངས་པ། །བྱིན་རླབས་འཇུག་པའི་ཐབས་ཟབ་མོ། །གྲུབ་ཐོབ་བརྒྱུད་པའི་ཞལ་ལུང་ལྟར། །རང་རྟོག་འཁྲུལ་དྲིས་མ་བསླད་དགོད། །གྲུབ་པའི་སྤྱི་མེས་ཆེན་པོ་སློབ་དཔོན་རྟ་མཆོག་ཞབས་དང༌། རྩོད་དུས་ཀྱི་དཔལ་ཧེ་རུ་ཀ་ཞི་བ་སྦས་པའི་གདམས་ངག་གིས་བཀའ་སྲོལ་ལྟར་སློབ་དཔོན་དཔའ་བོ་འོད་གསལ་ལུགས་ཀྱི་གྲུབ་ཐོབ་བརྒྱད་ཅུ་རྩ་བཞི་གཙོ་བོར་གྱུར་པའི་གྲུབ་ཆེན་གང་ལའང་སྦྱོར་དུ་རུང་བའི་བླ་མའི་རྣལ་འབྱོར་ཉམས་སུ་ལེན་པར་འདོད་པས། དབེན་པའི་གནས་སུ་མཎྜལ་གྱི་ཡོ་བྱད་ཉེ་བར་བསྡོག །འབྱོར་ན་ཕྱི་ནང་གི་མཆོད་པ་ཇི་ལྟར་རིགས་པ་བཤམས་ལ། སྐྱབས་འགྲོ་དང་སེམས་བསྐྱེད། ཚད་མེད་བཞི་བསྒོམས་པ་རྣམས་སྤྱི་ལྟར་སྔོན་དུ་བཏང༌། མཎྜལ་བྱི་དོར་བྱས་ལ། ཨོཾ་བཛྲ་བྷཱུ་མི་སྭཱ་ཧཱ། ཞེས་སྐྱོན་སྦྱང༌། ཨོཾ་བཛྲ་རེ་ཁེ་ཧཱུྃ་སྭཱ་ཧཱ། ཞེས་དྲི་བཟང་དང་བ་བྱུང་གིས་སྐྱང་ནུལ་བྱ། དེའི་དབུས་སུ་ལག་པ་གཡས་པས་མེ་ཏོག་གསར་པའི་ཚོམ་བུ་བཀོད་ལ། ཧཱུྃ་སུ་མེ་རུ་མ་དྷྱེ་མ། ཤར་དུ་བཀོད་ལ། ཡ་སཱུརྦ་བི་དེ་ཧ་དྭཱི་བ། ལྷོར་བཀོད་ལ། ར་ཛཾ་པུ་དྭཱི་པ་དཀྵི་ཎཿ ནུབ་ཏུ་བཀོད་ལ། ཝ་གོ་ད་ནཱི་ཡ་བ་བཤྩ་མ་དྭཱི་པ། བྱང་དུ་བཀོད་ལ། ལ་ཨུརྟར་
XXX ཀུ་རུ་དཱི་པ། ཤར་གྱི་གཡས་གཡོན་དུ་བཀོད། ཡཾ་ཨཿདེ་ཧཤྩ་བི་དེ་ཧ། ལྷོའི་གཡས་གཡོན་དུ་བཀོད་ལ། རཾ་རཿཙ་མ་རཤྩ་ཨ་པ་ཙ་མ་རཿ ནུབ་ཀྱི་གཡས་གཡོན་དུ་བཀོད་ལ། ཝཾ་ཝཿཤ་ཥ་ཨུརྟར་མཏྟྲི་ཎཿ བྱང་གི་གཡས་གཡོན་ཏུ་བཀོད་ལ། ལཾ་ལཿཀུ་ར་ཝ་ཀོ་ར་ཝཱ། ཤར་གྱི་ཤར་དང་ནུབ་ཀྱི་ནུབ་ཏུ་བཀོད་ལ། ཙནྡྲ་སཱུརྻ་བྷཱུཥི་ཏ། ཞེས་བརྗོད་ནས། རིན་ཆེན་སྣ་ཚོགས་རང་བཞིན་ནི། །རི་རབ་ལྕོག་བརྒྱད་ཡང་དག་ལྡན། །གླིང་བཞི་གླིང་ཕྲན་ལྡན་པ་འདི། །འབུལ་གྱི་ཡང་དག་བཞེས་སུ་གསོལ། །ཞེས་མེ་ཏོག་དོར་ལ་མཎྜལ་མདུན་སྟེགས་སུ་བཀོད། མཎྜལ་གྱི་དབུས་སུ་དག་པ་ཡེ་ཤེས་ཀྱི་ཞིང་ཁམས་རྒྱ་དང་ཚད་ཡོངས་སུ་ཆད་པ་མེད་པ་རྒྱན་བཀོད་པ་ཕུན་སུམ་ཚོགས་པ་དང་བཅས་པ་ཕྱི་རོལ་སྲུང་བའི་འཁོར་ལོ་གཞོམ་དུ་མེད་པས་ཡོངས་སུ་བསྐོར་བའི་སྙིང་པོར་གཞལ་མེད་ཁང་རྒྱུ་དང་བཀོད་པ་ཕུན་སུམ་ཚོགས་པ། དུར་ཁྲོད་རོལ་པའི་ཡོ་བྱད་དང་ལྷ་རྫས་ཀྱི་ཉེར་སྤྱོད་མཐའ་ཀླས་པས་བརྒྱན་པའི་དབུས་སུ་ཀྲྀཥྞ་སཱ་རའི་པགས་པའི་གདན་ལ་རྩ་བའི་བླ་མ་དང་གཉིས་སུ་མེད་པའི་གྲུབ་པའི་དབང་ཕྱུག་དཔལ་ས་ར་ཧ། སྐུ་མདོག་དཀར་དམར་བྲམ་ཟེའི་ཆ་བྱད་ཅན། བགྲེས་རྒུད་སྤངས་པའི་ལང་ཚོ་འགྱུར་བ་མེད་པའི་གང་བ་ལ་རྟག་ཏུ་གནས་པ། དབུ་སྐྲ་ཇོ་བྲེགས་རས་དམར་པོའི་ཨངྒ་རག་གསོལ་ཞིང་ཕྱག་གཉིས་གཉུག་མའི་གནས་ལུགས་མཚོན་པར་བྱེད་པའི་མདའ་སྲོང་
XXX བའི་ཕྱག་རྒྱ་ཅན། ཞབས་ཕྱེད་སྐྱིལ་ཀྲུང་དུ་བཞུགས་པའི་གཡོན་ནས་རིག་མ་ཡེ་ཤེས་ཀྱི་རྣལ་འབྱོར་མ་མདའ་མཁན་མོའི་ཚུལ་ཅན་གྱིས་བརྟེན་པ་ལྷན་ཅིག་སྐྱེས་པའི་བདེ་བ་ཆེན་པོའི་ཡེ་ཤེས་གྱི་གཟི་འོད་ཕྱོགས་བརྒྱར་འབར་བས་བཟོད་པར་དཀའ་བའི་ཟིལ་ཅན་ཉི་མའི་སྙིང་པོ་ལྟ་བུ། སྲིད་པ་གསུམ་ཟིལ་གྱིས་གནོན་པའི་ལྟ་སྟངས་ཀྱིས་རབ་ཏུ་དཔའ་བའི་ཉམས་ཅན། ཐུགས་གཉིས་སུ་མེད་པའི་ཡེ་ཤེས་ཕྱག་རྒྱ་ཆེན་པོ་ཆོས་ཀྱི་སྐུ་ལ་རྟག་ཏུ་མཉམ་པར་བཞག་པ། ལྷུན་གྱིས་གྲུབ་ཅིང་རྒྱུན་མི་ཆད་པའི་ཕྲིན་ལས་ཀྱི་རྣམ་པར་རོལ་པ་ཟད་མི་ཤེས་པ་ཅན། དཔའ་བོ་དང་ཌཱ་ཀི་རྒྱ་མཚོ་ལྟ་བུའི་མཆོད་ཅིང་བརྗིད་པ་དང༌། ས་གསུམ་གྱི་དབང་པོ་རྣམས་ཀྱི་རི་མོར་བྱེད་བཞིན་པའི་སྐུ་ཅན་གྱི་སྤྱི་བོར་ཨོཾ། མགྲིན་པར་ཨཱཿ ཐུགས་ཀར་ཧཱུྃ། དམ་ཚིག་པ་དང་ཡེ་ཤེས་པ་གདོད་ནས་དབྱེར་མི་ཕྱེད་པ། དངོས་དང་བརྒྱུད་པའི་བླ་མ་ཀུན་འདུས། ཡི་དམ་ཞི་ཁྲོ་རབ་འབྱམས་ཀུན་འདུས། སངས་རྒྱས་ཆོས་དང་དགེ་འདུན་ཀུན་འདུས། མཁའ་འགྲོ་ཆོས་སྐྱོང་སྲུང་མ་ཀུན་འདུས། །བརྟན་གཡོའི་ཁྱབ་བདག །འཁོར་འདས་ཀྱི་དཔལ་མགོན། སྐྱབས་གནས་ཀུན་གྱི་སྤྱི་གཟུགས་ཆེན་པོར་མངོན་སུམ་དུ་བཞུགས་པར་གྱུར། ཨོཾ་ཨཱཿདཔལ་ལྡན་རྡོ་རྗེ་བླ་མ་དམ་པའི་ཞབས་ཀྱི་པདྨོ་ཡང་དག་པའི་ཡེ་ཤེས་གསལ་བར་བྱེད་པ་དེ་ལ་ཕྱག་འཚལ་ལོ་ཧཱུྃ། ཨདྱ་སིདྡྷྱ་མཱཾ། ཞེས་ལན་མང་དུ་ཕྱག་བྱ། གང་གི་དྲིན་གྱིས་བདེ་ཆེན་ཉིད། །སྐད་ཅིག་ཉིད་ལ་འཆར་བ་གང༌། །བླ་མ་རིན་ཆེན་ལྟ་བུའི་སྐུ། །མདའ་བསྣུན་ཁྱོད་ཞབས་པད་ལ་འདུད། །རྒྱལ་བ་ཀུན་དངོས་བླ་མ་ལ། །དངོས་བཤམས་ཡིད་སྤྲུལ་མཆོད་པའི་སྤྲིན། །སྒོ་གསུམ་ལོངས་སྤྱོད་དགེ་རྩར་བཅས། །གུས་པས་འབུལ་གྱིས་བཞེས་སུ་གསོལ། །ཉོན་མོངས་དབང་གྱུར་ཐོག་མེད་ནས། །སྡིག་སྒྲིབ་ཉེས་ལྟུང་ཅི་བསགས་པར། །གནོང་འགྱོད་དྲག་པོས་སྙིང་ནས་བཤགས། །དག་ཅིང་ཚངས་པའི་དངོས་གྲུབ་སྩོལ། །སྐྱེ་
XXX འཕགས་རྒྱལ་བ་སྲས་བཅས་ཀྱིས། །ཟག་བཅས་ཟག་པ་མེད་པ་ཡི། །བསོད་ནམས་གང་བསགས་ཐམས་ཅད་ལ། །དགའ་བ་ཆེན་པོས་རྗེས་ཡི་རང༌། །ཟབ་དང་རྒྱ་ཆེའི་ཆོས་ཀྱི་སྒོ། །ཁྱད་པར་ཐེག་མཆོག་བླ་ན་མེད། །གདུལ་བྱའི་ཁམས་དབང་མོས་པ་བཞིན། །རྒྱུན་ཆད་མེད་པར་སྟོན་པར་བསྐུལ། །འཁོར་བའི་འཁོར་ལོ་མ་ཞིག་བར། །དེ་སྲིད་སྙིང་རྗེའི་གཞན་དབང་གིས། །ཞི་བའི་དབྱིངས་སུ་མི་གཞོལ་བར། །རྟག་ཅིང་བརྟན་པར་བཞུགས་གསོལ་འདེབས། །འདིས་མཚོན་དུས་གསུམ་དགེ་བའི་མཐུས། །མྱུར་དུ་བྱང་ཆུབ་མཆོག་ཐོབ་ནས། །ནམ་མཁའ་མཉམ་པའི་སེམས་ཅན་རྣམས། །སྲིད་པའི་མཚོ་ལས་སྒྲོལ་བར་ཤོག །ཅེས་ཡན་ལག་བདུན་པ་ཅི་མང་དང༌། ཐུན་མོང་གིས་མཎྜལ་སྤྱི་ལྟར་རྒྱས་བསྡུས་ལན་མང་དུ་ཕུལ་རྗེས་ནང་གི་མཎྜལ་ནི། སྐད་ཅིག་གིས་ཡེ་ཤེས་ཀྱི་རལ་གྲི་རྣོ་ངར་དང་ལྡན་པ་ལག་ཏུ་བྱུང༌། དེས་རང་ལུས་དུམ་བུར་བྱས་ནས་མཎྜལ་དུ་བཀོད་པར་གྱུར། ཧཱུྃ་མསྟ་ཀ་སུ་མེ་རུ་ཡ་བཱ་མ་བཱ་ད་བི་དེ་ཧཿ ར་ཧི་ནི་པཱ་ད་ཛམྤུ་དྭཱི་པ། ཨ་པཤྩི་མ་དྭཱི་པ་ཧི་ན་ཧ་སྟ། ལ་བཱ་མ་ཧསྟ་ཀུ་རུ་ཨུརྟ་ར། ཤཱུཏྲ་ཀུ་སུ་མ་ཙནྡྲ་སཱུརྻ་བྷཱུ་ཥི་ཏཾ། ཞེས་ཚོམ་བུ་བཀོད་པར་མོས་ལ། ཨི་དཾ་གུ་རུ་རཏྣ་ཨཱཏྨ་ནཾ་ཀཱ་ཡ་མཎྜལ་ནིརྻ་ཏ་ཡཱ་མི། ཞེས་དབུལ་ཞིང་སླར་ཡང༌། རང་ལུས་རྣམ་སྨིན་ཕུང་པོའི་ཀ་པཱ་ལ། །ལིངས་སྐྱིས་ཕོག་དབུས་ལྷག་མའི་ལུས་ཕུང་རྣམས། །རིལ་པོར་བཅུག་ལ་ཡི་གེ་འབྲུ་གསུམ་གྱིས། །སྦྱངས་རྟོགས་སྤར་ཞུ་བདུད་རྩིའི་རྒྱ་མཚོར་གྱུར། །ཨོཾ་ཨཱཿཧཱུྃ་ཧ་ཧོ་ཧྲཱིཿལན་གསུམ་དུ་བརྗོད། ལྗགས་རྡོ་རྗེའི་འོད་ཟེར་གྱི་སྦུ་གུས་གསོལ་བར་གྱུར་པར་བསམ་ལ། ཞལ་ཟས་རོ་བརྒྱ་ལྡན་པའི་ཡིད་འཕྲོག་པ། །ལེགས་སྦྱར་འདི་ནི་དཔལ་ལྡན་བླ་མ་ལ། །དད་པས་ཕུལ་བས་འགྲོ་བ་འདི་དག་ཀུན། །འབྱོར་ལྡན་ཏིང་འཛིན་ཟས་ལ་སྤྱོད་པར་ཤོག །ཨོཾ་ཨཱཿཤྲཱི་མཱ་ན་སངྒུ་རུ་མ་ཧྲཱ་སིདྡྷི་མཱ་ན་ས་ར་ཧ་ས་པ་རི་ཝཱ་རི་བྷྱཿ ཨི་དཾ་བ་ལི་ག་ཎ་ཙཀྲ་མ་ཧཱ་པཱུ་ཛ་ཁཱ་ཧི། སརྦ་སིདྡྷི་མྨེ་པྲ་ཡཙྪནྟུ། འདིར་ཕྱི་ནང་གི་མཆོད་པ་ཅི་འབྱོར་བས་མཆོད་པར་
XXX བགྱི་གསུངས་པས་རྒྱས་པར་སྤྲོ་ན་མཆོད་ཕྲེང་གི་ཚིག་ཅི་རིགས་སྦྱར། དཀྱུས་སུ། ཡང་དག་དགའ་བའི་མེ་ཏོག་གིས། །རྡོ་རྗེ་ཉི་མ་པདྨར་བྱུང༌། །མེ་ཏོག་བདག་ཉིད་ལ་མཆོད་པ། །རྡོ་རྗེ་གསུམ་གྱི་བདག་ཉིད་མཆོག །པུཥྤེ་སོགས་སྦྱར། རྣམ་རྟོག་ཚོགས་ཀྱི་ཡུལ་མིན་ཅིང༌། །ལྟེ་བར་གཏུམ་མོ་འབར་བ་ཡིས། །ངེས་པར་སྲེགས་པ་དེ་ཡི་སྤོས། །ཐུགས་ཀྱི་རྡོ་རྗེ་ལ་ནི་དབུལ། །ཡི་གེ་ཧཱུྃ་ལས་ཡང་དག་བྱུང༌། །སྔགས་ཀྱི་འོད་ཟེར་ཤིན་ཏུ་གསལ། །མར་མེ་འབར་བའི་ཡང་དག་འོད། །ཐུགས་ཀྱི་རྡོ་རྗེ་ལ་དབུལ་བྱ། །བདེ་བ་ཆེན་པོའི་ནམ་མཁར་གནས། །བྱང་ཆུབ་སེམས་ནི་སད་པ་དང༌། །དེ་ཉིད་ཀྱིས་ཀྱང་བྱུགས་པ་ནི། །ཐུགས་ཀྱི་རྡོ་རྗེ་ལ་དབུལ་བྱ། །འདིར་ནི་གང་དང་གང་ལོངས་སྤྱོད། །དབང་པོ་ཐམས་ཅད་ཡང་དག་བསྟན། །དེ་དག་ཐམས་ཅད་ཐུགས་རྡོ་རྗེ། །བཟའ་བའི་མཆོད་པས་མཆོད་པར་བྱ། །འགོག་པའི་རྡོ་རྗེར་གུགས་པའི་སེམས། །རང་ཉམས་དཔྱིད་ཀྱི་དཔའ་བོའི་གླུ། །གཞོམ་མེད་ན་དཱའི་སྒྲ་དབྱངས་ཀྱིས། །ཐུགས་ཀྱི་རྡོ་རྗེའི་མཆོད་པར་བགྱི། །ནང་མཆོད་བདུད་རྩི་ཕུལ་ལ། ཨོཾ་ཨཱཿཧཱུྃ། བདུད་རྩི་ལྔ་ཡི་བཟའ་བ་ནི། །དངོས་གྲུབ་ཀུན་གྱི་དེ་ཉིད་མཆོག །སྒྲོན་མ་ལྔ་ཡི་བཟའ་བ་ནི། །སངས་རྒྱས་ཀུན་གྱི་དམ་ཚིག་གཙོ། །ཉེས་བྲལ་ཞི་བའི་བཏུང་བ་མཆོག །སྦྲང་རྩི་བུ་རམ་འབྲུ་དང་ཤིང༌། །བཅོས་པའི་མྱོས་བྱེད་རྣམ་པ་ལྔ། །ཤེས་རབ་རང་བཞིན་དབུལ་བར་བགྱི། །མཚན་ཉིད་དང་ལྡན་པའི་རིག་མ་ཕུལ་བར་མོས་ལ། ལྷ་མོ་འདི་དག་ཕྱག་རྒྱ་ཆེ། །མཐའ་ཡས་བདེ་བ་སྦྱིན་པ་མོ། །རིགས་ལྔ་ལས་བྱུང་འདི་ཕུལ་བས། །རིག་པའི་བརྟུལ་ཞུགས་མཐར་ཕྱིན་ཤོག །ལྷ་དང་མི་ཡི་བདེ་བ་ནི། །བསྡུས་བྱས་རྡོ་རྗེ་འཛིན་པ་ཡི། །བཅུ་དྲུག་ཆར་ཡང་མི་ཕོད་པའི། །དགའ་བ་བླ་ན་མེད་པས་མཆོད། །ཅེས་གསང་བའི་མཆོད་པ་བྱ། བསྟོད་པ་གྲུབ་ཆེན་སོ་སོའི་སྔགས་བརྗོད་བྱེ་བྲག་པ་སོགས་གང་ཤེས་དང༌། སྤྱི་ཙམ་དུ། ཟབ་ཞི་སྤྲོས་དང་བྲལ་བ་གཉུག་མའི་དོན། །སྣང་དང་སྟོང་པ་གཉིས་དང་གཉིས་མིན་ལ། །ཨེ་མ་ཧོ་འདི་སྙམ་བྲལ་
XXX བའི་ལྟ་བ་ཅན། །བདེ་ཆེན་ལྷན་སྐྱེས་རོལ་པ་ཁྱེད་ལ་འདུད། །སྨྲ་བསམ་བརྗོད་དུ་མེད་པའི་རང་བཞིན་ལ། །བདེ་སྟོང་འཛིན་པ་མེད་པ་བདེ་བའི་ཉམས། །ཨེ་མ་ཧོ་རྩོལ་བྲལ་ལྷུག་མའི་སྒོམ་པ་ཅན། །བདེ་ཆེན་ལྷན་སྐྱེས་རོལ་པ་ཁྱེད་ལ་འདུད། །སྤང་བླང་བྱར་མེད་རང་བཞིན་འོད་གསལ་ལ། །གཟུང་འཛིན་གློ་བུར་དྲི་མ་རྣམ་དག་པ། །ཨེ་མ་ཧོ་རང་བཞིན་ལྷུན་གྲུབ་འབྲས་བུ་ཅན། །བདེ་ཆེན་ལྷན་སྐྱེས་རོལ་པ་ཁྱེད་ལ་འདུད། །ཅེས་པ་ཙམ་བྱ། སླར་ཡང་ཡན་ལག་བདུན་པ་བྱ་བར་གསུངས་པས་རྒྱས་བསྡུས་གང་ལྕོགས་སྦྱོར་ཆོག །དཀྱུས་ཙམ་དུ། ཨོཾ་ཨཱཿདཔལ་ལྡན་རྡོ་རྗེ་བླ་མ་དམ་པའི་ཞབས་ཀྱི་པདྨོ་ཡང་དག་པའི་ཡེ་ཤེས་གསལ་བར་བྱེད་པ་དེ་ལ་ཕྱག་འཚལ་ལོ། །ཧཱུྃ། བྱང་ཆུབ་སྙིང་པོ་མཆིས་ཀྱི་བར། །བླ་མ་སངས་རྒྱས་ལ་ཕྱག་འཚལ། །སྐྱོབས་པ་ཆོས་ལ་ཕྱག་འཚལ་ལོ། །དགེ་འདུན་རྗེ་ལ་ཕྱག་འཚལ་ལོ། །ཕྱག་འོས་སངས་རྒྱས་ཐམས་ཅད་དང༌། །རྒྱལ་བས་གསུངས་པའི་ཆོས་རྣམས་དང༌། །ཚུལ་ཁྲིམས་བཟང་ལྡན་དགེ་འདུན་སྟེ། །དཀོན་མཆོག་གསུམ་ལ་བདག་སྐྱབས་མཆི། །བྱས་དང་བྱེད་དུ་བཅུག་དང་ཡི་རང་བའི། །སྡིག་པ་མ་ལུས་སྐྱོན་ཀུན་འཇིག་བྱེད་པའི། །སྤྱན་ལྔར་སོ་སོར་བཤགས་ཤིང་སླར་ཡང་ནི། །མི་བྱེད་པ་ཡི་སྡོམ་པ་བླང་བར་བགྱི། །ཉན་ཐོས་རང་རྒྱལ་བླ་མེད་རྒྱལ་བ་དང༌། །རྒྱལ་བའི་སྲས་ཀྱིས་དགེ་བ་གང་མཛད་པ། །དེ་དག་ཀུན་ལ་ཡང་དག་ཡི་རངས་ཤིང༌། །བྱང་ཆུབ་ཏུ་ནི་ཡོངས་སུ་བསྔོ་བར་བགྱི། །རྒྱལ་བ་དཀོན་མཆོག་ལ་སོགས་གསུམ་པོ་ལ། །དངོས་པོ་ཀུན་གྱིས་བདག་ནི་སྐྱབས་སུ་མཆི། །བྱང་ཆུབ་མཆོག་ཏུ་སེམས་བསྐྱེད་དེ་བཞིན་དུ། །བླ་ན་མེད་པའི་ལམ་ལ་བརྟེན་པར་བགྱི། །བདག་གིས་དུས་གསུམ་དགེ་བ་ཅི་སྤྱད་པས། །ནམ་མཁའི་མཐའ་ཀླས་གྱུར་པའི་སེམས་ཅན་རྣམས། །བླ་མེད་རྡོ་རྗེ་ཐེག་པའི་སྣོད་གྱུར་ཏེ། །ཀུན་ཀྱང་རྡོ་རྗེ་འཛིན་པ་མྱུར་ཐོབ་ཤོག །ཅེས་པ་ཙམ་བྱ། དེ་ནས། ཨཱཏྨ་ནཾ་སུ་ཁ་དུཿཁ་ཏེ་མེ་ཛྙཱ་
XXX ནེ་སུ་ཁ་ཀི་དུཿཁ་ཏོ་མ་ཐི། ནསྠི་ས་ར་ཧ་ན་མོ་སྟུ་ཏེ། ཞེས་པའམ་བོད་སྐད་དུ་བསྒྱུར་ན། བདག་གིས་བདེ་སྡུག་ཁྱེད་ཀྱིས་མཁྱེན་ནོ། །བདེའམ་སྡུག་ཀྱང་ཁྱོད་ལས་གཞན་མ་མཆིས་སོ། །ཕྱག་འཚལ་ཞིང་འདུད་དོ་ས་ར་ཧ། །ཞེས་པ་གང་རིགས་ཀྱིས་དྲག་ཏུ་གསོལ་བ་གདབ་ཅིང༌། གུ་རུ་ཤ་ར་ཎཾ་གཙྪ་མི། ལན་མང་དུ་བརྗོད། ཨོཾ་ཨཱཿམ་ཧཱ་སིདྡྷི་ལ་བྡྷ་ས་ར་ཧ་པཱ་ད་ཧཱུྃ་ཧཱུྃ། ཞེས་པའི་མཚན་སྔགས་ཀྱང་ཅི་ནུས་སུ་བཟླ་ཞིང༌། མཐར། བླ་མ་གྲུབ་བརྙེས་རྣལ་འབྱོར་དབང་ཕྱུག་གི །སྐུ་ལ་རྩ་གསུམ་འཁོར་ལོ་ལྔ་གསལ་བའི། །གཡོན་ཕྱོགས་རྐྱང་མ་དང་བྲལ་ཀུནྡའི་ཁམས། །སྐུ་ཡི་བྱིན་རླབས་བདུད་རྩི་འོད་དཀར་ཚུལ། །སྨིན་མཚམས་ནས་བྱུང་རང་གི་དཔྲལ་བར་ཐིམ། །ལུས་ཀྱི་སྒྲིབ་དག་བུམ་དབང་ཐོབ་པར་གྱུར། །གཡས་ཕྱོགས་རོ་མ་དང་འབྲེལ་རྡུལ་གྱི་ཁམས། །གསུང་གི་བདུད་རྩི་འོད་དམར་ཚུལ་དུ་བྱུང༌། །མགུལ་བའི་གནས་ནས་བདག་གི་མགྲིན་པར་ཐིམ། །ངག་གི་སྒྲིབ་དག་གསང་བའི་དབང་བསྐུར་ཐོབ། །ཨ་ཝ་དྷཱུ་ཏི་མུན་ཅན་དངས་མའི་ཚུལ། །ཐུགས་ཀྱི་བྱིན་རླབས་བདུད་རྩི་འོད་མཐིང་བཅས། །ཐུགས་ཀའི་གནས་ནས་སྙིང་གར་ཐིམ་པ་ཡིས། །ཡིད་ཀྱི་སྒྲིབ་དག་ཤེར་དབང་ཡེ་ཤེས་ཐོབ། །བླ་མ་འོད་དུ་ཞུ་ནས་རང་ལ་ཐིམ། །གཉིས་མེད་བསམ་བརྗོད་བྲལ་བའི་ངང་དུ་བཞག །སྒོ་གསུམ་འཕོ་བའི་སྒྲིབ་དག་ཚིག་དབང་ཐོབ། །བླ་མ་རང་སེམས་ཐ་མི་དད་དུ་འདྲེས། །ཞེས་དམིགས་ལ་བསམ་མེད་གཉུག་མའི་རང་ངོར་མཉམ་པར་འཇོག །དེ་ལས་ལྡང་བ་ན། ཨེ་མ་མ་ལ་དུས་གསུམ་དགེ་བ་འདིས། །བདག་དང་མར་གྱུར་མཐའ་ཡས་སེམས་ཅན་ཀུན། །གྲུབ་པ་མཆོག་གིས་རྟག་པར་རྗེས་བཟུང་ནས། །ཕྱག་རྒྱ་ཆེན་པོའི་དངོས་གྲུབ་མྱུར་ཐོབ་ཤོག །མགོ་བོར་བླ་མའི་ཅོད་པན་འཆང༌། །ལག་ཏུ་རྡོ་རྗེ་དྲིལ་བུ་འཛིན། །ངག་ཏུ་གསང་སྔགས་རྒྱལ་པོ་བཟླ། །ཡིད་ཀྱིས་ཟུང་འཇུག་བསྒོམ་པར་ཤོག །ཅེས་སོགས་ཐུན་མོང་མ་ཡིན་པའི་བསྔོ་སྨོན་གདབ་ཅིང་ཤིས་བརྗོད་ཀྱིས་མཐའ་བརྒྱན་ནོ། ༈ །དེ་བཞིན་དུ་གཞན་འདྲ་བ་ལ། མངོན་རྟོགས་ཀྱི་
XXX སྐབས། པགས་པའི་གདན་ལ་རྩ་བའི་བླ་མ་དང་གཉིས་སུ་མེད་པའི་དཔལ་མགོན་འཕགས་པ་ཀླུ་སྒྲུབ་སྐུ་མདོག་སྔོ་སངས་ནོར་བུའི་ཁ་དོག་ལྟ་བུ་དྭངས་ཤིང་དྲི་མ་མེད་པ་མཚན་དང་དཔེ་བྱད་ཀྱིས་སྤྲས་ཤིང་ཕྱག་གཉིས་ཆོས་འཁོར་གྱི་ཕྱག་རྒྱ་ཐུགས་ཀར་འཆིང་བ། ན་བཟའ་ཆོས་གོས་གསུམ་དང་བཅས་ཤིང་རྡོ་རྗེའི་སྐྱིལ་མོ་ཀྲུང་གི་བཞུགས་པ་ཤཾ་ཁ་ལ་སོགས་པའི་ཀླུའི་རྒྱལ་པོ་མཆོག་རྣམས་སྦྲུལ་གྱི་རྣམ་པས་གདེངས་ཀའི་གྲིབ་མ་འབུལ་བ་ལ་སྐུ་རྒྱབ་བརྟེན་པ། ཐུགས་གཉིས་སུ་མེད་པའི་ཡེ་ཤེས་མན་གོང་བཞིན་ལ། བསྟོད་པའི་སྐབས། ནཱ་གཱ་རྫུ་ནའི་ཞབས་ལ་འདུད། །མཚན་སྔགས་ཀྱང་ས་ར་ཧའི་ཚབ་ཏུ། །ནཱ་གཱ་རྫུ་ན་མ་གཏོགས་གཞན་གོང་དང་འདྲ་བ་ཉིད་དོ། ། ༈ །དེ་བཞིན་ཤ་བ་རི་ལའང༌། བླ་མ་དང་གྲུབ་པའི་དབང་ཕྱུག་དཔལ་རི་ཁྲོད་པ་ཆེན་པོ། འགྱུར་བ་མེད་པའི་ཆོས་ཉིད་མཚོན་པའི་སྐུ་མདོག་ནག་པོ། དབུ་སྐྲ་རལ་པ་སྤྱི་བོར་བཅིངས་པ་སྨྱུག་མའི་ཤུན་པས་བསྡམས་པ། སྤྱན་འབྲུ་ཚུགས་སུ་གཟིགས་ཤིང་སྤྱན་རྩ་དམར་བ། ཕྱག་གཉིས་མདའ་དང་འོད་མའི་གཞུ་མཆོག་ལ་ཕག་རྒོད་ཀྱི་ཁོག་སྟོང་དང་ཁོག་སྨད་བཀལ་བ། རྨ་བྱའི་མདངས་སྒྲོ་གཤིབས་པའི་ཤམ་ཐབས་དང༌། མེ་ཏོག་འབྲས་བུའི་རྒྱན་སྣ་ཚོགས་པས་བརྒྱན་ཏེ་འགྱིངས་བག་དང་བཅས་པའི་རོལ་སྟབས་སུ་བཞུགས་པ། སྐུའི་གཡས་གཡོན་ནས་རིག་མ་རྒྱན་དང་ཆ་ལུགས་གཙོ་བོ་དང་མཚུངས་ཤིག་མདའ་དོང་འཛིན་པ་གཉིས་ཀྱིས་བརྟེན་པ། ལྷན་ཅིག་སྐྱེས་པའི་བདེ་བ་མན་འདྲ། རི་ཁྲོད་དབང་ཕྱུག་ཞབས་ལ་འདུད། །ཤ་བ་རི་པཱ་ད་ཞེས་བསྒྱུར་བ་མ་གཏོགས་འདྲ། བསྟོད་པའི་སྐབས་སྤྲོ་ན་ནགས་རིན་གྱིས་མཛད་པའི་ཤ་བ་རི་པའི་བསྟོད་ཆེན་སོགས་ཀྱང་འདོན་ནོ། ༈ །དེ་བཞིན་དུ་གྲུབ་ཆེན་ནག་པོ་སྤྱོད་པ་ལའང༌། རྩ་བའི་བླ་མ་དང་གཉིས་སུ་མེད་པའི་གྲུབ་པའི་སློབ་དཔོན་བརྟུལ་ཞུགས་སྤྱོད་པའི་དབང་ཕྱུག་ཀཧྣ་པ་ཆེན་པོ་སྐུ་མདོག་ནག་པོ་དཔའ་ཞིང་སྒེག་པ་ཧུར་བག་ཆགས་པ་ཕྱག་གཡས་ཅང་ཏེའུ་འཁྲོལ་ཞིང༌། གཡོན་ཀ་པཱ་ལ་བདུད་རྩིས་གང་བ་འཛིན་པའི་མཆན་
XXX ཁུང་དུ་རྡོ་རྗེ་ཁ་ཊྭཱྃ་ག་བསྒྲེང་བ། དབུ་སྐྲ་རལ་པའི་ཐོར་ཚུགས་ཅན་སྐུ་ལ་མི་རུས་ཀྱི་ཕྱག་རྒྱ་དྲུག་གིས་བརྒྱན་ཅིང་སྟག་གི་པགས་པའི་ཤམས་ཐབས་གསོལ་བ། པི་ཤྭ་རཱུ་པི་ནཱི་ཞེས་བྱ་བའི་སྲིན་མོའི་གཙོ་མོ་འཇིགས་སུ་རུང་བ་གདན་ནམ་བཞོན་པའི་ཚུལ་དུ་གནས་པའི་སྟེང་ན་རོལ་སྟབས་སུ་བཞུགས་པ། རེས་འགའ་རོ་ལངས་ཆེན་པོ་མེ་ཏོག་གི་ཕྲེང་བས་བརྒྱན་པ་ལ་ཆིབས་པ་སོགས་སྣ་ཚོགས་པའི་རྣམ་འཕྲུལ་སྟོན་པར་མཛད་བཞིན་པའི། སྟེང་གི་ནམ་མཁའ་ལ་གདུགས་བདུན་འཛིན་པ་མེད་པར་འཁོར་ཞིང༌། ཌཱ་མ་རུ་བདུན་འཁྲོལ་བ་པོ་མེད་པར་རང་འཁྲོལ་བ། རེས་འགའ་གདུགས་བདུན་བརྒྱད་ཌཱ་མ་རུ་བདུན་བརྒྱར་འཕེལ་བའི་ཆོ་འཕྲུལ་ཅན། སྣང་བའི་འཁོར་བདུན་བརྒྱ་དང་མི་སྣང་བའི་འཁོར་བདུན་བརྒྱ་ལ་སོགས་པ་གྲུབ་པ་དང་རིག་པ་འཛིན་པའི་རྣལ་འབྱོར་ཕོ་མོ་གྲངས་མེད་དབུས་ན་རོལ་བ། ལྷན་ཅིག་སྐྱེས་པའི་བདེ་བ་མན་འདྲ། སྤྱོད་འཆང་དབང་པོའི་ཞབས་ལ་འདུད། །ཙརྻ་བཛྲ་རམ། ཀཧྣརྻ་ཀ་པཱ་ད་ཞེས་སྦྱར་བ་དང༌། ༈ གཉིས་སུ་མེད་པ་གྲུབ་པའི་དབང་ཕྱུག་བི་རཱུ་པ་ཆེན་པོ་སྐུ་མདོག་སྨུག་ནག་སྦོམ་ཞིང་ཐུང་ལ་གསུས་ཁྱིམ་ཆེ་བ། དབུ་སྐྲ་ཅོ་བྲེགས་ལ་མེ་ཏོག་གི་ཕྲེང་བས་སྤུད་པ། ལྷག་མ་རྒྱན་སྤངས་ཤིང་ཕྱག་གཡས་སྡིགས་མཛུབ་ཀྱི་ཕྱག་རྒྱ་གདེངས་པས་ཉི་མ་བརྟོད་ལ་གནོན་པའི་ཚུལ་དང༌། གཡོན་པ་མན་གྱི་རྭ་ཞལ་ཆང་གིས་གང་བ་དཀུར་བརྟེན་པ། ཤ་ནའི་གོས་ཀྱིས་འདོམས་དཀྲིས་ཅན་རོལ་པའི་འདུག་སྟངས་སུ་བཞུགས་པ། གཡོན་གྱི་ཕྱོགས་ནས་རིག་མ་ཆང་སྣོད་འཛིན་པས་འདུད་པའི་ཚུལ་ཅན། ལྷན་ཅིག་སྐྱེས་པའི་མན་འདྲ། བི་རཱུ་པ་ལ་ཕྱག་འཚལ་འདུད། །བི་རཱུ་པཱ་ད་ཞེས་བསྒྱུར་བ་དང༌། ༈ གྲུབ་པའི་དབང་ཕྱུག་ཌོམྦྷི་ཧེ་རུ་ཀ་སྐུ་མདོག་དཀར་དམར་རལ་པའི་ཐོར་ཚུགས་དང་རུས་པའི་རྒྱན་དྲུག་གིས་བརྒྱན་པ། ཤིན་ཏུ་འཇིགས་པའི་སྦྲུལ་རེག་པའི་དུག་ཅན་གྱིས་རྒྱན་དུ་མཛད་ཅིང༌། མཐོང་བའི་
XXX དུག་ཅན་ལྕག་གི་ཚུལ་དུ་བསྣམས་པ། ཁ་རླངས་ཀྱི་དུག་ཅན་བདུན་གྱིས་དབུའི་སྟེང་དུ་གདངས་གར་བྱས་ཤིང༌། སྟག་མོ་མི་བཟད་འཇིགས་སུ་རུང་བ་ལ་ཆིབས་པའི་བརླ་གཡོན་པའི་སྟེང་ནས་གསང་བའི་གཟུངས་མ་གཡུང་མོ་རྣལ་འབྱོར་མ་གཅེར་མོ་པདྨ་ཅན་གྱི་མཚན་ཉིད་ཡོངས་སུ་རྫོགས་པས་དམ་དུ་འཁྱུད་ཅིང་འཁྲིལ་བའི་བདེ་བས་དགྱེས་རྒུར་རོལ་པ། ལྷན་ཅིག་སྐྱེས་མན་འདྲ། ཌོམྦྷི་པ་ལ་ཕྱག་འཚལ་འདུད། །ཌོམྦྷི་ཧེ་རུ་ཀ་པཱ་ད་ཞེས་བསྒྱུར། ༈ གྲུབ་པའི་དབང་ཕྱུག་ལཱུ་ཧི་པ་ཆེན་པོ་སྐུ་མདོག་སྔོ་སངས་སྐེམས་ཤིང་རིད་པའི་ཚུལ་ཅན་རལ་པའི་ཐོར་ཚུགས་ཅུང་ཟད་དང་བཅས་ཤིང་རས་ཀྱི་སྨད་དཀྲིས་གསོལ་བ། སྐུའི་མདུན་ཕྱོགས་སུ་ཉའི་རྒྱུ་ལྟོ་སྤུངས་པ་ལས་ཕྱག་གིས་བླངས་ཏེ་ཞལ་དུ་གསོལ་བའི་རྣམ་པ་ཅན་ཕྱེད་སྐྱིལ་གྱིས་བཞུགས་པ། ལྷན་ཅིག་སྐྱེས་མན་འདྲ་བ་ལ། ལཱུ་ཧི་པ་ལ་ཕྱག་འཚལ་འདུད། །ལཱུ་ཧི་པཱ་ད་ཞེས་བསྒྱུར་བ་དང༌། ༈ བླ་མ་དང་གཉིས་སུ་མེད་པའི་གྲུབ་པའི་དབང་ཕྱུག་གཽ་རཀྵ་ནཱ་ཐ་སྐུ་མདོག་དཀར་སྔོ་སྣུམ་པའི་མདངས་ཅན་ཤངས་རྒྱུད་མཐོ་ཞིང་འཛུམ་བག་གི་མདངས་དང་ལྡན་པ། ཨག་ཚོམ་དང་དབུ་སྐྲ་ལྗང་སེར། ལྟ་སྟངས་ཅེར་རེ་པ། སྙན་ལ་མུ་དྲ་ནག་པོ་དང༌། མགུལ་དུ་སིངྒ་ནཱ་དའི་རྭ་དུང་འཆང་ཞིང་སྐུ་ལ་ཙཀྲ་ཀནྟ་སྟེ་འཁོར་ལོ་ལྟ་བུའི་བེམ་པོ་གསོལ་བ། སྒོམ་ཤིང་ལ་ཀོས་གོ་བརྟེན་པའི་ཚུལ་གྱིས་སྐྱིལ་ཀྲུང་དང་བཅས་དྲང་པོར་བཞུགས་ཤིང༌། ཕྱག་མཉམ་བཞག་གི་སྟེང་ན་ཀུ་བའི་སྣོད་ཐོགས་པ། མཐོང་བའི་མོད་ལ་ཉམས་དགའ་ཞིང་ཐ་མལ་གྱི་སྣང་བ་ཧྲུལ་པོར་འཇིག་པ། ལྷན་ཅིག་སྐྱེས་པ་མན་འདྲ། གཽ་རཀྵ་ལ་གུས་པས་འདུད། །གཽ་རཀྵ་ནཱ་ཐ་པཱ་ད་བསྒྱུར་བ་དང༌། ༈ གྲུབ་པའི་སློབ་དཔོན་ཆེན་པོ་ཏིནྟི་པ་སྔོ་སངས་ཤིན་ཏུ་སྨིན་པའི་ན་ཚོད་ཅན་གྱི་སྐུ་ལུས། ཨག་ཚོམ་དང་སྨ་ར་རིང་དུ་འཕྱང་བ་དབུ་སྐྱེས་དང་བཅས་པ་རབ་ཏུ་དཀར་བའི་མདངས་ཅན། རས་ཀྱི་སྨད་དཀྲིས་གསོལ་ཞིང་
XXX ཁྲི་འཐགས་ཀྱི་བྱ་བ་ལ་བརྩོན་པའི་ཚུལ་དུ་བཞུགས་པ། ལྷན་ཅིག་སྐྱེས་པ་སོགས་དང༌། ཏནྟི་པ་ལ་གུས་པས་འདུད། ཏནྟི་ཀ་པཱ་ད་སོགས། ༈ གྲུབ་པའི་དབང་ཕྱུག་དྲིལ་བུ་པ་སྐུ་མདོག་སྔོ་སངས་རལ་པའི་ཐོར་ཚུགས་ཅན། རུས་པའི་རྒྱན་དྲུག་དང་སྟག་གི་པགས་པའི་ཤམས་ཐབས་འཕྱང་བ། ཕྱག་གཉིས་རྡོ་རྗེ་དང་དྲིལ་བུ་འཛིན་པས་ཡུམ་པདྨ་ཅན་གྱི་མཚན་ཉིད་ཡོངས་སུ་རྫོགས་པ་རྡོ་རྗེ་རྣལ་འབྱོར་མའི་རྣམ་པ་དཀར་གསལ་ལྟ་བས་ཆོག་མི་ཤེས་པ་ལ་འཁྱུད་དེ་མཉམ་པར་སྦྱོར་བའི་བདེ་བ་རྒྱས་པ། ཞབས་གཡས་བརྐྱང་གི་སྟབས་ཅན་ཞེས་དང༌། དྲིལ་བུ་པ་ལ་ཕྱག་འཚལ་འདུད། །བཛྲ་གྷཎྜ་པཱ་ད་ཞེས་སོ། ། ༈ གྲུབ་པའི་དབང་ཕྱུག་ཆེན་པོ་ཛཱ་ལནྡ་ར་སྐུ་མདོག་དཀར་དམར་རལ་པའི་ཐོར་ཚུགས་དང་རུས་པའི་རྒྱན་ཅན་རས་དམར་པོའི་འདོམས་དཀྲིས་གསོལ་བ། ཞབས་ཕྱོགས་གཅིག་རྒྱབ་ནས་དཔུང་པར་བཀལ་ཞིང་ཕྱོགས་གཅིག་བཞེངས་པའི་ཚུལ་ཅན། ཕྱག་གཉིས་རྡོ་རྗེ་གཙུག་ཏོར་གྱི་ཕྱག་རྒྱ་ལྡོག་སྟེ་སྤྱི་བོར་འཆིངས་པ། གཡོན་གྱི་ཕྱོགས་ནས་རིག་མ་རྣལ་འབྱོར་མའི་ཆ་བྱད་ཅན་གྱིས་འདུད་བཞིན་པ་ཞེས་དང༌། ཛཱ་ལནྡཱ་རའི་ཞབས་ལ་འདུད། །ཛཱ་ལནྡྷ་ར་པཱ་ད་ཞེས་སོ། ། ༈ གྲུབ་པའི་སློབ་དཔོན་ཆེན་པོ་ཀུ་ཀུ་རི་པ་སྐུ་མདོག་སྔོ་སངས་རུས་པའི་རྒྱན་དང་རལ་པའི་ཐོར་ཚུགས་ཅན། ཕྱེད་སྐྱིལ་གྱིས་བཞུགས་ཤིང་ཐོད་པ་འཛིན་པའི་པང་དུ་རྡོ་རྗེ་ཡན་ལག་མ་ཀུ་ཀུ་རི་གཞོན་ནུའི་གཟུགས་ཅན་བཟུང་སྟེ་དགྱེས་རྒུར་རོལ་པ། ཞེས་དང༌། ཀུ་ཀུ་རཱི་པར་ཕྱག་འཚལ་འདུད། །ཀུ་ཀུ་རི་པཱ་ད་ཞེས་སོ། ། ༈ གྲུབ་པའི་སློབ་དཔོན་ཆེན་པོ་ལྭ་བ་པ་སྐུ་མདོག་དཀར་དམར་ཚངས་པ་སྤྱོད་པའི་ཆ་བྱད་ཅན། སྐུ་ལ་ལྭ་བའི་དུམ་བུ་བརྒྱ་ཕྲག་བསྡུས་ཏེ་དྲུབས་པའི་ན་བཟའ་གསོལ་ཞིང་ཕྱག་གཉིས་མཉམ་བཞག་གི་ཕྱག་རྒྱས་སྐྱིལ་མོ་ཀྲུང་བཅས་ཏེ་གཉིད་འཐུག་གི་ཟོལ་གྱིས་འོད་གསལ་བསམ་གྱིས་མི་ཁྱབ་པ་ལ་མཉམ་པར་འཇོག་པའི་
XXX ཚུལ་ཅན། ཞེས་དང༌། ལྭ་བ་པ་ལ་ཕྱག་འཚལ་འདུད། །ཀམྤ་ལ་པཱ་ད་བསྒྱུར་བ་དང༌། ༈ ཉེར་སྤྱོད་མཐའ་ཀླས་པས་བརྒྱན་པའི་དབུས་སུ་གྲུབ་པའི་སློབ་དཔོན་ཆེན་པོ་ཨིནྡྲ་བྷཱུ་ཏི་མིའི་བདག་པོ་སྟོབས་ཀྱིས་འཁོར་ལོས་བསྒྱུར་བའི་ཆ་བྱད་སྐུ་མདོག་དཀར་དམར་མཛེས་ཤིང་བརྗིད་ལ་ཆགས་པའི་ཉམས་ཅན་དར་དང་རིན་པོ་ཆེའི་རྒྱན་སྤྲས་ཏེ་ནོར་བུའི་ཁྲི་སྟན་མཐོ་ཞིང་ཡངས་ལ་བཀོད་ལེགས་པའི་སྟེང་དུ་བདེ་ལུགས་སུ་བཞུགས་པའི་སྐུའི་མཐའ་བསྐོར་དུ་བུད་མེད་རིན་པོ་ཆེའི་མཚན་ཉིད་རྫོགས་པའི་བཙུན་མོའི་ཚོགས་ལྔ་བརྒྱས་བསྐོར་བ་འདོད་པའི་ཡོན་ཏན་ཐམས་ཅད་ལ་རྗེས་སུ་ཆགས་པས་རྟག་ཏུ་དགྱེས་རྒུར་རོལ་པའི་རྣམ་པ་ཅན། ཞེས་དང༌། ཨིནྡྲ་བྷུ་ཏི་ལ་ཕྱག་འཚལ། །ཤྲཱི་ན་རེནྡྲ་བྷཱུ་ཏི་པཱ་ད། ཞེས་སོ། ། ༈ གྲུབ་པའི་སློབ་དཔོན་ཆེན་པོ་དཔལ་བདེ་བ་ཆེན་པོ་པདྨ་ཀཱི་ར་སྐུ་མདོག་དཀར་ལ་དམར་བའི་མདངས་ཆགས་པ། ཞལ་གྱི་དཀྱིལ་འཁོར་རབ་ཏུ་གང་ཞིང་རྒྱས་ལ། པདྨ་རྒྱས་པ་ལྟ་བུའི་སྤྱན་རས་དང་མཆུ་སྒྲོས་མངའ་བ། དབུའི་དཔྲལ་བའི་དབྱིབས་སུ་རྡོ་རྗེས་མཚན་པའི་པདྨ་རྒྱས་པའི་རེ་ཁཱས་སྤྲས་ཞིང༌། །སྐུའི་ཆ་ཤས་ཐམས་ཅད་དུ་པདྨ་ཨུཏྤལ་ལྕགས་ཀྱུ་ཞགས་པ་ལ་སོགས་པའི་ཤ་མཚན་དགེ་བ་ཤ་སྟག་གིས་སྤྲས་པ། ཀཱཎྚ་ཀའི་ཅོད་པན་མནབས་ཤིང༌། གསང་གོས་ཀྱི་སྟེང་དུ་ཆོས་གོས་རྣམ་པ་གསུམ་གསོལ་བ། ཕྱག་གཡས་རྡོ་རྗེ་རྩེ་ལྔ་ལ་ཐུགས་ཀར་གདེངས་ཤིང༌། གཡོན་ཀ་པཱ་ལ་བདུད་རྩིས་གང་བ་དཀུར་བརྟེན་པའི་མཆན་དུ་རྡོ་རྗེའི་ཁ་ཊྭཱྃ་ག་བཅུག་པ། ཞབས་རྡོ་རྗེའི་སྐྱིལ་མོ་ཀྲུང་གིས་བཞུགས་པའི་སྐུའི་གཡས་གཡོན་ནས་མཚན་ཉིད་ཐམས་ཅད་ཡོངས་སུ་རྫོགས་པའི་པདྨ་ནཱི་བཅུ་དྲུག་པའི་ལང་ཚོ་ཅན་གྱིས་བརྟེན་པ། ལྷན་ཅིག་སྐྱེས་པའི་སོགས་དང༌། པདྨཱ་ཀར་ར་ཕྱག་འཚལ་འདུད། ཤྲཱི་མ་ཧཱ་སུ་ཁ་པདྨ་བཛྲ་པཱ་ད་ཞེས་བསྒྱུར་བ་དང༌། ༈ གྲུབ་པའི་སློབ་དཔོན་ཆེན་པོ་ནག་པོ་བི་རཱུ་པ། དབུ་ལ་རྡོ་རྗེ་
XXX ཐོད་ཅེས་བྱ་བ་རྟེན་འབྲེལ་གྱི་བྱིན་རླབས་ཀྱི་ཅོད་པན་སྔོན་པོ་གསོལ་ཞིང༌། ཕྱག་གཡས་བ་མེན་གྱི་རྭ་བ་བདུད་རྩིས་གང་བ་འཛིན་ཞིང་གསོལ་བ། གཡོན་པུས་མོའི་སྟེང་དུ་བཞག་པ། སྐུའི་མདུན་དུ་ཀ་པཱ་ལ་མ་ཧཱ་བ་ལས་གང་བ་བཞག་ཅིང༌། དབུ་སྐྲ་ཅོ་བྲེག་ལྤགས་པའི་གདན་དང་འདོམས་དཀྲིས་ཅན། ལྷག་མ་རྒྱན་དང་ན་བཟའ་སྤངས་ཤིང་རྣལ་འབྱོར་པ་ཧུར་བག་ཆགས་པའི་རྣམ་པ། སྐུའི་གཡོན་ནས་རིག་མ་ཐལ་མོ་སྦྱར་བ་དང་བཅས་པ། ལྷན་ཅིག་སོགས་དང༌། ནག་པོ་བི་རཱུ་པ་ལ་འདུད། །ཀྲྀཥྞ་པི་རཱུ་པཱ་ད་ཞེས་བསྒྱུར། ༈ བརྒྱན་པའི་དབུས་སུ་གྲུབ་པའི་དབང་ཕྱུག་ཏིལླི་པ་ཆེན་པོ་སྐུ་མདོག་ཆེན་པོ་སྐུ་མདོག་སྔོན་ག་དབུ་སྐྲ་རལ་པའི་ཐོར་ཚུགས་ཅན། རས་ཀྱི་ཨངྒ་རག་གསོལ་ཞིང་མིང་འགྲེང་གང་ཙམ་གྱི་ནམ་མཁའ་ལ་འཕགས་ཏེ་ཏིལ་བརྡུང་བའི་རྣམ་པ་ཅན། སྐུའི་མདུན་དུ་རིག་མ་ཏིལ་མཁན་མོའི་རྣམ་པས་བར་སྣང་ལ་གནས་བཞིན་ཏུ་ཏིལ་ལུགས་པའི་བྱ་བ་ལ་བརྩོན་པ་དང་ཐབས་ཅིག་ཏུ་ལྷན་ཅིག་སྐྱེས་པའི་ཡེ་ཤེས་ཇི་ལྟར་འབྱུང་བའི་བརྡ་སྟོན་པར་མཛད་པ། བདེ་བ་ཆེན་པོའི་ཡེ་ཤེས་ཀྱི་སོགས་དང༌། ཏིལླི་པ་ལ་ཕྱག་འཚལ་ལོ། །ཏིལླི་ཀུ་པཱ་ད་ཧཱུྃ་ཧཱུྃ། ༈ གྲུབ་བའི་སློབ་དཔོན་ཆེན་པོ་དཔལ་ནཱ་རོ་པ་སྐུ་མདོག་སྨུག་ནག་ལྟ་བར་མི་བཟོད་པའི་ཟིལ་དང་ལྡན་པ། དབུ་སྐྲ་རལ་པའི་ཐོར་ཚུགས་དང་རུས་པའི་རྒྱན་དྲུག་གིས་སྤྲས་ཤིང་དར་གྱི་ཨངྒ་རག་གསོལ་བ། ཞིང་ཆེན་གྱི་པགས་པ་བཤུས་མ་ཐག་པ་ཁྲག་འཛགས་པ་སྟོད་གཡོགས་ཀྱི་ཚུལ་དུ་མནབས་པའི་རྐང་ལག་གཉིས་ནས་ཕྱག་གིས་བཟུང་སྟེ་ཕན་ཚུན་དུ་བརྒྱངས་པ། ཞབས་བརྐྱང་བསྐུམ་གྱི་ཚུལ་དུ་བཞུགས་པའི་གར་སྟབས་ཅན། ལྷན་ཅིག་སྐྱེས་སོགས་དང༌། ནཱ་རོ་པ་ཡི་ཞབས་ལ་འདུད། །ནཱ་རོ་པཱ་ད་ཞེས་བསྒྱུར་བ་དང༌། ༈ དབུས་སུ་གྲུབ་པའི་སློབ་དཔོན་ཆེན་པོ་དཔལ་ཤྲཱནྟི་པ་སྐུ་མདོག་སྔོ་སྐྱ་གནས་བརྟན་རྡོ་རྗེ་འཛིན་པ་ཆེན་པོ། ཅུང་ཟད་སྨིན་པའི་ན་ཚོད་ཅན་གྱི་རྣམ་པ་ཆོས་གོས་རྣམ་པ་གསུམ་དང་པཎྜི་ཏའི་ཅོད་
XXX པན་མནབས་ཤིང༌། ཕྱག་གཉིས་ཆོས་འཆད་ཀྱི་ཕྱག་རྒྱ་དང་བཅས་ཏེ་ཏ་ལའི་བྱང་བུར་བྲིས་པའི་གླེགས་བམ་བསྣམས་པ། ཞབས་རྡོ་རྗེའི་སྐྱིལ་མོ་ཀྲུང་གིས་གདིང་བ་ལ་བཞུགས་པ་དང༌། ཤཱིནྟི་པ་ལ་ཕྱག་འཚལ་ལོ། །རཏྣ་ཨཱ་ག་ར་ཤཱནྟི་པཱ་ཞེས་སྦྱར། དེ་བཞིན་ཏུ། ༈ བརྒྱན་པའི་དབུས་སུ་སློབ་དཔོན་ཆེན་པོ་ཤྲཱི་སཏྭ་ནཱ་ཐ་ཤཱནྟི་གུཔྟ་སྐུ་མདོག་སྨུག་ནག །རིན་པོ་ཆེ་དང་རུས་པའི་རྒྱན་ཐོ་རེ་བས་སྤྲས་པ། སྐུ་ཤ་ཉམས་རྒྱས་ཤིང་བརྗིད་ལ་ཧུར་བག་ཆགས་པ། དབུ་སྐྲ་ཅོ་བྲེག་རས་ཀྱིས་འདོམས་དཀྲིས་གྲུ་གསུམ་པ་གསོལ་ཞིང་ཞབས་གཉིས་བཟང་པོའི་འདུག་སྟངས་ཀྱིས་རིན་པོ་ཆེའི་ཁྲི་ལ་པགས་པའི་གདན་གྱི་སྟེང་དུ་བཞུགས་པ། ཕྱག་གཉིས་ཆོས་ཀྱི་འཁོར་ལོའི་ཕྱག་རྒྱ་ཐུགས་ཀར་འཆིང་བ། ལྷན་ཅིག་སྐྱེས་སོགས་དང༌། ཤཱནྟི་གུཔྟ་ལ་ཕྱག་འཚལ། །ཤྲཱི་སཏྭ་ནཱ་ཐ་ཤཱནྟི་གུཔྟ་ཧཱུྃ་ཧཱུྃ། ཞེས་སྦྱར། ༈ དེ་བཞིན་དུ། པགས་པའི་གདན་ལ་རྩ་བའི་བླ་མ་དང་གཉིས་སུ་མེད་པའི་སློབ་དཔོན་ཆེན་པོ་ཤྲཱི་བུདྡྷ་གུཔྟ་ཛོ་གིའི་ཆ་བྱད་ཅན་སྐུ་མདོག་དཀར་ལ་དམར་བའི་མདངས་ཆགས་པ། སྐུ་བོང་ཆེ་ཞིང་ལྷུན་ཆགས་ལ་དང་བ་འདྲེན་པ། མཐོང་བའི་མོད་ལ་བ་སྤུ་གཡོ་ཞིང་སྐྱི་བུང་ཞེས་བྱེད་པའི་བྲིལ་དང་ལྡན་པ། དབུ་སྐྲ་རལ་པའི་ཐོར་ཚུགས་སུ་བཅིངས་པའི་རྩེ་མོ་ནས་རལ་པའི་ཟར་བུ་ཅུང་ཟད་རྒྱབ་ཏུ་འཕྱང་བ། མེ་ཏོག་སེར་པོ་ཁ་བྱེ་མ་ཐག་པའི་ཐོད་བཅིངས་གསོལ་པ། བགྲེས་རྒུད་སྤངས་པའི་ལང་ཚོས་གང་བ་ལག་ནས་ཤིང་ཧུར་བག་ཆགས་པ། རས་ཀྱི་འདོམས་དཀྲིས་དང་ན་བཟའ་གསོལ་ཞིང་པུས་འཁྱུད་ཅན། ཕྱག་གཡས་ས་གནོན་པུས་སྟེང་དུ་བཀབ་ཅིང་གཡོན་ཀ་པཱ་ལ་བདུད་རྩིས་གང་བ་དཀུར་བརྟེན་པའི་ཚུལ་གྱིས་འཛིན་པ། སྐུ་དྲངས་པོར་བསྲངས་ཏེ་སྐྱིལ་ཀྲུང་ཕྱེད་པའི་འདུག་སྟངས་ཀྱིས་བཞུགས་པ། ལྷན་ཅིག་སྐྱེས་པའི་སོགས་དང༌། བུདྡྷ་གུཔྟར་གུས་ཕྱག་འཚལ། །ཤྲཱི་བུདྡྷ་གུཔྟ་ནཱ་ཐ་ཧཱུྃ་ཧཱུྃ། ཞེས་སྦྱར་བ་མ་གཏོགས་
XXX གོང་དང་འདྲའོ། །འདི་རྣམས་ཀྱིས་མཚོན་ནས་རང་རང་གིས་དམིགས་བསལ་དུ་དད་པའི་ཡུལ་སོགས་གྲུབ་ཐོབ་རྣལ་འབྱོར་གྱི་དབང་ཕྱུག་གང་ལའང་སྦྱོར་དུ་རུང་བར་གསུངས་པས། སོ་སོའི་མངོན་རྟོགས་དང་མཚན་དང་མཚན་སྔགས་ཁ་སྤོས་པས་ཆོག་གོ །དགེ་བས་གྲུབ་པ་མཆོག་རྣམས་ཀྱི། །བྱིན་རླབས་བདག་གི་རྒྱུད་ལ་ཞུགས། །རྟོགས་གྲོལ་དུས་མཉམ་མཁའ་སྤྱོད་ཚེའི། །གྲོང་ཁྱེར་ཉམས་དགར་དབུགས་དབྱུང་ཤོག །ཚུལ་འདི་ལྟ་བུའི་བླ་མའི་རྣལ་འབྱོར་མཛད་བྱང་མི་གསལ་ཡང་རྗེ་བཙུན་ཐམས་ཅད་མཁྱེན་པ་ཏཱ་ར་ནཱ་ཐའི་གསུངས་ཟིན་ཡིན་ངེས་པར་བཞུགས་པ་ལ་ཚིགས་ཟིན་གྱི་ཁ་སྐོང་འོས་རིགས་འཐད་ལྡན་རྣམས་དཀྱུས་སུ་བཙུད་པའི་བཀླགས་ཆོག་ཉིད་དུ་བློ་གྲོས་མཐའ་ཡས་པའི་སྡེས་རྫོང་གསལ་བཀྲ་ཤིས་ལྷ་རྩེའི་ཆོས་གྲྭར་བཀོད་པ་དགེ་ལེགས་འཕེལ།།


XXX @#/_/grub mchog spyi la brten pa'i bla ma'i rnal 'byor rgya gar lugs dngos grub thig le 'khyil ba bzhugs so/ /
XXX @##/_/na mo gu ru ma hA sid+d+hi la b+d+he b+h+yaH_rnam rtog la brten mi rtog brnyes/ /mi rtog khong nas ye shes shar/ /zung 'jug grub pa mchog rnams dang*/ /dbyer med rdo rje 'dzin la 'dud/ /bla ma'i rim pa las 'ongs pa/ /byin rlabs 'jug pa'i thabs zab mo/ /grub thob brgyud pa'i zhal lung ltar/ /rang rtog 'khrul dris ma bslad dgod/ /grub pa'i spyi mes chen po slob dpon rta mchog zhabs dang*/_rtsod dus kyi dpal he ru ka zhi ba sbas pa'i gdams ngag gis bka' srol ltar slob dpon dpa' bo 'od gsal lugs kyi grub thob brgyad cu rtsa bzhi gtso bor gyur pa'i grub chen gang la'ang sbyor du rung ba'i bla ma'i rnal 'byor nyams su len par 'dod pas/_dben pa'i gnas su maN+Dal gyi yo byad nye bar bsdog_/'byor na phyi nang gi mchod pa ji ltar rigs pa bshams la/_skyabs 'gro dang sems bskyed/_tshad med bzhi bsgoms pa rnams spyi ltar sngon du btang*/_maN+Dal byi dor byas la/_oM badz+ra b+hU mi swA hA/_zhes skyon sbyang*/_oM badz+ra re khe hU~M swA hA/_zhes dri bzang dang ba byung gis skyang nul bya/_de'i dbus su lag pa g.yas pas me tog gsar pa'i tshom bu bkod la/_hU~M su me ru ma d+h+ye ma/_shar du bkod la/_ya sUrba bi de ha dwI ba/_lhor bkod la/_ra dzaM pu dwI pa dak+Shi NaH_nub tu bkod la/_wa go da nI ya ba bash+tsa ma dwI pa/_byang du bkod la/_la urtar
XXX ku ru dI pa/_shar gyi g.yas g.yon du bkod/_yaM aHde hash+tsa bi de ha/_lho'i g.yas g.yon du bkod la/_raM raHtsa ma rash+tsa a pa tsa ma raH_nub kyi g.yas g.yon du bkod la/_waM waHsha Sha urtar mat+t+ri NaH_byang gi g.yas g.yon tu bkod la/_laM laHku ra wa ko ra wA/_shar gyi shar dang nub kyi nub tu bkod la/_tsan+d+ra sUr+Ya b+hUShi ta/_zhes brjod nas/_rin chen sna tshogs rang bzhin ni/ /ri rab lcog brgyad yang dag ldan/ /gling bzhi gling phran ldan pa 'di/ /'bul gyi yang dag bzhes su gsol/ /zhes me tog dor la maN+Dal mdun stegs su bkod/_maN+Dal gyi dbus su dag pa ye shes kyi zhing khams rgya dang tshad yongs su chad pa med pa rgyan bkod pa phun sum tshogs pa dang bcas pa phyi rol srung ba'i 'khor lo gzhom du med pas yongs su bskor ba'i snying por gzhal med khang rgyu dang bkod pa phun sum tshogs pa/_dur khrod rol pa'i yo byad dang lha rdzas kyi nyer spyod mtha' klas pas brgyan pa'i dbus su kr-iSh+Na sA ra'i pags pa'i gdan la rtsa ba'i bla ma dang gnyis su med pa'i grub pa'i dbang phyug dpal sa ra ha/_sku mdog dkar dmar bram ze'i cha byad can/_bgres rgud spangs pa'i lang tsho 'gyur ba med pa'i gang ba la rtag tu gnas pa/_dbu skra jo bregs ras dmar po'i ang+ga rag gsol zhing phyag gnyis gnyug ma'i gnas lugs mtshon par byed pa'i mda' srong
XXX ba'i phyag rgya can/_zhabs phyed skyil krung du bzhugs pa'i g.yon nas rig ma ye shes kyi rnal 'byor ma mda' mkhan mo'i tshul can gyis brten pa lhan cig skyes pa'i bde ba chen po'i ye shes gyi gzi 'od phyogs brgyar 'bar bas bzod par dka' ba'i zil can nyi ma'i snying po lta bu/_srid pa gsum zil gyis gnon pa'i lta stangs kyis rab tu dpa' ba'i nyams can/_thugs gnyis su med pa'i ye shes phyag rgya chen po chos kyi sku la rtag tu mnyam par bzhag pa/_lhun gyis grub cing rgyun mi chad pa'i phrin las kyi rnam par rol pa zad mi shes pa can/_dpa' bo dang DA ki rgya mtsho lta bu'i mchod cing brjid pa dang*/_sa gsum gyi dbang po rnams kyi ri mor byed bzhin pa'i sku can gyi spyi bor oM/_mgrin par AH_thugs kar hU~M/_dam tshig pa dang ye shes pa gdod nas dbyer mi phyed pa/_dngos dang brgyud pa'i bla ma kun 'dus/_yi dam zhi khro rab 'byams kun 'dus/_sangs rgyas chos dang dge 'dun kun 'dus/_mkha' 'gro chos skyong srung ma kun 'dus/ /brtan g.yo'i khyab bdag_/'khor 'das kyi dpal mgon/_skyabs gnas kun gyi spyi gzugs chen por mngon sum du bzhugs par gyur/_oM AHdpal ldan rdo rje bla ma dam pa'i zhabs kyi pad+mo yang dag pa'i ye shes gsal bar byed pa de la phyag 'tshal lo hU~M/_ad+ya sid+d+h+ya mAM/_zhes lan mang du phyag bya/_gang gi drin gyis bde chen nyid/ /skad cig nyid la 'char ba gang*/ /bla ma rin chen lta bu'i sku/ /mda' bsnun khyod zhabs pad la 'dud/ /rgyal ba kun dngos bla ma la/ /dngos bshams yid sprul mchod pa'i sprin/ /sgo gsum longs spyod dge rtsar bcas/ /gus pas 'bul gyis bzhes su gsol/ /nyon mongs dbang gyur thog med nas/ /sdig sgrib nyes ltung ci bsags par/ /gnong 'gyod drag pos snying nas bshags/ /dag cing tshangs pa'i dngos grub stsol/ /skye
XXX 'phags rgyal ba sras bcas kyis/ /zag bcas zag pa med pa yi/ /bsod nams gang bsags thams cad la/ /dga' ba chen pos rjes yi rang*/ /zab dang rgya che'i chos kyi sgo/ /khyad par theg mchog bla na med/ /gdul bya'i khams dbang mos pa bzhin/ /rgyun chad med par ston par bskul/ /'khor ba'i 'khor lo ma zhig bar/ /de srid snying rje'i gzhan dbang gis/ /zhi ba'i dbyings su mi gzhol bar/ /rtag cing brtan par bzhugs gsol 'debs/ /'dis mtshon dus gsum dge ba'i mthus/ /myur du byang chub mchog thob nas/ /nam mkha' mnyam pa'i sems can rnams/ /srid pa'i mtsho las sgrol bar shog_/ces yan lag bdun pa ci mang dang*/_thun mong gis maN+Dal spyi ltar rgyas bsdus lan mang du phul rjes nang gi maN+Dal ni/_skad cig gis ye shes kyi ral gri rno ngar dang ldan pa lag tu byung*/_des rang lus dum bur byas nas maN+Dal du bkod par gyur/_hU~M masta ka su me ru ya bA ma bA da bi de haH_ra hi ni pA da dzam+pu dwI pa/_a pash+tsi ma dwI pa hi na ha sta/_la bA ma hasta ku ru urta ra/_shUtra ku su ma tsan+d+ra sUr+Ya b+hU Shi taM/_zhes tshom bu bkod par mos la/_i daM gu ru rat+na At+ma naM kA ya maN+Dal nir+Ya ta yA mi/_zhes dbul zhing slar yang*/_rang lus rnam smin phung po'i ka pA la/ /lings skyis phog dbus lhag ma'i lus phung rnams/ /ril por bcug la yi ge 'bru gsum gyis/ /sbyangs rtogs spar zhu bdud rtsi'i rgya mtshor gyur/ /oM AHhU~M ha ho hrIHlan gsum du brjod/_ljags rdo rje'i 'od zer gyi sbu gus gsol bar gyur par bsam la/_zhal zas ro brgya ldan pa'i yid 'phrog pa/ /legs sbyar 'di ni dpal ldan bla ma la/ /dad pas phul bas 'gro ba 'di dag kun/ /'byor ldan ting 'dzin zas la spyod par shog_/oM AHshrI mA na sang+gu ru ma hrA sid+d+hi mA na sa ra ha sa pa ri wA ri b+h+yaH_i daM ba li ga Na tsakra ma hA pU dza khA hi/_sarba sid+d+hi m+me pra yats+tshan+tu/_'dir phyi nang gi mchod pa ci 'byor bas mchod par
XXX bgyi gsungs pas rgyas par spro na mchod phreng gi tshig ci rigs sbyar/_dkyus su/_yang dag dga' ba'i me tog gis/ /rdo rje nyi ma pad+mar byung*/ /me tog bdag nyid la mchod pa/ /rdo rje gsum gyi bdag nyid mchog_/puSh+pe sogs sbyar/_rnam rtog tshogs kyi yul min cing*/ /lte bar gtum mo 'bar ba yis/ /nges par sregs pa de yi spos/ /thugs kyi rdo rje la ni dbul/ /yi ge hU~M las yang dag byung*/ /sngags kyi 'od zer shin tu gsal/ /mar me 'bar ba'i yang dag 'od/ /thugs kyi rdo rje la dbul bya/ /bde ba chen po'i nam mkhar gnas/ /byang chub sems ni sad pa dang*/ /de nyid kyis kyang byugs pa ni/ /thugs kyi rdo rje la dbul bya/ /'dir ni gang dang gang longs spyod/ /dbang po thams cad yang dag bstan/ /de dag thams cad thugs rdo rje/ /bza' ba'i mchod pas mchod par bya/ /'gog pa'i rdo rjer gugs pa'i sems/ /rang nyams dpyid kyi dpa' bo'i glu/ /gzhom med na dA'i sgra dbyangs kyis/ /thugs kyi rdo rje'i mchod par bgyi/ /nang mchod bdud rtsi phul la/_oM AHhU~M/_bdud rtsi lnga yi bza' ba ni/ /dngos grub kun gyi de nyid mchog_/sgron ma lnga yi bza' ba ni/ /sangs rgyas kun gyi dam tshig gtso/ /nyes bral zhi ba'i btung ba mchog_/sbrang rtsi bu ram 'bru dang shing*/ /bcos pa'i myos byed rnam pa lnga/ /shes rab rang bzhin dbul bar bgyi/ /mtshan nyid dang ldan pa'i rig ma phul bar mos la/_lha mo 'di dag phyag rgya che/ /mtha' yas bde ba sbyin pa mo/ /rigs lnga las byung 'di phul bas/ /rig pa'i brtul zhugs mthar phyin shog_/lha dang mi yi bde ba ni/ /bsdus byas rdo rje 'dzin pa yi/ /bcu drug char yang mi phod pa'i/ /dga' ba bla na med pas mchod/ /ces gsang ba'i mchod pa bya/_bstod pa grub chen so so'i sngags brjod bye brag pa sogs gang shes dang*/_spyi tsam du/_zab zhi spros dang bral ba gnyug ma'i don/ /snang dang stong pa gnyis dang gnyis min la/ /e ma ho 'di snyam bral
XXX ba'i lta ba can/ /bde chen lhan skyes rol pa khyed la 'dud/ /smra bsam brjod du med pa'i rang bzhin la/ /bde stong 'dzin pa med pa bde ba'i nyams/ /e ma ho rtsol bral lhug ma'i sgom pa can/ /bde chen lhan skyes rol pa khyed la 'dud/ /spang blang byar med rang bzhin 'od gsal la/ /gzung 'dzin glo bur dri ma rnam dag pa/ /e ma ho rang bzhin lhun grub 'bras bu can/ /bde chen lhan skyes rol pa khyed la 'dud/ /ces pa tsam bya/_slar yang yan lag bdun pa bya bar gsungs pas rgyas bsdus gang lcogs sbyor chog_/dkyus tsam du/_oM AHdpal ldan rdo rje bla ma dam pa'i zhabs kyi pad+mo yang dag pa'i ye shes gsal bar byed pa de la phyag 'tshal lo/ /hU~M/_byang chub snying po mchis kyi bar/ /bla ma sangs rgyas la phyag 'tshal/ /skyobs pa chos la phyag 'tshal lo/ /dge 'dun rje la phyag 'tshal lo/ /phyag 'os sangs rgyas thams cad dang*/ /rgyal bas gsungs pa'i chos rnams dang*/ /tshul khrims bzang ldan dge 'dun ste/ /dkon mchog gsum la bdag skyabs mchi/ /byas dang byed du bcug dang yi rang ba'i/ /sdig pa ma lus skyon kun 'jig byed pa'i/ /spyan lngar so sor bshags shing slar yang ni/ /mi byed pa yi sdom pa blang bar bgyi/ /nyan thos rang rgyal bla med rgyal ba dang*/ /rgyal ba'i sras kyis dge ba gang mdzad pa/ /de dag kun la yang dag yi rangs shing*/ /byang chub tu ni yongs su bsngo bar bgyi/ /rgyal ba dkon mchog la sogs gsum po la/ /dngos po kun gyis bdag ni skyabs su mchi/ /byang chub mchog tu sems bskyed de bzhin du/ /bla na med pa'i lam la brten par bgyi/ /bdag gis dus gsum dge ba ci spyad pas/ /nam mkha'i mtha' klas gyur pa'i sems can rnams/ /bla med rdo rje theg pa'i snod gyur te/ /kun kyang rdo rje 'dzin pa myur thob shog_/ces pa tsam bya/_de nas/_At+ma naM su kha duHkha te me dz+nyA
XXX ne su kha ki duHkha to ma thi/_nas+thi sa ra ha na mo stu te/_zhes pa'am bod skad du bsgyur na/_bdag gis bde sdug khyed kyis mkhyen no/ /bde'am sdug kyang khyod las gzhan ma mchis so/ /phyag 'tshal zhing 'dud do sa ra ha/ /zhes pa gang rigs kyis drag tu gsol ba gdab cing*/_gu ru sha ra NaM gats+tsha mi/_lan mang du brjod/_oM AHma hA sid+d+hi la b+d+ha sa ra ha pA da hU~M hU~M/_zhes pa'i mtshan sngags kyang ci nus su bzla zhing*/_mthar/_bla ma grub brnyes rnal 'byor dbang phyug gi_/sku la rtsa gsum 'khor lo lnga gsal ba'i/ /g.yon phyogs rkyang ma dang bral kun+da'i khams/ /sku yi byin rlabs bdud rtsi 'od dkar tshul/ /smin mtshams nas byung rang gi dpral bar thim/ /lus kyi sgrib dag bum dbang thob par gyur/ /g.yas phyogs ro ma dang 'brel rdul gyi khams/ /gsung gi bdud rtsi 'od dmar tshul du byung*/ /mgul ba'i gnas nas bdag gi mgrin par thim/ /ngag gi sgrib dag gsang ba'i dbang bskur thob/ /a wa d+hU ti mun can dngas ma'i tshul/ /thugs kyi byin rlabs bdud rtsi 'od mthing bcas/ /thugs ka'i gnas nas snying gar thim pa yis/ /yid kyi sgrib dag sher dbang ye shes thob/ /bla ma 'od du zhu nas rang la thim/ /gnyis med bsam brjod bral ba'i ngang du bzhag_/sgo gsum 'pho ba'i sgrib dag tshig dbang thob/ /bla ma rang sems tha mi dad du 'dres/ /zhes dmigs la bsam med gnyug ma'i rang ngor mnyam par 'jog_/de las ldang ba na/_e ma ma la dus gsum dge ba 'dis/ /bdag dang mar gyur mtha' yas sems can kun/ /grub pa mchog gis rtag par rjes bzung nas/ /phyag rgya chen po'i dngos grub myur thob shog_/mgo bor bla ma'i cod pan 'chang*/ /lag tu rdo rje dril bu 'dzin/ /ngag tu gsang sngags rgyal po bzla/ /yid kyis zung 'jug bsgom par shog_/ces sogs thun mong ma yin pa'i bsngo smon gdab cing shis brjod kyis mtha' brgyan no/_!_/de bzhin du gzhan 'dra ba la/_mngon rtogs kyi
XXX skabs/_pags pa'i gdan la rtsa ba'i bla ma dang gnyis su med pa'i dpal mgon 'phags pa klu sgrub sku mdog sngo sangs nor bu'i kha dog lta bu dwangs shing dri ma med pa mtshan dang dpe byad kyis spras shing phyag gnyis chos 'khor gyi phyag rgya thugs kar 'ching ba/_na bza' chos gos gsum dang bcas shing rdo rje'i skyil mo krung gi bzhugs pa shaM kha la sogs pa'i klu'i rgyal po mchog rnams sbrul gyi rnam pas gdengs ka'i grib ma 'bul ba la sku rgyab brten pa/_thugs gnyis su med pa'i ye shes man gong bzhin la/_bstod pa'i skabs/_nA gA rdzu na'i zhabs la 'dud/ /mtshan sngags kyang sa ra ha'i tshab tu/ /nA gA rdzu na ma gtogs gzhan gong dang 'dra ba nyid do/ /_!_/de bzhin sha ba ri la'ang*/_bla ma dang grub pa'i dbang phyug dpal ri khrod pa chen po/_'gyur ba med pa'i chos nyid mtshon pa'i sku mdog nag po/_dbu skra ral pa spyi bor bcings pa smyug ma'i shun pas bsdams pa/_spyan 'bru tshugs su gzigs shing spyan rtsa dmar ba/_phyag gnyis mda' dang 'od ma'i gzhu mchog la phag rgod kyi khog stong dang khog smad bkal ba/_rma bya'i mdangs sgro gshibs pa'i sham thabs dang*/_me tog 'bras bu'i rgyan sna tshogs pas brgyan te 'gyings bag dang bcas pa'i rol stabs su bzhugs pa/_sku'i g.yas g.yon nas rig ma rgyan dang cha lugs gtso bo dang mtshungs shig mda' dong 'dzin pa gnyis kyis brten pa/_lhan cig skyes pa'i bde ba man 'dra/_ri khrod dbang phyug zhabs la 'dud/ /sha ba ri pA da zhes bsgyur ba ma gtogs 'dra/_bstod pa'i skabs spro na nags rin gyis mdzad pa'i sha ba ri pa'i bstod chen sogs kyang 'don no/_!_/de bzhin du grub chen nag po spyod pa la'ang*/_rtsa ba'i bla ma dang gnyis su med pa'i grub pa'i slob dpon brtul zhugs spyod pa'i dbang phyug kah+na pa chen po sku mdog nag po dpa' zhing sgeg pa hur bag chags pa phyag g.yas cang te'u 'khrol zhing*/_g.yon ka pA la bdud rtsis gang ba 'dzin pa'i mchan
XXX khung du rdo rje kha T+wA~M ga bsgreng ba/_dbu skra ral pa'i thor tshugs can sku la mi rus kyi phyag rgya drug gis brgyan cing stag gi pags pa'i shams thabs gsol ba/_pi shwa rU pi nI zhes bya ba'i srin mo'i gtso mo 'jigs su rung ba gdan nam bzhon pa'i tshul du gnas pa'i steng na rol stabs su bzhugs pa/_res 'ga' ro langs chen po me tog gi phreng bas brgyan pa la chibs pa sogs sna tshogs pa'i rnam 'phrul ston par mdzad bzhin pa'i/_steng gi nam mkha' la gdugs bdun 'dzin pa med par 'khor zhing*/_DA ma ru bdun 'khrol ba po med par rang 'khrol ba/_res 'ga' gdugs bdun brgyad DA ma ru bdun brgyar 'phel ba'i cho 'phrul can/_snang ba'i 'khor bdun brgya dang mi snang ba'i 'khor bdun brgya la sogs pa grub pa dang rig pa 'dzin pa'i rnal 'byor pho mo grangs med dbus na rol ba/_lhan cig skyes pa'i bde ba man 'dra/_spyod 'chang dbang po'i zhabs la 'dud/ /tsar+Ya badz+ra ram/_kah+nar+Ya ka pA da zhes sbyar ba dang*/_!_gnyis su med pa grub pa'i dbang phyug bi rU pa chen po sku mdog smug nag sbom zhing thung la gsus khyim che ba/_dbu skra co bregs la me tog gi phreng bas spud pa/_lhag ma rgyan spangs shing phyag g.yas sdigs mdzub kyi phyag rgya gdengs pas nyi ma brtod la gnon pa'i tshul dang*/_g.yon pa man gyi rwa zhal chang gis gang ba dkur brten pa/_sha na'i gos kyis 'doms dkris can rol pa'i 'dug stangs su bzhugs pa/_g.yon gyi phyogs nas rig ma chang snod 'dzin pas 'dud pa'i tshul can/_lhan cig skyes pa'i man 'dra/_bi rU pa la phyag 'tshal 'dud/ /bi rU pA da zhes bsgyur ba dang*/_!_grub pa'i dbang phyug Dom+b+hi he ru ka sku mdog dkar dmar ral pa'i thor tshugs dang rus pa'i rgyan drug gis brgyan pa/_shin tu 'jigs pa'i sbrul reg pa'i dug can gyis rgyan du mdzad cing*/_mthong ba'i
XXX dug can lcag gi tshul du bsnams pa/_kha rlangs kyi dug can bdun gyis dbu'i steng du gdangs gar byas shing*/_stag mo mi bzad 'jigs su rung ba la chibs pa'i brla g.yon pa'i steng nas gsang ba'i gzungs ma g.yung mo rnal 'byor ma gcer mo pad+ma can gyi mtshan nyid yongs su rdzogs pas dam du 'khyud cing 'khril ba'i bde bas dgyes rgur rol pa/_lhan cig skyes man 'dra/_Dom+b+hi pa la phyag 'tshal 'dud/ /Dom+b+hi he ru ka pA da zhes bsgyur/_!_grub pa'i dbang phyug lU hi pa chen po sku mdog sngo sangs skems shing rid pa'i tshul can ral pa'i thor tshugs cung zad dang bcas shing ras kyi smad dkris gsol ba/_sku'i mdun phyogs su nya'i rgyu lto spungs pa las phyag gis blangs te zhal du gsol ba'i rnam pa can phyed skyil gyis bzhugs pa/_lhan cig skyes man 'dra ba la/_lU hi pa la phyag 'tshal 'dud/ /lU hi pA da zhes bsgyur ba dang*/_!_bla ma dang gnyis su med pa'i grub pa'i dbang phyug gau rak+Sha nA tha sku mdog dkar sngo snum pa'i mdangs can shangs rgyud mtho zhing 'dzum bag gi mdangs dang ldan pa/_ag tshom dang dbu skra ljang ser/_lta stangs cer re pa/_snyan la mu dra nag po dang*/_mgul du sing+ga nA da'i rwa dung 'chang zhing sku la tsakra kan+ta ste 'khor lo lta bu'i bem po gsol ba/_sgom shing la kos go brten pa'i tshul gyis skyil krung dang bcas drang por bzhugs shing*/_phyag mnyam bzhag gi steng na ku ba'i snod thogs pa/_mthong ba'i mod la nyams dga' zhing tha mal gyi snang ba hrul por 'jig pa/_lhan cig skyes pa man 'dra/_gau rak+Sha la gus pas 'dud/ /gau rak+Sha nA tha pA da bsgyur ba dang*/_!_grub pa'i slob dpon chen po tin+ti pa sngo sangs shin tu smin pa'i na tshod can gyi sku lus/_ag tshom dang sma ra ring du 'phyang ba dbu skyes dang bcas pa rab tu dkar ba'i mdangs can/_ras kyi smad dkris gsol zhing
XXX khri 'thags kyi bya ba la brtson pa'i tshul du bzhugs pa/_lhan cig skyes pa sogs dang*/_tan+ti pa la gus pas 'dud/_tan+ti ka pA da sogs/_!_grub pa'i dbang phyug dril bu pa sku mdog sngo sangs ral pa'i thor tshugs can/_rus pa'i rgyan drug dang stag gi pags pa'i shams thabs 'phyang ba/_phyag gnyis rdo rje dang dril bu 'dzin pas yum pad+ma can gyi mtshan nyid yongs su rdzogs pa rdo rje rnal 'byor ma'i rnam pa dkar gsal lta bas chog mi shes pa la 'khyud de mnyam par sbyor ba'i bde ba rgyas pa/_zhabs g.yas brkyang gi stabs can zhes dang*/_dril bu pa la phyag 'tshal 'dud/ /badz+ra g+haN+Da pA da zhes so/ /_!_grub pa'i dbang phyug chen po dzA lan+da ra sku mdog dkar dmar ral pa'i thor tshugs dang rus pa'i rgyan can ras dmar po'i 'doms dkris gsol ba/_zhabs phyogs gcig rgyab nas dpung par bkal zhing phyogs gcig bzhengs pa'i tshul can/_phyag gnyis rdo rje gtsug tor gyi phyag rgya ldog ste spyi bor 'chings pa/_g.yon gyi phyogs nas rig ma rnal 'byor ma'i cha byad can gyis 'dud bzhin pa zhes dang*/_dzA lan+dA ra'i zhabs la 'dud/ /dzA lan+d+ha ra pA da zhes so/ /_!_grub pa'i slob dpon chen po ku ku ri pa sku mdog sngo sangs rus pa'i rgyan dang ral pa'i thor tshugs can/_phyed skyil gyis bzhugs shing thod pa 'dzin pa'i pang du rdo rje yan lag ma ku ku ri gzhon nu'i gzugs can bzung ste dgyes rgur rol pa/_zhes dang*/_ku ku rI par phyag 'tshal 'dud/ /ku ku ri pA da zhes so/ /_!_grub pa'i slob dpon chen po l+wa ba pa sku mdog dkar dmar tshangs pa spyod pa'i cha byad can/_sku la l+wa ba'i dum bu brgya phrag bsdus te drubs pa'i na bza' gsol zhing phyag gnyis mnyam bzhag gi phyag rgyas skyil mo krung bcas te gnyid 'thug gi zol gyis 'od gsal bsam gyis mi khyab pa la mnyam par 'jog pa'i
XXX tshul can/_zhes dang*/_l+wa ba pa la phyag 'tshal 'dud/ /kam+pa la pA da bsgyur ba dang*/_!_nyer spyod mtha' klas pas brgyan pa'i dbus su grub pa'i slob dpon chen po in+d+ra b+hU ti mi'i bdag po stobs kyis 'khor los bsgyur ba'i cha byad sku mdog dkar dmar mdzes shing brjid la chags pa'i nyams can dar dang rin po che'i rgyan spras te nor bu'i khri stan mtho zhing yangs la bkod legs pa'i steng du bde lugs su bzhugs pa'i sku'i mtha' bskor du bud med rin po che'i mtshan nyid rdzogs pa'i btsun mo'i tshogs lnga brgyas bskor ba 'dod pa'i yon tan thams cad la rjes su chags pas rtag tu dgyes rgur rol pa'i rnam pa can/_zhes dang*/_in+d+ra b+hu ti la phyag 'tshal/ /shrI na ren+d+ra b+hU ti pA da/_zhes so/ /_!_grub pa'i slob dpon chen po dpal bde ba chen po pad+ma kI ra sku mdog dkar la dmar ba'i mdangs chags pa/_zhal gyi dkyil 'khor rab tu gang zhing rgyas la/_pad+ma rgyas pa lta bu'i spyan ras dang mchu sgros mnga' ba/_dbu'i dpral ba'i dbyibs su rdo rjes mtshan pa'i pad+ma rgyas pa'i re khAs spras zhing*/ /sku'i cha shas thams cad du pad+ma ut+pal lcags kyu zhags pa la sogs pa'i sha mtshan dge ba sha stag gis spras pa/_kAN+Ta ka'i cod pan mnabs shing*/_gsang gos kyi steng du chos gos rnam pa gsum gsol ba/_phyag g.yas rdo rje rtse lnga la thugs kar gdengs shing*/_g.yon ka pA la bdud rtsis gang ba dkur brten pa'i mchan du rdo rje'i kha T+wA~M ga bcug pa/_zhabs rdo rje'i skyil mo krung gis bzhugs pa'i sku'i g.yas g.yon nas mtshan nyid thams cad yongs su rdzogs pa'i pad+ma nI bcu drug pa'i lang tsho can gyis brten pa/_lhan cig skyes pa'i sogs dang*/_pad+mA kar ra phyag 'tshal 'dud/_shrI ma hA su kha pad+ma badz+ra pA da zhes bsgyur ba dang*/_!_grub pa'i slob dpon chen po nag po bi rU pa/_dbu la rdo rje
XXX thod ces bya ba rten 'brel gyi byin rlabs kyi cod pan sngon po gsol zhing*/_phyag g.yas ba men gyi rwa ba bdud rtsis gang ba 'dzin zhing gsol ba/_g.yon pus mo'i steng du bzhag pa/_sku'i mdun du ka pA la ma hA ba las gang ba bzhag cing*/_dbu skra co breg lpags pa'i gdan dang 'doms dkris can/_lhag ma rgyan dang na bza' spangs shing rnal 'byor pa hur bag chags pa'i rnam pa/_sku'i g.yon nas rig ma thal mo sbyar ba dang bcas pa/_lhan cig sogs dang*/_nag po bi rU pa la 'dud/ /kr-iSh+Na pi rU pA da zhes bsgyur/_!_brgyan pa'i dbus su grub pa'i dbang phyug til+li pa chen po sku mdog chen po sku mdog sngon ga dbu skra ral pa'i thor tshugs can/_ras kyi ang+ga rag gsol zhing ming 'greng gang tsam gyi nam mkha' la 'phags te til brdung ba'i rnam pa can/_sku'i mdun du rig ma til mkhan mo'i rnam pas bar snang la gnas bzhin tu til lugs pa'i bya ba la brtson pa dang thabs cig tu lhan cig skyes pa'i ye shes ji ltar 'byung ba'i brda ston par mdzad pa/_bde ba chen po'i ye shes kyi sogs dang*/_til+li pa la phyag 'tshal lo/ /til+li ku pA da hU~M hU~M/_!_grub ba'i slob dpon chen po dpal nA ro pa sku mdog smug nag lta bar mi bzod pa'i zil dang ldan pa/_dbu skra ral pa'i thor tshugs dang rus pa'i rgyan drug gis spras shing dar gyi ang+ga rag gsol ba/_zhing chen gyi pags pa bshus ma thag pa khrag 'dzags pa stod g.yogs kyi tshul du mnabs pa'i rkang lag gnyis nas phyag gis bzung ste phan tshun du brgyangs pa/_zhabs brkyang bskum gyi tshul du bzhugs pa'i gar stabs can/_lhan cig skyes sogs dang*/_nA ro pa yi zhabs la 'dud/ /nA ro pA da zhes bsgyur ba dang*/_!_dbus su grub pa'i slob dpon chen po dpal shrAn+ti pa sku mdog sngo skya gnas brtan rdo rje 'dzin pa chen po/_cung zad smin pa'i na tshod can gyi rnam pa chos gos rnam pa gsum dang paN+Di ta'i cod
XXX pan mnabs shing*/_phyag gnyis chos 'chad kyi phyag rgya dang bcas te ta la'i byang bur bris pa'i glegs bam bsnams pa/_zhabs rdo rje'i skyil mo krung gis gding ba la bzhugs pa dang*/_shIn+ti pa la phyag 'tshal lo/ /rat+na A ga ra shAn+ti pA zhes sbyar/_de bzhin tu/_!_brgyan pa'i dbus su slob dpon chen po shrI satwa nA tha shAn+ti gup+ta sku mdog smug nag_/rin po che dang rus pa'i rgyan tho re bas spras pa/_sku sha nyams rgyas shing brjid la hur bag chags pa/_dbu skra co breg ras kyis 'doms dkris gru gsum pa gsol zhing zhabs gnyis bzang po'i 'dug stangs kyis rin po che'i khri la pags pa'i gdan gyi steng du bzhugs pa/_phyag gnyis chos kyi 'khor lo'i phyag rgya thugs kar 'ching ba/_lhan cig skyes sogs dang*/_shAn+ti gup+ta la phyag 'tshal/ /shrI satwa nA tha shAn+ti gup+ta hU~M hU~M/_zhes sbyar/_!_de bzhin du/_pags pa'i gdan la rtsa ba'i bla ma dang gnyis su med pa'i slob dpon chen po shrI bud+d+ha gup+ta dzo gi'i cha byad can sku mdog dkar la dmar ba'i mdangs chags pa/_sku bong che zhing lhun chags la dang ba 'dren pa/_mthong ba'i mod la ba spu g.yo zhing skyi bung zhes byed pa'i bril dang ldan pa/_dbu skra ral pa'i thor tshugs su bcings pa'i rtse mo nas ral pa'i zar bu cung zad rgyab tu 'phyang ba/_me tog ser po kha bye ma thag pa'i thod bcings gsol pa/_bgres rgud spangs pa'i lang tshos gang ba lag nas shing hur bag chags pa/_ras kyi 'doms dkris dang na bza' gsol zhing pus 'khyud can/_phyag g.yas sa gnon pus steng du bkab cing g.yon ka pA la bdud rtsis gang ba dkur brten pa'i tshul gyis 'dzin pa/_sku drangs por bsrangs te skyil krung phyed pa'i 'dug stangs kyis bzhugs pa/_lhan cig skyes pa'i sogs dang*/_bud+d+ha gup+tar gus phyag 'tshal/ /shrI bud+d+ha gup+ta nA tha hU~M hU~M/_zhes sbyar ba ma gtogs
XXX gong dang 'dra'o/ /'di rnams kyis mtshon nas rang rang gis dmigs bsal du dad pa'i yul sogs grub thob rnal 'byor gyi dbang phyug gang la'ang sbyor du rung bar gsungs pas/_so so'i mngon rtogs dang mtshan dang mtshan sngags kha spos pas chog go_/dge bas grub pa mchog rnams kyi/ /byin rlabs bdag gi rgyud la zhugs/ /rtogs grol dus mnyam mkha' spyod tshe'i/ /grong khyer nyams dgar dbugs dbyung shog_/tshul 'di lta bu'i bla ma'i rnal 'byor mdzad byang mi gsal yang rje btsun thams cad mkhyen pa tA ra nA tha'i gsungs zin yin nges par bzhugs pa la tshigs zin gyi kha skong 'os rigs 'thad ldan rnams dkyus su btsud pa'i bklags chog nyid du blo gros mtha' yas pa'i sdes rdzong gsal bkra shis lha rtse'i chos grwar bkod pa dge legs 'phel//


Footnotes[edit]



Research Information
Translator's notes
Note from Ringu Tulku
The Guru Yoga Based on the Siddhas from Indian Tradition Called: "Swirling of the Siddhis".
Notes on the text itself
Notes on authorship
Notes on individuals related to text
Other notes
Genre from Richard Barron's Catalog
Liturgy
Genre from dkar chag
khrid phran
BDRC Link
VolumeI1CZ3979
BDRC Content Information
No note on contents


Related Content
Recensions
Other Translations
Commentary(s) of this Text in the DNZ
Text(s) in the DNZ of which this is a commentary
Related Western Publications
Related Tibetan Publications
Other Information

Information about Unicode Tibetan and the digitization of this text

As the only available unicode Tibetan text at the time, Nitartha International's version of the Paro Edition of the gdams ngag mdzod is provided here. However, note that it has not been thoroughly edited and that there may also be mistakes introduced through the conversion process. Eventually we will provide a fully edited version of the entire Shechen Edition, entered and edited multiple times by Pulahari Monastery in Nepal, but as of fall 2017 that project has not been finished. Note that the folio numbers that appear throughout were added by Nitartha Input Center at the time of input.

Provided by Nitartha International Document Input Center. Many thanks to Lama Tenam and Gerry Wiener for help with fonts and conversion.

View JSON

JSON Export

,