Tibetan:སྙིང་ཐིག་མ་བུའི་ཁྲིད་ཡིག་དྲི་མེད་ཞལ་ལུང་

Cataloging data for this text

Full Title

Tibetan: ༄༅། རྫོགས་པ་ཆེན་པོ་གསང་བ་སྙིང་ཐིག་མ་བུའི་བཀའ་སྲོལ་ཆུ་བོ་གཉིས་འདུས་ཀྱི་ཁྲིད་ཡིག་དྲི་མེད་ཞལ་ལུང་ཞེས་བྱ་བ་བཞུགས་སོ།
Wylie: @#/_rdzogs pa chen po gsang ba snying thig ma bu'i bka' srol chu bo gnyis 'dus kyi khrid yig dri med zhal lung zhes bya ba bzhugs so/

Tibetan text

Information about Unicode Tibetan and the digitization of this text

As the only available unicode Tibetan text at the time, Nitartha International's version of the Gdams ngag mdzod Paro Edition of the gdams ngag mdzod is provided here. However, note that it has not been thoroughly edited and that there may also be mistakes introduced through the conversion process. Eventually we will provide a fully edited version of the entire Shechen Edition, entered and edited multiple times by Pulahari Monastery in Nepal, but as of spring 2015 that project has not been finished. Note that the ཤོག་ལྷེ་ numbers that appear throughout were added by Nitartha Input Center at the time of input. Provided by Nitartha International Document Input Center. Many thanks to Person:Namdak, Tenzin and Person:Wiener, G. for help with fonts and conversion.

ཤོག་ལྷེ་་༡༡༥རྫོགས་པ་ཆེན་པོ་གསང་བ་སྙིང་ཐིག་མ་བུའི་བཀའ་སྲོལ་ཆུ་བོ་གཉིས་འདུས་ཀྱི་ཁྲིད་ཡིག་དྲི་མེད་ཞལ་ལུང་ཞེས་བྱ་བ་བཞུགས་སོ། །

ཤོག་ལྷེ་༡༡༦ན་མོ་གུ་རུ་བཛྲ་ས་མནྟ་བྷ་དྲཱ་ཡ། །རང་བྱུང་ཡེ་ཤེས་ཀུན་ཁྱབ་གདོད་མའི་མགོན། །ཁྱད་པར་བདུན་ལྡན་དབྱིངས་སྣང་ལོངས་སྤྱོད་རྫོགས། །རང་བཞིན་འགྲོ་འདུལ་སྣ་ཚོགས་སྤྲུལ་པའི་སྐུ། །ཁྱབ་བདག་བླ་མའི་ཞབས་ལ་ཕྱག་བགྱིའོ། །ཟབ་ཅིང་བརྟག་དཀའ་ནམ་མཁའ་ལྟ་བུའི་གནས། །སྤང་བྱ་གཉེན་པོ་གཉིས་ཀའི་མཐའ་ལས་གྲོལ། །སུ་འཕྲད་འབྱུང་བཞི་འོད་དུ་དེངས་བྱེད་པ། །བསྟན་པ་འོད་གསལ་རྡོ་རྗེ་རྩེ་མོར་འདུད། །དགའ་རབ་ལ་སོགས་རྒྱ་བོད་རིག་པ་འཛིན། །ཁྱད་པར་དྲི་མེད་བཤེས་གཉེན་མཁས་པའི་རྗེ། །ཀློང་ཆེན་རབ་འབྱམས་ཡེ་ཤེས་སྒྱུ་མའི་འཕྲུལ། །རྡོ་རྗེ་གཟི་བརྗིད་བྱང་ཆུབ་བར་དུ་བསྙེན། །བཅུ་བདུན་རྒྱུད་ཀྱི་གཉེན་འཛིན་འཁོར་འདས་ཀྱི། །དབྱིངས་ཕྱུག་སྔགས་ཀྱི་བདག་མོ་རལ་གཅིག་མས། །གནང་བའི་སྐབས་སྩོལ་འཆད་དང་ཉམས་ལེན་ལ། །བར་ཆད་མེད་ཅིང་གྲུབ་པ་མཐར་ཕྱིན་མཛོད། །གདོད་མའི་དབྱིངས་སུ་འཁོར་བ་དོང་སྤྲུགས་ཆོས། །རྟོག་གེས་

ཤོག་ལྷེ་༡༡༧མ་བསླད་བྱིན་རླབས་གཟི་མ་ཉམས། །དྲི་མེད་བཤེས་གཉེན་ཐུགས་ཀྱི་ཐིག་ལེ་ནི། །ཀུན་མཁྱེན་ཆོས་རྗེས་བཅུད་དུ་དྲིལ་བ་གང་། །གཏེར་ཆེན་ཡབ་སྲས་ཞལ་ལུང་བུམ་བཟང་ལས། །ཁྱབ་བདག་བླ་མའི་དྲིན་གྱིས་ལེགས་ཐོབ་པ། །རང་བཟོས་མ་བསླད་གཞན་ལ་ཕན་འདོད་བློས། །འདུས་གསལ་ལག་ཁྲིད་རིམ་པ་བཤད་པར་བྱ། །འདིར་ཕྱོགས་བཅུ་དུས་གསུམ་གྱི་རྒྱལ་བ་མ་ལུས་པའི་བསྟན་པ་ཐམས་ཅད་ཀྱི་རྩེ་མོ། །ཆོས་ཐམས་ཅད་ཀྱི་འཁོར་ལོ་མཐའ་དག་གི་ཡང་བཅུད། རྡོ་རྗེ་ཐེག་པའི་ཉེ་ལམ་ཐམས་ཅད་ཀྱི་མཐར་ཐུག །འོད་གསལ་རྫོགས་པ་ཆེན་པོའ་རྒྱུད་འབུམ་ཕྲག་དྲུག་ཅུ་རྩ་བཞིའི་སྙིང་པོ། །ཡང་གསང་མན་ངག་གི་སྡེ་སློབ་དཔོན་ཆེན་པོ་བི་མ་ལ་མི་ཏྲའི་སྙིང་ཐིག་མ་བུའི་བཀའ་སྲོལ་ཆུ་བོ་གཅིག་འདྲེས་ཀྱི་ཟབ་ཁྲིད་འཆད་པར་བྱེད་པ་ལ་གཉིས། མཐུན་རྐྱེན་ཚོགས་པས་གདམས་ངག་གི་སྒྲོམ་དུ་གཞུག་པ་དང་། འཆད་བྱ་ཁྲིད་ཚུལ་གྱི་གདམས་ངག་དངོས་བཤད་པའོ། །དང་པོ་ལ་བཞི། ཁྲིད་འཆད་པ་

ཤོག་ལྷེ་༡༡༨པོ་སློབ་དཔོན་གྱི་མཚན་ཉིད། འཆད་ཡུལ་སློབ་མའི་མཚན་ཉིད། ཇི་ལྟར་བསྟེན་པའི་ཚུལ། མཐུན་རྐྱེན་གྱི་གཞི་བཟུང་བའོ། །དང་པོ་ནི། ཨ་ཏི་བཀོད་པ་ཆེན་པོ་ལས། །མཁས་ཤིང་བྱ་བ་བྲལ་བ་དང་། །ཆོས་ཉིད་དོན་ལ་ཚད་ཕེབས་དང་། །འདོད་པའི་དོན་ལ་རྨོངས་པ་མེད། །གསང་སྔགས་བླ་མའི་མཚན་ཉིད་དོ། །ཞེས་གསུངས་པས། །སྤྱིར་གསང་སྔགས་ཀྱི་རྒྱུད་སྡེ་མཐའ་དག་གི་དོན་ལ་མཁས་ཤིང་གྲུབ་མཐའི་དབྱེ་བ་ཕྱེད་པ་བྱེ་བྲག་ལམ་འདི་ཉིད་ཀྱི་ཉམས་མྱོང་དྲོད་ཚད་དང་ལྡན་པ་མན་ངག་གི་དོན་སྟོན་པ་ལ་མཁས་ཤིང་ཆགས་སྡང་སོགས་ཚེ་འདིའི་འདུ་འཛིའི་གཡེང་བ་རང་བྲལ་བ། རྡོ་རྗེའི་ལུས་ལ་གནད་དུ་བསྣུན་པའི་རིམ་གཉིས་ཀྱི་ཉམས་ལེན་མཐར་ཕྱིན་པས་ཡེ་ཤེས་ཀྱི་དཀྱིལ་འཁོར་ཆོས་ཉིད་མངོན་སུམ་གྱི་དོན་ཚད་ལ་ཕེབས་པ། དགོངས་པས་རང་རྒྱུད་གྲོལ་ཅིང་ཐུགས་རྗེས་གཞན་རྒྱུད་སྨིན་ནུས་པ། གནས་ལུགས་ཀྱི་དོན་ལ་ཤེས་རབ་ཟབ་མོས་སྒྲོ་འདོགས་ཆོད་པའི་ཡེ་ཤེས་ཀྱིས་སློབ་མས་དྲིས་པའི་ལན་ལ་མ་རྨོངས་པ་སྟེ། མཚན་ཉིད་དེ་དག་དང་ལྡན་པ་ནི་བླ་མ་རྡོ་རྗེ་འཛིན་པ་ཆེན་པོ་ཞེས་བྱའོ། །དེ་ལས་ལྡོག་པའི་སྐྱོན་ཅན་བསྟེན་དུ་མི་རུང་བ་ནི། རྒྱུད་རང་ཤར་ལས། མི་ཤེས་ང་རྒྱལ་ཆེན་པོ་དང་། །བློ་རྨོངས་ཚིག་ཕྱིར་འབྲེང་བ་དང་། །གསང་སྔགས་དོན་ལ་མི་དགོངས་དང་། །གཞན་གྱི་ཞེ་གཅོད་ཁེངས་ཚིག་དང་། །ལོག་པའི་ལམ་དུ་ཞུགས་པ་དང་། །དབང་གི་དཀྱིལ་འཁོར་ཞལ་མ་མཐོང་། །དམ་ཚིག་འཆལ་བར་གྱུར་པ་དང་། །དྲིས་པ་དག་ལ་ལན་མི་འདེབས། །ཐོས་ཆུང་ང་རྒྱལ་ཆེ་བ་སྟེ། །སློབ་དཔོན་མ་བརྟགས་སློབ་མའི་བདུད། །ཅེས་པས་སྐྱོན་དེ་དག་དང་ལྡན་པ་ནི་ཐོག་མ་ནས་བསྟེན་པར་མི་བྱའོ། །

ཤོག་ལྷེ་༡༡༩གཉིས་པ་སློབ་མའི་མཚན་ཉིད་ནི། རང་ཤར་ལས། དད་པའི་སྟོབས་དང་བརྩོན་འགྲུས་ཆེ། །ཤེས་རབ་ཆེ་ཞིང་འཛིན་ཆགས་མེད། །ཕུ་དུད་ཆེ་ཞིང་གསང་སྔགས་སྤྱོད། །རྟོག་མེད་སེམས་ལ་གཡེང་བ་མེད། །དམ་ཚིག་ལྡན་ཞིང་སྒྲུབ་ལ་བརྩོན། །སློབ་དཔོན་ཇི་སྐད་གསུང་བཞིན་བྱེད། །ཅེས་པས། བླ་མ་དང་གདམས་ངག་ལ་ཡིད་རབ་ཏུ་སྤྲོ་ཞིང་དོན་དུ་གཉེར་བ་དང་བའི་དད་པ། བསྒྲུབ་བྱའི་འབྲས་བུ་ལ་ཆེད་དུ་གདུང་བས་འདོད་པའི་དད་པ། ཐེ་ཚོམ་མི་བྱེད་པ་ཡིད་ཆེས་ཀྱི་དད་པ། ཉི་ཚེ་བའི་རྐྱེན་གྱིས་མི་འཕྲོག་པ་མཐར་ཐུག་གི་དད་པ་སྟེ་བྱིན་རླབས་འཇུག་པའི་རྒྱུ་ཚང་བ། བླ་ན་མེད་པའི་བྱང་ཆུབ་སྒྲུབ་པ་ལ་ཕྱི་གཤོལ་དང་ཐང་ལྷོད་མེད་པའི་སྙིང་སྟོབས་ཀྱི་དམ་བཅའ་བརྟན་པ། གནས་ལུགས་ཟབ་མོའ་དོན་ལ་དཔྱོད་པའི་ཤེས་རབ་གསལ་བས་ཉམས་རྟོགས་སྐྱེ་སླ་བ། ཟས་གོས་སོགས་སྲིད་པའི་བདེ་འབྱོར་ལ་འཛིན་ཆགས་ཆུང་བ། །བླ་མ་དང་ལྷག་པའི་ལྷ་ལ་ཕུ་དུད་ཆེ་བས་བྱིན་རླབས་འཇུག་པའི་སྒོ་ཚང་བ། གསང་སྔགས་ཀྱི་ལམ་ལ་ཐེ་ཚོམ་གྱི་སྒྲོ་འདོགས་ཆོད་པས་ཟབ་མོའ་སྤྱོད་པ་ལ་འཇུག་ནུས་པ། ཆགས་སྡང་རྨོངས་གསུམ་སོགས་ཐ་མལ་གྱི་རྣམ་རྟོག་ལ་སེམས་མི་འཇུག་པས་གཡེང་བ་དང་བྲལ་བ། རྩ་བ་དང་ཡན་ལག་གི་དམ་ཚིག་གཉེར་དུ་བླངས་པ་ལས་མི་འདའ་བའི་དམ་བཅའ་བརྟན་པ། ཟབ་མོའ་ལམ་སྒོམ་པ་ལ་སྐྱོ་ངལ་མེད་ཅིང་། བླ་མས་ཇི་ལྟར་གསུངས་པ་ལས་མི་འདའ་བ་སྟེ། མཚན་ཉིད་དེ་ལྡན་གྱི་སློབ་མ་ཉིད་འཆད་ཡུལ་དུ་བཟུང་བར་བྱ་དགོས་ཤིང་། དེ་ལས་ལྡོག་པའི་སྣོད་སྐྱོན་ཅན་ནི། རང་ཤར་ལས། བཀུར་བསྟི་ཕུ་དུད་མི་བྱེད་ཅིང་། །གསང་སྔགས་འཆལ་བ་སྤྱོད་་

ཤོག་ལྷེ་༡༢༠པ་དང་། །རིགས་རྒྱུད་མེད་ཅིང་ངང་རྒྱུད་མེད། །ཤེས་རབ་ཆུང་བར་གྱུར་པ་དང་། །བཀའ་དྲིན་ཁྱད་དུ་གསོད་པ་དང་། །དོན་མེད་འཆལ་བར་གྱུར་པ་སྟེ། །སློབ་མ་མ་བརྟགས་སློབ་དཔོན་དགྲ། །ཞེས་གསུངས་པ་ལྟ་བུའི་སྣོད་མིན་ལ་ཟབ་མོའ་ཆོས་བསྟན་ན་ཌཱ་ཀི་དམ་ཅན་གྱིས་བཀའ་ཆད་འབེབས་ཤིང་དངོས་གྲུབ་མི་ཐོབ་པ་དང་སྒྲོ་སྐུར་འབྱུང་བས་སྤང་བར་བྱའོ། །གསུམ་པ་བསྟེན་པའི་ཚུལ་ནི། མཚན་ཉིད་དང་ལྡན་པའི་སློབ་མ་དེས་ཀྱང་ནད་པས་སྨན་པ་བསྟེན་པ་ལྟར། འཁོར་བའི་ནད་ལས་ཐར་བའི་དོན་དུ། ལུས་ངག་ཡིད་གསུམ་གུས་པས་གཡོ་ཟོལ་མེད་པར་སྲིད་ཞུ་དང་ཕུ་དུད་བྱ་ཞིང་། གྲུ་འདོད་པས་མཉེན་པ་བསྟེན་པ་ལྟར་འཁོར་བས་འཇིགས་ནས་རྟག་ཏུ་ཅི་གསུང་ཉན་པ་དང་། ཚོང་པས་དེད་དཔོན་བསྟེན་པ་ལྟར་ཐར་པ་འདོད་པས་རིམ་གྲོ་ཆེར་བྱ། ཁྱད་པར་དུ་རབ་སྒྲུབ་པའི་ཞབས་ཏོག་གིས་སྒྲུབ་བརྒྱུད་ཀྱི་བསྟན་པ་ཟིན་པ། འབྲིང་ལུས་ངག་གི་ཞབས་ཏོག་གི་སྒོ་གསུམ་གྱི་སྒྲིབ་པ་སྦྱོང་བ། ཐ་མ་ཟང་ཟིང་གི་ཡོ་བྱད་ཀྱིས་ཚོགས་གཉིས་ཀྱི་བྲེ་ཁ་ཁེངས་པ་གང་རུང་གིས་ཅིས་ཀྱང་མཉེས་པ་བསྒྲུབ་པར་བྱ་སྟེ། རང་ཤར་ལས། དེ་ལྟར་མན་ངག་སློབ་དཔོན་ལ། །རང་ལུས་དང་ནི་རིན་ཆེན་རྫས། །ཤིན་ཏུ་དཀོན་པ་དག་གིས་བསྟེན། །ཞེས་གསུངས་ཤིང་དེའི་ཡོན་ཏན་ཀྱང་། བདུད་རྩི་འབྱུང་བའི་རྒྱུད་ལས། ནམ་མཁའ་གང་བའི་སངས་རྒྱས་ལ། །སྣ་ཚོགས་རིན་ཆེན་སྤྲས་པ་ཡི། །སྟོང་གསུམ་གང་བ་ཕུལ་བས་ཀྱང་། །བླ་མའི་བ་སྤུ་ཉག་གཅིག་ལ། །མར་གྱི་ཐིགས་པ་གཅིག་བྱུགས་ན། །བསོད་ནམས་བརྒྱ་ཕྲག་ཆར་མི་ཕོད། །ཅེས་དང་། གཞན་ཡང་སྒོ་གསུམ་གྱི་སྒྲིབ་པ་འདག་ཅིང་ཀུན་གྱིས་མཐོང་

ཤོག་ལྷེ་༡༢༡ན་དགའ་བ་དང་། བསོད་ནམས་དང་འབྱོར་པ་འཕེལ་ཞིང་མཁའ་འགྲོས་སྟོང་གྲོགས་བྱེད་པ་དང་། །མཆོག་དང་ཐུན་མོང་གི་དངོས་གྲུབ་ཐམས་ཅད་དཀའ་བ་མེད་པར་ཐོབ་པ་སྟེ། དམ་ཚིག་མཆོག་གི་རྒྱུད་ལས། དངོས་གྲུབ་འདོད་པའི་དད་པ་ཅན། །དངོས་གྲུབ་བླ་མ་མཉེས་ལས་འབྱུང་། །ཞེས་སོ། །བཞི་པ་མཐུན་རྐྱེན་གྱི་གཞི་བཟུང་བ་ལ་བཞི། གནས། དུས། ཡོ་བྱད། གྲོགས་སོ། །དང་པོ་ནི། ཀློང་གསལ་ལས། ལུང་སྟོང་གངས་ཁྲོད་རི་རྩེ་དུར་ཁྲོད་དམ། །ཤིན་ཏུ་དབེན་ཞིང་དྭངས་མཐོ་བསིལ་བའི་སར། །སྐལ་ལྡན་སྐྱེས་བུའི་ཉམས་ལེན་བྱེད་པའི་གནས། །བསམ་གཏན་འཕེལ་ཞིང་བརྟན་པ་མྱུར་ཏུ་ཐོབ། །ཅེས་པས་སྒྲུབ་པའི་གནས་སྤྱིར་ཡིད་དང་མཐུན་པ། དགྲ་རྐུན་སོགས་ཀྱི་འཚེ་བ་མེད་ཅིང་སྐྱེ་བོའ་རྒྱུ་འགྲུལ་དང་ཅ་ཅོ་སོགས་ཀྱི་རྣམ་གཡེང་ཆུང་བ། ས་ཕྱོགས་བཀྲ་ཤིས་ཤིང་གཞི་བདག་ཆོས་ལ་དཀར་བ། བླ་མ་དང་མཁའ་འགྲོ་དང་གྲུབ་ཐོབ་གོང་མས་བྱིན་གྱིས་བརླབས་པའི་གནས། གངས་རི་ནགས་ཁྲོད་བྲག་རི་ལ་སོགས་པ་རང་བཞིན་གྱིས་རིག་པ་དྭངས་ཞིང་ས་ཕྱོགས་མཐོ་བ། ཤར་གྱི་མདངས་འཕྲོགས་ཤིང་ནུབ་ཀྱི་ཟེར་སྡུད་པ། ཞེས་ཉི་མ་སྔ་མོ་འཆར་ཞིང་ཕྱི་མོར་ནུབ་པས་ཉི་ཚེ་རིང་བ། ཆུ་འཇམ་ཞིང་ཉམས་དགའ་བ། མཐུན་རྐྱེན་ཐམས་ཅད་རྙེད་པར་སླ་བའི་གནས་སུ་བསྒྲུབ་པར་བྱའོ། །གཉིས་པ་དུས་ནི། དུས་དང་ཚེས་གྲངས་གཟའ་སྐར་སོགས་བཟང་བ་ལ་འཇུག་དགོས་ཤིང་། ཁྱད་པར་ཐོད་རྒལ་བསྒོམ་པའི་དུས་ནི། དབྱར་མ་སྟོན་དང་དགུན་ཆུང་དཔྱིད་ཀྱི་དུས། ཟེར་གཉིས་དུས་ནི་མཆོག་ཏུ་བཤད་པ་ཡིན། །ཞེས་གསུངས་པས། དུས་དེར་བསིལ་དྲོད་སྙོམས་པའི་

ཤོག་ལྷེ་༡༢༢དབང་ཤེས་བྱིངས་རྨུགས་ཀྱི་རྐྱེན་ཉུང་ཞིང་། བྱེ་བྲག་འཆར་ནུབ་ཀྱི་ཟེར་གཉིས་ཏེ་ཡེ་ཤེས་འཆར་བའི་རྐྱེན་དུ་འགྱུར་བས་ངོ་སྤྲོད་ཀྱི་དུས་སུ་བཤད་པའི་ཕྱིར་དེ་དང་བསྟུན་པར་བྱའོ། །གསུམ་པ་ཡོ་བྱད་ནི། འཚོ་བའི་ཡོ་བྱད་ཟས་སྐོམ་དང་གོས་སྟན། བསྟེན་པའི་ཡོ་བྱད་དམ་རྫས། མཁོ་བའི་ཡོ་བྱད་རྡོ་རྗེ་དང་དྲིལ་བུ་སོགས། མཐུན་པའི་ཡོ་བྱད་སྨན་དང་རྟེན་འབྲེལ་གྱི་རྫས། ཁྱད་པར་གྱི་ཡོ་བྱད་དབང་ཡོན་དང་གཏོར་ཚོགས་ཀྱི་རྒྱུ་ལ་སོགས་པ་མདོར་ན་གང་གི་ཕྱིར་ཡང་གནས་སྐབས་དེ་དག་ཏུ་བྲེལ་མི་དགོས་པ་གོང་དུ་འཚོགས་པར་བྱ་སྟེ། ཕྱག་རྟེན་མེ་ཏོག་དབང་ཡོན་གཏོར་ཚོགས་རྒྱུ། །ཉམས་ལེན་དུས་སུ་ཁམས་ཀྱི་རྟེན་སོ་བཙལ། །མཐུན་པའི་ཡོ་བྱད་ཀུན་དང་ལྡན་པར་བྱ། །ཞེས་གསུངས་སོ། །བཞི་པ་གྲོགས་ནི། ཟབ་ལམ་སྒོམ་པའི་ཉམས་མྱོང་ཅན་ནམ་མིན་ཀྱང་རྒྱུད་ཞི་དུལ་དང་ལྡན་ཅིང་དམ་ཚིག་གཙང་བ། དག་སྣང་འབྱོངས་ཤིང་ཉོན་མོངས་ཤས་ཆུང་བ། བརྩེ་སེམས་ཆེ་བས་མཐུན་རྐྱེན་སྦྱོར་བ་ལ་སྐྱོ་ངལ་མེད་པ་ཉིད་བསྟེན་པར་བྱ་བ་ཀློང་གསལ་ལས་གསུངས་སོ། །གཉིས་པ་ཁྲིད་ཚུལ་གདམས་ངག་དངོས་རྒྱས་པར་བཤད་པ་ལ་ལྔ། ངེས་ཤེས་སྐྱེད་པ་ལོ་རྒྱུས། སྨིན་པར་བྱེད་པ་དབང་། གྲོལ་བར་བྱེད་པ་ཁྲིད། བསྒོམས་པ་ལས་བྱུང་བའི་འབྲས་བུ། ཞར་བྱུང་ལག་ལེན་གྱི་ཁྱད་པར་བསྟན་པའོ། །དང་པོ་ནི། ཀློང་གསལ་ལས། སྐལ་ལྡན་ངེས་ཤེས་བསྐྱེད་པའི་ཕྱིར། །བརྒྱུད་པའི་ལོ་རྒྱུས་བཤད་པར་བྱ། །ཞེས་གསུངས་པས་འདི་ལ་གསུམ། རྒྱལ་བ་དགོངས་བརྒྱུད། རིག་འཛིན་བརྡ་བརྒྱུད། གང་ཟག་སྙན་བརྒྱུད་དོ། །དང་པོ་ནི། གདོད་མའི་དབྱིངས་སུ་ཆོས་ཐམས་ཅད་ཀྱི་ཆོས་ཉིད་ཀ་དག་

ཤོག་ལྷེ་༡༢༣གི་སྤྲོས་པའི་མཐའ་ཐམས་ཅད་དང་བྲལ་བའི་ཀློང་ན། བཅོམ་ལྡན་འདས་དཔལ་ཀུན་ཏུ་བཟང་པོ་ཡབ་ཡུམ་གཉིས་ལྷུན་གྲུབ་ཡེ་ཤེས་ཀྱི་སྐུར་བཞེངས་ནས་རང་སྣང་གི་འཁོར་རྒྱལ་ཚབ་རིགས་ལྔ་དང་། རྒྱལ་སྲས་སེམས་དཔའ་སོགས་ཉིད་ལས་མི་གཞན་པའི་ཚོགས་ལ་རྫོགས་པ་ཆེན་པོ་སྒྲ་ཚིག་བྱ་རྩོལ་ལས་འདས་པ་དུས་ཀུན་མཉམ་པ་ཉིད་དུ་བརྗོད་མེད་ཀྱི་སྒོ་ནས་གསུངས་སོ། །གཉིས་པ་ནི། གསང་བའི་བདག་པོ་ཕྱག་ན་རྡོ་རྗེས་དུར་ཁྲོད་མེ་རི་འབར་བའི་གནས་སུ་སྤྲུལ་པའི་སྐུ་མཆོག་དགའ་རབ་རྡོ་རྗེ་ལ་ཆོས་ཉིད་དོན་གྱི་གནས་ལུགས་ཉིད་ཆོས་ཅན་བྱ་རྩོལ་ལས་འདས་པ་ཚིག་སྡེབ་སྦྱོར་ལེགས་པའི་སྒོ་ནས་བཤད། དེས་དུར་ཁྲོད་ཆེན་པོ་བསིལ་བའི་ཚལ་དུ་སློབ་དཔོན་འཇམ་དཔལ་བཤེས་གཉེན་ལ་ཆོས་ཉིད་བྱ་རྩོལ་ལས་འདས་པར་གསུངས། དེས་སོ་ས་གླིང་གི་དུར་ཁྲོད་དུ་རིག་འཛིན་ཤྲཱི་སིཾ་ཧ་ལ་མངོན་སུམ་རང་ཐོག་ཏུ་ཕབ་ནས་གསུངས། དེས་དུར་ཁྲོད་ཆེན་པོ་བསིལ་སྦྱིན་དུ་སློབ་དཔོན་ཛྙཱ་ན་སཱུ་ཏྲ་ལ་མངོན་སུམ་ཡིད་དཔྱོད་བྲལ་བས་གསུངས། དེས་དུར་ཁྲོད་ཆེན་པོ་བྷ་སིང་དུ་པཎ་ཆེན་བི་མ་ལ་མི་ཏྲ་ལ་གནས་ལུགས་གོ་རྟོགས་དང་བྲལ་བར་ཡེ་ཤེས་གོང་འཕོའ་ཚུལ་དུ་བརྡ་དང་བརྡའི་སྒོ་ནས་གསུངས་པ་ནི་རིག་འཛིན་བརྡ་བརྒྱུད་དོ། །གསུམ་པ་ནི། པཎ་ཆེན་བི་མ་མི་ཏྲ་ཉིད་ཀྱིས་མངའ་བདག་རྒྱལ་པོ་དང་། མྱང་བན་ཏིང་འཛིན་བཟང་པོ་སོགས་ལ་གསང་བ་བླ་ན་མེད་པའི་གདམས་པ་རྣམས་མནོག་ཆོས་སུ་གནང་ཞིང་། མྱང་བན་ཉིད་ཀྱིས་བརྒྱུད་པའི་བཀའ་སྲོལ་མི་ཉམས་པའི་ཆེད་དུ་སྙན་བརྒྱུད་རྣམས་འབྲོ་རིན་ཆེན་འབར་དང་སྦས་བློ་གྲོས་དབང་ཕྱུག་གཉིས་ལ་གཏད། དཔེ་བརྒྱུད་རྣམས་མ་འོངས་པའི་

ཤོག་ལྷེ་༡༢༤གདུལ་བྱར་དགོངས་ཏེ་དབུ་རུ་ཞྭའི་ལྷ་ཁང་དུ་སྦས་པས་ཕྱིས་གནས་བརྟན་ལྡང་མ་ལྷུན་རྒྱལ་གྱིས་གཏེར་ནས་བཏོན། སྙན་བརྒྱུད་བཙལ་ནས་གསན་པས་བཀའ་གཏེར་ཆུ་བོ་གཅིག་འདྲེས་སུ་གྱུར། དེས་ལྕེ་བཙུན་སེང་གེ་དབང་ཕྱུག་ལ་གནང་། རྗེ་བཙུན་ཆེན་པོས་ཀྱང་ཟབ་པ་པོད་བཞི་སོགས་གཏེར་ནས་བཞེས་ཤིང་ཁྱད་པར་བྱར་གྱི་ཕུ་བྲག་དཀར་ཐེམ་པ་འདྲ་བར་པཎ་ཆེན་བི་མ་ལ་མི་ཏྲས་གདམས་ངག་རྫོགས་པར་ཟླ་བ་བདུན་དུ་སྩལ། འོ་ཡུག་ཕྱི་གོང་རྫའི་ར་བར་འོད་ཀྱི་སྐུར་གཤེགས། དེས་ཞང་སྟོན་བཀྲ་ཤིས་རྡོ་རྗེ། དེས་རྗེ་བཙུན་གྱི་སྲས་མཁས་པ་ཉི་མ་འབུམ། དེས་ཆོས་བདག་གུ་རུ་ཇོ་འབེར། དེས་འཁྲུལ་ཞིག་སེང་གེ་རྒྱབ་པ། དེས་གྲུབ་ཐོབ་ཟླ་བ་མུན་སེལ། དེས་རིག་འཛིན་ཆེན་པོ་ཀུ་མ་རཱ་ཛ། དེས་མཁས་གྲུབ་ཀུན་གྱི་གཙུག་རྒྱན་ཆེན་པོ་འགྲན་ཟླ་ཐམས་ཅད་དང་བྲལ་བ་ཀུན་མཁྱེན་ཆོས་ཀྱི་རྒྱལ་པོ་ལ་གདམས་པ་རྫོགས་པར་གནང་བ་ཡིན་ཏེ། དམ་པ་འདི་ནི། སྒྲ་ཐལ་འགྱུར་རྩ་བའི་རྒྱུད་ལས་ལུང་བསྟན་པ་སྟེ། དེའང་ཁ་གཅིག་གིས། དེ་ནས་བློ་གྲོས་མཆོག་གིས་འཛིན། །ཅེས་མཚན་གྱི་རྣམ་གྲངས་ཚུལ་ཁྲིམས་བློ་གྲོས་ཞེས་མཚན་གྱི་འབྲེལ་དང་། ཤེས་བྱ་ལ་ཆགས་ཐོགས་མེད་པའི་མཁྱེན་རབ་ཀྱི་རྩལ་ཁ་རྒྱས་པས་དོན་དུ་འབྲེལ་གསུངས། དམ་པ་འགའ་ཞིག་གིས། དེ་འོག་སྒྲ་མཁས་དཔལ་འཛིན་ནོ། །ཞེས་པར་ཡང་ངོས་འཛིན་ཅིང་སྤྱིར་རྣམ་པར་ཐར་པ་བསམ་གྱིས་མི་ཁྱབ། ཁྱད་པར་འོད་གསལ་རྫོགས་པ་ཆེན་པོའ་ཆོས་འཁོར་གཞན་དྲིང་མི་འཇོག་པར་བསྐོར་བ་ལ་ཀུན་ཏུ་བཟང་པོ་བཤེས་གཉེན་གྱི་རྣམ་པར་སྣང་བ་ཡིན་ནོ། །ཡང་རྒྱུད་དེ་ཉིད་ལས། ས་ལ་གནས་པའི་བྱང་སེམས་ཀྱིས། །རྒྱ་མཚོའ་བར་

ཤོག་ལྷེ་༡༢༥དུ་སྤེལ་བར་བྱེད། །ཅེས་ལུང་བསྟན་པའི་རྒྱལ་བའི་དབང་པོ་གསུམ་པ་རང་བྱུང་རྡོ་རྗེས་ཐོག་མར་རིག་འཛིན་ཀུ་མཱ་རཱ་ཛ་ལས་གསང་བ་སྙིང་ཐིག་གི་གདམས་ཁྲིད་རྫོགས་པར་གསན། ཕྱིས་བི་མ་ལས་དངོས་སུ་རྗེས་སུ་བཟུང་བ་སྟེ། རྡོ་རྗེའི་གསུང་ལས། བདག་ནི་བི་མ་ལ་ཡིས་བྱིན་གྱིས་བརླབས། །ཀརྨའི་ཡང་དགོན་དབེན་པར་འདུག་པའི་ཚེ། །ནམ་ལངས་དུས་མཐར་ཤར་གྱི་ཕྱོགས་རོལ་ནས། །ལྟ་བས་མི་ངོམས་འོད་ཀྱིས་མཛེས་པ་ཞིག །མངོན་སུམ་ལྟར་སྣང་བདག་གི་མཛོད་སྤུར་ཐིམ། །དེ་ནས་འབད་མེད་གནས་འདི་ཐམས་ཅད་གོ །ཞེས་གསུངས་པ་ལྟར་དེ་ལ་བརྟེན་ནས་རྫོགས་པ་ཆེན་པོའ་རྒྱུད་འབུམ་ཕྲག་དྲུག་ཅུ་རྩ་བཞིའི་དགོངས་པ་བདེ་བླག་ཏུ་མཁྱེན་པའི་ཚུལ་བསྟན། དགོངས་པའི་ཀློང་ལས་བརྡོལ་བའི་ཀརྨ་སྙིང་ཐིག་ཅེས་མཛད་ཅིང་། མཁས་གྲུབ་ཀྱི་ཞལ་སློབ་བཞི་ལ་བི་མ་ལ་དང་པདྨའི་སྙིང་ཐིག་གི་ཆོས་རྣམས་དབུས་གཙང་ཁམས་གསུམ་རྒྱ་ནག་ལ་སོགས་པ་རྣམས་སུ་སྤེལ་བར་བཀའ་བསྒོས་པས་ལུང་གི་དོན་མངོན་དུ་གྱུར། དེས་ན་སྐྱེས་བུ་ཆེན་པོ་འདི་གཉིས་ནི་རྫོགས་ཆེན་བསྟན་པའི་བདག་པོ་སྒོ་ཐམས་ཅད་ནས་འགྲན་ཟླ་དང་བྲལ་བ་ཡིན་ཅིང་། གཉིས་ཀའི་བླ་མ་རིག་འཛིན་ཀུ་མཱ་རཱ་ཡིན་པ་དང་། ཀརྨ་སྙིང་ཐིག་ཀྱང་ཚིག་གི་བརྗོད་པ་ཕྲན་བུའི་ཁྱད་པར་ལས་ཚིག་དོན་གཉིས་ཀའི་ཆར་བི་མ་སྙིང་ཐིག་དང་ཁྱད་པར་ཅིའང་མེད་པར་མ་ཟད་གོང་མ་རྣམས་ལ་བི་མ་སྙིང་ཐིག་མ་བུ་དང་ཀརྨ་སྙིང་ཐིག་གི་བརྒྱུད་སྲོལ་ཆུ་བོ་གཅིག་འདྲེས་སུ་གྱུར་པས་ཉམས་ལེན་དང་འཆད་སྤེལ་གང་བྱས་ཀྱང་གཅིག་གོ་གཅིག་ཆོད་ངེས་པར་ཡོང་བ་ཡིན་ཅེས་ཀུན་མཁྱེན་བསྟན་པའི་ཉིན་བྱེད་སོགས་ཀྱིས་ཡང་ཡང་གསུངས། འོན་ཀྱང་འདིར་གཙོ་བོར་འཆད་བྱ་སྙིང་ཐིག་

ཤོག་ལྷེ་༡༢༦མ་བུའི་བརྒྱུད་སྲོལ་ནི། ཀུན་མཁྱེན་ཀློང་ཆེན་པ་ལ། དོན་གཉིས་མཐའ་རུ་ཕྱིན་པའི་སློབ་མ་སྐྱེས་ཆེན་མང་དུ་བྱོན་པ་ལས། བརྒྱུད་པ་གཙོ་ཆེ་བའི་དབང་གིས་མཁས་གྲུབ་ཁྱབ་བརྡལ་ལྷུན་གྲུབ་འདིར་འདྲེན་ཅིང་། དེས་འཇམ་དབྱངས་གྲགས་པ་འོད་ཟེར། དེས་འཁྲུལ་ཞིག་སངས་རྒྱས་དབོན་པོ། དེས་ཀུན་མཁྱེན་ཟླ་བ་གྲགས་པ། དེས་གྲུབ་ཆེན་ཀུན་བཟང་རྡོ་རྗེ། དེས་མཚུངས་མེད་རྒྱལ་མཚན་དཔལ་བཟང་། དེས་སྤྲུལ་སྐུ་སྣ་ཚོགས་རང་གྲོལ། དེས་གྲུབ་མཆོག་བསྟན་འཛིན་གྲགས་པ། དེས་མཁས་གྲུབ་མདོ་སྔགས་བསྟན་འཛིན། དེས་རིག་འཛིན་ཕྲིན་ལས་ལྷུན་གྲུབ། དེས་ཆོས་ཀྱི་རྒྱལ་པོ་ཨོ་རྒྱན་གཏེར་བདག་གླིང་པ་ལ་གནང་། རྗེ་འདིའི་ཕྱག་བཞེས་སུ་བི་མ་ལའི་མན་ངག་སྙིང་ཐིག་ཆེན་མོ་ཞེས་ཡོངས་སུ་གྲགས་པ་དང་། དེ་ཉིད་ལ་ཆོས་རྗེ་ཀུན་མཁྱེན་ཆེན་པོ་དྲི་མེད་འོད་ཟེར་གྱིས་སྙིང་ཐིག་རྩ་བའི་ཟབ་གནད་གསལ་བྱེད་དུ་མཛད་པའི་བླ་མ་ཡང་ཐིག་གཉིས་གདམས་ཁྲིད་སོ་སོར་རང་རྐང་དུ་འཆད་པའང་ཡོད་མོད། གཙོ་བོར་རྩ་བ་མ་བུ་གཉིས་གང་ལ་བརྟེན་ཀྱང་དམིགས་པའི་རྐང་གྲངས་སེམས་སྦྱོང་བདུན་སོགས་ངོ་བོ་མཐུན་པ་རྣམས་གཅིག་ཏུ་བྱས་ཤིང་། སྒོས་ཆོས་བྱེ་བྲག་རྣམས་མན་ངག་གཉིས་བསྡེབས་ནས་མཛད་པའི་ལུགས་སྲོལ་འདི་གནས་སྐབས་སུ་འཇུག་པ་བདེ་ཞིང་། དོན་གྱི་ཉམས་ལེན་མ་ནོར་ཚང་ཕྲུགས་སུ་འདེབས་པའི་ཟབ་གནད་གཅིག་གྲོགས་གཅིག་འགྲོའི་གནད་ཀྱིས་གཉིས་ཀའི་གདམས་ཁྲིད་ཐོབ་པའི་ཀུན་གོ་གཅིག་ཆོད་དུ་འགྱུར་བས་མཛད་པའི་རྒྱུན་ནི་ད་ལྟའི་ཕྱག་བཞེས་འདི་ཉིད་ཡིན་ནོ། །གཏེར་ཆེན་བླ་མས། རང་སྲས་བི་མའི་སྤྲུལ་པ་འགྱུར་མེད་རིན་ཆེན་རྣམ་རྒྱལ་དང་། རྗེ་བཙུན་མ་མི་འགྱུར་དཔལ་གྱི་སྒྲོན་མ་སོགས་ལ་སྩལ་ཞིང་། ཕྱི་མ་

ཤོག་ལྷེ་༡༢༧ནི་ཐལ་འགྱུར་ལས། །དེ་ནས་མཁའ་འགྲོ་དཔལ་འཛིན་མས། །བསྟན་པ་འདི་ཉིད་བཟུང་ནས་ནི། །ཚེ་ལོ་བཅུ་བའི་དུས་སུ་དར། །དེ་ནས་མི་གནས་རང་སའོ། །ཞེས་པའི་ལུང་གིས་བསྟན་པ་ལྟར་མཁྱེན་རྟོགས་འགྲན་ཟླ་དང་བྲལ་ཞིང་བསྟན་པའི་རྒྱུན་ལ་བཀའ་དྲིན་ལྷག་པར་ཆེ་བ་དང་། ཁྱད་པར་སྙིང་ཐིག་མ་བུའི་ཁྲིད་ཡིག་བདེ་ཆེན་ལམ་བཟང་སོགས་སྙིང་ཐིག་གདམས་སྲོལ་གྱི་མིག་ཏུ་གྱུར་པའི་ཡིག་ཆའང་མང་དུ་མཛད་ཅིང་། ལྕམ་དྲལ་དམ་པ་དེ་གཉིས་ཀྱིས་གཡུ་སྒྲའི་སྤྲུལ་པ་མཁན་ཆེན་ཨོ་རྒྱན་བསྟན་འཛིན་རྡོ་རྗེ། དེས་གནུབས་ཆེན་ཡང་སྲིང་ཁྲི་ཆེན་ཕྲིན་ལས་རྣམ་རྒྱལ། དེས་གཏེར་ཆེན་རྣམ་འཕྲུལ་ཁྲི་ཆེན་པདྨ་དབང་རྒྱལ། དེ་ལས་དཔལ་ལྡན་དཔའ་བོ་གཙུག་ལག་ཆོས་རྒྱལ་གྱིས་གསན་པ་ལས་བརྒྱུད་དེ་དབང་ལུང་ཚང་མ་སྐྱེས་ཆེན་དམ་པ་མགོན་སྤྲུལ་ཀརྨ་གཞན་ཕན་མཐའ་ཡས་ལས་ཐོག་མར་ནོས། ཡང་ཁྲི་ཆེན་ཕྲིན་ལས་རྣམ་རྒྱལ་ནས་རྗེ་བཙུན་རིན་པོ་ཆེ་འགྱུར་མེད་ཕྲིན་ལས་ཆོས་སྒྲོན། དེ་ལས་པཎ་ཆེན་བི་མ་ལའི་རྣམ་འཕྲུལ་ཀློང་ཆེན་གཉིས་པ་ཀུན་མཁྱེན་རྡོ་རྗེ་གཟི་བརྗིད་རྩལ་གྱིས་གསན། དེས་ཁོ་བོ་ཅག་ལ་ཐུགས་བརྩེ་བ་ཆེན་པོས་སྨིན་གྲོལ་རྒྱ་མཚོ་ལྟ་བུའི་བཅུད་དུ་སྩལ་བ་ནི་དབང་ལུང་ཁྲིད་དང་ཉམས་རྟོགས་བར་མ་ཆད་པའི་བརྒྱུད་ཚུལ་ཤིན་ཏུ་ཁྱད་པར་དུ་འཕགས་པ་ཡིན་ནོ། །སྤྱིར་སྙིང་ཐིག་ཡ་བཞི་ཞེས་ཡོངས་སུ་གྲགས་པ་ལ་གཉིས་བི་མ་དང་། གཉིས་པདྨ་སྙིང་ཐིག་ཡིན་ལ། དེའི་ངོས་འཛིན་རྙིང་ཕྱོགས་ཕལ་མོ་ཆེས་བི་མའི་སྙིང་ཐིག་ཆེན་མོ། །དེའི་བཅུད་འདྲིལ་བླ་མ་ཡང་ཏིག་གཉིས། ལས་འབྲེལ་རྩལ་གྱི་གཏེར་མ་མཁའ་འགྲོ་སྙིང་ཐིག །དེའི་ཟབ་གནད་མཁའ་འགྲོ་ཡང་ཏིག་སྟེ་བཞིར་བཞེད་ལ་

ཤོག་ལྷེ་༡༢༨ཡང་ཏིག་གཉིས་ནི་ཀུན་མཁྱེན་ཀློང་ཆེན་རབ་འབྱམས་ཀྱི་དགོངས་པའི་གཏེར་ལས་འཁྲུངས་པ་དང་། ཀོང་པོ་རྫོགས་ཆེན་པ་དང་རིག་འཛིན་ཚེ་དབང་ནོར་བུ་སོགས་ནི། བི་མ་སྙིང་ཐིག་མ་བུ་གཉིས་སོ་སོར་བགྲང་། མཁའ་འགྲོ་སྙིང་ཏིག་མ་བུ་གཅིག་ཏུ་བསྡམས། དེ་སྟེང་རྡོར་སེམས་སྙིང་ཏིག་བཅས་གཞིར་བཞེད་ཅིང་ཕྱི་མ་ལ་བཀའ་བབ་རིམ་པ་གསུམ་མཆིས་པ་འདི་ནི་བཻ་རོའ་སྙིང་ཏིག་གི་མཚན་གཞིའོ། །ཡང་ཁ་ཅིག་ནི་རྡོར་སེམས་སྙིང་ཐིག་མི་བགྲང་བར་ཀརྨ་སྙིང་ཐིག་བཅས་བཞིར་བྱེད་པའང་སྣང་ལ། རྗེ་རང་བྱུང་བས་ལས་འབྲེལ་ལ་མཁའ་འགྲོ་སྙིང་ཏིག་གསན་པའི་གཏེར་བརྒྱུད་ཀྱང་ད་ལྟ་བར་ཟམ་མ་ཆད་པར་བཞུགས་པ་དང་། ཁོ་བོ་ཅག་གིས་ཀྱང་དེ་དག་ཐམས་ཅད་སྐལ་བ་བཟང་པོའ་དཔྱིད་དུ་ནོས་པས་སྒོ་ཐམས་ཅད་ནས་ཆུ་བོ་གཅིག་འདྲེས་སུ་གྱུར་པ་མ་ཟད། ཀརྨ་སྙིང་ཐིག་སྒེར་གྱི་བརྒྱུད་པའང་རང་བྱུང་ཞབས་ནས་ཉམས་ཁྲིད་བར་མ་ཆད་པ་རིམ་པར་བརྒྱུད། དཔལ་ལྡན་དཔའ་བོ་གཙུག་ལག་དགའ་བ། ཀུན་མཁྱེན་ཆོས་ཀྱི་འབྱུང་གནས། རྗེ་བཅུ་གསུམ་པ་བདུད་འདུལ་རྡོ་རྗེ། དཔའ་བོ་གཙུག་ལག་ཆོས་རྒྱལ། ཐམས་ཅད་མཁྱེན་པ་རྒྱལ་དབང་ཀརྨ་པ་ཐེག་པ་མཆོག་གི་རྡོ་རྗེས་ལུང་ཁྲིད་ཀྱི་ཚུལ་དུ་བཀའ་དྲིན་སྩལ་བའོ། །འདིར་མདོ་ཙམ་སྨོས་པ་ཡིན་ལ། རྒྱས་པར་ན་གསང་བ་སྙིང་ཐིག་གི་བབ་ལུགས་ཆེན་མོའམ། ཡང་ཏིག་གི་ལོ་རྒྱུས་རིན་པོ་ཆེའི་ཕྲེང་བ། གཏེར་ཆེན་རིན་པོ་ཆེས་མཛད་པའི་སྙིང་ཐིག་མ་བུའི་བརྒྱུད་པའི་ཁ་སྐོང་ངེས་ཤེས་འདྲེན་པའི་ལྕགས་ཀྱུ་རྣམས་སྐབས་འདིར་འཆད་པར་བྱའོ། །གཉིས་པ་སྨིན་པར་བྱེད་པ་དབང་ལ་གཉིས། གཞི་དབང་བསྐུར། སྲོག་དམ་ཚིག་

ཤོག་ལྷེ་༡༢༩གོ །དང་པོ་ནི། ཐལ་འགྱུར་ལས། དབང་ནི་རྣམ་པ་བཞི་ཡིས་ཀྱང་། །སྐལ་པ་ལྡན་པར་སྨིན་པར་བྱ། །སྤྲོས་བཅས་ཉིད་དང་སྤྲོས་པ་མེད། །ཤིན་ཏུ་སྤྲོས་པ་མེད་པ་དང་། །དེ་བཞིན་རབ་ཏུ་སྤྲོས་པ་མེད། །དབྱེ་བ་བཞི་ཡི་ཚུལ་གྱིས་ནི། །སྐལ་ལྡན་རང་རྒྱུད་སྨིན་པར་བྱེད། །ཅེས་གསུངས་ཏེ། དེའང་སྤྱིར་ཡོ་ག་རྣམ་པ་གསུམ་གྱི་སྐབས་འདིར་ཐེག་པ་འོག་མ་ལྟར་དཀའ་སྤྱད་སོགས་ལ་མ་བརྟེན་པར། དུག་ལྔ་ལམ་ཁྱེར་གྱི་གདམས་པས་རྣམ་སྨིན་ཀུན་རྟོག་གི་བག་ཆགས་ཐབས་ཁྱད་པར་ཅན་གྱིས་སྦྱོང་ཞིང་། རང་བྱུང་གི་ཡེ་ཤེས་མངོན་སུམ་དུ་སྟོན་པར་བྱེད་པ་སྟེ། ཨ་བྷི་ཥིཉྩའི་སྒྲ་ལས་གཏོར་བའམ་བླུགས་པ་ཞེས་འབྱུང་བས་མེད་སྣང་འཁོར་བའི་བག་ཆགས་མ་ལུས་པ་དག་པར་བྱེད་པའི་ཆ་ནས་གཏོར་བ་དང་། གཞིའི་ངོ་བོ་གདོད་ནས་སྐུ་གསུམ་རང་ཆས་སུ་བཞུགས་པ་ཉིད་མཐོང་གསལ་དུ་བྱེད་པས་བླུགས་པའང་ཡིན་ཅེས་གསུངས་ལ། ཁྱད་པར་འདིར་ནི་སྣང་སྲིད་ཡེ་དག་ཆོས་ཉིད་བྱང་ཆུབ་སེམས་ཀྱི་དཀྱིལ་འཁོར་དུ་རང་བཞིན་སྤྲོས་བྲལ་རྫོགས་པ་ཆེན་པོར་དབང་བསྐུར་ནས་གཅེར་མཐོང་དུ་ངོ་སྤྲོད་པའོ། །དེ་ཡང་གང་ཟག་དབང་རབ་རྣམས་ནི་དབང་དུས་སུ་གྲོལ་བ་ཐོབ་པ་དང་། འབྲིང་གིས་བརྡའ་དོན་འཕྲོད་དེ་ཡེ་ཤེས་ཕེབས་པ་དང་། ཐ་མས་ཀྱང་རྒྱུད་ལ་ཐར་པའི་ས་བོན་འཇོག་པ་ཡིན་ཏེ། དབང་གི་ལས་ཀྱིས་ཐར་པའི་མྱུ་གུ་མངོན་དུ་བསྐྱེད་པའམ། སྐྱེ་ངེས་ཀྱི་ནུས་རུང་དུ་སྨིན་པ། །ཞེས་གསུངས་པས་སོ། །འདིར་མན་ངག་མ་བུ་གཉིས་བསྡེབས་ཀྱི་ཚུལ་དུ་གནང་ཡང་། དབང་རྣམས་བླ་མ་ཡང་ཏིག་གི་ནང་ལྟར་དང་། བསྐུར་ལུགས་ཀྱང་དང་པོ་ཁྲིད་ཀྱི་སྔོན་དུ་སྤྲོས་བཅས་ཀྱི་དབང་།

ཤོག་ལྷེ་༡༣༠ཁེགས་ཆོད་ཀྱི་སྔོན་དུ་སྤྲོས་མེད། ཐོད་རྒལ་གྱི་སྔོན་དུ་ཤིན་ཏུ་སྤྲོས་མེད་དང་། རབ་ཏུ་སྤྲོས་མེད་གཉིས་སྦྲེལ་མར་མཛད་པ་ཕྱག་བཞེས་ཡིན་ནོ། །གཉིས་པ་དམ་ཚིག་ནི། ཐལ་འགྱུར་ལས། དབང་རྟེན་པ་ཡི་དམ་ཚིག་ནི། །བྱེ་བྲག་བརྗོད་ཀྱིས་མི་ལང་ཡང་། །མདོར་བསྡུས་སྐུ་གསུང་ཐུགས་ཉིད་བསྲུང་། །ཞེས་པས་བསྲུང་བྱའི་དོན་ལས་ནམ་ཡང་མི་འདའ་བའི་སེམས་པ་ས་བོན་དང་བཅས་པ་སྟེ། ཕྲ་རྒྱས་ལས། གང་ཞིག་ནན་ཏན་ལས་མི་འགོངས། །རྨི་ལམ་དུ་ཡང་དམ་ཚིག་བརྗོད། །དམ་བཅའ་བ་ནི་སྡོམ་པར་འདོད། །ཅེས་སོ། །དབྱེ་ན་སྐུ་གསུང་ཐུགས་རེ་རེར་ཕྱིའི་ཕྱི། ཕྱིའི་ནང་། ཕྱིའི་གསང་བ་དང་། དེ་བཞིན་ནང་གསང་གཉིས་ལའང་སྦྱར་བས་རྣམ་གྲངས་ཉི་ཤུ་རྩ་བདུན། གཞན་ཡང་གསང་སྔགས་གི་དམ་རྫས་ཤ་ལྔ་དང་བདུད་རྩི་ལྔ་སོགས་གསང་བར་འོས་པ་དང་། བླ་མ་དང་མཆེད་རྣམས་ཀྱིས་སྤང་བླང་བསྟན་པ་རྣམས་གསང་བར་གཉེར་གཏད་པ་སྟེ། མདོར་ན་རང་གིས་ཇི་ལྟར་ཁས་བླངས་པའི་རྩ་བ་དང་ཡན་ལག་གི་དམ་ཚིག་ཐམས་ཅད་བག་ཡོད་དྲན་ཤེས་མ་བྲལ་བའི་སྒོ་ནས་བསྲུང་དགོས་ཏེ། དྲི་མེད་རྒྱལ་པོ་བཤགས་པའི་རྒྱུད་ལས། དམ་ཚིག་ས་གཞི་ལྟ་བུ་ལ། །ཐམས་ཅད་འབྲས་བུ་ལོ་ཏོག་སྨིན། །ཞེས་དང་། དམ་ཚིག་མཆོག་གི་རྒྱུད་ལས། འདི་ལས་འགལ་བར་མ་བྱས་ན། །རྡོ་རྗེ་འཛིན་པ་རྫོགས་སངས་རྒྱས། །ཚེ་འདི་ཉིད་ལ་ཐོབ་པར་ངེས། །ཞེས་སོགས་གསུངས་པས། ཉམས་ལེན་དངོས་གཞིའི་འབྲས་བུས་རྒྱུད་ལ་སྐྱེ་མིན་ཐམས་ཅད་འདི་ལས་རགས་ལས་སོ། །གསུམ་པ་གྲོལ་བར་བྱེད་པ་ཁྲིད་ཀྱི་རིམ་པ་བསྟན་པ་ལ་གསུམ། བརྩོན་འགྲུས་རབ་

ཤོག་ལྷེ་༡༣༡ཚེ་འདིར་གྲོལ་བ། འབྲིང་བར་དོར་གྲོལ་བ། ཐ་མ་རང་བཞིན་སྤྲུལ་སྐུའི་ཞིང་ཁམས་སུ་གྲོལ་བ་བསྟན་པའོ། །དང་པོ་ནི། དམིགས་གཏད་གསལ་བར་བྱེད་པའི་སྒྲོན་མེ་ཞེས་བྱ་བ་ཉམས་སུ་ལེན་པའི་སྒོམ་ཁྲིགས་ཆེན་མོ་ལས། དང་པོ་རིག་པ་གཅེར་མཐོང་ལ་ཡིད་མ་ཆེས་ན༔ གྲུབ་མཐའ་ངན་པར་ལོག་པ་འབྱུང་དོགས་སྲིད་པས༔ སྔོན་དུ་བྱང་ཆུབ་སེམས་སྦྱོང་གི་མན་ངག་ལ་བསླབ་པར་བྱའོ༔ །དེ་ནས་སེམས་འབྱོངས་པའི་དྲོད་རྟགས་གཏན་ལ་ཕེབས་པ་དང་༔ གསང་སྔགས་གཞན་དག་གི་མན་ངག་གིས་ལམ་དུ་དྲངས་ཏེ༔ གང་ཟག་ཆགས་པ་ཅན་དང་ཆགས་པ་མེད་པ་གཉིས་སུ་བྱས་ནས༔ རྩ་དང་རླུང་དང་ཐིག་ལེ་ལ་བསླབ་པར་བྱའོ༔ དེ་ལྟར་རྩ་རླུང་གི་དྲོད་རྟགས་གཏན་ལ་ཕེབས་ནས༔ དྲན་པ་རྒྱུན་གཅོད་ཀྱི་མན་ངག་གིས་རིག་པ་ཉིད་འབྱུང་བ་ལས་ལྡོག་པར་བྱའོ༔ དེ་ལྟར་འབྱུང་བ་ལྔ་ལས་བཟློག་ནས༔ སྦས་པ་མིག་འབྱེད་ཀྱི་མན་ངག་གིས་སྤྱོད་པ་སྒོམ་པ་ལྟ་བ་འབྲས་བུའི་འདུག་ཚུལ་བལྟ༔ ཞེས་དང་། སྤྱོད་པ་སོགས་བཞི་སྐོར་གྱི་གདམས་པའི་ཁྲིད་ཚུལ་རྒྱས་པར་བསྟན་པ་དང་ཡང་ཏིག་ཡིད་བཞིན་ནོར་བུའི་རྩ་བའི་ས་བཅད་ཟུང་འབྲེལ་ལག་ཏུ་ལེན་པ་ལ་དོན་གསུམ་དུ་བསྡུས་ཏེ། ལམ་སྒོམ་པའི་སྣོད་རུང་དུ་བྱ་བ་སྔོན་འགྲོའི་ཁྲིད་བསྟན་པ། དངོས་གཞི་སེམས་རིག་གཏན་ལ་འབེབས་པ་འོད་གསལ་སྙིང་པོའ་དོན་ཁྲིད་བསྟན་པ། རྗེས་གནད་བཞི་ཆོས་ཉིད་ཀྱི་འཁོར་ལོས་ཆུ་བོ་རྒྱུན་གྱི་རྣལ་འབྱོར་བྱ་བའི་ཚུལ་བསྟན་པའོ། །དང་པོ་ལ་ལྔ། ཟབ་ལམ་སྒོམ་པའི་མཚམས་སྦྱོར་མེད་དུ་མི་རུང་བའི་ཐུན་གྱི་སྔོན་འགྲོ་བསྟན་པ། གསང་བ་སྙིང་ཏིག་གི་ཁྱད་ཆོས་སེམས་

ཤོག་ལྷེ་༡༣༢སྦྱོང་བདུན་གྱིས་ལམ་གྱི་གཞི་བཅའ་བ། ཐུན་མོང་སྔོན་འགྲོ་བཞི་སྦྱོར་གྱིས་རྒྱུད་དག་པར་བྱེད་པ། གསང་སྔགས་སྤྱི་མཐུན་གྱི་ཐབས་ལམ་རླུང་ཐིག་གིས་ལུས་སེམས་སྦྱོང་བ། དྲན་པ་རྒྱུན་གཅོད་ཀྱི་མན་ངག་གིས་འབྱུང་ལྔ་རང་སར་དེངས་པར་བྱེད་པའོ། །དང་པོ་ཐུན་གྱི་སྔོན་འགྲོ་ནི། གནས་དབེན་པར་བདེ་བའི་སྟན་ལ་ལུས་གནད་རྣམ་སྣང་ཆོས་བདུན་དྲང་པོར་བསྲང་། དེའང་ཁྲིད་རིམ་སྒོམ་ཕྱིན་ཆད་སྤྱི་དང་བྱེ་བྲག་གི་ལུས་གནད་སྐབས་སུ་བབས་པར་འཆའ་བ་ལས། ལུས་ཉལ་བ་དང་བསྙེས་པ་ལ་སོགས་ཐ་མལ་དུ་ནམ་ཡང་སྡོད་མི་རུང་སྟེ། དེའི་རྒྱུ་མཚན་ལུས་གྲོང་ཁྱེར་དང་འདྲ། རྩ་ལམ་སྲང་དང་འདྲ། རླུང་རྟ་དང་འདྲ། རྣམ་ཤེས་མི་ཞ་བོ་དང་འདྲ་བས་བྱེད་པ་བཅིངས་ན་སྲང་སྒོ་ཁེགས་པས་མི་རྟ་ནང་དུ་ཚུད་དེ་འགྲོ་མི་ཐུབ་པ་དང་འདྲ་སྟེ། དཔེར་ན་སྦྲུལ་ལ་ཡན་ལག་ཡོད་ཀྱང་མ་གཅུར་ན་མི་གསལ་བ་བཞིན། ལུས་མ་གཅུན་ན་སེམས་མི་གནས་པས་རྟེན་འབྲེལ་ལུས་ལ་བསྒྲིགས་པས་རྟོགས་པ་སེམས་ལ་འཆར་བ་ཞེས་གོང་མ་རྣམས་ཀྱིས་ཟབ་མོའ་གདམས་ངག་གི་རྐང་དང་པོར་མཛད་དོ། །དེ་ནས་ཐུན་དང་པོར་རླུང་རོ་དགུ་ཕྲུགས། འོག་མ་རྣམས་ལ་སུམ་ཕྲུགས་སུ་བསལ་ཏེ། དེའང་དང་པོ་ནི། སྣ་བུག་གཡོན་ནས་ཆུང་འབྲིང་ཆེ་གསུམ། དེ་ནས་གཡས་ནས་གསུམ། གཉིས་ཀ་ཆབ་གཅིག་ཆུང་འབྲིང་ཆེ་གསུམ་བསལ་བའོ། །གཉིས་པ་ནི། གཡོན་གཡས་དབུས་ནས་ལན་རེ་བསལ། དེའི་ཚེ། རང་གཞན་སེམས་ཅན་ཐམས་ཅད་ཀྱི་ཚེ་རབས་ཐོག་མ་མེད་པ་བསགས་པའི་སྡིག་སྒྲིབ་གེགས་དང་བར་ཆད་མི་མཐུན་པའི་ཕྱོགས་ཐམས་ཅད་འུབ་ཀྱིས་འདུས་ནས་

ཤོག་ལྷེ་༡༣༣སྣ་སྒོའི་རླུང་དང་འགྲོགས་ཏེ་ཕྱིར་སང་སང་སོང་བས་ལུས་ཀྱི་ནང་བཤལ་བཏང་བ་ལྟར་དག་པར་གྱུར་སྙམ་དུ་བསམ་མོ། །འདིར་ནི་དཔེར་ན་བཅུད་བཟང་པོ་ཞིག་བླུགས་པར་བྱེད་པ་ལ་སྔ་ལོགས་སུ་སྣོད་བཀྲུ་བཤལ་བྱེད་པ་ལྟ་བུའོ། །དེ་ནས་མཁའ་མཉམ་གྱི་སེམས་ཅན་ཐམས་ཅད་ཀྱི་དོན་དུ་མན་ངག་རྫོགས་པ་ཆེན་པོའ་གདམས་པ་ཟབ་མོ་འདི་ཉིད་ཉམས་སུ་བླང་སྙམ་དུ་སེམས་བསྐྱེད་དུང་པ་ཞིག་སྔོན་དུ་བཏང་རྗེས། དཔལ་ལྡན་རྩ་བའི་བླ་མ་རིན་པོ་ཆེ། །བདག་གི་སྤྱི་བོར་པདྨའི་གདན་བཞུགས་ནས། །བཀའ་དྲིན་ཆེན་པོའ་སྒོ་ནས་རྗེས་བཟུང་སྟེ། །སྐུ་གསུང་ཐུགས་ཀྱི་དངོས་གྲུབ་སྩལ་དུ་གསོལ། །ཞེས་བརྗོད་པས། རང་གི་སྤྱི་བོར་པདྨ་དང་ཉི་ཟླའི་གདན་ལ་ངོ་བོ་དྲིན་ཅན་རྩ་བའི་བླ་མ་ཉིད་དཔལ་རྡོ་རྗེ་སེམས་དཔའི་རྣམ་པ་ཅན། མཚན་དཔེ་རབ་ཏུ་རྫོགས་པའི་སྐུ་དར་དང་རིན་པོ་ཆེའི་བརྒྱན་པ། ཕྱག་གཉིས་རྡོར་དྲིལ་འཛིན་ཅིང་ཞབས་སེམས་དཔའི་སྐྱིལ་གྱིས་བཞུགས་པ་ཞིག་གསལ་བཏབ་ནས་ངག་ཏུ། དུས་གསུམ་སངས་རྒྱས་ཐམས་ཅད་ཀྱི་ངོ་བོ་བླ་མ་རིན་པོ་ཆེ་མཁྱེན། བདག་གི་རྒྱུད་སྨིན་ཅིང་གྲོལ་བར་བྱིན་གྱིས་བརླབ་ཏུ་གསོལ། །ཞེས་པ་ཙམ་མམ། དེ་མཐར། ཟབ་ལམ་གྱི་རྟོགས་པར་ཁྱད་པར་ཅན་རྒྱུད་ལ་སྐྱེ་བར་བྱིན་གྱིས་བརླབ་ཏུ་གསོལ། ཚེ་འདི་ཉིད་ལ་ཕྱག་རྒྱ་ཆེན་པོ་མཆོག་གི་དངོས་གྲུབ་མྱུར་ཏུ་ཐོབ་པར་བྱིན་གྱིས་བརླབ་ཏུ་གསོལ། །ཞེས་འདོད་པའི་དོན་ལ་ཞེ་ཐག་པ་ནས་གསོལ་བ་ཕུར་ཚུགས་སུ་བཏབ་པས། བླ་མའི་ཞབས་གཡས་པའི་མཐེ་བོང་ལས་བདུད་རྩི་དཀར་པོའ་རྒྱུན་བབས། རང་གི་ཚངས་བུག་ནས་ཞུགས། ལུས་

ཤོག་ལྷེ་༡༣༤ཐམས་ཅད་གང་བདེ་བ་ཆེན་པོའ་ཡེ་ཤེས་སྐྱེས། མཐར་བླ་མ་འོད་དུ་ཞུ་ནས་རང་ལ་ཐིམ་པས་རྒྱུད་བྱིན་གྱིས་བརླབས་པར་བསམ་ལ་རིག་པ་འཛིན་མེད་དུ་འཇོག །འདི་ལ་རིག་འཛིན་ཚེ་དབང་ནོར་བུའི་གསུང་རྒྱུན་དུ་བླ་མ་གཞིའི་ཀུན་བཟང་གི་རྣམ་པར་མདུན་མཁར་ཐིག་ལེ་སྔོན་པོའ་དབུས་སུ་བསྒོམས་ནས་གསོལ་བ་བཏབ་རྗེས་ཧཱུཾ་མཐིང་གར་གྱུར་པ་འཆད་འགྱུར་རྡོ་རྗེའི་ལྟེ་བར་བྱོན་པར་མོས་གསུངས། འདི་ཉིད་ཀུན་མཁྱེན་གྱི་གཞུང་ཁྲིད་དུ་དངོས་སུ་མ་བསྟན་ཀྱང་རྡོ་རྗེ་ལམ་བསྟན་ནས་ཐུན་མཚམས་ཐམས་ཅད་དུ་བསྒོམ་པར་གསུངས་པ་ལྟར་ཕྱག་བཞེས་སུ་མཛད་ཅིང་། དེར་བླ་མ་དངོས་སམ་རྡོར་སེམས་གང་རུང་དུ་བསྒོམ་པར་གསུངས་པ་ལྟར་རང་བྱུང་ཞབས་ཀྱིས་ཀྱང་དེ་ཉིད་དྲངས་པར་མཛད་དོ། །གོང་ལྟར་དེའི་མཐར་རང་རྡོ་རྗེ་སྔོན་པོ་རྩེ་གསུམ་པར་བསྒོམས་ནས་རྡོ་རྗེའི་འདུག་སྟངས་བྱས་པས་བར་ཆད་མེད་པའི་རྟེན་འབྲེལ་དང་། དོན་དམ་གྱི་སྲུང་འཁོར་མཆོག་ཏུ་འགྱུར་རོ། །གཉིས་པ་གསང་བ་སྙིང་ཏིག་གི་ཁྱད་ཆོས་སེམས་སྦྱོང་བདུན་གྱིས་ལམ་གྱི་གཞི་བཅའ་བ་ནི། ཟངས་ཡིག་ཅན་ལས། ཀྱེ་མ་ཀྱེ་མ། རིགས་ཀྱི་བུ་རྣམས་ཉོན་ཅིག །རིག་པ་མངོན་སུམ་གྱི་སྣང་བ་ལ་བློ་མི་ཕེབས་ཤིང་དབང་པོ་དམན་པ་སྐལ་བ་ཞན་པའི་མི་རྣམས་ཀྱིས་འདི་ལ་ཡིད་མི་ཆེས་པ་འགའ་འབྱུང་སྲིད་པས། དེ་དག་རྣམས་རིག་པ་མཐོང་བར་བྱ་བའི་ཆེད་དུ་འདི་རྣམས་ལ་བསླབ་པར་བྱ་བ་ཡིན་ནོ། །རྐྱེན་མེད་པའི་ཕྱོགས་སུ་ཕྱི་ནང་གི་བྱ་བ་བཏང་སྟེ། བསམ་གཏན་གྱི་འཇིག་པ་རྣམས་སྤངས་ལ་དང་པོ་སེམས་སྦྱང་བར་བྱའོ། །ཞེས་སོགས་རྒྱས་པར་གསུངས་པ་ལྟར་འདི་ལ་བདུན། མི་རྟག་པ། འཕྲལ་ཡུན་གྱི་བདེ་བ། རྐྱེན་དུ་མ།

ཤོག་ལྷེ་༡༣༥བྱས་པ་དོན་མེད། སངས་རྒྱས་ཀྱི་ཡོན་ཏན། བླ་མའི་མན་ངག །རྣམ་པར་མི་རྟོག་པ་ལ་བརྟེན་ནས་སེམས་སྦྱོང་བ་རྣམས་སོ། །དང་པོ་མི་རྟག་པ་ལ་བསམ་སྟེ་སེམས་སྦྱོང་བ་ནི། ཕྱི་ན་ནམ་ཟླ་དུས་བཞིའི་འགྱུར་ལྡོག །ཉིན་མཚན་སྐད་ཅིག་ཐང་ཅིག་གིས་ཀྱང་མི་རྟག་པ་དང་། ནང་འབྱུང་བཞིའི་ཕུང་པོ་འགྱུར་ལྡོག་ཆུའི་ལྦུ་བ་སྤུངས་པ་དང་འདྲ་བ་མྱུར་ཏུ་འཇིག་ཅིང་སྙིང་པོ་མེད་པས་ཀྱང་མི་རྟག་པ་དང་། གསང་བ་ཕ་མ་གཉེན་འདུན་ཤི་བས་ཀྱང་མི་རྟག་པ་དང་། རང་ལའང་དེ་ལྟ་བུའི་གནས་སྐབས་ནམ་འབྱུང་ན་ཨང་། དེ་རིང་སང་ཙམ་ལའང་མི་འཆི་བའི་གདེངས་མེད་དེ། དོ་ནུབ་འཆིའམ་སང་འཆིའམ་སྙམ་དུ་སྙིང་ནས་སྐད་ཅིག་ཀྱང་མ་ཡེངས་པར་བསམ་ཞིང་། སེམས་ཅན་གཞན་མཐོང་བ་ལའང་འདི་ཀུན་ཀྱང་འཆི་བ་ལས་མ་འདས་སོ། །ནམ་འཆིའམ་སྙམ་དུ་བསྒོམ་པའོ། །དེས་ན་འདུས་བྱས་ཐམས་ཅད་མི་རྟག་པའི་རང་བཞིན། མི་རྟག་པའི་དཔེ་མཐོང་ནས་བློ་སྣ་ཐུང་དུ་སོང་བ་ནི་འབྱོངས་པའི་ཚད་དོ། །དེ་ལྟར་བསྒོམས་པས་འཁོར་བ་ལས་བློ་ལྡོག་པའི་དགོས་པ་ཡོད་དོ། །དེ་ཉིད་གསལ་གདབ་པའི་ཕྱིར། ཕྱི་རོལ་ཉིན་མཚན་དུས་བཞིའི་འགྱུར་ལྡོག་དང་། །ནང་གི་ཕུང་པོ་གསང་བ་གཉེན་འདུན་སོགས། །འདུས་བྱས་ཆོས་རྣམས་མི་རྟག་མྱུར་ཏུ་འཇིག །སྙིང་པོ་མེད་པ་ཆུ་ལྦུར་ལྟ་བུའོ། །ཞེས་འདོན་བསྒོམ་དུ་བྱའོ། །གཉིས་པ་འཕྲལ་གྱི་བདེ་བ་དང་ཡུན་གྱི་བདེ་བ་ལ་བསམ་སྟེ་སེམས་སྦྱོང་བ་ནི། ལས་མི་དགེ་བས་ངན་སོང་དང་སྡུག་བསྔལ་གྱི་རིགས་ཐམས་ཅད་བསྐྱེད་ལ། དགེ་བས་མཐོ་རིས་དང་བདེ་བའི་རིགས་ཐམས་ཅད་བསྐྱེད་ཅིང་། འཁོར་བ་མཐོ་དམན་གྱི་

ཤོག་ལྷེ་༡༣༦རང་བཞིན་ཟོ་ཆུའི་འཁྱུད་མོ་འདྲ་བ། འཕོ་ཞིང་རྟག་མི་ཐུབ་པ་འདི་མཚངས་རེ་ཆེ། འཁོར་བ་མི་འཇུག་པའི་ཐབས་དམ་པ། ཐར་པའི་བྱང་ཆུབ་མ་གཏོགས་པར་ཡིད་བརྟན་མི་རུང་ཞིང་བསླུ་བ་འདི་ཡ་ཆ། ཐར་པའི་ལམ་དུ་ཞུགས་ན་འཕྲལ་གྱི་བདེ་བ་མཐོ་རིས་དང་ཡོན་ཏན་བཟང་པོ་རྒྱུད་ལ་ཐོབ་སྟེ་རྒྱལ་སྲས་བྱང་ཆུབ་སེམས་དཔའ་རྣམས་བཞིན་ནོ། །ཡུན་གྱི་བདེ་བ་བླ་ན་མེད་པའི་བྱང་ཆུབ་འགྲུབ་སྟེ་སངས་རྒྱས་རྣམས་བཞིན་ནོ། །དེ་བས་གནས་སྐབས་དང་མཐར་ཐུག་གི་བདེ་བ་ཕུན་སུམ་འཚོགས་པ་བསྒྲུབ་པར་བྱ་སྙམ་དུ་བསམ་མོ། །དེས་ན་ཐར་པའི་ལམ་དུ་མ་ཚུད་ན། མི་དགེ་བས་ངན་སོང་། དགེ་བ་བྱས་པས་མཐོ་རིས་སུ་སྐྱེས་ཀྱང་། སླར་ངན་སོང་དུ་འཁོར་བའི་ཕྱིར། བྱས་པ་ཐམས་ཅད་སྡུག་བསྔལ་གྱི་རྒྱུར་འདུག་ཨང་སྙམས་པས་སྙིང་ནས་བྱུང་བ་ནི་གོམས་པའི་ཚད་དོ། །དེས་ནི་འཁོར་བའི་སྡུག་བསྔལ་ལས་ཡིད་དབྱུང་ནས་སྐྱོ་ཤས་དྲག་པོ་རྒྱུད་ལ་སྐྱེ་བའི་དགོས་པ་ཡོད་དོ། །དེ་གསལ་གདབ་པའི་ཕྱིར། དགེ་སྡིག་འབྲས་བུས་རིགས་དྲུག་གནས་སུ་འཁོར། །སྲིད་པའི་བདེ་འབྱོར་དུག་ཅན་ཁས་ཟས་བཞིན། །ལྟར་སྣང་བདེ་ཡང་ནམ་ཕུག་སྡུག་བསྔལ་རྒྱུ། །ངེས་ལེགས་ཐར་པའི་ལམ་མཆོག་ཁོ་ནའོ། །གསུམ་པ་རྐྱེན་དུ་མ་ལ་བསམ་སྟེ་སེམས་སྦྱོང་བ་ནི། འཁོར་བ་སྐྱེས་དུས་ན་ཡིད་བརྟན་དང་བློ་གཏད་མི་འདུག་སྟེ། ཕན་བཏགས་ཀྱང་ལན་དུ་གནོད་པ་བསྐྱལ་བ་དང་། ཟས་སྐོམ་ཟོས་ཀྱང་ནད་དང་འཆི་རྐྱེན་དུ་འགྲོ་བ་དང་། ཡོ་བྱད་བསགས་ཀྱང་དགྲ་རྐུན་གྱི་འདོད་པ་སྒྲུབ་པ་དང་། ཕན་དུ་རེ་ནས་གཉེན་བཤེས་སུ་བཏགས་པས་གནོད་པའི་དགྲར་འགྱུར་བ་དང་། གནོད་པ་མ་བྱས་ཀྱང་དོན་མེད་པའི་ངན་སྨྲས་དང་སྐུར་བར་འགྱུར་བ་དང་།

ཤོག་ལྷེ་༡༣༧གང་བྱས་ཀྱང་གཞན་གྱི་ཡིད་མི་མགུ་བ་དང་། ཟིན་པའི་དུས་མེད་པ་འདི་མཚངས་རེ་ཆེ། སེམས་ཅན་གྱི་བསམ་སྤྱོད་ལ་སྙིང་ནས་བསམ་ན་གང་ལྟར་ཕན་བཏགས་ཀྱང་ལ་ལ་མགུ་དུས་ལ་ལ་མི་མགུ། ཇི་ལྟར་བསམས་ཀྱང་མཐའ་གཅིག་ཏུ་ཕན་མེད། །ཅི་བྱས་ཐམས་ཅད་སྡུག་བསྔལ་གྱི་རང་བཞིན། ནང་རྐྱེན་དང་འཆི་རྐྱེན་གྲངས་མང་བ་འདི་དག་ལ་དངོས་སུ་ཕན་པ་མི་འགྲུབ་པས། བློ་ལྟོས་མི་བསླུ་བར་བླ་མ་དཀོན་མཆོག་ལས་གཞན་མེད་པའི་ཕྱིར་མོས་གུས་དང་མཆོད་པ་བྱས་ན་འདི་ཕྱིར་བདེ་བའི་རྒྱུ་ཡིན་པས། བློ་སྣ་དེ་དགེ་བ་འབའ་ཞིག་ལ་བསྒྱུར་དགོས་སྙམ་དུ་རྐྱེན་བཟང་ངན་སྔར་བྱུང་བ་དང་། ད་ལྟ་བྱེད་པ་དང་། ཕྱིས་བྱེད་འགྱུར་རྣམས་ལ་བསམ་ཞིང་། སྐྱོ་ཤས་དང་བློ་སྣ་བསྟུང་བར་བྱའོ། །དེས་ན་རིགས་དྲུག་གི་སེམས་ཅན་རྣམས་ལ་སྙིང་རྗེ་སྐྱེ་ཞིང་། ལས་སུ་དཀོན་མཆོག་དང་། བླ་མ་མཆོད་ན་ཅི་མ་རུང་སྙམ་པ་ནི་འབྱོངས་པའི་ཚད་དོ། །དེས་ནི་དད་པ་སྔོན་དུ་འགྲོ་བའི་དགོས་པ་ཡོད་དོ། །དེ་གསལ་གདབ་པ་ནི། རྐྱེན་སྣང་འཁྲུལ་པའི་བྱ་བ་ཟིན་དུས་མེད། །ཇི་ལྟར་བྱས་ཀྱང་འདོད་ཐོག་བབ་མི་འགྱུར། །སྨིག་རྒྱུའི་ཆུ་ལ་རི་དྭགས་སྙེགས་པ་བཞིན། །དེ་བས་བློ་སྣ་དགེ་ལ་བསྒྱུར་བར་བྱ། །བཞི་པ་བྱས་པ་ཐམས་ཅད་དོན་མེད་པར་སེམས་སྦྱོང་བ་ནི། བདག་གིས་ཚེ་འདིའི་བྱ་བཞག །གཉེན་སྐྱོང་བ། །དགྲ་འདུལ་བ། སོ་ནམ་ཞིབ་ཏིག །ཚོང་ཁེ་སྤོགས། ཁེ་གྲགས་ལོ་འདོད། ཆགས་སྡང་། ཞེ་སྡང་། གཞན་གྱིས་ཤ་ཚ་གྲོས་འདེབས། ཆེ་ཐབས་དང་། གཏམ་སྙན་འདོད་པ་ལ་སོགས་པ་ནས། གཉེན་གྲོགས་དང་ལྷན་ཅིག་ལོངས་སྤྱོད་དང་བཤེས་

ཤོག་ལྷེ་༡༣༨འདྲིས། གནས་ཁྱིམ་མཁར་ལས་ལ་སོགས་པ་ཅི་དང་ཅི་བྱས་ཀྱང་ཤི་བའི་ནངས་པར་འགྲོགས་ནས་མི་འགྲོ་བས་ཕན་མེད་དེ། ཁར་སང་ཕན་ཆད་ཀྱི་བྱ་བྱེད་ཅི་དང་ཅི་བྱས་དྲན་པའི་ཡུལ་ཙམ་ལས་ཕྱིར་མི་འོང་བས་མདང་གི་རྨི་ལམ་དང་འདྲ། དེ་རིང་གི་སྣང་བ་དོ་ནུབ་ཀྱི་རྨི་ལམ་དང་འདྲ། སང་ཕན་ཆད་བྱེད་པ་རྣམས་སང་དགོང་གི་རྨི་ལམ་དང་འདྲ་བ་ཞིག་ཡིན་པར་འདུག་པ་ལ། དོན་མེད་པའི་ཆགས་སྡང་དང་། འཐབ་རྩོད། སྙན་མི་སྙན། བདེ་སྡུག་གསོག་འཇོག་བྱ་བྱེད་རྣམ་པ་སྣ་ཚོགས་པ་ཞིག་གིས་དུས་འདས་པ་འདི་མཚངས་རེ་ཆེ། །འཇིག་རྟེན་གྱི་སྣང་བ་སྒྱུ་མའི་བསླུ་བྲིད་དུ་འདུག་པ། དེ་རིང་ལས་མ་གཏོགས་པ་ལིངས་ཀྱིས་བློས་བཏང་ལ། བླ་མ་དམ་པའི་གདམས་ངག་ཅིག་རྒྱུད་ལ་ཉམས་སུ་བླང་དགོས་སྙམ་དུ་བསམ་མོ། །དེས་ན་སྣང་བ་གང་ལའང་བློ་གཏད་མེད་པས་བླ་མའི་གདམས་ངག་ཅིག་ཐོབ་པར་བྱ་དགོས་སྙམ་པ་དུང་གིས་བྱུང་བ་ནི་འབྱོངས་པའི་ཚད་དོ། །དེས་ནི་བླ་མའི་གདམས་ངག་ལ་འཇུག་པའི་དགོས་པ་ཡོད་དོ། །དེ་གསལ་གདབ་པ་ནི། འཇིག་རྟེན་བྱ་བཞག་དོན་མེད་ཆགས་སྡང་གཞི། །གཉིད་ཐུན་གཅིག་གི་རྨི་ལམ་བཟང་ངན་ལྟར། །སྣང་བ་སྒྱུ་མས་བསླུས་པ་མཚངས་རེ་ཆེ། །ལིངས་ཀྱིས་བོར་ཏེ་ཟབ་མོའ་གདམས་ངག་བསྒོམ། །ལྔ་པ་སངས་རྒྱས་ཀྱི་ཡོན་ཏན་ལ་བརྟེན་ནས་སེམས་སྦྱོང་བ་ནི། འཁོར་བའི་ཉེས་པ་ཐམས་ཅད་ལས་འདས་པའི་སངས་རྒྱས་ཏེ། སྐུ་མཚན་དང་དཔེ་བྱད་དུ་འབར་བ། གསུང་ཆོས་ཀྱི་འཁོར་ལོ་བསྐོར་བ། ཐུགས་ཡེ་ཤེས་ཀྱི་ངང་ལས་མི་གཡོ་བ། ལྷ་དང་བཅས་པའི་འཇིག་རྟེན་ཐམས་ཅད་ཀྱི་འདྲེན་པ་དམ་པ་གཙོ་བོ་གཅིག་སུ་སྐྱབས་སྣང་དཔུང་གཉེན་དུ་གྱུར་པ་ཡིན་པས་ཐོབ་པར་བྱ་དགོས། སངས་མ་རྒྱས་ན་ཕན་མི་འདུག་སངས་རྒྱས་ཐོབ་པར་བྱེད་པ་

ཤོག་ལྷེ་༡༣༩ལའང་ལམ་མ་བསྒོམས་ན་མི་ཐོབ་པས། ཅིས་ཀྱང་བསྒོམ་དགོས། གྲུབ་ཐོབ་གོང་མ་ངོ་མཚར་ཅན་རྣམས་ཀྱི་རྗེས་བསྙགས་ལ་སྒྲུབ་པ་རྩེ་གཅིག་ཏུ་བྱ་དགོས། ཁོང་རྣམ་པས་དཀའ་བ་དུ་མ་སྤྱད། གཅིག་པུར་དབེན་པར་བསྒོམས་པས་གྲོལ་བ་ལྟར་བདག་གིས་ཀྱང་ཚེ་འདིའི་བྱ་བ་བློས་བཏང་ལ་གཅིག་པུར་དབེན་པའི་གནས་སུ་བསྒྲུབ་དགོས་སྙམ་དུ་བསམ་མོ། །དེས་ན་མ་བསྒོམས་ན་སངས་མི་རྒྱ་བས། ཅིས་ཀྱང་བསྒོམ་དགོས་སྙམ་པ་རྒྱུད་ལ་སྐྱེས་པ་ནི་འབྱོངས་པའི་ཚད་དོ། །དེས་ནི་བསྒོམ་པ་ལ་བསྲན་ཚུགས་པའི་དགོས་པ་ཡོད་དོ། །དེ་གསལ་གདབ་པ་ནི། སངས་རྒྱས་སྐུ་གསུམ་ཡོན་ཏན་ཚད་མེད་ལྡན། །རང་ལ་ཡོད་པ་དེ་ཉིད་བསྒོམས་ན་ཐོབ། །སྐྱེས་བུ་འབྲུམ་ནད་འབྱོངས་བཞིན་མི་ལྡོག་པས། །གཏན་བདེའི་གོ་འཕང་དཀའ་བ་སྤྱད་ལ་བསྒྲུབ། །དྲུག་པ། བླ་མའི་གདམས་ངག་ལ་བསམ་སྟེ་སེམས་སྦྱོང་བ་ནི། འཁོར་བའི་རྒྱ་མཚོ་གཏིང་མཐའ་མེད་པ་ལས་སྒྲོལ་བའི་དེད་དཔོན་ནི་བླ་མ་ཡིན་ལ། སྒྲོལ་བའི་ཐབས་ཀྱི་གྲུ་བོ་ཆེ་ནི་བླ་མའི་གདམས་ངག་ཡིན་པས། ཇི་སྐད་གསུངས་པ་བཞིན་དུ་ཉམས་སུ་བླང་དགོས་ཏེ། མ་བླང་ན་སྡུག་བསྔལ་གྱི་ནད་ཀྱིས་གཏན་དུ་གདུང་བའི་ཕྱིར་ན་བླ་མ་སྨན་པའི་རྒྱལ་པོ་ནི་བརྩེ་བ་ཆེན་པོ་སྟེ། གདམས་ངག་སྨན་གྱི་བདུད་རྩིས་ཉིན་མཚན་བསྲན་ཚུགས་པར་བྱས་ལ། ཉམས་སུ་བླང་དགོས་སྙམ་ནས་རྒྱུ་མཚན་དུ་མ་ལ་བསམ་ཏེ་བསྒོམ་པས། ཚེ་འདིའི་བྱ་བས་ཅི་བྱ། བླ་མའི་གདམས་ངག་ཁོ་ན་ཉམས་སུ་བླང་དགོས་སྙམ་པ་ནི་འབྱོངས་པའི་ཚད་དོ། །དེས་ནི་བྱ་བ་གཞན་ལ་བློ་མི་འཇུག་པར་གདམས་ངག་ལ་རྩེ་གཅིག་ཏུ་འཇུག་པའི་དགོས་པ་ཡོད་དོ། །དེ་གསལ་གདབ་པ་ནི།

ཤོག་ལྷེ་༡༤༠བླ་མ་སྨན་པ་གདམས་ངག་བདུད་རྩིའི་བཅུད། །འཁོར་བའི་རྒྱ་མཚོ་སྒྲོལ་བའི་གྲུ་བོ་ཆེ། །ཐར་པའི་ཁང་བཟང་བགྲོད་པའི་ཐེམ་སྐས་མཆོག །ཉིན་མཚན་བསྲན་བཙུགས་དེ་དོན་ཉམས་སུ་བླང་། །བདུན་པ་རྣམ་པར་མི་རྟོག་པ་ལ་བརྟེན་ནས་སེམས་སྦྱོང་བ་ནི། དེ་ཡང་། རྣམ་རྟོག་མ་རིག་ཆེན་པོ་སྟེ། །འཁོར་བའི་རྒྱ་མཚོར་ལྟུང་བྱེད་ཡིན། །ཅེས་གསུངས་པས་སྔོན་ཆད་མ་རིག་པའི་རྣམ་པར་རྟོག་པས་ཁམས་གསུམ་འཁོར་བའི་གནས་སུ་ཡང་ནས་ཡང་དུ་འཁོར་ཞིང་འཁྱམས་པས་སྡུག་བསྔལ་བར་གྱུར་ལ། ད་ནི་བླ་ན་མེད་པའི་བྱང་ཆུབ་ཐོབ་པ་ཞིག་བྱ་སྙམ་པའི་སྒོ་ནས་སྦྱོང་བ་སྟེ། དེ་ལའང་གསུམ། བདེ་སྟོང་། གསལ་སྟོང་། ཆོས་ཉིད་རྣམ་པར་མི་རྟོག་པ་ལ་བརྟེན་ནས་སྦྱོང་བའོ། །དང་པོ་ནི་ལུས་གནད་ཆོས་བདུན་བཅས་ལ་རང་ལུས་སྟོང་ཆེན་སྒྲིབ་ཐོགས་དང་བྲལ་བའི་དབུས་སུ་རྩ་དབུ་མ་མདའ་སྨྱུག་འབྲིང་པོ་ཙམ་ཕྱི་དཀར་ལ་ནང་དམར་བ། དྭངས་གསལ་སྦུགས་སྟོང་གི་ཡར་སྣ་ཚངས་བུག་དང་། མར་སྣ་ལྟེ་འོག་སོར་བཞིའི་ཐད་དུ་དྲང་ཐ་ལེར་གནས་པར་བསམ། དེ་ལྟར་གསལ་བའི་ཡར་སྣར་ཐབས་ཀྱི་རང་བཞིན་ཧཾ་ཡིག་དཀར་པོ་མགོ་བོ་ཐུར་ལྟ་བདེ་བའི་རང་བཞིན་འཛག་ལ་ཁད་པ། མར་སྣ་ཤེས་རབ་ཀྱི་རང་བཞིན་ཨ་ཡིག་དམར་པོ་མགོ་བོ་གྱེན་བསྟན་འབར་ལ་ཁདཁོད་པ་ཞིག་གསལ་བཏབ། དེ་ལྟར་གསལ་བར་གྱུར་པ་དང་རླུང་རོ་གསུམ་ཕྲུགས་སུ་བསལ། དེ་ནས་སྟེང་རླུང་ནར་གྱིས་རྔུབས་རྗེས་འོག་རླུང་བསྐུམས་པས་ཨ་ལས་གཏུམ་མོའ་མེ་ཆོས་བཞི་ལྡན་གྱེན་དུ་འབར་བ་དབུ་མའི་ཁོང་སེང་དུ་དམར་ཁྱུག་གི་སོང་། སྤྱི་བོའ་ཧཾ་ལ་རེག་པས་བྱང་སེམས་བདེ་བའི་རྒྱུན་སྐྱ་ཤར་གྱིས་བབས་པས་སྡོང་རྩ་མར་ཁུས་བརླན་པ་ལྟར་ལྟེ་བའི་ཨ་ཡིག་ལས་མེ་ཆེན་འབར།

ཤོག་ལྷེ་༡༤༡ཟླ་བ་བདུད་རྩིར་ཞུ་བའི་དྭངས་མས་དབུ་མ་དང་། ལུས་ནང་འཁོར་ལོ་བཞི་སོགས་གང་བས་བདེ་དྲོད་ཀྱི་ཡེ་ཤེས་སྐྱེས་པར་བསམ་ཞིང་། ཨ་ཧཾ་ལ་ཤེས་པ་མི་གཏོད་པར་སྙིང་གར་ཨ་ཡིག་དཀར་པོ་གསལ་ཞིང་འཚེར་བ་ཞིག་ལ་སེམས་བཟུང་སྟེ་བུམ་ཅན་ཁ་སྦྱོར་དུ་འཆིང་། མི་ཐུབ་ན་རྔུབ་ཆུང་བྱས་ལ་གཞིལ་བ་བྱ། དེ་ནས་ཕྲ་ལ་རིང་བའི་ཤུགས་ཀྱིས་ཕྱིར་འཕང་ངོ་། །དེ་ལྟར་བུམ་ཅན་ཆེ་འབྲིང་ཆུང་གསུམ་གང་རུང་མ་གྲུབ་ཀྱི་བར་དུ་འབད་ཅིང་། མ་གོམས་པར་རླུང་ཧ་ཅང་གི་དྲགས་པ་མ་ཡིན་པར་འཇམ་ཞིང་རན་པར་བཟུང་བར་བྱ། དེ་ལྟར་གོམས་པས་བདེ་བས་ཐབས་བྱས་པའི་ཤེས་རབ་སྟོང་ཉིད་ཀྱི་ཡེ་ཤེས་སྐྱེ་བར་འགྱུར་རོ། །གཉིས་པ་ནི། སྣ་བུག་གཉིས་ནས་རླུང་ཕྲ་ལ་རིང་བ་ཕྱིར་སང་གིས་བསལ་ལ། ཚོགས་དྲུག་གི་ཡུལ་སྣང་ཐམས་ཅད་ནམ་མཁའི་རང་བཞིན་དུ་སྔོ་མེར་གྱིས་ཞུ་བར་བསམས་པ་ལ་སེམས་གཏད་དེ་རླུང་ཕྱིར་མནན། དེ་ནས་རླུང་ནར་གྱིས་རྔུབ་པས་སྣང་ཡུལ་ནམ་མཁའི་རང་བཞིན་དུ་གྱུར་པ་དེ་ཉིད་སྣ་བུག་ནས་ཞུགས། །ལྟེ་བར་སྔོ་མེར་གྱིས་གནས་པར་བསམས་ལ་བུམ་ཅན་ཁ་སྦྱོར་དུ་འཆིང་། དེ་ཡང་ལུས་ཚ་བ་ཤས་ཆེ་ན་རླུང་བསིལ་བའི་རང་བཞིན་དང་། གྲང་བ་ཤས་ཆེ་ན་རེག་བྱ་ཚ་བའི་རང་བཞིན་ཅན་དུ་བསྒོམ། དེ་ལྟ་བུའི་བུམ་ཅན་སྦྱོར་བ་བཞི་ལྡན་ལ་འབད་རྩོལ་ཆེན་པོས་བསྒོམས་པས་རླུང་ཡུན་རིང་བཀག་ཀྱང་ངལ་བ་མ་བྱུང་ན་གོམས་པའི་རྟགས་སུ་གསུངས་ཤིང་། དེས་ནི་གསལ་བས་ཐབས་བྱས་པའི་སྟོང་ཉིད་རྣམ་པར་མི་རྟོག་པ་རྒྱུད་ལ་སྐྱེའོ། །གསུམ་པ་ནི། ལུས་གནད་སྔར་ལྟར་ལས། ངག་གནད་རླུང་རང་བབས་ལ་བཞག །སེམས་གནད་དུས་གསུམ་གྱི་རྣམ་པར་རྟོག་པ་གང་ཡང་མི་

ཤོག་ལྷེ་༡༤༢མནོ་མི་སེམས་བཅས་བཅོས་མི་བྱ་བར་རང་བབས་བཟོ་མེད་དུ་འབོལ་ལེ་ཡེངས་མེད་དུ་ཧྲིག་གེར་འཇོག་གོ །དེ་ལྟར་བཞག་པས་སེམས་གར་གཏད་ལ་ཟིན་ཅིང་། རྟོག་མེད་རང་གསལ་ནམ་མཁའ་ལྟ་བུའི་ངང་དུ་གནས་པ་ན་གོམས་པའི་ཚད་དོ། །དེས་ནི་བྱང་ཆུབ་ཀྱི་སེམས་གོང་འཕེལ་དུ་འགྱུར་བའི་དགོས་པ་ཁྱད་པར་ཅན་ཡོད་དོ། །དེ་གསལ་གདབ་པ་ནི། བདེ་གསལ་རྣམ་པར་མི་རྟོག་མཁའ་ལྟ་བུ། །བསམ་གཏན་དམ་པའི་བདེ་བས་རྒྱུད་དུལ་བ། །ཞིང་ས་གཤིམ་པོར་ལོ་ཏོག་ལེགས་པ་བཞིན། །ཏིང་འཛིན་ཀུན་གྱི་གཞི་རྟེན་བསྒྲུབ་པར་བྱ། །ཞེས་འདོན་བསྒོམ་དུ་བྱའོ། །འདིར་རིག་འཛིན་ཆེན་པོའ་ཁྲིད་རྒྱུན་ཏུ། མི་རྟག་པ་ལ་སེམས་སྦྱངས་མཚམས་སྐྱབས་འགྲོ། སེམས་སྦྱོང་གཉིས་པའི་རྗེས་སུ་སེམས་བསྐྱེད། གསུམ་པ་བཞི་པ་གཉིས་ཀྱི་རྗེས་སུ་མཎྜལ། ལྔ་པའི་རྗེས་སུ་རྡོར་སེམས་སྒོམ་བཟླས། དྲུག་པའི་རྗེས་སུ་བླ་མའི་རྣལ་འབྱོར། དེ་ནས་སེམས་སྦྱོང་བདུན་པའི་རྗེས་སུ་རླུང་ཐིག་བསླབ་པ་ལ་འཇུག་པར་མཛད་དོ། །གསུམ་པ་ཐུན་མོང་སྔོན་འགྲོ་བཞི་སྦྱོར་གྱིས་རྒྱུད་དག་པར་བྱེད་པ་ནི། ཟངས་ཡིག་ཅན་དང་ཀུན་མཁྱེན་ཆེན་པོའ་དོན་ཁྲིད་དུ་གསལ་ཁ་མ་གསུངས་ཀྱང་། ཡི་གེ་དམར་རུའི་རྒྱབ་ཡིག་ལས། དབེན་པའི་གནས་སུ་བསོད་ནམས་ཀྱི་ཚོགས་སྔོན་དུ་འགྲོ་བས། ཞེས་གཞུང་གི་ཤུགས་བསྟན་ཙམ་གྱིས་གསུངས་ཤིང་། གཏེར་ཆེན་ཡབ་སྲས་སོགས་བརྒྱུད་པའི་བླ་མ་རྣམས་ཀྱིས་ཕྱག་བཞེས་པར་མ་ཆད་པ་སྟེ། དེ་ལ་ལྔ། ལམ་དམན་པ་ལས་ཁྱད་པར་དུ་གྱུར་པ་སྐྱབས་འགྲོའི་ཁྲིད། སྡིག་སྒྲིབ་སྦྱོང་བའི་སྙིང་པོ་རྡོ་རྗེ་སེམས་དཔའི་བསྒོམ་བཟླས་ཀྱི་ཁྲིད། ཚོགས་གཉིས་རྫོགས་པར་

ཤོག་ལྷེ་༡༤༣བྱེད་པ་མཎྜལ་གྱི་ཁྲིད། བྱིན་རླབས་མྱུར་ཏུ་འཇུག་པ་བླ་མའི་རྣལ་འབྱོར་གྱི་ཁྲིད་དོ། །དང་པོ་སྐྱབས་འགྲོ་ལ་གཉིས་ཀུན་རྫོབ་དང་དོན་དམ་མོ། །དང་པོ་ནི། དེ་ཡང་རང་ཅག་རྣམས་མི་དགེ་བཅུ་སྤོང་གི་ཚུལ་ཁྲིམས་སོགས་དགེ་བའི་ལས་ཀྱིས་རེ་ཞིག་བདེ་འགྲོའི་གནས་སུ་སྐྱེས་ཀྱང་སྡུག་བསྔལ་སྤངས་པའི་ཐར་བ་བླ་ན་མེད་པའི་བྱང་ཆུབ་མ་ཐོབ་ན་སྔར་གྱི་དགེ་བའི་འཕེན་པ་ཟད་ནས་སླར་ཡང་ངན་སོང་དུ་ལྷུང་སྟེ། ཡུན་རིང་ལ་དོས་དྲག་པའི་སྡུག་བསྔལ་མི་བཟོད་པ་སྣ་ཚོགས་མྱོང་དགོས་པ་འདུག །དེ་ལས་སྐྱོབ་ནུས་པ་ནི་དཀོན་མཆོག་རིན་པོ་ཆེ་རྣམ་པ་གསུམ་མ་གཏོགས་གཞན་སུ་ཡང་མེད། དེ་ཡང་རང་ལ་དངོས་སུ་སྣང་བའི་སངས་རྒྱས་ནི་བླ་མ་དམ་པ་སྟེ། དུས་གསུམ་སངས་རྒྱས་ཐམས་ཅད་ཀྱི་སྐུ་གསུང་ཐུགས་དང་དབྱེར་མེད་པའི་ཕྱིར། སྐྱབས་གནས་དཀོན་མཆོག་རིན་པོ་ཆེ་རྣམ་པ་གསུམ་ལ་སྐྱབས་དང་རམ་ཟླ་ཞུ་སྙམ་དུ་ལུས་སེམས་རྣལ་དུ་ཕབ། རང་གར་གནས་ཀྱི་ས་ཕྱོགས་དེ་ཉིད་རིན་པོ་ཆེ་སྣ་ཚོགས་ལས་གྲུབ་པའི་ཞིང་ཁམས་མཛེས་ཤིང་ཡིད་དུ་འོང་བའི་དབུས་སུ་དཔག་བསམ་གྱི་སྡོང་པོ་ཡལ་ག་ལོ་འདབ་རབ་ཏུ་རྒྱས་པས་ནམ་མཁའི་ཁམས་ཀུན་ཡོངས་སུ་ཁྱབ་པའི་དབུས་ཀྱི་ཡལ་གའི་སྙིང་པོར་སེང་གེས་བཏེགས་པའི་རིན་པོ་ཆེའི་ཁྲི་སྣ་ཚོགས་པདྨ་དང་ཉི་ཟླའི་གདན་མཐོ་ཞིང་ཡངས་པའི་སྟེང་དུ། ངོ་བོ་དྲིན་ཅན་རྩ་བའི་བླ་མ་ཉིད་རྣམ་པ་དཔལ་ཀུན་ཏུ་བཟང་པོ་ལོངས་སྤྱོད་རྫོགས་པའི་ཆ་ལུགས་ཅན། སྐུ་མདོག་མཐིང་ག་གསལ་ཞིང་འཚེར་བའི་འོད་ཟེར་འཕྲོ་བ། དར་དང་རིན་པོ་ཆེའི་རྒྱན་ཕུན་སུམ་ཚོགས་པས་མཛེས་པར་སྤྲས་པ། ཕྱག་གཉིས་མཉམ་གཞག་གི་ཕྱག་རྒྱ་ཅན། ཞབས་རྡོ་རྗེ་སྐྱིལ་ཀྲུང་གིས་བཞུགས་པ། མཚན་དཔེའི་ལང་ཚོ་རབ་ཏུ་རྫོགས་པའི་སྐུ་ཅན་དུ་གསལ་བའི་མཐའ་བསྐོར་དུ་བརྒྱུད་པའི་བླ་མ་རྣམས་ཀྱིས་བསྐོར་བ། ཕྱོགས་བཞིར་གྱེས་པའི་ཡལ་ག་རྣམས་ལ་གདན་གྱི་བཀོད་པ་མཐོ་ཞིང་ཡངས་པ་རེ་རེ་གསལ་བར་གྱུར་པའི་མདུན་ལ་ཁྱད་པར་གྱི་སངས་རྒྱས་དཔལ་རྡོ་རྗེ་སེམས་དཔའ་ལ་ཡི་དམ་རྒྱུད་སྡེ་

ཤོག་ལྷེ་༡༤༤དྲུག་གི་ལྷ་ཚོགས་ཀྱིས་བསྐོར་བ། གཡས་ཀྱི་གདན་ལ་ཐུན་མོང་གི་སངས་རྒྱས་སྟོན་པ་ཐུབ་པའི་དབང་པོ་ལ་ཕྱོགས་བཅུ་དུས་གསུམ་གྱི་སངས་རྒྱས་མཆོག་གི་སྤྲུལ་སྐུ་རྣམས་ཀྱིས་བསྐོར་བ། རྒྱབ་ཀྱི་གདན་ལ་ལུང་རྟོགས་ཀྱི་དམ་ཆོས་དཀོན་མཆོག་རྣམས་གླེགས་བམ་བརྩེགས་པའི་ཚུལ་དུ་བཞུགས་པ། གཡོན་གྱི་གདན་ལ་སྤྱན་རས་གཟིགས་དང་འཇམ་དཔལ་ཕྱག་རྡོར་སོགས་བྱང་ཆུབ་སེམས་དཔའི་དགེ་འདུན་དང་། འཕགས་པ་ཤཱ་རིའི་བུ་དང་མཽ་དགལ་གྱི་བུ་སོགས་ཉན་ཐོས་ཀྱི་དགེ་འདུན་དཀོན་མཆོག་རྣམས་བཞུགས་པ། དེ་དག་གི་བར་མཚམས་རྣམས་སུ་ཁྱད་པར་གྱི་དགེ་འདུན་མཁའ་འགྲོ་ཆོས་སྐྱོང་སྲུང་མ་ཡེ་ཤེས་ཀྱི་སྤྱན་དང་ལྡན་པ་རྣམས་སྤྲིན་ཕུང་གཏིབས་པ་བཞིན་དུ་བཞུགས་པར་བསམ། དེའི་མདུན་དུ་རང་དང་སེམས་ཅན་ཐམས་ཅད་ས་ཆེན་པོའ་དྲེགས་པ་བཞིན་འཁོད་ཅིང་། ཐམས་ཅད་ཀྱང་ལུས་ངག་ཡིད་གསུམ་གུས་པ་ཆེན་པོ་དང་ལྡན་པས་སྐྱབས་འགྲོ་ལྷན་ཅིག་ཏུ་བྱེད་པར་མོས་ལ། བདག་དང་མཁའ་མཉམ་གྱི་སེམས་ཅན་ཐམས་ཅད་འཁོར་བ་སྡུག་བསྔལ་གྱི་རྒྱ་མཚོ་ཆེན་པོ་ལས་ད་ལྟ་ཉིད་དུ་དྲང་ཞིང་བསྐྱབ་ཏུ་གསོལ་སྙམ་པའི་ཡིད་གཞན་དུ་མ་ཡེངས་པས། ནམ་མཁའི་གནས་སུ་ནམ་མཁའ་གང་བ་ཡི། །བླ་མ་ཡི་དམ་མཁའ་འགྲོའི་ཚོགས་རྣམས་དང་། །སངས་རྒྱས་ཆོས་དང་འཕགས་པའི་དགེ་འདུན་ལ། །བདག་སོགས་འགྲོ་དྲུག་གུས་པས་སྐྱབས་སུ་མཆི། །ཞེས་བརྒྱ་སྟོང་སོགས་ཅི་ནུས་སུ་འདོན་ཅིང་། ཐུན་བསྡུ་བའི་ཚེ། སྐྱབས་ཡུལ་རྣམས་ཀྱི་སྐུ་ལས་འོད་ཟེར་འཕྲོས་རང་དང་སེམས་ཅན་ཐམས་ཅད་ལ་ཕོག་པས་སྡིག་སྒྲིབ་སྦྱངས་དག་པའི་ཞིང་དུ་འུར་གྱི་སོང་། བརྒྱུད་པའི་བླ་མ་དཀོན་མཆོག་གསུམ་སོགས་འཁོར་གྱི་ཚུལ་དུ་བཞུགས་པ་རྣམས་རྩ་བའི་བླ་མའི་སྐུ་ལ་བསྡུས། རྩ་

ཤོག་ལྷེ་༡༤༥བའི་བླ་མ་ཡང་འོད་དུ་ཞུ་བ་རང་གི་སྤྱི་བོ་ནས་སྙིང་གར་སིབ་ཀྱི་ཐིམ་པར་བསམ་ལ་སྐྱབས་སུ་འགྲོ་བྱ་འགྲོ་བྱེད་མི་དམིགས་པའི་ངང་དུ་ཅི་ནུས་མཉམ་པར་བཞག །ནུབ་མོ་ཉལ་བའི་ཚེ་ཚོགས་ཞིང་མ་བསྡུས་པར་དེ་ལ་སྔས་ཕྱོགས་པས་མོས་གུས་དུང་ངེ་བའི་ངང་ལ་གཉིད་དུ་འགྲོ་བར་བྱ་ཞིང་། ཐུན་མཚམས་རྣམས་སུའང་ཚོགས་ཞིང་གསལ་བཏབ་ལ་ཕྱག་མཆོད་སོགས་ལ་འབད་པ་གལ་ཆེའོ། །འདིར་རིག་འཛིན་ཆེན་པོའ་ཁྲིད་རྒྱུན་ཏུ། རང་གི་མདུན་གྱི་ནམ་མཁའི་དབུས་སུ་རྩ་བའི་བླ་མ་དེ་ཉིད་སྐུ་དངོས་ཀྱི་རྣམ་པ་ཕྱོགས་མཚམས་རྣམས་སུ་སྐྱབས་ཡུལ་རྣམས་སྤྲིན་ཕུང་འཁྲིགས་པའམ། མེ་ཏོག་གི་ཚོམ་བུ་བཀྲམ་པའམ་ནམ་མཁའི་སྐར་མ་བཞིན་དུ་གོ་མཚམས་མེད་པར་ཁྱབ་པའི་ཚུལ་དུ་སྒོམ་ཞིང་སྐྱབས་ཡུལ་མཆོག་དམན་ལ་ལྟོས་པའི་སྟེང་འོག་མཐོ་དམན་དང་མཐའ་དབུས་ཀྱི་རྣམ་པ་ཙམ་མ་གཏོགས་ལྔ་ཚོམ་ལྟ་བུའི་ཀ་དཔེ་མ་མི་དགོས་གསུངས། མཐར་སྐྱབས་ཡུལ་གཤེགས་བསྡུའི་སྤྲོས་པ་མེད་པ་དམིགས་མེད་དུ་འཇོག་པའི་ལུགས་སོ། །སྐྱབས་འགྲོའི་གོ་དོན་རྣམ་གཞག་ཕན་ཡོན་སོགས་སྤྲོ་ན་སྤྱི་ལྟར་འཆད་པར་བྱའོ། །གཉིས་པ་ནི། རང་གི་ལུས་ཀྱི་འཁོར་ལོ་བཞིའི་རྩ་འདབ་དགེ་འདུན། ཐིག་ལེ་ཆོས། རླུང་ལྔའི་དྭངས་མ་ཡེ་ཤེས་ལྔ་ནི། ཉོན་མོངས་པ་ཡེ་ནས་དག་པའི་སངས་རྒྱས་སྐུ་གསུམ་གྱི་བདག་ཉིད་དུ་རང་ངོ་ཤེས་ནས་བསྒོམ་སྙམ་དུ། རླུང་ལྔ་རྣམ་དག་དྭངས་མའི་སྐུ། །ཉོན་མོངས་རྣམ་དག་ཡེ་ཤེས་ལྔ། །སྐུ་གསུམ་མཛད་པ་མཐར་ཕྱིན་པའི། །དཀོན་མཆོག་གསུམ་ལ་རྟོགས་པས་འདུད། །ཅེས་ལན་ཅི་རིགས་བརྗོད་ལ་འོད་གསལ་གྱི་རང་ངོར་མཉམ་པར་གཞག་གོ །གཉིས་པ་སེམས་བསྐྱེད་པ་ལའང་གཉིས་ཀུན་རྫོབ་དང་། དོན་དམ་མོ། །

ཤོག་ལྷེ་༡༤༦དང་པོ་ནི། དོན་དམ་པར་གཟོད་མ་ནས་རྣམ་པར་དག་ཀྱང་། ཀུན་རྫོབ་འཁྲུལ་པའི་དབང་གིས་སྡུག་བསྔལ་གྱི་རྒྱུ་འབྲས་བསམ་གྱིས་མི་ཁྱབ་པ་ལ་རྟག་པར་ལོངས་སྤྱོད་པའི་མ་རྒན་སེམས་ཅན་ཐམས་ཅད་གདོད་མའི་མགོན་པོའ་གོ་འཕང་ལ་འགོད་པ་དང་། རང་གི་རིག་པ་མངོན་སུམ་གྱི་ཡེ་ཤེས་ལམ་སྣང་བ་རྣམ་པ་བཞི་ཉམས་སུ་བླང་སྙམ་པའི་སེམས་སྔ་ན་མེད་པ་བསྐྱེད་ལ། ཨེ་མ་ཧོ། །མ་རིག་འཇིག་རྟེན་མུན་པའི་ཀློང་། །རང་གི་ཐབས་ཤེས་སྒྲོན་མེ་ཡིས། །རང་ལ་གནས་པའི་ཡེ་ཤེས་དེ། །བླ་མའི་དྲིན་གྱིས་རྟོགས་པར་བྱའོ། །ཞེས་ལན་གྲངས་ཅི་ནུས་བརྗོད་ལ་སྨོན་པ་སེམས་བསྐྱེད། དབྱིངས་ཀ་དག་ཆོས་སྐུ་སྐྱེ་མེད་ནམ་མཁའ་ལྟ་བུ་དང་། ཡེ་ཤེས་ལྷུན་གྲུབ་རང་རིག་སྐུ་གསུམ་གྱི་ངོ་བོ་སྤྲོས་པའི་མཐའ་བཞི་ལས་འདས་པ་ཚིག་དང་ཡི་གེ་མེད་པའི་དོན། སྨྲ་བསམ་བརྗོད་མེད་ཆེན་པོ་ཉིད་རང་ངོ་ཤེས་པར་བྱ་སྙམ་དུ། ཨེ་མ་ཧོ། སངས་རྒྱས་མཐར་ཐུག་དབྱིངས་རིག་གཉིས། །སྐུ་གསུམ་ངོ་བོ་མཐའ་བྲལ་གཞི། །ཚིག་ལས་འདས་པའི་རང་བྱུང་དེ། །ད་ལྟ་ཉིད་དུ་རྟོགས་པར་བྱའོ། །ཞེས་ལན་གྲངས་ཅི་ནུས་སུ་བརྗོད་ལ་འཇུག་པ་སེམས་བསྐྱེད་དོ། །གཉིས་པ་ནི། དོན་དམ་པར་ཆོས་ཐམས་ཅད་གཟོད་མ་ནས་སྤང་བླང་བཅིངས་གྲོལ་མེད་པ་མཉམ་རྫོགས་ཆེན་པོའ་རང་བཞིན་དུ་སངས་རྒྱས་པས་འཁོར་བ་དང་མྱང་འདས། སངས་རྒྱས་དང་སེམས་ཅན། བདག་གཞན་བཟང་ངན་ཐ་དད་དུ་གྲུབ་པ་མེད་པ་ཡིན་པ་ལ་ཡིན་པར་ཤེས་པས་རྒྱུ་འབྲས་རྩོལ་སྒྲུབ་ལས་འདས་པ་ཡེ་གྲོལ་ཆོས་སྐུའི་དགོངས་པ་རང་ཆས་ལྷུན་འབྱམས་ཆེན་པོའ་ངང་དུ་ལ་བཟླ་བར་བྱའོ་སྙམ་པས། བདག་དང་མཐའ་ཡས་སེམས་ཅན་རྣམས། །ཡེ་ནས་སངས་རྒྱས་

ཤོག་ལྷེ་༡༤༧ཡིན་པ་ལ། །ཡིན་པར་ཤེས་པའི་བདག་ཉིད་དུ། །བྱང་ཆུབ་མཆོག་ཏུ་སེམས་བསྐྱེད་དོ། །ཞེས་བརྗོད། གཞན་ཡང་སྤྲོ་ན་ཀུན་རྫོབ་བྱང་སེམས་ཀྱི་ཉམས་ལེན་གཙོ་བོར་དབུགས་འབྱུང་འཇུག་དང་སྦྱར་བའི་བདེ་སྡུག་གཏོང་ལེན་གྱི་དམིགས་པ་དང་། འཁོར་གསུམ་རང་བཞིན་མེད་པ་དོན་དམ་སེམས་བསྐྱེད་ཀྱི་རང་ངོ་ལ་མཉམ་པར་གཞག་གོ །འདིར་སེམས་བསྐྱེད་ཀྱི་ངོ་བོ། །མཚན་ཉིད། བསྐྱེད་ཚུལ། བསླབ་བྱ་སོགས་འཆད་པར་སྤྲོ་ན་སྤྱི་ལྟར་བཤད་དོ། །གསུམ་པ་སྡིག་སྒྲིབ་སྦྱོང་བྱེད་རྡོ་རྗེ་སེམས་དཔའི་སྒོམ་བཟླས་ཀྱི་ཁྲིད་ལ་གཉིས། སྤྱི་དང་། ཁྱད་པར་རོ། །དང་པོ་ནི། རང་གི་སྤྱི་བོར་པད་ཟླའི་སྟེང་དུ་ཨ་ཡིག་དཀར་པོ། དེ་ལས་འོད་ཟེར་འཕྲོ་འདུས་ཡོངས་སུ་གྱུར་པ་ལས་བླ་མ་དང་གཉིས་སུ་མེད་པའི་དཔལ་རྡོ་རྗེ་སེམས་དཔའ་སྐུ་མདོག་དཀར་པོ་ཕྱག་གཡས་གསེར་གྱི་རྡོ་རྗེ་རྩེ་ལྔ་པ་ཐུགས་ཀར་འཛིན་ཅིང་། གཡོན་དངུལ་དཀར་གྱི་དྲིལ་བུ་དཀུར་བརྟེན་པས་ཡུམ་ལ་འཁྱུད་པ། ཞབས་སེམས་སྐྱིལ་གྱིས་བཞུགས་ཤིང་ཡུམ་སྙེམས་མ་དཀར་མོ་གྲི་ཐོད་འཛིན་པ་དང་མཉམ་པར་སྦྱོར་བ། གཉིས་ཀའང་དར་དང་རིན་པོ་ཆེའི་རྒྱན་ཅན་ཡབ་ཀྱི་ཐུགས་ཀར་ཟླ་བའི་དཀྱིལ་འཁོར་གྱི་སྟེང་དུ་ཧཱུཾ་ཡིག་དཀར་པོ། དེའི་མཐའ་བསྐོར་དུ་ཡི་གེ་བརྒྱ་བའི་སྔགས་ཕྲེང་དཀར་པོ་འོད་ཟེར་ཕྲོམ་ཕྲོམ་གཡོ་བ་གཡས་སུ་འཁོར་བ་གསལ་གདབ། དེ་ལྟར་སྤྱི་བོའ་བླ་མ་རྡོ་རྗེ་སེམས་དཔའ་སྐྱབས་གནས་ཀུན་འདུས་སུ་མོས་པ་རྟེན་གྱི་སྟོབས། སྔར་བྱས་ཀྱི་སྡིག་པ་མི་དགེ་བའི་ལས་ཐམས་ཅད་ལ་གནང་འགྱོད་དྲག་པོས་དཔལ་ལྡན་བླ་མ་རྡོ་རྗེ་སེམས་དཔའ་ཁྱེད་མཁྱེན་ནོ། །བདག་དང་སེམས་ཅན་ཐམས་ཅད་ཀྱིས་སྔོན་ཆད་སྡིག་པའི་ལས་བགྱིས་པ་ཐམས་ཅད་མཐོལ་ཞིང་

ཤོག་ལྷེ་༡༤༨བཤགས་སོ། །བྱང་ཞིང་དག་པར་མཛད་དུ་གསོལ་སྙམ་པ་སུན་འབྱིན་པའི་སྟོབས། ད་ཕྱིན་ཆད་འཆི་བ་སྲོག་ལ་བབས་ཀྱང་སྡིག་པའི་ལས་དངོས་སུ་ལྟ་ཅི། རྨི་ལམ་དུའང་མི་བགྱིད་སྙམ་པ་ཉེས་པ་ལས་སོར་ཆུད་པའི་སྟོབས། སྔར་བྱས་ཀྱི་གཉེན་པོར་རྡོ་རྗེ་སེམས་དཔའི་སྒོམ་བཟླས་ལ་སྤྱོད་པ་གཉེན་པོ་ཀུན་ཏུ་སྤྱོད་པའི་སྟོབས་ཏེ། དེ་ལྟར་སྟོབས་བཞི་དྲན་བཞིན་པས་ཡིག་བརྒྱ་གསོལ་འདེབས་ཀྱི་ཚུལ་དུ་བརྒྱ་སྟོང་སོགས་ཅི་ནུས་བཟླས་པས། སྔགས་ཕྲེང་རྣམས་ལས་བདུད་རྩིའི་རྒྱུན་སྐྱ་ཆིལ་གྱི་བབས་པས་ཡབ་ཡུམ་གཉིས་ཀྱི་སྦྱོར་མཚམས་ནས་ཐོན་རང་གི་ཚངས་བུག་ཏུ་ཞུགས། ནད་གདོན་སྡིག་སྒྲིབ་ཐམས་ཅད་དུད་ཁུ་དང་རྣག་ཁྲག་ལྗན་ལྗིན་དང་སྲོག་ཆགས་ཕྲ་མོ་ལ་སོགས་པའི་རྣམ་པར་བ་སྤུའི་ཁུང་བུ་དང་། གཤང་ལམ་དང་ཆུ་ལམ་སོགས་ནས་ཕུ་ཆུ་དྲག་པོས་ཐལ་བ་དེད་པ་ལྟར་ཐོན་པར་བསམ་ལ་དེ་ཉིད་གསལ་གདབ་པའི་ཕྱིར། རང་ལུས་ཐ་མལ་སྤྱི་གཙུག་ཏུ༔ པད་དཀར་ཟླ་བའི་དཀྱིལ་འཁོར་སྟེང་༔ ཨ་ལས་རྡོ་རྗེ་སེམས་དཔའ་དཀར༔ རྡོར་དྲིལ་འཛིན་པས་ཡུམ་ལ་འཁྱུད༔ རིན་ཆེན་རྒྱན་སྤྲས་སེམས་སྐྱིལ་བཞུགས༔ ཐུགས་ཀར་ཟླ་སྟེང་ཧཱུཾ་གི་མཐར༔ སྙིང་པོ་ཡི་གེ་བརྒྱ་པས་བསྐོར༔ སྐུ་དང་སྔགས་ལས་བདུད་རྩིའི་རྒྱུན༔ དཀར་ནར་བབས་ཏེ་སྤྱི་བོར་ཞུགས༔ བདག་གི་ལུས་ཀུན་གང་བ་ཡིས༔ སྡིག་སྒྲིབ་དག་ནས་ཤེལ་གོང་ལྟར༔ དྲི་མ་མེད་པའི་ལུས་སུ་གྱུར༔ ཅེས་ངག་ཏུ་བརྗོད་ཅིང་དམིགས་པ་རྩེ་གཅིག་ཏུ་གཅུན་ལ་ཡིག་བརྒྱ་བཟླ། མཐར་ལུས་ཤེལ་གོང་དྲི་མ་མེད་པ་ལྟར་གྱུར་པའི་ནང་བདུད་རྩིའི་རྒྱུན་གྱིས་མེར་ཁྲིག་གིས་གང་བར་གྱུར་པས་སྐུ་གསུང་ཐུགས་ཡོན་ཏན་ཕྲིན་ལས་ཀྱི་དངོས་གྲུབ་ཐོབ་པར་བསམ་ཞིང་། མཐར་མོས་གུས་གདུང་ཤུགས་དྲག་པོས། མགོན་པོ་བདག་ནི་མི་ཤེས་རྨོངས་པ་ཡིས༔

ཤོག་ལྷེ་༡༤༩དམ་ཚིག་ལས་ནི་འགལ་ཞིང་ཉམས༔ བླ་མ་མགོན་པོས་བསྐྱབ་མཛོད་ཅིག །གཙོ་བོ་རྡོ་རྗེ་འཛིན་པ་སྟེ༔ ཐུགས་རྗེ་ཆེན་པོའ་བདག་ཉིད་ཅན༔ འགྲོ་བའི་གཙོ་ལ་བདག་སྐྱབས་མཆི། །སྐུ་གསུང་ཐུགས་རྩ་བ་དང་ཡན་ལག་གི་དམ་ཚིག་ཉམས་ཆགས་ཐམས་ཅད་མཐོལ་ཞིང་བཤགས་སོ། །སྡིག་སྒྲིབ་ཉེས་ལྟུང་དྲི་མའི་ཚོགས་ཐམས་ཅད་བྱང་ཞིང་དག་པར་མཛད་དུ་གསོལ། ཞེས་གསོལ་བ་བཏབ་པས། རྡོ་རྗེ་སེམས་དཔའི་ཞལ་ནས། རིགས་ཀྱི་བུ་ཁྱོད་ཀྱི་སྡིག་སྒྲིབ་ཐམས་ཅད་ནས་དུས་ད་ལྟ་ནས་དག་གོ་ཞེས་གནང་བ་སྩལ་ཏེ་འོད་དུ་ཞུ་ནས་རང་ལ་ཐིམ་པས་རང་སེམས་དང་དབྱེར་མེད་བཤགས་བྱ་བཤགས་བྱེད་མི་དམིགས་པའི་ངང་ལ་ཡུན་ཇི་སྲིད་གནས་ཀྱི་བར་མཉམ་པར་བཞག །ཚུལ་དེ་ལྟ་བུའི་སྡིག་སྒྲིབ་དག་པའི་རྟགས་མ་མཐོང་གི་བར་དུ་འབད་པར་བྱ་ཞིང་། སྤྲོ་ན་ཉེས་ལྟུང་དང་གཉེན་པོའ་རྣམ་བཞག །བསྒོམ་བཟླས་ཀྱི་ཕན་ཡོན་སྤྱི་ལྟར་འཆད་དོ། །གཉིས་པ་ནི། སྐད་ཅིག་གིས་པད་ཟླའི་དབུས་སུ་རང་ཉིད་རྡོ་རྗེ་སེམས་དཔའ་དཀར་པོ་ཞལ་གཅིག་ཕྱག་གཉིས་པ། གཡས་རྡོ་རྗེ་ཐུགས་ཀར་འཛིན་ཅིང་། གཡོན་དྲིལ་བུ་དཀུར་བརྟེན་པ། ཞབས་རྡོ་རྗེའི་སྐྱིལ་ཀྲུང་ཅན། དར་དང་རིན་པོ་ཆེས་བརྒྱན་པའི་སྙིང་ནང་ཟླ་བའི་དབུས་སུ་རྡོ་རྗེ་དཀར་པོ་ཚོན་གང་བ་ལྟེ་བར་ཧཱུཾ་གིས་མཚན་པའི་མཐའ་བསྐོར་དུ་ཡི་གེ་བརྒྱ་པ་དཀར་སེར་མར་མེ་ལྟ་བུའི་འོད་ཀྱིས་བདག་དང་སེམས་ཅན་ཐམས་ཅད་ཀྱི་སྒྲིབ་པ་སྦྱངས་ཏེ། སྣང་བ་ཐམས་ཅད་རྡོ་རྗེ་སེམས་དཔའི་སྐུ། སྒྲ་སྐད་ཐམས་ཅད་ཡི་གེ་བརྒྱ་པར་བསམས་ལ། ༀ་བཛྲ་སྟྭ་ས་མ་ཡ། །མ་ནུ་པཱ་ལ་ཡ། བཛྲ་སྟྭ་ཏྭེ་ནོ་པ་ཏིཥྛ། དྲྀ་ཌྷོ་མེ་བྷ་ཝ། སུ་ཏོཥྱོ་མེ་བྷ་ཝ། སུ་པོཥྱོ་མེ་བྷ་ཝ། ཨ་ནུ་ོ་མེ་བྷ་ཝ། སརྦ་སིདྡྷིམྨེ་པྲ་ཡཙྪ།

ཤོག་ལྷེ་༡༥༠སརྦ་ཀརྨ་སུ་ཙ་མེ་ཙིཏྟཾ་ཤྲེ་ཡཿ ཀུ་རུ་ཧཱཾཨུ། ཧ་ཧ་ཧ་ཧ་ཧོཿ བྷ་ག་ཝཱན། སརྦ་ཏ་ཐཱ་ག་ཏ་ཧྲྀ་ད་ཡ། བཛྲ་མཱ་མེ་མུཉྩ། བཛྲི་བྷ་ཝ། མ་ཧཱ་ས་མ་ཡ་སྟྭ་ཨཱཿ ཞེས་ཅི་འགྲུབ་བཟླས་པའི་རྗེས་ལ་སྣང་བ་ཐམས་ཅད་ཐུགས་ཀའི་ཧཱུཾ་ལ་བསྡུ། ཧཱུཾ་མི་དམིགས་པའི་ངང་ལ་བཞག་སྟེ། བསྔོ་བ་བྱས་པས་བསྐལ་པ་འབུམ་ཕྲག་དུ་མར་བསགས་པའི་སྡིག་སྒྲིབ་དག་ཅིང་ཉམས་ཆགས་ཐམས་ཅད་བསྐངས་ནས་སེམས་ཉིད་ཀྱི་དོན་རྟོགས་པའི་དགོས་པ་ཡོད་དོ། །འདི་ནི་ཡང་ཏིག་ཡིད་བཞིན་ནོར་བུའི་རྩ་བའི་ཆོས་སྡེ་སྙན་བརྒྱུད་ཡེ་ཤེས་རང་སྣང་ལས་སྒྲིབ་པ་སྦྱོང་བ་རྡོ་རྗེ་སེམས་དཔའི་རྣལ་འབྱོར་གྱིས་བློ་སྦྱོང་ཞེས་དངོས་སུ་བསྟན་པ་ལུགས་འདིའི་ཐུན་མོང་མ་ཡིན་པ་ཉིད་དོ། །འདིར་རིག་འཛིན་ཆེན་པོའ་ཁྲིད་རྒྱུན་ཏུ། ཕྱི་བྱ་རྒྱུད་ལྟར་བླ་མ་རྡོ་རྗེ་སེམས་དཔའ་སྤྱི་བོར་བསྒོམ་པ། ནང་སྤྱོད་རྒྱུད་ལྟར་སྙིང་གར་བསྒོམ་པ། གསང་བ་རྣལ་འབྱོར་རྒྱུད་ལྟར་སེམས་དཔའ་སུམ་བརྩེགས་སུ་བསྒོམ་པ། ཡང་གསང་བླ་མེད་ལྟར་ཁྱེར་སོ་གསུམ་ལྡན་དུ་བསྒོམ་པ། དེ་ཁོ་ན་ཉིད་ཆོས་ཀྱི་དབྱིངས་སུ་ལ་བཟླ་བ་དང་ལྔ་ལས། དང་པོ་ནི། རང་གི་སྤྱི་བོར་པདྨ་དཀར་པོ་འདབ་བརྒྱད་དེ་ལས་འདབ་མ་གཅིག་ལ་གཅིག་མཐུད་ཀྱི་ཚུལ་དུ་ནམ་མཁའི་མཐའ་གཏུགས་པའི་བར་དུ་ཁྱབ་པ། དེ་ལྟ་བུའི་འདབ་མ་རེ་རེའི་འོག་ཏུ་སེམས་ཅན་རེ་རེ་འཁོད་པ། དེ་རེ་རེའི་སྤྱི་གཙུག་གི་པད་འདབ་སྟེང་དུ་ཡང་རྡོ་རྗེ་སེམས་དཔའ་རེ་བཞུགས་པ། དེ་ཐམས་ཅད་ཀྱང་རྡོར་སེམས་སྤྱི་མཐུན་ཡབ་རྐྱང་སེམས་སྐྱིལ་ཅན། ཐུགས་ཀར་ས་བོན་སྔགས་ཕྲེང་དང་བཅས་པ་ལས་འོད་འཕྲོས་སངས་རྒྱས་སྲས་བཅས་བསྟིམ། བཟླས་པ་དང་བདུད་རྩི་འབེབས་སྦྱོང་མཐར། མགོན་པོ་བདག་ནི་སོགས། རྡོ་རྗེ་སེམས་དཔའ་སེམས་དཔའ་ཆེ་སོགས་ཤློ་ཀས་བསྟོད།

ཤོག་ལྷེ་༡༥༡རྡོ་རྗེ་སེམས་དཔས་དབུགས་དབྱུང་སྟེ། གཉིས་པ་དང་སྦྲེལ་ན་རང་གི་སྤྱི་བོར་བཞུགས་པའི་མུ་ནས་སྐུའི་བྱིན་རླབས་བདུད་རྩི་བྱང་ཆུབ་སེམས་ཀྱི་རྣམ་པར་སླར་ཡང་བབས་མགྲིན་པ་ཡན་ཆད་གང་ལུས་ཀྱི་སྡིག་སྒྲིབ་དག་སྐུའི་བྱིན་རླབས་ཐོབ་པར་བསམ། ཡང་རྡོར་སེམས་མགྲིན་པར་བྱོན་གསུང་གི་བྱིན་རླབས་བདུད་རྩིའི་རྣམ་པ་བབས་སྙིང་ག་ཡན་གང་ངག་གི་སྒྲིབ་པ་དག །ཡང་སྙིང་གར་བྱོན་ཐུགས་ཀྱི་བྱིན་རླབས་བདུད་རྩིའི་རྣམ་པར་བབས་ལྟེ་བ་ཡན་ཆད་གང་འདི་ལ་ཡུན་རིང་དུ་འབད། ཐུགས་ཀྱི་བྱིན་རླབས་ཐོབ་པར་མོས། །དེ་དག་གི་སྐབས་སུ་ཡིག་བརྒྱ་བཟླ། དེ་ནས་གསུམ་པ་དང་སྦྲེལ་ན། བདུད་རྩིས་ལུས་ཐམས་ཅད་གང་སྒྲིབ་པ་མཐའ་དག་དག །རྣམ་སྨིན་གྱི་ཕུང་པོ་གནས་འགྱུར་ནས་རང་ཉིད་རྡོ་རྗེ་སེམས་དཔར་གྱུར་པའི་ཐུགས་ཀར་རང་འདྲའི་ཡེ་ཤེས་སེམས་དཔའ་དེའི་ཐུགས་ཀར་ཏིང་ངེ་འཛིན་སེམས་དཔའ་རྡོ་རྗེ་དཀར་པོ་རྩེ་ལྔ་པའི་ལྟེ་བར་ཧཱུྃ། དེར་དམིགས་ནས་ཡིག་བརྒྱ་བཟླ། བཞི་པ་དང་སྦྲེལ་ན། དེའི་མཐར་སྣང་གྲགས་རིག་གསུམ་རྡོ་རྗེ་སེམས་དཔའི་སྐུ་གསུང་ཐུགས་སུ་མོས་ཏེ། ཡིག་དྲུག་བཟླ། །ལྔ་པ་ནི། དམིགས་བྲལ་ཀ་དག་གི་ངང་དུ་མཉམ་པར་གཞག་པར་གསུངས་སོ། །བཞི་པ་ཚོགས་གཉིས་རྫོགས་བྱེད་མཎྜལ་གྱི་ཁྲིད་ནི། ཚོགས་ཞིང་སྐྱབས་ཡུལ་ལྟར་གསལ་གདབ་པར་བཤད་པ་ནི་དམིགས་པའི་རྣམ་གྲངས་མང་པོ་མི་འཆུན་པ་དང་སྤྱི་མཐུན་གྱི་ཕྱག་ལེན་སྟབས་བདེ་བ་ལ་དགོངས་པ་དེས་ཀྱང་འཐུས་མོད། འདིར་རང་ལུགས་ཐུན་མོང་མ་ཡིན་པ་ནི་ཕྱི་ནས་རིམ་བཞིན་འཆད་པར་བྱའོ། །མཎྜལ་གྱི་རྒྱུ་རབ་རིན་པོ་ཆེ་གསེར་དངུལ། འབྲིང་ཟ་རས་སོགས།

ཤོག་ལྷེ་༡༥༢ཐ་མ་རྡོ་ཤིང་ལྟ་བུ་དངོས་པོ་དམན་ན་ཁྲུ་གང་བ་ལས་མི་ཆུང་བ་དང་། ཚོམ་བུའི་རྒྱུའང་རབ་རིན་པོ་ཆེ། འབྲིང་དུང་དང་མགྲོན་བུ་སོགས། ཐ་མ་འབྲུ་གཙང་མ་དྲི་བཟང་གིས་ཁ་བསྒྱུར་བ་ལ་སྨན་ཁྲོལ་བུ་སོགས་གང་འཛོམ་བསྲེས་ཤིང་གཤེར་གྱིས་བརླན་པ་དང་དྲི་བཟང་བ་བྱུང་ཡང་འདུ་བྱ། རང་དང་སེམས་ཅན་ཐམས་ཅད་ལྷན་ཅིག་པས་ལུས་ཀྱི་ལས་སུ་ཚོམ་བུ་འགོད་པ། ངག་གི་ལས་སུ་འབུལ་ཚིག་རྣམས་འུར་དིར་གྱིས་འདོན་པ། ཡིད་ཀྱི་ཚིག་ཕྱིར་སེམས་མ་ཡེངས་པར་བྱ་བ་རྣམས་སུམ་ཕྲུགས་སུ་བྱ་ཞིང་། མཎྜལ་གྱི་ཆོ་ག་དངོས་ལ་གསུམ། །དང་པོ་སྤྲུལ་སྐུའི་མཎྜལ་ནི། ཚོགས་ཞིང་མདུན་དུ་རྡོ་རྗེའི་ཞིང་ཁམས་ཆེན་པོ་རྣམ་པར་དག་པའི་རིན་པོ་ཆེའི་རང་བཞིན་རི་རབ་གླིང་བཞི་དང་བཅས་པའི་རི་རྩེར་པད་ཟླའི་གདན་ལ་རྩ་བའི་བླ་མ་སྤྲུལ་པའི་སྐུའི་རྣམ་པ་ཅན་ལ་དགོངས་བརྡ་སྙན་བརྒྱུད་ཀྱི་བླ་མ་རྣམས་ཀྱིས་བསྐོར་བ། གླིང་དང་གླིང་བར་རྣམས་སུ་ཁྱད་པར་གྱི་དཀོན་མཆོག་སྐྱབས་ཡུལ་གྱི་སྐབས་ལྟར་བཞུགས་པར་མོས་ལ། ཐོག་མར་སེམས་ཀྱི་རང་བཞིན་རྣམ་པར་དག་པའི་བརྡར་མཎྜལ་ལན་གསུམ་ཕྱིས། བྱང་ཆུབ་སེམས་ཀྱི་རླན་མི་ཡལ་བའི་ཕྱིར་དྲི་བཟང་དང་བ་བྱུང་ཆུས་ཆགས་ཆགས་གདབ། ཚོམ་བུ་རབ་བཞི་བཅུ་རྩ་གཅིག །འབྲིང་ཉི་ཤུ་རྩ་གསུམ། བསྡུས་པ་ལ་དགུ་དགོད་པར་གསུངས་པ་ལས་འབྲིང་པོའ་ལུགས་བྱེད་ན་རི་རབ་གླིང་བཞི་གླིང་ཕྲན་བཅས་བཅུ་གསུམ། ཕྱོགས་མཚམས་བརྒྱད་དུ་བརྒྱད་བཀོད་པ་བཀྲ་ཤིས་རྫས་བརྒྱད་སོགས་མཆོད་རྫས་ཕྱོགས་བསྡུས། མདུན་རྒྱབ་གཉིས་སུ་གཉིས་བཀོད་པ་ཉི་ཟླ་མཚོན་པ་ཡིན་ལ། དེ་དག་ཀྱང་འཇིག་རྟེན་ཁམས་རབ་འབྱམས་རྒྱ་མཚོའ་ཕྱི་ནང་སྣོད་བཅུད་ཀྱི་དཔལ་འབྱོར་རིགས་ལྔ་གངས་ཆེན་མཚོའ་ཞིང་

ཤོག་ལྷེ་༡༥༣ཁམས་ཀྱི་བཀོད་པ་ལ་བརྟེན་པའི་ཚངས་ཆེན་གྱི་བསྐལ་པ་ཆེན་པོ་ནམ་མཁས་ཁྱབ་ཚད་དུ་སྤྲུལ་ནས་དུས་ཆད་པ་མེད་པར་འབུལ་བར་བསམ་ལ་ངག་འདོན་དང་དམིགས་པ་སྦྲགས་ཏེ། ༀ་ཨཱཿཧཱུྃ། དབང་ཆེན་གསེར་གྱི་ས་གཞི། རིའི་རྒྱལ་པོ་རི་རབ། ཤར་ལུས་འཕགས་པོ། ལྷོ་འཛམ་བུ་གླིང་། ནུབ་བ་གླང་སྤྱོད། བྱང་སྒྲ་མི་སྙན། ལུས་དང་ལུས་འཕགས། རྔ་ཡབ་དང་རྔ་ཡབ་གཞན། གཡོ་ལྡན་དང་ལམ་མཆོག་འགྲོ། །སྒྲ་མི་སྙན་དང་སྒྲ་མི་སྙན་གྱི་ཟླ། གསེར་གྱི་རི་བདུན། རོལ་པའི་མཚོ་བདུན། རྒྱལ་སྲིད་རིན་པོ་ཆེ་སྣ་བདུན། བཀྲ་ཤིས་ཀྱི་རྫས་བརྒྱད། གཏེར་གྱི་བུམ་པ། དཔག་བསམ་གྱི་ཤིང་། མ་རྨོས་པའི་ལོ་ཏོག་ཡིད་དུ་འོང་བའི་འདོད་ཡོན། ཤིན་ཏུ་མཛེས་པའི་ལྷ་མོ། །ཉི་མ། ཟླ་བ། དབུས་སུ་ལྷ་དང་མི་ཡི་འདོད་ཡོན་མ་ཚང་བ་མེད་པ། འཇིག་རྟེན་གྱི་ཁམས་རྒྱ་མཚོ་ལེགས་པར་བཀོད་དེ་བཅོམ་ལྡན་འདས་དཔལ་རྣམ་པར་སྣང་མཛད་ལ་སོགས་པ་ཕྱོགས་བཅུའི་དེ་བཞིན་གཤེགས་པ་རིགས་ལྔ་གངས་ཆེན་མཚོའ་སྐུ་དང་གསུང་དང་ཐུགས་མི་བཟད་པ་རྒྱན་གྱི་འཁོར་ལོ་ལ་བརྟེན་པའི་ཞིང་ཁམས་རབ་འབྱམས་མཐའ་ཀླས་པ་ཚངས་ཆེན་གྱི་བསྐལ་པ་ཆེན་པོས་ལེགས་པར་བརྒྱན་པ་འདི་ཉིད་བླ་མ་དང་ཡི་དམ་དཀྱིལ་འཁོར་གྱི་ལྷ་ཚོགས་དམ་ཅན་རྒྱ་མཚོའ་ཚོགས་དང་བཅས་པ་རྣམས་ལ་ཀུན་ཏུ་བཟང་པོའ་མཆོད་པའི་སྤྲིན་ཕུང་ཆེན་པོ་བསམ་གྱིས་མི་ཁྱབ་པར་དམིགས་ཏེ་འབུལ་ལོ། །ཕྱོགས་བཅུའི་ཞིང་ཁམས་རྒྱ་མཚོའ་རྡུལ་སྙེད་རི་རབ་གླིང་བཞིའི་འཇིག་རྟེན་ཁམས། ལྷ་དང་མི་ཡི་འདོད་ཡོན་ཕུན་ཚོགས་བདེ་གཤེགས་མཆོད་པའི་སྤྲིན་ཕུང་ཅན། །ཚངས་ཆེན་བསྐལ་པས་ལེགས་པར་བརྒྱན་ཏེ་དགེ་ལེགས་རྒྱ་མཚོའ་བསོད་

ཤོག་ལྷེ་༡༥༤ནམས་ཞིང་། །བླ་མ་ཡི་དམ་དཀྱིལ་འཁོར་ལྷ་ཚོགས་དམ་ཅན་རྒྱ་མཚོའ་ཚོགས་ལ་འབུལ། །རིན་ཆེན་མཎྜལ་ཡིད་འོང་མཆོད་པའི་སྤྲིན། །རྒྱལ་བའི་འབྱོར་ཚོགས་དཔག་མེད་དང་ལྡན་པ། །དཔག་ཡས་ནམ་མཁའི་རྒྱན་གྱུར་འདི་ཕུལ་བས། །རང་བཞིན་སྤྲུལ་སྐུའི་ཞིང་ལ་སྤྱོད་པར་ཤོག །ཅེས་ཚོམ་བུ་གསོ་ཞིང་ཤློ་ཀ་ཕྱི་མ་ལ་གྲངས་བཟུང་སྟེ་ཅི་ནུས་སུ་འབུལ་ལོ། །གཉིས་པ་ལོངས་སྐུའི་མཎྜལ་ནི། ཚོགས་ཞིང་འོག་མིན་སྟུགས་པོ་བཀོད་པའི་ཞིང་ཁམས་གཞི་དང་རྒྱ་ཚད་རྒྱན་བཀོད་པའི་ཁྱད་པར་བསམ་གྱིས་མི་ཁྱབ་པར་བླ་མ་ལོངས་སྐུ་རིགས་ལྔ་འཁོར་དཔག་ཏུ་མེད་པ་དང་བཅས་པ་བཞུགས་པར་མོས་ལ། ཚོམ་བུ་རྒྱས་པ་ཉེར་ལྔ། འབྲིང་ལ་བཅུ་གསུམ། བསྡུ་ན་བདུན་བཀོད་དེ། སྟུགས་པོ་བཀོད་པའི་ཞིང་ཁམས་ཐར་པ་ཆེན་པོའ་གཞལ་མེད་ཁང་བསམ་ལས་འདས་པའི་བཀོད་པ་ཡིད་དུ་འོང་བའི་ལྷ་མོ་ངོ་མཚར་བའི་མཆོད་རྫས་ཐོགས་པས་གང་བ་ཚངས་པ་རྔ་སྒྲའི་ཞིང་ཁམས་ཆེན་པོ་ཡེ་ཤེས་རིན་པོ་ཆེའི་སྤྲིན་གྱི་དྲྭ་བས་ལེགས་པར་བརྒྱན་པས་འཁོར་བ་མ་སྟོངས་ཀྱི་བར་དུ་རྟག་པ་རྒྱུན་གྱི་འཁོར་ལོར་མཆོད་པར་མོས་ལ། ༀ་ཨཱཿཧཱུྃ། འོག་མིན་གྱི་གནས་རྣམ་དག་སྟུགས་པོ་བཀོད་པ་བདེ་བའི་ཞིང་། ཐམས་ཅད་ཀྱང་སྣང་ལ་རང་བཞིན་མེད་པའི་ཞིང་ཁམས་ན། ཤིན་ཏུ་ཡིད་དུ་འོང་བའི་གཞལ་མེད་ཁང་ཆེན་པོ། སྒོ་བཞི་གྲུ་བཞི་རྟ་བབས་བཞི་དང་ལྡན་པ་ལ། རིན་པོ་ཆེའི་གདུགས། ཆོས་ཀྱི་འཁོར་ལོ་ཤིན་ཏུ་མཛེས་པའི་རི་དྭགས། ལྷའི་གོས་རྣམ་པར་རྒྱལ་བའི་རྒྱལ་མཚན། ཡིད་དུ་འོང་བའི་འཕན། ཟླ་བ་རླུང་གིས་བསྐྱོད་པ་རྔ་ཡབ་ནོར་བུའི་ཡུ་བ་ཅན། གསེར་གྱི་དྲིལ་བུ་གཡར་ཁའི་ཕྲེང་བ། རྡོ་རྗེ་དང་ནོར་བུ་རིན་པོ་ཆེའི་ཏོག

ཤོག་ལྷེ་༡༥༥རྩིག་པ་ལྔ་དང་ལྡན་པའི་སྟེང་ན། རིན་པོ་ཆེའི་ཕ་གུ། ནོར་བུ་སྣ་ཚོགས་ཀྱི་དྲྭ་ཕྱེད། རྡོ་ཀྲ་མ་ཤཱིཎའི་མདའ་ཡབ། རིན་པོ་ཆེའི་དྲྭ་མིག །གསེང་མའི་པུ་ཤུ། རབ་ཏུ་མཐོ་བའི་ཕྱུར་བུ། འདོད་ཡོན་གྱི་སྣམ་བུ། སྒེག་མོ་མ། ཕྲེང་བ་མ། གླུ་མ། གར་མ། མེ་ཏོག་མ། བདུག་སྤོས་མ། སྣང་གསལ་མ། དྲི་ཆབ་མ། ཞལ་ཟས་མ། སིལ་སྙན་མ། མཆོད་པའི་སྤྲིན་ཕུང་ཆེན་པོ་བསམ་གྱིས་མི་ཁྱབ་པས་ཕྱི་ནང་ཀུན་ཏུ་ཡང་ལེགས་པར་བརྒྱན་ཏེ་བཀོད་པའི་གནས། ཚངས་པ་རྔ་སྒྲའི་ཞིང་ཁམས་ཆེན་པོ། ཡེ་ཤེས་རིན་པོ་ཆེ་སྤྲིན་གྱི་དྲྭ་བས་ལེགས་པར་བརྒྱན་པ་འདི་ཉིད། བླ་མ་དང་ཡི་དམ་དཀྱིལ་འཁོར་གྱི་ལྷ་ཚོགས་དམ་ཅན་རྒྱ་མཚོའ་ཚོགས་དང་བཅས་པ་རྣམས་ལ་ཇི་སྲིད་འཁོར་བ་མ་སྟོངས་ཀྱི་བར་དུ་རྟག་པ་རྒྱུན་གྱི་འཁོར་ལོར་འབུལ་ལོ། །བདེ་ཆེན་གནས་ནི་ཤིན་ཏུ་མཐའ་ཡས་བཀོད་པའི་སྤྲིན་གྱི་འོད་ཟེར་ཅན། སྒོ་བཞི་གྲུ་བཞི་རྟ་བབས་བཞི་ལྡན་ཡེ་ཤེས་རྣམ་ལྔའི་རྩིགས་པས་བརྒྱན། །སྒེག་མོ་ཕྲེང་ཐོགས་རིན་ཆེན་གླུ་གར་མཆོད་པའི་སྤྲིན་གྱི་འོད་འཕྲོ་བ། །བླ་མ་ཡི་དམ་དཀྱིལ་འཁོར་ལྷ་ཚོགས་དམ་ཅན་རྒྱ་མཚོའ་ཚོགས་ལ་འབུལ། །འོག་མིན་བདེ་ཆེན་རིན་ཆེན་གཞལ་ཡས་ཁང་། སྣ་ཚོགས་མཆོད་པའི་སྤྲིན་གྱི་བླ་བྲེ་ཅན། །ནམ་མཁའ་གང་བར་དམིགས་ཏེ་ཕུལ་བ་ཡིས། །ལྷུན་གྲུབ་ལོངས་སྐུའི་ཞིང་ལ་སྤྱོད་པར་ཤོག །ཅེས་ཤློ་ཀ་ཕྱི་མ་ལ་གྲངས་བཟུང་ཞིང་འབུལ་ལོ། །གསུམ་པ་ཆོས་སྐུའི་མཎྜལ་ནི། ཚོགས་ཞིང་ཆོས་སྐུ་ཐིག་ལེ་ཉག་ཅིག་འོད་གསལ་རྡོ་རྗེ་སྙིང་པོའ་ཞིང་ཁམས་སུ་བླ་མ་ཆོས་སྐུ་གདོད་མའི་མགོན་པོ་འཁོར་རང་སྣང་ཡེ་ཤེས་རྒྱ་མཚོའ་ཚོགས་དང་བཅས་རང་གསལ་ལྷུན་གྲུབ་ཏུ་

ཤོག་ལྷེ་༡༥༦བཞུགས་པར་མོས་ལ། ཚོམ་བུ་རྒྱས་པར་ཉེར་ལྔ། འབྲིང་ལ་ལྔ། བསྡུ་ན་གསུམ་བཀོད་དེ། ཆོས་དབྱིངས་འོད་གསལ་རྡོ་རྗེ་སྙིང་པོའ་ཞིང་ཁམས་ཚད་དཔག་ཏུ་མེད་ཅིང་ནམ་མཁའི་མཐའ་ཀླས་པར་རིག་གདངས་འོད་ལྔའི་ཐིག་ལེ་ཐིག་ཕྲན་འཇའ་འོད་ཟེར་ཐག་མེར་མེར་ཤིག་ཤིག་ཏུ་གཡོ་བའི་སྐུ་དང་ཡེ་ཤེས་ཀྱི་སྣང་བ་ཚད་མེད་པས་བརྒྱན་པ་ཉིད་མཆོད་བྱ་མཆོད་བྱེད་མེད་པར་རང་བྱུང་རང་ཤར་རང་ཐིམ་དུ་འབུལ་བར་མོས་ལ། ༀ་ཨཱཿཧཱུྃ། ཆོས་ཉིད་འོད་གསལ་གྱི་ཞིང་ཁམས་གདོད་མ་ནས་ངོ་བོ་ཉིད་ཀྱིས་རྣམ་པར་དག་ཅིང་། ནམ་མཁའ་ལྟར་སྟོང་ལ་མཐའ་དབུས་མེད་པ། ཉི་ཟླ་ལྟར་བཀྲ་ཞིང་ལྷུན་གྱིས་གྲུབ་པ། འཁོར་བ་དང་མྱ་ངན་ལས་འདས་པ་གང་ཡང་མ་ཕྱེད་མི་འབྱེད་པ་མེད་པའི་རང་བཞིན། སངས་རྒྱས་ཀྱི་ཞིང་དང་འགྲོ་བ་དྲུག་གི་རྣམ་པར་འཕྲུལ་པ། དཔག་ཏུ་མེད་པའི་འབྱུང་གནས་ཆེན་པོ། ལྷུན་གྲུབ་རིན་པོ་ཆེའི་སྦུབས། སྐུ་གསུམ་འདུ་འབྲལ་མེད་པའི་ཀློང་། དུས་བཞི་མཉམ་པ་ཉིད་ཀྱི་ཡེ་ཤེས། གཞོན་ནུ་བུམ་པ་སྐུའི་ཞིང་ཁམས་ཕྱི་དང་ནང་མེད་པ་ཀུན་ཏུ་ཡང་ནང་དུ་གྱུར་པ། སྔོན་པོ་དང་། སེར་པོ་དང་། དམར་པོ་དང་། དཀར་པོ་དང་། ལྗང་ཁུའི་འོད་ཟེར་ཕྱོགས་བཅུར་འཕྲོ་ཞིང་། ནམ་མཁའི་མཐའ་ཀླས་པར་སྐུ་དང་ཡེ་ཤེས་ཀྱི་སྣང་བ་ཆེན་པོས་ལེགས་པར་བརྒྱན་པའི་བཀོད་པ་ཚད་མེད་པའི་མངའ་ཐང་ཆེན་པོ་ལ་དབང་འབྱོར་བ། འོད་གསལ་རྡོ་རྗེ་སྙིང་པོའ་ཞིང་ཁམས། རང་བཞིན་རྣམ་པར་དག་ཅིང་ལྷུན་གྱིས་གྲུབ་པ་འདི་ཉིད། བླ་མ་དང་ཡི་དམ་དཀྱིལ་འཁོར་གྱི་ལྷ་ཚོགས་དམ་ཅན་རྒྱ་མཚོའ་ཚོགས་དང་བཅས་པ་རྣམས་ལ། དགོངས་ཀློང་རྣམ་པར་དག་པའི་ངང་དུ་ཡེ་ཤེས་ཀྱི་མཆོད་པ་དམ་པར་འབུལ་ལོ། །གདོད་

ཤོག་ལྷེ་༡༥༧ནས་རྣམ་དག་འོད་གསལ་ཞིང་ནི་མ་སྐྱེས་ལྷུན་རྫོགས་འདུས་མ་བྱས། སྣ་ཚོགས་མ་དམིགས་སྤྲོས་ཀུན་ཉེར་ཞི་ཡེ་ཤེས་རྣམ་ལྔའི་གཞལ་ཡས་ཁང་། །སྐུ་གསུམ་མཛད་པའི་འོད་ཟེར་དང་བཅས་རང་བཞིན་ལྷུན་གྱིས་གྲུབ་པའི་གནས། །བླ་མ་ཡི་དམ་དཀྱིལ་འཁོར་ལྷ་ཚོགས་དམ་ཅན་རྒྱ་མཚོའ་ཚོགས་ལ་འབུལ། །འོད་གསལ་ལྷུན་གྲུབ་ཡེ་ཤེས་རིགས་ལྔའི་ཞིང་། །སྐུ་དང་ཐིག་ལེས་ཡེ་ནས་བརྒྱན་པ་འདི། །རང་སྣང་དག་པས་ལེགས་པར་ཕུལ་བ་ཡིས། །ཀུན་བཟང་ཆོས་སྐུའི་ཞིང་ལ་སྤྱོད་པར་ཤོག །ཅེས་ཤོ་ལོ་ཀ་ཕྱི་མ་ལ་གྲངས་བཟུང་སྟེ་ཅི་ནུས་འབུལ། མཐར་མཎྜལ་འབུལ་ཡུལ་མཆོད་རྫས་དང་བཅས་པ་ཧཱུཾ་སྔོན་པོའ་རྣམ་པར་བསྡུས། དེ་ཡང་རང་ལ་ཐིམ་པར་བསམ་ཞིང་ཚོགས་ཆེན་ལྷུན་གྱིས་རྫོགས་པའི་འོད་གསལ་གྱི་ངང་དུ་མཉམ་པར་གཞག་གོ །འདིར་ཡང་སྤྱི་དང་བྱེ་བྲག་གི་རྣམ་གཞག་དགོས་པ་ཕན་ཡོན་སོགས་འཆད་པར་སྤྲོ་ན་གཞན་ནས་བླང་ངོ་། །ལྔ་པ་བྱིན་རླབས་མྱུར་ཏུ་འཇུག་པ་བླ་མའི་རྣལ་འབྱོར་གྱི་ཁྲིད་ལའང་གཉིས། སྤྱི་དང་། ཁྱད་པར་རོ། །དང་པོ་ལ། གསོལ་བ་འདེབས་པའི་རྟེན་གསལ་འདེབས་པ་ནི། སྣོད་བཅུད་དག་པའི་ཞིང་ཁམས་འབྱམས་ཀླས་པའི་དབུས་སུ། རང་གི་སྤྱི་བོའ་ནམ་མཁར་ཡེ་ཤེས་ལྔའི་རང་མདངས་འཇའ་ཚོན་འོད་ལྔའི་གུར་ཁྱིམ་རབ་ཏུ་འཁྲུགས་པའི་དབུས་སུ་སེང་ཁྲི་པདྨ་ཉི་ཟླ་བརྩེགས་པའི་གདན་གྱི་སྟེང་དུ་རྩ་བའི་བླ་མ་དང་གཉིས་སུ་མེད་པའི་སྟོན་པ་ཀུན་ཏུ་བཟང་པོ་སྐུ་མདོག་མཐིང་ག་ཨིནྡྲ་ནི་ལའི་ལྷུན་པོ་ལ་ཉི་མ་ཤར་བ་ལྟ་བུའི་གཟི་བྱིན་རབ་ཏུ་འབར་ཞིང་ཕྱག་གཉིས་མཉམ་གཞག་གི་རྒྱ་ཅན། ཞབས་རྡོ་རྗེའི་སྐྱིལ་མོ་ཀྲུང་གིས་བཞུགས་ཤིང་དར་གྱི་ཆས་གོས་ལྔ་དང་རིན་པོ་ཆེའི་རྒྱན་བརྒྱད་ཀྱིས་མཛེས་པར་བརྒྱན་པ། སྐུ་ལ་

ཤོག་ལྷེ་༡༥༨མཚན་བཟང་པོ་སུམ་ཅུ་རྩ་གཉིས་དང་དཔེ་བྱད་བཟང་པོ་བརྒྱད་ཅུས་སྤྲས་པ། ཤིན་ཏུ་དྭངས་པའི་སྐུ་ལས་དྲི་མ་མེད་པའི་འོད་ཟེར་ཁ་དོག་དྲུག་གི་སྣང་བ་རེ་རེ་ཡང་བྱེ་བ་ཕྲག་དྲུག་དྲུག་ཏུ་འཕྲོ་ཞིང་འབར་བའི་ཀློང་ན་ལྷམ་མེར་བཞུགས་པ། གསུང་ཡན་ལག་དྲུག་ཅུའི་ཆོས་སྒྲ་སྒྲོག་པ། ཐུགས་ཏིང་ངེ་འཛིན་གྱི་སྒོ་བརྒྱ་ཕྲག་དུ་མ་ལ་མཉམ་པར་གཞག་པ། མཁྱེན་བརྩེ་ནུས་པའི་བདག་ཉིད་ཅན་དུ་གསལ་བའི་སྟེང་གི་ཆ་ལ་བརྒྱུད་པའི་བླ་མ་རྣམས་དང་། མཐའ་སྐོར་དུ་ཐེག་པ་ཆེ་ཆུང་གི་ཡི་དམ་སངས་རྒྱས། དམ་ཆོས་དགེ་འདུན། མཁའ་འགྲོ་དམ་ཅན་སྲུང་མའི་ཚོགས་དང་བཅས་པ་ཐམས་ཅད་སྤྲིན་གྱི་ཕུང་པོ་གཏིབས་པ་ལྟ་བུར་བཞུགས་པར་བསམ་ལ་དེ་ཉིད་གསལ་གདབ་པའི་སླད་དུ། སྣོད་བཅུད་དག་པའི་ཞིང་ཁམས་ཆེན་པོའ་དབུས། །རང་མདུན་ནམ་མཁར་ཡེ་ཤེས་འོད་ལྔའི་ཀློང་། །སེང་ཁྲི་པདྨ་ཉི་ཟླའི་གདན་སྟེང་དུ། །སྐྱབས་གནས་ཀུན་འདུས་རྩ་བའི་བླ་མ་དང་། །དབྱེར་མེད་གདོད་མའི་མགོན་པོ་ཀུན་ཏུ་བཟང་། །མཐིང་གསལ་ཞལ་གཅིག་ཕྱག་གཉིས་མཉམ་གཞག་ཅན། །དར་དང་རིན་ཆེན་རྒྱན་རྫོགས་སྐྱིལ་ཀྲུང་བཞུགས། །སྟེང་གི་ཆ་ལ་བརྒྱུད་པའི་བླ་མ་དང་། །མཐའ་བསྐོར་མཆོག་གསུམ་མཁའ་འགྲོ་ཆོས་སྲུང་ཚོགས། །སྣང་སྟོང་ཟུང་འཇུག་ཡེ་ཤེས་སྒྱུ་མའི་སྐུ། །གསང་གསུམ་མི་ཟད་རྒྱན་གྱི་འཁོར་ལོའ་སྤྲིན། །གང་འདུལ་མོས་དོར་ཅིར་ཡང་འཆར་བར་གྱུར། །ཅེས་བརྗོད། དེ་ནས་རང་དང་སེམས་ཅན་ཐམས་ཅད་ས་ཆེན་པོའ་རྡུལ་ལྟར་འཁོད་པར་གྱུར་པ་ལ། ཐམས་ཅད་ལུས་གུས་པས་ཐལ་མོ་སྦྱར། ངག་གུས་པས་གསོལ་འདེབས་ཀྱི་ཚིག་དིར་དིར་བརྗོད། ཡིད་གུས་པས་སྐྱིད་སྡུག་ལེགས་ཉེས་ཐམས་ཅད་ཁྱེད་ཀྱིས་མཁྱེན་སྙམ་པའི་བློ་གཏད་ལིང་གིས་འགེལ། དེ་

ཤོག་ལྷེ་༡༥༩ཡང་བླ་མ་ནི་སྐུ་དགེ་འདུན། གསུང་དམ་ཆོས། ཐུགས་སངས་རྒྱས་ཀྱི་རང་བཞིན་དུ་བཞུགས་པར་མ་ཟད། རང་ལ་སྔོན་གྱི་སངས་རྒྱས་རྣམས་ཀྱི་ཞལ་མཇལ་ཞིང་གསུང་ཐོས་པའི་སྐལ་བ་མ་མཆིས་པའི་དུས་འདིར་དེ་རྣམས་ཀྱིས་མཛད་རྒྱུ་བླ་མ་དམ་པས་མཛད་པ་དང་། རང་རྒྱུད་ལ་སངས་རྒྱས་དངོས་སུ་སྟོན་པའི་དེད་དཔོན་བླ་ན་མེད་པ་ཡིན་པའི་ཕྱིར་དུས་གསུམ་གྱི་རྒྱལ་བ་ཀུན་ལས་ལྷག་ཅིང་བཀའ་དྲིན་ཆེ་སྙམ་པའི་བློ་སྣ་མོས་གུས་སུ་ཧྲིལ་གྱིས་དྲིལ་ལ་བརྒྱུད་པའི་གསོལ་འདེབས་ཡིད་བཞིན་སྤྲིན་ཚོགས་དང་། བསྡུ་ན་གཏེར་ཆེན་རིན་པོ་ཆེས་མཛད་པ་རྗེ་བླ་མའི་ཁ་སྐོང་དང་བཅས་པ་ཉིད་བརྗོད་ལ། རྩ་བརྒྱུད་ཀྱི་བླ་མ་རྣམས་ཀྱི་ཡོན་ཏན་རྗེས་སུ་དྲན་བཞིན་པས་གསོལ་བ་གདབ་ཅིང་། སླར་ཡང་རྩ་བའི་བླ་མ་ལ་ཕུར་ཚུགས་སུ་གསོལ་བ་འདེབས་པ་ནི། ཀྱེ་བླ་མ་རྡོ་རྗེ་འཛིན་པ་ནི། །ཁམས་གསུམ་འཁོར་བའི་གཉེན་གཅིག་པུ། །འགྲོ་བ་སྐྱབས་མེད་རྣམས་ཀྱི་སྐྱབས། །ཐར་པའི་ཐེམ་སྐས་ཆེན་པོ་སྟེ། །མ་རིག་སེལ་བའི་སྒྲོན་མེ་ལ། །མུན་པའི་ཚོགས་བདག་སྐྱབས་སུ་མཆི། །འཁོར་བ་འདམ་གྱི་མཚོ་ནང་དུ། །བྱིང་བ་སྐྱབས་མེད་བདག་ལ་སྐྱོབས། །ཉོན་མོངས་མེ་ཡིས་གདུངས་པ་ལ། །ཐུགས་རྗེའི་ཆར་གྱིས་བསིལ་བར་མཛོད། །བླ་མ་སངས་རྒྱས་རིན་པོ་ཆེ། །བདག་ལ་རེ་ས་གཞན་ན་མེད། །དེང་ནས་བྱང་ཆུབ་སྙིང་པོའ་བར། །སྐྱིད་སྡུག་རེ་ལྟོས་ཁྱེད་མཁྱེན་པས། །མགོན་མེད་བདག་ལ་ཐུགས་རྗེས་གཟིགས། །ནད་གདོན་བགེགས་དང་བར་ཆད་སོལ། །སྐུ་གསུང་ཐུགས་ཀྱིས་བྱིན་གྱིས་རློབས། །མཆོག་དང་ཐུན་མོང་དངོས་གྲུབ་སྩོལ། །ཅེས་པས་

ཤོག་ལྷེ་༡༦༠མོས་གུས་ཀྱི་ཉམས་མ་སྐྱེས་བར་དུ་གསོལ་བ་བཏབ་པའི་མཐར་དབང་བླང་བ་ནི། འཁོར་གྱི་ལྷ་ཚོགས་རྣམས་རྩ་བའི་བླ་མའི་སྐུ་ལ་ཐིམ་པས་བླ་མ་སྔར་བས་ཀྱང་གཟི་བྱིན་ཆེར་འབར་བའི་གནས་གསུམ་དུ་ༀ་ཨཱཿཧཱུཾ་དཀར་དམར་མཐིང་གསུམ་འོད་འབར་བས་མཚན་པ་དེ་བཞིན་གཤེགས་པ་ཐམས་ཅད་ཀྱི་རྡོ་རྗེ་གསུམ་གྱི་བདག་ཉིད་དུ་གྱུར། བདག་དང་མཁའ་ཁྱབ་ཀྱི་སེམས་ཅན་ཐམས་ཅད་དབང་བཞིའི་ཆུ་བོས་རྒྱུད་སྨིན་ཅིང་གྲོལ་བར་བྱིན་གྱིས་བརླབ་ཏུ་གསོལ། །ཞེས་གསོལ་བ་བཏབ་པས། གུ་རུའི་སྤྱི་བོའ་ༀ་ལས་འོད་ཟེར་དཀར་པོ་འཕྲོས། རང་གི་སྤྱི་བོར་ཐིམ་པས་བུམ་པའི་དབང་ཐོབ། ལུས་ཀྱི་དྲི་མ་སྦྱངས། ལམ་བསྐྱེད་རིམ་བསྒོམ་པ་ལ་དབང་། འབྲས་བུ་སྤྲུལ་སྐུ་ཐོབ་པའི་སྐལ་བ་ཅན་དུ་བྱས། མགྲིན་པའི་ཨཱཿལས་འོད་ཟེར་དམར་པོ་འཕྲོས། རང་གི་མགྲིན་པར་ཐིམ་པས་གསང་བའི་དབང་ཐོབ། དག་གི་དྲི་མ་སྦྱངས། ལམ་རྩ་རླུང་བསྒོམ་པ་ལ་དབང་། འབྲས་བུ་ལོངས་སྐུ་ཐོབ་པའི་སྐལ་བ་ཅན་དུ་བྱས། ཐུགས་ཀའི་ཧཱུཾ་ལས་འོད་ཟེར་སྔོན་པོ་འཕྲོས། རང་གི་སྙིང་གར་ཐིམ་པས་ཤེས་རབ་ཡེ་ཤེས་ཀྱི་དབང་ཐོབ། ཡིད་ཀྱི་དྲི་མ་སྦྱངས། ལམ་ཐིག་ལེ་བསྒོམ་པ་ལ་དབང་། འབྲས་བུ་ཆོས་སྐུ་ཐོབ་པའི་སྐལ་བ་ཅན་དུ་བྱས། སླར་ཡང་གནས་གསུམ་ལས་འོད་ཟེར་དཀར་དམར་མཐིང་གསུམ་འཕྲོས། རང་གི་གནས་གསུམ་དུ་ཐིམ་པས་དབང་བཞི་པ་ཐོབ། ཡེ་ཤེས་ཀྱི་དྲི་མ་སྦྱངས། ལམ་རྫོགས་པ་ཆེན་པོ་བསྒོམ་པ་ལ་དབང་། འབྲས་བུ་ངོ་བོ་ཉིད་སྐུ་ཐོབ་པའི་སྐལ་བ་ཅན་དུ་བྱས་སོ། །སླར་ཡང་དུས་གསུམ་སངས་རྒྱས་ཐམས་ཅད་ཀྱི་ངོ་བོ་སྐུ་བཞིའི་བདག་

ཤོག་ལྷེ་༡༦༡ཉིད་དཔལ་ལྡན་བླ་མ་དམ་པ་ལ་གསོལ་བ་འདེབས་སོ། །བདག་ལ་དབང་བསྐུར་བྱིན་གྱིས་བརླབ་ཏུ་གསོལ། ཟབ་ལམ་གྱི་རྟོགས་པ་ཁྱད་པར་ཅན་རྒྱུད་ལ་སྐྱེ་བར་བྱིན་གྱིས་བརླབ་ཏུ་གསོལ། ཀ་དག་གནས་ལུགས་ཀྱི་ལྟ་བ་རྟོགས་པར་བྱིན་གྱིས་བརླབ་ཏུ་གསོལ། ལྷུན་གྲུབ་སྣང་བཞིའི་ཡེ་ཤེས་མཐར་ཕྱིན་པར་བྱིན་གྱིས་བརླབ་ཏུ་གསོལ། །ཞེས་མོས་གུས་གདུང་ཤུགས་དྲག་པོས་གསོལ་བ་བཏབ་པས་བླ་མ་འོད་ལྔའི་གོང་བུར་གྱུར་པ་རང་གི་ཚངས་བུག་ནས་སིབ་ཀྱིས་ཐིམ་པས། རང་གི་སྒོ་གསུམ་དང་བླ་མའི་རྡོ་རྗེ་གསུམ་དབྱེར་མེད་གྱུར་པར་བསམ་ལ་བློ་འདས་གཉུག་མའི་རང་ངོ་ལ་མཉམ་པར་གཞག་གོ །གཉིས་པ་བྱེ་བྲག་བླ་མའི་རིམ་པ་དངོས་གྲུབ་རྒྱ་མཚོ་ལྟར་ཉམས་སུ་ལེན་པ་ནི། ༀ་ཨཱཿཧཱུྃ། ངན་འགྲོའི་འཇིགས་པ་སྐྱོབ་མཛད་པ། །དཀོན་མཆོག་གསུམ་ལ་སྐྱབས་སུ་མཆི། །ངེས་པའི་དོན་དུ་སེམས་བསྐྱེད་ནས། །འགྲོ་ལ་ཕན་ཕྱིར་བླ་མ་བསྒོམ། །ཆོས་ཐམས་ཅད་རང་བཞིན་གྱིས་མ་སྐྱེས་པའི་ངང་ལས། རང་གི་སྤྱི་བོར་པདྨ་དཀར་པོ་དང་ཉི་ཟླ་གའུ་ཁ་སྦྱོར་བསམ་པའི་ནང་ན། ཨ་དཀར་པོ་ལས་འོད་འཕྲོས་པས། རྩ་བའི་བླ་མ་སྤྱན་དྲངས་ནས། སྐྱིལ་ཀྲུང་ཕྱེད་པས་བཞུགས་པ་ལ། བརྒྱུད་པའི་བླ་མ་དང་ཆོས་འབྲེལ་ཡོད་ཚད་ཐམས་ཅད་ཐིམ་པའི་མཐར། ཡི་དམ་དཀྱིལ་འཁོར་གྱི་ལྷ་ཚོགས་མཁའ་འགྲོ་དམ་ཅན་རྒྱ་མཚོས་བསྐོར་བ་སྤྲིན་ཕུང་འཐིབས་པ་ལྟར་བསམ། འདིར་ཡིད་ཀྱིས་མཆོད་ཅིང་བསྟོད་པར་གསུངས་པས་དེ་ཁོ་ནས་ཆོག་ཀྱང་ད་ལྟའི་གང་ཟག་ཕལ་ཆེར་ལ་དག་འདོན་མེད་ན་རྣམ་པ་མི་གསལ་བས་དེ་ལྟར་ན། ༀ་ཨཱཿཧཱུྃ། ཆོས་

ཤོག་ལྷེ་༡༦༢ཀྱི་དབྱིངས་ཀྱི་ཕོ་བྲང་ནས། །སྐྱེ་མེད་བླ་མ་གཤེགས་སུ་གསོལ། །ལོངས་སྤྱོད་རྫོགས་སྐུའི་ཕོ་བྲང་ནས། །གསལ་དག་བླ་མ་གཤེགས་སུ་གསོལ། །སྤྲུལ་པ་སྐུ་ཡི་ཕོ་བྲང་ནས། །ཐུགས་རྗེ་ཅན་རྣམས་གཤེགས་སུ་གསོལ། །འཇའ་དང་འོད་དུ་ཀྱི་ལི་ལི། །སྐུ་དང་ཐིག་ལེ་ཤིགས་སེ་ཤིག །སྤྱི་གཙུག་ཉི་ཟླའི་གདན་སྟེང་དུ། །བདག་དང་དབྱེར་མེད་བརྟན་པར་བཞུགས། །ལུས་ངག་ཡིད་གསུམ་གུས་ཕྱག་འཚལ། །ཕྱི་ནང་གསང་གསུམ་མཆོད་པ་འབུལ། །སྐུ་གསུང་ཐུགས་ཀྱི་ཉམས་ཆགས་བཤགས། །སྨིན་གྲོལ་དབང་དང་གདམས་པ་ཞུ། །ༀ་སྐུ་སྐྱེ་བ་མེད་པ་གསལ་ལ་དྭངས། །རྡོ་རྗེའི་སྐུ་ལ་གསོལ་བ་འདེབས། །ལུས་ལ་བདེ་བར་བྱིན་གྱིས་རློབས། །ཨཱཿགསུང་འགགས་པ་མེད་པ་ཆོས་ཀྱི་སྒྲ། །ཨཱ་ལི་ཀཱ་ལིར་གསོལ་བ་འདེབས། །ངག་ལ་ནུས་པར་བྱིན་གྱིས་རློབས། །ཧཱུྃ་ཐུགས་ཀ་དག་ཆེན་པོ་ཀུན་བཟང་ཀློང་། །ཅིར་མི་དགོངས་ལ་གསོལ་བ་འདེབས། ཟད་སར་འཁྱོལ་བར་བྱིན་གྱིས་རློབས། །ཞེས་ཆོས་སྤྱོད་ཆེན་མོ་ནས་འབྱུང་བ་ལྟར་བརྗོད། དེ་ནས། བླ་མ་རྡོ་རྗེ་འཛིན་པ་ནི། །ཁམས་གསུམ་འཁོར་བའི་གཉེན་གཅིག་པོ། །འགྲོ་བ་མགོན་མེད་རྣམས་ཀྱི་སྐྱབས། །ཐར་པའི་ལམ་སྐས་ཆེན་པོ་སྟེ། །མ་རིག་སེལ་བའི་སྒྲོན་མེ་ལ། །མུན་པའི་ཚོགས་བདག་སྐྱབས་སུ་མཆི། །འཁོར་བ་འདམ་གྱི་མཚོ་ནང་དུ། །བྱིང་བ་སྐྱབས་མེད་བདག་ལ་སྐྱོབས། །དུག་གསུམ་མེ་ཡིས་གདུང་བ་ལ། །རང་བྱུང་རླན་གྱིས་བསིལ་བར་མཛོད། །མ་རིག་འཁྲུལ་པས་བཅིངས་པ་ཡི། །གདོས་བཅས་ལུས་ངག་ཡིད་རྣམས་ཀུན། །རང་དེངས་འོད་ཀྱི་རང་བཞིན་ཏུ། །ལྷག་མེད་མྱ་ངན་འདས་ཐོབ་མཛོད། །བླ་མ་སངས་རྒྱས་

ཤོག་ལྷེ་༡༦༣རིན་པོ་ཆེ། །བདག་ལ་རེ་ས་གཞན་ན་མེད། །ཐུགས་རྗེའི་སྤྱན་གྱིས་གཟིགས་མཛོད་ལ། །འཁོར་བའི་མཚོ་ལས་བསྒྲལ་དུ་གསོལ། །ཚེ་འདིར་ལེགས་པ་ཀུན་འགྲུབ་ཅིང་། །བགེགས་དང་བར་ཆད་མེད་པ་དང་། །འཆི་ཁར་ཟབ་མོའ་འོད་གསལ་ཟིན། །བར་དོའ་འཕྲང་ལས་སྒྲོལ་བར་མཛོད། །ལུས་དང་ངག་ཡིད་བརྩམས་པ་ཀུན། །རྟག་ཏུ་གཞན་ལ་ཕན་པ་དང་། །རྐྱེན་རྣམས་བྱང་ཆུབ་ལམ་མཆོག་ཏུ། །དེ་རིང་ཉིད་ནས་བསྒྱུར་དུ་གསོལ། །བདག་གིས་འབད་ཀྱང་ཐར་པ་དཀའ། །མགོན་པོ་ཁྱོད་ཀྱིས་ཐུགས་རྗེས་གྲུས། །མགོན་མེད་བདག་དང་འགྲོ་བ་ཀུན། །ཐར་པའི་གླིང་དུ་ཕྱིན་པར་མཛོད། །གང་དག་བདག་ལ་དད་གྱུར་ཏམ། །སྨོད་དང་སྐུར་པ་འདེབས་ཀྱང་རུང་། །དེ་དག་སྡིག་བྱང་ཉོན་མོངས་མེད། །སྲིད་པའི་ཆུ་བོ་སྤང་བར་ཤོག །ནམ་ཞིག་བདག་གི་མིང་ཙམ་གྱིས། །འགྲོ་བའི་འདོད་དགུ་རབ་སྒྲུབ་ཅིང་། །ཕྱོགས་བཅུ་གང་བའི་ཞིང་རྣམས་སུ། །མཆོད་པའི་སྤྲིན་གྱིས་ཆར་འབེབས་ཤོག །དགེ་བ་འདི་ཡིས་ལུས་ཅན་ཀུན། །ཐམས་ཅད་སྲིད་ལས་རྣམ་གྲོལ་ནས། །ཡེ་ཤེས་དམ་པ་གཉིས་ཐོབ་སྟེ། །དོན་གཉིས་ལྷུན་གྱིས་གྲུབ་པར་མཛོད། །ཅེས་གསོལ་བ་དྲག་ཏུ་བཏབ་པས། ཞབས་ཀྱི་མཐེ་བོང་ལས། བདུད་རྩིའི་རྒྱུན་བབས། །བདག་དང་སེམས་ཅན་ཐམས་ཅད་ཀྱི་སྤྱི་བོ་ནས་ལུས་ཕྱི་ནང་ཐམས་ཅད་ཁྱབ་པས། ལུས་ཀྱི་སྒྲིབ་པ་དག །སྐུའི་དངོས་གྲུབ་ཐོབ། མགྲིན་པར་བབས། ངག་གི་སྒྲིབ་པ་དག །གསུང་གི་དངོས་གྲུབ་ཐོབ། སྙིང་གར་བབས། ཡིད་ཀྱི་སྒྲིབ་པ་དག །ཐུགས་ཀྱི་དངོས་གྲུབ་ཐོབ། ལྟེ་བར་བབས། དྲི་མ་ཐམས་ཅད་དག །

ཤོག་ལྷེ་༡༦༤ཡོན་ཏན་གྱི་དངོས་གྲུབ་ཐོབ། གསང་བར་བབས། ཕྲིན་ལས་ཀྱི་དངོས་གྲུབ་ཐོབ། བདེ་བ་དང་སྟོང་པ་གཉིས་སུ་མེད་པར་གྱུར། མཐར་མོས་གུས་ཀྱི་ཤུགས་ཀྱིས་བླ་མ་འོད་དུ་ཞུ་ནས་རང་ལ་ཐིམ་པས་དབྱེར་མེད་དུ་གྱུར་པར་མོས་ལ་བཅོས་བསླད་བྲལ་བའི་རང་རིག་གི་ངོ་བོ་ཅི་ནུས་བསྐྱང་ངོ་། །ཐུན་ལས་ལྡང་བ་ན། རང་བཞིན་དག་པའི་དགེ་བ་འདིས། །འཁོར་བ་ངན་སོང་དོང་སྤྲུགས་ཏེ། །སྲིད་ན་འགའ་ཡང་མི་གནས་པར། །ཐམས་ཅད་སངས་རྒྱས་མྱུར་ཐོབ་ཤོག །ཅེས་སོགས་བསྔོ་སྨོན་གྱིས་མཚམས་སྦྱར་ཏེ་སྤྱོད་ལམ་ལ་འཇུག །ཐུན་མཚམས་ཐམས་ཅད་དུའང་སྣང་གྲགས་རིག་གསུམ་བླ་མའི་གསང་བ་གསུམ་གྱི་ཡེ་ཤེས་སུ་ལམ་དུ་ཁྱེར་ཞིང་ཚོགས་གཉིས་ཟུང་འབྲེལ་གྱི་རྣལ་འབྱོར་ལ་བརྩོན་པར་བྱའོ། །འདིར་རྣམ་གཞག་གོ་དོན་ཕན་ཡོན་སོགས་སྤྲོ་ན་སྤྱི་དང་མཚུངས་པར་འཆད། ཚོགས་བསགས་ཀྱི་རིམ་པ་འདི་དག་སོ་སོར་འབུམ་ཐེར་ལ་སོགས་པ་ཐུན་དུ་བཅད་དེ་བརྩོན་སྐབས་སོ་སོའ་རྗེས་སུ་བསྔོ་སྨོན་གྱི་རྒྱས་གདབ་པ་དང་། ཐུན་མཚམས་སུ་སྐབས་དེ་དང་དེར་འབྲེལ་བའི་ལམ་ཁྱེར་གྱི་གནད་སོགས་ཀྱང་སྤྱི་ལྟར་ཤེས་པར་བྱའོ། །སྔོན་འགྲོ་སྤྱིར་བཤད་པ་དེ་རྣམས་སྨིན་གླིང་གི་ཁྲིད་རྒྱུན་དཀྱུས་སུ་འབྱུང་བ་ཡིན་ཅིང་། དེའང་ཁྲིད་ཚུལ་སྤྱི་དང་མཐུན་པའི་འདོན་སྒོམ་ཟོར་ཡང་གཙོ་བོར་བཏོན་པར་སྣང་ལ། བྱེ་བྲག་ཏུ་བསྟན་པ་རྣམས་ནི་ཡང་ཏིག་ཡིད་བཞིན་ནོར་བུ་ལས་དངོས་སུ་གསལ་བའི་ཐུན་མོང་མ་ཡིན་པར་སྣང་བས། རྗེ་བླ་མས་ཀྱང་འདི་ལྟར་ལེགས་ཞེས་དངོས་སུ་བཀས་གནང་བ་དང་། རིག་འཛིན་ཆེན་པོ་སོགས་ཀྱི་ཁྲིད་རྒྱུན་ལས་ཀྱང་འབྱུང་བར་སྣང་བས་འདོན་སྒོམ་མ་ཆད་ན་དགོས་པ་ཆེ་སྙམ་ཡིག་ཚོགས་ལ་མ་འཛེམ་པར་དཀྱུས་སུ་བཀོད་པ་

ཤོག་ལྷེ་༡༦༥ཡིན་ནོ། །བཞི་པ་གསང་སྔགས་སྤྱི་མཐུན་གྱི་ཐབས་ལམ་རླུང་ཐིག་གིས་ལུས་སེམས་སྦྱོང་བ་ལ་གཉིས། ཆགས་བྲལ་རླུང་ལ་བསླབ་པ་དང་། ཆགས་ཅན་ཐིག་ལེ་ལ་སློབ་པའོ། །དང་པོ་ལ་ལྔ། རླུང་གི་ཁ་དོག་ལ་སློབ་པ། དབྱིབས་ལ་སློབ་པ། གྲངས་ལ་སློབ་པ། འགྲོ་འོང་ལ་སློབ་པ། བྱམ་པ་ཅན་ལ་སློབ་པའོ། །དང་པོ་ནི། ལུས་གནད་ཆོས་བདུན་དྲངས་པོར་བསྲངས་ལ་མིག་གནང་མཐོ་དམའ་བྱིང་རྒོད་དང་མཐུན་པར་བལྟ། ངག་གནད་སྣ་བུག་གཉིས་ནས་རླུང་རོ་དལ་ལ་རིང་བ་གསུམ་བསལ། ཡིད་ཀྱི་གནད་སྨིན་མཚམས་སུ་རླུང་རྣམས་འདུས་པའི་ངོ་བོ་ཐིག་ལེ་དཀར་པོ་ཡུངས་འབྲུ་ཙམ་གསལ་ཞིང་འབར་བ་ཞིག་གསལ་བཏབ་ལ་རེ་དོགས་སྐྱོན་ཡོན་དགག་སྒྲུབ་སོགས་དུས་གསུམ་གྱི་རྣམ་པར་རྟོག་པ་ཀུན་སྤངས་ཏེ་ཐིག་ལེའི་རྣམ་པ་དེ་ཁ་ལ་སེམས་རྩེ་གཅིག་ཏུ་གཏད་ལ་བསྒོམ། རྣམ་རྟོག་ཇེ་ཕྲ་ཇི་ལྟར་ཤར་ཡང་འཕྲོ་བཅད་ལ་ཐིག་ལེའི་སྟེང་དུ་ཧྲིལ་གྱིས་བསྒྲིམས་ལ་འཇོག །ཡང་རིག་པ་གཡེར་ཞིང་འཕྲོ་རྒོད་ཆེར་སོང་ན་ཐིག་ལེའི་རྣམ་པ་ཡིད་ཀྱི་ཡུལ་དུ་ལམ་མེར་གསལ་བ་ལ་ཧ་ཅང་གྲིམས་མ་དྲག་ཙམ་གྱིས་དྲན་པའི་རྒྱང་སོ་བཅུགས་ལ་ལྷོད་ཀྱིས་འཇོག་སྟེ། རང་རིག་དང་ཐིག་ལེ་སོ་སོར་མི་བལྟ་བར་དབྱེར་མེད་རང་གསལ་ཞེན་འཛིན་མེད་པའི་ངང་དུ་སྐྱོང་ཞིང་། ཐིག་ལེའི་རྣམ་པ་ཁོ་ན་ལ་སེམས་ཟིན་ཅིང་བརྟན་པར་གྱུར་པ་དང་། ཐིག་ལེའི་མདངས་འོད་ཀྱིས་རང་གི་མགོ་བོ་དང་། དེ་ནས་ལུས། དེ་ནས་ཐོ་ཕྱི་དང་ཡུལ་ཁམས་ཐམས་ཅད་ཁྱབ། མཐར་སྣང་བ་ཐམས་ཅད་རླུང་གི་རང་བཞིན་དཀར་མེ་རེ་བ་ལ་ཤེས་པ་གཏད། །ཡང་རིམ་གྱིས་ཚུར་འདུས། སྨིན་མཚམས་རྩ་བའི་ཐིག་ལེ་ལ་ཤེས་པ་གཏད། དེ་ལྟར་སྤྲོ་བསྡུ་

ཤོག་ལྷེ་༡༦༦རེས་འཇོག་ལ་བསླབ་པས་ལུས་ཡང་། ངག་གསལ། སེམས་གནས་པ་སོགས་རྟགས་མ་ཐོན་གྱི་བར་དུ་བསྒོམ་པ་ནི་ཕྱི་མ་རྣམས་ལའང་འགྲེ། །གཉིས་པ་ནི། སྣ་རྩེར་རླུང་གི་ཐིག་ལེ་དཀར་སྔོ་ཆེ་ཆུང་བོད་སྲན་ཙམ་པ་ཞིག་གསལ་བཏབ། དེ་གསལ་བ་དང་སྣ་བུག་གི་རླུང་འགྲོ་འོང་དལ་བ་ལ་བརྟེན་ནས་རླུང་ཕྱིར་དབྱུང་ཚེ་ཐིག་ལེ་དེ་རླུང་དང་འགྲོགས་ནས་སྐྱ་ཡེར་གྱི་སོང་། ནང་དུ་འཇུག་ཚེ་རླུང་དང་ལྷན་ཅིག་བྱུང་བ་སྣ་རྩེར་གྲང་བསིལ་གྱིས་གནས་པར་བསམ། དེ་ཡང་ལུས་གྲང་ཤས་ཆེ་ན་ཐིག་ལེ་ཁ་དོག་དམར་པོ་རེག་བྱ་ཚ་བར་བསྒོམ། ཡང་ན་མཛོད་པུར་བསྒོམས་ཀྱང་ཆོག་གསུངས། །གསུམ་པ་ནི། རླུང་དང་ཤེས་པ་འགྲོ་ལྡོག་གཅིག་ཏུ་བྱས་ཏེ། རྒྱུན་གྱི་དབུགས་འབྱུང་འཇུག་གནས་གསུམ་པོ་འདི་དག་རང་བབ་ཏུ་བགྲང་བ་ལ་ཤེས་པ་རྩེ་གཅིག་ཏུ་གཏད་དེ་ཁུག་པ་རེ་ལ་གཅིག་ཏུ་བརྩིས་པའི་གྲངས་མ་ཡེངས་པར་བཟུང་། རིམ་གྱིས་རྒྱུ་བ་ཇེ་དལ་ཇེ་རིང་ལ་གཏང་ནས་མཐར་ཡུན་རིང་དུ་གནས་པ་མ་བྱུང་གི་བར་དུ་སྦྱང་ངོ་། །བཞི་པ་ནི། རང་ལུས་སྟོང་ཆེན་སྒྲིབ་ཐོགས་དང་བྲལ་བའི་ལྟེ་བར་ཐོད་པ་ཕྱི་དཀར་ལ་ནང་དམར་བ་དཔྲལ་བ་མདུན་ཕྱོགས་སུ་བསྟན་པ་ཞིག་གསལ་གདབ། དེའི་ནང་དུ་རླུང་གི་རྡོ་རྗེ་སྔོན་པོ་གྱེན་ལངས་ནས་འབྲས་ཙམ་པ་ལ་སེམས་གཏད་ནས་ཅི་ནུས་བསྒོམ། དེ་ལ་གསལ་བརྟན་གྱི་ཉམས་སྐྱེས་པ་ན་སྣ་སྒོའི་རླུང་འགྲོ་འོང་དང་བསྟུན་ནས། རླུང་ཕྱིར་འགྲོ་བའི་ཚེ་རྡོ་རྗེ་སྣ་བུག་གཡས་ནས་སྔོ་རྒྱང་གི་སོང་། ཚུར་འོང་བ་ན་གཡོན་ནས་ཞུགས་ཏེ་ཐོད་པར་གནས་པར་བསམ་ཞིང་ལུས་སེམས་བདེ་ཕྲིལ་ཕྲིལ་བ་ལ་བློ་བཞག །གོམས་ནས་སེམས་གནས་ཇེ་བརྟན་དུ་སོང་རིམ་བཞིན་རྡོ་རྗེ་ཕྱིར་འགྲོ་བའི་ཚད་ཇེ་ཐུང་དུ་བཏང་། མཐར་སྣ་རྩེའི་སོར་བཅུ་དྲུག་གི་ཚད་ཙམ་

ཤོག་ལྷེ་༡༦༧ཙམ་དུ་འགྲོ་འོང་བྱེད་པར་བསམ། ལྔ་པ་ནི། སྔ་མ་གོམས་པ་དང་དམིགས་པའི་གཞི་སྔར་གྱི་འགྲོ་འོང་དེ་ཀ་ལན་ཁ་ཤས་བྱས་རྗེས་རླུང་ཕྲ་ལ་རིང་བ་ཞིག་འཕངས་པས་རྡོ་རྗེ་སྣ་བུག་གཡས་ཀྱི་ལམ་ནས་རྒྱང་རིང་པོར་སོང་བར་བསམ་ལ་རླུང་ཕྱིར་མནན། དེ་ནས་རླུང་ནང་དུ་ཤར་གྱིས་དྲངས་པས་རྡོ་རྗེ་སྣ་བུག་གཡོན་ནས་ཞུགས། ལྟེ་བའི་ཐོད་པ་ལ་སིབ་ཀྱི་ཐིམ་པར་བསམ་ལ་བུམ་ཅན་གཡོ་མེད་ཁ་སྦྱོར་དུ་འཆིང་། དེའི་ཚེ་ཐོད་པ་ཡང་ཞུ་ནས་ཧ་ཡིག་དམར་པོའ་རྣམ་པར་གྱུར་པ་ལ་བློ་བཞག་སྟེ་རླུང་དང་ལུས་ཐམས་ཅད་ན་བུན་ཡལ་བ་ལྟར་བུན་ལོང་དུ་གྱུར་པར་བསམ་ལ། བུམ་པ་ཅན་གྱི་རླུང་སྦྱོར་བ་བཞི་ལྡན་དྲག་ཏུ་དགོང་། རླུང་གཏོང་བའི་ཚེ་རླུང་སེམས་ནམ་མཁའ་དང་བསྲེས་ནས་མི་རྟོག་པའི་ངང་དུ་བཞག་གོང་དུ་བུམ་ཅན་འབྱོངས་ཟིན་པ་ཡིན་ན་འདིར་ཅི་ནུས་རེ་བསྒོམ་པས་ཆོག་གོ །དེ་མིན་རབ་འབྲིང་ཐ་མ་གང་རུང་མ་འགྲུབ་ཀྱི་བར་དུ་སྦྱོང་ཞིང་དེའང་ཐོག་མར་ཧ་ཅང་མ་དྲགས་པའི་རན་པར་བཟུང་ན་གེགས་ཆུང་བ་ཡིན་ནོ། །ལུས་གནད་དང་རླུང་རོ་བསལ་བ་ནི་སྤྱི་གནད་ཡིན་པས་གོང་སྨོས་ལྟར་ཐམས་ཅད་ལ་སྦྱོར་རོ། །གཉིས་པ་ཆགས་ཅན་ཐིག་ལེའི་རྣལ་འབྱོར་ལ་བསླབ་པ་ལ། དངོས་རིག་མ་ལ་བརྟེན་ནས་ལུས་གྱི་བདེ་བ་ལ་སློབ་པ་ནི་ལག་ཏུ་མི་ལོན་པས་ཁྲིད་རྒྱུན་དཀྱུས་ལ་མི་འབྱུང་ཞིང་། དེའི་ཚུལ་བདེ་སྟོང་བདུད་རྩིའི་སྤྲིན་ཕུང་སོགས་སུ་གསལ་བ་ལྟར་རོ། །རྗེས་མཐུན་རླུང་ཐིག་གི་བདེ་བ་ལ་སློབ་པ་ནི། ལུས་གནད་རྐང་པ་སྐྱིལ་ཀྲུང་། ལག་པ་ཁུ་ཚུར་ཁ་སྦུབ། པུས་མོའ་བརླ་སྟེང་དུ་བཞག་ལ་ལག་ངར་བསྲང་། མིག་ཐད་ཀར་ཆེར་རེ་མིག་འབྲས་མི་བསྒྱུར་ཞིང་རྫི་མ་མི་བརྡེག །སེམས་གནད་རང་ལུས་སྟོང་གསལ་ཕྲུ་མ་ཕུས་བཏབ་པ་ལྟར་གྱུར་པའི་དབུས་སུ། རྩ་དབུ་མ་སྦོམ་ཕྲ་མདའ་སྨྱུག་འབྲིང་པོ་

ཤོག་ལྷེ་༡༦༨པོ་ཙམ་པ། ཁ་དོག་དམར་སྐྱའམ་ཕྱི་དཀར་ལ་ནང་དམར་བ་ཡིད་ཡུལ་དུ་གསལ་གང་བདེ་བ་ཞིག་བསྒོམས་ལ། དེ་ཡང་ཡར་སྣ་ཚངས་བུ་ག་དང་མར་སྣ་ལྟེ་འོག་སོར་བཞིའི་ཐད་དུ་ཆུ་ཤིང་གི་སྡོང་པོ་ལྟར་དྲང་ཞིང་ཏིལ་གྱི་མར་མེ་བཞིན་དུ་གསལ་བ་རང་འོད་འཕྲོ་བ། པདྨའི་སྣལ་མ་ལྟར་ཤིན་ཏུ་སྲབ་པ། དེའི་གཡས་སུ་རོ་མ་དམར་མོ་དང་གཡོན་དུ་རྐྱང་མ་དཀར་པོ་དབུ་མ་ལས་ལྡབ་འགྱུར་གྱིས་ཕྲ་བ། ཡར་སྣ་སྨིན་མཚམས་ཀྱི་ཐད་ནས་གུགས་ཏེ་སྣ་བུག་གཡས་གཡོན་དུ་ཟུག་ཟུག་ཅིང་མས་སྣ་གཉིས་དབུ་མའི་མས་སྣར་ཚུད་པ། དེ་ལྟར་རྩ་གསུམ་སུམ་གཤིབས་སུ་ཐལ་གྱི་ཡོད་པ་ལས་འཁོར་ལོ་བཞིའི་མཚམས་རྣམས་སུ་རོ་རྐྱང་གཉིས་དབུ་མ་ལ་ཐིམ་པའི་ཚུལ་གྱིས་ནང་ཁོངས་འབྲེལ་བར་གནས་པ། དེ་ལས་གྱེས་པའི་འཁོར་ལོ་བཞི་བསྒོམ་སྟེ། དེ་ཡང་དབུ་མའི་ཡར་སྣེ་ལས་རྩེ་སོར་གཉིས་གཞལ་བའི་མཚམས་ན་རྩེ་མོ་རྣམ་པར་བཀོད་པའི་འཁོར་ལོ། །མགྲིན་པའི་ཕྲག་པ་སྐྱེས་མཚམས་ནས་རོ་རྣམས་འདུས་པའི་འཁོར་ལོ། །སྙིང་གའི་ནུ་ཕྲག་གི་ཐད་ནས་དྲན་པ་འདུས་པའི་འཁོར་ལོ། །ལྟེ་ཁུང་གི་ཐད་ནས་སྐྱེ་བྱེད་ཀྱི་འཁོར་ལོ་སྟེ། ཐམས་ཅད་ཀྱང་ཁ་དོག་དམར་སྐྱ་དྭངས་གསལ་སྦུབས་སྟོང་གི་རྣམ་པ་གསལ་བར་བསྒོམ་མོ། །དེ་ནས་སྤྱི་བོའ་རྩེ་མོ་རྣམ་བཀོད་ཀྱི་འཁོར་ལོའ་དབུས་སུ་ཐིག་ལེ་སྟོང་པའི་སྒྲོན་མ་ཁ་དོག་དཀར་ལ་སྣུམ་ཞིང་འདྲིལ་བ་སྲན་མ་ཙམ་ཞིག་གསལ་བཏབ་ནས་དེ་ཉིད་ལ་སེམས་རྩེ་གཅིག་ཏུ་གཏད་ལ་བསྒོམ། དེ་ལ་སེམས་ཟིན་པ་ན་རླུང་རོ་ལན་གསུམ་བསལ་ལ་སྟེང་རླུང་ནར་གྱིས་རྔུབ། ལྟེ་བར་བསྒྱུར་སྟབས་སུ་མནན་ཅིང་འོག་རླུང་དྲག་ཏུ་བསྐུམས་པས་ཐིག་ལེ་དེ་ཉིད་འདར་ཕྲི་ལི་ལི་བྱེད་པ་དང་། དེ་ལས་བྱང་སེམས་བདེ་བའི་རྒྱུན་སྲན་ཆུང་ཙམ་གཅིག་རྗེས་གཅིག་ནོན་དུ་བདེ་ཕྲི་ལི་ལི་བབས་པའམ། ཡང་ན་བ་ཐག་ལྟ་བུ་ན་ར་ར་

ཤོག་ལྷེ་༡༦༩བབས་པ་གང་བདེ་བྱས་ལ་སྤྱི་བོ། །མགྲིན་པ། སྙིང་ག །ལྟེ་བའི་འཁོར་ལོ་བཞི་རིམ་པར་གང་བས་དགའ་བཞིའི་ཡེ་ཤེས་སྐྱེས་པར་བསམ། ཐིག་ལེ་གསང་བར་བརྟན་པར་གྱུར་པས་དངོས་པོ་ལྷན་ཅིག་སྐྱེས་པའི་ཡེ་ཤེས་ཉམས་སུ་མྱོང་བར་བསམ་ཞིང་། དེ་རེ་རེའི་ངང་མདངས་བསྐྱངས་ལ་བུམ་ཅན་ཅི་ནུས་བཟུང་བས་བདེ་བ་ཇེ་རྒྱས་སུ་སོང་། ལུས་སེམས་བདེ་བས་ཁྱབ། སླར་ཡང་གྱེན་དུ་རིམ་གྱིས་དྲངས་པས་མས་བརྟན་གྱི་དགའ་བཞི་ཉམས་སུ་མྱོང་། སྤྱི་བོའ་ཐིག་ལེ་ལ་སིབ་སིབ་ཐིམ་ཞིང་བརྟན་པར་གྱུར་པས་རང་བཞིན་ལྷན་ཅིག་སྐྱེས་པའི་ཡེ་ཤེས་ཉམས་སུ་མྱོང་བར་བསམ་ལ་དེའི་ངང་མདངས་ཅི་ནུས་བསྐྱང་། མཐར་ཐིག་ལེ་དེ་ཇེ་ཆུང་ཇེ་ཕྲར་གྱུར་ཏེ་མི་དམིགས་སྤྲོས་པ་དང་བྲལ་བའི་ངང་དུ་ཅི་ནུས་སུ་འཇོག །བདེ་སྟོང་ཟུང་འཇུག་རང་རིག་རང་གསལ་དེ་ཉིད་ཐུན་མཚམས་རྣམས་སུ་ཡང་བསྐྱང་ཅི་ཐུབ་བྱ། འདིར་ལྟེ་བར་ཨ་ཐུང་མི་བསྒོམ་པ་ནི་མན་ངག་གི་བྱང་བར་ཡིན་ཅིང་། བདེ་སྟོང་བདུད་རྩིའི་སྤྲིན་ཕུང་གི་རང་ལུས་སྦྱོང་སྐབས་ལྟེ་བའི་ཨ་ཐུང་བསྒོམ་པར་ཡང་གསུངས་པས་བདེ་དྲོད་སྐྱེ་དཀའ་བའི་རིགས་ལ་དེ་ལྟར་ཡང་ལེགས་པར་མངོན་ནོ། །དེ་ལྟར་འབད་པས་ལུས་སེམས་བདེ་སྟོང་དུ་འགྲོ་ཞིང་རླུང་ཐིག་ལས་སུ་རུང་བས་འབྱུང་བ་ལྔ་ལ་ཐོགས་པ་མེད། ཟས་སྐོམ་གྱི་སྲེད་པ་ལས་གྲོལ་སེམས་ལ་རང་དབང་ཐོབ། རང་བཞིན་རྫོགས་པ་ཆེན་པོའ་བསམ་གཏན་གྱི་རིམ་པ་དཔག་ཏུ་མེད་པའི་ཡོན་ཏན་མཐའ་ཡས་པ་དག་ཀྱང་ཐོབ་པར་འགྱུར་རོ། །དེ་ལྟར་ཆགས་བྲལ་རླུང་གི་རྣལ་འབྱོར་དང་། ཆགས་ཅན་ཐིག་ལེའི་རྣལ་འབྱོར་ནི་ལམ་གཞན་ལས་རླུང་འབྱོངས་པའི་གང་ཟག་ལ་མ་བཤད་ཀྱང་ཆད་པའི་སྐྱོན་དུ་མི་འགྱུར་ཞིང་། ཀུན་མཁྱེན་ཆེན་པོའ་དོན་

ཤོག་ལྷེ་༡༧༠ཁྲིད་དུའང་མ་གསུངས་པས་རྩ་རླུང་མི་ཆུན་པའི་གང་ཟག་ལའང་མ་བསྟན་ཀྱང་ཆོག་པར་མངོན་ནོ། །ལྔ་པ་དྲན་པ་རྒྱུན་གཅོད་ཀྱི་མན་ངག་གིས་འབྱུང་བ་ལྔ་རང་སར་དེངས་པར་བྱེད་པའི་གནད་བསྟན་པ་ལ་གཉིས། ཨ་ལྔ་སྐྱེམ་ཀྱི་དོན་ཉམས་སུ་ལེན་པ། འབྱུང་འཁྲུགས་བྱིངས་རྒོད་ཀྱི་གེགས་སེལ་བའོ། །དང་པོ་ནི། འབྱུང་བཞི་ཟད་པའི་རྒྱུད་ཆེན་ནམ་མཁའ་ལ། །འཁྲུལ་གཞི་ཟད་པའི་རིག་པ་རྒོད་ཡན་དེ། །སྣ་ཚོགས་ཁྱབ་བརྡལ་ཆེན་པོའ་ཁང་བཟང་དུ། །འཛིན་བྱེད་དྲན་པ་ཟད་པའི་ལྕགས་ཀྱུ་ཡིས། །གསལ་བྱེད་སྟེང་འོག་མེད་པའི་སྙིང་ནང་ནི། །མ་ཡེངས་བསམ་པ་ཟད་པའི་ཚུལ་གྱིས་བཟུང་། །ཞེས་འབྱུང་བས། ཨ་ལྔའི་དོན་སྐྱེ་བ་མེད་པར་ཉམས་སུ་བླང་བར་བགྱིའོ་སྙམ་ནས་ལུས་གནད་རྣམ་སྣང་ཆོས་བདུན་བཅའ། རླུང་ཁ་ནས་དྲངས་ཏེ་དལ་བུས་ཕྱིར་བཏང་། དལ་བུས་ནང་དུ་རྔུབས་ལ་རྩོལ་བ་ལྷོད་པའི་ངང་ཅུང་ཟད་འཐེན་ལ། སྙིང་གར་ནམ་མཁའ་རྣམ་པར་དག་པའི་ངོ་བོ་ཨ་སྔོན་པོ་མཚོན་གང་བ་ཞིག་བསམས་ལ། དེར་ཤེས་པ་གཏད་དེ་རླུང་སེམས་ཀྱི་འདུ་བྱེད་ཐམས་ཅད་བསྟིམས་ནས་རྟོག་མེད་སྤྲོས་བྲལ་གྱི་ངང་ལ་བཞག་པས་ནམ་མཁའ་དག་པར་བྱེད་དོ། །དེ་བཞིན་དུ་སྤྱི་བོའ་འཁོར་ལོའམ་སྣ་རྩེའི་ཐད་ཀྱི་མདུན་དུ་རླུང་རྣམ་པར་དག་པའི་ངོ་བོ་་་ལྗང་གུ་ཉིས་བརྩེགས་ལ་ཤེས་པ་གཏད་དེ་རླུང་དང་རྣམ་རྟོག་གཡོ་བ་ཐམས་ཅད་བསྟིམས་ནས་སྔར་བསྒོམས་པས་རླུང་དག་པར་བྱེད་དོ། །ཡང་སྙིང་གའམ་སྣ་རྩེར་ཆུ་རྣམ་པར་དག་པའི་ངོ་བོ་།།།་དཀར་པོ་སུམ་བརྩེགས་ལ་ཤེས་པ་གཏད་དེ་འདུ་ཤེས་དང་རླུང་ཐམས་ཅད་དྲན་པ་རང་ཡུལ་དུ་བཏང་ནས་རླུང་ཕྱིར་འཛིན་ཅུང་ཟད་དང་དབུགས་ཀྱི་འགྱུ་བ་བཅད་དེ་བཞག་པས་ཆུ་དག་པར་བྱེད་དོ། །ཡང་མགྲིན་པའམ་མདུན་

ཤོག་ལྷེ་༡༧༡མཁར་མེ་རྣམ་པར་དག་པའི་ངོ་བོ་།།།་དམར་པོ་བཞི་བརྩེགས་ལ་ཤེས་པ་གཏད་དེ་འཛིན་ཡུལ་ཚོར་སོགས་སྡུད་བྱེད་ཀྱི་དྭངས་མ་མིག་གི་རྣམ་ཤེས་རང་དག་ལ་སེམས་བཟུང་བས་མེ་དག་པར་བྱེད་དོ། །ཡང་ལྟེ་བའམ་པར་སྣང་ལས་རྣམ་པར་དག་པའི་ངོ་བོ་ཡི་གེ་་།།།སེར་པོ་ལྔ་བརྩེགས་ལ་ཤེས་པ་གཏད་དེ་བཟུང་ཡུལ་མཆེད་པ་ཐམས་ཅད་བསྟིམས་ནས་སྒོ་ལྔ་འཛིན་མེད་དུ་བཞག་པས་ས་རྣམ་པར་དག་པར་བྱེད་དོ། །རང་བྱུང་ཞབས་ཀྱི་མན་ངག་ཏུ་རླུང་རོ་བསལ་བ་དང་བཅས་བུམ་པ་ཅན་གྱི་རླུང་སྦྱོར་བྱས། རྩ་གསུམ་འཁོར་ལོ་བཞི་གསལ་བཏབ། འཁོར་ལོ་སོ་སོའ་ལྟེ་བར་གནས་ཀྱི་རང་མདོག་དང་མཚུངས་པའི་ཨ་ལྔ་བརྩེགས་རེ་རེ་བསྒོམ། རེ་རེ་བཞིན་རླུང་སེམས་བསྟིམས་ལ་རླུང་ཁུག་ཇི་ལྟར་རིགས་པ་བཟུང་། མཐར་དེ་རྣམས་རང་ཡལ་མི་རྟོག་པའི་ངང་དུ་བློ་འཇོག་པར་གསུངས་སོ། །གཉིས་པ་ནི། དེ་ལྟར་སྒོམ་པའི་སྐབས་སུ་འབྱུང་བ། འཁྲུགས་པ་དང་བྱིང་རྒོད་ཤས་ཆེ་བར་གྱུར་ན་དེ་དག་སེལ་བའི་མན་ངག་ནི། སྙིང་ཐིག་ཆེན་མོ་ལྟར་ན། སའི་སྐྱོན་གྱིས་ལུས་ལྕི་ཞིང་སེམས་བྱིངས་འཐིབས་སུ་གྱུར་པ་ལ་སྤྱི་བོའ་འཁོར་ལོར་ཡཾ་ལྗང་ནག་བསྒོམས་པ་ལ་རླུང་སེམས་བཅུག་སྟེ་རླུང་བཟུང་། གཏོང་བ་ན་ནམ་མཁར་སྔོ་ཕྱུར་ཕྱུར་སོང་བར་བསམས་པས་སེལ་ལོ། །ཡང་ཆུའི་སྐྱོན་གྱིས་གྲང་ཞིང་འདར་ན་མགྲིན་པའི་འཁོར་ལོར་རཾ་དམར་པོ་འབར་བ་སྒོམ་ཞིང་རླུང་དྲག་ཏུ་གཅུན་པས་ལྟེ་འོག་རྩ་གསུམ་འདུས་མདོའ་ཧ་ཡིག་དམར་པོ་ལས་ཀྱང་མེ་འབར་བས་ལུས་ཀྱི་ནང་གང་བར་བསམ་ན་སེལ་ལོ། །ཡང་མེའི་སྐྱོན་གྱིས་ཚ་ཞིང་ལུས་བཙེ་བ་སོགས་བྱུང་ན་སྙིང་གའི་འཁོར་ལོའམ་ཕོ་བར་ཁམ་དཀར་བསིལ་འཁྱག་པ་ལྟ་

ཤོག་ལྷེ་༡༧༢བུ་བསྒོམས་ལ་སོ་བར་ནས་སིད་ཀྱི་སྒྲས་རླུང་དབྱུང་བས་སེལ་ལོ། །ཡང་རླུང་གི་སྐྱོན་གྱིས་ཤེས་པ་འཕྱོ་ཞིང་སྟོད་འཚངས་པ་སོགས་བྱུང་ན་ལྟེ་བ་ལཾ་སེར་པོ་ལྕི་ཐིབས་ཞིག་བསྒོམས་ལ་རླུང་སེམས་མཐུར་དུ་གཏད་པས་སེལ་ལོ། །དེ་དག་ཐམས་ཅད་ལའང་བུམ་པ་ཅན་གྱི་རླུང་སྦྱོར་བྱའོ། །ཡང་ཏིག་ཡིད་བཞིན་ནོར་བུ་ལྟར་ན། བདེ་ཆེན་འཁོར་ལོའ་ཧཾ་ལས་ཐིག་ལེ་དཀར་བསིལ་བབས་པས་ནད་སོང་བར་བསྒོམས་ལ། རླུང་ཕྱིར་སངས་སངས་ཕུལ་ལ་ཕྱིར་བཟུང་། གྲང་བ་ལ་ལྟེ་བར་སྤྲུལ་པའི་འཁོར་ལོར་རཾ། དེ་ལས་མེ་འབར་བས་བསྲེགས་པར་བསམ་ལ། རླུང་ཁ་སྦྱར་ལ་ནང་དུ་གཟུང་། བད་ཀན་ལའང་དེ་དང་འདྲ་བ་ལས། ཁྱད་པར་དུ་ལོངས་སྤྱོད་འཁོར་ལོའ་ཏྲཱཾ་ལས་བདུད་རྩི་བབས་པས་ནད་སངས་པར་བསམས་ཏེ། རླུང་ཕྱིར་གསུམ་གསུམ་ཕུལ་ལ་ནང་དུ་རེ་རེ་གཟུང་། སེམས་རྒོད་ཅིང་པྲ་ཡས་ན་བདེ་སྐྱོང་འཁོར་ལོའ་ཧཾ་ལས། བདེ་དྲོད་འབར་བ་ལ་སེམས་བཟུང་ཞིང་རླུང་བཟུང་། བསྒོམ་དུས་ཏིང་ངེ་འཛིན་ཇི་ལྟར་བྱས་ཀྱང་མ་སྐྱེས་ན་ཆོས་ཀྱི་འཁོར་ལོའ་ཧཱུྃ་ལས་སྤྱི་བོའ་དྭངས་མ་བབས་པར་བསམས་ཏེ་རླུང་ནང་དུ་བཟུང་བས། ནད་ཀུན་ཞི་ཞིང་ཏིང་ངེ་འཛིན་རང་ལུགས་སུ་སྐྱེ་བ་ཡིན་ནོ། །འདི་དག་ནི་གནད་དམ་པའོ། །འདིའི་དུས་སུ་ཡི་གེ་དེ་དག་ངག་ཏུ་ཡང་བརྗོད་ཅིང་། ཧ་དང་ཧཱུྃ་དང་ཨ་མང་པོ་འདོན་པ་ནི་ཐབས་སོ། །ཞེས་གསུངས་སོ། །གཉིས་པ་དངོས་གཞི་སེམས་རིག་གཏན་ལ་འབེབས་པ་འོད་གསལ་སྙིང་པོའ་དོན་ཁྲིད་བསྟན་པ་ལ་གཉིས། སེམས་གཏན་ལ་དབབ་པའི་མན་ངག་གཞི་ཁྲེགས་ཆོད། རིག་པ་གཏན་ལ་དབབ་པའི་མན་ངག་ལམ་ཐོད་རྒལ་གྱི་ཁྲིད་བསྟན་པའོ། །དང་པོ་ནི། ལྟ་སྒོམ་འབྱེད་པའི་ལྡེའུ་མིག་སྦས་པ་མིག་འབྱེད་ལས།

ཤོག་ལྷེ་༡༧༣འཛིན་ཆགས་མེད་པའི་སྤྱོད་པའི་མན་ངག་གིས་སྣང་བ་ཟིལ་གྱིས་མནན་པ་དང་། དམིགས་གཏད་མེད་པ་སྒོམ་པའི་མན་ངག་གིས་དྲན་བྱེད་ཀྱི་ཡིད་ཟིལ་གྱིས་མནན་པ་དང་། གཟའ་གཏད་མེད་པར་ལྟ་བའི་མན་ངག་གིས་ཞེན་པའི་གཞི་ཉོན་མོངས་པ་ཟིལ་གྱིས་མནན་པ་དང་། སྤངས་ཐོབ་མེད་པར་འབྲས་བུའི་མན་ངག་གིས་རིག་པ་ཕྱིར་མི་ལྡོག་པར་བསྟན་པའོ། །ཞེས་གསུངས་ཤིང་། དེ་དག་ལའང་ཆོས་ཅན་སྤྱི་སྟེ་རྫོགས་པ་ཆེན་པོ་སྤྱི་དང་། ཆོས་ཉིད་རང་གི་བྱེ་བྲག་ཅེས་ཡང་གསང་ཐིག་ལེའི་མན་ངག་འདི་ཉིད་ཀྱི་ལུགས་དང་སྦྱར་བའི་གཉིས་གཉིས། དེ་རེ་རེ་ལའང་གང་གིས། གང་ཞིག །གང་ལྟར། གང་ཐོབ་ཅེས་དོན་བཞི་བཞིའི་སྒོ་ནས་བསྟན་པ་རྣམས་སྤྱོད་པ་བསྡུས་པའི་སྒྲོན་མ་སོགས་སྒྲོན་མ་སྐོར་བཞི་ལས་རིམ་གྱིས་རྟོགས་པར་བྱ་དགོས་ཤིང་། འདིར་སྤྱི་ཙམ་དུ་བསྟན་པ་ལ་བཞི། སྤྱོད་པ། སྒོམ་པ། ལྟ་བ། འབྲས་བུའོ། །དང་པོ་འཛིན་ཆགས་མེད་པར་སྤྱོད་པའི་མན་ངག་ལ་གསུམ། ལས་དང་པོ་པའི་སྤྱོད་པ་ནི། མི་དགེ་བ་ཆ་དང་བཅས་པ་འདོར་ཞིང་། དགེ་བ་ཆ་དང་བཅས་པ་སྤེལ་བ་སྟེ། རྣལ་འབྱོར་པས་ཀྱང་སྤང་བླང་ཤེས་ནས། བླ་མ་དམ་པའི་དྲུང་དུ་སོང་ལ། ཐོས་པས་ཆོས་དང་ཆོས་མ་ཡིན་པ་ཤེས་ཤིང་། ཟབ་མོའ་གདམས་པ་ཁ་ཚང་བ་ཉན་ལ། ཚིག་གི་སྒྲོ་འདོགས་བཅད་ཅིང་། བསམ་པས་དེའི་དོན་ནོར་འཁྲུལ་མེད་པའི་གནད་མི་འཆུག་པར་བྱ་ཞིང་། འཁོར་བ་ལས་བློ་ལྡོག་པའི་ཐབས་ལ་བསླབ་བོ། །སྙིང་པོ་ལྷུར་བླང་པའི་སྤྱོད་པ་ནི། དེ་ནས་རྒྱུས་མེད་པའི་ས་ཕྱོགས་སུ་ཕྱིན་ལ། སྤྲང་པོའམ་རི་དྭགས་ལྟར་གཅིག་པུར་བླ་མའི་གདམས་ངག་ལ་སྤྱད་དེ་ཟས་གོས་ངན་ངོན་གྱིས་ཆོག་ཤེས་པར་བྱས་ལ།

ཤོག་ལྷེ་༡༧༤གདམས་པ་གཞན་ལ་ངོ་མཚར་དུ་མི་འཛིན་པར་རང་གི་མན་ངག་ལ་ཡིད་ཆེས་པར་བྱ་ཞིང་། བྱ་བྱེད་རྩོལ་སྒྲུབ་ཀྱི་ཆོས་ཚེ་འདིའི་འཁྲི་བ་དང་བཅས་པ་ཐམས་ཅད་ལིངས་ཀྱིས་བསྐྱུར་ནས་བསྲན་ཚུགས་པར་བྱས་ཏེ། སྔོན་དུ་འཁོར་འདས་རུ་ཤན་འབྱེད་པའི་སྤྱོད་པས་ལུས་ངག་ཡིད་གསུམ་གྱི་ཞེན་པ་ལོག་པར་བྱ་ཞིང་། །དེ་ནས་སུ་དང་ཡང་འབྲེལ་འདྲིས་མེད་པར་ལྐུགས་པ་ལྟ་བུའི་སྤྱོད་པས་ངག་བཅད་ལ་བརྡ་ཙམ་ཡང་མི་བྱ་བར་བུ་ཆུང་ལྟ་བུའི་སྤྱོད་པ་ཚོགས་དྲུག་ལྷུག་པར་ཀློད་ནས་ཆོས་ཉིད་ཀྱི་དོན་ལ་བསྒོམ་པར་བྱའོ། །བརྟུལ་ཞུགས་ལམ་སློང་གི་སྤྱོད་པ་ནི། དེ་ནས་མི་ཕོད་པ་ལ་ཐོག་འགེལ་དུ་བྱེད་པས། སེམས་ཀྱི་འཁྲི་བ་བཙན་ཐབས་སུ་བཅད་ཅིང་། གཙང་བཙོག་མེད་པ་ཁྱི་ཕག་ལྟ་བུའི་སྤྱོད་པས་བླང་དོར་གྱི་ཞེན་པ་འདོར་བ་དང་། ཤུགས་འབྱུང་འགགས་མེད་སྨྱོན་པ་ལྟ་བུའི་སྤྱོད་པས་རིག་པའི་སྣ་མི་བསྐྱིལ་བར་ཟང་ཐལ་ལ་སྤྱོད་པས་སྣང་བ་ཐམས་ཅད་གྲོགས་སུ་འཆར་བ་ཡིན་ནོ། །དེ་ནས་གཞན་གྱི་མི་དད་པ་བསྒྱུར་ནུས་པ་དང་། བསད་པ་གསོ་ནུས་པ་དང་། འབྱུང་བཞི་དང་རླུང་སེམས་ལ་དབང་བསྒྱུར་ནུས་པའི་དུས་སུ། ཞེན་འཁྲིས་བག་ལ་ཉལ་པ་བཅད་པའི་ཕྱིར། རིག་པ་བརྟུལ་ཞུགས་ཀྱི་སྤྱོད་པ་ཚང་དུས་ལ་སོགས་པར་ཡང་བྱས་པས། ནང་གི་ཉོན་མོངས་པ་ཆོད་པ་དང་། ཕྱིའི་སྣང་བ་དབང་དུ་འདུས་པ་དུས་མཉམ་དུ་འབྱུང་སྟེ་སྣང་བ་དབང་སྒྱུར་གྱི་སྤྱོད་པ་ཞེས་བྱའོ། །མདོར་ན་སྤྱོད་པ་དུས་ཚོད་དང་འབྲེལ་བ་ལ་བསླབ་བོ། །གཉིས་པ་དམིགས་གཏད་མེད་པ་སྒོམ་པའི་མན་ངག་ལ་གཉིས། སེམས་ཀྱི་སྣ་ཁྲིད་པ་སྒོ་གསུམ་གྱི་སྔོན་འགྲོ། །སེམས་རྣལ་དུ་དབབ་པའོ། །དང་པོ་ལ་གསུམ། ལུས། ངག །སེམས་

ཤོག་ལྷེ་༡༧༥ཀྱི་སྔོན་འགྲོའོ། །དང་པོ་ལུས་རྡོ་རྗེའི་འདུག་སྟངས་ལ་སློབ་པ་ནི། སྒྲུབ་པ་པོས་འཇིག་རྟེན་གྱི་བྱ་བ་ཐམས་ཅད་བློས་ལིང་གིས་བཏང་ནས་གཅིག་པུར་དབེན་པར་གནས་ཏེ་རང་གི་མདུན་གྱི་ནམ་མཁར་ཐིག་ལེ་མཐིང་ཁའི་དཀྱིལ་ན་བཀའ་དྲིན་མཉམ་མེད་དྲིན་ཅན་རྩ་བའི་བླ་མ་དེ་ཉིད་སྐུ་དངོས་ཀྱི་རྣམ་པ་ལ་གཅེར་བུ་ཨཱངྒ་རག་གསོལ་བ། རྡོ་རྗེའི་འདུག་སྟངས་ཅན་ཞིག་བསྒོམས་ཏེ་དེ་ལ་དམིགས་ནས་གདུང་ཤུགས་ཀྱི་གསོལ་འདེབས་དྲག་ཏུ་བྱས། ལུས་བརྡབ་ཆག་མི་འབྱུང་བའི་གདན་འབོལ་པ་རྒྱ་ཆེར་བཏིང་བ་སོགས་ཉེར་བསྡོགས་ལེགས་པར་བྱས་ནས། གཅེར་བུར་ཨང་རག་དང་ལྡན་པས་ལུས་བསྲངས་ཏེ་རྐང་མཐིལ་གཉིས་སྦྲད། པུས་མོ་ཕྱིར་བསྐྱེད། ལག་གཉིས་གྲུ་མོ་བརྒྱངས་ཏེ་ཐལ་མོ་མགོ་ལ་མ་རེག་བར་སྦྱར་བ་རྡོ་རྗེ་རྩེ་གསུམ་པའི་འདུག་སྟངས་བྱས་ལ་མིག་བར་སྣང་ལ་ཧ་རེ་གཏད། དམིགས་པ་རང་ལུས་རྡོ་རྗེ་སྔོན་པོ་མེ་འབར་བ་ཞིག་ཏུ་བསྒོམ། མདུན་གྱི་བླ་མ་ཧཱུྃ་མཐིང་ནག་ཏུ་གྱུར། རང་ལུས་རྡོ་རྗེའི་རྣམ་པའི་ལྟེ་བ་ཧྲིལ་པོའ་ནང་དུ་བཞུགས་པ་ལ་ཅུང་ཟད་སེམས་གཏད། དེ་ཡང་ཡལ་ནས་སྙིང་གའི་མི་ཤིག་པའི་ཐིག་ལེའི་དྭངས་མ་དང་དབྱེར་མེད་དུ་གྱུར་པར་མོས་ལ། འ་ཨ་ཤ་ས་མ་ཧ། ཞེས་རྫོགས་ཆེན་ཡིག་དྲུག་བརྗོད། དེ་ནས་སེམས་དུས་གསུམ་གྱི་སྤྲོས་པ་བཅད་ནས་སྤྲོས་བྲལ་རྣམ་པར་མི་རྟོག་པ་ཁོ་ན་མ་གཏོགས་འགྱུ་བའི་རྣམ་པ་ཕྲ་མོས་ཀྱང་མ་རེག་པར་རྟོག་མེད་དུ་བཞག་ནས་ལུས་རང་ཤུགས་ཀྱིས་ཧལ་ཏེ་མ་འགྱེལ་བར་དུ་བསྒོམ། འགྱེལ་རྗེས་སུ་འགྱེལ་ལུགས་ཇི་ལྟར་བྱས་པའི་སྟེང་དེ་ན་ལུས་གཡོ་འགུལ་བཟོ་བཅོས་མི་བྱ་ཞིང་། སེམས་ཀྱང་རྟོག་མེད་དུ་འཇོག་པ་རྒྱང་ཙམ་བྱ། ཡང་བླ་མ་བསྒོམ་པ་ནས་བརྩམས་སྔར་བཞིན་བྱ་བ་ཅི་ནུས་སུ་ཐུན་དུ་བཅད་ནས་ཉི་མ་གསུམ་དུ་འབད་པས་བསྒོམ། དེ་ལྟར་བྱས་

ཤོག་ལྷེ་༡༧༦པས། །དང་པོ་ལུས་ན་ཞིང་ཤ་ཀོར་རྩེར་འཕར་བ་དང་། ཁང་རུལ་ཞིག་པའི་རྣམ་པ་ལྟར་ཤག་ཤག་ཚུགས་མི་ཐུབ་པ་འབྱུང་ཡང་། སྲན་བསྐྱེད་ནས་བསྒོམས་པས་མཐར་ལུས་འབོལ་ལེ་ཤིག་གེ་བ་དང་བདེ་དྲོད་སྐྱེ་བ་བྱུང་ན་གནད་དུ་སོང་བའོ། །དེ་ལ་ཐུན་མོང་གི་དགོས་པ་ནི་ལུས་ཀྱི་མངོན་ཞེན་ཟློག་པ་དང་། བར་ཆད་ཞི་བ་དང་། སྡིག་པ་འདག་པའོ། །མཆོག་གི་དགོས་པ་ནི། ལུས་མངལ་གྱི་གྲོང་ཁྱེར་དུ་མི་འཇུག་པ་དང་། སྤྲུལ་སྐུར་གྲོལ་བ་དང་། མཐར་ཐུག་སངས་རྒྱས་ཀྱི་སྐུ་རྡོ་རྗེ་དང་གཉིས་སུ་མེད་པར་འགྱུར་རོ། །གཉིས་པ་ངག་གི་སྔོན་འགྲོ་ལ་བཞི། རྒྱས་གདབ་པ། རྩལ་སྦྱོང་བ། མཉེན་བཙལ་བ། ལམ་དུ་གཞུག་པའོ། །དང་པོ་ལ་གཉིས། ཕྱི་སྣང་བ་ལ་རྒྱས་གདབ་པ་དང་། ནང་ཕུང་པོ་ལ་རྒྱས་གདབ་པའོ། །དང་པོ་ནི། མདུན་མཁར་བླ་མ་སྐུ་དངོས་ཀྱི་རྣམ་པ་ཐིག་ལེ་མཐིང་ཁའི་དཀྱིལ་དུ་རྡོ་རྗེ་སྐྱིལ་ཀྲུང་གིས་བཞུགས་པ་ལ་མོས་གུས་དྲག་པོས་གསོལ་བ་གདབ། རང་ཉིད་ལུས་གནད་རྣམ་སྣང་ཆོས་བདུན་ལྟ་སྟངས་སྣ་རྩེར་གཏོང་ནས། རང་གི་སྙིང་གར་ཡང་གཞིར་གནས་ཀྱི་ཧཱུྃ་སྔོན་པོ་གཅིག་བསམ། མཐར་མདུན་གྱི་བླ་མ་ཧཱུྃ་དུ་གྱུར། སྙིང་གའི་ཧཱུྃ་ལ་ཐིམ་པར་བསམས་ལ་དར་ཅིག་ཀློད་རྗེས་མཆུ་སོ་གཉིས་མ་རེག་ཙམ་བྱས་ལ་ཧཱུྃ་གི་གླུ་ཆེ་ཆུང་རན་པར་བརྗོད་པས། སྙིང་གའི་ཧཱུྃ་ལས་ཧཱུྃ་མང་པོ་སྣ་བུག་གཡས་ནས་ཐོན། རང་གང་གནས་ཀྱི་ཁང་ཁྱིམ་སོགས་རིམ་གྱིས་གང་། མཐར་ཕྱི་རོལ་གྱི་སྣང་བ་ཐམས་ཅད་ཧཱུྃ་གིས་མེ་རེ་རེ་གང་བར་གྱུར་ཅིང་། ཐམས་ཅད་ཧཱུྃ་གི་སྒྲ་དིར་དིར་སྒྲོག་པ་དང་། ཡོམ་ཡོམ་ཤིག་ཤིག་གཡོ་བ་ལ་ཤེས་པ་གཏད་དེ་ཅུང་ཟད་ཀློད་ལ་བཞག་གོ །གཉིས་པ་ནི། ཧཱུྃ་དེ་དག་སླར་སྣ་བུག་གཡོན་ནས་

ཤོག་ལྷེ་༡༧༧ཞུགས། རང་ལུས་ཀྱི་སྤྱི་བོ་ནས་རྐང་སེན་གྱི་བར་དུ་མེར་ཁྲིག་གཏེ་མ་ཙེར་གྱིས་གང་བ་ལ་དམིགས་པ་གཏད་ལ་བསྒོམ་མོ། །རིག་འཛིན་ཆེན་པོས་འདི་གཉིས་སོ་སོར་བྱ་བ་དང་། རྗེས་མའི་སྐབས་ཕྱི་རོལ་ནས་ཐོལ་བྱུང་གི་ཧཱུྃ་མང་པོ་སྣ་བུག་ནས་ཞུགས་པ་ལས་སྔ་མཚུར་བསྡུ་བ་འདི་མཐའ་གཅིག་ཏུ་མི་དགོས་གསུངས། །གཉིས་པ་རྩལ་སྦྱོང་བ་ལའང་གཉིས། དང་པོ་ཕྱི་སྣང་བ་ལ་རྩལ་སྦྱང་བ་ནི། མདུན་དུ་བླ་མ་བསྒོམ་པ་དང་གསོལ་འདེབས་སྔར་ལྟར་ལ། རང་གི་སྙིང་གར་གཞིར་གནས་ཀྱི་ཧཱུྃ་མཐིང་ནག་མེ་འབར་བ་གཅིག་ཏུ་བསྒོམ་མཐར་བླ་མ་ཡང་དེ་ལྟ་བུའི་ཧཱུྃ་དུ་གྱུར་ནས་དེ་ལ་བསྟིམ་པ་ནི་ཁྱད་པར་རོ། །དེ་ནས་ངག་ཏུ་ཧཱུྃ་ཐུང་ལ་དྲག་པར་བརྗོད་པས་སྙིང་གའི་ཧཱུྃ་ལས་ཧཱུྃ་ཚ་བ་མེ་ལྟ་བུ། མྱུར་བ་གློག་ལྟ་བུ། རྣོ་བ་སྤུ་གྲི་ལྟ་བུ། ཤུགས་ཐོག་ལྟ་བུ་ཐོལ་ཐོལ་འཕྲོས། ཐོག་མར་རང་གི་མདུན་གྱི་དངོས་པོ་གང་རུང་དེ་ཤོག་བུ་ལ་མེ་སྟགས་ཕོག་པ་ལྟར་ཕར་ཐལ་ཚུར་ཐལ་དུ་ཕུག་པས་ཁྲལ་ཁྲོལ་ལ་སོང་། དེ་ནས་དངོས་པོ་རྣམས་རིམ་གྱིས་ཕུག་ཅིང་སྦྱངས་ནས་མཐར་དངོས་པོར་གྲུབ་པ་ཏིལ་འབྲུ་ཙམ་ཡང་མ་ལུས་པར་ཐམས་ཅད་ཧཱུྃ་གི་རང་བཞིན་དུ་ཤིག་ཤིག་གང་བར་བསམས་ལ་ཅུང་ཟད་མཉམ་པར་འཇོག་གོ །གཉིས་པ་ནང་ཕུང་པོ་ལ་རྩལ་སྦྱོང་བ་ནི། བླ་མའི་རྣལ་འབྱོར་སྔར་ལྟར། སྙིང་གའི་ཧཱུྃ་ལས་ཧཱུྃ་ཡིག་ཁྱད་ཆོས་བཞི་ལྡན་མང་པོ་འཕྲོས། རང་ལུས་སྤྱི་བོ་ནས་རྐང་མཐིལ་གྱི་བར་རྟ་རྔ་གཤགས་པའི་ཆ་ཙམ་ཡང་མ་ལུས་པར་ཡལ་ཐལ་མར་ཐལ། ཕར་ཐལ་ཚུར་ཐལ་དང་། ཕྱི་ནས་ཀྱང་ཐོལ་སྐྱེས་རང་ཤར་དུ་བྱུང་བའི་ཧཱུྃ་ཡིག་ཁྱད་ཆོས་བཞི་ལྡན་ནང་དུ་འོང་བས་ཀྱང་དེ་བཞིན་དུ་ཐོགས་པ་མེད་པར་ཕུག་

ཤོག་ལྷེ་༡༧༨ནས་སྟོང་སང་སང་འགྲོ་བར་བསྒོམ། ཧཱུྃ་དྲག་ལ་ཐུང་བ་ངར་བསྐྱེད་ནས་ངག་ཏུ་ཡང་བརྗོད་པས་ཤ་འཕར་བ་དང་ཁྲལ་ཁྲོལ་དུ་སོང་བ་སྙམ་འབྱུང་། འདིས་གདོན་གྱི་གནོད་པ་ལ་སོགས་པ་ཡོད་ཀྱང་འཇོམས་ཞིང་། གདོན་ཐོན་པའི་རྟགས་སུ་འདར་བ་དང་འཕྲིགས་པ་ལ་སོགས་པ་འབྱུང་། དེ་དུས་བར་བར་དུ་ངལ་གསོ་ཞིང་བསྒོམ་པས་གདོན་ལས་གྲོལ་བར་འགྱུར། མཐར་དམིགས་མེད་ནམ་མཁའ་ལྟ་བུར་བཞག །གསུམ་པ་མཉེན་བཙལ་བ་ནི། མདུན་དུ་དབྱུག་པ་འདོམ་ཕྱེད་ཙམ་ཞིག་གཙུགས། བླ་མ་བསྒོམ་བསྟིམ་སྔར་དང་འདྲ། སྙིང་གའི་ཧཱུྃ་ལས་ཧཱུྃ་རང་འདྲ་བ་གཉིས་པ་ཞིག་སྤྲོས། སྙིང་ག་ནས་ཐོགས་མེད་དུ་ཐོན། དབྱུག་པའི་རྩེ་མོར་འཁོད་ཅིང་གསལ་བརྟན་འབར་བ་ལ་སེམས་བཞག །ཡང་གཞིར་གནས་ཀྱི་སྙིང་གའི་ཧཱུྃ་ལ་ཚུར་བསྡུ། ཡང་ཕར་སྤྲོ་བ་དེ་འདྲ་ལན་ཁ་ཤས་ཀྱིས་དམིགས་པའི་གཞི་བཙལ་ནས། མདུན་དུ་ཤིང་འདོམ་གང་ཙམ་བཙུགས་པ་ལ་སྙིང་གའི་ཧཱུྃ་ལས་ཧཱུྃ་མང་པོ་གཅིག་རྗེས་གཅིག་མཐུད་བྲེང་ཆགས་སུ་ཕྲེང་བ་བརྒྱུས་པ་ལྟར་འཕྲོས། མདུན་གྱི་དབྱུག་པའི་རྩ་བ་ནས་བཟུང་རིམ་པས་གཡས་བསྐོར་དུ་ཇེ་མཐོ་ཇེ་མཐོར་དཀྲིས་ནས། ཧཱུྃ་སྔོན་མ་དེ་དབྱུག་པའི་རྩེ་མོར་ཡེར་གྱིས་ཕྱིན་པ་ན་ཅུང་ཟད་དེ་ལ་སེམས་བཞག །ཡང་ཧཱུྃ་ཡིག་རྗེས་མ་སྤྲོ་གཞི་ལ་སྡུད་པ་ནས་བརྩམས་ཕྱི་རིམ་གཡོན་བསྐོར་དུ་ཤིག་ཤིག་འོང་ནས་སྙིང་གའི་ཧཱུྃ་ལ་ཐིམ་པར་བསམས་ཏེ་བཀྲོལ། ཡང་སྔ་མ་བཞིན་དུ་སྤྲོ་བ་སོགས་བྱ་ཞིང་། དེའི་སྐབས་སུ་ངག་ཏུ་ཡང་ཧཱུྃ་སྒྲ་འབོལ་ལ་རིང་བ་བརྗོད་ནས་ཧཱུྃ་གི་གླུ་ལེན། དེ་ལ་གོམས་ནས་དངོས་སུ་དབྱུག་པ་འདོམ་དོ་ཙམ་བཙུགས། དམིགས་པས་དེ་ཉིད་དཔག་བསམ་གྱི་ཤིང་དུ་གྱུར་པའི་རྩེ་མོ་སྲིད་རྩེར་སླེབ་པ་ཞིག་ཏུ་བསྒོམས་

ཤོག་ལྷེ་༡༧༩ནས། ཡང་ཧཱུྃ་གི་གླུ་ལེན་པ་དང་དམིགས་པའི་སྤྲོ་བསྡུ་བཤད་མ་ཐག་པ་ལྟར་ཡང་ཡང་བྱ། དེ་ནས་དངོས་པོ་ཐམས་ཅད་ལ་ཡང་དེ་ལྟར་དུ་སྦྱངས་པས་སེམས་གར་གཏད་དུ་ཟིན་པ་སྙམ་འབྱུང་བ་དང་། དམིགས་པ་སྔ་ཕྱི་ཐམས་ཅད་ལ་གསལ་སྣང་ཐོབ་ན་འབྱོངས་པའི་ཚད་ཡིན། འདི་དག་གི་སྐབས་སུ་ཧཱུྃ་གི་ཕྲེང་བ་དེ་ཡི་ཐོག་མཐའ་བར་གསུམ་གཅིག་བསྒོམ་དུས་གཅིག་མི་གསལ་བ་ལྟ་བུ་མ་ཡིན་པ་ཐམས་ཅད་ཀྱི་རྣམ་པ་སྤྱི་ལམ་པ་གཅིག་ཅར་དུ་གསལ་ཐེབས་ཤིང་རྟོག་པ་གཞན་གྱིས་བར་མ་ཆོད་པ་ཞིག་གལ་ཆེའོ། །བཞི་པ་ལམ་དུ་གཞུག་པ་ནི། བླ་མ་བསྒོམ་བསྟིམ་སྔ་མ་བཞིན་ལ་དམིགས་པ་ཐུན་མོང་བ་ལྟར་ན། རང་གི་སྙིང་གར་ཧཱུྃ་དཀར་པོ་འོད་ལྔ་ལྡན་པ་ཞིག་བསམ། ཧཱུྃ་སྙན་ལ་རིང་བ་བརྗོད་པས་སྙིང་གའི་ཧཱུྃ་ལས་ཧཱུྃ་གཅིག་རྒྱང་གིས་འཆད་དེ་སྲིན་འགྲོས་ལྟ་བུའི་ལམ་ལས་ཞུགས། ཐོག་མར་གནས་ཁང་གི་ཕྱི་ཙམ། དེ་ནས་མཐོང་ཡུལ། རིམ་གྱིས་རི་བྲག་དང་ཡུལ་ལྗོངས་སོགས་བརྒལ་ནས་འཇིག་རྟེན་གྱི་ཁམས་བློས་མི་འཁྱུད་པའི་ཕ་མཐར་སོང་བར་བསམ་ཞིང་། འགའ་ཞིག་ཏུ་ཅུང་ཟད་འདུག་པར་བསམ་ལ་གསལ་སྣང་འདོན་བསྐྱོར་བྱ། རེས་འགའ་ངལ་བུས་འགྲོ་བར་བསམ་ལ་ཧཱུྃ་རིང་པོར་བརྗོད། རེས་འགའ་མདའ་འཕང་བ་ལྟར་འགྲོ་བར་བསམ་ལ་ཧཱུྃ་ཐུང་ངུར་བརྗོད། ཡང་རིམ་གྱི་ཚུར་ལྡོག་སྟེ་མདུན་ནམ་སྙིང་གར་གནས་པར་བསམ། ཧཱུྃ་བརྗོད་དུས་རླུང་རིག་གཅིག་ཏུ་དྲིལ་ཞིང་། ཕྱི་ནང་གང་དུ་འགྲོ་འོང་བྱེད་པ་ལ་སེམས་རྩེ་གཅིག་ཏུ་གཏོད་པ་གལ་ཆེའོ། །འདིར་ངལ་གསོ་བའང་སྲིན་འགྲོས་ཀྱི་འཁྱོག་མཚམས་རེ་དང་། ཧཱུྃ་ཡང་སྐབས་དེར་དྲག་ལ་ཐུང་བ་རེ་རེ་བརྗོད་གསུང་པའང་ཡོད་ཅིང་། །ཁྱད་པར་ཐུན་མོང་མ་ཡིན་པ་བླ་མའི་

ཤོག་ལྷེ་༡༨༠མན་ངག་ཞལ་ཤེས་ཀྱི་དབང་དུ་བྱས་ན་ཐོག་མ་ནས་ངོ་བོ་རང་གི་ལུས་ངག་སེམས་གསུམ་རྣམ་པ་ཧཱུྃ་དཀར་པོ་འོད་ལྔ་ལྡན་པ་ཞིག་ཏུ་བསྒོམ་པ་དེ་ཉིད་འཁྱོག་འགྲོས་སུ་སོང་ནས་ཤུལ་དུ་ལུས་དང་སྤྲོ་གཞིའི་ཧཱུྃ་ལུས་རྒྱུ་མེད་པར་བསྒོམ་པ་དེ་ཉིད་ཞིང་ཁམས་བགྲོད་པ་ལ་སོགས་པ་ལ་སྔ་མ་ལས་ཟབ་ཁྱད་ཐོན་པའི་དམིགས་པ་ཡིན་གསུངས། དེའང་འཇིག་རྟེན་གྱི་ཁམས་མང་པོ་བགྲོད་པའི་མཐར་ཤར་ཕྱོགས་མངོན་པར་དགའ་བའི་ཞིང་དུ་ཕྱིན་ནས་སྟོན་པ་བཅོམ་ལྡན་འདས་རྒྱལ་བ་མི་བསྐྱོད་པའི་ཐུགས་ཀློང་བདེ་བ་ཆེན་པོ་ངང་ཧཱུྃ་ཡིག་དབྱེར་མེད་དུ་འདྲེས་པར་བསམ་ལ། ཚུར་མི་བསྡུ་བར་རྟོག་མེད་དུ་མཉམ་པར་བཞག །ཞིང་ཁམས་གཞན་ལའང་དེས་འགྲེས། དམྱལ་བ་སོགས་མ་དག་པའི་གནས་རྣམས་སུའང་བགྲོད་ནས། ཧཱུྃ་ཡིག་གོང་དུ་སླེབ་པའི་གནས་དེ་ཉིད་སྣོད་བཅུད་དག་པ་ལྷ་དང་གཞལ་ཡས་ཁང་གི་རང་བཞིན་དུ་ལམ་ལམ་བསྒྱུར་ནས་མཐར་དེ་ཀུན་མི་དམིགས་པ་ཧཱུྃ་དང་བཅས་རང་ཡལ་དུ་བསམ་ནས་སྟོང་ཉིད་སྤྲོས་བྲལ་མི་རྟོག་པ་ལ་མཉམ་པར་བཞག །འདི་དག་ཐམས་ཅད་དལ་བུས་རྐང་ཐང་དུ་བགྲོད་པ་ལྟ་བུར་བྱས་ནས་སེམས་སྦྱོང་བ་ལས་ཡུད་ཀྱིས་བགྲོད་ཅིང་ཕྱིན་པ་བྱ་རྒྱུ་མིན། ཧཱུྃ་གང་དུ་སླེབ་པ་དེར་རང་ཉིད་དངོས་སུ་སླེབ་པ་ལྟ་བུར་བསྒོམས་པས་མཐར་དངོས་སུ་སོང་བ་དང་ཁྱད་མེད་པའི་གསལ་སྣང་ཐོབ་པ་དང་། རྨི་ལམ་འཛིན་སྤེལ་སྦྱང་བ་སོགས་ལའང་ཚེགས་མེད་ཅིང་། དེ་དག་ལ་བསྟེན་ནས་ཞིང་ཁམས་བགྲོད་པ་ལ་སོགས་པའང་འབྱུང་གསུངས། དེ་དེ་ལྟར་ངག་གི་སྔོན་འགྲོ་ལ་འབད་པས་གནས་སྐབས་སུ་ངག་གི་མངོན་ཞེན་བཟློག །བར་ཆད་ཞི། ངག་གི་སྒྲིབ་པ་འདག །མཆོག་གི་དགོས་པ་ནི། ངག་འཁོར་བར་མི་འཇུག་ལོངས་སྐུར་གྲོལ། སངས་རྒྱས་ཐམས་

ཤོག་ལྷེ་༡༨༡ཅད་ཀྱི་གསུང་རྡོ་རྗེ་ཐོབ་པར་འགྱུར་རོ། །གསུམ་པ་སེམས་ཀྱི་སྔོན་འགྲོ་ལ་གསུམ། དང་པོ་བྱུང་ས། བར་དུ་གནས་ས། མཐར་འགྲོ་ས་ལ་བརྟག་པའོ། །དེའང་ཐལ་འགྱུར་ལས། སེམས་ནི་དང་པོ་བྱུང་ས་དང་། །བར་དུ་གནས་དང་ཐ་མར་འགྲོ། །དེ་ལྟར་གསུམ་ལ་བརྟགས་དཔྱད་པས། །སེམས་སྦྱོང་སེམས་ཀྱི་གནས་ལུགས་ཤེས། །ཞེས་པས། དང་པོ་བྱུང་ས་དང་འབྱུང་མཁན་ལ་བརྟག་པ་ནི། མདུན་དུ་བླ་མ་སྔར་ལྟར་བསྒོམ། ལུས་གནད་རྣམ་སྣང་ཆོས་བདུན་སྤྱི་འགྲེ་བཅས་ནས་གསོལ་བ་གདབ། བླ་མ་རང་ལ་བསྟིམས་ཏེ་སེམས་དང་དབྱེར་མེད་དུ་བསྲེས། རྣམ་པར་མི་རྟོག་པའི་རང་བབས་སུ་ཅི་གནས་ཀྱི་ཡུན་ལ་མཉམ་པར་བཞག །དེ་ནས་ཁ་ནང་དུ་ཕྱོགས་ཏེ་རང་གི་ལུས་ངག་ཡིད་གསུམ་གཙོ་གང་ཆེ། འཁོར་བར་སྐྱུར་མཁན་དང་མྱང་འདས་ཐོབ་མཁན་འདི་ལུས་ངག་ཡིད་གསུམ་གང་ཡིན་བརྟགས་ཤིང་དཔྱད་པས། སེམས་གཙོ་བོར་གཏན་ལ་ཕེབས་པ་ན། རང་གི་སེམས་མི་འཆར་དགུ་འཆར་སྣ་ཚོགས་སུ་འཕྲོ་བ་འདི་ཕྱི་འབྱུང་བའི་དངོས་པོ། ནང་རང་གི་སྒྱུ་ལུས། སྣང་བ་སྟོང་པ་ཕ་མའི་རྐྱེན་སོགས་དང་པོ་གང་ལས་བྱུང་། སེམས་ལས་སེམས་བྱུང་ངམ། ཇི་ལྟ་བུ་ཞིག་ལས་བྱུང་། ཕར་བལྟ། ཚུར་བལྟ། ཡར་བལྟ་མར་བལྟ་བྱའོ། །དེ་ལྟར་དཔྱད་པས་བྱུང་ས་བྱུང་མཁན་མེད་པར་ཤེས་ནས་ཤར་བ་འདྲ་ཡང་། ཤར་དུས་ནས་མ་གྲུབ་པ་དེ་ནི་ཐོག་མར་སྐྱེ་བ་མེད་པ་གདོད་མའི་གཤིས་ཆོས་སྐུའི་བཞུགས་ཚུལ་ཡིན་པས་རང་ངོ་འཕྲོད་པའི་དགོས་པ་ཡོད་དོ། །གཉིས་པ་བར་དུ་གནས་པ་ལ་བརྟག་པ་ནི། སེམས་འདི་འདྲ་ཞིག་ནས་འབྱུང་སྙམ་པའམ། རྣམ་རྟོག་ཐོལ་གྱི་ཤར་བའི་དུས་སུ་

ཤོག་ལྷེ་༡༨༢དེ་ལྟར་ཤར་བའི་སེམས་ཉིད་ཕྱི་སྣང་བ་ལ་གནས་སམ། ནང་ཕུང་པོ་ལ་གནས། གནས་མཁན་གྱི་ཤེས་པ་དེ་ཉིད་དངོས་པོ་དངོས་མེད་དབྱིབས་ཁ་དོག་ལ་སོགས་པ་ཇི་ལྟར་འདུག་བརྟགས་པས་ཅིར་ཡང་མ་གྲུབ་པར་གསལ་སྟོང་ནམ་མཁའ་ལྟ་བུའི་དགོངས་པ་ཤར་བ་ནི་བར་དུ་གནས་པ་མེད་པར་ངོ་འཕྲོད་པ་སྟེ་མཐར་ཐུག་ལོངས་སྐུ་འགྲུབ་པའི་དགོས་པ་ཡོད་དོ། །གསུམ་པ་ཐ་མར་འགྲོ་ས་ལ་བརྟག་པ་ནི། རྣམ་རྟོག་ཝལ་གྱིས་ཤར་ནས་ཡལ་གྱིས་སོང་སྙམས་བྱེད་པ་འདི་གང་དུ་འགྲོ། འགྲོ་ས་འགྲོ་མཁན་ཇི་འདྲ་ཞིག་འདུག །རྣམ་རྟོག་ཡལ་ནས་སོང་སྙམ་ན་གང་དུ་ཡལ་བལྟས་པས་འགྲོ་བ་ལྟར་སྣང་ཡང་སོང་བ་མེད་པ། འགགས་པ་ལྟར་སྣང་ཡང་འགགས་པ་མེད་པར་ཤེས་པ་ནི་རིག་སྟོང་རྗེས་མེད་རང་ངོ་འཕྲོད་པ་སྟེ། མཐར་ཐུག་འབྲས་བུ་སྤྲུལ་སྐུ་དང་མཇལ་བའི་དགོས་པ་ཡོད་དོ། །གཞན་ཡང་སེམས་འདི་དངོས་པོ་དང་དངོས་མེད་གང་ཡིན། དངོས་པོའོ་སྙམ་ན་དབྱིབས་དང་ཁ་དོག་ཆེ་ཆུང་བྱེད་ལས་ངོ་བོ་གང་གིས་མཚོན། རྟོག་བྱེད་ཀྱི་ཤེས་པ་ལ་ཚུར་བལྟ། བལྟ་བའི་ཤེས་པ་ལ་ཕར་བལྟ། དེ་གཉིས་ཀྱང་གཅིག་ཡིན་ནམ། སོ་སོ་ཡིན་སོགས་རིག་པ་རྐྱང་དེད་ཀྱིས་སྐད་ཅིག་ཀྱང་མ་ཡེངས་པར་བལྟ། དེ་ལྟར་ཕུ་འདེད་མདའ་འདེད་དུ་བརྟགས་ཤིང་བཙལ་བའི་ངང་ནས་རྒན་པོ་ཉི་མ་འདེབདེ་བའམ། བྱ་བ་ཟིན་པའི་སྐྱེས་བུ་ལྟར་ལྷོད་ཀྱིས་ཀློང་ལ་བཞག །ཡང་རྣམ་རྟོག་ཐོལ་ཐོལ་འཕྲོ་ན་དེ་བྱ་ཤོར་དུ་མ་སོང་བར་དྲན་པས་ཚིར་གྱིས་བཟུང་ནས་རྣཾ་རྟོག་དེ་ག་གང་ལས་སྐྱེས་བལྟ། དེ་སེམས་ལས་སྐྱེས་སྙམ་ན་སེམས་དེ་གང་ལས་བྱུང་། ཡོད་པ་ལས་བྱུང་ངམ། དེའི་ཚང་ཨེ་འདུག །མེད་པ་ལས་བྱུང་ངམ། དེའི་དམིགས་ཨི་རྙེད་སྐད་ཅིག་ཀྱང་མ་ཡེངས་པར་

ཤོག་ལྷེ་༡༨༣བལྟས་པས་ཅིར་ཡང་མ་མཐོང་བའི་ངང་དུ་ལྷོད་དེ་བཞག་གོ །ཡང་རྣམ་རྟོག་ཝལ་གྱིས་ཤར་ན་སྔ་མ་ལྟར་སེམས་ཀྱི་ཕུ་ཐག་མ་ཆོད་ཀྱི་བར་དུ་བལྟ། དེ་ལྟར་བརྟགས་ཤིང་དཔྱད་པས་ཅི་ཡང་མ་རྙེད་པའི་ངང་དེར་ངོས་བཟུང་ལ་དཔྱད་ར་མེད་པར་གཏན་ལ་མ་ཕེབས་ཀྱི་བར་དུ་བསྐྱར་རོ། །དེ་ལྟར་འབད་པས་གནས་སྐབས་སུ་སེམས་ཀྱི་མངོན་ཞེན་བཟློག །བར་ཆད་ཞི། སྡིག་པ་འདག །མཐར་ཐུག་མཆོག་གི་དགོས་པ་སེམས་འཁོར་བར་མི་འཇུག་ཆོས་སྐུ་ཉག་གཅིག་ཏུ་གྲོལ། སངས་རྒྱས་ཐམས་ཅད་ཀྱི་ཐུགས་རྡོ་རྗེ་དང་གཉིས་སུ་མེད་པར་འགྱུར་བའི་དགོས་པ་ཡོད་དོ། །རྒྱུད་ལས་ཀྱང་། བསམ་དུ་རྡུགས་པར་གཞུག་པ་འདི་ཉིད་ཀྱིས། །དྲན་པ་རྣམས་ནི་ཟད་པའི་སར་བསྐྱལ་ལོ། །ཞེས་འབྱུང་བའང་འདིའི་དོན་ཡིན་ནོ། །སྐབས་འདིར་རྒྱས་པར་སྤྲོ་ན་ཁྲེགས་ཆོད་ཡེ་བབ་སོར་བཞག་གི་དོན་ཁྲིད་ལྟར་སྔོན་འགྲོ་སེམས་ཀྱི་ཁང་བུ་བཤིགས་པའི་གདམས་ངག །སྐྱེ་འགག་གནས་གསུམ་ལ་བརྟགས་པས་སེམས་ཉིད་བརྗོད་དུ་མེད་པའི་ངོ་བོ་མཐོང་། གཅིག་ཐ་དད་ལ་བརྟགས་པས་སེམས་ཀྱི་གནས་ལུགས་རྟོགས། རང་རོ་གཅེར་མཐོང་ལ་བརྟགས་པས་སེམས་ལས་འདས་པའི་ཡེ་ཤེས་ངོས་བཟུང་བ་རྣམས་རྒྱས་པར་གྲུབ་ན་ཤིན་ཏུ་ལེགས་སོ། །གཉིས་པ་སེམས་རྣལ་དུ་དབབས་པ་ནི། མདུན་གྱི་ནམ་མཁར་སྟོང་གཟུགས་ཀྱི་ཐིག་ལེ་སྔོ་དངསམདངས་ཀྱི་དཀྱིལ་དུ་དྲིན་ཅན་རྩ་བའི་བླ་མ་སྐུ་མི་གཡོ། སྤྱན་ཟིམ་བུ། གསུང་བརྗོད་བྲལ། ཐུགས་སྤྲོས་མེད་ཀྱི་རྣམ་པར་བཞུགས་པ་གསལ་བཏབ་པའི་ཐུགས་ཀར་ཨ་དཀར་པོ་གཅིག་བསྒོམ། གསོལ་བ་བཏབ་ནས་རང་ལ་བསྟིམ། དེ་ནས་ལུས་སོག་

ཤོག་ལྷེ་༡༨༤ཕོན་གྱི་ཐག་པ་ཀློད་པ་ལྟར་བདེ་ལུགས་སུ་བཞག །ངག་པི་ཝང་གི་རྒྱུན་ཐག་བཅད་པ་བཞིན་མ་བཅོས་པར་འཇོག །ཡིད་རང་ཐག་གི་ལྟག་ཆུ་བཅད་པ་བཞིན་རྟོག་དཔྱོད་ཀྱིས་འཚོལ་འཕྲོ་མི་བྱ་བར་རང་བབས་སུ་འཇོག་གོ །དེ་ལྟར་བཞག་པས་དགེ་སྡིག་དགག་སྒྲུབ་སོགས་ཤེས་པའི་སྤྲོས་པ་ཉེ་བར་ཞི་བ་ལན་ཚྭ་ཆུར་ཐིམ་པ་ལྟ་བུ། གསལ་སྟོང་ལྷན་ཅིག་སྐྱེས་པ་གདོད་མའི་ངང་དུ་མ་བཅོས་པར་འཇོག་སྟེ། དེ་ཡང་བློ་ལ་ཡུལ་སྣང་ངམ་ཡུལ་ལ་བློ་གང་སྣང་ཡང་ཕར་གང་སྣང་བ་མ་འགགས་ལ། ཚུར་གང་སྣང་ལ་དེར་འཛིན་བློའི་དྲི་མ་དང་བྲལ་བ། སྣང་སེམས་དབྱེར་མེད་ཡུལ་དང་ཡུལ་ཅན་འདི་ཞེས་ངོ་བོ་ངོས་བཟུང་ཐམས་ཅད་དང་བྲལ་བའི་རིག་པ་གསལ་ཧྲིག་རྗེན་ནེ་བའི་ངང་དུ་འཇོག །དེས་སྔར་སེམས་ཚོལ་སོགས་དམིགས་པ་གཞུར་པོ་བྱས་པས་ཐང་ཆད་པ་ལྟ་བུ་དེ་འདིར་ངལ་སོས་པའི་ཚུལ་གྱིས་ཏིང་ངེ་འཛིན་སྐྱེ་བའི་དགོས་པ་ཡོད། དེའི་ངང་ནས་ལུས་བསྒུལ་བསྐྱོད་འདོད་པ་དང་། སེམས་ལ་རྟོག་པ་འགྱུ་ན་དེའི་ངོ་བོ་ལ་གཅེར་གྱིས་བལྟས་ནས་ལྷོད་ཀྱིས་ཀློད། ངག་བརྗོད་འདོད་བྱུང་ན་དམིགས་མེད་ཀྱི་ངང་ནས་ཨ་ཨ་ཨ་ཞེས་བརྗོད། འདིའི་སྐབས་སུ་འཕྲོ་རྒོད་ཀྱི་གེགས་བྱུང་ན། རང་གི་ལུས་སེམས་ཐམས་ཅད་རྡོ་རྗེ་ཕ་ལམ་གྱི་རང་བཞིན་ཕ་ཝང་གྲུ་བཞི་པར་བསྒོམས་ལ་མཉམ་པར་བཞག །བྱིངས་ན་ལུས་སེམས་ཨ་དཀར་པོར་བསྒོམས་ནས་དེར་འཛིན། རྨུག་ན་ལུས་ཧྲིལ་པོའམ་ཡང་ན་ལུས་ནང་སྙིང་ཐད་དུ་མར་མེ་འོད་གསལ་བ་ཞིག་ཏ་ལེར་འབར་བ་ལ་སེམས་གཏད་པ་སྟེ་གེགས་སེལ་བོག་འདོན་གྱི་དམིགས་ཕྲན་གསུམ་མོ། །རྗེས་ཐོབ་ཀྱི་གནས་སྐབས་སུའང་གང་ཤར་དགག་སྒྲུབ་བླང་དོར་སོགས་རེ་དོགས་མེད་པར་བསྐྱངས་པས་གང་སྣང་སྒོམ་གྱི་གྲོགས་སུ་

ཤོག་ལྷེ་༡༨༥འཆར་བར་འགྱུར་ཞིང་། རྟོག་པ་ནན་གྱིས་བཀག་ན་མི་གནས་པའི་ཁར་གེགས་སུ་འགྲོ་ལ། ཡིད་ཤེས་ཚོགས་དྲུག་གི་ཡུལ་སྣང་དེར་འཛིན་མེད་ཅིང་གཉེན་པོས་མ་བསླད་པར་སྐྱོང་བ་ཉིད་གལ་ཆེ། ཀ་དག་གི་ངང་དུ་བཞག་དུས་སུ་འཆར་འཆར་འདྲ་ཡང་དོན་ལ་ཤར་བ་མེད་པས་རིག་པ་ཟང་ཐལ་རྗེན་པར་ངོས་བཟུང་ལ་ཀ་དག་རིག་སྟོང་སྤྲོས་བྲལ་གྱི་ངང་དུ་ལ་ཟློ་བར་བྱའོ། །གསུམ་པ་བཟའ་གཏད་མེད་པ་ལྟ་བའི་མན་ངག་བསྟན་པ་ལ་གཉིས། དོན་ཉམས་སུ་བླང་བ་དང་། ངོ་གཅེར་ཕོག་ཏུ་སྤྲད་པའོ། །དང་པོ་ལའང་གཉིས། གོ་བར་བྱ་བ་དང་། ཉམས་ལེན་དངོས་སོ། །དང་པོ་ནི། ཁྲེག་ཆོད་ཀྱི་རྒྱབ་ཡིག་ནམ་མཁའ་དྲི་མེད་དང་། རྟོག་མེད་ནམ་མཁའ་སྤྲིན་ཕུང་སོགས་ལས་ཤེས་པར་བྱའོ། །གཉིས་པ་ནི། བླ་མའི་རྣལ་འབྱོར་སྔོན་དུ་འགྲོ་བས་སྤྲུལ་པ་སྐུའི་འདས་རྗེས་ཚིག་གསུམ་གནད་དུ་རྡེག་པའི་སྒོ་ནས་རང་གི་རིག་པ་ཆོས་སྐུ་དྲི་མ་མེད་པར་རྟོགས་པར་བྱེད་པ་ལ་གསུམ། ངོ་རང་ཐོག་ཏུ་སྤྲད་པ་ནི། ད་ལྟར་གྱི་ཤེས་པ་བཅོས་བསླད་གཉེན་པོ་དང་བྲལ་བ། ངོ་བོ་ངོས་བཟུང་ལས་འདས་པ། རིག་པ་མཚན་མར་མ་གྲུབ་པ། སྟོང་གསལ་རང་བྱུང་གི་ཡེ་ཤེས་དྲན་བསམ་བློ་འདས་ཆེན་པོ་ཝ་ལེ་སང་ངེ་ཕྱམ་མེར་གནས་པ་འདི་ཉིད་རང་བྱུང་གི་ཡེ་ཤེས་ཆོས་སྐུ་ཀ་དག་གི་དགོངས་པར་ངོ་ཤེས་པར་བྱའོ། །ཐག་གཅིག་ཐོག་ཏུ་བཅད་པ་ནི། ཆོས་སྐུ་བློ་འདས་ཀྱི་དགོངས་པ་བཞི་ཆ་གསུམ་བྲལ་གྱི་ངང་ལ་མི་གཡོ་བས་གནས་པ་སྟེ། དེའང་དྲན་བསམ་སྔ་མ་འགག །ཕྱི་མ་མ་སྐྱེས། ད་ལྟར་གྱི་ཤེས་པ་གང་དུའང་བཅོས་བསླད་བྲལ་བའི་ངང་ལ་རིག་པའི་གདངས་མ་འགགས་པར་ཆུ་རྙོགས་མ་དྭངས་པ་དང་འདྲ་བའི་ངང་ལ་ཆེད་དུ་རྩོལ་བས་མ་

ཤོག་ལྷེ་༡༨༦བསྒྲིབས། ཡེངས་པ་ཕྱལ་བར་མ་ཤོར་བར། ཐལ་མལ་གྱི་རིག་པ་སོར་བཞག་གཅིག་པུ་རིག་གེ་སེང་ངེ་ཡེ་རེ་ཝལ་ལེར་བཞག་པར་བྱའོ། །གདིང་གྲོལ་ཐོག་ཏུ་བཅའ་བ་ནི། དེ་ལྟར་ངང་དྭངས་སྤྲོས་པ་དང་བྲལ་བ་རྒྱལ་མཚོ་དྭངས་པ་ལྟ་བུའི་ངང་ལ་བཞག་དུས། ཐ་མལ་གྱི་ཤེས་པ་ཡུལ་ཐོག་ཏུ་འཕྲོ་ཡང་རང་ཤར་རང་གྲོལ་དུ་བསྟན་པ་རྦ་རླབས་ཆུར་ཐིམ་པ་ལྟ་བུ་སྟེ། ཤར་དུས་ཡེངས་མེད་བཅོས་བསླད་མེད་པའི་ངང་དུ་གློད་པས། དྲན་རྟོག་རྗེས་མེད་དུ་ཡལ་ནས་བྱུང་ཚོར་གཞི་ཐིམ་ལ་སོང་བ་ནི་རང་གྲོལ་ཞེས་བྱ་སྟེ། རང་ཤར་རིས་མེད་འཛིན་རྩོལ་སྤང་བླང་གཉེན་པོ་མེད་པར་གདིང་འཆོས་པའོ། །གཉིས་པ་ངོ་གཅེར་ཕོག་ཏུ་སྤྲད་པ་ལ་གཉིས། བྱིན་རླབས་འཕོ་བའི་སྟོབས་ཀྱིས་ངོ་སྤྲད་པ་དང་། ཉམས་མྱོང་སྒོམ་པའི་ཐོག་ཏུ་ངོ་སྤྲད་པའོ། །དང་པོ་ནི། དབེན་པའི་གནས་སུ་ཚོགས་གཏོར་རྒྱ་ཆེར་བཤམ་ཞིང་སློབ་མ་རྣམས་ཀྱིས་མཎྜལ་དབུལ་ལ་ལུས་གནད་དྲང་པོར་བསྲང་། ངོ་སྤྲོད་འདེབས་པ་པོ་བསྒོམ་གཞིར་བྱས་ནས་སྔར་བླ་མའི་རྣལ་འབྱོར་དུ་བཤད་པའི་དམིགས་པ་ཕོག་ལ། དེ་ཡང་སྐྱོན་ཀུན་ཟད། །ཡོན་ཏན་ཀུན་ཚང་། དགོས་འདོད་ཀུན་སྩོལ། སྐྱབས་གནས་ཀུན་འདུས་ཀྱི་ངོ་བོར་ངེས་ཤེས་ཁྱད་པར་ཅན་བསྐྱེད་ནས་ཅི་མཛད་ཁྱེད་ཤེས་ཀྱིས་བློ་གཏད་ལིངས་བསྐྱུར་ཏེ། རྩ་བརྒྱུད་ཀྱི་བླ་མ་དམ་པ་རྣམས་ཀྱིས་ཚད་མེད་པའི་ཐུགས་རྗེས་དགོངས་ནས་བདག་གི་རྒྱུད་བྱིན་གྱིས་བརླབ་ཏུ་གསོལ། ཟབ་ལམ་གྱི་རྟོགས་པ་ཁྱད་པར་ཅན་དུས་ད་ལྟ་ཉིད་དུ་སྐྱེ་བར་བྱིན་གྱིས་རློབས་ཤིག་སྙམ་དུ་མོས་གུས་གདུང་ཤུགས་དྲག་པོ་འཆི་མ་འཁྲུགས་པ་ཙམ་དུ་སྐྱེད་ཅིག་བྱས་ལ། སྤོས་དང་གུ་

ཤོག་ལྷེ་༡༨༧གུལ་སྲེག་ཅིང་བླ་མས་ཌཱ་དྲིལ་འཁྲོལ་བ་དང་བཅས་ནས། ཆོས་སྐུ་ཀུན་ཏུ་བཟང་པོ་ལ་གསོལ་བ་འདེབས་སོ། །ཟབ་ལམ་གྱི་ཉམས་རྟོགས་རྒྱུད་ལ་སྐྱེ་བར་བྱིན་གྱིས་རློབས་ཤིག །ཅེས་སོགས་བརྒྱུད་པའི་གཤར་འདེབས་ཀྱིས་བྱིན་ཕབ། རྗེས་བླ་མ་ཉིད་ཚད་མེད་པའི་ཐུགས་རྗེས་འོད་དུ་ཞུ། སློབ་མའི་སྤྱི་བོ་ནས་ཐིམ་པས་སློབ་མའི་སྒོ་གསུམ་དང་བླ་མའི་རྡོ་རྗེ་གསུམ་དབྱེར་མེད་སྤྲོས་པ་དང་བྲལ་པའི་ངང་ལ་ཤེས་པ་ཀློད་ལ་འཇོག་ཏུ་བཅུག་པས་བྱིན་རླབས་འུར་ལངས། སྒོ་གསུམ་གྱི་སྣང་བ་བླ་མར་འདྲེས། རྣམ་རྟོག་མོས་གུས་སུ་ལྷང་ངེར་ཤར། གཤིས་འཛིན་མེད་དུ་ཁྲོ་ལེར་གྲོལ། དེའི་ངང་ལ་བཟོ་མེད་དུ་ལྷོད་ཀྱིས་གློད་ལ་བཞག་པས་རང་རིག་ཀ་དག་ཆོས་སྐུའི་དབྱིངས་སུ་གྲོལ་བ་ཞེས་བྱ་བ་ཡིན་ནོ། །འདི་ནི་རྩ་བའི་དངོས་བསྟན་ལ་མེད་ཀྱང་ཉམས་མྱོང་བོགས་ཆོད་སྐྱེ་བའི་ཕྱིར་གཏེར་ཆེན་རིན་པོ་ཆེའི་ཕྱག་བཞེས་སུ་མཛད་པས་བྱིན་རླབས་ཤིན་ཏུ་ཆེ་བ་ཡིན་ནོ་གསུངས་སོ། །གཉིས་པ་ལ་གསུམ། གནས་པ། འགྱུ་བ། ཟུང་འཇུག་གི་དགོངས་པ་ངོ་སྤྲད་པའོ། །དང་པོ་དོན་སྐྱེ་མེད་དུ་རྩད་བཅད་ནས་གནས་ཐོག་ཏུ་གཞི་བཅིངས་གྲོལ་མེད་པའི་གནས་ལུགས་ཆོས་ཟད་ཀ་དག་གི་དགོངས་པར་ངོ་སྤྲད་པ་ན། སློབ་མ་རྣམས་སྔར་ལྟར་ལུས་གནད་རྣམ་སྣང་ཆོས་བདུན་བཅའ། ངག་རླུང་གནད་རང་བབས་སུ་བཞག །སེམས་གནད་རྟོག་པ་སྔ་མ་འགགས། ཕྱི་མ་མ་སྐྱེས། ད་ལྟའི་རིག་པ་བཞི་ཆ་གསུམ་བྲལ་གཤིས་གང་དུ་ཡང་མ་གྲུབ་ཅིང་། མདངས་བདེ་ཆེན་དུ་མ་འགགས་ལ། རྩལ་སྣ་ཚོགས་སུ་སྣང་ཡང་ངོ་བོ་སྨྲ་བསམ་བརྗོད་མེད་བློའི་སྤྱོད་ཡུལ་ལས་འདས་པའི་རིག་པ་གསལ་ལེ། ཡེ་རེ།

ཤོག་ལྷེ་༡༨༨ཧྲིག་གེ །རྗེན་ནེ། སང་ངེ་བ་འདི་རང་བྱུང་གི་ཡེ་ཤེས་ཆོས་སྐུ་བློ་འདས་ཆེན་པོའ་དགོངས་པ་ཡིན་པས་དེ་ཅར་ཕོག་ཏུ་ངོས་བཟུང་ལ། མཐའ་བྲལ་ནམ་མཁའ་ལྟ་བུའི་ངང་དུ་དར་ཅིག་མཉམ་པར་ཞོག་ཅིག །ཅེས་བརྡའ་སྤྲད། དེ་ལྟར་བཞག་པས་རྣམ་རྟོག་གི་སྤྲོས་པ་ཉེ་བར་ཞི་ནས་བྱ་བྱེད་དྲན་རྟོག་ཐམས་ཅད་བདེ་གསལ་རྣམ་པར་མི་རྟོག་པའི་ཡེ་ཤེས་ཀྱི་རོལ་པ་འཆར་ཏེ་མཉམ་རྗེས་ཀྱི་རིས་མེད། ཉིན་མཚན་གྱི་བར་མེད། རྟག་ཆད་ཀྱི་འཕྲང་མེད། བླང་དོར་གྱི་ཆོས་མེད། བསྒོམ་བྱ་སྒོམ་བྱེད་ཐམས་ཅད་ལས་འདས་པའི་གནས་ལུགས་ཆོས་ཟད་ཀ་དག་གི་དགོངས་པར་ལ་བཟླ་བའོ། །དེ་ལྟར་ཡང་གསང་བ་སྒྲ་རྒྱུད་ལས། སྔ་ཕྱི་དྲན་རྟོག་མེད་པ་ཡི། །རིག་གེ་སེང་ངེ་གསལ་ལེ་བ། །ད་ལྟའི་ཤེས་པ་འདི་ཉིད་ལ། །ཆོས་སྐུ་བཞི་ལྡན་ངོས་བཟུང་ངོ་། །ཞེས་གསུངས་ཤིང་། དེའི་ཚེ་སེམས་སྤྲོས་བྲལ་དུ་གནས་པ་ཆོས་སྐུ། གསལ་བདེ་འཛིན་པ་མེད་པ་ལོངས་སྐུ། སྣ་ཚོགས་སྣང་བའི་འཆར་གཞིར་མ་འགགས་པ་སྤྲུལ་སྐུ་སྟེ། ངོ་བོ་རང་བཞིན་ཐུགས་རྗེ་གསུམ་དབྱེར་མེད་པ་ནི། ནོར་བུ་ཕྲ་བཀོད་ལས། རྫོགས་སངས་རྒྱས་ནི་རང་རིག་ཉིད། །ངོ་བོ་དུས་གསུམ་འགྱུར་བ་མེད། །རང་བཞིན་རྟག་ཏུ་འགགས་པ་མེད། །ཐུགས་རྗེ་ཀུན་ལ་རང་སྣང་ངོ་། །ཞེས་གསུངས་པ་ལྟར་རོ། །འདིར་ཐུན་མོང་མ་ཡིན་པའི་ཕྱག་བཞེས་ནི། དཔེར་ན། ཀ་བ་ལྟ་བུའི་དངོས་པོ་གསུམ་མམ་འདས་མ་འོངས་ད་ལྟ་སྟེ་དུས་གསུམ་ལྟ་བུ་གང་ཡང་རུང་བའི་དངོས་པོ་གསུམ་ལ་དུས་གཅིག་ཅར་སྐད་ཅིག་མ་གཅིག་གི་སྟེང་ནས་རྣམ་སྤྱི་ལམ་པ་ཙམ་མ་ཡིན་པར། བྱེ་བྲག་ཕྲ་མོ་ལའང་དུས་གཅིག་ཏུ་སེམས་བསྒྲིམས་ནས་གཏད་པས་འཆར་ཚུལ་ཁྱད་པར་བ་ཞིག་ཡོད་པ་ཡིན། དེ་ལ་བརྟེན་ནས་བླ་མས་ངོ་སྤྲད་མཛད་པ་ནི་བཞི་ཆ་

ཤོག་ལྷེ་༡༨༩གསུམ་བྲལ་ཏེ། ཇི་སྐད་དུ། བཞི་མཚོན་དངོས་གཞི་རྣམས་དང་བྲལ། །ཅེས་གསུངས་པའི་དགོངས་དོན་ནོ། །གཉིས་པ་རྩལ་སྣང་འགག་མེད་དུ་གཏན་ལ་ཕབ་ནས། འགྱུ་ཐོག་ཏུ་སྤང་གཉེན་མེད་པ་རང་གྲོལ་དུ་ངོ་སྤྲད་པ་ནི། སེམས་ཉིད་བདེ་གསལ་མི་རྟོག་པའི་ངང་ལས་མ་འགགས་པའི་རྩལ་སྣང་དྲན་རིག་འཕྲོ་འདུ་གང་ཤར་དེ་ཀ་ཕྱིའི་སྣང་བ་མ་འགགས་ལ། ནང་འཛིན་ཞེན་གྱི་གཉེན་པོས་མ་བཅིངས་པའི་སྟེང་དུ་སྔ་ཕྱི་བསུ་སྐྱེལ་དང་། སྤང་བླང་དགག་སྒྲུབ་སོགས་གང་གིས་ཀྱང་བཅོས་བསླད་མེད་པའི་རིག་པ་གཅེར་བུ་ཧར་སང་རྗེན་པ། གསལ་རིག་དེ་ཀའི་ངང་མདངས་རང་བབས་སུ་བསྐྱངས་པས་རྒྱ་མཚོར་རླབས་ཇི་ལྟར་ཤར་ཡང་རྒྱ་མཚོའ་ཆུ་ཉིད་ལས་མ་འདས་པ་ལྟར་གང་ཤར་གྱི་རྟོག་པ་ཐམས་ཅད་མ་སྤངས་མ་བསྒྱུར་བར་ཆོས་ཉིད་ཀྱི་རོལ་བ་ལས་མི་འདའ་ཞིང་མི་འགྱུར་བའི་ཕྱིར། དེ་ཡང་ཕྱི་སྣ་ཚོགས་སུ་འཕྲོ་ཡང་སྣང་བས་སེམས་མི་གཡོ་བ་སྒྱུ་མའི་སྐྱེས་བུ་ལྟར་ཆགས་ཞེན་གྱི་རྩིས་གདབ་མེད་པར་གནས་པ་དང་། ནང་སྣ་ཚོགས་སུ་སྣང་ཡང་ཞེན་འཛིན་མེད་པ་བུ་ཆུང་གི་ཤེས་པ་ལྟར་འདི་ཞེས་ངོས་བཟུང་མེད་པར་གནས་པས་བྱུང་ཚོར་གྱི་རྟོག་པ་ཐམས་ཅད་ལན་ཚྭ་ཆུར་ཐིམ་པ་ལྟར་རང་ཞི་རང་སངས་ལ་སོང་བས་ཅིར་སྣང་རང་གྲོལ་ཞེས་བྱ་བ་ཡིན་ཏེ། ཐལ་འགྱུར་ལས། ཇི་ལྟར་ཤར་བའི་རིག་པ་ནི། །སྦྲུལ་མདུད་བཞིན་དུ་རང་གྲོལ་ལོ། །གཉེན་པོ་མེད་ཕྱིར་འབད་རྩོལ་ཞིག །ངོ་བོ་ཉིད་ཀྱིས་ཡེ་གྲོལ་ལོ། །ཅེས་གསུངས་པའི་ཕྱིར་རོ། །གསུམ་པ་གནས་འགྱུ་ངོ་བོ་དབྱེར་མེད་དུ་ཐག་བཅད་ནས་ཟུང་འཇུག་ཏུ་གང་ཤར་རིག་པ་རྗེན་པར་ངོ་སྤྲད་པ་ནི། སྒོ་གསུམ་རང་བཞིན་ལྷུག་པར་གནས་པའི་ངང་ལས་རྩལ་སྣང་མ་འགགས་པའི་རྣམ་རྟོག་ཇི་སྙེད་ཅིག་འཆར་ཡང་དགག་སྒྲུབ་བླང་དོར་མེད་

ཤོག་ལྷེ་༡༩༠པར་རང་བབས་སུ་བཞག་པས་ཆོས་ཉིད་ཀྱི་ངང་དུ་མི་གཡོ་བར་གནས་ཞིང་། །གནས་པའི་རང་རྩལ་འགག་པ་མེད་པར་གྲོལ་བའི་ཕྱིར། དེ་ལྟར་གནས་པ་དང་འཕྲོ་བའི་རང་བཞིན་གཉིས་སུ་མེད་ཅིང་དབྱེར་མེད་པ་སྟེ། དེ་ཡང་གནས་འགྱུ་ངོ་བོ་ལྟོས་བཞག་ཅན་མ་ཡིན་པའི་གནད་ཀྱིས་ཚོགས་དྲུག་གི་སྣང་བ་གང་གི་ཡང་ཕྱོགས་སུ་མ་ལྷུངས་པར་རིག་པ་རྗེན་པར་བཞག་པས། རྣམ་རྟོག་ཆེ་ཕྲ་ཐམས་ཅད་ཐོལ་སྐྱེས་ཐོལ་ནུབ་འཁྱགས་རོམ་ཆུར་ཞུ་བའམ། ན་བུན་ནམ་མཁའ་ཡལ་བ་ལྟར་ཆོས་ཉིད་ཀྱི་རོལ་པ་ལས་མི་འདའ་ཞིང་མི་གཡོ་བར་ཤེས་པར་བྱའོ། །དེ་ལྟར་ཡང་རྨད་བྱུང་ལས། ཇི་ལྟར་རྒྱ་མཚོའ་རྦ་རླབས་བཞིན། །སེམས་ཀྱི་རྦ་རླབས་གཡོ་བ་ཀུན། །གདོད་མ་གཞི་ཡི་རྒྱ་མཚོར་ཐིམ། །ཞེས་གསུངས་པ་བཞིན་ནོ། །དེ་ལྟར་སེམས་གནས་ན་གདོད་མའི་ངང་དུ་གནས། འཕྲོ་ན་ཡེ་ཤེས་ཀྱི་རོལ་པ་ཤར། མཉམ་ན་གཉིས་མེད་ཀྱི་ངང་དུ་ཡན་པས་ཇི་ལྟར་ཤར་ཡང་ཆོས་ཉིད་ཀྱི་ངང་མདངས་ལས་མ་འདས་པ་ཡིན་ཏེ། མཉམ་པ་མི་སྒྲུབ། འཕྲོ་བ་མི་དགག །གནས་པ་མི་སད་སྟེ། ཇི་ལྟར་ཤར་ཡང་རང་གི་རིག་པའི་ཆོ་འཕྲུལ་ལས་མ་འདས་སྟེ། དེ་ཡང་ལུང་ལས། དྲི་མེད་དག་པའི་སངས་རྒྱས་ནི། །རང་རིག་ཆོས་སྐུ་འགྱུར་བ་མེད། །སལ་ལེ་སང་ངེ་ཝལ་ལེ་བ། །སྤྲིན་མེད་སྟོན་ཀའི་ནམ་མཁའ་བཞིན། །མི་འགྱུར་བརྟན་པ་རི་བོ་བཞིན་དུ་ཞོག །མི་གཡོ་དྭངས་པ་རྒྱ་མཚོ་བཞིན་དུ་ཞོག །ཡངས་དོག་བྲལ་བ་ནམ་མཁའ་བཞིན་དུ་ཞོག །གང་ལྟར་གནས་ཀྱང་རིག་པའི་ངང་ཡིན་ཞོག །འཕྲོ་གནས་རང་རིག་དྭངས་སངས་ཕྱེད་པར་ཞོག །ཇི་ལྟར་བྱ་རྣམས་ནམ་མཁར་འཕུར་བ་ཡང་། །མཁའ་ལས་མ་འདས་དེ་བཞིན་རིག་པའི་ངང་། །ཆོས་རྣམས་རང་གསལ་གཡོ་བ་མེད་པར་

ཤོག་ལྷེ་༡༩༡ཞོག །ཅེས་གསུངས་པ་ལྟར་བཟོ་བཅོས་མེད་པར་རང་བབས་སུ་ཀློདགློད་པས་དགག་སྒྲུབ་བླང་དོར་རེ་དོགས་མེད་པའི་ཞི་ཆ་ལ་པ་ཞིག་འཆར་ཏེ། དེ་ནི་རིག་པ་རང་གནས་ཀྱི་བསམ་གཏན་ཡིན་པར་ཤེས་པར་གྱིས་ཤིག །འདི་ངོས་ཟིན་པ་ན་ཤེས་པ་གནས་འགྱུ་དགག་སྒྲུབ་བཟང་རྟོག་ངན་རྟོག་གི་དུས་ཐམས་ཅད་དུ་རང་རིག་རང་གསལ་རང་བབས་ལ་ཅེ་རེ་བལྟས་པས་འཛིན་མེད་རང་གནས་ཀྱི་བསམ་གཏན་རྗེ་ནེ་སང་གི་འཆར་ཏེ། དེ་རྩོལ་མེད་ཆུ་བོའ་རྒྱུན་བཞིན་དུ་འཇུག་པའི་དྲན་འདུན་གྱིས་བསྐྱང་བ་སྟེ། དེ་དག་གིས་ནི། ཇི་ལྟར་སྣང་ཞིང་མྱོང་བའི་ཆོས་ཐམས་ཅད་དགག་སྒྲུབ་བླང་དོར་རེ་དོགས་མཚན་འཛིན་ལས་འདས་པར་ངོ་སྤྲད་པའོ། །ཡང་ན་ངོ་སྤྲོད་ཕྱི་མ་འདི་དག་གི་ཚབ་ཏུ་ཁྲེགས་ཆོད་ཡེ་བབས་སོར་བཞག་གི་དོན་ཁྲིད་ལྟར། དགོངས་པ་རང་གནས་དང་། དྲན་རིག་འཆར་ནུབ་མེད་པར་ངོ་སྤྲད་པའི་ཚུལ་གཉིས་གདབ་ནའང་ལེགས་སོ། །དེའང་སྐལ་བ་དང་ལྡན་པའི་གང་ཟག་གིས་དོན་ཉམས་སུ་བླངས་པའི་རྒྱུད་ཐོག་ཏུ་བླ་མས་ངོ་སྤྲོད་ཐེབས་པར་བཏབ་པས་གནས་ལུགས་ཟབ་མོའ་དོན་ལ་སྒྲོ་འདོགས་ཆོད་ཅིང་། དེའི་རྒྱུན་མ་ཉམས་པར་བསྐྱངས་པས་བརྟན་པ་མྱུར་ཏུ་ཐོབ་པར་འགྱུར་ཞིང་། བསྒོམ་དོན་ལ་མྱོང་བ་མ་སྐྱེས་ཤིང་གོ་ཡུལ་དུ་སོང་བ་རྣམས་ལ་ངོ་སྤྲོད་བཏབ་ཀྱང་བྱ་ཤོར་དུ་འགྲོ་བས། སླར་ཡང་དམིགས་རིམ་རྣམས་ལ་མྱོང་བ་ཐོན་ཐོན་གྱི་བར་འབད་ནས་སྒོམ་ཞིང་། ཉམས་རྟོགས་སྐྱེས་རིམ་དང་བསྟུན་ནས་ངོ་སྤྲོད་བཏབ་པས་རིམ་གྱིས་ཉམས་མྱོང་གི་སྣེ་ཟིན་པར་འགྱུར་རོ། །བཞི་པ་སྤང་ཐོབ་མེད་པ་འབྲས་བུའི་མན་ངག་ནི། དེ་ལ་འབྲས་བུའི་ངོ་བོ་ནི་རིག་སྟོང་ཆོས་སྐུ་སྟེ། ཡེ་གྲོལ་དུ་འདུག་པས་ད་གདོད་བསྐྱར་ནས་གྲོལ་རྒྱུ་མེད་

ཤོག་ལྷེ་༡༩༢པར་ཡིད་ཆེས། རང་གྲོལ་དུ་འདུག་པས་གཉེན་པོ་གཞན་ལ་རགས་མ་ལུས་པར་ཐག་ཆོད་ཡང་གྲོལ་དུ་འདུག་པས་གྲོལ་ཐོག་ཉིད་ལས་སྤོ་བླག་མི་དགོས་པར་གདིངས་འཆོས་ཏེ། སོར་བཞག་རིག་སྟོང་རྗེས་མེད་ཀྱི་ངང་ལ་ཡེ་ཡིན་རྫོགས་པ་ཆེན་པོར་ཐག་བཅད་ནས་བཟོ་མེད་རེ་དོགས་དང་བྲལ་བ་རང་བཞག་པས། བློ་བདེ་ཆོས་ཉིད་དུ་གྲོལ་བ་གཞི་གདོད་མའི་གནས་ལུགས་ལ། ད་ལྟར་གྱི་རིག་པ་རང་གནས་ཆེན་པོར་ངོ་འཕྲོད་ནས། རྩོལ་སྒྲུབ་བཅོས་བསླད་མེད་པར་ཐ་མལ་གྱིན་འདར་གློད་པས། ཆོས་སྐུ་རང་གནས་ཆེན་པོར་ལ་ཟློ་བ་ནི། གཉུག་མ་ལྷུན་གྲུབ་ཆེན་པོའ་འབྲས་བུའོ། །མདོར་ན་རང་སེམས་སངས་རྒྱས་སུ་ཐག་བཅད་ནས། རེ་དོགས་བཅོས་བསླད་དང་བྲལ་བ་རང་རིག་སྟེ། བྱ་བྱེད་རྩོལ་སྒྲུབ་ཞིག་པའི་ཤེས་པ་སོར་བཞག་ཡེ་གྲོལ་ཆེན་པོར་ཁོང་ལྷོད་པ་ནི་གཤིས་རྫོགས་པ་ཆེན་པོའ་གནས་ལུགས་ཏེ། བྱར་མེད་ཆུ་བོ་རྒྱུན་གྱི་རྣལ་འབྱོར་ལ་བསླབ་པར་བྱའོ། །འདིར་གསུང་རྒྱུན་སྔ་མར་སྤྱོད་པ་དང་འབྲས་བུ་གཉིས་སྤྱིའི་ཚུལ་ཙམ་བཤད་ཀྱང་། ལྟ་སྒོམ་གཉིས་རང་གནད་ཐུན་མིན་དུ་སོང་བས་འདིར་སྤྱོད་འབྲས་གཉིས་ཀྱང་ཡང་གསང་གནད་ཀྱི་ངེས་པ་དང་སྦྱར་བ་ཁྲེགས་ཆོད་ཀྱི་རྒྱབ་ཡིག་དང་། རྟོག་མེད་ནམ་མཁའ་སྤྲིན་ཕུང་ལས་བྱུང་བ་ཡིན་ནོ། །དེ་རྣམས་ཀྱིས་སེམས་གཏན་ལ་དབབ་པའི་མན་ངག་ཁྲེགས་ཆོད་སྤྲོས་པ་ཀུན་ཞིའི་ཁྲིད་རིམ་དངོས་གཞི་བཤད་ཟིན་ཏོ། །གཉིས་པ་རིག་པ་གཏན་ལ་དབབ་པའི་མན་ངག་ལམ་ཐོད་རྒལ་གྱི་ཁྲིད་བསྟན་པ་ལ་བཞི། སྔོན་འགྲོ་ལུས་ངག་ཡིད་གསུམ་གྱི་གནད་སྦྱོང་བ། གནད་ལྔ་ལ་བརྟེན་ནས་མངོན་སུམ་རང་ཐོག་ཏུ་དབབ་པ། ཉམས་སུ་བླངས་པས་སྣང་བཞིའི་འཆར་ཚུལ་བསྟན་

ཤོག་ལྷེ་༡༩༣པ། མཐའ་རྟེན་གྱི་མན་ངག་བཤད་པའོ། །དང་པོ་ལ་གཉིས། འཁོར་འདས་རུ་ཤན་འབྱེད་པ། སྒོ་གསུམ་གྱི་བྱ་བ་དགུ་ཕྲུགས་སུ་བཏང་བའོ། །དང་པོ་ནི། ཐོག་མར་སྤྱོད་པ་བརྩམས་པ་ལ་བར་ཆད་མི་འཇུག་པའི་ཕྱིར་དུ་བསྲུང་བ་བྱ་བ་སྟེ། གྲུབ་ན་ཚོགས་གཏོར་བཤམས་ལ་ཚོགས་མཆོད་ཡིད་བཞིན་རྒྱ་མཚོ་ལྟར་འབུལ། བླ་མ་ལ་གསེར་གྱི་མཎྜལ་ཕུལ་ལ་སློབ་མ་རྣམས་རིག་པ་སྒྲིབ་གཡོགས་མེད་པ་མཚོན་པའི་ཕྱིར་ལུས་གཅེར་བུའམ། མ་བདེན་སྟོད་གཡོགས་ཙམ་ཕུད་ལ། བླ་མ་ཞལ་ཤར་དུ་ཕྱོགས་ལ་བཞེངས་པའི་མདུན་དུ་ལང་བུ་གཤིབས་ལ་ལངས་ཏེ་ཐལ་མོ་སྙིང་གར་སྦྱར། མིག་བླ་མའི་ཐུགས་ཀར་གཏད། མངོན་དུ་སྤྱོད་པ་ལ་བར་ཆད་ཀྱི་བགེགས་མི་འཇུག་པ་དང་། རྣམ་ཤེས་ཚོགས་བརྒྱད་ཡུལ་དུ་མི་འཕྲོ་བར་བྱ་བའི་དོན་དུ། བླ་མ་སྐུ་སྔོ་ནག་རབ་ཏུ་འཇིགས་ཤིང་སྐྲ་བརྫེས་པ་མཆེ་བ་གཙིགས་ཤིང་ལྗགས་འགྱུར་བ་ཞིག་ཏུ་བསྒོམ་དུ་གཞུག །བླ་མས་ཕྱག་གཡོན་སྐེད་པར་བརྟེན། གཡས་པས་སྡིགས་མཛུབ་ཐོག་མར་ཤར་ནས་བརྩམས་ཕྱོགས་ཀུན་ཏུ་གཏོད་ཅིང་ལྟ་སྟངས་དང་བཅས་པས་བགེགས་བསྐྲད། བླ་མའི་ཐུགས་ཀ་ནས་སློབ་མའི་སྤྱི་བོར་ཧཱུྃ་སྔོན་པོ་འཕྲོས་དྲ་བ་ཅན་གྱི་རྩ་ལས་བརྒྱུད། ལུས་ཧཱུྃ་མཐིང་གར་གྱུར་པ་བསྒོམ་དུ་བཅུག་ལ་དཔོན་སློབ་ཐམས་ཅད་ཀྱི་ཧཱུྃ་དི་རི་རི་བརྗོད། དེས་འགྲེས་ཏེ་ཐོག་མར་བླ་མའི་གནས་སོ་སོར་ཡི་གེ་གསལ། དེ་ལས་འཕྲོས་ཏེ་སློབ་མའི་གནས་རྣམས་སུ་ཐིམ་པར་མོས་ཏེ། རྐང་མཐིལ་གཡོན་དུ་ཡཾ་ལྗང་གུ། ལྟེ་བར་རཾ་དམར་ལྗང་། མགྲིན་པར་ཁཾ་དུད་ཁ། དཔྲལ་བར་ཨེ་མཐིང་ག །ལྐོག་མར་སུཾ་སེར་པོ། པུས་མོ་གཡས་ལ་ཧ་དཀར་པོ། རྐང་

ཤོག་ལྷེ་༡༩༤མཐིལ་གཡས་སུ་ཕཊ་སྔོ་ནག་སྟེ་ཡི་གེ་བརྒྱད་རེ་རེ་བཞིན་སྤྲོས་ལ། ངག་ཏུའང་ཡི་གེ་རེ་རེ་ནས་དབུགས་ཐེངས་རེ་ལ་ཉེར་གཅིག་རེ་བརྗོད་ལ་བསྲུང་བ་བྱའོ། །ཀརྨ་སྙིང་ཐིག་ལུགས་སུ་འདིར་སྲུང་བའི་དོན་དུ་ཕཊ་ཉེར་གཅིག་མཉམ་དུ་བརྗོད། རིག་འཛིན་ཆེན་པོའ་ཕྱག་སྲོལ་དུ། དེ་མཐར། བླ་མའི་ཐུགས་ཀའི་ཧཱུྃ་ལས་ཧཱུྃ་སྤྲོས། སློབ་མའི་སྙིང་གར་ཞུགས་ཧཱུྃ་གིས་ལུས་གང་བར་བསམ་ལ་དཔོན་སློབ་མཉམ་དུ་ཧ་ངར་དང་ལྡན་པ་གསུམ་བརྗོད་པར་མཛད་དོ། །འདིར་སྤྲོས་པ་བསྡུ་ན་ཚོགས་མ་གྲུབ་ཀྱང་འགལ་བ་མེད་དོ། །དེ་ལྟར་ཡི་གེ་བརྒྱད་ཀྱིས་སྲུང་བར་བྱས་ནས། རུ་ཤན་དབྱེ་བ་དངོས་ནི། དེའང་ཐལ་འགྱུར་ལས། འཁོར་འདས་རུ་ཤན་མ་ཕྱེ་ན། །ཁམས་གསུམ་ལུས་ངག་ཡིད་ཀྱི་ཡང་། །འབྲེལ་བ་ཆོད་པ་མི་འགྱུར་བས། །འཁོར་འདས་རུ་ཤན་དབྱེ་བར་བྱ། །ཞེས་གསུངས་པས་སེམས་ཅན་རྣམས་ཀྱི་ལུས་ངག་ཡིད་གསུམ་གྱི་ཆོས་ཉིད་ཡེ་ནས་རང་བཞིན་གྱི་རྣམ་པར་དག་ཀྱང་། གནས་སྐབས་འཁྲུལ་པའི་ཞེན་སྣང་གིས་བསྒྲིབས་པས་ཐོག་མ་མེད་པ་ནས་ད་ལྟ་ཡན་ཆད་རིགས་དྲུག་གི་གནས་སུ་བར་མེད་དུ་འཁོར་ཞིང་། རིགས་དྲུག་སོ་སོའ་རྣམ་འགྱུར། ངག་གི་སྨྲ་བརྗོད། སེམས་ཀྱི་རྟོག་དཔྱོད། སྡུག་བསྔལ་གྱི་མྱོང་ཚུལ་གྲངས་ཀྱིས་མི་ཆོད་པ་ཞིག་མྱོང་ཡང་དོན་མེད་ཁོ་ནའི་དབང་དུ་སོང་འདུག །ད་དུང་ཟིན་མེད་ཀྱི་ལས་ལ་ཆགས་པས་ཅི་ཞིག་བྱ། དེས་ན་ད་རེས་ལུས་ངག་ཡིད་གསུམ་འཁོར་འདས་རུ་ཤན་ཕྱེད་པར་བྱས་ཏེ་ཕྱིན་ཆད་འཁོར་བར་སྐྱེ་བའི་གཞི་རྩ་ཆོད་པ་ཞིག་བྱ་དགོས་ལ། ཇི་ལྟར་དབྱེ་ན་འཁོར་བའི་ལས་སྣང་དང་མཐུན་པར་ལམ་དུ་བྱས་པས་ལས་ངན་གྱི་མཚང་རྟོགས་ནས་ཕྱིན་ཆད་ཞེན་

ཤོག་ལྷེ་༡༩༥འཛིན་ལས་གྲོལ་བར་འགྱུར་བའི་ཕྱིར་ཏེ། གསང་སྔགས་ཐུན་མོང་པ་ལས་ཀྱང་། རྣམ་རྟོག་ལས་ནི་རྣམ་རྟོག་དང་། །སྲིད་པ་ཉིད་ཀྱིས་སྲིད་པ་དག །ཇི་ལྟར་རྣ་བར་ཆུ་ཞུགས་པ། །ཆུ་གཞན་གྱིས་ནི་འགུག་པར་བྱ། །དེ་བཞིན་དངོས་པོའ་རྣམ་རྟོག་ཀྱང་། །རྣམ་རྟོག་ཉིད་ཀྱིས་སྦྱང་བར་བྱ། །ཞེས་གསུངས་པ་ལྟར་རོ། །དེ་ཡང་དུར་ཁྲོད་དམ་ལུང་སྟོང་སོགས་དབེན་པའི་གནས་སུ་སོང་སྟེ། མཁའ་འགྲོ་དང་གཞི་བདག་ལ་གཏོར་མ་བྱིན་ནས་འཁོར་འདས་རུ་ཤན་དབྱེ་བར་བྱེད་པ་ལ་བར་ཆད་མི་བྱེད་པའི་བཀའ་བསྒོ། ད་ནི་སེམས་ཅན་གྱི་དོན་དུ་འཁོར་འདས་རུ་ཤན་ཕྱེ་སྟེ་ཕྱིན་ཆད་འཁོར་བར་མི་ལྡོག་པར་བྱའོ་སྙམ་དུ་སེམས་བསྐྱེད་ནས་དམྱལ་བ་ཚ་གྲང་། ཡི་དྭགས་བཀྲེས་སྐོམ། དུད་འགྲོ་བཀོལ་སྤྱོད། མི་སྐྱེ་རྒ་ན་འཆི། ལྷ་མིན་འཐབ་རྩོད། ལྷ་འཕོ་ལྟུང་སོགས་རིགས་དྲུག་གི་སྤྱོད་ཚུལ་བདེ་སྡུག་སོགས་ལུས་ཀྱིས་སོ་སོའ་རྣམ་འགྱུར། །ངག་གིས་དེ་དག་གི་སྒྲ་སྐད་སྣ་ཚོགས། སེམས་ཀྱིས་དེ་རེ་རེའི་སྡུག་བསྔལ་རང་རྒྱུད་ལ་མྱོང་བར་བསམ་ལ། ལུས་ངལ་ཞིང་ཆད། ངག་འཛེར་ཞིང་འགགས། སེམས་འགྱུ་བ་སྤུན་ཐག་ཆད་པར་མ་གྱུར་གྱི་བར་དུ་འབད་པར་བྱ། དེ་དག་གི་སྐབས་སུ་བླ་མ་ཁྲོ་བོའ་རྣམ་པ་ཀྱང་སྒོ་གསུམ་གྱི་སྤྱོད་པ་རང་དང་མཉམ་དུ་མཛད་པར་མོས་གསུངས་པའང་ཡོད། དེ་དག་གིས་སུན་པ་དང་ལུས་གནད་དྲང་པོར་བསྲང་། ངག་རླུང་རང་བབས་སུ་བཞག །སེམས་དེ་ལྟར་མྱོང་བྱེད་ཀྱི་ངོ་བོ་ལ་ཆེར་རེ་བལྟས་ལ་འཇོག་ཅིང་ངལ་གསོ། ཡང་ལུས་ཀྱིས་བདེ་བར་གཤེགས་པ་ཞི་ཁྲོའི་སྐུའི་རྣམ་འགྱུར། ངག་གིས་དེ་དག་གི་སྙིང་པོ་སྒྲ་སྐད། ཡིད་ཀྱིས་དེ་དག་གི་རྣམ་པ་

ཤོག་ལྷེ་༡༩༦ལམ་མ་བ་ལ་སེམས་གཏད། སྐབས་སྐབས་སུ་ཨ་ཨ་ཞེས་བརྗོད། རྗེས་ཤེས་ཀྱི་རང་ངོ་བསྐྱང་། འཕྲོ་གཅོད་པ་ནའང་། ལུས་སངས་རྒྱས་ཀྱི་བཞུགས་སྟངས། ངག་ཨའི་སྒྲ། སེམས་རྟོག་མེད་དུ་མཉམ་པར་གཞག་པ་ལ་འཇོག་གོ །དེ་ལྟར་བྱས་པས་ལུས་ལ་ཚ་གྲང་བཀྲེས་སྐོམ་ལ་ཆགས་སྡང་དང་དགག་སྒྲུབ་མེད་པ་དང་། ངག་བླ་མའི་གདམས་ངག་ལ་ཡིད་ཆེས་ཞིང་གོ་བ་རང་བརྡོལ་དུ་ཤར་བ་དང་། སེམས་གསལ་སྟོང་འགག་མེད་རང་བྱུང་གི་ཡེ་ཤེས་རྩོལ་མེད་དུ་འཆར་བ་མ་བྱུང་གི་བར་བསྐྱར་བ་ཤིན་ཏུ་ནས་གལ་ཆེ་བར་གསུངས་ལ། དེ་དག་གི་དགོས་པ་ནི། ཐུན་མོང་དུ་ལུས་ངག་ཡིད་གསུམ་གྱི་སྡིག་པ་འདག་ཅིང་བར་ཆད་ཞི། མངོན་ཞན་ལྡོག །མཐར་ཐུག་སྐུ་གསུང་ཐུགས་རྡོ་རྗེ་མངོན་པར་འཚང་རྒྱ་བའི་དགོས་པ་ཡོད་དོ། །དེ་ནས་ཤིན་ཏུ་སྤྲོས་མེད་དང་། རབ་ཏུ་སྤྲོས་མེད་ཀྱི་དབང་བསྐུར་ཏེ། འདས་རྗེས་ལས། དེ་ནས་ལུས་ངག་ཡིད་གསུམ་པོ། །རྣལ་དུ་དབབ་ལ་མཁས་པར་བྱ། །ཞེས་གསུངས་པས། གོང་དུ་རུ་ཤན་དབྱེ་བས་འབྱུང་བ་འཁྲུགས་ཤིང་ངལ་བར་གྱུར་པ་ཉིད་ངལ་བསོས་ལ་རྣལ་དུ་དབབ་པའི་ཚུལ་ནི་ཁྲེགས་ཆོད་ཀྱི་སྐབས་སུ་བཤད་པ་ལྟར་བྱའོ། །འདི་དག་གི་སྐབས་སུ་རྟགས་ཚད་ཐུན་མོངས་མ་ཡིན་པ་སོགས་ནི་སྙིང་ཏིག་ཆེན་མོ་དང་། ཐེག་མཆོག་རིན་པོ་ཆེའི་མཛོད་ལས་ཤེས་པར་བྱའོ། །གཉིས་པ་ནི། ཀློང་གསལ་ལས། མངོན་སུམ་གནད་ལ་དབབ་པའི་ཕྱིར། །ཕྱི་ནང་གསང་བའི་བྱ་བ་ནི། །ལུས་དང་ཡིད་ཀྱི་དགུ་ཕྲུགས་བཏང་། །ཞེས་གསུངས་པས། དང་པོ་ལུས་ཀྱི་གསུམ་ནི། ཕྱི་འཇིག་རྟེན་འཁྲུལ་པའི་བྱ་བྱེད་དང་རྣམ་གཡེང་ཐམས་ཅད། ནང་ཕྱག་དར་བསྐོར་བ་སོགས་

ཤོག་ལྷེ་༡༩༧དམན་པའི་དགེ་བ་རྣམས། གསང་བ་རྣམ་གཡེང་བསྒུལ་བསྐྱོད་ཐམས་ཅད་སྤངས་ཏེ་གཅིག་པུར་འདུག་པའོ། །གཉིས་པ་ངག་གི་གསུམ་ནི། ཕྱི་འཇིག་རྟེན་གྱི་འཁྲུལ་གཏམ་སྣ་ཚོགས། ནང་ཁ་ཏོན་དང་བཟླས་བརྗོད་སོགས། གསང་བ་སྨྲ་བརྗོད་ཐམས་ཅད་སྤངས་ཏེ་གནས་པར་བྱའོ། །གསུམ་པ་ཡིད་ཀྱི་གསུམ་ནི། ཕྱི་འཇིག་རྟེན་གྱི་འཁྲུལ་རྟོག་ཐམས་ཅད། ནང་བསྐྱེད་རྫོགས་ཀྱི་སེམས་འཛིན་སྣ་ཚོགས། གསང་བ་རྣམ་རྟོག་གི་འཕྲོ་འདུ་ཐམས་ཅད་སྤངས་ཏེ་རྟོག་མེད་ཀྱི་ངང་དུ་གནས་པར་བྱས་པས་སྒོ་གསུམ་གནས་པ། བརྟན་པ། གྲོལ་བར་འགྱུར་རོ། །སྐབས་འདི་དག་ཏུ་བདུད་རྩི་ལྗོན་ཤིང་འོད་གསལ་གྱི་གནད་ཡིག་ལྟར་ཐུན་མོང་མ་ཡིན་པའི་བླ་སྒྲུབ་ཕྱི་ནང་གསང་བ་ཡང་གསང་རྣམས་ཇི་ལྟར་ནུས་པས་ཉམས་སུ་བླང་བར་བྱའོ། །གཉིས་པ་གནད་ལྔ་ལ་བརྟེན་ནས་མངོན་སུམ་རང་ཐོག་ཏུ་དབབ་པ་ལ་གཉིས། ཟག་མེད་ཀྱི་ཡེ་ཤེས་རྒྱུད་ལ་བརྟེན་པ། མངོན་སུམ་རང་གནད་དུ་ཕབ་པའི་དོན་ངོ་སྤྲད་པའོ། །དེའང་གདམས་པ་འདི་ནི་སྔར་ལས་ཁྱད་པར་བདུན་གྱིས་འཕགས་ཏེ། བདུན་གང་ཞེ་ན། སྣང་བ་འོད་ཀྱི་ཁྱད་པར། ཉམས་མྱོང་གོང་འཕེལ་གྱི་ཁྱད་པར། རང་གནད་མངོན་སུམ་དུ་གཟིར་བའི་ཁྱད་པར། ལུས་གནད་རྩའི་ཁྱད་པར། མཐོང་བ་དབང་པོའ་ཁྱད་པར། རང་རིག་ཡུལ་གྱི་ཁྱད་པར། ཉམས་མྱོང་གོང་འཕེལ་གྱི་ཁྱད་པར་བདུན་གྱིས་འཕགས་པའོ། །ཁྱད་པར་དེ་ལྡན་གྱི་གདམས་པ་ཉིད་གནད་ལྔ་ལ་བརྟེན་ནས་ཉམས་སུ་བླང་བར་བྱ་སྟེ། དེའང་། ལུས། ངག །སེམས། སྒོ། ཡུལ་ལོ། །དང་པོ་ནི། བཞུགས་སྟངས་གསུམ་སྟེ། ཐོག་མར་ཆོས་སྐུ་སེང་གེའི་བཞུགས་སྟངས་ནི།

ཤོག་ལྷེ་༡༩༨རྐང་པའི་མཐིལ་གཉིས་སྦྱར། པུས་མོ་ཕྱིར་བསྒྲད། ལག་པའི་མཐེ་བོང་གིས་སྲིན་ལག་གི་རྩ་བ་མནན་པའི་རྡོ་རྗེ་ཁུ་ཚུར་བཅངས་པ་རྟིང་པའི་རྩར་ས་ལ་བཙུགས་ལ་ལག་ཡུ་དྲང་པོར་བསྲང་ངོ་སྟོད་གསེངས་ཏེ་དཔུང་པ་གྱེན་དུ་འཐེན། མཇིང་པ་ཡིད་ཙམ་གྱེན་དུ་གཏོད། མིག་གཉིས་མིག་འབྲས་མི་བསྒུལ་ཞིང་རྫི་མ་མི་བརྡེབས་པར་ལྟ་སྟངས་ཀློད་ལ་སྨིན་ཕྲག་གི་ནམ་མཁའ་ལ་བལྟ། ལྕེ་ཅུང་ཟད་གྱེན་ལ་བསྒྲིལ་ལོ། །གཉིས་པ་ལོངས་སྐུ་གླང་པོ་ཆེའི་བཞུགས་སྟངས་ནི། ཁ་སྦུབ་ཏུ་པུས་བྲང་སྦྱར། གྲུ་མོ་ས་ལ་བཙུགས་ཏེ་ལག་མཐིལ་གྱིས་ཨོས་ཀོ་བརྟེན་པའི་སོར་མོ་འགྲམ་པ་ལ་སྦྱར། སྒལ་ཚིགས་དྲང་པོར་བསྲངས་ནས་ཐད་ཀའི་ནམ་མཁའ་ལ་ཟུར་མིག་ཧྲིག་གིས་མགོ་གྱེན་དུ་དགྱེ་ཙམ་བྱས་ནས་བལྟ་བའོ། །གསུམ་པ་སྤྲུལ་སྐུ་དྲང་སྲོང་གི་བཞུགས་སྟངས་ནི། རྐང་པའི་ལོང་བུ་གཤིབས་ཏེ་ཙོག་པུར་འདུག །ལག་གཉིས་པུས་མོ་ལ་བསྐོར། རྒལ་ཚིགས་དྲང་པོར་བསྲངས་ཏེ། མིག་ཟི་མ་བུར་བར་སྣང་ལ་གཏོད་དོ། །དེ་ལྟར་བྱས་པས་བཞུགས་སྟངས་དང་པོས་འབྱུང་པ་རང་སར་དག །གཉིས་པས་གཡོ་བྱེད་ཀྱི་རླུང་ཟིན། གསུམ་པས་དྲོད་སྐྱེས་ཅིང་འབྱུང་བ་སྙོམས་པར་བྱེད། མཐར་ཐུག་སྐུ་གསུམ་ལས་གྲོལ་ནས་མྱ་ངན་ལས་འདའ་བར་འགྱུར་རོ། །དེ་ཡང་རིག་པའི་ཡེ་ཤེས་ལུས་ལ་གནས་ཀྱང་ཐབས་ལུས་གནད་ཀྱིས་མ་གཟིར་ན་དབང་པོའ་མངོན་སུམ་དུ་སྣང་མི་ནུས་ཏེ། སྦྲུལ་ལ་ཡན་ལག་ཡོད་ཀྱང་མ་གཅུས་ན་མི་གསལ་བ་བཞིན་ནོ། །གཉིས་པ་ངག་གནད་ནི། སྨྲ་བརྗོད་ཅུང་ཟད་ཀྱང་མི་སྨྲ་བར་རླུང་དལ་བར་བསྟེན་ཏེ་མཆུ་སོ་མ་རེག་ཙམ་བྱས་ལ་ཁ་ནས་བཏང་བ་དང་ཅུང་ཟད་ཕྱིར་འཛིན་པ་ལ་བསླབ་བོ། །

ཤོག་ལྷེ་༡༩༩།། །།གསུམ་པ་སེམས་གནད་ནི། ཁྲེགས་ཆོད་ཀྱི་ལྟ་བ་གཞིར་བྱས་ཏེ། སྤྲིན་དང་ཁུ་རླངས་མེད་པའི་ནམ་མཁའ་སྟོང་སང་ངེ་བ་ལ་མིག་དང་ནམ་མཁའ་རིག་པ་གསུམ་སོ་སོར་མི་བལྟ་བར་དབྱེར་མེད་བྱས་པས་བལྟའོ། །བཞི་པ་སྒོའི་གནད་ལ་གསུམ། དང་པོ་ཆོས་སྐུའི་གཟིགས་སྟངས་ནི། མིག་གི་ཨ་འབྲས་གྱེན་ལ་ཟློག་པ་གཙུག་ཏོར་རྣམ་པར་བལྟ་བའི་ཚུལ་གྱིས་བལྟས་པས་དབྱིངས་རིག་གི་འཕེལ་ཆེ། གཉིས་པ་ལོངས་སྐུ་ལ་གཟིགས་སྟངས་ཐ་དཀར་བལྟ་བ་མདའ་མཁན་སྨྱུག་མ་སྲོང་བ་ལྟ་བུས་ཡེ་ཤེས་ཀྱི་སྣང་བ་མཐོང་། གསུམ་པ་སྤྲུལ་སྐུའི་གཟིགས་སྟངས་ཅུང་ཟད་འཐུར་དུ་ཕབ་པ་དྲང་སྲོང་བསམ་གཏན་སྒོམ་པ་ལྟ་བུས་འོད་ཁྱིམ་གྱི་སྒྲོན་མ་མཐོང་ངོ་། །སྤྱིར་ཕྱིའི་ནམ་མཁའ་ལ་དབང་པོ་མདུང་ཚུགས་སུ་གཏད་དེ་བསྒོམས་པས་ཕྱིའི་དབྱིངས་མཐོང་། གཡས་གཡོན་ཟུར་མིག་དང་། ཡང་ན་ཟིམ་བུས་ཉི་མ་ལ་བལྟས་པས་ནང་གི་དབྱིངས་རིག་མཐོང་། དེ་ནས་དབང་པོ་བར་སྣང་ལ་འཁྲིད་ཅིང་བལྟས་པས་འཁྲུལ་སྣང་ཞིང་ཁམས་སུ་འཆར་བར་འགྱུར་རོ། །དེ་ལྟར་ལྟ་སྣངས་གསུམ་པོ་གང་རུང་གིས་བལྟ་བ་ལ་བསླབས་པས། མིག་ཡུལ་ལ་ཇི་ཙམ་གཏང་ཀྱང་ཚུགས་ནུས་པར་འགྱུར་རོ། །གཟིགས་སྟངས་གང་ལའང་ཧ་ཅང་རྩོལ་བས་བསྒྲིམས་ཤིང་བསྡམས་ན་རླུང་བཙན་ཐབས་སུ་གཅུན་པས་གེགས་སུ་འགྱུར་བའི་ཕྱིར་ངལ་བུས་བྱ་བ་གནད་ཡིན་ནོ། །ལྔ་པ་ཡུལ་གྱི་གནད་ནི། སྤྲིན་མེད་པའི་ནམ་མཁའ་དྭངས་པ་ལ་སྔ་དྲོ་ཁ་ནུབ་དང་ཕྱི་དྲོ་ཁ་ཤར་དུ་བལྟ་བའམ། འོད་གསལ་འཆར་སླ་བའི་ཆེད་དུ་ཉི་ཟེར་གཉིས་དང་སྦྱར་ནས་སྔ་དྲོ་ཤར་དང་ཕྱི་དྲོ་ནུབ་ཏུ་ཉི་མ་ལས་འོག་ཏུ་ཁྲུ་གང་ཙམ་དུ་བལྟས་པས་འོད་གསལ་འཆར་སླ་

ཤོག་ལྷེ་༢༠༠བའི་དགོས་པ་ཡོད་དོ། །དེའང་ཐག་རིང་པོ་ལས་ཇེ་ཐུང་དུ་འཁྲིད་པར་བསླབ་པ་ནི་གནད་དོ། །དེ་དག་ལས། ཐོག་མལ་ལོངས་སྐུའི་བཞུགས་སྟངས་ཀྱི་ས་གཞི་བཅའ། སྤྲུལ་སྐུའི་བཞུགས་སྟངས་ཀྱིས་གནད་གཟིར་ལ་ལུས་གཅུན། དེ་ནས་ཆོས་སྐུའི་བཞུགས་སྟངས་ཀྱིས་རིག་པ་གཅུན་ལ་རྩལ་སྦྱང་བར་གསུངས། ཡང་ན་ཆོས་སྐུའི་བཞུགས་སྟངས་དང་གཟིགས་སྟངས་སྔ་དྲོ། ལོངས་སྐུ་ཉིན་གུང་། སྤྲུལ་སྐུ་ཕྱི་དྲོ་ལ་གཙོ་བོར་བྱ། དེའང་རྩ་བའི་འདུག་སྟངས་གསུམ་པོ་འབྱོངས་ནས་ཡན་ལག་གི་འདུག་སྟངས་བདུན་ལ་སློབ་པའང་གསུངས་ཏེ། སྟག་སྐྱུག་ཁྱུང་དང་སྐྱེས་བུ་དང་། །ཝ་དང་བྱ་རྒོད་གྱད་དང་དྲུག །ཆུ་སྲིན་འདུག་སྟངས་ལུས་གནད་བདུན། །ཞེས་པ་དང་། ཡང་ཟབ་ཆོས་ཉིད་ཀྱི་འཁོར་ལོ་ལས་གསུངས་པའི་འདུག་སྟངས་དང་ལྟ་སྟངས་རྩ་བ་ཡན་ལག་གཞན་རྣམས་དགོས་ཤིང་སྐབས་སུ་བབས་ན་དེ་ཉིད་དུ་ཤེས་པར་བྱའོ། །དེའང་རེ་ཞིག་སྐུ་གསུམ་གྱི་བཞུགས་སྟངས་དང་གཟིགས་སྟངས་ལ་བསྒྲིལ་ན་ལེགས་པར་མ་ཟད། ལས་དང་པོ་པས་ཆོས་སྐུ་སེང་གེའི་འདུག་སྟངས་ཁོ་ན་གཙོར་འདོན་བྱས་པ་ཉིད་ལེགས་པར་གསུངས། ཡང་ཏིག་གི་ཉམས་ལེན་གནད་སྒྲོན་ཏུ། བཞུགས་སྟངས་གསུམ་ལས་གཙོ་བོར་དྲང་སྲོང་ཙོག་པུ་བྱ་ཞིང་། གཟིགས་སྟངས་གསུམ་ལས་ཐུར་དུ་ཅུང་ཟད་ཕབ་ལ་བལྟའོ། །གཞན་རྣམས་གྲོགས་ཙམ་དུ་བསླབ་བོ། །ཞེས་གསུངས་པ་ཉིད་ད་ལྟ་ལག་ལེན་བདེ་བས་ཕལ་ཆེར་བྱེད་པར་སྣང་ངོ་། །གནད་དེ་དག་ལ་བརྟེན་ནས་མངོན་སུམ་གྱི་ཡེ་ཤེས་ཉམས་སུ་བླང་བའི་ཚེ་རིག་པ་མི་གནས་པ་གནས་པར་བྱེད་པ་ལ་སོགས་པ་ཉམས་སུ་ལེན་པའི་གནད་དྲུག་ནི་གནད་གསུམ་ཆོས་

ཤོག་ལྷེ་༢༠༡ཉིད་ཀྱི་འཁོར་ལོར་ཤེས་པར་བྱ་དགོས་ལ། མདོར་བསྡུ་ན་བཤད་མ་ཐག་པ་དེ་དག་ལ་དོན་ཚང་ངོ་། །སྐབས་འདིར་ཤེས་པར་བྱ་བ་ཉམས་ལེན་གནད་ཀྱི་སྒྲོན་མེ་ལས་འདི་ལྟར་གསུངས་ཏེ། ཉམས་སུ་ལེན་དུས་སུ་དཀར་ལང་ལང་ལས་ཐིག་ལེ་མ་མཐོང་ན་མིག་གཉིས་མཉམ་པར་ཐད་དྲང་དུ་བལྟའོ། །དབྱིངས་མ་མཐོང་ན་ཉི་མའི་དྲུང་ནས་ཟུར་ལ་བལྟས་ཏེ་ཁད་ཀྱིས་དྲངས་ལ་བལྟ་བ་གནད་དོ། །དེ་ནས་དཀར་ཤས་ཆེ་ན་གཡས་སུ་བཟློག་པ་དང་། སེར་ཤས་ཆེ་ན་གྱེན་ལ་བཟློག་པ་དང་། ལྗང་ཤས་ཆེ་ན་གཡོན་དུ་བཟློག་པ་དང་། དམར་ཤས་ཆེ་ན་ཐུར་དུ་དབབ་པ་དང་། མཐིང་ཤས་ཆེ་ན་དབུས་སུ་དྲིལ་བ་དང་། ལྔ་ལྡན་སྙོམས་པར་གསལ་ན་གཟིགས་སྟངས་གང་ཡིན་ལས་མི་འགྱུར་བ་གནད་ཡིན་ནོ། །འདིའི་དུས་སུ་ཆོས་སྐུའི་རྟེན་ཉི་མ་ལ་བསླབ་པ་ཡང་། ཉོན་མོ་ཉི་མ་ལས་ཁྲུ་གང་གི་འོག་གམ། གཡོན་དུ་ནམ་མཁའ་ལ་མིག་འབྲས་ཅུང་ཟད་བཟློག་ལ་བལྟས་པས། དབྱིངས་འོད་ལྔའི་དབུས་སུ་རྡོ་རྗེ་ལུ་གུ་རྒྱུད་ཐིག་ལེ་དང་བཅས་པ་མཐོང་དུས། ལོངས་སྐུའི་གཟིགས་སྟངས་ཀྱིས་ཉི་མ་ལས་ཇེ་རིང་དུ་ཟུར་ལ་ཁྲིད་ལ་ཡས་མན་ནམ་ཕན་ཚུན་གྱི་ཐད་དྲང་དུ་བཞག་པའམ། སྤྲུལ་སྐུའི་གཟིགས་སྟངས་ཀྱིས་ཐུར་ལ་སེམས་མ་ཡེངས། མིག་མི་འགུལ། ངག་མི་སྨྲ། བཞུགས་སྟངས་མི་གཡོ་བར་གནས་པས། དབྱིངས་འོད་ལྔ་དང་རག་པ་ལུ་གུ་རྒྱུད་ཐིག་ལེ་དང་བཅས་པའི་སྣང་བ་གོང་དུ་མཆེད་པ་དང་། མཚན་མོ་ལོངས་སྐུའི་རྟེན་ཟླ་བ་ལ་བསླབ་པ་ཡང་ཚུལ་དེ་དང་འདྲ་བ་ལས། ཁྱད་པར་དུ་མིག་ཟླ་བའི་དཀྱིལ་དུ་གཏན་ནས་སེམས་མ་ཡེངས་པར་བཟུང་བས་སྣང་བ་མཆེད་པ་དང་། ཉིན་མོ་མིག་གི་ཚ་བ་འཕེལ་ནས་ཅུང་ཟད་མི་གསལ་བ་གྲང་བས་སྙོམས་ཏེ།

ཤོག་ལྷེ་༢༠༢རབ་ཏུ་གསལ་བར་བྱེད་པས་རབ་ཏུ་ཟབ་བོ། །སྤྲུལ་སྐུའི་རྟེན་སྒྲོན་མེ་ལ་བསླབ་པ་ཡང་དེ་དང་མཚུངས་པ་ལས། མར་མེའི་དཀྱིལ་ནས་གཞན་དུ་ཁྲིད་ལ་བསྒོམ་པ་གནད་ཡིན་ནོ། །དེ་ཡང་ཉིན་མོ་ཉི་མ་མེ་ཤེལ་ལ་བསླབ་པས་འོད་སྣང་གོང་དུ་མཆེད་པ་དང་། ཉིན་དུས་ཀྱི་འཁྲུལ་སྣང་འགགས་པས་མྱ་ངན་ལས་འདས་པའི་རང་ས་ཟིན་པར་བྱེད་ལ། མཚན་མོ་ཟླ་བ་སྟེ་ཆུ་ཤེལ་དྲི་མ་མེད་པ་དང་འོད་གསལ་སྒྲོན་མེ་ལ་བསླབས་པས་ལྔ་ལྡན་འོད་དུ་སྣང་བས་མཚན་མོའ་འཁྲུལ་པ་འཁོར་བའི་ཆ་གཟུགས་སྐུ་གཉིས་སུ་དག་པ་གདོད་མར་གྲོལ་བའི་དགོས་པ་ཡོད་དོ། །དེ་ཡང་སྔ་དྲོ་ཕལ་ཆེར་ཤར་ཕྱོགས་སུ་འོད་དཀར་པོ་མ་བྱུང་གི་བར་དུ་གཏད་ལ། དེ་ནས་སྣང་བ་དེ་ལྷོར་ཁྲིད་ནས་དར་ཅིག་བཞག་ཅིང་ཕར་ཕར་ཁྲིད་ནས་ནུབ་ཏུ་འོད་ལྔའི་སྣང་བ་འཁྲིགས་པ་ལ་གཏད་ཅིང་། ཕྱི་འཕྲེད་ནུབ་ཏུ་གཏད་དུས་ཟ་འོག་རིས་སུ་སྣང་བ་དེ་བྱང་དུ་ཁྲིད་ལ་བསླབ་བོ། །ཅུང་ཟད་ཙམ་ལས་ཁྲིད་མི་ནུས་པར་ཡལ་ན་རྟེན་དང་མ་རེག་ཙམ་དུ་ཡུན་རིང་བར་བསླབ་ལ་ཇེ་རིང་དུ་ཁྲིད་ཅིང་། འོད་སྣང་གི་ནང་དུ་ལུ་གུ་རྒྱུད་གནས་པ་ལ་བལྟ་བ་གནད་དམ་པའོ། །ཞེས་གསུངས་ཏེ་ཤར་ལྷོ་སྦོ་བའི་ཚུལ་འདི་གཙོ་བོར་ཁྲ་ཁང་ལ་བརྟེན་དགོས་པ་ཡིན་ནོ། །གཉིས་པ་མངོན་སུམ་རང་གནད་དུ་ཕབ་པའི་དོན་ངོ་སྤྲད་པ་ནི། ཡུལ་རྐྱེན་དང་བྲལ་བ་ནམ་མཁའ་སྟོང་པ། དབང་པོ་རྐྱེན་དང་བྲལ་བ་རྒྱང་ཞགས་ཆུའི་སྒྲོན་མ། གནས་རྐྱེན་དང་བྲལ་བ་དྭངས་ཤིང་མཐོ་ལ་དབེན་པར། སེམས་དབང་པོའ་ཡུལ་ལ་གཏད་ལ་རེ་དོགས་ཀྱིས་བཅོས་བསླད་མི་བྱ་བར་རང་བབས་སུ་ཀློད་ལ་བླ་མས་བརྡའ་སྤྲད་པ་ནི། རང་རང་གི་མདུན་གྱི་ནམ་མཁར་ཐིག་ལེ་འོད་ལྔའི་གུར་ཁྱིམ་འཇའ་རིས་མུ་ཁྱུད་ཅན་ལྔ་ཚོམ་དུ་གནས་པའི་དབུས་སུ་བླ་མ་ཀུན་

ཤོག་ལྷེ་༢༠༣བཟང་ཡབ་ཡུམ་རྣམ་པར་སྣང་མཛད་ཀྱི་ངོ་བོ། །ཕྱོགས་བཞིའི་ཐིག་ལེར་རྒྱལ་བ་རིགས་བཞི་ཡབ་ཡུམ་ཁ་སྦྱོར་གྱི་སྐུར་གསལ་བར་མོས་ལ་གདུང་ཤུགས་དྲག་པོས་གསོལ་བ་ཐོབ་ཅིག །ཅེས་ཕུར་ཚུགས་གསོལ་འདེབས་གང་འོས་བྱ། །མཐར་དེ་ཐམས་ཅད་རང་གི་སྙིང་གར་ཐིམ། མི་ཤིགས་དྭངས་མ་ཆེན་པོ་ངོ་བོ་རང་བཞིན་ཐུགས་རྗེ་གསུམ་གྱི་བདག་ཉིད་རང་རིག་འོད་གསལ་བ་དང་དབྱེར་མེད་དུ་བསྲེས་ལ་མཉམ་པར་གཞག་པའི་དང་ནས་རྫོགས་ཆེན་ཡིག་དྲུག་ཅི་ནུས་སུ་བརྗོད། དེ་ནས་བཞུགས་སྟངས་གཟིགས་སྟངས་གང་རུང་དང་བསྟུན་སྣང་བའི་འཆར་ཆ་མཚོན་པར་བྱས་ལ། འོ་མདོ་སྔགས་ཀྱི་ཆོས་གཞན་ལས་བདེ་གཤེགས་སྙིང་པོ་དང་རྒྱུའི་རྒྱུད་སོགས་སུ་བཤད་ཅིང་ཡིད་བྱེད་ཀྱི་ཚུལ་དུ་བསྒོམ་པ་དེ་ཉིད། འདིར་གཞི་གནས་ཀྱི་རིག་པ་ངོ་བོ་ཀ་དག་གི་ཡེ་ཤེས་གསུམ་ལྡན། ངོ་བོ་རང་བཞིན་ཐུགས་རྗེ་གསུམ་སྟོང་གསལ་མཐའ་བྲལ་འགག་མེད་ཚིག་དང་བློའི་སྤྱོད་ཡུལ་ལས་འདས་པའི་མན་ངག་ཟབ་མོས་མངོན་སུམ་དུ་ངོ་སྤྲོད་པའི་ཚུལ་སྐལ་ལྡན་དབང་བོ་ཡང་རབ་ལས་ཅན་རྣམས་ལ་ཚིག་གསུམ་གྱི་སྒོ་ནས་གདམས་པ་ནི། གནས་དབེན་པར་སོང་ལ་ལུས་གནད་འདི་ལྟར་གྱིས། ཡུལ་ནམ་མཁའ་སྤྲིན་བྲལ་ལ། རིག་པ་འདི་ལྟར་ལྟོས་ཤིག །ཅེས་པའི་དོན་ཏེ། དེ་ལྟར་ཉམས་སུ་བླངས་པས་ཕྱིའི་དབྱིངས་ནམ་མཁའ་སྟོང་པ་མེ་ལོང་དང་འདྲ་བས་སྣང་བའི་གོ་འབྱེད་བྱས་ནས། ནང་གི་དབྱིངས་རྣམ་པར་དག་པའི་སྒྲོན་མ་ཞེས་བྱ་བ་བདག་པོའ་བྱད་དང་འདྲ་བ་དེ་ཉིད། ཐོག་མར་མཐིང་ཁ་ཁྱབ་པ་ཆེན་པོའ་འོད་ལས་རིམ་གྱིས་མཆེད་ནས་ནམ་མཁའི་འཇའ་ཚོན་ནམ་རྨ་བྱའི་མདོངས་ལྟར་བཀྲ་བར་འཆར་ཏེ། སྒྲོན་མ་འབར་བ་ལས། ཁ་དོག་གསལ་བའི་འོད་ལྔར་ཡང་། །

ཤོག་ལྷེ་༢༠༤འདི་ཉིད་རབ་ཏུ་གསལ་བར་གྱུར། །ཞེས་སོ། །དེའི་དབུས་སུ་ཐིག་ལེ་སྟོང་པའི་སྒྲོན་མ་ཞེས་བྱ་བ་ཀོ་མོག་གི་ཆུ་ལ་རྡོ་བསྐྱུར་བའམ་ཕུབ་ཀྱི་ས་ཀོར་ལྟ་བུ་ཐོག་མར་འལ་འོལ་ཙམ་དང་། དེ་ནས་དམར་ཟླུམ་གསལ་དྭངས་ཅན་འཆར་ལ། དེའི་ནང་དུ་རིག་པ་རྡོ་རྗེ་ལུ་གུ་རྒྱུད་བདག་པོའ་སེམས་དང་འདྲ་བ་ཉིད་འཆར་ཏེ། ཕྲ་བ་རྟ་རྔ་ལ་མདུད་པ་བྱས་པ་ལྟ་བུ་དང་། གསེར་སྐུད་དང་མུ་ཏིག་གི་ཕྲེང་བ་དང་། ལྕགས་ཚགས་དང་། མེ་ཏོག་གི་ཆུན་པོ་དང་། མེ་ཏོག་གི་དྲྭ་བ་རང་སར་གནས་པ་ལྟ་བུ་ཐོག་མར་འལ་འོལ་མི་གསལ་བ་འགུལ་འཁྲིགས་ཅན་དུ་འཆར་བས། དེ་ཉིད་ལྟ་སྟངས་ཀྱིས་ཁྲིད་ནས་དབྱིངས་ཀྱི་ར་བར་བཅུག་སྟེ་ཆེ་རེ་གཏད་ནས་ཡིན་མིན་གྱི་རྟོག་དཔྱོད་ཀྱིས་མ་བསླད་པར་ལྟ་མཁན་གྱི་རིག་པ་དེ་དང་། རིག་པ་རང་གི་ངོ་བོ་ལ་ལྟ་ཤེས་ཙམ་ལས་མི་གཡོ་བར་བསྒོམས་པས་ཇེ་བརྟན་ཇེ་གསལ་དུ་འགྱུར་ཏེ། ཐལ་འགྱུར་ལས། རང་གི་རིག་པ་ལུ་གུ་རྒྱུད། །འགྲོ་འོང་བྲལ་ཏེ་མཁའ་ལའོ། །ཞེས་སོགས་གསུངས་པས་སོ། །དེའང་བློས་བྱས་ཀྱིས་བཅོས་བསྒྱུར་མི་བྱ་བར་དབྱིངས་རིག་རང་ངོ་ལ་བལྟས་པས། ཕྱིའི་སྣང་བ་མ་འགགས་ཤིང་ནང་གི་འཛིན་པས་མ་བསླད་པ། བརྗོད་མེད་སྤྲོས་པ་དང་བྲལ་བའི་རང་སོ་བཟུང་བས་ཡུལ་དང་ཡུལ་ཅན་དབྱེར་མེད་དུ་འདྲེས་ནས་འོད་གསལ་གྱི་སྣང་བ་སྨིན་མཚམས་ནས་བྲལ་ཏེ་གསལ་འགྲིབ་མེད་པར་འཆར་ཞིང་། འོད་གསལ་གྱི་སྣང་བ་དེ་མི་གསལ་བའམ་གཡས་གཡོན་སྟེང་འོག་ཏུ་ཡལ་ཡོལ་བུད་ན་དེའི་སྟེང་དུ་མིག་དང་སེམས་ཅན་ཕོག་ཏུ་མ་འབྲང་བར་ལྟ་སྟངས་ཀྱིས་ཁྲིད་ལ་སྔར་བཞིན་ཤར་བ་ལ་སེམས་ཧ་ཅང་མ་སྒྲིམས་པར་གཏོད་ཅིག །དེ་ལྟར་ཉམས་སུ་བླངས་པས་ཉམས་མྱོང་རིག་ཐོག་ཏུ་ཕེབས་ཏེ་རིག་པའི་ངོ་བོ་ལུ་གུ་རྒྱུད་ཀྱི་རང་ཞལ་མངོན་སུམ་མཇལ་

ཤོག་ལྷེ་༢༠༥པས་ཀུན་ཏུ་བཟང་པོ་དང་སྐལ་བ་མཉམ་པར་གསུངས་པ་ཡིན་ནོ། །དེ་ལྟར་ཡང་འདས་རྗེས་ལས། མངོན་སུམ་གནད་འདི་སུས་མཐོང་བ། །ཁམས་གསུམ་ལྡོག་པ་མ་ཡིན་ནོ། །ཞེས་དང་། གསང་བ་སྤྱོད་རྒྱུད་ལས། དབྱིངས་དང་རིག་པའི་ལྟ་སྟངས་ནི། །སྒྲིབ་བྱེད་བྲལ་བའི་ནམ་མཁར་བལྟ། །དབྱིངས་ཀྱི་ནང་དུ་ལུ་གུ་རྒྱུད། །མཉམ་པར་བཞག་ཅིང་འབྲལ་མི་བྱ། །དེ་ལྟར་སུ་ཡིས་མཐོང་བའི་མི། །ཐོག་མའི་ཀུན་ཏུ་བཟང་པོ་དང་། །སྐལ་པ་དག་ནི་མཉམ་པའོ། །ཞེས་གསུངས་པའི་དོན་ལགས་པས་ངེས་ཤེས་སྐྱེད་ཅིང་ཉམས་ལེན་ལ་བརྩོན་པས་སྣང་བཞི་གོང་དུ་འཕེལ་བར་འགྱུར་རོ། །ཞེས་ངོ་སྤྲད། འདིར་སྒོམ་ཁྲིགས་ཆེན་མོ་ལས། དེ་ལྟར་ཉམས་སུ་བླང་བར་བསྟན་ནས། དེའི་དོན་ལ་ཡིད་ཆེས་པར་བྱ་བའི་ཕྱིར་རིག་པའི་རྒྱབ་རྟེན་གྱི་མན་ངག་གིས་གཏན་ལ་ཕབ་ནས། ཞེས་སོགས་གསུངས་པ་ལྟར་ཟངས་ཡིག་ཅན་རང་གི་རིག་པའི་རྒྱབ་བརྟེན་ནས་བཤད་པ་དང་། གཞན་ཡང་དུང་ཡིག་ཅན་སོགས་ནས་ཇི་སྐད་གསུངས་པ་ལྟར། དབྱིངས་རིག་འཆར་བའི་རྒྱུ་རྐྱེན། འཁྲུལ་མ་འཁྲུལ་གྱི་དོན། དེ་ཉམས་ལེན་དུ་འགྲོ་བའི་རྒྱུ་མཚན། འབྲས་བུ་སྐུ་གསུམ་གྱི་རྣམ་གཞག་བསྟན་པ་རྣམས་ཀྱིས་དབྱིངས་རིག་ཇི་ལྟར་མཐོང་བ་དེའི་རྒྱུ་མཚན་གོ་དོན་རྣམས་ལེགས་པར་བཤད་དེ་ངེས་ཤེས་བསྐྱེད་པར་བྱའོ། །འདིར་སྤྲོ་ཞིང་ནུས་ན་ཡང་ཏིག་གི་དཔེ་དོན་གསལ་བྱེད་སྒྲོན་མེའི་ངོ་སྤྲོད་ཀྱི་རིམ་པ་བརྒྱད་པོ་བྱའོ། །གསུམ་པ་སྣང་བ་བཞིའི་འཆར་ཚུལ་བསྟན་པ་ལ་བཞི། དང་པོ་ཆོས་ཉིད་མངོན་སུམ་གྱི་སྣང་བ་ནི། དེ་ལྟར་བྱ་བ་བཏང་ནས་རྩེ་གཅིག་ཏུ་ཉམས་སུ་བླངས་ཏེ། ཐོག་མ་ན་རྡོ་རྗེ་ལུ་གུ་རྒྱུད་ལ་མི་འགྱུར་བར་བལྟས་པས་དབྱིངས་སྣང་རྣམ་དག་གི་སྒྲོན་མ་འཇའ་

ཤོག་ལྷེ་༢༠༦འོད་ཀྱི་ནང་དུ་ཐིག་ལེ་སྟོང་སྒྲོན་མུ་ཁྱུད་ཅན་གྱི་ཐིག་ལེ་དམར་སེར་མཐེབ་ལོང་ཙམ་པ་སོགས་ཉིས་སྦྲེལ་གྱི་བར་ཚུན་ཆད་མཐོང་བ་སྟེ། དེ་ཡང་རེས་སྣང་རེས་མི་སྣང་བའོ། །འདིར་རྡོ་རྗེ་ལུ་གུ་རྒྱུད་འཕར་གཡོ་བྱེད་པའི་རྣམ་པ་དེ་ཉིད་ཨར་ལ་གཏད་པའམ་བཙོན་དུ་འཛིན་པར་བྱ་སྟེ། དེའི་མན་ངག་ནི། །སྨིན་མཚམས་དབྱིངས་རྣམ་དག་གི་སྒྲོན་མ་ཡི་གེ་ན་རོ་འདྲ་བ། ཁ་དོག་འཇའ་ཚོན་ལྟ་བུ་ལ་རིག་པ་མ་ཡེངས་པར་དེ་ལ་བཅུག་སྟེ་ལྟ་བ་ནི་འཛིན་པར་བྱེད་པའི་ལྕགས་ཀྱུ་ཞེས་བྱ་བ་མཆོག་ཏུ་ཟབ་པའི་མན་ངག་ཡིན་གསུངས་སོ། །གཉིས་པ་ཉམས་གོང་འཕེལ་གྱི་སྣང་བ་ནི། འོད་ལྔ་ཐིག་ལེ་དང་བཅས་པ་རྟག་ཏུ་སྣང་ཞིང་འོད་ལྔའི་སྣང་བ་ཟ་འོག་གི་གུར་ཁིམ་ལྟ་བུ་དང་རྩིབས་ཤར་གྱེན་འགྲེང་སོགས་སྨིན་མཚམས་ཀྱི་སོར་བཞི་ལས་བྲལ་སྟེ་ནམ་མཁར་འཐོན་ནས་མཐོང་བའི་ཡུལ་ཙམ་དུ་དབྱིངས་སྣང་ཟླུམ་ཁྲིགས་ཀྱི་ནང་དུ་པད་འདབས་བཞི་བཞིས་བསྐོར་བ་ལྟ་བུའི་ཚོམ་བུ་འཆར་བ་ཚུན་ཆད་དོ། །གསུམ་པ་རིག་པ་ཚད་ཕེབ་ནི། འོད་ལྔའི་སྣང་བས་ཁེངས་པའི་དབུས་ན་མུ་ཁྱུད་ལྔ་ལྡན་གྱི་ཐིག་ལེའི་ནང་དུ་དང་པོར་ལྷའི་གཙུག་ཏོར་སོགས་ནས་རིམ་པར་ཕྱེད་སྐུ་དང་། སྐུ་རྐྱང་སྐུ་ལྔ་ཚོམ་སོགས་གྲངས་མེད་ཞིང་ཁམས་ཐམས་ཅད་གང་བའི་བར་འཆར་རོ། །བཞི་པ་ཆོས་ཉིད་ཟད་པའི་སྣང་བ་ནི། ཕྱི་སྣང་བ། ནང་སྒྱུ་ལུས། གསང་བ་རླུང་སེམས། ཉམས་སྣང་གི་འཕེལ་བ་དང་བཅས་པ་ཐམས་ཅད་ཟད་པ་སྟེ། ལུས་འོད་སྐུར། ངག་གཞོམ་མེད་རང་སྒྲར། གཟུང་འཛིན་གྱི་བློ་ཆོས་སྐུར་གྲོལ་བའོ། །དེ་དག་གི་དོན་རྒྱས་པ་ནི་ཆོས་རྗེ་ཀུན་མཁྱེན་ཆེན་པོའ་གསུང་རབ་རྣམས་ལས་ཤེས་པར་བྱའོ། །བཞི་པ་མཐའ་རྟེན་གྱི་མན་ངག་བཤད་པ་ལ་བཞི། མི་འགུལ་བ་གསུམ་ལ་གཞི་བཅའ་བ། སྡོད་པ་

ཤོག་ལྷེ་༢༠༧གསུམ་གྱིས་ཚད་གཟུང་བ། ཐོབ་པ་གསུམ་གྱིས་གཟེར་གདང་བ། གདེང་བཞིའི་གྲོལ་ཚད་བསྟན་པའོ། །དང་པོ་ནི་ཉམས་སུ་ལེན་པའི་དུས་སུ། ལུས་མི་འཕུལ་བ་བཞུགས་སྟངས་གསུམ་ལས་མི་འདའ་བར་བྱས་པས། རྩ་རླུང་ཐད་སོར་གནས་པས་རྟོག་པ་རང་འགགས་པའོ། །མིག་མི་འགུལ་བར་གཟིགས་སྟངས་གསུམ་དང་མི་འབྲལ་བར་བྱས་པས། མངོན་སུམ་ཡུལ་ལ་གསལ་བས་ཡིད་དཔྱོད་ཚིག་གི་སྒྲོ་འདོགས་དང་བྲལ་བའོ། །རླུང་རིག་མི་འགུལ་བ་དལ་བར་བརྟེན་པས་ཆོས་ཉིད་རང་ངོར་གནས་ཏེ་མ་བུ་དབྱེར་མེད་དུ་འདེས་ནས། གདོད་མའི་དབྱིངས་སུ་གནས་པའི་དགོས་པ་ཡོད་དོ། །དེའི་ཚེ་སྒྲོན་མ་བཞིའི་དོན་ལ་དཔྱོད་པ་ནི། སྙིང་དབུས་འོད་རྩའི་ནང་ན་ཡེ་ཤེས་ཆེན་པོ་གནས་པ་ཡང་། ངོ་བོ་སྟོང་པ་དང་ཐུགས་རྗེ་རིག་པ་གཉིས་སུ་མེད་པ་ནི་ཤེས་རབ་རང་བྱུང་གི་སྒྲོན་མ་ཡིན་ལ། རང་བཞིན་གསལ་བ་འཇའ་འོད་ཀྱི་ཁང་པ་ནི། དབྱིངས་རྣམ་པར་དག་པའི་སྒྲོན་མ་དང་། དེའི་དབུས་ན་ལྔ་ལྡན་འོད་ཀྱི་ཚོམ་བུ་རིགས་ལྔ་སྐུའི་ཆ་ཅན་ནི་ཐིག་ལེ་སྟོང་བའི་སྒྲོན་མ་སྟེ། རྨ་བྱའི་མདོངས་ལྟ་བུའོ། །ནང་གི་གདངས་ཕྱིར་ཤར་དུས་མིག་གི་ཨ་འབྲས་ཀྱི་འོད་གདངས་དམར་སེར་གྱི་སྣང་བ་ལ་ཐིག་ལེ་སྟོང་པའི་སྒྲོན་མར་བཏགས་པ་ནི་གདངས་ཀྱི་ཐིག་ལེ་སྟོང་སྒྲོན་ཡིན་ལ། ནམ་མཁར་སྣང་བའི་འོད་སྣང་ལ་དབྱངས་རྣམ་དག་གི་སྒྲོན་མར་བཏགས་པ་ཡང་གདངས་ཀྱི་དབྱིངས་རྣམ་དག་གི་སྒྲོན་མའོ། །དེ་བཞིན་དུ་རིག་པ་རྡོ་རྗེ་ལུ་གུ་རྒྱུད་ཅེས་བཏགས་ཀྱང་རིག་པའི་གདངས་རྡོ་རྗེ་ལུ་གུ་རྒྱུད་དོ། །དེ་ལྟར་འོད་ནང་དུ་ལུ་གུ་རྒྱུད་གནས་པ་ལ་གཏད་ནས་མ་ཡེངས་པར་ཕྱིར་བསྒོམས་པས། ནང་དུ་སྟོང་གསལ་སྤྲོས་པ་དང་བྲལ་བའི་ཡེ་ཤེས་ཤར་བ་ནི། ཤེས་རབ་རང་བྱུང་གི་སྒྲོན་མ་

ཤོག་ལྷེ་༢༠༨ཞེས་བྱའོ། །དེ་ལྟར་བཏགས་པ་ཡང་། གནད་དེས་ཡེ་ནས་ཡོད་ཐོག་ཏུ་དུས་དེར་ཕེབས་པ་ལ་བཏགས་ཀྱིས་སྔར་མེད་གསར་བྱུང་གི་ཤེས་རབ་རང་བྱུང་གི་སྒྲོན་མ་མ་ཡིན་ནོ། །གཉིས་པ་སྡོད་པ་གསུམ་ནི། དེ་ལྟར་བྱས་པས་ཕྱི་སྣང་བ་སྡོད་པས་རྐྱེན་ངན་གྲོགས་སུ་འཆར། ནང་སྒྱུ་ལུས་སྡོད་པས་འཁྲུལ་པའི་བྱ་བ་དང་བྲལ། གསང་བ་རླུང་སེམས་སྡོད་པས་རྣམ་རྟོག་སྐྱེ་མི་སྲིད་པའོ། །འདིའི་སྐབས་སུ་ཚད་རྨི་ལམ་གྱིས་གཟུང་བ་དང་། རྟགས་ལུས་ངག་ལ་འཆར་བ་གཉིས་ལས། དང་པོ་ནི། བརྩོན་འགྲུས་རབ་རྨི་ལམ་གཏན་ནས་འགགས། འབྲིང་གིས་རྨི་ལམ་ལ་རྨི་ལམ་དུ་ཤེས། ཐ་མས་རྨི་ལམ་ངན་པ་མེད་པར་བཟང་པོ་ཤ་སྟག་ཏུ་འགྱུར་བ་ཡིན་ནོ། །གཉིས་པ་ལ་བཞི་ལས། ཆོས་ཉིད་མངོན་སུམ་གྱི་དུས་ན། ལུས་རུ་སྦལ་འཁར་གཞོང་དུ་བཅུག་པ་ལྟར་འདུག་སྟངས་ལས་འབྲལ་མི་ཕོད་པ་དང་། ངག་ལྐུགས་པ་ལྟར་བརྗོད་དུ་མེད་པ་དང་། སེམས་མཁའ་འགྲོ་སྙི་ལ་ཟིན་པ་ལྟར་རྣམ་རྟོག་འཕྲོ་བ་ལྟར་སྣང་ཡང་གཞི་ལས་མ་གཡོས་པའོ། །ཉམས་གོང་འཕེལ་གྱི་དུས་ན། ལུས་སྐྱེས་བུ་ནད་ཀྱིས་གདུངས་པ་ལྟར་རྒྱན་དང་བྱི་དོར་མེད་པ། ངག་སྨྱོན་པ་ལྟར་ཟང་ཐལ་རྗེས་མེད་པ། སེམས་དུག་ནད་ཀྱིས་ཟིན་པ་ལྟར་རྟོག་པའི་འཕྲོ་འདུ་ཆད་པའོ། །རིག་པ་ཚད་ཕེབས་ཀྱི་དུས་ན། ལུས་གླང་པོ་ཆེ་འདམ་དུ་བྱིང་བ་ལྟར་སྐད་ཅིག་གིས་རི་བྲག་ལ་ཐོགས་མེད་དུ་འགྲོ་བ། ངག་གྲུལ་བུམ་གྱི་ཕྲུ་གུ་ལྟར་སྙན་ཞིང་ཡིད་དུ་འོང་བ། སེམས་སྙིང་ལ་མདས་ཟིན་པ་ལྟར་དྲན་བསམ་གྱི་འཕྲོ་འདུ་ཆད་པའོ། །ཆོས་ཉིད་ཟད་པའི་དུས་ན། ལུས་དུར་ཁྲོད་ཀྱི་རོ་ལྟར་དགག་སྒྲུབ་ཀྱི་འཁྲུལ་པ་མེད་པའོ། །ངག་བྲག་ཆ་ལྟར་གཞན་གྱི་རྗེས་སུ་ཟློ་བ། སེམས་རིམས་ནད་བྱང་བའི་སྐྱེས་བུ་

ཤོག་ལྷེ་༢༠༩ལྟར་དྲན་བསམ་དབྱིངས་སུ་དག་ནས་རིག་པ་རང་གསལ་དུ་གནས་པའོ། །གསུམ་པ་ཐོབ་པ་གསུམ་ནི། ཕྱི་སྣང་བ་ལ་དབང་ཐོབ་པས་སྣང་རྐྱེན་ཞིང་ཁམས་སུ་གྲོལ། ནང་ཕུང་པོ་ལ་དབང་ཐོབ་པས་སྒྱུ་ལུས་འོད་གསལ་དུ་གྲོལ། གསང་བ་དབྱིངས་རིག་ལ་དབང་ཐོབ་པས་འཁྲུལ་རྟོག་རང་འགགས་པའོ། །བཞི་པ་གདེང་བཞི་ནི། ཡར་སངས་རྒྱས་ལ་ཐོབ་ཏུ་རེ་བ་མེད་པ་དང་། མ་ཐོབ་ཀྱི་དོགས་པ་མེད། མར་འཁོར་བར་མི་སྐྱེ་བའི་རེ་བ་དང་། སྐྱེས་ཀྱིས་དོགས་པ་མེད་པའོ། །དེ་དག་གིས་རིག་པ་གཏན་ལ་དབབ་པ་ལམ་ཐོད་རྒལ་སྙིང་པོའ་དོན་མངོན་སུམ་ལམ་དུ་བྱེད་པའི་ཁྲིད་བསྟན་ཟིན་ཏོ། །གསུམ་པ་རྗེས་གནད་བཞི་ཆོས་ཉིད་ཀྱི་འཁོར་ལོས་ཆུ་བོ་རྒྱུན་གྱི་རྣལ་འབྱོར་དུ་བྱ་བའི་ཚུལ་ལ་གཉིས། དངོས་དང་། འཕྲོས་དོན་ནོ། །དང་པོ་ལ་གཉིས། ཉིན་མོ་སྣང་བ་རྒྱས་གདབ་པ་དང་། མཚན་མོ་ཡེ་ཤེས་གནད་དུ་བསྣུན་པའོ། །དང་པོ་ནི། ཡང་ཟབ་ཡེ་ཤེས་འཁོར་ལོ་ལྟར་གཞི་ལམ་འབྲས་བུ་གསུམ་ལ་དམ་ཚིག་ཆེན་པོ་བཅུ་གསུམ་གྱིས་བསྲུང་བའི་ཚུལ་འདིར་ལེན་དགོས་ལ། མདོར་བསྡུས་པ་ནི། ཕྱི་སྣང་བ། ནང་རིག་པ། མདོར་ན་སྣང་སྲིད་འཁོར་འདས་ཀྱིས་བསྡུས་པའི་ཆོས་གང་ལའང་འཛིན་ཞེན་གྱི་བློའི་དྲི་མས་མ་བསླད། ཉམས་ཀྱི་ཞེན་པས་མ་བཅིངས་པར་གང་ལྟར་སྣང་ཡང་རྨི་ལམ་སྒྱུ་མའི་རོལ་པ་ལྟ་བུའོ་སྙམ་པའི་བློས་སྦྱང་། རྨི་ལམ་སྒྱུ་མ་ལྟ་བུ་ཤར་པའི་སྟོང་ཆའི་བློ་དེ་ཡང་ཡོད་མེད། ཡིན་མིན། ཕྱོགས་རིས། བཟང་ངན། བླང་དོར་ལས་འདས་པའི་སྒྲོས་བྲལ་ནམ་མཁའ་ལྟ་བུའི་ངང་ལ་བསལ་བཞག་མེད་པར་འཇོག་གོ །རྗེས་ཐོབ་ཀྱི་གནས་སྐབས་རྣམས་

ཤོག་ལྷེ་༢༡༠སུའང་ཤེས་པ་རྒྱ་ཡན་དུ་མ་ཤོར་བར་དྲན་འཛིན་གྱིས་འདི་ལྟར་སྣང་བའི་ཆོས་ཐམས་ཅད་སྒྱུ་མ། མིག་ཡོར། ཆུ་ཟླ། སྤྲུལ་པ། དྲི་ཟའི་གྲོང་ཁྱེར་ཙམ་དུ་ངེས་པར་འདུག་ཨང་། སྐད་ཅིག་ཀྱང་བདེན་པར་གྲུབ་པ་རུལ་ཙམ་ཡང་མེད་སྙམ་དུ་རྩལ་སྦྱང་། དེ་བཞིན་དུ་ཆགས་སྡང་། དགག་སྒྲུབ། རེ་དོགས་སོགས་གཉིས་འཛིན་ཐམས་ཅད་གཉིས་མེད་ཡེ་གྲོལ་གྱི་དགོངས་པ་ཟད་ཐལ་རྗེན་པར་སྐྱོང་བ་ལ་བསླབ་པར་བྱའོ། །གཉིས་པ་ལ་གསུམ། སྲོང་ལ་དབང་པོ་གནས་སུ་བསྡུ་བ། ནམ་གུང་ཤེས་པ་བུམ་པར་འཇུག་པ། ཐོ་རངས་རིག་པ་རང་གསལ་གཏོང་པའོ། །དང་པོ་ནི། མི་ཚེའི་ཕྱེད་གཉིད་ལོག་པ་ཡིན་པས་གཉིད་དགེ་བར་བསྒྱུར་པའི་ཕྱིར་འདི་ལྟར་ཉམས་སུ་བླང་བར་བྱ་སྟེ། སྤྲུལ་སྐུ་དྲང་སྲོང་ཙོག་པུའི་ལུས་གནད་བཅས་ལ། རང་གི་ལུས་ཀྱི་དབུས་སུ་རྩ་དབུ་མ་ཕྱི་དཀར་ལ་ནང་དམར་བའམ། ཡང་ན་ཁ་དོག་དམར་སྐྱ་དྭངས་གསལ་སྦུབས་སྟོང་མདའ་སྨྱུག་ཙམ་སྤྱི་བོ་ནས་གསང་གནས་ཀྱི་བར་དྲང་ཐལ་ལེར་གནས་པའི་ལྟེ་བར་པདྨ་དམར་པོ་འདབ་མ་བཞི་པའི་དབུས་སུ་ཨ་ཐུང་དམར་པོ་རེག་པ་ཚ་བ་སོལ་མེ་ངར་མ་ལ་ཕུས་བཏབ་པ་ལྟ་བུ། དབུ་མའི་ཡར་སྣར་ཧཾ་དཀར་པོ་མགོ་ཐུར་དུ་བལྟ་བ་སྣུམ་ལ་འདྲིལ་བ་བདེ་བའི་རང་བཞིན་འཛག་ལ་ཁང་པར་བསྒོམ། བདེ་དྲོད་ཀྱི་གཞི་བཅའ་བའི་དམིགས་པ་ལ་སེམས་དུམ་གཅིག་བཟུང་ངོ་། །དེ་ནས་རླུང་རོ་ལན་གསུམ་སང་གིས་བསལ། སྟེང་རླུང་དལ་གྱིས་རྔུབ། འོག་རླུང་གྱེན་དུ་འཐེན་པས་ལྟེ་བའི་ཨ་ལས་མེ་དམར་ཁྱུག་གེ་འབར། སྤྱི་བོའ་ཧཾ་ལ་རེག །ཉཾ་ལས་བྱང་སེམས་བདེ་བའི་རྒྱུན་ནར་བབས་པས་མེའི་གསོས་བྱས། མེ་ཆེར་འབར་བས་ལས་དང་བག་ཆགས་བསྲེགས། ཟླ་བ་བདུད་རྩིར་ཞུ་བའི་དྭངས་མས་དབུ་མ་དང་ལུས་ཀྱི་རྩ་ཁམས་ཐམས་ཅད་

ཤོག་ལྷེ་༢༡༡གང་། བདེ་དྲོད་ཀྱི་ཡེ་ཤེས་ཁྱད་པར་བ་སྐྱེས་པ་ལ་སེམས་བཟུང་སྟེ་བུམ་ཅན་ཅི་ནུས་བཟུང་། བུམ་ཅན་གྱིས་དལ་ན་སྔར་གྱི་དམིགས་པ་དེ་རླུང་བབས་ཀྱི་ངང་ནས་ཅི་ནུས་སུ་བསྒོམ་མོ། །གཉིས་པ་ནི། ལོངས་སྐུའི་འདུག་སྟངས་སམ་གཞོག་གཡས་ཕབ་པར་གསུངས་ཀྱང་། ཕྱག་ལེན་ཏུ། དྲང་སྲོང་ཙོག་པུའི་སྟབས་ཀྱིས་ཉལ་པར་བཞེད་ལ། གོང་ལྟར་ལུས་ཀྱི་དབུས་སུ་དབུ་མ་སྔར་ལྟར་གསལ་བཏབ། ཁྱད་པར་དུ་སྙིང་གར་པདྨ་དམར་པོ་འདབ་མ་བཞི་པ་ཅུང་ཟད་ཁ་བྱེ་བའི་དབུས་སུ་ཨ་ཡིག་དཀར་པོ་འོད་འབར་བ་ཞིག་བསྒོམས་ལ་སེམས་དར་ཅིག་བཟུང་རྗེས་སྤྱི་བོར་ཡང་ཨ་དཀར་པོ་ཞིག་བསྒོམ། དེ་ནས་ཨ་གཉིས་ཀྱི་བར་དུ་ཨ་དཀར་པོ་ཤིན་ཏུ་ཕྲ་བ་ཉེར་གཅིག་ཕྲེང་བ་བརྒྱུས་པ་ལྟ་བུར་གནས་པར་བསམས་ལ་རླུང་བྱང་བར་ཡོད་ན་བུམ་ཅན་ཁ་སྦྱོར་དུ་བཟུང་ཞིང་། དེ་ལྟར་མིན་ན་འཇམ་རླུང་རང་བབས་ཀྱི་ངང་ནས་གསལ་སྟོང་གི་ཡེ་ཤེས་ས་ལེ་བའི་དང་ཅི་ནུས་བསྒོམ། གཉིད་དུ་འགྲོ་ཁར་ཨ་རྣམས་རིམ་གྱིས་སྙིང་གའི་ཨ་ལ་ཐིམ། དེ་ནས་སྤྱི་བོའ་ཨ་དེ་ཡང་སྙིང་གའི་ཨ་ལ་སིབ་ཀྱིས་ཐིམ། སྙིང་གའི་པདྨ་ཁ་ཟུམ་པའི་ནང་དུ་ཨ་དེ་བུམ་ནང་གི་མར་མེ་ལྟར་གནས་པར་བསམས་ལ། རྨི་ལམ་འཛིན་པའི་འདུན་པ་བཅས་ཏེ་སེམས་ཧ་ཅང་མ་གྲིམས་ཧ་ཅང་མ་གློད་པའི་ངང་ནས་གཉིད་དུ་འགྲོ་བར་བྱ། གལ་ཏེ་གཉིད་མ་བྱུང་ན་སྔར་གྱི་དམིགས་པ་དེ་ག་ཡང་ཡང་བསྐྱར། རྨི་ལམ་དང་གཉིད་ཀྱི་བར་རྣམ་རྟོག་གཞན་གྱིས་མ་ཆོད་པར་སློབ་པ་གལ་ཆེ། རྣམ་རྟོག་ཤར་ཡང་སྤང་བླང་བསུ་སྐྱེལ་དགག་སྒྲུབ་མི་བྱ་བར་ཨ་ཡིག་གི་སྟེང་དུ་སེམས་བསླན་ཏེ་བཞག །གཉིད་འཐུག་པོ་མིན་པའི་གཉིད་དང་རྨི་ལམ་གྱི་བར་དེར་མི་དང་ཁར་ཁྱིམ་སོགས་རྣམ་རྟོག་གི་

ཤོག་ལྷེ་༢༡༢སྣང་བ་ར་རི་ཞིག་འབྱུང་བ་དེ་རྨི་ལམ་གྱི་རྒྱུ་ཡིན་པས་ན་མིག་མི་འབྱེད་པར་དེ་རྨི་ལམ་ཡིན་སྙམ་པའི་འདུན་པ་བཏང་ལ་ཨ་དེའི་སྟེང་དུ་སེམས་བཟུང་ལ་བཞག་ཅིང་ངོས་ཟིན་པར་བྱས་པས་དཔེ་ཁབ་མིག་ཏུ་སྐུད་པ་ཚུད་པ་ལྟར་མུ་འབྱོར་ཞིང་ཟིན་སླབ་ཡིན། དེ་ལས་ཇི་ཞིག་ན་གཉིད་མཐུག་པའི་སྐབས་ཀྱི་སྟོང་པའི་ཡེ་ཤེས་རྨི་ལམ་མེད་པར་གསལ་སྟོང་ནམ་མཁའ་ལྟ་བུ་ལྷག་གེ་འཆར་བ་དེའི་ཉམས་མ་ཤོར་བའི་ངང་ལས་ལྷ་སྐུ་སྒྱུ་མ་ལྟ་བུའི་སྐུར་ལངས་ཞིང་འཛིན་མེད་སྤྲོས་བྲལ་གྱི་ངང་དུ་འཇོག་གོ །རྨིས་ན་རྨི་ལམ་དང་རྣམ་རྟོག་ཐམས་ཅད་སྙིང་ནང་གི་ཨ་ལ་བསྡུས་ཤིང་གོང་ལྟར་བསྒོམས་པས་འོད་གསལ་རང་བྱུང་གི་ཡེ་ཤེས་འཆར་རོ། །ཉིན་མོའང་རྨི་ལམ་གྱི་འདུན་ཤུགས་དང་སྣང་བ་ཞི་ཁྲོ་སོ་སོའ་སླུ་སྤེལ་བསྒྱུར་བྱེད་པ་དང་། རེས་འཁོར་བའི་ལས་སྣང་སྣ་ཚོགས་ལ་སྤེལ་བསྒྱུར་བྱ་བ་དང་། དག་པ་དང་། མ་དག་པའི་ཞིང་ཁམས་རྣམས་སུ་འགྲོ་ཞིང་གནས་ལུགས་བརྟག་པ་དང་། མེ་ཆུ་གཡང་ས་དང་གཅན་གཟན་སོགས་ཀྱིས་མཚོན་འཇིགས་སྐྲག་གི་སྣང་བ་དང་སྦྱར་ཏེ་འདུན་ཤུགས་དྲག་པོས་ཐོག་བརྫིས་ཀྱི་རྩལ་སྦྱངས་པས། རྨི་ལམ་གྱི་རྟེན་དེས་ཉིན་མོ་ཇི་ལྟར་སྦྱངས་པའི་དོན་རྣམས་མཚན་མོ་གང་འདོད་ཀྱི་སྤྲུལ་སྒྱུར་བྱེད་ནུས་ཤིང་། དེ་ཡང་ཐོག་མར་འོལ་སྤྱི་ཙམ་དང་། དེ་ནས་ཇེ་བརྟན་ཇེ་གསལ་དུ་འགྱུར་བ་ཡིན་གསུངས། དེ་ཡང་གཉིད་དུ་སོང་ལ་ཉེ་འཁོར་གྱི་གཟུགས་མཐོང་། སྒྲ་ཐོས། དྲི་ཚོར། རོ་མྱོང་། རེག་བྱ་ཚོར། གཏམ་གྱི་དོན་རིག་ལ་རྟོག་པ་མི་སྐྱེ། གཉིད་དུ་མ་སོང་བ་ཡང་མ་ཡིན་ཏེ། དེ་ལས་སད་རྒྱུ་འབྱུང་བ་ཡིན། དེ་ལྟར་བརྩོན་པ་ཆེན་པོས་ཡང་ཡང་བཟུང་ཡང་མ་ཟིན་ན་འབྱམས་པ་ཡིན་པས་འབྱམས་པ་བཞིའི་གཅོད་ཚུལ། འཛིན་པའི་དུས་གནད། སྲབ་མཐུག་

ཤོག་ལྷེ་༢༡༣འོད་གསལ་གྱི་དབྱེ་སྒོ་སོགས་ཁྲིད་རིམ་སྤྱི་དང་མཚུངས་པ་ཡིན་ནོ། །གསུམ་པ་ནི། ཐོ་རངས་ཀྱི་ཐུན་ལ་བབས་པ་ན། སེང་གེའི་འདུག་སྟངས་བཅས་ལ། སྙིང་ནང་གི་ཨ་དེར་གསལ་སྣང་འདོན་བསྐྱོར་ཞིག་བྱས། མིག་བར་སྣང་ལ་གཏད་དེ་ཧ་ཞེས་གསུམ་བུས་པས་སྙིང་གའི་པདྨ་ཁ་བྱེ་བའི་ནང་ནས་ཨ་དེ་ཚངས་བུག་ཏུ་རྒྱངས་ཀྱིས་ཐོན། གཞུ་གང་ཙམ་གྱི་ནམ་མཁའ་ལ་ལིང་ངེ་འདུག་པ་ལ་སེམས་གཏད་ལ་ཅུང་ཞིག་ཕྱིར་འཛིན་པ་ལ་བསླབས་པས། གང་ལ་ཡང་མི་རྟོག་པའི་ཏིང་ངེ་འཛིན་བཟང་པོ་སྐྱེ་བར་འགྱུར་རོ། །ཤེས་པ་ཡེར་ཞིང་རྒོད་ན་ཨ་དེ་ཇེ་དམར་གྱུར་ཏེ། སྙིང་ནང་དུ་འདུག་པ་ལ་སེམས་གཏད། མིག་ཕྱེད་བཙུམ་གྱི་ཅུང་ཟད་དམ་དམའ་བར་ལྟ་ཞིང་བསྒོམ། ཡང་བྱིང་ན་སྔར་ལྟར་བསྒོམས་པས་བྱིང་རྒོད་དང་བྲལ་བའི་ཡེ་ཤེས་རྣམ་པར་མི་རྟོག་པ་ཆུ་བོའ་རྒྱུན་བཞིན་འཆར་བ་ཡིན་ནོ། །དེ་ལྟར་མཚན་མོ་ཐུན་གསུམ་གྱི་རིམ་པས་ཉམས་སུ་བླངས་པས་བདེ་གསལ་མི་རྟོག་པའི་ཏིང་ངེ་འཛིན་བཟང་པོ་སྐྱེ་ཞིང་མངོན་པར་ཤེས་པ་ལ་སོགས་པ་མངོན་དུ་གྲུབ། བྱ་རྩོལ་བྲལ་བ་ཀུན་བཟང་གི་ཀློང་དེར་མྱུར་ཏུ་གྲོལ་བར་འགྱུར་བ་ཡིན་ནོ། །འདིར་ཀུན་མཁྱེན་ཆོས་རྗེའི་ཞལ་ནས། དེ་ལྟར་ཉིན་མཚན་དུ་སྒོམ་པ་ཐམས་ཅད་ཀྱི་སྐབས་སུའང་། དལ་འབྱོར་རྙེད་དཀའ་བས་དལ་བ་ཆུད་མི་གསོན་པར་བརྩོན་པ་དང་། ཆོ་མི་རྟག་པར་ཤེས་པས་སྒྲུབ་པ་ལ་ལོང་ཡོད་མི་བྱེད་པ་དང་། འཁོར་བ་སྡུག་བསྔལ་དུ་ཤེས་པས་སྲིད་པ་ལ་མངོན་པར་སྐྱོ་བ་དང་། ཆོས་ཐམས་ཅད་ངོ་བོ་ཉིད་མེད་པས་གང་ལའང་བདེན་ཞེན་མེད་པ་དང་། མྱ་ངན་ལས་འདས་པ་མཆོག་ཏུ་བདེ་བས་ཞི་བའི་བྱང་ཆུབ་སྒྲུབ་པ་དང་། གསང་སྔགས་ཐབས་ཀྱིས་འགྲུབ་པས་སྣ་ཚོགས་ལམ་ལ་བསློབ་པ་དང་། ཐེག་

ཤོག་ལྷེ་༢༡༤ཆེན་སྙིང་རྗེ་ལ་རགས་ལས་པས་གཞན་དོན་སེམས་བསྐྱེད་དང་ལྡན་པ་དང་། བྱིན་རླབས་མོས་གུས་ལ་རགས་ལས་པས་བླ་མ་སངས་རྒྱས་སུ་མཐོང་བ་དང་། ཐམས་ཅད་རང་སེམས་ལ་ཐུག་པས་དག་སྣང་ཕྱོགས་མེད་ལ་སྦྱང་བ་དང་། འཁོར་བ་འཁྲུལ་རྟོག་ལས་བྱུང་བས་གཟུང་འཛིན་གྱི་རྩ་བ་གཅད་པ་དང་། བདེ་སྡུག་སྔོན་ལས་ལས་བྱུང་བས་དགེ་སྡིག་བླང་དོར་དུ་བྱ་བ་དང་། འཁོར་འདས་རིག་པ་ལས་ཤར་བས་རིག་པ་རང་གནད་དུ་ངོ་ཤེས་པར་བྱ་བ་སྟེ། གནད་རྣམ་པ་བཅུ་གཉིས་ཀྱིས་རང་གི་རྒྱུད་འདུལ་བ་ནི་ཡང་གནད་གལ་པོ་ཆེའི་གདམས་པ་ཡིན་པས་སྙིང་ནས་བསམ་པར་བྱའོ། །ཞེས་གསུངས་སོ། །གཉིས་པ་འཕྲོས་དོན་ནི། གོང་གསལ་དམིགས་པ་དེ་དང་དེ་སྒོམ་པའི་དགོས་ཆེད་དང་། གོ་དོན། ལུས་ཉམས་ཤེས་ཉམས་ལ་སོགས་པའི་རྟགས་ཚད་དང་གེགས་སེལ་བོགས་འདོན། །ཉམས་མྱོང་སྐྱེས་རིམ་ནས་ངོ་སྤྲོད་ཐབས་རྣམས་ཟངས་ཡིག་ཅན་སོགས་རྩ་བའི་མན་ངག་དང་། དེ་དག་གི་དགོངས་འགྲེལ་ཡང་ཏིག་ཡིད་བཞིན་ནོར་བུའི་གླེགས་བམ་ཉིད་འབྲལ་སྤང་གི་ཚུལ་དུ་འཆངས་ནས་རྟོགས་པར་བྱ་དགོས་ཤིང་། ཁྱད་པར་ལུས་ཉམས་ལེན་གྱི་རྟེན་ཡིན་པས་ནད་གདོན་གྱི་གེགས་བྱུང་ན་གེགས་སེལ་བདུད་རྩིའི་ལྗོན་ཤིང་མངོན་སུམ་གྱི་གནད་མིག་ཡིན་པས་དེ་ལ་གེགས་བྱུང་ན་གེགས་སེལ་སྒྲོན་མ་སྣང་བྱེད། རིག་པ་སེམས་ཉམས་ལེན་གྱི་རྩ་བ་ཡིན་པས་དེའི་གེགས་སེལ་ཡེ་ཤེས་དྲི་མེད་རྣམས་ཚིག་ཙམ་དུ་མ་ལུས་པར་བརྟེན་པར་བྱ། བོགས་འདོན་ཁྲེགས་ཐོད་གཉིས་ཀ་ལ་གལ་ཆེ་བ་ནམ་མཁའ་སུམ་ཕྲུགས་ཀྱི་གདམས་པ་ནི། ཕྱིའི་ནམ་མཁའ་སྤྲིན་མེད་སྔོ་དྭངས་ནི་འདུས་མ་བྱས་རྡུལ་བྲལ་གྱི་ནམ་མཁའ། ནང་གི་ནམ་མཁའ་གསང་བའི་རྩ་དབུ་མ་སྟེ། རྒྱ་མཚོ་གསེར་གྱི་ཉི་མ་ལས་བྱུང་བའི་ཀ་ཏི་ཤེལ་སྦུག་རྒྱང་ཞག་ཆུའི་སྒྲོན་མ་དང་འབྲེལ་བ། དེ་གཉིས་

ཤོག་ལྷེ་༢༡༥ཀ་ལ་ཁྱབ་བྱེད་གསང་བའི་ནམ་མཁའ་སྙིང་གའི་མི་ཤིགས་པའི་ཐིག་ལེ། དེའང་མ་དག་པ་གསུམ་འདུས་པའི་ཆ་ཅན་མ་ཡིན་པར་དག་པའི་མི་ཤིགས་པ་འོད་གསལ་བའི་རང་བཞིན། །ངོ་བོ་རང་བཞིན་ཐུགས་རྗེ་གསུམ་གྱི་བདག་ཉིད་རྣམ་པ་ཐམས་ཅད་པ་སྟེ། དེ་ཡང་ནམ་མཁའ་དང་པོའ་དཔེ་རྡུལ་བྲལ་གྱི་མེ་ལོང་། གཉིས་པའི་དཔེ་མདའ་སྲོང་གི་མིག །གསུམ་པའི་དཔེ་ནོར་བུ་ཀེ་ཏ་ཀ་ལྟ་བུའོ། །དེའང་སྤྱིར་རྩ་དབུ་མ་ཞེས་བྱ་བ་དངོས་སུ་མིག་ཤེས་ཀྱིས་བཟུང་རུང་དབུ་མའི་ཐ་སྙད་འདོགས་པ་དེ་ནི་ད་ལྟ་ལུས་ལ་གནས་ཚུལ་རྒལ་ཚིགས་དང་ཉེ་བའི་རྒྱབ་ངོས་སུ་ཡོད་པ་སྲོག་རྩ་ཞེས་གྲགས་པ་སྟེ་གཟུང་འཛིན་འཁོར་བ་སྐྱེད་བྱེད་ཡིན། འདིར་ནང་གི་ནམ་མཁར་བཞག་རྒྱུའི་དབུ་མ་ནི་མིག་ཤེས་ཀྱི་སྤྱོད་ཡུལ་ལས་འདས་པ་དྭངས་མ་ལྔ་ལྡན་གྱི་རྩ་ལུས་ཅན་རྣམས་ཀྱི་སྙིང་གའི་དབུས་སུ་ཡོད་པ་དང་། དེ་ལས་གྱེས་པའི་ཡལ་ག་མིག་ལ་ཟུག་པ་གཉིས་ཏེ་སྔ་མའི་མིང་ལ་རྒྱ་མཚོ་གསེར་གྱི་ཉི་མ་ཞེས་བྱ། ཕྱི་མ་ལ་རྒྱང་ཞགས་ཆུའི་སྒྲོན་མ་ཞེས་བྱ། དེ་དག་ནི་རྟེན་ཁྱབ་བྱའི་ནམ་མཁའ་འམ་དབུ་མ་ཡིན། དེའི་རང་བཞིན་ཤིན་ཏུ་རྣམ་དག་དྭངས་མ་ཆེན་པོའ་དབུ་མ་དེ་གཉིས་ཀྱི་རང་བཞིན་དུ་བཞུགས་པ་ཡང་། དེ་དག་གི་ཁོངས་སུ་བསྡུ་ཞིང་། མིང་གི་བརྡ་ཆད་ཀྱང་མཉམ་པོར་འཇུག །གཉིས་ཀ་ཡང་ནང་གི་ནམ་མཁའ་ཡིན། གསང་བའི་ནམ་མཁའ་དྭངས་མ་ལྔ་ལྡན་གྱི་ཐིག་ལེ། དེའི་ཆོས་ཉིད་རང་བཞིན་གྱིས་འོད་གསལ་བ་ངོ་བོ་རང་བཞིན་ཐུགས་རྗེ་གསུམ་གྱི་བདག་ཉིད་རྣམ་པ་ཐམས་ཅད་པ་དེ་ནི་བརྟེན་པའམ་ཁྱབ་བྱེད་དོ། །དེ་ལྟར་ཤེས་པར་བྱས་ནས་ཕྱིའི་ནམ་མཁའ་དྭངས་པ་ལ་བཞུགས་སྟངས་གང་རུང་དང་འབྲེལ་བས་ནང་གི་ནམ་མཁའ་གཏད། དེ་ལ་གསང་བའི་ནམ་མཁའ་གཏད་པས་མི་རྟོག་པའི་ཡེ་ཤེས་རྒྱུད་ལ་ཚེགས་མེད་དུ་འཆར་བར་འགྱུར་རོ། །མུན་ཁང་བརྟེན་པའི་

ཤོག་ལྷེ་༢༡༦ལག་ལེན་སོགས་ནི་འོད་གསལ་ཡེ་ཤེས་འཁོར་ལོ་ལས་ཤེས་པར་བྱའོ། །གེགས་སེལ་བོགས་འདོན་ཉམས་ལེན་གྱི་རྗེས་སྤྱོད་མདོར་བསྡུས་པ་ཀུན་མཁྱེན་ཆོས་རྗེའི་ཞལ་ནས། གང་སྣང་སྒྱུ་མའི་དཔེ་བརྒྱད་དུ་ཤེས་པས་ཆགས་སྡང་དང་ཉོན་མོངས་ལས་གྲོལ་བར་བྱ་ཞིང་། དགག་སྒྲུབ་སེམས་ཀྱི་རོལ་པར་ཤར་ཚད་གཞི་མེད་རྩ་བ་དང་བྲལ་བར་ཐག་བཅད་ལ་འཛིན་ཞེན་དང་བླང་དོར་མི་བྱ། ཇི་སྲིད་བདག་འཛིན་དབྱིངས་སུ་མ་ནུབ་ཀྱི་བར་དུ་ཟབ་མོའ་གདམས་པ་བསྒོམ་ཞིང་རྒྱུ་འབྲས་ཀྱི་ལས་ལ་འཛེམ། དག་སྣང་དང་མོས་གུས་བྱ་ཞིང་རང་སེམས་ལ་སྐྱོན་མེད་པར། དམ་ཚིག་དང་སྡོམ་པ་བསྲུང་ཞིང་གཅིག་པུར་དབེན་པར་འདུག །རྣམ་གཡེང་དང་འདུ་འཛི་སྤངས་ཤིང་དགོས་མེད་རྒྱུད་ལ་བརྟེན། ཆགས་མེད་ཞེན་མེད་བྱ་ཞིང་འཛིན་མེད་ལམ་དུ་སློང་། །རྟག་ཏུ་འཆི་བ་བསམ་ཞིང་བརྩོན་འགྲུས་མེ་བཞིན་སྦར། །ཉིན་མཚན་དགེ་བས་འདའ་ཞིང་ཚེ་འདིའི་བྱ་བ་བཏང་། །རྟག་ཏུ་བླ་མ་བསྟེན་ཅིང་མོས་གུས་གསོལ་བ་གདབ། །གཏད་མེད་ལམ་དུ་ཁྱེར་ཞིང་བྱར་མེད་ངང་ལ་བཞག །བདག་གཞན་གཉིས་འཛིན་སྤངས་ཤིང་རེ་དོགས་རྩ་བ་གཅད། །རྐྱེན་ངན་ལམ་དུ་སློང་ཞིང་ཅིར་སྣང་བླ་མར་བལྟ། །ཐམས་ཅད་རང་སྣང་ཤེས་པས་བདག་འཛིན་ཞེན་པ་དོར། །གང་ཡང་སྙིང་པོ་མེད་པས་བདེན་མེད་ཡོ་ལང་བསྐྱང་། །ཡེ་སྟོང་བབ་སྟོང་ཤེས་པས་རང་སྣང་ཞར་ལ་འཆར། །དེ་ལྟ་བུའི་ཐབས་དང་སྤྱོད་པས་གནས་ཤིང་ཉིན་མཚན་འདའ་བར་བྱའོ། །བློ་རྐྱེན་ཁར་འཆོར་རིང་ལ་རིག་པའི་རྩལ་སྦྱོང་དང་དབེན་པར་ཉམས་ལེན་ལ་འབུངས། དགག་སྒྲུབ་ཞེན་འཛིན་ཡོད་རིང་ལ་དགེ་སྡིག་བླང་དོར་བྱ་ཞིང་གཉིས་མེད་དོན་ལ་སྦྱང་། གང་ཡང་གྲོགས་སུ་མ་ཤར་བའི་རིང་ལ་གདམས་པའི་སྣ་ཁ་བསྒྱུར་ཞིང་རིག་པའི་དོན་ལ་བལྟ།

ཤོག་ལྷེ་༢༡༧སྐྱེ་ཤིའི་འཇིགས་དངངས་སྐྱེས་རིང་ལ་སྐྱེ་མེད་དོན་ལ་སྦྱངས་བས་ཕྱི་ནང་ཐམས་ཅད་ཆོས་ཉིད་དུ་འཆར་བའི་དུས་ན་སྒོམ་མེད་ཆུ་བོ་རྒྱུན་གྱི་རྣལ་འབྱོར་ལ་གནས་པ་ཡིན་ནོ། །ཞེས་གདམས་པར་མཛད་པ་ཉིད་སྙིང་གི་བདུད་རྩིར་བཟུང་བར་བྱའོ། །གཞན་ཡང་ཁྲིད་ཚུལ་འདིར་ཤིན་ཏུ་གལ་ཆེ་བ་སེམས་དང་རིག་པ་འབྱེད་པའི་མན་ངག་ཀྱང་ཁྲེགས་ཆོད་ཀྱི་རྒྱབ་ཡིག་ནམ་མཁའ་དྲི་མེད་སོགས་ལས་རྟོགས་པར་བྱ་བ་ཁོ་ནའོ། །དོན་གཉིས་པ་དབང་པོ་འབྲིང་བར་དོར་གྲོལ་བའི་ཁྲིད་ལ་གསུམ། ངོ་བོ། །དབྱེ་བ། སོ་སོའ་ལམ་ཁྱེར་རོ། །དང་པོ་ནི། གཞི་ཀ་དག་ལས་གཞན་དུ་སྣང་བ་ཐམས་ཅད་བར་དོའ་གནས་སྐབས་ཡིན་ཏེ། གཞི་སྣང་ཡེ་ཤེས་སུ་འཆར་བའི་སྣང་ཆ་ནི་དག་པ་ཆོས་ཉིད་ཀྱི་བར་དོ་དང་། འཁྲུལ་སྣང་འགྲོ་དྲུག་གིས་བསྡུས་པའི་ཆོས་སོ་ཅོག་ནི་མ་དག་པ་འཁྲུལ་པའི་བར་དོ་ཡིན་ལ། དེ་ཡང་དབྱིངས་ཀ་དག་ལས་ཤར་ཞིང་། འཆར་གཞི་དབྱིངས་སུ་མ་རྫོགས་ཀྱི་བར་གྱི་སེམས་པ་ས་བོན་དང་བཅས་པ་ནི་བར་དོའོ། །གཉིས་པ་ལ་བཞི། སྐྱེ་ཤིའམ་རང་བཞིན་གྱི་བར་དོ། །འཆི་ཁའི་བར་དོ། །ཆོས་ཉིད་བར་དོ། །སྲིད་པ་བར་དོའོ། །དང་པོ་ནི། མའི་མངལ་དུ་སྐྱེ་བ་གྲུབ་ནས་འཆི་ནད་ཀྱིས་བཏབ་པ་ཚུན་ཆད་དོ། །གཉིས་པ་ནི། འཆི་བ་ལ་ཕྱོགས་པ་ནས་ནང་དབུགས་ཆད་པ་ཚུན་ཆད་དོ། །གསུམ་པ་ནི། ནང་དབུགས་ཆད་ནས་འོད་གསལ་གྱི་སྣང་བ་ཤར་ཏེ། ལྷུན་གྲུབ་ཀྱི་སྣང་བ་ཐིམ་པ་ཚུན་ཆད་དོ། །བཞི་པ་ནི། ལྷུན་གྲུབ་ཀྱི་སྣང་བ་ཐིམ་ནས་ཕྱི་མའི་སྐྱེ་སྲིད་གྲུབ་པ་ཚུན་ཆད་དོ། །གསུམ་པ་ནི། བར་དོ་བཞི་ལ་དཔེ་དོན་གཉིས་གཉིས་ཀྱིས་བསྟན་ཏེ། དང་པོ་སྐྱེ་གནས་ཀྱི་བར་དོ་ལ་སྒྲོ་འདོགས་ཆོད་པ་ཐི་བྱ་ཚང་དུ་འཇུག་པ་ལྟ་བུ་ནི། དོན་བླ་མ་དམ་པ་ལ་

ཤོག་ལྷེ་༢༡༨བརྟེན་ནས། དེས་བསྟན་པའི་གདམས་ངག་ལ་ཐོས་བསམ་གྱིས་སྒྲོ་འདོགས་བཅད་དེ་བསྒོམས་པས་གནས་ལུགས་ཀྱི་དོན་ཕྱིན་ཅི་མ་ལོག་པར་ཉམས་མྱོང་རིག་ཐོག་ཏུ་སྒྲོ་འདོགས་ཆོད་དེ་སློབ་པའི་ལམ་བཞི་དང་ས་བཅུའི་ཡོན་ཏན་རྣམས་རྫོགས་ནས་མི་སློབ་པའི་འབྲས་བུ་མངོན་དུ་བྱེད་པའོ། །གཉིས་པ་འཆི་ཀའི་བར་དོ་ལ་གསལ་གདབ་པ་སྒེག་མོ་མེ་ལོང་ལ་བལྟ་བ་ལྟ་བུ་ནི། སྔར་སྒོམ་པའི་གདམས་པ་རྣམས་སྐབས་འདིར་བློ་ལ་གསལ་འདེབས་པ་ཡིན་ཏེ། ཇི་ལྟར་འདེབས་ན་འཆི་བ་འོད་གསལ་དང་། རྗེས་མཐུན་གྱི་ཐིམ་རིམ་རྣམས་ལ་གདམས་པའི་གནད་བློ་ངོར་གསལ་བཞིན་དུ་མིག་འོང་སྣང་ལ་བལྟ་ཞིང་རིག་པ་སྟོང་གསལ་དུ་བཞག་པས་ད་ལྟའི་འོད་གསལ་སྐྱེལ་མ་ལྟ་བུ་དང་བར་དོའ་འོད་གསལ་སུན་མ་ལྟ་བུ་གཉིས་གཉིས་ཚེས་བཅོ་ལྔའི་ཉི་མ་ནུབ་པ་དང་ཟླ་བ་ཤར་བ་དུས་མཉམ་པ་ལྟར་གྲོལ་བ་ཡིན་ཏེ། དེ་ཡང་ཉི་ཟླ་ཁ་སྦྱོར་ལས། ས་ནི་ས་ལ་ཐིམ་པ་ན། །ལུས་ནི་ལྕི་ཞིང་ཟས་མི་ལེན། །ལངས་དང་འགྲོ་བའི་སྟོབས་ཀུན་ཟད། །ཆུ་ནི་ཆུ་ལ་ཐིམ་པའི་ཚེ། །ཁ་ཆུ་སྣ་ཆུ་འཛག་པར་བྱེད། །དེ་བཞིན་མེ་ལ་མེ་ཐིམ་པས། །ཁ་སྣ་དག་ནི་རབ་ཏུ་སྐམ། །ལུས་ཀྱི་དྲོད་རྣམས་མཐའ་ནས་འཆོར། །དེ་བཞིན་རླུང་ལ་རླུང་ཐིམ་པས། །དབུགས་ནི་ངར་ངར་ཡན་ལག་གཡོག །མིག་ཀྱང་གྱེན་ལ་བཟློག་པ་འབྱུང་། །རྟགས་ནི་སུ་ལ་བྱུང་བ་དེ། །ངེས་པར་ཕ་རོལ་འགྲོ་བས་ན། །དེ་ཚེ་བླ་མའི་གདམས་ངག་རྣམས། །རང་གི་རྒྱུད་ལ་དྲིལ་བར་བྱ། །ཞེས་གསུངས་པ་ལྟར། གདམས་པའི་དོན་རྣམས་ལ་སྐབས་འདིར་རིག་པ་གྲུང་བཏོན་ཏེ་སྐད་ཅིག་ཀྱང་མ་ཡེངས་པར་གསལ་བཏབ་པས། རླུང་རྣམ་ཤེས་ལ་ཐིམ་པའི་དུས་དེར་སྔ་ཕྱིའི་འོད་གསལ་གཉིས་མ་བུ་འཕྲོད་ནས་གདོད་མའི་དབྱིངས་སུ་གྲོལ་བའོ། །གསུམ་པ་ཆོས་ཉིད་ཀྱི་བར་དོ་

ཤོག་ལྷེ་༢༡༩དོར་རང་སྣང་ལ་ཡིད་ཆས་པ་མ་པང་དུ་བུ་འཇུག་པ་ལྟ་བུ་ནི། གདམས་ངག་གི་དོན་ཉམས་འོག་ཏུ་ཆུད་པས་ཆོས་ཉིད་ཀྱི་སྣང་ཆ་ཇི་ལྟར་ཤར་ཡང་འཇིགས་པ་མེད་པར་རང་སྣང་ཡེ་ཤེས་ཀྱི་རོལ་པར་ཤར་བ་རྣམས་ཐིམ་ཚུལ་ལྔའི་སྒོ་ནས་ངོས་ཟིན་པར་བྱ་སྟེ། དང་པོར་རྣམ་ཤེས་ནམ་མཁར་ཐིམ་པའི་ཚེ་རིག་པའི་འོད་རྩལ་ཞུག་ནས་མིག་ཏུ་གནས་སྐབས་སྐད་ཅིག་དང་པོ་ལ་ཀ་དག་གི་སྣང་བ་སྟོན་ཀའི་ནམ་མཁའ་སྤྲིན་དང་བྲལ་བ་ལྟ་བུའི་འོད་གསལ་མཐའ་དབུས་མེད་པ་འཆར། དེ་ནས་ནམ་མཁའ་འོད་གསལ་ལ་ཐིམ་པའི་ཚེ་དུས་མ་འགྱུར་བར་སྣང་བ་འགྱུར་ནས་འོད་ལྔའི་སྣང་བ་དང་སྒྲ་འོད་ཟེར་གསུམ་གྱི་སྣང་བ་ནམ་མཁའ་ཁྱབ་པར་འཆར། དེ་ནས་འོད་གསལ་ཟུང་འཇུག་ལ་ཐིམ་པས་རིགས་ལྔའི་ཚོམ་བུ་རྣམས་བསམ་གཏན་གྱི་ཞག་ལྔར་རིམ་གྱིས་འཆར། དེ་ནས་ཟུང་འཇུག་ཡེ་ཤེས་ལ་ཐིམ་པས་ཡེ་ཤེས་བཞི་སྦྱོར་གྱི་སྣམ་བུ་དང་ཐིག་ལེ་རྣམས་འཆར་རོ། །དེ་ནས་ཡེ་ཤེས་ལྷུན་གྲུབ་ལ་ཐིམ་པའི་དུས་སུ་ཡར་ཀ་དག་ཆོས་སྐུ་དང་། ཐད་ཀར་ལོངས་སྐུ་རིགས་ལྔ་མར་འགྲོ་འདུལ་སྤྲུལ་སྐུ་ལ་སོགས་པའི་ཞིང་ཁམས་རྣམས་འཆར་ཞིང་། དེའི་ཚེ་ཆོས་ཉིད་ཀྱི་སྣང་ཆ་ཇི་ལྟར་ཤར་ཡང་འཇིགས་པ་མེད་པ་སྔར་འདྲིས་ཀྱི་མི་དང་འཕྲད་པ་ལྟར་རང་སྣང་ཡེ་ཤེས་ཀྱི་རོལ་པར་ཐག་བཅད་དོ། །དེའང་ཐིམ་ལུགས་ལྔ་པོ་ཐར་ཆགས་སུ་བགྲོད་པའི་ངེས་པ་མེད་དེ། གང་ཟག་གི་དབང་པོའ་རིམ་པས་ཉི་ཟླ་ཁ་སྦྱོར་ལྟར་ལུས་བོར་བ་དང་འོད་གསལ་འཆར་བ་དུས་མཉམ་དུ་གྲོལ། འབྲིང་ཟུང་འཇུག་དང་ཡེ་ཤེས་ཀྱི་སྣང་བ་གང་རུང་དུ་གྲོལ། ཐ་མ་ལྷུན་གྲུབ་ཀྱི་སྣང་བར་གྲོལ་ཞིང་། སྣང་བའི་འཆར་ཚུལ་ཡང་གང་དུ་གྲོལ་བ་ཡན་ལག་དུ་འཆར་ཞིང་། དེ་མན་ཆད་དབྱིངས་སུ་ཐིམ་པས་མི་འཆར་ལ། དེ་དག་གང་དང་གང་དུ་གྲོལ་ཀྱང་སྐད་ཅིག་དང་པོར་

ཤོག་ལྷེ་༢༢༠རང་སྣང་དུ་ངོ་ཤེས། གཉིས་པར་ཤེས་ཐོག་ཏུ་གནས། གསུམ་པར་གནས་ཐོག་ཏུ་གྲོལ། བཞི་པར་གྲོལ་ཐོག་ནས་སེམས་ཅན་གྱི་ཞིང་ཁམས་རྣམས་སུ་སྤྲུལ་པ་བཀྱེ། ལྔ་པར་རང་གསལ་བུམ་སྐུར་བཞུགས་ཤིང་སྐད་ཅིག་དེ་དག་ཀྱང་ཕལ་ཆེར་བྱ་རྫོགས་ཀྱི་སྐད་ཅིག་ཡིན་ཀྱང་མཐའ་གཅིག་ཏུ་མ་ངེས་ཏེ། བསམ་གཏན་གྱི་ཞག་ནི་སྔོན་ཏིང་ངེ་འཛིན་ལ་མཉམ་པར་གཞག་ནས་ཕྱི་མའི་ཀུན་རྟོག་མ་སྐྱེས་པའི་བར་གྱི་གོམས་ཆ་ཡིན་ལ། དེ་རྣམས་ཀྱང་འདིར་ནི་རགས་བསྡུས་ཙམ་དུ་བསྟན་པ་ཡིན་ནོ། །གཞན་ཡང་ཆོས་ཉིད་བར་དོའ་སྣང་བ་ལ་འཇུག་པ་ཤེས་པའི་གནད། གྲོལ་བ་ལུས་ཀྱི་གནད། མཐར་ཕྱིན་པ་ངོ་ཤེས་པའི་གནད་གསུམ་གྱི་དོན་སོགས་ཉམས་ལེན་གནད་ཀྱི་སྒྲོན་མེ་ལས་ཤེས་པར་བྱའོ། །བཞི་པ་སྲིད་པ་བར་དོ་ལ་ལས་ཀྱི་འཕྲོ་མཐུད་པ་ཡུར་བ་ཀོང་ཆད་ལ་ཝ་འཛུགས་པ་ལྟ་བུ་ནི། འཁྲུལ་སྣང་འཇིགས་སྐྲག་ཇི་ལྟར་ཤར་ཡང་སྔར་གོམས་པའི་གདམས་པའི་གནད་ཀྱིས་དག་པའི་སྐྱེ་སྲིད་ཀྱི་ལམ་དུ་འཇུག་པའོ། །དེ་ཡང་དབང་པོའ་རིམ་པས་ངོ་སྤྲོད་ཀྱི་གནད་ཐོབ་ཀྱང་བསྒོམ་པ་འཕྲོ་ཅན་དུ་ལུས་ཏེ་སྐྱེ་བ་བརྒྱུད་ནས་གྲོལ་བ་དང་། གོམས་ཀྱང་ལྷུན་གྲུབ་ཀྱི་སྣང་བ་ཤར་ཚེ་ཏིང་ངེ་འཛིན་གྱི་རྩལ་ཞན་སྟོབས་ཀྱིས་སྔ་ཕྱིའི་འོད་གསལ་གཉིས་ཤར་ནུབ་དུས་མཉམ་པས་རང་སྣང་ངོས་མ་ཟིན་པར་སྣང་བ་རང་ཡལ་ལ་སོང་སྟེ་རྣམ་ཤེས་ལུས་རྒྱ་དང་བྲལ་སྟོབས་ཀྱིས་འབྱུང་བཞི་ཕྲ་བའི་ལས་རླུང་ལུགས་ལྡོག་ཏུ་ལངས་ཏེ། བར་དོའ་ཡིད་ལུས་གྲུབ་ནས་སྣང་བ་ཐམས་ཅད་བན་བུན། ཟ་ཟི་ཆད་ཆོད། བྱ་སྤུ་རླུང་གིས་བསྐྱོད་པ་ལྟར་སྣ་ཚོགས་འཆར་ཞིང་། འབྱུང་བཞིའི་དངོས་པོ་གང་ལའང་ཐོགས་མེད་དུ་འཇུག་ནུས་ཤིང་ལས་ཀྱི་རྫུ་འཕྲུལ་གྱི་མཐུ་དང་ལྡན་པ། སྔར་མེད་ཀྱི་མངོན་ཤེས་ཕྲ་མོ་འཆར་ཞིང་དབང་པོ་རྣོ་བ་དྲན་པ་གསལ་བ་རིགས་མཐུན་གྱི་འགྲོ་བ་

ཤོག་ལྷེ་༢༢༡གཞན་ལྷ་མིག་དག་པས་མཐོང་བ། སྔར་གོམས་བག་ཆགས་ཀྱིས་ཉེ་དུ་འབྲེལ་ཡོད་སོགས་ཀྱི་ཕྱོགས་སུ་ཕྱིན་ཏེ་གཏམ་སྨྲས་ཀྱང་དེ་རྣམས་ཀྱིས་མ་མཐོང་ཞིང་མ་ཐོས་པས་ལན་མེད་པ་ན་རང་ཉིད་ཤི་བར་ཤེས་ཏེ། སྔར་གྱི་གདམས་པ་རྣམས་དྲན་པས་བར་དོའ་འཁྲུལ་སྣང་དང་འཇིགས་སྐྲག་ཐམས་ཅད་རང་ངོ་ཤེས་ནས། དེ་ཡང་དབང་པོའ་རིམ་པས་བློ་རབ་རྣམས་བླ་མའི་མོས་གུས་ཀྱི་ལམ་ཁྱེར་དང་། གཟུང་འཛིན་གཉིས་བསྡུས་ཀྱི་སྣང་བ་ཐམས་ཅད་བདེན་མེད་སྒྱུ་མ་ལྟ་བུར་རྟོགས་པས་གྲོལ་བ་དང་། བློ་འབྲིང་རྣམས་ཡི་དམ་གྱི་བསྐྱེད་རྫོགས་ཟུང་འཇུག་གི་ཉམས་ལེན་ལ་བརྟེན་ནས་གྲོལ་བ་དང་། ཐ་མས་དག་པའི་ཞིང་ཡིད་ལ་བསམས་ནས་མདུན་མཁར་ཆོས་འབྱུང་དམར་པོ་གདེངས་ཀ་གྱེན་བསྟན་གྱི་དབུས་སུ་རང་སེམས་ཨ་ཡིག་དཀར་པོའ་རྣམ་པར་གསལ་བཏབ་ཅིང་སྨོན་ལམ་གྱིས་མཚམས་སྦྱར་ཏེ་ཆོས་འབྱུང་ནམ་མཁའ་སྐར་མདའ་འཕངས་པ་ལྟར་དག་ཞིང་དུ་སོང་བར་བསམ་སྟེ་སེམས་སྤྲོས་བྲལ་གྱི་ངང་དུ་བཞག་པས་གྲོལ་ལོ། །དེར་མ་གྲོལ་ན་ཕྱི་མའི་མངལ་སྒོ་ངན་པ་སྤངས་ཏེ་བཟང་པོའ་འཕྲོ་མཐུད་པ་ནི། གང་དུ་སྐྱེ་འགྱུར་གྱི་ཕ་མ་དང་ཡི་དམ་དབྱེར་མེད་ཡབ་ཡུམ་གྱི་རྣམ་པར་བསྒོམས་པའི་མངལ་དུ་པད་ཉི་ཟླ་སྟེང་ཧཱུྃ་ཡིག་དཀར་པོ་ཞིག་བསམས་ལ་དེར་རྣམ་ཤེས་འཇུག་དུས་སྐྱེ་བ་བླང་བའི་རྟེན་འདི་ལ་བསྟན་པ་དང་སེམས་ཅན་གྱི་དོན་རླབས་པོ་ཆེ་བྱེད་ནུས་པར་ཤོག་ཅིག་སྙམ་པའི་འདུན་པ་རྩེ་གཅིག་པས་རང་ཉིད་རྡོ་རྗེ་སེམས་དཔའ་བསྒོམས་ཏེ་དེ་ཉིད་མའི་མངལ་གྱི་ཧཱུྃ་ལ་ཐིམ་པར་བསམ་ཞིང་། སྤྲོས་བྲལ་སྟོང་ཉིད་ཀྱི་ངང་དུ་བཞག་པས་ཕ་མ་དད་པ་ཅན་གྱིས་བུར་སྐྱེས་ཏེ་ཆུང་ངུ་ནས་ཆོས་དང་འཕྲད་ཅིང་ཤེས་རབ་དང་བརྩོན་འགྲུས་ལྡན་པ། སྦྱངས་པའི་ལས་འཕྲོ་སད་པས་སྙིང་པོའ་བསྟན་པ་དང་མཇལ་ནས་ལམ་གྱི་འཕྲོ་མཐུད་པས་ཚེ་དེ་ཉིད་

ཤོག་ལྷེ་༢༢༢དམ་བར་དོར་ངེས་པར་འཚང་རྒྱ་བར་གསུངས་སོ། །དོན་གསུམ་པ་དབང་པོ་ཐ་མ་རང་བཞིན་སྤྲུལ་སྐུའི་ཞིང་དུ་འཚང་རྒྱ་བའི་གདམས་པ་ལ་གསུམ། རང་བཞིན་གནས་པའི་དུས་སུ་སྦྱོང་བ། བར་དོའ་དུས་སུ་འཕོ་བ། སྤྲུལ་སྐུའི་ཞིང་དུ་གྲོལ་པའོ། །དང་པོ་ནི། མངོན་སུམ་གྱི་སྣང་བ་ལ་ཉིན་མཚན་གོམས་པར་བྱས་པས་རྨི་ལམ་ངན་པ་ནུབ་ནས་བཟང་པོ་ཤ་སྟག་ཏུ་རྨི་ཞིང་སེམས་ལ་བདེ་གསལ་མི་རྟོག་པའི་ཏིང་ངེ་འཛིན་ལ་ཡུན་རིང་དུ་གནས་པ་དེས་སྐབས་སུ་ཉིན་དུས་རང་བཞིན་སྤྲུལ་པ་སྐུའི་ཞིང་བསམས་ལ་རིག་པ་འོད་ཀྱི་གོང་བུ་མིག་ནས་འཐོན་ཏེ། གཙོ་བོའ་ཐུགས་ཀར་འཕངས་པར་བྱ་ཞིང་། མཚན་དུས་ཉལ་ཚེའང་ཐོ་སྐོར་ཐམས་ཅད་རང་བཞིན་སྤྲུལ་པའི་ཞིང་དང་། ལུས་གཞལ་ཡས་ཁང་དང་། སྙིང་པདྨ་དང་ཉི་ཟླའི་དབུས་ན། རིགས་ལྔའི་སངས་རྒྱས་བཞུགས་པ་ལ་སེམས་གཏད་ནས་མ་ཡེངས་པར་གཉིད་དུ་ཉལ་བས། དག་པའི་ཞིང་ཁམས་རྨི་ལམ་དུ་འབྱོངས་པར་འོང་ངེས་སོ། །གནད་འདི་ནི་ཉི་ཟླ་ཁ་སྦྱོར་གྱི་འགྲེལ་པར་གསུངས་པས་རབ་ཏུ་ཟབ་བོ། །གཉིས་པ་ལ་གཉིས། གཞུང་གི་དགོངས་པ་དངོས། ལེ་ལོ་ཅན་བཙན་ཐབས་འཕོ་བའི་མན་ངག་ལ་བརྟེན་ནས་མཚམས་སྦྱོར་བའོ། །དང་པོ་ནི། རང་སྣང་བར་དོའ་འོད་གསལ་ནུབ་དུས་རང་ཉིད་ཀྱིས་བར་དོ་ངོ་ཤེས་པ་འབྱུང་བས། དེའི་ཚེ་སྔར་གྱི་དམིགས་པ་དེས་འཕོས་པས་སྐྱེ་བའོ། །དེའང་ཆོས་ཉིད་བདེན་པའི་བྱིན་རླབས་དང་། རིག་འཛིན་གྱི་བླ་མ་རྣམས་ཀྱི་ཐུགས་རྗེ་ལས་དེ་ལྟར་འགྱུར་བ་ཡིན་ལ། བར་དོའང་གང་དུ་བསམ་སར་ཕྱིན་ནུས་པའི་རྫུ་འཕྲུལ་ཡོད་པའི་གནད་ཀྱིས་སོ། །ཁ་ཅིག་བེམས་རིག་བྲལ་མ་ཐག་སྐྱེ་བར་གསུངས་ལ། ཁ་ཅིག་འོད་གསལ་ནུབ་པ་དང་དུས་མཉམ་དུ་སྐྱེ་བར་གསུངས་སོ། །ཁ་ཅིག་སྲིད་པའི་བར་དོ་ལ་ལམ་འཐོན་ནས་རྨི་ལམ་ལྟར་ཡང་

ཤོག་ལྷེ་༢༢༣ཡུད་ཞག་བདུན་ལ་སོགས་པར་གནས་པ་ལས། རྨི་ལམ་སད་པའི་ཚུལ་གྱིས་ཤར་ཕྱོགས་མངོན་པར་དགའ་བ་ལ་སོགས་པར་རྫུས་ཏེ་སྐྱེ་བར་གསུངས་སོ། །དེ་དག་ནི་གོམས་ཤུགས་རབ་འབྲིང་ཐ་མའི་དབང་དུ་བྱས་པའོ། །གཉིས་པ་ནི། གསེར་ཕྲེང་གི་དགོངས་པ་འཕོ་བ་འོད་གསལ་སྙིང་པོ་ཉམས་སུ་ལེན་པར་བྱ་སྟེ། དེའང་རྩ་ཁྲིད་དང་སྦྲེལ་ན་ཟུར་དུ་མི་དགོས་ཀྱང་། མི་སྦྲེལ་བར་དམིགས་སུ་སྒོམ་པ་སོགས་ལ་སྐྱབས་སེམས་བླ་མའི་རྣལ་འབྱོར་རྣམས་སྔོན་དུ་བཏང་། གང་ལྟར་བདེ་བའི་སྟན་ལ་ལུས་གནད་དང་ལྡན་པས་འཁོད་དེ། ཉམས་ལེན་དངོས་ལ། དམིགས་སྐོར་དང་པོ་སྟོང་ར་སྦྱང་བ། གཉིས་པ་རྩ་གསལ་གདབ་པ། གསུམ་པ་རླུང་སེམས་བསྡུ་བ། བཞི་པ་བསུ་སྐྱེལ་ལ་སློབ་པ་དང་། ལྔ་བ་གེགས་བསལ་བ། དྲུག་པ་ལས་ལ་སྦྱར་བའོ། །དང་པོ་ནི། རང་ལུས་ཕྱི་ལྤགས་པའི་སྐྱ་རིལ་ནང་སྟོང་ཆེན་སྒྲིབ་ཐོགས་དང་བྲལ་བར་བསྒོམ་མོ། །གཉིས་པ་ནི། ལུས་ཀྱི་དབུས་སུ་དབུ་མ་དྭངས་གསལ་མདའ་སྨྱུག་ཙམ་པ། སྤྱི་བོ་ནས་གསང་གནས་ཀྱི་བར་དུ་དྲང་ཐ་ལེར་གནས་པར་བསྒོམ། གསུམ་པ་ནི། སྙིང་གར་འོད་ལྔའི་གོང་བུའི་དབུས་སུ་རང་གི་རླུང་སེམས་མི་འགྱུར་བའི་དྭངས་མ་ཨ་དཀར་པོ་སྲན་ཆུང་ཙམ་དཀར་ཞིང་འཚེར་བ་ཞིག་བསྒོམས་པས། ཐ་མལ་གྱི་རྟོག་པ་འགགས་ནས་ཨ་ལ་སེམས་རྩེ་གཅིག་ཏུ་ཟིན་པ་ནི་གོམས་པའི་ཚད་དོ། །འདི་ནི་ལོངས་སྐུའི་འཆར་གཞི་ཀུན་བཟང་ཡབ་ཡུམ་གྱི་དགོངས་པའོ། །བཞི་པ་ནི། རང་གི་སྤྱི་བོའ་ནམ་མཁར་འོག་མིན་ལྷུན་གྲུབ་རིན་པོ་ཆེའི་ཞིང་ཁམས་འཇའ་ཚོན་འོད་ལྔ་འཁྱིལ་པའི་དབུས་ན་པདྨ་དང་ཉི་ཟླའི་སྟེང་དུ་རྩ་བའི་བླ་མ་དང་དབྱེར་མེད་པའི་རྣམ་པར་སྣང་མཛད་ཡབ་ཡུམ་ལོངས་སྤྱོད་རྫོགས་པ་སྐུའི་ཆ་བྱད་ཅན་གྱི་མཐའ་བསྐོར་དུ་མི་བསྐྱོད་པ་སོགས་རིགས་བཞིའི་སངས་རྒྱས་དང་། དཔའ་བོ་མཁའ་

ཤོག་ལྷེ་༢༢༤འགྲོའི་འཁོར་གྱིས་བསྐོར་བ་གསལ་བཏབ་ཅིང་མོས་གུས་དྲག་ཏུ་བྱ། དེ་ནས་ངག་ཏུ་ཨ་ཨཱ་ཞེས་བརྒྱ་རྩ་བརྒྱད་དབྱངས་བཅས་བརྗོད་པས་ཨ་དེ་ཇེ་མཐོ་ཇེ་མཐོར་གྱུར་ཏེ་རྣམ་སྣང་གི་ཐུགས་ཀར་སིབ་ཀྱིས་ཐིམ་པར་བསམ་ལ་མཉམ་པར་བཞག །ཡང་ཨ་དེ་རྣམ་སྣང་གི་ཐུགས་ཀ་ནས་རང་གི་སྙིང་གར་བདེ་ཕྲིལ་ཏེ་བབས་པར་བསམ། གེགས་ཆུང་ཁྱད་སྐབས་སུ་ཚངས་བུག་ཏུ་ཧཾ་དཀར་པོ་ཞིག་གསལ་བཏབ་བ་དེ་ལས་བདུད་རྩིའི་རྒྱུན་རྣམ་ཤེས་ཀྱི་ཐིག་ལེ་ལ་སིབ་སིབ་བསྟིམས། དེ་ལྟར་ནའང་མཐར་ཧཾ་དང་རོ་གཅིག་ཏུ་གྱུར་པ་རྣམ་སྣང་གི་ཐུགས་ཀར་བསྟིམ་ཞིང་། དེ་ནས་རིགས་ལྔའི་ཚོམ་བུ་ཇེ་མཐོ་ཇེ་ཕྲར་གྱུར་ཏེ་ནམ་མཁའ་ལ་འཇའ་ལྟར་ཡལ་བར་བསམ་ལ་ཨ་གྲངས་ཇི་ལྟར་རིགས་པ་བརྗོད་ཅིང་གསལ་སྟོང་སྤྲོས་པ་དང་བྲལ་བའི་ངང་དུ་འཇོག་གོ །སྔར་ནས་འཕོ་བ་འབྱོངས་ཟིན་པ་ཡིན་ན་ནམ་དགོས་དུས་ལས་ལ་སྦྱར་བས་ཆོག་གི །དེ་ལྟར་མིན་ན་ཞག་བདུན་ལ་སོགས་པའི་བར་རྟགས་ཐོན་ཐོན་དུ་བསྒོམ་དགོས་སོ། །ལྔ་པ་ནི། མཇུག་ཏུ་གེགས་སེལ་རླུང་འཇུག་གནས་ལྡང་གསུམ་དང་སྦྱར་བའི་རྡོར་བཟླས་ཅི་ནུས་བྱ་ཞིང་། མཐར་དགེ་བ་བསྔོ། དྲུག་པ་ནི། བཟློག་ཏུ་མེད་པའི་འཆི་ལྟས་ཤར་བ་ན་འཕོ་བར་བྱ་སྟེ། དེའང་སྤྱི་བོའ་ཚངས་བུག་ཧ་རེ་ཡོད་པར་བསམས་ལ། སྙིང་གའི་ཐིག་ལེ་རྣམ་སྣང་གི་ཐུགས་ཀར་བསྟིམ་པའི་བར་སྔར་ལྟར་ལས་ཐིག་ལེ་མི་འབེབས་ཞིང་། ལན་གཅིག་གསུམ་སོགས་ཅི་རིགས་ཀྱི་མཐར་སྔར་ལྟར་རིགས་ལྔའི་ཚོམ་བུ་ཇེ་མཐོར་གཤེགས་རྗེས་འཕོ་བྱ་འཕོ་བྱེད་དང་བྲལ་བའི་ངང་དུ་རང་སེམས་བདེ་སེང་ངེར་བསྐྱུར་ལ་འཇོག་གོ །དེས་ནི་བར་དོའ་འོད་གསལ་ངོས་ཟིན་ཅིང་སྲིད་པ་བར་དོའ་གཡངས་མི་མཐོང་། གཞོན་ནུ་བུམ་སྐུའི་ཞིང་ཁམས་ཀུན་ཏུ་བཟང་པོའ་ས་ལ་སངས་རྒྱས་ནས་དོན་གཉིས་ལྷུན་གྱིས་ཕྲིན་ལས་ལ་དབང་འབྱོར་

ཤོག་ལྷེ་༢༢༥པ་ཡིན་ནོ། །གསུམ་པ་ནི། མངོན་སུམ་གྱི་དོན་མཐོང་ཡང་བརྟན་པ་མ་ཐོབ་པར་སྒོམ་པ་འཕྲོ་ཅན་དུ་ལུས་པའམ། བསྒོམས་ཀྱང་ཏིང་ངེ་འཛིན་གྱི་རྩལ་ཞན་པས་བར་དོའ་གྲོལ་ཚད་དང་མི་ལྡན་པ་རྣམས་ཆོས་ཉིད་ཀྱི་བར་དོ་ཤར་ཡང་ངོས་མ་ཟིན་པར་སྲིད་པའི་བར་དོ་རྨི་ལམ་གྱི་འཁྲུལ་ངོ་ཙམ་དུ་ཤར་བ་ལས། ཆོས་འདིའི་སྒོ་མཐོང་བའི་བྱིན་རླབས་ཀྱིས་རྨི་ལམ་སད་པའི་ཆ་ཙམ་ལ་མངོན་པར་དགའ་བ་ལ་སོགས་པ་དག་པའི་ཞིང་དུ་སྐྱེ་བ་བླངས་ནས་དེ་བཞིན་གཤེགས་པ་རྣམས་ཀྱི་ཞལ་མཐོང་། གསུང་ཐོས། དབང་བསྐུར། ལུང་ནོད། དབུགས་དབྱུང་། ལུང་བསྟན། གཟེངས་བསྟོད་རྣམས་ཐོབ་ནས་ཉོན་མོངས་པའི་འཆིང་བ་ལས་གྲོལ་ནས་གདོད་མའི་ཞིང་དུ་སྐད་ཅིག་གིས་གྲོལ་བར་འགྱུར་བ་ཡིན་ནོ། །སྤྱི་དོན་བཞི་པ་བསྒོམས་པ་ལས་བྱུང་བའི་འབྲས་བུ་བསྟན་པ་ལ་གསུམ། ཇི་ལྟར་འཚང་རྒྱ་བ། དེའི་ཐུགས་རྗེ་མཛད་ཕྲིན། འབྲས་བུ་ཐོབ་པའི་དུས་བཤད་པའོ། །དང་པོ་ནི། འདི་ཉིད་དུ་གྲོལ་ལུགས་གསུམ་བཤད་པ་དེ་ལའང་ལྷག་མེད་དང་ལྷག་བཅས་སུ་སངས་རྒྱ་ལུགས་གཉིས་སུ་གསུངས་པའི་དང་པོ་ལྷག་མེད་མྱང་འདས་ནི། ཉོན་མོངས་ཕྲ་རགས་དང་། འབྱུང་ལུས་ཀྱི་གདོས་བཅས་ཐམས་ཅད་དག་ནས། ངོ་བོ་སྐུ་རུ་སངས་རྒྱས་པས་སྐུ་གསུམ་འདུ་འབྲལ་མེད། རང་བཞིན་མཁྱེན་པའི་ཡེ་ཤེས་སུ་རྒྱས་པས་ཡེ་ཤེས་འོད་ལྔ་འདུ་འབྲལ་མེད། ཐུགས་རྗེ་མཛད་པའི་ཕྲིན་ལས་སུ་རྒྱས་པས་ཐུགས་རྗེ་ལ་རྒྱུན་ཆད་མེད་པས། ཡང་དག་པར་རྫོགས་པའི་སངས་རྒྱས་ཞེས་བྱ་བ་སྟེ། དེའང་ཚེ་འདིའམ་རང་བཞིན་སྤྲུལ་སྐུའི་ཞིང་དུ་སངས་རྒྱས་པ་ལ་བཞེད་དོ། །གཉིས་པ་ལྷག་བཅས་མྱང་འདས་ནི། ཀ་དག་ལྷུན་གྲུབ་གྱི་ཉམས་ལེན་ལ་བརྟེན་པ་ལམ་གྱི་ཡོན་ཏན་འབྲས་བུའི་ཐོབ་ཚུལ་

ཤོག་ལྷེ་༢༢༦ལོ། །ཞེས་པ་ལྟར་ས་ལམ་གྱི་ཡོན་ཏན་རིམ་གྱིས་བགྲོད་དེ། གདོས་བཅས་ཀྱི་ཕུང་པོ་ལྷག་བཅས་སུ་བཞག་ནས་འོད་དང་། སྒྲ་དང་། ས་གཡོ་བ་དང་། སྐུ་དང་། གདུང་སོགས་ཕྱི་ནང་གི་རྟགས་སྣང་དང་བཅས་བར་དོར་འཚང་རྒྱ་བ་ནི། མངོན་པར་རྫོགས་པར་འཚང་རྒྱ་བ་ཞེས་བཞེད་པ་ཡིན་ནོ། །གཉིས་པ་ནི། གྲོལ་ལུགས་གསུམ་པོ་གང་དུ་སངས་རྒྱས་ཀྱང་ཐུགས་རྗེ་མཛད་པ་ཕྲིན་ལས་ནི། རང་རྒྱུད་ཀྱིས་བསྡུས་པའི་གཟུགས་སྐུ་གཉིས་ཀྱི་མཐུ་ལས་རྒྱལ་སྲས་སར་གནས་རྣམས་དང་། ཐུན་མོང་གི་གདུལ་བྱ་ལ་གཞན་སྣང་ལོངས་སྤྱོད་རྫོགས་པ་དང་། གང་ལ་གང་འདུལ་གྱི་སྤྲུལ་པའི་རྣམ་རོལ་སོ་སོའ་མོས་ངོར་མཐའ་ཡས་པར་སྟོན་པ་སྟེ། དེའང་ནང་གསལ་སྐུ་དང་ཡེ་ཤེས་འདུ་འབྲལ་མེད་པའི་དགོངས་པ་དུས་གསུམ་འཕོ་འགྱུར་མེད་པའི་དབྱིངས་ལས་མ་གཡོས་བཞིན་དུ་ཕྱོགས་བཅུའི་ཞིང་ཁམས་རྣམས་སུ་ལོངས་སྤྱོད་རྫོགས་སྐུ་དང་སྤྲུལ་སྐུས་དོན་མཛད་པ་ནི་མཁའ་དབྱིངས་ཀྱི་ཟླ་བ་དྭངས་པའི་ཆུ་སྣོད་དུ་མར་འཆར་བ་ལྟ་བུ་དང་། འཁོར་བ་ཇི་སྲིད་བར་དུ་དོན་མཛད་པ་ནི་ཡིད་བཞིན་གྱི་ནོར་བུ་དང་དཔག་བསམ་གྱི་ཤིང་ལྟར་འབད་མེད་ལྷུན་གྲུབ་ཏུ་འབྱུང་ཞིང་རྒྱུན་མི་འཆད་པ་ཡིན་ནོ། །གསུམ་པ་ནི། འདས་རྗེས་དོན་ཁྲིད་ལས། ཡང་གསང་སྙིང་ཐིག་མངོན་སུམ་མན་ངག་འདིར། །གང་གིས་རེག་པས་མྱང་འདས་དངོས་ལ་སྦྱོར། །ཞེས་གསུངས་པ་ལྟར་གསང་བ་བླ་ན་མེད་པའི་གདམས་པ་འདི་རྩེ་གཅིག་ཏུ་ཉམས་སུ་བླངས་ན་དབང་པོ་ཡང་རབ་རྣམས་ཚེ་གཅིག་ལུས་གཅིག་གིས་གྲོལ་བ་དང་། ཡང་ན་རབ་ལོ་གསུམ། འབྲིང་ལོ་ལྔ། ཐ་མས་མི་ལོ་བདུན་ཚུན་ལ་གྲོལ་བ་རྒྱུད་དང་རིག་འཛིན་གྲུབ་པའི་ཚོགས་ཀྱིས་མགྲིན་གཅིག་ཏུ་གསུངས་སོ། །ལྔ་པ་ཞར་བྱུང་

ཤོག་ལྷེ་༢༢༧ལག་ལེན་གྱི་གནད་བསྟན་པ་ལ་གཉིས། གདམས་ངག་སྤྱིའི་རྣམ་པར་གཞག་པ། ལག་ལེན་གྱི་དབྱེ་བསྡུ་བཤད་པའོ། །དང་པོ་ནི། རྫོགས་པ་ཆེན་པོ་འདིའི་ལུགས་ཀྱི་གདམས་ངག་གི་འདེབས་ལུགས་གསུམ་དུ་བཞེད་དེ། ཁྲིད་ཀྱི་ལུགས་སུ་གདབ་པ། ངོ་སྤྲོད་ཀྱི་ལུགས་སུ་གདབ་པ། འགྲོན་པོ་ལ་རྒལ་ལ་ཚངས་སྤྲུགས་སུ་གདབ་པའོ། །དང་པོ་ནི། སྔོན་འགྲོ་གསུམ་གང་རུང་སྔོན་དུ་སོང་ནས་དངོས་གཞི་ངོ་སྤྲོད་དེ་རྗེས་རྒྱབ་ཆོས་ཀྱིས་ཡིད་ཆེས་པར་བྱེད་པའོ། །དེའང་སྐྱེས་བུ་སྤྲོས་པ་ཅན་ཐུན་མོང་གི་དྲོད་རྟགས་ལ་དགའ་བས་སྐུ་གསུམ་གྱི་སྣ་ཁྲིད་པ་འབྱུང་བཞིའི་སྒྲ་དོན་སྔོན་དུ་སྦྱངས་ནས་དངོས་གཞི་ངོ་སྤྲོད་པའོ། །བརྩོན་འགྲུས་ཅན་བརྟུལ་ཞུགས་ལ་དགའ་བས་རིག་པའི་སྣ་ཁྲིད་པ་འཁོར་འདས་རུ་ཤན་འབྱེད་པའི་སྤྱོད་པ་ལ་སྔོན་དུ་སྦྱངས་ནས་དངོས་གཞི་ངོ་སྤྲོད་པའོ། །ལེ་ལོ་ཅན་རྟོག་དཔྱོད་ལ་དགའ་བས་སེམས་ཀྱི་སྣ་ཁྲིད་པ་ལུས་ངག་སེམས་ཀྱི་སྔོན་འགྲོ་སྔོན་དུ་སྦྱངས་ནས་དངོས་གཞི་ངོ་སྤྲོད་པ་ཡིན་ནོ། །ངོ་སྤྲོད་ཀྱི་ལུགས་སུ་གདབ་པ་ནི་ལས་འཕྲོ་སད་པ་ཁ་ཅིག་ལ་སྙེ་མ་མགུལ་བ་ནས་འཆང་བ་ལྟར་དབང་གི་རྗེས་ལ་ངོ་སྤྲད་ནས་ཉམས་སུ་ལེན་པ་སྟེ། དེའང་ཁྲེགས་ཆོད་དང་ཐོད་རྒལ་གྱི་དོན་ཁོ་ན་སྟོན་པར་བྱ་བ་དང་། དེའི་རྗེས་འབྲེལ་དུ་དབྱིངས་མཚོན་བྱེད་མེ་ལོང་། ཡེ་ཤེས་མཚོན་བྱེད་རྨ་བྱའི་མདོངས། ཟུང་འཇུག་མཚོན་བྱེད་མན་ཤེལ་སོགས་ལ་བརྟེན་ནས་ངོ་སྤྲོད་ཉེར་གཅིག་དང་། ལྔ་ཚན་ལྔའི་སྒོ་ནས་གདབ་པའོ། །གསུམ་པ་ནི། དེའང་དུས་མཐའི་ཚེ་འཆི་ཁའི་མི་དེ་འགྲོན་པོ་ལམ་ཞུགས་ལྟ་བུ། འཆི་བའི་སྡུག་བསྔལ་ལ་ཆེན་པོ་ལྟ་བུ། དེའི་ལམ་སྣར་སྣང་བའི་འཆར་ཚུལ་སྣ་ཚོགས་སྣང་བ་རྣམས་ངོ་མ་ཤེས་ན་དགྲར་ལྡང་བའི་ཚད་ཡོད་ཅིང་། ངོ་ཤེས་ན་གྲོགས་

ཤོག་ལྷེ་༢༢༨སུ་འཆར་བའི་ཚད་ཡོད་པས། འཆི་ཁའི་དུས་དེར་ངོ་སྤྲོད་ཚངས་སྤྲུགས་སུ་འདེབས་པར་གསུངས་སོ། །དེའང་ཕྱི་མ་གཉིས་ས་བཅད་དང་པོར་འདུ་བ་ཡིན་ནོ། །གཉིས་པ་ལག་ལེན་གྱི་དབྱེ་བསྡུ་ནི། རྫོགས་རིམ་ཡོངས་རྫོགས་སྨིན་སློབ་དུ་ཁྲིད་པར་འདོང་ན། ཐུན་གྱི་སྔོན་འགྲོ་ནས་བརྩམས་ཏེ་སྔོན་འགྲོ་སེམས་སྦྱོང་བདུན་དང་། ཐུན་མོང་དང་ཁྱད་པར་གྱི་ཚོགས་བསགས་པ་དང་། དེ་ནས་ཆགས་བྲལ་རླུང་དང་ཆགས་ཅན་ཐིག་ལེའི་རྣལ་འབྱོར། ཐུན་མིན་སྔོན་འགྲོ། ཀ་དག་གི་ཁྲིད་དམིགས་རྣམས་དང་། འཁོར་འདས་རུ་ཤན་དབྱེ་བ་ནས་བཟུང་ཐོད་རྒལ་གྱི་མན་ངག །སྐུ་གསུམ་གྱི་འདུག་སྟངས་ལ་སློབ་ཚུལ། མཚན་མོའ་ཐུན་གསུམ་ལ་ཡེ་ཤེས་གནད་དུ་བསྣུན་པའི་མན་ངག །རྨི་ལམ་གཟུང་སྦྱང་སྤེལ་བསྒྱུར་ལ་འབད་པའི་རིམ་པ་རྣམས་རེ་རེ་ནས་རྒྱུད་ལ་མྱོང་བ་མ་སྐྱེས་ཀྱི་བར་དུ་བསྒོམ་པ་ལ་སློབ་ཅིང་སྐབས་སུ་བབ་པའི་སྤྱོད་པ་ལ་གནས་པས་གདོད་མའི་གྲོལ་སར་སྙོགས་པ་གདོན་མི་ཟའོ། །ཡང་རྫོགས་རིམ་གཞན་གྱིས་རྒྱུད་སྦྱངས་ཟིན་པའི་གང་ཟག་ལམ་འདིའི་དངོས་གཞི་ལ་ཞུགས་པར་སྤྲོ་ན། སེམས་སྦྱོང་བདུན་པོ་ཇི་ལྟར་འོས་པ་ནས་ཐུན་མོང་མ་ཡིན་པའི་སྔོན་འགྲོ་དྲན་པ་རྒྱུན་གཅོད་འབྱུང་ལྔའི་རྣལ་འབྱོར་དང་། སྒོ་གསུམ་གྱི་སྔོན་འགྲོ་ནས་བརྩམ་ཁྲེགས་ཐོད་དངོས་ལ་འཇུག་པས་ཆོག་ཅིང་། ལོ་རྒན་བ་སོགས་རྩ་རླུང་མི་འཆུན་བའམ། དེའི་འབྲས་བུ་མི་འབྱིན་པའི་རིགས་ལ་རླུང་ཐིག་གི་རྣལ་འབྱོར་བཞག་ཀྱང་ཆད་སྐྱོན་དུ་མི་འགྱུར་བ་དང་། །དབང་པོའ་སྒོ་མི་གསལ་བ་ལྟ་བུ་ཐོད་རྒལ་གྱི་སྣོད་དུ་མི་རུང་བ་ལ་ཁྲེགས་ཆོད་ཁོ་ན་ནི་ཤིན་ཏུ་སྟོན་རུང་ལ། ཁྲེགས་ཆོད་ལེགས་པར་སྔོན་དུ་མ་སོང་བ་ལ་ཐོད་རྒལ་རྐྱང་པ་ནམ་ཡང་སྟོན་མི་རུང་། སྤྱིར་ཁྲེགས་ཆོད་ནི་ལམ་འབད་མེད་དུ་རང་གྲོལ་བ་འོད་གསལ་གྱི་སྣང་བ་་

ཤོག་ལྷེ་༢༢༩ལ་མ་ལྟོས་པར་རིག་པ་རྗེན་པར་ཉམས་སུ་ལེན་པ་ལེ་ལོ་ཅན་མ་བསྒོམས་པར་འཚང་རྒྱ་བ་དབང་པོ་རྣོན་པོའ་གནད་ཡིན་ལ། ཐོད་རྒལ་ནི་འབད་བཅས་སུ་གྲོལ་བ་འོད་གསལ་གྱི་སྣང་བ་ལ་ལྟོས་ནས་བརྩོན་འགྲུས་ཅན་ཚེ་འདི་ཉིད་དུ་གདོས་བཅས་འོད་ལུས་སུ་དག་ནས་འཚང་རྒྱ་བར་བྱེད་པ་ཡིན་ནོ། །ཁྲིད་ཚུལ་རྒྱས་བསྡུས་གང་ལའང་ལུགས་འདིའི་དབང་བསྐུར་རྣམས་ནི་ཅིས་ཀྱང་སྔོན་དུ་འགྲོ་དགོས་ལ་བསགས་སྦྱོང་གཞན་ཉམས་སུ་ལེན་མ་ནུས་ཀྱང་བླ་མའི་རིམ་པ་དངོས་གྲུབ་རྒྱ་མཚོ་ཙམ་ནི་ཤིན་ཏུ་གལ་ཆེ་བར་མངོན་ལ་འདི་ཉིད་ཆེད་དུ་ཉམས་སུ་ལེན་པ་པོ་ལ་གནད་ཆེ་བ། བླ་མ་ཡི་དམ་མཁའ་འགྲོའི་སྒྲུབ་ཐབས་ཡིད་བཞིན་ནོར་བུ་སྐོར་གསུམ་གྱི་བསྒོམ་བཟླས་དང་། བོགས་འདོན་སྤྱོད་པའི་གནད་ཡིག་བདུད་རྩིའི་རྒྱལ་པོ་སོགས་ཀྱང་གྲོགས་སུ་བསྟེན། མདོར་ན། རབ་ཚེ་གཅིག །འབྲིང་ཆོས་ཉིད། ཐ་མ་རང་བཞིན་སྤྲུལ་སྐུའི་ཞིང་དུ་མི་གྲོལ་མི་སྲིད་པའི་ཟབ་ཆོས་གདོད་མའི་མགོན་པོའ་ཐུགས་ཏིག་འདི་ལྟ་བུ་དང་མཇལ་བའི་ཚེ་སྙོམས་ལས་སུ་མི་བཞག་པར་ཅི་ནུས་ཀྱིས་ཉམས་སུ་བླང་བ་ལ་རྩེ་གཅིག་ཏུ་བརྩོན་པར་བྱས་པས་དོན་གཉིས་ལྷུན་གྱིས་འགྲུབ་པར་གདོན་མི་ཟའོ། །བླ་མེད་འོད་གསལ་རྡོ་རྗེ་སྙིང་པོའ་ལམ། །གྲོལ་བ་བཞི་ལྡན་ཐེག་དགུའི་མཐར་ཐུག་པ། །གང་དེའི་ཡང་ཏིག་ཞིང་ཁམས་རྒྱ་མཚོ་རུ། མཚན་ཙམ་དཀོན་པའི་སྙིང་ཏིག་ཡིད་བཞིན་ནོར། །ལུགས་སྲོལ་བཞི་ཡི་མཆོག་གྱུར་བི་མ་ལའི། །སྙིང་ཏིག་མ་བུ་བཀའ་སྲོལ་ཆུ་བོ་གསུམ། །གཅིག་འདུས་མཁས་གྲུབ་ཀུན་གྱི་མནོག་ཆོས་ཏེ། །དེ་ཡི་ཁྲིད་ཚུལ་ཀུན་གྱི་ཡང་བཅུད་བསྡུས། །ཟབ་བརླིངས་རྡོ་རྗེའི་གནས་ནི་རྟོགས་པར་དཀའ། །ཆོས་སྲུང་མེལ་ཚེ་ནམ་ཡང་མི་གཡེལ་བས། །བདག་ལྟ་རྨོངས་པའི་

ཤོག་ལྷེ་༢༣༠ལས་སུ་བབས་མིན་ཀྱང་། །ཁྱབ་བདག་བླ་མས་རྗེས་སུ་གནང་ཕྱིར་བྲིས། །གོང་མའི་གསུང་བཟང་དབང་པོར་བཀོད་ན་ཡང་། །ཤེས་རབ་རྩལ་ཆུང་སྒོམ་པའི་སྟོབས་དམན་པས། །ནོངས་པར་གང་གྱུར་རྩ་གསུམ་ཆོས་སྲུང་གིས། །འཕྲལ་ཡུན་སྒྲིབ་པར་མི་འགྱུར་དག་ཚངས་སྩོལ། །དྲི་མེད་བཤེས་གཉེན་མཁས་པའི་གཙུག་རྒྱན་དངོས། །ཀློང་ཆེན་གཉིས་པ་རྡོ་རྗེ་གཟི་བརྗིད་ཀྱི། །ཞལ་ལུང་བདུད་རྩི་དམ་སེལ་རྙོགས་པ་ཡིས། །བསླད་མིན་སྐལ་ལྡན་གསོས་སུ་བསྟེན་པར་འོས། །རབ་དགེ་དྲི་མ་མེད་ལས་འོད་གསལ་གྱི། །སྣང་བའི་སྦུབས་སུ་འཁྲུལ་པ་ཀུན་སངས་ཏེ། །ནམ་མཁས་ཁྱབ་པའི་ལུས་ཅན་ཇི་སྙེད་པ། །གདོད་མའི་གྲོལ་སར་མངོན་བྱང་ཆུབ་བར་ཤོག །ཆོས་ཚུལ་འདི་ཡང་ཉི་ཟླ་ལྟར་ཁྱབ་ཅིང་། །ནོར་བུ་བཞིན་དུ་སྐྱེ་དགུའི་འདོད་པ་འཇོ། །ཆུ་བོའ་རྒྱུན་བཞིན་ནམ་ཡང་ཆད་མེད་པས། །ཐོག་མའི་མགོན་པོའ་མཛད་པ་སྒྲུབ་གྱུར་ཅིག །དེ་ལྟར་སྙིང་ཐིག་མ་བུའི་ཁྲིད་སྲོལ་ཆུ་བོ་གཅིག་འདུས་ཀྱི་ཡིག་ཆ་འདིའང་། ཀུན་མཁྱེན་གདོད་མའི་མགོན་པོ་རྡོ་རྗེ་གཟི་བརྗིད་རྩལ་གྱི་ཞལ་སྔ་ནས་སྨིན་གྲོལ་བཀའ་དྲིན་དུ་སྩལ་བའི་ཚེ། འདི་ལྟར་བགྱི་བར་འོས་ཞེས་བཀའ་ཡིས་རྗེས་སུ་གནང་བ་དང་། སླད་ཆར་སྒྲུབ་སྡེ་འདི་ཉིད་དུ་ཉམས་ལེན་མཁན་རྣམས་ལ་ཉེ་བར་མཁོ་བས་མཚམས་སྦྱར་ཏེ་རྗེ་བླ་མ་ཉིད་ལ་གསོལ་བ་བཏབ་ཀྱང་། །སླར་རྗེས་སུ་གནང་བ་དམིགས་བསལ་དུ་སྩལ་བ་ལས། བྱམས་མགོན་ཏཱའི་སི་ཏུའི་འབངས་ཐ་པདྨ་གར་དབང་ཕྲིན་ལས་འགྲོ་འདུལ་རྩལ་གྱིས་སྨིན་གླིང་རྗེ་བཙུན་རིན་པོ་ཆེའི་ཁྲིད་ཡིག་རྩ་བར་བཟུང་། སྙིང་ཏིག་མ་བུ་

ཤོག་ལྷེ་༢༣༡དངོས་ཀྱི་རྡོ་རྗེའི་གསུང་སྟབས་བདེ་བ་རྣམས་ཉེ་བར་བསྡེབས། རྡོ་རྗེ་ཚེ་དབང་ནོར་བུའི་ཞལ་ལུང་དང་། ཀརྨ་སྙིང་ཏིག་གི་གནད་འགའ་ཞིག་གིས་ཀྱང་ཟུར་བརྒྱན་ཏེ། དཔལ་སྤུངས་ཡང་ཁྲོད་ཀུན་བཟང་བདེ་ཆེན་འོད་གསལ་གླིང་དུ་རྒྱལ་བས་ཆོས་ཀྱི་འཁོར་ལོ་སྐོར་བའི་དུས་ཚེས་དགེ་བར་བྲིས་པ་བསྟན་འགྲོ་ལ་ཕན་པ་རྒྱ་ཆེན་པོ་འབྱུང་བར་གྱུར་ཅིག །དགེ་ལེགས་འཕེལ།། །།

ཤོག་ལྷེ་༢༣༢