མི་གཡོ་བའི་ཁྲིད་ཡིག།

Previous Text Back to Master Text Next Text

		Rigpe Dorje Publications, 2024
Wylie title	mi g.yo ba'i khrid yig
Location	gdams ngag rin po che'i mdzod Volume 18, Text 10, Subtext 15, Pages 227-229 (Folios 15a2 to 16a3)
Author	ཀུན་དགའ་གྲོལ་མཆོག་
Citation	Kun dga' grol mchog. Mi g.yo ba'i khrid yig. In Gdams ngag rin po che'i mdzod, Vol. 18: 227-229. Kalimpong: Rigpe Dorje Publications, 2024.
Side notes	Recto: zab khrid Verso: jo nang khrid brgya skor
More details More details
Genre	Contemplative Guide Books and Instructional Manuals - khrid yig
Colophon	སྔོན་གྱི་ཡིག་རྙིང་ལས་བཏུས་སོ།
Colophon	sngon gyi yig rnying las btus so/

[edit]

(༡༥) །མི་གཡོ་བའི་ཁྲིད་ཡིག །བཀའ་གདམས་ལྷ་བཞིའི་མི་གཡོ་བའི་ཁྲིད་ནི༑ སྐྱབས་སེམས་སྔོན་དུ་སོང་ནས། སྟན་ལ་ལུས་གནད་བཅས་ཧཱུྃ་ལས་སྐད་ཅིག་གིས་ལྷའི་སྐུར་ཝལ་གྱིས་དམིགས་དུས། སྐུ་མདོག་སྔོན་པོ་ཞལ་གཅིག་ཕྱག་གཉིས་པ། གཡས་ཡེ་ཤེས་ཀྱི་རལ་གྲི་འཕྱར་ཞིང༌། གཡོན་རྡོ་རྗེའི་ཞགས་པ་དང་བཅས་པས་ཐུགས་ཀར་སྡིགས་མཛུབ་མཛད་པ། དབུ་སྐྲ། སྨ་ར། སྨིན་མ་དམར་སེར་གྱེན་དུ་འབར་བ། དམར་ཞིང་ཟླུམ་པའི་སྤྱན་གསུམ་འཁྱུག་ཅིང༌། ཚེམས་ཀྱིས་མ་མཆུ་མནན་པ༑ རིན་པོ་ཆེ་དང་ཀླུ་ཆེན་བརྒྱད་ཀྱིས་བརྒྱན་པ། སྟག་ལྤགས་ཀྱི་ཤམ་ཐབས་ཅན། གཡས་བསྐུམ་གཡོན་བརྐྱང་བ། བགེགས་ཀྱི་རྒྱལ་པོ་གླང་པོ་ཆེའི་སྣ་ཅན་གྱི་སྟེང་ན་བརྫིས་པ། སྤྲུལ་པའི་ཁྲོ་ཆུང་དུ་མའི་འཕྲོ་འདུ་དང༌༑ ཡེ་ཤེས་ཀྱི་མེ་འབར་བའི་དབུས་ན་བཞུགས་པ། དེའི་ཐུགས་ཀར་པད་ཉིའི་སྟེང་དུ་ཧཱུྃ་གི་མཐར་ཡི་གེ་བཅུ་པས་བསྐོར་བ་ལས་དྲག་པོའི་མེ་ལྕེ་འཇིག་དུས་བསྐལ་པའི་མེ་ལྟར། ཚ་བ་རྩུབ་པ། དྲག་པ། རྣོ་བ། སྟོབས་ལྡན་ཤུགས་བཅས་མྱུར་བ་མཚན་ཉིད་བདུན་ལྡན་འབར། ཐོག་མར་ཧཱུྃ་སྔགས་ཕྲེང་དང་བཅས་པ་མེ་ནང་དུ་འུར་གྱིས་འབར་ཞིང༌། དེ་ལས་ཀྱང་མེ་ལྕེ་འཁྱོགས་པོས་རང་གི་ལུས་ནང་དམར་མེར་གང་ནས་ལུས་ཀྱི་སྒོ་དགུ་ནས་མེ་ལྕེ་སྦྲུལ་གྱི་ལྕེ་ལྟར་དམར་ཉུག་ཉུག་བྱུང་ཞིང༌། མཐར་བ་སྤུའི་སྒོ་ཐམས་ཅད་ནས་དམར་ལམ་ལམ་མཆེད། ཕྱིའི་མེའི་གུར་ཁང་དང་འདྲེས་པ་ལས། འདོམ་དང༌། མདའ་རྒྱང་དང༌། རྒྱངས་གྲགས་དང༌། དཔག་ཚད་ཀྱི་བར་དུ་ལྷབ་ལྷབ་འབར་ཞིང་མཆེད་པས། བསྟན་དགྲ་གདུག་པ་ཅན་རྣམས་དང༌། ནད་དང་དལ་ཡམས་ཀྱི་བདག་མོ་མཐུ་མོ་ཆེ་རྣམས་རྒྱ་མཚོའི་མཐར་བསྐྲད་ཅིང་བྱེར་བར་དམིགས་ལ་སྔགས་བཟླ། སྤྱན་གཡས་པའི་ནང་དུ་ཡི་གེ་མཾ་ལས་ཉི་མའི་དཀྱིལ་འཁོར་གཅིག་བསམ། དེས་སངས་རྒྱས་ཀྱི་ཞིང་ཁམས་དང༌། རྒྱུ་འབྲས་རྟེན་འབྲེལ་འཁོར་འདས་ཀྱི་ཆོས་ཐམས་ཅད་ལ་གཟིགས་པ་དང༌། སྤྱན་གཡོན་པའི་ནང་དུ་ཨ་ལས་ཟླ་བའི་དཀྱིལ་འཁོར་གཅིག་བསམ། དེས་ཆོས་ཐམས་ཅད་ཅིར་ཡང་མ་དམིགས་པའི་སྟོང་པ་ཉིད་དུ་གཟིགས་པ་དང༌། སྤྱན་དེ་གཉིས་ཀྱི་དབུས་སུ། སྤྱན་ཁྲ་ཧུ་རེ་བ་ཞིག་བྱུང༌། དེས་ཐབས་ཤེས་དབྱེར་མེད་ཞི་ལྷག་ཟུང་འཇུག་རྟག་ཆད་ཡོད་མེད་ལ་སོགས་དབྱེར་མེད་ཟུང་འཇུག་ཏུ་གསལ་ལེར་གཟིགས་པར་བསམས་ལ་རྩེ་གཅིག་ཏུ་མཉམ་པར་བཞག །འཕོ་བ་བྱེད་ན། ལུས་གནད་རླུང་སྦྱོར། ཡི་དམ་ཝལ་བསྒོམ། ༀ་ཙཎྜ་མ་ཧཱ་རོ་ཥ་ཎ་ཧཱུྃ་བྱས་པས་ཆོས་ཐམས་ཅད་སྒྲ་བརྙན་ཙམ་དུ་བསམ། ཕཊ་བྱས་པས་སེམས་ཉིད་བྲག་ཆ་ཡལ་བ་ལྟ་བུར་བསམ། དགེ་བཤེས་སྣེ་ཟུར་བ་སྐུ་འདའ་ཁར། ༀ་ཙཎྜ་མ་ཧཱ་རོ་ཥ་ཎ་ཧཱུྃ་ཞེས་གསུང་ཞིང་ཅུང་ཞིག་བཞུགས་ནས་ཕཊ་ཅེས་གསུང་སྤྱན་གྱེན་ལ་ཧྲིག་མཛད་ནས་གཤེགས་སོ། །སྤྱི་བོའི་གཙུག་ཏུ་རླངས་པ་ཇ་ཁོག་ཁ་བྱེ་བ་ཙམ་བྱུང་ལོ། མི་གཡོ་ཁྲོ་རྒྱལ་ཀུན༵་འདུས་ཁྲིད། །དག༵འ་སྤྲོ་ཟུང་འབྲེལ་རྣམ་གྲོལ༵་མཆོ༵ག །མྱུར་བགྲོད་གདམས་པའི་དམིགས་པའི་ཐོ། །ཡི་གེའི་སྒོ་ནས་གསལ་བར་བྱས། །སྔོན་གྱི་ཡིག་རྙིང་ལས་བཏུས་སོ།