DNZ-13-PA-001-003

Previous Text Back to Master TextNext Text

The Pure Golden Egg of the Stainless Path		Rigpe Dorje Publications, 2024
Wylie title	lam dri ma med pa gser sgong dag pa'i skor
Location	gdams ngag rin po che'i mdzod Volume 13, Text 1, Subtext 3, Pages 26-31 (Folios 13b5 to 16a5)
Author	ཕ་དམ་པ་སངས་རྒྱས་
Citation	Pha dam pa sangs rgyas. Lam dri ma med pa gser sgong dag pa'i skor. In Gdams ngag rin po che'i mdzod, Vol. 13: 26-31. Kalimpong: Rigpe Dorje Publications, 2024.
Side notes	Recto: rtsa ba   Verso: zhi byed skor
More details More details
Genre	Source Scriptures - gzhung
Colophon	ལམ་དྲི་མ་མེད་པ་གསེར་སྒང་དག་པའི་སྐོར་ཞེས་བྱ་བ། རྣལ་འབྱོར་གྱི་དབང་ཕྱུག་དཔལ་མི་ཕམ་མགོན་པོ་ནས་གསུངས་པ་རྫོགས་སོ།
	lam dri ma med pa gser sgang dag pa'i skor zhes bya ba/_rnal 'byor gyi dbang phyug dpal mi pham mgon po nas gsungs pa rdzogs so/

Tibetan Text

[edit]

༄༅། །ལམ་དྲི་མ་མེད་པ་གསེར་སྒོང་དག་ ངོ་སྤྲོད་ཀྱི་གནད་བསྡུས་པའོ། །པའི་སྐོར་བཞུགས་སོ། །བླ་མ་དམ་པ་རྣམས་ལ་ཕྱག་འཚལ་ལོ། །རྣལ་འབྱོར་གྱི་དབང་ཕྱུག་དཔལ་མི་ཕམ་མགོན་པོས། རྣལ་འབྱོར་ཕོ་མོ་ལྔ་བཅུ་རྩ་བཞིའི་དགོངས་པ་བསྡུས་ནས། ཉམས་ཀྱི་ཕྲེང་བ་གླེན་ཚིག་ཏུ་གསུངས་པ་རྣམས་ཡི་གེར་བཀོད་པ་ཡིན་ནོ། །ཏོལ་སྐྱེས་ཀྱི་ཤེས་པ་ངོས་ཟུངས་ཤིག །དྲན་པ་རང་གྲོལ་དུ་འགྲོ་ཡིས། ཤེས་རབ་བཟང་པོའི་དགོངས་པ་ཡིན། ༡ ཡུལ་གྱི་སྣང་བ་ལ་བདེན་འཛིན་ཤིག་ཅིག །ཆགས་སྡང་རང་གྲོལ་དུ་འགྲོ་ཡིས། ཙ་པའི་དགོངས་པ་ཡིན། ༢ རྩལ་ཡུལ་ཐོག་ཏུ་སྦྱོངས་ཤིག །སྣ་ཚོགས་སུ་འགྲོ་ཡིས། ནཱ་རོ་པའི་དགོངས་པ་ཡིན། ༣ གང་ལ་ཡང་ཆེད་དུ་མ་འཛིན་ཅིག །རྟེན་རྟོག་ཕྲ་མོ་དང་འབྲལ་གྱིས། བྷུ་སུ་ཀུའི་དགོངས་པ་ཡིན། ༤ ནམ་ཡང་དྲན་པའི་རྩིས་ཟུངས་ཤིག །གང་ཡང་སྒོམ་དུ་འགྲོ་ཡིས། ཀླུ་སྒྲུབ་སྙིང་པའི་དགོངས་པ་ཡིན། ༥ ཐབས་ཀྱིས་ཡུལ་གཅུན་ཅིག །སྣ་ཚོགས་ལམ་དུ་འགྲོ་ཡིས། ཌོམྦྷི་པའི་དགོངས་པ་ཡིན། ༦ གོ་ཆ་རྗེ་ལ་ཁོལ་ཅིག །གཉེན་པོ་སྟོབས་སུ་འགྲོ་ཡིས། ཏོག་རྩེ་པའི་དགོངས་པ་ཡིན། ༧ རིག་པ་གཞི་ནས་སློངས་ཤིག །ཡུལ་གྱི་དྲི་མས་མི་གོས་ཀྱིས། ཨིནྡྲ་བྷུ་ཏིའི་དགོངས་པ་ཡིན། ༨ ཉམས་དུམ་བུར་མཐུད་ཅིག །འཁྲུལ་པས་གླགས་མི་རྙེད་ཀྱིས། མར་མེ་མཛད་ཀྱི་དགོངས་པ་ཡིན། ༩ བཟང་པའི་འཕྲོ་ལ་ཤིག་ཅིག །ཉམས་ཀྱིས་མི་འཆིང་བ་ཡིན་གྱིས། བརྟུལ་ཞུགས་སྤྱོད་པའི་དགོངས་པ་ཡིན། ༡༠ ཐབས་རྐྱེན་ཐོག་ཏུ་ཁོལ་ཅིག །ཡུལ་ངན་གྱིས་ལམ་སྣ་འདྲེན་གྱིས། ཨཱ་ནནྡའི་དགོངས་པ་ཡིན། ༡༡ གསལ་བ་ལ་གྲུངས་ཐོན་ཅིག །རྐྱེན་ངན་གྱིས་མི་བསྒྲིབ་པ་ཡིན་གྱིས། ཀྲཥྞ་པའི་དགོངས་པ་ཡིན༑ ༡༢ སྟོང་པ་ལ་ངར་སྐྱེད་ཅིག །ཡུལ་འཕྲད་འཇོམས་སུ་འགྲོ་ཡིས། པདྨ་འབྱུང་གནས་ཀྱི་དགོངས་པ་ཡིན། ༡༣ ཤེས་པ་གང་ཤར་ལ་ཐོང་ཞིག །ཉམས་ཀྱི་རྩལ་འབྱོངས་པ་ཡིན་གྱིས། ཀུ་ཀུ་རི་པའི་དགོངས་པ་ཡིན༑ ༡༤ ཡོན་ཏན་ལ་ཡིད་མ་རློམས་ཤིག །བར་ཆད་ཀྱི་བདུད་མི་འཁོར་བ་ཡིན་གྱིས། བི་པའི་དགོངས་པ་ཡིན། ༡༥ གྲགས་པའི་འགྲོས་ཤིག་ཅིག །སྒྲུབ་པ་ཕྱིར་འཕེལ་བ་ཡིན་གྱིས། ཨ་བ་དྷཱུ་ཏིའི་དགོངས་པ་ཡིན༑ ༡༦ དྲན་པའི་མེལ་ཚེ་སྐྱོངས་ཤིག །ཡེངས་པ་འཁོར་བ་ཡིན་གྱིས། རྡོ་རྗེ་དྲིལ་བུ་པའི་དགོངས་པ་ཡིན། ༡༧ སོ་མ་ལ་སྙེམས་ཆོད་ཅིག །རྟོགས་པའི་འཕན་མི་ལྡང་བ་ཡིན་གྱིས། ལཱུ་ཧི་པའི་དགོངས་པ་ཡིན། ༡༨ མི་རྟོག་པའི་གདིང་སྐྱེད་ཅིག །ཕྲ་རགས་ཀྱི་འཕན་མི་ལྡང་བ་ཡིན་གྱིས། པདྨ་བཛྲའི་དགོངས་པ་ཡིན། ༡༩ ལྷུག་པ་ལ་སོ་ཐོན་ཅིག །གཉེན་པའི་བྱ་ར་བ་འཇིག་པ་ཡིན་གྱིས། ས་ར་ཧའི་དགོངས་པ་ཡིན། ༢༠ རྗེན་པ་ལ་འཇུར་བུ་ཀློད་ཅིག །བླའི་དྲི་མ་སེལ་བ་ཡིན་གྱིས། ཨ་བ་དྷཱུ་ཏི་འབྲིང་པའི་དགོངས་པ་ཡིན། ༢༡ རང་སོ་ལ་སྡོད་ཆུག་ཅིག །ཡུལ་ཕྱིར་སེམས་མི་འཆོར་བ་ཡིན་གྱིས། ཡན་ལག་མེད་པའི་རྡོ་རྗེའི་དགོངས་པ་ཡིན། ༢༢ དྲན་པ་རྩལ་སྦྱོངས་ཤིག །ཉམས་དང་བོགས་སུ་འགྲོ་བ་ཡིན་གྱིས། བརྟུལ་ཞུགས་པ་ཆུང་ངུའི་དགོངས་པ་ཡིན། ༢༣ གཉེན་པའི་གོ་ར་ཤིག་ཅིག །མཉམ་བཞག་བཞི་ལ་མི་འཆོར་བ་ཡིན་གྱིས། དྷུ་ཏི་པ་ཆུང་བའི་དགོངས་པ་ཡིན། ༢༤ གཉིས་སྣང་གི་ཤེས་པ་ཕྲོལ་ཅིག །འཁོར་བ་མིང་དུ་འགྲོ་བ་ཡིན་གྱིས། ཨཱ་དེ་བའི་དགོངས་པ་ཡིན། ༢༥ དུག་ལྔ་ངོས་ཟུངས་ཤིག །མཐོང་བས་རང་གྲོལ་བ་ཡིན་གྱིས། ཀམྦཱ་ལའི་དགོངས་པ་ཡིན། ༢༦ འཐོར་ཡས་ཕྱིར་སྡོམས་ཤིག །སྒྲོག་རྩ་བར་བཅད་པ་ཡིན་གྱིས། ཀོ་ཥ་པའི་དགོངས་པ་ཡིན། ༢༧ བྱིངས་རྨུགས་རྩད་ཆོད་ཅིག །མུན་ཁུང་དུ་མར་མེ་བཏེགས་པ་ཡིན་གྱིས། ཨཱ་ནནྡའི་དགོངས་པ་ཡིན༑ ༢༨ སྐྱོ་འགྱོད་སུན་ཕྱུངས་ཤིག །འཁོར་བ་ལ་ཡིད་འབྱུང་བ་ཡིན་གྱིས། བ་སུ་དྷ་རའི་དགོངས་པ་ཡིན། ༢༩ དབང་པོས་རིག་པ་གཏོད་ཅིག །སེམས་ཀྱི་གྱོང་འདུལ་བ་ཡིན་གྱིས། བསོད་སྙོམས་པའི་དགོངས་པ་ཡིན། ༣༠ ལྟ་སྟངས་གདན་ས་སྤོས་ཤིག །འཁྲུལ་པ་དུམ་བུར་གཏུབས་པ་ཡིན་གྱིས། ཐོགས་མེད་ཀྱི་དགོངས་པ་ཡིན། ༣༡ སྒྲིམ་གློད་རེས་འཇོག་ཏུ་ཁྱེར་ཅིག །མཉམ་རྗེས་རྒྱུན་བསྲིང་བ་ཡིན་གྱིས། གསེར་གླིང་པའི་དགོངས་པ་ཡིན། ༣༢ བཤིག་རྗེས་གཡང་ལ་སྐྱུར་ཅིག །གཉུག་མའི་རང་ཞལ་བལྟ་བ་ཡིན་གྱིས། ཌོམྦྷི་ཆུང་བའི་དགོངས་པ་ཡིན། ༣༣ མོས་གུས་ལ་སྟོབས་སྐྱེད་ཅིག །བྱིན་རླབས་ཀྱིས་རྒྱུད་སྨིན་པ་ཡིན་གྱིས༑ ནཱ་རོ་པའི་དགོངས་པ་ཡིན། ༣༤ གདམས་པ་ཡུལ་དང་བསྟུན་ཅིག །གཉེན་པོ་སྟོབས་འཕེལ་བ་ཡིན་གྱིས། ཏཻ་ལོ་པའི་དགོངས་པ་ཡིན། ༣༥ ལམ་རྟགས་ངོས་ཟུངས་ཤིག །འབྲས་བུ་མི་བསླུ་བ་ཡིན་གྱིས། རིན་ཆེན་བཟང་པའི་དགོངས་པ་ཡིན། ༣༦ གཉེན་པའི་གོ་རིམ་ཤིག་ཅིག །རྟེན་རྟོག་དང་བྲལ་བ་ཡིན་གྱིས། གནྡྷ་པའི་དགོངས་པ་ཡིན། ༣༧ རྟོག་པ་འཕྲང་ནས་ཐོན་ཅིག །ཉམས་ཀྱི་གསོས་འདེབས་པ་ཡིན་གྱིས༑ ཛ་བ་རི་པའི་དགོངས་པ་ཡིན། ༣༨ གང་ལ་ངེས་ཤེས་སྐྱེད་ཅིག །གང་ཡང་གདམས་པར་འགྲོ་བ་ཡིན་གྱིས། ར་ཊི་ཏའི་དགོངས་པ་ཡིན། ༣༩ མ་འཁྲུལ་བར་ངོས་ཟུངས་ཤིག །དེར་འཛིན་འཇིག་པ་ཡིན་གྱིས། བི་རུ་པའི་དགོངས་པ་ཡིན། ༤༠ སོ་མའི་རྒྱུན་མཐུད་ཅིག །འཁྲུལ་པས་གླགས་མི་རྙེད་པ་ཡིན་གྱིས། དྷ་ས་ལའི་དགོངས་པ་ཡིན། ༤༡ རིག་པ་གང་ཤར་དུ་དེད་ཅིག །འཕྲོ་རྒོད་ཀྱི་མཚངས་རྡོལ་བ་ཡིན་གྱིས། ཨ་ཀ་ར་སིདྡྷིའི་དགོངས་པ་ཡིན། ༤༢ ཐབས་ཀྱི་གནད་ཆིངས་ཤིག །ཤེས་རབ་ཀྱི་རྩལ་ཐོན་པ་ཡིན་གྱིས། སྒེག་པ་རྡོ་རྗེའི་དགོངས་པ་ཡིན། ༤༣ གང་ཡང་གྲོགས་སུ་ཁྱེར་ཅིག །རྩལ་སྣ་ཚོགས་ལ་འབྱོངས་པ་ཡིན་གྱིས། ཙཱ་པའི་དགོངས་པ་ཡིན། ༤༤ ཞེན་པ་གློ་བུར་དུ་ཆོད་ཅིག །ཡུལ་གྱིས་མི་འཆིང་བ་ཡིན་གྱིས། པདྨོ་ཞབས་ཀྱི་དགོངས་པ་ཡིན། ༤༥ སྙེམས་སེམས་ལ་ཐོག་རྫིས་གྱིས་ཤིག །ཡུལ་ཕྲད་འཇོམས་སུ་འགྲོ་བ་ཡིན་གྱིས། ཤིང་ལོ་མའི་དགོངས་པ་ཡིན། ༤༦ མཚང་ཡུལ་ལས་ཐོན་ཅིག །གཞི་ལ་མི་ཆགས་པ་ཡིན་གྱིས། རི་ཁྲོད་མའི་དགོངས་པ་ཡིན། ༤༧ སྐྱོན་ངོས་ཟུངས་ཤིག །གཉེན་པོ་བསྟེན་སླ་བ་ཡིན་གྱིས། དྲི་མེད་མའི་དགོངས་པ་ཡིན། ༤༨ བཟང་པའི་འཕྲོ་ལ་མཐུད་ཅིག །ཉམས་མྱོང་འཕེལ་བ་ཡིན་གྱིས། གྷ་དྷ་རའི་དགོངས་པ་ཡིན། ༤༩ རོ་སྣ་ཚོགས་ལ་མྱོངས་ཤིག །ཕན་གང་ནས་ཐོགས་ངེས་པ་མེད་ཀྱིས༑ གཅེར་བུ་མའི་དགོངས་པ་ཡིན། ༥༠ རྐྱེན་ངན་དང་དུ་བསྣོལ་ཅིག །གཉེན་པོ་རྐྱང་པ་ལམ་མིན་གྱིས། མཁའ་འགྲོ་དཀར་མའི་དགོངས་པ་ཡིན། ༥༡ འཁུ་འཕྲིག་གི་མཐའ་སོལ་ཅིག །བློ་ཡི་སྙེམས་ཐག་ཆོད་པ་ཡིན་གྱིས། ལེགས་སྨིན་ཀཱ་རའི་དགོངས་པ་ཡིན། ༥༢ ཤེས་བཞིན་དྲན་པས་ཟུངས་ཤིག །འཁྲུལ་པས་མི་གོས་པ་ཡིན་གྱིས། ཀུ་མུ་ཏའི་དགོངས་པ་ཡིན། ༥༣ མངོན་དུ་གྱུར་པ་གྱིས་ཤིག །ཕྱིར་མི་ལྡོག་པ་ཡིན་གྱིས༑ སུ་ཁ་མ་ཧཱ་སིདྡྷིའི་དགོངས་པ་ཡིན། ༥༤ རྣལ་འབྱོར་ཕོ་མོ་ལྔ་བཅུ་རྩ་བཞིའི་དགོངས་པ་དྲིལ་བ། ལམ་དྲི་མ་མེད་པ་གསེར་སྒང་དག་པའི་སྐོར་ཞེས་བྱ་བ། རྣལ་འབྱོར་གྱི་དབང་ཕྱུག་དཔལ་མི་ཕམ་མགོན་པོ་ནས་གསུངས་པ་རྫོགས་སོ།