DNZ-18-TSHA-010

Previous Text Back to Volume PageNext Text

The Profound One Hundred and Eightfold Guidebooks		Rigpe Dorje Publications, 2024
Wylie title	zab khrid brgya dang brgyad kyi yi ge
Location	gdams ngag rin po che'i mdzod Volume 18, Text 10, Pages 199-481 (Folios 1a1 to 142a4)
Author	ཀུན་དགའ་གྲོལ་མཆོག་
Citation	Kun dga' grol mchog. Zab khrid brgya dang brgyad kyi yi ge. In Gdams ngag rin po che'i mdzod, Vol. 18: 199-481. Kalimpong: Rigpe Dorje Publications, 2024.	Shechen Publications, 1999
Side notes	Recto: zab khrid   Verso: jo nang khrid brgya skor
More details More details
Genre	Contemplative Guide Books and Instructional Manuals - khrid yig
Colophon	།དེ་ལྟར་ཁྲིད་ཚུལ་བརྒྱ་དང་བརྒྱད། །རང་གིས་གང་ལས་གང་ཐོབ་པའི། །ཡི་གེ་ཇི་བཞིན་ཉུང་ངུའི་ཚིག །དོན་ཚང་སྙིང་པོ་ཆ་ཙམ་བཀོད། །ཐུན་མོང་ཐུན་མོང་མིན་པའི་ཁྲིད། །སྤྱི་བསྡོམས་གཅིག་དྲིལ་སྔོན་བཏང་ནས། །དངོས་གཞི་རང་རང་མ་འདྲེས་པའི། །ཁྲིད་རིམ་རྒྱ་མོའི་ཐག་སོའི་དཔེ། །བརྒྱུད་ལྡན་དམ་པ་གོང་མ་ཡི། །དགོངས་པ་ཕན་ཚུན་མ་འཛིངས་པར། །ལུགས་གང་དེ་ལས་རང་བློ་ཡི། །ནན་གྱིས་བཅོས་པའི་དྲི་མ་བྲལ། །སངས་རྒྱས་རྣམ་འཕྲུལ་རྒྱ་བོད་འདིར། །སྔོན་བྱོན་མཁས་གྲུབ་མ་ལུས་པའི། །བཞེད་པའི་ཟབ་གནད་ཀུན་འདུས་པ། །འདི་འདྲ་ཐོས་པ་སྐལ་པ་ཆེ། །ཁོ་བོས་ཟབ་ཁྲིད་རེ་རེ་ནས། །དཀའ་བ་དང་བླངས་བཙལ་བའི་ཆོས། །ཁྱེད་ཅག་ཚེགས་མེད་དུས་གཅིག་ཏུ། །རྣ་བར་ལེན་པ་ངོ་མཚར་རྨད། །སྔ་མའི་བསགས་ཁྱབ་དབང་བྱས་པས། །མི་ཚེ་ཆོས་ཀྱི་སྣང་བས་འདས། །འཚོལ་དང་ཉན་དང་འབྲི་དང་སེམས། །མཐར་ནི་ཡི་གེའི་ལམ་དུ་བྲིས། །རང་གི་ཚེ་རབས་ཕྱི་མ་ཡི། །ཆོས་ཀྱི་བག་ཆགས་གསོ་བྱེད་དང༌། །དུས་འདིར་དོན་གཉེར་དང་ལྡན་འགའ། །སྲིད་ན་དེ་ལའང་ཕན་གྱུར་ཅིག །ཅེས་ཚེགས་ཆུང་ངུས་ཆོས་ཀྱི་གནད་བདེ་བླག་ཏུ་རྟོགས་བྱེད། ཁྲིད་བརྒྱའི་བརྗེད་བྱང་བྲིས་པའི་མཐའ་རྟེན་དུ་གྲོལ་མཆོག་གི་བློ་མཚོ་ལས་སོ། །མངྒ་ལཾ།།
	de ltar khrid tshul brgya dang brgyad/_/rang gis gang las gang thob pa'i/_/yi ge ji bzhin nyung ngu'i tshig_/don tshang snying po cha tsam bkod/_/thun mong thun mong min pa'i khrid/_/spyi bsdoms gcig dril sngon btang nas/_/dngos gzhi rang rang ma 'dres pa'i/_/khrid rim rgya mo'i thag so'i dpe/_/brgyud ldan dam pa gong ma yi/_/dgongs pa phan tshun ma 'dzings par/_/lugs gang de las rang blo yi/_/nan gyis bcos pa'i dri ma bral/_/sangs rgyas rnam 'phrul rgya bod 'dir/_/sngon byon mkhas grub ma lus pa'i/_/bzhed pa'i zab gnad kun 'dus pa/_/'di 'dra thos pa skal pa che/_/kho bos zab khrid re re nas/_/dka' ba dang blangs btsal ba'i chos/_/khyed cag tshegs med dus gcig tu/_/rna bar len pa ngo mtshar rmad/_/snga ma'i bsags khyab dbang byas pas/_/mi tshe chos kyi snang bas 'das/_/'tshol dang nyan dang 'bri dang sems/_/mthar ni yi ge'i lam du bris/_/rang gi tshe rabs phyi ma yi/_/chos kyi bag chags gso byed dang /_/dus 'dir don gnyer dang ldan 'ga'/_/srid na de la'ang phan gyur cig_/ces tshegs chung ngus chos kyi gnad bde blag tu rtogs byed/__khrid brgya'i brjed byang bris pa'i mtha' rten du grol mchog gi blo mtsho las so/__/mang+ga laM//

Tibetan Text

Subtexts

[edit]

༄༅། །ཟབ་ཁྲིད་བརྒྱ་དང་བརྒྱད་ཀྱི་ཡི་གེ་བཞུགས་སོ།

༄༅། (༡) ཞེན་པ་བཞི་བྲལ་གྱི་ཁྲིད་ཡིག །ཞེན་པ་བཞི་བྲལ་གྱི་ཁྲིད་ནི། སྐྱབས་སེམས་སྔོན་དུ་སོང་ནས། ཚེ་འདི་ལ་ཞེན་པ་ཆུའི་ཆུ་སྦུར་དང་འདྲ། ཞེན་པ་བྱ་རིན་མེད་པས་ནམ་འཆི་ཆ་མེད་བསམ། འཆི་རྐྱེན་མང་བར་བསམ། འཆི་བ་ལ་ཅིས་ཀྱང་མི་ཕན་པར་བསམ་པ་དང་གསུམ་གྱིས་སྙིང་ནས་ཆོས་བྱེད་འདོད་ཅིག་སྐྱེས་ཏེ། བློ་ཆོས་སུ་སོང་བའི་ཁྲིད་འགོ་འཛིན། ཁམས་གསུམ་འཁོར་བ་འདི་ཐམས་ཅད་དུག་གི་འབྲས་བུ་དང་འདྲ། འཕྲལ་ཁར་ཞིམ་པ་ལྟར་སྣང་ཡང་ཁོང་དུ་སོང་ན་ཟུག་གཟེར་དང་སྲོག་འབྲལ་བ་ལ་སུ་ཞེན་པར་བྱེད་པ་རང་འཁྲུལ་བས། འཁོར་བའི་གནས་ཚུལ་ལ་བསམ་ཞིང༌། འཁོར་ལོས་བསྒྱུར་རྒྱལ་ཐོབ་ཀྱང་མཐར་འཆི་ཞིང་འཇིག །སྡུག་བསྔལ་ལས་མ་འདས་སྙམ་དུ་བསམ་པས་ཆོས་ལམ་དུ་འགྲོ། རང་དོན་ལ་ཞེན་པ་དགྲའི་བུ་ལ་གོ་གསོས་བྱེད་པ་དང་འདྲ། འཕྲལ་དགའ་དགའ་ལྟར་སྣང་ཡང་ཕུགས་སུ་གནོད་པ་སྐྱེལ་བའི་དཔེས། རང་དོན་ལ་ཞེན་ན་འཕྲལ་བདེ་ཡང༌། ཕུགས་བྱང་ཆུབ་ཀྱི་གེགས་སུ་འགྲོ་བས་ཁམས་གསུམ་སྡུག་བསྔལ་གྱི་རང་བཞིན་འདི་ལས་བདག་གཅིག་པུ་གྲོལ་བས་མི་ཕན་ཏེ། སེམས་ཅན་རེ་རེས་ཀྱང་ཕ་མ་མ་བྱས་པ་མེད་པས་འདི་རྣམས་བདེ་བའི་མཆོག་སངས་རྒྱས་ཐོབ་ན་བདག་བསྐལ་པ་ནས་བསྐལ་པའི་བར་དམྱལ་བར་སྐྱེས་ཀྱང་སླ་སྙམ་པའི་བློ་རྒྱུད་ལ་སྐྱེས་སྐྱེས་ནན་ཏན་དུ་བསྒོམས་པས་ལམ་གྱི་འཁྲུལ་པ་སེལ་བ་ཡིན་ནོ། །དངོས་པོ་དང་མཚན་མ་ལ་ཞེན་ན། སྨིག་རྒྱུ་ལ་ཆུར་འཛིན་པ་དང་འདྲ། འཕྲལ་ཆུར་སྣང་ཡང་ཁར་བཏུང་དུ་མེད་པས་སྐོམ་པ་མི་སེལ། འཁོར་བ་འདི་བློ་འཁྲུལ་པར་སྣང་ཡང་ཡང་དག་པར་དཔྱད་ན་ངོ་བོར་གྲུབ་པ་ཅི་ཡང་མེད། དེས་ན་འདས་པ་ལ་སེམས་མི་འཇུག །མ་འོངས་པ་ལ་སེམས་མི་གཞུག །ད་ལྟར་བ་ལ་རྣམ་པར་ཤེས་པ་མི་གཞུག་པར་ཆོས་ཐམས་ཅད་སྤྲོས་བྲལ་དུ་ངེས་པར་བྱས་ན། འཁྲུལ་སྣང་ཡེ་ཤེས་སུ་ཤར་ནས་སངས་རྒྱ་བ་ཡིན་གསུངས། ཀུན༵་གྱི་ཐོག་མར་ཐོས་པའི་ཆོས། །རང་ཡིད་དག༵འ་མགུར་དྲངས་པའི་ཁྲིད། །སེམས་ཀྱི་མདུད་གྲོལ༵་སྟོན་པའི་ལམ། །བླ་མ་མཆོ༵ག་གི་གསུང་བཞིན་བྲིས། །ཞེན་པ་བཞི་བྲལ་གྱི་ཁྲིད་ཡིག་འདི། ནུབ་པ་རིག་འཛིན་གྲགས་ཀྱིས་མཛད་པ་ལས་བཏུས་ཤིང༌། ཆོས་རྗེ་དཔལ་ལྡན་ས་སྐྱ་པཎྜི་ཏའི་གསུང་གིས་ཕྲ་བཏབ་པའོ། (༢) །བློ་སྦྱོང་དོན་བདུན་མའི་ཁྲིད་ཡིག །བློ་སྦྱོང་དོན་བདུན་མའི་ཁྲིད་ནི། སྐྱབས་སེམས་སྔོན་དུ་སོང་ནས། སྔོན་འགྲོ་རྟེན་གྱི་ཆོས་ཐུན་མོང་བའི་སྔོན་འགྲོ་འདུས་ཤིང༌། དངོས་གཞི་བྱང་ཆུབ་སེམས་གཉིས་བསྒོམ་ཚུལ་ལ། ལུས་དྲང་པོར་འདུག་ལ། དབུགས་ཕྱིར་འགྲོ་དང་ནང་འགྲོ་ཉི་ཤུ་རྩ་གཅིག་གི་བར་དུ་མ་འཁྲུལ་བར་བགྲང༌། ཆོས་རྣམས་རྨི་ལམ་ལྟར་གཟུང་ཡུལ་དུ་སྣང་བ། སེམས་ཉིད་འཁྲུལ་ནས་སྣང་བ་ཡིན་གྱིས། སེམས་ལས་ལོགས་སུ་གྱུར་པ་ཅུང་ཟད་ཀྱང་མེད་སྙམ་ན། མ་སྐྱེས་རིག་པའི་གཤིས་ལ་དཔྱད། གཤིས་ཅིར་ཡང་མ་གྲུབ་པའི་ངང་ལ་བཞག །ཡུལ་སེམས་སྟོང་པའོ་སྙམ་ན་ངོ་བོ་ལ་བལྟ། ཀུན་གཞི་རྣམ་ཤེས་ཚོགས་བདུན་གྱི་སྤྲོ་བསྡུ་དང་བྲལ་བ་ལ་བློས་ཅིར་ཡང་མི་འཛིན་པར་སལ་ལ་སིང་ངེ་བཞག །རྗེས་སྣོད་བཅུད་སྒྱུ་མ་ལྟར་དཔྱད། ཐོག་མར་རང་གི་མ་དམིགས་དྲིན་ཆེ་སྙམ་དུ་བསྒོམས་ལ། མའི་རྒྱུད་ལ་ཡོད་པའི་སྡུག་བསྔལ་ཀུན་འབྱུང་རང་གི་སྙིང་ནང་དུ་བྱུང༌བར་བསམ། བྱུང་ན་དགའ་བའི་འདུན་པ་དྲག་ཏུ་བྱ། བདག་གི་བདེ་དགེ་མ་ལ་བཏང༌། འཕྲལ་བདེ་ཞིང་མཐུན་རྐྱེན་འཛོམས་ནས་སངས་རྒྱས་པ་ཙམ་དུ་གྱུར། དེ་བཞིན་དུ་ཕ་ལ་སོགས་པའི་སེམས་ཅན་ཐམས་ཅད་ལ་བསྒོམས་ཏེ། རླུང་ཕར་འགྲོ་བ་ན་དེ་དང་འགྲོགས་ནས་བདག་གི་བདེ་དགའ་ཐམས་ཅད་གཞན་ལ་སོང་ཞིང༌། ཚུར་འོང་བ་ན་གཞན་གྱི་སྡིག་སྡུག་ཐམས་ཅད་བདག་ལ་བྱུང་བར་བསྒོམ་མོ། །ཡུལ་ཡིད་དུ་འོང་མི་འོང་བར་མ་གསུམ་ལ་བརྟེན་ནས་ཆགས་སྡང་རྨོངས་གསུམ་སྐྱེས་པའི་སེམས་ཅན་རྣམས་དགེ་བ་གསུམ་དང་ལྡན་པར་གྱུར་ཅིག །སྤྱོད་ལམ་ཀུན་ཏུ་ཚིག་བརྗོད། འདུན་པ་ལེན་པའི་གོ་རིམ། མ་འོངས་པ་ན་འབྱུང་བའི་སྡུག་བསྔལ་ད་ལྟ་བླང༌། སྡིག་འབྲས་གནོད་སྙམ་ན། སེམས་ཅན་གྱི་སྡུག་བསྔལ་བདག་ལ་ལེན། ཁྱད་པར་གནོད་བྱེད་མིའམ་མི་མ་ཡིན་བྱུང་ན། བདག་གི་ལས་ངན་གྱིས་བསྐུལ་ནས་འདིས་ད་ལྟ་བདག་ལ་གནོད་པའི་སྡིག་པ་བྱས་པས། ཕྱིས་དེའི་འབྲས་བུ་སྡུག་བསྔལ་མྱོང་བ་སྙིང་རྗེ་སྙམ་དུ་གཏོང་ལེན་དྲག་ཏུ་བསྒོམ། མི་ཁྱི་ལྟ་བུ་ལ་དངོས་སུ་ཕན་ཅི་ཐོགས་འབད། འདྲེ་ཡིན་ན་ཁྱོད་བདག་གི་ཤ་ཁྲག་ལ་ཟོ་ཞིག་སྙམ་བློས་ལིང་བསྐྱུར། རྐྱེན་ངན་སྣོད་བཅུད་སྡུག་བསྔལ་གང་བྱུང་འཁྲུལ་པའི་སྣང་བ་རྨི་ལམ་དུ་མེས་ཚིག་པ། ཆུས་ཁྱེར་ནས་ཉམ་ཐག་པ་ལྟར་མི་བདེན་པ་དེའི་ངོ་བོ་ལ་བལྟས་ན། མ་སྐྱེས་ཆོས་སྐུ། འགག་མེད་ལོངས་སྐུ། གནས་མེད་སྤྲུལ་སྐུ། དབྱེར་མེད་ངོ་བོ་ཉིད་སྐུ། ལྟ་བ་སྐུ་བཞིའི་ངོ་སྤྲོད། མཛེ་ནད་སོགས་བྱུང་ན༑ འདི་མེད་ན་ཚེ་འདིའི་ཤོམ་ར་ལ་སོང༌། ཆོས་མི་དྲན་པ་ལ། འདིས་ཆོས་དྲན་དུ་བཅུག །འདི་ཀ་དཀོན་མཆོག་གི་ཕྲིན་ལས་ཡིན་སྙམ་དུ་བསམ། མདོར་ན་སྡུག་བསྔལ་མི་འདོད་ན། རྒྱུ་ཚོགས་སོགས་ཤིག་པའི་བརྡ་ཡིན་གྱི་སྙམ་པ་བྱས། དཀོན་མཆོག་མཆོད་པ། དགེ་འདུན་བསྙེན་བཀུར། འབྱུང་པོའི་གཏོར་མ། བླ་མ་ལ་མཎྜལ་ཕུལ་ལ་བདག་ན་བ་ལེགས་ན་ན་བར་བྱིན་གྱིས་བརླབ་ཏུ་གསོལ། སོས་པ་ལེགས་ན་སོས་པར་བྱིན་གྱིས་བརླབ་ཏུ་གསོལ། ཤི་བ་ལེགས་ན་ཤི་བར་བྱིན་གྱིས་བརླབ་ཏུ་གསོལ། ཞེས་རེ་དོགས་འགོག་པའི་གསོལ་བ་དྲག་པོ་གདབ་བོ། །གདོན་ལ་གཏོར་མ་ཕུལ། བཀའ་དྲིན་ཆེ། སེམས་ཅན་གྱི་སྡུག་བསྔལ་བདག་ལ་སྨིན་པར་མཛད་དུ་གསོལ། ཞེས་ཞེ་ཐག་པ་ནས་རེ་དོགས་འགོག་པ་ཡིན། མན་ངག་སྙིང་པོ་དཀར་པོའི་ས་བོན་སྟོབས། ཡོ་བྱད་བསོད་ནམས་གང་ཆེར་བཏང་། འཕེན་སྟོབས་ད་ནས་བཟུང་སྟེ། ཟླ་བ། ལོ། མ་ཤིའི་བར། བློའི་འཕེན་པ་དྲག་པོ་བྱེད། གོམས་སྟོབས་ཡང་དང་ཡང་དུ་སྦྱོང༌། སུན་འབྱིན་སྟོབས་བདག་གཅེས་འཛིན་རྒྱངས་ཀྱིས་སྤང༌། སྨོན་ལམ་སྟོབས་ནི་དགེ་སྦྱོར་གཤམ་དུ་བྱང་ཆུབ་སེམས་གཉིས་དང་མི་འབྲལ་བར་གྱུར་ཅིག ༑སྟོབས་ལྔ་ཆོས་ཐམས་ཅད་ཧཱུྃ་དྲིལ་ཡིན། འཕོ་བ་འཆི་ངེས་ནད་ཀྱིས་ཐེབས་ན། དཀར་པོའི་ས་བོན་ཡོ་བྱད་བསོད་ནམས་གང་ཆེར་བཏང༌། སྨོན་ལམ། བདག་བར་དོ་དང་ཚེ་རབས་ཕྱི་མ་ཐམས་ཅད་དུ་བྱང་ཆུབ་ཀྱི་སེམས་གཉིས་འབྱོངས་པ། ཆོས་འདི་སྟོན་པའི་བླ་མ་དང་མཇལ་བར་བྱིན་གྱིས་བརླབ་ཏུ་གསོལ། གསོལ་བ་བཏབ། སུན་འབྱིན། ལུས་གཅེས་འཛིན་སྤང༌། འཕེན་སྟོབས་བར་དོར་བྱང་སེམས་སྦྱང་སྙམ་པའི་འདུན་པ་བྱ། གོམས་སྟོབས་སྔར་གྱི་དྲན་པ་སྤྱོད་ལམ་འཆི་ཁར་གཞོག་གཡས་འོག་ཏུ་བཅུག་རླུང་འགྲོ་འོངས་ལ་བསྐྱོན་ནས་གཏོང་ལེན་གཉིས་སྦྱང༌། སྐྱེ་འཆི་སེམས་སྣང་ཡིན་པའི་ངང་ལ་བློ་ཅིར་ཡང་མི་འཛིན། དེ་ལྟར་སྤེལ་ཞིང་བསྒོམ་པར་བྱས་པའི་འཕྲོ་ལ་འཆི་བར་བྱའོ། །ཐེག་པ་ཆེ་ ཚད་ ཆུང་གི་ཆོས་ཐམས་ཅད་བདག་འཛིན་འདུལ་བར་འདུས། གཉེན་པོ་བློ་སྦྱོང་ཡིན་པས་རང་ལ་རང་གིས་མ་ཁྲེལ་བ་ལ་འབད། བློ་ལེགས་པར་སྦྱངས་པས་རྐྱེན་ངན་ཅི་བྱུང་ལ་དགའ་བ། དེའི་སྟེང་དུ་གཞན་གྱི་རྐྱེན་ངན་པ་ལ། རྟ་པ་རྩལ་ཅན་ཡེངས་ཀྱང་རྟ་ལས་མི་ལྷུང་བ་ལྟར་རྐྱེན་ངན་དེ་ཉིད་བློ་སྦྱོང་བའི་གྲོགས་སུ་ཁད་ཀྱིས་འགྲོ་བ་ཡིན་པས། བློ་སྦྱོང་ཁས་ དམ་ཚིག བླངས་དང་མ་འགལ་བར། ཐོ་ཅོར་མ་ཤོར་བར། ཕྱོགས་རེར་མ་ལྷུང་བ། མངོན་ཚན་ཆུང་ལ་ས་ཆོད་ཆེ་བ་གཅིག་བྱེད་དགོས། གཞན་སྐྱོན་མི་བརྗོད། ཉོན་མོངས་གང་ཆེ་དེའི་གཉེན་པོར་ཆོས་ཐམས་ཅད་སྤུངས། རང་འདོད་སྤངས། བདེན་འཛིན་སྤངས། འཁོན་འཛིན་སྤངས། ཚིག་ངན་མི་སྨྲ་སྤང༌། གནོད་ལན་འཇལ་བ་སྤང༌། མིའི་མཚང་མི་འབྲུ། མི་མ་ཡིན་ལ་སྲོག་སྔགས་ཟློས་པ་ལ་སོགས་མི་བྱེད། རང་ལ་བབས་པའི་བཅུ་གལ་ཁག་ངན་གཡོ་སྒྱུ་གཞན་ལ་བསྒྱུར་བ་སྤང༌། བཟང་འདོད་སྤང༌། བློ་སྦྱོང་བསྒོམས་ནས་རྒྱུད་རེངས་ན་འདྲེ་ཤར་སྒོ་ནས་གནོད་པ་ལ་གླུད་ནུབ་སྒོར་བསྐྱལ་བ་དང་འདྲ་བས། སྨན་ནད་ཐོག་ཏུ་གཏོང༌། ཉེ་དུ་ཤི་ན་ཟས་ནོར་ཡོང༌། ཡོན་བདག་ལ་ན་ཚ་ཤི་ཆད་བྱུང་ན་ཚོགས་གསོག་ཡོང༌། རང་མཉམ་ཤི་ན་ང་གཅིག་པུ་ལ་སྐུ་བསོད་ཡོང༌། དགྲ་ཤི་ན་ང་འཚེངས་སྙམ་པ་སྤང༌། ཟས་གོས་ཀྱི་ བསླབ་བྱ། རྣལ་འབྱོར་ཐམས་ཅད་གཞན་ཕན་གྱི་སེམས་འབའ་ཞིག་གིས་བྱེད། ལོག་གནོན་ཐམས་ཅད་གཏོང་ལེན། ཐོག་མཐའ་གཉིས་སྔ་དྲོའི་ཚེ་དེ་རིང་བྱང་སེམས་དང་མི་འབྲལ་བར་བྱ་སྙམ་པའི་དྲན་ཤེས་ཀྱིས་ཟིན་པར་བྱ། དགོང་མོ་བྱང་སེམས་དང་འགལ་ན་རྔན་བགྲང༌། གཉིས་པོ་བཟོད་པ་ནི་འཁོར་ལོངས་སྤྱོད་སོགས་ལ་མ་དྲེགས། ཤིན་ཏུ་རྒུད་པ་ལ་ཞུམ་པ་མེད་པར་བྱས། ཆོས་སྤྱི་དང་བློ་སྦྱོང་གི་དམ་ཚིག་སྲོག་བས་གཅེས་པར་བསྲུངས། དཀའ་བ་གསུམ། ཉོན་མོངས་དྲན་དཀའ། བཟློག་དཀའ། རྒྱུན་གཅོད་དཀའ་བས་མི་འབྱུང་བའི་ཕྱིར་འབད། རྒྱུའི་གཙོ་བོ་བླ་མ་བཟང་པོ་དང་མཇལ། རང་གི་བློ་ལས་སུ་རུང༌། ཆོས་ཚུལ་བཞིན་དུ་ཉམས་སུ་ལོངས་པ་གསུམ་ལ་དགའ་བ་བསྒོམ། གཞན་ལའང་དེ་ཚང་བར་སྨོན། ཉམས་མེད་གསུམ། བླ་མ་ལ་མོས་གུས་ཉམས་མེད། བློ་སྦྱོང་བསྒོམ་པ་ལ་སྤྲོ་བ་ཉམས་མེད། བསླབ་བྱ་ཕྲ་མོ་ཚུན་ཆད་མ་ཉམས་པའོ། །འབྲལ་མེད་གསུམ། ལུས་ངག་ཡིད་གསུམ་དགེ་བ་དང་མ་བྲལ་བ། ཡུལ་ལ་ཕྱོགས་རིས་མེད་པ། ཐམས་ཅད་བློ་སྦྱོང་ཁ་ཙམ་ཚིག་ཙམ་མ་ཡིན་པར་གཏིང་ནས་འབྱོངས་པར་བྱེད། བཀོལ་བ་ལས་ཀྱི་དབང་གིས་སྙིང་དུ་མི་སྡུག་པ། ལྷག་པར་བྱང་ཆུབ་སེམས་ཀྱི་ལམ་དུ་འཁྱེར། གཙོ་བོ་ཉམས་སུ་བླང་བ་ནི། ད་རེས་ཀྱི་ཚེ་འདི་ལ། ཚེ་འདི་བས་ཆོས་གཙོ། ཆོས་ཀྱང་སྒྲུབ་པ་གཙོ། སྒྲུབ་པ་སེམས་སྦྱོང་བ་གཙོ། དེ་ཡང་ལུང་རིགས་ཀྱི་སྒོ་ནས་སྦྱོང་བ་བས་མན་ངག་ལ་བརྟེན་ནས་ཕུར་ཚུགས་སུ་སྦྱོང་བ་གཙོ། གོ་ལོག་དྲུག །ཆོས་བསྒྲུབ་པའི་སྡུག་བསྔལ་མི་བཟོད་པར་དགྲ་འདུལ་གཉེན་སྐྱོང་སྡུག་བསྔལ་བཟོད་པ་ནི་བཟོད་པ་གོ་ལོག །ཆོས་བྱེད་པ་ལ་འདུན་པ་མི་བྱེད་པར་ཚེ་འདིའི་འདུན་པ་བྱེད་པ་འདུན་པ་གོ་ལོག །ཆོས་ཀྱི་རོ་མི་མྱོང་བར་འཇིག་རྟེན་གྱི་རོ་མྱོང་བ་ནི་རོ་མྱོང་གོ་ལོག །སྡིག་པ་བྱེད་པ་ལ་སྙིང་རྗེ་མི་བསྒོམ་པར་ཆོས་ཕྱིར་དཀའ་ཐུབ་བྱེད་པ་ལ་སྙིང་རྗེ་བསྒོམ་པ་ནི་སྙིང་རྗེ་གོ་ལོག །རང་ལ་ལྟོས་པ་ཆོས་ལ་མི་སྦྱོར་བར་ཚེ་འདིའི་ཆེ་ཐབས་ལ་སྦྱོར་བ་ཉེ་སེམས་གོ་ལོག །དགེ་བ་ལ་དགའ་བ་མི་བསྒོམ་པར་དགྲ་ལ་སྡུག་བསྔལ་བྱུང་ན་དགའ་བ་བསྒོམ་པ་ནི་རྗེས་སུ་ཡི་རང་གོ་ལོག་གོ །དེ་ལ་བློ་སྦྱོང་ཉིད་ལ་བློ་ལིངས་བསྐྱུར་ནས་སྦྱང༌། རྟོག་དཔྱོད་གཉིས་ཉོན་མོངས་གང་ཆེ་བལྟས་ནས་གཉེན་པོས་སྤང༌། ཡུས་ཕ་རོལ་ལ་བདག་གི་དྲིན་ཡོད་པ་དང༌། རང་གིས་ཆོས་བྱས་པ་ཡུས་བྱ་ས་མེད་དོ། །ཀོ་ལོང་བདག་ལ་གཞན་གྱིས་དམའ་ཕབ་སོགས་ལ་ལན་མི་བྱ། ཡུད་ཙམ་ཅུང་ཟད་ལ་དགའ་མི་དགའི་རྣམ་འགྱུར་མི་བྱ། འོར་ཆེ་ཕན་བཏགས་ལ་ཚིག་གི་གཏོང་རག་ལ་རེ་བ་མེད་པར་བྱ། དེ་ལྟར་ཚེ་ཧྲིལ་གྱིས་བྱང་ཆུབ་ཀྱི་སེམས་གཉིས་པོ་མཉམ་རྗེས་གཉིས་ཀྱི་སྒོ་ནས་འབྱོངས་པའི་གདིང་ཐོབ་པར་བྱའོ། །ཀུན༵་ཏུ་བློ་རྩ་ཟིང་ཟིང་པོ། །དག༵འ་སྡུག་སྣང་བས་སྐྱོད་པའི་ཡིད། །མདུད་འཆིང་གྲོལ༵་བའི་ལམ་མཆོ༵ག་ནི། །ཉུང་གསལ་ཡི་གེའི་ལམ་དུ་ཤར། །རྒྱལ་སྲས་རིན་པོ་ཆེའི་ཁྲིད་ཡིག་ལས་བཏུས་སོ། (༣) །རྟེན་འབྲེལ་སྙིང་པོའི་ཁྲིད་ཡིག །རྟེན་འབྲེལ་སྙིང་པོའི་ཁྲིད་ཡིག་ནི། སྐྱབས་སེམས་སྔོན་དུ་སོང་བས། རང་གི་ ཁྱད་པར་སྔོན་འགྲོ། སྤྱི་བོར་པད་ཟླའི་གདན་ལ་རང་གི་བླ་མ་སྤྱན་རས་གཟིགས་སུ་བསྒོམས་པའི་མདུན་དུ་རྩ་བའི་མ་ བྱམས་པ། གསལ་བཏབ་ནས། དེའི་ལྟོ་བར་ཆགས་པ་ནས་བཙས་པ་དང༌། མཐར་ནར་སོན་པར་བསྐྱངས་པའི་དྲིན་བསམས་ལ། བརྩེ་གདུང་དྲག་ཏུ་ཤུགས་བསྐྱེད་ནས། ངག་ཏུ་ངའི་མ་ཞེས་ཡང་ཡང་བརྗོད་ལ། བ་སྤུ་གཡོ་བ། མཆི་མ་འཁྲུགས་པ་ནམ་བྱུང་བར་བསྒོམ་ཞིང༌། དེ་ལྟར་མ་བྱུང་ན་ལུས་ སྙིང་རྗེ། བུས་མ་བྲང་སྦྱར། གདོང་སྨད། བཞིན་བསྡུས། ལག་པས་འགྲམ་སྐྱོར། སྲིན་ལག་ཁར་བཅུག །མྱ་ངན་གྱི་ལུས་གནད་དང་ལྡན་པས་སྙིང་རྗེ་དྲག་ཏུ་བསྒོམ་ཞིང༌། ཕ་བླ་མ་བདག་གི་མ་དྲིན་ཅན་འདི་ཐར་ལམ་དུ་ད་ལྟ་རང་དྲང་མཛོད། ཅེས་ར་མདའ་འབོད་ཀྱི་ཚུལ་དུ་སྐད་ང་རོ་ཆེན་པོས་གསོལ་བ་འདེབས་ཤིང་བསྒོམ་གྱི་སྣེ་ཟིན་ནས། དམིགས་པའི་ཁ་བསྒྱུར་འགྲོ་དྲུག་གི་ཕ་མར་ཡོངས་ལ་སྤོས་ནས་བསྒོམ་སྟེ། ལྷ་ལ་འཆི་འཕོ། ལྷ་མིན་ལ་འཐབ་རྩོད། མི་ལ་མྱངས་གྲུབ་སྐྱེ་རྒ་ན་འཆི། དུད་འགྲོ་ལ་གསོད་འཁོལ། ཡི་དྭགས་ལ་བཀྲེས་སྐོམ། དམྱལ་བའི་ཚ་གྲང་བཙོ་བསྲེགས་རྣམས་དྲན་པར་བྱས་ལ་སྙིང་རྗེ་བསྐྱེད་ཅིང་ཡུས་སུ་ངོ་ཐོན་གྱི་ཕ་མ་ཞེས་དྲག་ཏུ་གསོལ་བ་ཕུར་ཚུགས་བཏབ་རྗེས། བརྗེ་བ། མ་རྒན་འགྲོ་དྲུག་གི་ གཏོང་ལེན། སྡུག་བསྔལ་དང་ལེན་གྱི་བཟོད་སྟོབས་བསྐྱེད། མཐར་བདག་གཞན་མཉམ་ཉིད་སྤྲོས་བྲལ་ནམ་མཁའི་ངང་ལ་འཇོག་ཅིང་གནད་དེ་དང་ལྡན་པའི་དམིགས་པ་ནད་ཐོག་གདོན་ཐོག་དགྲ་ཐོག་ཏུ་བསྒྱུར་བར་བྱའོ། །ཀུན༵་སྣང་རྟེན་འབྲེལ་དགའ་དག༵འ་འདྲའི། །འཆར་སྒོ་རང་གྲོལ༵་མཆོ༵ག་སྟོན་པའི། །ཟབ་མོའི་གནད་སྦྱོར་གདམས་པ་འདི། །སེམས་ལ་ཕན་པའི་དོན་དུ་བྲིས། །རྟེན་འབྲེལ་སྙིང་པོའི་ཁྲིད་ཡིག་འདི། མུས་ཆེན་རྒྱལ་མཚན་དཔལ་བཟང་གི་ཁྲིད་ཡིག་ལས་བཏུས་ནས་བྲིས་པའོ། (༤) །སྐྱིད་སྡུག་ལམ་འཁྱེར་གྱི་ཁྲིད་ཡིག །སྐྱིད་སྡུག་ལམ་འཁྱེར་གྱི་ཁྲིད་ནི༑ སྐྱབས་སེམས་སྔོན་དུ་སོང་ནས། སྐྱིད་པ་ལམ་དུ་འཁྱེར་བ་དང༌། སྡུག་པ་ལམ་དུ་འཁྱེར་བ་རེ་རེ་ལ་ཡང༌། ཀུན་རྫོབ་བྱང་སེམས་ཀྱི་སྒོ་ནས་དང་དོན་དམ་བྱང་སེམས་ཀྱི་སྒོ་ནས་ལམ་དུ་འཁྱེར་བ་ལ། དང་པོ་ལ་ངེས་ཤེས་འདྲོངས་ནས་ཕྱི་མ་ཡང་དེར་འདྲེན་ནུས་པས། དེ་ཡང་ལུས་ལ་ན་ཚ་མེད། སེམས་ལ་སྡུག་བསྔལ་མེད་ཅིང་མཐུན་རྐྱེན་ཐམས་ཅད་འཛོམ་སྟེ། ད་ལྟ་ང་ལས་སྐྱིད་པ་སུ་ཡོད་སྙམ་པའི་ཚེ། ང་བདེ་སྐྱིད་ལ་འདུན་པ་བཞིན་སེམས་ཅན་ཐམས་ཅད་ཀྱང་འདུན་ལ། སེམས་ཅན་རེ་རེས་ཀྱང་ཕ་མ་བྱས་ནས་ཕན་མ་བཏགས་པ་མེད་པས། བདག་བདེ་དང་སྐྱིད་པ་བཞིན་དུ་མ་རྒན་སེམས་ཅན་ཐམས་ཅད་ཀྱང་བདེ་བ་དང་སྐྱིད་པར་གྱུར་ཅིག་སྙམ་དུ་ཞེ་ཐག་པ་ནས་བསམ་ཞིང་ངག་ཏུ་ཡང་བརྗོད། བདེ་སྐྱིད་དང་ལྡན་པ་འདི་ཡང་སྔོན་བསོད་ནམས་བསགས་པའི་མཐུ་ལས་བྱུང་བ་ཡིན་པས་ད་ཕྱིན་ཆད་ཀྱང་འདི་ལྟ་བུའི་བདེ་སྐྱིད་འདོད་ན་དགེ་བ་ལ་འབོད་བྱ་བའི་བརྡར་བསམས་ནས་སྒོ་གསུམ་དགེ་བ་ལ་འབད་པར་བྱའོ། །གཉིས་པ་དོན་དམ་པ་བྱང་སེམས་ཀྱི་སྒོ་ནས་སྐྱིད་པ་ལམ་དུ་འཁྱེར་བ་ལ་གསུམ་ཡོད་པའི་དང་པོ། སྐྱིད་པ་ཆོས་སྐུར་ངོ་སྤྲད་པ་ནི། ད་ལྟ་སྐྱིད་དོ་སྙམ་པར་འདུག་པ་འདི་ལུས་སྐྱིད་དམ་སེམས་སྐྱིད། དེ་གཉིས་མ་གཏོགས་པའི་སྐྱིད་མཁན་མི་འདུག །སེམས་མེད་ན་ལུས་ནི་བེམས་པོ་དུར་ཁྲོད་ཀྱི་རོ་དང་འདྲ་བས་སྐྱིད་རྒྱུ་དང་བདེ་རྒྱུ་ཅི་ཡང་མེད་པས་ན་སྐྱིད་པར་སྣང་བ་དེ་དང་པོ་གང་ནས་ཀྱང་མ་བྱུང༌། མཐར་གང་དུ་ཡང་མ་འགགས། བར་དུ་གནས་པ་ན་ལུས་ཀྱི་སྤྱི་གཙུག་ནས་རྐང་མཐིལ་བར་གང་དུ་གནས་པ་མི་འདུག །ཁ་དོག་དབྱིབས་ལ་སོགས་པའི་ངོ་བོ་ཅིར་ཡང་མ་གྲུབ་འདུག་པའི་གཤིས་འདི་ཉིད་ཆོས་སྐུ་ཟེར། གཉིས་པ་སྐྱིད་པ་ལོངས་སྐུར་ངོ་སྤྲོད་པ་ནི། སྐྱིད་པར་སྣང་བའི་སེམས་དེ་ཉིད་ཧྲཱིཿ དཀར་པོ་ཚེག་དྲག་ཅན་ལས་སྤྱན་རས་གཟིགས་སུ་ལམ་བསྒོམས་ནས། ༀ་མ་ཎི་པདྨེ་ཧཱུྃ། ཅི་ནུས་འདྲེན། གསུམ་པ་སྐྱིད་པ་སྤྲུལ་པའི་སྐུར་ངོ་སྤྲོད་པ་ནི། སྐྱིད་པར་སྣང་བའི་སེམས་ཀྱི་སྔོ་སེར་དཀར་དམར་སོགས་མདངས་མ་འགགས་པ་སྣ་ཚོགས་སུ་སྣང་བ་འདི་ཉིད་སྤྲུལ་སྐུ་ཡིན་ཞེས་བསྒོམས་པའི་རྗེས་ལ། སྐྱིད་ན་བདེ་བ་ཚོགས་སུ་བསྔོ། །ཕན་བདེས་ནམ་མཁའ་གང་བར་ཤོག །ཅེས་བརྗོད་ཅིང༌། ཚུལ་གཉིས་པ་ཡང་ཀུན་རྫོབ་དོན་དམ་སྐུ་གསུམ་ཞལ་བསྒྱུར་ཚུལ་དེ་བཞིན་དུ་སྦྱར་ཏེ་མཐར། སྡུག་ན་ཀུན་གྱི་སྡུག་བསྔལ་ཁུར། །སྡུག་བསྔལ་རྒྱ་མཚོ་སྐེམ་པར་ཤོག །ཅེས་སྨོན་ལམ་འདེབས་པ་རྣམས་སྔར་བཞིན་གོ་བར་བྱ། སྐྱིད་སྡུག་ཀུན༵་ལ་དག༵འ་སྡུག་གི །སྣང་བ་རང་གྲོལ༵་མཚོན་པའི་གནད། །མཆོ༵ག་ཏུ་ཟབ་པའི་ཁྲིད་ཀྱི་ཐོ། །རང་གིས་ཐོབ་པ་ཇི་བཞིན་བྲིས། །སྐྱིད་སྡུག་ལམ་འཁྱེར་གྱི་ཁྲིད་ཡིག་ནི། རྒྱལ་སྲས་ཆོས་རྫོང་བའི་གསུང་ལས། བླ་མ་རྗེ་བཙུན་རེད་མདའ་བས་ཟིན་བྲིས་མཛད་པ་ལས་བཏུས་ནས་བྲིས་པའོ། (༥) །སུམ་པའི་བློ་སྦྱོང་གི་ཁྲིད་ཡིག །སུམ་པའི་བློ་སྦྱོང་གི་ཁྲིད་ནི། སྐྱབས་སེམས་སྔོན་དུ་སོང་ནས། སྔོན་གྱི་རང་གིས་བསགས་ཁྱབ་ལས། ད་ལྟ་གང་བྱུང་བའི་སྣང་བ་དེ་ལ་དཔྱས་མི་འདོགས་པར་ཆོག་ཤེས་དྲན་རྩ་བསྐྱེད་དེ། སེམས་འབོལ་ལེ་ཤིག་གེ་ལུས་སེམས་ཅི་ནས་བདེ་བའི་ཚོ་གཟུང༌། སེམས་ལ་ལས་མི་འཆོལ་བར་ཡང་ཆོད་དེ་བསྡད་པས་སྐྱིད་ནང་ནས་འཆར་ཞིང༌། སེམས་འདས་པའི་རྗེས་མི་གཅོད། མ་འོངས་པའི་སྔོན་མི་བསུ། ད་ལྟའི་ཤེས་པ་ལྷང་ངེ་བའི་ངང་ལ་རྩིས་གདབ་མེད་པར་སྡོད། དེའི་ངང་ལ་འཕྲོ་ན་ཡང་གང་བདེར་དྲན་པའི་ཐག་པས་སྦྲེལ་ནས་ཕྱིན་པས་ཆོག་ཅིང༌། བྱ་བ་གང་ཡང་ཐུག་འཕྲད་དུ་བཏང་བས། ཅིས་ཀྱང་དགོས་མེད་ཀྱི་བློ་ཆོས་སུ་སོང་དུས་ནི་ཤི་ཡང་སླ། ཐར་པའི་ལམ་ལས་འཁྱོགས་པ་མི་སྲིད། དོན་དུ་ནི་རང་སེམས་འཆི་བ་མེད་དེ་སྐྱེ་བར་སྣང༌། ཤི་བར་བཏགས་པ་ཙམ་དུ་རྟོགས་པས་སྐྱེ་འཆིའི་མཚང་གཏིབས། འཆི་མེད་གཉུག་མའི་རང་ཞལ་མཐོང་ནས་འཆི་རྒྱུ་ག་ལ་ཡོད་ཅེས་ཡིད་འཕྲང་རྦད་དེ་གཅད་དོ། །བརྟགས་ཚེ་ཀུན༵་ལས་ཟབ་པའི་ཆོས། །མཁས་པ་ཡིད་དག༵འ་འཕེལ་བའི་དོན། །རང་གྲོལ༵་མཆོ༵ག་གི་ཉེ་ལམ་གྱི། །གནད་བསྡུས་སྙིང་པོ་བཀོད་འདིའོ། །ཆོས་རྗེ་དཔལ་ལྡན་བླ་མ་དམ་པའི་ཁྲིད་ཡིག་ལས་བཏུས་སོ། (༦) །མ་གཅིག་གི་གཅོད་ཀྱི་ཁྲིད་ཡིག ། མ་གཅིག་གི་གཅོད་ཁྲིད་ནི། སྐྱབས་སེམས་སྔོན་དུ་སོང་ནས། ༈ ཡུམ་དོན་ངོས་ སྔོན་འགྲོ་ལྟ་བ། ཡུམ་དོན་ངོ་སྤྲད་པ། བཟུང་སྟེ། སེམས་མ་བཅོས་པ་གནས་ཆའི་སྟེང་དུ་བློ་ལྷོད་གློད། ཡིད་ལ་ཅི་ཡང་མི་བྱ། བློས་གང་ཡང་མི་བསམ། སུའི་རྗེས་སུ་མི་འབྲང༌། རིག་པ་དྭངས་ཆ་ཐོན་པར་བྱ། མིག་གི་ཨ་འབྲས་མི་འགུལ། ལྟ་སྟངས་ལ་ཧད་དེ་བཞག་པས། བཞག་ཏུ་བཏུབ་ཅིང་བསྒོམ་དུ་བཏུབ་ན་ལེགས། དེ་ཀ་རང་བསྒོམ། ཅིས་ཀྱང་བསྒོམ་དུ་མི་འདོད་ན། མདུན་འདིར་བླ་མ་དང་མ་གཅིག་དབྱེ་བ་མེད་པར་སྐུ་ཆེ་ཆུང་ཚོན་གང་བ། སྐུ་ལས་མེ་འོད་འཕྲོ་བ། སྐུ་གང་ལའང་ཐོགས་པ་མེད་པ། ཕར་ཐལ་ཚུར་ཐལ་དུ་འབིགས་པར་བྱེད་པའི་ནུས་པ་དང་ལྡན་པར་བསྒོམ། དེས་རང་གི་ལུས་སྤྱི་གཙུག་ནས་རྐང་མཐིལ་གྱི་བར་དུ། གསུང་དྲག་པོ་ཕཊ་ཀྱི་སྒྲ་སྒྲོགས་པ་གཅིག་གིས་ཕར་ཐལ་ཚུར་ཐལ་ཕུག་པར་བསྒོམ། དེ་ལྟར་བྱས་པས་རྣམ་རྟོག་འགྱུ་བྱེད་དང་བྲལ་བའི་གནས་ཆ་ནམ་མཁའི་དཀྱིལ་ལྟ་བུ་དེ་ངོ་སྤྲད་ཅིང༌། བླ་མས་བག་ཙམ་གཅུར་ལ་ཁྲིད་ལྟ་ཡང་ཡང་བྱ། དེའི་དོན་དམ་ཡུམ་གྱི་རང་ངོ་དེ་ད་ལྟའི་སེམས་ངོས་གཟུང་མེད་པ། གཏད་སོ་དང་བྲལ་བ། ལྷ་བཟང་མེད། འདྲེ་ངན་མེད༑ ཕྱི་བལྟས་མཐའ་བྲལ། ནང་བལྟས་མཐའ་བྲལ་འདི་ཡིན་ནོ། །འདི་ལ་བརྟེན་ནས་སངས་རྒྱས་ཐམས་ཅད་སངས་རྒྱས་སོ། །འདིའི་དོན་རྟོགས་པ་ལས་སངས་རྒྱས་བྱོན་པ་ཡིན་ནོ། །ཉམས་སུ་ལོང་ཞིག ༈ །དངོས་གཞི་བསྒོམ་པ་བདུད་བཞི་དབྱིངས་སུ་གཅོད་པ། དེ་བརྟེན་པར་བྱེད་པ་ལ་ཐོག་མར་ངོ་འཕྲོད་པར་བྱས་ལ། དེ་ནས་ཡུམ་གྱི་ངང་དུ་བཞག་རྟིང་ནས། རྐྱེན་ངེས་པ་མེད་པས། ཤེས་པ་གཏད་སོ་མེད་པ་བསྐུལ། (༡) མིག་ཏུ་གཟུགས། རྣ་བར་སྒྲ། སྣར་དྲི། ལྕེར་རོ། །ལུས་རེག་བྱ་སྟེ། དབང་ལྔ། ཡུལ་ལྔ། ཡུམ་གྱི་ངང་དུ་བཅད་དགོས་ཏེ་རང་གི་ཡིད་ལ་ལམ་གྱིས་ཤར་བ་དང༌། ཕཊ་བརྗོད། ཡིད་ལྷོད་ཀློད་དེ་བཞག་པས། ཆགས་སྡང་གི་རྒྱུན་དེ་རྦད་ཆོད། རང་ངོར་སིང་གནས། རང་སར་རྗེན་གྱིས་ཆོད་པ་ཡིན། དེ་ཡང་ཆགས་སྡང་ལམ་ཤར་བ་ལྷོང༌། ཕཊ་བརྗོད་ངང་དུ་འཇོག་པ་གཅོད། བློ་བྲལ་རྗེན་པ་ཆོད་ཚད་ཡིན། དེ་ཉམས་སུ་བླང༌། (༢) དེ་ནས་དགའ་བ། མི་དགའ་བ། འཇིགས་པ། སྐྲགས་པ། སྐྱོ་བ། སུན་པ། ཡ་ང་བ། བག་ཚ་བ། འདོད་པ། མི་འདོད་པ། འདས་མ་འོངས་ད་ལྟ་བའི་རྣམ་རྟོག་འགྱུ་ཚད་བདུད་ཡིན་པས་ལམ་ཤར་བ་དང༌། ཕཊ་བརྗོད་ཡིད་ཀློད་པས་ཡིད་རྒྱུན་རྦད་ཆོད། སེམས་རང་ངོ་རྗེན་པ་དེ་ཆོད་པ་ཡིན། སྟོང་ཉིད་ལ་རྣམ་རྟོག་ལམ་ཤར་བ་སློང་། འཛིན་མེད་འཇོག་པ་གཅོད། རང་ངོ་ཤེས་པ་དེ་ཆོད་ཚད་ཡིན། (༣) དེ་བཞིན་ཆོས་ལ་ཞེན་པ་དགའ་བྲོད་སྐྱེ་ན་བླ་མ་བཟང་པོ། ཆོས་ཟབ་མོ་འདི་འདྲ་སྙམ་པའི་ཞེན་པ་ལམ་ཤར་བ་དང༌། ཕཊ་བརྗོད། ཡིད་ལྷོད་ཀློད་ལ་བཞག །དགའ་སྤྲོ་རྦད་ཆོད། སེམས་ཞེན་མེད་དུ་སིང་ངེ་ཤེས། དགའ་སྤྲོ་ལམ་པ་སློང༌། ཕཊ་ངང་དུ་འཇོག་པ་དེ་གཅོད། རང་ངོ་ཤེས་པ་ཆོད་ཚད་ཡིན་ནོ། (༤) །ཐམས་ཅད་སྙེམས་སུ་འདུས་ཏེ་ཆེ་བ་སྙམ། ཆུང་བ་སྙམ་པ་ཐོགས་བཅས། དགའ་སྙམ་མི་དགའ་སྙམ་ཐོགས་མེད། བདེ་དྲོད་ལ་སོགས་དགའ་སྤྲོ་ཡིན། སྙེམས་བྱེད་ངང་ལ་ལྷན་ནེར་བཞག །ཕཊ་བརྗོད། ཡིད་དེ་ཐོག་ཏུ་སིང་བཞག་ལ་རང་ངོ་ཤེས་པར་བྱའོ། །དེ་ལྟར་བདུད་བཞི་ཡུམ་གྱི་ངང་དུ་གྲོལ་དེ་རྗེས་ རྗེས་སྤྱོད་པ་རོ་སྙོམས་ལམ་དུ་སློང་བའོ། །ངང་མ་བྲལ་བར། རི་ཁྲོད་གཉན་ས་ཀུན་ཏུ་གཅོད་བྱེད་ཅིང་འགྲོ། དེས་མཉམ་རྗེས་དབྱེར་མེད་དུ་བསྲེ་བ་ཡིན་ནོ། །གཅོད་སྐོར་ཀུན༵་ལས་ཟབ་པའི་གནད། །བསམ་ཚེ་དག༵འ་བ་འཕེལ་བྱེད་པའི། །འཆིང་བ་རང་གྲོལ༵་མཆོ༵ག་གི་ཁྲིད། །ཡི་གེར་བཀྲོལ་བ་ཨེ་མ་མཚར། །དོན་ཁྲིད་ལས་བཏུས་སོ། (༧) །སྙིང་པོ་དོན་གསུམ་གྱི་ཁྲིད་ཡིག །སྙིང་པོ་དོན་གསུམ་གྱི་ཁྲིད་ནི། སྐྱབས་སེམས་སྔོན་དུ་སོང་ནས། རང་ ཚེ་འདི། གི་སྤྱི་བོར་པདྨ་དང་ཟླ་བའི་གདན་ལ། ངོ་བོ་བླ་མ་རྣམ་པ་ཤེལ་གྱི་མཆོད་རྟེན་སྒོ་སྟོང་ལྡན་སྒོ་རེ་རེ་ལ་སངས་རྒྱས་སྟོང་རྩ་བཞུགས་པར་མོས་ལ། ངག་ཏུ། སྐྱེ་མེད་ཆོས་སྐུའི་ངོ་བོ་བླ་མ་རིན་པོ་ཆེ་ལ་གསོལ་བ་འདེབས་སོ། །འགག་མེད་ལོངས་སྐུའི་ངོ་བོ༴ གནས་མེད་སྤྲུལ་སྐུའི་ངོ་བོ༴ སྐུ་གསུམ་བདེ་ཆེན་གྱི་ངོ་བོ༴ སོགས་བརྗོད་ནས་སྙིང་པདྨ་དམར་པོ་འདབ་མ་སྟོང་ལྡན་གྱི་དབུས་སུ་ཧྲཱིཿ ལས་ཇོ་བོ་ཁ་སརྤ་ཎི་ཚོན་གང༌། འདབ་མ་རྣམས་ལ་རྩྭ་ཁའི་ཟིལ་པ་འདྲ་བའི་ཨཱཿ སྟོང་བསྒོམས་ལ། ངག་ཏུ། ༀ་ཨཱཿ ཧྲཱིཿ ཧཱུཾ་ཞེས་བགྲངས་པས་ཨཱཿ ཡིག་རྣམས་བདུད་རྩིར་ཞུ་བས་ལུས་གང་སྡིག་སྒྲིབ་སྦྱང་བར་མོས་སོ། །མཐར་རང་སེམས་སྐྱེ་མེད་ཀྱི་ངང་དུ་བཞག་ཅིང༌། དེ་ལས་ལངས་ འཆི་ཁ། ནས་གདོས་བཅས་གཟུགས་ཕུང་གི་ཡ་ཐོད་ཡི་དམ་ལྷས་བཀོག་ནས་ཐོད་པའི་སྒྱེད་བུ་གསུམ་གྱི་ཁར་བཞག་པའི་ནང༌། ལུས་ལྷག་མས་གང་བ་ལ་ༀ་ཨཱཿ ཧཱུྃ། མ་དག་པའི་བག་ཆགས་སྦྱངས་ཏེ། ཟག་པ་མེད་པའི་བདུད་རྩིར་བསྒྱུར་བ་བྱམས་པ་གཙོ་བོར་གྱུར་པའི་འཁོར་འདས་ཀྱི་མགྲོན་ལ་འབུལ། མཐར་བྱམས་པའི་ཐུགས་ཀ་ནས་འོད་ཀྱི་སྦུབས་ལྕགས་ཀྱུ་དང་བཅས་བྱུང་བའི་ནང་ནས་ཡར་རང་ཁ་སརྤ་ཎིའི་རྣམ་པས་སྐར་མདའ་འཕངས་པ་ལྟར་དགའ་ལྡན་དུ་འཕོས། བྱམས་པའི་མདུན་ན་ཆོས་ཉན་པར་བསམ་ཞིང༌། ད་ལྟའི་ བར་དོ། སྣང་བ་འདི་བར་དོར་ངེས་ཤེས་བསྐྱེད་ལ། གཟུགས་ལྷ། སྒྲ་སྔགས། དྲན་རྟོག་གཉུག་མ་ལྷན་སྐྱེས་སུ་ཐག་རྦད་བཅད་དེ་བསྒོམ་མོ། །སྙིང་པོའི་དོན་ཀུན༵་ལེགས་འདོམས་ནས། །དག༵འ་བ་རང་གྲོལ༵་མཆོ༵ག་གི་བློས། །མི་ཏྲའི་དགོངས་དོན་བླ་མེད་དོན། །འདིར་ནི་ཡི་གེའི་ལམ་དུ་བཀོད། །སྙིང་པོ་དོན་གསུམ་གྱི་ཁྲིད་འདི་ཁྲོ་ཕུ་ལོ་ཙཱ་བའི་ཡི་གེ་ལས་བཏུས་པའོ། (༨) །སེམས་ཉིད་ངལ་གསོའི་ཁྲིད་ཡིག །སེམས་ཉིད་ངལ་གསོའི་ཁྲིད་ནི། སྐྱབས་སེམས་སྔོན་དུ་སོང་ནས། བཅའ་བ་ལུས་ཀྱི་ཕྱག་རྒྱ་རྣམ་སྣང་གི་ཆོས་བདུན་དང་ལྡན་པར་བྱ། བརྗོད་པ་ངག་གི་ཕྱག་རྒྱ། རླུང་ཆེད་དུ་མི་འབུད་ཆེད་དུ་མི་རྔུབ། རླུང་འགྲོ་འོང་མེད་པའི་ངང་ལ་སིང་ངེ༌། སེམས་གཡེང་བ་མེད་པའི་ངང་དུ་སིང་ངེ་བཞག །བསྒོམ་པ་ཡིད་ཀྱི་ཕྱག་རྒྱ། འདས་པའི་རྟོག་པའི་རྗེས་མི་གཅོད་འདས་པའི་འདུ་ཤེས་དོར། མ་འོངས་པའི་སྔོན་མི་བསུ་ཡིད་ཀྱི་འབྲེལ་ཐག་བཅད། ད་ལྟར་བ་ལ་དགའ་མི་དགའི་རྩིས་གདབ་པ་མེད་པར་རིག་པའི་རང་སོ་བཟུང་ནས་ཐོག་མར་མ་ཡེངས་པར་རལ་གྲི་སྐོར་མཁན་གཡུལ་དུ་འཇུག་པའི་དཔེས། སེམས་སྒྲིམ་ལྷོད་རན་པའི་ངང་ནས་གང་དུ་ཡང་མི་ཡེངས་པར་དྲན་པའི་རྒྱངས་སོ་བཙུགས་ནས་སེམས་འཁྲུལ་མེད་ཀྱི་ངོ་བོ་ལ་ཆེ་རེ་འཇོག །བར་དུ་མ་བཙལ་བར་མཁས་པ་བ་གླང་སྐྱོང་བའི་དཔེས། ཆེད་དུ་མི་འཛིན། ཆེད་དུ་མི་སྤྲོ། སེམས་རང་བབས་གང་བདེའི་ངང་མ་ལོག་པར་འབོལ་ལེ་ཤིག་གེ། སེམས་ལ་ལས་མི་འཆོལ། ཆེད་གཉེར་མི་བྱ། འཛིན་མེད་དབྱིངས་སུ་ཆོམ་མེར་བཏང་ངོ༌། །མཐར་གཟིངས་ཐོག་ནས་བྱ་འཕུར་བའི་དཔེས་ཡར་བལྟས་ནམ་མཁའ་མར་བལྟས་ནམ་མཁའ་ཁོ་ན་ལས་བབ་ས་དང་བརྟེན་ས་མ་རྙེད་པར་སྔར་གྱི་གཟིངས་ཐོག་རང་གི་སྟེང་དུ་ལྷན་བབས་ཡོང་བ་ལྟར་སེམས་གར་འཕྲོར་བཟོ་མེད་ཀྱིས་བསྐྱངས་པས་འཕྲོ་བ་ཐང་ཆད། ཆད་པ་ངལ་གསོ་བའི་ཚུལ་གྱིས་རང་བབ་མ་བཅོས་ངང་དུ། བཟོད་མེད་ཤུགས་འབྱུང་དུ་གནས་པ་ངོ་ཤེས་ཀྱི་ཡིད་ཆེས་ཀྱིས་སོར་འཇོག་པ་དེ་ཉིད་དོ། །ཐོག་མ་མེད་ནས་དུབ་པའི་སེམས། །ཀུན༵་ཏུ་ངལ་གསོའི་དག༵འ་ཚལ་ནི། །འཆིང་བ་ལས་གྲོལ༵་མཆོ༵ག་གི་གནད། །མ་བཅོས་གཏན་ཡུལ་མཚོན་དཔེའོ། །ཡང་རྩེ་བའི་ཁྲིད་ཡིག་ལས་བཏུས་སོ། (༩) །སྐྱེས་བུ་གསུམ་གྱི་ཁྲིད་ཡིག །སྐྱེས་བུ་གསུམ་གྱི་ཁྲིད་ནི། སྐྱབས་སེམས་སྔོན་དུ་སོང་ནས། སྐྱེས་བུ་ཆུང་ངུ༌། སྐྱེས་བུ་འབྲིང༌། སྐྱེས་བུ་ཆེན་པོ་རེ་རེ་ལའང་བསྒོམ་པ་དང༌། སྒྲུབ་པ་གཉིས། ༈ སྐྱེས་བུ་ཆུང་ངུ་ལ། རྟེན་མི་ལུས་ཐོབ་པ་ཉུང་བས་དོན་ཡོད་པ་བསྒོམ། འཆི་བས་འཆི་གྲབ་བསྒོམ། ལས་འབྲས་བསླུ་མེད་བསྒོམ། ཕན་ཡོན་ཆེ། དུས་མྱུར། གཞན་ལ་རེ། གྲངས། རྒྱུ། དཔེས་ངེས་ཤེས་བསྐྱེད། མྱུར་དུ་འཆི། ནང་མི་རྟག །ཕྱི་མི་རྟག །ངེས་པར་འཆི། ནམ་འཆི་ངེས་མེད། འཆི་བ་ཅིས་ཀྱང་མི་བཟློག །སྐད་ཅིག་མི་རྟག །རྒྱུན་གྱིས་མི་རྟག །སྣོན་མཁན་མེད། འགྲིབ་པས་འཆི་བ་བསྒོམ། མི་འཆི་བ་སུ་ཡང་མི་སྲིད། འཆི་བ་སེམས་ཅན་གྱི་ཆོས་ཉིད་ཡིན། ཕྱི་མི་རྟག་པ་དུར་ཁྲོད་རོ། ཤིང་གི་གྲིབ་མ། རྒྱུ་སྐར་ལ་བརྟགས་ལ་ལས་འབྲས་མི་བསླུ་བ་ངེས་པར་མྱོང་བ་ལ་འདོར་ལེན་བྱ། ནག་པོའི་ལས་ལ་ཡིད་དབྱུང༌། དཀར་པོའི་ལས་ལ་དང་བ་བསྒོམ། འབྲས་བུས་སྡུག་བསྔལ། རྒྱུ་མི་དགེ་བ་ལ་ཡིད་དབྱུང༌། རྣམ་སྨིན་གྱི་འབྲས་བུ། མྱོང་བ་རྒྱུ་མཐུན། བྱེད་པ་རྒྱུ་མཐུན། བདག་པོའི་འབྲས་བུ་བཞི། རྣམ་སྨིན་ཆེན་པོས་དམྱལ་བ། འབྲིང་པས་ཡི་དྭགས། ཆུང་ངུས་དུད་འགྲོ། མྱོང་དུས་བཟོད་མི་བཟོད་བརྟག །གཞི་སྐྱབས་འགྲོ། རྟེན་ཚུལ་ཁྲིམས། ལམ་དགེ་བ་བསྒྲུབ། ༈ སྐྱེས་བུ་འབྲིང་ལ་སྒོམ་སྒྲུབ་ལམ་གཉིས། འཁོར་བའི་ཉེས་པ། ལུས་ཉེར་ལེན་གྱི་ཉེས་པ་བསྐྱེད། མིའི་སྡུག་བསྔལ། ལྷ་མ་ཡིན་གྱི་སྡུག་བསྔལ། ལྷའི་སྡུག་བསྔལ། སྐྱེ་རྒས་ན་འཆི། མི་སྡུག་པ་དང་འཕྲད། སྡུག་པ་དང་བྲལ། འདོད་པ་བཙལ་ཏེ་མ་རྙེད། ཉེར་ལེན་ཕུང་པོ་ལྔ་སྡུག་བསྔལ་བ། སྐྱེ་བ་ལྟོ་ན་གནས་པ།བཙས་པ། བྱིས་པའི་སྡུག་བསྔལ། རྒས་པ་ཡོངས་སུ་ཉམས། ན་བ་ཡིད་མི་འོང༌། འཆི་བ། ཡུལ། ནོར། གཉེན། ལུས་དང་འབྲལ། ལྷ་ལ་འཆི་ལྟས། ཉེ་བའི་འཆི་ལྟས། ཁམས་གོང་མ་ལ། ཏིང་ངེ་འཛིན་གྱི་ཉེས་པ། ཏིང་ངེ་འཛིན་ཉམས་པ། ཁམས་འོག་ཏུ་ལྟུང་དགོས་པ། འཁྲུལ་པའི་རང་བཞིན། བསམ་པ་འཁྲུལ་པ། སྦྱོར་བ་འཁྲུལ་པ། སྐྱེ་བ་ངེས་མེད། གྲོགས་ངེས་མེད། ལས་ངེས་མེད། རིགས་དྲུག་སོ་སོའི་ལས་ཀྱི་ཉེས་པ་བསྒོམ། གཞི་རྟེན་ལམ་སྔར་ལྟར་བསྒྲུབ། ༈ སྐྱེས་བུ་ཆེན་པོ་ལ། སྒོམ་སྒྲུབ་གཉིས། ཐབས་སྙིང་རྗེ། ཤེས་རབ་སྟོང་ཉིད། རྩ་བ་ཚད་མེད། ངོ་བོ་བྱང་སེམས། སྙིང་རྗེ་སྐྱེ་བ་འདིའི་མ་ལ། སྐྱེ་བ་གཞན་གྱི་མ་ལ། མཐར་སེམས་ཅན་ཐམས་ཅད་ལ་དྲིན་ཡོད་པས། དྲིན་གསབ་དགོས་པ། དྲིན་ལན་བདེ་བ་དང་ལྡན་འདོད་བྱམས་པ་བསྒོམ། ཕན་གདགས། སྡུག་བསྔལ་འཁུར་བ། མི་འགྲུབ་པའི་གྲོགས་བྱས་པའི་དྲིན་བསབ། མིའི་སྡུག་བསྔལ་མི་བཟོད་པ་འབྲལ་འདོད་བྱང་ཆུབ་སེམས་བདག་གཞན་བརྗེ་བ། སངས་རྒྱས་ཐོབ་འདོད་ཀྱི་སྨོན་པ། ཤེས་རབ་སྟོང་པ་ཉིད། སྣོད་རང་བཞིན་མེད་པ། སེམས་རང་བཞིན་མེད་པ་གཉིས་རྡུལ་ཕྲན། རགས་པ་རེ་རེ་ལ་ཡང་རིག་ཤེས་ཀྱི་ངེས་ཤེས་བསྐྱེད། རྩ་བ་ཟུང་འཇུག་སེམས་བསྐྱེད། ལྟ་བ་བདེན་གཉིས་ཟུང་འཇུག །སྦྱོར་བ་ཚུལ་ཁྲིམས་ཟུང་འཇུག་སྒྲུབ་བོ། །སྐྱེས་བུ་ཀུན༵་གྱི་ལམ་པོ་ཆེ། །ཆུང་འབྲིང་ཆེན་པོ་དག༵འ་མགུའི་ཡིད། །རྣམ་གྲོལ༵་ཞིང་མཆོ༵ག་འདྲེན་པའི་སྲོལ། །ཆོས་ཀྱི་སྙིང་པོ་ཡི་གེར་བཀོད། །མཆིམས་ཀྱི་ཁྲིད་ཡིག་ལས་བཏུས་སོ། (༡༠) །བསྟན་རིམ་གྱི་ཁྲིད་ཡིག །བསྟན་རིམ་གྱི་ཁྲིད་ནི། སྐྱབས་སེམས་སྔོན་དུ་སོང་ནས། སྔོན་གྱི་སྟོན་པ་ ཚུལ་གནས། འཁོར་བཅས་ཀྱི་བསྟན་པ་ལ་རབ་ཏུ་བྱུང་ཞིང་བསྙེན་པར་རྫོགས། སོ་སོར་ཐར་པའི་བསླབ་པ་ལ་ནན་ཏན་དུ་མཛད་པ་ལྟར་རང་ཉིད་ཀྱིས་ཀྱང་དེ་ལྟར་བྱེད་པའི་འཕེན་པ་དང༌། དེ་བཞིན་དམ་བཅས་ཤིང་སྔར་མཁན་སློབ་ཀྱི་སྤྱན་སྔར་ཇི་ལྟར་ཁས་བླངས་པའི་སོ་སོར་ཐར་པའི་བསླབ་པ་རྣམས་ལ་རྒྱུན་དུ་དྲན་ཤེས་བག་ཡོད་བསྟེན། དེ་ཡང་ཞག་གཅིག་ཐུན་དྲུག་ཏུ་བྱས་པའི་ཐུན་རེ་རེའི་ནང་དུ་གཞི་བསྡུས་ཀྱི་བསླབ་བྱ་རགས་པ་རྣམས་དང༌། རྣམ་འབྱེད་ནས་འབྱུང་བའི་ལྟུང་བ་རྣམས་ཡིད་ལ་དྲན་པའི་སྒོ་ནས། ལྟུང་བ་སྤྱི་དང་ཁྱད་པར་འབྱུང་ཉེ་བ་རྣམས་ཀྱིས་རང་རྒྱུད་ལ་གོས་མ་གོས་ལྟ། མ་གོས་ན་དགའ་བ་བསྒོམ་ཞིང་གོས་ན་བཤགས་པར་འོས་པ་རྣམས་བཤགས། བསྡམ་པར་འོས་པ་རྣམས་བསྡམ། བྱིན་གྱིས་བརླབ་པར་འོས་པ་རྣམས་བྱིན་གྱིས་བརླབས་ཏེ་བཤགས་ཚད་དུས་ལས་མ་འདས་པར་བྱ། ཕྱིན་ཆད་མི་འབྱུང་བའི་སྡོམ་སེམས་དྲག་པོས་ཐུན་རེ་རེའི་ནང་དུ་རང་རྒྱུད་དག་པར་བྱས། དེ་ནས་ཕན་བདེའི་འབྱུང་གནས་བསྟན་པ་རིན་པོ་ཆེ་དང༌། དེ་དགེ་འདུན་ཚུལ་ལྡན་ལ་རག་ལས་པ་དང༌། བསྟན་པའི་རྩ་བ་འདུལ་བ་ཡིན་པ་སོགས་དང༌། བསླབ་པའི་གནས་རྣམས་ལ་སྔོན་གྱི་དྲང་སྲོང་རྒན་པོ་རྣམས་ཀྱིས་བསླབ་པ་ཇི་བཞིན་དུ། རང་ཉིད་ཀྱང་དེའི་རྗེས་སུ་འཇུག་ཅིང་དེ་བཞིན་དུ་སློབ་པར་བྱེད་དོ། །རྗེས་ནི་སྔོན་གྱི་རབ་བྱུང་ཀུན་གྱིས་འདི་ཉིད་ཉམས་སུ་བླངས་པ་དང༌། འདི་ཉིད་ཉམས་ལེན་གྱི་གཙོ་བོར་ངོས་བཟུང༌། སྐལ་ལྡན་འདིས་གྲོལ་བ༑ རང་ཉིད་ཀུན་གྱིས་མཆོད་པའི་རྟེན་དང༌། ཐར་འདོད་ཚུལ་འདིར་འཇུག་ཅིང་སྐྱེ་བོ་གཞན་ཡང་འདིར་འཇུག་པ་སོ་སོར་ཐར་པའི་ཚུལ་ཁྲིམས་ལ་མཁྱེན་ལྡན་དཔང་དུ་བཞག་སྟེ། འཁྲུལ་མེད་ཀྱི་འདུལ་བའི་བསླབ་ཁྲིམས་རྣམ་པར་དག་པ་དང༌། སྔོན་གྱི་ ཐོས་བསམ་སྒོམ། རྒྱལ་སྲས་བྱང་ཆུབ་སེམས་དཔའ་མ་ལུས་པས། སེམས་ཅན་གྱི་དོན་དུ་གཏོང་དཀའ་བ་རང་གི་ལུས་སྲོག་ཀྱང་ཕོངས་པ་མེད་པར་སྦྱིན་པའི་ཚུལ་ལ་དཔགས་ཏེ། འགྲོ་དྲུག་ཕ་མར་གོ་བའི་བྱམས་བརྩེ་ཕྱོགས་རིས་མེད་པ་སྙིང་ནས་བསྐྱེད། སུ་ལ་ཡང་འཁོན་གཅུགས་མེད་པའི་བཟོད་པ་དང༌། ལེ་ལེན་ཐམས་ཅད་རང་གི་བདག་འཛིན་ཁོ་ན་ལ་ཐུག་པའི་དྲན་ཤེས་ཁྱད་པར་ཅན་གྱི་གཉེན་པོ་བསྐྱེད་ཅིང་དངོས་དང་བརྒྱུད་ནས་གཞན་ལ་ཅི་ཕན་དང༌། ལས་འབྲས་བླང་དོར། བྱམས་སྙིང་རྗེ་ཞི་ལྷག་ཟུང་འབྲེལ་སོགས་ལ་རིམ་གྱིས་སྦྱང་ཞིང་ནན་ཏན་དུ་བྱེད་པ་ཉིད་དོ། །ཀུན༵་ནས་ཚུལ་ཁྲིམས་དག་པ་ནི། །དག༵འ་བ་རྒྱ་ཆེན་རྣམ་གྲོལ༵་མཆོ༵ག །ཉན་ཐོས་བསམ་སྦྱོར་ལས་བཟློག་པའི། །བསྟན་རིམ་ཡི་གེར་བཀོད་འདིའོ། །མཆིམས་ཀྱི་ཡིག་རྙིང་ལས་བཏུས་སོ། (༡༡) །སྲིད་ཞི་མཉམ་ཉིད་ཀྱི་ཁྲིད་ཡིག །སྲིད་ཞི་མཉམ་ཉིད་ཀྱི་ཁྲིད་ནི། སྐྱབས་སེམས་སྔོན་དུ་སོང་ནས། སྲིད་པ་འཁོར་ ཀུན་རྫོབ། བའི་གནས་ཚུལ་སྡུག་བསྔལ་ཟོ་ཆུན་གྱི་འཁོར་མོ། རང་སྡུག་རང་ཉོས་ཀྱི་ལས་ངན། དམུས་ལོང་འབྲོག་དགོན་དུ་འཁྱམས་པའི་སྣང་ཚུལ་འདི་ལ་ཉིན་མཚན་དུས་དྲུག་ཅེར་རེ་དྲན་པའི་མེལ་ཚེ་བཏང་བས། ཞི་བ་མྱང་འདས་ཀྱི་གཏན་ཡུལ། བདེ་བ་ཀུན་སྣང་གི་གྲོང་ཁྱེར། དགེ་རྩ་ཡོངས་སྨིན་གྱི་ཞིང་བཟང༌། ཕན་བདེ་ཡོངས་ཁྱབ་ཀྱི་དགའ་ཚལ་གྱི་རྣམ་བཀོད་ལ་ཡང་སྔར་ལྟར་ཡིད་ཀྱིས་ཆེར་བལྟས་པས་བདེ་སྡུག་སྤང་བླང་གི་དྲན་ཤེས་གྲུངས་པོ་གཅིག་ནང་དུ་ལྷང་འཆར་ཏེ་འདིར་འཁོར་བའི་ཚུལ་ལ་སྐྲག་ཅིང་ཡིད་དབྱུང༌། མྱང་འདས་ཀྱི་གནས་ལ་ཨ་འཐས་ཤིང་ཞེན་པའི་བློས་ཉན་རང་དམན་པའི་གནས་སུ་གོལ་བས། འཇིགས་འཕྲང་འདིར་སྲིད་པ་གསུམ་གྱི་སེམས་ཅན་ཐམས་ཅད་ཕ་མར་མ་གྱུར་པ་གཅིག་ཀྱང་མེད་ལ། ཕ་མ་བྱས་རེས་ཀྱིས་དངོས་ཀྱི་ཕ་མའི་དྲིན་བཞག་པ་འདྲ་བས་ཁྲེལ་བོར་རང་དོན་གྱི་སྐྱིད་ལ་ཞེན་པས་ཅི་ཆོག །སྲིད་པར་འཁྱམས་པའི་འགྲོ་དྲུག་སེམས་ཅན་མ་ལུས་པའི་སྡུག་བསྔལ་རྒྱུ་བཅས་གཞོམ་བྱེད་བདག་གི་ལུས་ངག་ཡིད་གསུམ་དཀར་པོ་དགེ་བའི་བྱ་བ་ལ་ཉིན་མཚན་ཆད་པ་མེད་པར་འཁོལ་སྙམ་པའི་བསམ་སྦྱོར་ཤུགས་དྲག་པོ་བསྐྱེད་དོ། །མགོན་མེད་ཀྱི་སེམས་ཅན་ཡོངས་ལ་སྙིང་རྗེ་བསྒོམ། བྱམས་པར་བྱ། ཕན་འདོགས། སྡིག་ལས་ལྡོག །ཕ་མ་བརྩེ་གདུང་ཅན་གྱིས་བུ་ལ་བགྱི་བའི་དཔེ་ལ་བསླབ་ཅིང༌། མངོན་ཚན་ཆུང་ལ་དུས་སུ་འདོམས་པར་ལག་ལེན་བྱ། དེ་ཉིད་ཀྱང་མཛེས་མཆོར་རང་བསྟོད་ཀྱི་རྒྱུར་སོང་དོགས་ཁོ་ནའི་འཕྲང་འགག་བྱས་ལ། མཐར་ དོན་དམ། སྲིད་ཞིའི་རང་བཞིན་རང་ངོས་མཉམ་པ་ཉིད་དུ་གདོད་མ་ནས་གནས་པའི་རང་བབས་ལ་ཡིད་སོམ་ཉི་མེད་པར་བཞག །རེ་དོགས་སྤུ་ཙམ་ཡང་མེད་པའི་གང་དགའ་ཤོག་ཉིད་གེགས་སེལ་དང༌། ལུས་ངག་ཡིད་ཀྱིས་སྤྱད་པའི་དགེ་བའི་རྩ་བ་ཅི་དང་ཅི་ཡོད་པའི་མཐུས། མ་རྒན་ནམ་མཁའ་དང་མཉམ་པའི་སེམས་ཅན་ཐམས་ཅད་གནས་སྐབས་བདེ་ཞིང་མཐར་ཐུག་སངས་རྒྱས་ཐོབ་པའི་རྒྱུར་གྱུར་ཅིག་ཅེས་བསམ་ཞིང་བརྗོད་པས་བོགས་འདོན། གཡས་ནས་ཙནྡན་གྱི་ལྡེ་གུ་དང༌། གཡོན་ནས་ཁྱི་ལུད་ཀྱིས་བྱུག་པ་ལ་དགག་སྒྲུབ་བྲལ་བ་ནི་བསྒོམ་གནད་དུ་སོང་བའི་དཔེ་བཞིན་ཡིན་གསུང་ངོ༌། །སྲིད་ཞི་ཀུན༵་ཏུ་མཉམ་པའི་བློས། །འབད་ནས་དག༵འ་བས་བསྒོམས་པ་ལས། །བདེ་སྡུག་རང་གྲོལ༵་མཆོ༵ག་གི་སེམས། །ལེགས་སྟོན་འཁྲིད་ཚུལ་ཡི་གེར་བཀོད། །མཆིམས་ཀྱི་ཁྲིད་ཡིག་ལས་བཏུས་སོ། (༡༢) །དབུ་མ་ཆེན་པོའི་ཁྲིད་ཡིག །དབུ་མ་ཆེན་པོའི་ཁྲིད་ནི། སྐྱབས་ སྔོན་འགྲོ། སེམས་སྔོན་དུ་སོང་ནས། སྣང་ ཤེས་རབ། སྟོང་གནས་ལུགས་ལ་བརྟགས་ཏེ༑ སྣང་བ་ནི་མ་འགགས་སྣ་ཚོགས་སུ་འཆར་བ་འདི་ཉིད་ཡིན་ལ། སྟོང་པའི་གོ་བ། བུམ་པ་ཆག་ནས་སྟོང་པའམ། བུམ་པ་སྣམ་བུས་སྟོང་པ་ལྟ་བུའི་སྟོང་པའམ། རི་བོང་རྭ་ལྟར་ཅང་མེད་སྟོང་པ་མིན། སྣང་དུས་ན་རང་རིག་དེའི་རང་བཞིན་གྱིས་སྟོང་པ་ཡིན། དེའང་ཀུན་རྫོབ་ཏུ་བདེན་པས་སྟོང་པ་སྒྱུ་མ་ལྟ་བུ་དང༌། དོན་དམ་པ་ངོ་བོས་སྟོང་པ་ནམ་མཁའ་ལྟ་བུ། མདོར་ན་ཇི་ལྟར་སྣང་ཡང༌། དེ་ལྟར་བདེན་པར་གྲུབ་པ་སྐྲ་རྩེ་ཙམ་ཡང་མེད། དེ་བཀག་པའི་སྟོང་པ་མིན། བྱས་པའི་སྟོང་པ་མིན། སྣང་བ་དེ་རང་ལ་ལྟོས་པའི་སྟོང་པ་ཁོ་ན་ཡིན་ནོ། །ཉམས་ལེན་ ཐབས། དུས་ལུས་བསམ་གཏན་གྱི་འདུག་སྟངས་དང་ལྡན་པའི་ངང་ནས། དང་པོ་ཤེས་པ་བག་ཙམ་སྒྲིམ། མཇུག་ཏུ་ཀློད་ཀྱིས་ལྷོད། ལས་དང་པོ་བས་ཐུན་ཆུང་ལ་གྲངས་མང་བར་བྱ། དེ་ ཐབས་བྱུང་། ལྟར་བསྒོམས་པས་གསལ་བདེ་མི་རྟོག་པའི་ཉམས་གསུམ་འཆར་ཞིང༌། སེམས་གང་དུ་ཡང་མི་འཕྲོ་བ་གར་སྤྱིན་ལ་ལག་པ་བཞག་པ་འདྲ་བ་ལྷན་ནེ་གནས་པ་ཞིག་ཡོང་ཞིང༌། ཆོས་ཉིད་སྤྲོས་བྲལ་གྱི་ངང་ལ་ཤེས་པ་ཡང་སྤྲོས་དང་བྲལ་བར་འཇོག་ལ། སེམས་མ་རྨུགས་པའི་གསལ་ཆ་དང༌། ཡུལ་རྐྱེན་ལ་མི་འཕྲོ་བའི་རྩེ་གཅིག་པའི་འཆར་སྒོ་ལ་ཞི་གནས། དེའི་རང་བཞིན་རྣམ་པར་མི་རྟོག་པ་ནམ་མཁའི་དཀྱིལ་ལྟར་ངོས་གཟུང་བྲལ་བ་ལ་ལྷག་མཐོང་དུ་བཏགས་ལ། དམིགས་པ་འཛིན་བློས་མ་རེག་པའི་སོར་འཇོག་ཉིད་དང༌། རྗེས་ཤེས་རྨི་ལམ་སྒྱུ་མའི་ཚུལ་གྱི་སྤྱོད་ལམ་རྣམ་བཞིར་ཉམས་སུ་ལེན། ཡོད་མེད་བརྟགས་དཔྱད་ཀྱི་སྤུ་རིས་ཤུགས་འབྱུང་ལ་རིམ་གྱིས་རྩལ་སྦྱངས་པས། མཐའ་བརྒྱད་སྤྲོས་པའི་དྲི་མས་མ་གོས་པའི་གནས་ལུགས་དང་ཞལ་མཇལ་ཏེ་མཆི་གསུངས། ཆོས་ཀུན༵་སྙིང་པོ་དབུ་མ་ཆེ། །མཁས་པ་དག༵འ་དགར་མ་དཔྱད་ཅིང༌། །བླུན་བསྒོམ་ཡུལ་ལས་རྣམ་གྲོལ༵་བ། །མཐའ་བྲལ་མཆོ༵ག་གི་ལམ་ཆེན་ཉིད། །བྱང་སེམས་ཟླ་རྒྱལ་གྱི་ཁྲིད་ལས་བཏུས་སོ། (༡༣) །བཀའ་གདམས་ལྐོག་ཁྲིད་ཀྱི་ཁྲིད་ཡིག ༑བཀའ་གདམས་ལྐོག་ཁྲིད་ཀྱི་ཁྲིད་ནི། སྐྱབས་སེམས་སྔོན་དུ་སོང་ནས། རྡོ་ལེབ་གཅིག་བསམ། དེའི་སྟེང་དུ་རང་ལུས་བཞག །དེ་ལ་རྒྱལ་བསེན་ས་བདག་ཐེའུ་རང་བཞིས་ཕྱོགས་བཞི་ནས་ཐོ་བ་རེ་ཐོགས་ནས་བརྡུངས་པས་ཤ་ཁྲག་གི་ཟེགས་མས་སུམ་གཉིས་ཙམ་བཀང༌། རྒྱལ་བསེན་ས་བདག་ཐེའུ་རང་བཞིས་གྲི་རེ་རེས་གཏུབས། རྒྱལ་བསེན་ཀླུ་གསུམ་གྱིས་ཆགས་སྡང་རྨོངས་གསུམ་བསྐྱེད་དེ། རང་ཤ་རང་གིས་ཟ་བས། དེ་ནས་མདུན་དུ་བསེན་མོ་བཀུག་ནས་སྙིང་རྗེ་བསྒོམ། ལུས་ཤ་རུལ་བསེན་མོས་ཟོས་པས་ཚིམ་པར་བསམ། མོའི་སེམས་ཉིད་ཐིག་ལེ་སྙིང་ཁ་ནས་བྱུང༌། སྣ་བུག་གཡས་ནས་མདུན་ན་གནས་པ། རང་སེམས་ཐིག་ལེ་ཡང་ཡར་རྒྱང་ཐོན་པར་བསམ། མོའི་སེམས་ཇེ་རིང་ཇེ་རིང་ལ་མཁའ་ལ་ཡལ། རང་སེམས་ཐིག་ལེ་མོའི་སྣ་བུག་གཡོན་དུ་ནུབ་སྟེ། མོའི་གཟུགས་ནམ་མཁའ་ལ་སྟོང་སངས་སངས་སོང༌། དེའི་ངང་ལ་བཞག །རྒྱལ་པོ་ལ་ལུས་སྦྱིན་པ་སྔར་དང་འདྲའོ། །གནོད་བྱེད་ཀླུ་མདུན་དུ་བཀུག །རོ་སྟོད་དུ་ཁོའི་ཕོ་བྲང་བསམ། ཕོ་བ་ཁྲག་དང་ཆུ་སེར་མཚོ་དང༌། རྒྱུ་མ་ལོང་ཁ་འཁོར་གྱི་སྦྲུལ་དང་སྲིན་བུ་ས་བདག་སྦལ་ལྕང་ལ་སོགས་པ་འཁོར་དང༌༑ དོན་སྙིང་སྣ་ལྔ་རིན་ཆེན་ལྔ་དང་མི་གཙང་ལྗན་ལྗིན་དྲི་དང་སྤོས་སུ་བསམ། དེ་ནས་ཁོས་གཙོར་བྱས་པའི་སེམས་ཅན་ཐམས་ཅད་ཀྱི་སྡིག་སྒྲིབ་ཐམས་ཅད་ཀོ་བ་སྐྱི་གྲིས་བཞར་བ་བཞིན་དུ་བྱུང་ནས་རང་ལ་སྨིན་པར་བསམ། རང་གི་དགེ་བདེ་ཐམས་ཅད་ཁོང་ལ་སྨིན་པར་བསམ། དར་ཅིག་བསྒོམ། ལམ་གཅིག་ཆོད། འདུན་མ་གཅིག་དྲིལ། རྟོགས་པ་འབུར་འཇོམས། གཉེན་པོ་བཅོམ་བརྡེག་ལ་ས་ལམ་མི་བརྩི། ང་བདག་དེ་རིང་བརླགས་ན་དེ་རིང་སངས་རྒྱ། སང་མེད་ན་སང་སངས་རྒྱ། ང་བདག་ནམ་མེད་ན་སངས་རྒྱ་བ་ཡིན་ནོ། །ཀུན༵་ནས་མ་ཐུལ་གྱོང་པོའི་སེམས། །དག༵འ་བཞིན་སྦྲུལ་མདུད་གྲོལ༵་ཚུལ་དུ། །བདག་འཛིན་མཆོ༵ག་ཏུ་སྤོང་བའི་ཐབས། །དམིགས་ཐོ་ཡི་གེར་བཀོད་འདིའོ། །མཆིམས་ཀྱི་ཡིག་རྙིང་ལས་བཏུས་སོ། (༡༤) །ཐུབ་པའི་ཁྲིད་ཡིག །བཀའ་གདམས་ལྷ་བཞིའི་ཐུབ་པའི་ཁྲིད་ནི། སྐྱབས་སེམས་སྔོན་དུ་སོང་ནས། མདུན་དུ་སེང་ཁྲི་པད་ཟླའི་གདན་ལ། ཞིང་འདིའི་བསྟན་པའི་བདག་པོ་བཅོམ་ལྡན་འདས་ཐུབ་པའི་དབང་པོ་སྐུ་གསེར་གྱི་གཏན་པ་ཕྱིས་པ་ལྟར་འོད་འབར་བ་ཆོས་གོས་རྣམ་གསུམ་གསོལ་བ་ས་གནོན་མཉམ་བཞག་རྡོ་རྗེ་སྐྱིལ་ཀྲུང་མཚན་དཔེས་བརྒྱན་པ་འོད་ཟེར་ཕྱོགས་བཅུར་འཕྲོ་བ་ཞིག་བསམས་ལ། ལུས་ཀྱི་བཅའ་བ། སེམས་ཀྱི་བཞག་ཐབས་ལ། རྟེན་བཅས་ཀྱི་ཞི་གནས། རྟེན་མེད་ཀྱི་ཞི་གནས། ཆ་ཤས་ཀྱི་རྟེན་བཅས། རྫོགས་པའི་རྟེན་བཅས། སེམས་འཇོག །ཀུན་ཏུ་འཇོག །ངེས་པར་འཇོག །ཉེ་བར་འཇོག །དུལ་བར་བྱེད། ཞི་བར་བྱེད། ཉེ་བར་ཞི་བར་བྱེད། རྒྱུན་གཅིག་ཏུ་བྱེད། མཉམ་པར་འཇོག་པར་བྱེད། ལྷག་མཐོང་བསྒོམ། གང་ཟག་གི་བདག་མེད། ཆོས་ཀྱི་བདག་མེད། རྒྱུའི་བདག་མེད། ངོ་བོའི་བདག་མེད། མཉམ་བཞག་གིས་ལམ་དུ་བྱ། རྗེས་ཐོབ་ཀྱིས་སྒྲོ་འདོགས་བཅད། བདག་མེད་ངོ་བོའི་རང་བཞིན་མེད། རྒྱུའི་རང་བཞིན་མེད། འབྲས་བུའི་རང་བཞིན་མེད། རྟེན་འབྲེལ་གྱི་རང་བཞིན་མེད། ཡུལ་རང་བཞིན་མེད། ཡུལ་ཅན་རང་བཞིན་མེད། ཆོས་ཐམས་ཅད་རང་བཞིན་མེད། དངོས་པོའི་རང་བཞིན་མེད། དངོས་མེད་རང་བཞིན་མེད། སྣོད་རང་བཞིན་མེད། སེམས་ཅན་རང་བཞིན་མེད། ཐུབ་པ་སངས་རྒྱས་ཀུན༵་འདུས་ཁྲིད། །དག༵འ་སྤྲོ་ཟུང་འབྲེལ་རྣམ་གྲོལ༵་མཆོ༵ག །མྱུར་བགྲོད་གདམས་པའི་དམིགས་པའི་ཐོ། །ཡི་གེའི་སྒོ་ནས་གསལ་བར་བྱས། །ཡིག་རྙིང་ལས་བཏུས་སོ། (༡༥) །མི་གཡོ་བའི་ཁྲིད་ཡིག །བཀའ་གདམས་ལྷ་བཞིའི་མི་གཡོ་བའི་ཁྲིད་ནི༑ སྐྱབས་སེམས་སྔོན་དུ་སོང་ནས། སྟན་ལ་ལུས་གནད་བཅས་ཧཱུྃ་ལས་སྐད་ཅིག་གིས་ལྷའི་སྐུར་ཝལ་གྱིས་དམིགས་དུས། སྐུ་མདོག་སྔོན་པོ་ཞལ་གཅིག་ཕྱག་གཉིས་པ། གཡས་ཡེ་ཤེས་ཀྱི་རལ་གྲི་འཕྱར་ཞིང༌། གཡོན་རྡོ་རྗེའི་ཞགས་པ་དང་བཅས་པས་ཐུགས་ཀར་སྡིགས་མཛུབ་མཛད་པ། དབུ་སྐྲ། སྨ་ར། སྨིན་མ་དམར་སེར་གྱེན་དུ་འབར་བ། དམར་ཞིང་ཟླུམ་པའི་སྤྱན་གསུམ་འཁྱུག་ཅིང༌། ཚེམས་ཀྱིས་མ་མཆུ་མནན་པ༑ རིན་པོ་ཆེ་དང་ཀླུ་ཆེན་བརྒྱད་ཀྱིས་བརྒྱན་པ། སྟག་ལྤགས་ཀྱི་ཤམ་ཐབས་ཅན། གཡས་བསྐུམ་གཡོན་བརྐྱང་བ། བགེགས་ཀྱི་རྒྱལ་པོ་གླང་པོ་ཆེའི་སྣ་ཅན་གྱི་སྟེང་ན་བརྫིས་པ། སྤྲུལ་པའི་ཁྲོ་ཆུང་དུ་མའི་འཕྲོ་འདུ་དང༌༑ ཡེ་ཤེས་ཀྱི་མེ་འབར་བའི་དབུས་ན་བཞུགས་པ། དེའི་ཐུགས་ཀར་པད་ཉིའི་སྟེང་དུ་ཧཱུྃ་གི་མཐར་ཡི་གེ་བཅུ་པས་བསྐོར་བ་ལས་དྲག་པོའི་མེ་ལྕེ་འཇིག་དུས་བསྐལ་པའི་མེ་ལྟར། ཚ་བ་རྩུབ་པ། དྲག་པ། རྣོ་བ། སྟོབས་ལྡན་ཤུགས་བཅས་མྱུར་བ་མཚན་ཉིད་བདུན་ལྡན་འབར། ཐོག་མར་ཧཱུྃ་སྔགས་ཕྲེང་དང་བཅས་པ་མེ་ནང་དུ་འུར་གྱིས་འབར་ཞིང༌། དེ་ལས་ཀྱང་མེ་ལྕེ་འཁྱོགས་པོས་རང་གི་ལུས་ནང་དམར་མེར་གང་ནས་ལུས་ཀྱི་སྒོ་དགུ་ནས་མེ་ལྕེ་སྦྲུལ་གྱི་ལྕེ་ལྟར་དམར་ཉུག་ཉུག་བྱུང་ཞིང༌། མཐར་བ་སྤུའི་སྒོ་ཐམས་ཅད་ནས་དམར་ལམ་ལམ་མཆེད། ཕྱིའི་མེའི་གུར་ཁང་དང་འདྲེས་པ་ལས། འདོམ་དང༌། མདའ་རྒྱང་དང༌། རྒྱངས་གྲགས་དང༌། དཔག་ཚད་ཀྱི་བར་དུ་ལྷབ་ལྷབ་འབར་ཞིང་མཆེད་པས། བསྟན་དགྲ་གདུག་པ་ཅན་རྣམས་དང༌། ནད་དང་དལ་ཡམས་ཀྱི་བདག་མོ་མཐུ་མོ་ཆེ་རྣམས་རྒྱ་མཚོའི་མཐར་བསྐྲད་ཅིང་བྱེར་བར་དམིགས་ལ་སྔགས་བཟླ། སྤྱན་གཡས་པའི་ནང་དུ་ཡི་གེ་མཾ་ལས་ཉི་མའི་དཀྱིལ་འཁོར་གཅིག་བསམ། དེས་སངས་རྒྱས་ཀྱི་ཞིང་ཁམས་དང༌། རྒྱུ་འབྲས་རྟེན་འབྲེལ་འཁོར་འདས་ཀྱི་ཆོས་ཐམས་ཅད་ལ་གཟིགས་པ་དང༌། སྤྱན་གཡོན་པའི་ནང་དུ་ཨ་ལས་ཟླ་བའི་དཀྱིལ་འཁོར་གཅིག་བསམ། དེས་ཆོས་ཐམས་ཅད་ཅིར་ཡང་མ་དམིགས་པའི་སྟོང་པ་ཉིད་དུ་གཟིགས་པ་དང༌། སྤྱན་དེ་གཉིས་ཀྱི་དབུས་སུ། སྤྱན་ཁྲ་ཧུ་རེ་བ་ཞིག་བྱུང༌། དེས་ཐབས་ཤེས་དབྱེར་མེད་ཞི་ལྷག་ཟུང་འཇུག་རྟག་ཆད་ཡོད་མེད་ལ་སོགས་དབྱེར་མེད་ཟུང་འཇུག་ཏུ་གསལ་ལེར་གཟིགས་པར་བསམས་ལ་རྩེ་གཅིག་ཏུ་མཉམ་པར་བཞག །འཕོ་བ་བྱེད་ན། ལུས་གནད་རླུང་སྦྱོར། ཡི་དམ་ཝལ་བསྒོམ། ༀ་ཙཎྜ་མ་ཧཱ་རོ་ཥ་ཎ་ཧཱུྃ་བྱས་པས་ཆོས་ཐམས་ཅད་སྒྲ་བརྙན་ཙམ་དུ་བསམ། ཕཊ་བྱས་པས་སེམས་ཉིད་བྲག་ཆ་ཡལ་བ་ལྟ་བུར་བསམ། དགེ་བཤེས་སྣེ་ཟུར་བ་སྐུ་འདའ་ཁར། ༀ་ཙཎྜ་མ་ཧཱ་རོ་ཥ་ཎ་ཧཱུྃ་ཞེས་གསུང་ཞིང་ཅུང་ཞིག་བཞུགས་ནས་ཕཊ་ཅེས་གསུང་སྤྱན་གྱེན་ལ་ཧྲིག་མཛད་ནས་གཤེགས་སོ། །སྤྱི་བོའི་གཙུག་ཏུ་རླངས་པ་ཇ་ཁོག་ཁ་བྱེ་བ་ཙམ་བྱུང་ལོ། མི་གཡོ་ཁྲོ་རྒྱལ་ཀུན༵་འདུས་ཁྲིད། །དག༵འ་སྤྲོ་ཟུང་འབྲེལ་རྣམ་གྲོལ༵་མཆོ༵ག །མྱུར་བགྲོད་གདམས་པའི་དམིགས་པའི་ཐོ། །ཡི་གེའི་སྒོ་ནས་གསལ་བར་བྱས། །སྔོན་གྱི་ཡིག་རྙིང་ལས་བཏུས་སོ། (༡༦) །སྤྱན་རས་གཟིགས་ཀྱི་ཁྲིད་ཡིག །བཀའ་གདམས་ལྷ་བཞིའི་སྤྱན་རས་གཟིགས་ཀྱི་ཁྲིད་ནི། སྐྱབས་སེམས་སྔོན་དུ་སོང་ནས། རང་ཉིད་པད་ཟླའི་སྟེང་ན་འཕགས་པ་སྤྱན་རས་གཟིགས་ཞལ་གཅིག་ཕྱག་བཞི་པར་ལམ་གྱིས་གསལ་བའི་སྐུ་ལུས་ཀྱི་བ་སྤུའི་སྒོ་ཉི་མའི་འོད་ཅེས་པ་ན། བྱང་ཆུབ་སེམས་དཔའ་བྱེ་བ་ཁྲག་ཁྲིག་དུ་མ་དང༌། གསེར་གྱི་རི་ཁྲི། རི་རེ་རེ་ལ་ཡང་རྩེ་མོ་ཁྲི་ཉིས་སྟོང༌། རིན་པོ་ཆེའི་ཁང་བཟང་སྐྱེད་ཚལ་རྒྱན་བཀོད་དུ་མས་བརྒྱན་པ། ཡི་གེ་དྲུག་པའི་ཆོས་སྒྲ་སྒྲོགས་པ། བ་སྤུ་དེའི་ནང་ན་ཡང་རྒྱལ་བའི་དབང་པོ་ཞེས་བྱ་བའི་བ་སྤུའི་ཁུང་བུ་ན་ལྷའི་གསེར་རི་བརྒྱད་ཁྲི་རིན་པོ་ཆེའི་བྲག་རི་ལྗོན་ཤིང་དག་དང༌། ཟས་གོས་ལྷའི་རང་བཞིན་ལས་གྲུབ་པ་ལ། བྱང་ཆུབ་སེམས་དཔའ་དག་སྤྱོད་ཅིང་ཡི་གེ་དྲུག་པའི་ཆོས་སྒྲ་སྒྲོག་གོ །བ་སྤུ་དེ་འདས་པ་ན་སྨན་ཆེན་པོ་ཞེས་བྱ་བའི་བ་སྤུའི་ཁུང་བུ་ན་བྱང་ཆུབ་སེམས་དཔའ་སེམས་བསྐྱེད་མ་ཐག་བྱེ་བ་ཁྲག་ཁྲིག་བརྒྱད་སྟོང༌། རྡོ་རྗེ། དངུལ། གསེར། ཨིནྡྲ་ནཱི་ལ། པདྨ་རཱ་ག །མར་གད། ཤེལ་གྱི་རི་རྩེ་མོ་བརྒྱད་ཁྲི་ཡོད་པ། དྲི་ཟའི་སིལ་སྙན་གྱི་སྒྲ་ལས་ཡི་གེ་དྲུག་པའི་ཆོས་ཀྱི་དབྱངས་འབྱིན་ཅིང༌། གང་སེམས་ཐོག་མ་བསྐྱེད་པའི་བྱང་ཆུབ་སེམས་དཔའ་དེ་དག་སྟོང་པ་ཉིད་དང་མཚན་མ་མེད་པ་སེམས་ཏེ། ཀྱེ་མ་ཧོ་སྡུག་བསྔལ་ལོ། །སྐྱེ་རྒ་ན་འཆི་ལ་སོགས་ལ་སྐྱོ་བས་སྐྱིལ་མོ་ཀྲུང་བཅས་ཏེ། ལུས་དྲང་པོར་བསྲངས་ནས། དྲན་པ་མངོན་པར་བཞག་སྟེ་རི་དེ་དག་ལ་འཁོད་དོ། །བ་སྤུ་དེ་ཡང་འདས་པ་ན་སྣ་ཚོགས་པའི་རྒྱལ་པོ་ཞེས་བྱ་བའི་བ་སྤུའི་ཁུང་བུ་ན་རང་སངས་རྒྱས་བྱེ་བ་ཁྲག་ཁྲིག་བརྒྱ་སྟོང་དུ་མ་མེ་འབར་བ་དང༌། ཆར་འབེབས་པ་དང༌། ཆོ་འཕྲུལ་སྣ་ཚོགས་སྟོན་ཅིང་རིན་ཆེན་སྣ་བདུན་ལས་གྲུབ་པའི་རིའི་རྒྱལ་པོ་བརྒྱ་ཕྲག་སྟོང་དག་ལས་འདོད་དགུ་འབྱུང་བའི་དཔག་བསམ་སྡོང་པོ་རྩ་བ་མུ་ཏིག །ལོ་མ་གསེར་དངུལ། མེ་ཏོག་མན་ཤེལ་ལས་བྱས་པ་དག་ལས་རྒྱན་ཆ་དུ་མ་དང༌། ཀཱ་ཤི་ཀཱའི་གོས་རྣམས་འཕྱང་ངོ༌། །དེ་འདྲ་བའི་རི་དག་ལ་རང་སངས་རྒྱས་རྣམས་བཞུགས་ནས་གསུང་རབ་ཡན་ལག་བཅུ་གཉིས་ཀྱང་ཡི་གེ་དྲུག་པའི་སྒྲར་སྟོན་ཏོ། །ཐམས་ཅད་ཀྱི་ཐ་མ་ན་བ་སྤུའི་ཁུང་བུ་རྒྱལ་མཚན་གྱི་རྒྱལ་པོ་ན་རིན་པོ་ཆེའི་རི་བརྒྱད་ཁྲི་བཞི་སྟོང་དཔག་བསམ་དང༌། ཙནྡན་དང༌། བྱི་རུའི་ཤིང་དེ་སྙེད་ཡོད་ཅིང༌། རིན་པོ་ཆེ་འབར་བའི་ཁང་བརྩེགས་ན་དེ་བཞིན་གཤེགས་པའི་སྐུ་འཛམ་བུ་གླིང་དུ་མངོན་པར་ཕྱོགས་ཤིང་ཆོས་འཆད་པ་ཕར་ཕྱིན་དྲུག་གི་ཡི་གེ་དྲུག་ཏུ་སྟོན་པར་མཛད་པ་ཡང་བཞུགས་ཏེ། མདོར་ན་སྐྲ་ཙམ་ཁྱོན་ལ་དུས་གསུམ་གྱི་ཚད་སྙེད་ཀྱི༑ སངས་རྒྱས་བྱང་སེམས་བཞུགས་ནས་ཡི་གེ་དྲུག་པའི་སྒྲ་དབྱངས་སྒྲོག་ཅིང༌། དེ་དག་ལས་བྱུང་བའི་འོད་ཟེར་བྱེ་བ་ཁྲག་ཁྲིག་བ་སྤུའི་སྒོ་བྱེ་བ་ཕྲག་བརྒྱ་ནས་ཕྱུང་སྟེ། འགྲོ་དྲུག་གི་བག་ཆགས་སྦྱོང་བར་རྩེ་གཅིག་ཏུ་དམིགས་པའི་ངང་དང་མ་བྲལ་བར། ༀ་མ་ཎི་པདྨེ་ཧཱུྃ། ཞེས་ཅི་ནུས་བགྲང་བ་ཉིད་དོ། །སྤྱན་གཟིགས་ཞི་ལྷ་ཀུན༵་འདུས་ཁྲིད། །དག༵འ་སྤྲོ་ཟུང་འབྲེལ་རྣམ་གྲོལ༵་མཆོ༵ག །མྱུར་བགྲོད་གདམས་པའི་དམིགས་པའི་ཐོ། །ཡི་གེའི་སྒོ་ནས་གསལ་བར་བྱས། །མཆིམས་ཀྱི་ཁྲིད་དཔེ་ལས་བཏུས། མདོ་ཟ་མ་ཏོག་བཀོད་པ་སོར་བཞག་གོ (༡༧) །སྒྲོལ་མའི་ཁྲིད་ཡིག །བཀའ་གདམས་ལྷ་བཞིའི་སྒྲོལ་མའི་ཁྲིད་ནི། སྐྱབས་སེམས་སྔོན་དུ་སོང་ནས། རང་སེང་ལྡེང་ནགས་ཚལ་མེ་ཏོག་འབྲས་བུས་བརྒྱན་པའི་ལྗོན་ཤིང་དུ་མས་གཏིབས་པའི་དབུས་ན་པད་ཟླའི་གདན་ལ། འཕགས་མ་སྒྲོལ་མ་ལྗང་སེར་ཞལ་གཅིག་ཕྱག་གཉིས་ཨུཏྤ་ལའི་སྡོང་བུ་འཛིན་པ། སེམས་དཔའི་སྐྱིལ་ཀྲུང་རིན་པོ་ཆེ་དང་དར་གྱིས་བརྒྱན་པ། ཟླ་བའི་རྒྱབ་ཡོལ་ཅན། དབུ་སྐྲ་ལི་བ། འཛུམ་པའི་ཞལ་ཅན་དུ་གསལ་བའི་བ་སྤུའི་བུ་ག་ནས་རང་འདྲའི་སྒྲོལ་མ་ནམ་མཁའི་ཁམས་ཁྱབ་པ་སྤྲོས། འགྲོ་དྲུག་གི་སྡུག་བསྔལ་རྒྱུ་བཅས་བསལ། བདེ་བའི་གནས་ལ་བཀོད་པར་བསམས་ཏེ་ༀ་ཏཱ་རེ་ཏུཏྟཱ་རེ་ཏུ་རེ་སྭཱ་ཧཱ། ཅི་ནུས་བཟླ་ཞིང༌། འཇིགས་བརྒྱད་སོ་སོ་ལ་སེང་གེའི་འཇིགས་སྐྱོབ་སྒྲོལ་མ་སེང་གདོང་མཆེ་བ་གཙིགས་ཤིང་ལྕེ་གློག་ལྟར་འཁྱུག་པ། སྤྱན་སེར་མོ་མདོག་དམར། སྐྲ་སེར༑ ཐུགས་ཁར་མི་འཇིགས་སྦྱིན་པའི་ཕྱག་རྒྱ་མཛད་པ་རྒྱན་གྱིས་བརྒྱན་པ། སེམས་ཅན་རྣམས་སེང་གེའི་འཇིགས་པ་ལས་སྒྲོལ་བར་བསྒོམ། གླང་པོ་ཆེའི་འཇིགས་སྐྱོབ། སྒྲོལ་མ་གླང་གདོང༌། ཤངས་མཐོ་ཞིང་མཆེ་བ་གཙིགས་པ། གསུས་པ་འཕྱང་བ་དུ་བའི་མདོག་ཅན། མཐེ་བོང་མངོན་པར་བརྐྱངས། ཕྱག་གཉིས་ཀྱིས་བསྡིགས་པར་མཛད་པ། སེམས་ཅན་རྣམས་གླང་པོ་ཆེའི་འཇིགས་པ་ལས་སྒྲོལ་བར་བསྒོམ། མེའི་འཇིགས་སྐྱོབ་སྒྲོལ་མ་དམར་མོ་འབར་བའི་གདོང་ཅན། ཞལ་བདུན། ལྗགས་བདུན། སྐྲ་གྱེན་དུ་འབར་ཞིང་ཕྱག་གཉིས་པདྨའི་ཕྱག་རྒྱ་མཛད་ཅིང༌། རྒྱན་ཐམས་ཅད་ཀྱིས་བརྒྱན་པ། སེམས་ཅན་ཐམས་ཅད་མེའི་འཇིགས་པ་ལས་སྒྲོལ་བར་བསྒོམ། སྦྲུལ་གྱི་འཇིགས་སྐྱོབ་སྒྲོལ་མ་ཁ་དོག་ནག་མོ་སྦྲུལ་མགོའི་གདེངས་ཀ་བཅུ་དང་ལྡན་ཞིང༌། སྐྲ་གྲོལ་བ། རྒྱན་གྱིས་བརྒྱན་པ། ཕྱག་གཉིས་ཀྱིས་མི་འཇིགས་པ་སྦྱིན་པའི་ཕྱག་རྒྱ་མཛད་ཅིང༌། སེམས་ཅན་སྦྲུལ་གྱི་འཇིགས་པ་ལས་གྲོལ་བར་བསྒོམ། ཆོམ་རྐུན་འཇིགས་སྐྱོབ་སྒྲོལ་མ་སྐུ་མདོག་ལྗང་གུ། ཞལ་ཁྲོ་གཉེར་བསྡུས་པ། དབུ་སྐྲ་གྱེན་དུ་བརྫེས་པ། ཕྱག་གཡས་རལ་གྲི། གཡོན་སྡིགས་མཛུབ་རྒྱན་གྱིས་བརྒྱན་པ། བཞེངས་པ། སེམས་ཅན་རྣམས་ཆོམ་རྐུན་གྱི་འཇིགས་པ་ལས་སྒྲོལ་བར་བསྒོམ། ལྕགས་སྒྲོག་འཇིགས་སྐྱོབ་སྒྲོལ་མ་སྐུ་མདོག་དམར་མོ། གཡས་པས་ལྕགས་ཀྱུ་དང་གཡོན་པས་ཞགས་པ་འཛིན་ཅིང༌། རྒྱན་གྱིས་བརྒྱན་པ། བཞེངས་པ༑ སེམས་ཅན་རྣམས་ལྕགས་སྒྲོག་གི་འཇིགས་པ་ལས་སྒྲོལ་བར་བསྒོམ། ཆུའི་འཇིགས་སྐྱོབ་སྒྲོལ་མ་སྐུ་མདོག་དཀར་མོ། ཕྱག་གཡས་ལྕགས་སྒྲོག །གཡོན་སྡིགས་མཛུབ། ཞི་བའི་སྐུ་བཞེངས་པ། སེམས་ཅན་རྣམས་ཆུའི་འཇིགས་པ་ལས་སྒྲོལ་བར་བསྒོམ། ཤ་ཟའི་འཇིགས་སྐྱོབ་སྒྲོལ་མ་སེམས་དཔའི་སྐྱིལ་ཀྲུང་གིས་བཞུགས་པ། ཀུནྡ་དང་ཟླ་བའི་མདོག་ཅན། རྒྱན་གྱིས་བརྒྱན་པ། ཕྱག་གཡས་མཆོག་སྦྱིན་དང་གཡོན་མི་འཇིགས་པའི་ཕྱག་རྒྱ་མཛད་ཅིང༌། སེམས་ཅན་རྣམས་ཤ་ཟའི་འཇིགས་པ་ལས་སྒྲོལ་བར་བསྒོམ། རེ་རེ་ལ་ཡང་མོས་གུས་དུང་དུང་དང་འབྲེལ་བར་ཡི་གེ་བཅུ་པ་བཟླས་ལ། ཏཱ་ར་ཏཱ་ར་ཞེས་གཉིས་ཀྱིས་སྔགས་འདི་དང༌༑ མཐར་ཏཱ་ར་མཁྱེན་ཞེས་བརྗོད་དོ། །སྒྲོལ་མ་ཞི་ཁྲོ་ཀུན༵་འདུས་ཁྲིད། །དག༵འ་སྤྲོ་ཟུང་འབྲེལ་རྣམ་གྲོལ༵་མཆོ༵ག །མྱུར་བགྲོད་གདམས་པའི་དམིགས་པའི་ཐོ། །ཡི་གེའི་སྒོ་ནས་གསལ་བར་བྱས། །མཆིམས་ཀྱི་ཁྲིད་ཡིག་ལས་བཏུས་སོ། (༡༨) །པོ་ཏོ་བའི་དཔེ་ཆོས་ཀྱི་ཁྲིད། པོ་ཏོ་བའི་དཔེ་ཆོས་ཀྱི་ཁྲིད་ནི། སྐྱབས་སེམས་སྔོན་དུ་སོང་ནས། སྣོད་ཁ་སྦུབ། ཞབས་རྡོལ། དྲི་མ་ཅན་ཏེ་སྣོད་སྐྱོན་གསུམ་གྱིས་མ་གོས་པ་དགོས་ཚུལ། ང་རྒྱལ། ཆེད་གཉེར་མེད། རྣམ་གཡེང་ཡིད་འདུས། སྐྱོ་བའི་དྲི་མ་ལྔ་དང་བྲལ། དོན་ཚིག་བརྡ་མ་གོ་བ་ལོག་པར་འཛིན་པའི་ཡུལ་ལས་བཟློག་ལ། དད་པ། འདོད་པ། ཡིད་ཆེས། ཕྱིར་མི་ལྡོག་པའི་དད་པ་བཞི་སྟོབས་བསྐྱེད་དེ། མན་ངག་དཔེའི་སྒོ་ནས་སྟོན་པ། ཨ་ཕའི་སྐད་དུ་ཁ་ཆེམས་རླུང༌། ཞེས་མཚམས་སྦྱར་ནས། སྐྱབས་འགྲོའི་མཐུན་དཔེ་འཁོར་ལོས་བསྒྱུར་རྒྱལ་ནས། གཉེན་སྒྲོན་བར་ཉེར་བཞི་མི་མཐུན་ཕྱོགས། བྲག་ཕུག་ཁ་བྱང་བསྟན་ནས་བྲ་བ་བསད་པའི་དཔེ་དེ་བཅུ་དྲུག་གི་བརྡ་སྦྱར། དལ་འབྱོར་རྙེད་དཀའི་མཐུན་དཔེ་མཁར་ཐོག་རྩ་ནས་སོ་ཁའི་མཁར་བར་བཅུ་གཉིས་སོ། །མི་མཐུན་ཕྱོགས། བྱིས་པའི་སྣེ་ཟན་ནས་ལ་ཆ་གྲང་མོའི་བར་བཅུ་དྲུག །མི་རྟག་པའི་མཐུན་དཔེ་འདི་ན་མི་དགའ་ནས་རྒན་པོ་སྐྱེས་ཀྱི་བར་སོ་དགུ། མི་མཐུན་ཕྱོགས་ཤིང་སྤར་ནས་སྤང་ཐང་བར་བཅུ་དྲུག །ལས་རྒྱུ་འབྲས་ཀྱི་མཐུན་དཔེ་བཟང་ལེན་ནས་སྟོང་གསུམ་བྲན་ཁོལ་བསད་ཀྱང་རུང་གི་བར་ཉེར་དགུ། མི་མཐུན་ཕྱོགས་སྐལ་ཆད་ནས། ཇ་ཐུག་དྲང་བར་ཉེར་བཞི་སྟེ་འདི་ཡན་གྱི་སྐྱེས་བུ་ཆུང་ངུའི་ལམ་རྫོགས་ནས། འཁོར་བའི་ཉེས་དམིགས་ལ་མཐུན་དཔེ་དགའ་བོ་ནས་མཐའ་མཐོང་བར་བཅུ་གསུམ། མི་མཐུན་ཕྱོགས་ལ་རྙོང་ལ་སྤྲེའུ་ནས་ཟང་སྦ་བར་བཅུ་དྲུག་གོ །དེ་ལྟར་འཁོར་བ་ལ་ངེས་པར་འབྱུང་ནས་སོ་ཐར་གྱི་སྒོར་འཇུག་པའི་ཚུལ་ཁྲིམས་ལ་མཐུན་དཔེ་རྟ་ལ་སྲབ་ནས་ལྷ་གཉིས་བཞིན་གྱི་བར་བཅུ་བཞི། མི་མཐུན་ཕྱོགས་ཡུར་ཆུ་གཙང་པོ་ནས་རྒྱལ་བཙུན་སྤུན་གྱི་བར་བཅུ་གཉིས། ལྟོགས་ན་ནད་པ་བོན་པོ་རྟ་ནས་ཁང་བུ་རྙེད་ཀྱི་བར་སྐྱེས་བུ་འབྲིང་གི་ལམ་རྫོགས། མཐུན་པའི་ཡུལ་སྐྱེས་བུ་དམ་པའི་མཐུན་དཔེ། གསེར་གྱི་ཁྲོན་རྡོལ་ནས༑ ར་འདེད་འདྲའི་བར་བཅུ་གཅིག །མི་མཐུན་ཕྱོགས་ཤིང་གི་རང་འཐགས་ནས་འགོ་མེད་གླང་འདྲ་འཕྱིང་བུའི་བར་བཅུ་གཉིས། སློབ་མའི་མཐུན་དཔེ་བུ་ཆུ་ཁ་ཅན་ཁ་མེད་ནས་ཤེས་རབ་ཡོན་ཏན་བར་བཅུ། མི་མཐུན་ཕྱོགས་ལ་ངང་པ་རྒྱ་གར་ནས་ཨ་ན་ལའི་བར་བཅོ་ལྔ། བླ་མ་བརྟེན་ཚུལ་མཐུན་དཔེ་བུ་ཆུང་བྱེད་ཕྲུག་མ་ལ་རག་ནས་ལུད་པ་ཐོབ་པའི་བར་བཅུ། མི་མཐུན་ཕྱོགས་ལ་ཤིག་འཆའ་ནས་སྤྲེའུ་ཡི་ཟས་ཀྱི་བར་བརྒྱད། རང་གི་ལེགས་སྨོན་ལ་མཐུན་དཔེ། བུར་སྒོར་ནས་ངེད་ཀྱི་རྣ་གཏམ་བར་དྲུག །མི་མཐུན་ཕྱོགས་ཨ་མ་ང་ནི་ནས། རྟ་གཡག་ར་དང་བྱའི་བར་ལྔ། བསོད་ནམས་བསགས་པའི་མཐུན་དཔེ་ཨ་ཏི་ཤ་ནས་སྟན་ལ་འདུག་པའི་བར་བཅུ་གཉིས། མི་མཐུན་ཕྱོགས། མི་ཁོམ་ལུས་བླངས་ནས་ནོར་བུ་བཙོངས་པའི་བར་བཅུ་གཉིས། མདོར་ན་བསླབ་ལྡན་དགེ་སློང་འཁོར་ལོ་བཞི་ལྡན། དེས་ཐེག་ཆེན་ལམ་དུ་འཇུག་པའི་མཐུན་དཔེ་འགྲོ་ས་ལམ་ནས་བདུད་རྩི་འདྲ་བའི་བར་ལྔ། མི་མཐུན་ཕྱོགས་ལ་ཆུ་ཤིང་ནས་འཆི་བའི་བར་ལྔ། དེ་ཡང་བྱས་པ་ཤེས་ཤིང་དྲིན་གཟོ་བསྒོམ་པའི་མཐུན་དཔེ། འབུ་སྲིན་ནས་རལ་གྲི་དགྲའི་བར་བཞི། མི་མཐུན་ཕྱོགས་དཔེ། བུ་སྟོར་ཆུས་ཁྱེར་མ་སྐྱེས་དགྲ་གསུམ། བྱམས་པ་ལ་མཐུན་དཔེ། མ་ནི་བུ་ལ་ནས་རྒྱལ་ཤོའི་བར་དྲུག །མི་མཐུན་ཕྱོགས་སྲེག་བྱེད་མེ་ནི་ནས་མ་ལ་སྦིག་བར་དྲུག །སྙིང་རྗེའི་མཐུན་དཔེ་དམུས་ལོང་འབྲོག་འཁྱམས་ནས་ཡུལ་སྣ་གདོང་བར་ལྔ། མི་མཐུན་ཕྱོགས་སྔགས་པར་བསད་ནས་ཁྲ་སྤྱང་བར་བཞི། སྨོན་སེམས་ཀྱི་མཐུན་དཔེ། ཆུ་འདོད་ནས་ཆོས་བདུན་བསླབ་བར་ཉེར་གཉིས། མི་མཐུན་དཔེ་དགྲ་བོ་ཡུལ་འབྱིན་ནས་སྔགས་པ་མར་འཚོང་དཔེ་འབྱུང་བར་ཉེར་གཅིག །སྨོན་སེམས་སྐྱེས་ནས་རང་སྨིན་བར་ཕར་ཕྱིན་དྲུག་གི་སྦྱིན་པའི་མཐུན་དཔེ་ཟང་ཟིང་སྦྱིན་པ་སྦྲུལ་ལྐོགས་ནས་ཁོ་མཁས་བར་ལྔ། ཆོས་སྦྱིན་དགོན་པའི་དགེ་སློང༌། ཁ་ཏོན་ཀློག་གཉིས། མི་འཇིགས་སྦྱིན་རྒྱལ་རིགས་འཇིགས་པའི་རབ་བྱུང་གཉིས། མི་མཐུན་དཔེ་ཟང་ཟིང་ལ་མར་ལ་ཏི་ཏོས་ནས་བྱང་བའི་སྟོན་མོ་བར་བཞི། ཆོས་སྦྱིན་གྱི་མེས་ཚིག་རྒོད། མི་འཇིགས་པའི་སེང་གེ །ཀོང་བུ་ལྷག་གཉིས། ཚུལ་ཁྲིམས་མཐུན་དཔེ་སྡོམ་པའི་ཁྲིམས་ལ། རྩ་བའམ་མི་གཙང་ནས་གསེར་འབུམ་བར་བཅུ་དགུ། དགེ་བ་ཆོས་སྡུད་ལ། རླན་གྱི་སྡུད་སྐྱེད་རྐང་མིག་ལྡན་གཉིས། སེམས་ཅན་གྱི་དོན་བྱེད་ལ་ཕ་མ་མི་སྐྱོ་ནས་རང་ལུས་བར་བཞི། མི་མཐུན་ཕྱོགས་ལ། སྡོམ་པའི་ཚུལ་ཁྲིམས། མི་མཐུན་ཕྱོགས་ཀྱི་ཁྱི་འདྲ་ནས་བཏེགས་ནས་འདབས་བར་བཅུ་གསུམ། དགེ་བ་ཆོས་སྡུད་ལ། མེས་བསྲེགས་འདབ་གཤོགས་མེད་པའི་བྱ་གཉིས། སེམས་ཅན་དོན་བྱེད་སྣམ་བུ་བོར་བཙོངས་ནས་ཕན་གནོད་སྐྱེལ་བར་ལྔ། བཟོད་པའི་མཐུན་དཔེ། ས་དང་ནས་རྟག་ཏུ་ངུའི་བར་བཅུ་གཉིས། མི་མཐུན་ཕྱོགས་ཁྱི་ཁལ་མི་ཐེག་ནས། ཁ་དེ་མངར་བར་བཅུ་དྲུག །བརྩོན་འགྲུས་ལ་མཐུན་དཔེ་ཆ་ཁར་ཐོབ་འདྲ་ནས། ཉུང་ཐུག་འཐུང་བར་བཅོ་བརྒྱད། མི་མཐུན་ཕྱོགས་དཔེ་དྲོད་ལྐོག་མེད་ནས་སེ་མོ་འབྲུ་བར་བཅུ་གཉིས། བསམ་གཏན་གྱི་མཐུན་དཔེ་དྲི་མེད་སྣོད་དུ་ཆུ་གཙང་ནས། སྐུ་མཐོང་ཤིག་བར་བཅུ་གཅིག །མི་མཐུན་ཕྱོགས་མ་དག་སྣོད་འདྲ་ནས་བྱང་པ་མོ་བཞིན་རྟག་མེད་འདྲ་བའི་བར་བཅུ་གསུམ་སྟེ་ཐབས་ཀྱིས་ཁྱད་པར་དུ་བྱས་པ་ཡིན། ད་ནི་ཤེས་རབ་ཀྱི་ཕར་ཕྱིན་མཐུན་དཔེ། སྐྱེས་བུའི་མིག་ནས་བུམ་བཟང་བར་སོ་ལྔ། མི་མཐུན་ཕྱོགས་བརྒྱ་ཕྲག་ནས། སྨིག་རྒྱུ་སྙེགས་པའི་བར་ཉེར་ལྔ། ཐེག་པའི་མཐར་ཐུག་སྔགས་ཀྱི་ཡོན་ཏན་ལ་མཐུན་དཔེ་ལག་གི་བཟོ་བྱེད་ནས། མ་ར་ཛ་བར་དྲུག །མི་མཐུན་ཕྱོགས་བོད་ན་མི་འདུག་ནས༑ ང་ལ་ཆ་མེད་ཨ་བོ་ཟེར་གྱི་བར་བཅུ་གསུམ། ལམ་གྱི་རྩ་བ་བླ་མ་མཉེས་པར་བྱ་དགོས་པའི་མཐུན་དཔེ་ལ། ཕུ་ཆུ་རྫིང་ནས་ཨ་ཏི་ཤ་དང༌། རིགས་ངན་བཞིན་བར་བདུན། མི་མཐུན་ཕྱོགས་ཕ་མེས་ནས་རྐང་མགྱོགས་བར་དྲུག །མཇུག་བསྔོ་བའི་མཐུན་དཔེ། གསེར་དངུལ་མགར་བ་ནས་འབྲེལ་ཐག་བཅད་བར་དགུ། མི་མཐུན་ཕྱོགས་ལ་སྐར་མདའ་ནས་རྟོག་པས་ཕུལ་བར་བཅུ། ཐམས་ཅད་ཀྱི་དོན་བསྡུ་བ་ནི། དགྲ་ཟིན་ཕྱེ་བར་བཞི། ཟན་རྡོག་གཅིག་ལ་གཙུབ་ཤིང་མེ། །རྟག་ཏུ་ངུ་དང་ནོར་བཟང་བཞིན། །ཞེས་པ་སྟེ་དཔེས་དོན་གོ་བར་བསྐྱེད་ནས་སྐྱེས་བུ་གསུམ་ལ་བློ་སྦྱང་བ་ཞིག་ཡིན་སྣང་ངོ༌། །ཆོས་ཀུན༵་དཔེ་འདྲ་ཡིད་དག༵འི་གནས། །མཐོང་གྲོལ༵་མཆོ༵ག་ཏུ་བློ་སྦྱོང་བའི། །པོ་ཏོའི་གདམས་པ་རིན་སྤུངས་ཀྱི། །གནད་འདོམས་ཡི་གེའི་ལམ་འདིར་བཀོད། །ཧོར་ཀ་བཞི་པའི་ཁྲིད་དཔེ་ལས་བཏུས་སོ། (༡༩) །ཐིག་ལེ་བཅུ་དྲུག་གི་ཁྲིད་ཡིག །ཐིག་ལེ་བཅུ་དྲུག་གི་ཁྲིད་ནི། སྐྱབས་སེམས་སྔོན་དུ་སོང་ནས། རྟེན་དཀྱིལ་འཁོར་གྱི་ཐིག་ལེ་བཞི། བརྟེན་པ་ལྷའི་ཐིག་ལེ་དྲུག །རྩ་བརྒྱུད་བླ་མའི་ཐིག་ལེ་དྲུག །བཅུ་དྲུག་པོ་ཟུང་འཇུག་བྱང་ཆུབ་སེམས་ཀྱི་ཐིག་ལེའོ། །དང་པོ་བཞི་ནི། སྤྱིར་ཕྱིའི་བཀོད་པ་བསམ་གྱིས་མི་ཁྱབ་པའི། སྒོས་སྟོང་གསུམ་མི་མཇེད་ཀྱི། ཡང་དགོས་བོད་ཁ་བ་ཅན་གྱི། ཞེ་སྒོས་དབུ་རུ་བྱང་ཕྱོགས་ཀྱིའོ། །དང་པོ་ནི། གཞལ་ཡས་ཁང་གྲུ་བཞི་སྒོ་བཞི་སོགས་མཚན་ཉིད་ཡོངས་རྫོགས་བཏུད་ནས་བལྟས་ན། སྟེང་ༀ་དཀར། ཤར་མ་ཡང་དཀར། ལྷོ་ཎི་སེར། ནུབ་པད་དམར། བྱང་མེ་ལྗང༌། འོག་ཧཱུྃ་སྔོན་པོའི་རྣམ་པར་སྣང་བ་ནང་གི་དབུས་སུ་པད་དཀར་སྟོང་ལྡན་ཟླ་བ་ཞུན་མའི་གདན་དང་བཅས་པའོ། །གཉིས་པ་ནི། ཐུབ་པ་ཆེན་པོ་རྣམ་སྣང་གངས་ཅན་མཚོ་གསེར་མདོག་ཆོས་འཆད་སྤྲུལ་སྐུའི་ཆ་བྱད་ཅན། གསུམ་པ་ནི། སྤྱན་རས་གཟིགས་རྒྱལ་བ་རྒྱ་མཚོ་ཕྱག་སྟོང་སྤྱན་སྟོང༌། སྐྱིལ་ཀྲུང་མཛད་པ། བཞི་པ་ནི། འབྲོམ་ཤེལ་གྱི་ཁྱེའུ་བཞེངས་པ། གཡས་ཤེལ་འཕྲེང་འདྲེན་ཚུལ། གཡོན་ཤེལ་གྱི་འཁར་བའི་རྩེ་མོར་པད་དཀར་འདབ་སྟོང་གི་དབུས། ཡུམ་ཆེན་མོ། གཡས་སུ་ཐུབ་པ། གཡོན་དུ་དེ་དང་ཐ་མི་དད་པའི་ཇོ་བོ། འདབ་སྟོང་ལ་བསྐལ་བཟང་གི་སངས་རྒྱས་སྟོང་བཞུགས་པའོ། །ཡི་དམ་དྲུག་ནི། ཡུམ་ཤེར་ཕྱིན་གསེར་མདོག་ཕྱག་བཞིའི་གཡས་དང་པོ་རྡོ་རྗེ་རྩེ་དགུ་པ། གཡོན་དང་པོ་མཉམ་གཞག །གཡས་གཉིས་པ་ཕྲེང་བ། གཡོན་གཉིས་པ་པོ་ཏི་འཛིན་པ། རྡོ་རྗེའི་སྐྱིལ་ཀྲུང༌། རིན་པོ་ཆེའི་རྒྱན་ཅན། ཐུབ་པ་བདུད་འདུལ་ས་གནོན་མཉམ་གཞག །སྤྱན་རས་གཟིགས་ཞལ་གཅིག་ཕྱག་བཞི་པ། སྒྲོལ་མ་ཞི་བ་ལྗང་སེར། སེང་ལྡེང་ནགས་སྒྲོལ། སྒྲོལ་མ་ཁྲོ་མོ་ལྗང་ནག །ཕྱག་བཞི་གྲི་ཐོད༑ ཌཱ་མ་རུ་དང་ཁ་ཊྭཱཾ་ག །རུས་རྒྱན། དབུ་སྐྲ་དམར་སེར། གཡོན་བརྐྱང་བཞེངས་སྟབས། མི་གཡོ་བ་བརྐྱང་བསྐུམ་གྱིས་ཚོགས་བདག་མནན་ཅིང༌། གླང་ལྤགས་བསྣམས་པ། རལ་གྲི་ཞགས་པ་འཛིན་ཅིང༌། དབུ་སྐྲ་ཁམ་སེར་སྦྲུལ་རྒྱན་ཅན་ནོ། །བླ་མ་ལྔ་ནི། ཡབ་ཇོ་བོ། སྲས་འབྲོམ། རྒྱ་ཆེན་སྤྱོད་པའི། ཟབ་མོ་ལྟ་བའི། ཉམས་ལེན་བྱིན་རླབས་ཀྱི་བརྒྱུད་པས་བསྐོར་བའི་བྱམས་པ་འཇམ་དབྱངས་རྡོ་རྗེ་འཆང་ངོ༌། །བཅུ་དྲུག་པ་ནི། སངས་རྒྱས་ཆོས་སྐུ་མཐིང་སྐྱ་ཞལ་གཅིག་ཕྱག་གཉིས་ཏིང་ངེ་འཛིན་གྱི་ཕྱག་རྒྱ་ཅན་ཐམས་ཅད་ཀྱང་ངོ་བོ་ཡེ་ཤེས་རྣམ་པ་ལྷ་སྐུ་གསལ་རྫོགས་དང༌། བཅོ་ལྔ་པོ་ཐམས་ཅད་ཀྱི་ཕྱི་ལྷ་སྐུ། ནང་གཞལ་ཡས་ཁང་བཅུ་དྲུག་པའི་ཐུགས་ཀའི་ནང་དུ་ཤིན་ཏུ་ཕྲ་བའི་རླུང་སེམས་གཉིས་རྟེན་དང་བརྟེན་པའི་ཚུལ་ཐིག་ལེ་དཀར་སེར། སྤྲོས་ན་ནམ་མཁའ་ཁྱབ་པ། བསྡུ་ན་སྲན་མ་ཕྱེད་གཤགས་དང༌། མཐར་ཉུངས་ཀར་སྦོམ་པོ་ཙམ་གྱི་བྱང་ཆུབ་ཀྱི་སེམས་ཀྱི་རང་སྣང་འོད་ཟེར་ལྔ་འཕྲོ་བ་ལ་སེམས་རྩེ་གཅིག་བཟུང་ཞིང་བསྒོམ། རྗེས་དྲན་ལྔ་དང་འབྲེལ་བར་བྱ་སྟེ། བཟླས་པའི་སྐབས། ཡུམ་ཆེན་མོ་ལ། ཏདྱ་ཐཱ་ག་ཏེ་སོགས། ཐུབ་པ་ལ་ༀ་མུ་ནེ་མུ་ནེ་སོགས། སྤྱན་རས་གཟིགས་ལ་ཡི་གེ་དྲུག །སྒྲོལ་མ་ལ་ཏཱ་རེ་ཏུཏྟཱ་རེ་སོགས། སྒྲོལ་མ་ཁྲོ་མོ་ལ། ༀ་ཏཱ་རེ་ཏུཏྟཱ་རེ་ཏུ་རེ་ཧཱུྃ་ཕཊ། མི་གཡོ་བ་ལ། ༀ་ཙཎྜ་མ་ཧཱ་རོ་ཥ་སོགས་བཟླ་ཞིང༌། དབང་པོའི་སྒོ་མ་ལུས་པ་བསྡམས་ཏེ་རྩེ་གཅིག་ཏུ་བསྒོམ་པར་བྱའོ། །བཀའ་གདམས་ཀུན༵་གྱི་ཡང་སྙིང་བཅུད། །དག༵འ་དང་སྤྲོ་བའི་རྣམ་གྲོལ༵་མཆོ༵ག །མྱུར་དུ་སྟེར་བྱེད་རྣམ་གྲོལ་འདི། །གླེགས་བམ་ནང་བཞིན་ཁོལ་ཕྱུང་བྲིས། །ཐིག་ལེ་བཅུ་དྲུག་གི་ཁྲིད་ཡིག་འདི་སྨྱུག་ལ་པཎ་ཆེན་གྱི་ཟིན་བྲིས་སྟེང་ནས་ཐོབ་ཀྱང༌། འདི་ནི་གླེགས་བམ་རང་ལ་ཞིབ་དཔྱོད་བྱས་པའི་སྙིང་པོར་དྲིལ་ནས་བྲིས་པའོ། (༢༠) །ཤེས་ཕྱིན་བཀའ་བབས་ཁྲིད་ཡིག །ཤེས་ཕྱིན་བཀའ་བབས་དྲུག་གི་ཁྲིད་ནི། སྐྱབས་སེམས་སྔོན་དུ་སོང་ནས། བདེ་བའི་འབྱུང་གནས་སྟེང་དགའ་ལྡན་ལྷ་ཡུལ་གྱི་རྒྱལ་ཚབ་བྱམས་པ་ལས་མཁྱེན་གསུམ། སྦྱོར་བཞི། འབྲས་བུ་ཆོས་སྐུ་སྟེ་སྐབས་བརྒྱད། སྟན་ཐོག་གཅིག་ཏུ་བསྒོམ་ཚུལ་ཉིད་ལམ་གྱི་སྲོག་ཏུ་བཞག་ནས། དེའི་ཡིད་ཆེས་ཀྱང་ལོངས་སྤྱོད་ཀྱི་འབྱུང་གནས་འོག་ཀླུའི་ཡུལ་ནས་ཡུམ་རྒྱས་པ་བཅུ་དྲུག་དུ་མ་སྤྱན་དྲངས་པ་ལ་རྒྱས་པར་ཕྱེ་ན། སྔར་གྱི་སྐབས་བརྒྱད་དང༌། དོན་བསྡུས་དྲུག་ཏུ་འབྱེད་པ་དང༌། གསུམ་དུ་འབྱེད་པ་རྣམས་རིག་པའི་འབྱུང་གནས་བྷང་ག་ལའི་མཁས་པ་པཎྜི་ཏའི་དཔྱད་སྒོམ་རྣམ་དབྱེ། ལུང་རིག་གི་རྣམ་འབྱེད། དེ་ཡང་ལམ་བསྐྱེད་པའི་གོ་རིམ་ངེས་འབྱེད་བཞི་སོགས་རིམ་སྦྱོར། ཡོན་ཏན་གྱི་འབྱུང་གནས་ལྷོ་ཕྱོགས་བཻ་ཏའི་ཡུལ་ལས་བྱུང་བའི་བསྟན་རིམ་དང༌། ཕར་ཕྱིན་དྲུག་པོ་རེ་རེར་ཡང་དྲུག་དྲུག་འདུས་པའི་ཚུལ་སྟོན་པ་བཀའི་བསྡུ་བ། བྱིན་རླབས་ཀྱི་འབྱུང་གནས་ནུབ་ཕྱོགས་ཨོ་རྒྱན་མཁའ་འགྲོ་མའི་གསུང་ནས་བརྒྱུད་པ་དང༌། དེ་དག་ལ་ཡང་སེམས་ཀྱི་ཟུག་རྔུའི་སྡུག་བསྔལ་མ་ལུས་པ་ཞི་བར་བྱེད་པ་ངོ་མཚར་གྱི་འབྱུང་གནས་བི་ཤྭ་ཀོཊ་ཙནྡན་གྱི་གླིང་ནས་འབྱུང་བ་རྣམས་ཀྱི་དྲིལ་དོན་ཡང་དཔྱད་ངོར། སྨྲ་བསམ་བརྗོད་མེད་ཤེས་རབ་ཕ་རོལ་ཕྱིན། །མ་སྐྱེས་མི་འགག་ནམ་མཁའི་ངོ་བོ་ཉིད། །འཇོག་ངོར། སོ་སོ་རང་རིག་ཡེ་ཤེས་སྤྱོད་ཡུལ་བ། །དུས་གསུམ་རྒྱལ་བའི་ཡུམ་ཞེས་ཁོངས་སུ་ཆུད་པར་བྱ་བ་ཉིད་དོ། །བཀའ་བབས་ཀུན༵་གྱི་སྙིང་པོ་འདི། །རང་རིག་དག༵འ་བ་ཆེན་པོའི་དབྱིངས། །རྣམ་གྲོལ༵་མཆོ༵ག་གི་ཕོ་བྲང་ཆེ། །ཡུམ་དོན་ཡི་གེས་གསལ་བྱས་འདིའོ། །རོང་སྟོན་གྱི་ཁྲིད་ཡིག་ལས་བཏུས་སོ། (༢༡) །ཞི་བྱེད་ལམ་ལྔའི་ཁྲིད་ཡིག །ཞི་བྱེད་ལམ་ལྔའི་ཁྲིད་ནི། སྐྱབས་སེམས་སྔོན་དུ་སོང་ནས། ལམ་ལྔ་དཀའ་ཐུབ་གསུམ་གྱི་སྲང་ནས་འདོན། ཚོགས་ལམ་བློ་སྦྱོང༌། སྦྱོར་ལམ་དཀའ་ཐུབ། མཐོང་ལམ་རྗེས་སྦྱོར། བསྒོམ་ལམ་རོ་སྙོམས། མཐར་ལམ་བྱ་བྲལ་ལོ། །བློ་སྦྱོང་ལ་རྟེན་སྤྱི་བོར་པདྨའི་སྡོང་པོ་པདྨ་ཉི་ཟླ་ལ་དངོས་ཀྱི་བླ་མ་གཟི་མདངས་ལྡན་པ། བརྒྱུད་པའི་བླ་མ་བཞི་བརྩེགས་ཀྱི། དམ་པ་རྒྱ་གར་སྐུ་མདོག་སྨུག་ལ་དམར། དབུ་སྐྲ་ཡོ་འབོག་གི་སྡོང་པོ་ལྟར་གཟིངས་པ། སྣང་སྲིད་ནོན་པ་གོང་འོག་བརྩེགས་ཏེ་བཞུགས་པ། གྲུབ་ཐོབ་ཕོ་མོ་ལྔ་བཅུ་རྩ་བཞི༑ མཚན་ཉིད་སྒྲ་རིག་བླ་མ་བཅུ་གཅིག །གཡོ་བ་རླུང་གི་བླ་མ་བཅུ་གཅིག །བདེ་བ་ཉམས་ཀྱི་བླ་མ་བཅུ་གཅིག །ཕྱག་རྒྱ་བརྡའི་བླ་མ་བཅུ་གཅིག །རིག་པ་ངོ་སྤྲོད་ཀྱི་བླ་མ་བཅུའོ། །ངོ་མཚར་མཁའ་སྤྱོད་ཀྱི་བླ་མ་སུམ་ཅུ་རྩ་དྲུག །ཐུགས་དམ་བདེ་བར་གཤེགས་པའི་བླ་མ་བཅུ་གཉིས། ཀུན་ཀྱང་ཆ་ལུགས་ཀྱི་སྤྲོས་པ་མེད་པ་ནམ་མཁའི་གོས་ཅན་ནོ། །བདག་གི་སྙིང་ག་ནས་འོད་ཟེར་བྱུང་སྟེ་མཆོད་པ་ཕུལ། བླ་མ་རྣམས་ལ་ཕྱག་འཚལ་ཞིང་སྐྱབས་སུ་མཆིའོ། །བྱིན་གྱིས་བརླབ་ཏུ་གསོལ། གང་དུའང་མ་འོངས། ཨ་ཨཱ། ཨི་ཨཱི། ཨུ་ཨཱུ། རྀ་རཱྀ། ལྀ་ལཱྀ། ཨེ་ཨཻ། ཨོ་ཨཽ། ཨཾ་ཨ། ཀ་ཁ་ག་གྷ་ང༌། ཙ་ཚ་ཛ་ཛྷ་ཉ། ཊ་ཋ་ཌ་ཌྷ་ཎ། ཏ་ཐ་ད་དྷ་ན། པ་ཕ་བ་བྷ་མ། ཡ་ར་ལ་ཝ། ཤ་ཥ་ས་ཧ་ཀྵ། ལན་བཞིར་བརྗོད། གསང་སྔགས་བཟླས་བརྗོད་ཀུན་ཐིམ། ༀ་སྐུའི་ས་བོན་དཀར་ནར་བྱུང་ལུས་ཁེངས། ཨཱཿ གསུང་གི་ས་བོན་དམར་ལྷུག་གི་བྱུང༌། ནང་ཁེངས། ཧཱུྃ་ཐུགས་ཀྱི་ས་བོན་སྔོ་ཕྲེང་བྱུང༌། ལུས་བདེ་བས་གང༌། ཧྲཱིཿ ཡོན་ཏན་གྱི་ས་བོན་ཁ་དོག་སྣ་ཚོགས་བྱུང༌། ལུས་སེམས་སྟོང་རྗེན་གྱུར་པར་བསམ་མོ། །ངོ་སྤྲོད་ལམ་ཁྱེར་ལ་རྐང་པ་སྐྱིལ་ཀྲུང༌། ལག་པ་མཉམ་གཞག །སྒལ་ཚིགས་བསྲང༌། མགྲིན་པ་དགུག །དཔུང་པ་བརྒྱང༌། མཆུ་སོ་མལ་དུ་གཞག །མིག་སྣ་རྩེར་དབབ། མིག་སྣ་སེམས་གསུམ་དྲིལ། རྟོག་མེད་རང་ལུགས་སུ་བཞག །རྗེས་སྣང་ཚད་བདེན་མེད། སྐམ་ཐག་ཆུ་ནང་ནས་ཆོད། ༀ་ཨཱཿ ཧྲཱི་གུ་རུ་སིདྡྷི་ཧཱུྃ། སྙིང་པོ་འབྲུ་བརྒྱད་གདུང་ཤུགས་བཅས་འདྲེན། དངོས་ཀྱི་བླ་མ་མི་བསྟིམ། དེ་ཉིད་ཀྱི་བྱིན་རླབས་ཞུགས་པར་བསམ། ཐུན་གཏོང་བའི་ཚེ་འགྲུབ་པར་གྱུར་ཅིག །ཅེས་བརྗོད། སྦྱོར་ལམ་དཀའ་ཐུབ་ཀྱི་ལམ་ལ༑ གཞན་སྔར་དང་འདྲ། ཁྱད་པར་བླ་མ་ལོངས་སྐུ་མཚན་དཔེས་བརྒྱན་པར་བསམ་མོ། །ཨཱ་ལི་ཀཱ་ལི་ལན་བཞིར་བརྗོད། གཟུགས་ལྷ་སྒྲ་སྔགས་ཡིད་ཡེ་ཤེས་བཞི་པ་སྔར་དང་མཚུངས་སོ། །སྤྱི་བོའི་བླ་མའི་སྐུའི་ས་བོན༑ རྣམ་སྣང་དཀར་པོ་ཡུམ་དང་ཞལ་སྦྱོར། མགྲིན་པར་གསུང་གི་ས་བོན། འོད་དཔག་མེད་དམར་པོ་ཞལ་སྦྱོར། སྙིང་གར་ཐུགས་ཀྱི་ས་བོན། མི་བསྐྱོད་པ་སྔོན་པོ་ཞལ་སྦྱོར། ལྟེ་བར་ཡོན་ཏན་གྱི་ས་བོན། རིན་འབྱུང་སེར་པོ་ཞལ་སྦྱོར། པད་ཟླ་ལ་སྐྱིལ་ཀྲུང་དུ་བཞུགས་པ། དབང་བཞི་བླང་བ་མཚུངས་སོ། །ཕྲ་རགས་ཀྱི་རྟོག་པ་ལ་སྤྱན་ལྔས་བལྟ། རུས་སྦལ་སྤྱན་བཙུམ་ལ་བལྟ། མགྲོན་བུ་སྤྱན་བག་ཙམ་ཕྱེ་ལ་ཟིམ་མེ་བལྟ། ཟླ་ཚེས་སྤྱན་ཅུང་ཟད་ཕྱེ་ལ་བལྟ། མཁལ་མ་སྤྱན་ཅུང་ཟད་དཔངས་བསྟོད་ལ་བལྟ། ཟླ་བ་ཉ་གང་སྤྱན་བགྲད་དེ་བལྟ། ཆུན་བདོ་བ་ལ་བཤིག་ཅིང་རྗེས་བློ་དང་བྲལ་བ་ནི་ཀུན་ལ། ༀ་ཨཱཿ ཧྲཱི་གུ་རུ་སིདྡྷི་ཕ་ལ་ཧཱུྃ། སྔ་མ་ལྟར་གསོལ་བ་བཏབ་བོ། །མཐོང་ལམ་རྗེས་སྦྱོར་ལ་མི་འདྲ་བའི་ཁྱད་པར། བླ་མ་གཅེར་བུ་རུས་པའི་རྒྱན་ལྡན། ཨཱ་ལི་ཀཱ་ལི་བཞི་རུ་བརྗོད། སྣང་གྲགས་ངོ་བོ་བླ་མ། རྣམ་པ་ཡི་དམ་ལྷ། སྐྱེ་མེད། གནས་མེད། འགག་མེད། གྲུབ་མེད། སྣང་སྟོང༌༑ གྲགས་སྟོང༌། དྲན་སྟོང་གཉིས་སུ་མེད། དབང་བཞི་དམིགས་པའི་རང་བཞིན་མེད་པར་གྲོལ་ཕྱིར། ལྟ་སྟངས་བསྒྱུར་ཏེ་ཉན་ཐོས་ཐུར་དུ། རང་རྒྱལ་གྱེན། སེམས་དཔའ་གཡས། སེམས་མ་གཡོན། བདེ་གཤེགས་ཐད་ཀར། དེ་དག་གི་དུས་སེམས་གྲིམས་ལྷོད་ཀུན་དཀའ་ཐུབ་དང་མཚུངས་སོ། །ༀ་ཨཱཿ ཧྲཱི་གུ་རུ་ཛི་ན་མི་ཏྲ་ཧཱུྃ། བསྒོམ་ལམ་རོ་སྙོམས་ལ་མི་འདྲ་བའི་ཁྱད་པར། བླ་མ་སྐུ་ཆ་ལུགས་ངེས་མེད་བསྒོམ། ཨཱ་ལི་ཀཱ་ལི་བཞིར་བརྗོད། སྣང་གྲགས་བླ་མའི་སྐུ་གསུང་ཐུགས། བདེ་སྟོང་གཉིས་སུ་མེད། དབང་བཞི་དམིགས་པའི་ཁྱད་པར་འཁོར་ལོ་བཞིར། བདེ་གཤེགས་རྣམས་གསལ་བཏབ། དབང་ཡང་གོ་རིམ་མེད་པར་བླང་ངོ༌། །ཨ་འཐས་ཀྱི་དངོས་འཛིན་ལ་འཇིགས་པར་བྱེད། གྲལ་རིམ་སྒྱེལ་བ་རྒྱ་ཡན་གྱི་གནད། འདུག་པའི་སྤྱོད་ལམ་ལྔ། སྐྱིལ་ཀྲུང༌། ཕྱེད་སྐྱིལ། ཙོག་པུར། མ་བསྙེས་པ། རྒྱལ་པོ་རོལ་པ། འགྲོ་བ་ལྔ་ནི། འགྲོ་བ། འགྲོ་འཕྲོ་ལ་འཆམས། རྒྱུག་པ། རྒྱུགས་འཕྲོ་ལ་འཆམས། ངལ་གསོ། ལངས་པ་ལྔ་ནི། ལངས་ཀ །ཕྱེད་ལངས། ལངས་པ། གོས་ཚགས་བྱེད་པ། གོམ་པ་འདོར་བ། ཉལ་བ་ལྔ། གཡས་ཉལ། གཡོན་ཉལ། གན་རྐྱལ། ཁ་སྦུབ། མགོ་གཏུམས་སོ༑ ༑དེ་དག་རེ་རེ་ལ་ཆུན་བདོ་བ་ལ་འཇིག་ཅིང་བཤིག །བཤིག་རྗེས་ཀློད་ལ་རྗེན་ནེ་བཞག་གོ །མཐར་ལམ་བྱ་བྲལ་ལ་མི་འདྲ་བའི་ཁྱད་པར། བླ་མ་མཆོག་གི་སྤྲུལ་པ་དགེ་སློང་གི་ཆ་ལུགས་ཅན་ནོ། །ཡི་གེ་ལན་བཞིར་བརྗོད། སྣང་གྲགས་སྣང་ལ་རང་བཞིན་མེད་པར་ནམ་མཁའི་སྤྲིན་དེངས་པ། རྒྱ་མཚོ་ལ་འཁྱགས་ཞུ་བ་ལྟར་རོ། །དབང་བཞི་དམིགས་པ་འཁོར་ལོ་བཞིའི་སྤྱི་བོར་རྣམ་སྣང་ཞུ་ནས་ཡུམ་ལ་ཐིམ། ཡུམ་སངས་རྒྱས་མཁའ་འགྲོ་དཀར་མོ་འཁོར་ལོ་ཐོད་ཁྲག །གཞན་སྣང་ཟིལ་གྱིས་གནོན། ལོངས་སྤྱོད་འཁོར་ལོ་འོད་དཔག་མེད་ཡང་སྔར་བཞིན་ཞུ། པད་མ་མཁའ་འགྲོ་དམར་མོ་པད་མ་ཐོད་ཁྲག །གཞན་སྣང་བདག་གི་དབང་དུ་སྡུད། ཆོས་འཁོར་མི་བསྐྱོད་པ་སྔར་བཞིན་ཞུ། ཡུམ་རྡོ་རྗེ་མཁའ་འགྲོ་སྔོན་མོ་རྡོ་རྗེ་ཐོད་ཁྲག །གཞན་དབང་དུ་འདུས་པའི་གདུལ་བྱ་འདུན་པར་བྱས། སྤྲུལ་འཁོར་རིན་འབྱུང་ཡང་ཞུ། ཡུམ་རིན་ཆེན་མཁའ་འགྲོ་སེར་མོ། རིན་པོ་ཆེའི་ཐོད་ཁྲག །གཞན་དད་པར་གྱུར་པའི་ཡིད་ཆོས་ཀྱིས་ཚིམ། ཕྱིན་ཆད་སེམས་ཅན་གྱི་དོན་ལས་རང་དོན་དུ་ལྟ་རྒྱུ་མེད་དེ་མི་ལྟ། ལྟ་རི་ཤི། བལྟ་ནའང་ང་ལ་སྡིག །སེམས་ཅན་གྱི་དོན་མ་གཏོགས་རང་དོན་དུ་མི་བསྒོམ། སྒོམ་རི་ཤི། བསྒོམས་ནའང་ང་ལ་སྡིག །སེམས་ཅན་གྱི་དོན་མ་གཏོགས་རང་དོན་དུ་མི་སྤྱོད། སྤྱོད་རི་ཤི། སྤྱོད་ནའང་ང་ལ་སྡིག །སེམས་ཅན་གྱི་དོན་མ་གཏོགས་རང་དོན་དུ་མི་བསྒྲུབ། སྒྲུབ་རི་ཤི། བསྒྲུབས་ནའང་ང་ལ་སྡིག་སྙམ་དུ་རང་ལ་འཁྲིས་པའི་འཛིན་ཞེན་བཤིག །ༀ་ཨཱཿ ཧྲཱི་གུ་རུ་བྷུ་ཧཱུ་ཀུ་རུ་ཧཱུཾ། དཀའ་ཐུབ་སྲང་དཔེ་གསུམ། གང་ཟག་གསུམ། དུས་གསུམ། བསྐུར་ལུགས་གསུམ་མོ། །སྒྲོ་འདོགས་གཅོད་པ་ཉན་ཐོས་ལྟ་བུ། གཅིག་པུར་སྒྲུབ་པ་རང་རྒྱལ་ལྟ་བུ། གཞན་དོན་ཉམས་ལེན་བྱང་ཆུབ་སེམས་དཔའ། གང་ཟག་གསུམ། བྱ་བ་སྤང༌། འཇིག་རྟེན་སྤང༌། གསོག་འཇོག་མེད། དུས་གསུམ། རབ་ཞག་གསུམ། འབྲིང་གཉིས། ཐ་མ་གཅིག་གོ །བསྐུར་ལུགས། ལམ་འོག་མ་འོག་མ་མཐར་མ་ཕྱིན་པར་གོང་མ་ཉམས་སུ་ལེན་མི་གཞུག་གོ །བྱ་བྲལ་འབྲས་བུ་ནི། རབ་ཚེ་འདི་ཉིད་དུ། འབྲིང་འཆི་ཁར། ཐ་མ་བར་དོ་ལ་ཡོན་ཏན་བརྒྱུད་ནས་འབྱུང་ངོ༌། །ཞི་བྱེད་ཀུན༵་གྱི་གནད་ཚང་བ། །དག༵འ་མོ་སེམས་ཀྱི་ངག་སྟེགས་འདི། །རྣམ་གྲོལ་ལུགས་ལས་རང་གྲོལ༵་གྱི། །མཆོ༵ག་ཏུ་སྙིང་པོ་ཁོལ་དུ་ཕྱུང༌། །རོང་སྟོན་ཤེས་བྱ་ཀུན་རིག་གི་ཁྲིད་ཡིག་ལས་བཏུས་སོ། (༢༢) །སྒོམ་རིམ་ཐོག་མཐའ་བར་གསུམ་གྱི་ཁྲིད་ཡིག །སྒོམ་རིམ་ཐོག་མཐའ་བར་གསུམ་གྱི་ཁྲིད་ནི། སྐྱབས་སེམས་སྔོན་དུ་སོང་ནས། འཁོར་ལོ་དང་པོར་གསུངས་པའི་ལམ་ཁྲིད་འདུས་བྱས་མི་རྟག །ཟག་བཅས་སྡུག་བསྔལ་བའི་གོ་བས་ལས་འབྲས་སྤང་བླང་དཀར་ནག་སྤུ་འབྱེད་ལ་ཡིད་ཆེས་སུ་བསྟན་ནས་དཔྱད་པའི་རྒྱུ་ལ་འབྲས་བུ་འབྱུང་བར་ངེས་པའི་ཡིད་ཆེས་ཁོ་ནས་རང་གཞན་སྡིག་སྤོང་དགེ་སྒྲུབ་ལ་ནན་ཏན་རྗེས་སུ་བསྒྲུབ་སྟེ། ལས་འབྲས་འཆོལ་བར་སྤྱོད་པའི་གྲོགས་ངན་སྤང༌། ལས་འབྲས་བསླུ་མེད་དུ་སྟོན་པའི་དགེ་བའི་བཤེས་གཉེན་བསྟེན། ཐོས་བསམ་བསྒོམ་པའི་ལམ་ལ་འབུང་ཞིང༌། ལུས་ངག་ཡིད་གསུམ་བླངས་པ་ཁས་ལེན་གྱི་ཡུལ་དུ་གྲུབ་པའི་གནས་དང་ལྡན་པ་ལ་དགའ་བ་བསྒོམ། ཉེས་བྱས་ཕྲ་བ་ནས་སྤང་བླང་བྱ་སྟེ། ཁྲིམས་ཀྱིས་རང་རྒྱུད་དག་པ་གལ་ཆེ། རྒྱལ་བས་བསྔགས་པའི་བས་མཐའི་རི་བོ་རྣམ་གཡེང་མེད་པའི་སྤྱིལ་བུར་འཁོར་བ་ལ་ཡིད་འབྱུང་བའི་བློས། གང་ལའང་མི་ཆགས་མི་ཞེན་པའི་སྤོབས་པས་སེམས་ནང་དུ་བཅུག་ལ་འཁོར་ལོ་བར་པར་གསུངས་པའི་དམིགས་རྟེན་ཤིང་བུ། རྡེའུ་མེ་ཏོག་སོགས་གང་རྙེད་མདུན་དུ་བཞག །སེམས་ཡུལ་ལ་འཕྲོ་བའི་རྒྱུན་ལམ་འགོག་བྱེད་ཡིད་རྩེ་གཅིག་ཏུ། ལུས་སྐྱིལ་ཀྲུང་དུ་ཕབ། ལག་པ་མཉམ་བཞག །སྒལ་ཚིགས་དྲང་པོར་བསྲང་ངོ༌། །མིག་འབྲས་དམིགས་རྟེན་ལ་གཟིར་ནས། མགྲིན་པ་སྒུ། སོ་མཆུ་མ་རེག་ཙམ་བྱ། ཡུལ་རྐྱེན་གང་གིའང་རྗེས་སུ་མི་འབྲང༌། གསལ་ལེ། སིང་ངེ་འཇོག་ཅིང་སོ་སོར་རྟོག་པའི་ཤེས་རབ་ཀྱི་རལ་གྲིས་རྣམ་རྟོག་ཡུལ་ཅན་གྱི་ལྗོན་ཤིང་རྦད་ཆོད་དུ་བཏང་ནས། ཆོས་ཐམས་ཅད་སྟོང་ཞིང་བདག་མེད་པའི་ངང་ལ་བཞག་གོ །བྱིང་རྨུགས་ཀྱི་དབང་དུ་གཏན་ནས་མི་གཏང༌། ཤེས་པ་ངར་བསྐྱེད། མྱང་འདས་ཞི་བདེའི་རོ་མི་མྱོང༌། རྩ་བ་ཕུང་བྱེད་བདག་ཏུ་འཛིན་པ་དྲུངས་ནས་འབྱིན་བྱེད་ཁོ་ནས། སྙེམས་སུ་སྣང་བའི་རྟག་ཆད་གཡང་སའི་མཐའ་བཅད་ཡུལ་མི་ལེན་པའི་བྱིང་བ་ཆེན་པོ་འཕྱི་བ་ཚང་ཞུགས་འདྲ་བའི་མུན་པ་བསལ། རང་རིག་རང་གསལ་རང་རྒྱུད་ཀྱིས་བསྡུས་པའི་ཡིད་ཆེས་སུ་འཛིན་པ་མི་དཀྲུགས། རིག་ལམ་ངོར་གྲུབ་པའི་བློས་བྱས་སྟོང་པར་གོ་བ་མི་ལེན། ཡུལ་དང་ཡུལ་ཅན་དགྲ་གྲོགས་སུ་ཕྱེ་བའི་ཞལ་ཆེ་མི་གཅོད་པར་གང་ཤར་སྟོང་པའི་རང་གཟུགས་སུ་ཐག་རྦད་བཅད། རང་མྱོང་དཔང་པོ་ཅན་གྱི་སོ་སོར་རྟོག་ཅིང་རྗེས་མི་མཐུད་པར་རང་གྲོལ་སྦྲུལ་མདུད་ལྟར་ལ་བསླབ། མཉམ་བཞག་རྗེས་མེད་དེའི་ངང་ནས་རྗེས་སྤྱོད་རྒྱལ་བའི་བཀའི་བཅས་མཚམས་ལ་མིག་འབྲས་བཞིན་བསྲུང༌། ལྟ་བ་ཡངས་ཞིང་སྤྱོད་པ་ཞིབ་པ་ལ་ནན་ཏན་རྗེས་སུ་བསྒྲུབ་པ་ཉིད་དོ། །བསྒོམ་རིམ་ཐོག་མཐའ་ཀུན༵་བསྡུས་ནས། །རབ་དག༵འི་སྤོབས་པ་རྣམ་གྲོལ༵་མཆོ༵ག །ལྟ་སྤྱོད་ཟུང་འབྲེལ་གནད་སྟོན་པའི། །ཡི་གེ་འདི་ཉིད་གཅེས་པར་ཟུངས། །རོང་སྟོན་ཤེས་བྱ་ཀུན་རིག་གི་ཁྲིད་ཡིག་ལས་བཏུས་སོ། (༢༣) །བྱམས་ཆོས་ལྔའི་ཁྲིད་ཡིག །བྱམས་ཆོས་ལྔའི་ཁྲིད་ནི། སྐྱབས་སེམས་སྔོན་དུ་སོང་ནས། ཐོག་མར་མཆོད་བརྗོད་དང་འབྲེལ་བར། མངོན་རྟོགས་རྒྱན་གྱི་སྙིང་པོ་དྲིལ་དོན་ལ་ཚོགས་ལམ་དུ་ཡུལ་མཁྱེན་གསུམ་ལ་དམིགས་ཏེ་བསྒྲུབ། ངོ་བོ་སྦྱོར་བ་བཞིས་ལམ་ཕ་རོལ་ཏུ་ཕྱིན་པ་དྲུག་ཏུ་བསྒྲུབ། བསམ་པ་གོ་ཆའི་སྒྲུབ་པ་ནི། སྐྱབས་འགྲོ་སྔོན་དུ་སོང་བའི་སྦྱིན་པ་གསུམ། ཉན་རང་ཡིད་ལ་བྱེད་པ་སྤང་བ་ཚུལ་ཁྲིམས། མི་སྙན་པ་བཟོད་པ། ཐེག་པ་ཆེན་པོའི་འཁོར་ལ་འདུན་པ་བརྩོན་འགྲུས། ཐེག་པ་གཞན་དང་མ་འདྲེས་པ་བསམ་གཏན། བྱང་ཆུབ་ཏུ་བསྔོ་བ་ཤེས་རབ་སྟེ་འཁོར་གསུམ་དུ་མི་རྟོག་པས་ཟིན་པར་བྱའོ། །སའི་ཚོགས་ཕ་རོལ་ཏུ་ཕྱིན་པ་བཅུ། གཙོ་བོའི་ས་སྦྱོང་ངོ༌། །མདོ་སྡེ་རྒྱན་གྱི་སྙིང་པོ་དྲིལ་ཐོ་ལ། བྱང་ཆུབ་སེམས་དཔའི་སྤྱོད་པ་ཉམས་སུ་ལེན་པ་ནི། མ་དག་སའི་མོས་སྤྱོད། དག་པ་སའི་ལྷག་བསམ། བྱང་ཆུབ་སེམས་དཔའི་སྤྱོད་པ་ཉམས་སུ་བླང༌། ཕན་ཡོན་ལས་སྦྱོར་བའི་བསམ་པ་ཐེག་པ་ཆེན་པོའི་ཆོས་ལ་མོས་པ་བསྐྱེད། རང་དོན་དུ་ཆོས་ཚོལ་བ་ལ་འདུན་པ་མ་ལོག་པའི་ངང་ནས། གཞན་དོན་དུ་སྦྱོར་བ་ཆོས་སྟོན་པ་དང༌། དངོས་གཞི་རང་དོན་དུ་ཆོས་བདག་ཉིད་བསྒྲུབ། གཞན་དོན་གདམས་ངག་དང་རྗེས་གདམས་བསྟན། རྗེས་ལ་རང་གཞན་གཉིས་ཀའི་སྤྱོད་པ་ཐབས་ཀྱིས་ཟིན་པར་བྱ༑ དག་པ་སའི་སྤྱོད་པ། རྒྱ་ཆེ་བའི་དང་ཟབ་པའི་སྤྱོད་པའོ། །ཕན་ཡོན་ནི་ཐེག་པ་ཆེན་པོའི་ཆོས་ཉམས་སུ་བླངས་པས་ཉོན་མོངས་པའི་ནད་ཞི་བ་དང༌། བསྒྲུབས་ན་ཡོན་ཏན་ལ་དབང་ཐོབ་པ་དང༌། སེམས་ལ་བཅངས་ན་འདི་ཕྱིའི་དོན་མ་ལུས་པ་འབྱུང་བ་ཡིད་བཞིན་གྱི་ནོར་བུ་ལྟ་བུའོ། །ཆོས་ཉིད་རྣམ་འབྱེད་ཀྱི་སྙིང་པོ་དྲིལ་དོན་ལ། རང་སེམས་ཚོགས་བརྒྱད་ཀྱི་རྟོག་པར་སྣང་བ་འདི། ཆོས་ཉིད་ངོ་མ་ཤེས་པར་སྐྱེ་ཡང་བདེན་པར་མེད། འདི་མི་སྣང་བར་ཆོས་ཉིད་སྣང་བ་བདེན་ཞེས་ངོ་སྤྲོད། ནང་སེམས་དང་ཕྱི་སྣོད་བཅུད་དུ་སྣང་བའི་འཁྲུལ་རྟོག་ཞེན་པས་ཉོན་མོངས་པ་བསྐྱེད། རྟོག་པ་དང་གཉིས་སྣང་འགགས་པའི་ཤེས་པ་ཆོས་ཉིད་དུ་གནས་པས་མི་རྟོག་པའི་ཡེ་ཤེས། རྗེས་ལ་ཞེན་མེད་སྒྱུ་མ་ལྟ་བུར་འཆར་རོ། །དབུས་མཐའ་རྣམ་འབྱེད་ཀྱི་དྲིལ་དོན་ནི། འཇིག་རྟེན་བློས་སྤངས་ནས་སེམས་ཅན་གྱི་དོན་དུ་བྱང་ཆུབ་བསྔོ་བ། ཚོགས་དང་སྦྱོར་བའི་དུས་སུ་བརྩམས་པ། ས་དང་པོ་ལ་སྒྱུ་མ། བརྒྱད་པ་ལ་རྒྱུ་མཐུན་སྤྱོད། ས་བཅུ་དང་སངས་རྒྱས་ས་ལ་ཕ་རོལ་ཏུ་ཕྱིན་པ་འགྲུབ། ཐབས་བདག་གཞན་མཉམ་པར་མོས་པ། གཞན་གྱི་ཕ་རོལ་ཏུ་ཕྱིན་པ་ཏིང་ངེ་འཛིན་དབང་འབྱོར་བས་རྣམ་པར་མི་རྟོག་པའི་ཡེ་ཤེས་མངོན་དུ་བྱ་ཕྱིར་གྲོགས་ཆོས་སྤྱོད་བཅུ་དང་ཞི་གནས་གཡེངས་མེད་ལྷག་མཐོང་ཕྱིན་ཅི་མ་ལོག་པར་བསྒྲུབ་པ་ཉིད་ཡིན་ལ། ཐེག་ཆེན་རྒྱུད་བླར་ཞབས་བསྔོ་བ་གསུངས་པས་འཇུག་རྟེན་གྲུབ་པའི་དྲིལ་དོན་ནི༑ གོང་དུ་བཤད་པའི་བྱམས་པའི་ཆོས་སྡེ་བཞིའི་སྙིང་པོ་རང་བཞིན་འོད་གསལ་རྡོ་རྗེའི་གནས་བདུན་དཔེ་དགུས་རྒྱས་པར་འཆད་པ་ཉིད་དེ། གཟུང་འཛིན་གཉིས་སྣང་གི་གཡའ་ཡིས་གཉུག་མའི་ཡེ་ཤེས་ལ་ངར་འཛིན་བྲལ་བའི་རང་རིག་རང་གསལ་ཉིད་དུ་ཐག་བཅད་ནས། རིག་པས་ཆད་ལྟ་བསལ་བས་རྟག་ལྟའི་འཕྲང་བཀག་སྟེ། སེམས་ཀྱི་རང་བཞིན་ནམ་མཁའ་བཞིན་དུ་འགྱུར་བ་མེད་པས། ཡང་དག་པར་མིན་རྟོག་ལས་བྱུང་བའི་ཉོན་མོངས་པས་གོས་པ་མེད་པའི་དབྱིངས་ངོ་འཕྲོད་པ་དེ་སྐལ་བ་དང་ལྡན་པ་ལ་བྱམས་གཞུང་ཉིད་ལ་མཛུབ་མོས་ཁྲིད་དེ་བརྡར་སྦྱོར་བ་ཉིད་དོ། །བྱམས་ཆོས་རྣམ་ལྔ་ཀུན༵་གྱི་ཁྲིད། །ཨུ་དུམ་མེ་ཏོག་རེས་འགའ་ལྟར༑ ༑དག༵འ་བས་དྲངས་པའི་རང་གྲོལ༵་བློས། །ཡིད་ཆེས་མཆོ༵ག་གི་སྣེ་ཙམ་བཀོད། །བཅོམ་ལྡན་འདས་རིག་པའི་རལ་གྲིའི་ཁྲིད་དཔེ་ལས་ཅུང་ཟད་ཙམ་བཏུས་སོ། (༢༤) །རང་སྟོང་གི་ལྟ་ཁྲིད། རང་སྟོང་གི་ལྟ་ཁྲིད་ནི། སྐྱབས་སེམས་སྔོན་དུ་སོང་ནས༑ གཞི་དབུ་མ་ཐ་སྙད་སྣང་ཙམ་དགེ་མི་དགེ་ཕྲ་ཞིང་ཕྲ་བ་ནས་ཉམས་སུ་ལེན། མཉམ་གཞག །འགག་མེད། སྐྱེ་མེད། ཆད་མེད། རྟག་མེད། འོངས་མེད། འགྲོ་མེད། ཐ་དད་མིན། གཅིག་མིན། སྤྲོས་པའི་མཐའ་བརྒྱད་དང་བྲལ་བ། རྗེས་ཐོབ་སྒྱུ་མ་ལྟ་བུ་ཡུན་རིང་དུ་བསྒོམ། གོམས་ན་སྟོང་པ་ཉིད་ཀྱི་སྒྲ་ཐོས་པའི་དུས་སུ་ཡིད་བདེ་ཆེན་པོ་འབྱུང་ཞིང་ལུས་ཀྱི་བ་སྤུ་ལྡང༌། མིག་མཆི་མ་འཁྲུགས། ཐེག་པ་ཆེན་པོའི་རིགས་སད། གནད་དོན་མངོན་སུམ་དུ་རྟོགས། སྤང་བྱ་ཉོན་མོངས་པ་ལས་གྲོལ། ཉམས་ལེན་སྤྲོས་བྲལ་ལ་འཛིན་མེད་ཞེན་མེད་དུ་སྐྱོང༌། ལུས་ངག་གི་དགེ་སྦྱོར་གཙོ་བོར་མི་བྱ། སྤྲོས་བྲལ་གྱི་དོན་ལ་བརྟན་པ་མ་ཐོབ་ན། ལུས་ངག་གི་དགེ་སྦྱོར་གཙོ་བོར་བྱེད་དགོས། མཐར་འཛིན་སྤྲོས་པའི་ཚོགས་རྣམ་ཀུན༵། །སྤྲིན་བྲལ་མཁའ་བཞིན་དག༵འ་སྤྲོའི་ངང༌། །དེ་ཡང་རང་གྲོལ༵་འཛིན་བྲལ་བའི། །མཆོ༵ག་གི་ལྟ་ཁྲིད་ཡི་གེར་བཀོད། །པ་ཚབ་ཀྱི་ཁྲིད་དཔེ་ལས་བཏུས་སོ། (༢༥) །གཞན་སྟོང་གི་ལྟ་ཁྲིད། གཞན་སྟོང་གི་ལྟ་ཁྲིད་ནི། སྐྱབས་སེམས་སྔོན་དུ་སོང་ནས། འཁྲུལ་པ་ལ་བདེན་ཞེན་ཀུན་བརྟགས། ཡང་དག་མ་ཡིན་པའི་ཀུན་རྟོག་ཉིད་གཟུང་འཛིན་དངོས་པོར་ཞེན་པ་ཐག་ཁྲ་སྦྲུལ་བཞིན་གཟུགས་ནས་རྣམ་མཁྱེན་གྱི་བར་ཇི་སྙེད་ལ། དེ་དང་དེར་བཟུང་བའི་ཀུན་བརྟག་ཀྱང་དེ་སྙེད། རྒྱུ་རྐྱེན་ལ་ལྟོས་ན་གཞན་དབང་སྣ་ཚོགས་སུ་སྣང་བ་ཡང་དག་མ་ཡིན་རྟོག་པ་ཙམ་དུ་ཟད་ལ། སྦྲུལ་དུ་འཁྲུལ་པའི་གཞི་ཐག་ཁྲ། ལས་དང་ཉོན་མོངས་རྣམ་རྟོག་དུ་གྱུར་པའི་གཟུགས་ནས་རྣམ་མཁྱེན་གྱི་བར། གཞན་དབང་རྣམས་ལ་གདོད་མ་ནས་ཁྱབ་པའི་ཆོས་ཉིད་རང་བྱུང་ཐག་ཁྲ་ལ་ཁྱབ་པར་ཡོད་པའི་ནམ་མཁའ་བཞིན་ཕྱིན་ཅི་མ་ལོག་པའི་ཡོངས་གྲུབ། འགྱུར་མེད་ཡོངས་གྲུབ། གཟུགས་སྐུ་གཉིས། བྱང་ཕྱོགས་ལམ་བདེན་རྣམས་དང་ཆོས་ཉིད་ཀྱི་གཟུགས་ནས་རྣམ་མཁྱེན་བར། ཐ་སྙད་དུ་ཀུན་བརྟག་མཚན་ཉིད་ཀྱིས་སྟོང༌། ངོ་བོ་ཉིད་མེད་གསུམ་དུ་བཞག་ཀྱང༌། དཔྱད་ན། སེམས་ལས་མ་གཏོགས་པའི་གཟུང་འཛིན་མེད་པའི་ཕྱིར་ཆོས་ཅན་གཞན་དབང་དང༌། ཆོས་ཉིད་ཡོངས་གྲུབ་ཁོ་ན་དྲི་མ་དང་བྲལ་ཞིང་ལྷུན་གྱིས་གྲུབ་པའི་ཆོས་ཉིད་གཅིག་པུ། དེས་ན་ཀུན་བརྟག་རང་གི་ངོ་བོས་སྟོང་པ་ཉིད་རི་བོང་གི་རྭ་ལྟ་བུ། གཞན་དབང་ཀུན་བརྟགས་ཀྱིས་སྟོང་པས་སྒྱུ་མ་ལྟ་བུ། ཡོངས་གྲུབ་ཀུན་བརྟག་གཞན་དབང་གཉིས་ཀར་གྱིས་སྟོང་པས་ནམ་མཁའ་ལྟ་བུ། ཀུན་བརྟག་གཞན་དབང་གི་ཐ་སྙད་ཀུན་རྫོབ་ཏུ་ཡོད་ཀྱི་དོན་དམ་དུ་མེད་ལ། ཆོས་ཉིད་ཡོངས་གྲུབ་ནི་དོན་དམ་དུ་ཡོད་ཀྱི། ཆོས་ཅན་ཀུན་རྫོབ་དང་ངོ་བོ་གཅིག་ཐ་དད་གང་ཡང་མ་ཡིན་པ་མཐའ་ཐམས་ཅད་དང་བྲལ་བའི་དབུ་མ་ཆེན་པོའོ། །ཆོས་ཀུན༵་མཚན་ཉིད་གསུམ་བསྡུས་ནས༑ ༑གཉིས་སྣང་གཡའ་ཡིས་མ་གོས་པའི། །དག༵འ་བ་རང་གྲོལ༵་མཆོ༵ག་གི་ཁྲིད། །འདིར་ནི་ཡི་གེར་གསལ་བར་བྱས། །བཙན་ཁ་བོ་ཆེའི་ཁྲིད་དཔེ་ལས་བཏུས་སོ། (༢༦) །སྦས་དོན་ཀྱི་ཁྲིད་ཡིག །སྦས་དོན་གྱི་ཁྲིད་ནི། སྐྱབས་སེམས་སྔོན་དུ་སོང་ནས། རབ་དྲན་རིག་སྐད་ཅིག་མའི་སྟེང་དུ་བསྐྱེད་རྫོགས་ཡེ་རྫོགས་སུ་གཉུག་མ་གཅེར་མཐོང༌། འབྲིང་གཤིས་སྐྱེ་མེད། གདངས་འགག་མེད་ལྷར་འཆར་བའི་རྩོལ་མེད་སོ་མ། ཐ་མ་བསྒོམ་པའི་ངོ་བོ་བཟོ་མེད་ཤུགས་འབྱུང་སྟེ། ཐ་མའི་ལམ་རིམ་འདི་དཀྱུས་སུ་མཛད་ནས་སྐུ་གསུང་ཐུགས་ཡེ་ཤེས་རྡོ་རྗེ་བཞིར་མཛད་པ་ལས། དགྲ་བགེགས་ཚར་གཅོད་དང༌། སྐལ་ལྡན་རྗེས་འཛིན་གཉིས་ལས་དམར་ནག་འཇིགས་གསུམ་བསྐྱེད་རིམ་དང་འབྲེལ་བར་རྫོགས་རིམ་སྤྲོས་མེད་རྣལ་འབྱོར་བཞི། སྤྲོས་མེད་ལ་དཔྱལ་ལོ་མཐའ་བྲལ་ལམ་བྱེད། དམིགས་གཅིག་མ་ཆགས་ལོའི་འོད་གསལ་ལམ་འཇུག །གློ་ལོ་བིའི་རྡོ་རྗེའི་ཚིག་རྐང་ལ་བརྟེན་པའི་སྤྲོས་མེད་རྒྱས་པ། དཱ་ན་ཤཱི་ལའི་ཕྱག་རྒྱ་ལམ་སྦྱོར། ཐར་ལོའི་སྤྲོས་མེད་ཉེ་བརྒྱུད། ག་ན་ཤྲཱི་ནས་མྱང་སྟོང་བཀའ་ལུགས་ཏེ་དྲུག །རྣལ་འབྱོར་བཞི་ལའང༌། དཔྱལ། ཆག །གློ་ལོ། དཱ་ན་ཤཱི་ལ། ཐར་ལོ་ཨཱརྱ་སྟེ་སྒོ་དྲུག །ཀུན་བསྡོམས་བཅུ་གཉིས། དེ་བཞིན་ནག་པོ་ལུགས་གཉིས་ལའང༌། རྭ། སྐྱོ། ཞང༌། ས་ལུགས་དང་བཞི། རེ་རེར་རྒྱུད་རྐྱང་མན་ངག་གི་ལུགས་རེ། དགྲ་ནག་ལ། དེ་ཝ་ཨཱ་ཀ་ར་ཙནྡྲའི་ཕྱག་རྒྱ་བཞིའི་གཞུང༌། གདོང་དྲུག་ལ། རྡོ་རྗེ་བཞད་པའི་རིམ་པར་ཕྱེ་བའི་ཐེམ་བཀོད། རྒྱ་གཞུང་གཉིས་ཀྱི་ལུགས། དགྲ་གདོང་ལ། དམིགས་བསྡུས་བཞི། འགྲེལ་པས་ཁ་བསྐང་བཞི། ཁྲིད་རིམ་བཞི་སྟེ་བརྒྱད། འཇིགས་བྱེད་ལའང༌། ལུགས་བཞི་སོ་སོར་རྭ་ལོས་ཟབ་པ་རྒྱ་ཆེ་ལ་སློབ་ཚུལ། སྐྱོ་སྟོན་རྭ་རྩེ་སེམས་འཛིན། ཞང་ཤཱནྟི་པའི་ཚོགས་འཁོར་ནང་གི་རྣལ་འབྱོར་བདུད་རྩི་བུམ་པ། ས་སྐྱ་པ་ནཱ་རོ་པའི་མན་ངག་མཚན་མ་གྱེན་བསྒྲེངས་ཏེ་བཞི། མདོར་ན་གཤིན་རྗེའི་གཤེད་ལ་ཁྲིད་ཚུལ་ཉི་ཤུ་རྩ་བཞི། སྒོ་མཐུན་ར་ལིའི་ཕྱག་རྒྱ་བཞི་ལའང༌། ལྷའི་བདེ་བས་ཉི་ཤུ་རྩ་བཞིར་ཕྱེ། སྔར་གྱི་དང་བསྡོམས་པ་ལས་བཞི་བཅུ་ཞེ་བརྒྱད། འཁོར་ཆེན་གྱི་ཁྲིད་ཀྱང་སྦྲེལ་ནས་ཞེ་དགུ། ཉམས་ལེན་སྲོལ་ལྷན་ཅིག་སྐྱེས་སྦྱོར་དང་ལྔ་བཅུ་ཐམ་པ། དོན་བསྡུས་འཇིགས་བྱེད་ཀྱི་བསྒོམ་གསལ་དྭངས་རྙོགས་མེད། དྭངས་མ་གསུམ་ལྡན། སྒྲིབ་མེད་ལྷར་ཤར་བ། ཤིན་ཏུ་ཁྲོས་པའི་མ་ཧེའི་གདོང་མཐིང་ནག །སྤྱན་གསུམ་ཁྲ་ཟླུམ་ཟླུམ་པ། རྭ་སྔོ་སངས། རྩ་བ་ཁྲོ་གཉེར་ཅན། བར་གཞའ་ཁུག་དང༌། རྩེ་མོ་རྣོ་ཟུལ་ཟུལ་བ། སྟེང་ཞལ་དམར་ལམ་ལམ་པ། དམར་འཚེར་འཚེར་བ། ཉི་མ་འབུམ་ཕྲག་ཤར་བ་ལྟ་བུ། ཧ་ཧ་ཞེས་དྲག་ཏུ་བཞད་པ། དེ་སྟེང་འཇམ་དཔལ་གྱི་ཞལ་དམར་སེར། སྨིན་མ་ནག་ཁྱུག་ཁྱུག་པ། སྤྱན་དཀྱུས་རིང་ཞིང་བཀྲ་བ། ཤངས་གཟེངས་མཐོ་བ། མཆེ་བ་ཅུང་ཟད་གཙིགས་པ། གཡས་གཡོན་གྱི་ཞལ། ཕྱག་ཞབས། ཁྲོ་བོའི་དབང་པོ་སྐུ་འཇའ་ལུས་སུ་ཁྲ་ཤིགས་སེ། འོད་ལུས་སུ་འོད་ཁོ་རེ། ཞེས་འཇོག་པ་ནི་དཔྱོད་པ། དེའི་ཚེ་བསམ་གཏན་བསྒོམ་པའི་དབང་གིས་ཡིད་སྤྲོ་བ་མིའི་སྐྱིད་སྣང་ལྟ་བུར་འཆར་བ་ནི་དགའ་བདེ། རྩེ་གཅིག་ཏུ་མ་འཁྲུལ་པ་ནི་བསམ་གཏན། དེ་ཉིད་ཀྱང་སྟོང་ཉིད། མཉམ་ཉིད། བརྗོད་མེད། མི་རྟོག་པ་དང་འབྲེལ་བ་བསྐྱེད་རིམ་ལྷན་ཅིག་སྐྱེས་སྦྱོར། ཁམས་གསུམ་སྣང་བ་ལྷར་ཤར་བའི་ངང་ནས་རྫོགས་རིམ་ལ་འཇུག་སྟེ། རྭ་རྩེ་གཉིས་སུ་ཐིག་ལེ་བཀྲག་ཅིང་འཚེར་བ་དེ་བ་ཐག་ཙམ། མགྲིན་པར་འདུས་ནས་སྙིང་ཁའི་འཇམ་དབྱངས་ལ་ཐིམ། བདེ་བས་ལུས་གང༌། འཛིན་མེད་དུ་བསྒོམ། དེ་ཉིད་ཀྱང་དཔྱད་ན་གསལ་བ་སེམས། དྭངས་པ་རླུང༌། རྙོག་མེད་ཕལ་པའི་ཡུལ་ལས་འདས་པ་རྫོགས་རིམ་ལྷན་ཅིག་སྐྱེས་སྦྱོར། ཐུན་དང་པོའི་ཁྲིད་རྫོགས། ཐུན་གཉིས་པ་སྐལ་ལྡན་རྗེས་འཛིན་འདུས་པའི་ལམ་ལའང༌། རྩ་རྒྱུད་ཉིད་དང་འབྲེལ་བ་བཤད་རྒྱུད། རྒྱུད་ཕྱི་མ་ཡེ་ཤེས་རྡོ་རྗེ་ཀུན་ལས་བཏུས། ལྷ་མོ་བཞིས་ཞུས། རྡོ་རྗེ་ཕྲེང་བ། རྡོ་རྗེ་སྙིང་པོ་རྒྱན་གྱི་རྒྱུད། ལྷའི་དབང་པོས་ཞུས་པ་སྟེ་དྲུག་རྩ་བཤད་འབྲེལ། གཞན་གཉིས་མེད་རྣམ་རྒྱལ་གྱིས་ཁ་བསྐངས་ནས་གླེང་གཞི་མི་བསྐྱོད་པ་ལྷ་སོ་གཉིས་ཉིད་ཀུན་གྱི་དབྱེ་གཞི་ཐུན་བཞི་ཁྲིགས་བཀོད། གཞན་ཤཱནྟི་པའི་མི་བསྐྱོད་པ་ལྷ་ཉེར་ལྔ། བཅུ་དགུ། བཅུ་གསུམ། དགུ་མ་དང༌། རིགས་ལྔ། རིགས་གཅིག་ཏུ་ཕྱེ་ནས་ལུས་དཀྱིལ་འགོད་ཚུལ། སངས་རྒྱས་ཡེ་ཤེས་ཞབས་ལུགས་རྒྱུད་ཕྱི་མ་ལ་བརྟེན་ནས་གཙོ་བོ་གོ་འཕོ། འཇམ་པའི་རྡོ་རྗེ་ལྷ་བཅུ་དགུ་བཀྲལ། སྤྱན་རས་གཟིགས་ལྷ་བཅུ་དགུར་བཞེད། རྩ་རྒྱུད་དངོས་བསྟན་ལ་ལྔ་ལས་མེད་ཀྱང༌། རྒྱུད་ཕྱི་མས་བསྟན་པའི་ཡན་ལག་དྲུག །མན་ངག་འཕྲུལ་གྱི་ཐོན་པའི་ཀུན་འགྲོ་ལྷན་ཅིག་སྐྱེས་སྦྱོར་གསུམ་རྩ་བར་མཛད་ནས་དེ་ལས་གྱེས་པའི་རྣམ་གྲངས་བཅོ་བརྒྱད་ལས། རིམ་ལྔ་ལ་ཀླུ་སྒྲུབ་བཞེད། པཎྜི་ཏའི་ལུགས་རྒྱུད་ཚིག་ཡིད་ཆེས་སུ་བཞག་ལ། ཨཱརྱ་དེ་ཝ་དང་ཟླ་གྲགས་ལས་བརྒྱུད་པ་དང༌། རྣལ་འབྱོར་པ་ཀུ་སཱ་ལིའི་ལུགས་ཀྱི་ཉམས་ལེན། སྨར་ཁྲིད་མ་ཏཾ་གི་ལས་ཏེ་ལོ་ནཱ་རོ་ལ་འཕེལ་བ་གཉིས་དཔྱད་བསྒོམ། ལོ་ཆེན་རིན་ཆེན་བཟང་པོའི་སྒྲོན་གསལ་ཟུང་སྦྱར། སྤྱི་ལ་དམ་ཚིག་རྡོ་རྗེ། མངོན་ཤེས་ཅན། བཙུན་མོ་ཅན་གསུམ་གྱི་སོ་སོར་བཀོད་པ་ཤོག་རིལ་གསུམ་སྟེ། བཞི་པ་ཚབ་ལོ་ཙཱ་བས་དམ་པ་རིགས་བརྒྱད་སྤོད་སྒོམ་དང་ལྔ། ཇོ་བོས་ཤཱནྟི་པ་ལས་གསན་པའི་རིམ་ལྔ་དང་དྲུག །དམ་པ་རྒྱ་གར་གྱིས་རྨ་ལོ་ཙཱ་བ་ལ་གནང་བའི་རིམ་ལྔ་ཀླུ་བྱང་ལུགས་དང་བདུན། ཁ་ཆེ་པཎ་ཆེན་གྱིས་དཔྱལ་ལོ་ཙཱ་བ་ལ་ཁྲིད་དུ་གདམས་པ་དང་བརྒྱད། ཐར་ལོའི་རིམ་ལྔ་ཉེ་བརྒྱུད་དང་དགུ། ཆག་ལོའི་རིམ་ལྔ་ལོ་སྐོར་མ་དང་བཅུ། ཀླུ་སྒྲུབ་ཡབ་སྲས་གཙོ་བོར་གྱུར་པའི་རྒྱ་གཞུང་འབའ་ཞིག་ལ་བརྟེན་མར་པའི་ཁྱད་ཆོས་རིམ་ལྔའི་གདན་རྫོགས་ལ། སྨར་ཁྲིད་མཛུབ་བཙུགས། ནག་ཁྲིད་གསུང་བགྲོས་གཉིས། སྟེང་སྒོ། འོག་སྒོ་གཉིས་ཏེ་བཞི། སྟེང་སྒོ་ལ་རིམ་གྱིས་པ་དང་ཐོད་རྒལ། དཀྲི་ཚུལ། འོག་སྒོ་ལ་དབྱེ་བས་དྲུག །ནཱ་རོ་ནི་གུ་གཉིས་ཀྱང་འདིའི་ཁོངས་སུ་འདུ། བཙན་ཐབས་ལག་ལེན་བཀའ་རྒྱ་ལོགས་སུ་སྟོན། དཀྱུས་འདིར་མི་གསུང༌། འཇམ་རྡོར། གྲོལ་ཐིག་རྒྱུད་ཕྱི་མ་ངེས་པ་ལས་དྲངས། རིམ་ལྔའི་འོད་གསལ་ཟུང་འཇུག །རྗེས་གཞིག་གོང་བསྡུའི་རྣལ་འབྱོར་དུ་དྲིལ་ནས་ཀུན་འགྲོ་ལྷན་ཅིག་སྐྱེས་སྦྱོར་གྱི་སྲོག་རྩར་སྦྱར་བས་ཁྲིད་བཅོ་བརྒྱད་ཉམས་ལེན་སོར་སྡུད་དང་འདྲ། བསམ་གཏན་སོགས་ཀྱང་འདྲ། རྟོགས་པའི་སྐབས་ཞལ་གསུམ་ཕྱག་དྲུག །ཞབས་རྡོ་རྗེའི་སྐྱིལ་ཀྲུང༌། རང་འདྲ་བའི་ཡུམ་ལ་འཁྱུད་པ། དཔྱོད་པའི་སྐབས་སུ་རྩ་ཞལ་སྔོ་ལམ་ལམ་པ། སྔོ་འཚེར་འཚེར་བ། སྨིན་མ་ནག་ཁྱུག་ཁྱུག་པ། སྤྱན་ཁྲ་ཧུར་ཧུར་བ། ཤངས་སྔོ་ཟུལ་ཟུལ་བ། ཞལ་སྔོ་དམར་མཚམས་ཕྱེད་པ། མཆེ་བ་ཅུང་ཟད་གཙིགས་པ། ཁྲོ་ཆགས་ཉམས་ཅན་གསལ་བཏབ། གཡས་ཞལ་དཀར་པོ་དཀར་ལམ་ལམ་པ། དཀར་འཚེར་འཚེར་བ། གཡོན་ཞལ་དམར་པོ་དམར་ལམ་ལམ་པ། ལྟ་བས་ཆོག་མི་ཤེས་པ། ཆགས་པའི་ཉམས་ཅན། མཚན་དཔེ་གསལ་བ། ཐུན་གཉིས་པ་གསུམ་པ་བདེ་མཆོག་སྐབས། རྒྱུད་ལས་བསྟན་ཚུལ། འགྲེལ་བྱེད་ཀྱིས་བཀྲལ་ཚུལ། མཁའ་འགྲོ་ལ་བྱུང་ཚུལ་གསུམ། རྩ་རྒྱུད་ལས་རིགས་ལྡན་མ་མཆོད་པའི་ངེས་གནས་སྟོང་ཆེན་ཡི་གེ་ལྔའི་བདག་ཉིད་ཀྱི་ཨེ་ཆོས་འབྱུང་དང༌། ཐིག་ལེ་ཡི་གེ་དྲུག་འདུས་པའི་བཾ་ཡིག །ཕྱི་ནང་གཞན་གསུམ་གྱི་ཟབ་གནད་རྩ་ཨུཏྤལ་ཁ་འབྱེད། ཨ་ཐུང་ཕག་མོའི་རང་ཞལ་རྗེན་པར་ལྟ་བའི་ཉམས་ཁྲིད། འདི་ཉིད་བདེ་མཆོག་ལྷན་ཅིག་སྐྱེས་སྦྱོར། སྔར་ཕ་རྒྱུད་སྐབས་ཟབ་པ་ལྷན་ཅིག་སྐྱེས་སྦྱོར། མ་རྒྱུད་སྐབས་རྩ་ཐིག་རླུང་གསུམ། ཆོས་སྐུ་གཅེར་མཐོང་ཉིད་ལྷན་ཅིག་སྐྱེས་སྦྱོར། ཕ་རྒྱུད་མ་རྒྱུད་གཉིས་ཀྱི་ཟབ་གནད་འདིས་འབྱེད་ཅིང་ཕ་རྒྱུད་དམ་པ་རིགས་བརྒྱ། ཐིག་ལེ་སྟོང་པ་ཡང་ཡི་གེ་བརྒྱར་བཞེད་ལ། སྔར་ལས་བཟློག་ནས་སྟོང་ཆེན་ཡི་གེ་ལྔ་ཝཾ། ཐིག་ལེ་ཡི་གེ་དྲུག་ཨེ་ཡིག །མངོན་བརྗོད་བླ་མར། སྙིང་ཁའི་མི་ཤིགས་པ་ལ་གནད་དུ་བསྣུན། ཧེ་རུ་ཀ་མངོན་འབྱུང་ལས་ཧེ་རུ་ཀ་ཕག་མོ་མཉམ་སྦྱོར། རྡོ་རྗེ་མཁའ་འགྲོར་དཔྱིད་ཐིག་ཞལ་སྦྱོར། རྣལ་འབྱོར་མ་ཀུན་སྤྱོད་ལས་ངལ་གསོ་ལྷན་སྐྱེས། སྡོམ་འབྱུང་དུ་རིམ་ལྔ་གསལ་རྫོགས། མཱ་ཧཱ་མཱ་ཡར་རྣལ་འབྱོར་གསུམ་ལྡན། སངས་རྒྱས་ཐོད་པར་ཡེ་ཤེས་བཞི་རྫོགས། གདན་བཞིར་རྣལ་འབྱོར་བཞི་ལྡན། མཁའ་འགྲོ་རྒྱ་མཚོར་ཡན་ལག་དྲུག་ལྡན། རྣལ་འབྱོར་མ་བཞིའི་ཁ་སྦྱོར་དུ་ཕྱག་རྒྱའི་ལམ་ཁྲིད། རྡོ་རྗེ་ཕྲེང་བར་དམར་ཁྲིད་ཟབ་ལམ་རྣམས། རྒྱུད་ལ་ལཱུ་ཧི་པའི་རྣལ་འབྱོར་ཆེན་པོའི་རྫོགས་རིམ། ནག་པོ་པས་དཔྱིད་ཀྱི་ཐིག་ལེ། དྲིལ་བུ་པས་རིམ་ལྔ། ཀུ་ཀུ་རི་པས་ཤིན་ཏུ་སྤྲོས་མེད། ས་ར་ཧས་གཉུག་མ་ངོ་སྤྲོད། ཨཱརྱ་དེ་ཝས་རྣལ་འབྱོར་བཞི་ཁྲིད། ཤ་བ་རིས་སྦྱོར་དྲུག །རཏྣ་རཀྵི་ཏས་རིམ་ལྔ་ལག་ཁྲིད། ཡུམ་ལ་སོ་བདུན་མ། ལྷ་མོ་བཅོ་ལྔ། བཅུ་གསུམ་མ། དགུ་མ། བདུན་མ། ལྔ་མ། ལྷན་ཅིག་སྐྱེས་མ་རེ་རེ་ལ་རྫོགས་རིམ་རེ་རེ། ཇོ་བོ། ཨ་བྷཱ་ཡ། ཁ་ཆེ་པཎ་ཆེན་གྱི་བདེ་མཆོག་དཀར་པོ་ལྷན་སྐྱེས་ལ་བརྟེན་པའི་རྫོགས་རིམ་གསུམ། དྲིལ་བུ་པ། དགའ་རབ་རྡོ་རྗེ། ཨ་བྷཱ་ཡ་རྣམས་ལྷན་སྐྱེས་སྔོན་པོ་ལ་བརྟེན་པའི་རྫོགས་རིམ། མཁའ་འགྲོ་སྙན་བརྒྱུད། ཏཻ་ལོའི་གཞུང་ཟིན། ནཱ་རོ། ནི་གུ། སུ་ཁ། མ་རྒྱུད་སྐབས་སུ་ཁྲིད་སུམ་ཅུ་སོ་བདུན་འབྱུང་བའི་ཉམས་ལེན༑ སྤྱི་འགྲོ་སྔར་དང་འདྲ། རྟོགས་པའི་སྐབས་སུ་ཞལ་བཞི་པ་ཞབས་གཡས་བརྐྱངས་པ། ཡུམ་ཕག་མོས་འཁྱུད་པ། དཔྱོད་པའི་སྐབས་རྒྱབ་ཞལ་གསེར་མདོག་སེར་པོ་ལམ་ལམ་པ། གསེར་འོད་འཕྲོ་འཕྲོ་བ། སྤྱན་ཡངས་པ་ཅུང་ཟད་གཡོ་བ། ཤིན་ཏུ་སྒེག་པའི་ཉམས་ཅན་དེ། ཐུན་གསུམ་པ་བཞི་པ་དགེས་པ་རྡོ་རྗེའི་སྐབས་སུ་རྩ་རྒྱུད་བརྟག་གཉིས། རྡོ་རྗེ་གུར། སཾ་བྷུ་ཊི། ག་ཡ་དྷཱ་རས་སིང་ག་ལའི་རྣལ་འབྱོར་མ་ལས་གསན་པའི་ཨ་ར་ལི་སྐོར་གསུམ། རྒྱུད་ཆུང་གསུམ་དུ་མཚན་གསོལ་ནས། དབང་གོང་མའི་ཉམས་ལེན་ཁ་སྐོང་དུ་བསྒྲིགས། སྤྱིར་རྒྱུད་དེ་དག་ལས་རྫོགས་རིམ་ཐོན་པའི་ཚུལ་ཡང༌། བརྟག་གཉིས་ལས་དག་པ་གསུམ་ཁྲིད། ལྷན་སྐྱེས་གསུམ་ཁྲིད། ཟབ་གསལ་ཆུ་བོའི་རྒྱུན་ཁྲིད། སྲིད་ཞི་མཉམ་སྦྱོར་ལྟ་ཁྲིད། གཉུག་མ་ལྷན་སྐྱེས་བཞི་དོན་དུ་ངོ་སྤྲོད་ཁྲིད། སྤྱོད་པ་ཐོག་རྫིས་ཀུན་འདར་གསང་སྤྱོད་ཁྲིད། གླེང་གཞི་སྦས་བཤད་གསུམ་སྦྱོར་བའི་ཁྲིད། སོར་སྡུད༑ བསམ་གཏན། སྲོག་རྩོལ། འཛིན་པ། རྗེས་དྲན། ཏིང་ངེ་འཛིན་ཏེ་ཡན་ལག་དྲུག་ཁྲིད། བསྲེ་འཕོ་ཤེས་རབ་རྣམ་བཞིར་ཁྲིད། ཆགས་བྲལ་ཐབས་ཁྲིད། ཆགས་ཅན་ཕོ་ཉའི་ཁྲིད། བསྐྱེད་རྫོགས་ཆ་མཉམ་ཁྲིད། རྫོགས་རིམ་ལུས་ལྷ་ཁྲིད། བསྐྱེད་རིམ་ཞེན་རྟོག་མཐར་ཁྲིད། རྩ་གསུམ་དྲིལ་སྒྲུབ། མོས་གུས་བླ་མའི་སྲོག་ཁྲིད་ཀྱི་བར་ཁྲིད་ཚུལ་བཅུ་དྲུག་འབྱུང༌། སྔགས་རིམ་ཀུན་ཤེས་ནས། ཀྱེ་རྡོ་རྗེ་ལས་བསྟན་པའི་བསྐྱེད་རྫོགས་མ་ལུས་པའི་ཟབ་གནད་ཀུན་དབང་བཞིའི་ལམ་དུ་བསྒྲིག །གཞི་ལམ་འབྲས་བུ་སྟེ། སྔར་གྱི་སྟོན་ཚུལ་བཅུ་དྲུག་པོ་ལས་ཆེས་ཁྱད་པར་དུ་འཕགས་པ། གཉིས་མེད་སཾ་བྷུ་ཊིའི་དགོངས་དོན་ལམ་འབྲས་བུ། གུར་ལས་ཐིག་ལེའི་རྣལ་འབྱོར་མཐའ་ཡས་པ་དང༌། སཾ་བྷུ་ཊིར་རང་བྱིན་རླབས་ཀྱི་དམིགས་པ་ཉི་ཤུ་རྩ་དགུ། རྒྱུད་ཆུང་ཕྱི་མ་གསུམ་ལས་ཕྲ་ཐིག་གི་རྣལ་འབྱོར་དཔག་མེད་གསུངས། རྒྱུད་དོན་འགྲེལ་པའི་སློབ་དཔོན་རྒྱ་བོད་དུ་བསམ་གྱིས་མི་ཁྱབ་པ་ཞིག་བྱོན་ཀྱང༌། ནང་གསེས་ཕན་ཚུན་སྲོལ་གཅིག་ཏུ་བསྒྲིལ་ཞིང༌། མན་ངག་གི་མིག་གིས་ཞིབ་ཏུ་བལྟས་ན་ཁྲིད་སྤྱི་གཅིག་ཏུ་བསྡོམས་པའི། འདིར་ཉམས་ལེན། རྒྱུད་མ་ལུས་པའི་བདག་པོ། དཔལ་དགེས་པ་རྡོ་རྗེ་ཉིད་ཉམས་ལེན་གཞུང་གི་ངོ་བོར་ཁྲིད་པ་ལས། ཐུན་ལྷག་མ་གསུམ་གྱི་དེ་ཉིད་ཀྱང་འདུས་པའི་ཚུལ་དུ། ལྟ་བ་ངོ་བོ་ཉིད་གསུམ། གྲུབ་མཐའ་འཁོར་འདས་དབྱེར་མེད། འདའ་ཁ་མ་གྲོང་འཇུག །འབྲས་བུ་གཉུག་མའི་ལྷ་དང་བཞིར་སྟོན་པ་ལས། ངོ་བོ་ཉིད་གསུམ་རྣམ་ཤེས་ཀྱི་སྣང་ཆ་རགས་པར་གསལ་བ་མ་ལུས་བསྒོམ་བྱ་ལྷ་ཞལ་ཕྱག་གི་རྣམ་པ་ཅན་དུ་མཚོན་པའི་བསྐྱེད་རིམ་ཐབས་མཁས་དེ་ཉིད་སྒོམ་བྱེད་ཡེ་ཤེས་ཀྱི་ངང་དུ་འཇུག་པའི་ཤེས་བྱ་ངོ་བོ་ཉིད་གསུམ་སྟེ། མ་བཅོས་ཀློང་ཡངས་ཀྱི་ལམ་འདིས་རྣལ་འབྱོར་བླ་མེད་ཀྱི་ཚོགས་ལམ་རྫོགས་ནས། ཐ་མལ་པའི་ལུས་ངག་ཡིད་གསུམ་བྲལ་བའི་འབྲས་བུ་ཐོབ་སྟེ། བསྐྱེད་རྫོགས་དབྱེར་མེད་ཀྱི་རང་ངོ་རྗེན་པར་རྟོགས་པའི་སྣང་བ་དེ་ཉིད་ཀྱང༌། ཐབས་མཁས་པའི་འཕྲུལ་ལྟ་བ་ངོ་བོ་ཉིད་གསུམ་གྱི་སྟེང་དུ་སྦྱར་ནས་སྟོན་ཏེ། རྣམ་པ་ཀྱེ་རྡོ་རྗེ་ཞལ་བརྒྱད་ཕྱག་བཅུ་དྲུག་པར་གསལ་བ་གཞན་དབང༌། རང་མགོ་གཅིག་ལག་གཉིས་ཀྱིས་ཐ་མལ་པར་བརྟགས་པ་ནི་ཀུན་བརྟགས། རང་བཞིན་བཟང་ངན་གྱི་དྲི་མས་མ་གོས་པས་ཡོངས་གྲུབ། དེ་ཉིད་ཀྱང་གནས་ལུགས་ཀྱི་གཞི་རྩར་སྦྱར་ན། སེམས་ཉིད་གཉུག་མ་ལ་འཁྲུལ་པར་བརྟགས་པ་ཀུན་བརྟག་གཉུག་མ་ཉིད་གཞན་གྱི་རྐྱེན་དང་བྲལ་བས་གཞན་དབང༌། གཉུག་མ་ཉིད་འཁྲུལ་པས་གོས་མ་མྱོང་བས་ཡོངས་གྲུབ་ཏུ་ངེས་པར་རྟོགས་ནས། བསྐྱེད་རྫོགས་དབྱེར་མེད་གཉུག་མའི་ཡེ་ཤེས་རྣམ་པ་ལྷར་གསལ་བ། རང་བཞིན་ཀུན་བརྟགས་ཀྱིས་སྟོང་པའི་ངོ་བོ་ཟུང་འཇུག་ཏུ་བསྒོམ། རྟོགས་པའི་ཚེ། རང་ཉིད་ཀྱེ་རྡོ་རྗེ་སྐུ་ལུས་དང་རྩ་ཞལ་མཚུངས་པར་སྔོ། གཡས་དཀར། གཡོན་དམར། ལྷག་མ་གཉིས་ནག །སྟེང་ཞལ་དུད་ཁ། སྤྱན་ཉེར་བཞི། སྣ་ཚོགས་རྡོ་རྗེས་སྤྱི་བོར་མཚན་པ། ཕྱག་བཅུ་དྲུག་པ། ཞབས་བཞི། ཡུམ་དང་མཉམ་པར་སྦྱོར་བ། མི་ཤིགས་པ་དྭངས་མ་གསུམ་ལྡན་གྱི་ངོ་བོ་མེ་ལོང་ནང་གི་གཟུགས་བརྙན་ལྟ་བུ། དཔྱོད་པའི་ཚུལ་རེ་རེ་ནས། རྩ་ཞལ་གཡུ་མདོག །གཡས་ཞལ་ཟླ་མདོག །གཡོན་ཞལ་བྱི་རུ། སྟེང་ཞལ་དུད་སྤྲིན། ཞལ་ལྷག་མ་དུད་ཁའི་མདོག་ཅན། གླང་པོ། རྟ། བོང་བུ། གླང༌། རྔ་མོ། མི། ཤ་ར་བྷ༑ བྱི་ལ། སའི་ལྷ། ཆུའི་ལྷ། མེའི་ལྷ། རླུང་གི་ལྷ། ཟླ་བའི་ལྷ། ཉི་མའི་ལྷ། གཤིན་རྗེ། ནོར་འཛིན་དང་བཅས་པའི་ཐོད་པ། གཡས་གཉིས་བརྐྱངས་པའི་ཞབས་འོག་ན་ཚངས་པ་དྲག་པོ། གཡོན་གཉིས་བསྐུམས་པས་དབང་པོ་ཉེ་དབང་གདན་དུ་བྱས། དེའི་པང་ན་བདག་མེད་ལྷ་མོ་གྲི་ཐོད་འཛིན་པ། བྱིན་པ་གཉིས་ཀྱིས་ཡབ་ལ་འཁྲིལ་བ། ལང་ཚོ་དང་ལྡན་པ་ཡབ་ཡུམ་གཉིས་ཀའང་ཐོད་སྐམ་ལྔ་ལྔའི་ཅོད་པན། ཡུམ་ སྐམ་རློན་ ཡབ་ ལྔ་བཅུའི་དོ་ཤལ༑ ཕྱག་རྒྱ་དྲུག་དང་ལྔས་བརྒྱན་པ། སྟག་གི་པགས་པའི་ཤམ་ཐབས་ཅན། ཞེས་དཔྱད་ཅིང་བསྒོམ་པའོ། །དེའི་ཚེ་ལྷ་སྐུ་སྣང་སྟོང་གིས་དྲངས་པའི་སྔར་འདྲིས་ཀྱི་མི་དང་ཕྲད་པ་ལྟ་བུའི་ཡིད་བདེ་ནི་དགའ་བདེ་ཡིན་ལ། དེ་ཉིད་ཆུ་ཟླ་ལྟར་འཇོག་པ་ནི་བསམ་གཏན། དེ་ལྟར་མཉམ་རྗེས་མེད་པར་ཉམས་སུ་བླངས་པས། སྣང་བ་ཐམས་ཅད་སེམས་ཀྱི་རང་གདངས་སུ་ཤེས་ནས་ལྷར་སྣང་ཉིད། སྟོང་ཉིད། མཉམ་ཉིད། མི་རྟོག་པ་དང་བྲལ་བ་ཡིན། རྣམ་དཔྱད་རྫོགས་པ་ན་ཆོས་གང་ལ་ཡང་མི་མནོ། མི་བསམ། མི་དཔྱད། མི་རྟོག་རྩོལ་མེད་དུ་ལྷུག་པ་སྟེ། བློ་འདས་ལྟ་བ་ལ་མཐའ་བྲལ་བློ་སྦྱོང་གཏན་ལ་ཕབ་ནས་ཟུང་འཇུག་ཏུ་ཉམས་སུ་ལེན། ༀ་ཨཱཿ ཧཱུྃ་ཀཱ་ཡ་ཝཱ་ཀ་ཙིཏྟ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། སྣོད་ཐམས་ཅད་གཞལ་ཡས་ཁང༌། བཅུད་ཐམས་ཅད་ལྷ་དང་ལྷ་མོ། རང་བཞིན་ལྷུན་གྲུབ་མངོན་དུ་གྱུར་པའོ། །སྐུ་ཁྲིད། གསུང་ཁྲིད། སྲོག་རྩོལ་རླུང་གི་རྣལ་འབྱོར་ལ། འཇམ་རླུང༌༑ བར་རླུང༌། དྲག་རླུང༌། དེ་ཡང་བསམ་གཏན་གྱི་ཡན་ལག་སྔོན་དུ་བཏང་ནས། རླུང་ནང་དུ་འཇུག་པ་ༀ། གནས་པ་ཨཱཿ ཕྱིར་གྲོ་བ་ཧཱུྃ་བཟླ། བར་རླུང་རླུང་ནང་དུ་ཇེ་རིང་དུ་བཏང་ནས་མཐར་ཐུབ་ཚད་དུ་ལྟོ་བ་ཕྱིར་ཕུལ་ཞིང་སྟེང་འོག་གི་རླུང་གཉིས་ཐད་སོར་བཞག་གོ །ཐ་མ་རྔུབ་པ། དགང༌། གཞིལ། མདའ་ལྟར་འཕང་བ། འཁོར་ལོ་ལ་མ་བརྟེན་པ། འཁོར་ལོ་ལ་བརྟེན་པ། ཐིག་ལེའི་རྣལ་འབྱོར། མན་ངག་གི་གནད་ལ་བརྟེན་པ་སྟེ། གསང་དབང་གི་ལམ་མཐར་ཐུག་པ་གཏུམ་མོའི་མེ་དམིགས་བཅོ་བརྒྱད་པོ་འདི་ཉིད་ཉམས་སུ་ལེན། ཟས་སྤྱོད་ལམ་བསྐུལ། བོགས་འདོན་གེགས་སེལ་མ་ལུས་པའི་གནད་བསྡུས། ཕྲིན་ལས་སུམ་ཅུ་རྩ་གཉིས་ཀྱི་འཁྲུལ་འཁོར། རིམ་དང༌། རིམ་མིན། དཀྲུགས་པ་དགུ་བཅུ་རྩ་དྲུག་ལག་ལེན་བཞིན་ཉམས་སུ་བླངས། གསུམ་པའི་ལམ་འདིར་དུས་འཁོར་རྡོ་རྗེ་བཞི་རིམ། གྱི་ཇོ། འབྲོ། རྭ། དིང་རི་ཆོས་གྲགས་ཏེ་སྔོན་གྱི་ལོ་ཙཱ་བ་བཞི། མན་ལུང་གུ་རུ། ཐར་ལོ། ཨོ་རྒྱན་པ། བི་བྷུ་ཏི་ཙནྡྲ་སྟེ་བར་བྱོན་བཞི། ཤ་བ་རི་ཐོག་མཐའ་བར་གསུམ། ཕྱིས་བྱོན་ནགས་རིན་ཉེ་བརྒྱུད་དེ། ཁྲིད་ལུགས་བཅུ་གཉིས་པོ་འདི་ལམ་གྱི་སྲོག་རྩར་བྱིན། བུ་སྟོན་ལ་སྦྱོར་དྲུག་རིགས་མི་འདྲ་བ་དྲུག །བླ་མ་དམ་པ་བསོད་ནམས་རྒྱལ་མཚན་ལ་སྔོན་མེད་པའི་ཉམས་ཁྲིད་སྐྱ་རྒྱལ་སོགས་སྦྱོར་དྲུག་གི་རིགས་མི་འདྲ་བ་ཉེར་དྲུག་བཞུགས་པ་ཐམས་ཅད་ཀྱི་ཟབ་གནད་གཅིག་དྲིལ། འཛིན་པ་རྗེས་དྲན་དུ་གསུངས་པའི་བཀའ་སྲོལ་ལ། དམར་ཁྲིད་གསུང་སྒྲོས་གུད་དུ་ཕྱེ། ཐད་སོར་གནད་འདོམས་གདན་ཐོག་གཅིག་ཏུ་བསྒྲུབ་ཚུལ་ལེགས་པར་ཚང་ངོ༌། །དེ་ཉིད་འདུས་པའི་ཆུ་ཀླུང་ཀུན༵། །དག༵འ་བ་འཁྱིལ་བའི་སྦས་དོན་ཁྲིད། །གྲོལ༵་བྱེད་མཆོ༵ག་གི་རྒྱས་འགྲེལ་གྱི། །སྙིང་པོ་བསྡུས་ཏེ་བཀོད་པ་ལགས། །རང་གི་རྒྱས་འགྲེལ་ལས་བཏུས་སོ། (༢༧) །ཚེ་ཁྲིད། ཚེ་ཁྲིད་ནི། སྐྱབས་སེམས་སྔོན་དུ་སོང་ནས། རང་ཉིད་ཚེ་དཔག་ཏུ་མེད་པར་གསལ་བའི་རལ་པའི་མདུན་དུ་རིགས་བདག་སྤྲུལ་སྐུ་ལ་མོས་གུས་དུངས་པ་བྱས། བླ་མའི་ཐུགས་ཀའི་ཧྲཱིཿ ལས་འོད་ཟེར་འཕྲོས། རང་གི་བླ་ཚེ་བཀུག །ཕྱག་གི་ལྷུང་བཟེད་བདུད་རྩིའི་རྒྱུན་གྱིས་དབང་བསྐུར་བར་བསམ། འོག་འབྱུང་བ་བཞིའི་བཅུད་བསྡུས་ཐམས་ཅད་ལ་འདི་བཞིན་བྱ། ༀ་ཨཱ་མ་ར་ཎི་ཛཱི་ཝནྟི་ཡེ་སྭཱ་ཧཱ། ཡང་ཧྲཱིཿ ཡི་འོད་ཟེར་གྱིས་ས་ཁམས་ཀྱི་བཅུད་བསྡུས། དབང་བསྐུར། བཟླས་པ། ཡང་ཧྲཱིཿ ཡི་འོད་ཟེར་འཕྲོས། ཆུ་ཁམས་བཅུད་བསྡུས། དབང་བླང༌། བཟླས་བརྗོད། ཡང་ཧྲཱིཿ ལས་འོད་ཟེར༴ སྲེག་བྱེད་མེ་བསྡུས། དབང་བླང༌། བཟླས་པ། ཡང་ཧྲཱིཿ ལས་འོད་ཟེར་འཕྲོས། རླུང་ཁམས་བཅུད་བསྡུས། དབང་བླང༌། བཟླས་བརྗོད། ཡང་ཧྲཱིཿ ལས་འོད་ཟེར་འཕྲོས། འཇིག་རྟེན་མ་ལུས་པའི་ཚེ་བསྡུས། དབང་བླང༌། བཟླས་བརྗོད། ཡང་ཧྲཱིཿ ལས་འོད་ཟེར་འཕྲོས། རྒྱལ་བ་སྲས་བཅས་ཀྱི་བྱིན་རླབས་བསྡུས། དབང་བླང༌། བཟླས་བརྗོད་བྱ། རང་ལུས་དྭངས་མ་ལྔ་ལྡན་སྐྱེ་འཆི་མེད་པའི་རྡོ་རྗེར་གྱུར་པ་ལ་ཐག་རྦད་བཅད་དེ་བཟླའོ། །སྙིང་གའི་དབུས་སུ་ཟླ་བ་སྲན་མ་ཕྱེད་བཀས་ཙམ་གྱི་སྟེང་དུ་སྲོག་གི་ཡི་གེ་ཨ་ཐུང་དྭངས་གསལ་འོད་དམར་སྐྱ་འཕྲོ་བ། དེ་ལས་འོད་འཕྲོས་འཆི་མེད་ཚེའི་བཅུད་ༀ་ཡིག་ཕྲེང་དུ་དངར་བ་སྣ་སྒོ་གཡོན་ནས་ཞུགས། དེ་སྙིང་ཁའི་ཨ་ལ་ཐིམ། འཇམ་རླུང་ཡང་ཨ་ལས་འོད། ལུས་ནང་མ་ལུས་པའི་རླུང་ཉམས་རླུང་གི་ཆའི་མཁོན་གྲིབ་མི་གཙང་བའི་ཆ་ཕྱགས་མས་བཏབ་པ་ལྟར་ཧཱུྃ་ཕྲེང་དུ་དངར་བ་ཕྱིར་སངས་ཀྱིས་འབུད། ནང་དུ་ༀ། གནས་པ་ཨཱཿ ཕྱིར་ཧཱུྃ་གྲངས་སུ་བཏབ། ལྟེ་བར་ཨ་ཐུང་ཚེ་དཔག་མེད་དམར་པོ། སྤྱི་བོར་ཧཾ་ཚེ་དཔག་མེད་དཀར་པོ། གཤང་རླུང་ཡཾ་སུམ་མདོའི་མེ་སྦར། ལྟེ་བའི་ཚེ་དཔག་མེད་པའི་ཕྱག་གི་བུམ་ནང་ཁོལ། རླངས་པ་དབུ་མའི་ནང་ནས་གྱེན་དུ་སོང༌། སྤྱི་བོའི་ཚེ་དཔག་མེད་ཀྱི་སྐུ་ལ་རེག །ཡུམ་གོས་དཀར་མོ་དམར་མོར་གྱུར་འོག་རླུང་འཐེན། སྟེང་རླུང་རྔུབ། རླུང་རེག་བྱ་དྲོད་ཀྱི་རང་བཞིན་ཅན། དེས་སྤྱི་གཙུག་ཚེ་དཔག་མེད་ཕྱག་བུམ་ཁོལ་བའི་རྒྱུན་དབུ་མའི་ནང་ནས་ཐུར་དུ་བབས། ལྟེ་བའི་ཚེ་དཔག་མེད་དམར་པོའི་སྐུ་ལ་རེག་པས་ཡུམ་གོས་དཀར་མོ་དམར་མོར་གྱུར་ནས་འཁྱུད། སྟེང་རླུང་མནན། སླར་སོ་སོར་སྦྱོར་མཚམས་ནས། དཀར་དམར་ལྟེ་བ་སྤྲུལ་འཁོར། སྤྱི་བོ་བདེ་ཆེན་གང་ཞིང་དེ་བཞིན་སྙིང་ཁ་ཆོས་འཁོར། མགྲིན་པ་ལོངས་སྤྱོད་མེར་གྱིས་གང༌། རང་ལུས་འོད་ཀྱི་རང་བཞིན་དུ་གྱུར། རླུང་ཁ་སྦྱར། ལྟེ་བའི་ཕྱག་བུམ་ནས་བདུད་རྩི་གྱེན་དུ་བྱུང་སྙིང་ཁ་ཉི་མ། སྤྱི་བོའི་ཕྱག་བུམ་ནང་ནས་བདུད་རྩི་ཐུར་དུ་བྱུང་ཟླ་བ། ཉི་ཟླ་གྭའུ་ཁ་སྦྱོར་གྱི་དབུས་སུ་རང་རིག་ཧྲཱི་དམར་སྐྱ་ཨཱ་ལི་ཀཱ་ལིས་རྒྱ་གྲམ་དུ་བཅིངས་པར་བསམ། སྲིན་ལག་གཉིས་ཀྱི་ནང་དུ་ཧཱུྃ་དམར་པོ་མེ་འོད་བསམ། དམིགས་རིམ་ཟླ་བ་བཅུ་གཉིས་བསྒོམས་ན་ལོ་བཅུ་ལ་ངེས་པར་ཚེ་བསྲིང་བ་ཡིན་གསུངས། གཉུག་མ་འོད་གསལ་གྱི་ཚེ་བསྲིང༌། རང་རྩལ། སོ་མ། རང་མདངས། ལྷུག་པ༑ རེ་དོགས་མེད་པར་འཇོག །ཞབས་འདིར་བཅུད་ལེན་གྱི་ཚེ་བསྲིང༌། ཅོང་ཞི། ར་མོ་ཤག །དབང་ལག །ཨ་རུ་གསེར་མདོག་ལ་རིལ་བུ་ཤ་བའི་རིལ་མ་ཙམ་ཐོད་སྣོད་དུ་བཞག །དེའི་ནང་དུ་ཚེ་དཔག་མེད་པ་ཡབ་ཡུམ་བསྐྱེད་ལ་སྒྲུབ་པ་ཞག་བདུན་བྱས་ཏེ་བསྟེན་པར་ཡང་གསུངས་སོ། །ཚེ་སྒྲུབ་རྒྱལ་པོ་ཀུན༵་གྲགས་པ། །འབྱུང་བཞི་དབང་གི་དག༵འ་བཞིའི་གནས། །སྨིན་གྲོལ༵་ཟུང་སྦྱོར་ཉམས་ལེན་འདི། །མཆོ༵ག་ཏུ་གསལ་འདོམས་ཡི་གེར་བྱས། །རང་གི་ཁྲིད་ཡིག་ལས་བཏུས་སོ། (༢༨) །སྒྲོལ་དཀར་གྱི་ཁྲིད་ཡིག །སྒྲོལ་དཀར་གྱི་ཁྲིད་ནི། སྐྱབས་སེམས་སྔོན་དུ་སོང་ནས། དོན་དམ་བྱང་ཆུབ་ཀྱི་སེམས་ཀྱི་ངང་དུ་བཟོ་མེད་པར་བཞག །སྭཱ་བྷཱ་ཝ་ཡིད་འགྱུར་ཙམ་གྱི་བྱིན་གྱིས་བརླབས་པས་མ་དག་པའི་སྣང་བ་ལོག །མ་བཅོས་པའི་སེམས་སྣང༌། བྷྲཱུཾ་ལས་སྣོད་ཀྱི་འཇིག་རྟེན་ཟླ་བ་ཆུ་ཤེལ་གྱི་གཞལ་ཡས་ཁང་དུ་གསལ་བའི་དབུས་སུ་པད་ཟླའི་གདན་ལ་ཏཱཾ་ཡིག་ལས་འཕྲོས་པའི་འོད་ཟེར་གྱིས། འཁོར་འདས་ཐམས་ཅད་ཀྱི་མི་ཤིགས་པ་རྟག་བརྟན་གཡུང་དྲུང་ཚེའི་དངོས་གྲུབ་མ་ལུས་པ་བསྡུས་ཏེ་ཡོངས་སུ་གྱུར་པའི་སྐད་ཅིག་ལ་འཆི་མེད་སྒྲོལ་མ་ཡིད་བཞིན་འཁོར་ལོ་སྐུ་མདོག་ཟླ་བ་ལྟར་དཀར་བ། ནོར་བུ་ཆུ་ཤེལ་ལྟར་དྭངས་པ། དྲི་མ་མེད་པའི་འོད་ཟེར་ལྔ་ལྡན་འཕྲོ་བ། རབ་ཏུ་ཞི་བ་ཆེན་པོའི་འཛུམ་ཞལ་ཅན། ཨུཏྤལ་གྱི་འདབ་ལྟར་རབ་ཏུ་རྒྱས་པའི་སྤྱན་བདུན་དང་ལྡན་པ། གཡས་མཆོག་སྦྱིན་དང༌། གཡོན་པའི་མཐེབ་མཛུབ་སྦྱར་བས་ཨུཏྤལ་དཀར་པོའི་སྡོང་པོ་འཛིན་པ། སྒེག་ཅིང་ཆགས་པའི་ཉམས་ལྡན་ནུ་འབུར་ཟུང་གིས་མཛེས་མ། མུ་ཏིག་དཀར་པོ་གཙོ་བོར་གྱུར་པའི་རྒྱན་དང༌། དར་དཀར་གྱི་སྟོད་གཡོགས། དར་སྣ་ཚོགས་ཀྱི་སྨད་དཀྲིས་གསོལ་བ། དབུ་སྐྲ་ལི་བ་ལྟག་པར་བཅིངས་པའི་ཟུར་ཕུད་རྣམ་པར་གཡོ་ཞིང༌། གཞོན་ནུའི་ལུས་ཅན་རྡོ་རྗེ་སྐྱིལ་ཀྲུང་གིས་འགྱིངས་ཚུལ་དུ་བཞུགས་ཤིང༌། རི་བོང་འཛིན་པའི་རྒྱབ་ཡོལ་ཅན། དེའི་ཐུགས་ཁར་འཁོར་ལོ་ཡིག་འབྲུ་དང་བཅས་པ། སྤྱི་བོར་པད་ཟླའི་གདན་ལ་རིགས་བདག་བླ་མ་སྣང་བ་མཐའ་ཡས་དང༌། གཡོན་ངོས་སུ་ཚེས་གཅིག་གི་ཟླ་བས་སྤྲས་པ། དེ་ནས་སྙིང་གའི་འོད་ཀྱིས་བསྐུལ་བས་རིགས་བདག་གི་ལྷུང་བཟེད་ལས་འོད་འཕྲོས། སྣོད་བཅུད་ཀྱི་ཆོས་རྣམས་བདུད་རྩིའི་རྣམ་པར་བསྡུས། སྤྱི་བོ་ནས་ཞུགས་པའི་རྟེན་འབྲེལ་གྱིས་བསྐལ་པའི་བར་དུ་རྐྱེན་གང་གིས་ཀྱང་མི་ཤིགས་པའི་འཆི་མེད་གཉུག་མའི་དབྱིངས། རྩོལ་བྲལ་བློ་འདས་རྗེན་པའི་རང་ངོ་ལ་ཅི་གནས་སུ་བཞག་ཅིང༌། ཡང་ཡང་དྲན་པའི་སྣང་བ་དང་འབྲེལ་བར་བཟླས་བརྗོད་ཀྱི་རྣལ་འབྱོར་ལ་སྦྱོར་བ་འདིའི་གནད་དོ། །ཚེ་སྒྲུབ་ཀུན༵་གྱི་དག༵འ་མགུའི་ཡིད། །ཡིད་བདེ་རྣམ་པར་གྲོལ༵་བ་མཆོ༵ག །མཆོག་ཏུ་ཡིད་ཆེས་གྱུར་པའི་ཆ། །ཆ་ཤས་ཡི་གེར་བཀོད་པའོ། །གསུང་རྒྱུན་ལས་བྱུང་བའོ། །རྒུད་པ་མེད་པའི་ལང་ཚོ། མངོན་པར་འདུས་མ་བྱས་པའི་གཟི་འོད། རྩོལ་མེད་ཀྱི་སྟོབས། ཤུགས་འབྱུང་གི་རྩལ། མ་ཟག་པའི་དངོས་གྲུབ། མ་ཉམས་པའི་བསོད་ནམས། རྣམ་པར་རྒྱས་པའི་དཔལ། མ་གཡོས་པའི་དབང་ཐང༌། མ་གུག་པའི་བླ། འཆི་བ་མེད་པའི་སྲོག །འགྱུར་བ་མེད་པའི་ཚེ། མ་འགགས་པའི་བློ། རྣམ་པར་གྱུར་པའི་སྤོབ་པ། ཕྱོགས་ལས་རྣམ་པར་རྒྱལ་བའི་དགེ་མཚན། (༢༩) ཚེ་དཔག་མེད་དཀར་པོའི་ཁྲིད་ཡིག །ཚེ་དཔག་མེད་དཀར་པོའི་ཁྲིད་ནི། སྐྱབས་སེམས་སྔོན་དུ་སོང་ནས། སེམས་བཟོ་བཅོས་མེད་པར་བཞག །དེའི་ངང་ལས་ཧཱུྃ་ཡིག་རྡོ་རྗེའི་རྭ་གུར་ཡེ་ཤེས་ཀྱི་མེ་དཔུང་འཁྲིགས་པ་དང་བཅས་པའི་སྲུང་འཁོར། དེའི་ཀློང་དུ་ཧྲཱིཿ ཡིག་ལས་སྣོད་ཀྱི་འཇིག་རྟེན་པདྨ་འབར་བའི་གཞལ་ཡས་ཁང་དུ་གསལ་བའི་དབུས་སུ་པད་ཉི་ཟླ་བའི་གདན་ལ་སྐད་ཅིག་གིས་ཚེ་དཔག་མེད་སྐུ་མདོག་དཀར་བ། ཕྱག་གཉིས་མཉམ་བཞག་གི་སྟེང་ན་བདུད་རྩིས་གང་བའི་བུམ་པ་བསྣམས་པ། དར་དང་རིན་པོ་ཆེའི་རྒྱན་གྱིས་བརྒྱན་ཞིང་མཚན་དཔེས་སྤྲས་པ། རྡོ་རྗེའི་སྐྱིལ་ཀྲུང་གིས་བཞུགས་པ། འོད་ཀྱི་དཀྱིལ་འཁོར་འབར་བ། དེའི་གཙུག་གཏོར་གྱི་སྟེང་པདྨ་ཉི་མ་ཟླ་བའི་སྟེང་དུ་བླ་མ། ཐུགས་ཀར་བྷྲཱུཾ། དེའི་འོད་ཟེར་གྱིས་འཁོར་འདས་གཉིས་ཀའི་སྣོད་ཀྱི་འབྱུང་བཞིའི་མདངས་དང་བཅུད། བཅུད་ཀྱི་ཚེ་དང་བསོད་ནམས་ཡེ་ཤེས་སྤྱི་དང་ཁྱད་པར་དངོས་གྲུབ་མཐའ་དག་མ་ཚང་བ་མེད་པར་འོད་ཟེར་དཀར་དམར་གྱི་རྣམ་པར་བསྡུས། དམ་ཚིག་སེམས་དཔའི་སྒྲུབ་པའོ། །བདུད་རྩིའི་རྒྱུན་བུམ་པར་ཞུགས་པ་རང་གི་ཁར་བྱུང༌། མགྲིན་པར་རོ་གཅིག་ཏུ་འདྲེས་པའི་བདེ་བ་ལ་སེམས་བསྲེ་སྟེ། ལྕེའུ་ཆུང་གཞིབས། ངོ་བོ་སོ་སོ་རང་རིག་ཏུ་བསྐྱང༌། མགྲིན་པ་ནས་སྙིང་ག་ལྟེ་བའི་བར་གང༌། རླུང་གཞིལ་བ་དང་ལྷན་ཅིག་དེའི་འོད་ཟེར་གྱིས་འཁོར་འདས་གཉིས་ཀའི་སྣོད་ལ་ཕོག ༑འབྱུང་བའི་དྭངས་མ་མ་ཚང་བ་མེད་པར་རླུང་ནང་དུ་རྔུབ་པ་དང་ལྷན་ཅིག་བསྡུས། བུམ་པ་ཅན་བརྟན་པར་བཟུང༌། བསྐལ་པའི་བར་དུ་རྐྱེན་གང་གིས་ཀྱང་མི་ཤིགས་པའི་ཚེའི་རྟེན་ཕུར་གདབ། སླར་གསང་རླུང་གི་གདངས་ཧཱུྃ་དུ་ཤར་བ་འཁྲུལ་འཁོར་དང༌། བྱང་ཆུབ་ཀྱི་སེམས་མཐའ་དག་གསང་གནས་ནས་ལྟེ་སྙིང་མགྲིན། གཙུག་ཏོར་གྱི་བར་དུ་བརྟན་པས་རྡོ་རྗེའི་སྐུ་ཐོབ། དབུ་མའི་ཡར་སྣ་བྷྲཱུྃ་ཐིག་ལེ་དཀར་པོས་བཀག །རླུང་གཞིལ་རྔུབ་སྔར་དང་འདྲ། འཁོར་འདས་གཉིས་ཀའི་ཚེ་མཐའ་དག་མ་ཚང་བ་མེད་པར། རགས་པར་ཕྲ་བར་བསྡུས་ཏེ་མི་ཤིགས་པའི་ཚེའི་རྟེན་ཕུར་གདབ། མཐར་ལག་པ་གཉིས་བསྣོལ་ཏེ་དཔུང་མགོ་མནན། ལྕེའུ་ཆུང་གཞིབས། རང་རྡོ་རྗེའི་སྐུ་ཞུ་བླུགས་ཀྱི་ངོ་བོ་ཉིད་དུ་འདྲེས། རྩོལ་བྲལ་བློ་འདས་འཆི་མེད་གཉུག་མའི་རང་བབ་ལ་མཉམ་པར་བཞག །རྐྱེན་སྣང་གི་རྟོག་པའི་རྗེས་སུ་མི་འབྲང་བར་ངང་ཉིད་དུ་གློད་ཅིང་བཞག །དེ་ལྟར་བསྐྱངས་པས་རྡོ་རྗེའི་ཚེ་དང་ཡེ་ཤེས་དཔག་ཏུ་མེད་པའི་སྐུ་གསུང་ཐུགས་ཀྱི་ངོ་བོ་ཉིད་ཀྱི་གོ་འཕང་གོང་ནས་གོང་དུ་ཁྱད་པར་དུ་འགྱུར་བ་ལ་སློབ་བོ། །ཐུན་མཚམས་སུ་འདིའི་ཚེ་ཁྲིད་དངོས་ལ་ལུས་ཟུངས་རྒྱས་པའི་སྦྱོར་བས་མཚན་ལྡན་མུ་དྲ་དང་མཉམ་པར་སྦྱོར་བའི་གསང་སྲིད་ནི་ཞལ་ལས་ཤེས་སོ། །ཀུན༵་ནས་ཚེ་ཡི་དངོས་གྲུབ་ལ། །དག༵འ་ཞིང་འདུན་པའི་གྲོལ༵་མཆོ༵ག་གིས། །མི་ཏྲའི་སྦས་དོན་ཉེར་སྦས་ཏེ། །ཚིག་ཁྲིད་ཙམ་ཞིག་ཡི་གེར་བཀོད། །ཆག་ལོའི་ཁྲིད་ཡིག་ལས་བཏུས་སོ། (༣༠) །དམར་ཁྲིད་ཚེམ་བུ་ལུགས་ཀྱི་ཁྲིད་ཡིག །དམར་ཁྲིད་ཚེམ་བུ་ལུགས་ཀྱི་ཁྲིད་ནི། སྐྱབས་སེམས་སྔོན་དུ་སོང་ནས། བྱང་ཆུབ་ལྔའི་སྟོང་པའི་བྱང་ཆུབ། རང་གི་སྙིང་སྒོང་སྐོགས་ཁ་གྱེན་བསྟན་ལྟ་བུའི་ནང་དུ་གདན་པད་ཟླའི་སྟེང་དུ་གསུང་ཡིག་འབྲུ། ས་བོན་ཧྲཱིཿ ཡིག་ལས་ཐུགས་ཕྱག་མཚན་པདྨ་དཀར་པོ་ཧྲཱིཿ ཡིས་མཚན་པ་ལས། རང་ཉིད་སྐུ་ཡོངས་སུ་རྫོགས་པ་འཕགས་པ་སྤྱན་རས་གཟིགས་སྐུ་མདོག་དཀར་པོ་ཞལ་གཅིག་ཕྱག་བཞི་པ། ཕྱག་དང་པོ་གཉིས་ཐུགས་ཀར་ཐལ་མོ་སྦྱར་བ། གཡས་ཀྱི་གཉིས་པ་ན་ཤེལ་ཕྲེང་བརྒྱ་དང་བརྒྱད། གཡོན་གྱི་གཉིས་པ་ན་པདྨ་དཀར་པོ། ཞབས་གཉིས་རྡོ་རྗེ་སྐྱིལ་ཀྲུང་དར་དཀར་གྱི་སྟོད་གཡོགས་དང༌། རི་དྭགས་པགས་པའི་ནུ་ཁེབས། དར་ཁ་དོག་སྣ་ཚོགས་པའི་སྨད་གཡོགས། རལ་པའི་ཐོར་ཚུགས་རིན་པོ་ཆེའི་རྒྱན་ཐམས་ཅད་ཀྱིས་སྤྲས་པ། འོད་ཟེར་དཀར་པོ་བ་སྤུའི་སྒོ་ནས་ཕྱོགས་བཅུར་འཕྲོ་བ། ཟླ་བའི་རྒྱབ་ཡོལ་ཅན། དེའི་དཔྲལ་བར་ༀ། མགྲིན་པར་ཨཱཿ ཐུགས་ཁའི་སྟོད་དུ་ཧཱུྃ། ཐུགས་ཁར་པད་ཟླའི་གདན་ལ་ཧྲཱིཿ དེ་ལས་འོད་འཕྲོས་ཡི་དམ་མ་ལུས་པ་སྤྱན་དྲངས་ལ་བསྟིམས་པས་ཡི་དམ་ཀུན་འདུས། རང་གི་རྩ་བའི་བླ་མས་དབང་བསྐུར་སྤྱི་བོར་འོད་དཔག་མེད་ཀྱི་རྣམ་པར་བཞུགས་པ་ལ་བླ་མ་ཐམས་ཅད་བསྟིམ། བླ་མ་ཀུན་འདུས། སྙིང་ཁའི་ཧྲཱི་ཡིག་མཐར་ཡི་གེ་དྲུག་མས་བསྐོར་བ་ལས་འོད་འཕྲོས། ཆོས་ཕུང་བརྒྱད་ཁྲི་བཞི་སྟོང་མ་ལུས་པའི་བརྗོད་བྱ་མ་ལུས་པ་བསྟིམས་ལ་རང་གི་ལུས་ཀྱི་ནང་གི་སྲིན་བུ་བརྒྱད་ཁྲི་བཞི་སྟོང༌། སྐྲ་ཉི་ཁྲི་ཆིག་སྟོང༌། བ་སྤུ་བྱེ་བ་ཕྲག་ཕྱེད་དང་བཞིར་སྤྱན་རས་གཟིགས་རེ་རེ་གསལ་བཏབ་ནས༑ དེ་རྣམས་ཀྱིས་དུས་གཅིག་ལ་མ་ཎི་གསུང་བར་བསམས་ལ་ཅི་ནུས་བཟླས་པའི་མཐར། གཞི་མ་བཅོས་པའི་གཉུག་མའི་ལྟ་བ། ལམ་སྤྲོ་བསྡུ་མེད་པ་ཞི་ལྷག་ཟུང་འབྲེལ་གྱི་བསྒོམ་པ། གློད་པ་རང་གྲོལ་གྱི་བསམ་གཏན། མ་ཡེངས་པའི་ཏིང་ངེ་འཛིན་ལ་སྦྱང༌། རྗེས་བསྔོ་བས་རྒྱས་བཏབ་ནས། ཟས་ཟ་བའི་དུས་འབྲུ་གསུམ་གྱིས་སྣོད་བཅུད་བྱིན་གྱིས་བརླབས་ལ། སྤྱི་བོར་བླ་མ་ཀུན་འདུས་དང༌། རང་ལུས་ཡི་དམ་ཀུན་འདུས་ལ་མཆོད་པར་བསམས་ལ་ལོངས་སྤྱོད། དེ་བཞིན་གོས་ལ་ཡང་སྦྱར། གནས་ཁང་དག་པའི་ཞིང༌། འགྲོ་དྲུག་སྤྱན་རས་གཟིགས་སུ་བསྒོམས། ཉལ་བའི་རྣལ་འབྱོར། སྙིང་གའི་ཡེ་ཤེས་སེམས་དཔའི་དབུར་བླ་མ་རིགས་བདག་ཏུ་བཞུགས་པ་ལ་ཡིད་གཏད་དོ། །འཕོ་བ། ལྟེ་བར་ཆོས་འབྱུང་མཐིང་སྐྱའི་ནང་ན་སེམས་ཐིག་ལེ་སྔོ་དམར་འོད་ཟེར་ལྔ་ལྡན་རྩ་དབུ་མ་སྦ་ལྕག་ཙམ། སྙིང་གར་ཡི་དམ་ཚོན་གང་བ། དབུ་མའི་ཡས་སྣར་ཐུགས་རྗེའི་ལྕགས་ཀྱུ་ཧཾ་སྔོན་པོས་ཚངས་བུག་བཀག་པའི་སྤྱི་བོར་བླ་མ་འོད་དཔག་མེད་བྱམས་པའི་བཞུགས་སྟབས་ཀྱིས་ཞབས་གཡས་གཡོན་ཚངས་བུག་གི་ཕན་ཚུན་དུ་བཞག །སྐུ་རྒྱབ་རལ་པའི་ཐོར་ཚུགས་ལ་གཏད་པར་བསྒོམ། ལྟེ་བའི་ཐིག་ལེ་ལས་རླུང་སེམས་འདྲེས་པའི་ཐིག་ལེ་སྔོ་དམར་སྲན་མ་ཙམ་གཅིག་ཡར་ཆད། སྙིང་གའི་ཡི་དམ་ལ་བསྐོར་བ་མྱུར་བ་ལན་གསུམ་བྱས། སྤྱི་བོའི་ཧཾ་བསལ། ཐུགས་རྗེའི་ལྕགས་ཀྱུའི་རྩེར་བླངས་བླ་མའི་ཐུགས་ཁར་རེག་ཙམ་བྱས། སླར་ལོག་དེ་འདྲ་བཞིའི་མཇུག་ཏུ་ཐིག་ལེ་བླ་མའི་ཐུགས་ཁར་ཐིམ། བླ་མ་ཏོག་གིས་གཤེགས་པར་བསམ། བར་དོ་གཟུགས་ལྷ། སྒྲ་སྔགས། དྲན་རིག་སྟོང་ཉིད་དུ་མོས་པ་ཉིད་དོ། །དམར་ཁྲིད་སྙིང་པོ་ཀུན༵་གྱི་ཕུལ། །ཚེམ་བུ་ལུགས་ནི་དག༵འ་བཞིན་དུ། །རང་གྲོལ༵་མཆོ༵ག་གི་སྦྱངས་པའི་ཆ། །ལེགས་འདོམས་ཡི་གེའི་ལམ་དུ་བགྱིས། །ཆོས་རྗེ་ཤེས་འབུམ་པའི་ཁྲིད་ཡིག་ལས་བཏུས་སོ། (༣༡) །དམར་ཁྲིད་དཔལ་མོ་ལུགས་ཀྱི་ཁྲིད་ཡིག །དམར་ཁྲིད་དཔལ་མོ་ལུགས་ཀྱི་ཁྲིད་ནི། སྐྱབས་སེམས་སྔོན་དུ་སོང་ནས། རང་གི་སྙིང་གར་ཨ་དཀར་པོ་གཅིག་བསམས་པའི་འོད་ཟེར་གྱིས། ཁམས་གསུམ་སྣོད་བཅུད་བསྡུས་ནས་རང་ལ་ཐིམ་པས༑ གཟུང་བྱའི་ཡུལ་དང་བྲལ་བའི་རང་རིག་པ། པད་ཟླའི་གདན་ལ་ས་བོན་ཧྲཱིཿ ལས་བཞེངས་པའི་པདྨ། དེ་ཉིད་ཀྱིས་མཚན་པ་ལས་རང་ཇོ་བོ་ཐུགས་རྗེ་ཆེན་པོའི་སྐུར་ཀྲོང་གིས་བསྐྱེད་ལ་གནས་གསུམ་ཡི་གེ་གསུམ་དང༌༑ ཐུགས་ཁར་ཧྲཱིཿ བཀོད། རང་འདྲའི་འཕགས་པ་སྤྱན་དྲངས་ལ་བསྟིམ། རིགས་བདག་ཏུ་བླ་མ་འོད་དཔག་མེད་བསྒོམ། མ་ཎི་ཅི་ནུས་འདོན། མཐར་འགྲོ་དྲུག་གི་ཁམས་ལ་བསམ། སྡུག་བསྔལ་བ་ལ་ཚད་མེད་པའི་སྙིང་རྗེ་དྲག་ཏུ་བསྐྱེད་ཅིང་ངའི་མ་ཞེས་ངག་ཏུ་ཡང་བརྗོད། མཐར་སྤྲོས་བྲལ་ངང་དུ་བཞག །རྗེས་བསྔོ་བ་སྨོན་ལམ་བྱ། ཟས་གོས་འདུག་ས་ཉལ་བའི་གཉིད་རྣམས་ཕན་སེམས་བྱང་ཆུབ་སེམས་ཀྱི་ངང་དུ་སྤྱད། འཕོ་བ་སྣང་སྲིད་ཐམས་ཅད་རང་ལ། རང་རིག་ཨ་ལ་བསྡུས་ལ། ཨ་ཨ་ཞེས་བརྗོད་ཅིང་ཨ་ཡང་ནམ་མཁའི་འཇའ་ཡལ་བ་ལྟར་བསམས་ལ། བར་དོ་གཟུགས་ཡི་དམ། སྒྲ་མ་ཎི་པདྨེ། དྲན་རྟོག་སྟོང་ཉིད་སྙིང་རྗེར་ལམ་དུ་འཁྱེར་བའོ༑ ༑དཔལ་མོ་ཨ་ཡི་རང་ངོ་རུ། །མན་ངག་ཀུན༵་བསྡུས་དེ་ཡི་ཚུལ། །དག༵འ་གདུང་རང་གྲོལ༵་མཆོ༵ག་གི་གནད། །འདིར་ནི་ཡི་གེར་མཚོན་འདིའོ། །ཡོལ་སྟོན་ཆོས་དབང་གི་ཡིག་རྙིང་ལས་བཏུས་སོ། (༣༢) །དམར་ཁྲིད་ཟླ་རྒྱལ་ལུགས་ཀྱི་ཁྲིད་ཡིག །དམར་ཁྲིད་ཟླ་རྒྱལ་ལུགས་ཀྱི་ཁྲིད་ནི། སྐྱབས་སེམས་སྔོན་དུ་སོང་ནས། ཆོས་ཐམས་ཅད་རང་བཞིན་མེད་པ་སྟོང་པའི་ངང་ལས་པད་ཟླའི་གདན་ལ་ཧྲཱིཿ ལས་པདྨ་འདབ་བརྒྱད་གསེར་བཙོ་མ་ལྟར་འཚེར་བ་ཧྲཱིཿ ཡིས་མཚན་པ་ལས་རང་ཉིད་ཐུགས་རྗེ་ཆེན་པོ་ཞལ་གཅིག་ཕྱག་བཞི་པར་གྱུར་པའི་དཔྲལ་མགྲིན་སྙིང་ཁར། ༀ་ཨཱཿ ཧཱུྃ་བཀོད་པའི་འོད་ཟེར་གྱིས་པོ་ཏ་ལ་ནས་ཡེ་ཤེས་པ་སྤྱན་དྲངས་ལ་བསྟིམ། རིགས་ལྔས་དབང་བསྐུར། དབང་རྟགས་བླ་མ་འོད་དཔག་མེད་པས་དབུ་བརྒྱན་པར་མོས་ལ། སྙིང་ཁར་པད་ཟླའི་གདན་ལ་ཧྲཱིཿ ཡིག་གི་མཐར་མ་ཎིས་བསྐོར་བ་ལ་བཀླག་ཚུལ་གྱིས་ཅི་ནུས་བགྲངས་ལ་ཆོས་ཀྱི་གནས་ཚུལ་གཟོད་མ་ནས་ཞི་བའི་དབྱིངས་ལ་ངེས་པའི་ཤེས་པས་དེར་འཛིན་མི་བྱ་བར་ཆོམ་མེ་འཇོག །མདངས་སྙིང་རྗེའི་རང་བབས་སྐྱོང༌། རྗེས་ཐོབ་ཟས་གོས་འདུག་ས་རྣམས་དྲན་པར་བྱས་ལ་ལྷའི་ང་རྒྱལ་བྱ། ཉལ་དུས་སྙིང་ཁར་ཧྲཱིཿ ལ་ཤེས་པ་གཏད། འཕོ་བ་ཧྲཱིཿ སྐར་མདའ་ལྟར་དབུ་མའི་ལམ་ནས་བླ་མའི་ཐུགས་ཀར་འཕངས། བར་དོ་ད་ལྟ་ནས་འདུན་པ་ཁ་བསྒྱུར་ལ་འཁྱེར་སོ་གསུམ་གྱིས་སྦྱོང་བ་ཡིན་གསུང་ངོ༌། །དམར་ཁྲིད་བྱང་སེམས་ཟླ་རྒྱལ་གསུང༌། །འཛིམ་ཆེན་ཁྲིད་ཀུན༵་འདིར་བསྡུས་ཤིང༌། །རོང་སྟོན་ལེགས་བཤད་དག༵འ་སྤྲོ་ཡིས། །གྲོལ༵་མཆོ༵ག་བདག་གིས་མཚོན་པར་བྱས། །ཁྲིད་དཔེ་གཉིས་ཀྱི་སྙིང་པོ་བསྡུས་སོ། (༣༣) །དམར་ཁྲིད་སྐྱེར་སྒང་པའི་ལུགས་ཀྱི་ཁྲིད་ཡིག །དམར་ཁྲིད་སྐྱེར་སྒང་པའི་ལུགས་ཀྱི་ཁྲིད་ནི། སྐྱབས་སེམས་སྔོན་དུ་སོང་ནས། རང་གི་སེམས་འདས་པ་དང་མ་འོངས་པའི་མཐར་མ་ལྷུང་བའི་ད་ལྟའི་ཤེས་པ་གསལ་ཙམ་ཉིད། པད་ཟླའི་སྟེང་དུ་ཧྲཱིཿ ལས་ཕྱག་མཚན་ཨུཏྤལ་ཧྲཱིཿ ས་མཚན་པ་ལས། རང་ཉིད་འཕགས་པའི་སྐུ་ཞལ་གཅིག་ཕྱག་བཞི་པ། སྐུ་མདོག་དཀར་ལ་དམར་བའི་མདངས་ཅན། ཕྱག་དང་པོ་མཉམ་སྦྱོར། གཡས་མུ་ཏིག་གི་ཕྲེང་བ། གཡོན་ཨུཏྤལ་དཀར་པོ། རྡོ་རྗེ་སྐྱིལ་ཀྲུང་རལ་པའི་ཅོད་པན་ཅན། དར་ལེ་བརྒན་གྱིས་བཅིངས་པ། དར་དང་རིན་པོ་ཆེའི་རྒྱན་ཅན། སྤྱན་འདོམ་གང་ལས་མི་རིང་བར་གཟིགས་ཤིང༌། ཞལ་འཛུམ་བག་དང་ལྡན་པ་བླ་མ་འོད་དཔག་མེད་པས་དབུ་བརྒྱན་པར་གསལ་བཏབ་ནས། ཡི་གེ་དྲུག་པ་བཟླ། མཐར་ཆོས་ཉིད་དོན་གྱི་ལྷ་ཐུགས་རྗེ་ཆེན་པོའི་རང་ཞལ་གཤིས་སྐྱེ་མེད། མདངས་སྙིང་རྗེར་ལམ་མེ་བའི་ངང་ལ་འཇོག་ཅིང༌། ཟས་གོས་འདུག་ས་ཉལ་བའི་རྣལ་འབྱོར་ཐམས་ཅད་ཀྱང་འཆར་བ་ཉིད་ཡིན༑ བར་དོ་གཟུགས་ལྷ་དང་སྒྲ་སྔགས་སུ་ཤེས། སེམས་གཞི་མེད་རྩ་བྲལ་དུ་གོ་བའི་གདིང་དང་ལྡན་པའི་ཉམས་ལེན་གྱི་གནད་སྟོང་ཉིད་དོ། །དམར་ཁྲིད་སྐྱེར་སྒང་བཞེད་པ་ཀུན༵། །སྙིང་པོ་དག༵འ་མགུའི་བློས་བསྡོམས་ནས༑ ༑གྲོལ༵་མཆོ༵ག་ཉམས་ལེན་ཇི་བཞིན་ཡང༌། །ཡི་གེར་བཀོད་པ་འདི་ཉིད་ལགས། །ཆོས་སྐུ་ཤཱཀྱ་རིན་ཆེན་ཁྲིད་ཡིག་ལས་བཏུས་སོ། (༣༤) །བདེ་མཆོག་གི་དམར་ཁྲིད། བདེ་མཆོག་གི་དམར་ཁྲིད་ནི། སྐྱབས་སེམས་སྔོན་དུ་སོང་ནས༑ བྱང་ཆུབ་ལྔའི་སྟོང་པའི་བྱང་ཆུབ་རང་གི་སྙིང་སྒོང་ལྐོགས་གྱེན་བསྟན་ལྟ་བུའི་ནང་དུ། གདན་པདྨ་ཉི་མ། ས་བོན་ཧཱུྃ་སྔོན་པོ། ཕྱག་མཚན་རྡོ་རྗེ་རྩེ་ལྔ་པ་ལྟེ་བར་ཧཱུྃ་གིས་མཚན་པ། དེ་རྣམས་ལས་སྐུ་ཡོངས་རྫོགས་འཁོར་ལོ་བདེ་མཆོག་སྐུ་མདོག་སྔོན་པོ་ཞལ་གཅིག་ཕྱག་གཉིས་པ། སྤྱན་གསུམ། ཕྱག་གཉིས་ཀྱིས་རྡོ་རྗེ་དྲིལ་བུས་ཡུམ་ཕག་མོ་ལ་འཁྱུད་པ། རལ་པའི་རྩེར་ཡིད་བཞིན་གྱི་ནོར་བུ། གཡོན་ངོས་སུ་ཚེས་གཅིག་གི་ཟླ་བ༑ མཚོག་མའི་སྟེང་ན་སྣ་ཚོགས་རྡོ་རྗེ། སྟག་གི་པགས་པའི་སྨད་དཀྲིས། རུས་པ་དང་མི་མགོའི་ཕྲེང་བས་བརྒྱན་པ། ཡེ་ཤེས་ཀྱི་མེ་འབར་བའི་དབུས་ན་བཞུགས་པའི་དཔྲལ་མགྲིན་སྙིང་གར་གནས་པའི་ༀ་ཨཱཿ ཧཱུྃ་ལས་འོད་འཕྲོས། རྒྱུད་སྡེ་བཞི་དང་འབྲེལ་བའི་ལྷ་ཚོགས་མ་ལུས་པ་ཛཿ ཧཱུྃ་བྃ་ཧོཿ ཡི་དམ་ཀུན་འདུས་སུ་གྱུར། བླ་མས་དབང་བསྐུར་ནས་རིགས་བདག་ཏུ་བཞུགས་པ་ལ། བླ་མ་མ་ལུས་པ་ཐིམ། བླ་མ་ཀུན་འདུས། རང་གི་སྐྲ་ཉི་ཁྲི་ཆིག་སྟོང༌། བ་སྤུ་བྱེ་བ་ཕྲག་ཕྱེད་བཞི་དང༌། ཁམས་གསུམ་སེམས་ཅན་ཐམས་ཅད་ལྷར་གསལ་བ་དུས་གཅིག་ལ། ༀ་ཧྲཱིཿ ཧ་ཧ་ཧཱུྃ་ཧཱུྃ་ཕཊ། གསུང་བར་མོས་པས་ཅི་ནུས་བཟླ་ཞིང༌། ཟས་ལ་སྣོད་ཐོད་པ། བཅུད་ཤ་ལྔ་བདུད་རྩི་ལྔ། གོས་རུས་རྒྱན་སྟག་ལྤགས། གནས་ཁང་དུར་ཁྲོད་སྲུང་འཁོར་གཞལ་ཡས་ཁང༌། ཉལ་དུས་ལྷ་སྣང་འོད་གསལ་དུ་བསྡུ། འཕོ་བ་སྙིང་ཁར་རང་འདྲའི་ཡི་དམ་ཚོན་གང་བ། དབུ་མའི་མར་སྣར་ཆོས་འབྱུང་ནང་དུ་ཐིག་ལེ་སྔོ་དམར་འོད་ཟེར་ལྔ་ལྡན། དེ་ལས་ཐིག་ལེ་སྔོ་སྐྱ་སྲན་མ་ཙམ་ཞིག་ཆད། སྙིང་གའི་ཡི་དམ་ལ་བསྐོར་བ་མྱུར་བ་ལན་གསུམ། སྤྱི་བོའི་ཧཾ་བསལ། ཐུགས་རྗེའི་ལྕགས་ཀྱུས་དྲངས། བླ་མའི་ཐུགས་ཁར་ཐིམ༑ བླ་མ་མཁའ་སྤྱོད་ལ་གཤེགས་པར་བསམ། བར་དོ་གཟུགས་ལྷ། སྒྲ་སྔགས། དྲན་རྟོག་རང་སེམས་ལྷན་སྐྱེས་སུ་ད་ལྟ་ནས་སྦྱང་བ་ཉིད་དོ། །ཡི་དམ་ཀུན༵་གྱི་དམར་ཁྲིད་ཅེས། །དག༵འ་བར་བསྔགས་ལ་རྗེས་དཔག་ནས༑ ༑རྒྱལ་སྲས་གསུང་གི་རྣམ་ཆའི་ཚུལ། །གྲོལ༵་མཆོ༵ག་བདག་གིས་ཡི་གེར་བཀོད། །གསུང་རྒྱུན་ལས་བྲིས་སོ། (༣༥) །ཀྱེ་རྡོ་རྗེའི་དམར་ཁྲིད། ཀྱཻ་རྡོ་རྗེའི་དམར་ཁྲིད་ནི། སྐྱབས་སེམས་སྔོན་དུ་སོང་ནས། བྱང་ཆུབ་ལྔའི་སྟོང་པའི་བྱང་ཆུབ་རང་གི་སྙིང་སྒོང་ལྐོགས་ཁ་གྱེན་བསྟན་ལྟ་བུའི་ནང་དུ་གདན་པདྨ་ཉི་མ། ས་བོན་ཧཱུྃ་སྔོན་པོ། ཕྱག་མཚན་རྡོ་རྗེ་རྩེ་ལྔ་པ་ལྟེ་བར་ཧཱུྃ་གིས་མཚན་པ། དེ་རྣམས་ལས་སྐུ་ཡོངས་རྫོགས་ཀྱཻ་རྡོ་རྗེ་སྐུ་མདོག་སྔོན་པོ་ཞལ་གཅིག་ཕྱག་གཉིས་སྤྱན་གསུམ། ཕྱག་གཡས་རྡོ་རྗེ་འཕྱར་བ། གཡོན་ཐོད་ཁྲག་ཐུགས་ཁར་འཛིན་པ། གྲུ་མོ་ན་ཡུམ་སྦས་པའི་ཁ་ཊྭཱཾ་ག །སྟག་གི་པགས་པའི་སྨད་དཀྲིས། རུས་པ་དང་མི་མགོའི་ཕྲེང་བས་བརྒྱན་པ། ཡེ་ཤེས་ཀྱི་མེ་འབར་བའི་དབུས་ན་བཞུགས་པའི་དཔྲལ་མགྲིན་སྙིང་ཁར་གནས་པའི་ༀ་ཨཱཿ ཧཱུྃ་ལས་འོད་ཟེར་འཕྲོས་རྒྱུད་སྡེ་བཞི་དང་འབྲེལ་བའི་ལྷ་ཚོགས་མ་ལུས་པ་ཛཿ ཧཱུྃ་བྃ་ཧོཿ ཡི་དམ་ཀུན་འདུས་སུ་གྱུར། བླ་མས་དབང་བསྐུར་ནས་རིགས་བདག་ཏུ་བཞུགས་པ་ལ་བླ་མ་མ་ལུས་པ་ཐིམ། བླ་མ་ཀུན་འདུས། རང་གི་སྐྲ་ཉི་ཁྲི་ཆིག་སྟོང༌། བ་སྤུ་བྱེ་བ་ཕྲག་ཕྱེད་བཞི། ཁམས་གསུམ་སེམས་ཅན་ཐམས་ཅད་ལྷར་གསལ་བས་དུས་གཅིག་ལ། ༀ་དེ་ཝ་པི་ཙུ་བཛྲ་ཧཱུཾ་ཧཱུཾ་ཧཱུྃ་ཕཊ་སྭཱ་ཧཱ། གསུང་བར་མོས་ལ་ཅི་ནུས་བཟླ་ཞིང༌། ཟས་ལ་སྣོད་ཐོད་པ། བཅུད་ཤ་ལྔ་བདུད་རྩི་ལྔ། གོས་རུས་རྒྱན་སྟག་ལྤགས། གནས་ཁང་དུར་ཁྲོད་སྲུང་འཁོར་གཞལ་ཡས་ཁང༌། ཉལ་དུས་ལྷ་སྣང་འོད་གསལ་དུ་བསྡུ། འཕོ་བ་སྙིང་ཁར་རང་འདྲའི་ཡི་དམ་ཚོན་གང་བ། དབུ་མའི་མས་སྣར་ཆོས་འབྱུང་ནང་དུ་ཐིག་ལེ་སྔོ་དམར་འོད་ཟེར་ལྔ་ལྡན་དེ་ལས་ཐིག་ལེ་སྔོ་སྐྱ་སྲན་མ་ཙམ་གཅིག་ཆད། སྙིང་གའི་ཡི་དམ་ལ་བསྐོར་བ་མྱུར་བ་ལན་གསུམ་བྱས། སྤྱི་བོའི་ཧཾ་བསལ། ཐུགས་རྗེའི་ལྕགས་ཀྱུས་སྤྱན་དྲངས་བླ་མའི་ཐུགས་ཀར་ཐིམ། བླ་མ་མཁའ་སྤྱོད་ལ་གཤེགས་པར་བསམ། བར་དོ་གཟུགས་ལྷ། སྒྲ་སྔགས། དྲན་རྟོག་རང་སེམས་ལྷན་སྐྱེས་སུ་ད་ལྟ་ནས་སྦྱང་བ་ཉིད་དོ། །ཡི་དམ་ཀུན༵་གྱི་དམར་ཁྲིད་ཅེས། །དག༵འ་བར་བསྔགས་ལ་རྗེས་དཔག་ནས། །རྒྱལ་སྲས་གསུང་གི་རྣམ་དབྱེའི་ཚུལ། །གྲོལ༵་མཆོ༵ག་བདག་གིས་ཡི་གེར་བཀོད། །གསུང་རྒྱུན་ལས་བྲིས་སོ། (༣༦) །ཕྱག་རྡོར་འཁོར་ཆེན་ཁྲིད་ཡིག །ཕྱག་རྡོར་འཁོར་ཆེན་གྱི་ཁྲིད་ནི། སྐྱབས་སེམས་སྔོན་དུ་སོང་ནས། བསྐྱེད་རིམ་སྲུང་བ་བཞི་ལྡན། རྫོགས་རིམ་བྱིན་རླབས་བཞི་ལྡན། སྲུང་བ་བཞི་ནི། རྣལ་འབྱོར་བདག །གནས། སྲོག་བསྲུང་བ། དག་བྱེད་གསུམ་ནི། འཆི་སྲིད། བར་དོ། སྐྱེ་སྲིད་དག་བྱེད། རྣལ་འབྱོར་སྲུང་བ། སེམས་ཅན་ལ་སྨོན་སེམས་བསྐྱེད། བདག་སྲུང་སྙིང་ག་ན་ཉི་མར་ཧཱུཾ་ལས་འོད་འཕྲོས། ཡི་དམ་སངས་རྒྱས་སྤྱན་དྲངས། བདག་གི་སྨིན་མཚམས་ནས་ཞུགས། ཧཱུཾ་འོད་སེམས་ཅན་ལ་ཕོག་འོད་དུ་ཞུ། སངས་རྒྱས་ལ་ཕོག་འོད་ཞུ་རང་ལ་ཐིམ། གཞན་རྟོག་སྤང༌། ཧཱུཾ་ལས་འོད་འཕྲོས་ལུས་བུན་ནེ་ཡལ་སོང༌། ཤེས་པ་ཧཱུཾ་དུ་བསམ། བདག་གི་རྟོག་པ་སྤང༌། ཧཱུཾ་ལས་པདྨའི་སྟེང་དུ་བདག་ཉིད་ཁྲོ་བོ། སྟེང་དུ་ཡང་པདྨའི་གུར་ཕུབ་པ། ཐུགས་ཀ་མགྲིན་པ་སྤྱི་བོ་རྣམས་སུ་ཧཱུཾ་ཨཱཿ ༀ། ཐ་མལ་གྱི་མིང་དང་རུས་རྟོག་པ་སྤང་བ་ནི་བདག་སྲུང༌། གནས་སྲུང་ཧཱུཾ་ལས་མེ་ཕྱིར་ཐོན། སྐྱིལ་ཀྲུང་བཅས་པའི་ཕྱག་གིས་སླེབས་ཚད་ཀྱི་ཁོ་ར་ཁོར་ཡུག་ཏུ་མེ་འབར་བར་བསམ། སྲོག་སྲུང་རླུང་ནང་འཇུག་གི་དུས་སུ་ཤེས་པ་ཧཱུཾ་མེ་འབར་བར་ཐིམ། དག་བྱེད་གསུམ། ཧཱུཾ་འོད་ནི་འཆི་སྲིད། ཧཱུཾ་ཙམ་བར་དོ། ཧཱུཾ་ཁྲོ་བོ་སྐྱེ་སྲིད། སྐུ་སྒྱུ་མ་ཡིད་ལ་དམིགས། ༀ་བཛྲ་པཱ་ཎི་ཧཱུྃ་བཟླས། སྤྱོད་ལམ་ལྷའི་ང་རྒྱལ། རྫོགས་རིམ་བྱིན་རླབས་བཞི་ལྡན། ལུས་ངག་ཡིད་དེ་ཁོ་ན་ཉིད། ལུས་རྣམ་པར་སྣང་མཛད་ཆོས་གནད་ལ་དབབ། བདག་གཙོ་བོའི་ང་རྒྱལ་ལ་སྲིད་པ་ཆགས་པ་ལྟེ་བ་སྤྲུལ་འཁོར། རྩ་འདབ་དྲུག་ཅུ་རྩ་བཞི། སྙིང་ཁ་བརྒྱད། མགྲིན་པ་བཅུ་དྲུག །སྤྱི་བོ་སུམ་ཅུ་རྩ་གཉིས། དྷཱུ་ཏིའི་ཡར་སྣ་ཧཾ། མར་སྣ་ༀ༑ སྦོམ་ཕྲ་ནི་གྲོ་སོག་ཙམ། ལྟེ་བའི་ༀ་དྷཱུ་ཏིར་མགོ་ཚུད་ཙམ། སྙིང་ཁར་ཧཱུཾ། མགྲིན་པར་ཨཱཿ སྤྱི་བོར་ཧཾ། ངག་རླུང༌། ༀ་སྲོག །ཧཾ་རྩོལ་བ། ཨཾ་ལས་རླུང༌། ༀ་སྒྲ་དང་བཅས་པའི་རེག་བྱ་ཚ་བ་དྷཱུ་ཏིའི་ནང་དུ་ཡར་ཞུགས། སྤྱི་བོའི་ཧཾ་ལ་ཕོག །ཚ་ལམ་སྲོས། ཧཾ་ལས་རླུང་ཧིག་སྒྲ་དང་བཅས་པ་རེག་བྱ་བསིལ་བ་བབ། དྷཱུ་ཏི་ན་མར་ཞུགས། ལྟེ་བའི་ཨཾ་ལ་ཕོག་རེག་བྱ་བསིལ་བར་བསམ། ཨ་ཧཾ་གི་བཟླས་པ་བརྒྱ་བྱའོ། །ཡིད་ངོ་བོ་ཐིག་ལེའོ། །ཨཾ་ཧཾ་ཞུ་ཡུངས་ཀར་ཙམ་བསམ། ཉམས་མྱོང་བདེ་བ་དཔེའི་ཡེ་ཤེས་དེ་རིམ་བཞིན། དགའ་བ། མཆོག་དགའ། དགའ་བྲལ། ལྷན་སྐྱེས། སྤྱི། མགྲིན། སྙིང༌། ལྟེ་བར་ཕྱིན། ལྟེ་འོག་ཐིག་ལེ་སྲན་མ་ཙམ། མས་ལུགས་བཟློག་རིམ་སྦྱོར། དེ་ལྟ་བུའི་ཐིག་ལེ་ལ་སེམས་གཏད་པ་ནི་ཡིད་བྱིན་རླབས། དེ་ཁོ་ན་ཉིད་དྭངས་གསལ་མི་རྟོག་ནམ་མཁའ་དྲི་མེད། དེ་ལ་སྟོང་པའི་བསྒོམ་ཤུགས་ཀྱིས་འབྱུང༌། སྣང་བ་མི་འགགས་མྱོང་གསལ་ཡིན། བསྒོམ་གནད་རླུང་ཤས་ཆེ་ན་ལྟེ་བ། དུས་སྔ་དྲོ། མཁྲིས་ཤས་ཆེ་ན་སྤྱི་བོ། དུས་ཕྱི་དྲོ། ཤེས་པ་རྒོད་ན་མི་རྟོག་པ་ལ། བྱིང་ན་བདེ་བ་ལ་སེམས་གཏད་པས་བསྒོམས་ན། དུ་བ། སྨིག་རྒྱུ། སྲིན་བུ་མེ་ཁྱེར། མར་མེ་འབར་བ། ནམ་མཁའི་སྤྲིན་མེད་རྣམས་འབྱུང༌། དེ་ནི་མཆོག་གི་དངོས་གྲུབ་འགྲུབ་པའི་རྟགས་སོ། །འཁོར་ཆེན་བསྐྱེད་རྫོགས་ཀུན༵་ཉམས་ལེན། །དག༵འ་བཞི་སྨིན་གྲོལ༵་ལམ་སྦྱོར་བའི། །མཆོ༵ག་གི་ཁྲིད་ཡིག་གསལ་བར་བཀོད། །སྐལ་བཟང་འགྲོ་ལ་ཕན་གྱུར་ཅིག །དམར་ཁྲིད་ཀྱི་ཡིག་རྙིང་ལས་བཏུས་སོ། (༣༧) །གཏུམ་པོའི་ཁྲིད་ཡིག །གཏུམ་པོའི་ཁྲིད་ནི། སྐྱབས་སེམས་སྔོན་དུ་སོང་ནས། རང་ཉིད་འགྲོ་རྒྱུད་སེམས་ཅན་དུ་སྣང་བའི་ཕྱག་ན་རྡོ་རྗེར་སྙེམས་པས་རང་ངོ་རང་གིས་མི་ཤེས་པར་སྒྲིབ་བྱེད་རྣམ་སྨིན་བག་ཆགས་ཀྱི་ཡོལ་བ་བསལ་བར་མོས་ལ། ༀ་སྭ་བྷཱ་ཝ་ཤུདྡྷཿ སརྦ་དྷརྨཱཿ སྭ་བྷཱ་ཤུདྡྷོ྅ཧཾ། ཞེས་བརྗོད་པས་གཟུང་འཛིན་གཉིས་སྣང་དང་བྲལ་བའི་རང་སྣང་ནམ་མཁའ་སྤྲིན་བྲལ་ལྟར་གྱུར་པ་ནི་ཆོས་ཉིད་དོན་གྱི་ཕྱག་ན་རྡོ་རྗེ། དེའི་ངང་ལས་པད་ཉིའི་སྟེང་དུ་རིག་པ་ཧཱུྃ་ཡིག་མེ་འབར་བ་ལམ་གྱིས་བསྒོམ་སྟེ་ཡི་གེ་བརྡའི་ཕྱག་ན་རྡོ་རྗེ། དེ་ལས་འོད་འཕྲོས་སྟེང་གདོན་གཟའ། འོག་གདོན་ཀླུ། བར་གདོན་འབྱུང་པོ་ལོག་འདྲེན་རྣམས་བྱ་སྒྲོ་རླུང་གིས་འདེད་པ་ལྟར་ཕྱོགས་བཅུར་གཏོར། ཧཱུྃ་ཡིག་ཡོངས་སུ་གྱུར་པ་ལས། གནམ་ལྕགས་ཀྱི་རྡོ་རྗེ་རྩེ་དགུ་པ། རྩ་བ་བརྟན་པ་གདན་ལ་ཟུག་པ། རྩེ་མོ་བྱུང་རྒྱལ་མཁའ་ལ་བསྟན་པ། ལྟེ་བར་སྐྱེད་བྱེད་ཧཱུྃ་ཡིག་མེ་འབར་བས་མཚན་པ་ནི་མཚན་མ་རྫས་ཀྱི་ཕྱག་ན་རྡོ་རྗེ། དེའི་འོད་ཟེར་གྱིས་ལྕང་ལོ་ཅན་གྱི་གནས་མཆོག་ནས་གསང་སྔགས་རིགས་སྔགས་ཀུན་གྱི་བདག་པོ། འབྲས་རྒྱུད་སངས་རྒྱས་སུ་སྣང་བའི་དཔལ་ཕྱག་ན་རྡོ་རྗེ་འཁོར་སེམས་དཔའ་རྡོ་རྗེ་འཛིན་པ་བྱེ་བ་ཕྲག་དགུས་བསྐོར་བ་སྤྱན་དྲངས་ནས་ཐིམ་པའི་སྐད་ཅིག་ལ་རང་ཉིད་ལམ་རྒྱུད་འཕགས་པར་སྣང་བའི་དཔལ་ཕྱག་ན་རྡོ་རྗེ། ཆོས་སྐུའི་ངོ་བོ། ལོངས་སྐུའི་རྣམ་པ། སྤྲུལ་སྐུའི་བདག་ཉིད་ལོ་བཅུ་དྲུག་ལོན་པའི་ཆ་བྱད་ཅན། སྐུ་མདོག་མཐིང་སྔོན་ནམ་མཁའ་རྡུལ་གྱིས་མ་གོས་པ་ལྟར་གསལ་དྭངས་མཚམས་ཀྱི་སྤྲིན་དམར་མཆེད་པ་འདྲ་བའི་དབུ་སྐྲ་སྨིན་མ་སྨ་ར་གྱེན་དུ་འཁྱིལ་བ་མེ་སྟག་འཕྲོ་བ། སྤྱན་གསུམ་དམར་ཞིང་ཟླུམ་པ། མཆེ་བའི་མྱུ་གུ་གཙིགས་པ། འཛུམ་ཁྲོ་འགྱིངས་བག་ལྡན་པ། ཕྱག་གཡས་རྡོ་རྗེ་འཕྱར་སྟབས། གཡོན་དྲིལ་བུ་འཛིན་པས་ཡུམ་ལ་འཁྱུད་པ། སྦྲུལ་རྒྱན་དང༌། སྟག་གི་པགས་པའི་ཤམ་ཐབས་རྒྱབ་ཀྱི་ཆར་དཀྲིས་པ། ཞབས་གཡས་བསྐུམས་གཡོན་བརྐྱངས་པའི་སྟབས་ཀྱིས་བཞུགས་པའི་པང་ན་ཡུམ་རྡོ་རྗེ་གཏུམ་མོ་ལྗང་སྔོན་ལང་ཚོ་ལྡན་པ་གྲི་ཐོད་འཛིན་པས་ཡབ་ཀྱི་མགུལ་ནས་འཁྱུད་ཅིང༌། ཞབས་གཡོན་བསྐུམས་གཡས་བརྐྱངས་པས་ཡབ་ལ་འཁྲིལ་བ། སྤྱན་གསུམ། དབུ་སྐྲ་དམར་སེར་ཐུར་དུ་བཤིག་པ། ཐོད་པའི་ཅོད་པན་དང་རུས་པའི་རྒྱན་ཅན། རྡོ་རྗེ་པདྨ་མཉམ་པར་སྦྱོར་བ། གཉིས་ཀའང་ཡེ་ཤེས་ཀྱི་མེ་དཔུང་འབར་བའི་དབུས་ན་བཞུགས་པའི་གསལ་སྣང་རྒྱ་ཆེར་བསྐྱེད་དེ། ལྷའི་རྣམ་པ་འགག་མེད་ལ་ཡིད་རྩེ་གཅིག་ཏུ་གཏད་ཅིང༌། རང་གི་སྙིང་གར་ཉི་མའི་དཀྱིལ་འཁོར་གྱི་སྟེང་དུ་ཧཱུཾ་ཡིག་བཻ་ཌཱུརྱའི་མདོག་གསལ་ཕྲུང་བ་གཅིག་བསམ། དེ་ལས་ཧཱུཾ་བརྒྱ། ཧཱུཾ་སྟོང༌། ཧཱུཾ་ཁྲི། ཧཱུཾ་འབུམ། ཧཱུཾ་ཚད་མེད་རྒྱས་པའི་དབང་གིས། རང་གི་ལུས་ཇེ་སྲབ་ཏུ་སོང་བ་ཕྲུ་མ་ཕུས་བཏབ་པ་ལྟ་བུའི་ནང་ཧཱུྃ་ཡིག་གིས་མེར་གང༌། དཔལ་ཕྱག་ན་རྡོ་རྗེའི་མཐུ་སྟོབས་མ་ལུས་པས་བྱིན་གྱིས་བརླབས། ཧཱུཾ་གི་ཤུགས་ཀྱིས་པགས་པ་རལ་ནས་ཧཱུཾ་འབའ་ཞིག་པའི་རྣམ་པར་ཤིག་གེར་སོང་སྟེ། འཇིག་རྟེན་ཁམས་མ་ལུས་པ་ཧཱུཾ་སྒྲས་གང་བར་མོས་ཤིང༌། ཕྱོགས་བཅུའི་སངས་རྒྱས་ཀྱི་ཞིང་ཐམས་ཅད་དུ་སྒྲ་དབྱངས་འབྲུག་སྒྲ་ལྟར་ཁྱབ་པས་ཐུགས་དམ་བསྐུལ། བདུད་དང་ལོག་འདྲེན་མ་ལུས་པའི་རྣ་བར་སོན་པས་འཇིགས་སྐྲག་དཔའ་བཀང་བར་བསམས་ལ་རིག་པ་ངར་བསྐྱེད། མིག་རྩ་དཔངས་བསྟོད། ཤེས་པ་ཧུར་ཕྱུང་ལ་ཧཱུཾ་ཧཱུཾ་ཞེས་སྒྲ་གསངས་ཇེ་མཐོ་ལྕེ་རྩ་མི་བསྒུལ་བར་མགྲིན་པ་ནས་ཤུགས་བསྐྱེད་དེ། དང་པོ་དལ་བར་བྱ། གོམས་ནས་སྐད་ཇེ་ཆེར་བཏང་ལ་བཟླ། ཐུན་འཇོག་དུས་སྔགས་ཀྱི་འབྲས་བུ་སྙིང་གའི་ཧཱུྃ་ལ་བསྡུ། བ་སྤུ་བྱེ་བ་ཕྲག་བརྒྱ། སྐྲ་ཉི་ཁྲི་ཆིག་སྟོང་ཧཱུཾ་དུ་ཡང་ཡང་གསལ་གདབ་ཅིང་ལྷའི་སྐུ་དྭངས་གསལ་ཆུ་མཚོའི་རྒྱུ་སྐར་ལྟར་ལས་མ་ཡེངས་པར་འབྲུ་གཅིག་ཧཱུཾ་གི་སྣ་གླུར་བསྒྱུར་བ་ཉིད་དོ། །གཏུམ་ཆེན་རྫོགས་རིམ་ཧཱུཾ་དྲིལ་འདི། །ཀུན༵་ནས་ཁྱེར་བདེའི་དག༵འ་འདྲར་མཐོང༌། །རང་གྲོལ༵་སེམས་ལ་མཆོ༵ག་ཤེས་ཚུལ། །ཡི་གེར་གསལ་བ་འདི་ཉིད་ཡིན༑ ༑གསང་བདག་གྲུབ་ཆེན་གྱི་ཁྲིད་ཡིག་ལས་བཏུས་སོ། (༣༨) །ཕག་མོ་ཀུརྨ་པཱ་དའི་ཁྲིད་ཡིག །ཕག་མོ་ཀུརྨ་པཱ་དའི་ཁྲིད་ནི། སྐྱབས་སེམས་སྔོན་དུ་སོང་ནས། ཐོག་མར་ཐང་སྐུ་གཅིག་རང་ལ་ཉེ་བར་བཀྲམ་ལ་མཆོད་པ་ཤ་ཆེན་གྱི་སྤོས་གཅིག་བྱ། ཐང་སྐུ་ལ་མིག་བལྟས་ལ་མ་ཡེངས་པར་ཤེས་པ་གཏད་ལ་བསྒོམ། མིག་ན་ན་མིག་བཙུམ་ལ་ཡིད་ཀྱི་ཡུལ་དུ་ཐང་སྐུ་ལ་བྲིས་པ་དེ་ལྟ་བུ་གཅིག་བསྒོམ་མོ། །བཞུགས་ཚུལ་ནི། ཀུརྨ་པཱ་ད་བྱ་བ་ཡིན། རུ་སྦལ་གྱི་འདུག་ལུགས་དང་འདྲ་བ་ཡིན་པས་མཚན་ཡང་རུ་སྦལ་ཞབས་ཡིན། དེ་ལྟར་བསྒོམས་པས་ཐང་སྐུ་དང་ཡིད་ལ་ཡོད་པ་གཉིས་ཁྱད་པར་མི་འདུག་ན་དམིགས་པ་ཟིན་པ་ཡིན། ཡང་བདག་གི་ལྟེ་བར་པདྨ་དཀར་པོ་འདབ་མ་བཞི་པ་གཅིག །སྣ་ཚོགས་པདྨ་འདབ་མ་བརྒྱད་པའི་ལྟེ་བར་བྷཻ་ར་བ་ནག་པོ། ཞལ་གཅིག་ཕྱག་གཉིས་པ་གཅིག་ཁ་བུབ་ཏུ་བསྒྱེལ་བ་གྲི་གུག་ཐོད་པ་འཛིན་པ། སྟག་གི་པགས་པའི་ཤམ་ཐབས་ཅན་རུས་པས་བརྒྱན་པ་གཅིག་གིས་མི་ལྤགས་རློན་པ་གྱོན་པའི་སྟེང་དུ་རྗེ་བཙུན་མ་སྐུ་མདོག་སེར་མོ་ཞལ་གཅིག་ཕྱག་གཉིས་མ། གཡས་གྲི་གུག་འཛིན་པའི་ཕྱག་ཐུར་དུ་བརྐྱངས་པ། གཡོན་ཐོད་པ་ཐུགས་ཀར་འཛིན་པ། དབུ་སྐྲ་སིལ་བུ་ཐུར་དུ་འཕྱང་བ། མི་མགོ་རློན་པའི་ཕྲེང་བ་ཅན། ཞབས་གཉིས་གར་སྟབས་སུ་བཞུགས་པ། ཕྱག་རྒྱ་ལྔ་དང་ལྡན་པའི་འོད་ཟེར་བསྐལ་པའི་མེ་ལྟར་འབར་བ་གཅིག་བསྒོམ། ཤེས་པ་རྒོད་པ། འདར་བ། སྤུ་ལངས་པ༑ ཕྱི་རོལ་གྱི་རྟོག་པ་འགགས་ནས་འགུལ་མི་ཤེས་པ་ལྟ་བུ་འབྱུང༌། དེ་ལྟར་བསྒོམས་ན་ཚེ་འདི་ཉིད་ལ་ཕྱག་རྒྱ་ཆེན་པོ་མཆོག་གི་དངོས་གྲུབ་ཐོབ་པར་འགྱུར་རོ། །ཕག་མོ་ཀུན༵་ལས་སེར་མོའི་སྐུར། །ལེགས་བསྟན་དག༵འ་འཁྱིལ་གྲོལ༵་ཞབས་མའི། །མཆོ༵ག་གི་གདམས་པ་གཡེར་པོ་ཆེ། །ཆག་ལོའི་ཁྱད་ཆོས་འདི་ལགས་སོ། །རིན་ཆེན་ཆོས་རྒྱལ་གྱི་ཁྲིད་ཡིག་ལས་བཏུས་སོ། (༣༩) །ཀུ་རུ་ཀུལླེ་ཁྲིད་ཡིག །ཀུ་རུ་ཀུལླེ་ཁྲིད་ནི། སྐྱབས་སེམས་སྔོན་དུ་སོང་ནས། རང་ལྷར་གསལ་བའི་ལྟེ་བར་ཡོན་ཏན་གྱི་རྩ་ཁྱི་མོ་ཉལ་བ་ལྟ་བུ་དེ་ལ་བརྟེན་པའི་ཚུལ་གྱིས་གྱེན་དུ་ཞལ་ཕྱོགས་པ་ཡོན་ཏན་གྱི་རྩ་གཡེར་མ་ཁ་བྱེ་བ་ལྟ་བུ་ལས་སྐྱེས་པའི་སྙིང་ཁར་རྣམ་ཤེས་ཚོགས་བརྒྱད་དང་འབྲེལ་བའི་རྩ་ཨུཏྤལ་འདབ་བརྒྱད་ཁ་བྱེ་བ་ལྟ་བུའི་ལྟེ་བར་རྩ་ཐིག་རླུང་གསུམ་འདུས་པའི་ཧྲཱིཿ ཉི་མ་འཆར་ཀའི་མདོག་ཅན་བསམས་ལ། སྔགས་ཕྲེང་སྐོར་ཙམ་བཟླས། དེ་ནས་མདུན་དུ་བསྒྲུབ་བྱ་བསམ་པའི་ལུས་ནང་དུ་ཡང་རྩ་གསུམ་བརྩེགས་ཧྲཱིཿ དང་བཅས་པའི་འདབ་མ་བརྒྱད་ལ་ཨཱ་ལི་ཐུང་ངུ་བརྒྱད། རང་གི་སྙིང་གར་ཡང་དེ་བཞིན་བསྒོམས་ལ། མཚུངས་པ་འདྲ་བའི་ཡི་གེ་ལ་སྔ་མ་རིང་པོའི་དཔེར་བསྒྲུབ་བྱའི་ཚེ་དཔལ་མ་ལུས་པའི་ངོ་བོ་རིང་པོར་ཤར། སླར་རང་ལྷའི་ང་རྒྱལ་གྱིས། ༀ་ཀུ་རུ་ཀུལླེ་ཧྲཱིཿ སྭཱ་ཧཱ། ཞེས་དྲག་ཏུ་བཟླས་པས་སྙིང་ཁའི་ཧྲཱི་ལས་འགུགས་བྱེད་མཁའ་འགྲོ་མ་རྣམ་པ་བུང་བ་དམར་པོ་དྲེགས་པའི་ཤུགས་ཅན་བརྒྱད་རྣ་བ་གཡས་སྒོ་ལས་ཐོན༑ ཕྱག་གི་ཨུཏྤ་ལའི་མདའ་ལྟོང་ནས་བརྒྱུད་དེ། བསྒྲུབ་བྱའི་རྣ་བའི་སྒོ་ནས་ཞུགས། རིམ་པ་ལས་མ་འདས་པར་ཕྲལ་བའི་ཚུལ་གྱིས་དབྱངས་ཡིག་གི་སྲོག་ཁུ་བཅུད་བླངས་ཨུཏྤ་ལ་རིད་ཅིང་སྐམ། སྔ་མའི་ལམ་ནས་རང་གི་སྙིང་གའི་དབྱངས་ཐུང་ལ་སྲོག་བཅུག་པས་ཡི་གེ་རིང་པོ་བརྗིད་ལྡན་དུ་བསམས་ལ་སྔགས་བཟླས་པའི་མཐར། གང་ལ་ཐོག་མ་དབུས་མཐའ་མེད། །སྲིད་མེད་མྱ་ངན་འདས་པ་མེད། །བདག་མེད་གཞན་ཡང་མེད་པ་སྟེ། །འདི་ནི་མཆོག་ཏུ་བདེ་ཆེན་ཉིད། །ཅེས་པའི་དོན་ལ་ཡིད་མཉམ་པར་བཞག་པ་ཉིད་དོ། །ཀུན༵་ཁྱབ་འཁོར་ལོ་བཞིའི་གཏུམ་མོ། །ལྷ་འདིའི་རྫོགས་རིམ་ལ་སྦྱར་ནས། །དག༵འ་དགའ་ཆོས་ལྟར་བཅོས་སྟོན་ལ། །གྲོལ༵་མཆོ༵ག་གད་མོ་གཏིང་ནས་ཤོར། །གཅེས་བཏུས་ནང་ནས་བཏུས་སོ། (༤༠) །དུས་འཁོར་སྙན་བརྒྱུད་ཀྱི་ཁྲིད་ཡིག །དུས་འཁོར་སྙན་བརྒྱུད་ཀྱི་ཁྲིད་ནི། སྐྱབས་སེམས་སྔོན་དུ་སོང་ནས། ཕྱག་རྒྱ་ཆེན་པོའི་ཚིག་རྐང་ནི། དང་པོ་རྩོལ་སྒྲུབ་དང་བྲལ་བས་ཁོང་སློད། བར་དུ་ཐེ་ཚོམ་དང་བྲལ་བས་སེམས་མ་བཅོས་པར་བཞག །ཐ་མ་བྱུང་ཚོར་ཐམས་ཅད་སྐྱེ་མེད་དུ་ཤེས་པར་བྱ། གཅིག་ཤེས་ཀུན་གྲོལ་ཚིག་རྐང་ནི། ཆོས་ཉིད་ཟབ་མོ་ལ་བཞག །སེམས་ལ་སོ་སོར་རྟོག །སེམས་ཉིད་རྒྱ་ཆེན་པོ་ལ་ལྟོས། ཆོས་ཉིད་ཀྱི་རང་མདངས་སྐྱོང༌། དེ་ཉམས་སུ་བླང༌། རྟོག་པ་ཕུལ། ངོ་སྤྲད། མདོ་རྒྱུད་མན་ངག་ལུང་བསྟན་བཅོས་གང་ལ། དོན་སེམས་སེམས་ཉིད་གཉིས། ཆོས་ཆོས་ཉིད་གཉིས་ལ་ཚིག་ཁྲིད། ངག་སེམས་འབྱེད་པ་ཚིག་ཁྲིད། བསྒོམ་རྒྱུ་ལྔ། བཤད་རྒྱུ་བཞི། ངེས་འཇོག་བཞི། གསོལ་འདེབས་གསུམ། བསྒོམ་རྒྱུ་ལྔ། སེང་གེའི་ཁྲི། པད་མ། ཟླ་བ། ཉི་མ། བླ་མ། བཤད་རྒྱུ་བཞི། བདག་དང་སེམས་ཅན་བླ་མ་ལ་སྐྱབས་ངེས་འཇོག་བཞི། འདི་ཀ་སངས་རྒྱས། ཐུགས་མི་རྟོག་ཡེ་ཤེས། གསུང་ཆོས། སྐུ་དགེ་འདུན། གསོལ་འདེབས་གསུམ། བླ་མ་བདག་ལ་ཕྱག་རྒྱ་ཆེན་པོའི་གནས་ལུགས་རྟོགས་པར་བྱིན་གྱིས་རློབས། གསུམ། བསྒོམ་རྒྱུ་གཅིག །ཆོ་ག་གཉིས། གསོལ་འདེབས་གསུམ། གཅིག་ནི་ངའི་བླ་མ། གཉིས་ནི་ཕྱག་རྒྱ་ཆེན་མོ། གསུམ་ནི་བླ་མ་བདག་ལ་ཕྱག་རྒྱ་ཆེན་མོ་སྟོང་ཉིད་སྙིང་རྗེ་རྒྱུད་ལ་སྐྱེ་བར་བྱིན་གྱིས་རློབས། དབང་བཞིའི་རྟེན་འབྲེལ་བསྒྲིག་གོ །ཐུགས་ཡིད་གཅིག་ཏུ་བསྲེ་བ། འགྱུར་མེད་སྨོན་ལམ་བཏབ། རྗེས་དྲག་སྔགས་གསོལ་བ་གདབ། ཀྭ་ཡེ་འདི་གཅིག་ཆོས་ཀྱི་སྐུ། །གཉིས་མཐུད་ཕན་ཆད་རྟོག་པ་སྟེ། །འཁྲུལ་དང་མ་འཁྲུལ་ངོ་བོ་གཅིག །འགྲོ་ལ་སེམས་རྒྱུད་གཉིས་མི་འཆང༌། །ད་དུང་རྡོ་རྗེ་སེམས་དཔའ་ཉོན། །རང་བྱུང་རིག་པའི་ཀུན་བཟང་ལ། །ཚིག་དང་ཡི་གེ་མེད་པས་སློབ་དཔོན་མེད། །རང་གིས་རང་ལ་འཆད་པས་སློབ་དཔོན་ཡོད། །རང་གིས་རང་ཉིད་རིག་པས་ཆོས་ཀྱི་སྐུ། །ཡིད་ཀྱིས་བརྗོད་པ་མ་གཏོགས་པ། །དོན་ཀུན་རབ་ཏུ་མི་མཐོང་ངོ༌། །ཕྱི་ལྟས་ཀྱི་ཚོལ་འབྲོས་དགོས་པ་མེད། །སངས་རྒྱས་ཀྱི་དགོངས་པ་སེམས་ལ་འདུག །རང་ངོ་ལ་རང་གིས་ལྟ་བ་འདི། །དཔེ་ཡིད་བཞིན་གྱི་ནོར་བུ་རྙེད་པ་འདྲ། །ཐབས་ཀྱིས་ཕྱེ་ན་བརྒྱ་དང་ལྔ་བཅུ་སྟེ། །ཉེ་བར་བསྡུས་ན་སུམ་ཅུ་ཐམ་པར་འདུས། །དེ་ཡང་བསྡུས་ན་སྟོང་ཆེན་ཡི་གེ་ལྔ། །དེ་ཡང་བསྡུས་ན་ཐབས་ཤེས་ཡི་གེ་གཉིས། །དེ་ཡང་བསྡུས་ན་གསང་ཆེན་ཡི་གེ་གཅིག །རྟགས་བཅུ་རྣམ་དག་གི་སེང་ཁྲི་ལ། །ཨཱ་ལི་རྣམ་དག་གི་ཉི་གདན་དང༌། །ཀཱ་ལི་རྣམ་དག་གི་ཟླ་གདན་དང༌། །སྒྲ་གཅན་རྣམ་དག་གི་ཐིག་ལེའོ། །ཆོས་ཉིད་རྣམ་དག་གི་ཡི་གེ་ལ། །ཤེས་བྱ་ཀུན་ཁྱབ་ཀྱི་ཡེ་ཤེས་སོ། །གཞོམ་མེད་སྒྲ་ཡིས་ཡོངས་བསྐུལ་ནས། །རྣམ་དག་འོད་ལྔའི་གཞལ་ཡས་སུ། །རང་རིག་ཡེ་ཤེས་གསལ་བར་བྱེད། །བདེ་ཆེན་ལྷུན་གྲུབ་སྐུ་རུ་ཤར། །སེམས་ཉིད་རིན་པོ་ཆེ་ལ་ཕྱག་འཚལ་ལོ། །ཉི་ཁྲི་ཆིག་སྟོང་དྲུག་བརྒྱ་ལ། །རྡོ་རྗེའི་བཟླས་པའི་སྲོག་སྙིང་ཆགས། །སྐྱེ་མེད་བུང་བའི་སྒྲ་དབྱངས་མཁན། །སྐུ་གསུམ་ལྷུན་གྲུབ་རྒྱུན་ཆད་མེད། །སེམས་ཉིད་རིན་ཆེན་ལ་ཕྱག་འཚལ། །ཙིཏྟ་རིན་ཆེན་སྙིང་གི་གུར་ཁང་དུ། །རྟ་རྔ་བརྒྱ་ཚད་ཤིན་ཏུ་དྭངས་པ་ལ། །ཁ་དོག་ལྔ་ལྡན་ཨ་ཡི་རང་སྒྲ་སྒྲོག །ཤེས་བྱ་ཐམས་ཅད་མེ་ལོང་ནང་བཞིན་གསལ། །སེམས་ཉིད་རིན་ཆེན་ལ་ཕྱག་འཚལ། །སྒྲོལ་མ་ལམ་ཞུགས་ཕྱི་རོལ་ཇི་བཞིན་དུ། །ཁྱབ་གདལ་ཆེན་པོ་ཕྱི་ནང་འདྲེས་པར་གསལ། །རྣལ་འབྱོར་པ་ལ་འདོད་དོན་དེ་ཡིས་སྟེར། །མཆོག་ཏུ་མི་འགྱུར་བདེ་བ་ཆེན་པོ་ཡིན། །སེམས་ཉིད་རིན་ཆེན་ལ་ཕྱག་འཚལ། །ཨ་ནི་སྟོང་དང་མི་སྟོང་འདས། །གནས་ནི་སྐྱེ་བ་མེད་པར་གནས། །བརྗོད་ནི་རྒྱུན་ཆད་མེད་པར་བརྗོད། །ཁྱབ་ནི་འགྲོ་བ་ཡོངས་ལ་ཁྱབ། །མཐོང་ནི་སུས་ཀྱང་མཐོང་བ་མེད། །སྟོན་ནི་བླ་མ་དམ་པས་སྟོན། །སེམས་ཉིད་རིན་ཆེན་ལ་ཕྱག་འཚལ། །མཐར་ཐུག་སྟོང་ཆེན་ཐིག་ལེ་དྭངས་པའི་ནང༌། །རེ་ཁ་ནག་པོ་རྟ་རྔ་བརྒྱར་གཤགས་ཚད། །དེ་ནང་གཟུགས་དང་རིགས་དྲུག་གཟུགས་ལ་སོགས། །ཁམས་གསུམ་གང་བའི་ཆོས་རྣམས་མ་ངེས་གསལ། །དྲི་མེད་འོད་འཕྲོ་རྣམ་ཀུན་མཆོག་ལྡན་གཟུགས། །དུས་གསུམ་རྒྱལ་སྐུ་རྡོ་རྗེ་སེམས་དཔར་གྱུར། །སེམས་ཉིད་རིན་ཆེན་ལ་ཕྱག་འཚལ། །ངའི། ངའོ། །ང་རང༌། ངས། ང་ལ། ང་ཡོད། ང་མེད། ང་མིན། མ་བཅོས་སོ་མ་གདན་དུ་ཐིངས། །ཐོལ་སྐྱེས་སོ་མ་སྔས་སུ་ཆུག །རང་གདངས་འབྲལ་མེད་གོས་སུ་གྱོན། །གཅེར་ཉལ་ཉི་ཁྲི་ཆིག་སྟོང་དང༌། །དྲུག་བརྒྱ་ཡོངས་སུ་རྫོགས་པ་ན། །རང་ཉིད་རྡོ་རྗེ་སེམས་དཔར་འགྱུར། །རྗེས་ལམ་ཁྱེར་དགུ་ནི། བྱིང་བ་ཆེན་པོ་ལ་གཏི་མུག་གི་ལམ་ཁྱེར། འདུས་པ་ཆེན་པོ་ལ་ཞེ་སྡང་གི་ལམ་ཁྱེར། བྱམས་པ་ཆེན་པོ་ལ་འདོད་ཆགས་ཀྱི་ལམ་ཁྱེར། མི་ཐུབ་དགྲ་ལ་སྦྱིན་གཏོང་གི་ལམ་ཁྱེར། རྐུན་མ་ལ་ངོས་འཛིན་གྱི་ལམ་ཁྱེར། ཐུག་ཕྲད་ལ་དཔའ་བོ་ཆིག་ཆོད་ཀྱི་ལམ་ཁྱེར། འཇིགས་འཕྲང་ལ་སོ་འཛུག་གི་ལམ་ཁྱེར། བསླུས་མ་ལ་མགོ་བསྐོར་གྱི་ལམ་ཁྱེར། ངན་པ་ལ་དུག་སྦྱོར་གྱི་ལམ་ཁྱེར། སྔར་གྱི་དུག་གསུམ་སྟེང་དུ་ཁེངས་པ་ཆེན་པོ་ལ་ང་རྒྱལ། འགྲན་སེམས་ཆེན་པོ་ལ་ཕྲག་དོག་བསྣན་ནས་གུད་ཆུང་སྤུན་ལྔར་ཡང་མིང་འདོགས་གསུང༌། དུས་གསུམ་ཐམས་ཅད་བླ་མ་མཐོང་ཚད་ལ་ཐུགས་ཡིད་བསྲེ། རྟེན་མཐོང་ཚད་ལ་རབ་གནས། སེམས་ཅན་མཐོང་ཚད་ལ་སྙིང་རྗེ། གཤིན་པོ་ཐོས་ཚད་ལ་བདུན་ཚིག །སྣང་བ་མཐོང་ཚད་ལ་དབྱིངས་རིག་བསྲེ། མཐར་འཕོ་བ་ཨ་གཅིག་མའི་གདམས་པ་བསྟན་ནོ། །དུས་འཁོར་སྙན་བརྒྱུད་མན་ལུང་པའི། །གདམས་པ་ཀུན༵་བསྡུས་དག༵འ་བཞིན་དུ། །གྲོལ༵་མཆོ༵ག་བདག་གིས་ཉུང་ངུའི་ངག །ལེགས་པར་བསྡུས་ཏེ་ཡི་གེར་བྱས། །རྙིང་མའི་གལ་པོའི་རྒྱུད་ལུང་ཕ་མ་མེད་པའི་རྒན་རྒོན་སོགས་ཕྱིར་བསལ། གང་ཡིད་ཆེས་པ་རྣམས་ཆོས་རྗེ་མཁས་པའི་དབང་པོའི་ཞལ་སློབ་ཅིག་གི་ངག་ལས་རྙེད་པའི་ཆ་ཙམ་བཀོད་པའོ། (༤༡) །ཨོ་རྒྱན་བསྙེན་སྒྲུབ་ཀྱི་ཁྲིད་ཡིག །ཨོ་རྒྱན་བསྙེན་སྒྲུབ་ཀྱི་ཁྲིད་ནི། སྐྱབས་སེམས་སྔོན་དུ་སོང་ནས། རྩ་དག་སྐུ་རྡོ་རྗེ། སྐྱིལ་ཀྲུང་གསུམ་བྱེད། སྒྲུབ་ཁང་མུན་པ་ཅན་དུ་བསྒོམ་ཞིང༌། སྐྱིལ་ཀྲུང་དཔུང་རྒྱངས། ལྟག་པ་བསྲང༌། མགྲིན་པ་དགུགས། ལྕེ་དྲིལ། ཁ་སྣ་གཉེར་ཙམ། རྣ་བ་ཧྲེང་གཏང༌། མིག་གྱེན་དུ་བལྟ། དམིགས་པ་མི་འཛིན། བསྒོམ་འདོད་རྟོག་པ་ཕྱིར་བསྙིལ། མ་ཡེངས་ཙམ་བཞག །སྒོ་ལྔ་བཅུད་ལ་བོར་བས་རྩ་བ་ཡན་ལག་གི་རླུང་ནང་དུ་བཀང༌། དུ་བ་སོགས་མཐོང༌། རླུང་སྟོད་དུ་འཚང་ན། འོག་གི་སྐྱིལ་ཀྲུང་ལྟོ་བ་འོག་སྒོ་རྐང་པ་བསྡམ། ཆ་ཆ་ནས་བསྒྲིམ། ལྟ་སྟངས་ཐུར་ལ་ལྟ་བ་འཇོག །སྟེང་གི་སྐྱིལ་ཀྲུང་འོག་གི་སྐྱོན་སེལ༑ བར་གྱི་སྐྱིལ་ཀྲུང༌། དལ་མོ་ཅུང་ཟད་སྒྱེ་བར་བྱ། ལྟོ་བ་ཕྱིར་བསྐྱེད། སྟེང་འོག་གེགས་ཐམས་ཅད་སེལ། སྔ་དྲོ་ཕྱི་དྲོ་ཉི་མ་དང་སེར་བུ་ལ་རྒྱབ་ཕྱོགས། ཉིན་གུང་བསྒོམ་པ་མ་ཡིན། ནམ་མཁའ་མཐོང་སར་ཕྱེད་གཡབ་འོག་སྤྲིན་མེད་དྭངས་པ་ལ་བསྒོམ། ཉིན་མོའི་རྟགས་དྲུག་མཐོང༌། འབྱུང་རླུང་ཟིན་པ། དེ་ཡང་ས་རླུང་དུ་བ་ལ་ཆུ་རླུང་སྨིག་རྒྱུ། མེ་རླུང་སྲིན་བུ་མེ་ཁྱེར། རླུང་གི་རླུང་མར་མེའི་འོད། མཚན་རྟགས་བཞི། ནམ་མཁའི་རླུང་ནམ་མཁའ་ལྟ་བུ། མེ་འབར་བ། ཟླ་བ། ཉི་མ། སྒྲ་གཅན་གནག་ལིང་ལིང་བ། གློག་ཤིན་ཏུ་ཕྲ་བའི་ཐིག་ལེའི་དབུས་སུ་ལོངས་སྐུ་མཐོང༌། ཉིན་རྟགས་དྲུག་མ་ངེས་པ། བུམ་པ། སྣམ་བུ། རེ་ལྡེ་ལ་སོགས་བསམ་གྱིས་མི་ཁྱབ། དེ་ལུས་ཉམས། སེམས་ཉམས། རྨི་ཉམས་གསུམ་གྱིས་བརྟག་དགོས་ཏེ་རྟགས་བཅུའོ། །ཤེས་རབ། རྟོག་དཔྱོད། དགའ་བ། གཡོ་མེད། བདེ་བ། བསམ་གཏན་ཡན་ལག་ལྔ་མཐོང༌། མངོན་པར་ཤེས་པ་ལྔ་འཆར། གསུང་རྡོ་རྗེ། རྩ་ཁྱིམ། ཐིག་ལེ་ལོངས་སྤྱོད། རླུང་བདག་པོ། རིག་པ་རྟེན་དུ་གནས། རླུང་རོ་ཕྱུང༌། རླུང་འཇུག་པ་ༀ། གནས་པ་ཨཱཿ ཕྱིར་དབྱུང་བ་ཧཱུཾ། བགྲང་ཕྲེང་སྤངས་པའི་བཟླས་པ་བྱེད། དེ་རྗེས་རླུང་མ་འཆོལ་བ་རླུང་སྦྱོར་ལྔ་བསྒོམ་སྟེ། ནམ་མཁའི་རླུང་འབྱུང་བ་ཚོར་རིག་མེད་པ་འཇམ་ཞིང་ཆ་མཉམ་གཟུང༌། མེ་རླུང་དྲག་ལ་ཐུང་རྦུད་རྦུད་གཟུང༌། ཆུ་རླུང་སོ་བསྡམས་ནས་གཞུར་སིད་སྒྲ་དང་བཅས་གཟུང༌། སའི་རླུང་ནམ་མཁའི་རླུང་ལས་ཅུང་ཟད་དྲག་པར་ཚོར་མ་ཚོར་ཙམ་གཟུང༌། དེ་ནས་ཐུར་སེལ་རླུང་གི་གདན་དང་འབྱུང་བ་རིམ་བརྩེགས་བསྒོམ། ལྟེ་བར་ཨེ་སྔོན་པོ་ནམ་མཁའ་གྲུ་གསུམ་དྭངས་པ། དེའི་སྟེང་དུ་ཡཾ་ལས་རླུང་གི་དཀྱིལ་འཁོར་ནག་པོ་གཞུའི་དབྱིབས་ཅན། རཾ་ལས་མེའི་དཀྱིལ་འཁོར་དམར་པོ་གྲུ་གསུམ། བཾ་ལས་ཆུའི་དཀྱིལ་འཁོར་དཀར་ལ་ཟླུམ་པོ། ལཾ་ལས་སའི་དཀྱིལ་འཁོར་སེར་པོ་གྲུ་བཞིའི་སྟེང་དུ་ཡེ་ཤེས་ཀྱི་གདན་ལྗང་གུ་ཟླུམ་པོ། སྒྲ་གཅན། ཉི་མ། ཟླ་བ། དུས་མེ་ཟླུམ་པོ། རེག་བྱ་འབྱུང་བ་དང་མཐུན། སྟེང་གི་རླུང་སྦྱོར་གྱིས་འབྱུང་བའི་གདན་ལ་ཨཱ་ལི་ཀཱ་ལི་གསེར་མདོག་གི་ཕྲེང་བ་ན་ར་ར་བྱུང༌། དུས་མེའི་སྟེང་དུ་སེར་ཧྲཾ་དམིགས། གཏོང་དུས་སུ་ཡིག་འབྲུ་གྱེན་ལ་ཡོང་བར་བསྒོམ། ཆུ་རླུང༌། ཨཱ་ལི་ཀཱ་ལི་སྐྱ་ན་ར་ར་བྱུང༌། ཟླ་གདན་སྟེང་དུ་དཀར་ཧྲཾ་མེ། མེ་རླུང་ཨཱ་ལི་ཀཱ་ལི་དམར་ན་ར་ར་བྱུང༌། ཉི་གདན་སྟེང་དུ་དམར་ཧྲཾ་མེ། རླུང་གི་རླུང༌། ཨཱ་ལི་ཀཱ་ལི་ནག་ན་ར་ར་བྱུང༌། ཡེ་ཤེས་ཀྱི་གདན་གྱི་སྟེང་དུ་སྔོ་ཧྲཾ་མེ་བསམ། ཐམས་ཅད་ཀྱི་ཐུན་མགོ་ལ་ལྟ་སྟངས། རང་རང་འཛིན་སྟངས་ཀྱི་བར་རླུང་གཟུང༌། སྟེང་འོག་གློད། ས་བོན་རྣམས་རྡོ་རྗེ་སྔོན་པོ། རལ་གྲི་ནག །རིན་པོ་ཆེ་དམར། པད་མ་དཀར། འཁོར་ལོ་སེར་པོ། དེ་རྣམས་སྐད་ཅིག་གིས་ཀྲོང་བསྐྱེད། ལྷ་རེ་རེ་སྟེ་དུས་འཁོར་རམ། ཡབ་ཡུམ་ཀྲོང་བསྐྱེད་གསོལ་གདབ། རླུང་ལྟ་སྟངས་སྨད༑ སྐུ་སྨད། བར་རླུང་སྐེད་པ། སྐུ་སྟོད། སྟེང་རླུང་ཞལ་སྤྱན། རླུང་རིན་པོ་ཆེ་མེ་ཆུ་ས་ཁམས་པ་བསྐྱེད། དེ་ལྟར་རླུང་ལམ་དུ་སློང་བའི་དུས་སུ་ལྷ་མེ་ཁམས་པའི་ལྟེ་བ་ནས་རེག་བྱ་ཚ་བ། མེ་བདེ་ཆེན་ཧཾ་ལས་ཨཱ་ལི་ཀཱ་ལིའི་སྟེང་འོག་ཏུ་བབ་ལུས་ཁྱབ། འདི་སྐབས་སུ་ལས་ཆེན་སྒྲུབ་ན། ཆུ་རླུང་བཞི་སྦྱོར་ནི་ཞི་བའི་ལས། ལྷ་ཆུ་ཁམས་པ་བསྐྱེད། ཆུ་རླུང་དབུ་མར་བཅུག །ༀ་མ་མ་ཀི་རི་ཆེ་གེ་མོ་ཤཱནྟིཾ་ཀུ་རུ་ན་མཿ ས་རླུང་བཞི་སྦྱོར་རྒྱས་པའི་ལས། ལྷ་ས་ཁམས་པ་བསྐྱེད། ས་རླུང་དབུ་མར་བཅུག །ༀ་ལོ་ཙ་ན་པ་དྷི་ཆེ་གེ་མོ་པུཥྚིཾ་ཀུ་རུ་སྭཱ་ཧཱ། མེ་རླུང་བཞི་སྦྱོར་དབང་གི་ལས། ལྷ་མེ་ཁམས་པ་བསྐྱེད། མེ་རླུང་དབུ་མར་བཅུག །ༀ་པཎྜ་བ་སུ་ནི་ས་ར་ཏེ་ཆེ་གེ་མོ་བཽ་ཥཌ། རླུང་གི་རླུང་བཞི་སྦྱོར་དྲག་པོའི་ལས། ལྷ་རླུང་ཁམས་པ་བསྐྱེད། རླུང་གི་རླུང་དབུ་མར་བཅུག །ༀ་ཏཱ་རེ་ཏུཏྟཱ་རེ་ཆྒཻ་མོ་མཱ་ར་ཡ་ཧཱུྃ། གཞན་དབྱེ། རེངས། རྨོངས། དུག་ཞི་བ། བསྐྲད་པ། ཚད་རིམས་ཀྱིས་འདེབས་པ། ཕུར་བུས་གདབ་པ། ལས་ཆེན་བཅུ་གཉིས་སྒྲུབ་པ། ལྷ་ནམ་མཁའི་ཁམས་པ་བསྐྱེད། ནམ་མཁའི་རླུང་དབུ་མར་བཅུག །བསྒྲུབ་བྱ་མི་སྣང་བར་བསྒོམ་པས་མི་སྣང༌། དེ་ལྟར་ཉམས་སུ་བླངས་པས་སྲོག་རླུང་ཐིག་ལེའི་ནང་དུ་ཆུད་ནས་འཛིན་པ་ཡིན། ཐུགས་རྡོ་རྗེ། ལུས་གནད་སྐྱིལ་ཀྲུང༌། རང་གི་ནང་སྟོང་རའི་དབུ་མ་མདའ་སྙུག་འབྲིང་པོ་ཙམ། འཁོར་ལོ་དྲུག་གི་སྲོག་ཤིང༌། ཡར་སྣ་ཐིག་ལེ་དཀར་པོ་ཧཾ། མར་སྣ་ཐིག་ལེ་དམར་པོ་ཧོ་གློག་འདྲ་བ། དཔྲལ་བར་ༀ། མགྲིན་པར་ཨཱཿ སྙིང་གར་ཧཱུྃ། གསང་བར་ཀྵ། རླུང་འཇམ་ལ་རིང་བ་ལ་གནད་དུ་བསྣུན། ཀྵ་མེར་འབར། གསང་གནས། ལྟེ་བར། སྙིང་གར། མགྲིན་པར། དཔྲལ་བའི་རྩ་ནང་གི་བག་ཆགས་བསྲེགས། ཧཾ་ལས་བྱང་སེམས་བྱུང་རྩ་འདབ་མེར་གང༌། རིམ་གྱིས་མགྲིན་སྙིང༌། ལྟེ་གསང་གང༌། ཟག་མེད་ངོས་བཟུང༌། བློ་བྲལ་ལ་རྩེ་གཅིག་གཏད། རྒྱ་མཚོ་འཕུལ། རླུང་མི་དགག་སོར་བཞག །སྟོད་སྨད་ལྟེ་འོག་ཏུ་ཕུལ། སྲོག་རླུང་མི་རྔུབས། སྟེང་འོག་བར་གསུམ་བསྲེས་ནས་རྒྱངས་བསྐྱུར། འོག་རླུང་འཕུལ། སྲོག་རླུང་གནས་སུ་འཕུལ་བའོ། །རྡོ་རྗེ་གསུམ་གྱི་བསྙེན་སྒྲུབ་ཀྱི། །དམིགས་འདོམས་ཀུན༵་ལ་དག༵འ་སྦྱིན་པའི། །གྲོལ༵་བ་མཆོ༵ག་གི་གནད་འདི་ཡང༌། །ཡི་གེར་ལེགས་པར་བཀོད་ལ་གཟིགས། །ཟླ་སེང་གི་ཁྲིད་ཡིག་ལས་བཏུས་སོ། (༤༢) །ལམ་འབྲས་ཀྱི་ཁྲིད་ཡིག །ལམ་འབྲས་བུ་དང་བཅས་པའི་ཁྲིད་ནི། སྐྱབས་སེམས་སྔོན་དུ་སོང་ནས། མ་དག་སྣང་བ་འཁོར་བའི་སྡུག་བསྔལ་བསམ་གྱིས་མི་ཁྱབ་ཀྱང༌། བསྡུ་ན་སྡུག་བསྔལ་གྱི། འགྱུར་བའི། འདུ་བྱེད་གསུམ་ལས། དམྱལ་བ་ཚ་དམྱལ། ཡང་སོས། ཐིག་ནག །བསྡུས་འཇོམས། ངུ་འབོད། ངུ་འབོད་ཆེན་པོ། ཚ་བ། རབ་ཏུ་ཚ་བ། མནར་མེད། གྲངས་དམྱལ། ཆུ་བུར་ཅན། ཆུ་བུར་རྡོལ་བ་ཅན། ཨ་ཆུ་ཟེར་བ། ཀྱི་ཧུད། སོ་ཐམ་པ། ཨུཏྤལ་ལྟར་གས་པ། པདྨ་ལྟར་གས་པ། པད་མ་ལྟར་ཆེར་གས་པ། ཉི་ཚེ་ཉེ་འཁོར། ཚ་དམྱལ་བརྒྱད་ཀྱི་ཕྱོགས་བཞི་ན། མེ་མ་མུར་གྱི་འོབས། རོ་མྱགས་ཀྱི་འདམ། སྤུ་གྲིའི་ཐང༌། རལ་གྲི་ལོ་མའི་ནགས། ཤལ་མ་ལིའི་སྡོང་པོ། ཡི་དྭགས་ཕྱིའི་སྒྲིབ་པ་ཅན། ནང་གི་སྒྲིབ་པ་ཅན། ཟས་སྐོམ་གྱི་སྒྲིབ་པ་ཅན། དུད་འགྲོ་ལ་བྱིངས་ན་གནས་པ། ཁ་འཐོར་བ་སྟེ་དེར་མི་སྐྱེ་བའི་ཐབས་མེད་དོ་བསམ། འགྱུར་བ་འཁོར་བ་མི་རྟག་པ། སྙིང་པོ་མེད་དེ། བརྒྱ་བྱིན་དུ་སྐྱེས་ནས་སླར་ས་སྟེང་དུ་ལྷུང༌། འཁོར་ལོས་སྒྱུར་བར་སྐྱེས་ནས་བྲན་གྱི་ཐ་མར་སྐྱེ། ལྷ་ཐོབ་ནས་དམྱལ་བར་སྐྱེ། ཉི་ཟླ་མུན་པར་འཇུག །ཕྱུག་པོ་སྤྲང་པོར་འགྲོ། ཁ་དྲག་ཞན་པོར། དགྲ་བཤེས། བཤེས་དགྲར། ཡུལ་མི་དང་རྒྱལ་ཁམས་ཀྱི་མི་ལ་བལྟས་ན་སྔར་གྱི་ས་ན་མེད་པར་རིམ་བཞིན་འགྱུར་ནས་འགྲོ། འདུ་བྱེད་ལ། རྒས་རྒས་ཤི་ཤི་ལས་བྱས་ཀྱང་ཚིམ་པ་མེད་ལ་ཚེ་རབས་བརྒྱུད་མར་ལས་བྱས་ཀྱང་ལས་ཟིན་པ་མེད་དོ། །དེ་ལྟར་བསམ་པས་འགྲོ་བ་གང་དུ་སྐྱེས་ཀྱང་སྐྱིད་པ་མེད་པའི་བསམ་བློ་ཐག་ཆོད་ན་ཅི་བྱས་ཆོས་སུ་འགྲོ་བ་ཡིན་ནོ། །དལ་འབྱོར་རྙེད་དཀའ་བ། ཕན་ཐོགས་ཆེ་བ། ཡུན་དུ་མི་གནས་པ། དེ་སྒྲུབ་པའི་རྟེན་ཡང་དལ་འབྱོར་གྱི་མི་ལུས་འདི་ཡིན། དལ་འབྱོར་ཡང༌། རང་འབྱོར་ལྔ༑ གཞན་འབྱོར་ལྔ། རྙེད་དཀའ་ཐོབ་པའི་དུས། སྙིང་པོ་བླང་དགོས་ཤིང༌། དེའང་འདིའི་ཚེ། ཕྱི་མའི་མཐོ་རིས། ཐེག་པ་འོག་མའི་མྱང་འདས། རྣམ་མཁྱེན་གྱི་སངས་རྒྱས་ཀྱང་བསྒྲུབ་པར་ནུས། རྙེད་དཀའ་བའི་དལ་འབྱོར་དེ་མི་རྟག་པའི་ཆོས་ཡིན་པས་ཡུན་རིང་དུ་མི་གནས། རྒྱུ་མཚན་ཛཾ་བུ་གླིང་པའི་ཚེ་ལ་ངེས་པ་མེད། མི་མཐུན་པའི་ཕྱོགས་ཀྱི་རྐྱེན་མང༌། མཐུན་པའི་རྐྱེན་དཀོན་པས་ནམ་འཆི་ཆ་མེད་དེ། རྒྱུ་འབྲས་ལ་ཡིད་ཆེས། མི་དགེ་བ༑ དགེ་བ། ལུང་མ་བསྟན་བསམ་སྟེ་མི་དགེ་བ་བཅུ་ཆེ་འབྲིང་ཆུང་གསུམ་དུ་སྤྱད་པས། ངན་སོང་གསུམ་དུ་སྐྱེ། མི་དགེ་བ་ལས་སྡུག་བསྔལ་འབྱུང་བས་སྐད་ཅིག་མི་སྤྱད། དགེ་བ་བཅུ་སྤྱད་པའི་རྣམ་སྨིན་གྱིས་འབྲས་བུ་བདེ་འགྲོར་སྐྱེ། བྱང་ཆུབ་གསུམ་ཐོབ་པ་ཡིན། དགེ་བ་ལ་ཕན་ཡོན་འདུག་སྙམ་དུ་བསམ། ལུང་མ་བསྟན་ཀུན་སློང་དགེ་མི་དགེའི་བསམ་པ་གང་གིས་ཀྱང་མ་ཟིན་པ་ཡིན་པས། སྒོ་གསུམ་གྱི་ལས་ཅི་བྱེད་བྱང་ཆུབ་སེམས་ཀྱིས་ཟིན་པར་བྱ། ཉམས་སྣང་ཐུན་མོང་ལ་བྱམས་སྙིང་རྗེ་བྱང་ཆུབ་ཀྱི་སེམས་གཉེན་དགྲ་ཐ་མལ་པ་ལ་བྱམས་པ་བསྒོམ། སྙིང་རྗེ་སེམས་ཅན་བདེ་བ་དང་བདེ་བའི་རྒྱུ་དང་འཕྲད་ན་དགའ་བ་ལ་སྡུག་བསྔལ་གྱི་རྒྱུ་ལ་སྤྱོད་པ་སྙིང་རེ་རྗེ། སེམས་ཅན་བདག་ཏུ་མ་གྲུབ་ཀྱང་མ་རིག་པ་སེམས་ཅན་དུ་བཏགས་ཏེ་སྡུག་བསྔལ་བར་འགྱུར་བ་སྙིང་རེ་རྗེ། སེམས་ཅན་རང་བཞིན་བདེན་པར་མ་གྲུབ་པ་ཡིན་ཀྱང་གང་ཟག་ཆོས་སུ་ཞེན་པས་སྡུག་བསྔལ་བ་སྙིང་རེ་རྗེ། བྱང་ཆུབ་སེམས་ལ་སྨོན་པ་བདག་གིས་སེམས་ཅན་ཐམས་ཅད་ཀྱི་དོན་དུ་སངས་རྒྱས་ཐོབ་ན་སྙམ་པ་སྐོམ་པ་ཆུ་འདོད་པ་ལྟ་བུ། སེམས་ཅན་བདག་གི་མ་ཡིན་པས་དེའི་འདོད་པ་ཅི་ཡོད་བདག་གིས་བསྒྲུབ། སེམས་ཅན་མདུན་དུ་དམིགས། བདག་ལ་གཅེས་འཛིན་དོར་ནས། སེམས་ཅན་གྱི་ལས་ངན་ཐམས་ཅད་བདག་ལ་སྨིན་པར་གྱུར་ཅིག །བདག་གི་བདེ་བ་དགེ་བ་སེམས་ཅན་ལ་སྨིན་པར་གྱུར་ཅིག ༑བསམ་པ་དེ་ལྟ་བུའི་རྗེས་ཐོབ་ཏུ་གཞན་གྱི་ཁུར་འཁུར་བ་ལ་སོགས་པའི་དཀའ་བའི་སྤྱོད་པ་ལ་བསླབ། བདག་གཞན་ཡུལ་རྗེ་བ་པོ། བརྗེ་བྱའི་བདེ་སྡུག་རྣམས་རང་གི་སེམས་ཀྱི་སྣང་བ་ཡིན། དེའང་མ་གྲུབ་སྟེ་སྟོང་པ་ཡིན་སྙམ་དུ་ཐག་བཅད། གནས་ཚད་འཇོག །ཐུན་མོང་མིན་པ་ལམ་ཟབ་མོ་ལ་ཞུགས་ནས་ཉམས་ཀྱི་སྣང་བ་བསམ་གྱིས་མི་ཁྱབ་པ་ཞིག་སྐྱེ་ཡང་བསྡུ་ན་བཅོ་ལྔར། ལམ་གསུམ། ཉམས་གསུམ། རྟེན་འབྲེལ་གསུམ། དྲོད་གསུམ། ཏིང་ངེ་འཛིན་གསུམ། དེ་རླུང་གི་རྟེན་འབྲེལ་གྱིས་དབང་བྱས་པ་ལས་བྱུང་བ་ཡིན་པས། དེ་རྣམས་མཐུན་པའི་རྐྱེན་ལ་དགའ་བ་བྱ་རྒྱུ་ཡང་མེད། མི་མཐུན་པའི་ཕྱོགས་ལ་མི་དགའ་བ་བྱ་རྒྱུ་ཡང་མེད་སྙམ་དུ་བསྒོམ། དག་པའི་སྣང་བ། སྐུ་མི་ཟད་པ་ནི་སྐུ་བསམ་གྱིས་མི་ཁྱབ་པ་གཙུག་ཏོར་བལྟར་མི་མངོན་པ་སོགས་དང༌། གསུང་མི་ཟད་པ་ནི་གསུང་བསམ་གྱིས་མི་ཁྱབ་པ་ཉེ་རིང་མེད་པས་ཐོས་པ། ཐུགས་མི་ཟད་པ་ནི། ཐུགས་བསམ་གྱིས་མི་ཁྱབ་པ་ཇི་སྙེད་པ་མཁྱེན་པ། དེ་ལྟ་བུ་ལ་སོགས་པ་ཡོན་ཏན་དཔག་ཏུ་མེད་པ་ལམ་ཉམས་སུ་བླངས་པས་ཐོབ་པ་ཡིན་སྙམ་དུ་བསྒོམ་མོ། །རྒྱུད་གསུམ་ལས་རྒྱུ་དབང་བསྐུར་རྗེས། ཕྱི་ནང་གི་སེམས་ལ་བརྟགས་ན་ཕྱི་རོལ་ན་འགའ་ཡང་མེད། སེམས་ཀྱང་ངོ་བོ་གསལ། རང་བཞིན་སྟོང༌། གསལ་དུས་སྟོང༌། སྟོང་དུས་གསལ། གཉིས་པོ་དབྱེར་མེད་པ་དེ་ལ་ཟུང་འཇུག་སེམས་ཀྱི་ངོ་བོ་ཞེས་བློས་ཐག་བཅད་མ་ཡེངས་པར་འཇོག་པའོ། །དེའི་ཚེ་རྟོག་པ་འཕྲོ་ན་རྒྱུན་མི་མཐུད། རྟོག་པ་གང་སྐྱེས་ཟུང་འཇུག་ངང་དུ་མཉམ་པར་བཞག་གོ །ལྷན་སྐྱེས་ཉི་ཤུ་རྩ་བདུན། དེ་ལྟ་བུའི་ཆོས་གསུམ་པོ་དེ་མ་རྟོགས་པའི་དབང་གིས་འཁོར་བར་འཁྱམས་ཏེ་སེམས་སྒྱུ་མ་རང་བཞིན་མེད་པ་ལ། གཙོ་བོའི་དཔེ་བཞི། ཡན་ལག་གི་དཔེ་བཞིས་སེམས་སུ་སྒྲུབ། གཉིད་དང་སྣང་བ་བསྲེ། རྨི་ལམ་དང་ད་ལྟ་ལ་ཁྱད་ཅི་ཞིག་ཉམས་སུ་ནི་མྱོང༌། བདེན་ནི་མི་བདེན། ཞེས་ངེས་ཤེས་བསྐྱེད། རྗེས་བསྔོ་བ། མ་རྟོགས་པ་ལ་སྙིང་རྗེ། དཔེ་དོན་རྟག་ཏུ་དྲན་པར་བྱ། སྦྱོར་དངོས་རྗེས་གསུམ་གྱི་སྒོ་ནས་དཔེ་དང་པོ་ལ་ངེས་ཤེས་སྐྱེས་སྐྱེས་བསྒོམ། ཡུན་རིང་དུ་འགོར་ཡང་གཉིས་པ་མན་ཆད་ཀྱི་དམིགས་པ་མི་སྤོའོ། །ཆོས་དགུ་འོག་མ་ལ་ཡང་སྦྱར་ཞིང༌། དཔེའི་ངོ་བོ་བསྟན་ན། རྫས། ནད། གདོན། མིག་ཡོར། རབ་རིབ། མགལ་མེ། མྱུར་འཁོར་བ། དེ་དག་ལ་བརྟེན་ནས་སྣང་བ་འདི་ཕྱྭའམ། དབང་ཕྱུག་གམ་རྡུལ་ཕྲན་ལ་སོགས་པས་བྱས་པ་མིན་གྱིས་རང་གི་སེམས་ཀྱི་རྣམ་འཕྲུལ་ལོ་ཞེས་སྤྲོས་པ་གཅོད། སྒྱུ་མར་སྒྲུབ་པ་ལ། གཙོ་བོའི་དཔེ་བཞི། སྒྱུ་མ། སྨིག་རྒྱུ། ཆུ་ཟླ། གློག །ཡན་ལག་གི་དཔེ་བཞི། འཕྲོག་པ། དྲི་ཟའི་གྲོང་ཁྱེར། སྤྲིན། འཇའ་ཚོན། དེ་དག་གིས་ནི་སེམས་རང་ལའང་བདེན་པའི་རང་བཞིན་མེད་དེ་སེམས་ཉིད་ཀྱི་འགྱུར་བ། རྒྱུ་རྐྱེན་སྣ་ཚོགས་ལ་བརྟེན་ནས་སྐྱེས་པས་སོ། །ཞེས་སྤྲོས་པ་གཅོད། རྟེན་འབྲེལ་གཙོ་བོའི་དཔེ་བཞི༑ ཁ་ཏོན། མར་མེ། མེ་ལོང༌། རྒྱ། ཡན་ལག་གི་དཔེ་བཞི། མེ་ཤེལ། ས་བོན། སྐྱུར། བྲག་ཆ། དེ་དག་ནི་སྒྱུ་མ། ཞེས་པའི་རྒྱུ་རྐྱེན་བདེན་པར་གྲུབ་པ་གཅིག་ཀྱང་མེད་ལ། རྒྱུ་འབྲས་བུར་འོངས་པ་ཡང་མེད་ཅིང༌། རྒྱུ་ལ་མ་བརྟེན་པར་འབྲས་བུ་འབྱུང་བ་ཡང་མེད་པས། འགྲོ་འོང་སྐྱེ་འགགས་མེད་པའོ། །ཞེས་པའི་དོན་ཏོ། །བརྗོད་བྲལ་ལ་རྩ་བའི་དཔེ་བཞི། གཞོན་ནུ་རྒོད། ལྐུགས་པའི་རྨི་ལམ། གནད་ལ་ཕྲུགས་པ། དབང་པོའི་བདེ་བ། ཡན་ལག་གི་དཔེ་བཞི་ནི། གསུམ་པའི་ཡེ་ཤེས། གསང་བའི་སྙོམས་འཇུག །ལོངས་སྤྱོད་རླབས། དཀྱིལ་འཁོར་འཁོར་ལོ། ཆོས་ཐམས་ཅད་རྟེན་འབྲེལ་ལས་འབྱུང་བ་ངེས་ཤེས་སྐྱེས་ཀྱང༌། འདིའོ་ཞེས་བརྗོད་མི་ཤེས་པས་བརྗོད་བྲལ་ལ་མཉམ་པར་བཞག་གོ །དེ་དག་གི་ཚུལ་གྱིས་དཔེ་སུམ་ཅུ་རྩ་གཉིས་ཀྱིས་དོན་གཏན་ལ་ཕབ་ནས། དཔེའི་གཙོ་བོ་བཞིར་བསྡུས། རེ་རེའང་ཆོས་བཞི་བཞིས་གཏན་ལ་ཕབ་ནས་སེམས་སུ་བསྒྲུབ། དཔེ་རྨི་ལམ༑ སྒྱུ་མ། ཆུ་ཟླ། རྟེན་འབྲེལ་གྱི་ས་བོན། བརྗོད་བྲལ་གྱི་གནད་ཕྲུགས། དེ་རེ་རེ་ལའང༌། སེམས། སྒྱུ་མ། རྟེན་འབྲེལ། བརྗོད་བྲལ་ལ་ངེས་ཤེས་བསྐྱེད། དེ་དང་སྣང་བ་བསྲེ་ཞིང་ཉམས་སུ་བླང༌། དཔེའི་གཙོ་བོ་གཅིག་ཏུ་བསྡུས་པ་ལའང་ངེས་ཤེས་བསྐྱེད་པ་ནི། ལོངས་སྤྱོད་ཀྱི་རླབས་ལ་བརྟེན་ནས་ལྷན་སྐྱེས་ཀྱི་ཡེ་ཤེས་བསྐྱེད་ལ་དེ་ཉིད་སེམས་སོགས་བཞིར་གཏན་ལ་ཕབ་པ་ལ་སོགས་པ་སྔར་ལྟར་ཉམས་སུ་བླང་ངོ༌། །བསྐྱེད་རིམ་ཐ་མལ་རྣམ་རྟོག་གིས་བར་མ་ཆོད་པར་དྲག་ལ་ཡུན་ཐུང་བ་བསྒོམ། མཐར་སྤྱན་དབུས་མ་གསལ་བཏབ་སྟེ་སེམས་བཟུང༌། ཅུང་ཞིག་རྩོལ་བ་ཀློད། མི་གསལ་ན་བྲིས་པའི་སྤྱན་དབུ་མ་ལ་བལྟ་ཞིང་གསལ་བཏབ། དེ་ནས་སྤྱན་གསུམ་ཀ་ལ་དམིགས་པ་གཏད་ལ་བསྒོམ། དེ་ནས་དབུ་རིལ་པོ། སྐུ་རིལ་པོ་སོགས་གདན་དཀྱིལ་འཁོར་ལྷ་གཞལ་ཡས་ཁང་སྲུང་བའི་འཁོར་ལོ་དང་བཅས་པ་སྔ་མ་བཞིན་དུ་བསྒོམ། ལམ་དུས་ཀྱི་དབང་རྒྱས་པར་བླངས་ནས། སྙིང་ཁར་ཐུགས་རྡོ་རྗེ་ལྷ་མོ་བརྒྱད། མགྲིན་པར་འོད་དཔག་མེད། འཁོར་ལྷ་མོ་བཅུ་དྲུག །སྤྱི་བོར་རྣམ་སྣང༌། འཁོར་སུམ་ཅུ་སོ་གཉིས། ལྟེ་བར་རིན་ཆེན་འབྱུང་ལྡན། འཁོར་ལྷ་མོ་དྲུག་ཅུ་རྩ་བཞི། གསང་གནས་སུ་དོན་ཡོད་གྲུབ་པ། འཁོར་ལྷ་མོ་སུམ་ཅུ་རྩ་གཉིས་ལ་སེམས་བཟུང༌། དེ་ནས་སྐྱེ་མཆེད་དྲུག །ཡུལ་དྲུག །ཚིགས་ཆེན་བཅུ་གཉིས་ལྷ་དང༌། ལུས་ཀྱི་ཆ་ཤས་རྟེན་གཞལ་ཡས་ཁང་ལ་སེམས་གཟུང༌། འོད་ཀྱི་གོང་བུའི་འདའ་ཁ་མ་བསྟན་རྗེས། གསང་དབང་གི་ལམ་ལ་འཇུག་སྟེ་སྐྱོན་ཅན་ཕྱིར་འདོན་པ་འདྲ་བས་ཐོག་མར་རྩོལ་བ་ནས་མགོ་འཛིན་ཏེ། ཡིད་སྣ་རྩེ་གཡས་པར་གཏད་ལ་རླུང་ཕྱིར་རྒྱུ་བའི་དུས་སུ་ཕྱིར་རྒྱུས། ནང་དུ་རྒྱུ་བའི་དུས་སུ་ནང་དུ་རྒྱུས། ཅུང་ཟད་གནས་པའི་ཚེ་གནས་ཞེས་དྲན་པར་བྱ། དེ་ཉིད་ལ་སེམས་རྩེ་གཅིག་ཏུ་ཟིན་ནས། རྟོག་པ་གཞན་མི་རྒྱུ་ན་འཇུག་པ་སེལ་བའི་ལམ། བོགས་དབྱུང༌། རླུང༌༑ ཕྱིར། བརྔན་དགས་བྱིན་ཏེ། ཕྱིར་འགྲོ་ཇེ་རིང་འཇུག་གནས་ཐུང་ངུ་བྱས། དེ་ལ་ཏིང་ངེ་འཛིན་སྐྱེས་པ་དང༌། སྲོག་ནས་འགོ་བཟུང༌། ནང་དུ་རྒྱུས། གནས། ཕྱིར་རྒྱུས་སྙམ་དུ་དྲན། ནང་དུ་རྒྱུ་བ་ༀ། གནས་པ་ཨཱཿ ཕྱིར་གྲོ་བ་ཧཱུྃ། དེ་བརྟན་པའི་ཡན་ལག་ཏུ་སྲོག་ལ་བརྔན་དགས་བྱིན་ཏེ། ནང་འཇུག་ཇེ་རིང་ཕྱིར་འགྲོ་ཇེ་ཐུང་བཏང༌། ཡིད་ཀྱིས་ཀྱང་ནང་དུ་རིང་དུ་རྒྱུས། ནང་དུ་གནས། ཕྱིར་ཐུང་དུ་རྒྱུས་ཞེས་དྲན་པར་བྱ། རྩོལ་བ་བཀག་སྟེ་སྲོག་ནས་བཏང་བའི་མན་ངག་ལ་མགོ་ཅུང་ཟད་བཏོད་ལ། སེམས་སྣ་རྩེའམ་སྣ་བུག་གཡོན་དུ་གཏད་ལ། སྡིགས་མཛུབ་བརྩེགས་པས་བཀག་ལ་རླུང་ནང་དུ་རྔུབ་སྟེ་གཡོན་ན་ཕར་བུས་ལ་བཏང་ངོ༌། །འདི་སྐྱོན་ཅན་ཕྱིར་བཏོན་ཡིན། ཤུགས་བསྐྱེད་དེ་གཉིས་ཀ་ནས་བཏང་བ་ལ། ཤེས་པ་མཛོད་སྤུར་གཏད། རླུང་གི་གནད་གཉིས་ཀ་ནས་ཤུགས་བསྐྱེད་དེ་དྲག་ཤུལ་དུ་བུས་ལ་བཏང་། ཕྱིར་ཐུབ་ཚད་གཅིག་བཞག །རླུང་གི་གནད། རང་གི་མདུན་ཁྲུ་གང་ཙམ་གྱི་ནམ་མཁའ་ལ་ཡིད་གཏད། དེ་ནས་འདོམ་གང་ཙམ། དེ་ནས་མདུང་གང་ཙམ། དེ་ནས་རྒྱ་ཆེ་བའི་ལུང་པ་ཙམ། དེ་ནས་ས་སྐོར་གཅིག་ཙམ་ལ། དེ་ནས་གླིང་བཞི། དེ་ནས་སྟོང་གསུམ། མཐར་འཇིག་རྟེན་གྱི་ཁམས་ཀྱི་ནམ་མཁའ་ཐམས་ཅད་ལ་ཡིད་གཏད། སྒྲ་བཅས་སུ་བཏང་བ་ནི། སོ་བསྒྲིགས་ནས་སེམས་ཀྱི་གནད་རང་གི་འདོམ་གང་ཙམ་གྱི་ཁོར་ཡུག་གི་ནམ་མཁའ་ལ་སེམས་གཏད། སིའི་སྒྲ་ལ་སེམས་གཏད། རླུང་གི་གནད་སོ་བར་ནས་སིད་སྒྲ་དང་བཅས་པས་བུས་ལ་བཏད། བོགས་དབྱུང༌། རླུང་སྤོས་ཀྱི་དུད་པ་ལྟ་བུ་བྱུང་བཤང་ལམ་ནས་འཐོན། འོག་གི་ཁྲུ་གང་ཙམ་དུ་འཁྱིལ་བ་ལ་ཤེས་པ་གཏད། སྟེང་རླུང་ཐུབ་ཚད་མནན། འོག་རླུང་ཅུང་ཟད་བསྐུམ། དེའི་ཚེའང་ཕྱིས་བུས་པ་ཕྱིར་འཕེལ་དུ་མི་གཞུག་གོ །དགང་བའི་མན་ངག་རྩོལ་བ་བཀག་སྟེ་སྲོག་ནས་དགང་བ་ཡིན། ལྟེ་བར་སྒོ་ངའི་སྐོགས་པ་འདྲ་བ་ཕྱི་དཀར་ལ་ནང་སེར་བ་གཅིག་གི་ནང་ན་མར་ལ་རླུང་སིབ་སིབ་འགྲོ་བ་བསམ། རླུང་གི་རྟ་མཆིལ་མ་སྒྲ་མེད་པར་མིད། རླུང་ཐུབ་ཚད་དུ་མནན། རྣལ་འབྱོར་དབང་ཕྱུག་གི་ཉམས་ཀྱང་འདི་ལས་སྐྱེས་པ་ཡིན་གསུང༌། ལྟེ་བར་ཆོས་འབྱུང་གྲུ་གསུམ་སྔོན་པོའི་ནང་ན་མར་རླུང་ཐམས་ཅད་སིབ་སིབ་འགྲོ་བར་བསམ་ཞིང་ཁ་ཕྱེ་ལ། རླུང་ཁ་ནས་སྒྲ་མེད་དུ་དལ་བུར་རིང་བར་རྔུབ་ཅིང༌། རྫོགས་པ་དང་མཆིལ་མ་སྒྲ་མེད་དུ་མིད་ལ༑ མགོ་གསིག །དེ་གཉིས་ཀྱི་ཐུན་མོང་དུ་གཉིས་ཀའི་དམིགས་པ་སྔ་མའི་མཇུག་ཐོག་ཏུ་བསྒོམ་བྱའི་ལྟེ་བར་མེ་སོར་གཉིས་བཞི་དམིགས། ལྟེ་བར་ཆོས་འབྱུང་ས་གཞི་ལྟར་རྒྱ་བསྐྱེད་དེ། རླུང་མནན་པས་ཆོས་འབྱུང་དེ་རྒྱ་ཇེ་ཆེ་ལ་སོང༌། མཐར་ས་གཞི་ཐམས་ཅད་ཁྱབ། དེའི་ནང་སྟོང་པར་སོང་བའི་ནང་དུ་རླུང་འཇུག་པ་དང་ཡང་རྒྱ་མཚོ་ལྟར་གཏིང་ཟབ་པར་བསྒོམ། ཁ་སྦྱར་ལྟེ་བར་གཏུམ་མོའི་མེ་ཨ་ཤད་ཀྱི་རྣམ་པ་ལྟ་བུ། ཕྲ་ཞིང་ཚ་ལ་རྣོ་ངར་དང་ལྡན་པར་བསམ། དེ་ནས་དང་པོར་འོག་རླུང་ཅུང་ཟད་བསྐུམ། དེ་ནས་སྟེང་རླུང་སྒྲ་མེད་པར་མགོ་ས་ལ་ཐུག་པ་ཙམ་གྱི་རྩོལ་བས་རིམ་གྱིས་དྲངས་ལ་རླུང་ཐམས་ཅད་ལྟེ་བའི་མེ་ལ་ཐིམ་པར་བསྒོམས་པའི་སྟེང་རླུང་རྫོགས་པ་དང༌། མཆིལ་མ་གཅིག་མིད་ལ། འོག་རླུང་དྲག་ཏུ་འཐེན་ནས་རླུང་ལྟེ་བའི་གནས་སུ་ཁ་སྦྱར་ལ་ཕོ་བ་སྒལ་ཚིགས་ལ་གཅེར། གསུས་པོ་ཆེ་ཕྱིར་ཅུང་ཟད་དགུག །ཨོལ་མདུད་ནོན་ཙམ་བྱས་ལ་རླུང་ཐུབ་ཚད་བཟུང༌། གཏུམ་མོའི་མན་ངག་མར་མེ་གསོ་བ། ཚངས་པའི་ཐོག །རྩ་བའི་རྣལ་འབྱོར། སྲུབ་ཤིང་གི་འཁོར་ལོ། སྙིང་ཁའི་ཉི་ཟླ་ཁ་སྦྱོར། ལྟེ་བའི་དཔའ་བོ་འབའ་ཞིག །གསང་གནས་བདེ་བའི་ཐིག་ལེ་མཛོད་སྤུ་སྐྲ་དཀར་གྱི་ས་བོན། འཁོར་ལོ་གཅིག་ལ་བརྟེན་ན་རྣོ་བ། འཁོར་ལོ་གཉིས་ལ་མྱུར་བ། འཁོར་ལོ་བཞི་ལ་བརྟེན་ན་བརྟན་པ། མན་ངག་གི་གནད་ལ་བརྟེན་པ་བདུན། མེ་དམར་སྐྱ། མེ་འབར་བ། ཐིག་ལེའི་འཐབ་མོ༑ འཁོར་ལོའི་དམིགས་པ། མེ་དྲག་ཏུ་འབར་བ། ཐམས་ཅད་མེ་འབར་བ། ཤེས་རབ་ཡེ་ཤེས་ཀྱི་ལམ་ལ་སྦྱོར་བ་འདུ་ཤེས་གསུམ་གྱིས་བྱིན་གྱིས་བརླབས་པ། དངོས་གཞི་དབབ་གཟུང་ངོས་བཟུང་བ། རྗེས་བཟློག་ཁྱབ་ཀྱིས་མི་ཉམས་པར་བསྲུང་བའོ། །དབང་བཞིའི་ལམ་ལ་ལུས་ཀྱི་རྦ་རླབས། ལུས་སྐྱིལ་ཀྲུང༌། ལག་པས་པུས་མོ་ལ་བཀབ། རྐེད་པ་དྲང་པོར་བསྲང༌། ལྟོ་བ་ཚིགས་པ་ལ་སྦྱར། རླུང་འབུད་གསུམ་རྔུབ་གསུམ་གྱི་ཚུལ་གྱིས་སྟེང་རླུང་བཅུག །འཚང་ར་གཡས་གཡོན་འོག་ཏུ་གནོན་པ་རེ་མོས་ཀྱིས་དལ་གྱིས་བསྐུམ་སྟེ་དྲག་ཏུ་འཐེན། དྲག་ཤུལ་དུ་བསྐུམ་ན་ཤུགས་ཆད་ནས་འགྲོ། གཏོང་ཙ་ན་འོག་རླུང་སྔོན་ལ་བཏང༌། ངག་འདྲེན་ཞི་དྲག་གི་རྦ་རླབས། ལུས་སྐྱིལ་ཀྲུང༌། ལག་པ་རྡོ་རྗེ་ཁུ་ཚུར་སྙིང་ཁར་བསྣོལ། མདུན་དུ་ས་ལ་མ་རེག་ཙམ་བཏུད་ལ། ཨིའི་གདངས་ཀྱིས་ཁ་ནས་སྒྲ་མེད་པར་རླུང་སོ་བར་ནས་བཞུར་ཏེ། ནང་རླུང་གྱེན་དུ་འདྲེན་པ་དང་དུས་གཅིག་ཏུ་ཁ་ནས་དལ་བུས་འདྲོངས་ཚད་དུ་དྲངས། དེ་དང་བསྟུན་ནས་རྒྱུ་ཞབས་དང་འོག་རླུང་ཡང་རིམ་གྱིས་དྲག་ཏུ་བསྐུམ། མཐར་མགོ་སྒྱེད་བྱས་ལ་མིག་སྟེང་དུ་བགྲད། རླུང་ཐུབ་ཚད་དུ་མནན། དེ་ལྟ་བུ་མདུན་དུ་གསུམ། གཡས་སུ་གསུམ། གཡོན་དུ་གསུམ་ཉམས་སུ་བླང༌། གོམས་ནས་གླིང་བུ་ལྟ་བུའི་སྒྲ་འབྱུང་ངོ༌། །ངག་འདྲེན་དྲག་པོ་ནི། ལུས་ངག་གི་གནད་སྔར་དང་འདྲ། ཧཱུཾ་སྒྲ་སྐད་ངར་ཇེ་ཆེ་ཇེ་ཆེར་བཏང༌། མཐར་ཕྱིན་པ་ན་རྒྱངས་རིང་པོ་ནས་ཐོས་པའི་རག་དུང་གི་སྐད་ལྟ་བུ་འབྱུང་ངོ༌། །སེམས་ཀྱི་རྦ་རླབས་ནི། ཡེ་ཤེས་ཀྱི་ཕྱག་རྒྱ་ལ་བརྟེན་ནས་འདུ་ཤེས་གསུམ་གྱིས་སྐད་ཅིག་གིས་སྙོམས་པར་ཞུགས། ཡབ་ཡུམ་གཉིས་ཀའི་ཁམས་དྭངས་མ་དབུ་མའི་སྣ་རྩེར་བྱོན། འོད་ཟེར་གྱི་རྣམ་པར་གྱུར། གཡས་རོ་མ་ནས་སོང༌། ལྟེ་བར་བྱོན། ལྟེ་བའི་འཁོར་ལོ་ནམ་ལངས་པ་བཞིན་ཡལ་ཡལ། ཉི་མ་ཤར་བ་བཞིན་གསལ་གསལ། གློ་བ་བུས་པ་བཞིན་ཏང་ཏང༌། ཡང་རོ་མ་ནས་སོང༌། མགྲིན་པར་བྱོན། ཆོས་གསུམ་ལྡན་དྲན། ཡང་རོ་མ་ནས་སོང༌། རྣ་བ་གཡས་ནས་འོད་ཟེར་གྱི་རྣམ་པར་འཕྲོས། འོད་ཟེར་གྱི་སྒོ་ལས་ལྷག་པའི་ལྷའི་དཀྱིལ་འཁོར་འཕྲོས། སེམས་ཅན་གྱི་རྒྱུད་ལ་དབང་བཞི་བསྐུར། སྣོད་གཞལ་ཡས་ཁང་བཅུད་ཀྱི་སེམས་ཅན་རྣམས་ལྷག་པའི་ལྷར་བྱས། སྣོད་བཅུད་ཐམས་ཅད་འོད་ཟེར་གྱི་རྣམ་པར་གྱུར། ཕར་འཕྲོས་པའི་འོད་ཟེར་དང་འདྲེས་བདུད་རྩིའི་བཅུད་དུ་གྱུར༑ ཚངས་པའི་སྒོར་ཞུགས། སྤྱི་བོར་ཆོས་གསུམ་ལྡན་དུ་དྲན། མགྲིན་པར་བྱོན་ཉི་མ་སྟོང་གི་གཟི་བརྗིད་དང་ལྡན། སྙིང་ཁར་བྱོན། བདག་གི་རྒྱུད་སྐུ་ལྔར་བསྒྱུར་བའི་རྟགས་སུ་འོད་ཁ་དོག་ལྔར་གྱུར། རྩ་དག་པའི་ལམ་ལྟེ་བ་ནས་བྱུང༌། ཡུམ་གྱི་མཁར་སྔ་མ་བཞིན་གནས་པར་བསམ་མོ། །དེས་གཟུང་རྟོག་ནུབ། རོ་མ་དབང་དུ་འདུས། རྩོལ་བའི་རླུང་ལ་དབང་ཐོབ་བོ། །རྣམ་པར་ཐར་པའི་སྒོ་མཚན་མ་མེད་པ་མངོན་དུ་བྱས་སྙམ་པ་མོས་པ་ཙམ་བྱའོ། །དེ་བཞིན་དུ་གཡོན་དུའང་བྱ་སྟེ། འཛིན་རྟོག་ནུབ། རྐྱང་མ་དབང་དུ་འདུས། སྲོག་རླུང་ལ་དབང་ཐོབ། རྣམ་པར་ཐར་པའི་སྒོ་སྨོན་པ་མེད་པ་མངོན་དུ་བྱས་པར་བསམ། དེ་བཞིན་དུ་དབུ་མར་ཡང་བྱས་ཏེ་གཟུང་འཛིན་གཉིས་ཀའི་རྟོག་པ་ཕྲ་མོ་ནུབ། དབུ་མ་སྦྱངས༌། རླུང་གནས་པ་ལ་དབང་ཐོབ། རྣམ་པར་ཐར་པའི་སྒོ་སྟོང་པ་ཉིད་མངོན་དུ་བྱས་པར་བསམ་མོ། །གཉིས་པ་ཤེས་རབ་ཀྱི་རྒྱུད་དག་པར་བྱ་བ་ནི། ཡུམ་གྱི་རྩ་གསུམ་སྦྱོང་བའི་དམིགས་པ་སྔར་བཞིན་བྱ་སྟེ། རྩ་གཡས་གཡོན་གཉིས་ནས་རྣ་བ་གཡས་གཡོན་གཉིས་ཀྱི་སྒོར་བྱོན་པ་ཙམ་ལས་ཕྱིར་སྤྲོ་བ་ནི་མེད་ལ། ཚངས་པའི་སྒོ་ལས་སྤྲོ་བ་དང་བསྡུ་བ་བྱས་ཀྱང་རུང༌། མ་བྱས་ཀྱང་རུང་སྟེ་འདྲ་བར་བཞེད་དོ། །གསུམ་པ་རྒྱུད་སོ་སོར་དག་པར་བྱ་བ་ནི། ཡབ་ཀྱི་དབུ་མ་ནས་ཁམས་དྭངས་མ་འོད་ཟེར་གྱི་རྣམ་པར་སོང་ནས་གཙུག་ཏོར་མཆོག་ཏུ་ཐིམ། ཡུམ་གྱིའང་དེ་བཞིན་དུ་ཐིམ་སྟེ། གཉིས་ཀའང་སྐུ་ལྔ་ལྷུན་གྱིས་གྲུབ་པ་དྲན་པ་ཙམ་བྱ་སྟེ། འདི་དག་རླུང་ལྡང་འཇུག་དང་བསྟུན་མི་དགོས་ལ། ཐུན་བཞིའི་ངེས་པའང་མི་དགོས་པར་བཞེད་དོ། །དེའི་ཚེ་ཉམས་གར་སྐྱེ་ངེས་པ་མེད་ལ་ཅི་སྐྱེས་བྱུང་རྒྱལ་དུ་བསྐྱངས་པས་ལྟ་བ་ཆོས་ཐམས་ཅད་ཤིན་ཏུ་རྣམ་པར་དག་པའི་དེ་ཁོ་ན་ཉིད་མས་བརྟན་གྱི་དགའ་བ་བཞིའི་ཉམས་མྱོང་རྒྱུད་ལ་སྐྱེས་ཏེ། འདི་ཁམས་འདུས་པ་ཐ་མ་སྐྱོན་མེད་གཉུག་མ་ཡེ་ཤེས་ཀྱི་ལམ་དུ་ཁྲིད་པ་ཡིན་ནོ། །ཁྲིད་ཚུལ་ཀུན༵་ལས་དག༵འ་བའི་ཏོག །སྨིན་གྲོལ༵་མཆོ༵ག་གི་རྒྱལ་མཚན་ནི། །ཉམས་ལེན་ཐུན་བཞིའི་ལྷབ་ལྷུབ་ཅན། །གསུང་ངག་དམིགས་ཐོ་ཡི་གེར་བྲིས། །ཆོས་རྗེ་དཔལ་ལྡན་བླ་མ་དམ་པའི་ཁྲིད་ཡིག་སྦས་དོན་གསལ་བ་ལས་བཏུས་སོ། (༤༣) །བསམ་མི་ཁྱབ་ཀྱི་ཁྲིད་ཡིག །ལམ་སྐོར་ཕྱི་མ་བསམ་མི་ཁྱབ་ཀྱི་ཁྲིད་ནི། སྐྱབས་སེམས་སྔོན་དུ་སོང་ནས། ལུས་ངག་སེམས་གནད་ལ་དབབ། བླ་མ་བསྒོམ། ལྷའི་ང་རྒྱལ་བསྐྱེད། ཕྱི་རོལ་དུ་དཔེའི་ཚུལ་དུ་ནམ་མཁའ་ལ་བསླབ་སྟེ། སྣ་རྩེ་ནས་སོར་བཞི་ཚུན་ཆད་ཀྱི་ནམ་མཁའ་ལ་རང་གི་ཤེས་པ་དམིགས། ལུས་སེམས་གཉིས་ཀ་བསྒྲིམ་ལ་བསྒོམ། ཡང་སོར་བརྒྱད་ཚུན་གྱི་ནམ་མཁའ་ལ་ཡང་ཚུལ་དེ་ཉིད་ལ་བསླབ། ཡང་སོར་བཅུ་དྲུག་ནས་འདོམ་གང་ཚུན་ཆད་ཀྱི་ནམ་མཁར་ཡང་ཚུལ་དེ་ཉིད་ཀྱིས་བསླབ། སེམས་གནས་པའི་ཉམས་ཅི་བྱུང་དེ་བཞིན་དུ་བསྐྱང༌། ཕལ་ཆེར་རང་བཞིན་སྟོང་ཉམས་སུ་སྐྱེའོ། །བོགས་དབྱུང༌། ཤར་ཕྱོགས་སུ་འདོམ་དོ་ལ་སོགས་པ་ནས་བཟུང་སྟེ་ཇི་སྲིད་ནམ་མཁའི་མཐར་ཐུག་གི་བར་དུ་རྟོག་ཏུ་བཏང་བས་མཐའ་བྲལ་གྱི་ཉམས། ཤུགས་ཆད་ཀྱི་ཉམས། གཟི་ཆགས་ཀྱི་ཉམས་གསུམ་གང་སྐྱེས་ཀྱང་དེ་བཞིན་དུ་བསྐྱང་ངོ༌། །དེ་བཞིན་དུ་ལྷོ་ལ་སོགས་པའི་ཕྱོགས་ཐམས་ཅད་དུ་བསླབ་བོ། །དེ་ལྟར་བསླབ་པས། སྒོང་རྒྱ་བཅག་པའི་ཚུལ་དུ་མིང་སྐྱེ་མེད་བསམ་མི་ཁྱབ་ལ་སྦྱར་བ། བ་རྒྱ་བྲལ་བའི་ཚུལ་དུ་དོན་སྐྱེ་མེད་བསམ་མི་ཁྱབ་ལ་སྦྱར་བ། ཁ་ཆུ་བསལ་བའི་ཚུལ་དུ་ཏིང་ངེ་འཛིན་ཉིད་ཀྱང་སྐྱེ་མེད་བསམ་མི་ཁྱབ་ལ་སྦྱར་བ་ནི། རྣལ་འབྱོར་པ་རང་ཉིད་ཀྱིས་མིང་དུ་འཛིན་པའི་རྟོག་པ་སེམས་ལ་ཐིམ་ཞིང་གསལ་བ་མི་འགག་པའི་ཉམས་སྐྱེ། དོན་སྐྱེ་མེད་བསམ་མི་ཁྱབ་ནི་རང་རིག་ཐོག་མའི་རྒྱུ་དང༌། ད་ལྟ་གནས་པའི་ངོ་བོ་དང༌། མཐར་འགག་པ་གསུམ་ནམ་མཁའ་ལྟ་བུར་སྐྱེ་མེད་དུ་བསྒོམ། ཏིང་ངེ་འཛིན་སྐྱེ་མེད་བསམ་མི་ཁྱབ་ནང་དུ་འཛིན་མེད་དུ་བཞག་པ་དང༌། ཕྱི་རོལ་དུ་ལྷུག་པར་བཞག །ལུས་སེམས་ཡང་བར་བྱ། དེ་ནས་ཤེས་པ་ཁ་ནང་དུ་ལྟ་བ་ཙམ་དྲན་པར་བྱ། གལ་ཏེ་འཕྲོ་ན་དབང་པོའི་སྒོ་ལྷུག་པར་བཞག་པས་ཞེན་པ་དང་བྲལ་ནས་བདེ་སྟོང་མཆོག་སྐྱེ་བར་འགྱུར་རོ། །བརྟན་པའི་ཡན་ལག་ཏུ་མདུན་དུ་མེ་ཏོག་ཉེ་རིང་རན་པར་བཞག །རྟེན་མི་འགྱུར། ལུས་མི་གཡོ། མིག་མི་འཛུམ། ཡིད་འཛིན་མེད་དེ་ཡན་ལག་བཞི་ལྡན་དུ་བྱས་ནས་བསླབ། གཟུགས་ངོས་གཟུང༌། དེ་བཞིན་དུ་སྒྲ་ལ་སོགས་པ་ཡང་བསླབ། སྒོམ་ཐོག་མར། ཡུལ་རྐྱེན་གྱིས་རེས་གནོད་རེས་ཕན། སྣང་བ་ཕྲ་མོར་འཆར་བའི་དུས་ཕན་གནོད་མེད། ཡུལ་རྐྱེན་འཕྲད་མ་ཐག་ཏུ་ནང་དུ་རྟོགས་པ་མཆོག་ཏུ་འགྱུར་རོ། །དེ་ནི་སྣང་བ་དགེ་བའི་བཤེས་གཉེན་དུ་འཆར་བའི་དུས། ཕྱི་ནང་གཉིས་འདྲེ་བའི་དུས། དུག་ལྔ་སྨན་དུ་ཤེས་པའི་དུས་སོ། །དེ་ནས་བསམ་གཏན་གྱི་གེགས་བྱིང་བ་དང་རྒོད་པ་བསལ་ཏེ། ཆེད་དུ་བྱ་བའི་བྱིང་རྒོད། རྐྱེན་གྱིས་འབྱུང་བའི་བྱིང་རྒོད༑ རང་ཤུགས་ཀྱིས་བྱུང་བའི་བྱིང་རྒོད་བསལ་བ། སྤྱོད་ལམ་གྱིས་བསལ་བ། ཁ་ཟས་ཀྱིས་བསལ་བ། སེམས་ཀྱི་མཐུས་བསལ་བ། ལོག་གནོན་རྣམ་པ་ལྔ་འཁོར་ལོ་ལྟར་བསྐོར་བ། གྲུ་གུ་ལྟར་འདྲིལ་བ། བུ་ག་མང་པོའི་སྦྱོར་བ། སྟེང་འོག་གི་འཁོར་ལོ་མེད་པ་ལ་བསླབ་པ། རབ་ཏུ་དམའ་བའི་སྦྱོར་བ་ལ་བསླབ་པའོ། །བསམ་མི་ཁྱབ་ལྔའི་ལམ་ཁྲིད་ཀུན༵། །རང་སེམས་དག༵འ་བའི་དཔལ་དུ་དྲངས། །སྨིན་གྲོལ༵་མཆོ༵ག་གི་རྫོགས་པའི་རིམ། །གོང་ན་མེད་པའི་ཡི་གེར་བཀོད། །རྗེ་བཙུན་གྲགས་པའི་ཁྲིད་དཔེ་ལས་བཏུས་སོ། (༤༤) །ཟབ་པའི་ཚུལ་དགུའི་ཁྲིད་ཡིག །ལམ་སྐོར་ཕྱི་མ་པདྨ་བཛྲ་གྱི་ཁྲིད་ནི། སྐྱབས་སེམས་སྔོན་དུ་སོང་ནས། སེམས་གཟུང་མན་ངག་དགུ་སྟེ་སེམས་འཇོག་པ་དང༌། ཀུན་ཏུའམ་རྒྱུན་དུ་འཇོག་པ། ངེས་པར་འཇོག་པའམ་བསླན་ཏེ་འཇོག་པ་དང༌། ཉེ་བར་འཇོག་པ་དང༌། དུལ་བར་བྱེད་པ་དང༌། ཞི་བར་བྱེད་པ་དང༌། ཉེ་བར་ཞི་བར་བྱེད་པ་དང༌། རྒྱུན་དུ་བྱེད་པའམ་རྩེ་གཅིག་ཏུ་བྱེད་པ་དང༌། ཤིན་ཏུ་མཉམ་པར་འཇོག་པ་ཞེས་བྱ་བ་ཡིན་ནོ། །ལྡང་བའི་རྣལ་འབྱོར་ནས་བཟུང་སྟེ། རིགས་ཀྱི་བདག་པོས་རྒྱས་བཏབ་པའི་བར་དུ་ཤིན་ཏུ་རྩོལ་བས་བསྒྲིམ་ཏེ་བསྒོམ། དེ་ནས་ཐོག་མར་སྤྱན་དབུས་མ་ལ་སེམས་བཟུང་སྟེ། དེའང་གསལ་ན་གསལ་ཏེ་འཕྲོ་བཅད། མི་གསལ་ན་མི་གསལ་ཏེ་འཕྲོ་བཅད། བསམ་གཏན་གྱི་དུག་དབྱུང༌། འཕྲོ་བཅད་ནས་ཀྱང་ཝལ་ཝལ་བྱུང་ན་དུག་ཡིན་པས་བུམ་པའམ་སྣམ་བུ་ལ་སོགས་པ་དངོས་པོ་གཞན་ལ་སེམས་ཡེངས་སུ་གཞུག །ཡང་བསྒོམ་སྟེ་གསལ་ན་གསལ་ཏེ་འཕྲོ་བཅད། མི་གསལ་ན་མི་གསལ་ཏེ་ཡེངས་སུ་བཅུག །བསྒོམ་པས་གསལ་གདབ་པའོ། །དེ་ལྟ་བུའི་ཚུལ་གྱིས་བསམ་གཏན་གྱི་དུག་དབྱུང་ཞིང་ཡང་དང་ཡང་དུ་གོམས་པར་བྱས་ཀྱང་དམིགས་པ་གསལ་པོར་མ་བྱུང་ན་བརྗོད་པས་གསལ་བཏབ་ཅེས་བྱ་བ་བསྒོམ། དེ་ལ་ཡང་གཉིས་ལས་རང་གི་བརྗོད་པས་གསལ་གདབ་པ་ནི། སྤྱན་དབུ་མ་སྤྱན་རྩ་དམར་ཞིང་ཁྲོ་བ་ཞེས་བརྗོད་ལ། སྔ་མ་བཞིན་དུ་བསམ་གཏན་གྱི་དུག་དབྱུང་ཞིང་བསྒོམ། དེས་ཀྱང་གསལ་པོ་མ་བྱུང་ན་གཞན་དག་གཅིག་སྤྱན་དབུས་མ་ཞེས་བརྗོད་དུ་བཅུག་ལ་བསམ་གཏན་གྱི་དུག་དབྱུང་ཞིང་བསྒོམ། དེས་ཀྱང་མི་གསལ་ན་བལྟས་པས་གསལ་གདབ་པ་ཞེས་བྱ་བ། སྤྱན་དབུས་མ་ཤིན་ཏུ་མཛེས་པ་གཅིག་བྲིས་ལ། དེ་ལ་བལྟས་ཤིང༌། བསམ་གཏན་གྱི་དུག་དབྱུང་ཞིང་བསྒོམ། དེ་དག་གིས་ནི་རྒྱུན་དུ་འཇོག་པའི་གདམས་ངག་ཡིན་ནོ། །ངེས་པར་འཇོག་པའམ་བསླན་ཏེ་འཇོག་པ་ནི། ཤེས་པ་ཕྱིར་འཕྲོ་ན་ངའི་ཤེས་པ་རྒོད་པར་སོང་སྙམ་ནས་ཤེས་པ་ལ་དྲན་པ་མྱུར་དུ་བསླན་ཏེ། རིངས་པར་དམིགས་པ་ལ་བློས་འཇོག་པའོ། །ཉེ་བར་འཇོག་པ་ནི། དམིགས་པ་གཅིག་གིས་སེམས་སྐྱོ་ན། དབུའི་གཙུག་ཏོར་རམ། སྣ་ཚོགས་རྡོ་རྗེའམ། ཞལ་གྱི་མཆེ་བ་ལྟ་བུ་ལ་ཐུན་རེ་རེ་ཙམ་སེམས་གཏད་དེ་བསྒོམ་པ་ནི་དབུགས་ཕྱུང་ལ་བསྒོམ་པའོ༑ ༑དུལ་བར་བྱེད་པ་ནི། ཏིང་ངེ་འཛིན་ལ་ཡོན་ཏན་དཔག་ཏུ་མེད་པ་ཡོད་པར་ཤེས་པར་བྱས་ལ་སྤྱོད་ལམ་གྱི་དུས་སུ་ཡང་དམིགས་པ་གསལ་བ་མེད་ཀྱང་ལྷའི་རྣམ་པ་རྟག་ཏུ་དྲན་པས་སེམས་དུལ་བར་བྱའོ། །ཞི་བར་བྱེད་པ་ནི། རྣམ་པར་རྟོག་པ་འཕྲོ་བ་ན་ཡིད་མི་དགའ་བར་གྱུར་པའི་ཚེ་དམིགས་པའི་སྟེང་དུ་སེམས་གློད་དེ་ཞི་བར་བྱའོ། །ཉེ་བར་ཞི་བར་བྱེད་པ་ནི། བརྣབ་སེམས་ལ་སོགས་པ་མི་དགེ་བའི་སེམས་སྐྱེས་པའི་ཚེ་དམིགས་པ་ལ་བརྟེན་ནས་ཞི་བར་བྱེད་པའོ། །རྩེ་གཅིག་ཏུ་བྱེད་པ་ནི། སེམས་ཕྱིར་མི་འཕྲོ་བར་གནས་ན་དེ་ཉིད་ཀྱི་སྟེང་དུ་རྩེ་གཅིག་ཏུ་འཇོག་པར་བྱེད་པའོ། །ཤིན་ཏུ་མཉམ་པར་འཇོག་པ་ནི། དམིགས་པ་དེ་དག་ལ་བརྟེན་ནས་ཆེད་དུ་མ་བསྒྲུབས་པར་ཏིང་ངེ་འཛིན་འབྱུང་བ་ཡིན་ནོ། །དེ་ལྟར་བསྐྱེད་པའི་རིམ་པའི་སྐུའི་ཕྱོགས་གཅིག་ལ་སེམས་འཛིན་པའི་གདམས་ངག་དེས། སྐུའི་ཕྱོགས་གཅིག་ལ་སེམས་བརྟན་པར་ཟིན་ན་སྐུའི་ཕྱོགས་གཞན་ལ་དམིགས་པ་སྤོ་བར་བྱ་སྟེ། ཐུན་དང་པོ་ལ་སྤྱན་དབུས་མ་བསྒོམ། གཉིས་པ་ལ་སྤྱན་གསུམ་གསལ་གདབ། གསུམ་པ་ལ་ཁྲོ་གཉེར། བཞི་པ་ལ་ཤངས། ཉི་མ་གཉིས་པ་དང་གསུམ་པ་ལ་ཡང་སྤྱན་གསུམ་གསལ་བའི་ཚུལ་གྱིས་བསྒོམ་སྟེ། མདོར་ན་སྤྱན་གསུམ་པོ་གསལ་བར་འདོད་ན་གསལ་ལ། མེད་པར་འདོད་ན་མེད་པའི་བར་དུ་དམིགས་པ་བརྟན་པར་བྱ། ཉི་མ་གཉིས་པའི་ཐུན་དང་པོ་ལ་ཞལ་གྱི་མཆེ་བ་གསལ་གདབ། གཉིས་པ་ལ་སྙན། གསུམ་པ་ལ་ཞལ། བཞི་པ་ལ་གཡས་དཀར་བ། ཉི་མ་གསུམ་པའི་ཐུན་དང་པོ་ལ་རྩ་ཞལ་དང་གཡས་དཀར་བ། གཉིས་པ་ལ་གཡོན་དམར་བ། གསུམ་པ་ལ་གཡས་པའི་ཞལ་གཉིས་གནག་པ། བཞི་པ་ལ་གཡོན་ཞལ་གཉིས་གནག་པ་དང༌། སྟེང་གི་ཞལ་གསལ་གདབ། ཉི་མ་བཞི་པའི་ཐུན་དང་པོ་ལ་ཞལ་བརྒྱད། ཐུན་གཉིས་པ་ལ་དབུའི་གཙུག་ཏོར་དབུ་སྐྲ་དམར་སེར་སྣ་ཚོགས་རྡོ་རྗེ་དང་བཅས་པ། ཐུན་གསུམ་པ་ལ་རུས་པའི་འཁོར་ལོ་རྣ་རྒྱན་ལ་སོགས་པ་དབུའི་རྒྱན་རྣམས། ཐུན་བཞི་པ་ལ་སྐུ་བྱིངས་པོ་མགུལ་རྒྱན་ལ་སོགས་པ་དང་བཅས་པ་གསལ་གདབ། ཉི་མ་ལྔའི་ཐུན་དང་པོ་ལ་དབུ་དང་སྐུ་བྱིངས་པོ་གསལ་གདབ། གཉིས་པ་ལ་ཕྱག་གཡས་པ་བརྒྱད་ཕྱག་མཚན་དང་བཅས་པ། གསུམ་པ་ལ་གཡོན་པའི་ཕྱག་བརྒྱད་ཕྱག་མཚན་དང་བཅས་པ། མི་མགོ་ལ་སོགས་པ་སྐུའི་རྒྱན་མེ་རི་དང་བཅས་པ་གསལ་གདབ། བཞི་པ་བདུད་བཞི་མནན་པའི་ཞབས་གསལ་གདབ། ཉི་མ་དྲུག་པའི་ཐུན་དང་པོ་ལ་གཙོ་བོ་དང་གཽ་རཱི། གཉིས་པ་ལ་ཙཽ་རཱི། གསུམ་པ་ལ་བེ་ཏཱ་ལཱི། བཞི་པ་ལ་གྷསྨ་རཱི། ཉི་མ་བདུན་པའི་དང་པོ་ལ། གཙོ་འཁོར་ལྔའི་སྟེང་དུ་པུཀྐ་སཱི། གཉིས་པ་ལ་ཤ་ཝ་རཱི། གསུམ་པ་ལ་ཙཎྜ་ལཱི། བཞི་པ་ལ་གཡུང་མོ། ཉི་མ་བརྒྱད་པའི་ཐུན་དང་པོ་ལ། ལྷ་དགུ་གཞལ་ཡས་ཁང་དང་བཅས་པ། གཉིས་པ་ལ་དུར་ཁྲོད། གསུམ་པ་ལ་སྲུང་འཁོར། བཞི་པ་ལ་ཁམས་གསུམ་སྣོད་བཅུད། དཀྱིལ་འཁོར་གྱི་འཁོར་ལོ་ལ་སོགས་པ་གསལ་གདབ་བོ། །བསྐྱེད་པའི་རིམ་པའི་དམིགས་པའོ། །རྫོགས་པའི་རིམ་པ། མར་མེའི་རྩེ་མོ་ལྟ་བུ་ལ་ཡང་སེམས་གཟུང་ངོ༌། །དེའང་ཁམས་གསུམ་ནས་དཀྱིལ་འཁོར་གྱི་འཁོར་ལོའི་བར་རིམ་པ་བཞིན་དུ་བསྡུས་ལ། འོད་ཕུང་ཐིག་ལེ་བསྒོམ། དེ་གསལ་ན་མར་མེའི་རྩེ་མོ་ལ། དེ་གསལ་ན་རྟ་རྔ་ཙམ། རྟ་རྔ་བརྒྱར་གཤགས་པའི་ཚད་ལ། མཐར་མེ་ལོང་ལ་དབུགས་ཀྱི་དྲོད་ཡལ་བའི་ཚུལ་གྱིས་སྟོང་པ་ཉིད་ལ་བློ་བཞག་གོ །དེ་ལྟར་གསལ་གདབ་པ་ནས་བཟུང་སྟེ། སྟོང་པར་བསྒོམ་པའི་ཐུན་ནི་མ་འཇོག་པར་འདོད་པའི་དུས་སུ་ཁམས་གསུམ་བསྡུ་བ་ནས་བཟུང་སྟེ་སྟོང་པའི་བར་དུ་བསྡུས་ལ། ལྡང་བར་འདོད་ན་སྟོང་པའི་ངང་ལས་གཙོ་བོའི་ང་རྒྱལ་གྱིས་ལངས་ལ། དག་པ་རྗེས་སུ་དྲན་པ་དང༌། རྡོ་རྗེའི་གླུ་དང་སྨོན་ལམ་རྣམ་པར་དག་པ་བཏབ་ལ། སྤྱོད་ལམ་གྱི་རྣལ་འབྱོར་གྱིས་གནས་པར་བྱའོ། །མཚོ་སྐྱེས་རྡོ་རྗེའི་དགོངས་པ་ཀུན༵༑ ༑ཟབ་ཚུལ་དགུར་བཀྲལ་དག༵འ་སྤྲོའི་ཆོས། །གྲོལ༵་ལམ་མར་མེའི་རྩེ་མོ་མཆོ༵ག །གསལ་འདོམས་ཡི་གེར་བྲིས་པའོ། །རྗེ་བཙུན་གྲགས་པས་མཛད་པའི་ཁྲིད་དཔེ་ལས་བཏུས་སོ། (༤༥) །ལྷན་ཅིག་སྐྱེས་གྲུབ་ཀྱི་ཁྲིད་ཡིག །ལམ་སྐོར་ཕྱི་མ་ཌོམ་བྷི་པའི་ལྷན་ཅིག་སྐྱེས་གྲུབ་ཀྱི་ཁྲིད་ནི། སྐྱབས་སེམས་སྔོན་དུ་སོང་ནས། གང་ཟག་ལམ་སྒྲུབ་ཚུལ་གཉིས་ཏེ། དཀའ་ཐུབ་ཀྱི་ལམ། བུ་ཆུང་གི་ལམ། དེ་གཉིས་ཀའང་ཆུད་མ་ཟོས་པ་གསུམ་དགོས། ལོངས་སྤྱོད་ཆུད་མ་ཟོས་པ། ལུས་ཆུད་མ་ཟོས་པ། སེམས་ཆུད་མ་ཟོས་པའོ། །ལོངས་སྤྱོད། མེ། ཆུ། དགྲ། གདོན་གྱིས་ཆུད་མ་ཟོས་པར་བྱས་ལ། དཀོན་མཆོག་དང་མཁའ་འགྲོ་ལ་བཏང༌། ལུས་སྡོམ་པ་གསུམ་དང་ལྡན། སོ་ཐར་བྱང་སེམས་རིག་འཛིན། སེམས་ཆུད་མ་ཟོས་པ་ནི། བྱང་ཆུབ་ཀྱི་སེམས་གཉིས་ཀྱི་ཕྱི་ཀུན་རྫོབ་སྔོན་འཇུག །དོན་དམ་སྤྲོས་བྲལ། ནང་ཀུན་རྫོབ་ཀུན་ད། དོན་དམ་བདེ་སྟོང་ངོ༌། །ལྷན་ཅིག་སྐྱེས་པ་གསུམ་གྱིས་ལམ་ཁྲིད་ཚུལ༑ རྒྱུ་ལྷན་ཅིག་སྐྱེས་པ་རང་བཞིན་གྱིས་གནས་པ། ཐབས་ལྷན་ཅིག་སྐྱེས་པའི་ཉམས་གསུམ་བསྐྱེད་པའི་ཐབས། འབྲས་བུ་ལྷན་ཅིག་སྐྱེས་པ་རྣམ་ཐར་སྒོ་གསུམ། སྐུ་གསུམ་དུ་སྐྱེས། ལྷན་ཅིག་སྐྱེས་པ་དེ་ལ་ནང་གི་བར་ཆད་ནད་འདུ་བ་གསུམ་ལྷན་ཅིག་སྐྱེས། ཕྱིའི་བར་ཆད་གདོན་གསུམ་ལྷན་ཅིག་སྐྱེས། དེ་ལ་ནད་རླུང་དང་གཅིག །ཁྲག་མཁྲིས་གཉིས་གཅིག་ཏུ་བྱས། བད་ཀན་དང་གསུམ་མོ། །གདོན་གསུམ་ནི། ཕོ་རིགས་མོ་རིགས་ཀླུ་རིགས་ འདི་ཕྱི་མ་ལ་མི་འདུག་ཀྱང༌། ལམ་འབྲས་ལས་བྱུང་བས་ཆད་དམ་སྙམ། དང་པོ་བླ་མ་སྤྱི་བོར་དྲན། བྱང་ཆུབ་ཀྱི་སེམས་རིན་པོ་ཆེ་བསྒོམ། ལྷའི་རྣལ་འབྱོར་ཡུད་ཙམ་གྱིས་དྲན་པར་བྱ། གསུམ་མོ། །སེམས་དངོས་པོའི་གནས་ལུགས་སྐྱེ་བ་མེད་པ་ལྷན་ཅིག་སྐྱེས་པ་དང་པོ། ཐབས་ལྷན་ཅིག་སྐྱེས་པ་ལས་གང་ཟག་རིགས་གཉིས་ཀྱི་ཐབས་ཀྱང་གཉིས་ཏེ། དཀའ་ཐུབ་པའི་གང་ཟག་དེ་དང་པོ་ལམ་ལ་ཞུགས་ནས། ལུས་ཀྱི་འཁྲུལ་འཁོར་ཉམས་ཀྱི་མན་ངག་ཆོས་ཉི་ཤུ་རྩ་བདུན་བསྟེན། སེམས་ལ་དགའ་བདེ་སྐྱེ། ངག་རྒོད་པ་ལ་སོགས་པ་འབྱུང༌། གློ་བུར་དུ་འོ་དོད་འབོད་དེ་དེ་ལྟར་ལུས་ངག་ཡིད་གསུམ་ཆར་ལ་འདོད་ཆགས་ཆེན་པོས་ཁྱབ་པ་ཞེས་བྱ་བའི་ཏིང་ངེ་འཛིན་ཏོ༑ ༑བདེ་བ་སྐྱེ་བའི་དུས་སུ་ཤེས་པ་གསལ་བ་ཡང་བ། སྙིང་རྗེ་ཆེན་པོ་འབྱུང་བ་ནི་ཏིང་ངེ་འཛིན་ཏོ། །གསལ་བའི་མཐར་ཐུག་ནི་ཞེ་སྡང་ཡིན་པས་ཞེ་སྡང་ལམ་དུ་བསྒྱུར། མི་སྡུག་པའི་ཡུལ་རྐྱེན་གྱིས་གསལ་བའི་མཐར་ཐུག་སྐྱེའོ། །ཡུལ་གང་ལ་ཡང་མི་རིག་མི་རྟོག་པས་མ་རིག་པ་ཆེན་པོ་ཡིན་ཏེ། ཉོན་མོངས་པ་གཏི་མུག་ལམ་དུ་སློང་ངོ༌། །དེ་ལྟར་ཡན་ལག་ཉི་ཤུ་རྩ་བཞིས་ལམ་ལྷན་ཅིག་སྐྱེས་པའི་ཉམས་བསྐྱེད་དོ། །ཌོམྦྷིའི་གསུང་གི་བདུད་རྩི་ཀུན༵། །ཡོངས་སུ་དག༵འ་བའི་ཡིད་ཤེས་ཀྱིས། །གྲོལ༵་མཆོ༵ག་རང་གིས་ངེས་པའི་ཆ། །འདིར་ནི་ཟིན་ཐོའི་ཡི་གེར་བྲིས། །རྗེ་བཙུན་གྲགས་པ་རྒྱལ་མཚན་གྱིས་མཛད་པའི་ཁྲིད་དཔེ་ལས་བཏུས་སོ། (༤༦) །གཏུམ་མོ་ལམ་རྫོགས་ཀྱི་ཁྲིད་ཡིག །ལམ་སྐོར་ཕྱི་མའི་གཏུམ་མོ་ལམ་རྫོགས་ཀྱི་ཁྲིད་ནི། སྐྱབས་སེམས་སྔོན་དུ་སོང་ནས། སྟན་ལ་བསྡད། བསྐྱེད་རིམ་བསྡུ། རྡོ་རྗེ་ཕག་མོ་ཨཾ་ལ་ཐིམ། ཨཾ་ལས་འོད་བྱུང་ནས་ལས་བྱེད་པའི་འཁོར་ལོ་གཉིས་དང༌། འཁོར་ལོ་གོང་མ་བཞི་མས་རིམས་སུ་གསལ་གདབ། རྩ་གསུམ་རོ་རྐྱང་གཉིས་ཡི་གེས་བཀག་པ་དང་བཅས་པ་གསལ་གདབ་བོ། །བཤང་སྒོའི་རླུང་གིས་སུམ་མདོའི་མེ་སྦར། མེས་ལྟེ་བའི་ཨཾ་སྦར། རླུང་མཆིལ་མ་དང་བཅས་པ་མིད་དེ། སྟེང་རླུང་ཐུབ་ཚད་དུ་མནན་ལ་བསྒོམ། ཨཾ་གི་མེ་རང་དབང་མེད་པར་འབར་བ་སྙམ་བྱེད། འོག་རླུང་མི་བསྐུམ་པར་མེ་རང་དབང་མེད་པར་འབར། གཡས་རོ་མ་དང་འགྲོགས་སོང༌། རིགས་ལྔ་ཡུམ་ལྔ་བསྲེག །སྣ་བུག་གཡས་ནས་མེ་འཕྲོས། ནམ་མཁར་དེ་བཞིན་གཤེགས་པ། དང་པོ་གཅིག་ལ་བྱ། དེ་ནས་བཅུ་ནས། བརྒྱ་ནས་བསམ་གྱིས་མི་ཁྱབ་པའི་བར་ལ་རིམ་གྱིས་ཤངས་ཀྱི་བུ་ག་གཡས་ནས་ཞུགས། མེ་ཡར་ལྡོག་མར་ལྡོག་ལན་འགའ་བྱས། དེ་བཞིན་གཤེགས་པའི་འཁོར་ལོ་བཞི་དང་ཁམས་བདུད་རྩི་རྣམས་གཅིག་ཏུ་ཞུ་ནས་སྲིན་བུ་པདྨས་ཁྲག་འདྲེན་པ་བཞིན་དུ་ཁྱེར་ཏེ་འོང༌། བདག་གི་སྣ་བུག་གཡོན་ནས་ཞུགས། ལྟེ་བའི་ཨཾ་ལ་ཕོག་ནས་དྲག་ཏུ་བསྐུལ། རྩ་དབུ་མ་ཁ་བྱེ་ནས་ཧཱུཾ་ཨཾ་ཧཾ་ཞུ་བའི་བྱང་ཆུབ་སེམས་ཀྱི་ཐིག་ལེ་སྟོབས་ཇེ་ཆེ་ཇེ་ཆེ་ལ་སྤྱི་བོ་ནས་བབ་པའི་བྱང་ཆུབ་ཀྱི་སེམས་རྡོ་རྗེ་ནོར་བུའི་རྩེ་མོར་ཕབ་ལ། བདེ་གསལ་མི་རྟོག་པའི་ཉམས་དགའ་བས་བསྡུས་པའི་དགའ་བ་བཞི། མཆོག་དགས་བསྡུས་པའི་དགའ་བ་བཞི། དགའ་བྲལ་གྱིས་བསྡུས་པའི་དགའ་བ་བཞི། ལྷན་སྐྱེས་ཀྱིས་བསྡུས་པའི་དགའ་བ་བཞི་མཐར་ཕྱིན། དགའ་བ་བཅུ་དྲུག་གི་མཐར་ཕྱིན་པ་དེ་འཕྲོ་བཅད་ལ། སྣ་གཉིས་ཀྱི་བར་ཀ་བ་མེད་པ་སྒོ་ང་སྟོང་པ་ལྟ་བུར་བསྒོམ། རླུང་སྤོས་ཀྱི་དུ་བ་ལུས་ཀྱི་ནང་ནས་སྣའི་རྡོག་མའི་རྩེར་ཐུ་ལུ་ལུ་འཁྱིལ་ནས་ཕར་མི་འགྲོ་བར་བསྒོམ། དེ་ལྟར་བསྒོམས་པ་དང་མཁའ་འགྲོ་མས་བྱིན་གྱིས་རློབ་པར་འགྱུར་རོ། །ཆོས་ཀུན༵་གཏུམ་མོའི་ལམ་གཅིག་ཏུ། །རང་དག༵འ་གྲོལ༵་བ་མཆོ༵ག་སྟེར་བའི། །བདེ་ཀྱེའི་རྒྱུད་དོན་ཕྱུངས་པའི་གནད། །ཉམས་ལེན་ཇི་བཞིན་ཡི་གེར་བྲིས། །རྗེ་བཙུན་གྲགས་པས་མཛད་པའི་ཁྲིད་དཔེ་ལས་བཏུས་སོ། (༤༧) །ཡོན་པོ་བསྲང་བའི་ཁྲིད་ཡིག །ལམ་སྐོར་ཕྱི་མ་ཡོན་པོ་བསྲང་བའི་ཁྲིད་ནི། སྐྱབས་སེམས་སྔོན་དུ་སོང་ནས། སྟན་ལ་བསྡད། ཡི་དམ་དྲན་པར་བྱ། འཁྲུལ་འཁོར་བཅའ། ལག་པ་ཁུ་ཚུར་པུས་མོའི་སྟེང་དུ་བཞག །མིག་གྱེན་ལ་བཟློག །ལྕེ་སྐན་ལ་སྦྱར། སོ་བསྒྲིག་ལ་ཁ་བགྲད། སྟེང་རླུང་འོག་རླུང་ཁ་སྦྱར་ལྟོ་བ་དྲག་ཏུ་ཚིགས་པ་ལ་གཅེར། ལག་པ་པུས་མོའི་སྟེང་ནས་ཡར་རིམ་གྱིས་གྲུ་མོ་པུས་མོ་ལ་སླེབ་སླེབ་བཏང༌། ལུས་ཉྭ་སུལ་བསྒྲིམ། ཅུང་ཟད་འདར་བ་ཙམ། རླུང་འཆིང༌། དེ་ལྟ་བུ་ཐུན་གྲངས་དང་ཐུན་ཚད་མེད་པར་བྱས་ན་ཅི་ཞིག་ཙམ་ན་ལུས་ཀྱི་འཁྲུལ་འཁོར་བྱས་མ་ཐག་ཏུ་གསལ་སྟོང་གི་ཏིང་ངེ་འཛིན་དུ་འགྲོ་བ་བྱུང་ན་མཐར་ཕྱིན་པ་ཡིན་པས་བརྟན་པར་བྱ་བའི་ཕྱིར་ལག་པ་གཡོན་ཁུ་ཚུར་སྙིང་གར་བཞག །གཡས་པ་ཁུ་ཚུར་ཕྱར། རླུང་ཁ་སྦྱར། ཡང་དེ་ལས་ལྡོག་ཏེ་གཡོན་པ་ཕྱར། ཡང་གཡས་གཡོན་གཞུ་འགེངས་པའི་ཚུལ་དུ་བྱས། ཡང་ལག་པ་གཉིས་ནམ་མཁའ་ལ་ཕྱར། ཁུ་ཚུར་བཅིངས་ལ་ཡང་སྙིང་གར་བསྣོལ་བཞིན་བསྒོམ། དེ་ལྟར་འཁྲུལ་འཁོར་གང་བཅིངས་ཀྱང་བརྗོད་བྲལ་ཏིང་ངེ་འཛིན་རྒྱུད་ལ་སྐྱེ་བ་མཐར་ཕྱིན་པའི་ཚད་ཡིན་ནོ༑ ༑རྩ་ཐིག་རླུང་ཀུན༵་དག༵འ་བཞིའི་གནས། །དབུ་མར་འཆིང་གྲོལ༵་མཆོ༵ག་སྟོན་པའི། །མྱུར་བདེའི་སངས་རྒྱས་ཉེ་ལམ་གྱི། །གནད་འདོམས་སྙིང་པོ་ཡི་གེར་བྲིས། །རྗེ་བཙུན་གྲགས་པའི་ཁྲིད་དཔེ་ལས་བཏུས་སོ། (༤༨) །ཕྱག་རྒྱའི་ལམ་གྱི་ཁྲིད་ཡིག །ལམ་སྐོར་ཕྱི་མ་ཕྱག་རྒྱའི་ཁྲིད་ནི། སྐྱབས་སེམས་སྔོན་དུ་སོང་ནས་ལུས་སྐྱིལ་ཀྲུང་བཅའ། ལག་པ་གཉིས་པུས་མོ་ལ་བཀབ། མིག་སྣ་རྩེར་དབབ། འོག་རླུང་དྲག་ཏུ་འཐེན་ལ་ཧཱུཾ་དལ་ལ་རིང་བ་ཁོག་པ་ནས་དྲང་ཞིང་མནན། དེའི་དུས་སུ་མཁལ་རྐེད་ན་བ་བྱུང་ན། ལྟོ་བ་སྐྱོད་ཅིང་རླུང་གྱེན་དུ་དྲངས། དར་ལ་སོགས་པ་འབོལ་པོས་སྐེད་པ་བསྡམ། མགོ་བོ་ན་ན་མགོ་བོ་བསྐྱོད། རོ་སྟོད་ན་ན་རོ་སྟོད་གསིག །དེ་ལྟ་བུ་ཞག་བདུན་ནམ༑ ཟླ་བ་ཕྱེད་དམ། ཞག་ཉི་ཤུ་རྩ་གཅིག་སྦྱངས་ན། ཐུར་སེལ་ཅི་རིགས་པ་ལ་དབང་ཐོབ་པར་འགྱུར་རོ། །དེའི་བར་ལ་ཐོག་མར་ལྟ་བ་བསྐྱང་བར་བྱ་སྟེ་ལྟ་བ་ནི་དངོས་པོའི་གནས་ལུགས་ལ་ཁྱབ་ཅིང༌། འདུས་བྱས་ཀྱི་རྐྱེན་གྱིས་མི་འཇིག་པ། དུས་གསུམ་དུ་འགྱུར་བ་མེད་པ། ཤེས་བྱའི་གནས་ཐམས་ཅད་ཀྱི་རང་བཞིན་ཤེས་པ་སྟེ་མཚན་ཉིད་བཞི་ལྡན། དེའང་ཉམས་སུ་ལེན་ན། ཆོས་ཐམས་ཅད་རང་གི་སེམས་ཀྱི་ངོ་བོར་གསལ་ཞིང་མ་འགགས་པ་བརྟགས་ན་སྟོང་པ་སྟེ། གསལ་སྟོང་དབྱེར་མེད་ཅེས་བྱ་བའམ། གསལ་བ་དེ་ཉིད་རང་གིས་རིག་ཅིང་ཉམས་སུ་མྱོང་བ་ལ་བརྟགས་ན་སྟོང་པ་སྟེ། རིག་སྟོང་དབྱེར་མེད་ཅེས་བྱ་བའམ། ལུས་བདེ་བ་ཆེན་པོར་སྐྱེ་ལ་སྣང་བ་ཐམས་ཅད་བདེ་བ་ཆེན་པོར་སྐྱེ་ཞིང༌། དེ་ཡང་བརྟགས་ན་སྟོང་པའི་བདེ་སྟོང་དབྱེར་མེད་ཅེས་བྱ་བར་ཤེས་པར་བྱས་ལ། དང་པོར་ཐོས་བསམ་གྱི་ཚུལ་གྱིས། དེ་ནས་ཤུགས་འབྱུང་བའི་ཚུལ་གྱིས་བསྐྱང་ཞིང་རླུང་སྦྱང་བར་བྱའོ། །དེ་ལྟར་རླུང་འབྱོངས་པ་དེས་ཡེ་ཤེས་ཀྱི་ཕྱག་རྒྱ་ལ་བརྟེན་ནས་བསྒྲུབས་པ་ལ། བདག་དང་རིག་མ་ཡི་དམ་གྱི་ང་རྒྱལ་བརྟན་ནས། རྡོ་རྗེ་པད་མ་བསྣོལ་མར་བྱིན་གྱིས་བརླབས་ཏེ༑ སྒྲུབ་པ་པོས་ཡུམ་གྱི་པདྨ་ཨེ་ལས་ཆོས་ཀྱི་འབྱུང་གནས། དེའི་ནང་དུ་ཨ་ལས་པདྨ་དམར་པོ་འདབ་མ་བརྒྱད་པ་ཟེའུ་འབྲུ་དང་བཅས་པ་ལ་ཨས་མཚན་པ་བསྐྱེད་ལ་སྔགས་ཀྱིས་བརྟན་པར་བྱ། ཡབ་ཀྱི་རྡོ་རྗེ་རྩེ་ལྔ་པ་ལ་ཧཱུཾ་གིས་མཚན་པར་བསྐྱེད། ༀ་ལས་ནོར་བུ། སྭཱ་ལས་རིན་པོ་ཆེའི་ཏོག །བུ་གར་ཧཱུཾ་མཐིང་ནག་མགོ་ཐུར་དུ་ལྟ་བ། ཕཊ་དམར་ནག་མགོ་གྱེན་དུ་བལྟ་བ་གཉིས་རྩེ་སྤྲད་པར་བསྒོམས་ལ་སྔགས་ཀྱིས་བརྟན་པར་བྱའོ༑ ༑འདོད་པ་ཐ་མལ་པའི་འདོད་ཆགས་འདི་ཉིད་ལམ་དུ་བྱས་ལ། རིམ་གྱིས་ཐ་མལ་པའི་འདོད་ཆགས་དེ་ཉིད་སྙིང་རྗེ་ཆེན་པོས་བསྐུལ་ཞིང་ཀུན་ནས་བསླངས་པའི་བྱང་ཆུབ་ཀྱི་སེམས་སུ་བསྒྱུར། སེམས་ཅན་གྱིས་རྫོགས་པའི་སངས་རྒྱས་ཐོབ་པར་བྱའོ་སྙམ་པའོ། །མན་ངག་གནད་ཀྱིས་ཟིན་པ་ལ་ལྔ། བྱང་ཆུབ་ཀྱི་སེམས་ཀྱི་ཐིག་ལེ་དབབ་པ་དང༌། བཟུང་ཞིང་བདེ་བ་བསྒོམ་པ་དང༌། ལྡོག་པ་དང་ཁྱབ་པར་བྱ་བ་དང༌། མི་ཉམས་པར་བསྲུང་བའོ། །དེ་ལ་ཕྱག་རྒྱ་དང་སྙོམས་པར་འཇུག་པའི་ཚུལ་གྱིས་བསྒོམ་པ་ནི་བྱང་ཆུབ་ཀྱི་སེམས་དབབ་པ། བྱང་ཆུབ་ཀྱི་སེམས་ནོར་བུའི་དབུས་སུ་ཕབ་སྟེ། གཟུང་བའི་ཐབས་གསུམ་གྱིས་མི་ཉམས་པར་བྱ། མིག་གཉིས་གྱེན་དུ་བགྲད་ལ། ལྕེ་རྐན་ལ་སྦྱར། སྟེང་རླུང་མནན། འོག་སྒོ་ནས་མར་འཕུལ་ཤེས་པ་གཏད། རིལ་བ་ཞབས་ཚགས་ཅན་གྱི་དཔེ་དང་འདྲ། ཕཊ་གྱེན་ལྟ་ཧཱུཾ་ཐུར་ལྟ་དེས་འདྲེན་པར་བསམ་ཞིང༌། ཧཱུཾ་དལ་ལ་རིང་བ་ཉི་ཤུ་རྩ་གཅིག་ལ་སོགས་པས་དྲང་བར་བྱའོ། །འོག་རླུང་ཅུང་ཟད་བསྐུམ། མིག་ཕྱེ་ལ་དབུགས་དལ་ལ་ཡུན་རིང་བས་དྲང་ངོ༌། །སྣ་བུག་གཉིས་ཀ་ནས་ཕྱིར་བུས་པས་ལུས་ཐམས་ཅད་ལ་བདེ་སྟོང་གི་ཏིང་ངེ་འཛིན་གྱིས་ཁྱབ་པར་འགྱུར་ཏེ། མས་བརྟན་གྱི་དགའ་བ་བཅུ་དྲུག་གི་ཚུལ་ཉམས་སུ་བླང༌། རྡོ་རྗེའི་རྩེ་མོ་ཉིད་ནས་བཟློག་ན་འགྱུར་བ་རྣམ་དྲུག་གིས་བཟློག་པར་བྱ་སྟེ། རྐང་ལག་གི་མཐེ་བོང་བཞི་བསྐུམ་ཞིང་བསྐྱེད་པ་དང༌། ལྟོ་བ་ཚིགས་པ་ལ་སྦྱར་བ་དང༌། ལྕེ་ཕུགས་སུ་བཟློག་པ་དང༌། ངག་ཏུ་ཧཱུྃ་རིང་པོའི་རྗེས་ལ་ཧིག་ཅེས་བརྗོད་པ་དང༌། ཏིང་ངེ་འཛིན་གྱི་ཧཱུཾ་གིས་ཕཊ་དྲངས་ལ་སྤྱི་གཙུག་ཏུ་བསྐྱལ་བར་བྱ་སྟེ། དེ་ཡང་བྱང་ཆུབ་ཀྱི་སེམས་ཀྱི་ལྷག་མ་ལུས་པར་སྲིད་པས་ལན་གཉིས་དང་གསུམ་གྱི་བར་དུ་དྲང་བར་བྱའོ། །དེ་ནས་ཁྱབ་པར་བྱ་བ་ལ། ལུས་པོ་ལ་མ་བཀྲམ་ན་ནད་ལ་སོགས་པར་འགྱུར་བས་ཁྱབ་པར་བྱ་བ་ནི། མགོ་བོ་སྤྲུག་པ་དང༌། རོ་སྟོད་གསིག་པ་དང༌། རྐེད་པ་གཅུ་བ་དང༌། ལག་པ་གཡབ་པ་དང༌། བྲོ་འཁྲབ་པ་དང༌། འོ་དོད་བོས་པ་ལ་སོགས་པས་ཁྱབ་པར་བྱ་སྟེ། དེ་ནི་གནས་སུ་བསྐྱལ་བ་ཡིན་ནོ། །དེ་ལྟར་ཉན་ཐོས་བཞིན་ཕྱག་རྒྱ་མི་སྤང་སྟེ། སྤངས་ན་ཐིག་ལེ་མི་རྒྱས་ཏེ། བ་མ་བཞོས་ན་ཞོ་སྐམ་པ་དང་འདྲའོ། །དེས་ན་བ་བཞིན་དུ་བཞོས་ན་ཐིག་ལེ་འཕེལ་ཏེ། ཐིག་ལེ་ལས་སངས་རྒྱས་འབྱུང་བ་ཡིན་ནོ། །ཕལ་པ་བཞིན་དུ་བྱང་ཆུབ་ཀྱི་སེམས་དོར་བར་མི་བྱ་སྟེ༑ དོར་ན་རྒྱུད་ནས་གསུངས་པའི་ཉེས་པ་ཐམས་ཅད་འབྱུང་ངོ༌། །དེས་ན་ཐིག་ལེ་དབབ་བཟློག་གི་སྒོ་ནས་ལྷན་ཅིག་སྐྱེས་པའི་ཡེ་ཤེས་མངོན་དུ་བྱ་བའི་བསམ་པས་ཆགས་པ་དོར་ཞིང་ལུས་ཐམས་ཅད་ཐིག་ལེས་གང་བདེ་སྟོང་གི་ཏིང་ངེ་འཛིན་རྒྱུན་མི་འཆད་པ་འབྱུང་ངོ༌། །ཕྱག་རྒྱའི་རིགས་ཀུན༵་དག༵འ་བའི་རྟེན། །སྨིན་གྲོལ༵་མཆོ༵ག་བསྐྲུན་ལུགས་གཉིས་ལས། །འདིར་ནི་ཡེ་ཤེས་ཕྱག་རྒྱ་ཙམ། །ལམ་དུ་འཁྱེར་ཚུལ་ཡི་གེར་བྲིས། །རྗེ་བཙུན་གྲགས་པས་མཛད་པའི་ཁྲིད་དཔེ་ལས་བཏུས་སོ། (༤༩) །ཕྱག་རྒྱ་ཆེན་པོ་ཡི་གེ་མེད་པའི་ཁྲིད་ཡིག །ལམ་སྐོར་ཕྱི་མ་ཕྱག་ཆེན་ཡི་གེ་མེད་པའི་ཁྲིད་ནི། སྐྱབས་སེམས་སྔོན་དུ་སོང་ནས། བླ་མ་སྤྱི་བོར་བསྒོམ། ཡི་དམ་གསལ་གདབ། སེམས་གང་དུ་སོང་བ་ཞིག་ཏུ་དྲན་པའི་ཐག་པས་གཟུང་ངོ༌། །དེ་ལས་གཞན་དུ་ཤོར་དུ་མི་གཞུག །དེ་ཉིད་བསྐྱང༌། འདས་པ་དང་མ་འོངས་པའི་རྗེས་མི་གཅོད། ཟིན་པར་འགྱུར་རོ། །མ་ཟིན་ན་ཤིང་གི་རྩེ་མོར་འཇོག །ཉི་ཟླའི་སྟེང་དུ་འཇོག །དེས་ཀྱང་མ་ཟིན་ན་སྣ་རྩེ་སྨིན་ཕྲག །ལྟེ་བར་སྤོ་ཞིང་སེམས་བཟུང༌། འདིས་སེམས་ཟིན་པར་འགྱུར་རོ། །སེམས་དྲན་པས་མ་ཟིན་ན་རྣམ་རྟོག་འཁོར་བའི་མཐར་ལྷུང༌། ལྟེངས་ན་ཉན་ཐོས་སུ་འགྱུར་བས། ཀ་བའམ། བུམ་པ་ལ་སོགས་པ་གང་ལ་སེམས་ཐེན་ནེ་འདུག་པ་དེ་ལས་བཏོན་ནས་གཞན་གཅིག་ལ་བཞག །མདོར་ན་གནས་པའི་དབང་ཡང་ཡོད། འཕྲོ་བ་དྲན་པས་ཟིན་ཡོང་བ་ནི་སེམས་ཐུལ་བ་ཡིན་ནོ༑ ༑སྨིག་རྒྱུ་མཐོང༌། འདི་རྒྱ་མཚོ་ཡིན་ནམ་སྙམ་དུ་འཁྲུལ། ཕྱིན་ཙ་ན་ཆུ་མ་ཡིན་སྨིག་རྒྱུ་འདུག་གོ་སྙམ། དྲུང་དུ་སླེབས་ཙ་ན་མ་དམིགས། དེ་བཞིན་རྨི་ལམ་དགྲ་དང་འཐབ་པ་དང༌། གཉེན་དང་མཛའ་བ་ལ་ངེས་ཤེས་བསྐྱེད། ཞེ་སྡང་དྲག་པོ་བྱུང་ན། མི་བདེན་པར་རྟོགས་ནས། ཞེ་སྡང་སེམས་དེ་རང་བཞིན་མེད་པ་སྟེ། ཕྱག་རྒྱ་ཆེན་པོ་ཡི་གེ་མེད་པའོ། །ཡི་གེ་རྣམ་རྟོག་བརྗོད་པ་མེད། བརྗོད་དུ་མེད་པ་ཕྱག་རྒྱ་ཆེན་པོ། མདུན་གྱི་ནམ་མཁར་བླ་མ་ཡི་དམ་ལ་དགྲ་གཉེན་ལུས་འབུལ། དེ་རྣམས་ཀྱང་སེམས། སེམས་སྒྱུ་མ། སྒྱུ་མ་རང་བཞིན་མེད་པ་ལ་བློ་སྦྱང༌། འོག་དམྱལ་བ་བཙོ་བསྲེག་གི་སྡུག་བསྔལ་ཉམས་སུ་མྱོང༌། དེ་སེམས། སེམས་སྒྱུ་མ། སྒྱུ་མ་རང་བཞིན་མེད་པ། ཡང་འོག་གི་སངས་རྒྱས་འབུམ་གཟིགས། སྟེང་གི་སངས་རྒྱས་རྣམ་སྣང༌། ཤར་ལྷོ་ནུབ་བྱང་ཕྱོགས་བཅུའི་ཞིང་ཁམས་བལྟ། མཐོང་ངོ་སྙམ་དུ་བསམ། དེའང་སེམས། སེམས་སྒྱུ་མ༑ སྒྱུ་མ་རང་བཞིན་མེད་པ། ཞེ་སྡང་ལ་སོགས་པ་ཉོན་མོངས་པ་རྣམས་བསྲེ། ཕྱོགས་གཅིག་དཔེར་བརྗོད་ན་ཞེ་སྡང༌། སྒྱུ་མ་རྨི་ལམ་ཞེས་ཡིད་ལ་བྱེད། སྣང་གྲགས་འཁོར་འདས་ཐམས་ཅད་དུས་གཅིག་ཏུ་རང་བཞིན་མེད་པ་ཕྱག་རྒྱ་ཆེན་པོ་ཡི་གེ་མེད་པ་རང་ཤུགས་ཀྱིས་རྟོགས་པ་ཡིན་ནོ། །མཉམ་རྗེས་མེད། སྣང་བ་སློབ་དཔོན་དུ་འཆར། ཉོན་མོངས་པ་ལམ་དུ་འགྱུར། རྣམ་རྟོག་ཡེ་ཤེས་སུ་འཆར། འགྲོ་དྲུག་གི་གཡང་ས་བཅད། རིགས་དྲུག་གི་གྲོང་ཁྱེར་འཇོམས། འདྲིས་པའི་མི་དང་འཕྲད་པ་ལ་རྟོག་དཔྱོད་ཀྱི་རྩོལ་སྒྲུབ་མེད་པ་དང་འདྲ་བའི་དུས་ཏེ། དགྲ་དང་རྣམ་རྟོག་ལས་འདས་པ་ཕྱག་རྒྱ་ཆེན་པོ་དེ་ཁོ་ན་ཉིད་ཡི་གེ་མེད་པ་རྟོགས་པར་འགྱུར་རོ། །ཡི་གེ་ཀུན༵་ན་མེད་པའི་གསང༌། །དག༵འ་བའི་སྙིང་པོ་ལྷན་ཅིག་སྐྱེས། །རྣམ་གྲོལ༵་མཆོ༵ག་སྦྱོར་འཁྲིད་ཀྱི་ཚུལ། །ཉུང་ངུའི་སྒོ་ནས་གསལ་བར་བྲིས། །རྗེ་བཙུན་གྲགས་པས་མཛད་པའི་ཁྲིད་དཔེ་ལས་བཏུས་སོ། (༥༠) །མཆོད་རྟེན་དྲུང་ཐོབ་ཀྱི་ཁྲིད་ཡིག །ལམ་སྐོར་ཕྱི་མའི་མཆོད་རྟེན་དྲུང་ཐོབ་ཀྱི་ཁྲིད་ནི། སྐྱབས་སེམས་སྔོན་དུ་སོང་ནས། སེམས་ཁོང་སློད་ལ་སོ་མ་ལྷུག་པ་རང་ཐད་མ་བཅོས་པར་བཞག །སེམས་ལ་དགེ་མི་དགེ་སོགས་གང་གི་ཡང་ལས་མི་འཆོལ། དེས་ཟིན་ཡོང༌། གལ་ཏེ་མ་ཟིན་ན་བྱ་ར་བ་ཅིག་བཞག་ལ། རང་གར་ཡན་དུ་བཅུག་པས་ལོག་ཡོང༌། དེ་ལྟར་བྱས་པས་གར་སྤྱིན་ལ་ལག་པ་བཞག་པ་ལྟ་བུ་ལྷན་གྱིས་གནས་ན་ཟིན་པའི་ཚད་ཡིན་པས་མ་བཅོས་པའི་འཇོག་སྟབས་དེ་ཉིད་ཀྱི་ངང་ནས་རང་གི་སེམས་ལ་བརྟགས་པས། ཐོག་མཐའ་མེད་པས་ནམ་མཁའ་ལྟ་བུ། སྐྱེ་འཆི་མེད་པས་ནམ་མཁའ་ལྟ་བུ། འགྲོ་འོང་མེད་པས་ནམ་མཁའ་ལྟ་བུ་ཡིན། མཐའ་དབུས་མེད་པར་ནམ་མཁའ་ལྟ་བུར་དྲན་པར་བྱས་ལ་དེའི་ངང་དུ་བཞག་གོ །འཕྲོ་ན། འདས་པའི་རྗེས་མི་གཅོད། མ་འོངས་པའི་སྔོན་མི་བསུ། ད་ལྟ་བ་ལ་ཐུག་ཕྲད་ཀྱི་དྲན་འཛིན་བྱས་ཏེ། དུས་གསུམ་སྐྱེ་འགག་གནས་གསུམ་མེད་པ་སྤྲོས་བྲལ་ལ་ངེས་ཤེས་བསྐྱེད་ཅིང༌། མཉམ་བཞག་གི་ཉམས་དེ་དང་རྗེས་ཐོབ་ཀྱི་སྤྱོད་ལམ་བསྲེ་བ་ཡང་གནད་ཀྱི་གདམས་པའོ། །གནད་འདི་ཀུན༵་ཏུ་རང་སེམས་ལ། །དག༵འ་བསྐྱེད་འཆིང་གྲོལ༵་མཆོ༵ག་སྟོན་པའི། །ཡིད་ཆེས་ཐོབ་བཞིན་བསྒོམ་བྱའི་གནད། །སྙིང་པོ་དྲིལ་ནས་འདི་བྲིས་སོ། །རྗེ་བཙུན་གྲགས་པས་མཛད་པའི་ཁྲིད་དཔེ་ལས་བཏུས་སོ། (༥༡) །མདོ་རྒྱུད་བསྲེ་བའི་ཁྲིད་ཡིག །མདོ་རྒྱུད་བསྲེ་བའི་ཁྲིད་ནི། སྐྱབས་སེམས་སྔོན་དུ་སོང་ནས། ཏིང་ངེ་འཛིན་ལུས་གནད་བྱས་ལ། ཐ་མལ་གྱི་ཡིད་འབྲེལ་ལྷར་གསལ་གདབ། ཐུགས་ཁའི་ས་བོན་གྱི་སྤྲོ་བསྡུ། འོད་ཟེར་ཡར་འཕྲོས་པས་འཕགས་པ་མཆོད། དེ་རྣམས་ཀྱི་ཐུགས་ཁར་ཞུགས། སླར་ལོག་པས་རང་ལ་གཉིས་སུ་མེད་པའི་ཡེ་ཤེས་ཀྱི་བྱིན་རླབས་ཞུགས། མར་འཕྲོས་པས་སྣོད་ཐམས་ཅད་གཞལ་ཡས་ཁང་དུ་སྦྱངས། བཅུད་ལྷ་དང་ལྷ་མོར་སྦྱངས་པར་བསམ། བླ་མ་བསྒོམས་ལ་བསྟིམ། དེ་ནས་སྣང་སྲིད་ལ་ཧད་དེ་ཆེ་རེ་བལྟས་པས་སྣང་སྲིད་ཀྱི་ཆོས་ཐམས་ཅད་བདེན་མེད་དུ་སྒྱུ་མ་ལྟ་བུར་གཏིང་ནས་ངེས་ཤེས་བསྐྱེད་དེ། དེ་ཡང་འཕྲལ་དུ་བཅོས་པར་མི་འདུག་གི། གདོད་ནས་རང་བཞིན་གྱིས་དག་པ་སྒྲོ་འདོགས་རྦད་ཀྱིས་ཆོད་ནས་རང་གསལ་དུ་སིང་ངེ༌། རང་གྲོལ་དུ་ཤིག་གེ་འདུག་པ། འཁོར་འདས་གཉིས་མེད་ཀྱི་ཆོས་སྐུར་གྲོལ། དེ་ལྟར་མ་ཤེས་མ་རྟོགས་པ་ལ་སྙིང་རྗེ་བསྐྱེད། དེའང་དབྱིངས་ཀྱི་ངང་ཡིན་པས་དབྱེར་མེད། དབྱེར་མེད་དེ་ཀ་ལ་སྟོང་ཉིད་སྙིང་རྗེའི་སྙིང་པོ་སྟེ། དེས་མཆོག་གི་ལམ་འབད་མེད་དུ་བགྲོད། ལམ་སྙིང་པོ་དོན་གྱི་རང་འགྲོས། དེ་ལྟ་བས་ཡས་མར་གཞལ་ཅིང༌། བགྲོད་ཚུལ་གྱིས་མས་ཡར་བརྩིས། དེས་ཟིན་པའི་སྒོམ་གྱི་ལས་དགེ་བ་རྣམས་ཚོགས་ལམ། བསམ་གཏན་གྱི་སེམས་གང་རུང་ལ་བརྟེན་ནས་དོན་སྤྱི་གསལ་ངེས་པ་སྦྱོར་ལམ། དེ་མངོན་དུ་གྱུར་པ་མཐོང་ལམ། དེ་གོམས་པས་ཉོན་མོངས་ཀྱི་བག་ཆགས་ཤེས་སྒྲིབ་ཀྱི་ཚུལ་ཅན་ཕྲ་བར་ནུབ་པ་ཡང་བསྒོམ་ལམ། དྲི་མ་ཕྲ་མོ་རེ་རེ་ཡང་དབྱིངས་སུ་ཞི་ནས་སྤངས་རྟོགས་ཀྱི་ཡོན་ཏན་ཡོངས་སུ་རྫོགས་ཏེ་ཕྲིན་ལས་སེམས་ཅན་གྱི་དོན་ལྷུན་གྲུབ་ཏུ་འབྱུང་བ་མཐར་ཕྱིན་པའི་ལམ་མོ། །ལམ་འདི་བློ་དམན་པ་གནས་ལུགས་ཀྱི་དོན་ལ་མ་རེག་པ་རྣམས་ལ་སྦྱིན་པར་མི་བྱ། དགེ་བའི་བཤེས་གཉེན་གྱིས་ཟིན། འཁོར་བའི་རང་བཞིན་ཤེས། ཚེ་འདིའི་བདག་འཛིན་སྤངས་ནས་སྒྲུབ་པ་གཅིག་དྲིལ་དུ་བྱེད་པ་ལ་སྦྱིན་པར་བྱའོ། །མདོ་རྒྱུད་ཀུན༵་གྱི་བཅུད་བསྡུས་ནས། །གཅིག་ཏུ་བསྲེ་བས་ཡིད་དག༵འི་ལམ། །རྣམ་གྲོལ༵་མཆོ༵ག་ལ་བཀྲི་བའི་ཚུལ། །ཡི་གེའི་ལམ་དུ་སྤེལ་བའོ། །ཡིག་རྙིང་ལས་བཏུས་སོ། (༥༢) །ཕྱི་རོལ་གདོན་གྱི་བར་ཆད་སེལ་བའི་ཁྲིད་ཡིག །བར་ཆད་གསུམ་སེལ་ལས་ཕྱི་རོལ་གདོན་གྱི་བར་ཆད་སེལ་བའི་ཁྲིད་ནི། སྐྱབས་སེམས་སྔོན་དུ་སོང་ནས། རང་ལྷར་བསྒོམས་པའི་ཐུགས་ཀའི་ཧཱུྃ་ལས་འོད་ཟེར་རྡོ་རྗེའི་ལྟེ་བ་ལ་ཧཱུཾ་གིས་མཚན་པ་ཅན་འཕྲོས། བ་སྤུའི་བུ་ག་ཐམས་ཅད་ཁྲིག་ཐམ་གྱིས་གཏམས། ངག་ཏུ་སྟོབས་ཀྱིས་ཧཱུཾ་དྲག་ལ་རིང་བ་བརྗོད། ཡང་འོད་འཕྲོས་སྟེང་འོག་ཕྱོགས་བཅུ་ཐམས་ཅད་རྡོ་རྗེའི་རྩིག་པར་བསམ། ངག་ཏུ་ཧཱུཾ་བརྗོད། སེམས་དབྱིངས་ལས་མ་གཡོས་པའི་གར་བྱས་ན་ཕྱི་རོལ་དུ་གདོན་གསུམ་སྲུང་བའི་མཆོག་ཡིན་ནོ། །ཕྱི་རོལ་གདོན་གྱི་བར་ཆད་ཀུན༵། །བསལ་ནས་དག༵འ་བ་རབ་བསྐྱེད་པའི། །རྣམ་གྲོལ༵་མཆོ༵ག་གི་ཁྲིད་འདི་ཡང༌། །ཡི་གེར་མཚོན་པར་བྱས་འདིའོ། །ཡིག་རྙིང་ལས་བཏུས་སོ། (༥༣) །འབྱུང་བ་ལུས་འཁྲུགས་ཀྱི་བར་ཆད་སེལ་བའི་ཁྲིད་ཡིག །འབྱུང་བ་ལུས་འཁྲུགས་ཀྱི་བར་ཆད་སེལ་བའི་ཁྲིད་ནི། སྐྱབས་སེམས་སྔོན་དུ་སོང་ནས། སྟོད་ཚད་པའི་གནས་སུ་ཟླ་བའི་གདན་ལ། སྨད་གྲང་བའི་གནས་སུ་ཉི་མའི་གདན་ལ། རྡོ་རྗེ་རྩེ་ལྔ་པ་སྲོག་ཤིང་རྩ་ཡིས་བྱས་པའི་སྦུབ་ནང་ན་ཐིག་ལེ་སྲན་མ་འབྲིང་པོ་ཙམ་གྱི་དབུས་ན་ཧཱུཾ་ནས་འབྲས་ཙམ་ཁ་སྦྱར། རྩ་བའི་བླ་མ་ཇི་ཙམ་འཚམ་པ་བསམ། རླུང་ཕྱིར་ལན་གསུམ་བུས་ལ། ཧཱུཾ་དང་བླ་མ་མི་འཁོར། རྡོ་རྗེ་ཐིག་ལེ་འཁོར་བའི་དམིགས་པ་གསལ་ངེས་པ་ཐུན་གཅིག་ཙམ་བསྒོམས་ན་འབྱུང་བ་ལུས་འཁྲུགས་པའི་ནད་ཐམས་ཅད་བསྲུང་ཞིང་སེལ་བར་ཐེ་ཚོམ་མེད་དོ། །འབྱུང་བ་ལུས་འཁྲུགས་བར་ཆད་ཀུན༵། །བསལ་ནས་དག༵འ་བ་རབ་བསྐྱེད་པའི། །རྣམ་གྲོལ༵་མཆོ༵ག་གི་ཁྲིད་འདི་ཡང༌། །ཡི་གེར་མཚོན་པར་བྱས་འདིའོ། །ཡིག་རྙིང་ལས་བཏུས་སོ། (༥༤) །ཏིང་ངེ་འཛིན་སེམས་ཀྱི་བར་ཆད་སེལ་བའི་ཁྲིད་ཡིག །ཏིང་ངེ་འཛིན་སེམས་ཀྱི་བར་ཆད་སེལ་བའི་ཁྲིད་ནི། སྐྱབས་སེམས་སྔོན་དུ་སོང་ནས། རང་གི་སེམས་གདོད་མ་ནས་དག་པ་འདི། མཚན་ཉིད་གསལ་བ་ལས་མི་འདའ་བ་དམ་ཚིག ༑ཕྱག་རང་བཞིན་གྱིས་དག་པ། རྒྱ་ཁྱབ་པ། གསལ་སྟོང་དབྱེར་མེད་དམ་ཚིག་གི་ཕྱག་རྒྱ། སྣང་བ་སེམས་ཀྱི་ཆོས་ཅན་ཡིན་ལ། སྣང་སྟོང་དབྱེར་མེད་ཆོས་ཀྱི་ཕྱག་རྒྱ། ཟག་བཅས་བདེ་བ་ལས་ཡིན་ལ། བདེ་སྟོང་དབྱེར་མེད་ལས་ཀྱི་ཕྱག་རྒྱའོ། །གསལ་སྣང་སྣང་སྲིད་ཆོས་ཐམས་ཅད་ཆེན་པོ་ཡིན་ལ། ཆོས་ཐམས་ཅད་རང་སྟོང་ཕྱག་རྒྱ་ཆེན་པོ་དེ་ལྟར་ཤེས་པའི་རྣལ་འབྱོར་པ་ལ་བར་ཆད་མེད་པས་འཆི་བ་མི་སྲིད་པ་ཡིན་ནོ། །ཏིང་འཛིན་སེམས་ཀྱི་བར་ཆད་ཀུན༵། །བསལ་ནས་དག༵འ་བ་རབ་བསྐྱེད་པའི། །རྣམ་གྲོལ༵་མཆོ༵ག་གི་ཁྲིད་འདི་ཡང༌། །ཡི་གེར་མཚོན་པར་བྱས་འདིའོ། །ཡིག་རྙིང་ལས་བཏུས་སོ། (༥༥) །སྡུག་བསྔལ་གསུམ་སེལ་གྱི་ཁྲིད་ཡིག །ཕྱག་ཆེན་སྡུག་བསྔལ་གསུམ་སེལ་གྱི་ཁྲིད་ནི། སྐྱབས་སེམས་སྔོན་དུ་སོང་ནས། གཉུག་མའི་དོན་ལ་རྒྱུད་དོན་ངེས་པ་ཟབ་གནད། སེམས་མ་ཟིན་པ་ལ་ནང་དུ་བཟུང་བ་ཟབ་གནད། གནས་པ་བོགས་འབྱིན་ལ་རྩལ་སྦྱོང་ཟབ་གནད། ཡིད་འཕྲེང་བཅད་པ་ལ་ཟླ་བ་ཟབ་གནད། ཀུན་ལ་དུག་མེད་བསྔོ་བ་ཟབ་གནད་ནི། སྡུག་བསྔལ་གསུམ་འཁོར་བའི་རང་བཞིན་ལ། སེམས་གཉུག་མ་མཐོང་ན། སྡུག་བསྔལ་གྱི་སྡུག་བསྔལ་གྱི་རང་བཞིན་ཤེས་ན་སྤྲུལ་སྐུ་ཐོབ། འགྱུར་བའི་སྡུག་བསྔལ་གྱི་རང་བཞིན་ཤེས་ན་ལོངས་སྐུ། འདུ་བྱེད་ཀྱི་སྡུག་བསྔལ་གྱི་རང་བཞིན་ཤེས་ན་ཆོས་སྐུ། ཐམས་ཅད་རང་བཞིན་མེད་པར་ཤེས་པས། སྒྲིབ་པ་གསུམ་ལས་གྲོལ་ནས་ངོ་བོ་ཉིད་ཀྱི་སྐུ་ཐོབ། དེ་སྣང་སྲིད་འཁོར་འདས་སེམས་ཡིན་ལ། གསལ་བ་སྟོང་པའི་རྩལ་སྦྱོང༌། སྟོང་པ་སྣང་བའི་དུག་སྦྱོང༌། མཁའ་སྤྲིན་མི་ཕྱེད་པ། མ་བཅོས་གཉུག་མ། དེ་རིག་ཀྱང་ནང་དུ་མ་ལུས། སྣང་ཡང་ཕྱི་རུ་མ་ལུས་རོ་གཅིག །སྙིང་ཁར་ཟླ་བའི་སྟེང་དུ་ཐིག་ལེ་ལ་སེམས་བཟུང་ལ་བལྟ། ཉིན་མོར་བདེ་སྟོང་རིག་སྟོང་སྐྱེ། མཚན་མོར་འོད་གསལ་ཟིན། སྣ་རྩེར་ཐིག་ལེ་ལ་སེམས་བཟུང༌། ཉིན་མོར་གསལ་སྟོང་སྣང་སྟོང་སྐྱེ། མཚན་མོར་རྨི་ལམ་ཟིན་ནོ། །ཡིན་ལུགས་རང་ངོ་ཤེས་པས་སོར་བཞག །ལྷུག་པ་རང་སོ་བཟུང༌། གནས་པ་ངར་བཅས་རྩལ་སྦྱོངས། གོ་བས་མཐའ་རྒྱ་ཆོད། མཐའ་འདའ་ས་མ་རྙེད། བསམ་བསྒོམ་གྱིས་ཉམས་སུ་སྦྱོང༌། དབུས་ས་མ་རྙེད། རང་འཁྲིས་མེད་པར་གཞན་དོན་དུ་བསྔོ་བས་རྒྱས་བཏབ་བོ། །སྡུག་བསྔལ་ཀུན༵་འབྱུང་དག༵འ་བདེའི་ངང༌། །རང་གྲོལ༵་མཆོ༵ག་བསྐྱེད་ལམ་ཁྲིད་འདི། །སུ་ལ་ཡོད་ཀྱང་སྨོན་པའི་གནས། །ཡི་གེར་བཀོད་ནས་བཞག་འདིའོ། །ཡིག་རྙིང་ལས་བཏུས་སོ། (༥༦) །གཉུག་མ་དྲན་གསལ་གྱི་ཁྲིད་ཡིག །གཉུག་མ་དྲན་གསལ་གྱི་ཁྲིད་ནི། སྐྱབས་སེམས་སྔོན་དུ་སོང་ནས། སྟན་ལ་ལུས་རྣམ་སྣང་གི་ཆོས་ཚང་བར་བཅས། རང་ལྷ། བླ་མ་སྤྱི་བོར་བསྒོམ། གུས་འདུད་བྱས་ལ་བསྟིམ། རླུང་རོ་གསུམ་བུས་ལ། རྟེན་དང་བརྟེན་པའི་དཀྱིལ་འཁོར། རྐང་མཐིལ་རྡོ་རྗེའི་ས་གཞི། སྤྱི་བོར་རྡོ་རྗེ་རྒྱ་གྲམ་གྱི་ཐོག །རྩིབ་མ་རྡོ་རྗེའི་གུར། བ་སྤུ་མདའི་དྲྭ་བ། སེན་མོ་མེ་རི་རབ་ཏུ་འབར་བ། རྐང་པ་བགྲད་པ་རླུང་གི་དཀྱིལ་འཁོར། སུམ་མདོ་མེ། ལྟེ་བ་ཆུ། སྙིང་ཁ་སའི་དཀྱིལ་འཁོར། སྒལ་ཚིགས་རི་རབ། ལུས་འདོམ་གང་གྲུ་བཞི་མི་མཉམ་པ་མེད་པ་ལ་གྲུ་བཞི། མིག་པཉྩ་རེ་ཁཱ། སོ་དྲ་བ་དྲ་ཕྱེད། ལྕེ་དང་མཆུ་ལྷ་མོ་ཆགས་གནས། རྐང་བརྒྱད་ཀ་བ་བརྒྱད། སྙིང་ཁའི་རྩ་འདབ་ཀྱི་ཕྱོགས་བཞི་ནས་འབྱུང་བ་བཞིའི་རླུང་རྒྱུ་བ་སྒོ་བཞི། གསང་གནས་དོན་གྲུབ་ལྗང་གུ། རལ་གྲི། དྲིལ་བུ། ཡུམ་གྲི་ཐོད་འཛིན་པ། འཁོར་ལྷ་མོ་སུམ་ཅུ་རྩ་གཉིས། ལྟེ་བར་རིན་འབྱུང་སེར་པོ་རིན་པོ་ཆེ་དང་དྲིལ་བུ། ཡུམ་གྲི་ཐོད་འཛིན་པ། ལྷ་མོ་དྲུག་ཅུ་རྩ་བཞི། སྙིང་གར་མི་བསྐྱོད་པ་སྔོན་པོ་རྡོ་རྗེ་དྲིལ་བུ། ཡུམ་གྲི་ཐོད་འཛིན་པ༑ ལྷ་མོ་བརྒྱད། མགྲིན་པར་འོད་དཔག་མེད་དམར་པོ། པདྨ་དྲིལ་བུ། ཡུམ་གྲི་ཐོད་འཛིན་པ། ལྷ་མོ་བཅུ་དྲུག་གོ །དཔྲལ་བར་རྣམ་སྣང་དཀར་པོ། འཁོར་ལོ་དྲིལ་བུ། ཡུམ་གྲི་ཐོད། ལྷ་མོ་སུམ་ཅུ་རྩ་གཉིས། གཙུག་ཏོར་དུ་རྡོ་རྗེ་འཆང་དཀར་པོ། ཞབས་སྐྱིལ་ཀྲུང༌། ཆོས་འཆད་ཕྱག་རྒྱས་རྡོ་རྗེ་དྲིལ་བུ། ཡུམ་གྲི་ཐོད་འཛིན་པ། ལྷ་མོ་བཞི། མིག་ས་སྙིང༌། རྣ་བར་ཕྱག་རྡོར། སྣར་ནམ་སྙིང༌། ལྕེར་འཇིག་རྟེན་དབང་ཕྱུག །ལུས་སྒྲིབ་སེལ༑ ཡིད་ཀུན་བཟང༌། གོ་རིམ་བཞིན་དུ་གཟུགས་རྡོ་རྗེ་མ་ནས་ཆོས་དབྱིངས་མས་འཁྱུད་པ། དེ་ཐམས་ཅད་ས་བོན་ལས་བསྐྱེད་མི་དགོས། དབང་བསྐུར་སྤྱན་དྲངས་གཤེགས་གསོལ་མི་དགོས། རང་བཞིན་གྱིས་གྲུབ་པ་དྲན་པ་ལས། སྣང་སྟོང་གི་ཡེ་ཤེས་སྐྱེ་སྟེ། བུམ་དབང༌། བཤང་སྒོའི་མེས་ཨ་ཐུང་འབར། མེ་གསལ་ལ་ཚ་བ་སྟོང་པ། ཆོས་གསུམ་ལྡན་འབར། ལྷ་རྣམས་མུན་ཁུང་དུ་སྒྲོན་མེ་བཏེགས་པ་ལྟར་གསལ། རླུང་བསྒོམ། གསལ་སྟོང་གི་ཡེ་ཤེས་སྐྱེ། གསང་དབང༌། མེས་ཧཾ་ཞུ། བ་ཐག་གི་ཕྲེང་བ་ལྟ་བུ་བསྒོམ་སྟེ། བདེ་སྟོང་གི་ཡེ་ཤེས་སྐྱེའོ། །ཤེས་རབ་ཡེ་ཤེས། མ་དག་པ་འཁོར་བའི་ཆོས་ཐམས་ཅད་དག་པ་ལྷ་དང་གཞལ་ཡས་ཁང་ཡིན་ཞིང༌། སྣང་སྟོང༌། གསལ་སྟོང༌། རིག་སྟོང༌། ཐམས་ཅད་རང་སྟོང་ཕྱག་རྒྱ་ཆེན་པོའི་རང་བཞིན་དུ། གཉུག་མ་དེར་ཤེས་ཀྱི་དྲན་པ་མ་ཡེངས་ཙམ། བསྒོམ་དུ་མེད། རང་སྟོང་གི་ཡེ་ཤེས་སྐྱེ། དབང་བཞི་སྟན་ཐོག་གཅིག་ཏུ་བསྒོམ་པའི་མན་ངག་གོ །གཉུག་མའི་ལྷ་ཀུན༵་དག༵འ་བཞིའི་ངང༌། །རང་བབ་རང་གྲོལ༵་སྐྱོང་བའི་ཚུལ། །མཆོ༵ག་ཏུ་གསལ་བ་བསྒོམ་པའི་གནད། །ཡི་གེར་ལེགས་པར་བྲིས་པའོ། །དབང་བཞིའི་ཡིག་རྙིང་ལས་བཏུས་སོ། (༥༧) །དག་པ་གསུམ་གྱི་ཁྲིད་ཡིག །དག་པ་གསུམ་གྱི་ཁྲིད་ནི། སྐྱབས་སེམས་སྔོན་དུ་སོང་ནས། དག་པ་གསུམ་ལས། དེ་བཞིན་ཉིད་ཀྱི་དག་པ། ཕྱི་དང་ནང་གི་དངོས་པོ་ཐམས་ཅད་བརྟགས་ན་ཕྱོགས་དང་དུས་མེད་པ་ལ། ཕྱོགས་དང་དུས་ཀྱི་ཕྱི་ནང་གཅིག་མ་གྲུབ་ཅིང༌། གཅིག་མེད་ཙ་ན་དུ་མ་མི་འབྱུང༌། གཅིག་དང་དུ་མ་མེད་པས་ཡོད་པ་མི་འགྲུབ་ཅིང༌། ཡོད་པ་མེད་ཙ་ན་དེ་ལ་ལྟོས་པའི་མེད་པ་མི་འགྲུབ། ཆོས་ཐམས་ཅད་སེམས་ཀྱི་རང་བཞིན་སྤྲོས་བྲལ་ཡིན་ཞེས་སྒྲོ་འདོགས་བཅད་ནས་བསྒོམ། དེ་ལྟར་མ་རྟོགས་པའི་སེམས་ཅན་སྙིང་རེ་རྗེ་སྙམ་དུ་བསྒོམ། དེ་ལྟར་བསྒོམས་པས་ལྟ་བ་ཕྱིན་ཅི་ལོག་ཏུ་མི་འགྲོ་ཞིང༌། འཇིག་རྟེན་ལས་འདས་པའི་ཡེ་ཤེས་སྐྱེ། ལྷ་སོ་སོའི་དག་པ་བསྐྱེད་རིམ་དཔའ་བོ་གཅིག་པ་ལྟ་བུ་གཅིག་བསྒོམ། ལྷའི་རྣམ་པ་སྣང་ལ་རང་བཞིན་མེད་པ་མེ་ལོང་གི་གཟུགས་བརྙན་ལྟ་བུ་ཝལ་གྱིས་གསལ་བཏབ། སྤྱན་དབུ་མ་ལ་བྱེ་བྲག་ཏུ་གསལ་བཏབ་ནས་བཞག །དེ་ནས་སྤྱན་གསུམ་ཀ །དབུ་རིལ་པོ། སྐུ་རིལ་པོ། གདན་རྣམས་སྔ་མ་བཞིན་དུ་བསྒོམ། ལྷ་ལ་དམིགས་པ་གསལ་བ་དང་རྒྱ་བསྐྱེད་འཇིག་རྟེན་ཐམས་ཅད་ཁྱབ་པར་བསྒོམ། དེ་ནས་རིམ་པ་བཞིན་དུ་ཡུངས་འབྲུའི་ཚད་ཙམ་གྱི་ནང་དུ་ལྷ་གསལ་བཏབ། དམིགས་པ་དེ་ལྟ་བུ་གྲུབ་པ་དང་བསྐྱེད་པའི་རིམ་པ་མཐར་ཕྱིན་པ་ཡིན་ནོ། །རང་རིག་པའི་དག་པ་བསྒོམ་པ། བསམ་གཏན་ཡན་ལག་དགུ་སྦྱང༌། རྩོལ་བ་བཀག་ནས་སྲོག་ནས་བཏང༌། ཤུགས་བསྐྱེད་དེ་གཉིས་ཀ་ནས་བཏང༌། ཁ་ནས་སྒྲ་བཅས་སུ་བཏང༌། རྩོལ་བ་བཀག་སྟེ་སྲོག་ནས་དགང་ཁ་ནས་སྒྲ་མེད་དུ་དགང༌། རླུང་ཁ་སྦྱར་ཏེ་བདུན། གཏུམ་མོ། ལུས་ཙོག་པུ་ཐབ་འགལ་ཕྱག་རྒྱ་བཅའ། ལྟེ་བའི་སོར་བཞིའི་འོག་ཏུ་གཏུམ་མོའི་མེ་རྟ་རྔ་བརྒྱར་གཤགས་པ་ལྟར་ཕྲ་བ། སོར་ཕྱེད་ཀྱི་ཚད་དང་མཉམ་པ་ཚ་བ་ངར་དང་ལྡན་པ་གཅིག་བསྒོམས་ནས། སྟེང་རླུང་མནན། འོག་རླུང་བསྡམ། མ་ཐུབ་ན་དལ་བུས་བཏང༌། བསྒོམས་པས་ལུས་ལ་དྲོད་ཅི་རིགས་པ་འབྱུང༌། མཐར་ཕྱིན་པའི་ཚེ། དྲོད་རྒྱུན་མི་འཆད་པ་འབྱུང༌། ལུས་ཐམས་ཅད་ལ་བདེ་བ་སྐྱེའོ། །ཐིག་ལེའི་རྣལ་འབྱོར། སྙིང་གའི་ནང་དུ་ཟླ་བ་སེན་མོ་ཟླུམ་པོ་ཙམ། དེའི་སྟེང་དུ་ཐིག་ལེ་དཀར་ལ་ཟླུམ་པ་སྲན་མ་ཙམ་ལ་ཡིད་གཏད། གོམས་པ་དང༌། སྨིན་མཚམས་སུ་ཐིག་ལེ་སྔ་མ་ལྟ་བུ་བསྒོམ། གོམས་པ་དང་གསང་གནས་ཀྱི་ནང་དུ་ཐིག་ལེ་དམར་པོ། གོམས་པ་དང་ཐིག་ལེ་གསུམ་འོད་ཀྱི་སྐུད་པ་ཕྲ་མོ་གཅིག་གིས་སྦྲེལ། དབུགས་ཕྱིར་རྒྱུ་བའི་ཚེ་གསང་གནས་ཀྱི་ནུས་པ་སྙིང་ལ། ནང་དུ་འཇུག་པའི་ཚེ་སྨིན་མཚམས་ཀྱི་ནུས་པ་སྙིང་ལ། གནས་པའི་ཚེ་སྙིང་གི་ནུས་པ་ལུས་ཡན་ལག་གི་རྩ་སྦུབས་ཁམས་ཐམས་ཅད་ན་རྒྱས་པར་བསྒོམ། འཁོར་ལོ་ལ་བརྟེན་ནས་ལུས་ཀྱི་དབུས་ཀྱི་ཆ་ལ། ཨ་ཝ་དྷཱུ་ཏི་ཕྲ་བ། གཡས་ར་ས་ནཱ་དམར། གཡོན་ལ་ལ་ནཱ་དཀར། ལྟེ་བར་འདབ་མ་དྲུག་ཅུ་རྩ་བཞི་པའི་ལྟེ་བར་ༀ། སྙིང་ཁར་འདབ་མ་བརྒྱད་པའི་ལྟེ་བར་ཧཱུྃ། མགྲིན་པར་འདབ་མ་བཅུ་དྲུག་པའི་ལྟེ་བར་ༀ། སྤྱི་བོར་འདབ་མ་སུམ་ཅུ་རྩ་གཉིས་པའི་ལྟེ་བར་ཧ་བསམ། རླུང་བསྐྱོད། མེ་སྦར། གཡས་ནས་སོང༌། སྙིང་ཁའི་འཁོར་ལོ་བསྲེགས། མགྲིན་པའི་འཁོར་ལོ་ཡང་བསྲེགས། མེ་སྤྱི་གཙུག་ནས་སོང་ནས། སངས་རྒྱས་ཀྱི་ཞབས་ལོང་བུ་གཡས་ནས་ཞུགས། སངས་རྒྱས་ཀྱི་བྱང་སེམས་མེའི་ནུས་པས་དྲངས་ནས་སྤྱི་གཙུག་ནས་བབ་གཡོན་ནས་ཞུགས། སྤྱི་མགྲིན་ལྟེ་བའི་ཨ་ལ་ཕོག །ཟེར་ཕྲ་བ་ཀུན་འདར་ནང་ལ་སོང༌། སྤྱི་གཙུག་གི་ཧཾ་ལས་ཐིག་ལེ་ཕྲ་བ་བབས། ལུས་ཀྱི་རྩ་ཡིག་ལ་ཁྱབ་པ་ལ་དམིགས་པ་གཏད། རླུང་ཁ་སྦྱར། མཐར་ཕྱིན་པའི་རྟགས། རླུང་ནང་དུ་ཅི་ཙམ་གནས་པར་ཐུབ། ཕྱིར་ཅི་ཙམ་འདོད་པར་གཏོང༌། སྟེང་འོག་གི་ནད་སྟེང་འོག་ཏུ་དབྱུང་བར་ནུས། ཐིག་ལེ་རྒྱས། མངོན་པར་ཤེས་པ་འབྱུང༌། ཟོ་མདོག་བཟང༌། རྫུ་འཕྲུལ་སྟོན་ནུས། རླུང་སེམས་ལ་དབང་འབྱོར། གསུམ་པའི་ལམ་སྦྱངས་པས་འདས་པའི་ཡེ་ཤེས་སྐྱེ། སངས་རྒྱས་ཀྱི་སའི་བར་དུ་བགྲོད་པར་འགྱུར་རོ། །དག་པ་གསུམ་དུ་ཀུན༵་བསྡུས་ནས། །རྩ་བ་མེད་པའི་ལམ་འབྲས་དེས། །དག༵འ་བཞིའི་རྒྱུད་དོན་མདུད་གྲོལ༵་མཆོ༵ག །ཇི་བཞིན་ཡི་གེར་བཀོད་པའོ། །ཆོས་ཀྱི་རྒྱལ་པོ་འཕགས་པའི་ཁྲིད་དཔེ་ལས་བཏུས་སོ། (༥༨) །རང་བྱིན་རླབས་ཀྱི་ཁྲིད་ཡིག །རང་བྱིན་རླབས་ཀྱི་དམིགས་པ་ཉི་ཤུ་རྩ་དགུའི་ཁྲིད་ནི། སྐྱབས་སེམས་སྔོན་དུ་སོང་ནས༑ ཙཎྜ་ལི་དང་པོ། བསྐྱེད་རིམ་གྱི་ལྷ། ལུས་གནད་ཙོག་པུ། ལག་པ་གཉིས་པུས་མོར་འཁྱུད། མགོ་མི་མཐོ་མི་དམའ་རན་པ། ལྟེ་བའི་དབུས་སུ་ཨཾ་དམར། སྙིང་གའི་དབུས་སུ་ཧཱུཾ་སྔོ་སྐྱ། འདབ་མ་ཡི་གེ་འགོད་པ་དང་བྲལ༑ དབུ་མ་ཆ་ཕྲ་བས་སྦྲེལ། རླུང་མནན། ཨཾ་གི་མེ་སྦར། ཧཱུཾ་ཞུ་བར་བསྒོམ། གཉིས་པ་སྤྲུལ་འཁོར་ལྟེ་བར་ཨཾ། ཕྱོགས་འདབ་ལ་བརྩེགས་ཀྱི་ཡི་གེ་བཞི། མཚམས་བཞིར་རྐྱང་པ། ཡི་གེ་དགུ་པོ་ཐམས་ཅད་མེའི་རྣམ་པར༑ རླུང་མནན་ལ་བསྒོམ། གསུམ་པ་སྤྲུལ་འཁོར་ལྟེ་བར་ཨཾ། འདབ་མ་ལ་ཨཱ་ལི་གཉིས་གཉིས་མེའི་རྣམ་པ། རླུང་མནན། མཐར་ཨཾ་ལ་བསྡུ། བཞི་པ་འཁོར་ལོ་བཞིའི་ལྟེ་བར་ཨཾ་ཧཱུྃ་ༀ་ཧྃ། འདབ་བརྒྱད་ལ་སྡེ་ཚན་བརྒྱད། དཀར་སྔོ་དམར་དཀར། དབུགས་རྒྱུ་དུས་ཡར་གསལ་གདབ། འཇུག་དུས་མར་གསལ་བཏབ། གནས་དུས་ཡིག་འབྲུ་ལ་བསྟིམ། རླུང་མནན་ཅིང་བསྒོམ། ལྔ་པ་སྤྲུལ་འཁོར་ལྟེ་བར་ཨཾ། འདབ་བརྒྱད་ལ་སྡེ་ཚན་བརྒྱད། རླུང་མནན། ཡིག་འབྲུ་གཡོ་བར་དམིགས་ཏེ་བསྒོམ་མོ། །དྲུག་པ་སྤྲུལ་འཁོར་ཨཾ། ཆོས་འཁོར་བཾ། ལོངས་སྤྱོད་ལཾ། བདེ་ཆེན་ཡཾ། འབྱུང་བ་སོ་སོའི་ཁ་དོག་ཅན། རླུང་ཨཾ་ལ་བསྟིམ། ཐུབ་ཚད་གནོན། བདུན་པ་སྤྲུལ་འཁོར་ལྟེ་བར་ཨཾ། འདབ་མ་བརྒྱད། ཨ་ཀ་ཙ་ཊ་ཏ་པ་ཡ་ཤ །ཆོས་འཁོར་ལྟེ་བ་ལ་ཧཱུཾ། རླུང་ཨཾ་ལ་བསྟིམ། ཧཱུྃ་གསལ་གདབ་ཅིང་བསྒོམ། བརྒྱད་པ་ཆོས་འཁོར་དབུས་སུ་ཧཱུཾ། ཕྱོགས་བཞིར་ཨ་ཨཱ་ཨཾ་ཨཿ ཐིག་ལེས་བརྒྱན། མཚམས་བཞིར་ར་རཱ་ལ་ལཱ། རླུང་འཇུག་ཙ་ན་ཧཱུཾ་ཨཾ་ལ་བསྟིམ་ཞིང་བསྒོམ་མོ། །དགུ་པ་ཆོས་འཁོར་ལྟེ་བར་ཟླ་བ་སྲན་མ་ཕྱེད་བཀས་སྟེང་དུ་ཧཱུཾ་དཀར་ཡུངས་འབྲུ་ཙམ། རླུང་མནན་ཅིང་བསྒོམ། བཅུ་པ་འཁོར་ལོ་བཞིའི་དབུས། ཨཾ་ཧཱུཾ་ༀ་ཧྃ། འདབ་མ་རྣམས་ཡི་གེ་དགོད་པ་དང་བྲལ་བ། རླུང་བསྒོམ། མེ་སྦར། ཧཱུཾ་ཞུ་བ་ལ་དམིགས། བཅུ་གཅིག་པ་སྤྲུལ་འཁོར་ལྟེ་བ་ལ་ༀ། འདབ་མ་ཡི་གེ་བྲལ། ཨཾ་མེར་འབར། སྙིང་ཁ་ནས་ལོག །སྨིན་མཚམས་ཀྱི་སྒོ་ཕྱེ། དེ་བཞིན་གཤེགས་པ་གནད་ཀྱི་སྒོ་ཕྱེས། བྱང་སེམས་ཀྱི་རྒྱུན་བྱུང་ལྟེ་བའི་ཨཾ་ལ་ཐིམ། རླུང་ཁ་སྦྱར། བཅུ་གཉིས་པ་སྤྲུལ་འཁོར་དབུས་སུ་ༀ། འདབ་བརྒྱད་ར་ཧ་བཅུ་དྲུག་གཉིས་གཉིས་རྣམ་པ་ཡིག་འབྲུ་གྱེན། རླུང་མནན་བསྒོམ། བཅུ་གསུམ་པ་སྙིང་ག་ལྟེ་བར་ཧཱུཾ། འདབ་མ་ལྔ་ལ་ར་ཧ་ས་ཡ་ཨ་དཀར་པོ་བསྒོམ། རླུང་མནན། བཅུ་བཞི་པ་ཡར་རྐན་ལྕེ་ཆུང་གི་རྩ་བར་པདྨ་འདབ་མ་བཞི་པའི་ལྟེ་བར་ༀ། འདབ་མ་བཞི་ལ་ར་ཧ་ས་ཡ་དམར། རླུང་ཕྱིར་འགྲོ་ཡིག་འབྲུ་ལ་བསྟིམ། འོང་དུ་མི་གཞུག་པའོ། །བཅོ་ལྔ་པ། ཨ་ཀ་ཙ་ཊ་ཏ་པ་ཡ་ཤ་ཆོས་འཁོར་ལ་བཀོད། ལྟེ་བར་ཐིག་ལེ་དཀར་པོ། སྲོག་རླུང་འཇུག་པ་མར་གཡོས། རྩོལ་བའི་རླུང་གིས་ཡར་འཕུལ་བར་བསྒོམ། བཅུ་དྲུག་པ་སྤྲུལ་འཁོར་དབུས་ཟླ་ཉི་སྲན་མ་ཕྱེད་བཀས་ཙམ་ཁ་སྦྱར་བའི་དབུས་སུ། ཐིག་ལེ་དཀར་པོ་ཡུངས་འབྲུ་ཙམ། དབུགས་ཕྱིར་འགྲོ་དུས་ས་རླུང་སེར་པོ་ཐིག་ལེ་ལ་བསྟིམ། དེ་བཞིན་དུ་ཆུ་དཀར། མེ་དམར། རླུང་ལྗང༌། སྤྲོ་ཞིང་བསྒོམ། བཅུ་བདུན་པ་ཆོས་འཁོར་ལྟེ་བར་ཐིག་ལེ་དཀར་པོ་ཡུངས་འབྲུ་ཙམ་ཅིག་བསམ། དབུགས་འཇུག་དུས་གཡོན་ལ་བསྟིམ། རླུང་མནན་པའོ། །བཅོ་བརྒྱད་པ་འཁོར་ལོ་བཞིའི་ལྟེ་བར་ཐིག་ལེ་རེ་བསྒོམས་ལ་རླུང་མནན། བཅུ་དགུ་པ་འཁོར་ལོ་བཞིར་ཨཾ་ཧཱུཾ་ༀ་ཧཾ། སྔོ་དམར་དཀར་བ། དབུགས་འགྲོ་དུས་འོད་ཟེར་སྣ་སྒོ་གཉིས་ནས་སྤྲོ། འཇུག་དུས་ཡི་གེ་ཡང་ཡང་བསྒོམ། ཉི་ཤུ་པ་འབྱུང་བ་བཞིའི་དཀྱིལ་འཁོར་ཡེ་ནས་གནས་པ་གསལ་བཏབ། རླུང་བསྐུམ། རླུང་གིས་མེ་སྦར་བས་ཆུ་བསྐོལ། ས་ཞུ། རླངས་པས་སྤྱི་བོའི་ཧཾ་ཞུ་བར་བསྒོམ། ཉི་ཤུ་རྩ་གཅིག་པ་སྤྲུལ་འཁོར་ཨཾ། འདབ་མ་ལ་ཨ་ཀ་ཙ་ཊ་ཏ་པ་ཡ་ཤ །ཕྱི་སྐོར་ལ་ཨཱ་ལི་ཕྲག་གཉིས། ཀཱ་ལི་ཧ་ཀྵ་སྤངས་པ་སོ་གཉིས། ཆོས་འཁོར་ཧཱུཾ། ཕྱོགས་བཞི་ལ་ཨཱ་ཨཱི་ཨུ་ཨེ། མཚམས་བཞིར་ཡ་ཝ་ར་ལ། ལོངས་སྤྱོད་ༀ་ནང་མ། ཨ་ཨི་ཨུ་ཨེ་ཕྱི་སྐོར། དབྱངས་མ་ནིང་དང་བྲལ་བ། བདེ་ཆེན་ཧཾ། འདབ་མ་ལ་ཨཱ་ལི་ཕྲག་གཉིས། རྩ་གཉིས་ཀྱང་གསལ་བཏབ། འོག་རླུང་བསྐུམ། མེ་སྦར། ཨཾ་མེར་འབར། འཁོར་ལོ་གཉིས་བསྲེགས། མེ་ལན་གསུམ་ལོག །ཧཾ་བསྲེགས། བྱང་སེམས་རྒྱུན་བབས། ཡིག་འབྲུ་རྣམས་གསོས་བཏབ། ཨཾ་འབར། ཆ་ཕྲ་བ་དབུ་མ་ནས་འབར། ཧཾ་ཞུ་བ་ལ་བློ་གཏད། རླུང་ཁ་སྦྱར། ཉི་ཤུ་རྩ་གཉིས་པ་སྤྲུལ་འཁོར་ལྟེ་བར་ཨཾ་བསམ། འོག་རླུང་ཨ་ལོང་འབྱེད་འཛུམ་བྱ། ཤེས་པ་ཨཾ་ལ་གཏད། མཐར་ཨཾ་གིས་མེ་སྦར། བྱང་སེམས་ལྟེ་བར་བྱུང༌། ཉི་ཤུ་རྩ་གསུམ་ཆོས་འཁོར་ཧཱུཾ། ཕྱོགས་བཞི་ༀ་ཏྲཾ་ཧྲཱིཿ ཁཾ། རླུང་འབྲུ་ལྔ་ལ་བསྟིམ་ཞིང་གནོན། ཉི་ཤུ་རྩ་བཞི་པ་ཆོས་འཁོར་ལྟེ་བར་ཟླ་བ། སྟེང་དུ་ཧཱུཾ་དཀར། དབུགས་རྔུབ་ཧཱུཾ་ལ་བསྟིམ། སྟེང་རླུང་མནན། ཧཱུཾ་འབར། མཐར་རང་བྱུང་གི་ཡེ་ཤེས་སྐྱེས། ཉི་ཤུ་རྩ་ལྔ་པ་ཐིག་ལེའི་རྣལ་འབྱོར། ཚངས་པའི་སྒོར་ཟླ་བ་སྲན་མ་ཕྱེད་བཀས་ཙམ་སྟེང་དུ་ཧཱུཾ་དཀར་པོ་ཐུར་དུ་བལྟ་བ། འོག་ཏུ་སུཾ་དཀར་པོ་ཐུར་བལྟས། དབུགས་འགྲོ་དུས་སུཾ་ལས་བདུད་རྩི་འོ་མའི་རྒྱུན་ལྟར་བབས་པར་བསམ། ལྕེ་ཆུང་བཟློག་སྟེ་མྱང༌། ཉི་ཤུ་རྩ་དྲུག་པ་སྒོ་བཅུའི་ཐིག་ལེ༑ སྙིང་གར་ཟླ་བར་ཧཱུཾ་དཀར་པོ། དབུགས་འགྲོ་དུས་སྒོ་དགུ་སྨིན་མཚམས་དང་བཅུ་པོ་ཐམས་ཅད་མུན་ཁུང་དུ་སྒྲོན་མེ་བཏེགས་པ་ལྟར་གསལ་བཏབ། ཐིག་ལེའི་ཆར་རྒྱུན་བབས་པར་ཡང་བསྒོམ། ཉི་ཤུ་རྩ་བདུན་པ་སྙིང་ཁར་ཟླ་བ། དབུགས་རྒྱུ་ན་སུམ་ཅུ་སོ་གཉིས་གསལ་བཏབ། འཇུག་ན་རྩ་ཐམས་ཅད་བྱང་སེམས་ཀྱི་ཐིག་ལེས་གང་བར་ཡང་ཡང་བསྒོམ། ཉི་ཤུ་རྩ་བརྒྱད་པ་ཚངས་པའི་ཐིག་ལེ། སྙིང་ཁར་ཟླ་བ་ཧཱུཾ་དཀར་པོ། ཚངས་པའི་སྒོར་ཧཾ་དཀར་པོ། རླུང་ཕྱིར་འགྲོ་དུས་ཧཾ་ལ་རེག །ཧཾ་ལས་བདུད་རྩི་བབས་པ་ཡང་ཡང་བསྒོམ། ཉི་ཤུ་རྩ་དགུ་པ་སྤྲུལ་འཁོར་ཨཾ། ཆོས་འཁོར་ཧཱུཾ་ཐུར་བལྟས་ཆ་ཕྲ་བ་ཟུང་སྦྲེལ། ཨཾ་གིས་མེ་སྦར་ཧཱུཾ་འཛག་པ་ལ་བློ་གཏད་རླུང་བསྒོམ་པའོ། །རྒྱུད་སྡེ་ཀུན༵་གྱི་བཤད་གཞི་ལ། །དག༵འ་ཆེན་ལྷན་སྐྱེས་གྲོལ༵་ལམ་མཆོ༵ག །རང་བྱིན་རླབས་པའི་དམིགས་པའི་ཐོ། །ཡི་གེའི་སྣང་བར་སྤེལ་འདིའོ། །འབྲོག་མིའི་ཡིག་རྙིང་ལས་བཏུས་སོ། (༥༩) །ལམ་སྦས་བཤད་ཀྱི་ཁྲིད་ཡིག །ལམ་སྦས་བཤད་ཀྱི་ཁྲིད་ནི། སྐྱབས་སེམས་སྔོན་དུ་སོང་ནས། རྫ་ལས་འཁོར་ལོ་ཞེང་དུ་མཐེབ་མཛུབ་གཉིས་སྦྱར་བའི་ནང་དུ་ཆུད་ཅིང༌། དཔངས་སུ་སོར་བཞི་པ་རྩེ་མོ་ཅུང་ཟད་ཕྲ་བ་དར་ལ་སོགས་པས་དྲིལ་ཏེ་བཞག །འབོལ་གྱི་སྟེང་དུ་ལུས་གླང་པོ་ཆེའི་རྣ་བ་ལྟ་བུའི་སྐྱིལ་ཀྲུང་བཅའ། སྔར་གྱི་འཁོར་ལོ་སྲིན་བུའི་ལམ་གྱི་ཐད་ཀར་བཞག་བརླ་རེ་མོས་འདེག །འོག་རླུང་འདྲེན། མི་བདེ་ན་སྨད། བདེ་ན་ཟོ་བཟུང༌། རང་དགེས་པ་རྡོ་རྗེ་དམིགས་པའི་གློ་བ་པདྨ་དཀར་པོ་འདབ་མ་བརྒྱད་ཁ་ཐུར་དུ་བལྟ་བ། མཆིན་པ་པདྨ་དམར་སྨུག་འདབ་མ་གྱེན་ལ་བསྟན་པ་སྟེ། དེ་གཉིས་རྩེ་མོ་ཅུང་ཟད་བསྣོལ་བ་ལས་གཞལ་ཡས་ཁང་གི་ཚུལ་དུའོ། །དེའི་དབུས་ན་རྩ་གསུམ་གྱི་མདུད་པ་ཡི་གེ་ཧཱུཾ་ཐུགས་རྗེའི་ངོ་བོ། ཧཱུྃ་ལས་རྡོ་རྗེ་ཧེ་རུ་ཀ་སྐུ་མདོག་སྔོ་ནག་མཆེ་བ་གཙིགས་པ་སྤྱན་གསུམ་གཡས་ཉི་མ་གཡོན་ཟླ་བ་དབུས་སྒྲ་གཅན། ཞབས་གཡས་ཀྱིས་ཉི་མ་མནན་པས་རྩ་རོ་མའི་རཀྟ་འཕོར་མི་སྟེར། གཡོན་པས་ཟླ་བ་མནན་པས་རྐྱང་མའི་བྱང་སེམས་འཕོར་མི་སྟེར། བཅོམ་ལྡན་འདས་ནི་རྩ་དབུ་མ་སྒྲ་གཅན་དག་པ། ཡེ་ཤེས་ཀྱི་མེ་འབར་བའི་དབུས་ན་བཞུགས་པ། དུས་ཀྱི་མེ་དག་པ། ཕྱག་གཉིས་རྡོ་རྗེ་དྲིལ་བུ་ཐུགས་ཀར་བསྣོལ་བ། ཉི་ཟླའི་རླུང་དབུ་མར་འཇུག །དབུའི་གཙུག་ཏོར་ནི་ཉི་ཟླ་གཟས་བཟུང༌། རྒྱན་དྲུག་ནི་ཕར་ཕྱིན་དྲུག་ཡིན་སྙམ་པ་ཙམ་བྱ། ལག་པ་པུས་མོ་ལ་བཀབ། ལྟོ་བ་བསྐྱོད། ལྕེ་རྐན་ལ་སྦྱར། མིག་ཅུང་ཟད་བགྲད། སྟེང་རླུང་ཧིག་གིས་དྲངས་ཤིང་སིབ་ཀྱིས་མནན། འོག་རླུང་འཐེན། ཟས་སྤྱོད་ལམ་གྱིས་བསྐྱང་ཞིང་བསྒོམ། ཕྱི་རོལ་དུ་སྣང་བ་དཀར་ལམ་པ་ཡོང་། ལུས་དྲོད་དང་བདེ་བ་སྐྱེ། སེམས་གཟུང་འཛིན་དང་བྲལ་ཁམས་འདུས་པ་དང་པོའི་ཐད་སོར་སླེབས་པ་ཡིན། ཟླ་བ་གཅིག་ནས་དུ་བ་ལ་སོགས་པའི་རྟགས་ལྔ་འབྱུང༌། ཟླ་བ་གསུམ་ནས་ལུས་རས་བལ་གྱི་འདབ་མ་ལྟར་ཡང་། སེམས་གཟུང་འཛིན་དང་བྲལ་བ། མཉམ་རྗེས་མེད། ཁམས་འདུས་པ་བར་མའི་ཐད་སོའོ། །དེ་ནས་སྣང་བ་ལྷར་འཆར་ཕོ་བྲང་ལྔའི་ལྷ་གསལ། མཉམ་བཞག་མི་རྟོག་པའི་ཏིང་ངེ་འཛིན། རྗེས་ཐོབ་མངོན་པར་ཤེས་པ་ཅི་རིགས་འབྱུང༌། ཁམས་འདུས་པ་ཐ་མའི་ཐད་སོར་སླེབས། དེར་རྟེན་འབྲེལ་གྱི་སྟོབས་ཀྱིས་མཐོང་ལམ་སྐྱེ། མིག་ཐུར་མས་ཕྱེ་བ་བཞིན་ནོ། །སྔར་གྱི་འཁོར་ལོ་སོར་གཅིག་ཐིམ་ན་བདེ་བ་སྐྱེ། གཉིས་ཐིམ་ན་དེ་བས་ཀྱང་བདེ་བ། གསུམ་ཐིམ་ན་ཆེས་ཆེ་བའི་བདེ་བ། བཞི་ཐིམ་ན་མཐོང་ལམ་སྐྱེ། ལྔ་པ་ཕན་ཆད་ཐིམ་དུ་མི་རུང་སྟེ་ཚེའི་བར་ཆད་དུ་འགྱུར། འཁོར་ལོ་ཡང་རང་ཤུགས་ཀྱིས་འདོམས་ཀྱི་སྦ་བ་སྦུབས་སུ་ནུབ་པ་འབྱུང་གསུང་ངོ༌། །གནས་སྐབས་ཀྱི་སྤྱོད་ལམ། ཟས་ཟོས་ནས་དར་ཅིག་མི་བསྒོམ། སྙིགས་མ་ལྟེ་བ་ཡན་ཆད་ལ་ཡོད། མཁལ་འདེགས་མན་ངག་ལྟར་བྱ། སྤྱི་སྦྱོར་མགོ་ས་ལ་བཙུགས། རྐང་པ་གྱེན་ལ་བསྟན་ཏེ་སྟེང་དུ་བརྐྱང་བསྐུམ་ཡང་ཡང་བྱ། ལུས་ཟུངས་རྒྱས་ཕྱིར་རྐང་པ་གཉིས་ལྟག་པར་བསྣོལ། ལྟག་པར་སོར་མོ་བཅུ་བསྣོལ། མིག་ཧུར་ཕྱུང་ལ་རླུང་ཁ་སྦྱར། མགོ་གཡས་གཡོན་དུ་གཅུ། མིག་དཔངས་གཏོད་པ་གཅེས་སོ༑ ༑ཀུན༵་ཏུ་གབ་པ་སྦས་བཤད་ཀྱི། །ཡི་གེ་མཐོང་ན་དག༵འ་བ་འདི། །གྲོལ༵་མཆོ༵ག་རང་གིས་ཐོབ་པའི་ཚུལ། །ཇི་བཞིན་ཡི་གེར་བྲིས་པའོ། །ཆོས་རྗེ་ས་སྐྱ་པཎྜི་ཏའི་ཁྲིད་དཔེ་ལས་བཏུས་སོ། (༦༠) །བརྡ་དོན་གསལ་བའི་ཁྲིད་ཡིག །བརྡ་དོན་གསལ་བའི་ཁྲིད་ནི། སྐྱབས་སེམས་སྔོན་དུ་སོང་ནས། སྦྱང་བ་གསུམ། བསྒོམ་པ་གསུམ། གནད་ལ་དབབ་པ་དང་གསུམ་བསྟན། ཡང་ན་དཔེ་ཆུ་ཟླ་ལྟ་བུ་གཅིག་གིས། སེམས་སྒྱུ་མ། རྟེན་འབྲེལ་བརྗོད་བྲལ། ཡང་དཔེ་གཅིག་གིས་བཞི་ཀ་འབྲེལ་ཆགས་བསྒོམ། ལྟ་བ་ཐབས་ཉམས་སུ་བླང་བ་ལ། བུམ་དབང༌། གསང་དབང༌། ཤེས་རབ་ཡེ་ཤེས། བཞི་པ། ལུས་དཀྱིལ་ལ་ལྷ་བརྒྱ་ལྔ་བཅུ་རྩ་བདུན་ནམ། ཡང་ན་ཕོ་བྲང་ལྔ། ཡང་ན་གཙོ་བོ་ཡབ་ཡུམ་གྱི་ཐུགས་ཀའི་འོད་ཟེར་གྱི་སྤྲོ་བསྡུས་སྣོད་བཅུད་དཀྱིལ་འཁོར་དང་ལྷར་བསྒོམ། དབང་འབྲིང་དུ་བླང་བའི་ཚིགས་བཅད་བཞིས་བྱང་ཆུབ་ཀྱི་སེམས་ཀྱི་ཆུ་རྒྱུན་གཅིག་ལ་དབང་རྫོགས་པར་བླང༌། གསང་དབང་ལ་རླུང་སྦྱོར་བདུན་ནམ། རྡོ་རྗེའི་བཟླས་པ། གཏུམ་མོ་བཅོ་བརྒྱད་དམ། ཡང་ན་རྩ་ལམ་སྦྱོང་བའི་ཚུལ་གྱིས་རྩའི་རྣལ་འབྱོར། གཏུམ་མོ་གསུམ་ཚང་ཚུལ་གྱིས་འཁོར་ལོ་བཞི༑ བོགས་འབྱིན་ཚུལ་གྱིས་ཐིག་ལེའི་སྦྱོར་བ་བཞི། བར་ཆད་སེལ་བའི་ཚུལ་གྱིས་མེ་ཆེར་འབར་བ་སྟེ་བདུན་ནམ། ཡང་ན་དབུ་མའི་འབར་འཛག་ཁོ་ན་བསྒོམ་མོ། །ཤེས་རབ་ཡེ་ཤེས་ཀྱི་རླུང་སྦྱོང་བ་ལམ་རྒྱས་པ་བཞིན་དངོས་གཞི་ཡེ་ཤེས་ཀྱི་རིག་མ་ལ་བསྲུབ། དབབ་བཟུང་བཟློག་ཁྱབ་བཞི། བཞི་པ་ངག་འདྲེན་པ་ཞི་དྲག་སྐད་ཅིག་མ་བདུན་ནམ། སྐད་ཅིག་མ་གསུམ་མམ་ཐུན་གཅིག །དེ་ལྟར་ན། རྒྱས་པ་ནི་སྔོན་འགྲོ་ལ་དམིགས་པ་ བསགས་སྦྱངས་གཉིས་ཀ་ལ་གཅིག །སྦྱང་བ་གསུམ་ལ་གཅིག །དེ་མན་ཆད་གཅིག །གསུམ། ལྟ་བས་ཐག་བཅད་པ་ལ་སུམ་ཅུ་རྩ་བདུན་ནམ་བུམ་དབང་ དྲན་པ་བསྐྱེད་པ་ལ་གཅིག །ཕོ་བྲང་ལྔ་ལ་རེ་རེ། ཡན་ལག་ལ་གཅིག །ལ་བདུན། རླུང་གི་སྦྱོར་བ་བདུན། གཏུམ་མོ་ལ་བཅོ་བརྒྱད། ཞུ་བདེ་ སྦྱང་བ་ལ་གཅིག །བསླབ་པ་ལ་ལྔ། མཉམ་པར་སྦྱོར་བ་ལ་གཅིག །ལ་བརྒྱད། བསྲུབ་པ་ལ་གཅིག །རྡོ་རྗེའི་རྦ་རླབས་ལ་དགུ་ ངག་འདྲེན་པ་ཞི་དྲག་གཉིས། སྐད་ཅིག་མ་བདུན། སྟེ། བརྒྱད་ཅུ་རྩ་དགུ༑ འབྲིང་ལ་སྔོན་འགྲོ་ལ་གསུམ། ལྟ་བ་ལ་བཞི། བུམ་དབང་ལ་གསུམ། རླུང་སྦྱོར་ལ་བདུན། གཏུམ་མོ་ལ་བདུན། ཞུ་བདེ་ལ་བཞི། རྦ་རླབས་ལ་ལྔ་སྟེ་སུམ་ཅུ་རྩ་གསུམ། བསྡུས་པ་ལ། སྔོན་འགྲོ་ལ་གསུམ། ལྟ་བ་ལ་གཅིག །བུམ་དབང་ལ་གཅིག །རླུང་སྦྱོར་ལ་གཅིག །གཏུམ་མོ་ལ་གཅིག །ཞུ་བདེ་ལ་གཅིག །བཞི་པ་ལ་གཅིག་སྟེ་དམིགས་པ་དགུ་སྟེ། རྒྱས་འབྲིང་གསུམ། ཕྱོགས་རེ་ལ་མ་འཐས་པར། ཀུན་ལ་འཕྲུལ་ཆགས་པ་རྒྱ་འབག་གི་མིག་ལྟར་ཤེས་པར་བྱའོ། །ཀུན༵་ནས་ཡིད་དག༵འ་སྐྱེད་བྱེད་པའི། །གྲོལ༵་ལམ་མཆོ༵ག་གི་གནད་འདོམས་ཏེ། །ལམ་འབྲས་སྙིང་པོའི་ཡང་སྙིང་འདི། །ཡི་གེར་ཆ་ཤས་ཙམ་ཞིག་བྲིས། །ཆོས་རྗེ་ས་སྐྱ་པཎྜི་ཏའི་ཁྲིད་ཡིག་ལས་བཏུས་སོ། །དཔེ་འདི་ཉིད་ན་འདི་ཐོག་ཏུ་དཀྱུས་དྲངས་ནས་བཀླག་ཆོག་གི་ཡི་གེ་བྱེད་ན། དཔལ་མགོན་ལྕམ་དྲལ་གྱིས་མགོ་བོ་ཁོས་ཤིག་ཅེས་བཀའ་རྒྱ་ཡོད་པས། རྒྱས་པར་འབྲིར་མི་རུང་ལ། མགོ་དོགས་མཆན་བུ་ཅུང་ཟད་ཀྱིས་བཀྲོལ་བའོ། (༦༡) །གསང་འདུས་རིམ་ལྔའི་ཁྲིད་ཡིག་ནི། གསང་འདུས་རིམ་ལྔའི་ཁྲིད་ནི། སྐྱབས་སེམས་སྔོན་དུ་སོང་ནས། སེམས་འཛིན་གཙོ་བོ་ལ་བརྟེན་ནས་སྣོད་བཅུད་ལྷར་མ་ཤར་གྱི་བར་དུ་བསྒོམ། དེ་ནི་དྲན་པ་གཅིག་པའི་རྣལ་འབྱོར་ཞེས་བྱའོ། །ལུས་དབེན་སྐུ་རྡོ་རྗེའི་རྣལ་འབྱོར་ཁྲིད་ཀྱི་དུས་དངོས་གཞི། གསང་ཆེན་རིགས་གཅིག །དམ་པ་རིགས་བརྒྱ། གོ་བདེ་བརྗོད་ན་ཕྱིའི་སྐྱེ་མཆེད་ལྔ། ནང་གི་སྐྱེ་མཆེད་ལྔ། ཕུང་པོ་ལྔ། འབྱུང་བ་བཞི་སྟེ་བཅུ་དགུ་ལ། ལྔ་ལྔར་ཕྱེ་ནས་དགུ་བཅུ་རྩ་ལྔ། ཡེ་ཤེས་ལྔ་སྤྱི་ཁྱབ་ཏུ་ཡོད་པ། བགྲངས་པས་རིགས་བརྒྱ། དེའང་གཟུགས་ལ། གྲུ་བཞི་ཟླུམ་པོ། རིང་ཐུང་སོགས་དབྱིབས་རྣམས་རྣམ་སྣང༌། བདག་གཞན་དུ་སྣང་བའི་གཟུགས་རྣམས་རྣམ་སྣང་གི་རིན་འབྱུང༌། སྔོ་སེར་སོགས་ཁ་དོག་གཟུགས་རྣམས་རྣམ་སྣང་གི་འོད་དཔག་མེད། ཉི་ཟླའི་འོད་སོགས་སྣང་བའི་གཟུགས་རྣམས་རྣམ་སྣང་གི་དོན་གྲུབ། མིག་བཙུམ་པའི་ཚེ་ཡིད་ཀྱི་ཡུལ་དུ་སྣང་བ་རྣམ་པ་རིག་བྱེད་མིན་པའི་གཟུགས་རྣམས་རྣམ་སྣང་གི་མི་བསྐྱོད་པར་བསྒོམ། དེས་སྒྲ་སོགས་ལའང་རིགས་འགྲེ་སྟེ་སྤྱོད་བསྡུས་སུ་བལྟའོ། །རིགས་བརྒྱད་པོ་དེའང་བསྡུ་ན་རིགས་ལྔར་འདུ་བས། མིག་དབང༌། གཟུགས་ཕུང༌༑ ས་ཁམས། རྣམ་སྣང༌། སྒྲ་རྣ་དབང༌། ཚོར་ཕུང༌། ཆུ། རིན་འབྱུང༌། དྲི་སྣ། འདུ་ཤེས། མེ། འོད་དཔག་མེད། རོ་ལྕེ། འདུ་བྱེད། རླུང་དོན་གྲུབ། དེ་ལྔ་བསྡུ་ན་སྐུ་གསུང་ཐུགས་རྡོ་རྗེ་གསུམ་དུ་འདུས། སྣང་བ་ཐམས་ཅད་ལུས་ངག་ཡིད་གསུམ་དུ། རྡོ་རྗེ་གསུམ་ཡང་བསྡུ་ན་རིགས་དྲུག་པ་རྡོ་རྗེ་འཆང་དུ་འདུས་སོ། །ལུས་ངག་གཉིས་ཀྱང་སེམས་སུ་འདུས་སོ། །དེས་ན་གསང་ཆེན་རིགས་གཅིག །བདག་གཞན་སྣོད་བཅུད་དུ་སྣང་བ་ཐམས་ཅད་རྡོ་རྗེ་འཆང་སྔོ་དཀར་དམར་བའི་ཞལ་གསུམ་ཕྱག་དྲུག་གི་གཡས་ན་རྡོ་རྗེ་འཁོར་ལོ་པདྨ། གཡོན་དྲིལ་བུ་རིན་ཆེན་རལ་གྲི་འཛིན་པ་སྐད་ཅིག་དྲན་རྫོགས་ལ་བསྒོམ་པའོ། །རང་རྡོ་རྗེ་འཆང་དུ་བསྒོམས་པའི་ཚེ་དམིགས་པ་མི་གསལ་ན། བྲིས་སྐུ་ལ་བལྟས་ནས་གསལ་བཏབ་ཅིང་བསྒོམ། དེས་ཀྱང་མི་གསལ་ན་མདུན་དུ་མེ་ལོང་ཤིན་ཏུ་གསལ་བ་བཞག །རྒྱབ་ཏུ་རྡོ་རྗེ་འཆང་གི་བྲིས་སྐུ་ལ་ཞལ་ཕྱག་གཡས་གཡོན་གོ་ལྡོག་པ་གཅིག་བཀྲམ། དེའི་གཟུགས་མེ་ལོང་གི་ནང་དུ་འཆར་བར་བྱས་ལ། དེ་ལ་བལྟས་ནས་གསལ་བཏབ་ཀྱིན་བསྒོམ། དེ་ལྟར་བསྒོམས་པས་སྣོད་བཅུད་མཐའ་དག་རྡོ་རྗེ་འཆང་དུ་དངོས་སུ་སྣང་བ་འབྱུང༌། དེས་ཐ་མལ་གྱི་རྣམ་རྟོག་མཐའ་དག་བཟློག །བསྒོམ་པ་འདི་ནི་བསྐྱེད་ཆོག་ལ་མི་ལྟོས། བསྐྱེད་རྫོགས་གང་གིའང་ཁོངས་སུ་མི་འདུས། རིང་ཐུང་འཚམས་པའོ། །ངག་དབེན་གསུང་རྡོ་རྗེའི་རྣལ་འབྱོར་གོ་སླ་བའི་ཕྱིར་མདོར་བསྡུས་ཏེ་བརྗོད་ན། སྤྱིར་རླུང་འཇུག་གནས་ལྡང་གསུམ། དེའང་རྩ་བའི་རླུང་ལྔ། སྲོག་འཛིན་གྱེན་རྒྱུ། མེ་མཉམ། ཐུར་སེལ། ཁྱབ་བྱེད། གནས་སྙིང་ཁ། མགྲིན་པ། ལྟེ་བ། གསང་གནས། ལུས་ཀྱི་ཚིགས། ངོ་བོ། ཆུ། མེ། རླུང༌། ས། ནམ་མཁའ། ཁ་དོག་དཀར། དམར། ལྗང་ཁུ། སེར། ནམ་མཁའི་ཁ་དོག་མི་གསལ་ལོ། །མིང་རྡོ་རྗེ། པདྨ། ལས་ཀྱི། རིན་ཆེན། རྣམ་སྣང་མགོན་པོ། རླུང་རྒྱུ་བའི་བྱེད་ལས། རྒྱུ་བ། རྣམ་པར་རྒྱུ་བ། ཡང་དག་པར་རྒྱུ་བ། རབ་ཏུ་རྒྱུ་བ། ངེས་པར་རྒྱུ་བ། མིག་དང༌། རྣ་བ། སྣ། ལྕེ། མཚན་མ་ལས། གཟུགས། སྒྲ། དྲི། རོ། རེག་བྱ། མདོར་ན་ཉིན་ཞག་ཕྲུགས་གཅིག་ལ་རླུང་གྲངས་ཉི་ཁྲི་ཆིག་སྟོང་དྲུག་བརྒྱ་རྒྱུ་སྟེ། འཕོ་ཆེན་བཅུ་གཉིས་ལ་འཕོ་ཆུང་ཉེར་བཞིར་བྱས་པའི་འཕོ་ཆུང་རེ་ལ་དགུ་བརྒྱ་པ་ཕྲག་རེ་རྒྱུ་བས་སོ། །དེའང་འཇུག་གནས་ལྡང་གསུམ་དུ་འདུ་བས། ཉམས་ལེན། རླུང་ཕྱིར་འགྲོ་བ་ཧཱུྃ། ནང་དུ་འཇུག་པ་ༀ། གནས་པ་ཨཱཿ འི་གདངས་སུ་ཤེས་པར་བྱ་བ་ལ། མ་འཁྲུལ་བར་བགྲང༌། དེའང་རླུང་དང་རང་བཞིན་དབྱེར་མེད་པའི་རང་བཞིན་སྤྲོས་བྲལ་དུ་ཤེས་པར་བྱས་ནས། ཐུན་བཞིའི་རྣལ་འབྱོར་གྱིས་བསླབ་བོ༑ ༑དེ་ནས་རླུང་གང་ནས་ལྡང་བ་དང༌། ཁ་དོག་མཐོང་བའི་ཚེ་དོན་གྲུབ་རླུང་ལྟེ་བ་ནས་ལངས་ནས་སྣ་བུག་གཡོན་ནས་ལྗང་སེར་དུ་རྒྱུ། པདྨ་མགོན་པོ་མགྲིན་པ་ནས་སྣ་བུག་གཡས་དམར། རིན་ཆེན་མགོན་པོའི་གནས་གསང་གནས་ནས་སྣ་བུག་གཉིས་དཀར་སེར། རྡོ་རྗེ་མགོན་པོའི་རླུང་སྙིང་ཁ་ནས་མི་ཚོར་བའི་ཚུལ་སྣ་བུག་གཉིས་ཀ་ནས་དཀར་པོ། དེ་ལྟར་སྣ་གཡོན་ནས་རྒྱུ་བ་འཕོ་བ་རེ་རེ། གཉིས་ཀ་ནས་འཕོ་བ་གཅིག །གཉིས་ཀ་ནས་དལ་བར་རྒྱུ་བའི་འཕོ་ཆུང་གཅིག་སྟེ་བཞི། ཉིན་ཞག་ཕྲུགས་གཅིག་ལ་ལན་དྲུག་འབྱུང༌། ལན་དྲུག་རེ་རྒྱུ་བས། འཕོ་ཆེན་བཅུ་གཉིས། རེ་རེ་ལ་གཉིས་གཉིས། འཕོ་ཆུང་ཉེར་བཞི་རེ་རེ་རྒྱུ། དེ་ལྟར་ལོབས་ནས་ལྷ་མོ་བཞི་བཞི་རླུང་སྣ་བུག་གཡོན་ནས་ཐུར་དུ་ལྗང་སྐྱར་རྒྱུ་བ་ཉིས་བརྒྱ་ཉེར་ལྔ་ཆུ་རླུང་མ་མཱ་ཀིའི་རྒྱུ་བ། སྟེང་དུ་དམར་ལྗང་དུ་རྒྱུ་བ་མེ་གོས་དཀར་མོ། ཐད་ཀར་ལྗང་སེར་དུ་རྒྱུ་བ་ས་རླུང་སངས་རྒྱས་སྤྱན་མ། སྲིབ་ལ་ལྗང་ནག་ཏུ་རྒྱུ་བ་རླུང་གི་རླུང་སྒྲོལ་མ་ཡིན་པས་མ་འཁྲུལ་བར་འཇུག་གནས་ལྡང་གསུམ་ཉམས་སུ་བླང༌། དེ་བཞིན་སྣ་བུག་གཡས་ནས་དམར་པོ། དམར། ཤིན་ཏུ་དམར། དམར་སེར༑ དམར་ནག་ཐུར་གྱེན་ཐད། སྲིབས་རྒྱུ། ཆུ་མེ་ས་རླུང་བཞིའི། ས་རླུང་གཙོ་བོར་གྱུར་པ་བཞི། ཆུ་རླུང་གཙོ་བོར་གྱུར་པ་བཞི། ཁ་དོག་རྣམས་སྔ་མ་ལ་དཔག་ནས་ཉམས་སུ་ལེན་ནོ། །རླུང་བཞི་ཐོགས་མེད་འགྲུབ་པ་དང༌། ས་རླུང་བཀག །སྲེད་མེད་བུའི་སྟོབས། ཆུ་རླུང་བཀག །མེས་མི་ཚིག །མེ་རླུང་བཀག །ཆུའི་གནོད་པ་མི་འབྱུང༌། རླུང་རླུང་ནམ་མཁའ་ལ་འགྲོ། སེམས་དབེན་ཐུགས་རྡོ་རྗེའི་རྣལ་འབྱོར་ལ། སྣང་བ། སྣང་བ་མཆེད་པ། སྣང་བ་ཉེར་ཐོབ། ལུགས་འབྱུང་དུ་བསྒོམ་པ། ལུགས་བཟློག་བསྒོམ་པ། རང་རྡོ་རྗེ་འཆང༌། ཐུགས་ཀར་ཉི་དཀྱིལ། དེའི་སྟེང་དུ་པདྨ་དམར་པོ་འདབ་མ་བརྒྱད་པ་ལྟེ་བར་ༀ་དཀར་པོ། དམིགས་པ་ཨཾ་ལ་བསྒོམ་ཨཾ་ལས་འོད་འཕྲོས་བྱུང༌། ཧཾ་ལ་བསྣུན་བདུད་རྩིའི་རྒྱུན་ཨཾ་ལ་ཐིམ་པར་བསམ། ཟླ་བའི་འོད་ཟེར་ལྟ་བུའི་སྣང་བ་འཆར། བདེ་བ་སྐྱེས། སྣང་བ་མཆེད་པའི་རྣལ་འབྱོར་རྡོ་རྗེ་འཆང་དུ་བསྒོམ། ཐུགས་ཀར་ཉི་དཀྱིལ་རྡོ་རྗེ་དམར་པོ་རྩེ་ལྔ་པ། ལྟེ་བར་ཨཱཿ ཚེག་དྲག་ལ་དམིགས། ཨཱཿ ལས་འོད་དམར་པོ་ཚ་བ་ཧཾ་ལ་བསྣུན། བདུད་རྩི་བྱུང༌། ཨཾ་ལ་ཐིམ་པར་བསམ། ཉི་མའི་འོད་ཟེར་ལྟ་བུའི་སྣང་བ་བྱུང་བདེ་བ་སྐྱེ༑ སྣང་བ་ཉེར་ཐོབ་ཀྱི་རྣལ་འབྱོར། ཐུགས་ཀར་ཨཱཿ དམར་པོ་བསམ། དེ་ལས་འོད་ཟེར་མོག་གེ་བ་གཅིག་བྱུང༌། ཧཾ་ལ་བསྣུན། བདུད་རྩི་ལ་ཐིམ་བདེ་བ་ཤིན་ཏུ་ཆེ་བ་སྐྱེས། སྣང་བ་ནུབ་ནས་མུན་པ་ལྟ་བུ། ལུགས་བཟློག་གི་སྣང་བ་གསུམ། སྔར་གྱི་ཉེར་ཐོབ་ལས་སྣང་བ་མཆེད་པ་ལྡང༌། ཉི་མའི་འོད་ལྟ་བུའི་སྣང་བ་མཆེད། སྣང་བར་ལྡང༌། ཨཱཿ དམར། ༀ་དཀར་བསྒྱུར་ནས་བསྒོམ། དེ་ལྟར་དབེན་གསུམ་མཐར་ཕྱིན། འདིར་ཉམས་ལེན༑ མཉམ་བཞག་སྒྱུ་མ། རྗེས་ཐོབ་སྒྱུ་མ། རྨི་ལམ་སྒྱུ་མ། རླུང་ཙམ་ལས་གྲུབ་པའི་རྡོ་རྗེ་འཆང་དཀར་པོ། སྐད་ཅིག་དྲན་རྫོགས། དེའང་སྣང་ངོ་ན་གྲུབ། རྗེས་བཅས་སུ་མ་གྲུབ། དཔེ་མེ་ལོང་གཟུགས་བརྙན་ལྟར། སྐུ་སྐད་ཅིག་གིས་གསལ་འདེབས། འཇའ་ཚོན་གྱི་ཁ་དོག་གཅིག་ཆར་སྐུའི་ཆ་ཤས་རྫོགས་པ། ཟླ་བ་གཟུགས་བརྙན་ཆུར་ཤར། མཚོ། རྫིང༌། འབབ་ཆུ་སོགས་ཆུ་གང་ཟླ་བ་གཅིག་པོ་དེའི་གཟུགས་བརྙན་གྱིས་ཁྱབ། རྗེས་ཐོབ་ཅི་སྣང་སྒྱུ་མའི་སྐུ། སྒྱུ་མ་ཉམས་ལེན་རྨི་ལམ། མཉམ་རྗེས་ཐམས་ཅད་དུ་དྲན་པ་གོམས་ནས། ཉལ་བའི་ཚེ་རྨི་ལམ་གྱི་ཤེས་པ་དེ་ངོ་ཤེས་པར་བྱ་སྙམ་འདུན་པ་དྲག་པོ་བཏང༌། རྨི་ལམ་རབ་རིབ་ཤར་ཚེ། ལུགས་ལྡོག་གི་སྣང་བ་དྲན་པར་བྱ། གཞན་གྱིས་མགྲིན་པར་ཨ་ནུ་ཏ་ར་ལ་ལམ་བསྒྱུར་བ་ནཱ་རོ་འདྲེས་ཡིན། འདུས་པའི་རང་ལུགས་མིན། དེ་ལྟར་བསྒོམས་པས་སྣང་བ་རྒྱུ་འཛིན། རིལ་འཛིན་རྗེས་གཞིག་སོ་སོར་བསྒོམ། སྐུ་རྡོ་རྗེའི་རྗེས་གཞིག་ཐུགས་ཀར་ༀ། རིལ་འཛིན་ༀ་ལས་འོད་འཕྲོས། སྣོད་བཅུད་འོད་དུ་ཞུ། སྐུ་རྡོ་རྗེ་ༀ་ལ་ཐིམ་རིལ་འཛིན་བཞིན་ནོ། །གསུང་རྡོ་རྗེ། ཐུགས་རྡོ་རྗེ་གཉིས་ཀྱང༌། ཨཱཿ ཧཱུྃ་ལས་ཇི་ལྟ་བ་བཞིན་རིལ་འཛིན་རྗེས་གཞིག་བྱ་བ་ལ། རྡོ་རྗེ་གསུམ་གྱི་རིལ་འཛིན་དང༌། རིགས་ལྔའི་རིལ་འཛིན་བསྒོམས་ཏེ་ཟླ་བའི་དཀྱིལ་འཁོར་པདྨ་དམར་པོ། ལྟེ་བར་ཨཱ་ཐུང༌། རླུང་ཕྱིར་རྒྱུ་བའི་ཚེ། ཨཱ་ལི་བཅུ་དྲུག །ཀཱ་ལི་སོ་བཞི་ཐོན་ནས་སྣ་རྩེའི་བར་དུ་སོང༌། འཇུག་པ་ཀ་ནས་ཨཱཿ ཚེག་དྲག་ཅན་གྱི་བར། གནས་པའི་ཚེ་ཨ་ནས་ཀའི་བར། ཀའང་མཐར་འཇའ་ཡལ་བ་ལྟར་བསམ། གསུང་རྡོ་རྗེའི་རིལ་འཛིན་རྗེས་གཞིག །ཐུགས་ཀར་ཉི་མ། པདྨ་དམར་པོ་འདབ་མ་བརྒྱད་མུ་ཁྱུད་དང་བཅས་པ། ལྟེ་བར་ཨཱ་དམར་པོ་མུ་ཁྱུད་དང་བཅས་པ་ལ་ཨཱ་ལི་བསྒོམ། ཨ་ལས་འོད་འཕྲོས་གསུང་རྡོ་རྗེ་འོད་དུ་ཞུ། ཨཱཿ ལ་སོགས་གོང་བཞིན་ནོ། །རྗེས་གཞིག །ཨཱཿ ལས་འོད་འཕྲོས་སྣོད་བཅུད་བསྡུ། ཐུགས་རྡོ་རྗེའི་རིལ་འཛིན་རྗེས་གཞིག །ལུས་ཀྱི་ནང་དུ་རྩ་དབུ་མ་དཀར་བ་ཁ་དོག་སྟོང་གསལ། རྩ་དབུ་མ་ལས་འོད་འཕྲོས་རང་རྩ་དབུ་མར་ཐིམ་མཁའ་ལ་འཇའ་ཡལ་བ་བཞིན། རྗེས་གཞིག །རྩ་དབུ་མའི་འོད་ཀྱིས་སྣོད་བཅུད་བསྡུད། རིགས་ལྔའི་རིལ་འཛིན་རྗེས་གཞིག་ལ་ལྔ། རྣམ་སྣང༌། འོད་དཔག་མེད། མི་བསྐྱོད་པ་གསུམ་རིལ་འཛིན། རྗེས་གཞིག་གཉིས། གོང་བཞིན་ༀ་ཨཱཿ ཧཱུྃ། རིན་འབྱུང་རིལ་གཞིག་གཉིས། སྒྱུ་ལུས་ཀྱི་ཡི་གེ་སོགས། གཞན་རིགས་འགྲེ། དོན་འགྲུབ་ཀྱི་རིལ་འཛིན་གཉིས་ཡི་གེ་ཧཾ། གཞན་རིགས་འགྲེ། དེ་ལྟར་ཡུན་རིང་དུ་བསྒོམ་པས་འོད་གསལ་སྟོང་པ་ཉིད་ཀྱི་རྟོགས་པའི་ཚེ་འོད་གསལ་ལས་མཐར་ཟུང་འཇུག་གི་སྐུར་ལྡང་ལ། ལུགས་ལྡོག་གི་སྣང་བ་ཡེ་ཤེས་ཀྱི་རླུང་ཙམ་ལས་གྲུབ་པའི་རྡོ་རྗེ་འཆང་མཚན་དཔེས་སྤྲས་པར་ལྡང་བ་ནི། ལོངས་སྐུའི་ཟུང་འཇུག་གོ །རང་གི་ཐུགས་ཁ་ནས་ཡེ་ཤེས་ཀྱི་རིག་མ་སྤྲོས། མཁའ་གསང་བྱིན་གྱིས་བརླབས་ནས་སྙོམས་པར་ཞུགས་ནས་ཡུམ་གྱི་མཁའ་ནང་དུ་ཐིག་ལེ་ལས་དཀྱིལ་འཁོར་རྫོགས་པར་བསྐྱེད། ཐུགས་ཁར་དྲངས། ཕྱིར་སྤྲོས། རང་ལ་ཐིམ་ཞེ་སྡང་རྡོ་རྗེར་བསྒྱུར། དེ་སློབ་པའི་ཟུང་འཇུག །དེའི་རྒྱུན་གོམས་པར་བྱས་ཤིང༌། སྤྱོད་པ་སྤྱད་ན་མི་སློབ་པའི་ཟུང་འཇུག །དེ་ལྟར་ན་དྲན་པ་གཅིག་པ། ལུས་དབེན། ངག་དབེན། སེམས་དབེན། སྒྱུ་ལུས། འོད་གསལ། ཟུང་འཇུག་སྟེ། དམིགས་པའི་རྐང་གྲངས་ཤེས་པར་བྱས་ལ་རྩལ་སྦྱང་ངོ༌། །འགོས་ཀྱི་སྟོང་ཐུན་ཤོག་དྲིལ་ཀུན༵། །དག༵འ་བཞིན་བསྡེབས་ལས་གྲོལ༵་བ་མཆོ༵ག །རིམ་ལྔ་གཞན་དང་མ་འདྲེས་པའི། །གཙང་དག་དམིགས་ཐོའི་ཡི་གེའོ། །རྡོ་རྗེ་འཆང་གི་གསུང་སྒྲོས་ལས་བཏུས་སོ། (༦༢ ) །གྲོལ་བའི་ཐིག་ལེའི་ཁྲིད་ཡིག །གྲོལ་བའི་ཐིག་ལེའི་ཁྲིད་ནི། སྐྱབས་སེམས་སྔོན་དུ་སོང་ནས། རང་ཉིད་སྲུང་འཁོར་དབུས་སུ་འཇམ་པའི་རྡོ་རྗེར་གསལ་བའི་ལུས་ཀྱི་ནང་དུ་རྩ་གསུམ་འཁོར་ལོ་བཞི། སྙིང་ཁར་རང་འདྲའི་ཡེ་ཤེས་སེམས་དཔའ། དེའི་ཐུགས་ཀར་རལ་གྲིའི་ཡུ་བ་ལ་ཏིང་འཛིན་སེམས་དཔའ་མཾ་ལ་སེམས་གཏད། མཾ་ཞུ་ཐིག་ལེ་དམར་སེར་སྲན་ཆུང་ཙམ་འོད་ཟེར་ལྔ་ལྡན། དེའི་ནང་དུ་རྟེན་དང་བརྟེན་པའི་ཐིག་ལེ་བསྒོམ། དུ་བ་སོགས་འབྱུང༌། བོག་འདོན་ཐིག་ལེ་ལས་འོད་འཕྲོས། རྩེ་ལ་དཀྱིལ་འཁོར་སྤྲུལ། ཕྱོགས་བཅུའི་འཇིག་རྟེན་བཀང་ཞུ། བསྟིམ། ངོ་བོ་སེམས། ཐིག་ལེ་ལ་མཉམ་པར་བཞག །དཀར་ཆ་བཅུ་དྲུག །ནང་ནས་གཞི་ལུས་ཐིག་ལེ་བཅུ་དྲུག་དབྱངས་ཡིག་ཏུ་གསལ་བཏབ། རྐང་པ་གཉིས་ཀྱི་མཐེ་བོང་གི་རྩ་བར་ཨ། བྱིན་པ་གཉིས་ལ་ཨཱཿ བརླ་གཉིས་ལ་ཨི། གསང་བར་ཨཱི། གསུས་པའི་རྩ་བར་ཨུ། སྟེང་དུ་ཨཱུ། ནུ་མ་ལ་ར། ལག་པ་གཉིས་ལ་རཱ། མགྲིན་པ་ལ་ལ། མཆུ་ལ་ལཱ། འགྲམ་པ་གཉིས་ལ་ཨེ། མིག་གཉིས་ལ་ཨཻ། རྣ་བ་གཉིས་ཀྱི་རྩ་བར་ཨོ། སྤྱི་གཙུག་ཏུ་ཨཽ༑ ཚིགས་ཀུན་ཏུ་ཨཾ་ཨཿ དམིགས་ཏེ། སྙིང་གའི་ཐིག་ལེའི་འོད་ཀྱིས་དྲངས་ནས་བསྟིམ། སངས་རྒྱས་ཀྱི་བདུད་རྩི་བཀུག་བསྟིམ། རལ་གྲིའི་ཡུ་བ་གཞི་ལུས་བར་སྔར་བཞིན་གསལ་བར་བྱས། རྩེ་ལས་སྤྲུལ་པའི་དཀྱིལ་འཁོར་རབ་འབྱམས་ཞིང་དུ་བྱོན། རྒྱལ་བ་རྣམས་ཀྱི་ཞལ་དུ་ཞུགས། བདུད་རྩི་དང་འདྲེས། ཡབ་ཀྱི་གཡས། ཡུམ་གྱི་གཡོན་ནས་རྩ་བའི་ཐིག་ལེ་ལ་བསྟིམ། མཐར་ཆོས་ཐམས་ཅད་སེམས་སུ་བསྡུ༑ སེམས་ཐིག་ལེ་འབའ་ཞིག་ལ་རྩེ་གཅིག་ཏུ་མཉམ་པར་བཞག །མི་ཤིགས་ཐིག་ལེ་ལ་གནད་དུ་བསྣུན་ཏེ། གསང་བ་ནོར་བུའི་ཐིག་ལེ། སྙིང་ཁའི་ཐིག་ལེ་ལ་འོད་སྔར་བཞིན་འབར་ནས་རོ་རྐྱང་དབུ་མ་གསུམ་ནས་རྡུལ་མུན་སྙིང་སྟོབས་ཀྱི་རང་བཞིན་ཐུར་ལ་བབས། ནོར་བུའི་རྩེར་ཕྱག་མཚན་རལ་གྲི་སྔོན་པོ་ནས་འབྲུ་ཙམ་འོད་ཟེར་ལྔ་ལྡན་གྱི་ཡུ་བར་ཐིག་ལེ་ཡུངས་ཀར་སྦོམ་པོའི་ཚད་ཀྱི་ནང་དུ་ཐིག་ལེ་ཆེར་དང༌། དཀྱིལ་འཁོར་ཆུང་དུ་མ་སོང་བའི་ཚུལ་གྱིས། གཙོ་བོ་སེམས་དཔའ་སུམ་བརྩེགས་ལ་སེམས་གཅིག་ཏུ་གཏད། བོགས་འདོན། སེམས་བྱིང་རྒོད་དུ་གྱུར་ན་ཐིག་ལེ་རང་གི་མས་སྣ་ནས་ཕྱིར་ཕྱུང༌། ཡུམ་གྱི་མས་སྣར་བབས་པ་ལ་སེམས་གཏད། སངས་པ་ན་རྩ་བའི་ཐིག་ལེ་ལ་སེམས་བཟུང་བས། སྨིག་རྒྱུ། དུ་བ། མེ་ཁྱེར། སྒྲོན་མ་འབར་བ། སྤྲིན་མེད་ནམ་མཁའ་སོགས་རྟགས་ལྔ་འབྱུང༌། རྗེས་དྲན་ལྷ་བསྐྱེད་ཆོག་མེད་པར། རིགས་ལྔ་ཡུམ་བཞི། ཁྲོ་བོ་སོགས་དྲན་ནས་སྙོམས་པར་ཞུགས། ཞུ་བའི་ཐིག་ལེ་བསྒོམ། འདི་ཆེས་ཟབ། དབུ་མའི་མས་སྣར་བསྒོམ། རླུང་འཛིན། རླུང་སེམས་སྡུད་ཐབས་ཁྱད་པར་ཅན་ནོ། །དཔྲལ་བ། མགྲིན་པ། སྙིང་ཁ༑ ནུ་མའི་བར་རྣམས་སུ། སྐུ་གསུང་ཐུགས་ཡེ་ཤེས་སེམས་དཔའ། འཁོར་ལོ། པདྨ། རྡོ་རྗེ། རལ་གྲི། རླུང་གི་དཀྱིལ་འཁོར། ཆུ་མེ་སའི་དཀྱིལ་འཁོར་རོ། །ལྟེ་བར་ཟླ་བ་ལ་ༀ་དཀར་པོ། ཨཱཿ དམར་པོ། ཧཱུྃ་སྔོན་པོ། མཾ་འགྲོ་འོང་གནས་གསུམ་དང་བྲལ་བའི་རྣམ་པ་ཅན། འབྱུང་བཞིའི་རྣལ་འབྱོར། བཟླས་བྱ། ནང་འཇུག་ༀ། གནས་པ་ཨཱཿ ལྡང་བ་ཧཱུྃ། འབྲུ་གསུམ་ལྡང་འཇུག་གནས་གསུམ་ལ་བརྩོན་འགྲུས་བརྩམས། ནང་དུ་སྡུད་པའི་ཚེ་མི་ཤིགས་པ་ལ་བསྟིམ། གཡས་མཉམ་གནས་རླུང་གི་དང༌། གཡོན་སྲོག་འཛིན། ཆུ་གཉིས་ཀ་གྱེན་རྒྱུ། མེ་གཉིས་ཐུར་སེལ། རྡོར་བཟླས། དཔྲལ་བའི་རླུང་འབྱུང་འཇུག་གནས་གསུམ། སྣང་བའི་རྣམ་རིག་གི་གསལ་ཆ། ཀྵུཾ་ཞེས་པ། ཀ྄་ཥ྄་ཨུ་མ྄་འདུས་པའི་ཡིག་འབྲུ་ལས་འོད་ཟེར་ཕྱུང༌། དཀྱིལ་འཁོར་གསུམ་མམ་གཅིག །སྟོང་གསལ་བཞུ། མཉམ་པར་བཞག །གསལ་ཆ་གཙོ་བོར་འདོན་པ་ལ་འཇོག །རིམ་གྱིས་ཐིག་ལེ་བསྡུས་སྣང་སྟོང་ནམ་མཁའི་དཀྱིལ་ལྟ་བུར་འཇོག །འདིར་ཟབ་པ་གཙོ་བོར་འདོན། ཟུང་འཇུག་ཐིག་ལེའི་འོད་ཟེར་དཀྱིལ་འཁོར་གསུམ། ཟབ་གསལ་དབྱེར་མེད་ཆུ་ཟླ་ལྟ་བུའི་ངང་ལ་མཉམ་པར་གཞག །འདིར་ཟབ་གསལ་གཉིས་སུ་མེད་པ་གཙོ་བོར་འདོན། བརྩོན་འགྲུས་ཅན་ཚེ་འདིར་སངས་རྒྱ། ལེ་ལོ་ཅན་བར་དོར་སངས་རྒྱ། བར་ཆད་ཅན་སྐྱེ་བ་བརྒྱུད་ནས་སངས་རྒྱ། ཞེས་པའི་ཐ་སྙད་སྦྱར་ཏེ། ལྟེ་བ། སྨིན་མ། སྤྱི་གཙུག །མིག །རྣ་བ། ཁ། སྣ། བཤང་གཅིའི་སྒོ་སྟེ་དགུ་ཧཱུྃ་གིས་བཀག །རང་གི་སྤྱི་བོར་རིན་པོ་ཆེ་སྣ་ཚོགས་ལས་གྲུབ་པའི་རྡོ་རྗེ་རྩེ་དགུ། དེའི་ལྟེ་བར་རང་སེམས་རྡོ་རྗེ་དཀར་པོ་རྩེ་ལྔ་པ། གཉིས་ཀ་གྱེན་ལངས། རྩེ་ལྔ་པའི་ལྟེ་བར་ཟླ་བ་ལ་ཐིག་ལེ་སེར་པོ་སྲན་མ་ཆུང་བ་ཡུངས་གྲུ་ཙམ་ལ་སེམས་གཏད་དེ་གསལ་ཆ་འདོན། སྣོད་བཅུད་སྣང་བ་རང་ཉིད་འཇམ་པའི་རྡོ་རྗེར་གསལ་བའི་སྙིང་གའི་ཐིག་ལེ་ལ་བསྡུ། སེམས་དབུ་མར་ཞུགས། སྤྱི་གཙུག་གསེར་སྒོ་ནས་ཐོགས་མེད་དུ་སོང༌། རྡོ་རྗེ་གཉིས་ཀྱི་མར་གྱི་རྭ་དབུ་མ་ནས་ཞུགས། རྩེ་ལྔ་པའི་ལྟེ་བའི་ཐིག་ལེ་ལ་བསྟིམ། སེམས་བཟུང་ནས་རང་ལུས་རྩེ་དགུ་པ་ལ། དེ་རྩེ་ལྔ་པ་ལ། དེ་ཐིག་ལེར། ཐིག་ལེ་ཏ་ལ་བདུན་སྲིད་ཙམ་དུ་སྤར་ནས། ཐིག་ལེ་ཇེ་ཕྲ་ཇེ་ཕྲར་སོང༌། མཐར་འོད་གསལ་དུ་བསྡུ། སྤྲོས་པ་མཐའ་དག་ཞི་བའི་ཆོས་སྐུ་མངོན་དུ་བྱས། དེ་དང་དུས་མཉམ་མཚན་དཔེ་གསལ་རྫོགས་ལོངས་སྐུ། ཕལ་པའི་སྣང་ངོར་མཛད་པ་བཅུ་གཉིས་ཀྱི་ཚུལ་བསྟན་པ་སྤྲུལ་སྐུར་མོས་པ་ཡིད་ལ་བྱའོ། །འཕོ་བའི་རྣམ་བཞག་ཞལ་ལུང་མ་གཏོགས་ཕ་རྒྱུད་དུ་གསལ་བར་མི་འབྱུང་ངོ༌། །ཀུན༵་གཟིགས་འཇམ་པའི་རྡོ་རྗེ་ཡི། །དག༵འ་ཆེན་གྲོལ༵་བ་མཆོ༵ག་གི་ལམ། །རྫོགས་རིམ་ཨུ་དུམ་མེ་ཏོག་འདྲའི། །དམིགས་རིམ་ཡི་གེར་འཕོས་འདི་དཀོན། །བྱང་ཕུག་པའི་ཟིན་ཐོ་ལས་བཏུས་སོ། (༦༣) །སྤྲོས་མེད་ཀྱི་ཁྲིད་ཡིག །སྤྲོས་མེད་ཀྱི་ཁྲིད་ནི། སྐྱབས་སེམས་སྔོན་དུ་སོང་ནས། ཧཱུྃ་ལས་མདུན་གྱི་ནམ་མཁར་ཐུན་མོང་བའི་སྲུང་བའི་འཁོར་ལོའི་དབུས་སུ་སེང་ཁྲི་པདྨ་ཉི་མ་མ་ཧེ་དམར་པོའི་གདན་གྱི་སྟེང་དུ། དྲིན་ཆེན་རྩ་བའི་བླ་མ་འཇམ་དབྱངས་གཤིན་རྗེའི་གཤེད་དམར་པོ། དེའི་མཐའ་བསྐོར་དུ་རིན་ཆེན་པད་ཟླའི་གདན་ལ། བརྒྱུད་པའི་བླ་མ། ཡི་དམ་ལྷ་ཚོགས། སངས་རྒྱས་བྱང་སེམས། འཕགས་པ་ཉན་རང༌། དཔའ་བོ་མཁའ་འགྲོ། ཆོས་སྐྱོང་སྲུང་མའི་ཚོགས་ཀྱིས་བསྐོར་བ། བླ་མའི་ཐུགས་ཀའི་འོད་ཟེར་གྱིས་ཁམས་གསུམ་སེམས་ཅན་ཐམས་ཅད་ཡི་དམ་ལྷའི་རྣམ་པར་བྱས། གོང་གི་མཐར་འཁོད། ༀ་བཛྲ་པུཥྤེ་ཨཱཿ ཧཱུྃ། ༀ་བཛྲ་དྷཱུ་པེ་ཨཱཿ ཧཱུྃ། ༀ་བཛྲ་ཨཱ་ལོ་ཀེ་ཨཱཿ ཧཱུྃ། ༀ་བཛྲ་གནྡྷེ་ཨཱཿ ཧཱུྃ། ༀ་བཛྲ་ནེ་ཝིདྱ་ཨཱཿ ཧཱུྃ། ༀ་རཱུ་པ་བཛྲི་ཧཱུྃ། ༀ་ཤབྡ་བཛྲི་ཧཱུྃ། ༀ་གནྡྷེ་བཛྲི་ཧཱུྃ། ༀ་ར་ས་བཛྲི་ཧཱུྃ། ༀ་སྤརྴེ་བཛྲི་ཧཱུྃ། ༀ་དྷརྨ་དྷཱ་ཏུ་བཛྲི་ཧཱུྃ། དུས་གསུམ་སངས་རྒྱས་ཐམས་ཅད་ཀྱི་ངོ་བོ་དཔལ་ལྡན་བླ་མ་དམ་པ་ལ་བདག་ལ་གནོད་པའི་དགྲ་བགེགས་ཐམས་ཅད་དབུལ་བར་བགྱིའོ། །ཞེ་སྡང་བྲལ་བར་བྱིན་གྱིས་བརླབ་ཏུ་གསོལ། ཕན་འདོགས་པའི་བཤེས་གཉེན་ཐམས་ཅད་དབུལ་བར་བགྱིའོ། །ཆགས་པ་དང་བྲལ་བར་བྱིན་གྱིས་བརླབ་ཏུ་གསོལ། བར་མའི་འགྲོ་བ་རྣམས་དང༌། བདོག་པའི་དངོས་པོ་ཐམས་ཅད་དབུལ་བར་བགྱིའོ། །འཛིན་ཆགས་སེར་སྣ་དང་བྲལ་བར་བྱིན་གྱིས་བརླབ་ཏུ་གསོལ། དཔལ་ལྡན་བླ་མ་དམ་པས། བདག་གི་བསམ་པ་མཁྱེན་པར་མཛད་དུ་གསོལ། བདག་ལ་ཐུགས་རྗེས་གཟུང་དུ་གསོལ། བདག་ལ་བྱིན་གྱིས་བརླབ་ཏུ་གསོལ། ཐོད་པའི་ནང་གི་ལུས་ཀྱི་དུམ་བུ་རྣམས་ཟག་པ་མེད་པའི་ཡེ་ཤེས་ཀྱི་བདུད་རྩིའི་རྒྱ་མཚོ་ཆེན་པོར་གྱུར། ༀ་ཨཱཿ ཧཱུྃ། དགེ་འདུན་ལ་སྐྱབས་སུ་མཆིའོ། །ཆོས་ལ་སྐྱབས་སུ་མཆིའོ། །སངས་རྒྱས་ལ་སྐྱབས་སུ་མཆིའོ། །དུས་གསུམ་སངས་རྒྱས་ཐམས་ཅད་ཀྱི་ངོ་བོ་བླ་མ་རིན་པོ་ཆེ་ལ་སྐྱབས་སུ་མཆིའོ། །བླ་མའི་སྐུ་གསུང་ཐུགས་དང་རང་གི་ལུས་ངག་ཡིད་གསུམ་དབྱེར་མི་ཕྱེད་པའི་ངང་དེ་ཉིད་ནས། ཐོལ་སྐྱེས་ཀྱི་ཤེས་པ་གང་ཤར་གྱི་འཆར་སྒོ་དེ་ཉིད་ཐོག་མར་གང་ནས་འོངས། ད་ལྟ་ཇི་ལྟར་གནས། མཐར་གང་དུ་འགག །ཅེས་རང་སེམས་ལ་རང་སེམས་ཀྱིས་བརྡ་སྦྱར་བས། དང་པོ་གང་ནས་ཀྱང་མ་འོངས། ད་ལྟར་གང་དུའང་མི་གནས། མཐར་གང་དུའང་མི་འགག་མོད་ཀྱི། འོང་བར་སྣང་བ་དང༌། གནས་པར་སྣང་བ་དང༌། འགག་པར་སྣང་བའི་སྐད་ཅིག་མ་དེ་ཉིད་ལ། ངེས་ཤེས་ཀྱིས་ཡིད་ཆེས་སུ་དྲངས། དེ་ལྟར་བཙལ་བས་རྙེད་པའི་སེམས་རྣམ་རྟོག་ཡུལ་ཡུལ་ཅན་གང་ཡིན་སྒོ་དགུ་ནས་རང་གི་ལུས་ནང་དུ་པུར་གྱིས་བཅུག་པས། གསལ་ཞིང་དྭངས་པའི་མར་མེའི་རྩེ་ལྟ་བུ་དེ་ཉིད་གློག་ལྟར་འོད་དུ་འཁྱུག་ཅིང༌། མཐར་སྙིང་ཁ་ནས་བུ་ག་ཧར་གྱིས་ཕྱེ་ནས། སྐྱེས་བུས་མདའ་འཕངས་པ་ལྟར། ཕྱིའི་རྒྱ་མཚོའི་འགྲམ་མཐའ་ཀླས་པར་སོང༌། ལུས་གཤིན་རྗེའི་གཤེད་སྐུའི་རྣམ་པ་དེ་ཉིད་ཡང་ཞིང་གཡོ་བའི་ཤིང་ལོ་རླུང་གིས་བསྐྱོད་པ་ལྟར། བདེ་བ་ཅན་དུ་འོད་དཔག་མེད་པའི་དྲུང་དུ་བཞག །ༀ་ཨཱཿ ཧཱུྃ། སེམས་རིག་པའི་ངོ་བོ་ནམ་མཁའ་སྟོང་པའི་ཡེ་ཤེས་རྣམས་གཅིག་ཏུ་འདྲེས་ཏེ་དེར་འཛིན་པ་མེད་པར་བཞག །བྱིན་རླབས་བླ་མའི་རྣལ་འབྱོར་ནི། རང་ཉིད་ཀྱི་སྤྱི་བོར་བླ་མ་འཇམ་པའི་དབྱངས་གཤིན་རྗེའི་གཤེད་དངོས་སུ་བསྒོམས་ནས། སྙིང་ཁོང་རུས་པའི་གཏིང་ནས། མོས་གུས་ཀྱི་གདུང་ཤུགས་དྲག་པོས་ངག་ཏུ། དུས་གསུམ་སངས་རྒྱས་ཐམས་ཅད་ཀྱི་ངོ་བོ་བླ་མ་རིན་པོ་ཆེ་ལ་གསོལ་བ་འདེབས་སོ། །ཞེས་ཕུར་ཚུགས་སུ་གསོལ་བ་བཏབ་ནས། རང་ལ་ཐིམ་པའི་ངང་ལ་མཉམ་པར་འཇོག་གོ །མཉམ་མེད་སྙིང་རྗེའི་རྣལ་འབྱོར་ནི། གནོད་བྱེད་ཀྱི་དགྲ་བགེགས་ལྟ་བུ་ཞིག་ལ་ཆེད་དུ་གཏད་ནས་བསྒོམས་ཏེ། ཨ་རེ་སྡུག །འདི་དང་བདག་སྐྱེ་བ་དུ་མར། ཕ་མ། ཕུ་ནུ༑ མཛའ་བཤེས་སུ་ཡང་ཡང་འགྲོགས་ཤིང༌། ཕན་ཚུན་ཕན་པ་རྗེས་སུ་སྒྲུབ་པ་ལ། ད་ལྟ་ལས་ཀྱིས་བསྐུལ་ནས་སྨྱོན་པ་ལྟར་རང་དབང་མེད་པར་གནོད་ཅིང་འཚེ་བར་བྱེད་པ་སྙིང་རེ་རྗེ། འདིའི་གནོད་སེམས་ཐམས་ཅད་ཞི་བར་གྱུར་ཅིག་སྙམ་དུ་བསྒོམ། རྩ་བ་རྒྱུའི་རྣལ་འབྱོར་ནི། རང་གི་སོ་ན་བ་ལྟ་བུའི་དཔེས་མཚོན་པ་གཅིག་ལ། དེ་དང་རིགས་མཐུན་པའི་སེམས་ཅན་གཞན་གྱི་སྡུག་བསྔལ་དང་ལེན་གྱི་བྱམས་པ་བཅོས་མ་མ་ཡིན་པ། བདག་གི་སོ་ན་བ་འདི་ཁོ་ནས་སེམས་ཅན་ཐམས་ཅད་ཀྱི་སོ་ན་བའི་གོ་ཆོད་པར་གྱུར་ཅིག་སྙམ་དུ་བསྒོམ། སྲོག་རྩོལ་རླུང་གི་རྣལ་འབྱོར་ནི། རང་ཉིད་ཕྱི་གཤིན་རྗེའི་གཤེད། ནང་དར་དམར་གྱི་རྐྱལ་པ་བུས་པ་ལྟ་བུ་སྟོང་པའི་ངང་ནས། ཧཱུྃ་གསུམ་དང༌། ཧ་གསུམ་གྱིས་སྟོད་སྨད་ཀྱི་རླུང་རོ་མ་ལུས་པ་བསལ་ནས་འཇམ་རླུང་ཁ་སྦྱར་ཏེ། ཕོ་བ་གཡས་སྐོར་གཡོན་སྐོར་ལན་བཅུ་དྲུག །ཡན་ལག་ལྔ་སྦྱོང་དང་འབྲེལ་བར་བྱའོ། །རྟེན་འབྲེལ་རྫས་ཀྱི་རྣལ་འབྱོར་ནི། བསྒྲུབས་ཤིང་བྱིན་གྱིས་བརླབས་པའི་བཅུད་ལེན་བརྟེན་པ་ཉིད་ཡིན་ནོ། །རྡོ་རྗེ་འཇིགས་བྱེད་ཀྱི་རྣལ་འབྱོར་ནི། རང་ལུས་གཤིན་རྗེའི་གཤེད་དུ་གསལ་བའི་སྤྱི་བོར་བླ་མ་འོད་དུ་ཞུ། སྨིན་མཚམས་ནས་རྡོ་རྗེ་ནོར་བུའི་བར་གྱི་རྩ་དབུ་མ་སྲོག་གི་རླུང་སྔོ་དམར་འོད་ཟེར་ལྔ་ལྡན་གྱིས་གང་བར་བསམ་ནས་འཇམ་རླུང་འཛིན་པའོ། །བདུན་པ་བར་ཆད་ཀྱི་ཆོས་བསལ་བའི་གཟེར་བུ་ཡང༌། སྔར་ཤིན་ཏུ་སྤྲོས་པ་མེད་པའི་བཀའ་ལུང་མན་ངག་ལ་གོམས་པ་ལྷུར་བླངས་པའི་ངང་ཉིད་ནས། གུ་ཡངས་རྒྱ་འབྱམས་སུ་སྤྱོད་པ་ཉིད་གནད་ཀྱི་སྙིང་པོར་གྱུར་པས་སྔ་མའི་ཏིང་ངེ་འཛིན་གྱི་བོགས་འབྱིན་པ་སྟེ། རྐྱེན་སྣང་གི་འཆར་སྒོས་བློ་ཡུལ་གཡེངས་ཏེ། བསམ་གཏན་གྱི་ཡུལ་ལ་ཚེར་མ་བྱེད་ན། རྐྱེན་སྣང་དེ་ཉིད་དངོས་གྲུབ་ཏུ་བླངས་ནས། སྔར་སེམས་བསྐྱེད་པའི་ཐབས་དྲུག་གི་བྱིན་རླབས་བླ་མའི་རྣལ་འབྱོར་སྐབས་ལྟར་བླ་མའི་སྣང་བ་ལམ་དུ་བྱེད་པའི་རྣལ་འབྱོར་དང་ལྡན་པས་གསོལ་བ་རྩེ་གཅིག་ཏུ་བཏབ་མཚམས། བླ་མ་དང་རང་སེམས་བསྲེས་ནས་འབོལ་ལེ་ཤིག་གེ་རྒྱ་ཡན་དུ་འཇོག་ཅིང༌། བློ་རབ་ཀྱིས་ཅེར་ཕོག་ལས་མ་གཡོས་པར་རང་སོ་གཟུང༌། བློ་འབྲིང་གིས་འཆར་སྒོའི་ཡུལ་གང་སྣང་ལ་སོར་འཇོག་ཏུ་བསྐྱང༌། བློ་ཐ་མས་གང་ཤར་རྗེས་མཐུད་རྩ་བྲལ་དུ་ལམ་དུ་འཁྱེར། ཡང་རྣམ་རྟོག་གི་ཚོགས་ཀྱི་འཆར་སྒོ་འགག་མེད་དུ་སྣང་ན། རང་གི་ལུས་ཐ་མལ་པར་གནས་པའི་ལག་པ་གཡས་སུ་གང་བྱུང་ཆ་མེད་པའི་ཡེ་ཤེས་ཀྱི་རལ་གྲི་རྣོ་ངར་དང་ལྡན་པས། ལུས་གཅེས་འཛིན་གྱི་སྙེམས་འཕྲིགས་རྡུལ་ཙམ་མེད་པར་དུམ་བུ་བརྒྱ་སྟོང་དུ་གཏུབས་ཏེ་གནོད་བྱེད་འབྱུང་པོ་རྣམས་ལ་ཅི་དགར་བྱིན་པས། ཚིམས་ཤིང་ཡི་རང་མགུ་བ་བླ་ན་མེད་པ་ཐོབ་སྟེ། སེམས་རྒྱུད་ཀྱི་འཁོན་འཛིན་གདུག་རྩུབ་མ་ལུས་པ་ཞི་ནས་ཕན་བདེ་བྱང་ཆུབ་ཀྱི་སེམས་དང་ལྡན་པར་བསམས་ལ། ༀ་ཨཱཿ ཧཱུྃ། ཞེས་བརྗོད་ལ་མཉམ་པར་བཞག །ཡང་རྣམ་རྟོག་ཏོལ་གྱིས་སྐྱེས་ན། གང་སྣང་བའི་རྣམ་རྟོག་ཟུག་རྔུ་ཅན་དེ་ཉིད། གོང་གི་རྣམ་རྟོག་འོད་གསལ་གྱི་མན་ངག་ལྟར། ལུས་སེམས་རྟེན་དང་བརྟེན་པ་སོ་སོར་ཕྱེ་ནས། རང་རིག་མར་མེའི་རྩེ་མོ་ལྟ་བུ་དེ་ཉིད། གང་འཇིགས་པར་སྣང་བ་དེ་ཉིད་ཀྱི་སྙིང་དཀྱིལ་དུ་ཐིམ་པས་སེམས་ཉིད་དེ་ཉིད་ཀྱི་ངོ་བོར་གྱུར་པར་བསམ་ལ་མཉམ་པར་གཞག །ཡང་རྣམ་རྟོག་ཏོལ་སྐྱེས་ན། འཆར་སྒོ་དེ་ཉིད་ཀྱི་ངོ་བོ་རང་ལ་མ་ཡེངས་རྒྱང་སོ་བཙུགས་པས། ང་ཉིད་གཉིས་མེད་ཀྱི་ཡེ་ཤེས་ཡིན་ན། ཁྱོད་རྟོག་པར་བལྟའམ་ཞེས། ཐག་ཁྲ་ལ་སྦྲུལ་དུ་འཁྲུལ་པ་ཐག་པར་གོ་བའི་རང་ཉམས་བཞིན་དུ་འཁྲུལ་པ་གཞི་མེད་རྩ་བྲལ་དུ་གྱུར་ཏེ། བར་ཆད་ཀྱི་གཡུལ་ལས་རྣམ་པར་རྒྱལ་བའོ། །སྤྲོས་པ་ཀུན༵་གྱི་ཡིད་དག༵འ་ལ། །སྤྲོས་མེད་གྲོལ༵་བའི་ལམ་སྟོན་པའི། །ལམ་མཆོ༵ག་དམིགས་པའི་གནད་བསྡུས་འདི། །ཉུང་བསྡོམས་ཡི་གེར་བཀོད་པའོ། །གློ་བོ་ལོ་ཙཱ་བའི་གཏོང་ཐུན་ལས་བཏུས་སོ། (༦༤) །རྣལ་འབྱོར་བཞི་རིམ་གྱི་ཁྲིད་ཡིག །རྣལ་འབྱོར་བཞི་རིམ་གྱི་ཁྲིད་ནི། སྐྱབས་སེམས་སྔོན་དུ་སོང་ནས། བསྐྱེད་རིམ་བདག་བྱིན་གྱིས་བརླབ་པ་ནི། སྤྱན་དབུ་མ་ནས་བརྩམས་ཏེ། བཅོམ་ལྡན་འདས་ཡབ་ཡུམ་གྱི་སྐུ་ཡོངས་སུ་རྫོགས་པ་ལ་སེམས་འཛིན་པའོ། །སྣང་བ་བྱིན་གྱིས་བརླབ་པ་ནི། བཅོམ་ལྡན་འདས་ཡབ་ཡུམ་དུ་གསལ་བའི་སྙིང་ཁར་ཡ་དམར་པོ་གཅིག་བསམ། དེ་ལས་འོད་འཕྲོས་པས་སྣོད་ཀྱི་འཇིག་རྟེན་ཐམས་ཅད་འོད་དམར་པོར་ཞུ། དེ་ཉིད་གཞལ་ཡས་ཁང་དུ་གསལ་བཏབ། ཡང་ཡ་ལས་འོད་འཕྲོས། བཅུད་ཀྱི་སེམས་ཅན་ལ་ཕོག་པས། སེམས་ཅན་ཐམས་ཅད་བཅོམ་ལྡན་འདས་ཡབ་ཡུམ་གྱི་སྐུར་བསམ་པའོ། །ཟུང་འཇུག་བྱིན་གྱིས་བརླབ་པ་ནི། ཐ་མལ་དུ་སྣང་བའི་སྣོད་བཅུད་འདི་སྣང་ཙམ་ཉིད་ནས་གཞལ་ཡས་ཁང་དང༌། བཅོམ་ལྡན་འདས་ཀྱི་སྐུ་དྲན་ཅིང་བསྒོམ། དེ་ལྟར་སྣང་ཡང་རང་བཞིན་མ་གྲུབ་པས་ཆུ་ཟླ་ལྟ་བུ་ནི་ཟུང་འཇུག་གིས་བྱིན་གྱིས་བརླབས་པའོ། །སྔགས་ཀྱི་རིམ་པ་ནི། སྟོང་ར་ཧ་གསུམ་ཁ་ནས་རླུང་ཕྱིར་བཏང་བ་དང༌། ཧཱུྃ་གསུམ་སྣ་ནས་རླུང་ཕྱིར་བཏང་བའོ། །རྐང་པ་གཉིས་ཀྱི་བོལ་ནས་ལག་པ་གཉིས་ཀྱིས་གཟུང༌། རྩ་གསུམ་གསལ་བཏབ། རླུང་གཡས་རོ་མ་ནས་དབུ་མའི་ནང་དུ་ཞུགས་པར་བསྒོམ། རླུང་འཛིན་ཅིང་དབུ་མའི་ནང་དུ་སྡིག །དེ་བཞིན་དུ་གཡོན་རྐྱང་མ་ནས་དབུ་མར་ཞུགས་རླུང་འཛིན་ཅིང་སྡིག །དེ་ནས་དབུ་མར་ཞུགས་པ་ལ་དམིགས་ལ་རླུང་ཐུབ་ཚད་གཟུང་ངོ༌། །འཕོ་བ་རང་གི་སེམས་ཀྱི་ངོ་བོ་ཧཱུྃ་དམར་པོ། དེའི་འོག་ཏུ་ཨཱཿ དེའི་འོག་ཏུ་ཧྲཱིཿ དེའི་འོག་ཏུ་ཡ་ལྗང་ཁུ་གཉིས་ལྟག་སྤྲོད་དུ་ཡོད་པ། མིག་ལ་སོགས་པ་བུ་ག་དགུ་རིམ་གྱིས་ཧཱུྃ་གཉིས་སྦྲེལ་རེས་བཀག །སྤྱི་བོ་སྐར་ཁུང་ཕྱེ་བ་ལྟར་ཡོད་པའི། རང་གི་མདུན་དུ་ཏ་ལའི་ཤིང་སྡོང་དགའ་ལྡན་དུ་སླེབས་པ་གཅིག་བསམ། དེའི་སྟེང་དུ་རང་གི་རྩ་བའི་བླ་མ་བཅོམ་ལྡན་འདས་ཡབ་ཡུམ་དུ་གསལ་བར་བཞུགས་པར་བསྒོམ། དེ་ནས་སྙིང་ཁའི་ཡ་གཉིས་ལས་རླུང་བྱུང་བས། ཧྲཱིཿ ཕུལ། དེས་ཨཱཿ ཕུལ། དེས་ཧཱུྃ་ཕུལ་བས། ཧཱུྃ་སྤྱི་བོ་ནས་ཐོན། མདུན་གྱི་བླ་མ་བཅོམ་ལྡན་འདས་ཀྱི་ཐུགས་ཀར་ཕོག་པར་བསམ། རྗེས་སུ་ཧཱུྃ་དེ་ཉིད་རང་གི་སྙིང་ཁར་གནས་པར་བསམ་ཞིང་ཀ་ཧི་བརྗོད། སྤྱི་བོར་སྣ་ཚོགས་རྡོ་རྗེས་སྒོ་བཀག་པར་བསམ་མོ། །བྱིན་གྱིས་བརླབ་པའི་རྣལ་འབྱོར། ཕྱག་རྒྱ་དུང་ཅན་མ་ལ་སོགས་པའི་ཐབས་ཀྱིས་བདེ་སྟོང་ཟུང་འཇུག་ཏུ་རྟོགས་པར་བྱེད་པ་ཡིན་ལ། དེ་ཡང་ཟག་བཅས་སུ་རྟོགས་པ་ཡིན་པས། དེ་ཉིད་ཀྱང་ཟག་མེད་དུ་བྱིན་གྱིས་རློབ་པར་བྱེད་པ། དེ་ཁོ་ན་ཉིད་ཀྱི་རིམ་པ་ནི་སྤྲོས་པ་དང་བྲལ་བར་ངོ་སྤྲད་དོ། །རྣལ་འབྱོར་བཞི་རིམ་ཀུན༵་གྱི་གནད། །དག༵འ་བཞི་གྲོལ༵་བ་མཆོ༵ག་ལམ་དུ། །གྲུབ་ཆེན་དཔལ་འཛིན་བཞེད་པའི་ཆ། །དམིགས་ཐོ་སྙིང་པོ་ཡི་གེར་སྤེལ། །གློ་བོ་ལོ་ཙཱ་བའི་ཁྲིད་ཡིག་ལས་བཏུས་སོ། (༦༥) །འཇིགས་བྱེད་ཀྱི་ཁྲིད་ཡིག །འཇིགས་བྱེད་ཀྱི་རྭ་ཁྲིད་ནི། སྐྱབས་སེམས་སྔོན་དུ་སོང་ནས། རང་རྡོ་རྗེ་འཇིགས་བྱེད་དཔའ་བོ་གཅིག་པར་གསལ་བའི་རྭ་སྔོས་སངས་རྩ་བ་ཁྲོ་གཉེར་ཅན་བར་གཞའ་ཁུག་ཅན། རྩེ་མོ་རྣོ་ཟུལ་བ་ནང་དྭངས་གསལ་བཻ་ཌཱུའི་སྦུགས་ལྟ་བུ། རྭ་རྩེའི་ནང་དུ་ཐིག་ལེ་དཀར་ལ་འཚེར་བ། བ་མོ་འཛག་པའི་དབྱིབས་ཅན། སྙིང་ཁར་པད་ཟླའི་སྟེང་དུ་རྒྱུའི་འཇམ་དབྱངས་གུར་གུམ་གྱི་མདོག་ཅན་དམར་སེར་འོད་ཕུང་འཁྲིགས་པ། གཡས་རལ་གྲི་དཔུང་ཐད་འཕྱར་བ། གཡོན་ཨུཏྤལ་སྟེང་ན་གླེགས་བམ། ཞབས་རྡོ་རྗེའི་སྐྱིལ་ཀྲུང༌། དར་དང་རིན་པོ་ཆེའི་རྒྱན་ཅན༑ མཚན་དཔེ་གསལ་རྫོགས་འཛུམ་པའི་བཞིན་ཅན། རལ་པའི་ཟུར་ཕུད་སྐྲ་རྒྱན་མེ་ཏོག་ཕྲེང་བས་མཛེས་པ་ཚོན་གང་བ་ཞིག་གསལ་བཏབ་ནས་མཉམ་པར་འཇོག །དེའི་རྭའི་རྩེའི་ཐིག་ལེ་གཡས་གཡོན་ལས་བྱང་སེམས་བདེ་བའི་རང་བཞིན་བ་ཐག་ཙམ་རེ་བབས་ནས་རྭ་ནང་ནས་མར་ནམ་མཁའ་དྭངས་པ་ལ་འཇའ་དཀར་རམ་ཤེལ་ལས་སྐུད་པའི་ཚུལ་དུ་ཟ་འགྲམ་ཕན་ཚུན་བརྒྱུད་དེ་བྱུང༌། མགྲིན་པ་ནས་རྒྱུན་གཅིག་ཏུ་གྱུར་པ་དབུ་མའི་ལམ་ནས་སྙིང་ཁ་ན་བཞུགས་པའི་འཇམ་དབྱངས་ལ་ཐིམ་པས། འོད་ཟེར་ཉི་མ་འབུམ་གྱི་རྣམ་པར་ཤར་བ་རང་ཉིད་ཀྱི་བ་སྤུའི་སྒོ་ཐམས་ཅད་ནས། འོད་ཀྱི་རྩེ་མོ་བྱེ་བ་ཕྲག་ཁྲིག་ཕྱིར་སྤྲོས་པས་རང་ཉིད་ལྷར་གསལ་བའི་རྣམ་པ་མུན་ཁུང་དུ་སྒྲོན་མེ་བཏེགས་པ་བཞིན་གསལ་བ་རབ་ཀྱི་མཐར་ཕྱིན་པར་གྱུར་ཏེ། མ་ཧེའི་ཞལ་འཇིགས་རྔམས་རྣམ་པར་ཁྲོས་པའི་ཤངས་སྒོ་ཡངས་པ་ནས་སྲོག་གི་རླུང་སྔོ་དམར་དུད་སྤྲིན་ལྟར་འཚུབས་པ། གདོང་གི་ཁྲོ་གཉེར་རྒྱ་མཚོའི་རླབས་ལྟར་འཁྲིགས་ཤིང༌། སྤྱན་གསུམ་ཁྲ་ཧུར་རེ་བའི་སྡང་མིག་ཕྱོགས་བཅུར་གཡོ་བཞིན་པའི་རྫི་སྨིན་ནི་གློག་ལྟར་འཁྱུག་པ། དབུ་སྐྲ་ཁམ་སེར་མེ་ལྟར་འབར་བའི་རྩེར། དྲག་པོའི་མེ་ལྕེ་ལྷབ་ལྷབ་མཆེད་པའི་ཚུལ་གྱིས་རྣམ་པར་འཕྲོ་བ། མཆེ་བ་དཀར་ལ་དམར་བའི་ཁྲག་གིས་གོས་པའི་རྣོ་ངར་ཚེམས་རྣམ་པར་གཙིགས་ཤིང༌། ཞལ་ལྷག་པར་གདངས་ནས། ལྗགས་བསྐྱོད་པའི་དབུགས་མེ་ལྟར་ཚ་བའི་རླུངས་ཀྱི་འཚུབ་མས་གདོན་བགེགས་རྣམས་བསྲེགས་པ། སྐུ་སྦོམ་ཐུང་ལིང་ག་རྒྱས་པའི་ཤ་སུལ་ཅན། ལྟོ་བ་ཟླུམ་པོ། ཕྱག་ཞབས་ཀྱི་སེན་མོ་ལྕགས་ཀྱུའི་རྣམ་པས་དགྲ་བགེགས་འགུགས་པར་མཛད་པའི་ཕྱག་གཉིས་གྲི་ཐོད་ཐུགས་ཁར་འཛིན་ཞིང༌། ཞབས་གཡོན་བརྐྱངས་པས་པད་ཉིའི་གདན་ལ་འགྱིངས་ཚུལ་གྱིས་བཞུགས་པ། རུས་པའི་རྒྱན་གྱིས་དཀར་ཆབས་སེ་བརྒྱན་པ། ཐོད་སྐམ་གྱི་ཅོད་པན། མི་མགོ་ཁྲག་འཛག་གི་དོ་ཤལ། དུག་སྦྲུལ་གྱི་མཆོད་ཕྱིར་ཐོགས་འཆང་བ། ཡེ་ཤེས་ཀྱི་མེ་དཔུང་འབར་བའི་དབུས་ན་བཞུགས་པའི་སྐུ་གསལ་བ་རབ་ཀྱི་ང་རྒྱལ་ལས་མ་གཡོས་པར་གཅེར་བུ་གྲི་ཐོད་འཛིན་པའི་ཕྱག་རྒྱ་བཅས་ནས་མཚན་ཕྱེད་ཙམ་ལ། གོམ་པ་བདུན་ཚུན་གྱི་སར་གར་སྟབས་སུ་བསྐྱོད་པའི་རྩལ་སྦྱངས་པས་རྩིག་པ་དང་ར་བ་ལ་ཐོགས་པ་མེད་པའི་རྫུ་འཕྲུལ་ཐོབ་ཅིང༌། དེའི་ཚེ་དུར་ཁྲོད་སོགས་སུ་རྒྱུ་བར་བྱའོ། །སླར་ཡང་སྙིང་ཁའི་འཇམ་དབྱངས་ཀྱི་སྐུ་ལས་འོད་སྣང་དང༌། རྭ་རྩེའི་ཐིག་ལེ་བྱང་ཆུབ་སེམས་ཀྱི་རང་བཞིན་གྱིས་ལུས་ནང་གང་བ་ནམ་མཁའ་འཇའ་དཀར་གྱིས་ཁེབས་པ་ལྟར་གྱུར་པའི་འོད་རྩེ་སྤོས་ཀྱི་དུད་པ་ལྟར་ལིང་ག་རྒྱས་པའི་བུ་ག་ནས་རིམ་གྱིས་ཐོན་པའི་དཀར་ཆ་དྭངས་པ་ན་བུན་ལྟ་བུ་དེས་རང་ཉིད་ཀྱི་སྐུ་ལུས་མ་ལུས་པའི་ཆ་གཡོགས་པས་སྔོ་སྐྱ་འོད་ཕུང་གི་ཟེར་འཕྲོ་བ། དངུལ་ཆུའི་རྡོག་མ་ལྟ་བུའི་ཐིག་ལེའི་རང་བཞིན་ལྷར་གསལ་བའི་བདེ་སྟོང་ལ་ཡིད་རྩེ་གཅིག་ཏུ་གཏད་དེ་བསྒོམ་མོ། །འདི་ལ་འཁོར་ལོ་བཞི་དང་རིགས་ལྔ་ཡུམ་བཞི་སྒེག་སོགས་བརྒྱད་ཀྱི་ས་བོན་རྩ་འཁོར་ལ་འགོད་པ་དཔྱད་པའི་གནས་སུ་སྣང་གསུང་ངོ༌། །ཀུན༵་ནས་རང་ཡིད་རྭ་རྩེ་ལ། །སེམས་འཛིན་དག༵འ་བདེའི་རང་བབས་ཀྱིས། །མཚན་མོ་རང་ཉིད་རྒྱུ་བའི་གར། །སྦྲུལ་མདུད་གྲོལ༵་ཚུལ་མཆོ༵ག་འདི་བྲིས། །སྐྱོའི་ཡི་གེ་ལས་བཏུས་སོ། (༦༦) །ཡབ་ལ་བརྟེན་པའི་རྩ་དབུ་མའི་ཁྲིད་ཡིག །ཡབ་ལ་བརྟེན་པའི་རྩ་དབུ་མའི་ཁྲིད་ནི། སྐྱབས་སེམས་སྔོན་དུ་སོང་ནས། སྐྱིལ་ཀྲུང་མཉམ་གཞག་གི་ཕྱག་རྒྱ་ལྟེ་བར་གཅེར། ལྟེ་བར་ཟླ་བ་སྲན་མ་ཕྱེད་བཀས་ཙམ་གྱི་སྟེང་དུ་འབྱུང་བ་ལྔའི་རླུང་དབུས་སྔོ། ཤར་སེར། ལྷོ་ལྗང༌། ནུབ་དམར། བྱང་དཀར་བའི་ཐིག་ལེ་རྣམས་བསམས་ལ། དབུགས་ལན་བདུན་རྒྱུར་གཞུག་ལ། རླུང་ཁ་སྦྱོར་པུས་མོ་ལ་བསྐོར་བ་གཅིག །སེ་གོལ་གཅིག །ངལ་ན་གདན་ལས་མི་ལྡང་བར་ངལ་གསོ་ཐུན་ཆུང་ལྔ་སོང་བ་དང་སྤྱོད་ལམ་བྱ། ཉིན་ཞག་རེ་ལ་ཐུན་ཆུང་སུམ་ཅུ་བྱ། ཐུན་ཆུང་རེ་ལ་བསྐོར་བ་རེ་དང་སེ་གོལ་རེ་བསྣན་པས་རབ་ཞག་གསུམ། འབྲིང་ཞག་བདུན། ཐ་མ་ཞག་བཅོ་ལྔ་ནས་མེའི་ནུས་པ་རྙེད་དོ། །རང་ལྷར་གནས་པའི་ལྟེ་བར་ༀ་གྱི་སྟེང་དུ་ཐིག་ལེ་དམར་པོ་དང༌། སྤྱི་གཙུག་ཏུ་ཧཾ་དཀར་པོའི་བར་དབུ་མས་སྦྲེལ། ལྟག་པར་སྟོབས་ཀྱི་རླུང༌། རོ་རྐྱང་མར་སྣ་ཐིག་ལེ་ལ་གཏད། ཡར་སྣ་སྣ་བུག་ཏུ་ཟུག །རྐང་མཐིལ་རླུང་གིས་སུམ་མདོའི་མེ་སྦར། འོག་སྒོ་འབྱེད་འཛུམ་བྱས་པས། ཨཾ་འབར་ཏེ་རྩ་གཡས་གཡོན་ནས་སོང་ལྟག་པའི་རླུང་ལ་ཕོག །ཧཾ་གི་ཀླད་ཀོར་ནས་ཀྵུཾ་དཀར་དམར་འོད་ཀྱི་གཏུམ་མོ་ལས་མེ་ལྕེ་ཐུར་དུ་ཆད་དེ་ལྟེ་བའི་ཨཾ་གི་ཀླད་ཀོར་ནས་ཀྵུཾ་དམར་ནག་ཐ་མལ་གྱི་གཏུམ་མོ་ལས་མེ་གྱེན་དུ་འབར། སྙིང་ཁར་མེ་གཉིས་ཁྲུག་ཆིལ་ཆིལ་འཐབ་པར་བསམས་ལ་རླུང་ཁ་སྦྱར་དྲག་པོ་བྱ༑ རང་དང་ཡེ་ཤེས་ཀྱི་ཕྱག་རྒྱའི་འོག་ཏུ་འབྱུང་བཞི་རི་རབ། རང་བདེ་མཆོག་ཏུ་གསལ་བའི་རྡོ་རྗེའི་རྩེར་བྱཱཾ། ཕྱག་རྒྱ་ཕག་མོར་གསལ་བའི་པདྨའི་ཟེའུ་འབྲུའི་རྩེར་དྷྱཱཾ། རང་གི་ལུས་ཀྱི་རྩ་དབུ་མ་རྡོ་རྗེ་སྟེང་འོག་རྭ་གསུམ་པ་ཁ་དོག་སྣ་ཚོགས་པར་བསམ། ཡབ་ཡུམ་གྱི་སྙོམས་པར་ཞུགས་པའི་བྱང་སེམས་སོ་སོའི་དབུ་མའི་ལམ་ནས་མཆོག་གི་གནས་སུ་བྱོན། ཧ་སི་ཧྲིརཎ་ཧཱུྃ་གི་གདངས་ཀྱིས་གནས་སུ་དྲངས་ཤིང་སྟེང་འོག་གི་རླུང་གི་ལམ་སྦྱངས། འཕོ་བ་བཤང་ལྕིའི་བར་ཀྵུཾ། ལྟེ་བར་ཀྵྨུྃ ། སྙིང་གར་ཡྨུྃ ། དཔུང་པ་གཉིས་སུ་ཧྨུྃ་མགྲིན་པར་སྨུྃ་ཁར་སུྃ། སྣ་གཉིས་སུ་ཡུྃ། རྣ་བ་གཉིས་སུ་ཡབ་ཡུྃ། མིག་གཉིས་སུ་ཧཱུྃ། མཛོད་སྤུར་སུྃ། སྤྱི་གཙུག་ཏུ་ཀྵུཾ། སྙིང་ཁར་ཧཱུྃ། ཧིཀ྄་ཀ །ཀ་ཧིས་རང་སེམས་ལྷའི་ས་བོན་ཟླ་བ་རླུང་གིས་འདེགས་བྱེད་རྣམས་མཆོག་གི་ལམ་ནས་འཕེན་པའོ། །ཨུཏྤལ་གཞོན་ནུ་ཁ་འབྱེད་པའི། །ཀུན༵་དག༵འི་རང་གྲོལ༵་མཆོ༵ག་གི་གསང༌། །མྱུར་ལམ་སྙིང་པོའི་དམིགས་པའི་བཅུད། །ཉུང་ངུའི་སྒོ་ནས་བྲིས་པའོ། །རྗེ་བཙུན་གྲགས་པའི་ཁྲིད་ཡིག་ལས་བཏུས་སོ། (༦༧) །ཡུམ་གྱི་རྩ་དབུ་མའི་ཁྲིད་ཡིག །ཡུམ་ལ་བརྟེན་པའི་རྩ་དབུ་མའི་ཁྲིད་ནི། སྐྱབས་སེམས་སྔོན་དུ་སོང་ནས་བླ་མ་ འདི་ཕྱགས་ལྷຏམ། ཟེར་བ་བའང་སྣང༌། སྤྱི་བོར་བསྒོམ། ཚམ་རྔམས་སྔགས་ཀྱི་སྲུང་འཁོར། རང་བསྐྱེད་རིམ་མཁའ་སྤྱོད་མ་དབང་བཞི་ལུས་བསྒྲིགས་དང་ལྡན་པ་ལ་གོ་ཆས་རྒྱས་བཏབ་ལུས་གནད་ལྡན་པས། ལྟེ་བར་དབུས་སུ་ནམ་མཁའི་རླུང་རྒྱུ་བའི་རྩ་གྲི་གུག་སོ་བཅད་པ་ལྟ་བུ། ཤར་དུ་རླུང་གི་རླུང་རྒྱུ་བའི་རྩ་དབྱུགས་པ་ལྟ་བུ། ལྷོར་ས་རླུང་རྒྱུ་བའི་རྩ་ཚེག་དྲག་ལྟ་བུ། ནུབ་ཏུ་ཆུ་རླུང་རྒྱུ་བའི་རྩ་ཐོང་གཤོལ་ལྟ་བུ། བྱང་དུ་མེ་རླུང་རྒྱུ་བའི་རྩ་ཐིག་ལེ་ལྟ་བུ་རྣམས་ཐིག་ཕྲན་ལྟར་བསྒོམས་ནས་འོག་རླུང་ཅུང་ཟད་འཐེན། སྟེང་རླུང་དལ་བུས་མནན། འོག་རླུང་དྲག་ཏུ་འཐེན་ནས་བུམ་ཅན་བཟུང༌། དམིགས་པ་དབུས་ཀྱི་རྩ་ལ་གཏད། ཞག་གཅིག་ལ་དྲུག །ཉིན་མོ་ལ་ཐུན་གསུམ། དེ་ལའང་ལྔ་བྱས་ནས་སྔ་ཐུན་ལ་སེ་གོལ་གཅིག་གཏོགས། དེ་ལས་ལྷག་པ་མི་འཛིན། ཐུན་ཆུང་རེ་ལ་སེ་གོལ་རེ་སྤར་ནས་སྔ་ཐུན་རྗེས་མ་ལ་ལྔ། བར་ཐུན་རྗེས་མ་ལྔ་སྟེ་བཅུ། དགོང་ཐུན་རྗེས་མ་ལ་ལྔ་སྟེ་བཅོ་ལྔ། ཐོ་རངས་ཚུན་ལ་སུམ་ཅུ། ཞག་གཉིས་ལ་དྲུག་ཅུ། ཞག་གསུམ་ལ་དགུ་བཅུ། དེ་ལྟར་བསྣན་ཅིང་སྦྱངས་པས། རབ་ཞག་གསུམ་ལྔ། འབྲིང་བདུན་ནམ་བཅུ། ཐ་མ་བཅོ་ལྔ་ལ་བདེ་དྲོད་སྐྱེའོ། །རྩ་ཟུག་རླུང་ཟུག་ཉོན་མོངས་ཆེར་སོང་བ་བཀྲེས་སྐོམ་ཉམས་སོགས་སྣ་ཚོགས་བྱུང་བ་ངོ་ཤེས་པར་བྱས་ནས་བསྐྱང་ངོ༌། །སྔོན་འགྲོ་རླུང་སྦྱང་བའོ། །རྐང་མཐིལ་རླུང༌། སུམ་མདོ་མེ། ལྟོ་བ་ལ་ཨ་ཐུང་ཀླད་ཀོར་དང་བཅས་པ། སྨིན་མཚམས་ཀྱི་ཐད་ཀྱི་སྤྱི་བོའི་དཀྱིལ་དུ་ཧཾ་མགོ་ཐུར་བསྟན། དེ་གཉིས་ཀྱི་བར་དུ་དབུ་མས་བ་ཐག་བཞིན་སྦྲེལ་བ། ལྟག་པར་སྟོབས་ཀྱི་རླུང༌། རོ་རྐྱང་གཉིས་མིག་གིས་མི་བཟོད་ཙམ་རྩ་བ་ༀ་ལ་ཐུག །དྲང་པོར་ཧཾ་གི་རྩར་སོང་བའི་རྩེ་མོ་གུག་པ་སྣ་བུག་ལ་ཟུག་པར་བསམ། རླུང་གཡོས་མེ་སྦར་ལྟེ་བའི་ཨཾ་ལས་མེའི་རྣམ་པའི་རླུང་དྲོད་ཀྱི་རང་བཞིན་ཅན། རོ་རྐྱང་གི་ལམ་ནས་ཞུགས་རྩ་ལམ་སྦྱངས། ལྟག་པའི་རླུང་གིས་མར་དེད། སྣ་ནས་དལ་བུས་རྔུབ་པས་རོ་རྐྱང་གི་མེ་མར་ལོག་ནས། ཨཾ་ལ་དལ་བུས་བསྣུན་པས། བུས་པ་བཞིན་འབར་བས་ཨཾ་ལས་མེ་ཤིན་ཏུ་ཆ་ཕྲ་བ་དབུ་མ་ནས་ཡར་སོང་སྟེ་རླུང་ཁ་སྦྱར། ལུས་ལས་མེ་སྟག་འཕྲོས། ཐིག་ལེ་སྐར་མ་ལྟ་བུ་འཕྲོ་ཞིང་ཐིམ་པ་སོགས་ཅི་ཡང་འཆར་ཏེ་རང་ལྷག་པར་གནས་པའོ། །ལྟེ་བར་རྩ་འཁོར་རྩ་འདབ་དྲུག་ཅུ་རྩ་བཞིའི་ནང་སྐོར་སྡེ་ཚན་བརྒྱད་ཀྱི་ཡི་གེ་ཕྱི་མོ་ཨཱ་ལི་ཀཱ་ལི་ལྔ་བཅུ། ལྟེ་བར་ཐུང་ངུ་དྲུག །ལྟེ་བར་ཨ་ཐུང་གི་ཀླད་ཀོར་ནང་དུ་ཀྵུཾ་དམར་ནག་རྩུབ་ལ་དྲག་པ་དང༌། སྤྱི་བོའི་ཧཾ་གི་ཀླད་ཀོར་དུ་ཡང་དེ་འདྲ་ཞིག་བསམ། རླུང་གིས་མེ་སྔར་བཞིན་བསྐུལ་བས་ཀྵུཾ་ལས་མེ་ཤིན་ཏུ་ཕྲ་བ་སྙིང་ཁ་ནས་ཡར་སོང༌། སྣ་བུག་ནས་རླུང་དལ་བུས་རྔུབས་པས་ལྟག་པའི་རླུང་སྟོབས་རྒྱས་ཏེ་ཧཾ་གིས་ཀྵུཾ་གཙུབ། དབུ་མའི་ནང་ནས་མར་སོང་འདྲེས་པར་བསམས་ལ་རླུང་བཟུང་། ཁ་འབྱེད་པ་དངོས་ནི་མར་མེ་འབར་བ་དོར་ལ་ཧཾ་ལས་བྱང་སེམས་བ་ཐག་ལྟ་བུ་ན་ར་ར་བབས་པས་ཨཾ་གསོས་པར་བསམ་ཞིང་རླུང་ཁ་སྦྱོར་བྱ། དམིགས་པའི་གྲངས་ནི། རླུང་སྦྱོང་བ་ལ་གཅིག །རང་ལྷག་གནས་ལ་གཅིག །དབུ་མ་ཁ་འབྱེད་ལ་གཅིག །དངོས་གཞི་ལ་གཅིག་གམ་ཁ་འབྱེད་པ་གཉིས་སུ་མཛད་དོ། །ཀུན༵་ལས་ཁྱད་འཕགས་ཙཎྜ་ལཱི། །དག༵འ་ཆེན་མཁའ་སྤྱོད་རྫོགས་པའི་རིམ། །གྲོལ༵་བའི་གནད་མཆོ༵ག་སྙིང་པོ་འདི། །དབྲི་བསྣན་མེད་པར་བྲིས་པའོ། །གསུང་རྒྱུན་བཞིན་སྙིང་པོ་དྲིལ་ནས་བྲིས་པའོ། (༦༨) །དྲིལ་བུ་རིམ་ལྔའི་ཁྲིད་ཡིག །དྲིལ་བུ་རིམ་ལྔའི་ཁྲིད་ནི། སྐྱབས་སེམས་སྔོན་དུ་སོང་ནས། རང་སྐད་ཅིག་གིས་ལྷར་གསལ་བའི་ཡུམ་འོད་ཀྱི་རྣམ་པས་ལྟེ་བའི་ཨ་ལ་བསྟིམ། བླ་མ་ལ་གུས་འདུད་བྱ་ཞིང་གསོལ་བ་བཏབ། སྙིང་ཁར་ཟླ་བ་སྲན་མ་ཕྱེད་བཀས་ཙམ་གྱི་སྟེང་དུ་ཐིག་ལེ་དམར་སྐྱ་ཡུངས་འབྲུ་ཙམ་ལ་སེམས་བཟུང་རྗེས། མིག་གཉིས་ལ་དཀར་པོ། རྣ་བར་སྔོན་པོ། སྣ་བུག་གི་འཛོམས་སུ་སེར་པོ། ལྕེའི་རྩ་བར་དམར་པོ། མཚན་མའི་རྩེར་ལྗང་ཁུ། སྔར་གྱི་དམར་སྐྱའི་སྟེང་དུ་སྔོ་སྐྱ་སྟེ་ཐམས་ཅད་ཟླ་བ་ལ་ཚུལ་སྔར་བཞིན་ལ་ཤེས་པ་གཏད། དབང་པོ་ཡུལ་གང་ལ་འཕྲོ་བ་དང་སྦྱོར། ཡུལ་དྲུག་ལ་མི་འཕྲོ་ན། སྙིང་ཁའི་ཁོ་ན་ལ་གཏད་དེ་ས་བོན་དང་བཅས་པའི་རིམ་པའོ། །སྣ་གཡས་གཡོན་ཉི་ཟླའི་རླུང༌། སྣ་བུག་གི་བར་ལག་མེད་པར་བསྒོམས་ལ། ཕྱིར་རྒྱུ་དུས་རི་སྣར་སྨུག་པ་ཆགས་ཚུལ། ནང་དུ་འོད་ཟེར་གྱི་རྣམ་པས་ལུས་གང་བར་བསམ་ཞིང༌། དབང་པོའི་སྒོར་སྤྲོ་ན་སྔར་བཞིན་ལ་མ་སྤྲོ་ན་འགལ་བ་མེད་གསུངས། ས་བོན་མེད་པའི་རང་བྱིན་གྱིས་རླབས། རླུང་ལྡང་འཇུག་ལན་གསུམ་རྗེས་རང་གི་སྤྱི་བོར་སྣ་ཚོགས་རྡོ་རྗེ་ཕྱོགས་མདོག་གི་ལྟེ་བར་ཆོས་འབྱུང༌། དེའི་ནང་དུ་རྡོ་རྗེ་དམར་སྐྱའི་ལྟེ་བར་ཟླ་བ་ལ་ཧཱུྃ་སྔོན་པོ་ལས་འོད་ཟེར་སྤྲོས་པས་སངས་རྒྱས་བྱང་སེམས་རྣམས་བསྟིམ་ཞིང༌། སྤྲོ་ན་མིག་ནས་མཚན་མའི་བར་དང༌། སྙིང་ཁ་ལྟེ་བ་རྣམས་སུ་ཡང་བསླབ་ཅིང་སྣ་གཡས་ནས་རླུང་རྒྱུ་ན་མཛོད་སྤུར་ཉི་མ། གཡོན་ནས་ཟླ་བར་བསམ་ཞིང་སྟེང་དུ་ཐིག་ལེ་དབུས་སྔོན། ཤར་དཀར། བྱང་ལྗང༌། ནུབ་དམར། ལྷོ་སེར་བ་ལ་དམིགས་ཏེ་རླུང་བསྒོམས་པས་ས་བོན་མེད་པའི་སྣ་ཚོགས་རྡོ་རྗེ། དམ་ཚིག་གི་ཕྱག་རྒྱ་ནི་རང་ཡི་དམ་ཡབ་ཡུམ་དུ་བསྒོམས་པའི་མཁའ་གསང་པད་རྡོར་དུ་བསྐྱེད་པའི་རྩེར། བྱང་སེམས་དྷྱཱཾ་གྱི་ཡི་གེར་བསམས་ལ་སྙོམས་པར་འཇུག་ཅིང༌། ལས་ཀྱི་ཕྱག་རྒྱ་དངོས་ལའང་དེ་བཞིན་དང༌། ཆོས་ཀྱི་ཕྱག་རྒྱ་ནི་རྡོ་རྗེའི་བུ་གར་ཧཱུྃ་དཀར་པོ་ཐིག་ལེའི་རང་བཞིན་ཅན་ལ་ཤེས་པ་གཏད་ཅིང་བདེ་བ་རྙེད་ནས་རིམ་པས་གསང་རྩ་ལྟེ་སྙིང་མགྲིན་སྤྱིར་དྲངས། ཕྱག་རྒྱ་ཆེན་པོ་བདེ་བ་མཐའ་དང་བྲལ་བའི་རང་བབས་གཟོ་མེད་དུ་འཇོག་པ་སྟེ་ནོར་བུ་འགེངས་པའི་རིམ་པའོ། །གསང་གནས་སུ་ཆོས་འབྱུང་དམར་སྐྱའི་ནང་དུ་ཐིག་ལེ་ལྔ་ཚོམ་སྔར་ལྟར་བསྒོམས་ལ་སེམས་བཟུང་ཞིང་མཐར་ཐིག་ལེ་ལས་མེ་འོད་གཡས་རོ་མའི་ལམ་ནས་ཕྱིར་སོང༌། ཕྱོགས་བཅུའི་དེ་བཞིན་གཤེགས་པའི་བྱང་ཆུབ་ཀྱི་སེམས་མེ་སྣ་ལ་ཁྱེར་ཏེ་གཡོན་རྐྱང་མའི་ལམ་ནས་ནང་དུ་ཞུགས་པར་བསམ་ཞིང་འཇམ་རླུང་ཁ་སྦྱར་ནས་བསྒོམས་ཏེ། ཛ་ལནྡྷ་རའི་རིམ་པའོ། །རང་གི་སྙིང་ཁར་ཟླ་བ་ལ་གནས་པའི་ཧཱུྃ་ཡིག་དཀར་པོ་ལ་སེམས་གཏད་དེ། མཐར་དེ་ལས་འོད་འཕྲོས་སྣོད་བཅུད་འོད་དུ་བསྡུས་ནས་ཧཱུྃ་ལ་ཧཱུྃ་གི་ཨུ་ཧ་ལ། ཧ་མགོ་བོ་ལ། དེ་ཟླ་ཚེས་ལ༑ ཐིག་ལེ་ནཱ་དའི་བར་དུ་བསྡུས་ཏེ། ནཱ་ད་ཡང་སྤྲིན་དེངས་པ་ལྟར་གྱུར་ཏེ། ཐམས་ཅད་སྟོང་པ་འོད་གསལ་ལ་མཉམ་པར་འཇོག །སྟོང་ཉམས་ཆེ་ན་ནཱ་དར་ལངས། བདེ་ཉམས་ཆེ་ན་སྔར་བཞིན། བསམ་གྱིས་མི་ཁྱབ་པའི་རིམ་པའོ། །རིམ་ལྔའི་ཉམས་ལེན་ཀུན༵་འདོམས་པའི། །ཉུང་བསྡུས་དག༵འ་སྟེར་དམིགས་པའི་ཐོ། །གྲོལ༵་མཆོ༵ག་རང་གིས་ཐོབ་པའི་ཚུལ། །ཇི་བཞིན་ཡི་གེར་བཀོད་པའོ། །ཚོགས་སྒོམ་ཀུན་དགའ་དཔལ་གྱི་ཁྲིད་ཡིག་ལས་བཏུས་སོ༑ (༦༩) །ནག་པོ་རིམ་བཞིའི་ཁྲིད་ཡིག །ནག་པོ་རིམ་བཞིའི་ཁྲིད་ནི། སྐྱབས་སེམས་སྔོན་དུ་སོང་ནས། བདག་བླ་མས་དཀྱིལ་འཁོར་དུ་བཅུག་ཕྱིན་ལུས་ཀྱི་ཕྱི་ནི་བདེ་མཆོག་ཞལ་བཞི་ཕྱག་བཅུ་གཉིས་པ་ཡིན་ལ། ནང་གི་ལྷ་དྲུག་ཅུ་རྩ་གཉིས་ཡིན་སྙམ་པའི་ངེས་ཤེས་བསྐྱེད། སྤྱི་བོར་བླ་མའི་ཕྱགས་ལྷམ་བསྒོམ་མོས་གུས་བསྐྱེད་ལ་བསྟིམ། སྣོད་བཅུད་ལྷ་དང་གཞལ་ཡས་ཁང་གི་རྣམ་པས་རང་ལ་བསྡུ། རང་གི་ཞལ་རྣམས་རྩ་ཞལ། ཕྱག་རྣམས་རྩ་ཕྱག །ཡུམ་ཕག་མོ་ཡང་འོད་དམར་པོའི་རྣམ་པས་ལྟེ་བའི་ཨཾ་ལ་བསྡུས་ནས་ཕྱི་བདེ་མཆོག་ལྷན་སྐྱེས། ནང་རྩ་གསུམ་འཁོར་ལོ་བཞི། ལས་བྱེད་མེ་རླུང་གི་འཁོར་ལོ་གཉིས་རྣམས་དྲན་ཡུལ་དུ་ལམ་གསལ་འདེབས་ཏེ། གཤང་སྒོར་རླུང་གི་དཀྱིལ་འཁོར་ལྗང་ནག་དུ་བ་འཚུབ་པ་འདྲ་བའི་སྟེང་དུ་མེའི་དཀྱིལ་འཁོར་དམར་པོ་གྲུ་གསུམ་ཀྵ་ཡིག་མེ་འབར་བ་དམར་ནག་ལྟེ་བའི་དབུས་སུ་ཨཾ། ནང་སྐོར་བརྒྱད་ལ། ཨ་ཀ་ཙ་ཊ་ཏ་པ་ཡ་ཤ། ཕྱིར་ཨཱ་ལི་བཅུ་དྲུག །ཀཱ་ལི་སོ་བཞི། དབྱངས་རིང་པོ་དྲུག །སྙིང་གའི་ཕྱོགས་བཞིར་ཨ་ཨི་ཨུ་ཨོ་སྟེ་ཐུང་ངུ་བཞི། མཚམས་བཞིར་ཡ་ར་ལ་ཝ། མགྲིན་པའི་ནང་སྐོར་བཞི་ལ། ཨཱ་ཨཱི་ཨཱུ་ཨཻ། དབུས་སུ་ༀ། ཕྱི་སྐོར་འདབ་མ་བཅུ་གཉིས་ལ་རྀ་རཱྀ་ལྀ་ལཱྀ་བཞི་བོར་བའི་དབྱངས་བཅུ་གཉིས། སྤྱི་བོར་དབུས་སུ་ཧཾ། འདབ་མ་ལ་ཨཱ་ལི་བཅུ་དྲུག་ཕྲག་གཉིས། ཨཾ་ཧཾ་དབུ་མས་སྦྲེལ་ཞིང་གཡས་གཡོན་རོ་རྐྱང༌། ཨཱ་ལི་ཀཱ་ལི་སྤེལ་བ་མགོ་བོར་ༀ། མཇུག་ཧཱུྃ་ཕཊ་ཀྱིས་བཀག་པ་བསྒོམ་སྟེ་ཤེས་བྱ་རྒྱུད་རིམ། སྟེང་རླུང་ཨཾ་ལ་བསྟིམ་ནས་འབྱོངས་པའི་རྟགས་བཞི། བརྟན་པའི་རྟགས་དྲུག་གིས་མྱོང་བ་འདྲེན་བཞིན་མེས་ལྟེ་སྙིང་མགྲིན་པའི་འཁོར་ལོ་བཞུ་བཏུལ་བྱས་ནས། མེ་ལྕེ་སྨིན་མཚམས་ནས་བྱུང་སྟེ་ཕྱོགས་བཅུའི་དེ་བཞིན་གཤེགས་པ་ཀུན་འདུས། བླ་མའི་ངོ་བོ་བདེ་མཆོག་གི་བྱིན་པ་ནས་ཞུགས། སྐུའི་བདུད་རྩི་སྤྱན་དྲངས་ཏེ་རང་གི་སྤྱི་མགྲིན་སྙིང་ཁ་ལྟེ་བའི་བར་དགའ་བ་བཅུ་དྲུག་སོ་སོར་གྲངས་སྤེལ་ནས་རླུང་ཁ་སྦྱར་དང་རྗེས་སུ་འབྲེལ་བ་ཉམས་ལེན་སྔགས་རིམ། མཐར་རྩ་ཐིག་རླུང་གི་འགྲོས་གྱེན་རྒྱུར་ཟླ་ཉི་སོ་སོར་འབྱེད་པ་ལམ་རིམ་པས་བགྲོད་པ་སྐྱེ་བ་ཡེ་ཤེས་ཀྱི་རིམ་པ། ལུས་འཇའ་ལུས། སེམས་རྟོག་མེད་སྐུ་དང་ཡེ་ཤེས་ཟུང་འཇུག་མཐར་ཐུག་གསང་བའི་རིམ་པའོ། །ནག་པོའི་གསུང་ངག་དུས་ཀུན༵་ཏུ། །ཡིད་ལ་དག༵འ་བར་འགྲོགས་པའི་ཆ། །གྲོལ༵་བ་མཆོ༵ག་གི་ཉམས་ལེན་ཉིད། །ཡི་གེར་བཀོད་པ་བྱས་འདིའོ། །རྗེས་ཆེན་གྱི་རིམ་བཞི་ལམ་སློང་ལས་བཏུས་སོ། (༧༠) །བདེ་མཆོག་དཀར་པོའི་ཁྲིད་ཡིག །བདེ་མཆོག་དཀར་པོའི་ཁྲིད་ནི། སྐྱབས་སེམས་སྔོན་དུ་སོང་ནས། ཤྲཱི་ཧེ་རུ་ཀ་ཨ་ཧཾ། ཐབས་རིག་པ་གསལ་ལ་མ་འགགས་པ་ངེས་དོན་སྐུ་བཞིའི་གཟུགས་འཆང་འཛིན་པའི་རང་ཉིད་ལྷན་སྐྱེས་ཟླ་བའི་མདོག་ཅན་དུ་ཤར་བའི་ནང་དར་དཀར་གྱི་རྐྱལ་པ་བུས་པ་ལྟ་བུའི་དབུས་སུ། རྩ་ཨ་ཝ་དྷུ་ཏཱིའི་གཡས་གཡོན་རོ་རྐྱང་གསུམ་དྭངས་མ་དང༌། ཨཱ་ལི་ཀཱ་ལིའི་རྣམ་པའི་ཁུ་ཁྲག་གིས་གང་བ། གཤང་སྒོར་རླུང༌། སུམ་མདོར་མེ། ལྟེ་འཁོར་དྲུག་ཅུ་རྩ་བཞིའི་དབུས་སུ་ཨཾ། ནང་སྐོར་ལ་སྡེ་ཚན་བརྒྱད། ཕྱི་ལ་ཨཱ་ལི་ཀཱ་ལི། སྙིང་གར་དབུས་སུ་ཧཱུྃ། ཕྱོགས་བཞིར། བྷྲཱུྃ་ཨཱཾ་ཛྲཱ་ཁཱཾ། མཚམས་བཞིར་ལཾ་མཾ་པཾ་ཏཾ། མགྲིན་པར་དབུས་སུ་ༀ། འདབ་མར་དབྱངས་ཡིག་བཅུ་དྲུག །སྤྱི་བོར་ཧཾ། དབྱངས་ཕྲག་གཉིས། འདིར་ཡི་གེ་རྩ་སྦུབས་སུ་བསྒོམ་མོ། །རླུང་གིས་མེ་སྦར། ཨཾ་གི་མེས་འཁོར་ལོ་རྣམས་བསྲེགས། ཧཾ་གི་བདུད་རྩིས་བསྲོས་པའི་འབར་འཛག་ལ་སྦྱངས་ནས། བོགས་འབྱིན་དུ། པུ་ཛ་ཨོ་ཨ་གཽ་ར་དཻ་མ་སྟེ། ཐུགས་འཁོར་གྱི་གནས་བརྒྱད། ཀ་ཨོ་ཏྲི་ཀོ་ཀ་ལ་ཀ་ཧི། གསུང་འཁོར་གྱི་གནས་བརྒྱད། པྲེ་གྲ་སོ་སུ་ན་སི་མ་ཀུ། སྐུ་འཁོར་གྱི་གནས་བརྒྱད་དེ། ཡུལ་ཉེར་བཞིའི་རྩ་གནས་མ་ལུས་པར་ཡང་དྲངས་ཏེ། མཐར་ཁ་སྦྱོར་ཡན་ལག་བདུན་ལྡན་གྱི་གོ་འཕང་ལ་ཡིད་ཆེས་བསྐྱེད་པ་ཞིག་གོ །ཁ་ཆེ་པཎ་ཆེན་གདམས་པ་ཀུན༵། །རབ་དག༵འ་ཕྱེ་ཚེ་གྲོལ༵་བྱེད་གཞིར། །མཆོ༵ག་ཏུ་བསྔགས་པའི་རྫོགས་རིམ་གྱི། །ཞལ་ལུང་ཡི་གེར་སྤེལ་བའོ། །དཔྱལ་ཨ་མོ་གྷའི་ཁྲིད་དཔེ་ལས་བཏུས་སོ། (༧༡) །གདན་བཞིའི་ཁྲིད་ཡིག ༑གདན་བཞིའི་ཁྲིད་ནི། སྐྱབས་སེམས་སྔོན་དུ་སོང་ནས། བདག་ཉིད་ཡེ་ཤེས་དབང་ཕྱུག་མར་བསྐྱེད། སྒོ་རྣམས་སུ་ས་བོན། སྨིན་བར་དུ་རུས་པའི་ཆོས་འབྱུང་གྲུ་གསུམ། དེ་ན་རྩ་མདུད་གྲུ་གསུམ་ཡོད་པར་བྱང་སེམས་ཀྱི་ཐིག་ལེ་ཟླ་གམ་གཅིག་བསམ། བྱང་སེམས་ཀྱི་ཐིག་ལེ་འཁོར་བ་ཙམ་གྱི་ཁྱི་ལི་ལི་བསྒོམ། ཉམས་མྱོང་དགའ་བཞི་སྟེ། དགའ་བ། མཆོག་དགའ། དགའ་བྲལ། ལྷན་སྐྱེས། སྣང་བ། སྣང་ཆེན། སྣང་ཐོབ། ལྷན་སྐྱེས༑ བ་ནུའི་མན་ངག་ལྟེ་བ་ན་རྩ་ཀླུ་དབང་འཁྱིལ་བ་ལྟ་བུ་ཡོད། དེ་འོག་རྩ་གསུམ་འདུས་པ་ན། ཆོས་འབྱུང་ནང་དུ་ཀྵུཾ་སེར་པོ་མེའི་རང་བཞིན་ཅན། རྐང་མཐིལ་གཉིས་སུ་ཀྵུཾ་རེ་རེ། སྙིང་པདྨ་དམར་པོའི་ནང་བ་ལང་རྨིག་རྗེས་བྱང་ཆུབ་ཀྱི་ཐིག་ལེ་མཐེ་བོང་ཙམ། དཀྱིལ་ན་ཧཱུྃ་དཀར་པོ། སྟེང་འོག་རླུང་སྡིགས། ལྟེ་བར་ལས་ཀྱི་རླུང་འདུས། ཀྵུཾ་སེར་པོ་ལས་མེ་འབར། རྐང་མཐིལ་གཉིས་ལས་ཀྱང་འབར། རྩ་སྦུབ་ཐམས་ཅད་དམར་སེར་ཤིག་འབར། སེམས་སྤྱི་བོར་བསྡུས། ཧཾ་ལ་ཐིམ། སྒྱུ་མ་དང་སྟོང་པ་གཉིས་སུ་མེད་པ་ནི་ཟུང་འཇུག་གོ །དེ་ལྟར་བསྒོམས་པས་སྐུའི་སྒོ་དགུ་བགག །གསུང་གི་སྒོ་བཞི་བགག །ཐུགས་ཀྱི་གཉིས་ཕྱེ། རྟགས་ཡོན་ཏན་འབྱུང་ངོ༌། །དེ་ནས་བ་གླང་རྨིག་པའི་མན་ངག་ཡི་གེ་བཅུ་གསུམ་ལ་བརྟེན་པ་དང༌། ཡི་གེ་གཅིག་ལ་བརྟེན་པ་གང་རུང་བསྒོམ་སྟེ། ད་ནི་སྙིང་པདྨ་ཁ་ཕྱེ་བ་བ་གླང་རྨིག་རྗེས་ལྟ་བུའི་སྟེང་ཐིག་ལེ་བསྒོམ། དེའི་དབུས་སུ་ཡི་གེ་ཨཾ་དཀར་པོ་ཐིག་ལེའི་ནང་དུ་ཆུད་པའི་མཐའ་ནས་ཨ་ལ་སོགས་པ་ཡི་གེ་བཅུ་གཉིས་ཀྱིས་བསྐོར་བ། ཐིག་ལེ་ནས་གཡས་ཚ་རླུང་དམར་པོ་མེ་རླུང་གི་རང་བཞིན་ཅན་བྱུང༌། གཡོན་ནས་གྲང་བའི་རླུང་ས་ཆུའི་རང་བཞིན་ཅན་དཀར་པོ། དེ་གཉིས་འཁྲིལ་ཞིང་འཐབས་པས་ཐིག་ལེ་འཁོར་བ་ཙམ་ལ། ཡིག་འབྲུ་རྣམས་མི་ ཡོད་དམ་བརྟག །འཁོར་བར་བསྒོམ། ཡི་གེ་གཅིག་ལ་བརྟེན་ནས་བ་གླང་རྨིག་པའི་སྟེང་དུ་ཡི་གེ་ཨཾ་དཀར་པོ་གཅིག་བསྒོམ། གོང་དུ་བསྟན་པ་བཞིན་ཚ་གྲང་བརྒྱབ་པས་འཁོར་བར་བསམ། མེ་ལྕེའི་སྦྱིན་བསྲེག་ལྟེ་སྙིང་ཡི་གེ་ཨ་དཀར་པོ། ཨ་ཕྱིའི་ལུས་ལ་བསྡུ། སྟོང་པར་ལྷག་མོས་དང་འདྲ་གསུང༌། ཆུ་ཤིང་སྙེ་མ་རྩ་ཨ་ཝ་དྷུ་ཏི། སྙིང་པདྨ་འདབ་བརྒྱད། གཡས་ཁ་བྱེ་བ། ཐིག་ལེ་སྒོ་ང་ཙམ་པ་ཆུའི་རང་བཞིན། ལྕི་ལ་བསིལ་བའི་དབུས་སུ་ཧཱུྃ་དཀར་པོ། དེ་ཁ་བྱེ་བའི་ཚུལ། དཔེ་ཤིང་ཐོགས་ཁ་འབྱེ་བ་ན་དྲོད་དང་དུས་ཚོད་ཀྱི་རླན་དང་རླུང་གསུམ་གྱིས་ཁ་འབྱེའོ། །འདིའང་ལྟེ་བ་ན་ཀླུ་དབང་འཁྱིལ་བ། དེའི་འོག་ན་ཀྵུཾ་སེར་མེ་རླུང་བྱུང་དྷུ་ཏིའི་སྦུབ་ནས་འབར་བྱང་སེམས་ཞུ། མེ་དེས་ལྗོན་ཤིང་གི་ལོ་མ་ལྟ་བུ་ཧཾ་ཞུ། ཐིག་ལེ་ལས་སྨིན་མཚམས་སུ་བབས་པས་ནུས་པ་ཐོན་ཏེ། དྷུ་ཏི་ནས་སྙིང་གའི་ཧཱུྃ་དཀར་པོ་ལ་ཐིབ་ཐིབ་ཐིམ། ལུས་གང་བར་བསམ། བ་སྤུའི་བུ་ག་ཐམས་ཅད་ནས་དཀར་ཉུག་ཉུག་བསམ་ཕྱིར་མི་སྤྲོ། མཆོད་རྟེན་གྱི་བུམ་པ་སྙིང་ཆུ་ཤིང་གི་སྙེ་མ་དེ་མཆོད་རྟེན་གྱི་བུམ་པ། ནང་ཁ་ཕྱེ་བ་པདྨ་འདབ་བརྒྱད། ལྟེ་བར་ཐིག་ལེ་བདེ་བའི་རོས་གང༌། འདབ་མ་བཞི་ལ་ཨ་ཨ་ཨཾ་ཨ། མཚམས་བཞི་ལ་མ་ནིང་བཞི། དེའི་འོད་ཀྱིས་ནང་ཁེངས། ཕྱི་རོལ་དུ་ཡང་དཀར་ཕྲམ་ཕྲམ་བསམ། དེ་ལྟར་ཡང་ཡང་དུ་བསྒོམ་མོ། །འཕོ་བའི་མན་ངག །ཕྱི་ནང་གི་འཆི་ལྟས་བྱུང་ན་སླུ་བ་ལ་འབད། ངེས་པར་འཆི་ཚེ། སྔོན་དུ་རླུང་བུམ་པ་ཅན་ཐེབས་ཉི་ཤུ་རྩ་གཅིག་ཡང་ཡང་བསྒོམ་སྟེ་སྒོ་དགག་པ་ནི། མིག་གཉིས་སུ་ཧཱུྃ་སྔོན་པོ། ལྕེའུ་ཆུང་དུ་སུཾ་དཀར་པོ། མགྲིན་པར་སྨཾརཡུ། དཔུང་པར་ཧྨཾརཡུ། སྙིང་གར་ཡྨཾརཡུ། ལྟེ་བར་ཀྵྨཾརཡུ། འོག་སྒོ་གཅི་བའི་སྒོར་ཧཱུྃ། བཤང་སྒོར་ཀྵུཾ། དེ་ནས་བུམ་པ་གང་བ་ལྟ་བུ་དེ་ལ་ལུས་མཁལ་ཁུང་གཉིས། མཆན་འོག་གཉིས། རྐང་མཐིལ་གཉིས་དང་དྲུག་ཏུ་ཡུཾ་སྔོན་པོ་དྲུག་དགོད། སྙིང་དབུས་སུ་ཧཱུྃ་ལ་ཡུྃ་སྔོན་པོ་བཞིས་མཐའ་སྐོར་བ། ལྟེ་བ་ནས་སྤྱི་བོའི་བར་དུ་པདྨ་ཉི་ཤུ་རྩ་གཅིག་དོང་རྩེ་བརྩེགས་པ་ལྟར་བསྒོམ། ལྟེ་བའི་དབུས་སུ་ཨ། སྤྱི་བོར་ཚངས་པའི་བུ་གར་ཀྵུཾ། དེ་གཉིས་འོད་ཀྱི་རི་མོ་བ་ཐག་ལྟ་བུས་སྦྲེལ། ཧིཀ྄་བརྗོད་པས་ཨ་དེ་ཐག་པས་འཐེན་པ་བཞིན། པད་མའི་སྟེང་དུ་ཕྱིན་པར་བསྒོམ། ཉི་ཤུ་རྩ་གཅིག་ཧིཀ྄་བརྗོད། ཨ་དེ་སྤྱི་བོའི་པད་མའི་བར་དུ་ཀྵུཾ་གྱིས་འཐེན་ཞིང༌། ཁྲོན་པ་ནས་ཆུ་དྲངས་པ་ལྟ་བུར་ཤེས་པར་བྱའོ། །ཏིང་ངེ་འཛིན་གྱིས་གང་འདོད་པའི་སར་དམིགས་པ་ཉི་ཤུ་རྩ་གཅིག །ཐ་མ་ཧིཀ྄་ཞེས་འཕུལ། སྤྱི་བོ་ནས་འཕོ་བར་བྱའོ་གསུང་ངོ༌། །འདིས་ནི་རིག་པ་འཛིན་པ་དང་ལྷའི་ལུས་ལ་སོགས་ཏེ་གང་འདོད་པའི་ལུས་དེ་ཐོབ་པར་འགྱུར་རོ། །གདན་བཞིའི་མན་ངག་ཀུན༵་བསྡུས་ནས། །དག༵འ་ཆེན་གྲོལ༵་བའི་ལམ་མཆོ༵ག་ཏུ། །ཉེར་བསྡེབས་རྔོག་པའི་གསུང་ཇི་བཞིན། །ལྷག་ཆད་མེད་པར་ཡི་གེར་བཀོད། །རྔོག་ཞེ་སྡང་རྡོ་རྗེའི་ཡིག་རྙིང་ལས་བཏུས་སོ། (༧༢) །མ་ཧཱ་མཱ་ཡའི་ཁྲིད་ཡིག །མ་ཧཱ་མཱ་ཡའི་ཁྲིད་ནི། སྐྱབས་སེམས་སྔོན་དུ་སོང་ནས། སྟན་བདེ་བ་ལ་འདུག །རྐང་པ་སྐྱིལ་ཀྲུང༌། ལག་པ་མཉམ་བཞག་བཅས་ལ། གཡས་རྩ་ཀཱ་ལི་ཡས་མར། གཡོན་རྩ་ཨཱ་ལི་མས་ཡར། ལྟེ་བར་རྩ་གསུམ་འདུས་སུ་ཆོས་འབྱུང་དུ་མེ་རླུང་འབར་བ་ལ་སེམས་གཏད་དེ་བསྒོམ། ཨ་རེག་བྱ་དྲོད་ཚ་བར་བསམ། ཉམས་མྱོང་ཨན་རེ་དྲན་པར་བྱ། མ་ཡེངས་པར་བསྒོམ། བརྟན་པའི་དབང་དུ་བྱས་ནས། གཡས་གཡོན་ཨཱ་ལི་ཀཱ་ལི་རྒྱུས། ཆོས་འབྱུང་འོད་ཀྱི་ཁང་པ་དཀར་པོའི་ནང་དུ་ཡི་གེ་མེ་རླུང་གི་རང་བཞིན་ཨ་ལ་གཏད་དེ་བསྒོམ། མེ་ཕྲ་མོ་གཅིག་སིར་གྱིས་འབར། སྤྱི་བོའི་ཧཾ་ཏིལ་ཏིལ་བསྲེགས། བྱང་ཆུབ་སེམས་ཆི་ལི་ལི་བབས། མེའི་མཐའ་ཞལ་ཞལ་བྱས་ཨ་ལ་ཐིམ། དེ་ཀ་བསྒོམ། ཆོས་ཀྱི་རྣལ་འབྱོར་ཏེ་སྔགས་དབྱིབས་ཆོས་གསུམ་ལམ་ཚང་ལ་མ་ནོར་བ། དབྱིབས་སྔོན། དེ་ནས་སྔགས། དེ་ནས་ཆོས་ཀྱི་གོ་རིམ་ལྟར་བྱས་ཀྱང་ངེས་པ་མེད་གསུང༌། རྩ་གཉིས་ལ་ཨཱ་ལི་ཀཱ་ལིའི་ཕྲེང་བས་བཀག །ལྟེ་བར་ཨ། སྙིང་གར་ཧཱུྃ། མགྲིན་པར་ཨཾ། སྤྱི་བོར་ཧཾ། གོང་མ་གསུམ་ཆུའི་རང་བཞིན། ཨ་མེ་རླུང༌། ཨ་ལས་མེ་སིར་འབར། ཧཱུྃ་ཨཾ་ཧཾ་ལ་ཟུག་ཞུ། ཐད་ཀར་ཞལ་ཞལ་བབས། ཨ་ལ་ཏིམ་ཏིམ་ཐིམ། སྔགས་ཀྱི་རྣལ་འབྱོར་རེ། སྒོ། འོག་སྒོ། སྟེང་གསུམ་གྱི་མན་ངག ༑སངས་རྒྱས་ན་འདིས་རྒྱ་གསུང༌། དབྱིབས་ཀྱི་རྣལ་འབྱོར་བྱ། སྤྱི་བོར་རླུང༌། སྙིང་ཁར་ས། ལྟེ་བར་ཆུ། འདོམས་མེའི། གོང་མ་གསུམ་ཆུའི་རང་བཞིན། སྤྱི་བོར་རླུང་བསྐྱོད། ཧཾ་བྱང་ཆུབ་སེམས་ཅིག་བྱུང༌། རླུང་གི་སྙིང་ཁར་ལྟེ་བ་རྡོ་རྗེའི་རྩེར་དཀར་ལྷག་བྱུང༌། ཡར་ལོག་སྤྱི་བོར་ཕྱིན། ཧཾ་ལ་བསྟིམ། དབུགས་ཕྱིར་འགྲོ་ཙ་ན་ཐིག་ལེ་དེ་རྡོ་རྗེའི་རྩེར་ལྷག་གིས་བྱུང༌། ནང་དུ་རྔུབས་ཙ་ན་ཐིག་ལེ་དེ་ཡར་བྱུང་ནས་ཧཾ་ལ་ཐིམ། དཔེར་ན་ཆུ་ཡུར་བ་གཅིག་ནས་གཉིས་སུ་བགོས་པ་བཞིན། སྣ་གཡས་ཉི་ལམ། གཡོན་ཟླ་ལམ། དབུགས་འགྲོ་ཙ་ན་ༀ། འཇུག་ཙ་ན་ཧཱུྃ། ལྟེ་བར་གསུམ་གྱེས། སླེབས་ཙ་ན་ཨཱཿ དེ་ལྟར་བསྒོམ། བདེ་བ་ཕྲིལ་གྱིས་སྐྱེའོ༑ ༑བསྐྱེད་རིམ་དབྱིབས་བསྒོམ། ཡོན་ཏན་བརྒྱད་འཆར་རྫོགས་རིམ་དང་འབྲེལ་ལོ། །སྟེང་གི་སྣ་རྩེ། སྙིང་པདྨ་དམར་པོ་ཁ་བྱེ་བའི་ནང་དུ་པདྨ་འདབ་མ་བཞི་པ། ཉི་མ། ཟླ་བ། བར་དུ་བྱང་ཆུབ་སེམས་ཐིག་ལེ་ས་བཅུའི་རང་བཞིན། ཉི་ཟླ་ཁ་སྦྱོར་ལ་བ་ཐག་ཕྲ་མོ་གཅིག་གིས་ཚན་གསུམ་དུ་དཀྲིས། སྟེང་གི་བ་ཐག་ལ་ཀཱ་ལི་སུམ་ཅུ་རྩ་གཉིས་ཆེད་དུ་བསྒོམས་ལ་བ་ཐག་ལ་བརྒྱུས། བ་ཐག་དབུས་མ་ལ། ཨཱ་ལི་བཅུ་དྲུག །ཟླ་བ་ལ་ཡིག་འབྲུ་ཚན་གསུམ་དཀྲིས། ཉི་མ་ལ་ཡིག་འབྲུ་མེད་པར་བ་ཐག་རང་སེམས་དབུས་ཀྱི་ཐིག་ལེར་གཏད། ཟླ་བའི་དབུས་སུ་བུ་ག་གདང་ངེ་ཡོད་པ་ལ་བལྟ། ཏོག་ཟེར་བའི་སྒྲ་ལས་ཧཱུྃ་གཅིག་བྱུང༌། སྟེང་གི་ཟླ་བ་ཕུག་ཧཱུྃ་ལ་བ་ཐག་ཕྲ་བ་གཅིག་འབྱར། གཡས་སུ་སྐྱོག །དེ་སྐོར་ལ་དཀྲིས་མདུན་ངོས་ནས་སྐྱོག །ཉི་ཟླ་རྒྱ་གྲམ་དུ་བཀྲིས། ཧཱུྃ་བུག་པ་ནས་སོང་ཐིག་ལེ་ལ་གཏད། དེ་ནི་སྔགས་སོགས་ལྷ་བསྐྱེད་པའི་དབྱིབས་སོ། །རྣལ་འབྱོར་གསུམ་ཚང་བར་བསྒོམ། མཚན་མ་ལྔ་འབྱུང་ངོ༌། །ཐིག་ལེ་སྟེང་གི་སྣ་རྩེར་བྱེད་ན། ཉི་ཟླ་ཁ་སྦྱར་གྭའུ་འདྲ་བ་དཀྱིལ་སྟོང་པ་ལ་ཐིག་ལེ་གཅིག །དེའི་མཐའ་མ་ན་ཚུར་ཨས་སྣ་དྲངས་པའི་ཨཱ་ལི་བཅུ་དྲུག །དེའི་སྟེང་ན་ཚུར་ལ་ཀཱ་ལི་སུམ་ཅུ་རྩ་དྲུག་གི་ཡི་གེ་བ་ཐག་ཕྲ་མོ་གཅིག་གིས་བརྒྱུས་པ། དཔེར་ན་ནོར་བུ་མིག་ཡངས་པ་ལ་ཐག་པ་ཕྲ་མོས་བརྒྱུས་པས་གཅིག་ལ་གཅིག་མ་རེག་པ་བཞིན་དུ་མ་འབྱར་བར་ཐང་ངེ་སྤྲིང་ངེ་བསྐོར་བར་བསམ། རླུང་ཨེན་གཅིག་སྡིགས་ནས་བསྒོམ་པས་ཏོག་བརྟོལ་ནས་ན་ར་ར་བྱུང༌། ཀྵ་ཐིག་ལེ་ལ་རེག་གེ་འདུག །ཨ་དེ་སྟོར་བྱས་ཀྵ་ཤག་བྲལ། ཨ་དེ་ནང་དུ་ཚུར་ནུར་ཞུགས་པར་ཡང་ཡང་བསྒོམ། ཐིག་ལེ་འོག་སྒོ་ལ་བརྟེན་པ་བྱེད་ན། མཚན་ལྡན་གཅིག་བཙལ། དེ་རྙེད་ནས་ཨཾ་གུ་ལིའི་སྦྱོར་བ་བྱ། རྩ་ཁ་བྱེ་འབོལ་གྱིས་ཡོང༌། དེ་བྱུང་བ་དང་རྡོ་རྗེ་བསྲུབ་མི་དྲག་སྐྱོད། ཟག་མེད་ཉམས་སུ་མྱོང༌། དེ་ཀ་ལ་སེམས་བཞག །ཕྱིས་ཤེས་རབ་མེད་ཀྱང་རྟོགས་པ་སྐྱེའོ། །རླུང་རྒྱ་ཡན་བགྲང་ཞིང་བརྩི་བ་བུམ་པ་ཅན་ཡིན་ནོ། །རླུང་གང་ནས་འོངས། གར་འགྲོ། ལས་ཅི་བྱེད་བལྟ། ཆེད་ཀར་མི་བཏང༌། བསྡམ་ཡང་མི་བསྡམ། རྔུབ་ཀྱང་མི་རྔུབ། འབད་རྩོལ་མེད་པ་གང་དགར་བྱའོ། །རླུང་རྗེས་ཤེས་པ་ཟིན། གྲངས་བརྩི། སྙིང་གར་ཧཱུྃ། ཕྱིར་འགྲོ་ཙ་ན་རང་འཐག་ལྟར་གསུམ་སྐོར་ༀ། འཇུག་པ་ཧཱུྃ་སྐོར་བ་གསུམ། གནས་པ་ལ་ཨཱཿ དེ་ལྟར་བགྲང་ཞིང་བརྩིས་ཏེ་ཟིན་པར་བྱ། ནང་དུ་གནས་པ་ཇེ་རིང༌། བུམ་པ་ཅན་ཕར་ཧ་ཧ་བྱ། ས་ལ་ཐེབས་བཅུ་ཙམ་རྔུབ། དབུགས་བཀག །རླུང་ལྟེ་བ་མན་ཆད་བཀང༌། དྲག་པོར་མི་གཏང་ངོ༌། །གོལ་གྱིས་འགེངས། ཉི་ཤུ་རྩ་གཅིག་གི་ཕྱིར་གཏང་ངོ༌། །སེང་གེ་རྣམ་རོལ་ཕྱག་རྒྱས་འགེང༌། མིག་རྣ་བ་ཁ་སྣ་བགག །རྡོ་རྗེ་བརླ་བར་དུ་བཙིར། རྟིང་པས་བཤང་ལམ་བགག །དེ་ནི་བཙན་ཐབས་སོ། །བགག་པའི་ཚད་པུས་མོ་ལ་ལག་མཐིལ་ཡུལ་པ་གཅིག་བྱས་ལ་སེ་གོལ་དྲུག་བརྡབས་པའི་ཡུན་ཚད་དོ། །སྔགས་དབྱིབས་ཆོས་ཚང༌། སྐྱེ་མེད་དུ་འཆར་བས་ཆོས། དེ་ལས་ལྷ་དང་སྔགས་འབྱུང༌། ལམ་ཚང་ལ་མ་ནོར་བ་སྒྱུ་མ་ཆེན་པོའི་མན་ངག་གོ ༑མཱ་ཡ་ཀུ་ཀུ་རི་པའི་གཞུང༌། །ཀུན༵་ལས་འདུས་པའི་དག༵འ་སྦྱིན་ནི། །རང་གྲོལ༵་མཆོ༵ག་ཏུ་སྟོན་པའི་གནད། །མར་པའི་ཐུགས་བཅུད་འདིར་བཀོད་དོ། །རྔོག་པའི་ཡིག་རྙིང་ལས་བཏུས་སོ། (༧༣) །བདེ་མཆོག་བོང་ཞལ་ཅན་གྱི་ཁྲིད་ཡིག །བདེ་མཆོག་བོང་ཞལ་ཅན་གྱི་ཁྲིད་ནི། སྐྱབས་སེམས་སྔོན་དུ་སོང་ནས། རང་གི་སྙིང་ཁའི་ཧཱུྃ་ལས་འོད་ཟེར་འཕྲོས་སྣོད་བཅུད་ཐམས་ཅད་རང་གི་ལུས་ལ་བསྡུ། ཡུམ་ཡང་སྣ་གཡོན་ནས་རང་གི་སྙིང་ཁར་བསྡུ༑ རང་ཉིད་ཕྱག་གཉིས་པར་བསྡུས་པའི་སྤྱི་བོར་བླ་མ་བསྒོམས་པ་ལ་མོས་གུས་དྲག་ཏུ་བྱ་ཞིང༌། བདག་གི་རྒྱུད་ལ་ཡང་དག་པའི་ཏིང་ངེ་འཛིན་བསྐྱེད་དུ་གསོལ། ཞེས་གསོལ་བ་བཏབ། དེ་ནས་སྙིང་གའི་ནང་དུ་ཨ་ལས་ཟླ་བའི་དཀྱིལ་འཁོར་སྲན་མ་ཕྱེད་ཚལ་ཙམ་གྱི་སྟེང་དུ། རང་གི་ཤེས་པ་ཐིག་ལེ་དཀར་དམར་ཡུངས་འབྲུ་འབྲིང་པོ་ཙམ་བསམས་ལ་དེ་ལ་སེམས་གཟུང༌། རིམ་གྱིས་རླུང་ཡང་ཁ་སྦྱར་འཇམ་པོ་བྱ། གོམས་ནས་སེམས་ཟིན་པ་དང་ཡིད་གཞན་དུ་མི་འཕྲོ་ཞིང་རྩེ་གཅིག་ཏུ་གནས་པ་དང་བདེ་གསལ་གྱི་ཏིང་ངེ་འཛིན་སྐྱེའོ། །དེ་ལ་བརྟན་པ་དང་དབང་པོ་གཞན་ལ་ཡང་སྤྲོ་སྟེ། སྔོན་འགྲོ་སྔ་མ་ལྟར་བྱས་ལ༑ དངོས་གཞི་མིག་གི་འབྲས་བུ་གཉིས་ཀྱི་ནང་དུ་ཟླ་བ་ལ་གནས་པའི་ཐིག་ལེ་དཀར་པོ་ཤིན་ཏུ་ཕྲ་བ་རེ་བསྒོམས་ཏེ་མིག་བཙུམ་ལ་ཡིད་གཟུང༌། ཅུང་ཟད་ཟིན་པ་དང༌། གཟུགས་སྣ་ཚོགས་ལ་བལྟ་ཞིང༌། ཐིག་ལེ་ལ་ཡིད་གཏད་དེ་གཞན་དུ་སེམས་འཕྲོར་མི་གཞུག་གོ །དེ་གོམས་པས་ཐིག་ལེའི་རྣམ་པ་གསལ་ཞིང་གཟུགས་གང་མཐོང་བའི་སྟེང་དུ་ཏིང་ངེ་འཛིན་སྐྱེའོ། །དེ་ལ་བརྟན་པ་ཅུང་ཟད་ཐོབ་པ་དང༌། ཐིག་ལེ་དེ་སྙིང་ཁར་བསྡུས་ལ། སྙིང་ཁའི་ཐིག་ལེ་དེ་སྔར་བས་ཀྱང་གསལ་ཞིང་འབར་བར་བསྒོམ། མཉམ་པར་བཞག་པས་ཏིང་ངེ་འཛིན་མཆོག་སྐྱེའོ། །དེ་རྗེས་རྣ་བར་སྤྲོས་ཏེ་སྔོན་འགྲོ་སྔར་ལྟར་བསྒོམས་ལ་དངོས་གཞི་རྣ་བ་གཉིས་ཀྱི་ནང་དུ་ཟླ་བ་ལ་གནས་པའི་ཐིག་ལེ་སྔོན་པོ་གཉིས་བསྒོམས་ལ་སྒྲ་མེད་པའི་ས་ཕྱོགས་སུ་ཡིད་གཟུང༌། ཅུང་ཟད་ཟིན་པ་དང༌། སྒྲ་སྣ་ཚོགས་ལ་ཉན་ཞིང་ཐིག་ལེ་ལ་ཡིད་གཏད་དེ། གཞན་དུ་སེམས་འཕྲོར་མི་གཞུག །དེ་གོམས་པས་ཐིག་ལེའི་དམིགས་པ་གསལ་ཞིང་སྒྲ་གང་ཐོས་པའི་སྟེང་དུ་ཏིང་ངེ་འཛིན་སྐྱེའོ། །དེ་ལ་བརྟན་པ་ཅུང་ཟད་ཐོབ་པ་དང༌། ཐིག་ལེ་དེ་སྙིང་གའི་ཐིག་ལེ་ལ་བསྡུས་པས་ཐིག་ལེ་དེ་སྔར་བས་ཀྱང་གསལ་ཞིང་འབར་བར་བསྒོམས་ལ་མཉམ་པར་བཞག་པས་ཏིང་ངེ་འཛིན་མཆོག་སྐྱེའོ། །དེའི་རྗེས་སུ་སྣར་སྤྲོ་སྟེ། སྔོན་འགྲོ་སྔར་ལྟར་བསྒོམས་ལ། དངོས་གཞི་ལ་སྣ་བུག་སོ་སོའི་བུ་ག་འདོམས་པའི་ནང་དུ་ཟླ་བའི་སྟེང་དུ་ཐིག་ལེ་སེར་པོ་བསྒོམ་ལ་དྲི་མི་བྲོ་བའི་སར་ཡིད་བཟུང༌། ཅུང་ཟད་ཟིན་པ་དང་དྲི་སྣ་ཚོགས་བསྣོམ་ཞིང་ཐིག་ལེ་ལ་ཡིད་གཏད་དེ་སེམས་གཞན་དུ་འཕྲོར་མི་གཞུག །དེ་ལ་གོམས་པས་ཐིག་ལེའི་དམིགས་པ་གསལ་ཞིང་དྲི་གང་ཚོར་བའི་སྟེང་དུ་ཏིང་ངེ་འཛིན་སྐྱེའོ། །དེ་ལ་བརྟན་པ་ཅུང་ཟད་ཐོབ་པ་ན་ཐིག་ལེ་དེ་སྙིང་གའི་ཐིག་ལེ་ལ་བསྡུས་པས་ཐིག་ལེ་དེ་སྔར་བས་ཀྱང་གསལ་ཞིང་འབར་བར་བསྒོམ་ལ་མཉམ་པར་བཞག་པས་ཏིང་ངེ་འཛིན་མཆོག་ཏུ་གྱུར་པ་སྐྱེའོ། །དེའི་རྗེས་ལ་ལྕེར་སྤྲོས་ཏེ། སྔོན་འགྲོ་སྔར་ལྟར་བསྒོམས་ལ། དངོས་གཞི་ལ་ལྕེའི་རྩ་བར་ཟླ་བའི་སྟེང་དུ་ཐིག་ལེ་དམར་པོ་བསྒོམས་ལ། རོ་མི་མྱང་བར་ཡིད་གཟུང༌། ཅུང་ཟད་ཟིན་པ་དང༌། རོ་སྣ་ཚོགས་མྱོང་ཞིང་ཐིག་ལེ་ལ་ཡིད་གཏད་དེ་གཞན་དུ་སེམས་འཕྲོར་མི་གཞུག །དེ་ལ་གོམས་པས་ཐིག་ལེའི་དམིགས་པ་གསལ་ཞིང་རོ་གང་མྱང་བའི་སྟེང་དུ་ཏིང་ངེ་འཛིན་སྐྱེའོ། །དེ་ལ་བརྟན་པ་ཅུང་ཟད་ཐོབ་པ་ན། ཐིག་ལེ་དེ་སྙིང་གའི་ཐིག་ལེ་ལ་བསྡུས་པས་ཐིག་ལེ་སྔར་བས་ཀྱང་གསལ་ཞིང་འབར་བར་བསྒོམས་ནས་མཉམ་པར་བཞག་པས་ཏིང་ངེ་འཛིན་མཆོག་ཏུ་གྱུར་པ་སྐྱེའོ། །དེའི་རྗེས་སུ་ལུས་ལ་སྤྲོ་སྟེ་སྔོན་འགྲོ་སྔར་ལྟར་བསྒོམས་ལ། དངོས་གཞི་ལ། དཔྲལ་བར་ཟླ་བའི་སྟེང་དུ་ཐིག་ལེ་ལྗང་གུ་བསྒོམས་ལ། གང་ལའང་མི་རེག་པར་སེམས་བཟུང༌། ཅུང་ཟད་ཟིན་པ་དང་རེག་བྱ་སྣ་ཚོགས་ལ་རེག་ཅིང་ཐིག་ལེ་ལ་ཡིད་གཏད་དེ་སེམས་འཕྲོར་མི་གཞུག །དེ་ལ་གོམས་པས་ཐིག་ལེའི་དམིགས་པ་གསལ་ཞིང་རེག་བྱ་གང་ལ་རེག་པའི་སྟེང་དུ་ཏིང་ངེ་འཛིན་མཆོག་སྐྱེའོ། །དེ་ལ་བརྟན་པ་ཅུང་ཟད་ཐོབ་པ་དང༌། ཐིག་ལེ་དེ་སྙིང་ཁའི་ཐིག་ལེ་ལ་བསྡུས་པས་ཐིག་ལེ་དེ་སྔར་བས་ཀྱང་གསལ་ཞིང་འབར་བར་བསྒོམས་ནས་མཉམ་པར་བཞག་པས་ཏིང་ངེ་འཛིན་མཆོག་སྐྱེའོ། །དེའི་རྗེས་ལ་ཀུན་ཏུ་གཡོ་བའི་ཡིད་ལ་དམིགས་ཤིང་བསྒོམས་ཏེ༑ སྔོན་འགྲོ་སྔར་ལྟར་བསྒོམས་ལ། དངོས་གཞི་ལ་སྙིང་ཁའི་ཐིག་ལེ་དཀར་དམར་གྱི་སྟེང་དུ་དེ་ལས་ཕྲ་བའི་ཐིག་ལེ་དམར་སྐྱ་གཅིག་བསྒོམས་ལ། ཤིན་ཏུ་དབེན་པའི་གནས་སུ་ཡིད་གཟུང་ངོ༌། །ཅུང་ཟད་ཟིན་པ་དང་འདུ་འཛི་དང་བཅས་པའི་གནས་སུ་བསྒོམ་ཞིང༌། གང་ལ་ཡིད་འཕྲོ་བའི་ཡུལ་དང་རྣམ་རྟོག་དེ་ཉིད་ཐིག་ལེ་དམར་སྐྱ་དེ་ལ་བསྟིམ་ཞིང་ཡིད་གཟུང་ངོ༌། །དེ་ལ་གོམས་པས་ཐིག་ལེའི་དམིགས་པ་གསལ་ཞིང་རྟོག་པ་མི་སྐྱེ་བའམ། ཅུང་ཟད་སྐྱེས་ཀྱང་རང་ཡལ་དུ་འགྱུར་རོ། །དེ་ལ་ཅུང་ཟད་བརྟན་པ་ཐོབ་པ་དང༌། ཐིག་ལེ་དེ་འོག་གི་ཐིག་ལེ་དཀར་དམར་ལ་ཐིམ་པས། ཐིག་ལེ་སྔ་མ་དེ་བས་ཀྱང་གསལ་ཞིང་འབར་བར་གྱུར་པར་བསྒོམ་ལ་མཉམ་པར་བཞག་པས་ཞི་གནས་ཀྱི་ཏིང་ངེ་འཛིན་མཆོག་སྐྱེའོ། །དེའི་རྗེས་ལ་ཉོན་མོངས་དང་བཅས་པའི་ཡིད་ལ་དམིགས་ཤིང་བསྒོམས་ཏེ། སྔོན་འགྲོ་སྔར་ལྟར་བསྒོམ། དངོས་གཞི་ལ་སྙིང་ཁའི་ཐིག་ལེ་དཀར་དམར་གྱི་སྟེང་དུ་དམར་སྐྱ། དེའི་སྟེང་དུ་ཐིག་ལེ་སྔོན་པོ་གཅིག་བསྒོམས་ལ་ཤིན་ཏུ་དབེན་པའི་གནས་སུ་ཡིད་གཟུང་ངོ༌། །ཅུང་ཟད་ཟིན་པ་དང་ཉོན་མོངས་པ་སྣ་ཚོགས་སྐྱེ་བའི་ཡུལ་དང་བཅས་པའི་གནས་སུ་བསྒོམ་ཞིང༌༑ འདོད་ཆགས་ལ་སོགས་པ་ཉོན་མོངས་པ་ཀུན་ཏུ་རྒྱུ་བ་ཉིད་ཐིག་ལེ་སྔོན་པོ་ལ་བསྟིམ་ཞིང་ཡིད་གཟུང་ངོ༌། །དེ་གོམས་པས་ཐིག་ལེའི་དམིགས་པ་གསལ་ཞིང་ཉོན་མོངས་པ་མི་སྐྱེ་བའམ། ཅུང་ཟད་སྐྱེས་ཀྱང་རང་ཡལ་ལ་འགྱུར་རོ། །དེ་ལ་ཅུང་ཟད་བརྟན་པ་ཐོབ་པ་དང༌། ཐིག་ལེ་དེ་འོག་གི་ཐིག་ལེ་དམར་སྐྱ་ལ་ཐིམ། དེ་ཡང་འོག་གི་ཐིག་ལེ་དཀར་དམར་ལ་ཐིམ། དེ་ཡང་ཟླ་བ་ལ་ཐིམ། ཟླ་བ་ཡང་ནམ་མཁའ་ལ་སྤྲིན་དེངས་པ་ལྟར་ཡལ་ནས་སྟོང་པ་ལ་མཉམ་པར་བཞག་པས་ཞི་གནས་མཆོག་སྐྱེའོ། །མཐར་མཉམ་བཞག་ལས་ལྡང་བའི་ཚེ། སྐད་ཅིག་གིས་ཟླ་བ་དང་ཐིག་ལེའི་རྣམ་པར་རིམ་གྱིས་གྲུབ་པར་བལྟ་ཞིང༌། རང་ཧེ་རུ་ཀ་དང༌། ཕྱིའི་ཆོས་རྣམས་ཀྱང་སྣང་བཞིན་དུ་རང་བཞིན་མེད་པར་བལྟས་ལ་ལྡང་ངོ༌། །དེ་ལྟར་སོ་སོའི་རྟགས་མ་བྱུང་གི་བར་བསྒོམ་ཞིང༌། མཐར་ཕྱིན་པ་ན་སྟོང་པའི་ཞི་གནས་དང༌། བདེ་གསལ་ལྷག་མཐོང་གི་ཏིང་ངེ་འཛིན་སྐྱེས་ནས། ཏིང་ངེ་འཛིན་གྱི་རྒྱུན་དེས་མཐོང་ལམ་གྱི་ཡེ་ཤེས་སྐྱེ་བས་སངས་རྒྱས་ཉིད་འགྲུབ་པར་འགྱུར་རོ། །མདོར་ན་སྦྱོང་བའི་ཚུལ་དབང་པོའི་སྒོ་རྣམས་ལ་སོར་སྡུད་ཀྱི་ཏིང་ངེ་འཛིན་རབ་བཀྲམ་དུ་སྦྱངས་ནས། དངོས་གཞི་མི་ཤིགས་པའི་ཐིག་ལེ་ཉིད་རྩལ་དུ་འཇོག་པ་སྟེ། མཐར་ལྟེ་བར་རྩ་གནས་བོང་གདོང་འཁྱིལ་འདྲ་ལ། གཏུམ་མོའི་མེ་སྦྲུལ་གྱི་ལྕེ་ལྟར་འཁྱོག་པ་བྱུང་བས་རྩ་དབུ་མའི་ནང་གང་ཞིང་ཁྱབ་པར་བསམ་སྟེ་རླུང་ཁ་སྦྱར་ནན་ཏན་དུ་བསྒོམ། གདམས་པ་ཀུན༵་ལ་མེད་པ་ཡི། །སྲིད་པའི་དག༵འ་བདེ་ལ་ཞེན་རྣམས། །འཆིང་གྲོལ༵་སྟོན་པ་ཟབ་མོའི་བཅུད། །མན་ངག་མཆོ༵ག་གྱུར་ཁོ་བོས་བཀོད། །ཞལ་ལས་འོངས་པ་ཉིད་རྗེན་པར་བྲིས། (༧༤) ཕག་མོའི་སྒོམ་དྲུག་གི་ཁྲིད་ཡིག །ཕག་མོའི་སྒོམ་དྲུག་གི་ཁྲིད་ནི། སྐྱབས་སེམས་སྔོན་དུ་སོང་ནས། དང་པོ་ནི། རང་ལུས་ཕག་མོའི་སྐུར་བསྒོམ་པ་སྟེ་དབྱིབས་ལ་བསླབ་པའོ། །དེ་ནས་ལྟེ་བར་པད་མ་དམར་པོ་འདབ་མ་བཞི་པའི་སྟེང་དུ་བཾ་དམར་པོ་གཅིག་བསྒོམ། དེ་ནི་གཉིས་པ་ཡིག་འབྲུ་ལ་བསླབ་པའོ། །དེ་ནས་སྟེང་རླུང་མནན་པས་ལྟེ་བའི་བཾ་ལ་ཐིམ་པར་བསྒོམ། དེ་ནི་གསུམ་པ་རླུང་ལ་བསླབ་པའོ། །དེ་ནས་རྐང་པར་ཡཾ་ལས་རླུང་གི་དཀྱིལ་འཁོར་གཡོས་པས། འདོམས་བར་དུ་རཾ་ལས་མེ་འབར། དེ་ནས་ལྟེ་བའི་བཾ་དྲོས་པས་བཾ་ལས་འོད་འབར་ལ་ཁད་དེ། དེ་ལས་འོད་འབར་ཏེ་ལུས་འོད་ཀྱི་ཕུང་པོར་གྱུར་པར་བསྒོམ། དེ་ནི་བཞི་པ་འོད་ཀྱི་ལུས་ལ་བསླབ་པའོ། །དེ་ནས་འོད་དེ་ནམ་མཁའ་ལ་སྤྲིན་དེངས་པའམ། བར་སྣང་གི་འཇའ་ཚོན་ཡལ་བ་བཞིན་བསྒོམ། དེ་ནི་ལྔ་པ་འོད་གསལ་ལ་བསླབ་པའོ། །དེའི་ངང་ལ་སྔར་གྱི་སྤྱི་བོའི་ཐད་ཙམ་དུ་ཧཾ་དཀར་པོ་མགོ་ཐུར་དུ་བལྟ་བ་གཅིག་བསམ། ལྟེ་བའི་ཐད་ཙམ་དུ་བཾ་དམར་པོ་མགོ་གྱེན་དུ་བལྟ་བ་གཅིག་བསམ། དེ་ནས་སྟེང་གི་ཧཾ་དེ་ལས་བྱང་ཆུབ་ཀྱི་སེམས་བ་ཐག་ལྟ་བུ་འཐིགས་ནས་བཾ་ལ་ཕོག་པས་བཾ་ཡོངས་སུ་གྱུར་པ་ལས། རང་རྡོ་རྗེ་རྣལ་འབྱོར་མ་ཟུང་འཇུག་གི་ལྷ་མོ་འཇའ་ཚོན་ལྟ་བུ་བསྒོམས་ཏེ། བདེ་གསལ་མི་རྟོག་པའི་རང་བཞིན་དུ་བཞེངས་པའོ། །དེ་དག་ཀྱང་ཐ་དད་མེད་དེ་བདེ་བ་དང་སྟོང་པ་དབྱེར་མེད་པས་ཟུང་འཇུག །གསལ་བ་དང་སྟོང་པ་དབྱེར་མེད་པས་ཟུང་འཇུག་གོ །དེ་ནི་དྲུག་པ་ཟུང་འཇུག་ཏུ་བསླབ་པའོ། །དཔྱལ་ལོ་ཀུན༵་དག༵འ་རྡོ་རྗེ་ཡིས། །སྨིན་གྲོལ༵་མཆོ༵ག་ཏུ་བསྔགས་པའི་གཞུང༌། །ཕག་མོའི་བསྒོམ་དྲུག་གནད་འདོམས་པ། །ཡི་གེས་གསལ་བར་བྱས་འདིའོ། །དཔྱལ་པའི་ཡིག་རྙིང་ཇི་ལྟ་བ་བཞིན་བྲིས་སོ། (༧༥) །ནཱ་རོ་ཆོས་དྲུག་གི་ཁྲིད་ཡིག །ནཱ་རོ་ཆོས་དྲུག་གི་ཁྲིད་ནི། སྐྱབས་སེམས་སྔོན་དུ་སོང་ནས། ལུས་རྣམ་སྣང་གི་ཆོས་བདུན་ལྟ་བུ་ལ་གནས་ནས། ལུས་སྟོང་ར་སྐྲ་སེན་དང་བ་སྤུའི་བུ་ག་ཐམས་ཅད་ཀྱང་ཁྲོལ་ཚགས་ལྟར་བུག་པ་སང་ངེ་བར་བལྟས་ལ་བསྐྱང༌། བཅོམ་ལྡན་འདས་མ་ལྷན་ཅིག་སྐྱེས་མ་སྐུ་སྟོང་རའི་རང་བཞིན་དུ་བལྟས་ལ་བསྐྱང༌། ལུས་ཀྱི་དབུས་དྲང་པོ་ན་ཡར་དྷཱུ་ཏི་མདའ་སྙུག་ལྟར་དྲང་བ། སོག་སྦུབ་ལྟར་བུག་པ་ཡོད་པ། ཏིལ་མར་གྱི་མར་མེ་ལྟར་གསལ་བ། གསང་གནས་ཚངས་བུག་གི་བར་དུ། གཡས་གཡོན་རོ་རྐྱང་གཉིས། སྟེང་འོག་ཏུ་དབུ་མ་དང་འདྲེས་ཤིང༌། ཡར་སྣ་སྣ་བུག་གཉིས་སུ་ཟུག་པ། ལྟེ་བའི་འཁོར་ལོ་དྲུག་ཅུ་རྩ་བཞི། སྙིང་ཁའི་རྩ་འདབ་བརྒྱད། མགྲིན་པར་བཅུ་དྲུག །དཔྲལ་བར་སོ་གཉིས་སྟོང་རའི་རང་བཞིན་ཅན། བ་སྤུ་འཁྲུགས་པའི་བར་གྱི་རྩའི་ཕྲེང་བ་རྣམས་ཀྱང་སྟོང་རར་བསམ། འདི་ལ་རིགས་ལྡན་གྱི་གཞི་གཟུང་བ་ཞེས་ཀྱང་བྱ། རླུང་རོ་བསལ། སྣ་རྩེ་ནས་སོར་བཅུ་དྲུག་གི་ཐད་ནས་རླུང་དུ་བའི་མདོག་ཅན་ལ་དལ་བུས་རྔུབས་ཏེ་རོ་རྐྱང་གི་ལམ་གཉིས་ནས་དྷཱུ་ཏིའི་མར་སྣའི་ནང་དུ་སོང༌༑ འོག་རླུང་ཀྱང་དེར་དྲང༌། ཕྱིར་གཏང་རན་པ་ན་དྷཱུ་ཏི་ལས་སྤྱི་བོའི་ཚངས་བུག་ནས་ཡར་དུ་བ་འཐོན་པ་ལྟར་བསམ། སྟེང་འོག་གཉིས་ཀ་མི་འཛིན་པར། ལྟོ་བ་ཕྱིར་ཕུལ་ཏེ་བར་རླུང་དགང༌། དྷཱུ་ཏིའི་ཡར་སྣ་སྨིན་མཚམས་སུ་ཟུག་པའི་ཡར་སྣ་བྱང་སེམས་ཀྱི་ཐིག་ལེ་དཀར། སྣུམ། འདྲིལ། འཚེར་བ་སྟེ་ཆོས་བཞི་ལྡན་བསམ། རླུང་རྔུབས་པ་དང༌ལྷན་ཅིག་དྷཱུ་ཏིའི་ནང་ལ་འཁོར་ལོ་སོ་སོའི་ལྟེ་བར་གནས་པས་རིམ་གྱིས་གསང་གནས་ཀྱི་ལྟེ་བའི་བར་དུ་བྱུང༌། སླར་ཡང་གྱེན་དུ་གཤེགས་ཏེ་ཡར་སྣ་སྨིན་མཚམས་སུ་སྐྱ་ཡེར་གྱིས་བྱུང་བར་བསམ། གཏུམ་མོའི་ཐིག་ལེ་ལས་མེ་ལྕེ་ལྷག་པར་འབར་བ་ཕྱོགས་མཚམས་སྟེང་འོག་ཐམས་ཅད་དུ་སོང་བས་མེའི་རང་བཞིན་སྲུང་འཁོར་ཡངས་ཤིང་རྒྱ་ཆེ་བའི་ནང་དུ་གནས་ཁང་གཞལ་མེད་ཁང་གི་རྣམ་པ་མེ་ཆོས་བཞི་ལྡན་གྱི་རང་བཞིན་ཅན་བསམས་ཏེ་གཏུམ་མོ་གནས་ཁང་དུ་བྱའོ། །འདུག་པ་དང་ཉལ་བའི་ཚེ་སྟན་དང་མལ་མེའི་རང་བཞིན་ཅན་དུའང་བསམས་ཏེ་གཏུམ་མོ་སྟན་དུ་བྱའོ། །གོས་བགོ་བ་ཐམས་ཅད་ཀྱང་མེའི་རང་བཞིན་དུ་བསམས་ཏེ་གཏུམ་མོ་གོས་སུ་གྱོན་པའོ། །སྒྱུ་ལུས་ཀྱི་མན་ངག །སྡུག་བསྔལ་གྱི་རང་བཞིན་ཅན་གྱི་འཁོར་བ་སྤྱི་དང༌། སྒོས་སུ་རང་གི་ལུས་ཕུང༌། ཁྱད་པར་སེམས་རང་དབང་མ་ཐོབ་བར་སྐད་ཅིག་རེས་ཀྱང་མི་རྟག་པ་སྟེ། ཡིད་བརྟན་པར་མི་འོས་པའི་ཚུལ་ལ་བརྟག་ཅིང་དཔྱད། གདོད་ནས་སྣང་སྲིད་དག་པའི་འཁོར་ལོར་བཞུགས་པས་ལུས་ལྷག་པའི་ལྷའི་སྐུར་བལྟ། སྒྱུ་མའི་དཔེ་བཅུ་གཉིས་ཀྱིས་ངེས་ཤེས་བསྐྱེད་དེ། སྐུའི་རྣམ་པ་ཡོངས་སུ་རྫོགས་ཀྱང་རང་བཞིན་མེད་པ་མེ་ལོང་ནང་གི་གཟུགས་བརྙན་ལྟ་བུ། ཁ་དོག་ཅིར་ཡང་སྣང་བ་འཇའ་ལྟ་བུ། གཅིག་ལས་གཉིས་སུ་སྣང་བ་མིག་ཡོར་ལྟ་བུ། རླུང་དང་འོད་ཟེར་ལས་གྲུབ་པའི་མིག་འཕྲུལ་ལྟ་བུ། གཅིག་ཉིད་དུ་མར་སྣང་བ་ཆུ་ཟླ་ལྟ་བུ། དངོས་པོ་གང་གིས་ཀྱང་གཞིག་མི་ནུས་པ་གྲིབ་མའི་སྐྱེས་བུ་ལྟ་བུ། ཞིང་དང་བཀོད་པ་སྣ་ཚོགས་སུ་སྣང་བ་དྲི་ཟའི་གྲོང་ཁྱེར་ལྟ་བུ་སྟེ་བདུན་སྐུའི་དཔེ། གསུང་ལ་འཕོ་འགྱུར་མྱུར་བ་བྲག་ཆ་ལྟ་བུ། རོ་གཅིག་ལ་དུ་མར་སྣང་བ་ཆུ་བུར་ལྟ་བུ་སྟེ་གཉིས་གསུང༌། ཐུགས་ལ་ཉམས་སུ་མྱོང་བ་རང་བཞིན་མ་གྲུབ་པ་རྨི་ལམ་ལྟ་བུ། ལྷན་སྐྱེས་ཉིད་སྣང་བ་སྒྱུ་མ་ལྟ་བུ་སྟེ་གཉིས་ཐུགས། ཕྲིན་ལས་འཇུག་པ་མྱུར་བ་གློག་ལྟ་བུ་གསུམ་ཀའི་ངོ་བོ་སྟེ་དཔེའི་སྒོ་དེ་རྣམས་ཀྱིས་ངེས་ཤེས་བསྐྱེད་ཅིང་བསྒོམ་མོ། །རྨི་ལམ་གཟུང་བ་མགྲིན་པའི་འཁོར་ལོ་པད་འདབ་བཞི་པའི་དབུས་སུ་ཐིག་ལེ་དམར་པོ་མེའི་རང་བཞིན་ཅན་བསམས་ལ། པད་འདབ་བཞིར་ༀ་ཨ་ནུ་ཏ་ར་བསམས་ལ་ཉལ་བས་ངེས་པར་ཟིན་ནོ། །སྤྱོད་པ་ལ་བསྒྱུར་དང་སྤེལ་ཞིང་སྦྱང་། འོད་གསལ་ཉིན་གྱི་དུས་སུ་འོད་གསལ་རྣམ་པར་མི་རྟོག་པའི་ངང་ལ་གོམས་པ་བརྟན་པར་བྱས་པས་དེའི་སྟོབས་ཀྱིས་གཉིད་འཐུག་གི་འོད་གསལ་བདེ་གསལ་མི་རྟོག་པ་གསུམ་ཚོགས་ཀྱི་ཏིང་ངེ་འཛིན་མངོན་དུ་གྱུར་ནས། བར་སྲིད་ནམ་ཤར་བ་ན། གང་ཤར་དེ་སྔོན་གོམས་ཀྱིས་དག་སྣང་དུ་རྩལ་སྦྱངས་པས། བར་དོར་ལོངས་སྐུ་མངོན་དུ་འགྱུར་བ་ཡིན་ནོ། །སྐྱེ་བ་འདིའི་འཚོ་བ་ཡོངས་སུ་བཏང་སྟེ། ཕྱི་མའི་སྐྱེ་བ་ཡོངས་སུ་མ་བཟུང་བའི་བར་ན། རླུང་སེམས་ཙམ་གྱི་ལུས་ཅན་དུ་གནས་པ་དེ་ཉིད་ཉམས་སུ་ལེན་པ་ཡིན་ལ། དེ་ཡང་སྔོན་གོམས་ལ་རགས་ལས་པས༑ ད་ལྟར་གྱི་ཉིན་སྣང་གང་ཤར་བར་དོ་ཡིན་སྙམ་དུ་ངེས་པར་བྱས་ལ། རང་བཞིན་མངོན་དུ་བྱ་བའམ། ཡང་ན་དག་སྣང་དུ་བསྒྱུར་ཏེ། དེའི་ངང་དུ་རང་བབས་སུ་སྐྱོང་བ་གོམས་པར་བྱས་པས་རྨི་ལམ་དུ་འདྲོངས་ཏེ། རྨི་ལམ་གྱི་སྣང་བ་གང་ཤར་ལ་བར་དོའི་དྲན་འདུན་དང་དེའི་སྟེང་དུ་དག་སྦྱོང་དང༌། རང་གྲོལ་སྐྱོང་བའི་ཉམས་ལེན་ལག་ཏུ་ལོངས་པར་འགྱུར་ལ། དེ་གོམས་པས་ནམ་འཆི་བའི་ཚེ། རང་བཞིན་བརྒྱད་ཅུའི་རྣམ་རྟོག་རིམ་གྱིས་ཐིམ་སྟེ་སྣང་གསུམ་གྱི་རིམ་པས་ཚེ་འདིའི་འཇུག་པ་བརྟུལ་ཏེ། བར་སྲིད་ཀྱི་སྣང་བ་ཅི་ཡང་རུང་བ་ཤར་ན་སྔོན་གོམས་ཀྱི་མན་ངག་ཉམས་འོག་ཏུ་ཆུད་དེ། བར་སྲིད་ལོངས་སྐུའི་གོ་འཕང་མངོན་དུ་འགྱུར་རོ༑ ༑འཕོ་བའི་མན་ངག །སྤྱི་བོའི་མཐོ་གང་ཙམ་གྱི་ནམ་མཁར་བླ་མ་དང་ཡི་དམ་ཕོ་བྲང་མཁའ་སྤྱོད་དངོས་སུ་བསམ། ལུས་ཀྱི་ཨ་ཝ་དྷཱུ་ཏིའི་ནང་མགྲིན་པའི་གནས་སུ་ༀ་དཀར་པོ་ལ་ཨ་ནུ་ཏ་ར་བཞིས་བསྐོར་བར་བསམས་ལ། རླུང་ནང་དུ་རྔུབ་པ་དང་ལྷན་ཅིག་མགྲིན་པའི་ༀ་ལས་ཧཱུྃ་སྔོན་པོ་ཆད་དེ་སྙིང་ཁར་བྱུང༌། དེ་ལས་ཨཱཿ དམར་པོ་ཆད་དེ་ལྟེ་བར་གནས་པར་བསམས་ལ། རླུང་ཐུབ་ཚད་བཟུང་ལ། དེ་ནས་ཕྱིར་དབྱུང་བ་དང་ལྷན་ཅིག །ལྟེ་བའི་ཨཱཿ ཧཱུྃ་ལ་འདྲེས། དེ་མགྲིན་པའི་ༀ་ལ་འདྲེས། ༀ་ཡི་གེ་བཞི་དང་བཅས་པ་ལུས་ངག་ཡིད་གསུམ་གྱི་ངོ་བོ་ཐིག་ལེའི་གཟུགས་ཀྱིས་ཚངས་བུག་ནས་ཐོན་ཏེ། བླ་མའི་ཐུགས་ཀར་འདྲེས་པར་བསམ། ནཱ་རོ་ཆོས་དྲུག་ཀུན༵་ཁྱབ་ལས། །དག༵འ་བ་རྒྱས་པའི་མདུད་གྲོལ༵་མཆོ༵ག །གསེར་ཞུན་ནང་ནས་ཟ་འོག་གི །དུམ་བུ་ལོགས་སུ་བཀོལ་ལྟར་བྲིས། །གསེར་ཞུན་མ་ལས་བཀོལ་ཏེ་བྲིས་སོ། (༧༦) །ནི་གུ་ཆོས་དྲུག་གི་ཁྲིད་ཡིག །ནི་གུ་ཆོས་དྲུག་གི་ཁྲིད་ནི། སྐྱབས་སེམས་སྔོན་དུ་སོང་ནས། སྤྱི་བོར་པད་ཟླའི་སྟེང་དུ་བླ་མ་བསྒོམས་ལ། བླ་མ་རིན་པོ་ཆེ་བདག་གི་ནད་གདོན་ཞི་བར་མཛད་དུ་གསོལ། སྡིག་སྒྲིབ་དག་པར༴ ཏིང་ངེ་འཛིན་ཁྱད་པར་ཅན་རྒྱུད་ལ་སྐྱེ་བར་མཛད་དུ་གསོལ། རང་གི་མགོ་ནང་དུ་ཆོས་འབྱུང་དཀར་སངས་པའི་སྟེང་ཐད་དུ་ཨ་དཀར་པོ་ལས་བདུད་རྩི་བྱུང་ལུས་གང་སྡིག་སྒྲིབ་བག་ཆགས་དུད་ཁུའི་རྣམ་པར་ཕྱིར་སྦྱངས་ནས། ལུས་ཤེལ་གོང་ལྟར་གྱུར། ནད་ཚད་པ་ལ་བདུད་རྩི་བསིལ། གྲང་བ་ལ་དམར། རླུང་ལ་དམར་སེར་ཚ་གྲང་སྙོམས་པས་སྦྱངས། གདོན་ལ་ཁྲོ་ཆུ་ཁོལ་མ་ལྟ་བུ། རྟགས་རྣམས་དངོས་དང་རྨི་ལམ་དུ་འཆར། གཏུམ་མོའི་སྔོན་འགྲོ་མེའི་སྟོང་རར། ལུས་མེ་ཐབ་དྲུག་ཆིངས་སུ་བྱ་ཞིང༌། རྡོ་རྗེ་རྣལ་འབྱོར་མར་གསལ་བའི་ནང་དར་དམར་རྐྱལ་པ་ལྟར་སྲབ་དྭངས་ཀྱི་མཁལ་རྩ་གཡས་གཡོན་མདུན་རྒྱབ་ཏུ་མེ་གོང་བསམ། བླ་མ་རིན་པོ་ཆེ་བདག་ལ་སེམས་ཅན་ཐམས་ཅད་ཀྱི་དོན་དུ་བདེ་དྲོད་ཀྱི་ཏིང་ངེ་འཛིན། བདེ་སྟོང་གི་ཏིང་ངེ་འཛིན་སྐྱེ་བར་མཛད་དུ་གསོལ། འཇམ་རླུང་བཟུང་ལ་ཕོ་སྐོར་བྱས་པས་མེ་གང་འཐབ། མེ་སྟག་དམར་སྐྱ་ཐོར་འཐོར་བར་བསམ། གཏུམ་མོ་ཟས་བཟའ། རྩ་གསུམ་འདུས་མདོར་རཾ་ཡིག་མེ་རླུང་གིས་བསྐུལ་ཏེ་དབུ་མ་ཇེ་ཡངས་ལ་སོང་བ་མེས་ཁེངས་པར་བསམས་ལ། ལུས་དཀྲུགས་འཁོར། གཙུབ་ཤིང་མའི་འཁྲུལ་འཁོར། ངག་ལྟེ་འོག་གི་རླུང་ཁ་སྦྱར། སེམས་མེ་འབར་བ་ལ་རྩེ་གཅིག་གཏད་དོ། །གོས་གྱོན་མཐིལ་མེས་ལུས་འགེབས། སྟན་འདིང་ཁྱི་ཉལ་སྒོར་མོར་ཉལ། རྟ་ཞོན་མཆན་འོག་ནས་རླུང་གི་ལྷ་མོས་འདེགས་པར་བསམས་ལ། རླུང་ཁུག་པ་ཉེར་གཅིག་སྦྱོང༌། སྲིད་པའི་དབང༌། སྤྱི་བོའི་བླ་མའི་སྐུ་ལས་བདུད་རྩི་དཀར་ཆིལ་གྱིས་བྱུང་ནས་རང་གི་སྤྱི་མགྲིན་སྙིང་ཁ་ལྟེ་གསང་གང༌། དབང་བཞི་བསྐུར་བར་མོས། གེགས་སྟོད་ལ་ནོར་བུ་མིག་གསུམ་གང་ན་སར་བསྒོམ། ལུས་ཁྲོལ་ཚགས་ལྟར་ཡང་ཡང་བསམས་ལ་འབུད། ནད་རླངས་ཀྱི་རྣམ་པར་ཕྱིར་ཐོན་ཧ་དྲག་པོ་དང༌། ཁུ་ཚུར་ཕྱིར་བསྟན་ནུ་མའི་སྟེང་ཐད་དུ་བརྡེག །སྨད་ལ་རྡོ་རྗེའི་བུ་གར་རཀྟའི་ངོ་བོ་པདྨ་དམར་པོའི་རྩ་བ་ཕྲ་བ་བུ་གའི་ནང་ན་ཡར་ཆུད་པར་བསྒོམས་ལ་རྐང་མཐིལ་སྤྲད་ནས་རྡོ་རྗེ་གཙུག་ཏོར་གྱི་ཕྱག་རྒྱ་སྤྱི་བོར་བསྒྱུར་བས་དམིགས་པ་ནོར་བུ་རྒྱུ་མ་ནང་ཟློག་ཏུ་གྱེན་ལ་བྱུང་བས་ཧཱུྃ་ཡིག་དམར་ལ་དྭངས་པ་གཅིག་དབུ་མའི་ལམ་ནས་ཚངས་བུག་བར་དུ་བྱོན་པ་ལ་ཤེས་པ་གཏད། འཛག་པ་དྲུག་ཀ་འདིས་ཆོད། ཞལ་ཤེས་བྲིས་པ་ཡིན། སྒྱུ་ལུས་ལ། སྐྱོ་ཤས་བསྐྱེད་དེ་རང་བདེ་མཆོག་ལྷན་སྐྱེས་སུ་བསྒོམས་པའི་སྤྱི་བོར་བླ་མ་ཀུན་འདུས། བླ་མ་རིན་པོ་ཆེ་བདག་འཛིན་བློས་ཐོངས་པར༴ དགོས་མེད་རྒྱུད་ལ་སྐྱེ་བར༴ སྒྱུ་ལུས་རྨི་ལམ་འབྱོངས་པར་མཛད་དུ་གསོལ། བླ་མ་རང་ལ་བསྟིམ། རྗེས་ཅིར་སྣང་སྒྱུ་མར་ཤར་བའི་འཆར་སྒོ་དང་མ་བྲལ་བའི་རྗེས་ཐོབ་སྐྱོང་བ་ནི་དབང་པོ་རབ། འབྲིང་རང་ལུས་བདེ་མཆོག་གིས་མཚོན་པའི་སྣང་དམིགས་སྒྱུ་མ་རྨི་ལམ་དུ་ཐག་རྦད་བཅད་ནས་ཡིད་དང་ངག་མཚུངས་པར་སྒྱུ་མ་རྨི་ལམ་ཞེས་བརྗོད། ཐ་མས་འགྲོ་འདུག །འཕོ་སྐྱས། བློ་སྣ། ལོང་གཏམ་གྱི་སད་བཞི་སྤངས་ནས་ལྟེ་བར་ཆོས་འབྱུང་ནང་དུ་འགྲོ་བ་རིགས་དྲུག་ལ་སྙིང་རྗེ་བསྐྱེད། འོག་རླུང་བསྐུམ། སྟེང་རླུང་རིམ་པས་མནན་པས་བདེ་དྲོད་སྐྱེ། རྨི་ལམ་རང་ཟིན༑ སྦྱངས། སྤེལ། ཡུལ་སྣང༌། རང་ཤར་ཏེ་ཡོན་ཏན་དྲུག་འཆར། ནད་ལ་སྒྱུ་མར་ཐག་བཅད། གདོན་ཆོས་འབྱུང་དུ་བཀུགས་ལ་དཀྲུགས་འཁོར་བྱས་པས་ཐུལ་འགྲོ་ཞིང༌། ཞེན་མེད་སྒྱུ་མའི་རང་ཉམས་ཀྱི་རྩིས་བཟུང༌། རྨི་ལམ་ལ། བླ་མ་རིན་པོ་ཆེ་བདག་འཛིན༴ དགོས་མེད༴ རྨི་ལམ་ཟིན་པར་མཛད་དུ་གསོལ། སྤྱི་བོའི་ཧཾ་ལས་ཐིག་ལེ་དཀར་པོ། གསང་གནས་ཀྱི་ཧཱུྃ་ལས་ཐིག་ལེ་དམར་པོ། སྙིང་ཁར་འཁོར་བ་བུམ་དབང༌། རེག་པ་གསང་དབང༌། རེག་བདེ་ཤེས་རབ་ཡེ་ཤེས། གཅིག་ལ་གཅིག་ཐིམ་པ་དབང་བཞི་པར་མོས་ཤིང༌། གནད་འཕྱུགས་མེད་དགུ་ལ་དུས་ཐོ་རངས། ནམ་ལངས། ཉི་ཤར། ལུས་སྐྱིལ་ཀྲུང་ཙོག་པུ་སེང་གེའི་ཉལ་སྟབས། དམིགས་པ་རྟོག་བཅས་གཉིས་རྟོག་མེད་གཅིག་གིས། ཐིག་ལེ་དཀར་དམར་སྣ་སྒོ་གཡས་གཡོན་ནས་ཐོན་སྨིན་མཚམས་སུ་བདེ་མཆོག་ཡབ་ཡུམ་དུ་གསལ་བ་འོད་དུ་ཡལ་བ་དང༌། སྙིང་ཁར་བླ་མའི་ཐུགས་ཀར་ཧཱུྃ་བསམས་ལ་རང་བླ་མ། བླ་མ་ཧཱུྃ། ཧཱུྃ་འོད་དུ་ཡལ་འདི་ཉིད་རྨི་ལམ་ཞེས་པས་འདུན་པ་རྐྱང་དྲིལ་བྱས་ལ་གཟུང༌། སྦྱང་བ་རྨི་ལམ་འབྱོངས་པར་མཛད་དུ་གསོལ། ཞེས་གསོལ་བ་བཏབ། གཡང་ཟ་ལ་བདེ་མཆོག་གིས་སྦྱོང་བ་སེམས་ཀྱིས་ལུས། སྒོ་དགུའི་ཐིག་ལེ་ནང་དུ་འདུས་ནས་ཡལ་སོང་བ་ལུས་ཀྱིས་སེམས། མདུན་དུ་བདག་མེད་མའི་པདྨ་ལ་ཨ་ཕྲེང་དང༌། བདག་མེད་མ་འོད་སྔོན་དུ་རྡོ་རྗེ་ནོར་བུའི་ནང་ནས་འདྲེན་ལ༑ བདག་མེད་མའི་འདུན་རྐྱང་རྩེ་གཅིག་འདུན་པས་སྦྱངས་པའོ། །སྤེལ་ནུས་པར་མཛད་དུ་གསོལ་ཞེས་བྱས་ལ། བེམ་པོ་དང་སེམས་ཅན་གཅིག་ནས་བཅུ་ལ་སོགས་པར་སྤེལ་ཞིང་རྩ་བའི་གཅིག་ལ་བསྡུ། གང་འདུལ་དུ་སྤེལ་བ་ལ། བྱི་བར་བྱི་ལ། བྱིའུ་ཁྲ། ཁྱི་སྤྱང་ཁུ། སྟག་སེང་གེ །མི་སྲིན་པོ་སོགས་དང༌། ཀླུ་ལ་ཁྱུང༌། གཟའ་ལ་ཕྱག་ན་རྡོ་རྗེ། རྒྱལ་འགོང་ལ་རྟ་མགྲིན། ཀུན་ཁྱབ་ཏུ་རྡོ་རྗེ་འཇིགས་བྱེད་ལྟར་སྤྲུལ་ནས་ཕྱག་མཚན་གྱིས་བརྡུངས་པ། མེ་དཔུང་གིས་བསྲེགས་པར་མོས་པས་འདུལ། སྤྲུལ་ནུས་པར་གསོལ་བ་བཏབ་རྗེས། གང་སྤྲུལ་གོང་བཞིན། བསྒྱུར་ནུས་པར་གསོལ་བ་བཏབ་པ་དང༌། འབྱུང་བཞི་སེམས་ཅན་ནམ། ཕྲ་རགས། ལྷ་སྐུ་སྣ་ཚོགས་ཞལ་ཕྱག་མང་ཉུང་རྣམས་སྣང་སྟོང་ཞེན་བྲལ་དུ་བསྒྱུར། ཡུལ་སྣང་གཏན་ལ་ཕེབས་པར་གསོལ་བ་བཏབ་ནས། དམིགས་མེད་གསལ་མཁྱེན་གང་བསམ་གསལ་མཐོང༌། ཡིད་ལུས་མཁའ་ལྡིང་རྣམས་ལས་དམན་པའི་ཡུལ་སྣང་ལ། ལྟེ་བར་ཆོས་འབྱུང་དང་ཐོད་པའི་ནང་དུ་ༀ་ཨཱཿ སྭཱ་ཧཱ་ལས་བདག་མེད་མ་མན་ཤེལ་དྭངས་པ་ལྟ་བུ་ལས་འོད་ཟེར་སྣ་ལྔའི་རྩེར་ལྷ་ཚོགས་རང་རང་གི་སྔགས་སྒྲ་སྒྲོགས། ཕྱི་ནང་གསང་བའི་མཆོད་པས་མ་དག་སྣོད་བཅུད་སྦྱངས་ཤིང༌། ཁྲིག་མེར་གྱིས་གང་བའི་བདག་མེད་མའི་ཐུགས་ཁར་གང་བལྟ་འདོད་པའི་ཡུལ་འགོད་པའམ། བདག་མེད་མ་ཨར་བསམས་པའི་འོད་ཀྱིས་ཡུལ་སྣང་བལྟ་བའམ། ཨ་ཐིག་ལེར་བསམས་པའི་འོད་ཟེར་ཡུལ་སྣང་གོང་ལྟར་སྤྲོ་བའོ། །འོད་གསལ་ལ་ཡང་སྔར་ལྟར་སྐྱོ་ཤས་ཆེར་བསྐྱེད། དམ་རྫས་དང་ཁ་ཟས་སྣུམ་པ་སྤྱོད་ལམ་དལ་ཞིང་རྔུལ་ཐོན་གྱི་ལས་སྤང༌༑ ཤ་ཆེན་དང་ཚིལ་ཆེན་བསྲེག །ཚོགས་དང་གཏོར་མ་བཟང་དུ་བཤམ། བླ་མ་སངས་རྒྱས་དངོས་མཐོང་གི་བློས་འོད་གསལ་ཟིན་པར་གསོལ་བ་གདབ། རང་ལུས་རྩ་དབུ་མ་དྭངས་གསལ་བསྒོམས་པའི་ལྟེ་བའི་ཨ་ལ་མ་ཡེངས་པར་སེམས་འཇོག །ཀླད་རྒྱའི་སྟེང་དུ་བདག་མེད་མའི་ཐུགས་ཀའི་ཨའི་འོད་ཀྱིས་ཀླད་པ་གཏི་མུག་གི་རང་བཞིན་སྦྱངས། ཐོད་པ་དུང་ཁང་གི་གཞལ་མེད་ཁང༌། སྙིང་དབུས་སུ་གསལ་དྭངས་ཐིག་ལེའི་ནང་དུ་བླ་མ་དང་ཐུགས་ཀའི་ཧཱུྃ་ཡང་ཐིག་ལེའི་རང་བཞིན་ཅན་ལ་ཡིད་རྩེ་གཅིག་ཏུ་གཏོད་ཅིང་སྐུ་གསུམ་ལམ་འཁྱེར་ངང་ནས་གསལ་སྟོང་དབྱེར་མེད་དུ་ལྟ་སྟངས་ཀྱིས་མཉམ་རྗེས་བསྲེ་བ། སྣང་སྟོང་བདེ་སྟོང་གསལ་སྟོང་རིག་སྟོང་ཟབ་ཞི་སྤྲོས་བྲལ་དག་པ་གཉིས་ལྡན་དུ་ངེས་ཤེས་ལྷག་པར་བསྐྱེད་ཅིང་ངོ་སྤྲོད། དམ་ཚིག་སྤྱི་དང་བྱེ་བྲག་ལ་ནན་སྦྱོར་བྱ། གེགས་སེལ་ངེས། སྐྱོན་རང་གྲོལ། བོགས་འདོན་ཐེ་ཚོམ་རྩ་བ་གཅོད། ཉམས་རྟོགས་ཉིན་མཚན་ཁྱད་པར་རྣམས་ཀྱིས་ཤན་ཕྱེད་པར་བྱ་བ་གཅེས་སོ། །འཕོ་བ་ཐེབ་པར་མཛད་དུ་གསོལ་ཅེས་གསོལ་བ་ཕུར་ཚུགས་སུ་བཏབ་ལ་རང་ལུས་དར་སྔོན་གྱི་གུར་ཁྱིམ་ལྟར་སྣང་བའི་ལྟེ་བར་འགྲོ་དྲུག་སྐྱེ་སྒོ་གཅོད་པའི་ཆོས་འབྱུང་ཟུར་དྲུག་པའི། སྨད་ཟུར་ཐུར་བསྟན་ངན་སོང་གསུམ་གྱི་ལམ་སྒོ་གཅོད། སྟེང་ཟུར་གསུམ་མདུན་དང་མཁལ་རྩ་གཡས་གཡོན་ལ་གཏད་པའི་ནང་ནས་ཡར་རྩ་དབུ་མ་སྤྱི་གཙུག་རྒྱ་མཐོང་ཐ་ལེ། ལྟེ་བར་ཨ་དཀར་པོ་འོད་ཕིར་བ། ལྟོ་བ་སྒལ་པ་ལ་བཅར་རྒྱབ་པས་ཨ་སྐར་མདའ་ལྟར་དབུ་མའི་གཞུང་ལམ་ནས་སོང༌། སྤྱི་བོའི་རྒྱ་མཐོང་ནས་ཐོན་ཏེ་འོད་དུ་ཡལ་བ་ཆོས་སྐུ་དེ་བཞིན་ཉིད། བདེ་ཀྱེ་སོགས་ཡི་དམ་གང་མོས་ལ་བསྟིམ་ན་ཟུང་འཇུག་ཡི་དམ། མཁའ་སྤྱོད་དཀར་དམར་གང་རུང་གི་གསང་སྒོར་ཞུགས་ན་འཆུགས་མེད་མཁའ་སྤྱོད། བླ་མའི་ཐུགས་ཀར་འཕོས་ན་བྱིན་རླབས་བླ་མའི་འཕོ་བའོ། །བླ་མ་ལ་བར་དོ་ལོངས་སྐུ་འགྲུབ་པར་གསོལ་བ་བཏབ་ནས་རབ་བར་དོ་དང་པོའི་འོད་གསལ་རང་ཤར་རང་བཞིན་མའི་ངང་དུ་བུ་བསྒོམ་པའི་འོད་གསལ་མ་བུ་ཞལ་མཇལ་སྔར་འདྲིས་པའི་མི་དང་འཕྲད་པ་ལྟར་ངོ་ཤེས་དྲན་པའི་ཡིད་ཆེས་ཐོབ་པ་ཡིན་ལ། འབྲིང་ལུས་ལྷ། ངག་སྔགས། སེམས་སྐྱེ་མེད་ཕྱག་རྒྱ་ཆེན་པོའི་རང་རྩལ་གྱིས་གཤིན་རྗེའི་གཟུགས་རྒྱོབ་སོད་འབྱུང་བཞི་ལོག་པའི་སྒྲ་བར་དོར་སྐྱེ་བའི་དངངས་སྐྲག་དེར་འཛིན་པ་གྲོལ་བ། ཐ་མས་ཕྱི་སྣོད་གཞལ་ཡས་ཁང༌། ནང་བཅུད་ཡི་དམ་ལྷར་མོས་ནས་མདུན་དུ་ཆོས་འབྱུང་སྔོན་པོ་གཅིག་བསྒོམ། འདི་མ་རྟོགས་པ་ལ་མའི་མངལ་སྒོ་རྟོགས་པ་ལ་འོག་མིན་ཆོས་ཀྱི་དབྱིངས་ཀྱི་ཕོ་བྲང་ཡིན་ཨང་སྙམ་དུ་བསམ། དེའི་དབུས་སུ་ཧཱུྃ་སྔོན་པོ་འོད་ཟེར་ལྔ་ལྡན་འཕྲོས་པས་སྐྱེ་གནས་བཞིའི་འདས་པའི་མངལ་སྒོ་དག །ད་ལྟར་གྱི་མངལ་སྒོ་སྦྱང༌། མ་འོངས་པའི་མངལ་སྒོ་བཀག་པར་བསམས་ལ། ཧཱུྃ་ལས་རང་བདེ་མཆོག །དེའི་སྤྱི་བོ་རྗེ་བཙུན་མ། དེའི་སྤྱི་བོར་བཞུགས་པའི་བླ་མ་འོད་ཟེར་བདེ་བའི་རང་བཞིན་ཅན་རྗེ་བཙུན་མ་ལ། དེ་ལས་འོད་ཟེར་བདེ་བའི་རང་བཞིན་ཅན་རང་ལ་ཕོག །ཕོ་ཞེ་སྡང་སྐྱེ་བའི་ཡུལ་ཆོས་འབྱུང་གཡས་ཟུར་དུ་བདེ་མཆོག་ཡབ་རྐྱང༌། མོ་འདོད་ཆགས་སྐྱེ་བའི་ཡུལ་ཆོས་འབྱུང་གཡོན་ཟུར་དུ་རྡོ་རྗེ་རྣལ་འབྱོར་མ་ཡུམ་རྐྱང་དུ་བསྒོམས་ལ་ཡིད་ཀྱིས་སྤྲུལ་པའི་མཆོད་པ་ཕུལ་ཞིང་སྦྱངས་པས་བར་དོ་ལོངས་སྐུར་སངས་རྒྱ་བ་ཉིད་དོ། །ཟབ་ཁྲིད་ཀུན༵་ལས་ཕུལ་བྱུང་བའི། །དག༵འ་སྟེར་ནི་གུ་ཆོས་དྲུག་ཁྲིད། །གྲོལ༵་མཆོ༵ག་རང་གི་ཉམས་ལེན་ཚུལ། །ཡི་གེར་གསལ་བར་བཀོད་འདིའོ། །བསམ་སྡིངས་པ་གཞོན་ནུ་གྲུབ་ཀྱི་ཁྲིད་ཡིག་ལས་བཏུས་སོ། (༧༧) །ཕྱག་རྒྱ་ཆེན་པོ་གའུ་མའི་ཁྲིད་ཡིག །ཕྱག་རྒྱ་ཆེན་པོ་གའུ་མའི་ཁྲིད་ནི། སྐྱབས་སེམས་སྔོན་དུ་སོང་ནས། སྔོན་འགྲོ་རང་བབས་རྣམ་གསུམ་ནི། ལུས་ཀྱི་བྱ་བ་མ་གཡེང་བར། རྐང་པ་སྐྱིལ་ཀྲུང༌། རྒལ་ཚིགས་བསྲང༌། ལག་པ་པུས་མོ་གོང་དུ་བཞག་ལ་འབོལ་ལེ་སྡོད། ངག་ཀྱང་སྨྲ་བརྗོད་སྤངས་ལ་མཆུ་འབྱེད་འཛུམ་མི་བྱ། ཡིད་དུས་གསུམ་རྟོག་པའི་རྒྱུ་འཕྲེང་བཅད། མི་མནོ། མི་བསམ། མི་སྤྲོ། གཉུག་མའི་རང་སོ་བཟུང་ལ་བསྒོམ་འདོད་རྟོག་པས་མ་བསླད་པར་འཇོག་ཅིང༌། མདུན་རྒྱབ་སྟེང་འོག་གཡས་གཡོན་ཐམས་ཅད་ལྟ་སྟངས་བསྒྱུར་ཞིང་རྩོལ་མེད་དུ་ཧད་དེ། མདོ་འདོན། སྔགས་བཟླས། གཏམ་སྨྲ་བ་ཀུན་ལའང་ཧད་དེ་ཆད་དེ་དེ་ཁའི་ངང་ནས་བྱེད། རིག་པ་བྱིང་ན་མིག་གི་ལྟ་སྟངས་བསྟོད། རྒོད་ན་ཕབ། ཡང་ཡང་བླ་མས་བསྒོམ་བལྟ་བྱ་ཞིང༌། དངོས་གཞི་སྐྱོན་བཞི་རང་གྲོལ། རྒྱུན་དུ་འགྲོགས་ཀྱང་ཞལ་མ་མཇལ། ཉེ་དྲགས་པས་ངོས་མ་ཟིན། བཟང་དྲགས་པས་བློར་མི་ཚུད། ཟབ་དྲགས་པས་ཡིད་མ་ཆེས་པའི་འཚང་བརྟོལ་ནས་ངོ་སྤྲོད་དོ། །རྗེས་མཐར་སྐུ་བཞི་རང་ཤར། སེམས་མི་རྟོག་པ་ཆོས་སྐུ། རང་རིག་པ་ལོངས་སྐུ། སྣ་ཚོགས་སུ་འཆར་བ་སྤྲུལ་སྐུ། དབྱེར་མེད་ངོ་བོ་ཉིད་སྐུ། སྙིང་རྗེ་བསྐྱེད་རིམ་རླུང་མོས་གུས་ཀྱིས་བོགས་འདོན་པ་ཉིད་དོ། །གའུའི་ནང་ནས་ཕྱུང་བའི་དཔེ། །ཀུན༵་སྣང་ཏ་ལའི་འདབ་བྲིས་པའི། །བེའུ་བུམ་དག༵འ་མོའི་མདུད་གྲོལ༵་མཆོ༵ག །དེང་འདིར་ཡི་གེའི་སྣང་བར་བཀོད། །བསམ་སྡིངས་པ་གཞོན་ནུ་གྲུབ་ཀྱི་ཁྲིད་ཡིག་ལས་བཏུས་སོ། (༧༨) །ལམ་འཁྱེར་གྱི་ཁྲིད་ཡིག །ལམ་འཁྱེར་གསུམ་གྱི་ཁྲིད་ནི། སྐྱབས་སེམས་སྔོན་དུ་སོང་ནས། རང་གི་སྤྱི་བོར་པདྨ་ཟླ་བའི་སྟེང་དུ་བླ་མ་བསྒོམས་ཏེ། དེའང་སྐུའི་རྣམ་པ་ཇི་ལྟ་བ། གསུང་གི་ང་རོ་ཇི་ལྟ་བ། ཐུགས་ཀྱི་མཁྱེན་དགོངས་ཇི་ལྟ་བར་གསལ་བཏབ་ནས་གདུང་ཤུགས་དྲག་པོ་ཕར་ལ་བསྟིམ་ཕོད་པ། ཚུར་ལ་འཕྲོག་ནུས་པའི་བློ་སྣ་རྩེ་ཡམ་ཡམ་པས། གཟུགས་སྣང་བླ་མའི་སྐུ། སྨྲ་བརྗོད་བླ་མའི་གསུང༌། རང་རིག་བླ་མའི་ཐུགས་སུ་ཐག་རྦད་བཅད་ནས། མཚན་ལྡན་བླ་མ་དམ་པ་འདིས་བདག་བཟོད་དཀའི་འཁོར་བ་ལས་བསྒྲལ་བས་བཀའ་དྲིན་འཁོར་བ་མེད་སྙམ་པའི་ལུས་བ་སྤུ་གཡོ་བ། མིག་མཆི་མ་འཁྲུགས་པའི་མོས་གུས་སྟོབས་སུ་སྦྱར་ཏེ། ཕྱག་འཚལ་ལོ། །མཆོད་དོ། །སྐྱབས་སུ་མཆིའོ། །ཆོས་འཁོར་བསྐོར་ཞིང་མྱ་ངན་ལས་མི་འདའ་བར་གསོལ་བ་འདེབས་སོ། །དགེ་བ་བླ་མས་རྗེས་སུ་འཛིན་པའི་རྒྱུར་གྱུར་ཅིག་བརྗོད། དེ་བཞིན་དུ་ཅིར་སྣང་ཡི་དམ། ཅིར་སྣང་སྒྱུ་མར་བསྒོམས་ཏེ། ལམ་འཁྱེར་གོང་བཞིན་ཉམས་སུ་ལེན་པའོ། །ལམ་འཁྱེར་རྣམ་པ་ཀུན༵་འདུས་པའི། །དག༵འ་བློ་རང་གྲོལ༵་མཆོ༵ག་གི་ཁྲིད། །ཉུང་གསལ་ཡི་གེས་མཚོན་པའོ། །སྐལ་ལྡན་ཐར་ལམ་སྒྱུར་བྱེད་ཡིན། །བསམ་སྡིངས་པ་གཞོན་ནུ་གྲུབ་ཀྱི་ཁྲིད་ཡིག་ལས་བཏུས་སོ། (༧༩) །སེམས་འཆི་མེད་ཀྱི་ཁྲིད་ཡིག །སེམས་འཆི་མེད་ཀྱི་ཁྲིད་ནི། སྐྱབས་སེམས་སྔོན་དུ་སོང་ནས། རང་བདེ་མཆོག་ལྷན་སྐྱེས་ཡབ་ཡུམ་དུ་གསལ་བའི་ཡབ་ཀྱི་མཚོག་མའི་སྟེང་དུ་ཧཱུྃ་སྔོན་པོ། ཡུམ་གྱི་མཚོག་མར་བཾ། ཡིག་འབྲུ་གཉིས་སྔོ་བ་དང་དམར་བའི་མདངས་ཀྱིས་ལྷའི་སྐུ་ཡང་མོག་མོག་པོར་སྣང་བ་ལ་ཡིད་གཏད་དེ། ཡི་གེ་གཉིས་ལས་འོད་ཟེར་སྔོ་དམར་བདེ་བའི་རང་བཞིན་ཅན། གངས་རིའི་རྩེ་ལ་ཉི་མ་ཤར་བའི་དཔེས་རིམ་གྱིས་བྱུང་བས། འོད་ཀྱིས་གང་ཕོག་རྣམས། བཻ་ཌཱུ་དང་པདྨ་རཱ་ག་ལ་འཇིམ་པས་གོས་པ་ཆུས་བཀྲུས་པ་ལྟར་ཕྱི་གསལ་ནང་གསལ་ཉིད་དུ་གྱུར་ཏེ། ཡབ་ཀྱི་རལ་པའི་རྩེར་ཡིད་བཞིན་གྱི་ནོར་བུ། གཡོན་ངོས་ཀྱི་ཚེས་གཅིག་གི་ཟླ་བ། མཚོག་མའི་གོང་ཙམ་རལ་པ་ལ་བརྟེན་པའི་སྣ་ཚོགས་རྡོ་རྗེ། རལ་པ་ནག་པོ་རུས་པའི་འཁོར་ལོ་དང་འཕྱང་འཕྲུལ། ཐོད་སྐམ་ལྔའི་དབུ་རྒྱན་གྱི་བར་རྡོ་རྗེའི་ཕྲེད་ཉལ། དཔའ་བོའི་དར་དཔྱངས། སྤྱན་གསུམ་དམར་ཞིང་དབུས་སྔོ་མཐའ་སྐྱ་བ་ཤངས་གཟེངས་མཐོ་བ། དཔྲལ་བའི་དབྱེས་ཆེ་བ། ཞལ་འཛུམ་དང༌༑ སྙན་ཤལ་རིང་བ། བཞད་པའི་ཞལ་ཡས་མར་ཚེམས་དང་མཆེ་བའི་རྩེ་མངོན་ཙམ། མགྲིན་པ་ཟླུམ་པ། སྐུ་སྟོད་རྒྱས་པ། ཕྱག་གཉིས་ཀྱིས་རྡོ་རྗེ་དང་དྲིལ་བུ་འཛིན་པས་ཡུམ་ལ་འཁྱུད་པ། རུས་པའི་མགུལ་རྒྱན་སྙན་ཆ་སེ་མོ་དོ། དཔུང་རྒྱན་ཕྱག་གདུབ་སྐ་རགས་ཞབས་གདུབ་ཐམས་ཅད་དཀར་ཆབས་སེ་བ། སྟག་ལྤགས་རྒྱབ་ཏུ་གྲོལ་བ། ཞབས་གཡས་བསྐུམ་གཡོན་བརྐྱངས་པས། པད་ཉི་འཇིགས་བྱེད་དུས་མཚན་མནན་པ། ཡུམ་འཛུམ་ཁྲོ་ཧུར་བག་ཅན་དབུ་སྐྲ་ནག་པོ་སིལ་བུར་བཤིག་པ་གྲི་ཐོད་འཛིན་པས་ཡབ་ཀྱི་མགུལ་ནས་འཁྱུད་པ། རུས་རྒྱན་དཀར་ཁྲོམ་མེ་བ། ནུ་འབུར་རྒྱས་པ། ཞབས་གཡས་བརྐྱངས་གཡོན་བསྐུམས་པས༑ ཡབ་དང་མཉམ་པར་སྦྱོར་བའི་འོད་སྔོ་དམར་གྱི་གའུ་ཞལ་སྦྱོར་དུ་གསལ་བཏབ་ནས། རང་སེམས་འཆི་མེད། སྐྱེ་འཆིའི་དྲི་མས་མ་གོས་པ་ལ་ཡིད་ཆེས་བསྐྱེད་དེ། ལྷའི་སྐུ་སྣང་ལ་རང་བཞིན་མེད་པ་ལ་སེམས་མཉམ་པར་འཇོག་པའོ། །སེམས་ཀྱི་རང་བབས་མ་བཅོས་པ། །ཀུན༵་ནས་དག༵འ་སྤྲོར་སྣང་བའི་ཡིད། །རྣམ་གྲོལ༵་མཆོ༵ག་གི་རང་ཞལ་འདི། །འཕོ་བྱེད་བྲལ་བའི་ཡི་གེ་ཡིན། །བསམ་སྡིངས་པ་གཞོན་ནུ་གྲུབ་ཀྱི་ཁྲིད་ཡིག་ལས་བཏུས་སོ༑ (༨༠) ༑སུ་ཁ་ཆོས་དྲུག་གི་ཁྲིད་ཡིག །སུ་ཁ་ཆོས་དྲུག་གི་ཁྲིད་ནི། སྐྱབས་སེམས་སྔོན་དུ་སོང་ནས། གཏུམ་མོ་ལ་མེ་ཐབ་དྲུག་བཅིངས་བྱས་ལ་རང་གི་ལྟེ་བར་པདྨ་འདབ་བཞི་ཡི་གེ་ལྔ་དང་བཅས་པ་གསལ་བཏབ་རྗེས། གཤང་སྒོའི་རླུང་གིས་ལྟེ་བའི་མེ་སྦར་ཏེ་དབུས་ཀྱི་ཨ་དང་ཕྱོགས་ཀྱི་ཧ་རི་ནི་སའི་ཡི་གེ་བཞི་མེར་དམར་ཚེར་འབར། མེ་འོད་ཀྱིས་ལུས་ནང་གང་བ་ལ་ཤེས་པ་གཏད་དེ། ཡིད་ཀྱིས་ཧ་རི་ནི་ས་ཞེས་བཟླ། རླུང་ཁ་སྦྱར་གཟུང༌། སྒྱུ་ལུས་ནི་ལྟེ་བའི་པདྨའི་འོག་ཏུ་ཆོས་འབྱུང་ནང་རིགས་དྲུག་སེམས་ཅན་བསམས་ལ་སྙིང་རྗེ་བསྒོམ། ཡིག་འབྲུའི་འོད་ཀྱིས་སེམས་ཅན་རྣམས་ཀྱི་སྡིག་སྒྲིབ་སྦྱངས། འོད་རང་གི་ཚངས་བུག་ནས་ཐོན། ལྷའི་བུ་མོ་དཀར་མདངས། དྲི་ཟའི་སྔོ་སངས། བྲམ་ཟེའི་སེར་སྐྱ། མིའི་དཀར་དམར། ཀླུའི་དཀར་སེར། གདོལ་པའི་སྨུག་ནག་རྣམས། མིག་ལ་ཀྲི་ཀ །མཆུ་ལ་ཆ་ག །ལྟེ་བ་མན་ཆད་གོས་དང་བྲལ་བའི་གསང་སྒོའི་པདྨ་རྒྱས་པ་ཟེའུ་འབྲུ་རྒོད་པ་ལས་བྱང་སེམས་བདེ་བའི་རྒྱུན་དྲངས། སྤྱི་བོ་ནས་ཞུགས་ལུས་ནང་གང༌། བདེ་བ་སྐྱེས་པར་མོས་ཤིང་སྒྱུ་མའི་རང་བབས་བསྐྱང༌། རྨི་ལམ་ལྟེ་བའི་པདྨ་བདེ་དྲོད་ཀྱི་རང་ཉམས། ཡི་གེ་འཁོར་བ་ལ་ཤེས་པ་གཏད་ནས་རྨི་ལམ་ཡིན་སྙམ་དུ་གཟུང་སྤེལ་སྤྲུལ་བསྒྱུར་ཡང་ཡང་བྱ། ཡུལ་སྣང་ཨའི་འོད་ལམ་ལ་ཕྱིན་པས་གང་འདོད་ཇི་ལྟ་བར་མཐོང༌། འོད་གསལ་ལ་རང་སེམས་ཨ་ལ་བཟོ་མེད་གསལ་ལེ་བཞག་པས་འཆར། འཕོ་བ་པད་འདབ་ཀྱི་ཡི་གེ་བཞི་འབྱུང་བ་བཞིར་བསམས་ལ་འབྱུང་བ་སྡུད་པའི་རིམ་པས་ཨ་ལ་བསྡུས་ལ། སྤྱི་བོ་ནས་རྒྱངས་ཐོན་སྐྱེ་མེད་དུ་ཡལ་བར་བསམ་མོ། །བར་དོ་ད་ལྟ་ནས་སྣང་བ་ལྷ། གྲགས་པ་སྔགས། དྲན་རྟོག་ཆོས་ཉིད་དུ་འཁྱེར་བ་ཉིད་ཡིན་ནོ། །སུ་ཁ་མཁའ་འགྲོ་ཀུན༵་གྱི་གཙོ། །དག༵འ་བཞི་ལྷན་སྐྱེས་སྩོལ་མཛད་པའི། །རྣམ་གྲོལ༵་མཆོ༵ག་གི་ཆོས་དྲུག་གི །ཡི་གེ་ལྷག་ཆད་མེད་འདིའོ། །མཁྱེན་རབ་རྗེའི་ཁྲིད་ཡིག་ལས་བཏུས་སོ། (༨༡) །བདག་མེད་མའི་ནང་ཁྲིད། བདག་མེད་མའི་ནང་ཁྲིད་ནི། སྐྱབས་སེམས་སྔོན་དུ་སོང་ནས། རང་བདག་མེད་མའི་སྐུར་གསལ། སྒལ་ཚིགས་ཉེར་གཅིག་ལ་བདག་མེད་མ་ཚོན་གང་རེ་བཞུགས་པའི་ལུས་ཀྱི་དབུས་སུ་རྩ་གསུམ་ཤིང་སྡོང་ལ་འཁྲིལ་ཤིང་གི་ཚུལ་དུ་རོ་རྐྱང་གཉིས་དབུ་མ་ལ་བརྟེན་པར་བསྒོམ། ལྟེ་བར་པད་འདབ་བཞི་མདུན་སྔོ་སྐྱ། གཡས་དམར་གཡོན་སེར། རྒྱབ་དཀར། ལྟེ་བར་ལྗང་ཁུ་ལ་ཧ་རི་ནི་སའི་ཡི་གེ་འཁོད་པ། སྤྱི་བོར་སློབ་དཔོན་བི་པ་དང་དབྱེར་མེད་དགེས་མཛད་རྡོ་རྗེ་ཧེ་རུ་ཀ་ཞལ་གཅིག་ཕྱག་གཉིས་པ་གར་གྱི་ཉམས་ལྡན། མདུན་གྱི་ནམ་མཁར་དམ་པ་རྒྱ་གར་སྐུ་སྨད་ལ་བལ་གྱི་ཐུལ་པ་མནབས་པ། ཕྱག་ན་སྦའི་གླིང་བུ་འཛིན་པ་ཞལ་རང་ལ་བསྟན་པ་གཅིག་བསྒོམས་པ་ལ། བི་པ་ཧཱུྃ། སུ་ཁ་མ་ཨཱཿ དམ་པ་རྒྱ་གར་ༀ། ཞེས་རྩེ་གཅིག་ཏུ་གསོལ་བ་བཏབ་མཐར། ཨ་ལྟེ་བ་ན་གནས་པ་ལས་ཨའི་མདའ་གཅིག་ཆད། རྩ་དབུ་མའི་གཞུ་ལ་བརྟེན་རླུང་སེམས་གཉིས་ཀྱི་ལྕག་གིས་བསྐུལ་ནས་གྱེན་ལ་བྱོན་པར་བསམ། ལུས་གཡས་གཡོན་རེས་མོས་སུ་གཅུ་ཞིང་རྐང་པ་སྐྱིལ་ཀྲུང༌། ལག་པ་གཉིས་བླ་རྩར་བཞག །མིག་འབྲས་ཀྱང་གྱེན་ལ་རིམ་གྱིས་བསྐྱོད། དེའི་ཚེ་རོ་རྐྱང་གི་ཞགས་པས་དབུ་མའི་ལམ་གཅུན་ནས་ཨ་སྤྱི་བོར་རྒྱངས་ཐོན་ཏེ་སུ་ཁ་མ་སིདྡྷི་དང་དབྱེར་མེད་པའི་བདག་མེད་མ་བདེ་བ་རྒྱས་པར་གྱུར་ནས། ནག་པོ་བི་པ་ལ་ཁྱུད་ཀྱིས་འཁྱུད་དེ་མཉམ་པར་སྦྱར་བའི་བྱང་ཆུབ་སེམས་ཀྱི་ཆུ་རྒྱུན་སྒལ་ཚིགས་ལ་བརྒྱུད་བདག་མེད་མ་ཉེར་གཅིག་སྐུ་གང་མཐར། ལྟེ་བ་ལུས་ཀྱི་ཞིང་ས་ནས་ལུས་མ་ལུས་པ་ལ་ཁྱབ་པར་བསམས་ལ། བཞིན་ལ་ངར་བླུད། མིག་རྩ་དཔངས་བསྟོད། ཤེས་པ་ལ་ཁྲོག་ཕྱུང་ལ། ནམ་མཁའ་རིག་མེད་སྟོང་པ་ལ། །རིག་བཅས་སེམས་ཀྱི་རྩ་བ་གཅུན། །རྩ་བ་གཅུན་ལ་ལྷུག་པར་བཞག །ལྷུག་པར་བཞག་པས་རང་སོ་ཟིན། །ཅེས་པའི་གནད་དོ། །དགྱེས་རྡོར་ཀུན༵་ཏུ་དབྱེར་མེད་ལ། །སུ་ཁ་དག༵འ་བཞིའི་མདུད་གྲོལ༵་མཆོ༵ག །བདེ་ཆེན་འཁོར་ལོའི་རྒྱན་གྱུར་ཚུལ། །ཡི་གེའི་སྣང་བར་འཕོས་འདིའོ། །ཁྱུང་པོའི་ཡིག་རྙིང་ལས་བཏུས་སོ། (༨༢) །ལྷན་ཅིག་སྐྱེས་སྦྱོར་གྱི་ཁྲིད་ཡིག །ལྷན་ཅིག་སྐྱེས་སྦྱོར་གྱི་ཁྲིད་ནི། སྐྱབས་སེམས་སྔོན་དུ་སོང་ནས། བླ་མ་སྙིང་གི་དཀྱིལ་དུ་གསལ་བར་བསྒོམ། མདུན་དུ་ཤིང་བུ་ཕྲ་མོ་གཅིག་བཙུགས་ལ། དེ་ལ་མིག་མི་འཛུམ་པར་འགྱུར་བ་མེད་པར་ཅེ་རེ་ལྟ། ཤེས་པ་ཡང་དེ་ལ་ལྷན་ནེ་གཏད་དོ། །ཡང་དེ་ཀ་རང་ལ་ཁྲིམས་ནས་ཀྱང་མི་འཇོག་ལ། ཡང་རྩིར་ཟིན་དུ་ཡང་མི་བྱེད། དེ་ལ་ཡེངས་སུ་ཡང་མི་གཞུག་པར་སེམས་མི་ཡེངས་པའི་རྟེན་ཙམ་དུ་དེ་ལ་ཤེས་པ་ཡུད་དེ་གཏོད་ལ། དེའི་ངང་ལ་ཤེས་པ་རང་ལུགས་སུ་ལྷོད་གློད་ལ་ཆམ་གྱིས་ཞོག །སྒོམ་ལ་བཟང་གྱེས་བྱེད་པ་གལ་ཆེའོ། །གནས་བདོ་བ་ལ་ཤིག་བཤིག་ལ་ཅུང་ཟད་ངལ་གསོ། ཡང་དེ་ལྟར་བསྒོམ། དེ་ལྟར་ཐུན་ཐུང་ལ་གྲངས་མང་བར་མཛད་ནས་ཐུན་བཞིར་བསྒོམ་མཛོད། ཐུན་བར་ཐམས་ཅད་དེའི་ངང་མ་ཤོར་བ་དྲན་པས་རྒྱུན་ཆགས་སུ་ཏུ་རེ་མཛོད། མིག་ཀྱང་སྣ་རྩེ་ལ་མི་རིང་བར་ལྟ། འགྲོ་འདུག་ལ་སོགས་སྤྱོད་ལམ་ཐམས་ཅད་ཀྱང༌། ནད་པའི་སྤྱོད་ལམ་བཞིན་བྱ། དེ་ནས་སྨིན་མཚམས་སུ་ཐིག་ལེ་དཀར་པོ་སྲན་མ་ཙམ་གཅིག་བསམས་ལ། དེ་ལ་ཤེས་པ་ཡུད་དེ་གཏོད་ལ། དེའི་ངང་ནས་སེམས་རང་ལུགས་སུ་ལྷོད་དེ་ཞོག །གནས་བདོ་བ་ལ་ཤིག་བཤིག་ལ་ཅུང་ཟད་ངལ་བསོ། ཐུན་ཐུང་ལ་གྲངས་མང་བར་མཛད་ནས་ཐུན་བཞིར་བསྒོམ་མཛོད། ཐུན་བར་ཐམས་ཅད་དེའི་ངང་ལས་མ་ཤོར་བར་སྤྱོད་ལམ་སྔར་བཞིན། དེ་ནས་སྟན་གྱི་སྟེང་དུ་ཐིག་ལེ་ནག་པོ་རིལ་མ་ཙམ་ཅིག་བསྒོམ། དེ་ལ་ཤེས་པ་ཡུད་དེ་གཏོད་ལ། དེའི་ངང་ནས་སེམས་རང་གནས་སུ་ཞོག །དེ་རྣམས་ལ་གནས་པའི་སྣ་མ་ཟིན་ན་སེམས་མི་གནས་པའི་གེགས། རྣམ་རྟོག་ཐམས་ཅད་རྒྱ་ཡན་དུ་ཤོར་བ་ཡིན་ལ། དེ་དུས་སུ་རྣམ་རྟོག་འགེགས་པ་ནི། གདོད་ནས་རང་མི་འགེགས་རྣམ་རྟོག་ངོས་ཟིན་པར་བྱ། བསྒོམ་གྱིས་སྣ་མ་སུན་པར་གནད་ནས་བཟུང་ནས་བསྒོམ་པས་རྟོག་པ་ཇེ་ཕྲ་ལ་གནས་པ་སྐྱེ་འོང༌། ཅི་བྱས་ཀྱང་རྟོག་པ་ངན་ལང་ཅན་ལ། གཞན་སྔར་དང་འདྲ་རྟོག་པ་དེ་ཐོག་ཏུ་ལྷོད་ཀྱིས་གློད་ནས་དྲན་ཐག་མ་ཆད་པའི་ངང་ནས་རྟོག་པ་བྱུང་ཚད་འགྱུ་རུ་ཆུག །ཅི་མང་ལ་ཐོང༌། རྒྱ་ཡན་དུ་གཅིག་ཀྱང་མ་ཤོར་བ་གཅིག་སྐྱེས་ངོས་གཟུང༌། གཉིས་སྐྱེས་ངོས་གཟུང༌། སྐྱེས་ཚད་ངོས་བཟུང༌། དེས་རྟོག་པ་རང་སེམས་འཛིན་པའི་རྟེན་དུ་སོང་ནས་སླར་རྟོག་པ་རྒྱུན་འཆད། རྟོག་པ་དེ་ཆད་ནས་གནས་པ་ཆེར་ཡོང༌། རེས་གནས་པའི་རྒྱུན་མེད། རྟོག་པ་བན་བུན་མང་ཤེས་པ་ཚུབ་ཚུབ་པ་བྱུང་ན་ཁམས་ཀྱི་ནུས་པ་ཟད་པ་ཡིན་པས་ཁམས་གསོ་ཞིང་ཞག་རེ་ཙམ་ངལ་གསོས་ནས་གཟོད་བསྒོམ་པས་སོང་ཡོང༌། ཁ་ཟས་བཅུད་ཅན་གལ་ཆེའོ། །ད་འདི་འདྲ་གཅིག་བསྒོམ་བྱ་བའི་བསྒོམ་རྒྱུ་དམིགས་གཏད་རྟེན་ས་ཅི་ཡང་མེད། སེམས་ཁོ་རང་རང་ལུགས་སུ་ལྷོད་གློད་ལ། བཟོ་མེད། བདག་པོ་མེད། གཉེར་ཁ་མེད་པར་གར་ཐོད་ཐོད་དེ་ཀ་བཞིན་དུ་འབོལ་ཐོང་སྟེ་བསྒོམ། རང་བབས་སུ་ཆམ་ཞོག །དེའི་ངང་ལ་མ་ཡེངས་ཙམ་གྱི་དྲན་པ་ཡུད་དེ་བ་ཞིག་གྱིས་ལ། དེ་མིན་ཅི་ཡང་མ་བསྒོམས་པར་རང་ལུགས་སུ་ཞོག །ཐུན་ཀྱང་སྔར་བས་ཐུང་དུ་བྱ། ལྷན་གནས་པ་དང་ཤིག་བཤིག་ལ་དར་རེ་ངལ་གསོ། ཡང་དེ་ལྟར་བསྒོམ། དེ་ལྟར་ཐུན་བཞིར་བསྒོམ། ཐུན་བར་ཐམས་ཅད་དུ་དྲན་པས་རྒྱུན་ཆགས་སུ་ཏུ་རེ་བྱ། སྤྱོད་ལམ་སྔར་བཞིན་བྱ། བསྒོམས་ལས་ལངས་པ་དང༌། བཤིག་པའི་དུས་སུ་ཅི་འདྲ་ཞིག་འདུག་དྲིས་པས། བཤིག་ཙ་ན་སེམས་གང་དུའང་མི་འགྱུ་བར་ལངས་ཙ་ནའང་ཤེས་པ་དལ་ལ་ལྷོད་ཆགས་པ་ལྷོད་དེ་ཤིག་གེ་བ། སྣང་བ་ཟི་བུན་ནེ། རྩོལ་མེད་དུ་ལྷོད་དེ། ཡུལ་ལ་ཤེས་པ་ཆེད་དུ་མ་བཅུག་ན་སྤུ་རིས་མི་ཟིན་པ་གཅིག་འདུག་ཟེར་ན་ཞི་གནས་སྐྱེས་པ་ཡིན་ནོ། །དེ་ལ་ཤེས་པ་བག་ཙམ་ངར་བསྐྱེད་ལ་གསལ་ལེ་ཧྲིག་གེ་ཞོག །དེའི་ངང་ལ་མ་ཡེངས་པར་དྲན་པས་ཡུད་དེ་བྱ། གསལ་ལྷན་གནས་པ་དང་ཤིག་བཤིག་ལ་ངལ་གསོ། ཡང་དེ་ལྟར་བསྒོམ། ཐུན་བར་ཐམས་ཅད་དུ་དེའི་ངང་ལས་མ་ཤོར་བ་བྱ། སྤྱོད་ལམ་སྔར་དང་འདྲ། ད་དེ་ལྟར་གནས་པའི་རྟོག་པ་རྒྱུན་ཆད་ནས། བསྒོམ་བཟང་བདོ་བའི་དུས་ཀྱི་སེམས་དེའི་ངོ་བོ་ལ་ཆེར་བ་གཅིག་ལྟོས། སེམས་ཀྱི་ངོ་བོ་དེ་རང་ཅི་འདྲ་གཅིག་འདུག །རང་ལ་རང་གིས་ལེགས་པར་ལྟོས། ཐག་ཆོད་པ་ཞིག་ལྟོས། ཡང་ཅམ་བཞག་གིན་དར་རེ་ངལ་གསོ། ཡང་དེ་ལྟར་བསྒོམ། དེ་ལ་ཐག་ཆོད་པ་ཞིག་ལྟོས་ལ་སེམས་ལ་ངོས་གཟུང་འདུག་གམ། ངོས་གཟུང་མེད་པའི་སྟོང་པ་ཞིག་འདུག་གམ། སྟོང་པ་ཅང་མེད་གཅིག་འདུག་གམ། སྟོང་པའི་ངང་ནས་གསལ་ལེ་རྗེན་ནེ་བ་ཞིག་འདུག་གམ་ཇི་འདྲ་ཞིག་འདུག །རང་གིས་རང་ལ་ལྟོས་ལ་ཉམས་ཤིག་ཁྱེར་ལ་ཤོག །ཁྲིད་ཀྱི་གནད་ཐམས་ཅད་འདི་ལ་ཡོད། སེམས་ཀྱི་ངོ་བོ་ཅི་འདྲ་ཞིག་འདུག་དྲིས་པས་སྟོང་པ་ཞིག་འདུག་ཟེར་ན་ཕྱོགས་གཅིག་ཙམ་མཐོང་ཡང་ངོ་སྤྲོད་དུ་མི་བཏུབ་པས། སྟོང་པ་ཅང་མེད་ཅིག་འདུག་གམ༑ གསལ་ཧྲིག་ཅིག་འདུག་གམ། ལེགས་པར་ལྟོས། ངོ་མ་མཐོང་བར་ངོ་སྤྲད་དུ་མི་བཏུབ། ངོས་གཟུང་མེད་པའི་ཤེས་པ་ལྷག་གེ་འདུག་ཟེར་ན། ངོ་མཐོང་བ་ཡིན་པས། ད་ངོ་སྤྲད་པ་ནི། སྤྱིར་སྒོམ་ལ་ཞི་གནས་དང་ལྷག་མཐོང་གཉིས་ཡིན། དེ་ལ་ཞི་གནས་ལྷག་མཐོང་བྱ་བ་དེ་ཚིག་ཡིན། ཞི་གནས་གནས་པ་ཞིག་ཡོད་པར་འདུག །ལྷག་མཐོང་གསལ་བ་ཞིག་ཡོད་པར་འདུག་སྙམ་པ་དེ་གོ་བ་ཡིན། དེ་རྣམས་ཀྱིས་མི་ཕན། ངེད་སྒོམ་ཆེན་པ་རིག་ཐོག་ཏུ་རྗེན་ནེ་ཉམས་སུ་བླང་དགོས་པས། ད་ཁྱོད་ལ་ངོ་སྤྲད་ན། ཁྱོད་ཀྱི་སེམས་རང་ལུགས་སུ་ལྷོད་བཞག་པའི་དུས་ན་རྣམ་པར་རྟོག་པ་རང་སར་ཉལ་ཞི་ནས། སེམས་རང་ལུགས་སུ་ལྷན་ནེ་གནས་པ་ཞིག་མི་འདུག་གམ། དེ་ལ་ཞི་གནས་ཟེར་བ་ཡིན་ནོ། །ད་ལྟ་གདམས་ངག་པའམ། སྒོམ་ཆེན་པ་ཕལ་ཆེ་བ། དེ་ཁ་སྒོམ་དུ་བྱེད། རང་ཡང་རློམ། གཞན་ལ་ཡང་སྟོན་པ་མང་སྟེ། དེས་སྒོམ་དུ་ཅུང་མི་བཏུབ་པ་ཡིན༑ དེ་མེད་ཐབས་ཀྱང་མེད་པ་ཡིན། གནས་པ་དེའི་ངང་ནས་རྨུགས་པའམ། ལུང་མ་བསྟན་ནམ། འཆལ་བའམ། བཏང་སྙོམས་སུ་མ་ལུས་པར་སེམས་ཀྱི་ངོ་བོ་དེ་འདི་འདྲ་ཞིག་འདུག་བྱ་བའི་ངག་ཏུ་སྨྲ་རྒྱུའམ། ཡིད་ཀྱིས་བསམ་རྒྱུའམ། བློས་བརྟག་རྒྱུའམ། ཚིག་ཏུ་བརྗོད་རྒྱུའི་ངོས་གཟུང་རང་མེད་ལ། ངོས་གཟུང་མེད་བཞིན་དུ་གསལ་ལ་མ་འགགས་པའི་ཤེས་པ་སེང་སེང་ཡེར་ཡེར་རྗེན་ནེ་ལྷན་ནེ་བ་མ་མཐོང་བའི་མཐོང་རྒྱུའམ་མ་མྱོངས་པའི་མྱོང་རྒྱུ་རང་ལ་ཡོང་རྒྱུ་ཞིག་ཡོད་ལ། ཁར་འདོན་དུ་མི་བཏུབ་པའི་གསལ་ལ་ངོས་གཟུང་མེད་པ་གཅིག་མི་འདུག་གམ། དེ་ལ་ལྷག་མཐོང་ཟེར་བ་ཡིན། དེ་གཉིས་ཚིག་ལ་སྔ་ཕྱི་འབྱུང་ཡང་དོན་ལ་ཐ་དད་མེད་པར་བསྒོམ། སྐད་ཅིག་དེའི་ཐོག་ན་ཚང་བ་སྒོམ་སྐྱོན་མེད་སྐྱེས་པ་ཟེར་བ་ཡིན་ནོ། །དེ་སྒྲོ་བཏགས་ཐམས་ཅད་དང་བྲལ་བས་རྟག་པའི་མཐར་མ་ལྷུང༌། རང་གིས་རིག་ཅིང་མྱོང་བས་གྲུབ་པས་ཆད་པའི་མཐར་མ་ལྷུང་བའོ། །ད་སེམས་རང་ལུགས་སུ་ལྷོད་དེ་བཞག་པས་རྟོག་པ་རང་སར་ཉལ་ཞི་ནས་ངོས་གཟུང་མེད་པའི་ཤེས་པ་གསལ་སིང་ངེ་རང་རིག་རང་གསལ་དུ་རྗེན་ནེ་བ་དེ་ལ་སངས་རྒྱས་ཀྱི་ཐུགས་ཀྱི་དགོངས་པ་ཟེར་བ་ཡིན། སེམས་ཅན་གྱི་སེམས་ཀྱི་མཚན་ཉིད་ཟེར་བ་ཡིན། དངོས་པོའི་གནས་ལུགས་ཟེར་བ་ཡིན། རང་གི་སེམས་བྱ་བ་ངོས་གཟུང་མེད་པའི་ཤེས་པ་གསལ་སིང་ངེ་བ་འདི་ཡིན་མོད་བླ་མས་དེ་ངོ་སྤྲད་པ་ཡིན། སློབ་མས་དེར་ཤེས་པར་བྱེད་པ་ཡིན། དེ་སྔར་ངོ་མ་ཤེས་པ་ལ་ད་སེམས་ངོ་ཤེས་པ་ཟེར་བ་ཡིན། སངས་རྒྱས་མཁན། འཁོར་བར་འཁྱམས་མཁན། དགའ་བ་དང༌། མི་དགའ་བ་དང༌། མདོར་ན་སྲིད་དང་ཞི་བའི་ཆོས་ཀྱི་བྱེད་མཁན་ཐམས་ཅད་འདི་ཡིན། སྔར་རྟོག་པས་བསྒྲིབས་ནས་ངོ་མ་ཤེས་པ་ཡིན། ད་ལྟ་རྣམ་རྟོག་རྒྱུན་ཆད་པས་ངོ་ཤེས་པ་ཡིན་ནོ། །སེམས་དེ་ལ་ངོས་གཟུང་ཅི་ཡང་མེད་པ་སེམས་ཀྱི་རང་བཞིན་ཡིན༑ མེད་བཞིན་གསལ་ལེ་ཝལ་ལེ་བ་དེ་སེམས་ཀྱི་མཚན་ཉིད་ཡིན། སྟོང་གསལ་རིག་པའི་ངོ་བོར་སིང་ངེ་ཡེ་རེ་བ་དེ་ངོ་བོ་ཡིན། དེ་ལ་ངོ་ཤེས་རྗེན་པ་ཞིག་མཛོད། སེམས་ཉིད་ལྷན་ཅིག་སྐྱེས་པར་ངོ་སྤྲད་པའོ། །ཕྱག་ཆེན་ཀུན༵་གྱི་ནོར་བུའི་ཏོག །ལྷན་ཅིག་སྐྱེས་དག༵འ་མཉམ་སྦྱོར་ཉིད། །རྣམ་གྲོལ༵་མཆོ༵ག་ཏུ་དཀྲི་བའི་ཚུལ། །འདི་ན་ཡི་གེའི་སྣང་བར་ཤར། །རྒྱལ་སྲས་པའི་གསུང་ལས་རྒྱ་མ་པས་ཟིན་བྲིས་མཛད་པ་ལས་བཏུས་སོ། (༨༣) །ཕྱག་ཆེན་ལྔ་ལྡན་གྱི་ཁྲིད་ཡིག །ཕྱག་རྒྱ་ཆེན་པོ་ལྔ་ལྡན་གྱི་ཁྲིད་ནི། སྐྱབས་སེམས་སྔོན་དུ་སོང་ནས། བྱང་ཆུབ་སེམས། ཡི་དམ་ལྷ། བླ་མ། ཕྱག་ཆེན། བསྔོ་བ། ལྔ་ལྡན་ཉམས་སུ་ལེན་པ་ལ། ཐུན་འདིའི་ནང་དུ་ལུས་ངག་ཡིད་གསུམ་དགེ་བ་ལ་བཀོལ་ཞེས་ཞེ་ཐག་པ་ནས་བསྒོམ། རང་ཉིད་སྐད་ཅིག་གིས་འཁོར་ལོ་སྡོམ་པ་ཡུམ་ལ་མཉམ་པར་སྦྱོར་བ། རྣམ་པ་གསལ་ཞིང་ང་རྒྱལ་བརྟན་པོ་བསྒོམ། སྤྱི་གཙུག་ཏུ་པདྨ་ཟླ་ཉིའི་གདན་ལ། རྡོ་རྗེ་འཆང་སྐྱབས་གནས་ཐམས་ཅད་འདུས་པའི་ངོ་བོ། སེམས་ཅན་ཐམས་ཅད་བླ་མ་རིན་པོ་ཆེ་ལ་གསོལ་བ་འདེབས་སོ། །ཞེས་གསོལ་བ་བཏབ། མཐར་རང་ལ་ཐིམ། སྐུ་གསུང་ཐུགས་ལུས་ངག་ཡིད་གསུམ་འདྲེས་པའི་ངང་ལ༑ གང་ལ་ཡང་མི་སེམས་བྱིང་རྒོད་བྲལ་བཞིན་པའི་ངང་ནས་གང་དུའང་མི་འཕྲོ་བར་གསལ་ལེ། རྗེ་ནེ་བཞག །བསྔོ་བས་རྒྱས་བཏབ་བོ། །གནད་ལྔ་ཀུན༵་བསྡོམས་དག༵འ་བསྐྱེད་པའི། །གྲོལ༵་བ་མཆོ༵ག་སྟོན་ཐར་པའི་ལམ༑ ༑ཐབས་ཤེས་ཟུང་འབྲེལ་ཉམས་ལེན་གནད། །ཡི་གེར་རྣམ་པར་སྤེལ་བའོ། །སྤྱན་སྔ་བའི་ཁྲིད་ཡིག་ལས་བཏུས་སོ། (༨༤) །ཕྱག་རྒྱ་ཆེན་པོ་ཡི་གེ་བཞི་པའི་ཁྲིད་ཡིག །ཕྱག་རྒྱ་ཆེན་པོ་ཡི་གེ་བཞི་པའི་ཁྲིད་ནི། སྐྱབས་སེམས་སྔོན་དུ་སོང་ནས། གཞི་རྩ་བཅད། བཞག་ཐབས་བསྟན། གོལ་ས་བཅད། ལམ་འཁྱེར་སྟོན་ཏེ། སེམས་དང་པོ་བྱུང་ས་མེད། ཡེ་སྟོང་རྩ་བྲལ། བར་དུ་གནས་པ་མེད། འགྱུ་བ་འགྱུ་ས་སྟོང༌། ཐ་མ་འགྲོ་ས་མེད། འགྱུ་བ་རང་གྲོལ་ཅིར་ཡང་མ་འགགས་ལ་ཅིར་ཡང་མ་གྲུབ་པ། འཁོར་བའི་སྐྱོན་གྱིས་མ་གོས་པ། ཡེ་ནས་སངས་རྒྱས་ཡིན། བཞག་ཐབས་དྲུག་སྟེ། ལུས་རྣམ་སྣང་ཆོས་བདུན་བྱ། ཁྱུང་ཆེན་ནམ་མཁའ་ལ་ལྡིང་བ་བཞིན་དུ་མ་བཅོས་གཉུག་མའི་ངང་ལ་རྩོལ་སྒྲུབ་མེད་པར་བཞག །རྒྱ་མཚོ་རླབས་དང་བྲལ་བ་བཞིན་དུ་སེམས་གཡོ་འགུལ་མེད་པའི་ངང་ལ་བཞག །ཉི་མ་སྤྲིན་དང་བྲལ་བ་བཞིན་དུ་ཀུན་གསལ་མདངས་དང་ལྡན་པར་མཉམ་པར་བཞག །བུ་ཆུང་ལྷ་ཁང་ལྟ་བ་བཞིན་དུ་གསལ་ཆ་མ་འགགས་ལ་འཛིན་ཆ་མེད་པར་བཞག །ཆུའི་རྦ་རླབས་བཞིན་དུ་བྱུང་ཚོར་ཐམས་ཅད་སེམས་སུ་ཤེས་པར་བྱས་ལ་བཞག །ནམ་མཁའ་ལ་བྱ་འཕུར་བ་བཞིན་རིག་པ་རྗེས་མེད་བཞག །གོལ་ས་བཅད་པ། ཡར་སངས་རྒྱས་ལ་མི་རེ། མར་འཁོར་བ་ལ་མི་དོགས། བར་སྣང་བ་ལ་མི་ཞེན། ཡིད་ལ་བྱར་མེད་པར་ཁོ་ཐག་བཅད། ༈ ལམ་འཁྱེར་བསྟན་པ། རྒྱུན་གྱི་རྣལ་འབྱོར་དྲུག་སྟེ་ཉིན་མོ་སྣང་བ་རྒྱས་གདབ་པའི་རྣལ་འབྱོར། ནང་ནུབ་འདོད་ཡོན་གྲོགས་སུ་འཁྱེར་བའི་རྣལ་འབྱོར། སྲོད་ལ་དབང་པོ་བཞི་ལ་བསྡུ་བའི་རྣལ་འབྱོར། ནམ་གུང་ཤེས་བྱ་བུམ་པར་གཞུག་པའི་རྣལ་འབྱོར། ཐོ་རངས་རིག་པ་གསལ་ཆར་བཏབ་པའི་རྣལ་འབྱོར། འཆི་ཁར་ཡེ་ཤེས་ཟང་ཐལ་དུ་བཏང་བའི་རྣལ་འབྱོར་རོ། །ཨ་མ་ན་སི་ཡི་གེ་བཞི། །ཀུན༵་ཏུ་ཡིད་དག༵འ་འཆིང་གྲོལ༵་མཆོ༵ག །གཞི་རྩ་གཞག་ཐབས་གོལ་ས་བཅད། །ལམ་འཁྱེར་སྟོན་ཚུལ་ཡི་གེར་བཀོད། །གཡག་སྡེ་པཎ་ཆེན་གྱི་ཁྲིད་ཡིག་ལས་བཏུས་སོ། (༨༥) །སྐུ་གསུམ་ངོ་སྤྲོད་ཀྱི་ཁྲིད་ཡིག །སྐུ་གསུམ་ངོ་སྤྲོད་ཀྱི་ཁྲིད་ནི། སྐྱབས་སེམས་སྔོན་དུ་སོང་ནས། རང་ཉིད་སེང་ཁྲི་པདྨ་དང་ཟླ་བའི་གདན་ཁྲིའི་ཟུར་བཞི་ནས་ཚངས་པ། དབང་པོ། ཉེ་དབང༌། དྲག་པོ་བཞིས་འཕྲུལ་འདེགས་ཀྱི་ཚུལ་དུ་མགོས་འདུད་པ། ལྷ་རྫས་གོས་དང་ནོར་བུའི་ཕྲ་བཀོད་ཀྱིས་སྤྲས་པའི་སྟེང་ན། ཐུབ་པའི་དབང་པོ་གསེར་མདོག་མཚན་དཔེའི་རྒྱན་ཅན། ཆོས་གོས་རྣམ་གསུམ་གསོལ་བ། ས་གནོན་མཉམ་བཞག །རྡོ་རྗེ་སྐྱིལ་ཀྲུང་གིས་བཞུགས་པའི་དབུའི་གཙུག་ཏོར་ནས་བརྩམས། དཔྲལ་བའི་མཛོད་སྤུ། ཐུགས་དཔལ་བེའུ། སྐུའི་ཁྱོན་ཐམས་ཅད་ནས་སངས་རྒྱས་སྟོང་མ་འདྲེས་པར་གསལ་བའི་བདག་ཉིད་སྐྲ་ཙམ་ཁྱོན་ལ་དུས་གསུམ་སྙེད་དུ་བཞུགས་པའི་སྐུ་ལས་འོད་ཟེར་སྤྲོས། སྣོད་དག་པའི་ཞིང༌། བཅུད་རྒྱལ་བའི་སྐུར་གྱུར་པ་རྣམས་རང་གི་བ་སྤུའི་སྒོ་བྱེ་བ་ཕྲག་བརྒྱ་ནས་ཞུགས་པས་སྤྲུལ་སྐུ་མཐོང་ཐོས་དྲན་རེག་གི་འགྲོ་བའི་དཔལ་མགོན་དུ་བསམས་པ་ནི། སྤྲུལ་སྐུ་རང་བཞིན་ལྷུན་གྲུབ་ངོ་སྤྲོད་ཡིན་ཞིང༌། ཡང་སེང་ཁྲི་པད་ཟླའི་གདན་ལ་རང་ཉིད་སྤྱན་རས་གཟིགས་ལོངས་སྤྱོད་རྫོགས་པའི་རྣམ་པ་ཅན། ཞལ་གཅིག་ཕྱག་བཞི་པ། དང་པོ་མཉམ་སྦྱོར། གཡས་ཤེལ་ཕྲེང༌། གཡོན་པདྨ། ཞབས་རྡོ་རྗེ་སྐྱིལ་ཀྲུང༌། རལ་པའི་ཅོད་པན་མདུན་ན་འོད་དཔག་མེད། རི་དྭགས་ལྤགས་པའི་སྟོད་གཡོགས། གངས་རི་ལ་ཉི་མ་ཤར་འདྲའི་བ་སྤུའི་སྒོ་རྣམས་སངས་རྒྱས་བྱང་སེམས་ཀྱིས་གང་བ་ལས་འོད་ཟེར་འཕྲོས། སྣོད་བཅུད་སྦྱངས། ལོངས་སྐུ་ངེས་པ་ལྔ་ལྡན་དུ་གྱུར་པར་བསམས་པ་ལོངས་སྐུ་ངོ་སྤྲོད་ཡིན་ལ། ཡང་བདག་ཉིད་གདན་ཁྲི་ཕུན་སུམ་ཚོགས་པའི་སྟེང་ན། ཆོས་སྐུ་རྡོ་རྗེ་འཆང་ནམ་མཁའ་ལ་སྤྲིན་གྱིས་མ་གོས་པ་ལྟར་སྔོ་སངས། ཞལ་གཅིག་ཕྱག་གཉིས་རྡོ་རྗེ་དང་དྲིལ་བུ་ཐུགས་ཀར་བསྣོལ་ནས་འཛིན་པ། ཞབས་རྡོ་རྗེ་སྐྱིལ་ཀྲུང་མཚན་དཔེ་གསལ་རྫོགས། དར་དང་རིན་པོ་ཆེའི་རྒྱན་ཅན་གྱི་སྐུའི་ཆ་ཤས་མ་ལུས་པ་རྒྱུད་སྡེ་བཞིའི་དཀྱིལ་འཁོར་གྱིས་གཏམས་པ་ལས་འོད་ཟེར་སྤྲོ་བསྡུས་སྣོད་བཅུད་སྦྱངས་ལ་རང་ལ་བསྡུ། རང་སྣང་ཡང་འོད་གསལ་བདེ་བའི་ངང་དུ་ཐིམ་ནས། ཆོས་ཟད་མཐར་འཁྱོལ་བ། སྨྲ་བསམ་བརྗོད་མེད་ཟབ་ཞི་སྤྲོས་བྲལ་བློས་མ་བྱས་པའི་རང་བབས་ལ་ཅམ་འཇོག་པ་ནི་ཆོས་སྐུ་གདོད་མའི་ངོ་སྤྲོད་དོ༑ ༑ཕུལླ་ཧ་རིའི་གདམས་པ་ཀུན༵། །རྫོགས་མཐར་དག༵འ་བར་བསྐྱེད་པའི་གསུང༌། །རང་གྲོལ༵་ནཱ་རོས་སྩལ་བའི་ཆོས། །མཆོ༵ག་གྱུར་ཡི་གེས་མཚོན་འདིའོ། །རྗེ་རང་བྱུང་བའི་ཁྲིད་ཡིག་ལས་བཏུས་སོ། (༨༦) །རླུང་སེམས་གཉིས་མེད་ཀྱི་ཁྲིད་ཡིག །རླུང་སེམས་གཉིས་མེད་ཀྱི་ཁྲིད་ནི། སྐྱབས་སེམས་སྔོན་དུ་སོང་ནས། བསྐྱེད་རིམ་རླུང་སེམས་དབྱེར་མེད། རླུང་སེམས་ཐ་དད་སྤངས་པའི་རང་སྣང་ལྷ་སྐུ་བདེ་བའི་རང་ཉམས་ལྷན་ཅིག་སྐྱེས་མ་ལ་དྲན་པ་ཡེངས་མེད་དུ་སྐྱོང་ཞིང་མཉམ་རྗེས་མེད་པར་ནང་གི་ལྷན་ཅིག་སྐྱེས་མ་ལྟེ་བའི་ཨ་ཐུང་འབར་བ་མེའི་གོས་ཅན་ཙཎྜ་ལཱི་རླུང་གི་སྲོག་སྒྲུབ་ཡིན་པའི་ངེས་ཤེས་ཀྱིས་རླུང་སེམས་གྲུབ་སྡེ་གཅིག་པ་སྐྱེས་བུ་རྟ་ཞོན་གྱི་དཔེས་རླུང་ཟིན། ནམ་ཟིན་པ་ན་སྐད་ཅིག་ལ་སེམས་ཉིད་གདོད་མའི་རང་བབས་གསལ་ལེ་གནས་ཆ་བསྐྱང༌། མེ་སྣང་དང་གནས་ཆ་བསྲེ། གང་ཤར་སྒྱུ་ལུས་རླུང་སེམས་དབྱེར་མེད་ཀྱི་ངང་མ་ལོག་པའི་སྣང་སྟོང་ཞེན་བྲལ། ན་ནུས་འཆི་ནུས་གང་ལའང་མི་ཞུམ་པའི་གུ་ཡངས། བློ་བདེ་བླ་མའི་གདུང་ཤུགས་གཅིག་པུ་ལམ་གྱི་སྲོག་ཏུ་ཡིད་ཆེས་བསྐྱེད་ཅིང༌། འཆི་ཁར་འཕོ་བ་རླུང་སེམས་གཉིས་མེད། གསང་གནས་ནས་ཡར་རླུང་སེམས་འདྲེས་པའི་ཐིག་ལེ་སྔོན་དམར་སྲན་མ་ཙམ་གཅིག་དབུ་མའི་གཞུང་ལམ་ནས་ཐལ་གྱིས་ཚངས་པའི་བུ་ག་ནས་ཏོག་གིས་སྤར། གནས་ལུགས་ངང་དུ་འཇོག་པའོ། །རླུང་སེམས་ཀུན༵་ཏུ་རོ་གཅིག་པ། །ཐ་དད་མི་འཛིན་རང་དག༵འི་བློས། །རང་གྲོལ༵་ཕྱག་རྒྱ་ཆེན་པོའི་དབྱིངས། །མཆོ༵ག་ཏུ་ཞལ་སྟོན་ཡི་གེའོ། །ལྷ་གཟིགས་རས་པའི་ཁྲིད་ལས་བཏུས་སོ། (༨༧) །སྲས་མཁར་མའི་ཁྲིད་ཡིག །སྲས་མཁར་མའི་ཁྲིད་ནི། སྐྱབས་སེམས་སྔོན་དུ་སོང་ནས། ཤོག་དྲིལ་བཅོ་ལྔ་སྒོམ་པ་ལྷ་སྐོར་དང༌། བཀའ་སྲུང་ཁོལ་པོ་དར་ཐོད་ཅན་སོགས་བཞག་རྗེས། དམིགས་པའི་སྙིང་པོ་དུས་གསུམ་ཞལ་བསྒྱུར་ལ། དུག་ལྔ་ཡེ་ཤེས་ལྔའི་ངོ་བོ་རྒྱལ་བ་རིགས་ལྔར་ཞལ་བསྒྱུར་བ་སྟེ། ཞེ་སྡང་ནག་ཐོམ་སྐྱེས་པའི་སྐབས་སུ་འགྱུར་མེད་ཆོས་ཀྱི་དབྱིངས་ཀྱི་ཡེ་ཤེས་མི་བསྐྱོད་པ་ཀྲང་བྱོན་པ་ངེས་པས། ཞེ་སྡང་གི་ལས་ལ་མི་འཇུག །ཞུགས་ན་རྒྱལ་བུ་ཕ་དང་བྲལ། ཞེ་སྡང་གཉེན་པོས་མི་གནོན། མནན་ན་རྒྱལ་བུ་དབུ་འཕང་སྨད་པ་ཡིན། ཞེ་སྡང་དུ་སྣང་བའི་རང་ངོ༌། གྲ་མ་ཆགས་ཟུར་མ་ཉམས་པ་ཨམ་སོར་རེ་བ་དེ་ལ་ཞེ་སྡང་རྡོ་རྗེའི་མཚན་བཞག་ཅིང༌། ཞེ་སྡང་མ་སྤངས་གནས་དག་ཕྱག་རྒྱ་ཆེན་པོ་སྟེ། ཞེ་སྡང་རྡོ་རྗེའི་ཤོག་དྲིལ་བསྒོམ། དོན་དེས་རིགས་བསྒྲེས་ལ་ང་རྒྱལ་མཉམ་ཉིད་ཡེ་ཤེས། སེར་སྣ་རིན་འབྱུང༌། འདོད་ཆགས་སོར་རྟོག །ཕྲག་དོག་བྱ་གྲུབ། གཏི་མུག་མེ་ལོང་ཡེ་ཤེས་སུ་དག །གོང་གི་རིགས་པས་ཉམས་སུ་བླངས་ཤིང༌། དུག་ལྔའི་ཤོག་དྲིལ་སོ་སོར་ལག་ལེན་ཁྲིགས་བཀོད་ཡིན་ལ། ཆོས་དྲུག་གི་མཇུག་ན། འཕོ་བ་གྲོང་འཇུག་གི་གནད། ཐོད་པ་མཚན་ལྡན་ནང་སྣག་ཚས་བྱུག་ལ་ནག་སིང་བ་བྱས་པའི་དཀྱིལ་དྲང་ཐད་དུ། ཡི་དམ་ལྷའི་ས་བོན་ཧཱུྃ་ཡིག་དཀར་སེང་བ་གཅིག་བྲིས་ལ། མཁའ་འགྲོ་མ་འདུ་བའི་དུས་བཟང་ལ་མཚམས་བཅད་ལ། ཚོགས་འཁོར་སྤྱི་དང་ཁྱད་པར་ཨཽ་རྒྱན་གྱི་མཁའ་འགྲོ་ཟ་བྱེད་ལས་ཀྱི་མཁའ་འགྲོ་མ་ལ། མི་ཤས་བརྒྱན་པའི་གཏོར་མ། ཚིལ་ཆེན་གྱི་སྤོས། ཞུན་ཆེན་གྱི་སྒྲོན་མེའི་དམ་རྫས་གསུམ་ནི་མེད་མི་རུང་བས། གོང་དུ་འདུ་བྱས་ལ་མཆོད་པར་འབུལ་ཞིང༌། རང་ཉིད་བདེ་ཀྱེ་གང་མོས་ཀྱི་ལྷན་སྐྱེས་སུ་བསྒོམ་ཞིང༌། ཧྲཱིཿ ཧ་ཧའམ་དེ་ཝ་པི་ཙུ་གང་ནུས་བགྲང༌། མིས་དབེན་པའི་སྤྱིལ་བུར་སྔ་དྲོ་ཁ་ནུབ། དགོངས་ཀ་ཁ་ཤར་དུ་བལྟས་ལ་རང་གི་མདུན་དང་ཉེ་བར་ཐོད་པ་སྟེགས་བཅས་བཞག་ལ། དེའི་ནང་གི་ཧཱུྃ་ཡིག་ལ་མིག་ལྟ་སྟངས་གཅུན། སེམས་མ་ཡེངས་པར་བཞག་པས་རང་གི་བསགས་རྒྱབ་དང་བསྟུན་པའི་ཞག་མང་ཉུང་ཅི་རིགས་ནས་ཐོད་ནང་ཧཱུྃ་ལས་འོད་འཕྲོ་བ། དུད་པ་འཐུལ་བ། འདར་བ། འགུལ་བ་སོགས་བྱུང་ན་འགྲུབ་པའི་མཚན་མ་ཡིན་པས། ཐོད་པ་དར་ཟབ་ཀྱིས་གྲིལ་ལ་བཀུར་སྟི་བྱ། གཏོར་མ་ནུབ་ཕྱོགས་སུ་བཏང་ལ་ལས་ཀྱི་རྗེས་མི་མངོན་པར་བྱས་ཏེ་ཉམས་སད་པའི་ཕྱིར་སྦྲང་བུ་ཚོད་ནང་དུ་ཤོར་ནས་ཤི་འཕྲལ་གྱི་རོ་ལག་མཐིལ་དུ་བཞག་ནས། ལྷ་བསྒོམ་སྔགས་བཟླ། སྔར་གྱི་རང་རིག་ཧཱུྃ་ལ་གཏོད་པའི་ཚུལ་རོ་ལ་གཏད་པས་ཟིར་ཅེས་སྒྲ་འབྱིན་ཞིང་འདར་འདར་ཤིག་ཤིག་ངང་ནས་འཕུར་སོང་ན། དེ་ལྟར་ལན་ཅིག་ལན་གཉིས་མིན་པར་སྦྱངས་ན་དོན་འགྲུབ་ཅིང༌། སྔོན་རྗེ་མར་པས་ཕུག་རོན་ལུ་གུ་སོགས་ལ་གྲོང་འཇུག་པར་མཛད་པ་གྲུབ་ཐོབ་ཀྱི་རྣམ་འཕྲུལ་ཡིན་ལ། གཞན་དུད་འགྲོ་ལ་འཕོ་ནུས་ཀྱང་སླར་ལོག་དཀའ་བས་ཚོད་ཟིན་པ་ནི་གཅེས་སོ། །སྲས་སློབ་ཀུན༵་ལ་གསང་ཆོས་འགའ། །དག༵འ་བར་གདམས་པའི་ཤོག་དྲིལ་རྣམས། །ཆོས་དབང་རྣམ་གྲོལ༵་མཆོ༵ག་བརྙེས་ལས། །སྙིང་པོར་གྱུར་དག་བཀོལ་ནས་བྲིས། །གཏེར་ཡིག་ནང་ནས་བཀོལ་ནས་བྲིས་སོ། (༨༨) །རྔོག་པའི་བསྲེ་འཕོའི་ཁྲིད་ཡིག །རྔོག་པའི་བསྲེ་འཕོའི་ཁྲིད་ནི། སྐྱབས་སེམས་སྔོན་དུ་སོང་ནས། འདོད་ཆགས་དབང་གི་ཡེ་ཤེས་དང༌། ཞེ་སྡང་བསྐྱེད་རྫོགས་དང༌། གཏི་མུག་འོད་གསལ་དང་བསྲེ་བའི་གནད་ཀྱིས་འཁོར་བའི་རྩ་བ་དུག་གསུམ་མ་སྤངས་པའི་གནད་དག་གི་ཉམས་ལེན་ལ། གདོད་མའི་གནས་ལུགས་སེམས་ཅན་ཐམས་ཅད་ལ་རང་བཞིན་གྱི་འོད་གསལ་ཆོས་སྐུ། བར་དོ་ལོངས་སྐུ། སྐྱེ་བ་སྤྲུལ་སྐུའོ། །སྣང་ཚུལ་སྐྱེ་ཤིའི་བར་ན་རྣམ་སྨིན་གྱི་ལུས། གཉིད་དང་སད་པའི་བར་ན་བག་ཆགས་ཀྱི་ལུས། སྲིད་པ་འགག་པ་དང་སྐྱེ་བའི་བར་ན་ཡིད་ཀྱི་ལུས་སུ་གནས་སོ། །འཁྲུལ་ཚུལ་ལ། སྐྱེ་ཤི་བར་དོ་སྣང་བ། རྨི་ལམ་བར་དོ་བག་ཆགས། སྲིད་པ་བར་དོ་ལས་ཀྱི་འཁྲུལ་པའོ། །གྲོལ་ཚུལ་ལ། རབ་འོད་གསལ་གཉིས་འདྲེས་འཆི་ཁར། འབྲིང་སྒྱུ་མ་གསུམ་བརྒྱུད་དུ་བར་དོ། །ཐ་མ་སྐྱེ་གནས་ཕྱག་རྒྱ་ཆེན་པོར་གྲོལ་ལོ། །ལམ་དུ་སློང་ཚུལ་ནི། ཉིན་སྣང་བསྐྱེད་རིམ་བདེ་གསལ། མཚན་མོ་གཉིད་ཀྱི་འོད་གསལ། བར་དོ་འདུན་པ་ལ་ལམ་སྦྱོང་ངོ༌། །མངོན་དུ་བྱ་ཚུལ་ནི། དབང་གི་ཡུལ་བླ་མ་ཡབ་ཡུམ་མཉམ་སྦྱོར་གྱིས་འདོད་ཆགས་སྦྱང༌། དེའི་སྣང་བས་སྲིད་པ་ཉེར་ལེན་ཕ་མའི་ཞེ་སྡང་སྦྱོང་ཞིང༌། མ་རིག་ཀུན་ལྡན་གཏི་མུག་རང་རིག་རང་གསལ་གྱི་སྒྲོན་མེས་སྦྱངས་ལ་བསྲེ་བའི་གནད་ནས་གཟུང༌། འཆི་ཚེ་རབ་འོད་གསལ། འབྲིང་སྒྱུ་ལུས། ཐ་མས་སྐྱེ་འཛིན་དུ་འཕོ་སྟེ། རྣལ་འབྱོར་གོམས་སྟོབས་ཀྱིས་གཞིའི་འོད་གསལ་རང་ངོ་ཤེས་ན་སྔར་འདྲིས་མི་དང་འཕྲད་ཚུལ། སྒྱུ་འདྲའི་སྣང་བ་གང་མོས་དག་པའི་ཞིང་དུ། ཆོས་བཞིན་སྤྱོད་པའི་ཕ་མ་རིགས་བཟང་གི་མངལ་སྒོར་འཕོ་བ་སྟེ། བཀའ་བཞི་གདམས་པ་བསྲེ་འཕོ་སྐོར་སྙན་བརྒྱུད་ཀྱི་གནད་འདོམས་ཀྱང་དེ་ཉིད་དོ། །བཀའ་བཞི་ཀུན༵་གྱི་གདམས་པའི་གནད། །དག༵འ་བཞི་འདུས་པའི་གྲོལ༵་ལམ་མཆོ༵ག །རྔོག་བརྒྱུད་གསུང་གི་བདུད་རྩི་ཡི། །སྙིང་པོ་གཅིག་དྲིལ་ཡི་གེ་ཡིན། །རྔོག་ཞེ་སྡང་རྡོ་རྗེའི་ཁྲིད་དཔེ་ལས་བཏུས་སོ། (༨༩) །སྙན་གྱི་ཤོག་དྲིལ་བཞིའི་ཁྲིད་ཡིག །སྙན་གྱི་ཤོག་དྲིལ་བཞིའི་ཁྲིད་ནི། སྐྱབས་སེམས་སྔོན་དུ་སོང་ནས། ཤོག་དྲིལ་དང་པོ་དགྱེས་པ་རྡོ་རྗེའི་རྒྱུད་དོན་མཐར་ཐུག་ནི། ནཱ་རོ་པའི་ཞལ་གདམས་ཉིང་ཁུར་གྱུར་པ༑ སེམས་ཅན་གྱི་ས་ནས་སངས་རྒྱས་ཀྱི་བར་ཅིས་འགྲོ་ན་ཨས་འགྲོ། གནས་ལྟེ་བ་ནས་རྩ་དབུ་མའི་ལམ་ལ་བརྒྱུད་དེ་འགྲོ། ཐབས་རླུང་སྲོག་རྩོལ་གྱི་ཉེ་ལམ་ལ་བརྟེན་ནས་འགྲོ་སྟེ། རང་ལུས་ལྷར་གསལ་བའི་ལྟེ་བར་སེམས་ཉིད་རིག་པའི་ངོ་བོ་ཨ་ཁྲོན་གཏིང་ཟླ་བ་ལྟ་བུ་གཅིག་བསྒོམས་ལ་སྣ་བུག་ནས་སྲོག་རྩོལ་གྱི་རླུང་གིས་ལམ་བཙལ་ཏེ། མཐར་དབུ་མའི་ནང་ནས་ཡར་སྐར་མདའ་ལྟར་ཐལ་མར་བྱུང་ཞིང༌། སྤྱི་བོར་ཨ་མི་དམིགས་པ་གནས་ལུགས་ཕྱག་རྒྱ་ཆེན་པོ་ལ་འཇོག་པ་དང་གཅིག །ཤོག་དྲིལ་གཉིས་པ་གསང་བ་འདུས་པའི་རྒྱུད་དོན་མཐར་ཐུག་ནི། དཔལ་ཡེ་ཤེས་སྙིང་པོའི་ཞལ་གདམས་ཉིང་ཁུར་གྱུར་པ། སྣང་བ་སྒྱུ་མ། དྲན་རིག་འོད་གསལ་སེམས་གསུམ་སྟོང་པར་ཕེབས་པ་སྟེ། སྣོད་བཅུད་སྒྱུ་འདྲ་རྨི་ལམ་བཞིན། དྲན་རིག་སྐྱེ་མེད་འོད་གསལ་དང༌། སྣང་མཆེད་ཐོབ་གསུམ་རང་ཉམས་ལ། འཁྲུལ་པའི་ཡིད་ཆེས་རྙེད་པ་ཞིག་ཡིན། ཤོག་དྲིལ་གསུམ་པ། མ་ཧཱ་མཱ་ཡའི་རྒྱུད་དོན་མཐར་ཐུག །ཀུ་ཀུ་རི་པའི་ཞལ་གདམས་ཉིང་ཁུར་གྱུར་པ་ནི། སྤྲོས་པ་གཅོད་པ། འགྲོ་འོང་རང་གྲོལ་ངོ་བོ་འགྱུར་མེད་ལ་བློས་བྱས་ཀྱི་སྤྲོས་ཚོགས་བཅད་པས། གཟུང་འཛིན་འགྲོ་འོང་བྲལ་ནས། དོན་ལྷན་སྐྱེས་དབུ་མར་ཚུད་དེ་རིག་པ་ཆོས་སྐུར་སངས་རྒྱས་པ་ཉིད་དོ། །ཤོག་དྲིལ་བཞི་པ་རྡོ་རྗེ་གདན་བཞིའི་རྒྱུད་དོན་མཐར་ཐུག་ནི། རྣལ་འབྱོར་མ་ཆུ་ཤིང་སྙེ་མ་ཅན་གྱི་ཞལ་གདམས་ཉིང་ཁུར་གྱུར་པ། རྣལ་འབྱོར་པས་འཆི་བའི་དུས་ཐེབས་པ། འཕྲལ་ཡིད་ཆེས་ཀྱི་རྟགས་ཐོན་པ། འཆི་ཁར་སངས་རྒྱས་པ་ལ་ཐེ་ཚོམ་མེད་པ་སྟེ། ཕྱི་ནང་འཆི་ལྟས་སྤྱི་དང༌། ཁྱད་པར་བྲག་ཕུག་གསང་བའི་འདུ་གནས་སུ་མ་མཁའ་འགྲོའི་རང་སྒྲ་ཡལ་ངེས་ནས་ཞག་བདུན་ལས་མི་འདའ་ངེས་པས་དུས་བཏབ་བྱ། ཀླུ་དབང་འཁྱིལ་བའི་རྩ་གནས་ལྟེ་བའི་གྲོང་ཁྱེར་ནས་རིག་པའི་ཁྱེའུ་ཆུང་འཕུར་ཏེ། ཡང་དག་དབུ་མའི་ལམ་ཆེན་ནས་ཞུགས། མགྲིན་པའི་གོང་ཙམ་དུ་ཨེན་ཙམ་ངལ་གསོ། རྟེན་ལ་ཕྱི་རླུང་སྣ་སྒོ་གཉིས་ཀ་ནས་དྲག་ཏུ་རྔུབས་ཏེ་ཐུར་དུ་མི་གནོན་པར་སྟེང་དུ་གཅུན། མིག་འབྲས་གྱེན་ལ་བཟློག །ལྷག་པར་ལྟག་པ་དགྱེད་པར་བྱས་ལ་ལག་པའི་སོར་མོས་མནན་ཅིང་རླུང་གྱེན་དུ་འཕུལ་ལ་རིག་པ་གཏད་པས་ཚངས་སྒོ་གཡའ་ཚ་འཁྱུགས་པ་མཐར་ནི་ངང་སྒོང་ཙམ་འབུར་ཡོང་བ་དེ་ལ་འཇག་མ་གཙུགས་ཏེ་ཡིད་ཆེས་སྒྲུབ་ཅིང༌། དེ་འདྲའི་རྣལ་འབྱོར་པ་འཆི་ཁར་ཡེ་ཤེས་ཟང་ཐལ་དུ་སྡིག་སྒྲིབ་ཀྱིས་མི་གོས་པར་སངས་རྒྱས་པ་ཡིན་གསུང་ངོ༌། །མར་པའི་སྙན་གྱི་ཤོག་དྲིལ་ལས། །མཐར་ཐུག་བཞིའི་གདམས་པ་ཀུན༵། །དག༵འ་བའི་གླུ་ལེན་མཚུར་དབང་ལ། །རྣམ་གྲོལ༵་མཆོ༵ག་སྦྱིན་ཡི་གེའོ། །མཚུར་དབང་གི་རྡོ་རྗེའི་ཡིག་རྙིང་ལས་བཏུས་སོ། (༩༠) །སྦྱོར་དྲུག་གི་ཁྲིད་ཡིག །སྦྱོར་དྲུག་གི་ཁྲིད་ནི། སྐྱབས་སེམས་སྔོན་དུ་སོང་ནས། མུན་ཁང་དང་སྟེགས་བུ་སོགས་ཚགས་སུ་ཚུད་པར་བྱས་ལ། སྐྱིལ་ཀྲུང་ཕལ་བ་དང་ལག་པ་གཉིས་ས་གནོན་བྱས་ནས། རླུང་གི་དུག་དབྱུང་བ་ཅི་རིགས་གྲུབ་པའི་རྗེས་སུ། ལུས་གནད་རྡོ་རྗེ་སྐྱིལ་ཀྲུང༌། ལག་གཉིས་ཁུ་ཚུར་གན་རྐྱལ་ལམ། ཁ་སྦུབ་བརླའི་རྩ་བར་བཀོད་ཅིང༌། ལག་ངར་གཉིས་དྲང་པོར་བྱས་པ་རྩིབ་ལོགས་སུ་སྦྱར་བ་དང་ལྷན་ཅིག་ཏུ་རྒལ་ཚིགས་དྲང་པོར་བསྲང་བའམ། དེ་ལྟར་མ་ནུས་ན་སེམས་སྐྱིལ་དང༌། མཉམ་གཞག་གི་ཕྱག་རྒྱ་བྱས་ལ། རོ་སྟོད་རྒྱབ་ཏུ་དགྱེ་ཞིང་མགྲིན་པ་ཅུང་ཟད་སྒུར་ཀོས་ཀོས་ཨོལ་མདུད་ནོན་ཙམ། ལྕེ་རྐན་ལ་སྦྱར། མཆུ་རང་བབས་སུ་བཞག་པ་སྟེ། ལུས་གནད་མདུན་རྒྱབ་གཡས་གཡོན་ཡོ་འཁྱུགས་མེད་པར་བཅོས་ཏེ། ལྟ་སྟངས་སྣ་རྩེ་ནས་སོར་བཅུ་དྲུག་གི་ནམ་མཁར་གཡོ་བ་མེད་པར་རྩེ་གཅིག་ཏུ་གཏད་ལ། སེམས་འདས་མ་འོངས་ཀྱི་རྟོག་པའི་རྗེས་བཅད་སྔོན་བསུ་མེད་ཅིང་ད་ལྟ་བའི་ཤེས་པ་ལའང་འཕྲོ་གཞིག་མི་བྱ་བར་མི་རྟོག་པའི་ངང་ལ་བཞག་གོ །དེ་ལྟར་ལུས་ངག་ཡིད་དབེན་པ་གསུམ་ལ་གནས་པ་ནི། ལྟོས་མེད་བཞི་ལས། ལུས་ཀྱི་ལོངས་སྤྱོད་ལ་ལྟོས་པ་མེད་པ་དང༌། ངག་གི་ལོངས་སྤྱོད་ལ་ལྟོས་པ་མེད་པ་དང༌། སེམས་ཀྱི་ལོངས་སྤྱོད་ལ་ལྟོས་པ་མེད་པའི་དོན་ནོ། །སོ་སོར་སྡུད་པ་ནི། ས་རླུང་རྒྱུ་དུས་ངེས་པར་བྱས་ནས་སམ། སྣ་བུག་གཡས་ཀྱི་རླུང་སྡུད་རིམ་གྱིས་རྒྱུ་བའི་རྟེན་འབྲེལ་གྱིས་ཀྱང་རྣམ་པར་མི་རྟོག་པ་སྐྱེ་བས། དུས་དེའི་ཚེ་བསྒོམ་ཞིང༌། སྲོད་ཐོ་རངས། སྔ་དྲོ་ཕྱི་དྲོ་རྣམས་སུ་བསྒོམ། ཉིན་མཚན་གྱི་གུང་དང༌། དགོང་ཆའི་དུས་སུ་བྱིང་རྒོད་ཀྱི་དུས་ཡིན་པས་ངལ་གསོའོ། །ལུས་གནད་སྔར་བསྟན་པ་ཉིད། རླུང་གི་དུག་དབྱུང་བ་དང་བཅས་པ་བྱས་ནས་ལྟ་སྟངས་ཀྱང་སྨིན་མཚམས་ནས་སོར་བཅུ་དྲུག་གི་ཐད་སོར་གཡོ་མེད་དུ་གཏད། ངག་རླུང་རང་བབས་སུ་བཞག །སེམས་རྣམ་པར་མི་རྟོག་པར་བཞག་པ་གཙོ་བོར་བྱ། དེའི་ཚེ་ཅུང་ཟད་རྟོག་པ་འཕྲོ་ན་ལྟ་སྟངས་ཀྱིས་རིག་པ་གཅུན། ཡིད་མིག་རླུང་གསུམ་རྩེ་གཅིག་ཏུ་གཟིར་ཏེ་རིག་པ་རྩེ་གཅིག་ཏུ་བཞག་པ་གཅེས་སོ། །དེའི་དུས་ཀྱང་རྟོག་པ་ཡུལ་གྱི་སྟེང་དུ་རྒྱུག་ན། འདས་པ་དང༌། མ་འོངས་པ་གཉིས་བཅད་ནས་ད་ལྟ་བའི་ཤེས་པ་མ་བཅོས་པར་འཇོག་གོ །སེམས་ཀྱི་འཇོག་ཐབས་དེ་རྣམས་ཀྱི་གྲིམས་ཆས་ཤེས་པ་ཡེར་བར་གྱུར་ན། བསྒྲིམས་པའི་རྩོལ་བ་བཤིག་ནས་གློད་དེ་འཇོག་མོད་ཀྱི། མ་ཡེངས་པའི་དྲན་པས་ཅུང་ཟད་བྱ་ར་བྱའོ། །ཉིན་མོའི་རྣལ་འབྱོར་ནི། ཤར་ནུབ་ཏུ་ནམ་མཁའ་རྒྱ་ཆེར་སྣང་ལ་གངས་ལ་སོགས་པའི་དཀར་འཚེར་མེད་པར། སྤྲིན་དང་སེར་བུ་མེད་པའི་ཚེ་སྔ་དྲོ་ཁ་ནུབ་ཏུ་ཕྱོགས་ཤིང༌། ཕྱི་དྲོ་ཤར་དུ་ཕྱོགས་པས་ལྟ་སྟངས། ལུས་གནད། སེམས་ཀྱི་འཇོག་ཚུལ་སྔ་མ་ལྟར་བྱའོ། །ཉིན་གུང་ཐུན་མཚམས་བྱ། མན་ངག་རྣལ་འབྱོར་གཉིས་པོ་དེ་དག་གི་དུས་སུ་བྱིང་བ་ཤས་ཆེ་ན། སྐྱིལ་ཀྲུང་ལག་གཉིས་པུས་མོ་ལ་དགབ་པའི་ལུས་གནད་དང་ལྡན་པས་རླུང་ཅུང་ཟད་བཟུང་ནས་ཁ་སྣ་གཉིས་ཆར་ནས་རླུང་ཕྱིར་དྲག་ཏུ་དབྱུང༌། འཕྲོ་རྒོད་ཤས་ཆེ་ན། ལུས་འོད་ཀྱི་གང་བུར་བྱས་ནས། དེ་ཡང་ཇེ་ཆུང་ཇེ་ཕྲར་རིམ་གྱིས་མི་དམིགས་པ་ལ་འཇུག་པས་སེལ་ལོ། །རྣལ་འབྱོར་དེ་དག་ལ་རྩེ་གཅིག་ཏུ་བརྩོན་པར་བྱས་པའི་མཐུས། རླུང་སེམས་རྡོ་རྗེའི་ལམ་ལས་ཨ་ཝ་དྷཱུ་ཏིར་ཞུགས་ནས། འོད་གསལ་བའི་སྣང་བ་རྒྱ་ཆེར་མཐོང་བ་ཡང་མཚན་རྟགས། དུ་བ་དང༌། སྨིག་རྒྱུ་དང༌། མཁའ་སྣང་སྲིན་བུ་མེ་ཁྱེར་གྱི་རྣམ་པ་དང༌། མར་མེ་འབར་བ་ལྟ་བུ་དང་བཞི་འབྱུང༌། ཉིན་རྟགས་མེ་འབར་བའི་རྣམ་པ་སེར་པོ་འབར་བ་དང༌། ཟླ་བ་དང༌། ཉི་མ་དང༌། རྡོ་རྗེ་སྒྲ་གཅན་ཁ་དོག་ནག་པོ་དབྱིབས་དུ་མ་ཅན་དང༌། མཆོག་གི་ཆ་གློག་འགྱུ་བ་ལྟ་བུ་དང༌། ཐིག་ལེ་སྔོན་པོ་སོགས་ཀྱི་སྣང་བརྙན་རྣམ་པ་དྲུག་ཀྱང་འཆར། འདི་དག་ཀྱང་གཙོ་ཆེ་ཆུང་གི་ཉིན་རྟགས་དང་མཚན་རྟགས་སུ་བཞག་མོད་ཀྱི་མ་ངེས་པར་འབྱུང་ངོ༌། །དེ་ལྟར་ཡུན་རིང་དུ་བསྒོམས་པས་ཐིག་ལེ་དེའི་དབུས་སུ་རྣམ་པ་ཀུན་ལྡན་གྱི་མཆོག་དང་ལྡན་པའི་སྟོང་པ་ཉིད་གཟུགས་སུ་སྣང་བར་འགྱུར་རོ། །གཞོམ་དུ་མེད་པའི་སྒྲ་བརྙན་ནས་རེག་བརྙན་གྱི་བར་ཉམས་སུ་མྱོང་ངོ༌། །དེ་ལྟར་རྣམ་པའི་རྟགས་སྣང་འབྱུང་བའི་རྒྱུ་མཚན་ནི། བསྡུ་རིམ་དང་བསྐྱེད་རིམ་གྱི་རྒྱུ་བའི་རླུང་དབུ་མར་ཞུགས་པ་ལས་ཡིན་པར་གསུངས་ཀྱང༌། རགས་པའི་འབྱུང་འཇུག་བྱེད་པའི་རླུང་རིམ་པས་ཐིམ་པར་མི་མངོན་བཞིན་དུ་རྟགས་སྣང་ཇི་ལྟར་འཆར་བར་འགྱུར་རོ་སྙམ་ན། དེ་ནི་སེམས་རྣམ་པར་མི་རྟོག་པའི་མཐུས། ཕྲ་བའི་རླུང་རྣམ་ཤེས་ཀྱི་བཞོན་པར་གྱུར་པ་ངག་གི་གཡོ་བ་ལོག་ནས་གཟུང་འཛིན་གྱི་རྣམ་པར་རྟོག་པ་ཅི་ཙམ་འགགས་པ་ལྟར། འབྱུང་བ་ལྔའི་རླུང་རྣམས་རྒྱུ་བ་རིམ་གྱིས་ཐིམ་ཞིང་ཞུགས་པར་དགོངས་ལ། སྟོང་གཟུགས་དེ་མཐོང་བའི་མིག་ཀྱང་ཕལ་པ་ཉིད་མ་ཡིན་པར་ཤའི་མིག་གིས་མཐོང༌། དེ་ཡང་དབང་པོའི་མངོན་སུམ་རྣལ་འབྱོར་པའི་ཡེ་ཤེས་ཀྱི་སྣང་བ་རྟོག་བྲལ་མ་འཁྲུལ་པའི་མངོན་སུམ་དེ་ཉིད་ཉེ་བར་སྟོན་པར་བྱེད་པའི་མཚན་ཉིད་དུ་བཤད་པ་ཁོ་ན་ཡིན་ནོ། །རྟགས་དང་རྟགས་ཅན་དེ་དག་ལ་ངེས་པ་དང༌། ཡང་དག་པར་ངེས་པའི་རྟགས་ཤེས་ཀྱང་གསུངས་ཤིང༌། མ་ངེས་པའི་རྟགས། བུམ་པ། སྣམ་བུ་རེ་ལྡེ་སོགས་སྣ་ཚོགས་པའི་རྣམ་པ། རྨི་ཉམས་དུ་མ་འབྱུང་ལ། སྤུ་རིས་ཕྱེད་པ་ལས་རྟོགས་པར་བྱའོ། །བསམ་གཏན་ཞེས་པའི་དོན་ནི། སྔར་སོར་སྡུད་ཚེ་མཐོང་བའི་སྟོང་གཟུགས་ལ་སེམས་རྩེ་གཅིག་ཏུ་གནས་པར་བྱེད་པ་སྟེ། ཐོག་མར་སྟོང་གཟུགས་སྣ་ཚོགས་ཤར་ཡང་རང་བཞིན་སྟོང་པ་ཉིད་དུ་ཤེས་པ་ཤེས་རབ་དང༌། རྣམ་རྟོག་གཡོ་བར་འགྱུར་ན་སྟོང་གཟུགས་ཀྱང་གཡོ་ཞིང༌། སེམས་མི་འཕྲོ་བའི་དུས་མི་གཡོ་བར་ངེས་པ་ལ། སྟོང་བཞིན་དུ་དངོས་པོའི་རྣམ་པ་ཙམ་འཛིན་པ་རྟོག་པ་དང༌། དེ་ལྟར་སྟོང་གཟུགས་གཅིག་ཏུ་མ་ཟད་གང་སྣང་ཐམས་ཅད་ལ་ཡང་དེ་ཁོ་ན་ལྟར་ངེས་ཤེས་དང་བཅས་སྐྱེ་བ་ནི་དཔྱོད་པ་ཡིན་ལ། ཚུལ་དེས་སྟོང་པ་ཉིད་ཀྱི་གཟུགས་དེ་ལ་སེམས་ཀུན་ཏུ་གནས་པས་ཆགས་པའམ། ཡང་ཡུལ་དེ་ལ་མཚན་མར་འཛིན་པའི་ཆགས་པས་མ་གོས་པར་བྱ་བ་དག་འགལ་མེད་དུ་ཉམས་སུ་བླངས་པས་ཡིད་ལ་དགའ་བ་ཁྱད་པར་ཅན་འབྱུང་ཞིང༌། སྔ་མ་དེ་རྣམས་ལ་ཡང་ཡང་གོམས་པར་བྱས་པས། སེམས་དང་སྟོང་གཟུགས་རོ་གཅིག་ཏུ་འདྲེས་པ་ལྟར་གྱུར་ནས་ལུས་ཤིན་ཏུ་སྦྱངས་པའི་བདེ་བ་སྐྱེ་བ་ལ། གཡོ་མེད་བདེ་བའམ། མི་གཡོ་བའི་བདེ་བ་ཞེས་བྱ་ཞིང༌། ཡན་ལག་ལྔ་ལྡན་ལ་ནན་ཏན་བྱས་པས། སྟོང་གཟུགས་བརྟན་པོར་གྱུར་ཀྱང༌། མིག་བཙུམ་ན་སྟོང་གཟུགས་མི་གསལ་ན་ཉིན་མོའི་རྣལ་འབྱོར་གྱི་དུས་སུ། རྟགས་སྣང་ནམ་མཁར་ཤར་བ་རིམ་གྱིས་ཕབ་སྟེ། ལས་སྣང་གི་དངོས་པོ་གང་རུང་གི་སྟེང་དུ་ལྟ་སྟངས་རྩེ་གཅིག་ཏུ་གཏད་ཅིང་སེམས་བཟུང་བས་ཅི་ཞིག་ན་ལས་སྣང་དེ་རྣམས་འགགས་ནས། རྟགས་སྣང་འདྲེས་པར་འཆར། མིག་བཙུམ་པའི་སྟོང་གཟུགས་གསལ་ན། རྩ་གསུམ་གྱི་འདུས་མདོ་ཨ་ཝ་དྷུ་ཏིའི་ནང་དུ་སེམས་བཟུང་བས་ཁྱད་པར་དུ་ཡང་སེམས་གནས་ཆ་བརྟན་པར་འགྱུར་རོ། །ཡང་སྣ་བུག་གི་སྒོ་ནས་སོར་བཅུ་དྲུག་ཙམ་གྱི་ཐད་སོར། རླུང་རྒྱུ་བ་དང་སྟོང་གཟུགས་ཕྱོགས་མཐུན་དམིགས་པའི་ཡུལ་དུ་བྱས་པས་རླུང་གི་ཁ་དོག་མཐོང་བ་དང༌། ཞི་རྒྱས་ཀྱི་ལས་སྦྱོར་རྣམས་ཀྱང་འགྲུབ། མལ་སྟན་བདེ་ཞིང་སྔས་མཐོ་བར་བྱས་པ་ལ། སེང་གེའི་ཉལ་སྟབས་སུ་ལུས་གནད་དང༌། རླུང་རང་སོར་རྒྱུ་བ་ཉིད་ལ་སེམས་རྣམ་པར་མི་རྟོག་པའི་ངང་དུ་བཞག་པར་གཉིད་དུ་འགྲོ་བ་བྱས་པས། རྨི་ལམ་གྱི་རྣམ་པ་ཅི་རིགས་པའང་མེད་ཅིང༌། སད་པའི་རྗེས་སུ་སེམས་གསལ་སྟོང་དུ་གནས་པ་འབྱུང་བ་ནི་འཐུག་ཟིན་དང༌། གཉིད་ཤིན་ཏུ་སྲབ་མོར་གྱུར་ཏེ། མུན་ཁང་གི་ནང་སྐྱ་བོར་སྣང་བ་ལྟ་བུ་དང༌། སྟོང་གཟུགས་རྣམས་ཀྱང་གསལ་བར་འཆར་བ་དག་འབྱུང་ངོ༌། །རིམ་གྱིས་མཉམ་རྗེས་འདྲེས་པར་འགྱུར་བས་དེ་རྣམས་ལ་བརྩོན་པར་བྱའོ། །སོར་སྡུད་ཀྱི་དུས་ལ་རྟགས་སྣང་གསལ་བ་དང༌། རྒྱ་ཆེར་འཆར་བ་དང༌། སྒྲ་བརྙན་དྲི་བརྙན་སོགས་འབྱུང་བ་དང༌། ཐིག་ལེ་ལ་ཡང་འོད་སྣ་ཚོགས་འཕྲོ་ཞིང༌། ཕྲ་བ། འཚེར་བ། འདར་བ། གཞིག་དཀའ་བའི་ཆོས་ལྔ་ལྡན་དང༌། དེའི་དབུས་ཀྱི་སངས་རྒྱས་ཀྱི་སྐུ་ངེས་པ་གསུམ་ལྡན་རེ་ཁཱ་དང་བཅས་པ་སྣང༌། ལྷའི་མིག་གི་མངོན་ཤེས་ནས། རྣ་བ་དང༌། རྫུ་འཕྲུལ་གྱི་དང༌། གཞན་གྱི་སེམས་དང༌། སྔོན་གྱི་གནས་དྲན་པའི་མངོན་ཤེས་ལྔ་ཐོབ་ཅིང༌། རྩ་དག་ཅིང་རྡོ་རྗེའི་སྐུ་འགྲུབ། སྲོག་དང་རྩོལ་བ། སྟེང་ནས་རྒྱུ་བའི་སྲོག་གཡས་དང་གཡོན་པའི་རྩར་འབབ་པ་དགག་ཅིང་དབུ་མར་འཇུག་པའི་རིམ་པ་ནི་རྩོལ་བ། གཡོན་ནས་རླུང་རྒྱུ་བའི་དུས་དང་སྦྱར། གཙོ་ཆེར་མུན་ཁང་ལ་གནས་ནས་ལུས་གནད་རྐང་པ་གཡས་པའི་རྟིང་པས་རྡོ་རྗེའི་རྩ་དང་བཤང་སྒོ་དགག་ཅིང༌། གཡོན་མདུན་དུ་ཅི་བདེར་བརྐྱང༌། ལག་གཉིས་ཐལ་མོ་བསྣོལ་མར་བརླའི་སྟེང་ཙམ་དུ་བཞག་པ་ཐབ་འགལ་ལམ་འཁྱུད་པའི་ཚུལ་གྱིས་ཁུ་ཚུར་བཅིངས་པ་དང་ལྟ་སྟངས་སྨིན་མཚམས་ནས་སོར་བཅུ་དྲུག་གི་ཐད་དུ་ལྟ་བར་མཛད་པ་བཞིན་བྱས་ལ། ལྟོ་བ་ལྟེབས་པ་དང་སྦྱར་བའི་དབུགས་རྒྱུན་ཉེར་གཅིག་ཙམ་གྱི་བར་ཕྱིར་འབུད་པའི་ཚེ་ལུས་རྩ་ཐམས་ཅད་ནས་རླུང་ཕྱིར་བྱུང་ཞིང༌། རྩ་རྣམས་ཀྱང་ལྡེམ་ཀྱོག་བྱེད་པའི་དམིགས་པ་དང༌། གཡས་གཡོན་མཉམ་པར་དབྱུང་བ་ལག་ལེན་ལྟར་ཅི་རིགས་གྲུབ་པའི་རྗེས་སུ་ཉམས་སུ་བླང་བྱའི་མན་ངག་ཁ་ཆེ་པཎ་ཆེན་ནས་བརྒྱུད་པ་རྡོ་རྗེའི་ཚིག་དྲུག་ཅེས། རྩ་ལམ་སྦྱོང་བ་རྡོར་བཟླས། འཇམ་རླུང་དགང་གཏོང་གིས་རླུང་དབུ་མར་གཞུག་པ། རྩུབ་རླུང་བུམ་པ་ཅན་གྱིས་རླུང་དབུ་མར་ཞུགས་པ་དེ་བཅིང་བ། དེ་དག་གིས་ཚུད་པ་དང་འཆིང་བར་མ་གྱུར་ན་དྲག་རླུང་བཙན་ཐབས། ཞེས་གསུངས་པས། སྔ་དྲོ་ལྟོ་སྟོང་ལ་སོགས་པའི་དུས་སུ་སེམས་སྐྱིལ་ལམ་རྡོ་རྗེ་སྐྱིལ་ཀྲུང་བྱས་ལ། སྣ་བུག་གཡོན་ནས་རླུང་རྒྱུན་གཡས་པའི་ཁུ་ཚུར་གཡོན་པའི་མཆན་རྩ་དང་ནུ་མའི་སྟེང་དུ་བཞག་ལ་གྲུ་མོ་གཡོན་པས་མནན། གདོང་གཡས་སུ་གཅུས་ནས་འོག་རླུང་ཅུང་ཟད་འཐེན་ཞིང་ལག་པ་གཡོན་པའི་ཁུ་ཚུར་གྱི་མཛུབ་མོ་བརྐྱངས་པས་སྣ་བུག་གཡས་བཀག་ཅིང༌། རླུང་སྣ་བུག་གཡོན་ནས་དྲག་ཏུ་རྔུབས་ལ་ལྟེ་བར་མནན་ཟིན་པ་དང་གཡོན་ཕྱོགས་སུ་གདོང་བསྒྱུར་ལ། མཛུབ་མོས་སྣ་བུག་གཡས་བཀག་པ་བཏང་ནས་གཡོན་བཀག་ལ་གཡས་པའི་སྣ་བུག་ནས་རླུང་ཤུགས་ཕྱུང་སྟེ་འབུད་དོ། །དེ་བཞིན་དུ་གཡས་ནས་རྒྱུ་ན་ལག་པ་གཡོན་པའི་ཁུ་ཚུར་གྱིས་གཡས་པའི་མཆན་རྩ་དང་ནུ་མ་མནན། གདོང་གཡོན་དུ་བལྟས་ཏེ་འོག་རླུང་འཐེན། གཡས་པའི་ཁུ་ཚུར་གྱི་འཛུབ་མོས་སྣ་བུག་གཡོན་བཀག །གཡས་ནས་རྔུབས། གདོང་གཡས་སུ་བསྒྱུར་ནས་མཛུབ་མོས་སྣ་བུག་གཡས་བཀག་ལ་གཡོན་ནས་འབུད་དོ། །དེ་ལྟར་ལན་བདུན་ལ་སོགས་པར་རེས་མོས་ཀྱིས་བསྒྱུར་ནས་མཉམ་རྒྱུར་བྱ་ཞིང༌། སྐབས་སུའང་ངལ་གསོའོ། །སྲོག་རྩོལ་འདི་རྣམས་ཀྱང་ཇི་སྲིད་དུ་མགོ་བོ་ན་ཞིང་སྙིང་ཁར་འཚང་བ་དང༌། འོད་ཀྱི་འཁོར་ལོ་ལྟ་བུའི་རྟགས་མཐོང་ནས་ཀྱང༌། དེ་ཉིད་སྟེང་གི་ཕྱོགས་མཐོན་པོར་སོང་བ་མཐོང་ན། རེ་ཞིག་ཐུན་མཚམས་བྱ་བའམ། སོར་བསམ་དག་བསྒོམ་མོ། །སྲོག་ཐུར་བསྲེ་བ་དང༌། ལྕེའུ་ཆུང་གིས་བདུད་རྩི་མྱང་བ་གཉིས་སུ་བཞེད་ཀྱང༌། སྲོག་ཐུར་བསྲེས་རྗེས་འཁོར་ལོ་སོ་སོའི་དབུས་སུ་ས་ཆུ་ལ་ཐིམ་པ་ནས་ནམ་མཁའ་ཡེ་ཤེས་ལ་ཐིམ་པའི་ཚུལ་གྱིས་འཛིན་པའི་ཡན་ལག་བསྒོམ་པ་ལ། ལུས་གནད་བུམ་པ་ཅན་གྱི་སྐབས་བཞིན་ནམ་རླུང་གཡོན་དུ་གཙོ་བོར་རྒྱུ་ན་རྐང་པ་གཡས་ཀྱི་རྟིང་པས་འོག་སྒོ་མནན། གཡོན་ཅུང་ཟད་མདུན་དུ་བརྐྱངས་པའི་གཡོན་རོལ་དང༌། གཡས་རླུང་རྒྱུ་ན་དེ་ལས་བཟློག་པར་བྱ་ཞིང༌། ལག་གཉིས་པུས་མོ་ལ་བཀབ་པ་དང་ལྟ་སྟངས་སྔ་མ་ལྟ་བུས༑ ཐོག་མར་འོག་རླུང་སྟེང་དུ་འཐེན། སྟེང་རླུང་ཧཱུྃ་རིང་པོའི་གདངས་ཀྱིས་དྲངས་པས་སྣ་གཉིས་ཆར་ནས་ཕྱིར་ཕྱུང༌། སླར་ནང་དུ་རྔུབས་ཏེ་ཧཱུྃ་ཐུང་གིས་ལྟོ་བར་བཙུད་པས་སྲོག་ཐུར་འདྲེས་པར་བསམས་ནས། ལྟོ་བ་ཕྱིར་ལན་འགའ་ཕུལ། གསང་རླུང་ཧཱུྃ་ཐུང་གིས་དྲག་ཏུ་ཡར་དྲངས། མིག་སྨིན་མཚམས་སུ་བཟློག་ཅིང༌། ལྕེ་རྩེ་རྐན་ལ་སྦྱར་བ་དང་ཕཊ་ཅེས་དྲན་པས་འོག་རླུང་འཐེན། ལུས་ཀྱི་དབུས་སུ་རྩ་དབུ་མ་གསལ་བཏབ་ནས༑ ལྟེ་བའི་རྩ་འཁོར་འདབ་མ་བཞི་བརྒྱ་བཅུ་གཉིས་སོགས་ཕྱི་ནང་ཐམས་ཅད་དང༌། ཕྱི་རོལ་དྲུག་ཅུ་རྩ་བཞི་པོ་ཁ་དོག་སེར་པོར་བསྒོམས་པའི་དྷཱུ་ཏིའི་ནང་དུ་ཟླ་བའི་དཀྱིལ་འཁོར་གྱི་སྟེང་དུ་ༀ་དཀར་པོ་ཟླ་ཚེས་ཐིག་ལེ་ནཱ་ད་དང་བཅས་པ་དམིགས་ལ། ཐུར་སེལ་གྱིས་རླུང་ཡར་འཐེན། སྟེང་རླུང་རྩུབ་རླུང་གི་སྐབས་ལྟར་དྲངས་པ་དང༌། བུམ་པ་ཅན་དུ་བྱ་བ་སྟེ་ཡིད་ཐིག་ལེ་ལ་ཐིམ་པར་མོས་ནས་སེམས་རྩེ་གཅིག་ཏུ་གཏད་ཅིང༌། དེ་ལ་གོམས་ནས་སྟོང་གཟུགས་དང་ཡིད་རོ་གཅིག་ཏུ་བསྲེས་ལ་བསྒོམ། རླུང་མི་ཐུབ་པ་སྙམ་བྱེད་ན་དལ་གྱིས་བཏང་བ་སྟེ་འདི་ལ་ནན་ཏན་དུ་བྱའོ། །ལྟེ་བའི་འཁོར་ལོའི་རྩ་ཐིག་རླུང་གསུམ་རོ་གཅིག་ཏུ་གྱུར་པར་བསྟིམ། ཐུར་སེལ་འཐེན། སྟེང་རླུང་དང་ཁ་སྦྱར། སྙིང་ཁའི་འཁོར་ལོ་ལ་སེམས་རྩེ་གཅིག་ཏུ་བཟུང་ནས། སྟེང་རླུང་དལ་གྱིས་བཏང་ངོ༌། །ཕྱི་མ་རྣམས་ལའང་རླུང་སྦྱོར་གསུམ་འདྲ་བ་ལ། དམིགས་པ་མགྲིན་པར་རྩ་འདབ་བཞི། བརྒྱད། བཅུ་དྲུག །སོ་གཉིས་ཀྱི་ཕྱི་རིམ་ཁ་དོག་དམར་པོ་ལ་སྙིང་གའི་རྩ་ཐིག་རླུང་གསུམ་རོ་གཅིག་ཐིམ་པ་སོགས་སྔར་བཞིན་དང༌། དཔྲལ་བར་རྩ་འདབ་བཞི། བརྒྱད། བཅུ་དྲུག་གི་ཕྱི་རིམ་ལ་མགྲིན་པའི་རྣམ་གསུམ་རོ་གཅིག་པ་དང༌། སྤྱི་བོའི་རྩ་འདབ་བཞི་སྔོན་པོ་ལ། དཔྲལ་བའི་རྣམ་གསུམ་རོ་གཅིག་པ་དང༌། གསང་འཁོར་རྩ་འདབ་དྲུག་ཅུ། བཅུ་དྲུག་གི་ཕྱི་རིམ་ལྗང་གུ་ལ། སྤྱི་བོའི་རྩ་ཐིག་རླུང་གསུམ་དབྱེར་མེད་པར་ཐིམ་པར་མོས་ཤིང་གོམས་ནས་སྟོང་གཟུགས་དང་བསྲེས་པ་རྩེ་གཅིག་བསམ་གཏན་ཀྱང་ཐམས་ཅད་དུ་བྱའོ། །ཡན་ལག་དང་པོ་གཉིས་དང་བར་པ་དག་གི་གོ་རིམ་བརྟན་པས་ལྟེ་བ་སོགས་འཁོར་ལོ་དྲུག་ཏུ་རིམ་བཞིན་དེ་ལྟར་བསྒོམ་རིམ་ལ། བྱང་ཆུབ་ཀྱི་སེམས་སླ་བ་དང༌། ཅུང་ཟད་སྐ་བ་དང༌། ཤིན་ཏུ་སྐ་བར་གྱུར་པའི་གནས་སྐབས་ན་འཛིན་པ་ལ་སོགས་པའི་ཐབས་སུ། ལས་རྒྱ་ནས་རིམ་པར་འཇུག་དགོས་པར་བཞེད་པ་ཡང་ཡོད་མོད་ཀྱི། འདིར་རྣལ་འབྱོར་པ་མཆོག་གི་སྟོང་གཟུགས་ཕྱག་རྒྱ་ཆེན་པོ་ལམ་དུ་བྱས་ཏེ། ནང་རིག་འགྱུར་མེད་བདེ་བ་ཆེན་པོ་རྟོགས་པའི་མཐུས་འཕོ་བ་མེད་པར་འགྲུབ་ཅིང་འབྲིང་དང་ཐ་མས་ཕྱག་རྒྱ་གཉིས་ལ་བརྟེན་ནས་ཞུ་བདེ་ལྷན་སྐྱེས་ཉམས་སུ་མྱོང་ལ། ཁམས་ཀྱང་དངུལ་ཆུ་འཆིང་བ་བཞིན་དུ་བྱེད་ཅིང༌། འགྱུར་མེད་བདེ་བ་མངོན་དུ་འགྱུར་བས་གོ་རིམ་དེ་ལྟར་བྱ། ལུས་ཀྱི་དབུས་སུ་རྩ་དབུ་མ་ཡར་སྣ་སྨིན་མཚམས་སུ་ཟུག་ཅིང་འཁོར་ལོ་དྲུག་པོ་སྔར་སྨོས་པ་བཞིན་གསལ་བཏབ་པའི་ལྟེ་བར་གནས་པའི་རོ་རྐྱང་གཉིས་གཙུག་ཏོར་ནས་བརྩམས་ཏེ། འཁོར་ལོ་སོ་སོའི་ཐད་དུ་དབུ་མ་དང་འབྲེལ་བ་ལ་འཁོར་ལོ་དྲུག་གི་བར་དུ་གཡས་གཡོན་དུ་གྱེས་པ། གསང་བའི་འཁོར་ལོ་ནས་དབུ་མ་གཡས་དང༌། རོ་མ་གཡོན་དང༌། རྐྱང་མ་དབུས་སུ་སོང་བ་ལ་བཤང་གཅི་ཁུ་བ་འབབ་པས། རྩའི་གནས་ལུགས་དང་མཐུན་པར་དེ་ལྟར་བསྒོམས་ལ། ལྟེ་བའི་འཁོར་ལོའི་དབུས་སུ་ཧོ་ཡིག་ཡོངས་སུ་གྱུར་པའི་གཏུམ་མོའི་མེ་དམར་ཞིང་ཕྲ་ལ་རྣོ་བ་གྱེན་དུ་སོར་བཞིའི་ཚད་དུ་འབར་བའི་འོད་ཟེར་དབུ་མའི་སྟེང་འོག་ཐམས་ཅད་དུ་ཁྱབ་པར་དམིགས་ནས། འཇམ་རླུང་བུམ་པ་ཅན་དང་ལྷན་ཅིག་སྣང་བ་དང་བཅས་པའམ། མེ་ཁོ་ན་ལ་ཡུན་དུ་སེམས་བརྟན་པར་བཟུང་ལ། གཙུག་ཏོར་རམ་དཔྲལ་བའི་འཁོར་ལོ་བྱང་སེམས་ཧཾ་ཡིག་གམ་ཐིག་ལེའི་རྣམ་པ་ཅན་དུ་གཡོས་ཏེ༑ རྩ་ཕྲན་རྣམས་ཀྱང་རིམ་པས་ཁྱབ་ཅིང་དབུ་མར་འོང་བ་ལས། དཔྲལ་མགྲིན་དུ་དགའ་བ། སྙིང་ཁར་མཆོག་དགའ། ལྟེ་བར་ཁྱད་དགའ། གསང་བ་དང་ནོར་བུར་ལྷན་སྐྱེས་ཉམས་སུ་མྱོང་བར་བསྒོམ་པའམ། གཙུག་ཏོར་ནས་དཔྲལ་བའི་བར་དུ་སོན་པ་དགའ་བ། མགྲིན་པ་ནས་སྙིང་ཁར་མཆོག་དགའ། ལྟེ་བ་ནས་གསང་འཁོར་དུ་དགའ་བྲལ་ལམ་སྣ་ཚོགས་དགའ་བ། གསང་བ་ནས་རྡོ་རྗེ་ནོར་བུའི་བར་དུ་འོངས་པ་ལྷན་སྐྱེས་མཐར་ཐུག་འཆི་མེད་བདེ་བ་ཆེན་པོ་ཡེ་ཤེས་ཀྱི་སྐུ་འགྲུབ་པར་བྱ་བའི་དོན་དུ་ཐབས་ཀྱི་ཡན་ལག་འདི་དག་ཉམས་སུ་བླང་ངོ༌། །འཛག་མེད་དུ་རིམ་པར་བརྟན་པས་བདེ་བའི་སྐད་ཅིག་ཉི་ཁྲི་ཆིག་སྟོང་དྲུག་བརྒྱ་ཐོབ་ཅིང༌། དུས་སྦྱོར་གྱི་རླུང་རྣམས་ཀྱང་དེ་དང་མཚུངས་པར་འགགས་པ་ལས། ས་བཅུ་གཉིས་ཀྱི་དབང་ཕྱུག་ཏུ་འགྱུར་ཏེ། དེ་ཡང་ཐིག་ལེ་རྡོ་རྗེ་ནོར་བུའི་རྩེར་བརྟན་པས་མི་འགྱུར་བའི་བདེ་བའི་སྐད་ཅིག་དང་པོ་ཐོབ་ནས་ཏིང་ངེ་འཛིན་གྱི་ཐོག་མ་སྟེ། དབུགས་འབྱུང་འཇུག་གཅིག་འགག་གོ །དེ་བཞིན་དུ། སྐད་ཅིག་མ་སྟོང་བརྒྱད་བརྒྱའི་བར་དུ་འཕེལ་ཞིང༌། དབུགས་ཀྱི་གྲངས་དེ་སྙེད་འགགས་པའི་རིམ་པས། གསང་བར་ས་དང་པོ་དང་གཉིས་པ། ལྟེ་བ། སྙིང་ཁ། མགྲིན་པ། དཔྲལ་བ། གཙུག་ཏོར་རྣམས་སུ་བདེ་བའི་སྐད་ཅིག་ཐོབ་པ་དང༌། དུས་སྦྱོར་གྱི་རླུང་འགག་པའི་ཚུལ་དེ་ཉིད་ཀྱིས་ས་གཉིས་གཉིས་ཐོབ་པའི་རྣམ་པར་བཞག་པ་བསྟན་ལ་མཐར་ཐུག་གི་འབྲས་བུ་ཡེ་ཤེས་ཀྱི་སྐུ་ནི་བླ་ན་མེད་པའི་སངས་རྒྱས་ཉིད་དོ། །སྦྱོར་དྲུག་ཀུན༵་ལས་ཁྱད་འཕགས་པ། །དག༵འ་བཞི་དངོས་སུ་འདྲེན་པའི་ཆོས། །རྣམ་དག་གྲོལ༵་ལམ་མཆོ༵ག་འདི་ནི། །རྒྱུད་འགྲེལ་ཉིད་ལས་ཕྱུངས་པའོ༑ ༑ཙན་དན་དང་དེའི་དྲི་ལྟར་རྒྱུད་འགྲེལ་ལས་བཏུས་སོ། (༩༡) །སྙན་བརྒྱུད་ཀྱི་ཁྲིད་ཡིག །སྙན་བརྒྱུད་སྟེང་སྒོ་ཆོས་དྲུག་གི་ཁྲིད་ནི། སྐྱབས་སེམས་སྔོན་དུ་སོང་ནས། གཏུམ་མོ་འབར་ཐབས་ཨ་ཤད་ལ་སེམས་གཏད། སུམ་མདོ་རུ་མེའི་སྙིང་པོ་ཨ་ཤད་ཁབ་ཙམ་ཤིན་ཏུ་དམར་ཞིང་ཚ་བ། ཉི་ཟླའི་ལམ་ནས་རླུང་གིས་བུས། དབུ་མའི་ནང་ཚ་འུར་གྱིས་དྲོས་ལུས་སེམས་བསྒྲིམ། ཡང་དམིགས་པ་སྤོ་སྟེ། མེའི་སྙིང་པོ་དེ་ལ་རླུང་གིས་བུས་པས་མེ་ཅུང་ཟད་འབར་བས་ཇེ་ཆེ་ཇེ་ཆེ་ལ་སོར་བཞི་ཙམ། དེ་ནས་སོར་བརྒྱད་ཙམ། མཚན་ཉིད་བཞི་ལྡན་དེ། རེག་བྱ་ཚ་བ། ཁ་དོག་དམར་བ། རྩེ་མོ་རྣོ་བ། འཇམ་ཞིང་མཉེན་པ། དེ་ལ་སྦྱང༌། དྲོད་སྐྱེ། དེའི་དུས་སུ་རས་གོན། སྤྱི་བོར་ཧཾ་དཀར་པོ་མགོ་ཐུར་དུ་བལྟས་པ། ཨ་ཐུང་ལ་མེ་འབར། འོད་ཀྱིས་ཧཾ་བྱང་སེམས་དཀར་པོ་གྲང་སི་ལི་ལི་བྱུང༌། ཐམས་ཅད་སྐྱ་མེར་ཁེངས། དེ་ལ་མ་ཡེངས་པར་བྱ། ཕྱིར་འགྲོ་བ་ཧཱུྃ། འཇུག་པ་ༀ། གནས་པ་ཨཱཿ རྡོ་རྗེའི་བཟླས་པ་ཡིག་འབྲུ་གསུམ་ལ་གོམས་ཤིང༌། སངས་རྒྱས་ལྔ་ལ་ཁ་དོག་སོ་སོར་བསླབ། སྣའི་ཀ་བ་ལ་བརྟེན་པ་ས། མཆུ་གཉིས་ལ་བརྟེན་པ་ཆུ། ཕྱི་ལོགས་ལ་བརྟེན་པ་མེ། སྟེང་དུ་བརྟེན་པ་རླུང༌། ས་སེར༑ ཆུ་དཀར། མེ་དམར། རླུང་སྔོན། ས་ཡིས་ཤ་སྐྱེ་ཞིང་ཁ་དོག་གསལ། ཆུས་ལུས་སྣུམ། མེས་དྲོད་ཆེ། རླུང་གིས་ལུས་ཡང༌། ནམ་མཁས་ལུས་ཡོད་དུ་མི་ཚོར། བོགས་འདོན་སྒྱུ་མ་གསེར་འགྱུར་གྱི་རྩི་ནི། སེམས་ཉིད་འཁྲུལ་པ་ལས་ཀྱི་བག་ཆགས་ཀྱི་སྣང་བ་སྣ་ཚོགས་ཀྱི་རྒྱུ་ལ་བརྟེན་ནས། དགེ་བ་དང་སྡིག་པའི་རྒྱུ་འབྲས་སྣ་ཚོགས་སུ་སྐྱེ་བས་ན་སྒྱུ་མ། དཔེར་ན་སྒྱུ་མ་མཁན་གྱིས་རྫས་ཀྱི་དངོས་པོ་རྡེའུ་དང་གྱོ་མོ་ལ་སོགས་པ་ལ་བརྟེན་ནས། རྟ་དང་གླང་པོ་ཁང་ཁྱིམ་ལ་སོགས་པ་དུ་མར་སྣང་ཡང༌། དོན་ལ་བདེན་པར་མ་གྲུབ། དཔེ་དེ་བཞིན་དུ་འཁོར་བའི་ཆོས་ཐམས་ཅད་སྣང་ལ་རང་བཞིན་མེད་པ་སྒྱུ་མ་ལྟ་བུའི་ངེས་པའི་ཤེས་པ་གཏིང་ནས་ལྷག་གེ་མ་སྐྱེས་བར་དུ་སྦྱང༌། ཉི་ཟླའི་འོད། འཕོ་འགྱུར་གྱི་དུས། སྟོད་སྨད་ཀྱི་སྒྲ་ལ་སྦྱང༌། སྣང་བ་ཐམས་ཅད་བུན་ལོང་བའི་ཉམས་འཆར། ཉིན་སྣང་མཚན་མོ་རྨི་ལམ་དུ་ཁྱེར་བ་ལ་འདུན་པ་དྲག་པོ་བསྟེན། རྨི་ལམ་ཟིན་པར་གསོལ་བ་འདེབས། སྔས་བསྟོད། གཡས་ཕབ། གཉིད་ཐུམ་འགྲོ་དུས་ཟིན་མ་ཟིན་བརྟགས་ལ། གནས་ཁང་ཉལ་ས་ངོས་བཟུང༌། འདུན་པ་ལ་སྦྱངས་པས་ཟིན། རྨི་ལམ་ཟིན་དུས་རྨི་ལམ་དུ་ངོ་ཤེས་པས་རྨི་ལམ་ཟིན། སྦྱོང་དུས་མང་པོ་ཉུང་ངུ༌། ཉུང་ངུ་མང་པོ་རུ་སྤྲུལ་པས་རྨི་ལམ་འབྱོངས། འབྱམས་པ་བཞི། བརྗེད་འབྱམས། སད་འབྱམས། འཁྲུལ་འབྱམས། རྒྱུན་འབྱམས། རྨི་ལམ་འབྱོངས་ནས། གཉིད་འཐུག་འོད་གསལ་དུ་གཞུག་པ་ལ། གཉིད་ལོག་པའི་དུས། བླ་མ་ལ་མོས་གུས་དུངས་པ་བྱ། སྙིང་ཁར་ཤེས་པ་གཏད། དམིགས་པ་ཡེངས་མེད་འཛིན་མེད་ངང་ལ་བཞག་པས་རིག་པ་ཕྱི་མ་མེད་པར་གསལ་ལ་ངོས་བཟུང་མེད། སྒྲིབ་གཡོགས་དང་བྲལ་བ། འོད་གསལ་བའི་ཏིང་ངེ་འཛིན་འབྱུང༌། གཉིད་སད་པ་དང༌། ད་ལྟར་གྱི་སྣང་བ་ཐམས་ཅད་གསལ་ལ་ངོས་གཟུང་མེད་པ། ཕྱག་རྒྱ་ཆེན་པོའི་ངང་རྒྱུན་ཆད་མེད་པར་སྦྱང༌། དེས་ལམ་བགྲོད། གལ་ཏེ་དུས་ཀྱིས་གཏུགས་ནས་འཕོ་བ། ལུས་གནད་བྱས། སྙིང་ཁའི་ཐད་ཀར་ཧཱུྃ། སྤྱི་བོར་བླ་མ་བསམ། ཧཱུྃ་དེ་ཚངས་པའི་བུ་གའི་ལམ་ནས་ཐོན། བླ་མའི་ཐུགས་ཁར་ཐིམ་པར་བསམ། འཇོག་དུས་ཚངས་བུག་ཀྵས་བཀག །རྨི་ལམ་དང་འཆི་ཀ་མ་ལ་ཞིབ་ཏུ་བྱས་ལ། འོད་གསལ་བེའུ་མ་འཕྲད་ལྟར། རིག་པ་རྨུགས་པ་དྲན་པ་སད་ནས་རིག་པ་གསལ་ལ་ངོས་བཟུང་མེད་པ། འོད་ལྔའི་རང་བཞིན་མ་འདྲེས་པ་ཡོངས་སུ་རྫོགས་པ། སྐྱེལ་བསུ་དང་མཚམས་སྦྱོར་བདུན་ཕྲག་དང་པོ་ཡོན་ཏན་རྫོགས་པའི་དུས་སུ། སྔོན་འབྱུང་སྲིད་པའི་ཤ་གཟུགས་ཅན། །དབང་པོ་ཀུན་ཚང་ཐོགས་མེད་རྒྱུ། །རིགས་མཐུན་ལྷ་མིག་དག་པས་མཐོང༌། །འདིའི་དུས་སུ་སྔར་གྱི་གདམས་པ་དྲན་པར་བྱ། འཁོར་བ་ལུགས་ཀྱི་རིགས་མཐུན་ལམ་ མངལ་ཟེར་བའང་སྣང༌། གྱི་དུག་གསུམ་སྲེ་བྱེད་ཚེ་འདིར་བསྒོམས་ནས་ད་བཟོད་སངས་རྒྱ་བ་ཡིན་པ་ལ་སྙམས་པའི་ཐེ་ཚོམ་ཆོད་ནས་ཆོས་ཐམས་ཅད་ཟད་སར་སྐྱོལ་བ་ལམ་ཉམས་སུ་བླང་བའི་ཆོས་དྲུག་ལམ་དུ་ཤེས་པར་བྱའོ། །མི་ལའི་གསུང་ཀུན༵་རས་ཆུང་པའི། །སྙིང་ཁུང་ནང་དུ་དག༵འ་སྦྱིན་ཆོས། །སྨིན་གྲོལ༵་ཟུང་འབྲེལ་ལམ་མཆོ༵ག་གི །གནད་བསྡུས་ཡི་གེར་བྲིས་འདིའོ། །ཞང་ལོའི་ཁྲིད་ལས་བཏུས་སོ། (༩༢) །ལུས་མེད་མཁའ་འགྲོའི་ཆོས་སྐོར་དགུའི་ཁྲིད་ཡིག །ལུས་མེད་མཁའ་འགྲོའི་ཆོས་སྐོར་དགུའི་ཁྲིད་ནི། སྐྱབས་སེམས་སྔོན་དུ་སོང་ནས། ལུས་མེད་མཁའ་འགྲོའི་གླུ་དབྱངས། སྨིན་གྲོལ་སེམས་ཀྱི་རྒྱ་མདུད་བཤིག །ཅེས་པ་ལ། ཚོགས་ལམ་ཚོགས་གཉིས་ལམ་ཁྱེར། སྦྱོར་ལམ་དམིགས་པ་ཞེན་བྲལ། མཐོང་ལམ་གང་བྱུང་གྲོང་གདམས། སྒོམ་ལམ་ཉོན་མོངས་ལམ་ཁྱེར། མཐར་ཕྱིན་པ་འབྲས་བུ་ངོ་སྤྲོད་ཀྱི་གདམས་པ། ཚོགས་ལམ་ལ་ཞེན་པ་བཅད་ཕྱིར། སྦྱོར་ལམ་ལ་དམིགས་པ་ཞེན་བྲལ། སྦྱོར་ལམ་དུ་ཞེན་པ་བཅད་པའི་ཕྱིར། མཐོང་ལམ་འདོད་ཡོན་གང་སྣང་གྲོགས་སུ་ཁྱེར། གྲོགས་ཙམ་དུ་ཞེན་པ་དེའང་སྒོམ་ལམ་ཉོན་མོངས་ལམ་ཁྱེར་གྱིས་བཅད་ལ། སྨིན་གྲོལ་སེམས་ཀྱི་རྒྱ་མདུད་བཤིག །དམ་ཚིག་རང་སེམས་མེ་ལོང་ལྟོས། དགག་པ། སྒྲུབ་པ། དགག་སྒྲུབ་གཉིས་མེད་ཀྱི་དམ་ཚིག །མ་སྨིན་པར་དབང་ཆོས་མི་བཤད། སྣོད་མིན་ལ་གོང་ལམ་མི་བསྟན། ཡུལ་མ་ཡིན་པ་ལ་རྟེན་མི་བསྟན། མ་གུས་པ་ལ་ཆོས་མི་བཤད། མ་དད་པ་ཚོགས་ལམ་དུ་མི་གཞུག །དམ་ཚིག་མེད་པ་སློབ་མར་མི་བཟུང༌། རླུང་གི་དབུ་མར་མི་བསྐུར། བྱ་མ་རྟ་གྲོགས་སུ་མི་འགྲོགས། ཚིག་ལ་བརྟེན་པ་གདམས་པར་མི་བསྒོམ། བརྒྱུད་པ་དང་ལྡན་པའི་བླ་མ་བསྟེན། ལས་འཕྲོ་སད་པའི་ཡི་དམ་བསྒོམ། བར་ཆད་སེལ་བའི་ཌཱ་ཀི་མཆོད། ལྟ་སྤྱོད་མཐུན་པའི་གྲོགས་དང་འགྲོགས། གྲུབ་ཐོབ་བརྒྱུད་པའི་སྙན་བརྒྱུད་བསྒོམ། ཉོན་མོངས་སྤང་དུ་མེད། གཉེན་པོ་བསྟེན་དུ་མེད། དེ་ཁོ་ན་ཉིད་ཀྱི་ཆོས་ལ་བསྒོམ་དུ་མེད། འབྲས་བུ་གཞན་ལ་བཙལ་དུ་མེད། དམ་ཚིག་རང་སེམས་མེ་ལོང་ངོ༌༑ ༑དམ་རྫས་རྟོགས་པའི་ཉི་མ་ལྡེ། ཞེས་པ་ལ་འཁྲུལ་གཞི་འཁོར་བར་སྐྱེ་བར་བྱེད་པའི་དམ་རྫས་དང༌། ཟློག་བྱེད་མྱ་ངན་ལས་འདས་པའི་ཉི་མ་ལྡེ་བའོ། །སྤྱིར་དུག་གསུམ་སྐྱེད་པའི། ལས་ངན་གསོག་པའི། འཁོར་བར་སྐྱེ་བའི་དམ་རྫས་ལས་ལྡོག་པ་མི་དགེ་བ་བཅུ་སྤང༌། ངན་འགྲོར་མི་སྐྱེ་བའི་དམ་རྫས་ཡིན། དེའི་སྟེང་དུ་དགེ་བཅུ་སྤྱད། མཐོ་རིས་ཐོབ་པའི་དམ་རྫས། མྱང་འདས་ཀྱི་ཉི་མ་ལྡེ་བ་ལ། སྐྱབས་འགྲོ་རྟེན་གྱི། སོ་ཐར་ལས་འབྲས་ཀྱི། བྱང་སེམས་གཞན་དོན་གྱི། གསང་སྔགས་ངོ་སྤྲོད་ཀྱི་ཉི་མ་ལྡེ་བ་དམ་རྫས་རྟོགས་པའི་ཉི་མའོ། །སྤྱོད་པ་ཆུ་ལ་རལ་གྲི་ཐོབ་ཅེས་པ་ལ། ཀུན་བཟང་སྡོམ་པ་གསུམ་ལྡན། གསང་སྤྱོད་དམ་ཚིག་དང་ལྡན་པ། རིག་སྤྱོད་བག་ཡོད་དྲན་པ། ཨ་ཝ་དྷཱུ་ཏི་གཟའ་གཏད་མེད་པའི་སྤྱོད་པའོ། །ཕྱི་རྐྱེན་བྱུང་བརྡའ། ནང་སྒོ་གསུམ་ངན་སོང་སྒོ་འགེགས། གསང་བ་དུག་གསུམ་ལམ་ཁྱེར། དེ་ཁོ་ན་བདེ་གསལ་ངོ་སྤྲོད། ལུས་སྤྲུལ་སྐུ་སོ་ཐར་གྱི། ངག་ལོངས་སྐུ་བྱང་སེམས་ཀྱི་སྡོམ་པའི། སེམས་ཆོས་སྐུ་རིག་འཛིན་གྱི་སྤྱོད་པ་བྱ། དུག་གསུམ་ཆགས་སྡང་གི་འཁོར་ལོ་མི་བསྐོར། སྤྱོད་པ་གསོག་འཇོག་གི་ཁེ་སྤོགས་མི་བྱ། ཆོས་བརྒྱད་ཚེ་འདིའི་རྟ་ལ་མི་རྒྱུག །ཁ་འཛིན་དམ་པའི་ཆོས་ལ་མི་སྨད། བཟང་འདོད་ཀྱིས་གཞན་ལ་སྐུར་པ་མི་གདབ། འཁོར་འདོད་ཀྱིས་ཐོས་བསམ་མི་བྱ། ཉེ་འབྲེལ་དགྲ་ཡི་མཆོད་གནས་མི་འདེགས། ཕ་ཡུལ་སོ་མཚམས་ཀྱི་དགོན་པ་མི་བཟུང༌། སྡེ་སོགས་ཕྱོགས་འཛིན་གྱི་བྱ་ར་མི་དགྲམ། ང་རྒྱལ་གྱིས་སེམས་ཅན་བློས་མི་སྤང༌། མཉམ་ལ་འགྲན་སེམས་ཀྱི་གཞུ་མི་བདུང༌། མཐོ་ལ་ཕྲག་དོག་གི་མདའ་མི་འཕེན། གསང་སྤྱོད་ལུས་ཀྱི་སྤྱོད་པ་གཅེར་བུ་དང་སྐྲ་གྲོལ། རྒྱན་གྱི་སྤྱོད་པ་ཐལ་ཆེན་དང་རུས་རྒྱན། ཕྱག་མཚན་གྱི་སྤྱོད་པ་ཁ་ཊྭཱཾ་དྲིལ་བུ་ཌཱ་མ་རུ། རིག་སྤྱོད་གཅིག་པུ་ཉམ་ང་མེད་པ་སེངྒེ་ལྟ་བུའི། ཐོགས་རྡུགས་མེད་བ་སྟག་མོ་ལྟ་བུའི། ཚམ་ཚོམ་མེད་པ་གླང་པོ་ལྟ་བུའི། གཙང་སྨེ་མེད་པ་ཁྱི་ཕག་ལྟ་བུའི། བསམ་སྒོམ་བྲལ་བ་བུ་ཆུང་ལྟ་བུའི་སྤྱོད་པ་བྱ། ཨ་ཝ་དྷཱུ་ཏིའི་སྤྱོད་པ། སྣང་བ་སྒྱུ་མ་ཞེན་མེད་ཀྱི་སྤྱོད་པ། སེམས་ཉིད་འོད་གསལ་བརྗོད་མེད་ཀྱི་སྤྱོད་པ། གཉིས་མེད་བྱ་བྲལ་བློ་འདས་ཀྱི་སྤྱོད་པ། བསྒོམ་པ་མཐར་ཕྱིན་དུས་ཚོད་དང་འབྲེལ་བའི་སྤྱོད་པ། སྤྱོད་པ་ཆུ་ལ་རལ་གྲི་འདེབས་པའོ། །རྩ་རླུང་དྲ་མིག་འཁོར་ལོ་བསྐོར་བ། ངོ་བོ་རྩ་རླུང་གི་འཁོར་ལོ། ཕྲིན་ལས་རྩ་རླུང་དྲྭ་མིག་གོ ༑དབྱིབས་གདུགས་ལྟ་བུ། ཐོག་རྩེ་ལྟ་བུ། གའུ་ལྟ་བུ། ཨུཏྤལ་ལྟ་བུ། གྲངས་ནི་ཕྱིའི་རྩ་སྟོང་ཕྲག་བདུན་ཅུ་རྩ་གཉིས། ནང་གི་རྩ་བརྒྱ་ཉི་ཤུ། གསང་བའི་རྩ་སུམ་ཅུ་རྩ་གཉིས། དེ་ཁོ་ན་ཉིད་ཀྱི་རྩ་གསུམ་བསྡུས་ན་གཅིག །གནས་ཕྱི་རྩ་ཤ་ལྤགས་ལ། ནང་རྩ་ཚིལ་བུ་ལ། གསང་རྩ་རུས་པ་ལ། དེ་ཁོ་ནའི་རྩ་གསང་གནས་ལ། རྩ་རིང་ཐུང་རང་གི་འདོམ་རེ། ཐུང་བ་ནས་ཙམ། ཁབ་ཙམ། ལུས་རྩའི་དྲ་མིག་ཏུ་ཚུད་ནས་ཡོད། ནང་རྩ་རྟོག་པ། གསང་རྩ་བདེ་སྟོང༌། རླུང་ལ་རྒྱལ་བློན་འབངས། རྒྱལ་པོའི་རྩ་ལ་རླུང་ལྔ། བློན་པོ་ཡན་ལག་གི་རླུང་ལྔ། འབངས་རང་ལ་འབུམ་འབུམ། ནང་རླུང་འབྱུང་བ་བསྐུལ། གསང་རླུང་རྒྱུ་བ། ཡེ་ཤེས་རླུང་སྐུ་གསུམ། ཐིག་ལེ་ལ་ཕྱིའི་ཐིག་ལེ་རྩ་རེ་རེའི་ནང་ན་ཟག་བཅས་ཀྱི་ཐིག་ལེ་གྲངས་གོང་དང་མཉམ། བསྡུས་ན་རྐྱང་མ་མི་བསྐྱོད་རོ་མ་ཁྲག །ཨ་ཝ་དྷཱུ་ཏི་བྱང་སེམས་འབབ། ནང་གི་ཐིག་ལེ་རིག་པ་རང་ཤར། གསང་བའི་ཐིག་ལེ་གཉིས་མེད་ཡེ་ཤེས། ལམ་ཉམས་སུ་བླང་བ་འཆར་ཚུལ་ལོ། །ཁྲག་གི་དྭངས་མ་འོད་དུ་ཆགས། དབུགས་ཀྱི་དྭངས་མ་དྲོད་རླུང༌། ཐིག་ལེའི་དྭངས་མ་གསལ་དྭངས། རྒྱུ་ལུགས་དང་པོ་འོད་ལྔའི་རླུང་རྒྱུ། གཉིས་པ་དབུགས་ཀྱི་རླུང༌། གསུམ་པ་འདོད་ཆགས། བཞི་པ་དབང་པོའི་རྒྱུ། རྣམ་ཤེས་ལས་ཀྱི་རྒྱུ་ཚུལ། དང་པོ་ཀུན་གཞི། གཉིས་པ་ཡིད་ཤེས། གསུམ་པ་ཉོན་ཡིད། བཞི་པ་སྒོ་ལྔའི་ལས་རྒྱུ། རྟོག་དཔྱོད་འོད་ཀྱི་སྒྲོན་མ་ནི། རྩའི་སྦོམ་ཕྲ་རྟ་རྔའི་བཅུ་ཆ་ཙམ། ཐིག་ལེ་དར་དཀར་གྱི་སྐུད་པ་ཙམ། རླུང་རྒྱུ་ཚུལ་ལྔ། འདོད་ཆགས་དམར། ཞེ་སྡང་དཀར། གཏི་མུག་ནག །ང་རྒྱལ་སེར། ཕྲག་དོག་ལྗང༌། དབུས་ན་དྲན་པ་འཆར་བྱེད། བྱང་ཆུབ་ཀྱི་སེམས་ཀྱི་རྟེན་འོད༑ གཉིས་མེད་ཡེ་ཤེས་སུ་གནས། ཡེ་ཤེས་འཆར་ཚུལ་ཞེ་སྡང་མེ་ལོང་ཡེ་ཤེས། འདོད་ཆགས་སོར་རྟོག །གཏི་མུག་ཆོས་དབྱིངས། ང་རྒྱལ་མཉམ་ཉིད། ཕྲག་དོག་བྱ་གྲུབ། འཆར་ཚུལ། རྩ་ལོངས་སྐུ། རླུང་སྤྲུལ་སྐུ༑ རྩ་གསུམ་དྲ་མིག་འཁོར་ལོའི་མན་ངག །བདེ་ཆེན་གསུང་གི་རིན་ཆེན་བྲིས། འདི་ལ་སྨིན་ལམ་དབང་གི་མཐོང་དབྱེ་བ། གྲོལ་ལམ་ཐབས་ཀྱི་སྒྲོན་མེ་བལྟམས་པ། ལས་ཀྱི་ཕྱག་རྒྱ་སྔགས་སྐྱེས་མཚན་ཉིད་ལྡན་པ་གཅིག་ལ། དབང་བསྐུར་ནས་སེམས་ལྷན་སྐྱེས་ཡབ་ཡུམ། འདུ་ཤེས་གསུམ་ལྡན། ཡུམ་ཕག་མོ། ཡབ་བདེ་མཆོག །རྡོ་རྗེ་དང་པདྨ་བྱིན་རླབས། དལ་བུས་བསྲུབ། དབབ་པ་འཁྲུལ་འཁོར་གྱི་སྤྲོ་བསྡུ། གཟུང་བ་སྐུ་གསུམ་གྱི་བཅུད། བཟློག་པ་རིགས་གསུམ་གྱི་གནད། བསྲེ་བ་རྩ་མིག་ཏུ་དབབ། དབབ་པ་རང་ཤུགས་སུ་ཡོང་བས་ལྟེམས། གཟུང་བ་ལ་རུས་སྦལ་བསྐུམ། ཧག་སྟག་མོའི་སྐྱུག་སྟངས། སྐར་མདའ་ལུས་ཀྱི་འཁྲུལ་འཁོར། བཟློག་པ་ཧཱུྃ་གི་གཟེར་ཆེན། བསྲེ་བ་རྩ་མིག་ཏུ་སྡེབ་པ། ཟླ་བ་རྣམ་སྣང་གི་མདོག །ལྗོན་ཤིང་གདུགས་དབུབ་པ། བདེ་ཆེན་གསུང་གི་རིན་ཆེན་ནོ། །རིག་པ་ཡེ་ཤེས་སྒྲོན་མེ་ལ། ཐ་སྙད་དོན་འཚོལ་གྱི། དཔེ་དོན་གྱི༑ བརྡ་འགྲོལ་གྱི། ཉམས་རྟོགས་སྐུལ་བྱེད་ཀྱི། བྱིན་རླབས་རང་གི་སྒྲོལ་མ་ལ། ཡོད་མེད་མུ་མཐའ་བསལ་བ་དང༌། བློ་འདས་ཀྱི་སྒྲོན་མེ་བལྟམས་པའོ། །རིག་པས་བསྒྲུབ་པར་འདོད་པའི་ཕྱིར་དངོས་པོ་ཡིན། འགལ་བ་དང་བཅས་པའི་ཕྱིར་ལུང་གི་སྤྱོད་ཡུལ་ཡིན། ཚིག་གིས་མཚོན་པའི་ཕྱིར་ཐོས་ཡུལ་ཡིན། ཤེས་རབ་ཀྱིས་བརྟགས་པའི་ཕྱིར་རྟོག་པ་ཡིན། བློ་འདས་ཀྱི་སྒྲོན་མ་དགག་སྒྲུབ་དང་བྲལ་བའི་ཕྱིར་རིག་པའི་ཡུལ་མ་ཡིན༑ འགལ་བ་མེད་པའི་ཕྱིར་ལུང་གི་སྤྱོད་ཡུལ་མ་ཡིན། ཚིག་གི་རྗེས་སུ་མི་འབྲང་བའི་ཕྱིར་ཐོས་ཡུལ་མ་ཡིན། བརྟགས་ན་མི་རྙེད་པའི་ཕྱིར་རྟོག་པ་མ་ཡིན། གནད་ལས་བྱུང་བའི་ཕྱིར་བླ་མའི་གདམས་ངག་གིས་རྟོགས་པ་བསྟན་པ་ལ། བྱིན་རླབས་ཞུགས་ན་རྟོགས། ཡིད་ཆེས་ན་རྟོགས། ཉམས་སུ་བླངས་ན་རྟོགས། ལུང་གིས་རྟོགས། ཡིད་ལ་བྱེད་པ་ཁམས་གསུམ་དུ་འདུ། དཔེ་དོན་གྱི་སྒྲོན་མ། རང་གྲོལ་སྦྲུལ་མདུད། རང་བཞིན་ཆུ་སྦུར། རང་དེངས་སྤྲིན། རང་གསལ་ཤེལ། བློ་འདས་རི་བོང་རྭའི་དཔེའོ། །བརྡའ་འགྲོལ་སྒྲོན་མེ། ལྟ་བ་རྟོགས་པའི། བསྒོམ་པ་ཉམས་ཀྱི། དམུས་ལོང་ལྟ་མེད་ཀྱི། ལྐུགས་པ་སྨྲ་མེད་ཀྱི། སྨྱོན་པ་ཞེན་མེད་ཀྱི་བརྡའོ། །རེག་མེད་མཛུབ་མོའི་བརྡའ། གཅོད་མེད་རལ་གྲིའི་བརྡའ། མཆོངས་མེད་ཕྲག་པའི། བསྲེ་མེད་མེ། ཉམས་རྟོགས་བསྐུལ་བྱེད་སྒྲོན་མ། ཞེན་མེད་ངོས་གཟུང་མེད་པ། བློ་འདས་རང་གྲོལ། བྱིན་རླབས་རང་ཞུགས། ལྐུགས་པའི་བདེ་བ་ལྟར་སྒྲ་མེད། བུ་ཆུང་ལྟར་ཞེན་མེད། མར་མེ་ལྟར་རང་གསལ། རིག་པ་ཡེ་ཤེས་སྒྲོན་མེའོ། །རང་གྲོལ་ཕྱག་རྒྱ་ཆེན་པོ་ལ། སྒོམ་བྱེད་མོ་གཤམ་བུའི་གར་བྱེད་པ་དང༌། བསྒོམ་བྱ་ཕྱག་རྒྱ་ཆེན་པོ། གཟུགས་མེད་ཀྱི་ཐབ་ཁུང་བཅའ། རང་བྱུང་གི་ལིང་ག་དགོད། བྱ་རོག་པའི་བུད་ཤིང་བཅད། དང་པོའི་སངས་རྒྱས་ཀྱི་ལྷ་བསྐྱེད། དམུས་ལོང་གི་དགུག་གཞུག་བྱ། ལྷག་མེད་ཀྱི་དམིགས་པ་གཟུང་། རུས་སྦལ་སྤུ་ཡིས་ཐུན་བྲབ། རི་བོང་རྭའི་ཕུར་པ་གདབ། དུས་མཐའི་མེ་སྦར། ནམ་མཁའི་མེ་ཏོག་དབུལ། སེངྒེའི་འོ་མས་རཀྟ། ཡིད་ཀྱི་རྒྱལ་སྲིད་ཀྱི་དངོས་གྲུབ་བླང༌། རང་གྲོལ་ཕྱག་རྒྱ་ཆེན་པོའོ། །རོ་སྙོམས་ཕྱིའི་མེ་ལོང་ལ༑ སྟེང་རླུང་འོག་རླུང་ཚ་གྲང་རྟ་གཡག་ཚུལ་དུ་གནས། ཡེ་ཤེས་ཉོན་མོངས་གཉིས་དྷཱུ་ཏིའི་འཁྱགས་ཡོད་པ་ཞུ་བ། སྟེང་རླུང་འོག་རླུང་གཉིས་ཀ་བསྡམ། འཁོར་ལོ་ལྟར་བསྐོར། ལྕགས་ཀྱུ་ལྟར་དགུག །ནམ་མཁའ་ལྟར་དཔངས་བསྟོད། གཟེར་ན་སེང་གེའི་རྣམ་རོལ་གྱིས་དཀྲུགས། བྱིང་ན་འོག་སྒོ་བསྡམ། རླུང་སེམས་ནམ་མཁར་འཕང་ངོ༌། །རྒོད་ན་རྒྱུ་མའི་མཐིལ་དུ་སྦོས། རླུང་ནང་དུ་ཟིན་ན་ཡེ་ཤེས་སྐྱེ། ཕྱིར་ཤོར་ན་ཅི་ཡང་མི་འབྱུང་ངོ༌༑ ༑རོ་མཉམ་འོག་ས་ཤས་ཆེ་བ་དེ་ལ་ས་ལ་རླུང་བཏང༌། ལུས་ཀྱི་བརྟུལ་ཤུགས་དྲག་ཏུ་བྱ། སྟེང་ཆུ་ཤས་ཆེ་ན་ཆུ་ལ་མེ་བཏང༌། ཤེས་པ་སྤྲུལ་འཁོར་ན་ཡར་བཏང༌། སྲིན་པོའི་ཞལ་ནས་ཧཾ་ལས་མེ་སྤར། སྟེང་མེ་ཤས་ཆེ་ན་ཕྱག་རྒྱ་མ་ལ་དམིགས་ལ་ཐིག་ལེ་གཏང༌། རླུང་ཤས་ཆེ་ན་རླུང་ས་ལ་བཏང༌། གཙུག་ཏུ་ཐལ་མོ་བརྡབ། རྒྱང་མིག་ལྟ། ཁུ་བཏང༌། མེ་ཆུ་ཤས་ཆེ་ན་སྟེང་མནན། ས་ཆུ་ཤས་ཆེ་ན་འོག་སྤར། ས་ལ་རླུང་གཏང༌། རླུང་ལ་ས་གཏང༌། ཆུ་ལ་མེ་གཏང༌། མེ་ལ་ཆུ་གཏང༌། རླུང་ལ་སྐྱེ་མེད་གཏང༌། བདེ་བ་ལ་སྟོང་པ་གཏང༌། སྟོང་པ་ལ་བདེ་བ་གཏང༌། རོ་སྙོམ་ཕྱིའི་མེ་ལོང་ངོ༌། །ལུས་མེད་མཁའ་འགྲོའི་ཆོས་སྐོར་དགུའི་གདམས་པ་ལས། སྐོར་དང་པོ་བཞི་མར་པས། ཕྱི་མ་ལྔ་རས་ཆུང་པས་ཏི་ཕུ་བའི་གསུང་བཞིན་བཀོད་པའོ། །ལུས་མེད་ལྷག་ཀུན༵་ཏི་ཕུ་པས། །རས་ཆུང་ལ་བསྩལ་དག༵འ་བྲོ་འཁྲབ། །སྨིན་གྲོལ༵་མི་ལ་མཆོ༵ག་དྲུང་དུ། །ཕུལ་བའི་གདམས་པ་ལེགས་པར་བྲིས། །ཡིག་རྙིང་ལས་བཏུས་སོ། (༩༣) །ཞང་གི་ཟབ་རྒྱའི་ཁྲིད་ཡིག །ཞང་གི་ཟབ་རྒྱའི་ཁྲིད་ནི། སྐྱབས་སེམས་སྔོན་དུ་སོང་ནས། ལུས་ངག་ཡིད་གསུམ་བརྡ་ཐབས་ལ། བྱིན་གྱིས་བརླབས་པ་ཡིན་ཏེ། ཁྱོད་ཡི་དམ་ལྷ་སྐད་ཅིག་ལ་སྒོམས་ཤིག །གསལ་ལམ་དྲི། གསལ་ཟེར་ན། སྣང་བ་དེ་ད་ཅི་ཡོད་དམ་མེད་དྲིས་པས། མེད་ཟེར་ན། འོ་ན་དེ་འགག་གམ་མ་འགགས་དྲི། འགག་ཟེར་ན། འོ་དེ་རྟོག་པ་གློ་བུར་བ་ཡིན། རྟེན་སྐད་ཅིག་མ་ཙམ་ཡིན། ཡང་མདུན་ཏུ་ཁ་དོག་གཅིག་བསྒོམ་བཅུག་གོ །ཁ་དོག་དེ་སྣང་ངམ་དྲི། སྣང་ཟེར་ན། ད་ཅི་ཡོད་དམ་མེད་དྲི། མེད་ཟེར་ན། འོ་དེ་ཁ་དོག་གློ་བུར་སྐད་ཅིག་མ་ཡིན། ཆོས་ཐམས་ཅད་དེ་འདྲ། ཡང་སྟེང་སངས་རྒྱས་ཞིང༌། འོག་དམྱལ་བའི་ཞིང༌། ཞིང་ཁམས་སུ་འཛིན་པ་བློ། དེ་ཁ་སེམས་ཀྱིས་བྱས་པ་ཡིན་ལ། རྐྱེན་ལས་སྐྱེས་པ་ཡིན། ཡིད་ཀྱི་རྟོག་པ་ཐམས་ཅད་གཞི་མེད་རྩ་བྲལ། ངག་གི་བརྡ་ནི་རྡོ་རྗེ་ཕག་མོའི་གྲོང་ཁྱེར་ཙིནྡྷོ་ན་བྱང་ཆུབ་སེམས་དཔའ་སྤྱོད་པའི་བློ་གྲོས་བཞུགས་པ་ཐོས་སམ་བྱ། ཐོས་ཟེར་ན། དེ་ཉིད་དུ་ཐལ་མོ་བརྡབ། སྒྲ་དེ་ཐོས་སམ་བྱ། ཐོས་ཟེར་ན། ད་ཅི་སྤྱོད་པའི་བློ་གྲོས་སྣང་ངམ་མི་སྣང་བྱ། ཐལ་མོའི་རྐྱེན་གྱིས་མི་སྣང་ཟེར་ན། འོ་དེ་ཁ་རྟོག་པ་གློ་བུར་བ་རང་བཞིན་མེད་པ་ཡིན་ནོ། །ཡང་སུམ་ཅུ་རྩ་གསུམ་ཆོས་བཟང་ལྷའི་མདུན་ས་ན་ལྷའི་དབང་པོ་བརྒྱ་བྱིན་བཞུགས་སོ་ཞེས་བྱ། དེ་ཉིད་དུ་ངག་ཏུ་ཕཊ་ནམ་མཁའི་མཐོང་ན་མཚོན་པའི་དཔེ་གཅིག་འདུག་གོ་བྱ། དེར་དབང་པོ་མ་བརྗེད་དམ་བྱ། སྒྲ་ཕྱི་མ་དེའི་རྐྱེན་གྱིས་བརྗེད་ཟེར་ན། དེ་ཁ་རྟོག་པ་གློ་བུར་བ་ཡིན། སྣང་གྲགས་དེ་དང་འདྲའོ། །མདོར་ན་ལུས་ཀྱི་སྤྱོད་ལམ་ངེས་མེད་མང་པོ་བསྟན་པས། རྟོག་པ་གློ་བུར་བ་རྐྱེན་ལས་སྐྱེས་པ་སྐད་ཅིག་མ་ངོ་བོ་སྟོང་པ། ངེས་མེད་གཞི་མེད་རྩ་བྲལ། དེ་ལྟར་བརྡ་སྣ་ཚོགས་ཀྱིས་མཚོན་ནས། གཅེར་མཐོང་ཐུག་ཕྲད་དུ་ངོ་སྤྲད། ཅིར་སྣང་ཐམས་ཅད་བློ་བུར་བ་རང་བཞིན་མེད་པ་རྨི་ལམ་སྒྱུ་མ་ལྟ་བུ། བར་སྣང་ལྟ་བུར་ངོ་སྤྲད། དེ་ལ་སྐུ་ཡེ་ཤེས་ལྔ་ཇི་ལྟར་གནས་ཤེ་ན། གཞི་རྩ་གང་ཡང་མེད་དེ། སྐྱེ་མེད་ཆོས་སྐུ། རྟེན་འབྲེལ་གྱིས་སྐྱེས་པ་སྤྲུལ་སྐུ། ངོ་བོས་སྟོང་པ་སྣང་སྟོང་ཐ་དད་མེད་པ་ལོངས་སྐུ། དབྱེར་མེད་ངོ་བོ་ཉིད་སྐུ། དེ་སྐུ་བཞི་ལྷུན་གྲུབ་གོམས་པར་བྱས་པ་ཙམ་ལས་ལམ་ལོགས་པ་ཞིག་སྦྱངས་པས་འབྲས་བུ་ལོགས་ནས་ཐོབ་རྒྱུ་མེད། ཕྱག་ཆེན་མངོན་སུམ་ལམ་བརྡའི་ངོ་སྤྲོད་དོ། །ཞང་གི་ཐུགས་ནས་ཕྱུང་བ་ཀུན༵། །དཔེ་བཞག་དག༵འ་མགུ་རངས་པའི་སྲོལ། །སེམས་ཉིད་འཆིང་གྲོལ༵་མཆོ༵ག་སྟོན་གནས། །ཡི་གེར་སྣང་བ་འདི་ཉིད་དོ། །ཞང་གི་ཟབ་རྒྱ་ནས་བཏུས་སོ། (༩༤) །དཔལ་ཆེན་རྒྭ་ལོའི་སྦྱོར་དྲུག་གི་ཁྲིད་ཡིག ༑དཔལ་ཆེན་རྒྭ་ལོའི་སྦྱོར་དྲུག་གི་ཁྲིད་ནི། སྐྱབས་སེམས་སྔོན་དུ་སོང་ནས། མཆོག་གྲུབ་ཡེ་ཤེས་ཀྱི་ལམ་ལ་གནས་ཁང་མུན་པ་ཅན་ལ་ལུས་གནད་དང་བཅས་པས། ཐ་མལ་པའི་མིག་ཤེས་གཟུགས་ལ་འཇུག་པ་ལྟར་རྣལ་འབྱོར་པས་རྟགས་སྣང་གང་ཤར་གྱི་ཡུལ་ལ་སོ་སོར་བསྡུད་དེ། དེ་ལ་གཟུགས་མཐོང་ལ་གཡེང་ཚེ་དུང་སྒྲ་རྣ་བར་མི་ཚོར་བས་རྟོག་གཉིས་གཅིག་ཆར་མི་ལེན་པ་བཞིན། རྣལ་འབྱོར་པས་འཆར་སྒོ་གང་སྣང་དེ་རང་ལ་ཡིད་རྩེ་གཅིག་ཏུ་བཞག་པས། ལས་སྣང་གི་ཚོར་བས་མི་འཕྲོག་པའི་སེམས་རང་མལ་དུ་གནས་པའི་ངང་ཚོར་ཆུང་ཀུན་འགྲོའི་བྱེད་པ། དུ་སོགས་བསམ་གཏན་ཡུལ་ཅན་ལྔ་ལ་སྦྱར་ནས་དགའ་བདེ་རྟོག་དཔྱོད་ཤེས་རབ་གཡོ་མེད་རྣམས། གང་ཤར་དེའི་འཆར་སྒོར་དྲངས་ལ། ཞི་ལྷག་ཟུང་འབྲེལ་སོར་བསམ་མ་བུ་ཞལ་མཇལ་བྱ། རོ་རྐྱང་ཉི་ཟླ་ཁ་སྦྱོར་རླུང་སེམས་གཉིས་འདྲེས་སྲོག་རྩོལ་རྡོ་རྗེའི་བཟླས་པ་ཕྱིར་འོངས་ནང་འགྲོ། གནས་པའི་དབང་ལས་ཧཱུྃ་ༀ་ཨཱཿ སྒྲ་མེད་ཡིད་ཀྱིས་བཟླས་ཤིང་གནས་ཚེ་ཁ་སྦྱོར་བུམ་ཅན་གྱི་རྩོལ་བས་དབུ་མར་བཙན་ཐབས་སུ་འཇུག་ལ། སྟེང་དུ་ཡང༌། ཡང་ཡང་ལོངས་སྤྱོད་ཀྱི་རླབས་བཏབ་སྟེ་སྟེང་འོག་ལས་རླུང་གི་རྒྱུ་བ་འགག་པ་ལ་སྲོག་རྩོལ་གའུ་ཁ་སྦྱོར་བྱ། གཏུམ་མོའི་མེས་བྱང་སེམས་ཞུ་བའི་བདེ་ཉམས་རང་རིག་གི་འཛིན་པའི་ཤུགས་འབྱུང་དུ་ལུས་ཚོར་བདེས་ཡུལ་སྣང་དེ་མཚུངས་སྣང་བ་བདེ་བའི་རང་བབས་སྐད་ཅིག་རེ་ལ་ཡང་ལུས་གནད་འཇོག །ཐབས་ལྟ་སྟངས་གང་གི་ཚེ་ཡང་སྔར་བདེ་རྗེས་དྲན་སྡུག་བསྔལ་གྱི་སྣང་བ་འགོག་པའི་ཏིང་ངེ་འཛིན་ལྷུག་པར་རང་ཤར་ཏེ། དྭངས་མས་ལུས་ཁྱབ་པས་རྫུ་འཕྲུལ་མངོན་པར་འདུ་བྱེད་པ་གཞན་སྣང་ཟིལ་གནོན་འབད་མེད་འབྱུང་སྟེ། དཔལ་དུས་ཞབས་པས། རབ་ཀྱིས་དང་པོར་རྒྱུད་ལས་རྟོགས་ཞེས་གསུངས་པའི་ལག་ཁྲིད་སྙིང་གཏམ་གསང་བའི་མདུད་འཆིང་ཡིན་ལ། དེའི་བོགས་འབྱིན་བསིལ་བའི་ཚུལ་དུ་མཁའ་འགྲོས་དངོས་སུ་སྩལ་བའི་དམན་པ་ལས་ཀྱི་གཏུམ་མོ་ཞག་བདུན་གྱིས་ངེས་པ་བསྐྱེད་པའི་གནད་ཀྱང༌། རང་ཡི་དམ་དུ་གསལ་བའི་ལྟེ་བའི་མེ་ཚང་དུ་བླ་མས་ཡེ་ཤེས་ཀྱི་མེའི་རྣམ་པ་བླ་མའི་འཆར་སྒོར་ལམ་མེ་བ་ཚོན་གང་བསམ་པ་འདི་ཉིད། སངས་རྒྱས། ཆོས། དགེ་འདུན། སྐྱབས་ཡུལ་ཀུན་འདུས་ཡིན་ངེས་ཞེས་མོས་དུང་བསྐྱེད། རྐང་པ་བསྣོལ། ལག་པ་ཕན་ཚུན་བསྡམ། མགྲིན་པ་དགུག །སྒལ་སྐེད་བསྲང༌། དཔུང་པ་བརྒྱང༌། རླུང་རོ་ཕྱིར་བསལ་རྗེས་རྔུབ་པ་འཇམ་རིང་ཤུགས་རྫོགས་པ་སྨད་དུ་གཅུན། སྟེང་འོག་རླུང་ཐད་མཉམ་བཟུང་ལ་དགང་བ་ཕན་ཚུན་གཅུས་ཤིང་རླུང་དགང༌། གཞིལ་བ་ལུས་གསིགས་ལ་རླུང་གིས་ལུས་ཀུན་ཁྱབ་པར་བསམ། དབྱུང་བ་དངོས་སུ་སྣ་སྒོ་དང༌། དམིགས་པ་བ་སྤུའི་རྩེ་ནས་ཕར་སོང་བར་བསྒོམ་ཞིང་ལྟེ་བར་མེ་སྲན་མ་ཙམ་པ་མེ་སྟག་འཕྲོ་བ་ལུས་སྲེག་པ་ཙམ་གྱི་དྲོད་དང་ལྡན་པ་ལ་སེམས་ཁབ་མིག་ཏུ་སྐུད་པ་འཛུད་པ་ལྟར་བསྒྲིམས་པས་མེ་རྒྱུའི་ཐིག་ལེ་སྲན་མ་ཙམ་པ་ལམ་ལས་ཐོབ་པའི་རཀྟ་ཉི་མ་མེ་འབར་ཏེ་མེ་ལྕེ་སོར་བཞིའི་ཚད་དུ་སྦྲུལ་ལྕེ་ལྟར་འཁྱུག་ཅིང༌། རླུང་གིས་བསྐྱོད་པའི་མར་མེའི་རྩེ་ལྟར་རྣམ་པར་གཡོ་བ་ལ་ཡིད་རྩེ་གཅིག་གཏད་དོ། །མེ་ལྕེའི་རྩེས་རྩ་དབུ་མའི་སྒོ་ཕྱེ་ནས་ཤེལ་ནང་དུ་སྐུད་པ་ཚུད་པ་ལྟར་དབུ་མ་དྭངས་གསལ་ཆོས་བཞི་ལྡན་གྱི་ནང་ན་ཡར་དར་དམར་སྣལ་མ་བརྐྱངས་པ་འདྲ་བའི་མེ་ཏལ་ལ་འབར་བ་ལ་སེམས་མ་ཡེངས་པར་འཇོག །དབུ་མའི་རྩེ་ནས་སྤོས་དུད་ལྟར་དུ་བ་སྔོ་ལྗང་སྤྱི་བོ་ནས་སོང༌། ཡར་ནམ་མཁར་གདུགས་ཕུབ་པ་ལྟར་ཁྱིལ་ལེ་ཡོད་པར་བསམས་ལ། དམིགས་པ་ལྟེ་བའི་མེ་ཉིད་ལ་གཏད་དེ་འབད་ནས་བསྒོམས། དུ་བ་དེ་ཡང་རི་ལ་རྨུགས་པ་བབས་ཚུལ་དུ་རང་ལུས་ལ་གོས་སུ་གཡོགས་ཤིང༌། ལུས་ནང་མེ་འབར་བ་ལ་དམིགས་པ་གཅུན་ནས་རྩེ་གཅིག་ཏུ་བསྒོམ། མེ་ལྕེ་འཁྱོགས་པོ་སྤྱི་བོ་བཤང་སྒོའི་ལམ་གཉིས་ནས་ཕྱིར་ཐོན་ཞགས་པ་བསྐོར་བ་ལྟར་རྩེ་འཁྱིལ་ནས་འོད་ཀོར་རེ་བ་ལ་སེམས་གཏད་ནས། རླུང་དྲག་ཏུ་འཛིན། དབུ་མའི་ནང་ནས་ལུས་རྩ་སྒོ་ཐམས་ཅད་དུ་མེས་གང་ཞིང༌༑ རང་གི་ཕྱིའི་ཕྱོགས་བཞིར་ཉི་མའི་དཀྱིལ་འཁོར་ཆེ་བ་མེ་དབལ་གྱིས་ལུས་སྲེག་པ་ཙམ་དང་ཉི་མའི་འོད་ཟེར་དང་ལུས་ལས་འཕྲོས་པའི་མེ་འོད་ཀྱི་རྩེ་འཕྲད་ནས། མེའི་ཟེར་འཐབས་པས་ལུས་ཕྱི་ནང་མེ་དྲོད་དུ་འུར་འུར་བ་ལ་ཡིད་གཏད་ནས། ལུས་ཉྭ་བཞི་སྒྲིམས། རླུང་བཙན་ཐབས་སུ་དགང༌། འཁྱགས་པ་ཡིད་ལ་མི་བྱེད། དྲོ་ཧུ་རེ། ཚ་ལམ་མེ། ཉི་མ་སྟོང་གི་འོད་ཀྱིས་གདུངས་པར་བསྒོམ་མོ། །རྒྭ་ལོའི་གསང་གཏམ་ཀུན༵་གྱི་གཙོ། །དག༵འ་བདེ་རང་གྲོལ༵་མཆོ༵ག་གི་བཅུད། །སྨན་མཆོག་གཏུམ་མོའི་ཉམས་ལེན་ཉིད། །ཞང་གི་ཟབ་གནད་ནང་ནས་བཀོལ། །བླ་མ་ཞང་འཚལ་པའི་ཁྲིད་ཡིག་ལས་བཏུས་སོ། (༩༥) །ཕག་གྲུའི་ཐེལ་སྐོར་གྱི་ཁྲིད་ཡིག །ཕག་གྲུའི་ཐེལ་སྐོར་གྱི་ཁྲིད་ནི། སྐྱབས་སེམས་སྔོན་དུ་སོང་ནས། ལུས་གནད་སྐྱིལ་ཀྲུང་ཚིགས་པ་བསྲང༌། མིག་སྣ་རྩེ། མཉམ་བཞག་ཕྱག་རྒྱ་བཅའ། ཕག་མོའི་བརྡ་དབང་དུག་གསུམ་ཞལ་བསྒྱུར་གྱིས་སྒོ་ངེས་པར་བྱས་ལ། རྐྱེན་བཞིའི་གཉིས་དང་བྲལ་བའི་བཤེས་གཉེན་ལ་བརྟེན་ཏེ། ཤེས་རབ་ཀྱིས་རང་གི་སེམས་ཀྱི་མཚན་ཉིད་ཤེས་པར་བྱས། སྐྱེ་འགག་གནས་མེད། བློ་འདས་སྐུ་བཞི་གདོད་ནས་ལྷུན་གྲུབ། ཆོས་ཐམས་ཅད་ཀྱི་མཚན་ཉིད་མཚན་གཞི་ལས་འདས་པ། ཚིག་གི་ཆུ་ལས་དོན་གྱི་ཉ་གཟུང༌། ཆོས་ཐམས་ཅད་ཀྱི་མཉམ་ཉིད་ཤེས་པས། སྐད་ཅིག་ལ་བྱུང་ཚད་ཆོས་སྐུའི་ཡོ་ལང་དུ་ལོངས་སྤྱད་པས་སྐུ་ཡོངས་རྫོགས། ཚོགས་ལམ་སོགས་ཁྱད་པར་གྱི་ལམ་ལྔ་སྦྱང༌། མཐར་ཕྱིན་བྱང་ཆུབ་ཀྱི་ཕྱོགས་ཆོས་སུམ་ཅུ་རྩ་བདུན་ནམ། དྲན་པ་ཉེར་གཞག །ཡང་དག་སྤོང༌། ལམ་དེ་ལས་རྫུ་འཕྲུལ་གྱི་རྐང་པ་བཞི། དད་པས་རྒྱུ། དྲན་པས་ལམ། གྲོགས་བརྩོན་འགྲུས་གསུམ་ཐབས་ཤེས་རབ་ཀྱིས་ཤེས་དགོས། ཏིང་ངེ་འཛིན་འབྲས་བུ་སྟོབས་ལྔ་དང་བྱང་ཆུབ་ཀྱི་ཡན་ལག་འཕགས་ལམ་བརྒྱད། དེ་ལྟར་ལྟ་བའི་གོ་ཆས་རྟོག་པ་ལམ་དུ་འཁྱེར་བ་ནི། ནམ་མཁའི་ཁམས་ལ་བརྟག་པར་མི་ནུས་བཞིན། །སེམས་ཀྱི་མཚན་ཉིད་རིག་པ་མ་ཡིན་ན། །སྒྱུ་མའི་གཟུགས་ལ་ལེགས་ཉེས་རྟོག་མཁན་འཁྲུལ། །གཟུགས་བརྙན་དོན་དུ་འཛིན་པའི་བུ་ཆུང་བཞིན། །མཉམ་རྗེས་གཉིས་པོ་ལྕགས་ཟད་བརྡར་ཟད་ཡིན། །འཁོར་འདས་དབྱེར་མེད་ཆོས་སྐུ་ཉིད་ལ་མཚུངས། །ཆོས་རྣམས་ཐམས་ཅད་ནམ་མཁའ་ཉིད་ལ་མཚུངས། །ཆོས་རྣམས་ཐམས་ཅད་ནམ་མཁའི་ཆོ་འཕྲུལ་ཡིན། །རང་མཚངས་རིག་ན་བཅིངས་གྲོལ་དགོས་པ་མེད། །མེད་བཞིན་སྣང་བ་ནམ་མཁའི་ཆོ་འཕྲུལ་ཡིན། །ཤེས་པས་གྲོལ་བ་རྨི་ལམ་སད་པ་འདྲ། །སྣ་ཚོགས་སྣང་བ་ནམ་མཁའི་མེ་ཏོག་ཡིན། །བྱིས་པའི་དགའ་སྡུག་རྒན་ལ་ཅང་བདེན་ནམ། །ཕན་ཡོན་མེད་པ་སྒྱུ་མའི་རང་སྣང་ཡིན། །ནམ་མཁའི་ལྟས་མོ་འདི་འདྲ་ཤེས་པས་ལྟོས། །གཟུགས་ནས་རྣམ་མཁྱེན་ནམ་མཁའི་རི་མོ་ཡིན། །སྒྲོ་འདོགས་སེམས་ལ་ཆོད་ཅིག་སྒོམ་ཆེན་ཀུན། །གང་བྱུང་ཆོས་ཀྱི་དབྱིངས་ལ་བླང་དོར་མེད༑ ༑ཐམས་ཅད་སྒྲོ་བཏགས་ཡིན་ཕྱིར་རྫུན་ཕུགས་རྡིབ། །སྤང་བླང་མེད་པའི་དོན་ཅིག་རྟོགས་ཏེ་མཆི། །བཅིངས་གྲོལ་གོལ་ས་མེད་པའི་ཚུལ་ལུགས་མཆོག །རང་ལ་རང་གིས་ལྟོས་དང་རང་མཚངས་རིག །ཅིར་ཡང་འཆར་བ་གང་དུ་མི་འཛིན་པ། །ལམ་མཆོག་འདི་ལས་གོང་ན་གཞན་མ་མཆིས། །བག་ཆགས་འཐས་པའི་མི་སྣང་དགུ་སྣང་འདི། །བློ་ཡིས་བཟུང་ཚད་མཚན་མའི་ས་བོན་ཡིན། །ལྟོས་ཤིག་ལྟོས་ཤིག་ཅིར་ཡང་མ་བལྟ་ཞིག །བརྡར་ཤ་སེམས་ལ་ཆོད་ལ་གཅོད་མཁན་ལྟོས། །རེ་དོགས་འཁོར་འདས་ཐམས་ཅད་ཀློང་དུ་ཞི། །དངོས་པོའི་ཆོས་ཉིད་སྟེང་དུ་དེ་ཡིས་ཕེབ། །གཉིད་སད་རྨི་ལམ་བཞིན་དུ་རྟག་པར་ལྟོས། །དོན་གྱི་དབྱིངས་ཉིད་སྨྲ་བསམ་བརྗོད་མེད་ཡིན། །བློ་དང་བྲལ་བ་ཕྱག་རྒྱ་ཆེན་པོར་འདོད། །ཐབས་ལམ་གཏུམ་མོ། ལུས་ལྷའི་སྟོང་ར། ལུས་གནད་གཙོ་བོར་འདོན། མིག་དེ་བཞིན་དུ་བསྒྲིམ། རང་ཉིད་ལྷའི་སྤྱི་བོར་བླ་མ༑ རྩ་གསུམ་འཁོར་ལོ་བཞི་དྭངས་གསལ། རླུང་གཡོན་ནས་རྒྱུ་དུས་བསྒོམ། རླུང་སྦྱོར་བཞི་ལྡན་རྔུབ་དགང༌། གཞིལ། འཕངས། ལྟེ་བའི་ཨ་ཐུང་སོགས་ལ་རླུང་སེམས་བཟུང༌། མེ་སོར་བཞི་ནས་ཉི་ཤུའི་བར་ལུས་ཀྱི། ལྟེ། སྙིང༌། མགྲིན། སྤྱི། རིལ་པོར་བདེ་དྲོད་ལ་ངེས་ཤེས་བསྐྱེད་དེ་བོགས་དབྱུང་འབར་འཛག་སྐྲ་ཤད་འཛིངས་པའི་བསམ་གཏན་ལ་སྙུགས་ཇེ་རིང༌། མི་རྟོགས་མཚམས་སུ་ངལ་གསོ། རླུང་ཐམས་ཅད་ལྕགས་ཐག་སྦྲེལ། རྡུབ་ངལ་མི་གསོ། མཁལ་ཁུང་གཉིས་སུ་རཾ། ལྟེ་བར་མེའི་པདྨ་དམར། དབུས་ཨ་ཐུང་རང་བཞིན་མེ། རོ་རྐྱང་གི་རླུང་བུས། མེ་སོར་བཞི། བརྒྱད། བཅུ་གཉིས། ལྟེ་སྙིང༌། མགྲིན་སྤྱི་བར་དུ་ཕྲ་རགས་ཀྱི་མེས་གང༌། ཧཾ་ཞུ་བའི་ཐིགས་པ་ཕྲ་མོ་དང༌། རིགས་པ་དར་སྐུད་བརྐྱངས་པ་བཞིན་བབས་པས་འཁོར་ལོ་གོ་རིམ་བཞིན་གང༌། དམིགས་པ་བསྒྲིགས་ཆགས་མ་མེད། བྱེད་བྱང་ལུགས། བདེ་དྲོད་ཆེར་འབར་བ་ལ་ཡིད་གཏད། ལས་དང་གཏུམ་མོ་མཆོག་གི་གཏུམ་མོ་གསུམ་གཅིག་ཏུ་དྲིལ་ནས་ཉམས་སུ་ལེན། སྤྱན་མ་སོགས་ཡུམ་ལྔ་ཞུ་བའི་བདེ་བ་རླུང་སེམས་ཀྱི་སྟེང་དུ་འཆར། སྒྱུ་ལུས་ཀྱི་འཚང་རྒྱ་ཐབས། སྔོན་འགྲོ་གཏུམ་མོ་བཞིན། རང་དང་སྣང་བ་ཐམས་ཅད་སྒྱུ་མ་ལྟ་བུར་བསྒོམ། མེ་ལོང་གི་གཟུགས་བརྙན་ལ་བསྟོད་སྨད་བྱ། དགའ་མི་དགའ་མེད་ན་དེར་གཟུགས་བརྙན་རང་ལ་བསྟིམ། བདག་ལ་བསྟོད་སྨད་བྱེད་དུ་གཞུག །གཟུགས་བརྙན་བཞིན་དགའ་མི་དགའི་བསམ་པ་མི་ཡོང་ངེས། ཚོང་འདུས་སོགས་སུ་ཕྱིན་སྔར་བཞིན་བལྟ། མེད་ན་ཡི་དམ་སོགས་ཀྱི་སྐུ་མེ་ལོང་ལ་འཆར་དུ་བཅུག །དེ་བཏོན་ནས་རང་ལ་ཡང་ཡང་བསྟིམ། རང་ལུས་ལྷར་གསལ་ན་དག་པའི་སྒྱུ་ལུས་འབྱོངས་པ་ཡིན། སྦྱངས་པས་མཉམ་རྗེས་མེད་ན་མཆོག་ཐོབ། ཡོད་ན་བར་དོར་འཚང་རྒྱ། རྨི་ལམ་འཛིན་ཚེ་མགོ་བྱང་བསྟན། སྤྱི་བོའི་བླ་མ་ལ་སངས་རྒྱས་དངོས་ཀྱི་འདུ་ཤེས་བྱ། རྨི་ལམ་འཛིན་པའི་གསོལ་བ་བཏབ། སེམས་ཅན་ཐམས་ཅད་སྒྱུ་མས་རྡོ་རྗེ་འཛིན་པ་ཐོབ་པར་སྨོན་པའི་སེམས་བསྐྱེད། མགྲིན་པར་པདྨ་དམར་པོ་འདབ་མ་བཞི་པའི་ལྟེ་བར་བླ་མའི་ངོ་བོར་ༀ། འདབ་བཞིར་ཨ་ནུ་ཏ་ར་དཀར་སེར་དམར་ལྗང་མདུན་ནས་བསྐོར། འཁོར་བ་ལ་དམིགས་པ་གཏད། རྨི་ལམ་ཟིན་པར་བྱ་བའི་འདུན་པ་དྲག་པོ་ཡང་ཡང་བྱ། ཨ་ལ་ཤེས་པ་གཏད་ནས་གཉིད་པས་སྲོད་ནམ་གུང་ཐོ་རངས་ལ་ཟིན་ཡོང༌། མ་ཟིན་ན་སྨིན་མཚམས་སུ་ཐིག་ལེ་དམར་པོ་འཚེར་བ་སྲན་མ་ཙམ་ལ་ཤེས་པ་གཏད་པས་ཟིན། རྨི་ལམ་ལ་རྨི་ལམ་དུ་ཟིན་ཅིང་ཤེས་ན། ཡུན་བསྲིངས་ནས་བསྐྱང༌། གཅིག་ལས་གཉིས་སུ་སྤེལ་བ་དང༌༑ བསྒྱུར་བ། སྐྲག་ཟིན་རྩུབ་ཟིན་སོགས་ལ་མཆོངས་པ་སོགས་བྱ། གཉིད་ཀྱི་འོད་གསལ། རྨི་ལམ་གྱི་དངོས་པོ་ཐམས་ཅད་ལ་མཐའ་དབུས་མེད་པའི་ནམ་མཁའ་ལྟ་བུར་གྱུར་པའོ། །ཉམས་དེ་བསྐྱངས་པས་འཆི་ཁའི་འོད་གསལ་ཟིན་ནས་མཆོག་གི་དངོས་གྲུབ་ཐོབ་པས། གྲོགས་དང་བཅས་ཏེ་ལྭ་བ་པ་བཞིན་དུ་ཉམས་སུ་བླང་ངོ༌། །འཕོ་བ་གློ་གཡས་ཕབ། མགོ་བྱང༌། སྔར་གྱི་འོད་གསལ་ངང་ནས་འཕོས་ན་རབ་ཀྱིས་མཆོག་གྲུབ་ཅིང༌། ཐ་ནའང་མི་ལུས་ཆོས་ལྡན་ཐོབ། རང་ལུས་ལྷ། དབུ་མ་སྦ་ལྕག་ཙམ་གསལ་བཏབ། སྣོད་བཅུད་འོད་སྣང་དུ་གསལ་བར་ཞུ། རང་ལ་ཐིམ། ཧཱུྃ་ལ་བསྡུ། སྐར་མདའ་བཞིན་སྤྱི་བོར་བླ་མ་རྡོ་རྗེ་འཆང་གི་ཐུགས་ཁར་ཐིམ། དེ་ལ་མཉམ་པར་བཞག །ལན་མང་དུ་སྦྱང༌། དབང་པོ་རབ་འོད་གསལ། འབྲིང་སྒྱུ་ལུས། ཐ་མ་མི་ལུས་གང་འདོད་དུ་འཕོ། བསགས་པ་ཞན་ན་བར་དོར་འཁྱམས་པ་ཆོས་ཉིད་ཡིན་པས། ཞག་གསུམ་ཙམ་ནས་འཆི་བའི་རྟགས་གསུམ་འཆར། རྡོ་རྗེའི་གདན་དང་མངལ་མ་གཏོགས་གང་ལའང་མི་ཐོགས། མངལ་དགག་པ་ལ་རང་ཉིད་ཡི་དམ་དུ་གསལ་བས་འོད་གསལ་དུ་བཞག་པས་ཁེགས། ཡང་ན་རང་དང་སྣང་བ་ཐམས་ཅད་བླ་མ་ཡབ་ཡུམ་དུ་བསྒོམ་པས་དགག །ད་ལྟ་ནས་སྦྱོང༌། ཡང་ཕ་མ་འདུ་འཕྲོད་དུས་ཆགས་པ་སྐྱེ་བས། དེ་གཉིས་བླ་མའམ་ཡི་དམ་ཡབ་ཡུམ་དུ་མོས་གུས་བསྐྱེད། མཆོད་པ་དང་གསོལ་བ་བཏབ་པས་ཁེགས། ཡང་ན་སྔར་ཆགས་སྡང་བྱས་པས་ཉེས། ད་བྱེད་རི་ཤི་སྙམས་པས་ཁེགས། མ་ཁེགས་ན་རང་དང་སྣང་བ་ལྷ། ལྷ་སྐུ་སྒྱུ་མ་འཇའ་ཚོན། དེ་ཡང་འོད་གསལ་དང་བསྲེས་ཏེ། དྭངས་གསལ་འཛིན་མེད་ཕྱག་རྒྱ་ཆེན་པོ་ལ་བློ་འཇོག །དེས་མི་ཁེགས་མི་སྲིད། བདུན་ཕྲག་དང་པོ་དེས་ཁེགས་ཤིང༌། ཕྱི་མ་རྣམས་ཀྱང་རྩོལ་མེད་དུ་ཁེགས། འདས་པོའི་དོན་དུ་དགེ་རྩ་ལ་འབད་པ་གལ་ཆེ། ཀུན་ཁྱབ་ཏུ་སྔར་བསྟན་པའི་འོད་གསལ་ཕྱག་རྒྱ་ཆེན་པོ་ཉིད་ལ་རྩལ་འདོན། གནད་འདོམས་ལས་མངོན་རོལ་གཞན་མེད་དོ། །བཀའ་བརྒྱུད་ཕྱག་ཆེན་ཀུན༵་གྱི་བཅུད། །དག༵འ་བསྐྱེད་དྭགས་པོའི་དགོངས་གྲོལ༵་གནད། །གསང་མཆོ༵ག་ཕག་གྲུའི་ཉམས་བཞེད་མཐིལ། །ཆོས་དྲུག་གསལ་འདོམས་ཡི་གེར་བཀོད། །རྗེ་ཕག་གྲུའི་གསུང་འབུམ་ལས་བཏུས་ཏེ་འདིར་ཕྱུང་ངོ༌། (༩༦) །དགོངས་གཅིག་གི་ཁྲིད་ཡིག །དགོངས་གཅིག་གི་ཁྲིད་ནི། སྐྱབས་སེམས་སྔོན་དུ་སོང་ནས། བསྟན་པ་ཐ་དད་པས་གཅིག །གྲུབ་མཐའ་རྟེན་འབྲེལ་ཡིན། ཆོས་ཕུང་བརྒྱད་ཁྲི་བཞི་སྟོང་ཉོན་མོངས་གཉེན་པོར་གསུང༌། གསུང་རབ་ཡན་ལག་བཅུ་གཉིས་ཐ་དད་ཡིན་མོད། གཅིག་ནང་དུ་ཐམས་ཅད་ཚང༌། སྡེ་སྣོད་གསུམ་གཅིག་ལ་གཅིག་ཐུག །རེ་རེ་ལ་གསུམ་ཀ་ཚང༌། བཀའ་ཐམས་ཅད་ལ་ཕུན་ཚོགས་ལྔ་ཚང༌། འཁོར་འདས་ཀྱང་ཕུན་ཚོགས་ལྔས་བསྡུས། འདུལ་བ་ཐུན་མོང་གི་མདོ་སྡེ། སེམས་ཙམ་མངོན་པ། མུ་སྟེགས་བོན་གྱི་སྒོར་ཞུགས་པས་བདེན་པ་མཐོང་བའི་སྐབས་མེད། ཐར་པ་ཆ་མཐུན་ནི་ཡོད། མུ་སྟེགས་པས་ཉམས་སུ་བླང་བྱ་ཐམས་ཅད་སྤང་བྱ་ཡིན་ཟེར་ཡང་སྡོམ་པ་བསྲུང་བ་དང་སྙིང་རྗེ་ཕྱི་རོལ་པ་ལའང་ཡོད། རྒྱུ་མཚན་ཉིད་ཀྱི་ཐེག་པས་ཚེ་གཅིག་གིས་སངས་རྒྱ་བ་ཡོད། མཚན་ཉིད་སྔགས་སངས་རྒྱས་གཅིག །སྡོམ་གསུམ་གོང་ནས་གོང་དུ་དོག་ཏུ་འགྲོ། བྱང་ཕྱོགས་སོ་བདུན་ནི་ལམ་སངས་རྒྱས་ས་དེའི་ཕ་རོལ་ན་ཡོད་མོད། ལམ་ངོ་བོས་བགྲོད། ཉན་རང་རིགས་ཆད་སངས་མི་རྒྱ་བ་ཡིན་མོད། མཐར་ཐུག་བྱང་ཆུབ་ཆེན་པོར་འགྱུར། འཁོར་བ་མཐའ་མེད་སྤྲོས་པ་མེད། སྡེ་པ་བཞི་ངོ་བོ་གཅིག །རྨི་ལམ་ས་བོན་ཉམས་པ་ཉེས་པ་མེད་མོད། རྨི་ལམ་དུ་ཉམས་ཀྱང་ཉེས་པ་འབྱུང༌། ས་ཐོབ་ནས་ངན་འགྲོ་མེད་མོད། ས་ཐོབ་ངན་སོང་དུ་སོང་བ་ཡོད། ཚོགས་བསགས་ཉམས་ལེན་ཀུ་སུ་ལུའི་ཚོགས་གསོག་ཡིན། སྒྲུབ་པ་བྱེད་པ་ལ་ནད་དང་གནོད་པ་བྱུང་ན། སེལ་བའི་ཐབས་ལམ་དུ་གཏོང་བ་ཡིན། གསང་སྔགས་སྡེ་སྣོད་གསུམ་གྱི་སྙིང་པོ་ཡིན། དབང་བསྐུར་ཡང་མི་ཐོབ་པར་འདོད་པ་དང༌། མ་བསྐུར་ཡང་ཐོབ་པར་འདོད་པ་ཡིན་མོད། དབང་པོ་རབ་འབྲིང་གསུམ་ཀ་ལ་ཆོ་ག་དགོས། ལྷ་གཅིག་གིས་ཀྱང་ཕྲིན་ལས་ཐམས་ཅད་འགྲུབ། ལྷ་རེ་ལ་མཚན་རེ་ཡོད་མོད། ལྷ་ཐམས་ཅད་ལྷག་པའི་ལྷས་བཟུང༌། སྔགས་ནས་རྩ་བའི་དམ་ཚིག་གནང་སྐབས་མེད། ལྷ་ལ་རིམ་འཇུག་པ་གནད་ཟབ། བསྐྱེད་རིམ་ལ་བསྙེན་བགྲངས་གཙོ་བོ་ཡིན་མོད། ལྷ་རྟེན་འབྲེལ་གྱི་ཚོགས་པས་འགྲུབ་པར་ཤེས་དགོས། དཀའ་ཐུབ་ལྷ་ལ་བརྙས། ཐ་མལ་གྱི་ལུས་དམད་པར་བཞེད། རྒྱུད་སྡེ་བཞི་སྔོན་མ་དྲང་དོན། བླ་མེད་གཅིག་པུ་ཟབ་མོད། ངེས་དོན་ཐམས་ཅད་ལ་དགོས། ཆོ་ག་གང་གིས་འདུལ་བར་བསྡུས་པ། སྲུང་འཁོར་རྡོ་རྗེའི་ར་བ་ཟབ་པ་འདོད་མོད། སྲུང་བའི་འཁོར་ལོ་བྱང་ཆུབ་ཀྱི་སེམས་ཡིན། སྔགས་ཀྱི་ཉམས་ལེན་རྩ་རླུང་ཟབ་པར་འདོད་དེ་གཅད་འདུལ་བ་ཆེ། རྩ་རླུང་ཐིག་ལེ་དག་པ་ཁྱད་པར་དུ་ཟབ། དམ་ཚིག་གཉན་མི་གཉན་དཔོན་སློབ་གཉིས་ཀའི་དམ་ཚིག་མཉམ། ཀུན་གཞིའི་རྣམ་ཤེས་བྱིན་རླབས་དང་ལྡན་པས་གཞན་དུའང་མཐོང༌། ཆོས་ཀུན་སོ་སོ་ཐར་པའི་སྡོམ་པ་རེ་རེར་འདུ། མི་དགེ་བ་སྤྱད་ན་ས་བཅུ་པ་ཡང་ངན་འགྲོར་ལྷུང༌། འདུལ་བ་ཕར་ཕྱིན་གསང་སྔགས་གསུམ་མི་གཅིག་པར་འདོད་མོད། འདི་གསུམ་ཆར་ལམ་དུ་བཞེད་དོ། །ཕྱག་རྒྱ་ཆེན་པོ་ལ་དགེ་མི་དགེ་གཉིས་ཀས་སྒྲིབ་པར་འདོད་པ་མིན་མོད། དགེ་བའི་ངོ་བོས་ཆོས་སྐུ་ལ་སྒྲིབ་མི་སྲིད། བྲལ་བའི་འབྲས་བུ་ལ་རྒྱུ་མི་འདོད་མོད། རྒྱུ་མེད་ཀྱི་འབྲས་བུ་མི་སྲིད། བསྒོམ་བྱ་སྒོམ་བྱེད་གཉིས་བསྲེས་མཐར་ཐུག་ཏུ་འདོད་མོད། སྤྲོས་བྲལ་ཉན་ཐོས་སུ་བཞེད་དོ། །རླུང་རྩོལ་སྦྱོར་བ་བཞི་ལྡན་ཟབ་པར་འདོད་མོད། རླུང་མི་འཛིན་ལྷུག་པར་འཇོག་པ་གནད་ཟབ། འཕོ་བ་ཧཱུྃ་ཡིག་ལ་བརྟེན་ནས་བླ་མའི་ཐུགས་ཁར་འཕོ་བར་འདོད་མོད༑ མཆོག་གི་འཕོ་བ་རྣམ་ཤེས་འོད་གསལ་ལ་བྱ། སངས་རྒྱས་མྱ་ངན་འདས་པ་བུད་ཤིང་ཟད་པའི་མེ་བཞིན་དུ་ཤིང་ཟད་མེ་ཟད་འདོད་པ་ཡང་ཡོད་མོད། འདིར་ནི་བྱང་ཆུབ་རང་གཟུགས་མཐའ་དང་བྲལ་བའི་ངོ་བོར་བཞེད་དོ། །འདིར་བཤད་ཀྱི་དོན་རྣམས་མོས་གུས་ལྔ་ལྡན་གྱི་སྐྱ་བར་དུ་བཅུག་སྟེ་ཉམས་སུ་ལེན་པ་ཉིད་དོ། །དགོངས་པའི་དབྱིངས་སུ་ཆོས་རྣམས་ཀུན༵། །རོ་གཅིག་དག༵འ་མགུར་ལེགས་གཟིགས་ཆ། །རང་གྲོལ༵་མཆོ༵ག་ཏུ་བསྟན་པ་ཡི། །རྡོ་རྗེའི་གསུང་འདོམས་ཡི་གེའོ། །རྡོ་རྗེའི་གསུང་ཞེ་བརྒྱད་པ་ལས་བཏུས་སོ། (༩༧) །སྟག་ལུང་པའི་ཆོས་དྲུག་གི་ཁྲིད་ཡིག །སྟག་ལུང་པའི་ཆོས་དྲུག་གི་ཁྲིད་ནི། སྐྱབས་སེམས་སྔོན་དུ་སོང་ནས། གཏུམ་མོ་དམན་མཆོག་གིས་གཉིས་སུ་འབྱེད། ལས་རླུང་གཅུན་ལ་སྣང་རིམ་མཆེད། དམིགས་ཐུན་ཆུང་ལ་མང་བ་གནད། ལུས་མེ་འགལ་དྲུག་བཅིངས་བཅའ་སྙིང་རུས་འབད། རྗེས་ཐོབ་ཀྱི་འཆར་སྒོ་མ་དག་སྒྱུ་མའི་དཔེར་བླང༌། སྣང་དུས་ནས་ངོ་བོས་སྟོང་པའི་ཚུལ། རྨི་ལམ་ཉལ་དུས་ཀྱི་འཆར་སྒོ་འདུན་པ་ལས་མ་གཡོས་པར། ལས་རླུང་གི་གཏུམ་མོ་མཉམ་བཞག་གི་མཐིལ། མ་དག་པའི་སྒྱུ་ལུས་རྗེས་ཐོབ་ཀྱི་ལམ། རྨི་ལམ་གྱི་འདུན་པ་མཚན་སྣང་གི་ཆོས། ཐུན་བཞིའི་རྣལ་འབྱོར། མཆོག་ཡེ་ཤེས་ཙཎྜ་ལི། རླུང་སྲོག་རྩོལ་ཁ་སྦྱོར། སྤྱི་གཙུག་ནས་ཐིག་ལེ་ཨ་ཤད་ལ་འབེབས། ཉམས་བདེ་གསལ། སེམས་རྟོག་མེད། དབྱིངས་ཀ་དག་ཕྱག་རྒྱ་ཆེན་པོ། འཆར་སྒོའི་རང་རྩལ་གཉུག་མའི་གཤིས། ཡུལ་གདོད་ནས་བཞུགས་པའི་དག་པའི་སྒྱུ་ལུས། མན་ངག་གསེར་འགྱུར་བཟང་པོའི་སྨན་གྱི་གཞི་སྟེ། གཏི་མུག་ལྕགས་ཁམས་བསྒྱུར་ནས། མིང་འོད་གསལ་དུ་བཏགས་པའི་ལག་ལེན། བདེ་སྟོང་ཉམས་མྱོང་འཆར་སྒོ་གང་ཤར་འཕྲལ་བཟོ་བཅོས་མེད་པའི་གུ་ཡངས། འཆི་ཁའི་འོད་གསལ་མ་བུ། ཡིད་ལུས་ཀྱི་གར་མཁན་འཕོ་བའི་ཡིད་དཔྱོད། ཀ་ཧིའི་བཟླས་པ། རླུང་སེམས་ཀྱི་མདའ་གཞུ། དམིགས་པའི་ཁ་བསྒྱུར་གྱི་འཕྲུལ། ཧཱུྃ་ཡིག་གི་འཕོ་བ་ཆོས་དྲུག་གི་དགོངས་དྲིལ་ཉེ་ལམ་མོ། །གཏུམ་མོ་སྒྱུ་ལུས་རྨི་ལམ་དང༌། །དེ་བཞིན་འོད་གསལ་ཀུན༵་དག༵འི་མདངས། །འཆར་སྒོ་རྣམ་གྲོལ༵་མཆོ༵ག་ཉིད་ཀྱིས། །ཆོས་དྲུག་བྱེད་ཚུལ་བྲིས་འདིའོ། །དཔལ་སྟག་ལུང་ཐང་པ་ཆེན་པོའི་ཁྲིད་ཡིག་ལས་བཏུས་སོ། (༩༨) །བླ་སྒྲུབ་རྟེན་འབྲེལ་རོ་སྙོམས་ཀྱི་ཁྲིད་ཡིག །བླ་སྒྲུབ་རྟེན་འབྲེལ་རོ་སྙོམས་ཀྱི་ཁྲིད་ནི། སྐྱབས་སེམས་སྔོན་དུ་སོང་ནས། བླ་མ་ཆོས་ལོངས་སྤྲུལ་གསུམ་དུ་མོས་པའི་གནད་འདོམས་ཉམས་ལེན་ཡང་ཐོ་རངས་ནམ་གྱི་བརྒྱད་ཆ་ནས་ལངས་ཏེ། རང་གི་མདུན་གྱི་ནམ་མཁར་བཀོད་པས་ཁྱད་པར་འཕགས་པའི་ཁྲི་རྒྱན་གྱིས་སྤུད་པའི་དབུས་སུ་བླ་མ། ཟག་མེད་ཆོས་སྐུའི་རང་ཉམས་རྒྱལ་ཡུམ་ཤེས་རབ་ཀྱི་ཕ་རོལ་ཏུ་ཕྱིན་མར་མོས་ལ། ངག་ཏུ་མ་ནམ་མཁའ་མ་བཞི་སྐོར་འདོན་བཞིན་པས་ཡན་ལག་ལྔ་གཏུགས་ཀྱི་ཕྱག་སྟོང་ཕྲག་གྲངས་མ་འཆོལ་བའི་ངེས་ཤེས་དང་བཅས་ནས་བསྒྲུབས་མཐར། ཡུམ་ཆེན་ཤེས་ཕྱིན་བླ་མའི་ངོ་བོ་རང་ལ་ཐིམ་པས་རང་སེམས་ཆོས་སྐུ་སྤྲོས་བྲལ། བྱ་བྱེད་ལས་གསུམ་གྱི་དྲི་མས་མ་གོས་པའི་རང་རིག་རྗེན་པ་ཅི་ཙམ་གནས་པའི་རང་བབས་བསྐྱང༌། ཟས་ཀྱི་བྱ་བ་སོགས་ཐུན་མཚམས་བརྟེན་ཞིང༌། ཡང་བླ་མ་ལོངས་སྐུ་རྡོ་རྗེ་འཆང་མཚན་དཔེ་གསལ་རྫོགས། བརྒྱུད་པ་ཀུན་འདུས་སུ་མོས་བཞིན་ལས། སྔར་བཞིན་ཕྱག་འཚལ་སྟོང་ཕྲག་དང༌། རང་ལ་བསྟིམས་རྗེས་རང་སྣང་རྒྱལ་བ་ལོངས་སྐུའི་རང་མདངས་འགག་མེད་སྐྱོང་ཞིང༌། ཡང་བླ་མ་སྤྲུལ་སྐུ་ཤཱཀྱ་ཐུབ་པ་འོད་ཟེར་ཕྱོགས་བཅུར་འཕྲོ་བ་ལ་མོས་གདུང་དང་ལྡན་པས། སྔར་བཞིན་གུས་ཕྱག་དང་རང་ལ་བསྟིམས་རྗེས། རང་ཉིད་སྤྲུལ་སྐུ་འགྲོ་དོན་ལྷུན་གྲུབ་ཏུ་གྱུར་པའི་ངང་ལ་རང་རིག་གཅུན་ནས་མཐར་སྐུ་གསུམ་ཡོངས་རྫོགས་རྩ་བའི་བླ་མ་ཉིད་ལ་དད་འདུན་སྙིང་ནས་ཤུགས་བསྐྱེད་པའི་ལུས་ཀྱིས་ཕྱག །ངག་གིས་མ་ནམ་མཁའ་དང་མཉམ་པའི་སེམས་ཅན་ཐམས་ཅད་བླ་མ་སངས་རྒྱས་ཆོས་ཀྱི་སྐུ་ལ་སྐྱབས་སུ་མཆིའོ། །བླ་མ་ལོངས་སྤྱོད་རྫོགས་པའི་སྐུ་ལ༴ བླ་མ་ཐུགས་རྗེ་སྤྲུལ་པའི་སྐུ་ལ༴ བླ་མ་ངོ་བོ་ཉིད་ཀྱི་སྐུ་ལ༴ བླ་མ་སངས་རྒྱས་རིན་པོ་ཆེ་ལ༴ ཆོས་རྗེ་སངས་རྒྱས་བཀའ་དྲིན་ཅན་ལ༴ ཞེས་བརྗོད། སེམས་ཀྱིས་ཅི་མཛད་ཁྱེད་ཤེས་སུ་ལྟོས་པ་ལིངས་ཀྱིས་བསྐྱུར། ལུས་དང་ངག་དང་ཡིད་དང་གསུམ་རྩེ་གཅིག་ཏུ་བསྒྲིམ། མཚམས་བཅད་ལྷག་པར་བསྡམ། ནུབ་མོ་ཉལ་བའི་རྣལ་འབྱོར་བྱ། དེས་ཚོགས་རྫོགས། སྒྲིབ་དག །བླ་མའི་སྐུ་གསུང་ཐུགས་ཀྱི་བྱིན་རླབས་བཙན་ཐབས་སུ་རྒྱུད་ལ་འཇུག་པས་ཉམས་རྟོགས་ཀློང་རྡོལ་ཕ་རྗེས་བུས་ཟིན་པར་འགྱུར་རོ། །རྟེན་འབྲེལ་ཆིག་ཆོད་མའི་ཁྲིད། རྩ་བའི་སེམས་ཐག་ཆོད་ཕྱིན། དགོས་མེད་རྣམ་གྲངས་མང་པོས་ཡིད་ཀྱི་རྙོག་པ་མི་བསླང་སྟེ། འགྲངས་རྗེས་ཟོས་ན་སྐྱུག་པའམ་མ་ཞུ་བའི་ནད་ཕོ་ནད་འབྱུང་བའི་གོ་བ་བསྐྱེད། སོ་ནམ་དུས་བཞི། ཚོང་པ་ཇ་ཕོག་འགྲུབ་མཐར་དལ་བར་ཉལ་བ་བཞིན། སེམས་ངོ་འཕྲོད་རྗེས་བྱར་མེད་དུ་རོ་མཉམ་བསྟེན། ཕྱུགས་རྫིས་མཐོ་སར་འདུག་ནས་ཕྱུགས་ལུག་ལ་དགྲ་རྐུན་སྤྱང་ཀི་ཡོང་མི་ཡོང་བྱ་ར་འཇུག་པ་ལྟར། མ་ཡེངས་པའི་བྱ་ར་རིག་པའི་ངར་གཅུན། རི་དྭགས་རང་གནས་འཛིན་པ་བཞིན་གངས་ཁྲོད་ནགས་ཁྲོད་དུ་གཅིག་པུར་ཤུག་པ་བྲག་སྐྱེས་ལྟར་བསྒོམ། ལུས་ཀྱིས་འགྲོ་འདུག །ངག་གིས་སྨྲ་བརྗོད། ཡིད་ཀྱིས་ཀུན་འཕྲོ་མི་བྱ་ཞིང་ལས་མི་འཆོལ། ཁྱིམ་དབེན་བྲང་ཁང་འགོལ་ས། མལ་སར་ཡང་ཡོལ་བཅད་བྱེད། ངག་རྒྱུན་གཅོད་ལ། སྨྲ་སྒོ་གླེངས་ན་བླ་མའམ་ཆོས་དང༌། མཆེད་གྲོགས་ཀྱི་ཆེ་བ་བརྗོད། ཆོག་ཤེས་བྱ་བཏང༌། འདོད་ཟད་སྡོད་ཚུགས་ཀྱི་མན་ངག་བཞི་སྦྱང༌། ལུས་ངག་ཡིད་མི་གཡོ་བའི་དམ་ཚིག་གསུམ་བསྲུངས་ན་ཤ་ལ་སྦྲང་བུ་འདུ་ཚུལ་དུ་རྟེན་འབྲེལ་མ་ལུས་པ་ལྷུན་གྲུབ་ཏུ་འབྱུང་ངོ༌། །རོ་སྙོམས་ཀྱི་ཁྲིད་ནི། བླ་མ་ལ་གསོལ་བ་དུང་དུང་བཏབ། ཤར་གྲོལ་འཛིན་མེད་འདི་ཟབ། རྣམ་རྟོག་ལམ་དུ་འཁྱེར། ལྟས་ངན་གཡང་དུ་བླང༌། བློས་བཏང་རེ་དོགས་བསལ། གང་ཤར་ཙིར་གྱིས་གཟུང༌། སྤོང་ཡང་མི་སྤང༌། རྗེས་སུ་མི་འབྲེང༌། བཅས་བཅོས་མི་བྱེད། ལྷོད་དེ་འཇོག །ཧྲིག་གེ། ཕྱམ་མེ། བདག་འཛིན་བཏང༌། ཉོན་མོངས་ལམ་ཁྱེར། དུག་བདུད་རྩིར་བསྒྱུར་བ། ཞེ་སྡང༌། གཏི་མུག །ང་རྒྱལ། ཕྲག་དོག །འདོད་ཆགས་སུ་ཐོལ་ཤར་དུས་ཙིར་བཟུང༌། གསལ་ལེ་འཇོག །མ་སྤངས་གནས་སུ་དག །སོར་རྟོག་ཡེ་ཤེས། མེ་ལོང་ཡེ་ཤེས། ཆོས་དབྱིངས་ཡེ་ཤེས། མཉམ་ཉིད་ཡེ་ཤེས། བྱ་གྲུབ་ཡེ་ཤེས། རིགས་ལྔའི་རང་བཞིན་མངོན་དུ་བྱས་ལ། ལྷ་འདྲེ་ལམ་དུ་འཁྱེར། བར་ཆད་དངོས་གྲུབ་ཏུ་ལེན་པ། གདོན་རྟོག་འཇིགས་སྣང་ཐོལ་ཤར་ངོས་ཙིར་བཟུང༌། ལྷན་བཞག །འཇིགས་སྣང་མ་སྤངས་གནས་སུ་དག །གསལ་གྱིས་འོངས། གདོན་ཐུལ་ལམ་འཁྱེར། བྱང་ཆུབ་སེམས་ཀྱི་གདམས་ངག །སེམས་ཅན་ལ་སྙིང་རྗེ་བསྒོམ། བདག་གཞན་བརྗེ་བ་བཅོས་མེད་བསྐྱང༌། ན་ཚ་ལམ་ཁྱེར་འབྱུང་བ་རོ་སྙོམས། ནད་བྱུང་ཡང་ལག་ལེན་འདི་ལས་མེད། ངོས་གཟུང་བློས་བཏང༌། རེ་དོགས་བསལ། ནད་ཟུག་གི་མི་བདེ་བ་ལ་གཅེར་བལྟ། གང་ན་རྩད་བཅད་པས་མི་རྙེད་དེ། དེའི་ངང་དུ་བཞག །བདག་འཛིན་རེ་དོགས་ནད་ཀྱི་རྒྱུ་ཡིན། འཆི་བ་ལམ་དུ་ཁྱེར་བ་མ་བུ་ངོ་སྤྲོད། ཆོས་ཉིད་མ་ལ་སྣང་བ་ཡིན་ལུགས་རིག་པ་བུ༑ འཆི་བའི་དུས་སུ་བླ་མ་བསྒོམ། རྟོག་པ་ངོས་བཟུང༌། མོས་གུས་དུང་བྱ། ལྷོད་དེ་ཤིག་གེ་བཞག །འཆི་ཁའི་རིག་པ་ངོ་ཤེས་ཤིང་མ་བཅོས་པར་བཞག་པས་སངས་རྒྱས་པ་ཡིན་གསུང་ངོ༌། །བླ་སྒྲུབ་རྟེན་འབྲེལ་རོ་སྙོམས་ཀུན༵། །དག༵འ་བཞིན་དགའ་བ་དང་ལེན་བཅས། །མདུད་གྲོལ༵་མཆོ༵ག་གི་གནད་སྟོན་པའི། །སངས་རྒྱས་ལག་བཅངས་ཡི་གེའོ། །དཔལ་ལྡན་འབྲུག་པའི་ཁྲིད་དཔེ་ལས་བཏུས་སོ། (༩༩) །ལོ་རས་ཐུབ་པ་ལྔ་ལྡན་གྱི་ཁྲིད་ཡིག །ལོ་རས་ཐུབ་པ་ལྔ་ལྡན་གྱི་ཁྲིད་ནི། སྐྱབས་སེམས་སྔོན་དུ་སོང་ནས། གཏུམ་མོ་རས་ཐུབ་ལ་དམིགས་པ་རང་རྡོ་རྗེ་རྣལ་འབྱོར་མ་མེའི་སྐུ་ཅན། མེ་དཔུང་འབར་བའི་ཀློང་ན་འོག་ཉི་དཀྱིལ་རྐང་མཐིལ་མེས་བསྲེགས་པ་ལྟར་དམར་ཞིང་འཚེར་བའི་མེ་སྟག་གི་ཚྭ་ཚྭ་འཕྲོ་བ། སྟེང་ཡང་མེའི་རང་བཞིན་དུ་འབར་བ། ལུས་ཀྱི་རྒྱན་དྲུག་ཀྱང་མེར་དམར་ལམ་ལམ་ཕྱི་ནང་མེར་འབར་བའི་སྣང་བ་ལ་ཡིད་རྩེ་གཅིག་གཏད་ནས་མོས་གུས་ཤུགས་དྲག་པོས་བདེ་དྲོད་ཡེ་ཤེས་སྐྱེ་བར་བྱིན་གྱིས་རློབས། ཞེས་མགོ་ཆུ་རྟིང་པར་ཉིལ་མ་བྱུང་བར་བྱས་མཐར་གཙུབ་ཤིང་མེའི་འཁྲུལ་འཁོར་རྒྱུན་མི་ཆད་དང༌། རླུང་སྲོག་རྩོལ་གཉིས་ཤུགས་བསྐྱེད། ངལ་གསོའི་སྐབས་རང་ངོ་སྐྱོང་ཞིང་མ་ཡེངས་པར་བྱ། ཟས་སྤྱོད་ལམ་གྱི་ལྕག་གིས་བསྐུལ། གང་ཤར་གྱི་སྣང་བ་སྒྱུ་མར་ཐག་རྦད་བཅད་ལ། མི་ཕོད་པ་ལ་ཐོག་རྫིས་ཀྱིས་སྒྱུ་ལུས་གདིང་ཡོད་ཀྱི་རྟགས་ཐུབ་ངང་ནས། ནད་གདོན་གྱི་འཆར་སྒོ་རྐྱེན་ངན་གང་བྱུང་ལ་དེར་འཛིན་མེད་པར་གྲོགས་ཤར་དུ་གོ་བའི་རྐྱེན་ཐུབ་ལ་རྩལ་སྦྱངས་པས། བདེ་སྡུག་རོ་སྙོམས་གང་བྱུང་ལམ་དུ་བསླངས་ནས་རྩིས་གདབ་མེད་པས་ནད་ལ་གཉེན་པོ་གདིང་ཐུབ་སྟེ། གང་དགའི་བློ་སྐྱིད་ད་ལྟ་རང་ལ་བེམ་རིག་བྲལ་ཡང་ཡ་ང་དང་བག་ཚ་རྡུལ་ཙམ་མེད་པའི་ལྟ་བ་ཕྱག་རྒྱ་ཆེན་པོའི་དབྱིངས་སུ་ཤི་ཐུབ་སྙེམས་ཆོད་ཉིད་དོ། །ཐུབ་པ་ལྔ་ལྡན་གདམས་པ་ཀུན༵། །ཚེ་འདི་བློས་བཏང་དག༵འ་སྐྱིད་བློ། །འཆིང་བྱེད་དབྱིངས་གྲོལ༵་སྙེམས་ཆོད་ལམ། །ཟབ་ཟམ་མཆོ༵ག་འདི་ཡི་གེར་སྤེལ། །གྲྭ་དགའ་ལྡན་པའི་ཁྲིད་ཡིག་ལས་བཏུས་སོ། (༡༠༠) །རི་ཆོས་ཀྱི་ཁྲིད་ཡིག །རི་ཆོས་སྙིང་པོ་མ་དྲུག་གི་ཁྲིད་ནི། སྐྱབས་སེམས་སྔོན་དུ་སོང་ནས། དྲག་རླུང་གནད་ལྔ་ལ། རྔུབ་པ་དང༌། དགང་བ་དང༌། གཞིལ་བ་དང༌། མདའ་ལྟར་འཕང་བ་དང༌། བུམ་པ་ཅན་ཁ་སྦྱར་གྱི་གནད་དེ། རྔུབ་པའི་ལུས་གནད་རྔུབ་ལུགས་ཀྱི་གནད་ཐེམ་སྐྱོན་ཡོན་ཤན་འབྱེད་དེ། དེ་བཞིན་དུ་འོག་མ་བཞི་ལ་སྦྱར་ཏེ་ཡི་གེར་འབྲི་བའི་སྲོལ་མེད་པས་ལག་ལེན་བླ་མས་སྟོན་པ་ཉིད་ཡིན་ནོ། །འཕོ་བ་ཧཱུྃ་དམར་མ་ལ་སྦྱོང་བ་དང་ལས་སྦྱར་གྱིས་སྦྱོང་བ། ལུས་གནད་དང་ལྡན་པའི་སྤྱི་བོར་བླ་མ་བསྒོམས་པའི་བླ་མའི་གསང་སྒོ་དང༌། རང་གི་ཚངས་བུག་ཐད་མཉམ་དུ་བསམ། དད་མོས་ཆེར་བསྐྱེད། ལྟེ་བར་ཧཱུྃ་དམར་པོ་བྱུ་རུའི་མདོག་ལྟ་བུ་སྟེ། གསང་གནས་སུ་ལྷན་ནེ་བབས་འོད་ཟེར་བུང་བའི་མཚོན་ཆ་ལྟ་བུ་སྤྲོས། ལུས་ནང་གི་མི་གཙང་བ་དང་ལྗན་ལྗིན་མ་ལུས་པ་བསྲེགས། སྟོང་གསལ་ཕྲུ་མ་ཕུས་བཏབ་པ་ལྟར་གྱུར། ཡང་ཧཱུྃ་ལས་ཧཱུྃ་སྦྲེལ་མ་རེ་ཆད་དེ། བཤང་ཁ། ཆུ་སོ། ལྟེ་བ། ཁ་སྣ། མིག །རྣ་བ། སྨིན་མཚམས་བཀག །མཚོག་སྒོ་སྤྱི་གཙུག་ཚངས་པའི་སྒོ་ཧར་རེ་ཕྱེ་བར་མོས། ལུས་སྟོང་པའི་དཀྱིལ་ན་རྩ་དབུ་མ་སྦོམ་ཕྲ་སྦ་ལྕག་ཙམ་མས་སྣ་ལོང་ཁ་ཕུགས་རྡུགས་ལྟར་ལམ་མེ། ཡས་སྣ་སྟོང་གསལ་ལེ་ཚངས་བུག་ལ་ཟུག་པར་བསམ། ལྟེ་བར་གསང་གནས་ཀྱི་ཧཱུྃ་འོངས་ནས་དམར་ཤིག་ཤིག་འགུལ་འགུལ་ལྡེག་ལྡེག་ལ་ཡིད་གཏོད་པའི་ངང་ནས་ལས་སྦྱོར་ཧཱུྃ་དམར་རྒྱང་ངེ་སྐར་མདའ་ལྟར་དབུ་མའི་ལམ་ནས་སོང༌༑ བླ་མའི་གསང་སྒོར་ཟུལ་ཞུགས་པས་བླ་མ་ཏོག་གིས་ཡར། སུམ་ཅུ་རྩ་གསུམ་གྱི་གནས་རྡོ་ཨ་མོ་ལི་ཀའི་སྟེང་ན་ཕྱག་རྒྱ་ཆེན་པོའི་ངང་ལ་ཁད་དེ་བཞུགས་པར་བསམ་མོ། །སྟོང་ཉིད་རྡོ་རྗེའི་ཚིག་དྲུག་མ་ནི༑ ཆོས་ཉིད་ཅི་ཡང་མ་ཡིན་ཡོད་པ་ལ་ལྟོས་ནས་མེད་པ་ལྟ་བུ་ཕྱོགས་རེ་རེའི་སྟོང་པ། བུམ་སྣོད་ཆུས་སྟོང་པ་ལྟར་ཉི་ཚེའི་སྟོང་པ། སྟོང་པ་དང་སྟོང་ལུགས་ཀྱི་སྒྲོ་འདོགས་པ་རྣམ་གྲངས་ཀྱི་སྟོང་པ། བློར་མ་གྲུབ་པའི་ཡུལ་གཅིག་བསམ་པ་ཡིད་ཀྱི་སྟོང་པ་སྟེ། དེ་ལྟའི་དྲི་མས་མ་གོས་པའི་སྣང་སྲིད་འཁོར་འདས་ཐམས་ཅད་སྟོང་པ་ཉིད་དེ། ངའི་ལྟ་བ་འདི་ཡིན་ཅེས་ཡོངས་གཅོད་དུ་གྲུབ་པ་མེད་པས་ལྟ་བ་སྟོང་ལ། འདི་མིན་ཅེས་རྣམ་གཅོད་ཀྱི་དགག་ཆ་མེད་པས་ལྟ་མིན་གྱིས་སྟོང་སྟེ་ཕྱོགས་སུ་མ་ལྷུང་བའི་མཐའ་བྲལ་ཆེན་པོའོ། །དེ་ལྟར་གྱུར་པ་ཡང་བླ་མའི་གདམས་ངག་གི་ཟབ་ཆ་མིན། སློབ་མའི་ཤེས་རབ་ཀྱི་གོ་བ་མིན། མ་བཅོས་གདོད་མའི་གནས་ལུགས་དེ་ལྟར་དུ་བཞུགས་པ་ཡིན་ནོ། །གཞི་ལམ་འབྲས་བུའི་སྟོང་ལུགས་གསུམ་སྟོང་པ་འཐད་ལྡན། སྟོང་པ་གཏན་ལ་དབབ་ལུགས། སྟོང་པ་ཉིད་ཀྱི་སྐྱོན་ཡོན་ཏེ། དུམ་བུ་དྲུག་མ་ཚིགས་དྲུག་ཏུ་བཞག་གོ ༑ནད་འདོན་ཧཱུྃ་ཆོས་མ་ནི། རང་གི་སྙིང་ཁར་ཧཱུྃ་སྔོན་པོ་རྩེ་སོར་གང་ཙམ་གཅིག་བསྒོམ། ཚ་གྲང་གི་དབྱེ་བས་ཧཱུྃ་དཀར་དམར་རེག་བྱ་བསིལ་བ་དང༌། ཚ་བ་ལུས་སྟོད་སྨད་དུ་དམིགས་ནས་ནད་རྣམས་ཁབ་ལེན་གྱིས་ལྕགས་ཕྱེ་སྡུད་པའི་དཔེས་འུབ་ཀྱིས་བསྡུས་ལ་མཐར་སྤྱི་བོ་ནས་རྒྱངས་ཏེ་བཏོན་ལ་བཞག །སྐྲངས་པའི་ཁོལ་བུ་ལ་གང་ན་སར་ཧཱུྃ་མཐིང་ཁ་བསམ། ནད་བསྡུ་ཚུལ་གོང་བཞིན་སོར་མོའི་རྩེ་ནས་ཕྱིར་འདོན། གཞན་གྱི་ནད་འདོན་བྱེད་ན། རང་གི་སྙིང་ཁའི་ཧཱུྃ་ཕྱིར་འགྲོ་བ་དང་བསྟུན། དྲག་ཏུ་བུས་པས་ཧཱུྃ་ཕྲེང་བ་བརྒྱུས་པ་ལྟར་བར་མ་ཆད་པར་ནད་པའི་སྣ་སྒོ་ནས་ཞུགས། ལུས་ནད་ཧཱུྃ་གིས་མེར་ཁེངས། ནད་མ་ལུས་པ་བསྡུས། ཚུར་ཧཱུྃ་སྔགས་ཕྲེང་རྣམ་པས་རང་གི་སྣ་སྒོ་ནས་ནང་དུ་རྔུབ་ལ། མཐར་ཕྱིན་སངས་ཀྱིས་བུས་པས་ནད་སྣང་ནམ་མཁའི་ན་བུན་ཡལ་བ་ལྟར་བསམ། ནད་གདོན་ཚེར་མ་འདོན་པ་འདྲ་བར་སྣང་ངོ༌། །གསང་གཅོད་རྣལ་ལམ་མ་ནི། ལྷ་འདྲེ་སྟོང་པའི་གཟུགས་བརྙན་འདི། །ལམ་དུ་འཁྱེར་ན་འདི་ལྟར་རོ། །ཕ་མ་ཡིན་པས་བྱམས་པ་བསྒོམ། །བླ་མ་ཡིན་གྱིས་གསོལ་བ་ཐོབ། །ཡི་དམ་ཡིན་གྱིས་དངོས་གྲུབ་ཞུས། །ལྷན་སྐྱེས་ཡིན་གྱིས་ངང་ལ་ཞོག །ཅེས་པའི་གནད་དང་ལྡན་པས་བསྒོམ་ཞིང༌། འཛག་སྲུང་ལ། དམིགས་པ་རྡོ་རྗེའི་བུ་གར་ཕཊ་དམར་སེར་མགོ་ཐུར་དུ་བསྟན་པ། རྡོ་རྗེའི་རྩེ་ནས་ལྟེ་བའི་བར་ཧཱུྃ་ཡིག་དཀར་པོ་ཕྲེང་བ་བསྒྲིགས་པ་བ་སྤུའི་བུ་གར་ཧཱུྃ་ཕྱེད་ཕྱིར་ཐོན། ཕྱེད་ནང་དུ་ནུབ་པར་བསམས་ལ། ཤེས་པ་སྤྱི་བོའི་ཧཾ་ལ་གཏད། རྡོ་རྗེའི་བུ་གའི་ཧཱུྃ་ཕྲེང་དབུ་མའི་ནང་ནས་གྱེན་ལ་འབུ་རུ་རུ་བྱུང༌། སྤྱི་བོ་ནས་འཇུར་ཐོན་མཐོ་གང་ཙམ་ལ་སེམས་གཏད་དོ། །འཛག་པ་དྲུག་ཀ་བསྲུང༌། རྨི་ལམ་དུ་འཛག་ན་ཉལ་ཁར་བསྒོམ། འཁྲུལ་འཁོར་གྱི་འཛག་སྲུང་ཤིང་བུ་མཐོ་གང་གི་སྐེད་པ་ནས་ཐེ་གུ་བཏགས་ཏེ་ཤིང་བུ་ཨར་བུ་ཏའི་གནས་ལྟག་པ་ལ་ཟེར་བས་དེར་དྲང་པོར་བཞག །ལམ་པའི་གནས་མགྲིན་པ་ལ་ཟེར་བས་དེར་ཐིག་གུ་བཅིངས་མི་འཆུགས་པར་བྱས། གཡོན་རྐྱང་མའི་རྩ་འཐེམས་ནས་མི་འཛགས་པ་ཡིན། གདམས་ངག་བྱིས་པའི་རྩེད་མོ་འདྲ། རྫས་ཀྱི་འཛག་བསྲུང་ནི། གཤིན་རྗེའི་རལ་པ་ལྷད་མེད་ནི་གུ་གུལ། དྲག་པོའི་ཐུན་རྫས་ཡུངས་ཀར། པདྨ་རཀྟ། མ་ཧཱ་བུ་ལུ་ཐལ་ཆེན། ན་ར་ཨོག་ཏི་མིའི་ཀླད་པ། རྒྱ་ཚིལ་མིའི་ཚིལ་བུ་ལ་ཟེར་བས། རྫས་དེ་རྣམས་ཞིབ་ཏུ་བཏགས། བྱིས་པ་ལོ་བརྒྱད་ཡན་གྱི་དྲི་ཆུས་སྦྲུས་ཏེ། རིལ་བུ་ཡུངས་ཀར་ཙམ་གྲིབ་བསྐམ་བྱས། རྡོ་རྗེའི་བུ་གར་རེ་རེ་བཅུག་ན་གཟེར་ཐེམ་བཞིན་འབྱུང་ངོ༌། །རི་ཆོས་གནད་ཀྱི་ཁོག་ཆེན་ལས། །མ་དྲུག་དོན་སྙིང་མི་བདོག་ན། །གནད་ཆེན་མང་ཡང་མ་ཚང་བས། །འཆུགས་མེད་ལག་ལེན་ཤེས་པ་དཀའ། །ཞེས་གསུངས། ཡང་དགོན་ཆོས་ཀྱི་སྤྱན་ལྡན་དེའི། །རི་ཆོས་གནད་ཀུན༵་དག༵འ་སྟོན་ནི། །མ་དྲུག་གྲོལ༵་བ་མཆོ༵ག་གི་ལམ། །ཚིག་ཉུང་དོན་འདོམས་ཡི་གེར་བཀོད། །རི་ཆོས་ཉིད་ལས་བཏུས་སོ། (༡༠༡) །མགོན་པོ་སྐུ་རགས་མའི་ཁྲིད་ཡིག །མགོན་པོ་སྐུ་རགས་མའི་ཁྲིད་ནི། སྐྱབས་སེམས་སྔོན་དུ་སོང་ནས། རང་གི་ལུས་འདི་ནམ་གྲུབ་དུས་དམ་ཚིག་སེམས་དཔའ་ཡིན་པ་ལ་དཔལ་ཡེ་ཤེས་ཀྱི་མགོན་པོ་ཝལ་གྱིས་གསལ་བ་ཡེ་ཤེས་སེམས་དཔའ་སྟེ། སྐུའི་ནང་གཙང་དྭངས་ཤེལ་གྱི་མཆོད་སྡོང་ལྟ་བུའི་ལྟེ་བར་རྩ་གསུམ་འདུས་མདོར་རང་བཞིན་གྱིས་གྲུབ་པའི་ལྷ་གསུམ་གསལ་འདེབས་ཏེ། དབུས་སུ་ཡེ་ཤེས་མགོན་པོ། གཡས་བྱ་རོག་གདོང༌། གཡོན་ཙཎྜི་ཀཱ་དམར་མོ། རྩ་འདབ་རྣམས་མ་མགོན་གྱི་རྟེན་གཞི་རྩ་ཐིག་ཏུ་ཁྲ་ལམ་མེ་བསྒོམ། དུར་ཁྲོད་ཆེན་པོ་བསིལ་བ་ཚལ་ནས་རང་འདྲའི་ཡེ་ཤེས་སེམས་དཔའ་བསྟིམ། བླ་མ་བདེ་མཆོག་ལྷན་སྐྱེས་རིགས་བདག་གི་ཚུལ་གྱིས་མགོན་པོའི་དབུའི་ཐད་དུ་བཞུགས་པར་བསམས། མགོན་པོའི་ཐུགས་ཁར་ཧཱུྃ། བྱ་རོག་གདོང་གི་ཐུགས་ཁར་ཡང་ཧཱུྃ༑ ཙཎྜི་ཀཱའི་ཐུགས་ཁར་བྷྱོཿ རྣམས་ལ་རང་སྔགས་ཀྱིས་བསྐོར་བར་དམིགས་ལ། བླ་མ་ལ་མོས་གུས་བསྐྱེད་ཅིང་ཡི་གེ་བདུན་པ་ཕྲེང་སྐོར་ཙམ་བཟླས་པས། བླ་མ་ལྷན་སྐྱེས་ཀྱི་སྐུ་ལས་འོད་ཟེར་བདེ་བའི་རང་བཞིན་ཅན་བྱུང༌། མ་མགོན་རྣམས་ལ་ཕོག་པས་ཐུགས་མཉེས་པ་རབ་ཀྱི་མཐར་སོན་ཏེ། དམ་ཚིག་པ་ལ་རྗེས་སུ་དགོངས་ནས་བ་སྤུ་བྱེ་བའི་སྒོ་ནས་རང་འདྲ་བའི་ཆོས་སྐྱོང་སྤྲོས་པས་ལུས་ལ་གོ་ཁྲབ་ལྟར་གཏམས། སྲུང་བ་རྡོ་རྗེ་ལུས་ཅན་དུ་མོས་པས། ༀ་བཛྲ་ཀའུ་ཝ་ཝ་པ་ཤ་ཡ་མ་ཧཱ་ཀཱ་ལཱ་ཡ་ཧཱུྃ་ཧཱུྃ་ཕཊ། ཅེས་བགྲང་ཞིང་དེའི་འོད་ཀྱིས་བསྐུལ་བས་ཙཎྜི་ཀཱ་དང་བྱ་རོག་གདོང་ལས་རང་འདྲ་སྤྲོས། བསྟན་དགྲ་ཚར་བཅད་ནས་ས་གསུམ་གྱི་མཐུ་སྟོབས་ནུས་མཐུ་བསྡུས། རང་མགོན་པོར་གསལ་བའི་བ་སྤུའི་སྒོ་ནང་ནས་ཚུར་འདུས། ལྟེ་བའི་རྩ་བཞིར་ཕན་ཚུན་ཐིམ་པར་བསམས་ནས། རྩ་འདབ་ཀྱི་ཐིག་ལེ་རྣམས་དངུལ་ཆུའི་རྡོག་མ་མེ་ནང་དུ་གཡོ་བ་ལྟར་འདུས། མ་མགོན་རྣམས་ལ་མཆོད་ཚུལ་དུ་ཐིམ། གཡས་གཡོན་གྱི་ལས་མགོན་དང་ལྷ་མོ་ཡང༌། དབུས་ཀྱི་མགོན་པོ་ལ་ཐིམ་པས། མགོན་པོ་ཉིད་བསྐྱེད་གཞི་ཧཱུྃ་དུ་གྱུར་པའི་ཞབས་ཀྱུ་ནས་རིམ་གྱིས་ནཱ་ད་དང༌། དེ་བླ་མ་ལྷན་སྐྱེས་ཀྱི་ཞལ་དུ་ཐིམ། ཡབ་ཡུམ་སྙོམས་པར་ཞུགས་པའི་མཐར་བདེ་སྟོང་གི་ངང་དྭངས་མའི་སྲོག་ཕྱག་རྒྱ་ཆེན་པོ་ལ་འཇོག་ཅིང་དེ་ལྟར་གསང་གནས། སྙིང་ཁ། མགྲིན་པ། སྤྱི་བོ་བཞིར་ལྷ་གསུམ་བསྒོམ་པ་ནས། བླ་མ་ལྷན་སྐྱེས་བདེ་སྟོང་གི་ངང་དུ་ཐིམ་པའི་བར་རིམ་པར་བསྒོམ་ཞིང༌། རྩ་གསུམ་དཀར་དམར་མཐིང་སྐྱ། འཁོར་ལོ་ལྔར་ཐིག་ལེ་ཁ་དོག་རྣམ་ལྔར་བསྒོམ། མཐར་རང་མགོན་པོར་མོས་པའི་གསང་གནས་བདེ་སྟོང་ཆོས་འབྱུང༌། ཕྱི་སྔོན་ནང་དམར་བར་ཡུམ་དགའ་བྱེད་དབང་ཕྱུག་མ། དེའི་བྷ་གའི་ནང་དུ་མགོན་པོའི་རང་བཞིན་ཧཱུྃ་མཐིང་ནག་འོད་ཟེར་ལྔ་ལྡན་སྣུམ་ཞིང་གཟི་བརྗིད་ཉི་མ་སྟོང་ལྡན་དུ་བསྒོམས་ཏེ༑ གསང་རྟེན་ལུས་ལ་བཅའ་བའི་གནད་དམ་པའོ། །ཀུན༵་ནས་ཡིད་ཆེས་གོང་མའི་གསུང༌། །དག༵འ་དང་སྤྲོ་བས་ཐོ་ཙམ་བཀོད། །རང་གྲོལ༵་མཆོ༵ག་བསམ་ཡོངས་གང་བཞིན། །དཔྱོད་ལྡན་ཡིད་མགུ་ཐོབ་གྱུར་ཅིག །ཡིག་རྙིང་ནང་ལྟར་བཏུས་ཏེ་བྲིས་པའོ། (༡༠༢) །དཔལ་གུར་གྱི་མགོན་པོའི་ནང་ཁྲིད། དཔལ་གུར་གྱི་མགོན་པོའི་ནང་ཁྲིད་ནི། སྐྱབས་སེམས་སྔོན་དུ་བཏང་ནས། རང་མགོན་པོར་གསལ་བའི་རྩ་གསུམ་འཁོར་ལོ་རྣམས་གསལ་བཏབ་པའི་ལྟེ་བ་སྤྲུལ་འཁོར་དུ་ཨ་ཐུང་སྐྱེ་བ་མེད་པ་ལས་སྐྱེ་བའི་ཚུལ་དུ་ཨེ་ཀ་ཛཱ་ཊི། དེ་ཉིད་འོད་དུ་ཞུ་སྟེ་ཐིག་ལེ་བཞིར་གྱུར་ནས་སྟེང་གི་ཐིག་ལེ་བླ་མ་ཀྱེ་རྡོ་རྗེ་དཔའ་བོ་གཅིག་པ། རོ་རྐྱང་དབུ་མ་གསུམ་དང་ཐིག་ལེ་འདྲེས་པའི་དབུས་སུ་མགོན་པོ། གཡས་ཟངས་གྲི་ཅན། གཡོན་ལྷ་མོ། མགོན་པོའི་ཐུགས་ཁ་ནས་ཡ། ལྷ་མོ་ལས་མཾ་འཕྲོས་པས་གནོད་སྦྱིན་ཡབ་ཡུམ། ཡབ་ལ་ཏྲི་གཉིས་དང༌། ཡུམ་ལས་བྷྱོ་སྤྲོས་ཏེ། པུ་ཏྲ་མིང་སྲིང་རྣམས་གསལ་བཏབ་ནས་ཡེ་ཤེས་པ་བསྟིམ། དབང་བསྐུར། བླ་མ་དང་མགོན་པོ་ལ་མི་བསྐྱོད་པ། གཞན་རྣམས་ལ་རྡོ་རྗེ་རྩེ་ལྔས་དབུ་བརྒྱན། བླ་མའི་ཕྱག་གི་རྡོ་རྗེས་དམ་ལ་བཞག་པར་མོས་ལ། རྡོ་རྗེ་འདི་ནི་རྡོ་རྗེ་ཆེ། །སངས་རྒྱས་ཀུན་གྱི་བྱིན་གྱིས་བརླབས། །གལ་ཏེ་དམ་ལས་འདས་གྱུར་ན། །འཇིགས་འགྱུར་འདི་ལ་ཐེ་ཚོམ་མེད། །ས་མ་ཡ་སྨ་ར་ས་མ་ཡ་མ་ཏི་ཀྲ་མ། ས་མ་ཡ་རཀྵནྟུ། དེ་ནས་དེ་ཝ་པི་ཙུ། ཡི་གེ་བཅུ་གཉིས་པ། རོ་རུ་རྣམས་སྔ་མས་གཉའ་མནན་ཅིང་བཟླ། དམིགས་པ་བླ་མས་མགོན་པོ། མགོན་པོས་ཟངས་གྲི་ཅན་དང་ལྷ་མོ། དེས་གནོད་སྦྱིན་ཡབ་ཡུམ། དེས་པུ་ཏྲ་མིང་སྲིང་རིམ་པས་བསྐུལ་བས་སྟོང་གསུམ་ཁེངས་པའི་ཕོ་ཉས་དགྲ་བགེགས་ཚར་བཅད་པར་མོས་ལ། ༀ་ཀཱ་ལ་ཡཀྵ་ཡེ། ཀཱ་ལི་ཡཀྵི་སཱི། ཡཀྵ་པུ་ཏྲ་ཡེ། རུ་ཊ་བྷ་ཏྲ་ཡེ། རུ་ལུ་རཀྵ་སཱི་ཧཱུྃ་བྷྱོ་ཧཱུྃ། ཞེས་བཟླས་པའི་མཐར། རིམ་གྱིས་འདུས་ཏེ་ཐིག་ལེ་སེར་པོ་ཉུང་འབྲུ་ཙམ་ལ་སེམས་བཞག །འཇམ་རླུང་ཁ་སྦྱར་གཟུང༌། དེ་བཞིན་དུ་གསང་གནས། སྙིང་ཁ། མགྲིན་པ། སྤྱི་བོའི་འཁོར་ལོ་སོ་སོར་ཨ་ཐུང་ལས་ཨེ་ཀ་ཛཱ་ཊི་བཞེངས་པ་ནས་ཐིག་ལེ་ལྗང༌། སྔོ། དམར། དཀར་བ་ལ་སེམས་འཇོག་པའི་དམིགས་པ་ཁ་བསྒྱུར་དང༌། མཐར་ལྟེ་བར་ལྷ་མོ་དེའི་གསང་བའི་ཆོས་འབྱུང་ནང་དུ་ཧཱུྃ་བསམས་པའི་གསང་རྟེན་ནང་དུ་བཅའ་ཞིང༌། སྤུ་གྲི་སོ་འདེབས་ཀྱི་ལས་སྦྱོར་ཡང་བསྒོམ་མོ། །ཀུན༵་གྱིས་ཟབ་པར་སྒྲོགས་པའི་ཆོས། །དག༵འ་བསྐྱེད་ཡིད་བདེའི་རང་བབས་ཀྱི། །གྲོལ༵་ལམ་ཁྲིད་ཀྱི་དམིགས་པའི་ཐོ། །མཆོ༵ག་ཏུ་འདུམས་ཤིང་གསལ་བར་བྲིས། །ཡར་ཀླུང་པ་སེང་གེ་རྒྱལ་མཚན་གྱི་ཁྲིད་ཡིག་ནང་ལྟར་བཏུས་ཏེ་བྲིས་པའོ། (༡༠༣) །དོ་ཧ་སྐོར་གསུམ་གྱི་ཁྲིད་ཡིག །དོ་ཧ་སྐོར་གསུམ་གྱི་ཁྲིད་ནི། སྐྱབས་སེམས་སྔོན་དུ་སོང་ནས། འཁོར་འདས་ཐམས་ཅད་སེམས་ཀྱི་འཆར་ལུགས་ལས། དངོས་སུ་མེད་ལ་སེམས་རྒྱུ་རྐྱེན་བྱེད་པོ་འདིས་བྱས་མེད་དེ་སྟོང་པ་ཅང་མེད་རིག་པའི་རྩལ་འགག་མེད། དབྱིབས་ཁ་དོག །འདི་འདྲ་གང་དུ་མེད་དེ་གཅིག་དུ་མ། རྟག་ཆད། མཐའ་བྲལ། འདི་ལྟ་བུ་ཞེས་བསྟན་དུ་མ་བཏུབ། ཉམས་བློ་འདས་རང་ལ་ཅི་ཡང་འཆར་བ༑ གང་དུའང་སྣང༌། རྒྱ་མ་ཆད་པ། མཐར་མ་ལྷུང་བ། ཕྱོགས་སུ་མ་ཞེན་པ། ཟད་འཕེལ་མེད་པ། རྒྱུན་ཆད་མེད་པའོ། །དེ་བརྡས་ངོ་སྤྲོད། སེམས་གཅུན། སྔ་སོ་ལ་མ་ཤོར་བ། ཕྱི་སོ་ལ་མ་ཤོར་བ། རང་བབས་སུ་ཙེན་ནེ་འཇོག །རྟེན་མེད་ཀྱི་ངར་གྱིས་རྩལ་སྦྱོང༌། དྲན་པ་མ་ཡེངས་པར་གཟུང༌། རིག་པའི་ཉམས་བསྐྱང༌། གོམས་པ་ཀློང་དུ་གྱུར་པའི་ཚེ། དྲན་པས་གཟུང་མི་དགོས། གཉེན་པོ་བསྟེན་མི་དགོས། བློ་བྲལ་རང་བྱུང་གི་ཉམས་རྒྱུན་ཆད་མེད་པའོ། །དོ་ཧ་སྐོར་གསུམ་སྙིང་པོ་ཀུན༵། །ལེགས་པར་བསྡུས་པའི་དག༵འ་བསྐྱེད་ལམ། །འཆིང་བ་གྲོལ༵་བྱེད་མཆོ༵ག་གི་ཁྲིད། །ཡི་གེར་གསལ་བར་བྱས་འདིའོ། །སྤར་ཕུ་བའི་ཁྲིད་ཡིག་ལས་བཏུས་སོ༑ (༡༠༤) ༑གྲུབ་ཐོབ་ཆོས་དྲུག་གི་ཁྲིད་ཡིག །གྲུབ་ཐོབ་ཆོས་དྲུག་གི་ཁྲིད་ནི། སྐྱབས་སེམས་སྔོན་དུ་སོང་ནས། ལྟ་བ་འོད་གསལ། ལུས་སྒྱུ་ལུས། མཚམས་སྦྱོར་རྨི་ལམ་བར་དོ། ཇི་ལྟར་ན་སྐྱེས་ནས་མ་ཤིའི་བར་ལ་སྐྱེ་ཤི་བར་དོ། རྣམ་པར་སྨིན་པའི་ལུས་ལམ་རྩ་རླུང་ལ་བརྟེན། གཏུམ་མོ་འདོད་ཆགས་དང་བསྲེ། རྨི་ལམ་གཟུང་སྦྱང༌། སྒྱུ་མར་བསླབ། དེ་ཉིད་མི་འདའ་བར་བྱེད། སྔོན་དུ་འདུན་པ་དྲག་པོ་བྱེད། ཉིན་པར་གྱི་དུས་སུ་རྨི་ལམ་དུ་ཤེས་པར་བྱ་སྙམ་པའི་དྲན་པ་ཡང་ཡང་བྱ། སྔས་མཐོ་བ། སྟན་འབོལ་བ། གཞོགས་གཡས་ཕབ། མགྲིན་པར་པདྨ་དམར་པོ་འདབ་མ་བཞིའི་ལྟེ་བར་ཨ་དཀར་པོ་བསམ། གཉིད་ལ་འགྲོ་བའི་དུས་སུ་དྲན་པ་དུངས་པ་བྱ། སྲོད་ལ་སྨིན་ཕྲག་ཏུ་ཐིག་ལེ་དཀར་པོ་གཅིག་ལ་སེམས་བཟུང༌། ཐོ་རངས་མགྲིན་པའི་ཨཱཿ ལ་གཏད། གཉིད་སད་པའི་དུས་སུ་སྣང་སྲིད་རྨི་ལམ་དང་འདྲ་བར་ཤེས་པར་བྱ། ཟིན་པའི་རྟགས་ཆུ་དང་མེ་དང་གཡང་ས་དང་འདེད་པ་དང་། གསོད་པ་ལ་སོགས་པ་བྱུང་ཡང་རྨི་ལམ་ཡིན་སྙམ་པའི་ཤེས་པ་འབྱུང༌། དེ་གཟུང་བའོ། །སྦྱང་བ་ནི། ཇི་ལྟར་ཡང་བཏུབ་སྙམ་པའི་འདུན་པ་བྱས་ལ། རྨི་ལམ་གྱི་དུས་སུ་ཆུར་མཆོངས། མེར་བསྲེག །གཡང་ས་ལ་འཛེག །སུམ་ཅུ་རྩ་གསུམ་པའི་གནས་སམ། གནས་ཉེར་བཞི་ལྟ། ཉི་མ་རྐང་པས་མནན། ཡི་དམ་གྱི་ཞལ་བལྟ་ཞིང༌། ཆོས་ཉན་པ་སོགས་སེམས་ལ་ཅི་མནོ་བྱ། དེ་སྦྱང་བའོ༑ ༑སྒྱུ་མར་སློབ་པ་རྨི་ལམ་སྦྱང་བའི་དུས་སུ། ཆུར་མཆོངས་པ་ལ་སོགས་པ་བྱས་པས་བག་ཚ། འཇིགས་པ་སྙམ་བྱེད་ན། རྨི་ལམ་ཡིན། བདེན་པ་མ་ཡིན། འཇིགས་སུ་གང་ཡོད་སྙམ་པས་ཡ་ང་བ་སྤང་ངོ༌། །དེ་ཁོ་ན་ཉིད་ལས་མི་འདའ། རྨི་ལམ་སྦྱང་བ་ཡང་ཅི་ཡོད། འཁྲུལ་པ་ཤེས་པར་བྱ། གཉིད་འོད་གསལ་དུ་གཞུག་པ། སྙིང་གའི་འཁོར་ལོའི་ལྟེ་བར་ཧཱུྃ། མདུན་དུ་ཨ། གཡས་སུ་ནུ། རྒྱབ་ཏུ་ཏ། གཡོན་དུ་ར་བསྒོམ། ཐ་མལ་གྱི་དུས་སུ་ཨ་ལ། རྟོག་པ་རགས་པ་ནུབ་ནས་གཉིད་འཐིབས་པ་ཡོང་བའི་དུས་སུ་ནུ་ལ། རྣམ་རྟོག་ཕྲ་བ་ནུབ་དུས་ཏ་ལ། གཉིད་སྲིབ་པའི་དུས་སུ་ར་ལ་དམིགས། གཉིད་ཧྲུལ་གྱིས་འགྲོ་བའི་དུས་སུ་ཧཱུྃ་ལ་བསྡུ། ལྷན་གྱིས་ཉལ་བས་གཉིད་ཀྱི་རོ་བདེ་སྟོང་འོད་གསལ་ཉམས་མྱོང་སྟོང་པའོ། །བར་དོ་རྣམ་སྨིན་ལུས་ཞིག་པ་ན། བག་ཆགས་ཡིད་ལུས། ལུས་གཞན་གཅིག་ལ་མ་བླངས་པའི་བར། སྲིད་པའི་བར་དོ། དེ་ཙ་ན་མོ་མཚར་པོ་ལ་འདོད་ཆགས། ཕོ་མཚར་པོ་ལ་ཞེ་སྡང་མི་སྐྱེ་བར་འོད་གསལ་དུ་འཁྱེར། ཤི་ནས་ཞག་གསུམ་མམ་ལྔའམ་བདུན་ཚུན་ཆད་བརྒྱལ་བ་གཉིད་དུ་སོང་བ་ལྟ་བུ། སད་ནས་རྨི་ལམ་གྱི་ཚོད་ཙམ་དུ་འཇིགས། ཤི་ནས་འདུག་སྙམ་རྣམ་རྟོག་ལྡང༌། དེ་དུས་སྐྱེ་བ་སྔོན་ནས་བག་ཆགས་བསགས་པ་གཅིག་རྟིང་ནས་གཅིག་མཚམས་སྦྱར་ནས། དམྱལ་བ་ལ་སོགས་པ་ངན་སོང་གསུམ་གྱི་སྡུག་བསྔལ་ཉམས་སུ་མྱོང༌། སྔོན་མའི་ཉོན་མོངས་པ་རང་ག་མར་མ་ཤོར་བས། བར་དོའི་རྟོག་པ་རང་རྒྱུད་པར་མི་འཆོར་ཏེ། འོད་གསལ་ཆོས་སྐུ་མངོན་དུ་འགྱུར་གསུང་ངོ༌། །གྲུབ་ཐོབ་ཡོངས་ཀྱི་དགོངས་པའི་བཅུད། །གནོད་སྦྱིན་མོ་ལ་གདམས་པ་ཡི། །ཀུན༵་ཏུ་དག༵འ་བ་རང་གྲོལ༵་མཆོ༵ག །ཡི་གེའི་ལམ་དུ་འཕོས་འདིའོ། །ཡིག་རྙིང་ལས་བཏུས་སོ། (༡༠༥) །པདྨ་ལམ་རིམ་གྱི་ཁྲིད་ཡིག །པདྨ་ལམ་རིམ་གྱི་ཁྲིད་ནི། སྐྱབས་སེམས་སྔོན་དུ་སོང་ནས། གནས་དབེན་པ་སྒྲུབ་ཁང་ཉི་འོད་ཕེབས་པར་ཤེལ་སྒོང་ལས་འཇའ་སྣང་གསལ་བར་བྱས་པ་དམིགས་པའི་རྟེན་དུ་བཞག་སྟེ། རྒད་པོ་འཁར་བཙུགས། རྒན་མོ་མཛུབ་བཙུགས་ཀྱི་བརྡ་སྦྱོར་ཚུལ་དུ། བུ་འདི་ན་སྣང་བའི་རྡོ་རྗེ་སེམས་དཔའི་མེ་ལོང་འདི་ནི་ངོ་བོ་གང་དུ་མི་འགྱུར། རྐྱེན་གྱིས་ཅིར་ཡང་འཆར། འདི་བཞིན་སྣང་སྲིད་འཁོར་འདས་ཐམས་ཅད་ཐིག་ལེ་ཉག་གཅིག་ཕྱི་ནང་དུ་ཕྱེ་བ་མེད་ཅིང༌། འཇའ་འོད་ལ་མ་འདྲེས་གསལ་བའི་གཟིགས་མོ། འོད་སྣང་སྟོང་ཞིང་གོ་འབྱེད་པ། གསང་བའི་གནས་མཆོག་འོག་མིན་ཉམས་དགའི་ཞིང་ཡང་འདིས་མཚོན། ཆོས་སུ་བཏགས་སོ་ཅོག་ལ་ཀ་དག་ལྷུན་གྲུབ་མཉམ་ཉིད་ཁྱབ་བརྡལ། མན་ཤེལ་དང་མན་ཤེལ་གྱི་འོད་མདོག་དབྱིབས་ལྷན་ཅིག་འཇའ་འོད་སྣ་ཚོགས་སུ་སྣང་ཡང༌། མེད་སྣང་ཁྱབ་གསུམ་ལས་མ་འདས་པས་མ་བྱས་པའི་ཡེ་གྲོལ་དུ་ལམ་ལམ། ཝལ་ཝལ། སལ་སལ། སིང་སིང༌། ཡེར་ཡེར། རྗེན་རྗེན། ལྷན་ལྷན། དབྱིངས་རིག་དབྱེར་མེད་དབྱེར་མིན། དབྱེ་ཆ། དབྱེ་བྱེད་བྲལ་བ་སྟེ། མ་བཅོས་དབྱིངས་ལས་རང་བྱུང་འོད་གསལ་བ། །ཡོངས་ལ་ཡོད་མོད་སུས་ཀྱང་མཐོང་བ་མེད། །དཔག་པར་མི་སྤོབས་ནམ་མཁའི་ཁྱོན་དང་འདྲ། །གསལ་ལ་འཚེར་བ་ཉི་མའི་འོད་དང་འདྲ། །འགྱུར་མེད་བརྟན་པ་རི་རྒྱལ་ལྷུན་པོ་འདྲ། །ཟབ་ཅིང་གཏིང་མེད་རྒྱ་མཚོའི་མཐིལ་དང་འདྲ། །གོས་པ་མེད་པ་འདམ་རྫབ་པདྨ་འདྲ། །ངོས་གཟུང་མེད་པ་ཆུ་ནང་ཟླ་བ་འདྲ། །ཅི་ཡང་འཆར་བ་ནམ་མཁའི་འཇའ་སྤྲིན་འདྲ། །གསལ་བར་རྫོགས་པ་མེ་ལོང་གཟུགས་བརྙན་འདྲ། །གང་ལ་ཐོགས་མེད་གནམ་ལྕགས་ཐོག་དང་འདྲ། །རྒྱུན་ཆད་མེད་པ་ཆུ་བོ་ཆེན་པོ་འདྲ། །ཀུན་གྱི་གཞིར་གྱུར་ས་གཞི་ཆེན་པོ་འདྲ། །འདི་བཞིན་དཔེ་རྣམས་ཡེ་ཤེས་དབྱིངས་དང་སྦྱོར། །དེ་ལྟར་རིག་པ་རྡོ་རྗེ་ལུ་གུ་རྒྱུད་ལ་ཕྱི་ནང་དུ་གྲུབ་པ་མེད་ཀྱང༌། སྣང་ཚུལ་གྱི་དབང་གིས་ཕྱི་ནང་དུ་ཤར་བའི་ཕྱི་ལྷུན་གྲུབ་རིན་པོ་ཆེའི་སྦུབས་ནང་རིག་པ་རང་གསལ་དྭངས་མའི་ཁྱེའུ་ཆུང་ཞེས་བཏགས་ཏེ། རིག་པ་དངོས་དང་རིག་པའི་རང་འོད་དང་རིག་པའི་རང་མཚན་བྱ་བའི་ཚུལ་གྱིས་མ་འདྲེས་གསལ་བའི་རི་མོ་བཀྲ་བ་ཡབ་འོད་མི་འགྱུར། འོད་སྣང་གི་ཐིག་ལེ་སྟོང་གསལ་རྩ་སྦུབས་ཡུམ་རྡོ་རྗེ་བཙུན་མོའི་བྷ་གར་ཆུད་པ་ལས་ཉམས་བདེ་གསལ་སྟོང་པའི་ཁྱེའུ་ཆུང་འཁྲུངས་ཏེ། དཔག་བསམ་ཤིང་ལས་དཔག་བསམ་གྱི་འབྲས་བུ་སྨིན་ནོ། །བདུད་རྩིའི་རྒྱ་མཚོ་ལས་བདུད་རྩིའི་རྦ་རླབས་བྱུང་ངོ༌༑ ༑ཡིད་བཞིན་ནོར་བུ་ལས་འདོད་དགུའི་ཆར་འབེབས་སོ། །དེ་ལྟར་ན་ཡང་རྟོག་བྱེད་བློ་ངན་གྱི་སོམ་ཉིས་ངན་སྐྱུགས་ཀྱི་བུམ་པར་བདུད་རྩི་མ་བླུག་ཅིག །སྨན་གྱི་ས་བོན་ལས་དུག་འབྲས་མ་སྐྱེད་ཅིག །ཉི་མའི་སྣང་བ་ལ་མུན་པས་མ་འགེབས་ཤིག །ཨེ་མ་མདུན་གྱི་མན་ཤེལ་འདི་ཁོ་ན་བཞིན་དུ། ནང་རིག་པ་གསལ་བའི་ལུ་གུ་རྒྱུད་ཀྱང་གོ་བར་གྱིས། འདི་ལས་འོད་སྣང་གི་འཇའ་ཚོན་མ་འགགས་པ་ཤར་བས་མཚོན་པའི་འཆར་སྒོའི་འོད་གསལ་འབྱུང་བཞི་ཁ་བསྒྱུར་གྱི་རང་བབས། རྩ་རླུང་ཐིག་ལེ་རང་སྣང་ཐམས་ཅད་དུ་བ། སྨིག་རྒྱུ། གློག །སྲིན་བུ་མེ་ཁྱེར། མར་མེ་འབར་བ། ཟླ་འདྲ། ཉི་འདྲ། སྒྲ་གཅན་གྱི་དབྱིབས་ཏེ་འདི་འཆར། འདི་མི་འཆར་མེད་དེ་ཀུན་ཀྱང་དབྱིངས་ཤར་དབྱིངས་གྲོལ་སྦྲུལ་མདུད་འདྲ་བས་འཛིན་པའི་གདོན་གྱིས་མ་དཀྲུགས་པར་མན་ཤེལ་འདི་སྦུག་མེད་སྣང་དུ་སྣང་བ་འདྲ་བའི་དཔེས་རང་རིག་ལས་ལོགས་སུ་མ་ལྟ་ཞིག །རྟགས་སྣང་མ་ལུས་པ་མ་བྱས་རྩོལ་མེད་རང་གསལ་གྱི་རང་སྣང་དུ་མཚོན་པས་རྒྱུ་འབྲས་འཆོལ་མེད་ཀུན་ཏུ་སྤྱོད་པ་ཡིན་ནོ། །པདྨའི་བཀའ་སྩལ་སྙིང་པོ་ཀུན༵། །མན་ཤེལ་ཉམས་དག༵འི་བརྡ་ཐབས་ཀྱིས༑ ༑སེམས་ཀྱི་འཆིང་གྲོལ༵་མཆོ༵ག་སྟོན་པ། །ཡི་གེ་འདི་ལ་ཡིད་ཆེས་སྐྱེད། །པདྨ་ལམ་རིམ་གྱི་གནད་འདོམས་ཁོལ་ཕྱུང་ངོ༌། (༡༠༦) །རྒྱལ་པོ་བཀའ་འབུམ་གྱི་ཁྲིད་ཡིག །རྒྱལ་པོ་བཀའ་འབུམ་གྱི་ཁྲིད་ནི། སྐྱབས་སེམས་སྔོན་དུ་སོང་ནས། སྐུ་ཁྲིད་བསྐྱེད་རིམ་དང་འབྲེལ་བའི་སྔོན་འགྲོ་ཐུན་མོངས་མ་ཡིན་པ་ལ་ལུས་ཀྱིས་སྲོག་གཅོད། མ་བྱིན་ལེན། འདོད་པས་ལོག་པར་གཡེམ་པ་སྙིང་ནས་འགྱོད་པས་བཤགས་པར་བྱ་ཞིང༌། ལུས་དགེ་བ་གསུམ་དང་ལྡན་པར་བསླབ། ལུས་གདོད་མ་ནས་ལྷའི་སྐུ་ཡིན་པ་ལ་ཡིན་ངེས་པའི་བློས་རང་ཉིད་འཕགས་པ་སྤྱན་རས་གཟིགས་དྲི་མེད་དུང་གི་མདོག་ཅན་ཞལ་གཅིག་ཕྱག་བཞི་པར་ལམ་གྱིས་གསལ་བཏབ། བསྐྱེད་རིམ་བསྒོམ་ན་བར་སྣང་འཇའ་ལ་ལྟོས། །གསུངས་པས་སྣང་བ་གཟུགས་སུ་གྲུབ་ལ་རེག་བྱ་གཟུགས་སུ་མ་གྲུབ་པ་ལ་ངེས་ཤེས་བསྐྱེད་ཅིང༌། མཐར་སྐུ་ཉུངས་འབྲུའི་ཚུལ་དུ་འཕོ་བ་སྙིང་གའི་ཡེ་ཤེས་སེམས་དཔའ་ཚོན་གང་བ་དབུ་མའི་ལམ་ནས་མདུན་གྱི་ནམ་མཁར་བླ་མ་འོད་དཔག་མེད་ལྷའི་བུ་དང་བུ་མོའི་ཚོགས་ཀྱིས་བསྐོར་བའི་བླ་མའི་ཐུགས་ཀར་འཕོས་པས་འོད་ཀྱི་འཇའ་ལམ་ལ་སྤྱན་དྲངས་ཏེ། བདེ་བ་ཅན་དུ་གཤེགས་པར་བསམ། གསུང་ཁྲིད་བཟླས་པ་དང་འབྲེལ་པ་ལ། བརྫུན་ཕྲ་མ་ཚིག་རྩུབ་ངག་འཁྱལ་བཞི་བཤགས། ངག་ཡིག་དྲུག་དང་མི་འབྲལ་བར་བསླབ། ངག་གདོད་ནས་གྲག་སྟོང་དུ་གོ་བའི་བློས་ཡིག་དྲུག་རྡོ་རྗེའི་གླུ་བླང༌། བཟླ་ཚུལ་སོ་དྲུག་གི་བུང་བ་སྦྲང་ཚང་བཤིག་པའི་སྒྲ་ལྟར། རྩི་ཤིང་རི་བྲག་ས་རྡོ་སྣང་སྲིད་ཐམས་ཅད་ཡི་གེ་དྲུག་པའི་སྒྲར་བསམ་ཞིང༌། ༀ་མ་ཎི་པདྨེ་ཧཱུྃ། ཉིན་མཚན་ཆད་པ་མེད་པར་བཟླས་ལ། གསུང་ཡིག་འབྲུར་འཕོ་བ་སྤྱི་བོའི་རིགས་བདག་གི་ཐུགས་རྗེའི་ལྕགས་ཀྱུས་དབུ་མའི་ལམ་ནས་ལྟེ་བའི་རིག་པ་བྱང་ཆུབ་སེམས་ཀྱི་རྟེན་ཧྲཱིཿ ཡིག་ཚངས་པའི་སྒོ་ནས་ཡུད་ཀྱིས་དྲངས། བླ་མའི་ཐུགས་ཀར་ཐིམ། བླ་མ་ཏོག་གིས་ཡར། བདེ་བ་ཅན་ལ་གཤེགས་པར་བསམ་མོ། །ཐུགས་ཁྲིད་འོད་གསལ་དང་འབྲེལ་བ་ལ། བརྣབ་སེམས་གནོད་སེམས་ལོག་ལྟ་བཤགས་པར་བྱ། སེམས་གདོད་ནས་ཆོས་སྐུར་བཞུགས་པ་ལ་ཡིད་ཆེས་བསྐྱེད། ཝལ་པོ་རྗེས་མེད་ཀྱི་ལྟ་བའི་གཞི་རྩ་ལ་ཐག་ཆོད་བྱ། རེག་འབྱར་བརླན་གཤེར་མེ་ཚ་དུས་མཉམ་སྔ་ཕྱི་མེད་པས་འགྲངས་རྗེས་མི་ཟ། ངོམས་རྗེས་མི་འཐུང༌། དྲོད་རྗེས་མི་གྱོན། རྙེད་རྗེས་མི་འཚོལ་ཞིང༌། ཐུགས་འོད་གསལ་དུ་འཕོ་བ་ལ། འཕོ་བྱ་འཕོ་བྱེད་དང་བྲལ་བའི་སྒོ་ནས་འོད་གསལ་མ་བུ་ཞལ་འཇལ་ལ་སེམས་བཞག་པ་དེ་ཉིད་དོ། །སྐུ་གསུང་ཐུགས་སུ་ཁྱེར་སོ་གསུམ། །ཀུན༵་ཏུ་རབ་དག༵འི་བསྒོམས་བྱས་པས། །རྣམ་གྲོལ༵་སངས་རྒྱས་མཆོ༵ག་ཐོབ་པའི། །སྡིག་སྤོང་དགེ་བཅུའི་ལམ་རིམ་མཚར། །ལྷ་རྗེ་དགེ་བ་འབུམ་གྱི་ཁྲིད་ཡིག་ལས་བཏུས་སོ། (༡༠༧) །ནོར་བུ་མཐོང་གྲོལ་གྱི་ཁྲིད་ཡིག །ནོར་བུ་མཐོང་གྲོལ་གྱི་ཁྲིད་ནི། སྐྱབས་སེམས་སྔོན་དུ་སོང་ནས། ཚིག་དོན་ངོ་སྤྲད༑ བརྡ་བརྗོད་པ་སྟེ། ནམ་མཁའི་དབྱིངས་ན་ཡིད་བཞིན་ནོར་བུ་རིན་པོ་ཆེ་ལ་ཉི་ཟླ་གཉིས་ཤར། བར་སྣང་གི་འཇའ་ཚོན་ལ་རླུང་གི་ཞགས་པས་བཏབ་པ། རྒྱ་མཚོའི་ནོར་བུ་ཤེལ་གྱི་རྟ་མཆོག་ཞོན་པ། ཉི་ཟླའི་སྟེང་དུ་དཀྱུས་ཐོག་གཅོད་པ། འབྱུང་བ་ལྔའི་གྲོང་ཁྱེར་དུ་རིགས་དྲུག་གིས་གཅུན་ནས་རི་རབ་ཀྱི་སྟེང་དུ་སོང་བ། ཁམས་གསུམ་གྱི་འཕྲང་ལ་ཤེལ་གྱི་མི་ཕོ་བཙོན་དུ་བཟུང་བ་ཁམས་གསུམ་སྐད་ཅིག་ལ་བསྐོར་ནས་རང་ཁྱིམ་དུ་གཉིད་དུ་སོང་བའོ། །དེའི་དོན་དབྱིངས་ནམ་མཁའ་ལ་རིག་པ་ལུ་གུ་བརྒྱུད་ཀྱི་ནོར་བུ་ཤར་དུས། མིག་ཉི་ཟླ་གཉིས་ཀྱིས་མཐོང་བ། ནང་སྙིང་གའི་འོད་ཕུང་གི་དཀྱིལ་ན་རིག་པ་ལུ་གུ་རྒྱུད་ནོར་བུའི་འོད་རྩ་སྣ་གཉིས། མིག་གི་དྭངས་མ་ཐིག་ལེ་སྟོང་པའི་སྒྲོན་མེར་ཤར་བ། ཕྱི་ནམ་མཁའ་སྤྲིན་མེད་ལ་གདངས་ཀྱི་ལུ་གུ་རྒྱུད་ཤར་བ། ནང་དབྱིངས་ཀྱི་གདངས་འོད་ལྔ་བར་སྣང་ལ་ཤར་དུས། རིག་པ་མ་ཡེངས་པར་གཏད་ནས་རླུང་འགྲོ་འོང་བཅད་པས། ཐིག་ལེ་འགུལ་འཕྲིག་མེད་པ། སྙིང་གའི་རིག་གདངས་ཤེལ་སྦུབ་ཅན་གྱི་ནང་ནས་ཞུགས། མིག་གཉིས་ཀྱི་སྟེང་ལ་ཟང་ཐལ་དུ་ཤར་བ་ལ་རང་ངོ་མ་ཤེས་པའི་དབང་གིས་འཁོར་བར་འཁྱམས། འབྱུང་ལྔའི་གྲོང་ཁྱེར་དུ་རིགས་དྲུག་གི་དམག་མི་བཅུག་ནས། སྐྱེ་ཤིར་སྣང་བའི་བཙོན་རར་སྣང་སེམས་རང་ངོ་ཤེས་པའི་སྐད་ཅིག་ལ་གྲོལ། དབྱིངས་ཆོས་སྐུའི་ངང་དེར་གཉིད་ལ་སོང༌། མདོར་ན་སེམས་ཁམས་གསུམ་དུ་འཁོར་ཡང༌༑ རྣམ་དག་ཡེ་ཤེས་ཀྱི་རང་ངོ་ཤེས། མ་རིག་པ་བསལ་ཏེ། གདོད་མར་བཙན་ས་ཟིན། གཞི་གཤིས་ཀྱི་ངོ་བོ་ལ་འཁོར་འདས་སུ་མ་གྲུབ་ཀྱང༌། རིག་རྩལ་རང་ཤར་དུ་རིག་མ་རིག་གིས་འཁོར་འདས་སུ་ཤར། དོན་དམ་པའི་རང་བཞིན་ཚིག་གིས་མི་ཤེས་པ་རིག་པའི་མངོན་སུམ་དུ་མཐོང༌། གདོད་མའི་ཆོས་ཁམས་རང་བཞིན་གྱི་རིགས་ཀྱི་སྙིང་པོ་ལ་འཕེལ་འགྲིབ་མེད་ཀྱང༌། ཉམས་སུ་བླངས་པས་སྣང་བཞི་རིམ་པས་འཆར། ཀ་དག་གི་གཤིས་ལ་གྲོལ་རྒྱུ་མེད་ཀྱང༌། གནད་ཟབ་མོས་རླུང་སེམས་དབྱིངས་སུ་དག །ཐེག་པ་ལས་སངས་རྒྱས་དུས་ལ་ལྟོས་ཀྱང༌། ཡིན་ཐོག་ཅིག་ཆར་དུ་གྲོལ། ཉམས་རྣམ་པ་ཚད་མེད་ཀྱང༌། ངོ་བོ་གཅིག་ལས་མ་གཡོས་པར་ཐག་ཆོད། གནད་ཡིག་སྐལ་མེད་གསང་ཚིག་འཆོལ་པ་ལ་གབ་བོ། །ཕྱག་རྫོགས་ཀུན༵་གྱི་དགའ་དག༵འ་རྣམས། །ནོར་བུ་མཐོང་གྲོལ༵་མཆོ༵ག་ཉིད་དུ། །གྲུབ་ཆེན་ཡ་བརྒྱད་དགོངས་འདུས་ཀྱི། །སྙིང་པོར་དྲིལ་འདི་ཡི་གེར་བཀོད། །བྲམ་པའི་ཁྲིད་ཡིག་ལས་བཏུས་སོ། (༡༠༨) །སེམས་ཁྲིད་ཡིད་བཞིན་ནོར་བུའི་ཁྲིད་ཡིག །སེམས་ཁྲིད་ཡིད་བཞིན་ནོར་བུའི་ཁྲིད་ནི། སྐྱབས་སེམས་སྔོན་དུ་སོང་ནས། བྱིན་རླབས་འབའ་ཞིག་ལ་རེ་བ་ཡིན་པས༑ མོས་གུས་གདུང་ཤུགས་བསྐྱེད་ལ། ཕྱག་རྒྱ་ཆེན་པོ་ཟེར་བའི་སྒྲ་བོ་ཆེ་གཡེར་པོ་ཆེ་དེ་རང་གི་སེམས་ལ་ཟེར་བ་ཡིན། དེ་ངོ་མ་ཤེས་ན། མི་དྲན་དགུ་དྲན་གྱི་རིག་པ་འདི་ཀ་ཡིན། བསྒོམ་དུ་ཅི་ཡང་མེད། རིག་པ་འདི་རང་ཧྲིག་གེ་རང་སར་ཞོག །དེ་ཕྱག་རྒྱ་ཆེན་པོ་ཡིན་ནམ་མིན་ནམ་སྙམ་ཐེ་ཚོམ་མི་དགོས། ལེགས་སུ་རེ་བ་དང༌། ཉེས་ཀྱི་དོགས་པ་ཡེ་མི་བྱེད། རྟོག་པ་བན་བུན་མང་པོའི་རྗེས་སུ་མི་འབྲེང༌། དེ་ལྟར་ཡང་ཡང་གཅུན་པས། དུས་ཚོད་གཅིག་ཙ་ན། རྣམ་རྟོག་རང་ངོ་ཤེས་ནས་གཞི་མེད་རྩ་བྲལ་དུ་ལྷང་གིས་རྟོགས་ཏེ། ཞེན་པ་ཐམས་ཅད་རང་སར་གྲོལ། སྐད་ཅིག་ལ་བག་ཆགས་ཀྱི་མུན་པ་དྲུངས་ནས་ཕྱུང་སྟེ། དེ་ལ་སངས་རྒྱས་ཞེས་ཟེར། དེ་ལྟར་སེམས་སྐད་ཅིག་མའི་རང་འགྲོས་འདི་ལ་སྣང་བ་རང་སེམས་རང་ཡིན་པའི་གནད་ཀས་གང་ཤར་གྱི་ངོ་བོ་ལ་གཅེ་རེ་བལྟས་པའི་དུས་ན། སྣང་བ་ཕྱི་རུ་མ་ལུས། སེམས་ནང་དུ་མ་ལུས་པར་སོ་སོ་རང་རིག །ཤར་གྲོལ་དུས་མཚུངས་སུ་ཙན་གྱིས་ཤར་བ་དེ་རྩེ་གཅིག །དེའི་ངོས་ན་གཟུང་འཛིན་ལ་སོགས་པས་སྟོང་ཞིང་སྤྲོས་པའི་མཚན་མ་དང་བྲལ་བ་སྤྲོས་བྲལ། མྱོང་བ་ཅི་ཡང་མེད་པའི་སྟོང་པ་ཕྱང་ཆད་མ་ཡིན་པར་སྟོང་བཞིན་དུ་སྣང༌། སྣང་བཞིན་དུ་སྟོང་པ་རང་རིག་ཏུ་རོ་གཅིག །དེ་ལ་རྩོལ་མེད་དུ་གནས་ཤིང་གནས་པ་ལྷུན་གྲུབ་ཏུ་འཆར་བ་བསྒོམ་མེད་ཀྱི་རྣལ་འབྱོར་ཡིན་ནོ། །ཞེས་རིག་པ་སྐད་ཅིག་མའི་གནད་ལ་རང་བྱང་ཆུབ་པར་བྱའོ། །ཀུན༵་མཐའི་ཁྲིད་ཚན་དག༵འ་སྤྲོའི་བློས། །སེམས་ཀྱི་མདུད་གྲོལ༵་མཆོ༵ག་སྐྱེས་པ། །ལན་གཉིས་ནོས་ཤིང་དོན་གྱི་གསང༌། །ཆིག་གྲོལ་མྱོང་བ་ཡི་གེ་བྲིས། །ཀ་ལ་དུང་མཚོ་ནས་སྤྱན་དྲངས་པའི་དཔེ་རྙིང་ལས་བཏུས་སོ། ༈ །དེ་ལྟར་ཁྲིད་ཚུལ་བརྒྱ་དང་བརྒྱད། །རང་གིས་གང་ལས་གང་ཐོབ་པའི། །ཡི་གེ་ཇི་བཞིན་ཉུང་ངུའི་ཚིག །དོན་ཚང་སྙིང་པོ་ཆ་ཙམ་བཀོད། །ཐུན་མོང་ཐུན་མོང་མིན་པའི་ཁྲིད། །སྤྱི་བསྡོམས་གཅིག་དྲིལ་སྔོན་བཏང་ནས། །དངོས་གཞི་རང་རང་མ་འདྲེས་པའི། །ཁྲིད་རིམ་རྒྱ་མོའི་ཐག་སོའི་དཔེ། །བརྒྱུད་ལྡན་དམ་པ་གོང་མ་ཡི། །དགོངས་པ་ཕན་ཚུན་མ་འཛིངས་པར། །ལུགས་གང་དེ་ལས་རང་བློ་ཡི། །ནན་གྱིས་བཅོས་པའི་དྲི་མ་བྲལ། །སངས་རྒྱས་རྣམ་འཕྲུལ་རྒྱ་བོད་འདིར། །སྔོན་བྱོན་མཁས་གྲུབ་མ་ལུས་པའི། །བཞེད་པའི་ཟབ་གནད་ཀུན་འདུས་པ། །འདི་འདྲ་ཐོས་པ་སྐལ་པ་ཆེ། །ཁོ་བོས་ཟབ་ཁྲིད་རེ་རེ་ནས། །དཀའ་བ་དང་བླངས་བཙལ་བའི་ཆོས། །ཁྱེད་ཅག་ཚེགས་མེད་དུས་གཅིག་ཏུ། །རྣ་བར་ལེན་པ་ངོ་མཚར་རྨད། །སྔ་མའི་བསགས་ཁྱབ་དབང་བྱས་པས། །མི་ཚེ་ཆོས་ཀྱི་སྣང་བས་འདས། །འཚོལ་དང་ཉན་དང་འབྲི་དང་སེམས། །མཐར་ནི་ཡི་གེའི་ལམ་དུ་བྲིས། །རང་གི་ཚེ་རབས་ཕྱི་མ་ཡི། །ཆོས་ཀྱི་བག་ཆགས་གསོ་བྱེད་དང༌། །དུས་འདིར་དོན་གཉེར་དང་ལྡན་འགའ། །སྲིད་ན་དེ་ལའང་ཕན་གྱུར་ཅིག །ཅེས་ཚེགས་ཆུང་ངུས་ཆོས་ཀྱི་གནད་བདེ་བླག་ཏུ་རྟོགས་བྱེད། ཁྲིད་བརྒྱའི་བརྗེད་བྱང་བྲིས་པའི་མཐའ་རྟེན་དུ་གྲོལ་མཆོག་གི་བློ་མཚོ་ལས་སོ། །མངྒ་ལཾ།། །།

[edit]

There are 108 subtexts included in this text

1 200-202	ཞེན་པ་བཞི་བྲལ་གྱི་ཁྲིད་ཡིག། zhen pa bzhi bral gyi khrid yig Contemplative Guide Books and Instructional Manuals - khrid yig	Text page View PDF
	ཀུན་དགའ་གྲོལ་མཆོག་ (Kun dga' grol mchog)

2 202-208	བློ་སྦྱོང་དོན་བདུན་མའི་ཁྲིད་ཡིག། blo sbyong don bdun ma'i khrid yig Contemplative Guide Books and Instructional Manuals - khrid yig	Text page View PDF
	ཀུན་དགའ་གྲོལ་མཆོག་ (Kun dga' grol mchog)

3 208-209	རྟེན་འབྲེལ་སྙིང་པོའི་ཁྲིད་ཡིག། rten 'brel snying po'i khrid yig Contemplative Guide Books and Instructional Manuals - khrid yig	Text page View PDF
	ཀུན་དགའ་གྲོལ་མཆོག་ (Kun dga' grol mchog)

4 209-211	སྐྱིད་སྡུག་ལམ་འཁྱེར་གྱི་ཁྲིད་ཡིག། skyid sdug lam 'khyer gyi khrid yig Contemplative Guide Books and Instructional Manuals - khrid yig	Text page View PDF
	ཀུན་དགའ་གྲོལ་མཆོག་ (Kun dga' grol mchog)

5 211-212	སུམ་པའི་བློ་སྦྱོང་གི་ཁྲིད་ཡིག། sum pa'i blo sbyong gi khrid yig Contemplative Guide Books and Instructional Manuals - khrid yig	Text page View PDF
	ཀུན་དགའ་གྲོལ་མཆོག་ (Kun dga' grol mchog)

6 212-214	མ་གཅིག་གི་གཅོད་ཀྱི་ཁྲིད་ཡིག། ma gcig gi gcod kyi khrid yig Contemplative Guide Books and Instructional Manuals - khrid yig	Text page View PDF
	ཀུན་དགའ་གྲོལ་མཆོག་ (Kun dga' grol mchog)

7 214-216	སྙིང་པོ་དོན་གསུམ་གྱི་ཁྲིད་ཡིག། snying po don gsum gyi khrid yig Contemplative Guide Books and Instructional Manuals - khrid yig	Text page View PDF
	ཀུན་དགའ་གྲོལ་མཆོག་ (Kun dga' grol mchog)

8 216-217	སེམས་ཉིད་ངལ་གསོའི་ཁྲིད་ཡིག། sems nyid ngal gso'i khrid yig Contemplative Guide Books and Instructional Manuals - khrid yig	Text page View PDF
	ཀུན་དགའ་གྲོལ་མཆོག་ (Kun dga' grol mchog)

9 217-219	སྐྱེས་བུ་གསུམ་གྱི་ཁྲིད་ཡིག། skyes bu gsum gyi khrid yig Contemplative Guide Books and Instructional Manuals - khrid yig	Text page View PDF
	ཀུན་དགའ་གྲོལ་མཆོག་ (Kun dga' grol mchog)

10 219-221	བསྟན་རིམ་གྱི་ཁྲིད་ཡིག། bstan rim gyi khrid yig Contemplative Guide Books and Instructional Manuals - khrid yig	Text page View PDF
	ཀུན་དགའ་གྲོལ་མཆོག་ (Kun dga' grol mchog)

11 221-223	སྲིད་ཞི་མཉམ་ཉིད་ཀྱི་ཁྲིད་ཡིག། srid zhi mnyam nyid kyi khrid yig Contemplative Guide Books and Instructional Manuals - khrid yig	Text page View PDF
	ཀུན་དགའ་གྲོལ་མཆོག་ (Kun dga' grol mchog)

12 223-224	དབུ་མ་ཆེན་པོའི་ཁྲིད་ཡིག། dbu ma chen po'i khrid yig Contemplative Guide Books and Instructional Manuals - khrid yig	Text page View PDF
	ཀུན་དགའ་གྲོལ་མཆོག་ (Kun dga' grol mchog)

13 224-226	བཀའ་གདམས་ལྐོག་ཁྲིད་ཀྱི་ཁྲིད་ཡིག། bka' gdams lkog khrid kyi khrid yig Contemplative Guide Books and Instructional Manuals - khrid yig	Text page View PDF
	ཀུན་དགའ་གྲོལ་མཆོག་ (Kun dga' grol mchog)

14 226-227	ཐུབ་པའི་ཁྲིད་ཡིག། thub pa'i khrid yig Contemplative Guide Books and Instructional Manuals - khrid yig	Text page View PDF
	ཀུན་དགའ་གྲོལ་མཆོག་ (Kun dga' grol mchog)

15 227-229	མི་གཡོ་བའི་ཁྲིད་ཡིག། mi g.yo ba'i khrid yig Contemplative Guide Books and Instructional Manuals - khrid yig	Text page View PDF
	ཀུན་དགའ་གྲོལ་མཆོག་ (Kun dga' grol mchog)

16 229-231	སྤྱན་རས་གཟིགས་ཀྱི་ཁྲིད་ཡིག། spyan ras gzigs kyi khrid yig Contemplative Guide Books and Instructional Manuals - khrid yig	Text page View PDF
	ཀུན་དགའ་གྲོལ་མཆོག་ (Kun dga' grol mchog)

17 231-233	སྒྲོལ་མའི་ཁྲིད་ཡིག། sgrol ma'i khrid yig Contemplative Guide Books and Instructional Manuals - khrid yig	Text page View PDF
	ཀུན་དགའ་གྲོལ་མཆོག་ (Kun dga' grol mchog)

18 233-238	པོ་ཏོ་བའི་དཔེ་ཆོས་ཀྱི་ཁྲིད།། po to ba'i dpe chos kyi khrid Contemplative Guide Books and Instructional Manuals - khrid yig	Text page View PDF
	ཀུན་དགའ་གྲོལ་མཆོག་ (Kun dga' grol mchog)

19 238-240	ཐིག་ལེ་བཅུ་དྲུག་གི་ཁྲིད་ཡིག། thig le bcu drug gi khrid yig Contemplative Guide Books and Instructional Manuals - khrid yig	Text page View PDF
	ཀུན་དགའ་གྲོལ་མཆོག་ (Kun dga' grol mchog)

20 240-241	ཤེས་ཕྱིན་བཀའ་བབས་ཁྲིད་ཡིག། shes phyin bka' babs khrid yig Contemplative Guide Books and Instructional Manuals - khrid yig	Text page View PDF
	ཀུན་དགའ་གྲོལ་མཆོག་ (Kun dga' grol mchog)

21 241-246	ཞི་བྱེད་ལམ་ལྔའི་ཁྲིད་ཡིག། zhi byed lam lnga'i khrid yig Contemplative Guide Books and Instructional Manuals - khrid yig	Text page View PDF
	ཀུན་དགའ་གྲོལ་མཆོག་ (Kun dga' grol mchog)

22 246-248	སྒོམ་རིམ་ཐོག་མཐའ་བར་གསུམ་གྱི་ཁྲིད་ཡིག། sgom rim thog mtha' bar gsum gyi khrid yig Contemplative Guide Books and Instructional Manuals - khrid yig	Text page View PDF
	ཀུན་དགའ་གྲོལ་མཆོག་ (Kun dga' grol mchog)

23 248-251	བྱམས་ཆོས་ལྔའི་ཁྲིད་ཡིག། byams chos lnga'i khrid yig Contemplative Guide Books and Instructional Manuals - khrid yig	Text page View PDF
	ཀུན་དགའ་གྲོལ་མཆོག་ (Kun dga' grol mchog)

24 251	རང་སྟོང་གི་ལྟ་ཁྲིད། rang stong gi lta khrid Contemplative Guide Books and Instructional Manuals - khrid yig	Text page View PDF
	ཀུན་དགའ་གྲོལ་མཆོག་ (Kun dga' grol mchog)

25 251-253	གཞན་སྟོང་གི་ལྟ་ཁྲིད། gzhan stong gi lta khrid Contemplative Guide Books and Instructional Manuals - khrid yig	Text page View PDF
	ཀུན་དགའ་གྲོལ་མཆོག་ (Kun dga' grol mchog)

26 253-264	སྦས་དོན་ཀྱི་ཁྲིད་ཡིག། sbas don kyi khrid yig Contemplative Guide Books and Instructional Manuals - khrid yig	Text page View PDF
	ཀུན་དགའ་གྲོལ་མཆོག་ (Kun dga' grol mchog)

27 264-267	ཚེ་ཁྲིད། tshe khrid Contemplative Guide Books and Instructional Manuals - khrid yig	Text page View PDF
	ཀུན་དགའ་གྲོལ་མཆོག་ (Kun dga' grol mchog)

28 267-269	སྒྲོལ་དཀར་གྱི་ཁྲིད་ཡིག། sgrol dkar gyi khrid yig Contemplative Guide Books and Instructional Manuals - khrid yig	Text page View PDF
	ཀུན་དགའ་གྲོལ་མཆོག་ (Kun dga' grol mchog)

29 269-271	ཚེ་དཔག་མེད་དཀར་པོའི་ཁྲིད་ཡིག། tshe dpag med dkar po'i khrid yig Contemplative Guide Books and Instructional Manuals - khrid yig	Text page View PDF
	ཀུན་དགའ་གྲོལ་མཆོག་ (Kun dga' grol mchog)

30 271-273	དམར་ཁྲིད་ཚེམ་བུ་ལུགས་ཀྱི་ཁྲིད་ཡིག། dmar khrid tshem bu lugs kyi khrid yig Contemplative Guide Books and Instructional Manuals - khrid yig	Text page View PDF
	ཀུན་དགའ་གྲོལ་མཆོག་ (Kun dga' grol mchog)

31 273-274	དམར་ཁྲིད་དཔལ་མོ་ལུགས་ཀྱི་ཁྲིད་ཡིག། dmar khrid dpal mo lugs kyi khrid yig Contemplative Guide Books and Instructional Manuals - khrid yig	Text page View PDF
	ཀུན་དགའ་གྲོལ་མཆོག་ (Kun dga' grol mchog)

32 274-275	དམར་ཁྲིད་ཟླ་རྒྱལ་ལུགས་ཀྱི་ཁྲིད་ཡིག། dmar khrid zla rgyal lugs kyi khrid yig Contemplative Guide Books and Instructional Manuals - khrid yig	Text page View PDF
	ཀུན་དགའ་གྲོལ་མཆོག་ (Kun dga' grol mchog)

33 275-276	དམར་ཁྲིད་སྐྱེར་སྒང་པའི་ལུགས་ཀྱི་ཁྲིད་ཡིག། dmar khrid skyer sgang pa'i lugs kyi khrid yig Contemplative Guide Books and Instructional Manuals - khrid yig	Text page View PDF
	ཀུན་དགའ་གྲོལ་མཆོག་ (Kun dga' grol mchog)

34 276-277	བདེ་མཆོག་གི་དམར་ཁྲིད།། bde mchog gi dmar khrid Contemplative Guide Books and Instructional Manuals - khrid yig	Text page View PDF
	ཀུན་དགའ་གྲོལ་མཆོག་ (Kun dga' grol mchog)

35 277-279	ཀྱེ་རྡོ་རྗེའི་དམར་ཁྲིད།། kye rdo rje'i dmar khrid Contemplative Guide Books and Instructional Manuals - khrid yig	Text page View PDF
	ཀུན་དགའ་གྲོལ་མཆོག་ (Kun dga' grol mchog)

36 279-281	ཕྱག་རྡོར་འཁོར་ཆེན་ཁྲིད་ཡིག། phyag rdor 'khor chen khrid yig Contemplative Guide Books and Instructional Manuals - khrid yig	Text page View PDF
	ཀུན་དགའ་གྲོལ་མཆོག་ (Kun dga' grol mchog)

37 281-284	གཏུམ་པོའི་ཁྲིད་ཡིག། gtum po'i khrid yig Contemplative Guide Books and Instructional Manuals - khrid yig	Text page View PDF
	ཀུན་དགའ་གྲོལ་མཆོག་ (Kun dga' grol mchog)

38 284-285	ཕག་མོ་ཀུརྨ་པཱ་དའི་ཁྲིད་ཡིག། phag mo kurma pA da'i khrid yig Contemplative Guide Books and Instructional Manuals - khrid yig	Text page View PDF
	ཀུན་དགའ་གྲོལ་མཆོག་ (Kun dga' grol mchog)

39 285-286	ཀུ་རུ་ཀུལླེ་ཁྲིད་ཡིག། ku ru kul+le khrid yig Contemplative Guide Books and Instructional Manuals - khrid yig	Text page View PDF
	ཀུན་དགའ་གྲོལ་མཆོག་ (Kun dga' grol mchog)

40 286-290	དུས་འཁོར་སྙན་བརྒྱུད་ཀྱི་ཁྲིད་ཡིག། dus 'khor snyan brgyud kyi khrid yig Contemplative Guide Books and Instructional Manuals - khrid yig	Text page View PDF
	ཀུན་དགའ་གྲོལ་མཆོག་ (Kun dga' grol mchog)

41 290-294	ཨོ་རྒྱན་བསྙེན་སྒྲུབ་ཀྱི་ཁྲིད་ཡིག། o rgyan bsnyen sgrub kyi khrid yig Contemplative Guide Books and Instructional Manuals - khrid yig	Text page View PDF
	ཀུན་དགའ་གྲོལ་མཆོག་ (Kun dga' grol mchog)

42 294-307	ལམ་འབྲས་ཀྱི་ཁྲིད་ཡིག། lam 'bras kyi khrid yig Contemplative Guide Books and Instructional Manuals - khrid yig	Text page View PDF
	ཀུན་དགའ་གྲོལ་མཆོག་ (Kun dga' grol mchog)

43 307-309	བསམ་མི་ཁྱབ་ཀྱི་ཁྲིད་ཡིག། bsam mi khyab kyi khrid yig Contemplative Guide Books and Instructional Manuals - khrid yig	Text page View PDF
	ཀུན་དགའ་གྲོལ་མཆོག་ (Kun dga' grol mchog)

44 309-313	ཟབ་པའི་ཚུལ་དགུའི་ཁྲིད་ཡིག། zab pa'i tshul dgu'i khrid yig Contemplative Guide Books and Instructional Manuals - khrid yig	Text page View PDF
	ཀུན་དགའ་གྲོལ་མཆོག་ (Kun dga' grol mchog)

45 313-315	ལྷན་ཅིག་སྐྱེས་གྲུབ་ཀྱི་ཁྲིད་ཡིག། lhan cig skyes grub kyi khrid yig Contemplative Guide Books and Instructional Manuals - khrid yig	Text page View PDF
	ཀུན་དགའ་གྲོལ་མཆོག་ (Kun dga' grol mchog)

46 315-317	གཏུམ་མོ་ལམ་རྫོགས་ཀྱི་ཁྲིད་ཡིག། gtum mo lam rdzogs kyi khrid yig Contemplative Guide Books and Instructional Manuals - khrid yig	Text page View PDF
	ཀུན་དགའ་གྲོལ་མཆོག་ (Kun dga' grol mchog)

47 317-318	ཡོན་པོ་བསྲང་བའི་ཁྲིད་ཡིག། yon po bsrang ba'i khrid yig Contemplative Guide Books and Instructional Manuals - khrid yig	Text page View PDF
	ཀུན་དགའ་གྲོལ་མཆོག་ (Kun dga' grol mchog)

48 318-321	ཕྱག་རྒྱའི་ལམ་གྱི་ཁྲིད་ཡིག། phyag rgya'i lam gyi khrid yig Contemplative Guide Books and Instructional Manuals - khrid yig	Text page View PDF
	ཀུན་དགའ་གྲོལ་མཆོག་ (Kun dga' grol mchog)

49 321-323	ཕྱག་རྒྱ་ཆེན་པོ་ཡི་གེ་མེད་པའི་ཁྲིད་ཡིག། phyag rgya chen po yi ge med pa'i khrid yig Contemplative Guide Books and Instructional Manuals - khrid yig	Text page View PDF
	ཀུན་དགའ་གྲོལ་མཆོག་ (Kun dga' grol mchog)

50 323-324	མཆོད་རྟེན་དྲུང་ཐོབ་ཀྱི་ཁྲིད་ཡིག། mchod rten drung thob kyi khrid yig Contemplative Guide Books and Instructional Manuals - khrid yig	Text page View PDF
	ཀུན་དགའ་གྲོལ་མཆོག་ (Kun dga' grol mchog)

51 324-326	མདོ་རྒྱུད་བསྲེ་བའི་ཁྲིད་ཡིག། mdo rgyud bsre ba'i khrid yig Contemplative Guide Books and Instructional Manuals - khrid yig	Text page View PDF
	ཀུན་དགའ་གྲོལ་མཆོག་ (Kun dga' grol mchog)

52 326	ཕྱི་རོལ་གདོན་གྱི་བར་ཆད་སེལ་བའི་ཁྲིད་ཡིག། phyi rol gdon gyi bar chad sel ba'i khrid yig Contemplative Guide Books and Instructional Manuals - khrid yig	Text page View PDF
	ཀུན་དགའ་གྲོལ་མཆོག་ (Kun dga' grol mchog)

53 326-327	འབྱུང་བ་ལུས་འཁྲུགས་ཀྱི་བར་ཆད་སེལ་བའི་ཁྲིད་ཡིག། 'byung ba lus 'khrugs kyi bar chad sel ba'i khrid yig Contemplative Guide Books and Instructional Manuals - khrid yig	Text page View PDF
	ཀུན་དགའ་གྲོལ་མཆོག་ (Kun dga' grol mchog)

54 327-328	ཏིང་ངེ་འཛིན་སེམས་ཀྱི་བར་ཆད་སེལ་བའི་ཁྲིད་ཡིག། ting nge 'dzin sems kyi bar chad sel ba'i khrid yig Contemplative Guide Books and Instructional Manuals - khrid yig	Text page View PDF
	ཀུན་དགའ་གྲོལ་མཆོག་ (Kun dga' grol mchog)

55 328-329	སྡུག་བསྔལ་གསུམ་སེལ་གྱི་ཁྲིད་ཡིག། sdug bsngal gsum sel gyi khrid yig Contemplative Guide Books and Instructional Manuals - khrid yig	Text page View PDF
	ཀུན་དགའ་གྲོལ་མཆོག་ (Kun dga' grol mchog)

56 329-331	གཉུག་མ་དྲན་གསལ་གྱི་ཁྲིད་ཡིག། gnyug ma dran gsal gyi khrid yig Contemplative Guide Books and Instructional Manuals - khrid yig	Text page View PDF
	ཀུན་དགའ་གྲོལ་མཆོག་ (Kun dga' grol mchog)

57 331-334	དག་པ་གསུམ་གྱི་ཁྲིད་ཡིག། dag pa gsum gyi khrid yig Contemplative Guide Books and Instructional Manuals - khrid yig	Text page View PDF
	ཀུན་དགའ་གྲོལ་མཆོག་ (Kun dga' grol mchog)

58 334-338	རང་བྱིན་རླབས་ཀྱི་ཁྲིད་ཡིག། rang byin rlabs kyi khrid yig Contemplative Guide Books and Instructional Manuals - khrid yig	Text page View PDF
	ཀུན་དགའ་གྲོལ་མཆོག་ (Kun dga' grol mchog)

59 338-340	ལམ་སྦས་བཤད་ཀྱི་ཁྲིད་ཡིག། lam sbas bshad kyi khrid yig Contemplative Guide Books and Instructional Manuals - khrid yig	Text page View PDF
	ཀུན་དགའ་གྲོལ་མཆོག་ (Kun dga' grol mchog)

60 340-342	བརྡ་དོན་གསལ་བའི་ཁྲིད་ཡིག། brda don gsal ba'i khrid yig Contemplative Guide Books and Instructional Manuals - khrid yig	Text page View PDF
	ཀུན་དགའ་གྲོལ་མཆོག་ (Kun dga' grol mchog)

61 342-350	གསང་འདུས་རིམ་ལྔའི་ཁྲིད་ཡིག། gsang 'dus rim lnga'i khrid yig Contemplative Guide Books and Instructional Manuals - khrid yig	Text page View PDF
	ཀུན་དགའ་གྲོལ་མཆོག་ (Kun dga' grol mchog)

62 350-353	གྲོལ་བའི་ཐིག་ལེའི་ཁྲིད་ཡིག། grol ba'i thig le'i khrid yig Contemplative Guide Books and Instructional Manuals - khrid yig	Text page View PDF
	ཀུན་དགའ་གྲོལ་མཆོག་ (Kun dga' grol mchog)

63 353-359	སྤྲོས་མེད་ཀྱི་ཁྲིད་ཡིག། spros med kyi khrid yig Contemplative Guide Books and Instructional Manuals - khrid yig	Text page View PDF
	ཀུན་དགའ་གྲོལ་མཆོག་ (Kun dga' grol mchog)

64 359-361	རྣལ་འབྱོར་བཞི་རིམ་གྱི་ཁྲིད་ཡིག། rnal 'byor bzhi rim gyi khrid yig Contemplative Guide Books and Instructional Manuals - khrid yig	Text page View PDF
	ཀུན་དགའ་གྲོལ་མཆོག་ (Kun dga' grol mchog)

65 361-364	འཇིགས་བྱེད་ཀྱི་ཁྲིད་ཡིག། 'jigs byed kyi khrid yig Contemplative Guide Books and Instructional Manuals - khrid yig	Text page View PDF
	ཀུན་དགའ་གྲོལ་མཆོག་ (Kun dga' grol mchog)

66 364-365	ཡབ་ལ་བརྟེན་པའི་རྩ་དབུ་མའི་ཁྲིད་ཡིག། yab la brten pa'i rtsa dbu ma'i khrid yig Contemplative Guide Books and Instructional Manuals - khrid yig	Text page View PDF
	ཀུན་དགའ་གྲོལ་མཆོག་ (Kun dga' grol mchog)

67 365-368	ཡུམ་གྱི་རྩ་དབུ་མའི་ཁྲིད་ཡིག། yum gyi rtsa dbu ma'i khrid yig Contemplative Guide Books and Instructional Manuals - khrid yig	Text page View PDF
	ཀུན་དགའ་གྲོལ་མཆོག་ (Kun dga' grol mchog)

68 368-370	དྲིལ་བུ་རིམ་ལྔའི་ཁྲིད་ཡིག། dril bu rim lnga'i khrid yig Contemplative Guide Books and Instructional Manuals - khrid yig	Text page View PDF
	ཀུན་དགའ་གྲོལ་མཆོག་ (Kun dga' grol mchog)

69 370-372	ནག་པོ་རིམ་བཞིའི་ཁྲིད་ཡིག། nag po rim bzhi'i khrid yig Contemplative Guide Books and Instructional Manuals - khrid yig	Text page View PDF
	ཀུན་དགའ་གྲོལ་མཆོག་ (Kun dga' grol mchog)

70 372-373	བདེ་མཆོག་དཀར་པོའི་ཁྲིད་ཡིག། bde mchog dkar po'i khrid yig Contemplative Guide Books and Instructional Manuals - khrid yig	Text page View PDF
	ཀུན་དགའ་གྲོལ་མཆོག་ (Kun dga' grol mchog)

71 373-376	གདན་བཞིའི་ཁྲིད་ཡིག། gdan bzhi'i khrid yig Contemplative Guide Books and Instructional Manuals - khrid yig	Text page View PDF
	ཀུན་དགའ་གྲོལ་མཆོག་ (Kun dga' grol mchog)

72 376-380	མ་ཧཱ་མཱ་ཡའི་ཁྲིད་ཡིག། ma hA mA ya'i khrid yig Contemplative Guide Books and Instructional Manuals - khrid yig	Text page View PDF
	ཀུན་དགའ་གྲོལ་མཆོག་ (Kun dga' grol mchog)

73 380-385	བདེ་མཆོག་བོང་ཞལ་ཅན་གྱི་ཁྲིད་ཡིག། bde mchog bong zhal can gyi khrid yig Contemplative Guide Books and Instructional Manuals - khrid yig	Text page View PDF
	ཀུན་དགའ་གྲོལ་མཆོག་ (Kun dga' grol mchog)

74 385-386	ཕག་མོའི་སྒོམ་དྲུག་གི་ཁྲིད་ཡིག། phag mo'i sgom drug gi khrid yig Contemplative Guide Books and Instructional Manuals - khrid yig	Text page View PDF
	ཀུན་དགའ་གྲོལ་མཆོག་ (Kun dga' grol mchog)

75 386-390	ནཱ་རོ་ཆོས་དྲུག་གི་ཁྲིད་ཡིག། nA ro chos drug gi khrid yig Contemplative Guide Books and Instructional Manuals - khrid yig	Text page View PDF
	ཀུན་དགའ་གྲོལ་མཆོག་ (Kun dga' grol mchog)

76 390-398	ནི་གུ་ཆོས་དྲུག་གི་ཁྲིད་ཡིག། ni gu chos drug gi khrid yig Contemplative Guide Books and Instructional Manuals - khrid yig	Text page View PDF
	ཀུན་དགའ་གྲོལ་མཆོག་ (Kun dga' grol mchog)

77 398-399	ཕྱག་རྒྱ་ཆེན་པོ་གའུ་མའི་ཁྲིད་ཡིག། phyag rgya chen po ga'u ma'i khrid yig Contemplative Guide Books and Instructional Manuals - khrid yig	Text page View PDF
	ཀུན་དགའ་གྲོལ་མཆོག་ (Kun dga' grol mchog)

78 399	ལམ་འཁྱེར་གྱི་ཁྲིད་ཡིག། lam 'khyer gyi khrid yig Contemplative Guide Books and Instructional Manuals - khrid yig	Text page View PDF
	ཀུན་དགའ་གྲོལ་མཆོག་ (Kun dga' grol mchog)

79 399-401	སེམས་འཆི་མེད་ཀྱི་ཁྲིད་ཡིག། sems 'chi med kyi khrid yig Contemplative Guide Books and Instructional Manuals - khrid yig	Text page View PDF
	ཀུན་དགའ་གྲོལ་མཆོག་ (Kun dga' grol mchog)

80 401-402	སུ་ཁ་ཆོས་དྲུག་གི་ཁྲིད་ཡིག། su kha chos drug gi khrid yig Contemplative Guide Books and Instructional Manuals - khrid yig	Text page View PDF
	ཀུན་དགའ་གྲོལ་མཆོག་ (Kun dga' grol mchog)

81 402-404	བདག་མེད་མའི་ནང་ཁྲིད།། bdag med ma'i nang khrid Contemplative Guide Books and Instructional Manuals - khrid yig	Text page View PDF
	ཀུན་དགའ་གྲོལ་མཆོག་ (Kun dga' grol mchog)

82 404-409	ལྷན་ཅིག་སྐྱེས་སྦྱོར་གྱི་ཁྲིད་ཡིག། lhan cig skyes sbyor gyi khrid yig Contemplative Guide Books and Instructional Manuals - khrid yig	Text page View PDF
	ཀུན་དགའ་གྲོལ་མཆོག་ (Kun dga' grol mchog)

83 409-410	ཕྱག་ཆེན་ལྔ་ལྡན་གྱི་ཁྲིད་ཡིག། phyag chen lnga ldan gyi khrid yig Contemplative Guide Books and Instructional Manuals - khrid yig	Text page View PDF
	ཀུན་དགའ་གྲོལ་མཆོག་ (Kun dga' grol mchog)

84 410-412	ཕྱག་རྒྱ་ཆེན་པོ་ཡི་གེ་བཞི་པའི་ཁྲིད་ཡིག། phyag rgya chen po yi ge bzhi pa'i khrid yig Contemplative Guide Books and Instructional Manuals - khrid yig	Text page View PDF
	ཀུན་དགའ་གྲོལ་མཆོག་ (Kun dga' grol mchog)

85 412-413	སྐུ་གསུམ་ངོ་སྤྲོད་ཀྱི་ཁྲིད་ཡིག། sku gsum ngo sprod kyi khrid yig Contemplative Guide Books and Instructional Manuals - khrid yig	Text page View PDF
	ཀུན་དགའ་གྲོལ་མཆོག་ (Kun dga' grol mchog)

86 413-414	རླུང་སེམས་གཉིས་མེད་ཀྱི་ཁྲིད་ཡིག། rlung sems gnyis med kyi khrid yig Contemplative Guide Books and Instructional Manuals - khrid yig	Text page View PDF
	ཀུན་དགའ་གྲོལ་མཆོག་ (Kun dga' grol mchog)

87 414-416	སྲས་མཁར་མའི་ཁྲིད་ཡིག། sras mkhar ma'i khrid yig Contemplative Guide Books and Instructional Manuals - khrid yig	Text page View PDF
	ཀུན་དགའ་གྲོལ་མཆོག་ (Kun dga' grol mchog)

88 416-418	རྔོག་པའི་བསྲེ་འཕོའི་ཁྲིད་ཡིག། rngog pa'i bsre 'pho'i khrid yig Contemplative Guide Books and Instructional Manuals - khrid yig	Text page View PDF
	ཀུན་དགའ་གྲོལ་མཆོག་ (Kun dga' grol mchog)

89 418-420	སྙན་གྱི་ཤོག་དྲིལ་བཞིའི་ཁྲིད་ཡིག། snyan gyi shog dril bzhi'i khrid yig Contemplative Guide Books and Instructional Manuals - khrid yig	Text page View PDF
	ཀུན་དགའ་གྲོལ་མཆོག་ (Kun dga' grol mchog)

90 420-432	སྦྱོར་དྲུག་གི་ཁྲིད་ཡིག། sbyor drug gi khrid yig Contemplative Guide Books and Instructional Manuals - khrid yig	Text page View PDF
	ཀུན་དགའ་གྲོལ་མཆོག་ (Kun dga' grol mchog)

91 432-435	སྙན་བརྒྱུད་ཀྱི་ཁྲིད་ཡིག ། snyan brgyud kyi khrid yig Contemplative Guide Books and Instructional Manuals - khrid yig	Text page View PDF
	ཀུན་དགའ་གྲོལ་མཆོག་ (Kun dga' grol mchog)

92 435-442	ལུས་མེད་མཁའ་འགྲོའི་ཆོས་སྐོར་དགུའི་ཁྲིད་ཡིག། lus med mkha' 'gro'i chos skor dgu'i khrid yig Contemplative Guide Books and Instructional Manuals - khrid yig	Text page View PDF
	ཀུན་དགའ་གྲོལ་མཆོག་ (Kun dga' grol mchog)

93 442-444	ཞང་གི་ཟབ་རྒྱའི་ཁྲིད་ཡིག། zhang gi zab rgya'i khrid yig Contemplative Guide Books and Instructional Manuals - khrid yig	Text page View PDF
	ཀུན་དགའ་གྲོལ་མཆོག་ (Kun dga' grol mchog)

94 444-447	དཔལ་ཆེན་རྒྭ་ལོའི་སྦྱོར་དྲུག་གི་ཁྲིད་ཡིག། dpal chen rgwa lo'i sbyor drug gi khrid yig Contemplative Guide Books and Instructional Manuals - khrid yig	Text page View PDF
	ཀུན་དགའ་གྲོལ་མཆོག་ (Kun dga' grol mchog)

95 447-453	ཕག་གྲུའི་ཐེལ་སྐོར་གྱི་ཁྲིད་ཡིག། phag gru'i thel skor gyi khrid yig Contemplative Guide Books and Instructional Manuals - khrid yig	Text page View PDF
	ཀུན་དགའ་གྲོལ་མཆོག་ (Kun dga' grol mchog)

96 453-456	དགོངས་གཅིག་གི་ཁྲིད་ཡིག། dgongs gcig gi khrid yig Contemplative Guide Books and Instructional Manuals - khrid yig	Text page View PDF
	ཀུན་དགའ་གྲོལ་མཆོག་ (Kun dga' grol mchog)

97 456-457	སྟག་ལུང་པའི་ཆོས་དྲུག་གི་ཁྲིད་ཡིག། stag lung pa'i chos drug gi khrid yig Contemplative Guide Books and Instructional Manuals - khrid yig	Text page View PDF
	ཀུན་དགའ་གྲོལ་མཆོག་ (Kun dga' grol mchog)

98 457-461	བླ་སྒྲུབ་རྟེན་འབྲེལ་རོ་སྙོམས་ཀྱི་ཁྲིད་ཡིག། bla sgrub rten 'brel ro snyoms kyi khrid yig Contemplative Guide Books and Instructional Manuals - khrid yig	Text page View PDF
	ཀུན་དགའ་གྲོལ་མཆོག་ (Kun dga' grol mchog)

99 461-462	ལོ་རས་ཐུབ་པ་ལྔ་ལྡན་གྱི་ཁྲིད་ཡིག། lo ras thub pa lnga ldan gyi khrid yig Contemplative Guide Books and Instructional Manuals - khrid yig	Text page View PDF
	ཀུན་དགའ་གྲོལ་མཆོག་ (Kun dga' grol mchog)

100 462-466	རི་ཆོས་ཀྱི་ཁྲིད་ཡིག། ri chos kyi khrid yig Contemplative Guide Books and Instructional Manuals - khrid yig	Text page View PDF
	ཀུན་དགའ་གྲོལ་མཆོག་ (Kun dga' grol mchog)

101 466-468	མགོན་པོ་སྐུ་རགས་མའི་ཁྲིད་ཡིག། mgon po sku rags ma'i khrid yig Contemplative Guide Books and Instructional Manuals - khrid yig	Text page View PDF
	ཀུན་དགའ་གྲོལ་མཆོག་ (Kun dga' grol mchog)

102 468-470	དཔལ་གུར་གྱི་མགོན་པོའི་ནང་ཁྲིད། dpal gur gyi mgon po'i nang khrid Contemplative Guide Books and Instructional Manuals - khrid yig	Text page View PDF
	ཀུན་དགའ་གྲོལ་མཆོག་ (Kun dga' grol mchog)

103 470	དོ་ཧ་སྐོར་གསུམ་གྱི་ཁྲིད་ཡིག། do ha skor gsum gyi khrid yig Contemplative Guide Books and Instructional Manuals - khrid yig	Text page View PDF
	ཀུན་དགའ་གྲོལ་མཆོག་ (Kun dga' grol mchog)

104 470-473	གྲུབ་ཐོབ་ཆོས་དྲུག་གི་ཁྲིད་ཡིག། grub thob chos drug gi khrid yig Contemplative Guide Books and Instructional Manuals - khrid yig	Text page View PDF
	ཀུན་དགའ་གྲོལ་མཆོག་ (Kun dga' grol mchog)

105 473-475	པདྨ་ལམ་རིམ་གྱི་ཁྲིད་ཡིག། pad+ma lam rim gyi khrid yig Contemplative Guide Books and Instructional Manuals - khrid yig	Text page View PDF
	ཀུན་དགའ་གྲོལ་མཆོག་ (Kun dga' grol mchog)

106 475-477	རྒྱལ་པོ་བཀའ་འབུམ་གྱི་ཁྲིད་ཡིག། rgyal po bka' 'bum gyi khrid yig Contemplative Guide Books and Instructional Manuals - khrid yig	Text page View PDF
	ཀུན་དགའ་གྲོལ་མཆོག་ (Kun dga' grol mchog)

107 477-479	ནོར་བུ་མཐོང་གྲོལ་གྱི་ཁྲིད་ཡིག། nor bu mthong grol gyi khrid yig Contemplative Guide Books and Instructional Manuals - khrid yig	Text page View PDF
	ཀུན་དགའ་གྲོལ་མཆོག་ (Kun dga' grol mchog)

108 479-480	སེམས་ཁྲིད་ཡིད་བཞིན་ནོར་བུའི་ཁྲིད་ཡིག། sems khrid yid bzhin nor bu'i khrid yig Contemplative Guide Books and Instructional Manuals - khrid yig	Text page View PDF
	ཀུན་དགའ་གྲོལ་མཆོག་ (Kun dga' grol mchog)