DNZ-05-CA-010

Previous Text Back to Volume PageNext Text

		Rigpe Dorje Publications, 2024
Wylie title	lus med mkha' 'gro'i chos skor dgu til+li pa'i gdams pa
Location	gdams ngag rin po che'i mdzod Volume 8, Text 6, Pages 87-112 (Folios 1a1 to 13b6)
Author	ཏི་ལོ་པ་
Citation	Tilopa. Lus med mkha' 'gro'i chos skor dgu til+li pa'i gdams pa. In Gdams ngag rin po che'i mdzod, Vol. 8: 87-112. Kalimpong: Rigpe Dorje Publications, 2024.	Shechen Publications, 1999
Side notes	Recto: lus med chos dgu   Verso: bka' brgyud skor
More details More details
Genre	Spiritual Instructions - gdams ngag
Colophon	ལུས་མེད་མཁའ་འགྲོའི་གསང་བའི་ཚིག །ཆོས་སྐོར་དགུ་ཡི་གདམས་པ་འདི། །ཏེ་ལོ་ཞེས་བྱའི་རྣལ་འབྱོར་པས། །ཚངས་པའི་གསུང་རང་ཡི་གེར་བཏབ། །འཕྲི་བསྣན་མེད་པ་གནད་ཀྱི་གསང༌། །གཅིག་བརྒྱུད་དག་ཏུ་གདམས་པ་ཡིན། །ཡང་དག་པ་ཡི་གདམས་པ་ཟབ། །ཨྠིྀ། རྒྱ་གར་གྱི་གྲུབ་ཐོབ་ཏི་ཕུ་བ་གསང་སྔགས་སྡོང་པོ་ལ། བོད་ཀྱི་རྣལ་འབྱོར་པ་རས་ཆུང་རྡོ་རྗེ་གྲགས་པས་ཞུས་ཤིང་བོད་དུ་སྤྱན་དྲངས་པའོ།།
	lus med mkha' 'gro'i gsang ba'i tshig_/chos skor dgu yi gdams pa 'di/_/te lo zhes bya'i rnal 'byor pas/_/tshangs pa'i gsung rang yi ger btab/_/'phri bsnan med pa gnad kyi gsang /_/gcig brgyud dag tu gdams pa yin/__/yang dag pa yi gdams pa zab/__/a+thi+-i/__rgya gar gyi grub thob ti phu ba gsang sngags sdong po la/__bod kyi rnal 'byor pa ras chung rdo rje grags pas zhus shing bod du spyan drangs pa'o//

Tibetan Text

[edit]

༄༅། །ལུས་མེད་མཁའ་འགྲོའི་ཆོས་སྐོར་དགུ་ཏིལླི་པའི་གདམས་པ་བཞུགས་སོ། །

༄༅། །ན་མོ་གུ་རུ་དེ་ཝ་ཌཱ་ཀི་ནཱི། ཆོས་སྐོར་དགུའི་གདམས་པ་འདི་ལ་གཉིས་ལས། དང་པོ་ལོ་རྒྱུས་ཅུང་ཟད་དང་བཅས་ཏེ་བརྒྱུད་རིམ་བཤད་པ་ནི། རྣལ་འབྱོར་དབང་ཕྱུག་ཏིལླི་པས། ཨོ་རྒྱན་གནྡྷོ་ལའི་གཙུག་ལག་ཁང་དུ་བྱོན་ཏེ། ཡེ་ཤེས་ཀྱི་མཁའ་འགྲོ་ལ་སྙན་བརྒྱུད་ཀྱི་གདམས་ངག་ནོར་བུ་སྐོར་གསུམ་རྫོགས་པར་ཐོབ་ནས་མི་ཡུལ་དུ་འབྱོན་པར་ཆས་པ་ལ། འཁོར་གྱི་མཁའ་འགྲོ་མ་རྣམས་ཀྱིས་བཞུགས་པར་གསོལ་བ་བཏབ་རུང་མ་གནང་བར། ཚེས་བཅུ་ལ་འབྱོན་པར་ཆས་པ་ལ། ཡེ་ཤེས་མཁའ་འགྲོས་སྐྱེལ་ཆོས་ནི། སྐུ་ནི་མི་སྣང་ཧཱུྃ་གི་སྒྲ། །མཆོག་ཏུ་སྙན་ཞིང་ཡིད་འཕྲོག་པས། །མཁའ་ལ་ཅེར་གྱིས་བལྟས་པ་ལས། །ལྷ་དང་ཌཱ་ཀི་སྤྲིན་ལྟར་འཐིབས། །དཔའ་བོ་དཔའ་མོ་གློག་ལྟར་འཁྱུགས། །གདུགས་དང་རྒྱལ་མཚན་བ་དན་དང༌། །རོལ་མོ་ལ་སོགས་མཆོད་པའི་ཚོགས། །འཛིན་མཁན་མེད་པས་ནམ་མཁའ་གང༌། །འཇའ་འོད་དཀྱིལ་འཁོར་དབུས་ཉིད་ནས། །འོད་ཟེར་ཧཱུྃ་ཡིག་མཐིང་ནག་ལ། །མཆོད་པ་སྣ་ཚོགས་འབུལ་མཐོང་བས། །སློབ་དཔོན་ཆེན་པོ་ཏིལླི་པས། །ཐལ་སྦྱར་གསོལ་བ་བཏབ་པ་ལས། །ངོ་བོ་ཡེ་ཤེས་མཁའ་འགྲོ་མ། །རྣམ་པ་ཧཱུྃ་ཡིག་མཐིང་ནག་ལས། །ཚངས་དབྱངས་རང་སྒྲ་འདི་སྐད་ཐོས། །ཀྱཻ་ཧོ་བུ་ཉོན་རྣལ་འབྱོར་པ། །སྨིན་གྲོལ་སེམས་ཀྱི་རྒྱ་མདུད་ཤིག །དམ་ཚིག་རང་སེམས་མེ་ལོང་ལྟོས། །སྤྱོད་པ་ཆུ་ལ་རལ་གྲི་རྒྱོབ། །དམ་རྫས་རྟོགས་པའི་ཉི་མ་འདེས། །རིག་པ་ཡེ་ཤེས་སྒྲོན་མེ་ལྟོས། །རྩ་རླུང་དྲྭ་མིག་འཁོར་ལོ་སྐོར། །རོ་སྙོམས་ཕྱི་ཡི་མེ་ལོང་ལྟོས། །རང་གྲོལ་ཕྱག་རྒྱ་ཆེན་པོ་སྒོམས། །བདེ་ཆེན་གསུང་གི་རིན་ཆེན་ཟུངས། །བཅོམ་ལྡན་ལུས་མེད་མཁའ་འགྲོ་མ། །སངས་རྒྱས་ཌཱ་ཀིས་དེས་གསུངས་ཚེ། །རྣལ་འབྱོར་དབང་ཕྱུག་ཏེ་ལོ་ཡིས། །དེ་དོན་རྒྱས་པར་ཞུ་ཕྱིར་དུ། །སླར་ཡང་ཐལ་སྦྱར་གསོལ་བཏབ་པས། །ལུས་མེད་ཡེ་ཤེས་མཁའ་འགྲོ་མས། །ཆོས་སྐོར་དགུ་ཡི་ཚིག་དོན་རྣམས། །མ་ལུས་རྒྱས་པར་གསུང་བ་ནི། །སྨིན་གྲོལ་སེམས་ཀྱི་རྒྱ་མདུད་ཤིག །ཅེས་སོགས་ཀྱི་ཚིག་དོན་རྣམས་མན་ངག་གིས་བཀྲོལ་ཏེ་རྒྱས་པར་གསུང་བ་ལས། ཏེ་ལོ་པས་དུས་དེ་ཉིད་དུ་ཡི་གེར་བཀོད་ནས། མི་ཡུལ་དུ་འབྱོན་ཚེ། སྒྱུ་མ་ལུས་ཀྱི་གནྡྷོ་ལར། །ལུས་མེད་མཁའ་འགྲོའི་གསང་བཅུག་སྟེ། །བརྗོད་དུ་མེད་པའི་ལྕགས་བཅུག་ནས། །འོད་གསལ་སེམས་ཀྱི་བྱ་འཕུར་འགྲོ། །ཞེས་གསུངས་ནས་རྫུ་འཕྲུལ་གྱིས་གཙུག་གི་ནོར་བུའི་དགོན་པར་བྱོན་ཏེ། འགྲོ་དོན་མཛད་ཚེ་ཐུགས་སྲས་གྲུབ་ཐོབ་རྣམས་ཀྱིས་ཨོ་རྒྱན་ལ་མཁའ་འགྲོ་མ་ལས་གསན་པའི་ཆོས་རྣམས་ནན་གྱིས་ཞུས་པས་མ་གནང་བར། པཎ་ཆེན་ནཱ་རོ་པ་ལ་སྙན་བརྒྱུད་ཀྱི་གདམས་པ་བཀའ་རྒྱས་བཏབ་སྟེ་གནང་ནས་གནས་ལུང་བསྟན། ཆོས་སྐོར་དགུ་པོ་འདི་ཡང་མཁའ་འགྲོ་ལས་དངོས་སུ་གསན་པ་ཡིན་གསུངས། ནཱ་རོ་པ་སོགས་ཐུགས་སྲས་འགའ་ལ་གནང༌། ནཱ་རོ་པས་ཏི་ཕུ་བ་སོགས་ཐུགས་སྲས་འགའ་ལ་གནང༌། པཎ་ཆེན་ནཱ་རོས་ཏེ་ལོའི་ལུང་བསྟན་ལྟར་སྒྲ་སྒྱུར་མར་པ་ལ་བཀའ་རྒྱས་བཏབ་ནས་གནང་སྟེ། རྗེ་བཙུན་མི་ལ་ལུང་བསྟན་ཞིང༌། ཆོས་སྐོར་དགུ་ལས་བཞི་གནང་ཞིང་ཐོབ་ནས། རིག་པ་ཡེ་ཤེས་སྒྲོན་མེ། རྩ་རླུང་དྲྭ་མིག་འཁོར་ལོ། བདེ་ཆེན་གསུང་གི་རིན་ཆེན། རོ་སྙོམས་ཕྱི་ཡི་མེ་ལོང༌། རང་གྲོལ་ཕྱག་རྒྱ་ཆེན་པོ་རྣམས་མ་ཐོབ་པ་སྒྲ་སྒྱུར་མར་པས་རྗེ་བཙུན་མི་ལ་ལ་ལོངས་ཤིག་ཅེས་བཀའ་གནང་བ་ལས། རྗེ་བཙུན་ཉམས་ལེན་གྱིས་ཐུགས་ཚིམས་ནས་རྒྱ་གར་ལ་བྱོན་པ་མ་བྱུང་བ་ལ། ཆོས་སྐོར་དགུ་ཞུ་བར་རས་ཆུང་པ་བརྫངས། རས་ཆུང་པས་ཀྱང་ཏི་ཕུ་གསང་སྔགས་སྡོང་པོ་ལ་ཆོས་སྐོར་དགུ་པོ་ཚང་བར་ཞུས་ཏེ་བོད་དུ་སྤྱན་དྲངས་ནས། སྙན་བརྒྱུད་ཀྱི་ཆ་ལག་ཏུ་ཆོས་སྐོར་དགུའི་གདམས་པ་འདི་མ་གནང་བ་མེད་ཅིང༌། སྙན་བརྒྱུད་མ་གནང་བར་འདི་རང་གནང་བ་ཡང་འགའ་རེ་ཡོད། རས་ཆུང་པས་ཁྱུང་ཚང་བ་ལ་སྙན་བརྒྱུད་དང་བཅས་པ་གནང༌། ཁྱུང་ཚང་བས་ཀྱང་གོང་ལྟར་གཉིས་ཀ་གནང་བ་དང༌། འདི་རང་གནང་བ་དང་གཉིས་ཡོད་པ་ལས་ཐུགས་སྲས་གྲུབ་ཐོབ་རྣམས་གསུམ་ལ་གཉིས་ཀ་གནང་ཞིང༌། དེ་གསུམ་ཀ་ལ་ཞང་ལོཙྪ་བས་ཞུས་པ་ལས་དམར་སོམ་ཆོས་དགུ་ལ་ཤིན་ཏུ་འདྲིས་པར་དགོངས་ནས་ནན་ཏན་ཞུས་དག་དང་བཅས་ཞུས་ཤིང་གནང་བར་གདའ། དེ་མན་བདག་གི་ཕ་མཉམ་མེད་ཤ་བ་ར་ཆེན་པོ་དང་བདག་གི་བར་ལ་སྙན་བརྒྱུད་ཀྱི་ཆ་ལག་ཏུ་ཆོས་སྐོར་དགུ་པོ་འདི་མ་གནང་བ་མེད་པས་བརྒྱུད་པ། རྡོ་རྗེ་འཆང༌། ལུས་མེད་མཁའ་འགྲོ། ཏིལླི་ཤེས་རབ་བཟང་པོ། མཁས་པ་ནཱ་རོ་པཎ་ཆེན། ཏི་ཕུ་གསང་སྔགས་སྡོང་པོ། རས་ཆུང་རྡོ་རྗེ་གྲགས་པ། ཁྱུང་ཚང་ཡེ་ཤེས་བླ་མ། དམར་སྒོམ་ཚུལ་ཁྲིམས་འབྱུང་གནས། ཞང་ལོ་གྲུབ་པ་དཔལ་བཟང༌། འགྲོ་མགོན་དྷཱ་ར་ཤྲཱི། བྱང་སེམས་བསོད་ནམས་རྒྱལ་མཚན། མ་གཅིག་ཀུན་ལྡན་རས་མ། མཁས་བཙུན་གཟི་བརྗིད་རྒྱལ་མཚན། མཁན་ཆེན་དབང་ཕྱུག་ཤེས་རབ། བྱ་བཏང་རི་ཁྲོད་རས་ཆེན་གཞོན་ནུ་དཔལ་ལྡན། ལྡོང་སྟོན་ནམ་མཁའ་རྒྱལ་མཚན། འདུལ་འཛིན་ངག་གི་དབང་པོ། མཉམ་མེད་རབ་འབྱམས་ཆོས་རྗེ། དེས་བདག་དུ་མའི་མིང་ཅན་ལའོ། །གཉིས་པ་གདམས་པ་དངོས་བཤད་པ་ནི། ན་མོ་རཏྣ་གུ་རུ། ལུས་མེད་མཁའ་འགྲོ་མ་ཡི་གསང༌། །ཆོས་སྐོར་དགུ་ཡི་གདམས་པ་ལས། །སྨིན་གྲོལ་སེམས་ཀྱི་རྒྱ་མདུད་ཤིགས། །ཞེས་པའི་དོན་ལ། མཎྜལ་བཤམ་པ་དང༌། ལམ་དུ་ཞུགས་པ་དང༌། དབང་བསྐུར་བ་དང་གསུམ་མོ། །དང་པོ་མཎྜལ་བཤམ་པ་ནི། ཚུལ་དང་མཐུན་པའི་སྟེགས་བུའི་སྟེང་དུ། རིན་པོ་ཆེའི་མཎྜལ་བཤམ། དེའི་སྟེང་དུ་ཡི་གེ་ཧཱུྃ་གཅིག་བཞེངས་ནས་བཞུགས། དེའི་སྟེང་དུ་བདེ་མཆོག་ཡབ་ཡུམ་མམ། ཤཱཀ་ཐུབ་ཀྱི་ཐང་སྐུ་གཉིས་བཀྲམ། དེའི་མཐར་པཱུ་ཙ་ལྔ་བཤམས་ཏེ། ཤ་མར་ཟན་ཆང་ཁུར་བ་དང་ལྔའོ། །གཉིས་པ་ལམ་དུ་འཇུག་པ་ལ་གསུམ་གྱི་དང་པོ་སྐྱབས་སུ་འགྲོ་བ་ནི། ཆོས་སྤྱི་དང་མཐུན་པའི་སྐྱབས་འགྲོ་བྱ། ཡིད་ཀྱིས་བླ་མ་དཀོན་མཆོག་མིན་པ་སྐྱབས་མགོན་གཞན་ན་ཡོད་རེ་ཤི་སྙམ་པའི་ཞེ་མནའ་བསྐྱལ་ལོ། །གཉིས་པ་སེམས་བསྐྱེད་པ་ནི། སྨོན་འཇུག་གཉིས་ཁ་ཚང་བའི་སེམས་བསྐྱེད་བློ་སྟོབས་བསྐྱེད་པས་བླང་བ་སྤྱི་དང་མཐུན་ལ། བདག་གིས་རྫོགས་པའི་བྱང་ཆུབ་ཐོབ་ནས་སེམས་ཅན་ཐམས་ཅད་ཀྱི་དོན་བྱེད་པ་ལས། རང་གི་ཞི་བདེ་སྒྲུབ་རེ་ཤི་སྙམ་པའི་ཞེ་མནའ་བསྐྱལ་ལོ། །གསུམ་པ་སྡོམ་པ་བླང་བ་ལ་གཉིས་ལས། དང་པོ་རྟེན་བསམས་ནས་མཆོད་པ་འབུལ་བ་ནི། མདུན་གྱི་མཎྜལ་བསང་སྦྱངས་ཏེ་པྃ་ལས་པདྨའི་སྡོང་པོ་ཡངས་ཤིང་རྒྱ་ཆེ་བ་དབུས་ཀྱི་པདྨའི་སྟེང་དུ། རྃ་ལས་ཉི་མ། དེའི་སྟེང་ངོ་བོ་ལུས་མེད་མཁའ་འགྲོ་ཡི་གེ་ཧཱུྃ་གི་རྣམ་པར་བསམས། དེའི་སྟེང་དུ་བླ་མ་ཤཱཀྱ་ཐུབ་པའམ། བདེ་མཆོག་ཡབ་ཡུམ་གྱི་ངོ་བོར་བསམ། དེའི་སྟེང་དུ་བརྒྱུད་པ་རྣམས་རིམ་པར་བསམ། དེའི་པདྨའི་འདབ་མ་ལ་དཀོན་མཆོག་ཡི་དམ་མཁའ་འགྲོ་ཆོས་སྐྱོང་གིས་བསྐོར་ནས་བཞུགས་པར་བསམ། དེ་རྣམས་ལ་མཆོད་པ་ནི། དངོས་དང་ཡིད་ཀྱིས་སྤྲུལ་པའི་མཆོད་པ་འབུལ་ཏེ། ཕྱིའི་པཱུ་ཙ་སྔགས་དང་ཕྱག་རྒྱས་འབུལ། ནང་གི་མཆོད་པ་ཚོགས་ཀྱི་ཡོ་བྱད་ལྔ། ག་ན་ཙཀྲ་པཱུ་ཛ་ཧོཿ ཞེས་པས་དབུལ། གསང་བའི་མཆོད་པ་ནི། དངོས་དང་ཡིད་ཀྱིས་སྤྲུལ་པའི་བདག་ཉིད་མཆོད་པའི་ལྷ་མོ་ཡིད་དུ་འོང་བ་ཞིག་ཏུ་སྤྲུལ། བླ་མ་ཡི་དམ་དཔའ་བོ་དང་བཅས་པ་རྣམས་ལ་དབུལ་ལ། རབ་ཏུ་དགེས་ཤིང་རོལ་ནས་མཉེས་པར་བསམ་མོ། །གཉིས་པ་སྡོམ་པ་བླང་བ་དངོས་ནི། ཐུན་མོང་ཐེག་ཆེན་སྤྱི་དང་མཐུན་པར་བྱ། ཁྱད་པར་རིགས་ལྔའི་སྡོམ་པ་གཟུང་བར་བྱའོ། །གསུམ་པ་དབང་བསྐུར་བ་ནི། བླ་མ་བདེ་མཆོག་ཡབ་ཡུམ་དུ་བཞུགས་པ་ལ་མེ་ཏོག་དོར། བླ་མ་རིན་པོ་ཆེ་བདག་ལ་བུམ་དབང་བསྐུར་དུ་གསོལ། ཞེས་གསོལ་བ་བཏབ་པས་བླ་མའི་སྐུ་ལས་འོད་འཕྲོས་བདག་ལ་སོགས་པའི་ལུས་ལ་ཐིམ་པས་ལུས་ཀྱི་སྒྲིབ་པ་དཀར་སངས་ཀྱིས་དག་པར་བསམ། ཡང་བདག་ལ་གསང་བའི་དབང་བསྐུར་དུ་གསོལ། ཞེས་གསོལ་བ་བཏབ་པས་བླ་མ་ཡབ་ཡུམ་གྱི་སྦྱོར་མཚམས་ནས་ཐིག་ལེ་དཀར་དམར་བྱང་ཆུབ་ཀྱི་སེམས་ནར་གྱིས་བབ་ནས་བདག་གི་ངག་ནས་མར་ཞུགས་པས་ལུས་ཐིག་ལེས་མེར་གྱིས་གང་བར་བསམ། ངག་གི་སྒྲིབ་པ་དག་པར་གྱུར། ཡང་བདག་ལ་ཤེས་རབ་ཡེ་ཤེས་ཀྱི་དབང་བསྐུར་དུ་གསོལ། ཞེས་གསོལ་བ་བཏབ་པས། བླ་མའི་ཐུགས་ཀ་ནས་འོད་ཟེར་གཅིག་བྱུང་ནས་བདག་ལ་ཕོག་པས་བདག་གི་ལུས་འདི་ལྷ་མོ་མཛེས་མ་ཡིད་དུ་འོང་བ་ཞིག་ཏུ་གྱུར་ནས། བླ་མ་བདེ་མཆོག་གི་ངོ་བོར་བཞུགས་པའི་སྐུ་ལ་འཁྲིལ་ནས། གཉིས་སུ་མེད་པའི་སྦྱོར་བ་བྱས་ཉམས་བདེ་སྟོང་གི་ངང་དུ་ཕྲིལ་གྱིས་འབར་ནས་ཡིད་ཀྱི་སྒྲིབ་པ་དག་པར་བསམ། དེ་ནས་མདུན་གྱི་པདྨའི་སྟེང་གི་རྟེན་དེ་རྣམས་ཀྱིས་ཐུགས་རྗེས་བདག་ལ་ཅེར་གྱིས་གཟིགས་ཏེ། དེ་རྣམས་འོད་དུ་ཞུ་ནས་བདག་ལ་སིབ་ཀྱིས་ཐིམ་པར་བསམ། ཉམས་སྤྲོས་བྲལ་ལྷག་སོང་བར་བསམ། དེ་ནི་དབང་བཞི་པའོ། །དེ་ནས་ཚོགས་ལ་རོལ་ལོ། །ཨྠིྀ། ན་མོ་རཏྣ་གུ་རུ། ལུས་མེད་རྡོ་རྗེ་མཁའ་འགྲོ་ཡི། །ཆོས་སྐོར་དགུ་ཡི་གདམས་པ་ལས། །དམ་ཚིག་རང་སེམས་མེ་ལོང་ལྟོས། །ཞེས་གསུངས་པའི་དོན་ལ་གསུམ་གྱི་དང་པོ། དམ་ཚིག་ལ་བཞི་སྟེ། བུམ་དབང་གི་དམ་ཚིག །གསང་དབང་གི་དམ་ཚིག །ཤེས་རབ་ཡེ་ཤེས་ཀྱི་དང་དབང་བཞི་པའོ། །དེ་རེ་རེ་ལ་ཡང་དྲུག་དྲུག་སྟེ། མཉམ་བཞག་གི་དམ་ཚིག་དང༌། རྗེས་ཐོབ་ཀྱི་དམ་ཚིག་དང༌། བཟའ་བ་དང༌། བསྲུང་བ་དང༌། མི་འབྲལ་བ་དང་དགོས་པའོ། །བུམ་དབང་གི་མཉམ་བཞག་གི་དམ་ཚིག་ནི། ལྷ་སྐུའི་ང་རྒྱལ་ལ་གནས་པའོ། །རྗེས་ཀྱི་དམ་ཚིག་ནི། སྤྱོད་ལམ་བཞི་ཀར་ཐ་མལ་དུ་མ་སོང་བར། སྣོད་བཅུད་ལྷ་དང་གཞལ་ཡས་ཁང་དུ་གནས་པ་ལ་ལོངས་སྤྱོད་པའོ། །བཟའ་བར་བྱ་བའི་དམ་ཚིག་ནི། ཤ་ལྔ་བདུད་རྩི་ལྔར་བྱིན་གྱིས་བརླབས་པའི་རིལ་བུ་བརྟེན་པའོ། །དེས་ལྷ་དང་མཁའ་འགྲོ་འདུ་བའོ། །བསྲུང་བར་བྱ་བའི་དམ་ཚིག་ནི། རྩ་བ་བཅུ་བཞི་ཡན་ལག་བརྒྱད་དང་བཅས་པ་བསྲུང་བའོ། །མི་འབྲལ་བར་བྱ་བའི་དམ་ཚིག་ནི། སྐུའི་རྟེན་ཐང་སྐུ། གསུང་གི་རྟེན་ཌཱ་མ་རུ། ཐུགས་ཀྱི་རྟེན་རྡོ་རྗེ་དྲིལ་བུ་རྟག་ཏུ་བརྟེན་པའོ། །དམ་ཚིག་བསྲུང་བའི་དགོས་པ་ནི། སྤྲུལ་པའི་སྐུ་ཐོབ་པའོ༑ ༑གསང་དབང་ལ་ཡང་སྤྱི་དོན་དྲུག་ལས། གསང་དབང་གི་མཉམ་བཞག་ནི། སྟེང་སྒོ་གཏུམ་མོའི་རྣལ་འབྱོར་ལ་བརྟེན་ནས་རྩ་རླུང་ཡེངས་མེད་དུ་བསྒོམ་པའོ། །རྗེས་ཐོབ་ནི། རྩ་རླུང་སྒོམ་པའི་ཉམས་སྤྱོད་ལམ་བཞི་ཀར་བདེ་གསལ་སྟོང་པའི་ཉམས་ཡེངས་མེད་དུ་བསྐྱང་བའོ། །བཟའ་བར་བྱ་བའི་དམ་ཚིག་ནི། འདོད་ཡོན་ལྔ་ལ་སྤྱོད་པའི་ཚེ་གསལ་སྟོང་གཉིས་མེད་དུ་ལོངས་སྤྱོད་པའོ། །བསྲུང་བར་བྱ་བའི་དམ་ཚིག་ནི། ཐིག་ལེ་ཉམས་པར་བྱེད་པའི་ཟས་དང་སྤྱོད་ལམ་ཐམས་ཅད་སྲུང་བའོ། །མི་འབྲལ་བར་བྱ་བའི་དམ་ཚིག་ནི། སྲོག་རྩོལ་གྱི་རླུང་འཛིན་པ་ལ་ལེ་ལོར་མ་ཤོར་བར་བྱའོ། །མ་ཡེངས་ཙམ་དུ་བསྐྱང་ངོ༌། །དགོས་པ་ནི་ཆོས་སྐུ་ཐོབ་པའོ། །ཤེས་རབ་ཡེ་ཤེས་ཀྱི་དབང་གི་དམ་ཚིག་དྲུག་སྟེ། མཉམ་བཞག་གི་དམ་ཚིག་ནི། ལས་ཀྱི་ཕྱག་རྒྱ་མ་བརྟེན་ཅིང་ཐིག་ལེའི་དགོངས་པ་ལ་བརྩོན་པར་བྱའོ། །རྗེས་ཐོབ་ཏུ་སྤྱོད་ལམ་བཞི་ཇི་ལྟར་སྤྱོད་ཀྱང༌། ཉམས་བདེ་སྟོང་གི་ངང་ལས་མ་གཡོས་པར་བྱའོ། །བཟའ་བར་བྱ་བའི་དམ་ཚིག་ནི། འདོད་ཡོན་ལྔ་ལ་ལོངས་སྤྱོད་ཀྱང༌། རྣམ་པ་ལྷའི་ངོ་བོས་ཟས་བདུད་རྩིར་བྱིན་གྱིས་བརླབས་ལ། ཉམས་བདེ་སྟོང་གི་ངང་ལ་བཟའོ། །བསྲུང་བར་བྱ་བའི་དམ་ཚིག་ནི། གཞན་ལུས་ལས་ཀྱི་ཕྱག་རྒྱ་མ་དང་མི་འབྲལ་ཞིང༌། དུས་མ་ཡིན་པའི་ཐིག་ལེ་སྲོག་བཞིན་དུ་བསྲུང༌། མི་འབྲལ་བར་བྱ་བའི་དམ་ཚིག་ནི། ཕྱག་རྒྱ་མའི་གཟུགས་མཐོང་བ་དང༌། སྐད་ཐོས་ཙམ་དུ་མི་འབྲལ་བར་བྱའོ། །དགོས་པ་ནི་ལོངས་སྐུ་ཐོབ་པའོ། །དབང་བཞི་པའི་དམ་ཚིག་ལ་ཡང་དྲུག་ལས། མཉམ་བཞག་གི་དམ་ཚིག་ནི། གནས་ལུགས་མ་བཅོས་པའི་ངང་ལ་བཞག་པའོ། །རྗེས་ཐོབ་ནི། སྤྱོད་ལམ་བཞི་ཇི་ལྟར་སྤྱོད་ཀྱང་རང་བྱུང་རང་ཤར་སྐྱེ་མེད་སྤྲོས་བྲལ་དུ་ལྷག་ལྷག་ཤེས་པའོ། །བཟའ་བར་བྱ་བའི་དམ་ཚིག་ནི། འདོད་ཡོན་ལྔ་གང་ལ་སྤྱོད་ཀྱང་ཞེན་འཛིན་མེད་པ། སྐྱེ་བ་མེད་པའི་ངོ་བོར་ལྷག་ལྷག་ཤེས་པར་བྱའོ། །བསྲུང་བར་བྱ་བའི་དམ་ཚིག་ནི། དངོས་པོའི་ཆོས་ཐམས་ཅད་ལ་བདེན་པ་དང༌། རྟག་པ་དང༌། རང་རྒྱུད་པའི་བློ་སྤང་ངོ༌། །མི་འབྲལ་བར་བྱ་བའི་དམ་ཚིག་ནི། དུས་ཐམས་ཅད་དུ་གནས་ལུགས་ཀྱི་ངང་ལས་མ་ཡེངས་པའོ། །དགོས་པ་ནི་ངོ་བོ་ཉིད་སྐུ་ཐོབ་པའོ། །གཉིས་པ་རང་སེམས་ནི་མེ་ལོང་གཡས་མ་གོས་པ་ལྟ་བུ། སེམས་ཉེས་ལྟུང་གི་དྲི་མས་མ་གོས་པ་ཞིག་དགོས་པས་དེ་བཞིན་དུ་བསླབ་ཅིང༌། སྣང་བ་ཐམས་ཅད་རང་གི་སེམས་སུ་ཤེས་པར་བྱའོ། །གསུམ་པ་མེ་ལོང་ལྟ་བ་ནི། རང་རྒྱུད་ལ་ཉེས་ལྟུང་གི་དྲི་མས་གོས་མ་གོས་བལྟས་ལ། གོས་ན་མེ་ལོང་གཡས་སྒྲིབ་པ་ལྟར་རང་སེམས་ཉོན་མོངས་པས་བསྒྲིབས་པ་ཡིན་པས། མེ་ལོང་ཕྱི་བ་ལྟར་དམ་ཚིག་ཉམས་ཆགས་བྱུང་འདུག་ན། སྔར་བྱས་ཀྱི་ཉེས་པ་ལ་འགྱོད་སེམས་དུག་འཐུང་བ་ལྟ་བུ་དང༌། ཕྱིན་ཆད་སྲོག་ལ་བབས་ཀྱང་མི་བྱེད་སྙམ་པའི་སྡོམ་སེམས་དང་ལྡན་ངེས་ཀྱི་སྐོང་བཤགས་དྲག་པོ་བྱ་ཞིང༌། ཕྱིན་ཆད་རང་གིས་རང་ལ་མ་ཁྲེལ་བར་ཉེས་ལྟུང་གིས་ནམ་ཡང་མ་གོས་པར་བསྲུང་བ་ལ་འབད་པར་བྱའོ། །ཉམས་ཆགས་གཞི་མེད་རང་སར་གྲོལ་ན་རྟོགས་པ་མཆོག་གི་དམ་ཚིག་ཐོབ་པ་ཡིན་ནོ། །ཨྠིྀ། ན་མོ་རཏྣ་གུ་རུ། ལུས་མེད་རྡོ་རྗེ་མཁའ་འགྲོ་མའི། །ཆོས་སྐོར་དགུ་ཡི་གདམས་པ་ལས། །སྤྱོད་པ་ཆུ་ལ་རལ་གྲི་རྒྱོབ། །ཅེས་པའི་དོན། གསང་སྔགས་ཀྱི་སྤྱོད་པ་ལ་བཞི་སྟེ། ཚོགས་སྤྱོད། རིག་སྤྱོད། གསང་སྤྱོད། ཕྱོགས་ལས་རྣམ་པར་རྒྱལ་བའི་སྤྱོད་པའོ། །སྤྱོད་པའི་དུས་ལ་བཞི་སྟེ། ཏིང་ངེ་འཛིན་མཐུ་བརྟན་པར་བྱེད་པའི་དུས། བོགས་འབྱིན་པའི་དུས། རྐྱེན་ངན་ངང་བསྲེ་བའི་དུས། ཡུལ་ལམ་དུ་སློང་བའི་དུས་ཏེ་དེ་དག་ནི་དབང་བཞིའི་ཉམས་ལེན་གྱིས་དུས་དང་སྦྱོར། སྤྱོད་པ་ལ་ཡང་བཞི་སྟེ། བུམ་དབང་གི་སྤྱོད་པ། གསང་དབང་གི་སྤྱོད་པ། ཤེས་རབ་ཡེ་ཤེས་ཀྱི་སྤྱོད་པ། དབང་བཞི་པའི་སྤྱོད་པའོ། །དེ་རྣམས་གུང་སྦྱར་ནས། སྔགས་ཀྱི་རྣལ་འབྱོར་པའི་སྤྱོད་ལུགས་བསྟན་པ་ནི། དང་པོ་བུམ་དབང་གི་དོན་བསྐྱེད་རིམ་ལ་གོམ་འདྲིས་བརྟན་པར་བྱ་ཕྱིར། སྤྱོད་ལམ་ཐམས་ཅད་དུ་ལྷའི་ང་རྒྱལ་དང་མི་འབྲལ་བར་བྱ་ཞིང༌། འདོད་ཡོན་གང་ལ་ལོངས་སྤྱོད་ཀྱང་ཚོགས་སུ་རོལ་བར་བྱའོ༑ ༑གསང་དབང་གི་དོན་རིག་སྤྱོད་བྱ་སྟེ། རྫོགས་རིམ་རླུང་གི་རྣལ་འབྱོར་གཙོ་བོར་བསྒོམ་པར་བྱ་ཞིང༌། གཉིས་སུ་མེད་པའི་དོན་ཕྱག་རྒྱ་ཆེན་པོ་བསྒོམ་པར་བྱའོ། །ཤེས་རབ་ཡེ་ཤེས་ཀྱི་དབང་ཐོབ་ནས་ལམ་བསྐྱེད་རྫོགས་གཉིས་ཀྱི་ཏིང་ངེ་འཛིན་ལ་བོགས་དབྱུང་བའི་ཕྱིར། གསང་སྤྱོད་བྱས་ཏེ། ནགས་ཚལ་དང༌། དུར་ཁྲོད། ཤིང་གཅིག་ལ་སོགས་པའི་དབེན་པའི་གནས་སུ་ལས་ཀྱི་ཕྱག་རྒྱ་མཚན་ལྡན་ཁྲིད་དོ། །ལས་རྒྱུ་འབྲས་ཀྱི་ཆོས་ཀྱིས་ངེས་ཤེས་བསྐྱེད། ཟབ་མོའི་དབང་བསྐུར། གསང་སྔགས་ཀྱི་གདམས་ངག་བཏབ་ལ། ཤིན་ཏུ་གསང་བའི་སྒོ་ནས། བདེ་ཆེན་གསུང་གི་རིན་ཆེན་གྱི་ལས་རྒྱ་ལྟར་ཉམས་སུ་བླང་ངོ༌། །ཚིག་དབང་གི་དོན་ཕྱོགས་ལས་རྣམ་པར་རྒྱལ་བའི་སྤྱོད་པ་བྱ་སྟེ། གྲོང་དང༌། དུར་ཁྲོད། ཚོང་འདུས་དང༌། ཀུན་དགའ་ར་བ། རྒྱལ་པོའི་ཕོ་བྲང་ལ་སོགས་ཆགས་སྡང་སྐྱེ་བའི་ཡུལ་སྣ་ཚོགས་སུ་རྒྱུ་ཞིང༌། བདེ་སྡུག་གི་རོ་ཐམས་ཅད་ཆོས་ཉིད་དུ་མཉམ་མོ། །དེས་སྐྱོན་ཐམས་ཅད་ཆོད་དོ། །རྐྱེན་བཟང་ངན་མེད་པར་ལམ་དུ་བསླངས། སྤང་བླང་མེད་པར་གྲོགས་སུ་འགྱུར་རོ། །དེའི་ཚེ་རང་གི་བྱ་བ་ཐམས་ཅད་ཡོངས་སུ་རྫོགས་པས། གཞན་དོན་དུ་ཅི་འགྲོ་འབའ་ཞིག་བྱ་སྟེ༑ གང་དུ་འདུག་ཀྱང་གཞལ་ཡས་ཁང༌། སུ་དང་འགྲོགས་ཀྱང་ཡི་དམ་ལྷ། ལས་ཇི་ལྟར་བྱས་ཀྱང་བྱང་ཆུབ་ལམ་ཡིན་པས་ན། ཕྱོགས་སུ་ལྷུང་བའི་སྤྱོད་པ་ལས་རྣམ་པར་རྒྱལ་ནས། ཅི་བདེ་བའི་སྤྱོད་པའི་སྒོ་ནས་སེམས་ཅན་གྱི་དོན་དུ་འགྱུར་བའོ། །ཨྠིྀ། ན་མོ་རཏྣ་གུ་རུ། ལུས་མེད་རྡོ་རྗེ་མཁའ་འགྲོ་ཡི། །ཆོས་སྐོར་དགུ་ཡི་གདམས་པ་ལས། །དམ་རྫས་རྟོགས་པའི་ཉི་མ་འདེ། །ཞེས་པའི་དོན་དམ་རྫས་ནི་དབང་བཞིའི་དམ་རྫས་ཏེ། ལམ་ཕྱག་རྒྱ་བཞིའི་དུས་སུ་བརྟེན་པའོ། །དེ་ལ་བུམ་དབང་གི་དམ་རྫས་ནི། བསྐྱེད་རིམ་ལྷ་སྒོམ་པའི་དུས་སུ་བརྟེན་པ་སྟེ། ཡི་དམ་གང་ཡིན་གྱི་ཐང་སྐུ་དང༌། རུས་པའི་རྒྱན་བརྟེན་པ་སྟེ། དེ་ཡང་རབ་གནས་དང་ལྡན་པ་གལ་ཆེའོ། །གསང་བའི་དབང་གི་དམ་རྫས་ནི། རྫོགས་རིམ་རླུང་སྒོམ་པའི་དུས་སུ་བརྟེན་པ་སྟེ། ཤ་ལྔ་དང་བདུད་རྩི་ལྔ་བརྟེན་པའོ། །དེའང་བྱིན་གྱིས་མ་བརླབས་ན་ཁྱི་ཕག་དང་འདྲ་བས། བྱིན་གྱིས་བརླབས་པའི་རིལ་བུ་བརྟེན་ནོ། །དེ་ལྟ་བུར་བྱིན་གྱིས་བརླབས་པའི་ཐབས་ནི། ཚུལ་དང་མཐུན་པའི་མཎྜལ་སིནྡྷུ་ར་དང་ཆང་གིས་དམར་པོར་བྱུགས་ལ། མཉྫིའི་ཁར་ཐོད་པ་དུམ་བུ་གཅིག་པའམ་ལྔ་པ་དགོད། དེའི་དབུས་སུ་ཡབ་ཀྱི་བྱང་སེམས་དཀར་པོ་ཅོང་ཞིས་གཏའ་བྱས་པའི་རིལ་བུ། ཤར་དུ་དྲི་ཆེན་ཨ་རུ་རས་གཏའ་བྱས་པའི་རིལ་བུ། ལྷོར་ཤ་ཆེན་ལ་ཙནྡན་གྱིས་གཏའ་བྱས་པའི་རིལ་བུ། ནུབ་ཏུ་ཡུམ་གྱི་རཀྟ་སིནྡྷུ་རས་གཏའ་བྱས་པའི་རིལ་བུ། བྱང་དུ་དྲི་ཆུ་གུ་གུལ་དཀར་པོས་གཏའ་བྱས་པའི་རིལ་བུ་རྣམས་བཞག་ཅིང༌། དེ་རྣམས་ཀྱི་བར་དུ་འབྲས་བུ་གསུམ། ཚ་བ་གསུམ། བཟང་པོ་དྲུག་ཅུང་ཟད་རེ་བཞག་གོ །དེ་ནས་མཎྜལ་གྱི་མཐར་གཏོར་མ་དང༌། ཆང་བུ་དེ་དང་རཀྟ་དང་སྣ་ལྔའི་མཆོད་པ་དང༌། ཚོགས་རྣམས་བཤམས་ལ། རྡོ་རྗེ་མཁའ་འགྲོའི་ཏིང་འཛིན་དུ་ཞུགས་ནས། གུ་གུལ་གྱིས་དམ་རྫས་ལ་བདུག་ཅིང༌། སྲུང་བའི་འཁོར་ལོས་མཚམས་བཅད་དེ། ཧཱུྃ་བཞི་པས་བགེགས་བསྐྲད་དོ། །དེ་ནས་སྐྱབས་འགྲོ་སེམས་བསྐྱེད་ཚངས་པའི་གནས་བཞིའི་མཐར། བླ་མའི་རྣལ་འབྱོར་བསྒོམས་ནས་འདུན་རྣམ་དག་གིས་ཚོགས་བསགས་ཤིང༌། དབང་བཞི་ཞུས་ནས། རང་ཡི་དམ་གང་ཡིན་པའི་མངོན་རྟོགས་བསྒོམས་ལ༑ བསྙེན་པ་ཅུང་ཞིག་བསྐྱལ་ལོ། །དེ་ནས་བྷནྡྷའི་ནང་གི་བདུད་རྩི་ལྔའི་སྟེང་དུ་ཤ་ལྔ་བསྣན་ཏེ། དབུས་སུ་མི། ཤར་དུ་བ་གླང༌། ལྷོར་ཁྱི། ནུབ་ཏུ་རྟ། བྱང་དུ་གླང་པོ་ཆེའི་ཤའོ། །དེའི་སྟེང་དུ་སྦྱང་བྱའི་ཡི་གེ་བཀོད་དེ། ན་ཤུ། གོ་བི། ཀུ་མ། ད་ར། ཧ་མུ་དེ་དག་གི་སྟེང་དུ་ཕྱོགས་ཀྱི་རིམ་པ་གོང་ལྟར་ལ། སྦྱང་བྱེད་ཀྱི་ཡི་གེ་བཀོད་དེ། ཧཱུྃ་མཱུྃ། ༀ་ལཱྃ། སྭཱ་མཱྃ། ཨཱཿ པཱྃ། ཧ་ཏཱྃ། རྣམས་དགོད་ལ། རང་ཡི་དམ་ལྷ་ཡབ་ཡུམ་དུ་གསལ་བའི་མཁའ་གསང་བྱིན་གྱིས་བརླབས་ལ། གཉིས་སུ་མེད་པའི་སྦྱོར་བ་བྱས་པས། ཡབ་ཡུམ་གྱི་ཁམས་ལྔའི་དྭངས་མ་ཐིག་ལེ་བྱང་སེམས་ཞུ་ནས། ཡུམ་གྱི་མཁའ་ལ་བབས་ཏེ་སླར་ཡབ་ཀྱི་རྡོ་རྗེས་དྲངས་ནས་རྩ་དབུ་མར་ཞུགས། ཚངས་བུག་ནས་འཕྲོས། འོད་ཟེར་དེས་རིགས་ལྔ་ཡབ་ཡུམ་གྱི་ཐུགས་དམ་བསྐུལ། མདུན་གྱི་ནམ་མཁར་སྤྱན་དྲངས། གཉིས་སུ་མེད་པའི་སྦྱོར་བ་བྱས། དུས་གསུམ་གཤེགས་པའི་མཁའ་སྒོ་ནས་བྱང་སེམས་དཀར་དམར་དུ་ཤར་གྱིས་བབས་ནས། ཤ་ལྔ་བདུད་རྩི་ལྔའི་ཡིག་འབྲུ་རྣམས་ལ་ཕོག །ཡིག་འབྲུ་འོད་དུ་ཞུ་ནས་ཤ་ལྔ་བདུད་རྩི་ལྔ་ལ་ཐིམ་པས། བདུད་རྩི་མུ་ཏིག་དཀར་པོ་དྲི་མ་མེད་པ་དཀར་ལ་དམར་བའི་མདངས་ཆགས་པ་མེར་གྱིས་གྱུར་པར་བསམ་མོ། །སྔགས་ནི། ༀ་ཨཱཿ ཧཱུྃ་སྭཱ་ཧཱ་ཀུཎྜ་ལི་མ་ཧཱ་པཉྩ་མུཾ་ཨ་མྲ?་ཏ་ཧཱུྃ། ཞེས་ཐུན་རེ་རེ་ལ་སྟོང་སྟོང་བཟླའོ། །ཐུན་བཞིར་ཉམས་སུ་བླང༌། ཐུན་ཐ་མ་ལ་གཏོར་མ་བཏང་ཞིང་ཚོགས་བྱའོ། །དེ་ལྟར་ཐུན་བཞིར་ཉམས་སུ་བླངས་ཏེ། ཏིང་ངེ་འཛིན་སྔ་མ་ཁོ་ན་བཞིན་བྱའོ། །དེ་ལ་རྟགས་བདུད་རྩི་ལྔ་ལ་དུ་བ་འཐུལ་བའམ། དྲི་ཞིམ་པོ་འབྱུང་ངོ༌། །དེ་ཙ་ན་དངོས་གྲུབ་བླངས་ཕྱིར་སྐུ་གསུང་ཐུགས་ཀྱི་གནས་སུ་གཏུགས་ཏེ། རྫས་དེ་རྣམས་བསྡུས་ནས་ཆང་དང་སྦྱར་ཏེ་རིལ་བུ་སྲན་མ་ཙམ་བྱས་ལ་ལྕགས་ཀྱི་སྣོད་དུ་བཅངས། དེ་ལུས་ལ་བརྟེན་ན་ལྷ་དང་མཁའ་འགྲོ་རང་བཞིན་གྱིས་འདུ། ཁོང་དུ་ཟོས་ན་དཔའ་བོ་མཁའ་འགྲོ་མཉེས་ཞིང་རྩ་རླུང་ལས་སུ་རུང་བར་འགྱུར་རོ། །ཤེས་རབ་ཡེ་ཤེས་ཀྱི་དབང་གི་དམ་རྫས་ཕྱག་རྒྱ་མཚན་ལྡན་བསྟེན་ཞིང༌། གལ་ཏེ་དངོས་སུ་བསྟེན་པར་མ་ནུས་ན། ཡེ་ཤེས་ཀྱི་ཕྱག་རྒྱ་བསྟེན་ཅིང༌། ལས་ཀྱི་ཕྱག་རྒྱ་ཡང་སྤང་བློ་མ་སྐྱེ་བ་རེ་བྱའོ། །དབང་བཞི་པ་ཕྱག་རྒྱ་ཆེན་པོའི་དམ་རྫས་སུ། བླ་མའི་གདམས་ངག །གནས་ལུགས་ཀྱི་དྲན་པ་མ་ཡེངས་པར་བསྟེན་པར་བྱའོ། །ཨྠིྀ། ན་མོ་རཏྣ་གུ་རུ། ལུས་མེད་རྡོ་རྗེ་མཁའ་འགྲོ་ཡི། །ཆོས་སྐོར་དགུ་ཡི་གདམས་པ་ལས། །རིག་པ་ཡེ་ཤེས་སྒྲོན་མེ་བལྟམས། །ཞེས་པའི་དོན་ལ་གསུམ་སྟེ། གཞི་རིག་དང༌། ལམ་རིག་དང༌། འབྲས་བུའི་རིག་པའོ། །གཞི་རིག་པ་ནི། དབང་བཞིའི་གདམས་པ་སྟེ། རྒྱུ་སེམས་ཅན་གྱི་དུས་ན། འཁྲུལ་པ་རང་ག་མའི་སྣང་བ་འདི་ཀ་ཡེ་ནས་སྐུ་དང་ཡེ་ཤེས་ཀྱི་ངོ་བོར་སངས་རྒྱས་པ་ཡིན་ཀྱང༌། དེ་ལྟར་ངོ་མ་ཤེས་པ་ལ། དབང་བཞིའི་དུས་སུ་སྨིན་ཅིང་རིག་པར་བྱས་ཏེ། བུམ་དབང་གི་དུས་སུ་ལྷར་ངོ་སྤྲད་དེ། སྣོད་གཞལ་ཡས་ཁང༌། བཅུད་ལྷ་དང་ལྷ་མོ། ཕུང་པོ་ཁམས་དང་སྐྱེ་མཆེད་ཐམས་ཅད་ལྷའི་ངོ་བོར་ངོ་སྤྲད་པས། ལུས་ཐ་མལ་གྱི་ངོ་བོ་ལས་གྲོལ་ནས་ལྷའི་སྐུར་རིག་གོ །གསང་བའི་དབང་བསྐུར་བས་ངག་ཐ་མལ་དུ་འཛིན་པའི་ རྟོག་པ་ལས་ལོག་ནས། རླུང་འབྱུང་འཇུག་གནས་གསུམ། ཡི་གེ་གསུམ་གྱི་ངོ་བོར་རིག་པར་བྱས་ནས། གཏུམ་མོའི་རྫོགས་རིམ་རླུང་ལམ་དུ་བྱེད། ཤེས་རབ་ཡེ་ཤེས་ཀྱི་དབང་བསྐུར་བས། ཉོན་མོངས་པ་འདོད་ཆགས་རང་རྒྱུད་པའི་རྟོག་པ་ལས་ལོག་ནས། བདེ་སྟོང་ལྷན་ཅིག་སྐྱེས་པའི་ཡེ་ཤེས་སུ་རིག་ཅིང་ངོ་སྤྲད་པར་བྱས་ནས། རྫོགས་རིམ་རྩ་ལམ་དུ་བྱེད་དོ། །དབང་བཞི་པ་བསྐུར་བས་སེམས་ཐ་མལ་གྱི་རྟོག་པ་ཉོན་མོངས་པ་རང་རྒྱུད་པར་འཛིན་པ་དེ་ལས་ལོག་ནས་རིག་པ་དང་སྟོང་པ་གཉིས་སུ་མེད་པ་ཆོས་ཀྱི་དབྱིངས་ཀྱི་ངོ་བོར་རིག་སྟེ། འཁྲུལ་པ་རང་སར་གྲོལ་ནས། དག་པ་ཡེ་ཤེས་ཀྱི་སྣང་བ་ལ་ལོངས་སྤྱོད་པར་བྱེད་དོ། །དེས་ན་འཁོར་བ་བྱ་བ་ཡེ་ནས་མ་གྲུབ་ཀྱང༌། སྐྱེས་བུས་ལོག་པར་རྟོག་པས་སྡུག་བསྔལ་ཉམས་སུ་མྱོང་བ་ལ་བླ་མས་ངོ་སྤྲད་པས། ཡིན་ལུགས་བཞིན་རིག་པའོ། །ཨྠིྀ། ན་མོ་རཏྣ་གུ་རུ། ལུས་མེད་རྡོ་རྗེ་མཁའ་འགྲོ་ཡི། །ཆོས་སྐོར་དགུ་ཡི་གདམས་པ་ལས། །རྩ་རླུང་དྲྭ་མིག་འཁོར་ལོ་བསྐོར། །ཞེས་པའི་དོན་ནི། སྤྱིར་ལུས་མགོ་མཇུག་ན་རྩ་ཉི་ཁྲི་ཆིག་སྟོང༌། དེ་ལས་བསྡུས་པའི་རྩ་སྟོང་ཕྲག་བདུན་བཅུ་རྩ་གཉིས། དེ་ལས་བསྡུས་པའི་རྩ་བརྒྱད་གསུམ་ཉི་ཤུ་རྩ་བཞི། དེ་ལས་བསྡུས་པའི་རྩ་གཙོ་མོ་གསུམ་མོ། །དེ་ཡང་རྩ་གང་ན་གནས་པ་ན་རླུང་གནས། རླུང་གང་ན་གནས་པ་ན་ཐིག་ལེ་གནས། ཐིག་ལེ་གང་ན་གནས་པ་ན་སྤྲོས་མེད་ལྷན་ཅིག་སྐྱེས་པའི་ཡེ་ཤེས་གནས་སོ། །དེ་ལྟར་རྩ་ཐམས་ཅད་དྲྭ་བ་ལྟར་འབྲེལ་ཞིང༌། ནུས་པ་རེའུ་མིག་སོ་སོར་གནས་སོ། །དེ་ཡང་རྩ་ལས་སུ་རུང་བ་བྱེད་པ་ལ་རླུང་དགོས་ལ། རླུང་གི་ལས་ལ་དབྱེ་བ་བདུན་གནས་ཏེ། བུམ་པ་ཅན་དང༌། ཞབས་ཚགས་ཅན་དང༌༑ དཔྱང་ཐག་ཅན་དང༌། མདའ་ལྟར་འཕང་དང༌། རེའུ་མིག་ཅན་དང༌། འཁོར་ལོ་ཅན་དང༌། སྲོག་ཤིང་ཅན་ནོ། །དེ་ཡང་བུམ་པ་ཅན་གྱིས་འོག་རླུང་འཛིན་པས་ཐིག་ལེ་འཛིན་པ་དང༌། དྲོད་སྤོར་བའི་ལས་བྱེད་དོ། །ཞབས་ཚགས་ཅན་གྱིས་རླུང་ནད་སེལ་བ་དང༌། གསང་བའི་དབང་བསྐུར་བའི་དུས་སུ་ཐིག་ལེ་གཏོང་བའི་ལས་བྱེད་དོ། །དཔྱང་ཐག་ཅན་གྱིས་གསང་བའི་གནས་ནས་ཐིག་ལེ་གྱེན་ལ་སྡོམ་པའི་ལས་བྱེད་དོ། །དེ་ནི་ཡི་གེ་ཧཱུྃ་ལུས་གནད་བཅས་པས་དྲག་ཏུ་འཐེན་པའོ། །མདའ་ལྟར་འཕང་བས་སྟེང་འོག་གི་རླུང་དྲག་ཏུ་གཅུན་ནས། ཐིག་ལེ་རྩ་མིག་ཏུ་མདའ་ལྟར་འཕེན་པ་སྟེ། ཐིག་ལེ་འགྲེམ་པའི་ལས་བྱེད་དོ། །རེའུ་མིག་ཅན་གྱིས་ཚ་བའི་ནད་སེལ་བ་སྟེ། ལུས་གང་ན་བའི་སར་བུག་པ་ཟང་ཐལ་བསམས་ནས། སྟེང་གི་རླུང་བཅུད་ལ་བོར་བས། ནད་ཁྲག་ངན་བཞིན་དུ་རྒྱང་རྒྱང་ཐོན་པར་བསམ་མོ། །འཁོར་ལོ་ཅན་གྱིས་གྲང་བའི་ནད་ལ་ཕོ་བའི་ནང་དུ་སྟེང་འོག་གི་རླུང་བཅུད་ལ་བོར་ནས། ཕོ་བའི་རླུང་སྟེང་འོག་དྲག་པོ་བསྒོམས་པས། ཐང་སྟོང་ལ་རླུང་བྱུང་ནས་སྦུར་མ་གཏོར་བ་བཞིན་དུ། ནད་ཐམས་ཅད་བསྡུས་དཀྲུགས་གཏོར་ནས་ཕོ་བ་སྟོང་སངས་ཀྱིས་སོང་བར་བསམ་ལ། སྲོག་ཤིང་ཅན་ནི། རླུང་གི་བྱ་བ་མདོར་བསྡུས་པ་སྟེ། རླུང་ཐམས་ཅད་རྩ་དབུ་མའི་ནང་དུ་ཆུད་པར་བྱེད་པའོ། །དེས་ནི་གསལ་སྟོང་གི་ཉམས་ནམ་མཁའ་ལྟ་བུར་འཆར་རོ། །དེ་ལ་བརྟེན་ནས་ཕྱག་རྒྱ་ཆེན་པོ་གཤིས་མ་བཅོས་པའི་དོན་རྟོགས་པར་འགྱུར་རོ། །ཨྠིྀ། ན་མོ་རཏྣ་གུ་རུ། ལུས་མེད་རྡོ་རྗེ་མཁའ་འགྲོ་ཡི། །ཆོས་སྐོར་དགུ་ཡི་གདམས་པ་ལས། །རོ་སྙོམས་ཕྱི་ཡི་མེ་ལོང་ལྟོས། །ཞེས་པའི་དོན་ནི། སྤྱིར་ཆོས་ཉིད་སྐྱེ་བ་མེད་པའི་ངང་ལས་མ་གཡོས་བཞིན། ཆོས་ཅན་སྣང་བའི་རྩལ་སྣ་ཚོགས་སུ་ཤར་བ། སྟོང་པའི་རང་རྩལ་རྨི་ལམ་སྒྱུ་མ་ལྟ་བུ་ཡིན་པར་མ་ཤེས་པར། དངོས་པོ་རང་རྒྱུད་པར་བཟུང་ནས། དེ་ལ་ཆགས་སྡང་སྐྱེས། དེས་ལས་བསགས་ནས་འཁོར་བར་འཁྱམས་པ་ཡིན་པས། འདིར་དེ་ལས་ལོག་ནས། ཆོས་ཅན་ཡུལ་རྣམ་པ་སྣ་ཚོགས་སུ་ཤར་བ་དང༌། ཆོས་ཉིད་རང་བཞིན་གྱིས་སྤྲོས་བྲལ་གཉིས་སྣང་སྟོང་དབྱེར་མེད་སྒྱུ་མ་ལྟ་བུར་རོ་མཉམ་པས། དངོས་པོའི་བདེན་འཛིན་ཞིག་ནས་ལས་མི་གསོག་པའི་ཕྱིར། འཁོར་བར་འཁྱམས་དོན་མེད་དོ། །དེ་རོ་ཇི་ལྟར་སྙོམས་པ་གསུམ་གྱི་དང་པོ་ཚོགས་དྲུག་ཡུལ་གྱི་འཁྲུལ་སྣང༌། སྣང་སྟོང་ཞེན་མེད་དུ་རོ་སྙོམས་པ་ནི། ད་ལྟ་དབང་པོ་སྒོ་ལྔའི་ཡུལ་ན༑ གཟུགས་དང་སྒྲ་ལ་སོགས་པའི་ཡུལ་རྣམ་པ་སྣ་ཚོགས་སུ་ཤར་ཡང༌། ཕྱི་རོལ་ན་གྲུབ་པ་གཅིག་ཀྱང་མེད་པས། དེ་རྨི་ལམ་གྱི་ལྟས་མོ་ལྟར། རང་གི་སེམས་འཁྲུལ་པའི་གཟུགས་བརྙན་དུ་ཐག་བཅད། དེས་གཟུང་བ་རང་བཞིན་མེད་པར་ཤེས། ནང་ཤེས་པ་ལ་འགྱུ་བྱེད་ཀྱི་རྟོག་པ་སྣ་ཚོགས་སུ་ཤར་ཡང༌། སེམས་ཉིད་སྟོང་པ་ལ་དངོས་པོ་དང་ངོས་བཟུང་བ་མེད། རྟོག་པ་ལ་དངོས་པོ་དང་ངོས་བཟུང་མེད། རྟོག་པ་ཐམས་ཅད་སེམས་དྭངས་པ་ཡུལ་གྱི་གཟུགས་བརྙན་དུ་ཤར་བ་ཡིན། མེ་ལོང་ལ་ཟ་འོག་གི་གུར་ཁྱིམ་འཆར་བ་ལྟར། སྟོང་པའི་རི་མོ་ལ་དཔྱད། དེས་འཛིན་པ་ཐམས་ཅད་སྤྲོས་པ་དང་བྲལ་བར་ཤེས། དེས་གཟུང་འཛིན་གྱི་སྐུང་གཏིབས་པས༑ འཁོར་བའི་རྨང་རྡོ་ཞིག་ནས། ལས་ཀྱིས་ཁ་བསྒྱུར་དུ་མེད་དོ། །གཉིས་པ་བག་ཆགས་གཉིད་ཀྱི་འཁྲུལ་སྣང་རིག་སྟོང་རྟེན་འབྲེལ་དུ་རོ་སྙོམས་པ་ནི། རྨི་ལམ་གྱི་སྣང་བ་ཐམས་ཅད་བདེན་པར་གྲུབ་པ་མེད་ཀྱང༌། རང་རིག་འཁྲུལ་པའི་སྣང་བ་ལ་བག་ཆགས་ཀྱི་ལིང་བཏབ། འཁོར་བ་བརྒྱུད་མར་འཁོར་བ་ཡིན་པས། འདིར་གཏི་མུག་ཡེ་ཤེས་སུ་གྲོལ་བར་བྱ་བའི་ཕྱིར། གཉིད་དང་རྨི་ལམ་གྱི་གདམས་པ་ཉམས་སུ་བླངས་ཏེ། དང་པོ་ཉིན་པར་གྱི་སྣང་བ་འདི་ཐམས་ཅད་ཀྱང་རྨི་ལམ་ཡིན་ངེས་སྙམ་དུ་དྲན་པས་བཟུང༌། གཉིད་ཉལ་ཁར་རྨི་ལམ་དུ་ཤེས་པར་བྱ། ངོ་ཤེས་ནས་ཀྱང་རང་གི་དགེ་སྦྱོར་ལ་གནས་པར་བྱ་སྙམ་དུ་འདུན་པ་དྲག་པོ་ལན་མང་དུ་བཏང་ལ༑ མགྲིན་པ་ལོངས་སྤྱོད་ཀྱི་འཁོར་ལོར་ཐིག་ལེ་དམར་པོ་སྲན་མ་ཙམ་ལ་སེམས་གཏད་ལ་ཉལ་ལོ། །དེ་ནས་གཉིད་ལོག་པ་དང་རྨི་ལམ་རྨི་བའི་ཚེ། འདི་རྨི་ལམ་ཡིན་ངེས་སྙམ་དུ་ངོ་ཤེས་པས་རང་འཁྲུལ་ངོས་ཟིན། ཉིན་པར་གྱི་སྣང་བ་ལ་བདེན་འཛིན་འཇིག་གོ །རང་ལམ་གང་ལ་གནས་པའི་དགེ་སྦྱོར་གསལ་ཐེབས་པས་ལས་ཀྱི་རྒྱུན་པ་ལ། དེས་བར་དོ་ལ་ཐེ་ཚོམ་མི་ཟའོ། །གསུམ་པ་བར་དོ་ལས་ཀྱི་འཁྲུལ་སྣང་ཆོས་སྐུ་འོད་གསལ་དུ་རོ་སྙོམས་པ་ནི། ནམ་འཆི་བའི་ཚེ་བླ་མ་ལ་གསོལ་བ་བཏབ་ཅིང༌། བར་དོ་ལ་བར་དོ་ངོ་ཤེས་པར་བྱ་སྙམ་དུ་འདུན་པ་དྲག་པོ་བཏང༌། ཕྱིའི་དབུགས་ཆད་ནས་ནང་དབུགས་མ་ཆད་ཙམ་གྱི་བར་དེར། འགྲོ་བ་ཀུན་ལ་ཆོས་སྐུ་འོད་གསལ་རྗེན་པར་འཆར། འདི་ལ་འོད་གསལ་གོམས་པ་རྣམས་ཀྱིས། འཆི་བའི་འོད་གསལ་ངོས་ཟིན་ནས་དེ་ཉིད་དུ་སངས་རྒྱའོ། །འདི་ལ་མ་གོམས་པ་རྣམས་ཀྱིས་ངོས་མ་ཟིན་པས་ནང་དབུགས་ཤོར་བ་དང་བར་དོའི་འཁྲུལ་སྣང་འཆར་ཏེ། ཐོ་སྐོར་གྱི་མི་འདུས་པ་དང༌། ལྟོ་སྐལ་ཆད། མལ་ས་ཕྱགས། ཕུང་པོ་དོར། ཤི་བར་ངོ་ཤེས་འོང༌། དེའི་དུས་སུ་འདི་བར་དོར་འདུག་སྙམ་ནས་བླ་མ་དང་གདམས་ངག་དྲན་ནས། ལམ་འོད་གསལ་ལ་གསལ་བའི་ཉམས་དྲན་པས་འབྲས་བུ་མངོན་དུ་བྱེད་དེ། བསྐྱེད་རིམ་ལ་གོམས་པ་ཡིན་ཏེ། ཡི་དམ་གང་ཡིན་གྱི་སྐུར་སངས་རྒྱའོ། །རྫོགས་རིམ་ཉམས་སུ་བླངས་པ་ཡིན་ན། བར་དོ་འོད་ཀྱི་ལུས་ཀྱིས་མཁའ་སྤྱོད་དུ་འགྲོ། ཕྱག་རྒྱ་ཆེན་པོའི་དོན་རྟོགས་པ་ཞིག་ཡིན་ན་ཡུམ་ཆོས་ཀྱི་དབྱིངས་ལ་རིག་པའི་ཡེ་ཤེས་ཐིམ་ནས་ཆོས་སྐུར་གྲོལ་བར་འགྱུར་རོ། །ཨྠིྀ། ན་མོ་རཏྣ་གུ་རུ། ལུས་མེད་རྡོ་རྗེ་མཁའ་འགྲོ་ཡི། །ཆོས་སྐོར་དགུ་ཡི་གདམས་པ་ལས། །རང་གྲོལ་ཕྱག་རྒྱ་ཆེན་པོ་བསྒོམ། །ཞེས་པའི་དོན། ཤེས་བྱ་གཤིས་ཀྱི་འདུག་ཚུལ། སེམས་ཉིད་དངོས་པོའི་གནས་ལུགས། སངས་རྒྱས་དང་སེམས་ཅན་གཉིས་སུ་མེད་པར་གནས་པ་ཡིན་ཀྱང༌༑ སྟོང་པའི་རྩལ་རིག་པར་ཤར། རིག་པའི་རྩལ་སྣང་བར་ཤར། རང་སྣང་ལ་རང་འཁྲུལ་ནས། ཡུལ་ལ་དངོས་པོར་བཟུང༌། རང་རིག་རང་ངོ་མ་ཤེས་པས། རང་སེམས་འཛིན་པར་ཤར། གཟུང་འཛིན་གྱིས་འཁོར་བའི་རྨང་རྡོར་བཅུག །སྡུག་བསྔལ་གྲ་རྒྱས་པ་ཐག་པ་སྦྲུལ་དུ་འཁྲུལ་བ་ལྟ་བུ་སྟེ། ལ་ལས་སྤོང༌། ལ་ལས་སྤྱོད། ལ་ལས་བསྒྱུར་ཀྱང༌། ཡིན་ལུགས་ཀྱི་སྟེང་དུ་མ་ཕེབས་པས། འཁྲུལ་པ་རང་སར་གྲོལ་བར་མ་ནུས་ཏེ། ནད་དང་དཔྱད་འཛོལ་བ་ལྟ་བུ་ཡིན་ནོ། །ད་རེས་འདིར་འཁྲུལ་པ་རང་སར་གྲོལ་བར་བྱེད་པ་ཕྱག་རྒྱ་ཆེན་པོའི་དོན་ཡིན་ནོ། །འདི་ལ་གདམས་པའི་གནད་གསུམ་གྱི་དང་པོ་གཟུང་འཛིན་གྱི་རྩ་བ་བཅད་པ་ནི། བདེ་བའི་གདན་ལ་ཅི་བདེ་བར་འདུག་སྟེ། རང་ཡི་དམ་གྱི་ལྷའི་ང་རྒྱལ་གྱིས། སྤྱི་བོར་བླ་མ་བསྒོམས་ལ་གསོལ་བ་གདབ། སྣང་སྲིད་འཁོར་འདས་ཀྱི་ཆོས་ཐམས་ཅད་ཕྱི་རོལ་དང་དོན་ལ་སོགས་པ་གྲུབ་པ་མེད་དེ། རང་སེམས་འཁྲུལ་པའི་སྣང་བ་རྨི་ལམ་གང་ལ་ཐག་རྦད་ཀྱིས་བཅད་དོ། །འོ་ན་སེམས་བྱ་བ་གཅིག་ཡོད་དམ་སྙམ་ན། སེམས་ཀྱང་དྲན་ཙམ། རིག་ཙམ། བཏགས་པ་ཙམ་ཡིན་ཏེ། ཡང་དག་ཏུ་མ་གྲུབ་པར་ཤེས་པར་བྱ། དེ་ཡང་སེམས་ཀྱིས་སེམས་ལ་བལྟས་པས་དབང་པོ་དྲུག་གི་ཡུལ་ལས་འདས་ཞིང༌། ཅིའི་ངོ་བོར་ཡང་མ་གྲུབ་པ་ནམ་མཁའ་དྭངས་པའི་དཀྱིལ་ལྟ་བུར་ཤེས་པར་བྱའོ། །གཉིས་པ་འཁྲུལ་སྣང་གི་ཡལ་ག་བྲེགས་པ་ནི། དེ་ལྟར་གཟུང་འཛིན་གཉིས་མ་གྲུབ་པར་ཤེས་པ་དེའི་ངང་ལ་བལྟ་བྱ་ལྟ་བྱེད་དམ། བསྒོམ་བྱ་སྒོམ་བྱེད་ཀྱི་ཤེས་པ་ཐམས་ཅད་དང་བྲལ་ཏེ། སེམས་མ་བཅོས་པར་རང་བབས་སུ་ལྷན་ནེ་འཇོག་པའོ། །གསུམ་པ་རིག་པ་དབྱིངས་སུ་བསྟིམ་པ་ནི། སེམས་རང་སར་མི་གནས་པར། ཡུལ་ལ་རྟོག་པ་འཕྲོ་བའི་དུས་སུ། ཡུལ་རྟོག་དེ་དགག་ཀྱང་མི་དགག །རང་རྒྱུད་པར་ཡང་མི་གཟུང༌། རྗེས་སུ་ཡང་མི་འཛིན་པར། དྲན་པའི་མེལ་ཚེས་ཡུལ་རྟོག་དེ་ཉིད་ཀྱི་རང་བཞིན་ལ་ཅེར་ཅེར་བལྟས་པས། སྨིག་རྒྱུའི་འཁྲུལ་པ་བདས་པས་གཏོར་བ་ལྟར། རང་བཞིན་མེད་པར་རྗེན་ནེ་གྲོལ་ནས་འགྲོའོ། །དོན་དེ་ལྟ་བུ་ལ་ཡང་ནས་ཡང་དུ་གོམས་པར་བྱས་པས། འཁྲུལ་པ་ཐམས་ཅད་རང་སར་གྲོལ་བ་ནི་ཆབ་རོམ་ཆུར་ཞུ་ཞིང་ཐིམ་པ་བཞིན་ནོ། །ཨྠིྀ། ན་མོ་རཏྣ་གུ་རུ། ལུས་མེད་རྡོ་རྗེ་མཁའ་འགྲོ་ཡི། །ཆོས་སྐོར་དགུ་ཡི་གདམས་པ་ལས། །བདེ་ཆེན་གསུང་གི་རིན་ཆེན་ཟུང༌། །ཞེས་པའི་དོན། ལུས་ཀྱི་རྩ་ས་ཡ་ཕྲག་བཅུ་གསུམ་འདུས་པའི་བཅུད། ཐིག་ལེ་བྱང་ཆུབ་ཀྱི་སེམས་ཀུནྡྷ་ལྟ་བུའོ། །དེ་ལ་ཅིའི་ཕྱིར་བདེ་ཆེན་ཞེས་བྱ་ན། རྩ་ནུས་ལྡན་གྱི་སྟེང་དུ་ཐིག་ལེ་བྱང་ཆུབ་ཀྱི་སེམས་ཕེབས་ནས། ཐབས་དང་མི་ལྡན་པ་ལ་ཟག་བཅས་ཀྱི་བདེ་བ་སྐྱེ་བ་ལ། ཐབས་དང་ལྡན་པ་ལ་ཟག་མེད་ཀྱི་བདེ་བ་ཆེན་པོ་སྐྱེ་བའི་ཕྱིར་བདེ་ཆེན་ནོ། །གསུང་གི་ཞེས་པ་ནི་རླུང་ངོ༌། །དེ་ཡང་ཐིག་ལེ་འཕེན་སྡུད་བྱེད་པ་རླུང་གི་ལས་སོ། །རིན་ཆེན་ཇི་ལྟར་འདོད་པ་འབྱུང་བ་སྟེ། ཐབས་དང་མི་ལྡན་པའི་ཐ་མལ་པ་རྣམས་ཀྱིས་ཉོན་མོངས་པ་རང་རྒྱུད་པའི་བདེ་བ་ལ་སྤྱད་པས། འཁོར་བའི་ཆོས་འགྲུབ་པར་བྱེད་ལ། ཐབས་དང་ལྡན་པའི་རྣལ་འབྱོར་པ་རྣམས་ཀྱིས་དབབ་གཟུང་ཟློག་དང་འགྲེམ་པའི་གནད་ཀྱིས། ཟག་པ་མེད་པའི་བདེ་བ་ལ་ལོངས་སྤྱད་པས། ཐུན་མོང་གི་དངོས་གྲུབ་ཐོབ། མྱ་ངན་ལས་འདས་པའི་བདེ་བ་ལ་ལོངས་སྤྱོད་པའོ། །ཟུང་ཞེས་པ་ནི། ཐིག་ལེ་བསྲུང་བའི་དོན་ཏེ། ཁམས་ལྔའི་དྭངས་མ་ཞུ་བའི་ཐིག་ལེ་ཉམས་ན༑ ཡོན་ཏན་གྱི་འཆར་སྒོ་འགགས་པ་ཡིན་པས། ཐབས་དང་ལྡན་པ་རྣམས་ཀྱིས་རྟེན་མ་ཉམས་པར་བྱའོ། །རྟེན་ལ་ཡང་རིགས་གསུམ་སྟེ། ཐ་མལ་གྱི་རྟེན་ནི། ཆང་བཙགས་ཀྱི་སྦང་མ་དང་འདྲ་སྟེ། རྟེན་ཉམས་པ་ནི་ལུས་ལ་ནུས་པ་མེད་པ་ཡིན་ནོ། །སོ་སོར་ཐར་པའི་སྡོམ་པ་ལ་གནས་པ་རྣམས་ནི། རྟེན་མ་ཉམས་པའི་ལུས་ནུས་ལྡན་དུ་གནས་ཀྱང༌། ས་བོན་སྣོད་དུ་ལུས་པའམ། རི་དྭགས་ཀྱི་རྩི་དང་འདྲ་སྟེ། ཐབས་ཁྱད་པར་ཅན་དང་མི་ལྡན་པས་ཡོན་ཏན་སྐྱེ་བར་མི་ནུས་སོ། །གསང་སྔགས་ཐབས་ཁྱད་པར་ཅན་དང་ལྡན་པའི་གདམས་ངག་རྣམས་ནི། རྟེན་ནུས་མཆོག་ཏུ་གྱུར་པ་ཡིན་ཏེ། ལྗོན་ཤིང་ས་ལ་བཙུགས་ནས་ཆུ་ལུད་བྲན་པ་ལྟ་བུའོ། །དེ་ཡང་ས་གཞི་དང་འདྲ་བ་ནི་ཕྱག་རྒྱ་མཚན་ལྡན་ནོ། །ལྗོན་ཤིང་གི་རྩ་བ་འབྲས་བུའི་འབྲས་བུ་ལྟ་བུ་ནི་ཐིག་ལེའོ། །ཆུ་ལུད་བྲན་པ་ལྟ་བུ་ནི་ཐིག་ལེ་བཞུ་བཏུལ་བྱེད་པའོ། །ཤིང་ལས་སྡོང་པོ་དང༌། ཡལ་ག་ལས་མེ་ཏོག་དང་འབྲས་བུ་རྒྱས་པ་ལྟ་བུ་ནི་ཐིག་ལེ་ལས་སུ་རུང་བ་ལ་མཆོག་ཐུན་མོང་གི་དངོས་གྲུབ་ཐོབ་པར་བྱེད་པའོ། །དེ་ལྟར་ཐིག་ལེ་གཟུང་བའི་ཐབས་ལ་གཉིས་ཏེ། ཆགས་ལམ་པ་ལས་ཀྱི་ཕྱག་རྒྱ་ལ་བརྟེན་ནས་གཟུང་བ་དང༌། གྲོལ་ལམ་པ་ཡེ་ཤེས་ཀྱི་ཕྱག་རྒྱ་ལ་བརྟེན་ནས་གཟུང་བའོ། །དང་པོ་ནི། ཕྱག་རྒྱ་མཚན་ཉིད་དང་ལྡན་པ། དབང་དང་བྱིན་བརླབས་ཀྱིས་རྒྱུད་སྨིན་པར་བྱས་ལ་བདེ་བའི་སྟན་ལ་འདུག་སྟེ། ཡབ་ཡུམ་ལྷའི་ང་རྒྱལ་དང་ལྡན་པས། མཁའ་གསང་བྱིན་གྱིས་བརླབས་ནས། བརྩེ་བ་དང་གདུང་བའི་སྒོ་ནས་རྩའི་ནུས་པ་རྒྱས་པར་བྱས་ལ། དེ་ནས་དལ་བུས་སྙོམས་པར་འཇུག་ཅིང་ཐིག་ལེ་རིམ་པས་ཕབ་ལ། བདེ་སྟོང་གི་ཉམས་ལ་གནས་པར་བྱ། མཐར་བདེ་བ་ཤིན་ཏུ་རྒྱས་ནས། ཐིག་ལེ་ཉམས་སུ་ཉེ་བ་ན། འོག་རླུང་དྲག་ཏུ་འཐེན། རྒྱུ་ཞབས་རྒལ་པ་ལ་སྦྱར་ནས་ཧཱུྃ་ཞེས་དབུ་མའི་ནང་ནས་ཡར་དྲག་ཏུ་དྲངས་ནས། བདེ་ཆེན་གནས་སུ་ལྷན་གྱིས་བསྐྱལ་ལོ། །ཤིན་ཏུ་ཐིག་ལེ་རྒྱས་ནས་མི་ཐུབ་ནས་མ་ཟིན་པར་འཆོར་ན། རྩ་དགག་པའི་སྦྱོར་བ་ལ་འབད་པར་བྱའོ། །དེ་ལྟར་རྩ་ནུས་ལྡན་གྱི་སྟེང་དུ། ཐིག་ལེ་ཕབ་ནས་བདེ་བ་ལ་སྟོང་པས་རྒྱས་བཏབ་ཅིང་བདེ་སྟོང་གི་ཉམས་ཡང་ནས་ཡང་དུ་སྤར་ཤིང༌། མཇུག་རྡོ་རྗེ་སྐྱིལ་ཀྲུང་གིས་སྟེང་འོག་རླུང་ལན་གསུམ་གཅུད་ལ་བོར་ལ། ཐིག་ལེ་གནས་སུ་ཁྱབ་པར་དགྲམ། རྗེས་ལ་ལུས་སེམས་བཅོས་མེད་ཕྱག་རྒྱ་ཆེན་པོའི་ངང་ལ་བཞག་གོ ༑གཉིས་པ་གྲོལ་ལམ་པ་ཡེ་ཤེས་ཀྱི་ཕྱག་རྒྱ་ལ་བརྟེན་པ་ནི། རྣལ་འབྱོར་བདག་ཉིད་ཀྱིས་ཡི་དམ་ལྷ་ཡབ་ཡུམ་གྱི་རྣམ་པ་ཅན་དུ་གསལ་བར་བསྐྱེད་ལ། མཁའ་གསང་བྱིན་གྱིས་བརླབས་ནས། དལ་བུས་སྙོམས་འཇུག་བྱེད་པར་བསམ་ཞིང༌། ལག་པའི་འདུ་བྱེད་ཀྱིས་ཐིག་ལེ་ཕབ། བདེ་བའི་རོ་མྱོང་བ་དང༌། སྟོང་པས་རྒྱས་བཏབ། རྩ་ནུས་ལྡན་གྱི་སྟེང་དུ་ཐིག་ལེ་ཕེབ་པའི་ཚེ། བདེ་སྟོང་གི་ཉམས་ལ་མ་ཡེངས་པར་བྱས་ལ། འོག་རླུང་འཐེན་ལ་ཧཱུྃ་གིས་དྲག་ཏུ་དྲང༌། མིག་ནམ་མཁའ་ལ་བགྲད། ལུས་དྲག་ཏུ་བསྒྲིམ། དེས་ཀྱང་མ་ཟིན་ན་རྩ་དགག་པའི་སྦྱོར་བ་བྱ། དེ་ནས་སྔར་བཞིན་དུ་ཐིག་ལེ་དགྲམ་པ་དང༌། རྗེས་མ་བཅོས་པར་འཇོག་པ་རྣམས་བྱའོ། །ལུས་མེད་མཁའ་འགྲོའི་གསང་བའི་ཚིག །ཆོས་སྐོར་དགུ་ཡི་གདམས་པ་འདི། །ཏེ་ལོ་ཞེས་བྱའི་རྣལ་འབྱོར་པས། །ཚངས་པའི་གསུང་རང་ཡི་གེར་བཏབ། །འཕྲི་བསྣན་མེད་པ་གནད་ཀྱི་གསང༌། །གཅིག་བརྒྱུད་དག་ཏུ་གདམས་པ་ཡིན། །ཡང་དག་པ་ཡི་གདམས་པ་ཟབ། །ཨྠིྀ། རྒྱ་གར་གྱི་གྲུབ་ཐོབ་ཏི་ཕུ་བ་གསང་སྔགས་སྡོང་པོ་ལ། བོད་ཀྱི་རྣལ་འབྱོར་པ་རས་ཆུང་རྡོ་རྗེ་གྲགས་པས་ཞུས་ཤིང་བོད་དུ་སྤྱན་དྲངས་པའོ།། །།