Wylie:Gsum tshan gsum gyi man ngag ces kyang bya gces pa'i snying po zhes bya ba snying dang 'dra ba'i man ngag

From gDams Ngag mDzod
Jump to navigation Jump to search


Upload a file
Click the picture above to view the original manuscript.

གསུམ་ཚན་གསུམ་གྱི་མན་ངག་ཅེས་ཀྱང་བྱ་གཅེས་པའི་སྙིང་པོ་ཞེས་བྱ་བ་སྙིང་དང་འདྲ་བའི་མན་ངག་
gsum tshan gsum gyi man ngag ces kyang bya gces pa'i snying po zhes bya ba snying dang 'dra ba'i man ngag
Cherished Essence: The Most Precious Pith Instruction, Also Called The Three-by-Three Pith Instruction

Damngak Dzö Volume 16 (མ་) / Pages 504-509 / Folios 4b3 to 7a2
Translation's Introduction by Gethin, S.

The alternative title of this profound collection of pith instructions refers to its division into three sections, each of which is further divided and subdivided into sets of three.


Property "Author" has a restricted application area and cannot be used as annotation property by a user.


[edit]
504 ༈ རྗེ་བཙུན་སྐུ་དྲིན་ཅན་ལ་ཕྱག་འཚལ་ལོ། །དམ་པ་གསུམ་ལྡན་བྱིན་རླབས་ཀྱིས། །རང་སེམས་སྐུ་གསུམ་ངོ་སྤྲོད་ཅིང༌། ཐབས་ཆེན་དྲན་པ་གསུམ་ལྡན་གྱིས། །འགྲོ་ཀུན་འདྲེན་པའི་དཔལ་ལ་འདུད། །མན་ངག་འདི་ལ་དོན་གསུམ་སྟེ། སྔོན་འགྲོ་དམ་པ་གསུམ་ལྡན་གྱི་གསོལ་འདེབས། དངོས་གཞི་སྐུ་གསུམ་ངོ་སྤྲོད་གནད། རྗེས་དྲན་པ་གསུམ་ལྡན་གྱི་ཐབས་སོ། །དང་པོ་ནི། ནམ་མཁའ་མཉམ་པའི་མ་རྣམས་ཕྱིར། །བླ་མ་ཐུགས་རྗེ་ཆེན་པོ་ཡིས། །བདག་ལ་རྟོགས་པའི་མཆོག་བསྐྱེད་གསོལ། །མཁྱེན་པས་གཟིགས་ཤིག་ཐུགས་རྗེས་ཟུང༌། །ཞེས་བྱའོ། །འདིའི་དོན་ནི། རང་གི་སྤྱི་བོར་རྩ་བའི་བླ་མ་དང༌། སྙིང་གི་དཀྱིལ་དུ་ཇོ་བོ་སྤྱན་རས་གཟིགས་དབང་ཕྱུག་བསྒོམས་ལ། ཟབ་ཅིང་རྒྱ་ཆེ་བའི་མཆོད་པས་མཆོད། སྐྱབས་འགྲོ་དང༌། སྡིག་བཤགས་དང༌། རྗེས་སུ་ཡི་རང་བ་དང༌། བྱང་ཆུབ་མཆོག་ཏུ་སེམས་བསྐྱེད་ཅིང༌། དེ་མ་ཐག་ཏུ་ནམ་མཁའ་དང་མཉམ་པའི་སེམས་ཅན་ཐམས་ཅད་ཀྱི་དོན་དུ། བླ་མ་དང༌། ངོ་བོ་ཐུགས་རྗེ་ཆེན་པོས། བདག་གི་རྒྱུད་ལ་རྟོགས་པ་ཁྱད་པར་དུ་འཕགས་པར་མཛད་དུ་གསོལ། ཞེས་གསོལ་བ་དྲག་ཏུ་གདབ། དེ་ཐམས་ཅད་ལ་རྟེན་དམ་
505 བཅའ་བར་འཛིན་པ། རང་རྒྱུད་ལ་གདུང་བ་དྲག་པོ། རྟོག་པ་ལ་འདུན་པའི་ཤུགས་ཅན་དེ་གལ་ཆེའོ། །དེ་ནས་བླ་མ་རང་ལ་ཐིམ་པས་བླ་མའི་རྟོགས་པ་རང་ལ་འཕྲོས་པར་བསམ། ཇོ་བོ་རང་ལ་ཐིམ་པས་ཇོ་བོའི་སྐུ་གསུང་ཐུགས་སུ་བསྒོམ་མོ། །དེ་ལྟར་གསོལ་བ་གདབ་པ་ལ་རྒྱས་པར་བསྒོམ་ན། གསོལ་བ་གདབ་དགོས་པའི་རྒྱུ་མཚན། འདེབས་པའི་གནད། ཇི་ལྟར་གདབ་པའི་ཚུལ་གསུམ་ལས། །དང་པོ་ལ་གསུམ་ལས། གསོལ་བ་གདབ་པའི་ཕན་ཡོན་གསུམ། མ་བཏབ་པའི་ཉེས་པ་གསུམ། བཏབ་ན་ཐེབས་པའི་གསུམ་ལས། དང་པོ་ནི། དོན་མྱུར་དུ་ཐོབ་པ་ཚོང་པས་ལམ་དུ་ཟོང་རྙེད་པ་ལྟ་བུ། ཚོགས་ཆུད་པ་འཇིམ་པ་ལ་བརྐོས་ཕོར་གྱི་རྒྱས་བཏབ་པ་ལྟ་བུ། ཕུན་སུམ་ཚོགས་པ་པདྨ་འདམ་ནས་སྐྱེད་པ་ལྟ་བུའོ། །མ་བཏབ་པའི་ཉེས་པ་གསུམ་ནི། འདོད་ཀྱང་མ་རྙེད་པ་ཕོངས་པས་ནོར་ཚོལ་བ་ལྟ་བུ། ཚོགས་ཆེ་བ་སྙིམ་པས་ཆུ་ལེན་པ་ལྟ་བུ། ཕུན་སུམ་ཚོགས་པ་འཁོས་ཆུང་གི་ལག་བྱད་ལྟ་བུའོ། །གསོལ་བ་བཏབ་པས་ཐེབས་པའི་དཔེ་གསུམ་ནི། རྟེན་གྱི་སྒོ་ནས་རྟོག་པ་མེད་ཀྱང་དགོས་འདོད་མ་ལུས་པ་འབྱུང་བ་ཡིད་བཞིན་གྱི་ནོར་བུ་ལྟ་བུ། རང་གི་སྒོ་ནས་ནུས་པས་འདུན་པ་འདྲེན་པ་གདུང་བས་མཆི་མ་འབྱུང་བ་ལྟ་བུ། གཉིས་ཀའི་རྟེན་འབྲེལ་ཟབ་པ་སྤྲ་བ་ལ་མེ་འབར་བ་ལྟ་བུའོ། །གཉིས་པ་གསོལ་བ་འདེབས་པའི་གདན་ལ་གསུམ་སྟེ། རྟེན་ལུས་ལ་དགོང༌། །ཆོ་ག་ངག་ཏུ་བཟླ། གདུང་བ་སེམས་ལ་བསྐྱེད་པའོ། །ཇི་ལྟར་གདབ་པའི་ཚུལ་གསུམ་སྟེ། དོང་བ་ཡུན་རིང་མ་འཕྲད་པའི་མ་ལྟ་བ། །གདུང་བ་རྔ་མོ་རྗེའུ་སྟོར་བ་ལྟ་བུ། །འདོད་པ་འཇིགས་པར་སྐྱེལ་མ་ཚོལ་བ་ལྟ་བུའོ། །གཉིས་པ་དངོས་གཞི་སྐུ་གསུམ་ངོ་སྤྲད་པ་ལ། སྣང་མཁན་རང་ལ་རང་སོ་ཚུགས། །སྣང་མེད་སྙིང་རྗེ་ཆེན་པོར་བསྒྱུར། །གཉིས་མེད་ཐུག་ཕྲད་ལམ་དུ་བསྒྱུར། །མ་ཡེངས་མ་བཅོས་ཅི་དཀར་ཞོག །ཅེས་བྱའོ། །
506 འདིའི་དོན་ནི། གསོལ་བ་ཐེབས་པའི་རྗེས་ལ། རིག་པ་གང་ལྟར་སྣང་ཡང༌། སྣང་མཁན་རང་ཉིད་རང་སྟོང་ཡིན་པས། རང་ངོ་རང་གིས་ཤེས་པར་བྱས་ལ། དེ་ཉིད་སོ་ཚུགས་པར་བཞག་གོ །དེས་སྣང་མཁན་རང་སར་གྲོལ་བས། ཆོས་སྐུ་དྲི་མེད་མངོན་དུ་འགྱུར་བའི་གདམས་ངག་ཡིན་ནོ། །སྣང་མེད་རྐྱང་པ་ལས་འགྲོ་དོན་མི་འགྱུར་བས། །ཤེས་རབ་དྲི་མ་མེད་པ་དེ་ཉིད་མ་རྟོགས་པ་ལ་སྙིང་རྗེ་ཆེན་པོར་བསྒྱུར་ལ་བྱང་ཆུབ་ཀྱི་སེམས་སྦྱང་ངོ༌། །དེས་སྙིང་རྗེ་ཆེན་པོ་ཡོངས་སུ་དག་པས་རང་གཞན་གྱི་ཆོས་ཀྱི་ལོངས་སྤྱོད་རྫོགས་པའི་སྐུར་འཆར་བའི་གནད་ཡིན་ནོ། །དེའི་ངང་ལས་བཟང་ངན་གྱི་འདུ་བྱེད་ཅི་བྱུང་ཡང༌། །རང་ངོ་ཤེས་པས་རང་གྲོལ་དུ་འགྱུར་ཏེ། །དེ་ཉིད་རང་དོན་ཕུན་སུམ་ཚོགས་པའི་རྒྱུ་ཚང་ལ་མ་ནོར་ཞིང་བདེ་ལ་མྱུར་བ་ཡིན་ནོ་དེ་ཁོ་ན་ལྟར་སེམས་ཅན་ཐམས་ཅད་ཀྱང་རང་གྲོལ་དུ་གྱུར་ཅིག །ཅེས་གཞན་དོན་དུ་བསྔོས་པས། དེ་ཉིད་གཞན་དོན་ཕུན་སུམ་ཚོགས་པའི་རྒྱུ་ཚང་ལ་མ་ནོར་ཞིང་བདེ་ལ་མྱུར་བ་ཡིན་ནོ། །དེས་འཕྲལ་དུ་ཅི་བྱུང་བྱུང་ཐུག་ཕྲད་ལམ་དུ་བསླངས་པས། གང་ལ་གང་གིས་ཇི་ལྟར་འདུལ་འདུལ་གྱི་དོན་བྱེད་པའི་སྤྲུལ་སྐུ་ཐོགས་མེད་དུ་འབྱུང་བའི་གནད་ཡིན་ནོ། །དེ་དག་ཐམས་ཅད་དུ་ཡང༌། དང་པོ་མ་ཡེངས་པར་བཞག །བར་དུ་མ་བཅོས་པར་བཙའ། མཐར་ཅི་དགར་བསྐྱང་བ་གལ་ཆེའོ། །དེ་ལྟར་ངོ་སྤྲད་པ་ལ་ཡང༌། རྒྱས་པར་བསྒོམ་ན་དོན་གསུམ་སྟེ། ངོ་སྤྲད་དགོས་པའི་རྒྱུ་མཚན། སྤྲོད་པར་བྱེད་པའི་གནད། ཇི་ལྟར་སྤྲོད་པའི་ཚུལ་ལོ། །དང་པོ་གསུམ་སྟེ། ངོ་སྤྲོད་པའི་ཡོན་ཏན་དང༌། མ་འཕྲོད་པའི་ཉེས་པ་དང༌། སྤྲད་ན་འཕྲོད་པའི་དཔེའོ། །དང་པོ་ལ་གསུམ་སྟེ། སངས་རྒྱས་རང་ལ་རྙེད་པ་དབུལ་པོས་ཁྱིམ་དུ་གཏེར་རྙེད་པ་ལྟ་བུ། སྡུག་བསྔལ་བདེ་བར་འགྱུར་བ་གསེར་འགྱུར་གྱི་རྩིས་ལྕགས་གསེར་དུ་བསྒྱུར་བ་ལྟ་བུ། ཉོན་མོངས་པ་གྲོགས་སུ་འཆར་བ་དུག་ལ་སྔགས་བཏབ་པ་ལྟ་བུ།
507 མ་འཕྲོད་པའི་ཉེས་པ་གསུམ་ནི། རང་ངོ་རང་གི་མ་ཤེས་པ་གདོན་གྱིས་བརླབ་པའི་སྨྱོན་པ་ལྟ་བུ། ཅི་བྱེད་སྡུག་བསྔལ་དུ་འགྱུར་བ་དུག་ཅན་གྱི་ཟས་ཟོས་པ་ལྟ་བུ། ཉོན་མོངས་པ་སྤང་གིས་མི་སྤངས་པ་ནགས་ལ་མེ་མཆེད་པ་ལྟ་བུའོ། །སྤྲད་ན་ཕྲོད་པའི་དཔེ་ནི། སྣང་བའི་སྒོ་ནས་རང་སྣང་སྟོང་པར་ཐིམ་པ་ཆབ་རོམ་ཆུར་ཤེས་པ་ལྟ་བུ། སྟོང་པའི་སྒོ་ནས་སྟོང་ཉིད་སྣང་བར་ཤར་བ་ཆུ་ནང་གི་ཟླ་བ་ལྟ་བུ། གཉིས་ཀའི་སྒོ་ནས་སྣང་སྟོང་དབྱེར་མེད་དུ་རྟོགས་པ་ནམ་མཁའ་འཇའ་ཚོན་ལྟ་བུའོ། །ངོ་སྤྲོད་པའི་གནད་ལ་གསུམ་སྟེ། སོར་བཞག་གཉུག་མ་ལ་ངོ་སྤྲད། རང་གྲོལ་འགྱུར་བ་ལ་ངོ་སྤྲོད། ཐུག་འཕྲད་རྒྱུན་ཆགས་སུ་ངོ་སྤྲད་པའོ། །ངོ་འཕྲོད་པའི་ཚུལ་ལ་གསུམ་སྟེ། དང་པོ་མ་ཡེངས་པར་བཞག་པས་རལ་བསྐོར་མཁན་གཡུལ་དུ་ཞུགས་པ་ལྟ་བུ། བར་དུ་མ་མ་བཅོས་པར་བཙའ་བ་ལ་མཁས་པས་གླང་པོ་ཆེ་བསྐྱང་བ་ལྟ་བུ། ཐ་མར་ཅི་དགར་བཏང་བ་གཟིངས་ཐོག་ནས་བྱ་འཕུར་བ་ལྟ་བུའོ། །གསུམ་པ་རྗེས་སུ་དྲན་པ་གསུམ་ལྡན་གྱི་ཐབས་ནི། མཉམ་རྗེས་སྔ་ཕྱི་དྲན་པས་འབྲེལ། །རྒྱུན་ཆགས་རྒྱས་འདེབས་དྲན་རྒྱས་གདབ། །སྙིང་ཕུགས་གཞན་དོན་དྲན་པས་བཟུང༌། །ཀུན་ལ་གསལ་རིག་ཆགས་མེད་ཅེས། །ཞེས་བྱ་བའོ། །འདིའི་དོན་ནི། ཏིང་ངེ་འཛིན་དེ་ལས་ལོངས་ལ་མཉམ་རྗེས་འབྲེལ་པའི་དྲན་པས་སྒྱུ་མ་ལྟ་བུའི་བློས་སེམས་ཅན་ཐམས་ཅད་ལ་ཕན་གདགས་པའི་དོན་དུ། དེང་ཕྱིན་ཆད་བསམ་པ་གང་དང་གང་ལ་ཡེངས་ཀྱང༌། མཉམ་པར་བཞག་མ་བཞག་རང་བཞིན་གྱིས་མཚུངས་པར་མཚམས་སྦྱར། རྒྱུན་ཆགས་འབྲེལ་བའི་དྲན་པས་སངས་རྒྱས་ཐོབ་ཐོབ་ཀྱི་བར་དུ་རྒྱུན་ཆགས་མེད་པར་རྒྱས་གདབ། གཞན་དོན་འཕེན་པའི་དྲན་པས་དགེ་བའི་རྩ་ཐམས་ཅད་སྙིང་ཐག་པ་ནས་ཁམས་གསུམ་གྱི་སེམས་ཅན་ཐམས་ཅད་ལ་ལྟོས་པ་མེད་པར་བཏང་ངོ༌། །དེ་ཐམས་ཅད་
508 དུ་ཡང་མཚམས་སྦྱར་ལ་སྔར་འདྲེན་དང་ཕྱིས་སྙིགས་དང་རྒྱས་འདེབས་ལ་སྐབས་ཀྱི་གསལ་འདེབས་དང༌། མཐར་ཐུག་ལ་གཞན་དོན་སྙིང་ཕུགས་སུ་གཞུགས་པ་དོ་གལ་ཆེའོ། །དེ་ལྟར་དྲན་པ་གསུམ་གྱི་ཐབས་ལ་ཡང༌། རྒྱས་པར་བྱེ་ན། ཉམས་སུ་བླང་དགོས་པའི་རྒྱུ་མཚན། ཉམས་སུ་བླངས་པའི་གནད། ཇི་ལྟར་ལེན་པའི་ཚུལ་གསུམ་ལས། དང་པོ་ལ་ཡང་གསུམ་སྟེ། ཉམས་སུ་བླངས་པའི་ཕན་ཡོན། མ་བླངས་པའི་ཉེས་པ། བླང་ན་ལོངས་པའི་དཔེ་བསྟན་པའོ། །དང་པོ་ལ་གསུམ་སྟེ། མ་བསྒོམས་ཀྱང་སྒོམ་པའི་གོ་ཆོད་པ་གཟེར་དང་མ་བྲལ་བའི་འཁྲུལ་འཁོར་ལྟ་བུ། བསོད་ནམས་བར་མ་ཆད་དུ་འབྲེལ་བ་གངས་ཆུ་དང་རྒྱ་མཚོ་ལྟ་བུ། ཅི་བྱས་གནད་དུ་འཕོག་པ་དཔག་ཆེན་གྱི་མདའ་ལྟ་བུའོ། །མ་བླངས་པའི་ཉེས་པ་ལའང་གསུམ་སྟེ། མཉམ་རྗེས་ཡ་བྲལ་དུ་ཞིག་པ་ཤིང་རྟའི་གཟེར་ཆག་པ་ལྟ་བུ། འབད་འབྲས་གྲུབ་ཁར་ཉམས་པ་ལྕགས་ཚོས་ཁར་མེད་བསད་པ་ལྟ་བུ། དཀའ་སྤྱད་སྙིང་པོ་མེད་པའི་ཆུ་དང་ཤིང་གི་སྡོང་པོ་བསྐྱེད་པ་ལྟ་བུའོ། །ཉམས་སུ་བླངས་པས་ལོངས་པའི་དཔེ་གསུམ་སྟེ། སྔ་ཕྱི་འབྲེལ་བའི་སྒོ་ནས་ནུས་མཐུ་གཅིག་ཏུ་འགྲུབ་པ་ཞོའི་རུ་མ་ལྟ་བུ། རྒྱུན་ཆགས་འབྲེལ་བའི་སྒོ་ནས་ཐ་མལ་གྱིས་བར་མི་ཆད་པ་རྣལ་འབྱོར་པའི་སྲུང་འཁོར་ལྟ་བུ། གཉིས་ཀས་གཞན་དོན་སྒྲུབ་པའི་སྒོ་ནས་སྨན་ཤིང་གི་ས་བོན་ལས་སྡོང་པོ་སྐྱེ་བ་ལྟ་བུའོ། །ཉམས་སུ་བླང་བའི་གནད་ལ་གསུམ་སྟེ། མ་བརྗེད་པ་ཟུངས་སུ་བཟུང༌། གསལ་འདེབས་གཟེར་དུ་གདབ། ཞེན་འཁྲིས་ཁོང་ནས་བཅད་པའོ། །ཇི་ལྟར་བླངས་པའི་ཚུལ་ལ་གསུམ་སྟེ། སྔར་འདྲེན་དང་ཕྱིས་སྙེགས་ལ་མཁས་པ་སྐྱེས་བུ་གོམས་པའི་འཕངས་སྩལ་ལྟ་བུ། ཞར་ནས་ཞར་དུ་གསོ་བ་མེ་ལ་ཤིང་བསྣོན་པ་ལྟ་བུ། ཕུགས་གཏད་གཞན་ལ་ལྟ་བ་བུ་གཅིག་པའི་མ་ལྟ་བུའོ། །སྔོན་འགྲོ་དང༌། དངོས་གཞི་དང༌། རྗེས་ཀྱི་
509 ཐབས་དང་གསུམ་མོ། །ཡིད་བཞིན་ནོར་འདྲའི་བླ་མ་ལས། །བདུད་རྩིའི་རྒྱུན་འདྲའི་མན་ངག་ཐོབ། །དཔག་བསམ་ཤིང་འདྲའི་འབྲས་བུ་སྨིན། །དམིགས་མེད་མཁའ་འདྲའི་ཚོགས་རྫོགས་ཤོག །གསུམ་ཚན་གསུམ་གྱི་མན་ངག་ཅེས་ཀྱང་བྱ་གཅེས་པའི་སྙིང་པོ་ཞེས་བྱ་བ་སྙིང་དང་འདྲ་བའི་མན་ངག་རྫོགས་སོ།། །།
504 !_rje btsun sku drin can la phyag 'tshal lo/ /dam pa gsum ldan byin rlabs kyis/ /rang sems sku gsum ngo sprod cing*/_thabs chen dran pa gsum ldan gyis/ /'gro kun 'dren pa'i dpal la 'dud/ /man ngag 'di la don gsum ste/_sngon 'gro dam pa gsum ldan gyi gsol 'debs/_dngos gzhi sku gsum ngo sprod gnad/_rjes dran pa gsum ldan gyi thabs so/ /dang po ni/_nam mkha' mnyam pa'i ma rnams phyir/ /bla ma thugs rje chen po yis/ /bdag la rtogs pa'i mchog bskyed gsol/ /mkhyen pas gzigs shig thugs rjes zung*/ /zhes bya'o/ /'di'i don ni/_rang gi spyi bor rtsa ba'i bla ma dang*/_snying gi dkyil du jo bo spyan ras gzigs dbang phyug bsgoms la/_zab cing rgya che ba'i mchod pas mchod/_skyabs 'gro dang*/_sdig bshags dang*/_rjes su yi rang ba dang*/_byang chub mchog tu sems bskyed cing*/_de ma thag tu nam mkha' dang mnyam pa'i sems can thams cad kyi don du/_bla ma dang*/_ngo bo thugs rje chen pos/_bdag gi rgyud la rtogs pa khyad par du 'phags par mdzad du gsol/_zhes gsol ba drag tu gdab/_de thams cad la rten dam
505 bca' bar 'dzin pa/_rang rgyud la gdung ba drag po/_rtog pa la 'dun pa'i shugs can de gal che'o/ /de nas bla ma rang la thim pas bla ma'i rtogs pa rang la 'phros par bsam/_jo bo rang la thim pas jo bo'i sku gsung thugs su bsgom mo/ /de ltar gsol ba gdab pa la rgyas par bsgom na/_gsol ba gdab dgos pa'i rgyu mtshan/_'debs pa'i gnad/_ji ltar gdab pa'i tshul gsum las/ /dang po la gsum las/_gsol ba gdab pa'i phan yon gsum/_ma btab pa'i nyes pa gsum/_btab na thebs pa'i gsum las/_dang po ni/_don myur du thob pa tshong pas lam du zong rnyed pa lta bu/_tshogs chud pa 'jim pa la brkos phor gyi rgyas btab pa lta bu/_phun sum tshogs pa pad+ma 'dam nas skyed pa lta bu'o/ /ma btab pa'i nyes pa gsum ni/_'dod kyang ma rnyed pa phongs pas nor tshol ba lta bu/_tshogs che ba snyim pas chu len pa lta bu/_phun sum tshogs pa 'khos chung gi lag byad lta bu'o/ /gsol ba btab pas thebs pa'i dpe gsum ni/_rten gyi sgo nas rtog pa med kyang dgos 'dod ma lus pa 'byung ba yid bzhin gyi nor bu lta bu/_rang gi sgo nas nus pas 'dun pa 'dren pa gdung bas mchi ma 'byung ba lta bu/_gnyis ka'i rten 'brel zab pa spra ba la me 'bar ba lta bu'o/ /gnyis pa gsol ba 'debs pa'i gdan la gsum ste/_rten lus la dgong*/ /cho ga ngag tu bzla/_gdung ba sems la bskyed pa'o/ /ji ltar gdab pa'i tshul gsum ste/_dong ba yun ring ma 'phrad pa'i ma lta ba/ /gdung ba rnga mo rje'u stor ba lta bu/ /'dod pa 'jigs par skyel ma tshol ba lta bu'o/ /gnyis pa dngos gzhi sku gsum ngo sprad pa la/_snang mkhan rang la rang so tshugs/ /snang med snying rje chen por bsgyur/ /gnyis med thug phrad lam du bsgyur/ /ma yengs ma bcos ci dkar zhog_/ces bya'o/ /
506 'di'i don ni/_gsol ba thebs pa'i rjes la/_rig pa gang ltar snang yang*/_snang mkhan rang nyid rang stong yin pas/_rang ngo rang gis shes par byas la/_de nyid so tshugs par bzhag go_/des snang mkhan rang sar grol bas/_chos sku dri med mngon du 'gyur ba'i gdams ngag yin no/ /snang med rkyang pa las 'gro don mi 'gyur bas/ /shes rab dri ma med pa de nyid ma rtogs pa la snying rje chen por bsgyur la byang chub kyi sems sbyang ngo*/ /des snying rje chen po yongs su dag pas rang gzhan gyi chos kyi longs spyod rdzogs pa'i skur 'char ba'i gnad yin no/ /de'i ngang las bzang ngan gyi 'du byed ci byung yang*/ /rang ngo shes pas rang grol du 'gyur te/ /de nyid rang don phun sum tshogs pa'i rgyu tshang la ma nor zhing bde la myur ba yin no de kho na ltar sems can thams cad kyang rang grol du gyur cig_/ces gzhan don du bsngos pas/_de nyid gzhan don phun sum tshogs pa'i rgyu tshang la ma nor zhing bde la myur ba yin no/ /des 'phral du ci byung byung thug phrad lam du bslangs pas/_gang la gang gis ji ltar 'dul 'dul gyi don byed pa'i sprul sku thogs med du 'byung ba'i gnad yin no/ /de dag thams cad du yang*/_dang po ma yengs par bzhag_/bar du ma bcos par btsa'/_mthar ci dgar bskyang ba gal che'o/ /de ltar ngo sprad pa la yang*/_rgyas par bsgom na don gsum ste/_ngo sprad dgos pa'i rgyu mtshan/_sprod par byed pa'i gnad/_ji ltar sprod pa'i tshul lo/ /dang po gsum ste/_ngo sprod pa'i yon tan dang*/_ma 'phrod pa'i nyes pa dang*/_sprad na 'phrod pa'i dpe'o/ /dang po la gsum ste/_sangs rgyas rang la rnyed pa dbul pos khyim du gter rnyed pa lta bu/_sdug bsngal bde bar 'gyur ba gser 'gyur gyi rtsis lcags gser du bsgyur ba lta bu/_nyon mongs pa grogs su 'char ba dug la sngags btab pa lta bu/
507 ma 'phrod pa'i nyes pa gsum ni/_rang ngo rang gi ma shes pa gdon gyis brlab pa'i smyon pa lta bu/_ci byed sdug bsngal du 'gyur ba dug can gyi zas zos pa lta bu/_nyon mongs pa spang gis mi spangs pa nags la me mched pa lta bu'o/ /sprad na phrod pa'i dpe ni/_snang ba'i sgo nas rang snang stong par thim pa chab rom chur shes pa lta bu/_stong pa'i sgo nas stong nyid snang bar shar ba chu nang gi zla ba lta bu/_gnyis ka'i sgo nas snang stong dbyer med du rtogs pa nam mkha' 'ja' tshon lta bu'o/ /ngo sprod pa'i gnad la gsum ste/_sor bzhag gnyug ma la ngo sprad/_rang grol 'gyur ba la ngo sprod/_thug 'phrad rgyun chags su ngo sprad pa'o/ /ngo 'phrod pa'i tshul la gsum ste/_dang po ma yengs par bzhag pas ral bskor mkhan g.yul du zhugs pa lta bu/_bar du ma ma bcos par btsa' ba la mkhas pas glang po che bskyang ba lta bu/_tha mar ci dgar btang ba gzings thog nas bya 'phur ba lta bu'o/ /gsum pa rjes su dran pa gsum ldan gyi thabs ni/_mnyam rjes snga phyi dran pas 'brel/ /rgyun chags rgyas 'debs dran rgyas gdab/ /snying phugs gzhan don dran pas bzung*/ /kun la gsal rig chags med ces/ /zhes bya ba'o/ /'di'i don ni/_ting nge 'dzin de las longs la mnyam rjes 'brel pa'i dran pas sgyu ma lta bu'i blos sems can thams cad la phan gdags pa'i don du/_deng phyin chad bsam pa gang dang gang la yengs kyang*/_mnyam par bzhag ma bzhag rang bzhin gyis mtshungs par mtshams sbyar/_rgyun chags 'brel ba'i dran pas sangs rgyas thob thob kyi bar du rgyun chags med par rgyas gdab/_gzhan don 'phen pa'i dran pas dge ba'i rtsa thams cad snying thag pa nas khams gsum gyi sems can thams cad la ltos pa med par btang ngo*/ /de thams cad
508 du yang mtshams sbyar la sngar 'dren dang phyis snyigs dang rgyas 'debs la skabs kyi gsal 'debs dang*/_mthar thug la gzhan don snying phugs su gzhugs pa do gal che'o/ /de ltar dran pa gsum gyi thabs la yang*/_rgyas par bye na/_nyams su blang dgos pa'i rgyu mtshan/_nyams su blangs pa'i gnad/_ji ltar len pa'i tshul gsum las/_dang po la yang gsum ste/_nyams su blangs pa'i phan yon/_ma blangs pa'i nyes pa/_blang na longs pa'i dpe bstan pa'o/ /dang po la gsum ste/_ma bsgoms kyang sgom pa'i go chod pa gzer dang ma bral ba'i 'khrul 'khor lta bu/_bsod nams bar ma chad du 'brel ba gangs chu dang rgya mtsho lta bu/_ci byas gnad du 'phog pa dpag chen gyi mda' lta bu'o/ /ma blangs pa'i nyes pa la'ang gsum ste/_mnyam rjes ya bral du zhig pa shing rta'i gzer chag pa lta bu/_'bad 'bras grub khar nyams pa lcags tshos khar med bsad pa lta bu/_dka' spyad snying po med pa'i chu dang shing gi sdong po bskyed pa lta bu'o/ /nyams su blangs pas longs pa'i dpe gsum ste/_snga phyi 'brel ba'i sgo nas nus mthu gcig tu 'grub pa zho'i ru ma lta bu/_rgyun chags 'brel ba'i sgo nas tha mal gyis bar mi chad pa rnal 'byor pa'i srung 'khor lta bu/_gnyis kas gzhan don sgrub pa'i sgo nas sman shing gi sa bon las sdong po skye ba lta bu'o/ /nyams su blang ba'i gnad la gsum ste/_ma brjed pa zungs su bzung*/_gsal 'debs gzer du gdab/_zhen 'khris khong nas bcad pa'o/ /ji ltar blangs pa'i tshul la gsum ste/_sngar 'dren dang phyis snyegs la mkhas pa skyes bu goms pa'i 'phangs stsal lta bu/_zhar nas zhar du gso ba me la shing bsnon pa lta bu/_phugs gtad gzhan la lta ba bu gcig pa'i ma lta bu'o/ /sngon 'gro dang*/_dngos gzhi dang*/_rjes kyi
509 thabs dang gsum mo/ /yid bzhin nor 'dra'i bla ma las/ /bdud rtsi'i rgyun 'dra'i man ngag thob/ /dpag bsam shing 'dra'i 'bras bu smin/ /dmigs med mkha' 'dra'i tshogs rdzogs shog_/gsum tshan gsum gyi man ngag ces kyang bya gces pa'i snying po zhes bya ba snying dang 'dra ba'i man ngag rdzogs so// //


Footnotes[edit]



Research Information
Translator's notes
Notes on the text itself
Notes on authorship
Notes on individuals related to text
Other notes
Genre from Richard Barron's Catalog
Instruction manual
Genre from dkar chag
khrid phran
BDRC Link
VolumeI1CZ3979
BDRC Content Information
No note on contents


Related Content
Recensions
Other Translations
Commentary(s) of this Text in the DNZ
Text(s) in the DNZ of which this is a commentary
Related Western Publications
Related Tibetan Publications
Other Information

Information about Unicode Tibetan and the digitization of this text

As the only available unicode Tibetan text at the time, Nitartha International's version of the Paro Edition of the gdams ngag mdzod is provided here. However, note that it has not been thoroughly edited and that there may also be mistakes introduced through the conversion process. Eventually we will provide a fully edited version of the entire Shechen Edition, entered and edited multiple times by Pulahari Monastery in Nepal, but as of fall 2017 that project has not been finished. Note that the folio numbers that appear throughout were added by Nitartha Input Center at the time of input.

Provided by Nitartha International Document Input Center. Many thanks to Lama Tenam and Gerry Wiener for help with fonts and conversion.

View JSON

JSON Export