Wylie:Sgrol ma 'jigs pa brgyad skyob phrin las kyi khrid 'khor ba'i 'phrang sgrol

From gDams Ngag mDzod
Revision as of 17:29, 14 April 2022 by MortO (talk | contribs)
(diff) ← Older revision | Latest revision (diff) | Newer revision → (diff)
Jump to navigation Jump to search


Upload a file
Click the picture above to view the original manuscript.

སྒྲོལ་མ་འཇིགས་པ་བརྒྱད་སྐྱོབ་ཕྲིན་ལས་ཀྱི་ཁྲིད་འཁོར་བའི་འཕྲང་སྒྲོལ་
sgrol ma 'jigs pa brgyad skyob phrin las kyi khrid 'khor ba'i 'phrang sgrol
Liberation from the Perilous Path of Samsara: The Instructions of Tārā, the Deity Related to Enlightened Activities Who Protects from the Eight Fears

Damngak Dzö Volume 16 (མ་) / Pages 447-465 / Folios 1a1 to 10a3


Property "Author" has a restricted application area and cannot be used as annotation property by a user.




[[peoplefields::rnal 'byor pa 'od dpag rdo rje རྣལ་འབྱོར་པ་འོད་དཔག་རྡོ་རྗེ་ 'od dpag rdo rje འོད་དཔག་རྡོ་རྗེ་ Mitrayogi; Śrīputra; Karmapa, 8th? (in the order given in the colophon, Volume 16, p 465, 10a1) rnal 'byor pa 'od dpag rdo rje. | ]]


[edit]
XXX སྒྲོལ་མ་འཇིགས་པ་བརྒྱད་སྐྱོབ་ཕྲིན་ལས་ཀྱི་ཁྲིད་འཁོར་བའི་འཕྲང་སྒྲོལ་བཞུགས་སོ། །
XXX ཚོགས་གཉིས་རྒྱ་མཚོ་རབ་ཏུ་རྒྱས་པ་ལ། །རང་བྱུང་ཡེ་ཤེས་ཨུཏྤལ་རྣམ་རོལ་པ། །དམིགས་མེད་སྙིང་རྗེའི་དྲི་བསུང་འཕྲོ་བ་ཅན། །བཅོམ་ལྡན་སྒྲོལ་མས་འགྲོ་ཀུན་བསྐྱངས་བར་གསོལ། །གང་གི་ཞབས་ཟུང་པདྨོའི་ཅོད་པན་ལ། །ཚངས་དབང་དྲག་པོ་འཇིག་རྟེན་སྐྱོང་བཞི་དང༌། འཇིག་རྟེན་དྲེགས་ལྡན་གཙུག་གིས་གུས་བསྟེན་པའི། །འཕགས་མ་སྒྲོལ་མའི་ཞབས་ལ་སྤྱི་བོས་འདུད། །བཅོམ་ལྡན་སྒྲོལ་མས་མི་ཏྲ་ཛྭ་ཀི་ལ། །མན་ངག་བསྒོམ་པའི་རིམ་པ་གསུངས་པ་རྣམས། །སྙན་ནས་སྙན་བརྒྱུད་བདུད་རྩིའི་གཏེར་ཆེན་འདི། །འགྲོ་བ་གདུང་བ་སེལ་ཕྱིར་ཡི་གེར་བཀོད། །འདིར་བཅོམ་ལྡན་འདས་སྒྲོལ་མ་འཇིགས་པ་བརྒྱད་སྐྱོབ་ཕྲིན་ལས་ཀྱི་ཁྲིད་འཁོར་བའི་འཕྲང་སྒྲོལ་ཞེས་བྱ་བ་འདི་སྟོན་པ་བྱེད་པ་ལ་དོན་གསུམ་སྟེ། སྔོན་འགྲོ་དངོས་གཞི། རྗེས་སོ། །དང་པོ་ལ་གཉིས། ཐུན་མོང་དང་ཁྱད་པར་རོ། །དང་པོ་ལ་བཞི་སྟེ། དལ་འབྱོར་རྙེད་པར་
XXX དཀའ་བ། འཆི་བ་མི་རྟག་པ། ལས་རྒྱུ་འབྲས། འཁོར་བའི་ཉེས་དམིགས་བསྒོམ་པ་རྣམས་སྤྱི་དང་མཐུན་ནོ། །གཉིས་པ་ལ་བཞི་སྟེ། ཅི་བྱས་ཐམས་ཅད་བྱང་ཆུབ་ཀྱི་ལམ་དུ་འགྲོ་བར་བྱེད་པ་སྐྱབས་འགྲོ་སེམས་བསྐྱེད་ཀྱི་ཁྲིད། སྡིག་སྒྲིབ་དག་པར་བྱེད་པ་རྡོ་རྗེ་སེམས་དཔའི་བསྒོམ་བཟླས་ཀྱི་ཁྲིད། ཚོགས་གཉིས་རྫོགས་པར་བྱེད་པ་མཎྜལ་གྱི་ཁྲིད། བྱིན་རླབས་མྱུར་དུ་འཇུག་པར་བྱེད་པར་ལམ་ཟབ་མོ་བླ་མའི་རྣལ་འབྱོར་གྱི་ཁྲིད་དང་བཞི་ནི་སྤྱི་དང་མཐུན་ནོ། །དེ་དག་ནི་སྔོན་འགྲོའི་རིམ་པའོ། །གཉིས་པ་དངོས་གཞི་ནི་དོན་གཉིས་ཏེ། བསྐྱེད་རིམ་དང་རྫོགས་རིམ་མོ། །དང་པོ་ལ་གསུམ་སྟེ། དང་པོ་བསྐྱེད་པའི་རིམ་པ་སྐུའི་ཁྲིད་ནི། ཚད་མེད་པ་བཞི་སྔོན་དུ་འགྲོ་བས། །སྭབྷཱ་ཝས་སྟོང་པར་སྦྱང༌། སྟོང་པའི་ངང་ལས། ས་གཞི་ཐམས་ཅད་རི་བོ་ཏ་ལའམ། གཡུ་ལོ་བཀོད་པའི་ཞིང་ཁམས་སུ་གྱུར་པ་ལས། དེའི་དབུས་སུ་མཚོ་སྔོ་ཞིང་དྭངས་པའི་དཀྱིལ་དུ་ནེའུ་གསེང་མེ་ཏོག་གིས་མཛེས་
XXX པ་དང༌། དེའི་དབུས་སུ་པཾ་ལས་ཨུཏྤལ་རྒྱས་པ། ཡུ་བ་གསེར་ལས་གྲུབ་པ་ཟེའུ་འབྲུ་དང་ལོ་འདབ་རླུང་གིས་བསྐྱོད་པ་ལས་དམ་པ་ཆོས་ཀྱི་སྒྲ་འབྱུང་བ་དེའི་ལྟེ་བར་ཨ་ལས་ཟླ་བའི་དཀྱིལ་འཁོར་གྱི་སྟེང་དུ། ཏཱཾ་ལས་ཨུཏྤལ་ལྗང་ཁུ་ཏཱཾ་གྱིས་མཚན་པ། དེ་ལས་འོད་ཟེར་ཕྱོགས་བཅུར་འཕྲོས། སངས་རྒྱས་དང་བྱང་ཆུབ་སེམས་དཔའ་ཐམས་ཅད་མཆོད། སེམས་ཅན་ཐམས་ཅད་ཀྱི་སྒྲིབ་པ་སྦྱངས། སྒྲོལ་མའི་གོ་འཕང་ལ་བཀོད། ཚུར་འདུས་ཡོངས་སུ་གྱུར་པ་ལས། རང་ཉིད་འཕགས་པ་སྒྲོལ་མ་སྐུ་མདོག་ལྗང་སྔོན། ཞལ་གཅིག་ཕྱག་གཉིས། ཞབས་གཡས་བརྐྱང་གཡོན་བསྐུམ་པ། དར་གྱི་ཤམ་ཐབས་ཅན། ཕྱག་གཡས་པ་མཆོག་སྦྱིན་གྱི་ཕྱག་རྒྱས་ཨུཏྤལ་འཛིན་པ། གཡོན་ཨུཏྤལ་སྙན་གྱི་ཐད་ཀར་རྒྱས་པའི་ཡུ་བ་ཐུགས་ཀར་མཐེབ་སྲིན་གྱིས་འཛིན་པ། ནུ་མ་འབུར་བ། སྤྱན་དཀྱུས་དང་སྨིན་དཀྱུས་རིང་བ། རལ་པའི་ཐོར་ཅོག་སྤྱི་བོར་བཅིངས་ནས་ཟར་བུ་རྐེད་སོར་གཡོ་ཞིང་འགྱིང་བག་དང་བཅས་པ། ཞི་བ། སྒེག་པ། གཞོན་ནུ་ལང་ཚོ་དར་ལ་བབས་པ། བུ་མོ་ལོ་བཅུ་དྲུག་ལོན་པའི་ན་ཚོད་ཅན། རིན་པོ་ཆེ་སྣ་ལྔས་རྩེ་ཕྲན་དང་སྙན་ཆ། མགུལ་རྒྱན་དང་དཔུང་རྒྱན། ཕྱག་གདུབ་དང་ཞབས་གདུབ། སྐུ་རགས་དང་དོ་ཤལ། དར་གྱི་ཅོད་པན་དང་མུ་ཏིག་ཆུན་པོས་བརྒྱན་པ། ཟླ་བའི་རྒྱབ་ཡོལ་ཅན་སྣང་ལ་རང་བཞིན་མེད་པ། མེ་ལོང་གི་གཟུགས་བརྙན་ལྟ་བུར་བསྒོམ་པའི་སྤྱི་བོར་ཨོཾ་དཀར་པོ། མགྲིན་པར་ཨཱཿདམར་པོ། སྙིང་ཁར་ཧཱུྃ་མཐིང་ཁ། ཧཱུྃ་ལས་འོད་ཟེར་ལྕགས་ཀྱུ་ལྟ་བུ་འཕྲོས། པོ་ཏ་ལའམ། གཡུ་ལོ་བཀོད་པ་ནས། རང་འདྲའི་ཡེ་ཤེས་པ་སྤྱན་དྲངས། རང་དང་དབྱེར་མེད་དུ་གྱུར། སླར་འོད་ཟེར་འཕྲོས།
XXX རིགས་ལྔ་སྤྱན་དྲངས། དབང་བསྐུར། དྲི་མ་དག །བདུད་རྩིའི་ལྷག་མ་ཡར་ལུད་པ་ལས་སྤྱི་བོར་དོན་གྲུབ་ཀྱིས་དབུ་བརྒྱན། སྙིང་ཁར་ཨུཏྤ་ལའི་སྟེང་དུ་ཟླ་བའི་དཀྱིལ་འཁོར་གྱི་དབུས་སུ་ཏཱཾ་ཡིག་ལྗང་ཁུ་ལས་སྔགས་ཀྱི་ཕྲེང་བ་མར་གད་ཀྱི་མདོག་ལྟ་བུ་ལས་འོད་འཕྲོས། ལུས་ཀྱི་ནང་གང་དུག་ལྔ་སྦྱངས་ཕྱིར་འཕྲོས། སྣང་བ་འོད་ཀྱི་གཞལ་ཡས་ཁང་དུ་བྱས། སེམས་ཅན་ལ་ཕོག །སྒྲོལ་མའི་གོ་འཕང་ལ་བཀོད། ཚུར་འདུས་གཡས་སུ་འཁོར་བ་ལ་དམིགས་ནས། ཐམས་ཅད་ཀྱི་ཞལ་ནས་སྔགས་སྒྲ་སྒྲོགས་པར་བསམ་ལ། ཨོཾ་ཏཱ་རེ་ཏུཏྟཱ་རེ་ཏུ་རེ་སྭཱ་ཧཱ། ཞེས་སྔགས་འདྲེན་ནོ། །མཐར་སྣང་བ་འོད་དུ་ཞུ་ནས་ནང་བཅུད་ལ་ཐིམ། ནང་བཅུད་འོད་དུ་ཞུ་ནས་རང་ལ་ཐིམ། རང་ལུས་འོད་དུ་ཞུ་ནས་ཐུགས་ཀའི་ཏཱཾ་ཡིག་ལ་ཐིམ། ཏཱཾ་ཡིག་ནཱ་ད་ལ་ཐིམ། དེ་ནམ་མཁའ་ལ་འཇའ་ཡལ་བ་ལྟར་དམིགས་མེད་མ་བཅོས་པའི་ངང་ལ་བཞག་གོ །དེ་ནི་བསྐྱེད་པའི་རིམ་པའོ། །གཉིས་པ་དེ་ཉིད་གསལ་འདེབས་པ་འོད་ཟེར་སྤྲོ་བ་སྣའི་འཁྲིད་ནི། རང་ཉིད་སྔར་ལྟར་སྒྲོམ་མར་བསྐྱེད་པའི་སྤྱི་བོར་པད་ཟླའི་སྟེང་དུ་རྣམ་པར་སྣང་མཛད་སྐུའི་སྒྲོལ་མ་སྐུ་མདོག་ཟླ་བ་ལྟར་དཀར་བ། ཞལ་གཅིག་ཕྱག་གཉིས། ཞབས་གཡས་བརྐྱང་གཡོན་བསྐུམ་གྱིས་བཞུགས་པ། གཡས་མཆོག་སྦྱིན་ཕྱག་རྒྱས་ཨུཏྤལ་འཛིན་པ། གཡོན་ཨུཏྤལ་སྙན་གྱི་ཐད་ཀར་རྒྱས་པའི་ཡུ་བ་མཐེབ་སྲིན་གྱིས་ཐུགས་ཀར་འཛིན་པ། ཞལ་འཛུམ་པ་སྤྱན་དཀྱུས་དང་སྨིན་དཀྱུས་རིང་པ་སོགས་སྔར་ལྟར་བསྐྱེད་པའི་ཐུགས་ཀར་པད་ཟླའི་སྟེང་དུ་ཏཱཾ་ཡིག་དཀར་པོ་ལས་སྔགས་ཕྲེང་དཀར་པོ་མུ་ཏིག་ལྟ་བུ་འཁོར་བ། དེ་ལས་འོད་ཟེར་དཀར་པོ་
XXX དཔག་ཏུ་མེད་པ་འཕྲོས། རང་གི་ཀླད་པའི་ནང་གང༌། ལུས་ཀྱི་སྒྲིབ་པ་དག །གཏི་མུག་བྱང༌། འོད་ཟེར་ཕྱི་རོལ་ཏུ་ཕྱོགས་བཅུར་འཕྲོས། ཕྱོགས་བཅུའི་རྒྱལ་བ་སྲས་བཅས་ཀྱི་སྐུ་ལ་ཕོག །སྐུ་གཟི་མདངས་དང་ལྡན་པར་བྱས། སྐུའི་བྱིན་རླབས་ཐམས་ཅད་འོད་ཟེར་དཀར་པོའི་རྣམ་པར་བསྡུས་ནས་སྤྱི་བོའི་སྒོ་ལམ་ལ་ཐིམ་པས་སྐུའི་བྱིན་རླབས་ཞུགས། ཆོས་དབྱིངས་ཡེ་ཤེས་མངོན་དུ་བྱས་པར་བསྒོམ་ལ་སྔགས་འདྲེན་ནོ། །མགྲིན་པར་པད་ཟླའི་སྟེང་དུ་སྣང་བ་མཐའ་ཡས་གསུང་གི་སྒྲོལ་མ་དམར་མོའི་སྙིང་ཁར། པད་ཟླའི་སྟེང་དུ་ཏཱཾ་ཡིག་དམར་པོ་ལ་སྔགས་ཀྱི་ཕྲེང་བ་པདྨ་རཱ་གའི་མདོག་ལྟ་བུ་ལས་འོད་ཟེར་དམར་པོ་འཕྲོས། མགྲིན་པའི་ནང་གང༌། ངག་གི་སྒྲིབ་པ་དག །འདོད་ཆགས་དག །འོད་ཟེར་ཕྱོགས་བཅུར་ཕྱིར་འཕྲོས། ཕྱོགས་བཅུའི་རྒྱལ་བ་སྲས་བཅས་ཀྱི་གསུང་ལ་ཕོག །གསུང་དབྱངས་ཡན་ལག་དྲུག་ཅུ་དང་ལྡན་པར་བྱས། དེ་དག་གིས་གསུང་གི་བྱིན་རླབས་ཐམས་ཅད་འོད་ཟེར་དམར་པོའི་རྣམ་པར་བསྡུས་ནས་མགྲིན་པར་ཐིམ། གསུངས་དབྱངས་ཡན་ལག་དྲུག་ཅུའི་བྱིན་རླབས་ཞུགས། སོ་སོར་རྟོགས་པའི་ཡེ་ཤེས་མངོན་དུ་བྱས་པར་བསྒོམ་ལ་སྔགས་འདྲེན་ནོ། །སྙིང་ཁར་པད་ཟླའི་སྟེང་དུ། མི་བསྐྱོད་པ་ཐུགས་ཀྱི་སྒྲོལ་མ་མཐིང་ཁའི་ཐུགས་ཁར། པད་ཟླའི་སྟེང་དུ་ཏཱཾ་ཡིག་མཐིང་ཁ་ལ་སྔགས་ཀྱི་ཕྲེང་བ་བཻཌཱུརྻ་ལྟ་བུ་ལས་འོད་འཕྲོས། རང་གི་ལུས་ཀྱི་ནང་གང༌། ཡིད་ཀྱི་སྒྲིབ་པ་དག །ཞེ་སྡང་དག །འོད་ཟེར་ཕྱོགས་བཅུར་འཕྲོས། ཕྱོགས་བཅུའི་རྒྱལ་བ་སྲས་བཅས་ཀྱི་ཐུགས་རྒྱུད་བསྐུལ། དེ་དག་ཐམས་ཅད་ཀྱི་ཐུགས་རང་བཞིན་འོད་གསལ་བའི་ཆོས་ཉིད་ཇི་ལྟ་བ་རྟོགས་པ་དང༌། ཆོས་ཅན་ཇི་
XXX སྙེད་པ་མཁྱེན་པའི་ཡེ་ཤེས་ཐམས་ཅད་འོད་ཟེར་སྔོན་པོའི་རྣམ་པར་བསྡུས་ནས། རང་གི་སྙིང་ཁའི་སྒྲོལ་མ་ལ་ཐིམ་པས། ཐུགས་ཀྱི་བྱིན་རླབས་ཐམས་ཅད་ཞུགས། མེ་ལོང་ཡེ་ཤེས་མངོན་དུ་བྱས་པར་བསྒོམས་ལ་སྔགས་འདྲེན་ནོ། །ལྟེ་བར་པད་ཟླའི་སྟེང་དུ་རིན་འབྱུང་ཡོན་ཏན་གྱི་སྒྲོལ་མ་སྐུ་མདོག་སེར་མོ་ལྟ་བུར་བསྐྱེད་པའི་སྙིང་ཁར་པད་ཟླའི་སྟེང་དུ་ཏཱཾ་ཡིག་སེར་པོ་ལས་སྔགས་ཕྲེང་གསེར་མདོག་ལྟ་བུ་འཁོར་བ་ལས་འོད་འཕྲོས། རང་གི་ལུས་ནང་གང༌། འདོད་པ་དང་ང་རྒྱལ་ལས་གྱུར་པའི་སྒྲིབ་པ་དག །འོད་ཟེར་ཕྱིར་འཕྲོས་ཕྱོགས་བཅུའི་རྒྱལ་བ་སྲས་བཅས་ཐམས་ཅད་ལ་ཕོག །ཡོན་ཏན་མཐའ་དག་རྒྱས་པར་བྱས། དེ་དག་གི་ཡོན་ཏན་ཐམས་ཅད་འོད་ཟེར་སེར་པོའི་རྣམ་པར་བསྡུས་ནས་རང་གི་ལྟེ་བའི་སྒྲོལ་མ་ལ་ཐིམ། ཡོན་ཏན་གྱི་བྱིན་རླབས་མཐའ་དག་ཞུགས། མཉམ་ཉིད་ཡེ་ཤེས་མངོན་དུ་བྱས་པར་སྒོམ་ལ་སྔགས་འདྲེན་ནོ། །གསང་གནས་སུ་པད་ཟླའི་སྟེང་དུ་དོན་གྲུབ་ཕྲིན་ལས་ཀྱི་སྒྲོལ་མ་ལྗང་ཁུ། རང་ལྟ་བུའི་ཐུགས་ཁར་པད་ཟླའི་སྟེང་དུ་ཏཱཾ་ཡིག་ལྗང་ཁུ་ལས་སྔགས་ཕྲེང་མརྒད་ལྟ་བུ་འཁོར་བ་ལས་འོད་ཟེར་ལྗང་ཁུ་འཕྲོས། གསང་གནས་ཡན་ཆད་གང༌། ཆགས་པ་དང་ཕྲག་དོག་དག །འོད་ཟེར་ཕྱོགས་བཅུར་ཕྱིར་འཕྲོས། ཕྱོགས་བཅུའི་རྒྱལ་བ་སྲས་བཅས་ལ་ཕོག །ཕྲིན་ལས་ལྷུན་གྲུབ་ཏུ་བྱས། དེ་དག་གི་ཕྲིན་ལས་ཀྱི་བྱིན་རླབས་ཐམས་ཅད་འོད་ཟེར་ལྗང་ཁུའི་རྣམ་པར་བསྡུས་ནས་རང་གི་གསང་གནས་སུ་ཐིམ་པས་ཕྲིན་ལས་ཀྱི་དངོས་གྲུབ་ཐོབ། བྱ་བ་ནན་ཏན་གྱི་ཡེ་ཤེས་མངོན་དུ་བྱས་པར་བསྒོམ་ལ་སྔགས་འདྲེན་ནོ། །ཡང་རིམ་པ་ལྟར།
XXX སྤྱི་བོ། མགྲིན་པ། སྙིང་ཁ། ལྟེ་བ། གསང་གནས་ཀྱི་གནས་ལྔར། སྒྲོལ་མ་དཀར། དམར། མཐིང༌། སེར། ལྗང་ཁུ་ལྔ་ལས། འོད་ཟེར་དཀར་དམར་མཐིང་སེར་ལྗང་ཁུ་རང་གི་ལུས་ཀྱི་གནས་ལྔར་ཕོག །གཏི་མུག །འདོད་ཆགས། ཞེ་སྡང༌། ང་རྒྱལ། ཕྲག་དོག་ལྔ་སྦྱངས། འོད་ཟེར་ཕྱོགས་བཅུར་འཕྲོས། ཕྱོགས་བཅུའི་རིགས་དྲུག་ལ་ཕོག །དེ་དག་གིས་གཏི་མུག །འདོད་ཆགས། ཞེ་སྡང༌། ང་རྒྱལ། ཕྲག་དོག་ལྔ་སྦྱངས། ཆོས་དབྱིངས། སོར་རྟོགས། མེ་ལོང༌། མཉམ་ཉིད། བྱ་བ་གྲུབ་པའི་ཡེ་ཤེས་མངོན་དུ་བྱས། སྐུ་གསུང་ཐུགས་ཡོན་ཏན་ཕྲིན་ལས་ལྔའམ། རྣམ་སྣང༌། འོད་དཔག་མེད། མི་བསྐྱོད་པ། རིན་བྱུང༌། དོན་གྲུབ། ལས་ཀྱི་སྒྲོལ་མའི་གོ་འཕང་ལྔ་ལ་བཀོད། ཚུར་འདུས་སོ་སོར་ཐིམ། སྐུ་གསུང་ཐུགས་ཡོན་ཏན་ཕྲིན་ལས་ཀྱི་བྱིན་རླབས་རྣམས་ཞུགས། དུག་ལྔ་དག །ཡེ་ཤེས་ལྔ་མངོན་དུ་བྱས། སྐུ་ལྔ་ཐོབ་པར་བསམ་ལ་སྔགས་འདྲེན་ནོ། །དེ་དག་ནི་འོད་ཟེར་སྤྲོ་བསྡུའི་ཁྲིད་ཀྱི་དམིགས་པའོ། །འདི་ནི་བསྐྱེད་པའི་རིམ་པའི་ཁྲིད། བུམ་དབང་གི་དོན་ཡིན་ལ། སྤྲུལ་སྐུ་མངོན་དུ་བྱས་བྱ་ཡིན་ནོ། །གསུམ་པ་བཟླས་པ་སྔགས་ཀྱི་སྤྲོ་བསྡུའི་ཁྲིད་ནི། རང་སྒྲོལ་མ་གོང་ལྟར་གསལ་གདབ་པའི་གནས་ལྔར། སྒྲོལ་མ་རིགས་ལྔ་བསྐྱེད་དོ། །སྤྱི་བོར་དཀར་མོ། མགྲིན་པར་དམར་མོ། སྙིང་ཁར་མཐིང་ཁ། ལྟེ་བར་སེར་མོ། གསང་གནས་སུ་ལྗང་ཁུ་རྣམས་ཀྱི་སྙིང་ཁར་པད་ཟླའི་སྟེང་དུ་ཏཱཾ་ཡིག་དཀར་དམར་མཐིང་སེར་ལྗང་ཁུ་ལྔ་ལས་སྔགས་ཀྱི་ཕྲེང་བ་མུ་ཏིག་དཀར་པོ་དང༌། པདྨ་རཱ་ག་ལྟར་དམར་བ་དང༌། མཐོན་མཐིང་ངམ་བཻཌཱུརྻ་ལྟར་མཐིང་བ་དང༌། གསེར་གྱི་ཕྲེང་བ་ལྟར་སེར་བ་དང༌།
XXX མརྒད་ཀྱི་ཕྲེང་བ་ལྟར་ལྗང་བ་ལྔ་ལས་རིམ་པ་བཞིན། སྔགས་ཕྲེང་ངམ། ཨཱ་ལི་ཀཱ་ལིའི་རྣམ་པར་འོད་ཟེར་དཀར་པོ། དམར་པོ། སྔོན་པོ། སེར་པོ། ལྗང་ཁུ་རྣམས་ལས་འོད་ཟེར་རིམ་པ་བཞིན་ཕྱོགས་བཅུར་འཕྲོས་པས། ཕྱོགས་བཅུའི་སངས་རྒྱས་བྱང་སེམས་ཐམས་ཅད་ལ་ཕོག །སྐུ་གསུང་ཐུགས་ཡོན་ཏན་ཕྲིན་ལས་ཀྱི་རོལ་པ་མཐའ་དག་རྒྱས་པར་བྱས། ཕྱི་ནང་གསང་གསུམ་གྱི་མཆོད་པས་མཆོད་པར་བསམ་ལ། རླུང་རོ་ཐེང་གསུམ་འབུད། དེ་ནས་རླུང་ནང་དུ་རྔུབ་ལ་བུམ་པ་ཅན་བཟུང༌། ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་ཀྱི་ངོ་བོ་ཐམས་ཅད་སྔགས་ཕྲེང་དཀར། དམར། མཐིང༌། སེར། ལྗང་ཁུའི་རྣམ་པར་འདུས་ནས། སྤྱི་བོ། མགྲིན་པ། སྙིང་ཁ། ལྟེ་བ། གསང་གནས་རྣམས་ཀྱི་སྒྲོལ་མ་དཀར་དམར་མཐིང་སེར་ལྗང་ཁུ་ལྔའི་ཐུགས་ཀའི་སྔགས་འཁོར་ལ་ཐིམ་པས། གཏི་མུག །འདོད་ཆགས། ཞེ་སྡང༌། ང་རྒྱལ། ཕྲག་དོག་གི་སྒྲིབ་པ་ལྔ་དག །ཆོས་དབྱིངས་ཡེ་ཤེས། སོར་རྟོགས། མེ་ལོང༌། མཉམ་ཉིད། བྱ་གྲུབ་ཡེ་ཤེས་ལྔ་མངོན་དུ་བྱས། སྐུ་ལྔ་ཐོབ། སྐུ་གསུང་ཐུགས་ཡོན་ཏན་ཕྲིན་ལས་ཀྱི་བྱིན་རླབས་ཞུགས་པར་བསམ་ལ་རླུང་བུམ་པ་ཅན་ཅི་ནུས་སུ་བཟུང་ངོ༌། །དེ་བཞིན་དུ་སྒྲོལ་མ་ལྔའི་ཐུགས་ཁ་ནས་སྔགས་ཕྲེང་དཀར་དམར། སྔོ་སེར། ལྗང་ཁུ་འཕྲོས་པས། ལུས་ཀྱི་གནས་ལྔ་གང༌། དུག་ལྔ་དག །སླར་འོད་ཟེར་ཕྱོགས་བཅུར་འཕྲོས། ཕྱོགས་བཅུའི་རིགས་དྲུག་གི་སེམས་ཅན་ལ་ཕོག །དེ་དག་གིས་གཏི་མུག །འདོད་ཆགས། ཞེ་སྡང༌། ང་རྒྱལ། ཕྲད་དོག་ལྔ་དག །ཡེ་ཤེས་ལྔ་
XXX མངོན་དུ་བྱས། སྐུ་གསུང་ཐུགས་ཡོན་ཏན་ཕྲིན་ལས་རིགས་ལྔའི་སྒྲོལ་མའི་གོ་འཕང་ལ་བཀོད་པར་བསམ་ལ་རླུང་ཕྱིར་བཏང་ངོ༌། །དེ་ནས་དེ་དག་གི་སྐུ་གསུང་ཐུགས་ཡོན་ཏན་ཕྲིན་ལས་ཀྱི་ནུས་པ་ཐམས་ཅད་རང་ལ་ཞུགས་པར་བསམ་ཞིང༌། ཁྱད་པར་དུ་སེམས་ཅན་ཐམས་ཅད་ལ་སྙིང་རྗེ་ཚད་མེད་པ་བསྐྱེད་ལ། དེ་དག་སྔགས་ཕྲེང་གི་རྣམ་པར་བསྡུས་ཤིང༌། བུམ་པ་ཅན་གྱི་རླུང་ནུས་ཚད་བཟུང་ངོ༌། །དེ་ནི་སྔགས་ཕྲེང་བུམ་པ་ཅན་ལ་བརྟེན་པའི་སྦྱོར་བའོ། །དེ་ནས་སྣོད་བཅུད་རང་ལ་ཐིམ། རང་གི་སྤྱི་བོའི་སྒྲོལ་མ་མགྲིན་པའི་སྒྲོལ་མ་ལ་ཐིམ། མགྲིན་པའི་སྒྲོལ་མ་སྙིང་ཁའི་སྒྲོལ་མ་ལ་ཐིམ། གསང་གནས་ཀྱི་སྒྲོལ་མ་ལྟེ་བའི་སྒྲོལ་མ་ལ་ཐིམ། ལྟེ་བའི་སྒྲོལ་མ་སྙིང་ཁའི་སྒྲོལ་མ་ལ་ཐིམ། རང་ལུས་ཀྱང་ཐུགས་ཀའི་སྒྲོལ་མ་ལ་ཐིམ། ཐུགས་ཀའི་སྒྲོལ་མ་ཏཱཾ་ལ་ཐིམ། ཏཱཾ་ནམ་མཁའ་ལ་འཇའ་ཡལ་བ་ལྟར་དམིགས་མེད་བློ་འདས་ཀྱི་ངང་ལ་མཉམ་པར་བཞག་གོ །དེས་ནི་ངག་རླུང་དག་པར་བྱེད་པ་སྔགས་ཕྲེང་བུམ་པ་ཅན་ལ་བརྟེན་པའི་ཁྲིད་དེ་གསང་དབང་གི་དོན་ཡིན། དེ་ནི་ལོངས་སྤྱོད་རྫོགས་པའི་སྐུ་མངོན་དུ་བྱེད་པའོ། །གཉིས་པ་ལ་བཞི་སྟེ། ཞི་གནས། ལྷག་མཐོང༌། འོད་གསལ། འཕོ་བ་སྟེ་བཞིའོ། །དང་པོ་ལ་གསུམ། མཚན་མ་ལ་བརྟེན་པའི་ཞི་གནས་དང༌། རྟོག་པ་ལ་སེམས་གཏད་པའི་ཞི་གནས་དང༌། རྟོག་མེད་དུ་འཇོག་པའི་ཞི་གནས་ཏེ་གསུམ་མོ། །དང་པོ་ལ་གཉིས། ཕྱི་ན་སེམས་བཟུང་བ་དང༌། ནང་ན་སེམས་བཟུང་བའི། དང་པོ་ལ་གཉིས་ཏེ། མ་དག་པ་དང་དག་པའོ། །དང་པོ་མདུན་དུ་ཀ་བ་བུམ་པ། ཤིང་བུ། རྡེའུ་ལ་སོགས་པ་གང་ཡང་རུང་བ་ཞིག་ལ། ལུས་གནད་ལྟ་སྟངས་དང་བཅས་པས་མ་ཡེངས་པར་སེམས་བཟུང༌།
XXX དེ་ལ་ཡེངས་སུ་ཡང་མི་འཇུག །རྟོག་པ་ཡང་མི་འགྱེད། གཞན་ཡང་བྱིང་རྒོད་བྱུང་ན་སྟེང་འོག་ཏུ་སེམས་འཛིན་པ་དང༌། གཡས་གཡོན་དུ་སེམས་འཛིན་པ་ཡང་ཤེས་པར་བྱའོ། །གཉིས་པ་ནི། མདུན་དུ་སྒྲོལ་མའི་སྐུ་གཟུགས་སམ། མེད་ན་བསྒོམ་ལ། དེ་ལ་རྟོག་པ་ཡང་མི་སྤྲོ། ཡེངས་སུ་ཡང་མི་འཇུག །དེ་ཐོག་ཏུ་མ་ཡེངས་ཙམ་དུ་གློད་ནས་འཇོག་པ་ནི། དག་པ་རྒྱལ་བའི་སྐུ་ལ་སེམས་འཛིན་པའོ། །གཉིས་པ་ལ་གཉིས་ཏེ། མ་དག་པ་དང་དག་པའོ། །དང་པོ་མ་དག་པ་ཐིག་ལེ་ལ་སེམས་བཟུང་བ་ནི། རང་གི་སྙིང་གར་ཐིག་ལེ་དམར་སེར་འོད་འཕྲོ་བ། སྲན་འབྲུ་ཙམ་ལ་སེམས་བཟུང་སྟེ། དེ་ལ་རྟོག་པ་ཡང་མི་སྤྲོ། ཡེངས་སུ་ཡང་མི་འཇུག་གོ །གཉིས་པ་དག་པ་རྒྱལ་བའི་སྐུ་ལ་སེམས་འཛིན་པ་ནི། རང་གི་སྙིང་ཁར་པད་ཟླའི་སྟེང་དུ། སྒྲོལ་མ་ཚོན་གང་བ་འོད་དང་བཅས་པ་ལ་སེམས་བཟུང༌། དེ་ལ་རྟོག་པ་ཡང་མི་སྤྲོ། ཡེངས་སུ་ཡང་མི་འཇུག་གོ །བྱིངས་རྒོད་བྱུང་ན་སྔར་བཞིན་ནོ། །དེ་ནི་མཚན་མ་ལ་བརྟེན་པའི་ཞི་གནས་སོ། །གཉིས་པ་རྟོག་པ་ལ་གཏད་ནས་སེམས་བཟུང་བ་ནི། རྣམ་རྟོག་ལྷག་པར་སྤྲོས་ལ། དུག་ལྔ། དུག་གསུམ། ཉོན་མོངས་པ་གཟུང་འཛིན་འཁོར་བའི་རྣམ་རྟོག །དགེ་བ་བཅུ་དང༌། ཕ་རོལ་ཏུ་ཕྱིན་པ་བཅུའི་རྣམ་རྟོག་ལ་སོགས། དགེ་མི་དགེའི་རྟོག་པ་གང་སྐྱེས་པའི་ངོ་བོ་ལ་རྟོག་མེད་ཀྱིས་ཅེར་ཅེར་བལྟས་ན། འཛིན་མེད་དུ་ཞི་གནས། རིག་པ་གསལ་སྟོང་ངོས་བཟུང་མེད་པ། གསལ་གསལ་འཆར་བ་ཡིན་ཏེ། དེ་ཉིད་རང་རིག་རང་ངོ་ཤེས་པའི་རང་གྲོལ་གྱི་ངང་ལ་མ་ཡེངས་པར་བསྐྱངས། སླར་ཡང་རྣམ་རྟོག་གང་སྐྱེས་པའི་ངོ་བོ་ཅེར་གྱིས་གཏད་ནས། སྤང་
XXX བླང་མེད་པར་རང་ངོ་ཤེས་པར་བྱས་ལ། རྣམ་རྟོག་ལམ་ཁྱེར་གྱི་མན་ངག་ཉམས་སུ་བླངས་བར་བྱའོ། །གསུམ་པ་ཞི་གནས་མཐར་ཐུག་རྟོག་མེད་ལ་སེམས་བཟུང་བ་ནི། གནས་དབེན་པར་མུན་ཁང་གི་ནང་དུ་འབོལ་བའི་གདན་ལ། ལུས་རྣམ་སྣང་གི་ཆོས་བདུན་དང་ལྡན་པར་བྱས་ལ། མིག་བར་སྣང་སྟོང་པ་ལ་ཧད་དེ་གཏད་ནས། ཡིད་ལ་འདས་མ་འོངས་ད་ལྟར་གྱི་རྟོག་པ་གསུམ། དགེ་མི་དགེ་ལུང་མ་བསྟན་གྱི་རྟོག་པ་གསུམ་ལ་སོགས་པ་དུས་གསུམ་རྟོག་པའི་རྒྱུ་འགྲུལ་ཐམས་ཅད་རྦད་ཆོད་ལ་བཏང༌། ཡིད་ལ་ཅི་ཡང་མི་བསམ་པར། སེམས་ནམ་མཁའ་གཡའ་དག་པ་ལྟར། གསལ་སྟོང་འཛིན་མེད་དུ་ཕྱལ་ལེ་བ་གསལ་ལེ་ཧྲིག་གེར་བཞག་པས། བདེ་གསལ་མི་རྟོག་པའི་ཞི་གནས་སྐྱེ་བར་འགྱུར་རོ། །གཉིས་པ་ལ་གསུམ་སྟེ། དང་པོ་རྒྱུའི་ལྷག་མཐོང༌། སེམས་ལ་རྣམ་པར་བརྟག་ཅིང༌། བསྒོམ་པ་ནི། འདི་ལྟར། བདག་གི་སེམས་འདི་གང་ནས་བྱུང་ཞིང་གང་དུ་གནས། གང་དུ་འགྲོ་བར་འགྱུར། ཞེས་སྐྱེ་འགག་གནས་གསུམ་གྱི་ངོ་བོ་ལ་བརྟག་ཅིང་དཔྱད། འབྱུང་བ་ལྔ་རང་ལུས་ལ་སྐྱེས་སམ། གནས་སམ་འཆིའམ་སྙམ་དུ་བརྟག་ཅིང་དཔྱད་པར་བྱའོ། །གཞན་ཡང་སེམས་ལ་ཁ་དོག་དཀར་དམར། སྔོ་སེར་ལྗང་ཁྲ་ལ་སོགས་པའི་ཁ་དོག་ཡོད་པ་ཞིག་གམ། མེད་པ་ཞིག་གམ་སྙམ་དུ་བརྟག་ཅིང་དཔྱད། གཞན་ཡང་སེམས་ནི། ས་ཆུ་མེ་རླུང་ནམ་མཁའི་དབྱིབས་སམ། ཟླུམ་པོ་གྲུ་བཞི་ཟླ་གམ་ནར་མོ་འཇོང་མོ་ལ་སོགས་པའི་དབྱིབས་གྲུབ་པ་ཞིག་ཡིན་ནམ། དབྱིབས་མེད་པ་ཞིག་ཡིན་སྙམ་དུ་བརྟག་ཅིང་དཔྱད། སེམས་ལས་རྣམ་པར་རྟོག་པ་གཞན་ཞིག་ཡིན་ནམ། འོན་ཏེ་རྣམ་པར་རྟོག་པ་སེམས་ཡིན་
XXX ཅེས་བརྟག་ཅིང་དཔྱད། གཞན་ཡང་ཕྱི་རོལ་གྱི་སྣང་བ་སེམས་ལས་བྱུང་ངམ་འོན་ཏེ་སྣང་བ་ལས་སེམས་བྱུང་ཞེས་བརྟག་ཅིང་དཔྱད། བརྟག་མཁན་གྱི་སེམས་ལ་ཡང་སེམས་ཀྱིས་ལྟ་ཞིང་དཔྱད། སེམས་འདི་ཉིད་ཡོད་པ་ཞིག་གམ། འོན་ཏེ་མེད་པ་ཞིག །གསལ་བ་ཞིག་གམ་འོན་ཏེ་མི་གསལ་བ་ཞིག །བདེ་བ་ཞིག་གམ་འོན་ཏེ་སྡུག་བསྔལ་བ་ཞིག །བདག་ཡོད་པ་ཞིག་གམ་བདག་མེད་པ་ཞིག །རྟག་པ་ཞིག་གམ་འོན་ཏེ་མི་རྟག་པ་ཞིག །ཞི་བ་ཞིག་གམ་མ་ཞི་བ་ཞིག་ཡིན་སྙམ་དུ་བརྟག །སྣང་བ་ཞིག་གམ་འོན་ཏེ་མི་སྣང་བ་ཞིག་སྙམ་དུ་བརྟག་ཅིང་དཔྱད། གཞན་ཡང་མཉམ་པར་བཞག་པའི་སེམས་ནི་ཅི་ལྟ་བུ། མཉམ་པར་མ་བཞག་པའི་སེམས་ནི་ཅི་ལྟ་བུ་སྙམ་དུ་ལེགས་པར་རང་གི་སེམས་ལ་རང་གིས་བརྟག་ཅིང་དཔྱད། མཉམ་པར་འདོད་མཁན་གྱི་སེམས་ཀྱི་ངོ་བོ་ལ་ཡང་ལེགས་པར་བརྟག་ཅིང་དཔྱད་དོ། །དེའི་ཚེ། སེམས་ཀྱི་ངོ་བོ་སྐྱེ་འགགས་གནས་གསུམ་དང་བྲལ་བ། ངོ་བོ་རང་བཞིན་གྱིས་སྟོང་པ་ནམ་མཁའ་ལྟ་བུ་ལ་དབྱིངས་རང་བཞིན་གིས་འོད་གསལ་བ། དེ་ཉིད་རིག་པ་འགག་མེད་ཀྱི་རོལ་པ་ཅིར་ཡང་འཆར་ཞིང་སྣང་བ་འདི་ཐམས་ཅད། སྐྱེ་བ་མེད་པ་དང་འགག་པ་མེད་པ་དང༌། གནས་པ་མེད་པར་རོ་མཉམ། ངོ་བོ་སྟོང་པ། རང་བཞིན་གསལ་བ། རྣམ་པ་འགག་མེད་ཀྱི་རིག་པ་དུ་མར་འཆར་ཞིང་སྣང་བ། དབྱེར་མེད་བློ་འདས་ནམ་མཁའ་ལྟ་བུ་ལ་གསལ་རིག་སྟོང་གསུམ་ནམ་མཁའ་ལྟ་བུར་མཐའ་དབུས་མེད་པར་འདུག་གོ་ཞེ་ན། དེ་ཁོ་ན་ཉིད་དོ་ཞེས། གཞི་ལམ་འབྲས་གསུམ། ལྟ་སྒོམ་སྤྱོད་འབྲས་བཞི། བདེན་པ་བཞི། དགའ་བ་བཞི། ཚད་མེད་བཞི། ཕ་རོལ་ཏུ་ཕྱིན་པ་དྲུག །ས་བཅུ་ལམ་ལྔ། ཐབས་ཤེས་གཉིས།
XXX བདེན་པ་གཉིས། སྐྱབས་འགྲོ། བཤགས་པ། སྲུང་བ། སེམས་བསྐྱེད། ཚོགས་གཉིས། སྙིང་རྗེ། བསྐྱེད་རིམ། ཞི་ལྷག །དཀོན་མཆོག་གསུམ། སྐུ་གསུམ། ཡེ་ཤེས་ལྔ་ལ་སོགས་པའི་ཡོན་ཏན་ཐམས་ཅད་རང་ངོ་ཤེས་པའི་སྟེང་དུ་ངོ་སྤྲད་པ་ལ་མཁས་པར་བྱའོ། །གཉིས་པ་ངོ་བོའི་ལྷག་མཐོང༌། ཐ་མལ་གྱི་ཤེས་པ་སོ་མ་རང་ངོ་སྤྲད་ནས། ཅིག་ཅར་དུ་ཉམས་སུ་ལེན་པ་ནི། སེམས་ཉིད་སྐྱེ་འགག་གནས་གསུམ་གྱི་མཐའ་དང་བྲལ་བ། བདག་དང་བདག་གིར་འཛིན་པའི་གཟུང་འཛིན་ལས་གྲོལ་ཞིང༌། ངོ་བོ་སྟོང་པ། རང་བཞིན་གསལ་བ། རྣམ་པ་འགག་མེད་ཀྱི་རིག་པ་ཡུལ་མེད་དུ་མར་གསལ་ཞིང་སྣང་བ། མཐོང་བྱ་མཐོང་བྱེད་ཀྱི་འཛིན་པའི་ཡུལ་ལས་འདས་པ། བསྒོམ་བྱ་སྒོམ་བྱེད་ཀྱི་དམིགས་པའི་ཡུལ་ལས་གོལ་བ། གང་ཡང་ཡིད་ལ་མི་བྱེད་པས་ཡིད་བྱེད་དང་བྲལ་བ། དེ་ཉིད་ལ་བཟོ་བཅོས་མ་བྱས་པས་ལྷུགས་པ། བྱ་བ་ཐམས་ཅད་དང་བྲལ་བས་བྱར་མེད། གང་ཤར་ངོས་བཟུང་དང་བྲལ་བས་འཛིན་མེད། མཉམ་བཞག་གི་ཤེས་པ་ལ་བཅོས་སླད་དང་བྲལ་བས་ཧད་དེ་བ། མཚན་འཛིན་མེད་པས་སྟོང་སང་ངེ་བ། རང་བཞིན་གྱིས་འོད་གསལ་བས་ས་ལེ་བ། རྣམ་རྟོག་གཟུང་འཛིན་གྱིས་མ་གོས་པས་རྗེན་ནེ་བ། རང་ངོ་རང་གིས་ཤེས་པས་ཧྲིག་གེ་བ། ཡུལ་ཡུལ་ཅན་གྱི་འཛིན་པ་ཞིག་པས་སྣང་སེམས་དབྱེར་མེད་ཟང་ཐལ་དུ་ཕྱལ་ལེ་བ། རིག་པ་མ་བཅོས་པར་རང་ལུགས་སུ་འཇོག་པས་ཐ་མལ་གྱི་ཤེས་པ། རྣམ་རྟོག་ལུ་གུ་རྒྱུད་དུ་སྙིང་འཇུག་པས་སོ་མ་ཞེས་བྱ་སྟེ། འདི་ལྷག་མཐོང་གི་ངོ་བོ་ཉམས་སུ་བླང་བྱའི་དངོས་གཞི་ཡིན་ནོ། །འདི་ཉིད་འཕགས་མའི་ངོ་བོ་སྟེ། འཕགས་ཞེས་པ་ནི་མ་རིག་གཟུང་འཛིན་
XXX གྱི་འཁོར་བ་ལས་འཕགས་པའོ། །མ་ཞེས་པ་ནི་ཤེས་རབ་ཀྱི་རང་རྩལ་གྱིས་རང་ངོ་ཤེས་པའོ། །སྒྲོལ་ཅེས་པ་ནི། མ་འགག་པའི་རྩལ་སྙིང་རྗེ་ཆེན་པོས་སེམས་ཅན་གྱི་དོན་འབད་མེད་དུ་བྱེད་པའོ། །མ་ཞེས་པ་ནི། སྟོང་ཉིད་སྙིང་རྗེའི་སྙིང་པོ་ཅན་གྱིས་དོན་གཉིས་ལྷུན་གྲུབ་ཅེས་པའི་དོན་ཡིན་ནོ། །དེས་ན་སེམས་ཉིད་འཕགས་མ་སྒྲོལ་མ་རྟོགས་པར་བྱའོ། །ཞེས་ངོ་སྤྲད་པར་བྱའོ། །གསུམ་པ་མཐར་ཐུག་གི་ཞི་ལྷག་ཟུང་འཇུག་ཉམས་སུ་བླངས་བར་བྱ་བ་ནི། སེམས་ཉིད་སྐྱེ་གནས་འཇིག་གསུམ་དང་བྲལ་བ་དེ་ཉིད་འགག་པ་མེད་པས་ཆད་པའི་མཐའ་དང་བྲལ་བ། རང་བཞིན་སྟོང་པ་ཉིད་དུ་གནས་པས་རྟག་པའི་མཐའ་དང་བྲལ་བ། སྣ་ཚོགས་དུ་མར་རིག་པས་ཆད་པའི་མཐའ་དང་བྲལ་བ། སེམས་ཀྱི་ངོ་བོ་ཁ་དོག་དབྱིབས་སུ་གྲུབ་པ་མེད་པས་རྟག་པའི་མཐའ་དང་བྲལ་བ། སེམས་ཀྱི་ངོ་བོ་སྟོང་ཉིད་བདག་མེད་བློ་ལས་འདས་པས་རྟག་པའི་མཐའ་དང་བྲལ་བ། རྩལ་སྣ་ཚོགས་སུ་འཆར་བས་ཆད་པའི་མཐའ་དང་བྲལ་བ། དེས་ན་རྟག་ཆད་མཚན་འཛིན་གྱིས་མཐའ་ལས་འདས་པས། གསལ་རིག་སྟོང་གསུམ་དབྱེར་མེད་པ། ཟུང་འཇུག་ཉམས་སུ་ལེན་པའི་ཚུལ་ནི། ཐབས་བསོད་ནམས་ཀྱི་ཚོགས་སྒྱུ་མ་ལྟ་བུ་ལ་སེམས་གནས་ཤིང༌། དེ་དག་རང་བཞིན་མེད་པ་སྟོང་པ་ཉིད་དུ་ཤེས་ཤིང་མཐོང་བ་ནི་ལྷག་མཐོང་ངོ༌། །མོས་གུས་བླ་མའི་རྣལ་འབྱོར་ལ་སེམས་གནས་པ་ཞི་གནས་ཡིན་ལ། སེམས་དེའི་ངོ་བོ་སྟོང་ཉིད་བློ་འདས་སུ་མཐོང་བའི་ལྷག་མཐོང་ངོ༌། །བསྐྱེད་རིམ་ཆུ་ཟླ་ལྟ་བུ་ལ་སེམས་གནས་པ་ཞི་གནས། རང་བཞིན་སྟོང་པ་ཉིད་དུ་མཐོང་བ་ནི་ལྷག་མཐོང་ངོ༌། །སྣང་བ་སེམས་ཀྱི་རང་སྣང་ཆུ་ཟླ་ལྟ་བུ་ལ་སེམས་གནས་ཤིང༌།
XXX རྟེན་འབྲེལ་སྐྱེ་མེད་སྣང་སྟོང་དབྱེར་མེད་དུ་མཐོང་བ་ནི་ལྷག་མཐོང་ངོ༌། །ལམ་གྱི་མཐར་ཐུག་བདེ་བ་ཆེན་པོ་ལ་སེམས་གནས་པ་ཞི་གནས་ཡིན་ལ། དེ་ཉིད་ཞེན་མེད་སྟོང་པ་ཉིད་དུ་མཐོང་བ་ནི་ལྷག་མཐོང་ངོ༌། །སེམས་རང་བཞིན་འོད་གསལ་བ་ལ་སེམས་གནས་པ་ཞི་གནས་ཡིན་ལ། ངོ་བོ་སྤྲོས་བྲལ་སྟོང་པ་ཉིད་དུ་མཐོང་བ་ནི་ལྷག་མཐོང་ངོ༌། །བཅོས་བསླད་དང་བྲལ་བའི་རིག་པ་སོ་མ་ལ་སེམས་གནས་པ་ནི་ཞི་གནས་ཡིན་ལ། བདག་མེད་སྐྱེ་མེད་དུ་མཐོང་བ་ལྷག་མཐོང་ངོ༌། །མདོར་ན་ཆུ་ཟླ་དང་མེ་ལོང་གི་གཟུགས་བརྙན་དང་བྲག་ཅ་ལྟར་སྣང་བ་ལས་གཞན་པའི་སྟོང་པ་མེད། སྟོང་པ་ལས་གཞན་པའི་སྣང་བ་མེད། སྣང་སྟོང་སྐྱེ་མེད་ནམ་མཁའ་ལ་འཇའ་ཤར་བ་ལྟ་བུར་རྟོགས་ནས་དེའི་ངོ་བོར་འཇོག་པའི་ཞི་ལྷག་ཟུང་འཇུག་ཅེས་བྱའོ། །དེ་ལ་རྫོགས་རིམ་ཞི་ལྷག་ཟུང་འཇུག་སོང་ངོ༌། །གསུམ་པ་འོད་གསལ་འཛིན་པ་ནི་རང་ཉིད་སྒྲོལ་མར་གསལ་བར་བསྐྱེད་པའི་ཐུགས་ཁར། འཁོར་ལོ་ལྗང་ཁུའམ་དཀར་པོ་དངུལ་ཆུའི་མདོག་ལྟ་བུ་ལས་འོད་ཟེར་འཕྲོས། ལུས་ཀྱི་ནང་གང༌། ཕྱིར་འཕྲོས་ལུས་ཀྱི་ཕྱི་རོལ་ཐམས་ཅད་ཉི་མ་སྟོང་ལས་ལྷག་པའི་འོད་ཀྱིས་གསལ་གདབ་པར་བྱས། དེ་ནས་དཔག་ཚད་ཙམ་འོད་ཀྱིས་གང་བར་བྱས། དེ་ནས་འཛམ་བུ་གླིང་ཙམ། དེ་ནས་གླིང་བཞི། དེ་ནས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཐམས་ཅད་འོད་ཟེར་གྱིས་གང་བར་བྱས། སེམས་ཅན་ཐམས་ཅད་ལ་ཕོག་པས་དེ་དག་འོད་ཀྱི་རང་བཞིན་དུ་བྱས། ཡུལ་ཡུལ་ཅན་ཐམས་ཅད་འོད་ཟེར་གྱིས་གང་བར་བྱས། ཉི་མ་འབུམ་གྱི་འོད་ལས་ཀྱང་གསལ་བར་བསྒོམ། དེ་ནས་སེམས་རང་བཞིན་གྱིས་འོད་གསལ་བ། དམིགས་པ་མེད་པའི་
XXX ངང་ནས། རྟོགས་མེད་སྤྲོས་པ་ཐམས་ཅད་དང་བྲལ་བའི་ངང་ལ་མཉམ་པར་བཞག་ཅིང་འོད་གསལ་བསྒོམ་པའོ། །མཚན་མོ་ཡང་དེ་ལྟ་བུའི་ཚུལ་གྱིས་མཉམ་པར་བཞག་པས། གཉིད་འོད་གསལ་དུ་འཆར་བར་འགྱུར་རོ། །དེ་ནི་འོད་གསལ་བསྒོམ་པའི་རིམ་པའོ། །བཞི་པ་འཕོ་བ་ལ་གཉིས་ཏེ། སྦྱང་བ་དང༌། ལས་ལ་སྦྱར་བའོ། །དང་པོ་རང་གི་ལུས་སྟོང་རང་སྒོམ་པའི་སྙིག་ཁར་ཨུཏྤལ་རྒྱས་པའི་སྟེང་དུ། ཟླ་བའི་དཀྱིལ་འཁོར་གྱི་སྟེང་དུ་ཏཱཾ་ཡིག་ལྗང་ཁུ་ཞིག་བསམ། རང་གི་སྤྱི་བོར་ཚངས་པའི་བུ་ག་གསལ་ཧཾ་རེ་པ་བསྒོམ་མོ། །དེའི་སྟེང་གི་ཁྲུ་གང་ཙམ་གྱི་ནམ་མཁའ་ལ། རིན་པོ་ཆེའི་ཁྲིའི་སྟེང་དུ། ཨུཏྤལ་རྒྱས་པའི་སྟེང་དུ་འཕགས་མ་སྒྲོལ་མ་གསལ་བར་བསྐྱེད་པའི་ཞལ་ནས། ཨོཾ་ཏཱ་རེ་ཏཱཾ་སྭཱ་ཧཱ། ཞེས་གསུངས་པས་རང་གི་སྙིང་ཁའི་ཏཱཾ་ཡིག་ལས་ཐིག་ལེ་ལྗང་ཁུ་ཞིག་ཆད་ནས་སྤྱི་བོའི་ཚངས་བུག་ནས་ཡར་ཐོན། སྤྱི་བོའི་སྒྲོལ་མའི་ཐུགས་ཁར་རེག་པ་རེ་བྱས་ནས། སླར་མར་བབས། སྙིང་ཁའི་ཏཱཾ་ཡིག་ལ་ཐིམ་པར་བསྒོམ་སླར་ཏཱཾ་ཡིག་ལས་ཐིག་ལེ་ལྗང་ཁུ་ཞིག་ཆད་ནས་འོད་དང་བཅས་པར་འཕགས་མའི་ཐུགས་ཀར་ཐིམ་པ་ལ་དམིགས་པ་ཉི་ཤུའམ། བརྒྱ་ལ་སོགས་པ་བྱའོ། །མཐར་ཐུག་འཇོག་ཁར་སྤྱི་བོར་སྒྲོལ་མའི་ཕྱག་གཡས་ན་ཟླ་བའི་དཀྱིལ་འཁོར་གཅིག་གིས་རང་གི་ཚངས་བུག་དེ་བཀག་པར་བསམ་པ་ནི་ལོག་ནོན་ནོ། །དེ་ནི་སྦྱངས་པའོ། །གཉིས་པ་ལས་ལ་སྦྱོར་བ་ནི། རང་ལ་འཆི་བའི་རྟགས་
XXX ཚངས་པའི་ཚེ། ཞེན་ཆགས་མཐའ་དག་དང་བྲལ་བར་བྱས་ནས། རང་ལུས་སྟོང་སང་ངེ་བའི་སྙིང་ཁར་ཟླ་བའི་སྟེང་དུ་ཏཱཾ་ལྗང་ཁུ་འོད་ཟེར་ལྔ་འཕྲོ་བར་བསམ་པའི་སྤྱི་བོའི་གཙུག་རྒྱ་སྐར་ཁ་བྱེ་བ་ལྟ་བུའི་སྟེང་གི་ནམ་མཁར་འདོམ་གང་ཙམ་གྱི་བར། སྒྲོལ་མ་གསལ་བར་བསྐྱེད་པའི་ཞལ་ནས། ཨོཾ་ཏཱ་རེ་ཏཱཾ་སྭཱ་ཧཱ། ཞེས་པའི་སྔགས་སྒྲས་བསྐུལ་ནས། ཏཱཾ་ཡིག་གདན་དང་བཅས་པ་ནམ་མཁར་མདའ་འཕང་བ་ལྟར་སྒྲོལ་མའི་ཐུགས་ཁར་ཐིམ་པར་བསམ་ལ། རླུང་སེམས་སྤྱི་བོར་དྲག་ཏུ་གཏད། ངག་ཏུ་ཧིཀ་ཅེས་བརྗོད་པས་འཕོ་བར་འགྱུར་རོ། །དེ་ནི་སྤྲུལ་པའི་སྐུའི་འཕོ་བའོ། །ལོངས་སྐུ་ལ་འཕོ་བ་ནི། སྒྲོལ་མ་ནམ་མཁར་བྱོན་ནས། འོག་མིན་དུ་རྣམ་སྣང་གི་ཐུགས་ཀར་ཐིམ་པའམ། བདེ་བ་ཅན་གྱི་ཞིང་ཁམས་སུ་འོད་དཔག་མེད་ཀྱི་ཐུགས་ཀར་ཐིམ་པས། རྒྱལ་བ་དེ་དག་དང་དབྱེར་མེད་པར་བསམ་པ་ནི་ལོངས་སྐུ་ལ་འཕོ་བའོ། །ཆོས་སྐུ་ལ་འཕོ་བ་ནི། གཟུགས་སྐུ་དེ་དག་དམིགས་མེད་དུ་ཡལ་བར་བསམ་ལ། རིག་པ་གསལ་སྟོང་འཛིན་མེད་དུ་སྟེང་གི་ནམ་མཁར་གཏད་པའོ། །དེ་ནི་ཆོས་སྐུ་ལ་འཕོ་བའོ། །དེ་དག་ནི་དངོས་གཞིའོ། །གསུམ་པ་རྗེས་ནི། བསོད་ནམས་རྒྱ་ཆེན་གྱུར་པ་འདི་ཡིས་ནི། །འགྲོ་བའི་དོན་དུ་སྒྲོལ་མ་མཆོག་ཐོབ་ནས། །སྔོན་གྱི་རྒྱལ་བ་རྣམས་ཀྱིས་མ་བསྒྲལ་བའི། །སྐྱེ་བོའི་ཚོགས་རྣམས་སངས་རྒྱས་སར་འགོད་ཤོག །ཅེས་བསྔོ་བ་དང་སྨོན་ལམ་བཏབ་བོ། །དེ་ནི་རྗེས་སོ། །དེ་ལྟར་སྦྱོང་དངོས་རྗེས་གསུམ་ཡོངས་རྫོགས་པའི། །
XXX འཕགས་མ་སྒྲོལ་མའི་ཁྲིད་ཀྱི་རིམ་པ་འདི། །སྒྲོལ་མས་མི་ཏྲ་ཛྭ་ཀི་ལ་གནང་ཞིང༌། །དེ་ཡིས་ཤྲཱི་པུ་ཏྲ་རྗེས་སུ་བཟུང༌། །དེས་ནི་མི་བསྐྱོད་རྡོ་རྗེ་རྗེས་བཟུང་ནས། །གདམས་ངག་སྙན་ནས་སྙན་དུ་བརྒྱུད་པ་ཡི། །བདུད་རྩི་བུམ་པ་གང་བྱོས་ཚུལ་དུ་ནི། །འོད་དཔག་རྡོ་རྗེ་བདག་ལ་གསུངས་པ་རྣམས། །བརྗེད་ཀྱང་དོགས་ནས་ཡི་གེར་བཀོད་པའོ། །དགེ་བས་སེམས་ཅན་མ་ལུས་ཐམས་ཅད་ཀུན། །བཅོམ་ལྡན་སྒྲོལ་མའི་གོ་འཕང་མཆོག་ཐོབ་ཤོག། །།དགེ་ལེགས་འཕེལ།


XXX sgrol ma 'jigs pa brgyad skyob phrin las kyi khrid 'khor ba'i 'phrang sgrol bzhugs so/ /
XXX tshogs gnyis rgya mtsho rab tu rgyas pa la/ /rang byung ye shes ut+pal rnam rol pa/ /dmigs med snying rje'i dri bsung 'phro ba can/ /bcom ldan sgrol mas 'gro kun bskyangs bar gsol/ /gang gi zhabs zung pad+mo'i cod pan la/ /tshangs dbang drag po 'jig rten skyong bzhi dang*/_'jig rten dregs ldan gtsug gis gus bsten pa'i/ /'phags ma sgrol ma'i zhabs la spyi bos 'dud/ /bcom ldan sgrol mas mi tra dz+wa ki la/ /man ngag bsgom pa'i rim pa gsungs pa rnams/ /snyan nas snyan brgyud bdud rtsi'i gter chen 'di/ /'gro ba gdung ba sel phyir yi ger bkod/ /'dir bcom ldan 'das sgrol ma 'jigs pa brgyad skyob phrin las kyi khrid 'khor ba'i 'phrang sgrol zhes bya ba 'di ston pa byed pa la don gsum ste/_sngon 'gro dngos gzhi/_rjes so/ /dang po la gnyis/_thun mong dang khyad par ro/ /dang po la bzhi ste/_dal 'byor rnyed par
XXX dka' ba/_'chi ba mi rtag pa/_las rgyu 'bras/_'khor ba'i nyes dmigs bsgom pa rnams spyi dang mthun no/ /gnyis pa la bzhi ste/_ci byas thams cad byang chub kyi lam du 'gro bar byed pa skyabs 'gro sems bskyed kyi khrid/_sdig sgrib dag par byed pa rdo rje sems dpa'i bsgom bzlas kyi khrid/_tshogs gnyis rdzogs par byed pa maN+Dal gyi khrid/_byin rlabs myur du 'jug par byed par lam zab mo bla ma'i rnal 'byor gyi khrid dang bzhi ni spyi dang mthun no/ /de dag ni sngon 'gro'i rim pa'o/ /gnyis pa dngos gzhi ni don gnyis te/_bskyed rim dang rdzogs rim mo/ /dang po la gsum ste/_dang po bskyed pa'i rim pa sku'i khrid ni/_tshad med pa bzhi sngon du 'gro bas/ /swab+hA was stong par sbyang*/_stong pa'i ngang las/_sa gzhi thams cad ri bo ta la'am/_g.yu lo bkod pa'i zhing khams su gyur pa las/_de'i dbus su mtsho sngo zhing dwangs pa'i dkyil du ne'u gseng me tog gis mdzes
XXX pa dang*/_de'i dbus su paM las ut+pal rgyas pa/_yu ba gser las grub pa ze'u 'bru dang lo 'dab rlung gis bskyod pa las dam pa chos kyi sgra 'byung ba de'i lte bar a las zla ba'i dkyil 'khor gyi steng du/_tAM las ut+pal ljang khu tAM gyis mtshan pa/_de las 'od zer phyogs bcur 'phros/_sangs rgyas dang byang chub sems dpa' thams cad mchod/_sems can thams cad kyi sgrib pa sbyangs/_sgrol ma'i go 'phang la bkod/_tshur 'dus yongs su gyur pa las/_rang nyid 'phags pa sgrol ma sku mdog ljang sngon/_zhal gcig phyag gnyis/_zhabs g.yas brkyang g.yon bskum pa/_dar gyi sham thabs can/_phyag g.yas pa mchog sbyin gyi phyag rgyas ut+pal 'dzin pa/_g.yon ut+pal snyan gyi thad kar rgyas pa'i yu ba thugs kar mtheb srin gyis 'dzin pa/_nu ma 'bur ba/_spyan dkyus dang smin dkyus ring ba/_ral pa'i thor cog spyi bor bcings nas zar bu rked sor g.yo zhing 'gying bag dang bcas pa/_zhi ba/_sgeg pa/_gzhon nu lang tsho dar la babs pa/_bu mo lo bcu drug lon pa'i na tshod can/_rin po che sna lngas rtse phran dang snyan cha/_mgul rgyan dang dpung rgyan/_phyag gdub dang zhabs gdub/_sku rags dang do shal/_dar gyi cod pan dang mu tig chun pos brgyan pa/_zla ba'i rgyab yol can snang la rang bzhin med pa/_me long gi gzugs brnyan lta bur bsgom pa'i spyi bor oM dkar po/_mgrin par AHdmar po/_snying khar hU~M mthing kha/_hU~M las 'od zer lcags kyu lta bu 'phros/_po ta la'am/_g.yu lo bkod pa nas/_rang 'dra'i ye shes pa spyan drangs/_rang dang dbyer med du gyur/_slar 'od zer 'phros/
XXX rigs lnga spyan drangs/_dbang bskur/_dri ma dag_/bdud rtsi'i lhag ma yar lud pa las spyi bor don grub kyis dbu brgyan/_snying khar ut+pa la'i steng du zla ba'i dkyil 'khor gyi dbus su tAM yig ljang khu las sngags kyi phreng ba mar gad kyi mdog lta bu las 'od 'phros/_lus kyi nang gang dug lnga sbyangs phyir 'phros/_snang ba 'od kyi gzhal yas khang du byas/_sems can la phog_/sgrol ma'i go 'phang la bkod/_tshur 'dus g.yas su 'khor ba la dmigs nas/_thams cad kyi zhal nas sngags sgra sgrogs par bsam la/_oM tA re tut+tA re tu re swA hA/_zhes sngags 'dren no/ /mthar snang ba 'od du zhu nas nang bcud la thim/_nang bcud 'od du zhu nas rang la thim/_rang lus 'od du zhu nas thugs ka'i tAM yig la thim/_tAM yig nA da la thim/_de nam mkha' la 'ja' yal ba ltar dmigs med ma bcos pa'i ngang la bzhag go_/de ni bskyed pa'i rim pa'o/ /gnyis pa de nyid gsal 'debs pa 'od zer spro ba sna'i 'khrid ni/_rang nyid sngar ltar sgrom mar bskyed pa'i spyi bor pad zla'i steng du rnam par snang mdzad sku'i sgrol ma sku mdog zla ba ltar dkar ba/_zhal gcig phyag gnyis/_zhabs g.yas brkyang g.yon bskum gyis bzhugs pa/_g.yas mchog sbyin phyag rgyas ut+pal 'dzin pa/_g.yon ut+pal snyan gyi thad kar rgyas pa'i yu ba mtheb srin gyis thugs kar 'dzin pa/_zhal 'dzum pa spyan dkyus dang smin dkyus ring pa sogs sngar ltar bskyed pa'i thugs kar pad zla'i steng du tAM yig dkar po las sngags phreng dkar po mu tig lta bu 'khor ba/_de las 'od zer dkar po
XXX dpag tu med pa 'phros/_rang gi klad pa'i nang gang*/_lus kyi sgrib pa dag_/gti mug byang*/_'od zer phyi rol tu phyogs bcur 'phros/_phyogs bcu'i rgyal ba sras bcas kyi sku la phog_/sku gzi mdangs dang ldan par byas/_sku'i byin rlabs thams cad 'od zer dkar po'i rnam par bsdus nas spyi bo'i sgo lam la thim pas sku'i byin rlabs zhugs/_chos dbyings ye shes mngon du byas par bsgom la sngags 'dren no/ /mgrin par pad zla'i steng du snang ba mtha' yas gsung gi sgrol ma dmar mo'i snying khar/_pad zla'i steng du tAM yig dmar po la sngags kyi phreng ba pad+ma rA ga'i mdog lta bu las 'od zer dmar po 'phros/_mgrin pa'i nang gang*/_ngag gi sgrib pa dag_/'dod chags dag_/'od zer phyogs bcur phyir 'phros/_phyogs bcu'i rgyal ba sras bcas kyi gsung la phog_/gsung dbyangs yan lag drug cu dang ldan par byas/_de dag gis gsung gi byin rlabs thams cad 'od zer dmar po'i rnam par bsdus nas mgrin par thim/_gsungs dbyangs yan lag drug cu'i byin rlabs zhugs/_so sor rtogs pa'i ye shes mngon du byas par bsgom la sngags 'dren no/ /snying khar pad zla'i steng du/_mi bskyod pa thugs kyi sgrol ma mthing kha'i thugs khar/_pad zla'i steng du tAM yig mthing kha la sngags kyi phreng ba baiDUr+Ya lta bu las 'od 'phros/_rang gi lus kyi nang gang*/_yid kyi sgrib pa dag_/zhe sdang dag_/'od zer phyogs bcur 'phros/_phyogs bcu'i rgyal ba sras bcas kyi thugs rgyud bskul/_de dag thams cad kyi thugs rang bzhin 'od gsal ba'i chos nyid ji lta ba rtogs pa dang*/_chos can ji
XXX snyed pa mkhyen pa'i ye shes thams cad 'od zer sngon po'i rnam par bsdus nas/_rang gi snying kha'i sgrol ma la thim pas/_thugs kyi byin rlabs thams cad zhugs/_me long ye shes mngon du byas par bsgoms la sngags 'dren no/ /lte bar pad zla'i steng du rin 'byung yon tan gyi sgrol ma sku mdog ser mo lta bur bskyed pa'i snying khar pad zla'i steng du tAM yig ser po las sngags phreng gser mdog lta bu 'khor ba las 'od 'phros/_rang gi lus nang gang*/_'dod pa dang nga rgyal las gyur pa'i sgrib pa dag_/'od zer phyir 'phros phyogs bcu'i rgyal ba sras bcas thams cad la phog_/yon tan mtha' dag rgyas par byas/_de dag gi yon tan thams cad 'od zer ser po'i rnam par bsdus nas rang gi lte ba'i sgrol ma la thim/_yon tan gyi byin rlabs mtha' dag zhugs/_mnyam nyid ye shes mngon du byas par sgom la sngags 'dren no/ /gsang gnas su pad zla'i steng du don grub phrin las kyi sgrol ma ljang khu/_rang lta bu'i thugs khar pad zla'i steng du tAM yig ljang khu las sngags phreng margad lta bu 'khor ba las 'od zer ljang khu 'phros/_gsang gnas yan chad gang*/_chags pa dang phrag dog dag_/'od zer phyogs bcur phyir 'phros/_phyogs bcu'i rgyal ba sras bcas la phog_/phrin las lhun grub tu byas/_de dag gi phrin las kyi byin rlabs thams cad 'od zer ljang khu'i rnam par bsdus nas rang gi gsang gnas su thim pas phrin las kyi dngos grub thob/_bya ba nan tan gyi ye shes mngon du byas par bsgom la sngags 'dren no/ /yang rim pa ltar/
XXX spyi bo/_mgrin pa/_snying kha/_lte ba/_gsang gnas kyi gnas lngar/_sgrol ma dkar/_dmar/_mthing*/_ser/_ljang khu lnga las/_'od zer dkar dmar mthing ser ljang khu rang gi lus kyi gnas lngar phog_/gti mug_/'dod chags/_zhe sdang*/_nga rgyal/_phrag dog lnga sbyangs/_'od zer phyogs bcur 'phros/_phyogs bcu'i rigs drug la phog_/de dag gis gti mug_/'dod chags/_zhe sdang*/_nga rgyal/_phrag dog lnga sbyangs/_chos dbyings/_sor rtogs/_me long*/_mnyam nyid/_bya ba grub pa'i ye shes mngon du byas/_sku gsung thugs yon tan phrin las lnga'am/_rnam snang*/_'od dpag med/_mi bskyod pa/_rin byung*/_don grub/_las kyi sgrol ma'i go 'phang lnga la bkod/_tshur 'dus so sor thim/_sku gsung thugs yon tan phrin las kyi byin rlabs rnams zhugs/_dug lnga dag_/ye shes lnga mngon du byas/_sku lnga thob par bsam la sngags 'dren no/ /de dag ni 'od zer spro bsdu'i khrid kyi dmigs pa'o/ /'di ni bskyed pa'i rim pa'i khrid/_bum dbang gi don yin la/_sprul sku mngon du byas bya yin no/ /gsum pa bzlas pa sngags kyi spro bsdu'i khrid ni/_rang sgrol ma gong ltar gsal gdab pa'i gnas lngar/_sgrol ma rigs lnga bskyed do/ /spyi bor dkar mo/_mgrin par dmar mo/_snying khar mthing kha/_lte bar ser mo/_gsang gnas su ljang khu rnams kyi snying khar pad zla'i steng du tAM yig dkar dmar mthing ser ljang khu lnga las sngags kyi phreng ba mu tig dkar po dang*/_pad+ma rA ga ltar dmar ba dang*/_mthon mthing ngam baiDUr+Ya ltar mthing ba dang*/_gser gyi phreng ba ltar ser ba dang*/
XXX margad kyi phreng ba ltar ljang ba lnga las rim pa bzhin/_sngags phreng ngam/_A li kA li'i rnam par 'od zer dkar po/_dmar po/_sngon po/_ser po/_ljang khu rnams las 'od zer rim pa bzhin phyogs bcur 'phros pas/_phyogs bcu'i sangs rgyas byang sems thams cad la phog_/sku gsung thugs yon tan phrin las kyi rol pa mtha' dag rgyas par byas/_phyi nang gsang gsum gyi mchod pas mchod par bsam la/_rlung ro theng gsum 'bud/_de nas rlung nang du rngub la bum pa can bzung*/_phyogs bcu'i sangs rgyas dang byang chub sems dpa' thams cad kyi sku gsung thugs yon tan phrin las kyi ngo bo thams cad sngags phreng dkar/_dmar/_mthing*/_ser/_ljang khu'i rnam par 'dus nas/_spyi bo/_mgrin pa/_snying kha/_lte ba/_gsang gnas rnams kyi sgrol ma dkar dmar mthing ser ljang khu lnga'i thugs ka'i sngags 'khor la thim pas/_gti mug_/'dod chags/_zhe sdang*/_nga rgyal/_phrag dog gi sgrib pa lnga dag_/chos dbyings ye shes/_sor rtogs/_me long*/_mnyam nyid/_bya grub ye shes lnga mngon du byas/_sku lnga thob/_sku gsung thugs yon tan phrin las kyi byin rlabs zhugs par bsam la rlung bum pa can ci nus su bzung ngo*/ /de bzhin du sgrol ma lnga'i thugs kha nas sngags phreng dkar dmar/_sngo ser/_ljang khu 'phros pas/_lus kyi gnas lnga gang*/_dug lnga dag_/slar 'od zer phyogs bcur 'phros/_phyogs bcu'i rigs drug gi sems can la phog_/de dag gis gti mug_/'dod chags/_zhe sdang*/_nga rgyal/_phrad dog lnga dag_/ye shes lnga
XXX mngon du byas/_sku gsung thugs yon tan phrin las rigs lnga'i sgrol ma'i go 'phang la bkod par bsam la rlung phyir btang ngo*/ /de nas de dag gi sku gsung thugs yon tan phrin las kyi nus pa thams cad rang la zhugs par bsam zhing*/_khyad par du sems can thams cad la snying rje tshad med pa bskyed la/_de dag sngags phreng gi rnam par bsdus shing*/_bum pa can gyi rlung nus tshad bzung ngo*/ /de ni sngags phreng bum pa can la brten pa'i sbyor ba'o/ /de nas snod bcud rang la thim/_rang gi spyi bo'i sgrol ma mgrin pa'i sgrol ma la thim/_mgrin pa'i sgrol ma snying kha'i sgrol ma la thim/_gsang gnas kyi sgrol ma lte ba'i sgrol ma la thim/_lte ba'i sgrol ma snying kha'i sgrol ma la thim/_rang lus kyang thugs ka'i sgrol ma la thim/_thugs ka'i sgrol ma tAM la thim/_tAM nam mkha' la 'ja' yal ba ltar dmigs med blo 'das kyi ngang la mnyam par bzhag go_/des ni ngag rlung dag par byed pa sngags phreng bum pa can la brten pa'i khrid de gsang dbang gi don yin/_de ni longs spyod rdzogs pa'i sku mngon du byed pa'o/ /gnyis pa la bzhi ste/_zhi gnas/_lhag mthong*/_'od gsal/_'pho ba ste bzhi'o/ /dang po la gsum/_mtshan ma la brten pa'i zhi gnas dang*/_rtog pa la sems gtad pa'i zhi gnas dang*/_rtog med du 'jog pa'i zhi gnas te gsum mo/ /dang po la gnyis/_phyi na sems bzung ba dang*/_nang na sems bzung ba'i/_dang po la gnyis te/_ma dag pa dang dag pa'o/ /dang po mdun du ka ba bum pa/_shing bu/_rde'u la sogs pa gang yang rung ba zhig la/_lus gnad lta stangs dang bcas pas ma yengs par sems bzung*/
XXX de la yengs su yang mi 'jug_/rtog pa yang mi 'gyed/_gzhan yang bying rgod byung na steng 'og tu sems 'dzin pa dang*/_g.yas g.yon du sems 'dzin pa yang shes par bya'o/ /gnyis pa ni/_mdun du sgrol ma'i sku gzugs sam/_med na bsgom la/_de la rtog pa yang mi spro/_yengs su yang mi 'jug_/de thog tu ma yengs tsam du glod nas 'jog pa ni/_dag pa rgyal ba'i sku la sems 'dzin pa'o/ /gnyis pa la gnyis te/_ma dag pa dang dag pa'o/ /dang po ma dag pa thig le la sems bzung ba ni/_rang gi snying gar thig le dmar ser 'od 'phro ba/_sran 'bru tsam la sems bzung ste/_de la rtog pa yang mi spro/_yengs su yang mi 'jug go_/gnyis pa dag pa rgyal ba'i sku la sems 'dzin pa ni/_rang gi snying khar pad zla'i steng du/_sgrol ma tshon gang ba 'od dang bcas pa la sems bzung*/_de la rtog pa yang mi spro/_yengs su yang mi 'jug go_/byings rgod byung na sngar bzhin no/ /de ni mtshan ma la brten pa'i zhi gnas so/ /gnyis pa rtog pa la gtad nas sems bzung ba ni/_rnam rtog lhag par spros la/_dug lnga/_dug gsum/_nyon mongs pa gzung 'dzin 'khor ba'i rnam rtog_/dge ba bcu dang*/_pha rol tu phyin pa bcu'i rnam rtog la sogs/_dge mi dge'i rtog pa gang skyes pa'i ngo bo la rtog med kyis cer cer bltas na/_'dzin med du zhi gnas/_rig pa gsal stong ngos bzung med pa/_gsal gsal 'char ba yin te/_de nyid rang rig rang ngo shes pa'i rang grol gyi ngang la ma yengs par bskyangs/_slar yang rnam rtog gang skyes pa'i ngo bo cer gyis gtad nas/_spang
XXX blang med par rang ngo shes par byas la/_rnam rtog lam khyer gyi man ngag nyams su blangs bar bya'o/ /gsum pa zhi gnas mthar thug rtog med la sems bzung ba ni/_gnas dben par mun khang gi nang du 'bol ba'i gdan la/_lus rnam snang gi chos bdun dang ldan par byas la/_mig bar snang stong pa la had de gtad nas/_yid la 'das ma 'ongs da ltar gyi rtog pa gsum/_dge mi dge lung ma bstan gyi rtog pa gsum la sogs pa dus gsum rtog pa'i rgyu 'grul thams cad rbad chod la btang*/_yid la ci yang mi bsam par/_sems nam mkha' g.ya' dag pa ltar/_gsal stong 'dzin med du phyal le ba gsal le hrig ger bzhag pas/_bde gsal mi rtog pa'i zhi gnas skye bar 'gyur ro/ /gnyis pa la gsum ste/_dang po rgyu'i lhag mthong*/_sems la rnam par brtag cing*/_bsgom pa ni/_'di ltar/_bdag gi sems 'di gang nas byung zhing gang du gnas/_gang du 'gro bar 'gyur/_zhes skye 'gag gnas gsum gyi ngo bo la brtag cing dpyad/_'byung ba lnga rang lus la skyes sam/_gnas sam 'chi'am snyam du brtag cing dpyad par bya'o/ /gzhan yang sems la kha dog dkar dmar/_sngo ser ljang khra la sogs pa'i kha dog yod pa zhig gam/_med pa zhig gam snyam du brtag cing dpyad/_gzhan yang sems ni/_sa chu me rlung nam mkha'i dbyibs sam/_zlum po gru bzhi zla gam nar mo 'jong mo la sogs pa'i dbyibs grub pa zhig yin nam/_dbyibs med pa zhig yin snyam du brtag cing dpyad/_sems las rnam par rtog pa gzhan zhig yin nam/_'on te rnam par rtog pa sems yin
XXX ces brtag cing dpyad/_gzhan yang phyi rol gyi snang ba sems las byung ngam 'on te snang ba las sems byung zhes brtag cing dpyad/_brtag mkhan gyi sems la yang sems kyis lta zhing dpyad/_sems 'di nyid yod pa zhig gam/_'on te med pa zhig_/gsal ba zhig gam 'on te mi gsal ba zhig_/bde ba zhig gam 'on te sdug bsngal ba zhig_/bdag yod pa zhig gam bdag med pa zhig_/rtag pa zhig gam 'on te mi rtag pa zhig_/zhi ba zhig gam ma zhi ba zhig yin snyam du brtag_/snang ba zhig gam 'on te mi snang ba zhig snyam du brtag cing dpyad/_gzhan yang mnyam par bzhag pa'i sems ni ci lta bu/_mnyam par ma bzhag pa'i sems ni ci lta bu snyam du legs par rang gi sems la rang gis brtag cing dpyad/_mnyam par 'dod mkhan gyi sems kyi ngo bo la yang legs par brtag cing dpyad do/ /de'i tshe/_sems kyi ngo bo skye 'gags gnas gsum dang bral ba/_ngo bo rang bzhin gyis stong pa nam mkha' lta bu la dbyings rang bzhin gis 'od gsal ba/_de nyid rig pa 'gag med kyi rol pa cir yang 'char zhing snang ba 'di thams cad/_skye ba med pa dang 'gag pa med pa dang*/_gnas pa med par ro mnyam/_ngo bo stong pa/_rang bzhin gsal ba/_rnam pa 'gag med kyi rig pa du mar 'char zhing snang ba/_dbyer med blo 'das nam mkha' lta bu la gsal rig stong gsum nam mkha' lta bur mtha' dbus med par 'dug go zhe na/_de kho na nyid do zhes/_gzhi lam 'bras gsum/_lta sgom spyod 'bras bzhi/_bden pa bzhi/_dga' ba bzhi/_tshad med bzhi/_pha rol tu phyin pa drug_/sa bcu lam lnga/_thabs shes gnyis/
XXX bden pa gnyis/_skyabs 'gro/_bshags pa/_srung ba/_sems bskyed/_tshogs gnyis/_snying rje/_bskyed rim/_zhi lhag_/dkon mchog gsum/_sku gsum/_ye shes lnga la sogs pa'i yon tan thams cad rang ngo shes pa'i steng du ngo sprad pa la mkhas par bya'o/ /gnyis pa ngo bo'i lhag mthong*/_tha mal gyi shes pa so ma rang ngo sprad nas/_cig car du nyams su len pa ni/_sems nyid skye 'gag gnas gsum gyi mtha' dang bral ba/_bdag dang bdag gir 'dzin pa'i gzung 'dzin las grol zhing*/_ngo bo stong pa/_rang bzhin gsal ba/_rnam pa 'gag med kyi rig pa yul med du mar gsal zhing snang ba/_mthong bya mthong byed kyi 'dzin pa'i yul las 'das pa/_bsgom bya sgom byed kyi dmigs pa'i yul las gol ba/_gang yang yid la mi byed pas yid byed dang bral ba/_de nyid la bzo bcos ma byas pas lhugs pa/_bya ba thams cad dang bral bas byar med/_gang shar ngos bzung dang bral bas 'dzin med/_mnyam bzhag gi shes pa la bcos slad dang bral bas had de ba/_mtshan 'dzin med pas stong sang nge ba/_rang bzhin gyis 'od gsal bas sa le ba/_rnam rtog gzung 'dzin gyis ma gos pas rjen ne ba/_rang ngo rang gis shes pas hrig ge ba/_yul yul can gyi 'dzin pa zhig pas snang sems dbyer med zang thal du phyal le ba/_rig pa ma bcos par rang lugs su 'jog pas tha mal gyi shes pa/_rnam rtog lu gu rgyud du snying 'jug pas so ma zhes bya ste/_'di lhag mthong gi ngo bo nyams su blang bya'i dngos gzhi yin no/ /'di nyid 'phags ma'i ngo bo ste/_'phags zhes pa ni ma rig gzung 'dzin
XXX gyi 'khor ba las 'phags pa'o/ /ma zhes pa ni shes rab kyi rang rtsal gyis rang ngo shes pa'o/ /sgrol ces pa ni/_ma 'gag pa'i rtsal snying rje chen pos sems can gyi don 'bad med du byed pa'o/ /ma zhes pa ni/_stong nyid snying rje'i snying po can gyis don gnyis lhun grub ces pa'i don yin no/ /des na sems nyid 'phags ma sgrol ma rtogs par bya'o/ /zhes ngo sprad par bya'o/ /gsum pa mthar thug gi zhi lhag zung 'jug nyams su blangs bar bya ba ni/_sems nyid skye gnas 'jig gsum dang bral ba de nyid 'gag pa med pas chad pa'i mtha' dang bral ba/_rang bzhin stong pa nyid du gnas pas rtag pa'i mtha' dang bral ba/_sna tshogs du mar rig pas chad pa'i mtha' dang bral ba/_sems kyi ngo bo kha dog dbyibs su grub pa med pas rtag pa'i mtha' dang bral ba/_sems kyi ngo bo stong nyid bdag med blo las 'das pas rtag pa'i mtha' dang bral ba/_rtsal sna tshogs su 'char bas chad pa'i mtha' dang bral ba/_des na rtag chad mtshan 'dzin gyis mtha' las 'das pas/_gsal rig stong gsum dbyer med pa/_zung 'jug nyams su len pa'i tshul ni/_thabs bsod nams kyi tshogs sgyu ma lta bu la sems gnas shing*/_de dag rang bzhin med pa stong pa nyid du shes shing mthong ba ni lhag mthong ngo*/ /mos gus bla ma'i rnal 'byor la sems gnas pa zhi gnas yin la/_sems de'i ngo bo stong nyid blo 'das su mthong ba'i lhag mthong ngo*/ /bskyed rim chu zla lta bu la sems gnas pa zhi gnas/_rang bzhin stong pa nyid du mthong ba ni lhag mthong ngo*/ /snang ba sems kyi rang snang chu zla lta bu la sems gnas shing*/
XXX rten 'brel skye med snang stong dbyer med du mthong ba ni lhag mthong ngo*/ /lam gyi mthar thug bde ba chen po la sems gnas pa zhi gnas yin la/_de nyid zhen med stong pa nyid du mthong ba ni lhag mthong ngo*/ /sems rang bzhin 'od gsal ba la sems gnas pa zhi gnas yin la/_ngo bo spros bral stong pa nyid du mthong ba ni lhag mthong ngo*/ /bcos bslad dang bral ba'i rig pa so ma la sems gnas pa ni zhi gnas yin la/_bdag med skye med du mthong ba lhag mthong ngo*/ /mdor na chu zla dang me long gi gzugs brnyan dang brag ca ltar snang ba las gzhan pa'i stong pa med/_stong pa las gzhan pa'i snang ba med/_snang stong skye med nam mkha' la 'ja' shar ba lta bur rtogs nas de'i ngo bor 'jog pa'i zhi lhag zung 'jug ces bya'o/ /de la rdzogs rim zhi lhag zung 'jug song ngo*/ /gsum pa 'od gsal 'dzin pa ni rang nyid sgrol mar gsal bar bskyed pa'i thugs khar/_'khor lo ljang khu'am dkar po dngul chu'i mdog lta bu las 'od zer 'phros/_lus kyi nang gang*/_phyir 'phros lus kyi phyi rol thams cad nyi ma stong las lhag pa'i 'od kyis gsal gdab par byas/_de nas dpag tshad tsam 'od kyis gang bar byas/_de nas 'dzam bu gling tsam/_de nas gling bzhi/_de nas stong gsum gyi stong chen po'i 'jig rten gyi khams thams cad 'od zer gyis gang bar byas/_sems can thams cad la phog pas de dag 'od kyi rang bzhin du byas/_yul yul can thams cad 'od zer gyis gang bar byas/_nyi ma 'bum gyi 'od las kyang gsal bar bsgom/_de nas sems rang bzhin gyis 'od gsal ba/_dmigs pa med pa'i
XXX ngang nas/_rtogs med spros pa thams cad dang bral ba'i ngang la mnyam par bzhag cing 'od gsal bsgom pa'o/ /mtshan mo yang de lta bu'i tshul gyis mnyam par bzhag pas/_gnyid 'od gsal du 'char bar 'gyur ro/ /de ni 'od gsal bsgom pa'i rim pa'o/ /bzhi pa 'pho ba la gnyis te/_sbyang ba dang*/_las la sbyar ba'o/ /dang po rang gi lus stong rang sgom pa'i snyig khar ut+pal rgyas pa'i steng du/_zla ba'i dkyil 'khor gyi steng du tAM yig ljang khu zhig bsam/_rang gi spyi bor tshangs pa'i bu ga gsal haM re pa bsgom mo/ /de'i steng gi khru gang tsam gyi nam mkha' la/_rin po che'i khri'i steng du/_ut+pal rgyas pa'i steng du 'phags ma sgrol ma gsal bar bskyed pa'i zhal nas/_oM tA re tAM swA hA/_zhes gsungs pas rang gi snying kha'i tAM yig las thig le ljang khu zhig chad nas spyi bo'i tshangs bug nas yar thon/_spyi bo'i sgrol ma'i thugs khar reg pa re byas nas/_slar mar babs/_snying kha'i tAM yig la thim par bsgom slar tAM yig las thig le ljang khu zhig chad nas 'od dang bcas par 'phags ma'i thugs kar thim pa la dmigs pa nyi shu'am/_brgya la sogs pa bya'o/ /mthar thug 'jog khar spyi bor sgrol ma'i phyag g.yas na zla ba'i dkyil 'khor gcig gis rang gi tshangs bug de bkag par bsam pa ni log non no/ /de ni sbyangs pa'o/ /gnyis pa las la sbyor ba ni/_rang la 'chi ba'i rtags
XXX tshangs pa'i tshe/_zhen chags mtha' dag dang bral bar byas nas/_rang lus stong sang nge ba'i snying khar zla ba'i steng du tAM ljang khu 'od zer lnga 'phro bar bsam pa'i spyi bo'i gtsug rgya skar kha bye ba lta bu'i steng gi nam mkhar 'dom gang tsam gyi bar/_sgrol ma gsal bar bskyed pa'i zhal nas/_oM tA re tAM swA hA/_zhes pa'i sngags sgras bskul nas/_tAM yig gdan dang bcas pa nam mkhar mda' 'phang ba ltar sgrol ma'i thugs khar thim par bsam la/_rlung sems spyi bor drag tu gtad/_ngag tu hika ces brjod pas 'pho bar 'gyur ro/ /de ni sprul pa'i sku'i 'pho ba'o/ /longs sku la 'pho ba ni/_sgrol ma nam mkhar byon nas/_'og min du rnam snang gi thugs kar thim pa'am/_bde ba can gyi zhing khams su 'od dpag med kyi thugs kar thim pas/_rgyal ba de dag dang dbyer med par bsam pa ni longs sku la 'pho ba'o/ /chos sku la 'pho ba ni/_gzugs sku de dag dmigs med du yal bar bsam la/_rig pa gsal stong 'dzin med du steng gi nam mkhar gtad pa'o/ /de ni chos sku la 'pho ba'o/ /de dag ni dngos gzhi'o/ /gsum pa rjes ni/_bsod nams rgya chen gyur pa 'di yis ni/ /'gro ba'i don du sgrol ma mchog thob nas/ /sngon gyi rgyal ba rnams kyis ma bsgral ba'i/ /skye bo'i tshogs rnams sangs rgyas sar 'god shog_/ces bsngo ba dang smon lam btab bo/ /de ni rjes so/ /de ltar sbyong dngos rjes gsum yongs rdzogs pa'i/ /
XXX 'phags ma sgrol ma'i khrid kyi rim pa 'di/ /sgrol mas mi tra dz+wa ki la gnang zhing*/ /de yis shrI pu tra rjes su bzung*/ /des ni mi bskyod rdo rje rjes bzung nas/ /gdams ngag snyan nas snyan du brgyud pa yi/ /bdud rtsi bum pa gang byos tshul du ni/ /'od dpag rdo rje bdag la gsungs pa rnams/ /brjed kyang dogs nas yi ger bkod pa'o/ /dge bas sems can ma lus thams cad kun/ /bcom ldan sgrol ma'i go 'phang mchog thob shog/ //dge legs 'phel/

Footnotes[edit]



Research Information
Translator's notes
Note from Ringu Tulku
The Instructions on Tara Liberating from the Eight Fears Called: "Crossing the Abyss" (Activity Instructions) by Eupa Dorje.
Notes on the text itself
Notes on authorship
Notes on individuals related to text
Other notes
Genre from Richard Barron's Catalog
Instruction manual
Genre from dkar chag
khrid phran
BDRC Link
VolumeI1CZ3979
BDRC Content Information
No note on contents


Related Content
Recensions
Other Translations
Commentary(s) of this Text in the DNZ
Text(s) in the DNZ of which this is a commentary
Related Western Publications
Related Tibetan Publications
Other Information

Information about Unicode Tibetan and the digitization of this text

As the only available unicode Tibetan text at the time, Nitartha International's version of the Paro Edition of the gdams ngag mdzod is provided here. However, note that it has not been thoroughly edited and that there may also be mistakes introduced through the conversion process. Eventually we will provide a fully edited version of the entire Shechen Edition, entered and edited multiple times by Pulahari Monastery in Nepal, but as of fall 2017 that project has not been finished. Note that the folio numbers that appear throughout were added by Nitartha Input Center at the time of input.

Provided by Nitartha International Document Input Center. Many thanks to Lama Tenam and Gerry Wiener for help with fonts and conversion.

View JSON

JSON Export