DNZ-15-BA-025

Previous Text Back to Volume PageNext Text

		Rigpe Dorje Publications, 2024
Wylie title
Location	gdams ngag rin po che'i mdzod Volume 15, Text 25, Pages (Folios to )
Author	ཟླ་བ་སེངྒེ
Citation	Zla ba seng+ge. '. In Gdams ngag rin po che'i mdzod, Vol. 15: . Kalimpong: Rigpe Dorje Publications, 2024.	Shechen Publications, 1999
Side notes	Verso: sbyor drug skor
More details More details
Genre

Tibetan Text

[edit]

༄༅། །བསྙེན་སྒྲུབ་ཀྱི་ཁྲིད་ཡིག་བཞུགས་སོ། །

༄༅། །རྒྱུད་སྡེ་རིན་པོ་ཆེ་ཐམས་ཅད་ཀྱི་ཟབ་དོན་མ་ལུས་པའི་དོན་སྟོན་པར་བྱེད་པ། རྡོ་རྗེ་གསུམ་གྱི་བསྙེན་སྒྲུབ་ཅེས་པའི་ཁྲིད་ཡིག །བདེ་བར་གཤེགས་པ་ཐམས་ཅད་སྐྱེད་པར་བྱེད་པའི་ཡུམ་རྡོ་རྗེ་རྣལ་འབྱོར་མ་ཉིད་དང༌། རྗེ་གྲུབ་ཐོབ་ཆེན་པོའི་ཞབས་ལ་གུས་པས་ཕྱག་འཚལ་ཞིང་སྐྱབས་སུ་མཆིའོ། །དེ་ལ་ཐོག་མར་ལུས་རྩ་དག་པར་བྱེད་པ་སྐུ་རྡོ་རྗེའི་བསྙེན་པ། སོ་སོར་སྡུད་དང་བསམ་གཏན། གཉིས་པ་ངག་རླུང་དག་པར་བྱེད་པ་གསུང་རྡོ་རྗེའི་སྒྲུབ་པ། སྲོག་རྩོལ་དང་འཛིན་པ། གསུམ་པ་ཡིད་ཐིག་ལེ་དག་པར་བྱེད་པ་ཐུགས་རྡོ་རྗེའི་སྒྲུབ་པ་ཆེན་པོ་ རྗེས་དྲན་དང་ཏིང་ངེ་འཛིན། དང་གསུམ་མོ། །དེ་ཡང་ཡིད་དང་རྗེས་སུ་མཐུན་པའི་གནས་སུ་མུན་པ་ལེགས་པར་བསྒྲུབས་ནས། ལོག་འཚོ་སྤངས་པའི་ཡོ་བྱད་ཚོགས་པར་བྱས་ཏེ། སྐྱབས་འགྲོ་སེམས་བསྐྱེད་རྣམས་སྔོན་དུ་འགྲོ་བ་ཚར་བའི་རྗེས་ལ། གཡས་པའི་རྩ་ལ་སྲོག་བབས་པའི་དུས་སུ་བསྒོམ་ པར་བྱ་སྟེ། སྟོང་ཕྲག་བདུན་ཅུ་རྩ་གཉིས་རྩ་ཡི་བཅུད། །ནམ་མཁའི་མཐོངས་སུ་གཟའ་རྣམས་བརྟན་པར་བཅིངས། །ཞེས་པའི་དོན་ཉམས་སུ་ལེན་པའི་རིམ་པ་ནི། སྟེང་གི་སྐྱིལ་ཀྲུང་གིས་སྟེང་གི་རླུང་བཅིངས། འོག་གི་སྐྱིལ་ཀྲུང་གིས་འོག་གི་རླུང་བཅིངས། བར་གྱི་སྐྱིལ་ཀྲུང་གིས་བར་གྱི་རླུང་བཅིངས་ཏེ། དང་པོ་ནི་རྡོ་རྗེ་སྐྱིལ་ཀྲུང་བྱ། ལག་པ་རྡོ་རྗེ་ཁུ་ཚུར་བཅངས་ལ་བརླ་རྩ་མནན། མིག་གཉིས་རྡོ་རྗེ་གཙུག་ཏོར་གྱི་ལྟ་སྟངས་བྱ་ཞིང་དབང་པོའི་སྒོ་ལྔ་ཁྲིམ་སྒྲིམ་མོ། །དམིགས་པ་གང་ཡང་མི་འཛིན་པར་སྒོམ་འདོད་ཀྱི་རྟོག་པ་ཐམས་ཅད་ཕྱིར་བསྙིལ་ཏེ། ཐ་ན་ཉམས་མྱོང་དང་རྟགས་ཀྱི་འདོད་པ་ཙམ་ཡང་མི་བྱེད་པར་བློ་བརྟེན་གང་ལ་ཡང་མ་འཆའ། བློས་གང་དུ་ཡང་མི་འཛིན་པར་མི་རྟོག་པའི་ངང་དུ་མ་ཡེངས་ཙམ་དུ་བཞག་ཅིང༌། སྒོ་ལྔ་བཅུད་ལ་བོར་བས། རྩ་བ་དང་ཡན་ལག་གི་རླུང་དང༌། རྣམ་པར་རྟོག་པ་ནང་དུ་ བཀག་ན། རྣམ་པར་མི་རྟོག་པའི་ཏིང་ངེ་འཛིན་སྐྱེ་ཞིང༌། དུ་བ་ལ་སོགས་པའི་སྟོང་གཟུགས་མཐོང་བར་འགྱུར་རོ། །དེ་ཡང་མུན་པར་བསྒོམ་པའི་ཚེ། དུས་གསུམ་གྱི་སྤྲོས་པ་བཅད་ནས། བཟོ་བཅོས་གང་ཡང་མེད་པར་མིག་མི་འཛུམ་ཞིང་མིག་འབྲས་མི་འགུལ་བར་ཧད་དེ་འཇོག་པ་ཡིན། སྐབས་སྐབས་སུ་མུན་སྣང་དེ་ཉིད་ལ་མིག་གི་དབང་པོ་དང་རིག་པ་ཁྱབ་པར་བཀོད་ནས་ཤེས་པ་བཟོ་མེད་དུ་འཇོག །ཐུན་མཚམས་སུ་ཡང༌། མདུན་གྱི་ནམ་མཁའ་གང་སྣང་ལ་མིག་གི་དབང་པོ་དང་ཤེས་པ་ཁྱབ་པར་བཀོད་ནས། མ་ཡེངས་པའི་ངོས་ནས་མི་སྒོམ་པར་འཇོག་པ་ཡིན། མ་ཡེངས་ལ་རྩོལ་བ་མེད་པའི་གནད་དེ་ལ་རིག་པ་ལེགས་པར་ཆུན་ན་ཉམས་མྱོང་བཙན་ཐབས་སུ་སྐྱེ། དེས་མ་ཟིན་ན་འཕྲལ་ཏུང་ཏུང་གིས་འགྱུར་དྲགས་ཀྱི་རྩོལ་བ་བསྐྱེད་ཀྱང་སྒོམ་གྱི་སྣ་སུན་པའི་རྐྱེན་དུ་སོང་དོགས་ཡོད་པས་གནད་ཟིན་པ་གལ་ཆེའོ། །གཉིས་པ། དེ་ནས་འོག་སྐྱིལ་ཀྲུང་གིས། རྒྱ་མཚོའི་སྟེང་དུ་རྩ་གསུམ་ཡན་ལག་བསྡམས། །ཞེས་པའི་ལག་ལེན་འདི། བསམ་གཏན་གྱི་ཆོས་ལྔ་དང་ལྡན་པས། འོག་གཉིས་ཐད་ཀར་བསྡམ། ཉྭ་བཞི་བསྒྲིམ། རྐང་པའི་སོར་མོ་རྣམས་བསྐུམ། སྒལ་ཚིགས་དགྱེ་བར་བྱ། ལྟེ་བ་མན་ཆད་ཆ་ཆ་ནས་བསྒྲིམས་ནས། རྣམ་སྣང་གི་ལྟ་སྟངས་ཐུར་དུ་བལྟ་ཞིང༌། རྣམ་པར་མི་རྟོག་པ་ལ་འཇོག་པ་སྟེ། དེ་ལྟར་བསྒོམས་པས་སྟེང་གི་སྐྱོན་འོག་གིས་སེལ་ལ། སྟེང་སྐྱིལ་ཀྲུང་བསྒོམས་པས་ འོག་གི་སྐྱོན་རྣམས་སེལ་ལོ། །གསུམ་པ། དེ་ནས་སྟེང་འོག་གཉིས་གཅིག་ཏུ་བྱེད་པ་ལ། བར་སྐྱིལ་ཀྲུང་བསྒོམ་པ་ནི། ལུས་བསམ་གཏན་གྱི་ཆོས་ལྔ་དང་ལྡན་པས། དལ་མོ་ཅུང་ཟད་དགྱེ་བར་བྱ་ཞིང༌། ལྟེ་བ་ཕྱིར་བསྐྱེད་དེ་ནན་ཏན་དུ་བསྒོམས་པས། སྟེང་འོག་གཉིས་ཀའི་གེགས་སེལ་བ་ལ་སོགས་པ་ཡོན་ཏན་དཔག་ཏུ་མེད་དོ། །བཞི་པ། དེ་ནས་ཉི་མའི་རྣལ་འབྱོར་ནི། ནམ་མཁའ་རྒྱ་ཆེན་པོ་མཐོང་བའི་སར། ཉི་མ་ལ་རྒྱབ་ཕྱོགས་པར་བྱས་ནས་ལུས་གནད་ལྟ་སྟངས་དང༌། སེམས་ཀྱི་འཇོག་སྔར་ལྟར་བྱས་ནས་བསྒོམས་པས། ཉིན་མོའི་རྟགས་རྣམས་མཐོང་བར་འགྱུར་རོ། །དེ་ལྟར་རྟགས་ཀྱི་སྣང་བ་སྣ་ཚོགས་པ་དེ་ཐམས་ཅད་རིག་པ་གསལ་སྟོང་ངོ་བོར་ངོ་འཕྲོད་དགོས་ཏེ། གཞི་ལམ་འབྲས་བུའི་ཆོས་ཐམས་ཅད་རང་གི་སེམས་སྣང་བ་ལས་ལོགས་སུ་མེད་ཅིང༌། རྟགས་སྣང་མ་འགགས་པར་གསལ་བ་དེ། སེམས་ཀྱི་མཚན་ཉིད་ཡིན་ལ། དེའི་རང་བཞིན་སྟོང་པར་གནས་པས་སྣང་སྟོང་དབྱེར་མེད་པའི་ངོ་བོ་ཆུ་ནང་གི་ཟླ་བའམ། མེ་ལོང་ནང་གི་གཟུགས་བརྙན་ལྟར་དུ་ངོ་སྤྲད་གསུངས་སོ། །གྲུབ་པའི་ཚད་ནི་ཚིག་གི་མཆོག་སྟེར་བ་སྟེ། མེ་དང་གདོན་ལ་སོགས་པ་ཞི་བར་གྱུར་ཅིག་ཅེས་པས་ཞི་བ་ལ་སོགས་པའོ། །དབང་པོ་ལྔ་དང་ཡུལ་ལྔ་དབྱེར་མེད་དུ་ཤེས་པས། ལྷ་སྐུ་ལྔར་ཤར་བ་ནི་བསམ་གཏན་གྱི་རྟགས་བཅུའོ། །ཡན་ལག་ནི། ཤེས་རབ་དང༌། རྟོག་པ་དང༌། སྤྱོད་པ་དང༌། དགའ་བ་དང༌༑ གཡོ་མེད་བདེ་བ་སྟེ་བསམ་གཏན་གྱི་ཡན་ལག་ལྔའོ། །དེ་ལ་ཤེས་རབ་ཅེས་པ་ནི། ཡོད་པའི་ཆོས་ཐམས་ཅད་སྟོང་པར་མཐོང་བ་རྣམས་ལ་སྟོང་པ་ཉིད་ཀྱི་གཟུགས་དེ་ཉིད་ལ་སེམས་རབ་ཏུ་འཇུག་ཅིང་བལྟ་བའོ། ། རྟོག་པ་ཡིས་ནི་སེམས་ཀྱི་དངོས་པོ་འཛིན་པའོ། །སྤྱོད་པ་ནི་དེའི་དོན་ངེས་པ་སྟེ། འཛིན་པའི་དངོས་པོ་རྟོག་པའོ། །དགའ་བ་ནི་སྟོང་པ་ཉིད་ཀྱི་གཟུགས་ལ་ཆགས་པ་སྟེ། དངོས་པོ་ཐམས་ཅད་ལ་སེམས་གནས་པའོ། །གཡོ་མེད་པའི་བདེ་བ་ནི་སྟོང་གཟུགས་དང་སེམས་ལྷན་ཅིག་ཏུ་བྱེད་དེ། དངོས་པོ་ཐམས་ཅད་ལ་བདེ་བ་ཕུན་སུམ་ཚོགས་པའོ། །སོ་སོར་སྡུད་ཀྱི་གཟུགས་མཐོང་བ་ལ། བསམ་གཏན་གྱི་གཟུགས་ལ་སེམས་ཀྱིས་ཀུན་ནས་མཁྱུད་དེ་བརྟན་པར་བྱེད་པ་ཡིན་ནོ། །ཡོན་ཏན་ནི་མངོན་པར་ཤེས་པ་ལྔ་འཆར་བ་ལ་སོགས་པའོ། །དེ་ལྟར་སོ་སོར་སྡུད་དང་བསམ་གཏན་གྱིས་སྐུ་རྡོ་རྗེའི་བསྙེན་པ་སོང་ནས། ལྔ་པ། སྤྱི་དོན་ལྔ་པ་ངག་རླུང་དག་པར་བྱེད་པ་གསུང་རྡོ་རྗེའི་སྒྲུབ་པ་ནི། སྟན་བདེ་བ་ལ་ལུས་གནད་ལྟ་སྟངས་དང་ལྡན་པས། རང་ལྷར་བསྐྱེད། བླ་མ་ལ་གསོལ་བ་གདབ། རླུང་རོ་ལེགས་པར་ཕྱུང་སྟེ་སྒོམ་པ་ནི། འབྱུང་འཇུག་གནས་གསུམ་རྩ་བའི་རླུང་རྣམས་ཀྱང༌༑ ༑དེ་དུས་སྐུ་གསུང་ཐུགས་ཀྱི་བཟླས་པར་འགྱུར། །ཞེས་རླུང་ནང་དུ་འཇུག་པ་ༀ། བར་དུ་གནས་པ་ཧཱུྃ། ཕྱིར་དབྱུང་བ་ཨཱཿ ཡི་གེ་གསུམ་རང་བཞིན་རྡོ་རྗེའི་བཟླས་པ་བྱ་བ་ཡིན། བགྲང་ཕྲེང་སྤངས་པའི་བཟླས་པ་ ཅི་རིགས་པ་ཞིག་བྱེད་པ་ཡིན། །དྲུག་པ། དེའི་རྗེས་སུ་རླུང་གི་མལ་འཚོལ་ཅེས་པ། དམིགས་པ་མེད་པས་རླུང་ལམ་དུ་བྱེད་པའི་རླུང་སྦྱོར་རྣམ་པ་ལྔ་སྒོམ་སྟེ། ནམ་མཁའི་རླུང་གི་འཛིན་སྟངས། འཇུག་པ་དང་འབྱུང་བ་ཚོར་རིག་མེད་པ་ལྟ་བུར་འཇམ་ཞིང་དལ་ལ་ཆ་སྙོམས་པས་ཡུན་རིང་དུ་བཟུང༌། བདུན་པ། དེ་བཞིན་རླུང་གི་རླུང་དྲག་ལ་རིང་བར་བཟུང༌། བརྒྱད་པ། མེའི་རླུང་དྲག་ལ་ཐུང་བ་རྦུད་རྦུད་བཟུང་ལ་བསྒོམ། དགུ་པ༑ ཆུའི་རླུང་སོ་བར་ཅུང་ཟད་བསྡམས་པའི་བར་ནས་བཞུར་ལ་སིར་སྒྲ་དང་བཅས་ལ་བསྒོམ། བཅུ་པ། སའི་རླུང་ནམ་མཁའི་རླུང་ལ་ཅུང་ཟད་དྲག་པར་ཚོར་མ་ཚོར་ཙམ་དུ་དལ་བུ་ཡིས་བཟུང་ལ་བསྒོམ། རླུང་སྦྱོར་དེ་རྣམས་ཀྱི་གནད་འཐེམས་ན་རླུང་སོ་སོར་དྲོད་རྟགས་དང་ཉམས་རྟོགས་འཕྲལ་དུ་སྐྱེ། རླུང་སྦྱོར་ཕྱི་མ་རྣམས་ལ་གེགས་མི་ཡོང་བ་ཡིན་གསུངས། བཅུ་གཅིག་པ། དེ་ནས་འོག་ཐུར་སེལ་གྱི་རླུང་གིས། གདན་དང་འབྱུང་བ་རིམ་བརྩེགས་བསྒོམ་པ་ནི། ནམ་མཁའ་རླུང་མེ་ཆུ་དང་ས་རྣམས་ཀྱི། །ཐུར་དུ་བསྡམས་པས་དཀྱིལ་འཁོར་གསལ་བར་བལྟ། །ཞེས་པས། འབྱུང་བ་སོ་སོའི་རླུང་གི་འཛིན་སྟངས་ཀྱིས་སྲོག་རླུང་བཟུང་སྟེ། ལྟེ་བའི་འོག་ཏུ་ཕུལ་བས་ཐུར་སེལ་བསྡམ་པར་བྱའོ། །དམིགས་པ་ནི། ཨེ་ཡིག་སྔོན་པོ་ཡོངས་སུ་གྱུར་པ་ལས། ནམ་མཁའི་དཀྱིལ་འཁོར་སྔོན་པོ་གྲུ་གསུམ་ཨེས་མཚན་པ། ཤིན་ཏུ་དྭངས་པ་བློས་འཁྱུད་ཚད་བསྒོམ། ནམ་མཁའི་ རླུང་ཟིན་པའི་རྟགས་ལུས་མེད་པ་ལྟ་བུའི་སྟོང་ཉམས་བཟང་པོ་འཆར་རོ། །བཅུ་གཉིས་པ། ཆོས་འབྱུང་དེའི་སྟེང་དུ་ལྃ་ཡིག་ཡོངས་སུ་གྱུར་པ་ལས། རླུང་གི་དཀྱིལ་འཁོར་ནག་པོ་གཞུའི་དབྱིབས་ཅན་གཡོ་བའི་བ་དན་གྱིས་མཚན་པ་ཡང་ཞིང་གཡོ་བ་ཞིག་སྒོམ། ཟིན་རྟགས་མགོ་ཟི་བ་དང་གཡའ་ཟ་བ་ལ་སོགས་པ་འབྱུང༌། བཅུ་གསུམ་པ། རླུང་གི་སྟེང་དུ་རཾ་ཡིག་ཡོངས་སུ་གྱུར་པ་ལས། མེའི་དཀྱིལ་འཁོར་དམར་པོ་གྲུ་གསུམ་རེག་བྱ་ཤིན་ཏུ་ཚ་བ་རཾ་གྱིས་མཚན་པ་བསྒོམ། ཟིན་རྟགས་སྔར་ལས་དྲོད་ཆེ་བ་དང་ལུས་ཚ་བ་ལ་སོགས་པ་འབྱུང༌། བཅུ་བཞི་པ། མེའི་སྟེང་དུ་བཾ་ཡིག་ཡོངས་སུ་གྱུར་པ་ལས། ཆུའི་དཀྱིལ་འཁོར་དཀར་ལ་ཟླུམ་པ་རེག་བྱ་བསིལ་བ་བུམ་པས་མཚན་པ་བསྒོམ། རང་གི་འོག་ཏུ་རླུང༌། རང་གི་འོག་ཏུ་མེ། རང་གི་འོག་ཏུ་ཆུ་ཟེར་བའང་སྣང༌། ཟིན་རྟགས་གྲང་བ་དང་འདར་བ་ལ་སོགས་པ་འབྱུང༌། བཅོ་ལྔ་པ། ཆུའི་སྟེང་དུ་ལཾ་ཡིག་ཡོངས་སུ་གྱུར་པ་ལས། སའི་དཀྱིལ་འཁོར་གྲུ་བཞི་པ་རེག་བྱ་ཤིན་ཏུ་ལྕི་བ་རྡོ་རྗེ་རྒྱ་གྲམ་བཞིས་མཚན་པ་བསྒོམ། རླུང་ཟིན་པའི་རྟགས་ཤེས་པ་ལྕི་བ་དང༌། འགྲོ་སྙིང་མི་འདོད་པ་ལ་སོགས་པ་འོང༌། འདི་རྣམས་སྒོམ་པའི་དུས་འོག་རླུང་ལ་གནད་དུ་བསྣུན་པའི་རླུང་སྦྱོར་ཡིན་ནོ། །འབྱུང་བ་སོ་སོའི་རླུང་གི་འཛིན་སྟངས་ཀྱིས་འབྱུང་བ་རིམ་བརྩེགས་བསྒོམ་པར་བཤད་པ་འདི། རིམ་པ་རིམ་པར་བརྟན་བསྒོམ་པའི་ལུགས་ཡིན་ཞིང༌། མགྱོགས་ཆོད་དུ་བསྒོམ་པའི་ལུགས་འབྱུང་བ་ རིམ་བརྩེགས་ཀྱང་ལྷ་གང་བསྒོམ་པའི་རིགས་ཀྱི་རླུང་སྦྱོར་དེ་ཀས་བསྒོམ་པས་ཆོག་པ་ཡིན་གསུང༌། བཅུ་དྲུག་པ། དེ་ཡང་འབྱུང་བ་རིམ་བརྩེགས་ཀྱི་སྟེང་དུ། ཡེ་ཤེས་ཀྱི་གདན་ལྗང་ཁུ་ཟླུམ་པོའི་དབྱིབས་ཅན་དང༌། བཅུ་བདུན་པ། སྒྲ་གཅན་དང༌། བཅོ་བརྒྱད་པ། ཉི་མ་དང༌། བཅུ་དགུ་པ། ཟླ་བ་དང༌། ཉི་ཤུ་པ། དུས་མེ་རྣམས་ཀྱི་གདན་ཚོ་དབྱིབས་ཟླུམ་པོ། རེག་བྱ་འབྱུང་བ་རིམ་བརྩེགས་དང་མཐུན་པར་བསྒོམ་མོ། །འོག་ཐུར་སེལ་གྱི་རླུང་ཞེས་བྱ་བ། མོ་རླུང་ཞེས་བྱ་སྟེ། འོག་ནས་འབྱུང་བའི་རླུང་སྦྱོར་རོ། །ཉེར་གཅིག་པ། དེ་ནས་སྟེང་སྲོག་རྩོལ་གྱི་རླུང་སྦྱོར་ས་བོན་ཡིག་འབྲུ་བསྐྱེད་པ་ནི། ས་ཆུ་མེ་རླུང་ནམ་མཁའི་བདག་ཉིད་ཀྱི། །ཡིག་འབྲུ་རྒྱུ་བ་ཨཱ་ལི་ཀཱ་ལིའི་རླུང༌། །ཞེས་པ། སྲོག་རླུང་ས་རླུང་གི་འཛིན་སྟངས་ཀྱིས་ཨཱ་ལི་ཀཱ་ལི་གསེར་བཙོ་མའི་མདོག་ཅན། མེ་ཏོག་གི་ཕྲེང་བ་ལྟ་བུ་སེར་ནར་ནར་བྱུང་གདན་དུ་མེའི་སྟེང་དུ་བབས་པས་སེར་ཧམ་མེ་བ་ལ་དམིགས་པ་གཏད། དེ་ལ་ནན་ཏན་དུ་སྒོམ་ཞིང་མི་ཐུབ་པར་གཏོང་བའི་དུས་སུ། རླུང་ཕྱིར་དབྱུང་བ་དང་མཉམ་དུ་ཡིག་འབྲུ་རྣམས་ཀྱང་གྱེན་ལ་སེར་ན་ར་ར་སོང་བར་བསྒོམ། ཉེར་གཉིས་པ། ཡང་ཆུ་རླུང་གི་འཛིན་སྟངས་ཀྱིས་ཨཱ་ལི་ཀཱ་ལི་མུ་ཏིག་གི་ཕྲེང་བ་ལྟ་བུ་སྐྱ་ན་ར་ར་བྱུང༌། ཟླ་བའི་གདན་གྱི་སྟེང་དུ་དཀར་ཧྲམ་མེ་བ་ལ་དམིག་པ་གཏད། རླུང་ཕྱིར་དབྱུང་བའི་དུས་སུ་དཀར་ན་ར་ར་སོང་བར་བསམ་མོ། །ཉེར་གསུམ་པ། ཡང་མེ་རླུང་གི་ འཛིན་སྟངས་ཀྱིས་ཨཱ་ལི་ཀཱ་ལི་བྱི་རུའི་མདོག་ལྟ་བུ་དམར་ན་ར་ར་བྱུང་ནས་ཉི་མའི་གདན་གྱི་སྟེང་དུ་དམར་ཧྲམ་མེ་བ་ལ་དམིགས་པ་གཏད་ནས། ཕྱིར་དབྱུང་བ་ཡང་དམར་ན་ར་ར་སོང་བར་བསམ་མོ། །ཉེར་བཞི་པ། ཡང་རླུང་གི་འཛིན་སྟངས་ཀྱིས་ཨཱ་ལི་ཀཱ་ལི་ནག་པོ་ནག་ན་ར་ར་བྱུང་བ་སྒྲ་གཅན་གྱི་སྟེང་དུ་ནག་ཧྲིལ་བ་ལ་དམིགས་པ་གཏད། ཕྱིར་དབྱུང་བ་ཡང་ནག་ན་ར་ར་སོང་བར་བསམ་མོ། །ཉེར་ལྔ་པ། ནམ་མཁའི་རླུང་གི་འཛིན་སྟངས་ཀྱིས་ཨཱ་ལི་ཀཱ་ལི་བཻ་ཌཱུའི་མདོག་ལྟ་བུ་སྔོ་ན་ར་ར་བྱུང་བ་ཡེ་ཤེས་ཀྱི་གདན་གྱི་སྟེང་དུ་སྔོ་ཧྲམ་མེ་བ་ལ་དམིགས་པ་གཏད། ཕྱིར་དབྱུང་བ་ཡང་སྔོ་ན་ར་ར་སོང་བར་བསམ་མོ། །འབྱུང་བ་སོ་སོའི་རླུང་གི་འཛིན་རྟགས་ཐུར་སེལ་གྱི་སྐབས་དང་འདྲའོ། །དེ་ཐམས་ཅད་ཀྱི་ཐུན་མགོ་ལ་ལྟ་སྟངས་བསྒོམ། དེ་ནས་དམིགས་མེད་ཀྱི་རླུང་བསྒོམ། དེ་ནས་སྲོག་རྩོལ་གྱི་རླུང་བསྒོམ་པ་ཡིན་གསུང༌། དེ་ནི་སྟེང་སྲོག་རྩོལ་གྱི་རླུང་ཞེས་བྱ། ཕོ་རླུང་ཞེས་བྱ་སྟེ་སྟེང་ནས་འཇུག་པ་ཡིན་ནོ། །ཉེར་དྲུག་པ། དེ་དག་བརྟན་པ་དང་བར་རླུང་ལ་བསྟེན་ནས་ཕྱག་མཚན་བསྐྱེད་པ་ནི། རྡོ་རྗེ་རལ་གྲི་རིན་ཆེན་པདྨ་དང༌། །འཁོར་ལོ་རྣམས་ནི་རིམ་བཞིན་གསལ་བར་བལྟ། ། སྟེང་འོག་བར་དུ་བསྡམས་པས་ཐོབ་པར་འགྱུར། །ཅེས་པ་དང༌། རང་རང་གི་རླུང་གི་འཛིན་སྟངས་ཀྱིས་སྟེང་རླུང་བཟུང་འོག་རླུང་འཐེན། བར་རླུང་བཟུང་ནས་སྟེང་འོག་གཉིས་ཅུང་ཟད་གློད་དེ། གདན་ལ་གནས་པའི་ ས་བོན་རྣམས་ཡོངས་སུ་གྱུར་པ་ལས་རིམ་པ་བཞིན་ཧྲི་སྔོན་པོ་དང༌། ཉེར་བདུན་པ། རལ་གྲི་ནག་པོ་དང༌། ཉེར་བརྒྱད་པ། རིན་པོ་ཆེ་དམར་པོ་དང༌། ཉེར་དགུ་པ། པདྨ་འདབ་བརྒྱད་དཀར་པོ་དང༌། སུམ་ཅུ་པ། འཁོར་ལོ་རྩིབས་བརྒྱད་སེར་པོ་རྣམས་བསྒོམ་པར་བྱའོ། །དེ་རྣམས་བར་རླུང་གི་སྦྱོར་བ་སྟེ། རླུང་སེམས་སྟེང་འོག་བར་གསུམ་དང་ཡན་ལག་གང་དུའང་འདྲོངས་པ་ལ་སོགས་པ་ཡོན་ཏན་དཔག་ཏུ་མེད་པ་ཡོད་དོ༑ ༑དེ་ཡན་ཆད་ཀྱིས་སྟེང་འོག་བར་གསུམ་གྱི་རླུང་གི་གནད་བསྟན་ནས། །སོ་གཅིག་པ། འཛིན་པ་ལ་ཁ་སྦྱོར་གྱི་རླུང་གིས་ལྷ་སྐུ་སློང་བའི་རྣལ་འབྱོར་གསུངས། སྣོད་བཅུད་ཐ་མལ་འཛིན་པ་རབ་སྤངས་ཏེ། །གདན་དང་ཡིག་འབྲུ་ཕྱག་མཚན་གསལ་བ་ལས། །རིགས་ལས་སྐྱེས་པ་དེ་བཞིན་གཤེགས་པའི་སྐུ། །གདན་དང་ལོང་བུ་སྐེ་རགས་ཚངས་སྐུད་དང༌། །ཕྱག་དང་ཞལ་དང་སྤྱན་དང་སྐྲ་མཚམས་དང༌། །རྒྱན་དང་ཆ་ལུགས་མ་ལུས་རབ་རྫོགས་ནས། །གཙུག་ཏོར་བར་དུ་རིམ་བཞིན་གསལ་བར་བལྟ། །ཞེས་ཏེ། སྣོད་བཅུད་ནི་བརྟན་གཡོའི་དངོས་པོ་ཐམས་ཅད་རྡུལ་ཕྲ་རབ་ཀྱི་རྫས་དང་བྲལ་ཞིང༌། དབྱིངས་རང་བཞིན་གྱིས་རྣམ་པར་དག་པས། ཐ་མལ་དུ་འཛིན་པ་དང་བྲལ་བ། དེ་མངོན་དུ་བྱེད་པའི་ཐབས། ཟུང་འཇུག་གི་ལྷ་སྐུ་བསྒོམ་པ་སྟེ། སྔར་གྱི་ས་བོན་དང་ཕྱག་མཚན་རེ་རེའི་སྐབས་སུ། ལྷ་སྐུ་རིགས་དང་མཐུན་པ་རེ་རེ་སློང་བ་ཡིན། རིམ་གྱིས་སློང་བ་ལ། རང་རང་གི་སྟེང་འོག་བར་གསུམ་གྱི་རླུང་གི་འཛིན་སྟངས་ཀྱིས་འབྱུང་བ་རིམ་བརྩེགས་དང༌། གདན། ས་བོན། ཕྱག་མཚན་རྣམས་བསྒོམས་ནས། ཁ་སྦྱོར་གྱི་ལྷ་སྐུ་བསྐྱེད་པ་ཡིན་ལ། དེ་ཡང་ནམ་མཁའི་ཁམས་ནས་བསྐྱེད། རྡོ་རྗེ་སྔོན་པོ་ཡོངས་སུ་གྱུར་པ་ལས། དུས་ཀྱི་འཁོར་ལོའམ་བདེ་མཆོག་ལ་སོགས་པའི་ལྷ་ཡབ་ཡུམ་ཀྲོངས་བསྐྱེད་ལ་རིམ་པས་གསལ་གདབ་པ་ནི། འོག་གི་རླུང་སྦྱོར་ཅུང་ཞིག་གསལ་བས། ལྟ་སྟངས་སྨད་ལ༑ བཅོམ་ལྡན་འདས་བདེ་མཆོག་ལ་རིམ་པའི་གདན་དང༌། འཇིགས་བྱེད་དུས་མཚན་དང༌། ཡབ་སྐུ་མདོག་སྔོན་པོ། ཡུམ་དམར་པོ། དེ་གཉིས་ཀའི་ལོང་བུ་དང༌། ཞབས་གདུབ་དང༌། སྐུ་སྨད་དང༌། མཁའ་གསང་བྱིན་གྱིས་བརླབ་པ་དང༌། སྟག་ལྤགས་དང༌། བར་རླུང་གསལ་བས། རྐེད་པ་དང༌། སྐེ་རགས་དང༌། སྐུ་སྟོད་དང༌། ཚངས་སྐུད་དང༌། མགུལ་རྒྱན་དང༌། ཕྱག་དང༌། ཕྱག་མཚན་དང༌། གདུ་བུ་དང༌། དཔུང་རྒྱན་དང༌། སྟེང་རླུང་གསལ། ཞལ་དང༌། ཤངས་དང༌། སྤྱན་དང༌། གཙུག་ཏོར་དང༌། ནོར་བུ་དང༌། སྙན་དང༌། སྙན་ཆ་དང༌། ཐོད་ཕྲེང་དང༌། རལ་པའི་ཐོར་ཅོག་དང༌། སྣ་ཚོགས་རྡོ་རྗེ་དང༌། ཟླ་བ་ཕྱེད་པ་དང༌། ཡུམ་གྱི་སྐྲ་གྲོལ་བ་དང༌། དར་དཔྱངས་ལ་སོགས་པ་རྣམས་རིམ་པར་གསལ་ལ་མ་འདྲེས་པར་གསལ་གདབ། དེ་ཡང་སྤྱི་མི་གསལ་ན་སྤྱི་གསལ་གདབ། བྱེ་བྲག་མི་གསལ་ན་བྱེ་བྲག་གསལ་གདབ་སྟེ། ཇི་སྲིད་བརྟན་པ་མ་ཐོབ་ཀྱི་བར་དུ་བསྒོམ་པའོ། །སོ་གཉིས་པ། གཙུག་ཏོར་ནས་བཟུང་གདན་ལ་དེ་བཞིན་ནོ། །ཞེས་པ་ཡང་གཙུག་ཏོར་ནས་བཟུང་གདན་གྱི་བར་དུ་དེ་རྣམས་ཡས་རིམ་གྱིས་གསལ་འདེབས་པའོ། །སོ་གསུམ་པ། དེ་བཞིན་དུ་རལ་གྲི་ ཡོངས་སུ་གྱུར་པ་ལས་རླུང་ཁམས་པ། སོ་བཞི་པ། རིན་པོ་ཆེ་ལས་མེ་ཁམས་པ། སོ་ལྔ་པ། འཁོར་ལོ་ལས་ས་ཁམས་པ་བསྐྱེད་པ་ཡིན་ནོ། །དེ་རྣམས་ཀྱིས་ཁ་སྦྱོར་གྱི་རླུང་ཞེས་བྱ། གསང་བ་ཡེ་ཤེས་ཀྱི་རླུང་ཞེས་བྱ། བུམ་པ་ཅན་གྱི་རླུང་སྦྱོར་རོ། །སོ་དྲུག་པ། དེ་ལ་ལྷ་ཡབ་རྣམས་ནི་བཅུ་དྲུག་གི་ན་ཚོད་དང༌། ཡུམ་རྣམས་ནི་བཅུ་གཉིས་ཀྱི་ན་ཚོད་ཙམ་བསྒོམས་པས་མཆོག་སྟེར་བར་འགྱུར་རོ། །དེ་ལྟར་རླུང་ལམ་དུ་སློངས་ཤིང་བསྐྱེད་རིམ་བརྟན་པའི་དུས་སུ། སྣང་བ་ཐམས་ཅད་སྣང་སྟོང་དབྱེར་མེད་པར་བར་སྣང་གི་འཇའ་ཚོན་ནམ། སྒྱུ་མ་ལྟ་བུ་སྣང་ལ་རང་བཞིན་མེད་པར་ངོ་སྤྲད་གསུངས་སོ། །སོ་བདུན་པ། དེ་ནས་དྲོད་དང་བདེ་བའི་བོགས་དབྱུང་བར་འདོད་ན༑ དང་པོ་ལྷ་མེ་ཁམས་པ་གསལ་བའི་ལྟེ་བ་ནས་སོར་བཞིའི་འོག་ཏུ་ཉི་མའི་གདན་ལ་པདྨའམ། རིན་པོ་ཆེ་ཁ་དོག་དམར་ཞིང་གསལ་བའི་མདངས་དང་ལྡན་པ། རེག་བྱ་ཤིན་ཏུ་ཚ་བ་ལ་དམིགས་ནས་མེ་རླུང་བཙན་ཐབས་སུ་འཛིན་པ་ཡིན། སོ་བརྒྱད་པ། བདེ་བ་ལ་བདེ་ཆེན་འཁོར་ལོའི་ཧཾ་ལ་བྱང་ཆུབ་སེམས་ཀྱི་རྒྱུན་ཐིགས་པ་འབབ་པ་ལྟ་བུར་ཨཱ་ལི་ཀཱ་ལིའི་རྣམ་པ་ལྟེ་བའི་འོག་ཏུ་བབས་པས། ལུས་ཐམས་ཅད་བདེ་བས་གང་བར་བསྒོམས། འདིའི་སྐབས་སུ་རྩའི་གཙོ་མོ་གསལ་བཏབ་ཀྱང་ཡོང་གསུངས་སོ། །སོ་དགུ་པ། སྲོག་རྩོལ་གྱི་སྒོ་ནས་བགྲང་ཕྲེང་སྤངས་པའི་བསྙེན་པ་བྱ་བ་དང༌། ཕྲིན་ལས་ཆེན་པོ་བསྒྲུབ་ལ། དོ་ལིའི་བཟླས་པ་ནི། སྔགས་ཀྱི་ཕྲེང་བ་ ཡབ་ཀྱི་ས་བོན་ལས་ཐོན་དབུ་མའི་ལམ་བརྒྱུད་ཡུམ་གྱི་བྷ་གར་བབས། སྐུའི་བྱིན་རླབས་བརྒྱུད། ཡབ་ཀྱི་ཞལ་དུ་ཞུགས། ཐུགས་ཀའི་ས་བོན་ལ་ཐིམ་པ་ནི་བདེ་སྟོང་བསྐྱེད་པའི་བཟླས་པ་ཡིན་གསུངས། བཞི་བཅུ་པ༑ དེ་དག་ལ་ས་བོན་དེ་ཉིད་གསུམ་གྱི་བར་བཅུག་པ་ཐུགས་རྡོ་རྗེའི་བཟླས་པ། ཞེ་གཅིག་པ། མིང་དེ་ཉིད་གསུམ་གྱི་བར་དུ་བཅུག་པ་གསུང་རྡོ་རྗེའི་བཟླས་པ། ཞེ་གཉིས་པ། སྐུའི་བསྟོད་པ་དེ་ཉིད་གསུམ་གྱི་བར་དུ་བཅུག་པ་སྐུ་རྡོ་རྗེའི་བཟླས་པ་སྟེ། དེ་ལ་ཡང་གཡོན་ནས་དེ་བཞིན་དུ་རྒྱུ་བ་སྐུ་རྡོ་རྗེའི་བཟླས་པ། གཡས་ནས་རྒྱུ་བ་གསུང་རྡོ་རྗེའི་བཟླས་པ། དབུས་ནས་རྒྱུ་བ་ཐུགས་རྡོ་རྗེའི་བཟླས་པ་སྟེ། རླུང་གང་རྒྱུ་བལྟས་ལ་དེ་དང་དེའི་བཟླས་པ་བྱའོ། །ཞེ་གསུམ་པ། དེ་ལ་ཡང་ནང་བརྩེགས་སུ་བྱེད་ན། ཆུ་རླུང་བཞི་སྦྱོར་ཞི་བའི་ལས། །ཞེས་གསུངས་པ། ལྷ་ཆུ་ཁམས་པ་བསྐྱེད། ཆུ་རླུང་དབུ་མར་བཅུག །ༀ་མཱ་མ་ཀཱི་རི་ཀཱི་རི་ཆྒཻ་མོ་ཤཱནྟིང་ཀུ་རུ་ན་མཿ ཞེས་ཡིད་ཀྱིས་རླུང་བཟུང་ལ་བཟླས་པས། ནད་ལ་སོགས་པ་ཞི་བའི་ལས་འགྲུབ་བོ། །ས་རླུང་བཞི་སྦྱོར་རྒྱས་པའི་ལས། །ཞེས་པས། ལྷ་ས་ཁམས་པ་བསྐྱེད། ས་རླུང་དབུ་མར་བཅུག །ༀ་ལོ་ཙ་ན་བ་སུ་དྷེ་ ཆྒཻ་མོ་པུཥྚང་ཀུ་རུ་སྭཱ་ཧཱ། ཞེས་པ་ཚེ་དང་བསོད་ནམས་ལ་སོགས་པ་རྒྱས་པར་བྱེད་དོ། །མེ་རླུང་བཞི་སྦྱོར་དབང་གི་ལས། །ཞེས་པས། ལྷ་མེ་ཁམས་པ་བསྐྱེད། མེ་རླུང་དབུ་མར་བཅུག །ༀ་པཎྜ་ར་བཱ་སུ་ནི་བ་ར་ཏེ་ཆེ་གེ་མོ་བཽ་ཥཊ༴ ཞེས་པས། རྒྱལ་པོ་ལ་སོགས་པ་དབང་དུ་བྱེད་དོ། །རླུང་རླུང་བཞི་སྦྱོར་དྲག་པོའི་ལས། །ཞེས་པས། ལྷ་རླུང་ཁམས་པ་བསྐྱེད། རླུང་གི་རླུང་དབུ་མར་བཅུག །ༀ་ཏཱ་རེ་ཏུཏྟཱ་རེ་ཏུ་རེ་ཆེ་གེ་མོ་མཱ་ར་ཡ་ཧཱུྃ། ཞེས་པས། བསྒྲལ་བའི་ཞིང་རྣམས་བསད་པའི་ལས་འགྲུབ་བོ། །གཞན་ཡང་དབྱེ་བ་དང༌། རེངས་པ་དང༌། རྨོངས་པ་དང༌། དུག་ཞི་བ་དང༌། བསྐྲད་པ་དང༌། ཚད་རིམས་ཀྱིས་གདབ་པ་དང༌། ཕུར་བུས་གདབ་སྟེ་ལས་ཆེན་པོ་བཅུ་གཉིས་འགྲུབ་པ་ཡིན་ནོ། །ཡང་ལྷ་ནམ་མཁའ་ཁམས་པ་བསྐྱེད། ནམ་མཁའི་རླུང་དབུ་མར་བཅུག །གང་སྒྲུབ་བྱེད་པ་དེ་མི་སྣང་བར་བསྒོམས་པས་མི་སྣང་བར་འགྱུར་རོ། །ཡང་རླུང་བསྙེན་པར་བགྲང་བ་ཞེས་པ་ནི། རང་ལྷར་གསལ་བའི་ལྟེ་བར་ལས་དང་རྗེས་སུ་མཐུན་པའི་ཕྱག་མཚན་གདན་དང་བཅས་པ་བསྐྱེད་ལ། ལས་སྒྲུབ་པའི་སྔགས་ཀྱི་མཐའ་རྟེན་དང་བཅས་པ་བསྒྲུབ་ལ། ས་བོན་དང་མིང་དང་བསྟོད་པ་གསུམ། དེ་ཉིད་གསུམ་གྱི་བར་དུ་བཅུག་པས། སྐུ་གསུང་ཐུགས་ཀྱི་བསྙེན་པར་འགྱུར་བ་ནི་གོང་བཞིན་ནོ། །དེ་ཡང་རང་རང་གི་འཛིན་སྟངས་ཀྱིས། རླུང་ཡིག་འབྲུའི་རྣམ་པར་བཅུག་ནས་ཕྱག་མཚན་ལ་འཁོར་བ་ལ་རིག་པ་འཛིན་པ་སྟེ། དེ་དང་མཉམ་དུ་གསུས་པ་ལ་བསྐོར་བ་ཡིན། དེ་ཡང་ལུས་བྱིན་པོ་མི་འགུལ་བར་གསུས་པ་གཡས་གཡོན་དུ་རེ་མོས་སུ་བསྐོར་བ་སྟེ། རོ་རྐྱང་གཉིས་སུ་ཨཱ་ལི་ཀཱ་ལིའི་རྣམ་པར་སྣ་བུག་ནས་ཞུགས། སུམ་མདོར་སླེབས་པ་དང་དབུ་མའི་ ནང་དུ་ཡར་སོང་སྟེ། འོག་ཏུ་ཕྱག་མཚན་དུ་གྱུར། དེ་ལ་སྔགས་ཀྱིས་བསྐོར་བ་ལ་དམིགས་པ་ནི་གསང་བ་ཡེ་ཤེས་ཀྱི་འཁོར་ལུགས་སོ། །ཕྱོགས་གཅིག་ཏུ་དུས་རྟག་ཏུ་བསྐོར་ན་ཡོན་པོའི་གེགས་ཡོང་གསུངས། སྲོག་རྩོལ་ལ་འགོག་པའི་བཟླས་པ་ཞེས་པ་ལ། སྲོག་ནི་གྱེན་རྒྱུ་ཡིན་ལ། རྩོལ་བ་ནི་ཁྲིད་ཀྱི་ལག་ལེན་གྱིས་རླུང་ལམ་དུ་བྱེད་པའོ། །དེ་ལྟར་སྲོག་རྩོལ་གྱིས་ཉི་ཟླའི་འགྲོ་འོང་འགག་པ་ནི། ཐམས་ཅད་མཁྱེན་པའི་ཡེ་ཤེས་ཀྱི་རླུང་དུ་འགྱུར་ཞིང༌། དེ་ལྟར་ཉམས་སུ་བླངས་པས་སྲོག་རླུང་ཐིག་ལེའི་ནང་དུ་ཚུད་ནས། རླུང་སེམས་ཧཾ་གི་ཐིག་ལེར་འཛིན། །ཅེས་པ་ནི། སྲོག་རྩོལ་གྱི་འབྲས་བུ་ཡིན་གསུངས། མན་ངག་གདམས་པའི་གནད་འདི་ཞུ་བ་ལ། །ཆོས་བརྒྱད་ཚེ་འདིའི་སྦྱོར་བ་མ་ཞུགས་ཤིང༌། །ཆོས་དང་བླ་མ་ཚུལ་བཞིན་བཀུར་བྱས་ལ། །ཉམས་མྱོང་རྟོགས་པའི་དྲོད་དང་ལྡན་པར་ཤོག །བླ་མར་གསང་ཞིང་གདམས་པའི་དྲོད་ཉུལ་བའི། །ཁ་བསགས་གཡོ་རྒྱུས་གདམས་པ་ལེན་འདོད་ལ༑ ༑དམར་ཁྲིད་ལག་ལེན་བྱིན་ན་དམ་ཚིག་ཉམས། །སྣོད་ལྡན་སྣོད་མིན་ཤིན་ཏུ་བརྟག་པ་གཅེས། །སྙིང་ནས་ཚེ་འདི་སྤངས་ནས་ཉམས་ལེན་ཞིང༌། །ཆོས་འདིའི་སྐལ་བར་ལྡན་པའི་རྣལ་འབྱོར་པས། །བྱུང་ན་གཡོ་ རྒྱུ་མེད་པས་སྦྱིན་པར་བྱ། །དེ་ལྟ་མིན་ན་རྒྱལ་བའི་བཀའ་དང་འགལ། །ཆོས་འདི་རང་གིས་སོར་སྡུད་ལོ་གཅིག་འདྲེས་མེད་དུ་བསྒོམ་མི་ནུས་པའི་མི་ལ་གདམས་པ་འདི་སྦྱིན་དུ་མེད་དོ། །བླ་མ་དང་ཆོས་བདག་མཉེས་པར་མི་བྱེད་པ་ལ་གདམས་པ་འདི་སྦྱིན་དུ་མེད་དོ། །གསེར་གྱི་མེ་ཏོག་ཐད་ཀར་མི་འབུལ་བ་ལ་གདམས་པ་འདི་སྦྱིན་དུ་མེད་དོ། །དམ་བཅའ་འདི་རྣམས་དང་འགལ་བའི་སྣོད་མིན་རྣམས་ལ་གདམས་པ་འདི་བསྟན་པ་བྱུང་ན། འདིའི་སྙིང་ཁྲག་ཆོས་བདག་མཁའ་འགྲོའི་ཚོགས་ཀྱིས་གཏོར་བར་རིགས་སོ། །རྗེ་གྲུབ་ཐོབ་ཆེན་པོའི་གསུང༌། ཕྱག་ལེན་བཞིན་དུ་རྒྱལ་ཁམས་པ་ཟླ་བ་སེང་གེས་ཟིན་བྲིས་སུ་བཏབ་པའི་ཁྲིག་ཡིག་ རེ་ཞིག་རྫོགས་སོ། །མངྒ་ལཾ་བྷ་ཝནྟུ། ཤུ་བྷཾ།། །།