Tibetan:སློབ་དཔོན་དགའ་རབ་རྡོ་རྗེ་ནས་བརྒྱུད་པའི་རྫོགས་པ་ཆེན་པོ་སེམས་སྡེའི་པྲ་ཁྲིད་ཀྱི་མན་ངག་

DOWNLOAD ABOVE:
Click the picture above to view the original manuscript.

སློབ་དཔོན་དགའ་རབ་རྡོ་རྗེ་ནས་བརྒྱུད་པའི་རྫོགས་པ་ཆེན་པོ་སེམས་སྡེའི་པྲ་ཁྲིད་ཀྱི་མན་ངག་
slob dpon dga' rab rdo rje nas brgyud pa'i rdzogs pa chen po sems sde'i pra khrid kyi man ngag
Damngak Dzö Volume 1 (ཀ་) / Pages 311-361 / Folios 1a1 to 26a5

Volumes List > Volume 1 > Text #15 (No Translation) (Wylie)

Previous TextNext Text

Tibetan Text

༣༡༡སློབ་དཔོན་དགའ་རབ་རྡོ་རྗེ་ནས་བརྒྱུད་པའི་རྫོགས་པ་ཆེན་པོ་སེམས་སྡེའི་པྲ་ཁྲིད་ཀྱི་མན་ངག་བཞུགས་སོ།། །རྫོགས་པ་ཆེན་པོ་སེམས་སྡེ་ཁམས་ལུགས།

༣༡༢ༀ་སྭ་སྟི། རང་བཞིན་སྐྱེ་མེད་ཆོས་ཀྱི་སྐུ། །རོལ་པ་འགག་མེད་སྤྲུལ་པའི་སྐུ། །མཚན་ཉིད་དབྱེར་མེད་ལོངས་སྤྱོད་སྐུ། །རིག་པ་རང་གྲོལ་ངོ་བོའི་སྐུ། །འཕོ་འགྱུར་མེད་པ་རྡོ་རྗེའི་སྐུ། །སྐུ་ལྔ་ཡོངས་རྫོགས་ཀུན་ཏུ་བཟང་། །བཀའ་བརྒྱུད་བླ་མར་བཅས་པ་ལ། །དབྱེར་མེད་རང་སྣང་འདུད་ཕྱག་འཚལ། །དེ་ལ་འདིར་ཐེག་པ་དགུའི་ཡང་རྩེ། རྒྱུད་སྡེ་བཞིའི་སྙིང་པོ། དུས་གསུམ་སངས་རྒྱས་ཐམས་ཅད་བགྲོད་པ་གཅིག་ཏུ་གྱུར་པའི་ལམ། རྣལ་འབྱོར་པ་ཐམས་ཅད་ཀྱི་དོན་དུ་གཉེར་བྱའི་མན་ངག །སྤྲུལ་པའི་སྐུ་མཆོག་དགའ་རབ་རྡོ་རྗེས་མཛད་པའི་རྫོགས་པ་ཆེན་པོའི་པྲ་ཁྲིད་ཀྱི་མན་ངག་འདི་ལ་གཉིས་ཏེ། བླ་མ་བརྒྱུད་ཚུལ་གྱི་རིམ་པ་དང་། མན་ངག་དངོས་སོ། །དང་པོ་ལ་རིང་བརྒྱུད་ནི། ཆོས་སྐུ་ཀུན་ཏུ་བཟང་པོ། ལོངས་སྐུ་རྡོ་རྗེ་སེམས་དཔལ། སྤྲུལ་སྐུ་དགའ་རབ་རྡོ་རྗེ། རྒྱལ་བ་དགོངས་པའི་བརྒྱུད་པའོ། །དེ་ནས་སློབ་དཔོན་འཇམ་དཔལ་བཤེས་གཉེན། དྷ་ཧེ་ན་ཏ་ལོ། ཨིནྡྲ་བྷཱུ་ཏི། གོ་མ་དེ་བ། རབ་སྣང་བརྟན་མ། ཚོགས་ཀྱི་བདག་པོ། འཕགས་པ་ཀླུ་སྒྲུབ། རྡོ་རྗེ་ལེགས་པ་རྩལ། ཀུ་ཀུ་རཱ་ཛ། ཐོར་ཚུགས་

༣༡༣དགུ་པ། མར་མེ་མཛད། ཤྲཱི་སེཾ་དྷ། བཻ་རོ་ཙ་ནའི་བར། རིག་འཛིན་རིག་པར་བརྒྱུད་པའོ། །དེ་ནས་གཡུ་སྒྲ་སྙིང་པོ། གསལ་རབ་ཆེན་པོ། རྨ་དཔལ་གྱི་རྒྱལ་པོ། གཉན་བྱང་ཆུབ་ཤེས་རབ། ཡོན་ཏན་འབྱུང་གནས། ཅོག་རོ་སྒོམ་ཆུང་། བྱམས་པ་སྒོམ་ཆེན། བྱང་སྟོན་རྣམ་དག །དམ་པ་བདེ་གཤེགས། ཆོས་རྗེ་གཙང་པ། བྱམས་པ་ཆེན་པོ། སྤྱན་སྔ་བ། གཡན་པ་རིན་པོ་ཆེ། བོ་དྷི་ཤྲཱི། ཆོས་རྗེ་བཛྲ་ཤྲཱིའི་བར་གང་ཟག་སྙན་ནས་སྙན་དུ་བརྒྱུད་པའོ། །ཡང་བྱམས་པ་ཆེན་པོས་ནས། ཙ་སྡེ་སྤྱན་སྔ་བ། དྲུང་ཐུགས་རྗེ་ཡེ་ཤེས། སྟོན་པ་དབང་འབྱོར་དཔལ། དེས་བཛྲ་ཤྲཱི་སྟེ། གཡན་པ་དང་། བྱང་ཆུབ་དཔལ། སྟོན་པ་བ་གསུམ་ཀས། དཔལ་འབར་བ་ལ་གང་བྱོའི་ཚུལ་དུ་ཚིག་དོན་མ་ལུས་པ་གནང་བའོ། །ཉེ་བརྒྱུད་ནི། དམ་པ་ཆེན་པོ་ལ་དཔལ་རྡོ་རྗེ་སེམས་དཔས་དངོས་སུ་ཞལ་གཟིགས་ནས་ཡང་དག་པའི་དོན་མ་ལུས་པ་གནང་བའོ། །ཤིན་ཏུ་ཉེ་བརྒྱུད་ནི། རྩ་བའི་བླ་མ་ཉིད་སངས་རྒྱས་དངོས་ཡིན་པར་རྒྱུད་ཐམས་ཅད་ནས་གསུངས་སོ། །བརྒྱུད་པའི་བར་མ་ཆད་པ་ནི་རང་གི་སེམས་ཉིད་རྟོགས་ན་སྐུ་ལྔ་

༣༡༤ལྷུན་གྲུབ་སངས་རྒྱས་ཀྱི་ཡིན་པར་གསུངས་སོ། །གཉིས་པ་བརྒྱུད་པ་དེ་ལས་བྱུང་བའི་མན་ངག་ལ་གསུམ་སྟེ། སྔོན་ཏུ་འགྲོ་བས་རྒྱུད་སྣོད་དུ་རུང་བར་བྱེད་པ་དང་། དངོས་གཞི་ཉམས་སུ་བླང་བའི་རིམ་པ་དང་། རྗེས་འབྲས་བུ་ཅི་ལྟར་ཐོབ་པའི་ཚུལ་བསྟན་པའོ། །དང་པོ་ལ་གསུམ་གྱི་ཐོག་མར་ཡི་གེ་བརྒྱ་བའི་བསྒོམ་བཟླས་དང་། བླ་མའི་རྣལ་འབྱོར་ཐུན་མོང་དུ་བྱ་བ་ནི། བདག་དང་སེམས་ཅན་ཐམས་ཅད་འཁོར་བའི་སྡུག་བསྔལ་གྱི་རྒྱ་མཚོ་ལས་སྒྲོལ་ནས་སངས་རྒྱས་ཀྱི་གོ་འཕང་རིན་པོ་ཆེ་ཐོབ་པ་ཞིག་དཀོན་མཆོག་དྲུག་པོ་འདི་མཁྱེན་སྙམ་པ་བྱས་ལ། བླ་མ་ཡི་དམ་མཁའ་འགྲོ་དང་སངས་རྒྱས་ཆོས་དང་དགེ་འདུན་རྣམས་ལ་སྐྱབས་སུ་འགྲོ་བ་མང་དུ་བྱའོ། །དེ་ནས་ཁམས་གསུམ་གྱི་སེམས་ཅན་ཐམས་ཅད་ཀྱིས། ཐོག་མ་མེད་པ་ནས་བདག་གི་ཕ་མ་བྱས་ཤིང་དྲིན་གྱིས་བསྐྱངས་པ་ཁོ་ན་ཡིན་པ་རྣམས་ད་ལྟ་རིགས་དྲུག་འཁོར་བའི་སྡུག་བསྔལ་མྱོང་བ་འདི་དག་བདེ་བ་དང་ལྡན་སྡུག་བསྔལ་དང་བྲལ་ནས་སངས་རྒྱས་ཀྱི་ས་ལ་འགོད་པར་བྱེད་པ་ལ། ཐོག་མར་བདག་འཚང་རྒྱ་དགོས་ཏེ། དེའི་ཆེད་དུ་དགེ་སྦྱོར་བྱའོ་སྙམ་དུ་ངེས་པར་སེམས་བསྐྱེད། དེ་ནས་རིན་པོ་ཆེའི་ས་གཞི་སངས་རྒྱས་ཀྱི་ཞིང་ཁམས་རྣམ་པར་དག་པའི་དབུས་སུ་པདྨ་ཉི་ཟླའི་སྟེང་དུ། རང་གི་སེམས་ཉིད་ཧཱུྃ་དཀར་པོ་ལས་འོད་འཕྲོས་འཕགས་པ་མཆོད་སེམས་ཅན་གྱི་དོན་བྱས་སྒྲིབ་པ་སྦྱངས་ནས་རྡོ་རྗེ་སེམས་དཔའི་གོ་འཕང་ལ་བཀོད། འོད་ཚུར་འདུས་ཡོངས་སུ་གྱུར་པ་ལས། རང་ཉིད་རྡོ་རྗེ་སེམས་དཔའ་དཀར་པོ་ཞལ་གཅིག་ཕྱག་གཉིས་རྡོ་རྗེ་དང་དྲིལ་བུ་ཐུགས་ཀར་བསྣོལ་བ། ཞབས་རྡོ་རྗེའི་སྐྱིལ་ཀྲུང་དང་དར་སྣ་ལྔའི་ཤམས་ཐབས་བྱས་པ། རིན་པོ་ཆེའི་རྒྱན་ཐམས་ཅད་ཀྱིས་བརྒྱན་པའི་ཐུགས་ཀར་ཟླ་བའི་སྟེང་དུ་རྡོ་རྗེ་དཀར་པོ་རྩེ་ལྔ་པའི་ལྟེ་བར་ཟླ་བའི་སྟེང་དུ་ཧཱུྃ་ལ་ཡི་གེ་བརྒྱ་པས་གཡས་སུ་འཁོར་བ། རང་གི་སྤྱི་གཙུག་

༣༡༥ཉི་ཟླའི་སྟེང་དུ་རྩ་བའི་བླ་མ་དང་དབྱེར་མེད་པའི་རྡོ་རྗེ་སེམས་དཔའ་སྐུ་མདོག་སྔོན་པོ་ནམ་མཁའི་མདོག་ཅན། ཞལ་གཅིག་ཕྱག་གཉིས་རྡོ་རྗེ་དང་དྲིལ་བུ་བསྣོལ་མར་འཛིན་ཅིང་དར་དང་རིན་པོ་ཆེ་དང་རུས་པའི་རྒྱན་དྲུག་གིས་བརྒྱན་པ། སྣང་ལ་རང་བཞིན་མེད་པ་འཇའ་ཚོན་གྱི་སྐུ་ལྟ་བུའི་དཔྲལ་བར་ༀ། མགྲིན་པར་ཨཱཿ ཐུགས་ཀར་ཧཱུྃ། དེ་ལས་འོད་ཟེར་འཕྲོས། ཕྱོགས་བཅུ་དུས་གསུམ་གྱི་རྒྱལ་བ་སྲས་བཅས་ཐམས་ཅད་རྡོ་རྗེ་སེམས་དཔའི་རྣམ་པར་བྱོན་ནས་སྤྱི་བོའི་བླ་མ་རྡོ་རྗེ་སེམས་དཔའ་ལ་ཐིམ་པ་ལན་བདུན། རྡོ་རྗེ་བསྡུ་བའི་ཕྱག་རྒྱ་གཡས་སུ་བསྐོར་བ་དང་། སེ་གོལ་བཅས་པས་ལན་བདུན་ཡི་གེ་བརྒྱ་པ་ཚར་བདུན་བཟླ་བ་རིམ་བཞིན་སྤྲོད། དེ་ནས་བླ་མ་རྡོ་རྗེ་སེམས་དཔའི་སྐུ་གསུང་ཐུགས་ལས་ཡེ་ཤེས་ཀྱི་བདུད་རྩིའི་ཆུ་རྒྱུན་བྱུང་ནས་རང་གི་སྤྱི་བོར་བབས། ལུས་ཀྱི་ནད་གདོན་སེམས་ཀྱི་སྡིག་སྒྲིབ་དམ་ཚིག་ཆགས་ཉམས་ཐམས་ཅད་འོག་སྒོ་དང་། རྐང་ཞབས་སུ་བུད་ནས་སོང་བས། རང་ལུས་ཕྲུ་མ་ཕུས་བཏབ་པ་ལྟ་བུའི་ནང་ཟག་མེད་ཡེ་ཤེས་ཀྱི་བདུད་རྩིའི་གང་བར་བསམ་ཞིང་། ༀ་བཛྲ་ས་ཏྭ་མ་ཡ། མ་ནུ་པཱ་ལ་ཡ། བཛྲ་ས་ཏྭ་ཏྭེ་ནོ་པ་ཏིཥྛ། དྲྀ་ཌྷོ་མེ་བྷ་བ། སུ་ཏོ་ཥྱོ་མེ་བྷ་ཝ། ཨ་ནུ་རཀྟོ་མེ་བྷ་བ། སུ་པོ་ཥྱོ་མེ་བྷ་བ། སརྦ་སིདྡྷི་མྨེ་པྲ་ཡ་ཙྪ། སརྦ་ཀརྨ་སུ་ཙ་མེ། ཙིཏྟཾ་ཤྲཱི་ཡཿཀུ་རུ་ཧཱུྃ། ཧ་ཧ་ཧ་ཧ་ཧོཿབྷ་ག་ལྦཱན་སརྦ་ཏ་ཐཱ་ག་ཏ། །བཛྲ་མཱ་མེ་མུཉྩ་བཛྲཱི་བྷ་བ་མ་ཧཱ་ས་མ་ཡ་ས་ཏྭ་ཨཱཿ ཞེས་གསལ་དག་ཏུ་བཟླས་ཤིང་། ཐུན་རྟིང་ལ་བདག་གི་སྡིག་སྒྲིབ་ཉེས་ལྟུང་ཐམས་ཅད་བཤགས་སོ། དག་པར་མཛད་དུ་གསོལ། ཞེས་བརྗོད་ལ་བླ་མ་རང་ལ་བསྟིམ། རང་ཐུགས་ཀའི་རྡོ་རྗེ་ལ། དེ་ཧཱུྃ་ལ། ཧཱུྃ་འཇའ་ཡལ་བ་ལྟར་སོང་ནས་ཆོས་ཀྱི་དབྱིངས་སུ་འདྲེས་པར་བསམ་པའི་ངང་ནས་

༣༡༦དམིགས་མེད་དུ་བཞག་ལ་བསྔོ་སྨོན་བྱའོ། །དེ་ནས་རྟགས་ཐོན་པར་བྱེད་པ་གལ་ཆེ་སྟེ། རྟགས་ནི་སྔར་བས་དད་པ་ཆེ་བ། མི་རྟག་པ་རྒྱུད་ལ་སྐྱེ་བ། སེམས་དགའ་ཞིང་དགེ་སྦྱོར་ལ་བློ་འཇུག་པ། སེམས་ཅན་ལ་བྱམས་སྙིང་རྗེ་སྐྱེ་བ་དང་རྨི་ལམ་དུ་རི་དང་སྐས་ལ་སོགས་པར་གྱེན་ལ་འགྲོ་བ། ནམ་ལངས་པ། ཉི་ཟླ་ཤར་བ། ཁྲུས་བྱེད་པ། དར་ཕྱར་བ། དུད་འབུད་པ། ལྷ་ཆ་དཀྲོལ་བ། ལུས་ལས་འབུ་སྲིན་དང་ཁྲག་རྣག་བུད་པ། སྐྱུགས་སྦྱོང་དང་གོས་དཀར་པོ་གྱོན་པ། མེ་ཏོག་གི་གླིང་དུ་ཕྱིན་པ་ལ་སོགས་པ་རྨིའོ། །དགོངས་པ་ཚིག་གསུམ་པར། རྡོ་རྗེ་སེམས་དཔའ་བསྒོམས་ནས་ནི། །སྔགས་ཀྱང་རབ་ཏུ་ཟློ་བྱེད་པ། །དེ་ཡི་སྡིག་ཀུན་དག་ནས་ཀྱང་། །རྡོ་རྗེ་སེམས་དཔའ་འདྲ་བར་འགྱུར། །ཅེས་དང་། སྒོམ་པ་ལས། མདུན་དུ་ཐུགས་ཀྱི་ངོ་བོ་རྡོ་རྗེ་སེམས་དཔའ་ནི། ནམ་མཁའི་མདོག་ཅན་རྡོ་རྗེ་དྲིལ་བུ་འཛིན་པའི་གནས་གསུམ་དུ། །སྐུ་གསུང་ཐུགས་ཀྱི་ཡིག་འབྲུ་འོད་ཟེར་ཅན། །བདག་གི་ལུས་ལ་ཞུགས་པས་སྡིག་པ་དག་ནས་བྱིན་རླབས་འཇུག་པ་ཉིད། །ཅེས་གསུངས་སོ། །གཉིས་པ་ཚོགས་གཉིས་རྫོགས་ཤིང་བྱིན་རླབས་འཇུག་པར་བྱེད་པ་མཎྜལ་དང་བླ་མའི་རྣལ་འབྱོར་བསྒོམ་པ་ནི། སྐྱབས་འགྲོ་སེམས་བསྐྱེད་དང་། ཡི་གེ་བརྒྱ་པའི་བསྒོམ་བཟླས་སྔོན་དུ་སོང་བས། རང་ཡི་དམ་རྡོ་རྗེ་སེམས་དཔའི་སྨིན་མཚམས་ནས་བྷྲཱུྃ་སྤྲོས་པ་ལས་མདུན་གྱི་མཎྜལ་དེ་འོད་དུ་ཞུ་བས་རིན་པོ་ཆེ་ཁ་དོག་བརྒྱ་རྩ་བརྒྱད་ལ་མིག་མང་རིས་སུ་བསྡེབས་པའི་ས་གཞི་མནན་ན་ནེམ་པ་བཏེག་ན་འཕར་བ། གཞི་མདོ་ཐམས་ཅད་རིན་པོ་ཆེ་སྣ་ཚོགས་པའི་ཚོམ་བུས་སྤྲས་པ། མིག་གིས་བལྟར་མི་བཟོད་པའི་འོད་དང་ལྡན་པ་རྒྱ་ཆོས་དབྱིངས་ནམ་མཁའ་དང་མཉམ་པའི་དབུས་སུ། རིན་པོ་ཆེའི་ཁྲི་ཀ་བ་བརྒྱད་ཀྱིས་

༣༡༧བཏེགས་པ་མཛོད་མིག་བདུན་བདུན་དང་ལྡན་པ། གདུང་མ་ཟུང་སྒྲིལ་དུ་འཁོར་བ་སེང་གེ་བརྒྱད་ཀྱིས་བཏེགས་ཅིང་རིན་པོ་ཆེའི་དྲྭ་བས་ཁྲི་ཁེབས་བྱས་པའི་སྟེང་དུ། པདྨ་སྟོང་ལྡན་དང་ཉི་མའི་གདན་ལ། རྩ་བའི་བླ་མ་དང་ཆོས་སྐུ་ཀུན་ཏུ་བཟང་པོ་དབྱེར་མེད་པ་ལ། བརྒྱུད་ཚུལ་གསུམ་གྱི་བླ་མ་རྣམས་ཀྱིས་བསྐོར་བ། དེའི་མདུན་དུ་གླང་ཆེན་བརྒྱད་ཀྱིས་བཏེགས་པའི་གདན་དྲུག་བརྩེགས་ལ། ཡི་དམ་རྒྱལ་བའི་ལྷ་ཚོགས་ལ་མཁའ་འགྲོ་ཆོས་སྐྱོང་རྣམས་ཀྱིས་བསྐོར་བ། བླ་མའི་གཡས་སུ་རྟ་མཆོག་བརྒྱད་ཀྱིས་བཏེགས་པའི་གདན་དྲུག་བརྩེགས་ལ། སངས་རྒྱས་དཀོན་མཆོག་སྐུ་གསུམ་གྱིས་བསྡུས་པ་རྣམས་དང་། རྒྱབ་ཕྱོགས་སུ་རྨ་བྱ་བརྒྱད་ཀྱིས་བཏེགས་པའི་གདན་དྲུག་བརྩེགས་ལ། ཆོས་དཀོན་མཆོག་རྒྱུ་འབྲས་ལམ་གསུམ་གྱིས་བསྡུས་པ་རྣམས་གསེར་གྱི་ཤོག་བུ་ལ་བཻ་ཌཱུརྻ་ཞུན་མས་རང་ནན་དུ་བྲིས་པའི་གླེགས་བམ་རང་སྒྲ་གྲགས་པ་རྣམས་དང་། གཡོན་ཕྱོགས་སུ་ཤང་ཤང་བརྒྱད་ཀྱིས་བཏེགས་པའི་གདན་ལ། དགེ་འདུན་དཀོན་མཆོག་རིག་པ་འཛིན་པ་རྣམས་ལ་ས་དང་ལམ་ལ་གནས་པའི་བྱང་ཆུབ་སེམས་དཔའ་རྣམས་དང་རང་སངས་རྒྱས་ཉན་ཐོས་ཆེན་པོ་དགྲ་བཅོམ་པ་རྣམས་བཞུགས་པར་བསམས་ལ། རང་བཞིན་གྱི་གནས་དང་ཕྱོགས་བཅུའི་འཇིག་རྟེན་ནས། དེ་འདྲ་བ་ཐམས་ཅད་སྤྱན་དྲངས་ལ་སོ་སོར་བསྟིམ། དེ་དག་ལ་མཆོད་པའི་དངོས་པོ་ནམ་མཁའ་ཁྱབ་ཚད་ཀྱི་འཇིག་རྟེན་གྱི་ཁམས་ས་གཞི་དང་རི་དང་ཁང་པ་ཐམས་ཅད་ཀྱང་རིན་པོ་ཆེ་སྣ་ཚོགས་ལས་གྲུབ་པ། །རྩི་ཤིང་ནགས་ཚལ་ཐམས་ཅད་དཔག་བསམ་ཤིང་ལས་དགོས་འདོད་འབྱུང་བ། མཚོ་དང་ཆུ་ཐམས་ཅད་ཡན་ལག་བརྒྱད་ལྡན་གྱི་མཚོ་དང་རྫིང་བུ་གསེར་དངུལ་གྱི་བྱེ་མ་གདལ་བ། གཟུགས་སྒྲ་དྲི་རོ་རེག་བྱ་ཐམས་ཅད་མཆོད་རྫས་ཀྱི་བྱེ་བྲག་དངོས་པོ་བཟང་ལ་གྱ་ནོམ་པ། རང་

༣༡༨གི་ལུས་ཞིང་གི་རྡུལ་སྙེད་དུ་སྤྲུལ་ནས། སྐྱེ་འགྲོ་ལྷའི་བུ་དང་བུ་མོ། གཟུགས་བྱད་མཆོག་ཏུ་གྱུར་པ། ངག་ཏུ་ཅི་སྨྲ་ཐམས་ཅད་དབྱངས་དང་བསྟོད་པ། རྐང་ལག་གི་འདུ་བྱེད་ཐམས་ཅད་བྲོ་དང་གར། ལུས་ཀྱི་རྒྱན་དང་གོས། ལག་ཏུ་གང་བཟུང་ཐམས་ཅད་ལྷའི་ན་བཟའ་དོ་ཤལ་དབུང་རྒྱན་སེ་མོ་དོ་དང་། ཡེ་ཤེས་ཀྱི་བདུད་རྩི་ལ་སོགས་པའི་མཆོད་རྫས་སུ་གྱུར་པ་དང་། ནམ་མཁའ་བར་སྣང་ས་གཞི་ཐམས་ཅད་རིན་པོ་ཆེའི་སྤྲིན་ལས་དགོས་འདོད་ཆར་དུ་དབབ་པ་དང་། གདུགས་དང་རྒྱལ་མཚན་བ་དན་བླ་རེ་ཡོལ་བ་ལ་སོགས་པ་སྤྲིན་བཞིན་འཁྲིགས་པ། མེ་ཏོག་ཨུཏྤ་ལ་དང་པདྨ་ལ་སོགས་དྲི་བསུང་ཕྱོགས་བཅུར་འཕྲོ་བ་རྣམས་རྩི་ཤིང་ལྟར་རྒྱས་པ། མདོར་ན་ཕྱོགས་བཅུ་རབ་འབྱམས་མུ་མེད་མཐའ་ཀླས་པ་ཐམས་ཅད། འཕགས་པ་ཀུན་དུ་བཟང་པོའི་རྣམ་པར་ཐར་པ་ལྟ་བུའི་མཆོད་པས་རྒྱས་པར་བཀང་སྟེ་འབུལ་བར་བསམས་ལ། མཆོད་པའི་ཕྱག་རྒྱ་ཆེན་པོ་ནི། །སེམས་ཀྱི་ཡིད་བཞིན་སྤྲིན་ཚོགས་ཀྱིས། །ཕྱོགས་བཅུ་ཐམས་ཅད་སངས་རྒྱས་ཞིང་། །མཉེན་འཇམ་རེག་ན་བདེ་བ་ཡི། །སྣ་ཚོགས་རིན་པོ་ཆེ་ཡི་གཞིར། །མཛེས་པར་བྲེས་ཤིང་སྤྲས་པ་དང་། །ཀུན་འབྱུང་རིན་ཆེན་ཕུང་པོ་འབར། །དབྱིངས་ལེགས་རྫིང་བུ་བྲོ་མཆོག་བསེལ། །རིན་ཆེན་ཁང་པ་སྣ་ཚོགས་དང་། །རྒྱན་དང་དཔག་བསམ་ལྗོན་པའི་ཚལ། །གླུ་དབྱངས་ཚིགས་སུ་བཅད་པའི་སྒྲ། །བླ་བྲེ་རྒྱལ་མཚན་ན་བཟའ་གདུགས། །དོ་ཤལ་དཔུང་རྒྱན་སེ་མོ་དོ། །བཟའ་དང་བཏུང་བའི་མཆོག་རྣམས་ཀྱིས། །རང་ལ་མཛེས་པར་བརྒྱན་པ་ཡི། །ལྷ་དང་ལྷ་མོ་རྡུལ་སྙེད་ཀྱི། །བྲོ་གར་ལ་སོགས་བསམ་ཡས་ཀྱིས། །ཕྱོགས་བཅུ་ནམ་མཁའི་ཁམས་བཀང་ནས། །དཀྱིལ་འཁོར་ཀུན་ལ་རྒྱས་པར་འབུལ། །ཅེས་དམིགས་པ་དང་བཅས་པས་བརྒྱ་རྩའམ་ཉེར་གཅིག་ལ་སོགས་ཐུན་རེ་ལ་བྱའོ། །དེ་ལྟར་

༣༡༩སེམས་ཉིད་སྐྱེ་བ་མེད་པའི་ངང་ལས་འགག་པ་མེད་པའི་རྩལ་གྱི་རྣམ་པ་འཕྲུལ་བ་སྒྱུ་འཕྲུལ་ཆེན་པོའི་ཚུལ་དུ་མཆོད་པ་ནི། ལོངས་སྐུའི་ཞིང་སྒྲུབ་པའི་མཎྜལ་ཐུན་མོང་མ་ཡིན་པའོ། །དེ་ནས་སྤྲུལ་སྐུའི་ཞིང་སྒྲུབ་པ་ཐུན་མོང་གི་མཎྜལ་འབུལ་བ་ནི། རང་ཡི་དམ་རྡོ་རྗེ་སེམས་དཔའི་ཐུགས་ཀ་ནས་ཏྲཱྃ་ཅིག་སྤྲོས་པ་འོད་དུ་ཞུ་བ་ལས། མཐའ་ཡི་རྒྱ་མཚོ་ཆེན་པོའི་དབུས་སུ་རི་བོ་མཆོག་རབ། ཤར་ཤེལ་དཀར་པོ་ལས་གྲུབ་པ། ལྷོ་བཻ་ཌཱུརྻ་སྔོན་པོ། ནུབ་པདྨ་རཱ་ག་དམར་པོ། བྱང་གསེར་ལས་གྲུབ་པ་སེར་པོ། སྟེང་སུམ་ཅུ་རྩ་གསུམ་ལྷའི་ལོངས་སྤྱོད། ཕྱི་རོལ་རྒྱལ་ཆེན་སྡེ་བཞིའི་ལོངས་སྤྱོད། ཁོང་གསེང་ལྷ་མ་ཡིན་གྱི་ལོངས་སྤྱོད། འོག་ཀླུའི་ལོངས་སྤྱོད་དང་བཅས་པ་གསེར་གྱི་རི་བདུན་རོལ་པའི་མཚོ་བདུན་གྱིས་བསྐོར་བ། དེའི་ཤར་ཕྱོགས་ཀྱི་གླིང་ལུས་འཕགས་པོ་དང་། གཡས་གཡོན་དུ་གླིང་གཡོགས་ལུས་དང་ལུས་འཕགས་གཉིས། དེ་བཞིན་དུ་ལྷོ་འཛམ་བུ་གླིང་། རྔ་ཡབ་དང་རྔ་ཡབ་གཞན། ནུབ་བ་གླང་སྤྱོད། གཡོ་ལྡན་དང་ལམ་མཆོག་འགྲོ། བྱང་སྒྲ་མི་སྙན། སྒྲ་མི་སྙན་དང་སྒྲ་མི་སྙན་གྱི་ཟླ། གླིང་གི་ཕྱི་རོལ་ལྕགས་རི་མུ་ཁྱུད་ཀྱིས་བསྐོར་བ། གླིང་རྣམས་སུ་འཁོར་ལོ། ནོར་བུ། བཙུན་མོ། བློན་པོ། གླང་པོ། རྟ་མཆོག །དམག་དཔོན་ཏེ་རྒྱལ་སྲིད་སྣ་བདུན་དང་། གཏེར་ཆེན་པོའི་བུམ་པ། བཀྲ་ཤིས་རྫས་བརྒྱད་ལ་སོགས་པ་ལྷ་མིའི་ལོངས་སྤྱོད་དཔལ་འབྱོར་གྱིས་གང་བ་དང་། ནམ་མཁས་ཁྱབ་ཚད་ཀྱི་གླིང་བཞི་འཇིག་རྟེན། སྟོང་གསུམ་མུ་མེད་པ་ཐམས་ཅད། རིན་ཆེན་སྨན་དང་འབྲུ་ལ་སོགས་པས་བཀང་སྟེ། སྔར་གྱི་དམིགས་ཡུལ་ཚན་པ་ལྔ་པོ་ལ་འབུལ་བར་བསམས་ལ། ཏྲཱྃ། གླིང་བཞི་དཀྱིལ་འཁོར་རིན་ཆེན་ལྡན། །དཔག་བསམ་ཤིང་དང་

༣༢༠རྫིང་བུ་མཛེས། །ལས་བཞི་བྱིན་རླབས་ལྷུན་གྲུབ་པ། །ལྷ་དང་ལྷ་མོའི་ལོངས་སྤྱོད་ལྡན། །ལྷག་པ་ཏིང་འཛིན་མཆོད་པར་འབུལ། །ཅེས་ཐུན་རེར་བརྒྱའམ་ཉེར་གཅིག་ཕུལ་ན། རྒྱུ་བསོད་ནམས་ཀྱི་ཚོགས་དེས་འབྲས་བུ་ཡེ་ཤེས་ཀྱི་ཚོགས་ཡོངས་སུ་རྫོགས་པར་བྱེད་དེ། ཆོས་རྣམས་ཐམས་ཅད་འབྲས་བུ་ཡོངས་རྫོགས་པའི། །སངས་རྒྱས་རྣམས་ལ་མཎྜལ་འདི་ཕུལ་བས། །འབྲས་བུ་འཕགས་པའི་ནོར་བདུན་ལྷུན་གྲུབ་སྟེ། །ཏིང་འཛིན་འབུམ་ཕྲག་རྣམས་ལ་དབང་སྒྱུར་ཤོག །ཅེས་བསྔོའོ། །དེ་ནས་ཐལ་མོ་སྦྱར་ཏེ་ཡིད་ཀྱིས་མོས་གུས་གདུང་བ་ཞེ་ཐག་པ་ནས་གསོལ་བ་གདབ་པ་ནི། ན་མོ། ཕྱོགས་བཅུ་དུས་བཞིའི་བདེ་བར་གཤེགས་པ་ཐམས་ཅད་ཀྱི། སྐུ་དང་། གསུང་དང་། ཐུགས་དང་། ཡོན་ཏན་དང་། ཕྲིན་ལས་དང་། ཞིང་ཁམས་ཟག་པ་མེད་པ་ཟད་མི་ཤེས་པ་རྒྱན་གྱི་འཁོར་ལོའི་བདེན་པ་དང་། རྒྱལ་བ་རྒྱ་མཚོ། གསང་བ་རྒྱ་མཚོ། སྨིན་པ་རྒྱ་མཚོའི་བཀའ་བརྒྱུད་ཀྱི་བླ་མ་རིན་པོ་ཆེ་རྣམས་ཀྱི་བྱིན་རླབས་ཀྱིས། སེམས་ཅན་ཐམས་ཅད་ཀྱི་དོན་དུ་བདག་མིང་རྡོ་རྗེ་ཆེ་གེ་མོ་ཞེས་བགྱི་བ་ལ། རྫོགས་པ་ཆེན་པོ་ཤིན་ཏུ་རྣལ་འབྱོར་གྱི་དོན་རང་བྱུང་གི་ཡེ་ཤེས་དེ་ཁོ་ན་ཉིད་ཀྱི་གང་བ་དང་། ཤིན་ཏུ་གང་བ་དང་། རྒྱས་པ་དང་། ཤིན་ཏུ་རྒྱས་པ་དང་། སྨིན་པ་དང་། ཤིན་ཏུ་སྨིན་པ་དང་། གྲོལ་བ་དང་། ཤིན་ཏུ་གྲོལ་བ་རྒྱ་ཆེན་པོ་མཛད་དུ་གསོལ། ཞེས་ཐུན་རེ་ལ་ཉེར་གཅིག་ལ་སོགས་པས་གསོལ་བ་གདབ་ནས། དཀོན་མཆོག་རིགས་དྲུག་ཚན་ལྔ་པོ་དེ་འོད་དུ་ཞུ་ནས་རྩ་བའི་བླ་མ་ལ་ཐིམ། ཚོམ་བུ་བསྡུས་ལ་རང་གི་སྤྱི་བོར་བཞག །བླ་མ་བདག་ལ་ཐུགས་རྗེས་ཉེ་བར་དགོངས་ནས་སྤྱི་བོར་བྱོན་ཏེ། སྣ་ཚོགས་པདྨ་ཉི་མ་ཟླ་བའི་སྟེང་དུ་རྡོ་རྗེ་སེམས་དཔའ་བདེ་བ་ཆེན་པོའི་སྐུ་ཞལ་གཅིག་ཕྱག་གཉིས་པ། རྡོ་རྗེ་དྲིལ་བུ་ཐུགས་ཀར་བསྣོལ་པས་ཡུམ་

༣༢༡ལ་འཁྱུད་པ། རལ་པ་བཅིངས་བའི་ལྷག་མ་གྲོལ་བ། དར་སེར་པོའི་ཚངས་སྐུད་སེ་རལ་ཁར་ཐོགས་པ། ཡུམ་རྡོ་རྗེ་སྙེམ་མ་དམར་མོ་གཡས་ཡབ་ལ་འཁྱུད་ཅིང་། གཡོན་དྲིལ་བུ་སྙན་རྩར་འཁྲོལ་བ། ཡབ་ཡུམ་གཉིས་ཀ་ལ་རིན་པོ་ཆེའི་དབུ་རྒྱན། རྣ་རྒྱན། མགུལ་རྒྱན། དཔུང་རྒྱན། ཕྱག་གདུབ། དོ་ཤལ། སེ་མོ་དོ། སྐུ་རེག་ཐམས་ཅད་ཀྱིས་བརྒྱན་ཅིང་། དར་སྣ་ལྔའི་ཤམ་ཐབས་བྱས་པ། ཞབས་རྡོ་རྗེ་དང་པདྨའི་སྐྱིལ་ཀྲུང་དུ་བཞུགས་པ། སྣང་ལ་རང་བཞིན་མེད་པ། ཉི་མ་འབུམ་གྱི་གཟི་བརྗིད་དང་ལྡན་པའི་སྤྱི་བོར་ༀ་དཀར་པོ། མགྲིན་པར་ཨཱཿདམར་པོ། ཐུགས་ཀར་ཧཱུྃ་སྔོན་པོ་བསམ། དེ་ནས་བདག་གི་ལུས་ལོངས་སྤྱོད་ཁ་རྗེ་དབང་ཐང་དུས་གསུམ་གྱི་དགེ་རྩ་བདེ་སྐྱིད་དཔལ་འབྱོར་ཕུན་སུམ་ཚོགས་པ་ཐམས་ཅད་བླ་མ་དམ་པ་ལ་འབུལ་ལོ། །བཞེས་སུ་གསོལ་ལོ། །བདག་ལ་དབང་བསྐུར་བྱིན་གྱིས་བརླབས་དུ་གསོལ། ལུས་ངག་ཡིད་གསུམ་སྨིན་ཅིང་གྲོལ་བར་བྱིན་གྱིས་བརླབ་པར་མཛད་དུ་གསོལ། སངས་རྒྱས་ཐམས་ཅད་ཀྱི་དགོངས་པ་བླ་མ་དམ་པའི་རྟོགས་པ་ཁྱད་པར་ཅན་ད་ལྟ་ཉིད་དུ་བདག་གི་རྒྱུད་ལ་སྐྱེ་བར་མཛད་དུ་གསོལ། ཞེས་གདུང་སེམས་དྲག་པོས་བརྒྱ་རྩ་བརྒྱད་ལ་སོགས་པ་གསོལ་བ་བཏབ་པའི་རྗེས་ལ། བླ་མ་ཡབ་ཡུམ་མ་ཆགས་ཐབས་ཀྱི་རོལ་པའི་འོད་ཟེར་ཕྱོགས་བཅུར་འཕྲོས། སངས་རྒྱས་ཐམས་ཅད་ཀྱི་སྐུ་གསུང་ཐུགས་ཀྱི་རྒྱུད་བསྐུལ་བྱིན་རླབས་བསྡུས་བླ་མ་ཡབ་ཡུམ་ལ་ཐིམ། སྦྱོར་བ་མཛད་ནས་བྱང་སེམས་དཀར་དམར་བབས། བདག་གི་ལས་ཉོན་ཤེས་སྒྲིབ་ཐམས་ཅད་དག་ནས་རང་རྡོ་རྗེ་སེམས་དཔའ་ཉིད་དུ་གསལ་བ་ལ། བླ་མའི་དཔྲལ་བར་ནས་ༀ་དཀར་པོ་འོད་ཟེར་དང་བཅས་པ་བྱུང་བདག་གི་སྤྱི་བོར་ཐིམ། ལུས་ཀྱི་སྒྲིབ་པ་དག །སྐུ་བུམ་པའི་དབང་ཐོབ། ལུས་

༣༢༢སྤྲུལ་སྐུར་མངོན་དུ་བྱས་ཨཾ་སྙམ་པ་བྱའོ། །དེ་བཞིན་དུ་བླ་མའི་མགྲིན་པ་ནས་ཨཱཿདམར་པོ་འོད་ཟེར་དང་བཅས་པ་བྱུང་། རང་གི་ལྕེ་ཐོག་ཏུ་ཐིམ། ངག་གི་སྒྲིབ་པ་དག །གསུང་གསང་བའི་དབང་ཐོབ། ངག་ལོངས་སྐུར་གྲོལ། ཐུགས་ཀ་ནས་ཧཱུྃ་མཐིང་ག་འོད་ཟེར་དང་བཅས་པ་རང་གི་སྙིང་ནང་དུ་ཐིམ། ཡིད་ཀྱི་སྒྲིབ་པ་དག །ཐུགས་ཤེས་རབ་ཡེ་ཤེས་ཀྱི་དབང་ཐོབ། སེམས་ཆོས་སྐུར་གྲོལ་བར་བསམ། དེ་ནས་བླ་མ་ཡབ་ཡུམ་དགྱེས་པའི་ཚུལ་གྱིས་ཚངས་བུག་ནས་མར་བྱོན། རང་གི་སྙིང་པདྨ་དམར་པོ་འདབ་མ་བརྒྱད་པ་གཞིག་ཏུ་གྱུར་པའི་དབུས་སུ། ཉི་ཟླ་པདྨའི་གདན་ལ་ཞལ་འཛུམ་མུལ་ལེ། སྤྱན་ཁྲ་ཟིམ་མེ། ཐུགས་དགའ་ཡལ་ལེ། ཡབ་ཡུམ་དཀར་དམར་ལྷམ་མེར་བཞུགས་པ་ལ་ཅི་ནུས་སུ་སེམས་གཏད། དེ་ནས་བླ་མ་ཡབ་ཡུམ་འོད་དུ་ཞུ་ནས། དུས་གསུམ་སངས་རྒྱས་ཐམས་ཅད་འདུས་པའི་བླ་མ་དེའི་ཀཱ་ཝཱ་ཙི་དང་། རང་གི་ལུས་ངག་ཡིད་གསུམ་དབྱེར་མེད་དུ་འདྲེས། སྒོ་གསུམ་ཐ་དད་ཀྱི་དྲི་མ་དག །ཡེ་ཤེས་རྡོ་རྗེའི་ཚིག་གིས་སྦྱིན་པའི་དབང་ཐོབ། ངོ་བོ་ཉིད་དང་གསང་བའི་སྐུ་མངོན་དུ་གྱུར་ཨཾ་སྙམ་པའི་རྗེས་ལ། དུས་གསུམ་གྱི་རྟོག་པ་བཅད་ནས་སེམས་མ་བཅོས་ལྷུག་པར་བཞག་པ་ཡུན་བསྲིང་། ཐུན་རྟིང་དགེ་བ་བསྔོ་སྟེ། བདག་གིས་དགེ་བའི་ལས་འདི་བགྱིས་པ་ཡིས། །འཇིག་རྟེན་རིང་པོར་མི་ཐོགས་སངས་རྒྱས་ནས། །དེ་ཀུན་འགྲོ་ལ་ཕན་ཕྱིར་དམ་ཆོས་ཀྱིས། །སེམས་ཅན་སྡུག་བསྔལ་ཚ་གདུང་སྒྲོལ་གྱུར་ཅིག །འདི་ལ་རྟགས་མ་བྱུང་བར་དུ་གཉུག་བསྲིང་བ་གལ་ཆེ་སྟེ། བྱིན་རླབས་མ་ཞུགས་ན་ཉམས་རྟོགས་མི་སྐྱེ་ཞིང་། བླ་མའི་བྱིན་རླབས་ཞུགས་ན་ཉམས་རྟོགས་བཙན་ཐབས་སུ་སྐྱེ་བར་གསུངས་སོ། །རྟགས་ནི་རབ་སྣང་སྲིད་ཆོས་སྐུར་རྟོགས་པ། འབྲིང་སྣང་སྲིད་བླ་མར་འཆར་བ། བདེ་གསལ་མི་རྟོག་པའི་ཉམས་གཅིག་

༣༢༣ཅར་དུ་སྐྱེ་བ། ཐ་མས་འཁོར་བ་ལ་བློ་ལྡོག་ཅིང་། བླ་མ་ལ་སངས་རྒྱས་དངོས་ཀྱི་འདུ་ཤེས་སྐྱེ་བ་དང་། རྨི་ལམ་དུ་རིན་པོ་ཆེ་དང་སངས་རྒྱས་ཀྱི་ཞིང་ལ་སོགས་པ་དག་པའི་སྣང་བ་འབྱུང་། སྤྱིར་གསང་སྔགས་དབང་གིས་ཁྱད་པར་བྱས་པ་ཡིན་ཅིང་། དབང་ཐམས་ཅད་ལས་ཏིང་ངེ་འཛིན་གྱི་དབང་ཟབ། དེ་ལས་བླ་མལ་དབང་བླང་པ་ཟབ་ཅིང་། བླ་མ་སྙིང་དབུས་སུ་བསྒོམས་པས་སྙིང་རླུང་ལ་སོགས་པའི་སྨྱོ་འབོགས་དང་། འབྱུང་བ་འཁྲུགས་པའི་ནད་ཐམས་ཅད་དང་། གདོན་གྱི་བར་ཆད་ཐམས་ཅད་མི་འབྱུང་ཞིང་། ཏིང་ངེ་འཛིན་གྱི་ཡོན་ཏན་རིན་པོ་ཆེ་མ་ལུས་པ་འབྱུང་བར་གསུངས་པ་ལ་རང་གིས་མྱོང་བའི་ངེས་ཤེས་ཡོད་པས། བཀའ་རྒྱ་ཡོད་ཀྱང་གཞན་ལན་གྱི་བློ་ཁོ་ནས་བྲིས་པ་རྩ་གསུམ་ཚོགས་ལ་བཟོད་པར་གསོལ། གང་གིས་རྡོ་རྗེ་སློབ་དཔོན་ཉིད། །བཀུར་ཞིང་སྤྱི་བོར་སུས་སྒོམ་པ། །དེ་ལ་རྒྱལ་བས་བྱིན་གྱིས་རློབས། །རྒྱལ་བའི་དགོངས་པ་དེ་ཡིས་འཛིན། །ཅེས་པ་དང་། བླ་མ་དམ་པ་ཧེ་རུ་ཀ་ཡི་གཙུག་རྒྱན་ཉིད། །མོས་ཤིང་གུས་པ་ཡོན་ཏན་ཀུན་གྱི་གཞི། །ཞེས་སོགས་རྒྱུད་སྡེའི་ལུང་དཔག་ཏུ་མེད་དོ། །གསུམ་པ་བར་ཆད་བསྲུང་བའི་དོན་དུ་རང་ཡི་དམ་ཧེ་རུ་ཀ་ཡེ་ཤེས་ཀྱི་ཁྲོ་བོ་གང་རུང་བསྒོམ་པའི་ཐུགས་ཀར་ཧཱུྃ་མཐིང་ནག་གཅིག་བསམས་ལ། ཧཱུྃ་དེ་འདྲ་བ་གྲངས་མེད་པ་བྱུང་། སྣ་བུག་གཡས་ནས་ཕྱིར་ཐོན་ལོ་ཀའི་ཁམས་ཐམས་ཅད་ཧཱུྃ་སྒྲ་དང་བཅས་པས་གང་། སྣ་བུག་གཡོན་ནས་ཚུར་བྱུང་། ལུས་ཀྱི་ནང་ཐམས་ཅད་ཧཱུྃ་སྒྲ་དང་བཅས་པས་གང་བར་བསམ་ཞིང་། ངག་ཏུ་ཧཱུྃ་རིང་བགང་ངོ་། །དབུགས་ཕྱིར་འགྲོ་ཚུར་འོང་གང་ལ་ཡང་ཕྱི་ནང་གི་ཧཱུྃ་གིས་མགྲིན་པའི་བར་དུ་གང་བར་བསམ་པའོ། །བར་ཆད་བསལ་ཕྱིར་ཧཱུྃ་རིང་བགྲང་། །ཧཱུྃ་གི་སྦྱོར་བས་ཕྱོགས་མཚམས་བསྲུང་། །ཞེས་གསུངས་སོ། །སྔོན་འགྲོ་འདི་རྣམས་དང་པོ་རེ་རེ་

༣༢༤ནས་རྟགས་ཐོན་པར་བྱ་ཞིང་། ཕྱིས་ཀྱང་ཐུན་མགོ་ཐམས་ཅད་ལ་བྱའོ། །ཐུན་རིང་ཐུང་གང་ལ་ཡང་སྔ་མ་བསྐྱུར་ནས་ཕྱི་མ་ལ་འཇུག་པ་མ་ཡིན། སྐྱབས་འགྲོ་སེམས་བསྐྱེད་ནས་བཟུང་སྟེ་སྔ་མ་ལ་ཕྱི་མ་ཕྱི་མ་སྣོན་པའི་ཚུལ་དུ་བྱ་ཞིང་། ཐམས་ཅད་ཀྱི་ཐུན་རྟིང་དམིགས་མེད་དུ་བཞག་ལ་དགེ་བ་བསྔོ། གཉིས་པ་དངོས་གཞི་ལ་གཉིས་ཏེ། སྣོད་བཅུད་ཀྱི་མཚན་ཉིད་དང་། ཏིང་ངེ་འཛིན་གྱི་རིམ་པའོ། །དང་པོ་ནི། རྩ་ཚིག་ལས། ངེས་པའི་ལུང་ལྡན་སློབ་དཔོན་གྱིས། །རྣལ་འབྱོར་པ་ཡི་དོན་ཆེད་དུ། །བྱང་ཆུབ་སེམས་ཀྱི་པྲ་ཁྲིད་ཀྱི། །སྒོམ་པའི་རིམ་པ་བསྟན་པའོ། །ཞེས་པས། བླ་མ་དང་སློབ་མ་གདམས་ངག་གི་མཚན་ཉིད་གསུམ་སྟོན་ཏེ། བླ་མ་ནི་ངེས་དོན་སྟོན་པའི་རྒྱུད་ལུང་མན་ངག་མཁྱེན་པ། ཀུན་ཏུ་བཟང་པོ་ནས་རིམ་པར་དབང་བཞིའི་ཆུ་བོ་མ་ནུབ་པ། བྱིན་རླབས་ཉམས་རྟོགས་ཀྱི་ཟམ་མ་ཆད་པ། སྙན་བརྒྱུད་གདམས་ངག་གི་གནད་མ་འཆུག་པ། རང་འདོད་མེད་པ་གཞན་རྗེས་སུ་བཟུང་ནུས་པའི་བླ་མ། སློབ་མའི་མཚན་ཉིད་འཁོར་བ་ལ་ངེས་འབྱུང་གི་བློ་སྐྱེས་པ། སྙན་གྲགས་ལ་སོགས་པ་ཚེ་འདིའི་བྱ་བ་རྒྱབ་ཏུ་དོར་བ། དཀོན་མཆོག་གསུམ་ལ་མི་ཕྱེད་པའི་དད་པ་དང་ལྡན་ཞིང་། ལས་རྒྱུ་འབྲས་ཁྱད་དུ་མི་གསོད་པ། དབང་ཐོབ་ཅིང་དམ་ཚིག་དང་ལྡན་པ། བླ་མ་ལ་སངས་རྒྱས་སུ་བལྟ་ཞིང་ལུས་ལོངས་སྤྱོད་གཏོང་ནུས་པ། གདམས་ངག་ལ་གཅེས་སྤྲས་སུ་བྱེད་ཅིང་ཕྱི་བཤོལ་མེད་པར་སྒྲུབ་པ། རྣལ་མ་དོན་དམ་པའི་ཆོས་ཉིད་ལ་བློ་འབྱོར་ནུས་པའི་ཤེས་རབ་དང་ལྡན་པའོ། །གདམས་ངག་གི་མཚན་ཉིད་ནི། ལས་ཐབས་སྣ་ཚོགས་པས་ཚེ་འདི་སྒྲུབ་པའི་ཐབས་དང་། རང་ཉིད་ཞི་བདེ་སྒྲུབ་པ་ཐེག་དམན་གྱི་ལམ་དང་། བསྐལ་པ་གྲངས་མེད་དུ་ས་ལམ་བགྲོད་པ་མཚན་ཉིད་ཀྱི་ལུགས་དང་། མཚན་བཅས་རྩོལ་སྒྲུབ་ལ་ལྟོས་པ་གསང་སྔགས་འོག་མའི་ཐབས་ཐམས་ཅད་ལས་ཁྱད་པར་འཕགས་པ། འཁོར་

༣༢༥འདས་ངོ་བོ་གཅིག་པའི་དོན་བྱང་ཆུབ་ཀྱི་སེམས། ཆོས་སྐུ་མངོན་སུམ་དུ་རྟོགས་ཤིང་མངོན་དུ་བྱེད་པ་ལ་བརྡ་ཐབས་ལག་ལེན་གྱི་རིམ་པས་སྲ་ཐབས་སུ་ཁྲིད་པར་བྱེད་པ་འདི་བསྟན་པའོ། །གཉིས་པ་ཏིང་ངེ་འཛིན་གྱི་རིམ་པ་ནི། རྩ་ཚིག་ལས། དང་པོར་གནས་པའི་ཏིང་ངེ་འཛིན། །གཉིས་པ་ལ་ནི་མི་གཡོ་བ། །གསུམ་པ་མཉམ་པ་ཉིད་དུ་འགྱུར། །བཞི་པ་ཡེ་ཤེས་ལྷུན་གྱིས་གྲུབ། །ཅེས་པས། དཔེར་ན། སྐྱེས་བུ་རིམ་གྱིས་སྐྱེད་རྫོགས་པ་ལ། བྱིས་པ་དང་། གཞོན་ནུ་དང་། བར་པ་དང་། སྟོབས་རྫོགས་ནས་ཚེ་དང་ལུས་སྟོབས་མཐར་ཕྱིན་པ་བཞི་ཡོད་ཅིང་། ལོ་ཐོག་རིམ་གྱིས་སྐྱེས་པ་ལ་ཡང་ལྗང་བུ་དང་། སྙེ་མ་དང་། འབྲས་བུ་སྨིན་པ་དང་། རྔ་བཙས་ཟིན་ནས་མཐར་ཕྱིན་པ་བཞི་ཡོད་པ་ལྟར། གང་ཟག་བློའི་རིམ་གྱིས་ས་ལམ་བགྲོད་པ་ལ་ཡང་། དང་པོ་སེམས་ལས་སུ་རུང་བར་བྱེད་པ་ཞི་གནས་ཉམས་ཀྱི་དུས་དང་། གཉིས་པ་ལྷག་མཐོང་རྟོག་པ་མི་གཡོ་བའི་དུས་དང་། གསུམ་པ་ཞི་གནས་ཉམས་རྟོགས་གཅིག་ཏུ་འདྲེས་པ་མཉམ་པ་ཉིད་ཀྱི་དུས་དང་། བཞི་པ་ཡེ་ཤེས་ལྷུན་གྲུབ་ལམ་མཐར་ཕྱིན་པའི་དུས་ཀྱི་རྣལ་འབྱོར་དང་བཞིའོ། །དེ་ལ་དང་པོ་སེམས་ཞི་གནས་ཀྱི་སེམས་ལས་སུ་རུང་བར་བྱེད་པ་ལ་བཞི་སྟེ། ཏིང་ངེ་འཛིན་ལ་མཉམ་པར་གཞག་པའི་ཐབས། དེ་ལས་སྐྱེས་པའི་ཏིང་ངེ་འཛིན་གྱི་དཔེ། དེའི་དྲོད་རྟགས། འབྲས་བུ། ཅི་ལྟར་ཐོབ་ཚུལ་བསྟན་པའོ། །དང་པོ་བཞག་ཐབས་ནི། འཁོར་བའི་འདུ་འཛི་སྤངས་ནས་སུ། །དགོན་པར་མཉམ་པར་གཞག་པའི་ཚེ། །རྐྱེན་གྱི་ཚོགས་རྣམས་མ་བྱུང་བར། །ཇི་སྲིད་གནས་ལ་གནས་ཞེས་བྱ། །ཞེས་པས། དང་པོར་འཇུག་པའི་འགལ་རྐྱེན་སྤང་ཞིང་མཐུན་རྐྱེན་བསྟན་པ། །མཉམ་པར་གཞག་ཐབས་དངོས། བར་དུ་ཏིང་ངེ་འཛིན་གྱི་སྐྱོན་ངོས་བཟུང་ཞིང་སྤང་བ། ཏིང་ངེ་

༣༢༦འཛིན་གྱི་ངོ་བོ་བཞིས་སྟོན་ཏེ། སྤང་བྱ་ནི། ཚེ་འདིར་རང་ཉིད་གཉེན་འདུན་དང་བཅས་པ་བདེ་སྐྱིད་དཔལ་འབྱོར་འདོད་ཅིང་། དགྲའི་ཕྱོགས་འདུལ་བའི་དོན་དུ་མི་དགེ་བ་བཅུ་ལ་སོགས་སྡིག་པ་དང་། ཚོང་ཁེ་སྤོགས་སོ་ནམ་རྩོལ་སྒྲུབ་ཤེས་ཡོན་གྲོར་ཆོག་བཟོ་རྩིས་སྨན་བོན་ལ་སོགས་པའི་ལྟོ་གོས་དང་རྙེད་བཀུར་སྙན་གྲགས་སྒྲུབ་པ་ཐམས་ཅད་འདུ་འཛི་རྣམ་གཡེང་འཁོར་བའི་བྱ་བ་ཡིན་པས་རིང་དུ་སྤངས་ལ། བསྟེན་བྱ་ནི། གྲོང་ཡུལ་ལས་རིང་དུ་དཔག་པ་དགོན་པའི་གནས་མི་དང་མི་མ་ཡིན་པ། གཅན་གཟན་ལ་སོགས་པའི་འཇིགས་པ་མེད་པ་ཆུ་ཤིང་ལ་སོགས་མཐུན་རྐྱེན་བསྒྲུབ་སླ་བ། ཉམས་དགའ་ཞིང་དགེ་སྦྱོར་འཕེལ་བའི་གནས་སུ་མཚན་ཉིད་དང་ལྡན་པའི་བླ་མ་དང་། ཆོས་མཐུན་གྱི་གྲོགས་བཟང་པོ་བསྟེན་པར་བྱའོ། །གཉིས་པ་མཉམ་པར་གཞག་པའི་ཐབས་ནི། གསང་སྒྲོན་ལས། མ་ལུས་སེམས་ཅན་ཐམས་ཅད་ལ། །བྱང་ཆུབ་སྙིང་པོའ་རང་བཞིན་གནས། །དེ་དོན་རྟོགས་པར་བྱ་བའི་ཕྱིར། །མ་ཟིན་ཟིན་ཕྱིར་གནད་བཞི་བསྒོམ། །ཅེས་པས་བཅའ་བ་ལུས་ཀྱི་གནད་བསམ་གཏན་ཆོས་བདུན་བྱས་ཏེ། རྐང་པ་སྐྱིལ་ཀྲུང་བཅའོ། །སྒལ་པ་དྲང་པོར་བསྲང་། ལག་པ་མཉམ་གཞག་བྱས་ནས་དཔུང་པ་བརྒྱད། མགྲིན་པ་དགུག །ལྕེ་ཡ་རྐན་ལ་སྦྱར། སོ་ཡར་མར་མ་རིག་ཙམ་བྱ། མཆུའི་བར་རླུང་འགྲིམ་པ་ཙམ་དུ་སྦྱར། ལྟོ་བ་གསུས་པོ་ཆེ་ཕྱིར་བརྒྱང་། མིག་སྣ་རྩེར་སྨིན་མཚམས་ནས་ཕར་ཐད་ཀྱི་ལག་པའི་སླེབ་སོ་ཙམ་དུ་མ་འགུལ་བར་གཏད་དེ། དམིགས་པ་ཡུལ་གྱི་གནད་ནི། དམིགས་པ་གཏད་ས་དེ་ཨ་དཀར་པོ་གསལ་ཞིང་འཚེར་བ་གཅིག་ལ་སྐད་ཅིག་ཀྱང་མ་ཡེངས་པར་གཏད་དོ། །རྒྱ་བ་རླུང་གི་གནད་ནི། ཐུན་མགོ་ལ་རླུང་རོ་དྲག་པོ་ལན་དགུའམ་གསུམ་ལ་སོགས་པར་འབུད་ནས་དབུགས་རང་སར་ཀློད་ལ་བཞག །འཛིན་

༣༢༧པ་སེམས་ཀྱི་གནད་ལ་དམིགས་བཅས་དང་དམིགས་མེད་གཉིས་ཀྱི་དང་པོ་ནི། ཨ་དེ་ལ་སེམས་ཟིན་ནས་གཞན་དུ་མི་འཕྲོ་བ་དང་། རྟོག་མེད་དུ་ལྷན་ནེ་གནས་པ་མ་བྱུང་གི་བར་དུ་ཞག་གཅིག་ཐུན་དྲུག་ལ་སོགས་པར་བྱས་ནས་སྐབས་སུ་ཁམས་བསང་བྱ་ཞིང་བསྒོམ་མོ། །གསང་སྒྲོན་ལས། དང་པོ་དབེན་པར་ལུས་བསྡད་ནས། །བྱ་རྒོད་མཁའ་ལ་འཕུར་བ་བཞིན། །དམིགས་གཏད་བྱས་པའི་རིག་པ་གཏད། །རླུང་སེམས་གཅིག་ཏུ་བྱས་པ་དེས། །རྩོལ་བ་དྲག་ལ་ཐུན་དུ་བྱ། །དམིགས་པ་དག་ལ་བརྟེན་ནས་སུ། །མི་དམིགས་པ་དག་རབ་ཏུ་སྐྱེ། །ཞེས་སོ། །གཉིས་པ་དམིགས་མེད་ལ་སེམས་གཏད་ཐབས་ལ། གསུམ་གྱི་དང་པོ་ལུས་ངག་གི་གནད་སྔར་ལྟར་བྱས་ལ། ཡིད་ཀྱི་འདས་མ་འོངས་ད་ལྟར་གྱིས་བསམ་པ་ཅི་ཡང་མི་བྱེད་དེ། སྔར་གྱི་དམིགས་པ་གཏད་ས་ཨའི་མལ་དེར། ཡིད་མིག་རླུང་གསུམ་རྩེ་གཅིག་ཏུ་བསྒྲིམས་ལ་གཏད་ཅིང་ལོགས་སུ་སྐད་ཅིག་ཀྱང་ཡེངས་ལ་མ་ཤོར་བར་བྱས་ལ་རྟོག་པ་ཅི་བྱུང་ཏོལ་སྐྱེས་རྦད་ཆོད་དུ་བཏང་ངོ་། །གསང་སྒྲོན་ལས། སྔ་ཕྱི་རྗེས་འབྲང་འཁྲུལ་པའི་ལམ། །ད་ལྟའི་ཤེས་པ་མ་བཅོས་པ། །མདའ་མཁན་སྨྱུག་མ་སྲོང་བ་བཞིན། །དམིགས་པའི་རྩོལ་བ་དྲག་ཏུ་བསྒྲིམ། །ཅེས་སོ། །གཉིས་པ་རྟོག་པ་ངོས་ཟིན་ནས་བཅང་མི་ཐུབ་པ་ཞིག་འབྱུང་བའི་སྐབས་སུ་ལུས་སེམས་གཉིས་ཀ་ཁོང་ཀློད་ལ། སྒོམ་མི་སྐྱེ་དོགས་པའི་བློ་མི་བྱེད་ནས། རྣམ་རྟོགས་བཟང་ངན་ཅི་བྱུང་ཡང་། སྔོན་བསུ་རྒྱབ་སྐྱེལ་མི་བྱེད་ནས། རང་མལ་དུ་ཀློད་ལ་ཀློད་ཐོག་དེར་བཞག་ཅི་ཉན་བྱའོ། །འཇམ་དཔལ་བཤེས་གཉེན་གྱིས། དེ་ལ་བཞག་ཐབས་བསྟན་པ་ནི། །ལུས་ངག་ཡིད་གསུམ་མི་བསྡོམ་པར། །སོས་དལ་ཁོང་ཀློད་བཞག་པ་ཡིན། །ཅེས་སོ། །གསུམ་པ་འགྱུ་བ་གནས་པ་གཉིས་སོ་སོར་ཤེས་ནས། ལུས་སེམས་གཉིས་ཀ་ཧ་ཅང་མི་བསྒྲིམས་མི་ཀློད། ངན་

༣༢༨མོར་བདེ་ཚོད་ཙམ་དུ་བྱས་ལ། རྣམ་རྟོག་བདེ་མི་བདེ་ཅི་བྱུང་ཡང་བཅས་བཅོས་མི་བྱེད་པར་ཁོ་རང་གང་བྱུང་དེ་ཉིད་ཀྱི་སྟེང་དུ་ཙན་ནེ་བཞག་ཅིང་འཚོ་ཤེས་པ་ལོགས་སུ་ཡན་མི་གཞུག་པ་གལ་ཆེའོ། །གསང་སྒྲོན་ལས། ཤེས་པ་སོ་མ་གཅིག་ཏུ་སྡོད། །དེ་བཞིན་གཤེགས་པའི་དགོངས་པ་ཡིན། །ཅེས་སོ། །གསུམ་པ་སྐྱོན་ངོས་བཟུང་ནས་བསལ་བ་ལ། དམ་པ་རིན་པོ་ཆེས་གོལ་སྒྲིབ་སུམ་བཅུར་གསུང་པའི་ནང་ནས། ཏིང་ངེ་འཛིན་དང་པོར་མི་སྐྱེ་ཞིང་བར་དུ་མི་འཕེལ་བའི་སྐྱོན་དྲུག་དང་། བར་ཆད་བཅུ་དྲུག་གསུངས་ཏེ། དེ་ལ་སྐྱོན་ནི་རྣམ་པ་དྲུག །གློ་བུར་འདོད་ཆགས་ལྡང་བ་དང་། །ཞེ་སྡང་ཆེན་པོ་འབྱུང་བ་དང་། །ང་རྒྱལ་ཕྲག་དོགས་སེམས་འཁྲུགས་དང་། །ལྟ་བ་ཁེངས་དང་དེ་དྲུག་གོ །ལེ་ལོ་བྱ་བ་མང་བ་དང་། །སེམས་གཡེང་སེམས་རྒོད་དེ་དང་ནི། །སེམས་སྡུག་པ་དང་སེམས་རྗེས་འབྲང་། །སེམས་རྨུགས་པ་དང་རྟོག་པ་མང་། །རེ་བ་མང་དང་དོགས་པ་མང་། །འདོད་ཆགས་ཆེ་དང་བརྩོན་འགྲུས་ཆུང་། །གཉིད་དགའ་ཁ་ཏོན་ཀློག་འདྲི་དང་། །བྲེ་མོའ་གཏམ་དང་ཅལ་ཅོལ་སྨྲ། །བར་དུ་གཅོད་པ་བཅུ་དྲུག་ཏེ། །མཁས་པས་འདི་དག་སྤང་བར་བྱ། །ཞེས་གསུངས་པས། སྐྱོན་དེ་དག་ངོས་ཟིན་ནས་དྲན་ཤེས་བག་ཡོད་དང་ལྡན་པས་སྤང་བར་བྱའོ། །དེ་ཡང་ཏིང་ངེ་འཛིན་སྐྱོན་ཐམས་ཅད་བྱིང་། རྨུགས། །རྒོད། འཐོར་བཞིར་འདུས་ཏེ། བྱིང་བ་ནི་ཤེས་པ་ཧོན་ནས་ཅི་བྱས་མ་ཚོར་བའོ། །རྨུགས་པ་ནི་ཤེས་པ་མི་གསལ་བར་ནག་ཐིབས་སེ་བའོ། །རྒོད་པ་ནི་སེམས་ཅུང་རེ་གནས་ཀྱང་བསམ་བློ་ཙབ་ཙུབ་ཅུང་རེ་དྲན་པའོ། །འཐོར་བ་ནི་སྒོམ་བརྗེད་ནས་རྣམ་རྟོག་ཁ་འབྱམས་པའོ། །དེ་བསལ་བ་ལ་གཉིས་ཏེ། སྒོམ་པའི་ཤུགས་ལས་བྱུང་བ་དང་། རྐྱེན་གྱིས་བྱུང་བ་བསལ་བའོ། །དང་པོ་ནི། སྒོམ་དུས་བྱིང་ཤིང་རྨུགས་ན། མཐོ་ལ་བསིལ་བའི་སར་སྟན་སྲབ་མོ་ལ་བསྡད་ནས་ལུས་སེམས་ཧུར་བཏོག་

༣༢༩ལ་ཤེས་པ་སེང་ངེ་ཡེ་རེ་ཧྲིག་གེ་ཅིག་བྱས་ལ་བསྒོམ། ཟས་བཅུད་ཅན་སྤང་ང་ོ། །རྒོད་ཅིང་འཐོར་ན་དྲོ་ཞིང་དམའ་བ་དང་ནག་པའི་སར་སྟན་འབོལ་བ་ལ་བསྡད། ལུས་སེམས་ཁོང་ཀློད་ལ་ལྟ་སྟངས་སྨད་ལ་བསྒོམ་མོ། །ཟས་བཅུད་ཅན་དང་ཆང་བཟང་པོ་ཡོད་ན་ཉུང་ཙམ་བཏང་ངོ་། །གཉིས་པ་རྐྱེན་གྱི་འབྱུང་བ་ནི། སྔར་གྱི་གེགས་སམ་འཕྲལ་ལ་ཆགས་སྡང་གི་ཡུལ་ངན་གྱིས་ལྷོངས་ནས་བྱིང་རྒོད་བྱུང་ན། གསལ་སྒྲོན་ལས། །ཆགས་སྡང་གཏི་མུག་དབང་གིས་ནི། །རྒོད་ཅིང་བྱིང་བར་གྱུར་པའི་ཚེ། །ཕྱི་ནང་གསང་བ་གསུམ་པོ་ལ། །སེམས་གཏོད་ནས་ནི་ཞི་བར་འགྱུར། །ཞེས་པས། ཕྱི་ནི་འཁོར་བའི་འཇིགས་པ་དང་། །མྱ་ངན་འདས་ཀྱི་ཡོན་ཏན་བསམ། །ནང་ནི་ཤེས་པ་རྩེ་གཅིག་བསྡམ། །གསང་བ་ལྟ་བ་དྲན་པར་བྱ། །ཞེས་འབྱུང་ངོ་། །སྐབས་སུ་བསྒོམ་འཚེར་ལུས་རྨྱ་ཞིང་རྩུབ་པ། གཉིད་མི་ཕེབས་པ་བྱུང་ན་བསྐུ་མཉེ་བྱ། ཟས་བཅུད་ཅན་བཏང་། སྤྱོད་ལམ་བག་ཡངས་བྱའོ། །འགྲོ་འདོད་པ་དང་སེམས་གཡེང་བ་དང་མགོ་བསྟོད་ན་བ་བྱུང་ན། ལྟ་སྟངས་སན་སྨད། འོག་རླུང་བསྡམ། རླུང་རོ་དྲག་ཏུ་འབུད་ནས་ལུས་ཀློད། ལུས་ལྗིང་ས་ལ་ཕབས་ནས་ཤེས་པ་ལྟེ་བར་གཏད་ཅིང་བསྒོམ་མོ། །ཉམས་སྒྲོན་ལས། སྐྱོན་དང་བཅོས་ཐབས་ལ་སོགས་ཀུན། །ཉམས་དང་ཁམས་ཀྱི་ཚོད་བཟུང་ནས། །སྐྱོན་བཅོས་སྒྲིམ་ཀློད་ཞལ་ལས་ཤེས། །ཞེས་པའི་དོན་ནོ། །བཞི་པ་ཏིང་ངེ་འཛིན་གྱི་ངོ་བོ་ལ་ལྔ་སྟེ། ཉམས་སྐྱེ་ཚུལ་གྱི་རིམ་པ། ཏིང་ངེ་འཛིན་རང་གི་ངོ་བོ། རྒྱུན་དུ་བཙའ་ཐབས། ཐུན་གྱི་ཚད། བོགས་འདོན་བ་སྟེ། དེ་དག་རེ་རེ་ལ་ཡང་གསུམ་གསུམ་མོ། །སྐྱེ་ཚུལ་ལ་གཡོ་ཐོབ་བརྟན་གསུམ་སྟེ། གཡོ་བའི་ཉམས་ནི། དང་པོ་བསྒོམས་པས་རྣམ་རྟོག་སྔར་བས་མང་རུ་སོང་། སྒོམ་མི་སྐྱེ་བར་འདུག་སྙམ་པ་འབྱུང་། དེ་ནི་རྣམ་རྟོག་ངོས་ཟིན་པ་ཡིན་པས།

༣༣༠གོང་དུ་བསྟན་པ་ལྟར་སྐྱོན་དབང་དུ་མ་སོང་བར་བྱས་ལ། རྣམ་རྟོག་ཁོ་རང་གི་སྟེང་དུ་ཀློད་ཅིང་བཞག་པས། སྐབས་སུ་ཡོད་པ་བསྙམ་པ་དང་། ཏུ་མ་མེ་རེ་བ་དང་། ལྷན་ནེ་གནས་པ་སྙམ་དང་། ཇ་སུན་འཐུང་བ་ཙམ་དུ་རྟོག་པ་འཕྲོ་བ་འབྱུང་ངོ་། །ཉམས་སྒྲོན་ལས། །དེ་ཡང་དང་པོར་ཆུ་དྲག་བཞིན། །རྣམ་རྟོག་མང་ཞིང་ཅུང་ཟད་གནས། །ཞེས་སོ། །གཉིས་པ་ཐོབ་པའི་ཉམས་ནི། ཐུན་གྱི་མགོ་རྒབ་བར་གསུམ་དུ་མ་ངེས་པར། །ཤེས་པ་སེང་ངེ་བའམ། །བདེ་ལྷན་ནེ་བ། རྟོག་པ་མེད་པར་མེར་རེ་བའམ། །ལྷེམ་མེ་བའམ། །བདེ་གསལ་མི་རྟོག་གསུམ་ཆར་དུ་སྐྱེ་བའོ། །ཉམས་སྒྲོན་ལས། །དེ་ནས་དལ་དྲག་ཆུ་བོ་བཞིན། །རེས་འགའ་རེས་རྟོག་ཐུན་ཕྱེད་གནས། །ཞེས་སོ། །གསུམ་པ་བསྟན་པའི་ཉམས་ནི། ཐུན་རེའམ་ཉི་དྲོས་པའི་བར་ཙམ་མམ། ཕྱེད་སྐབས་ཙམ་དུ་ཡང་བྱིང་རྨུགས་རྒོད་འཐོར་མེད་པར་བདེ་གསལ་མི་རྟོག་གསུམ་ཀ་འཆར་རམ། ཤས་གང་ཆེ་མ་ངེས་པ་ལ་གནས་བ་འབྱུང་སྟེ། ཉམས་སྒྲོན་ལས། དེ་ནས་དལ་འབབ་ཆུ་བོ་བཞིན། །ཤེས་པ་ངལ་ཞིང་ཐུན་དུ་གནས། །ཞེས་སོ། །གཉིས་པ་ཏིང་ངེ་འཛིན་གྱི་ངོ་བོ་ངོས་བཟུང་བ་ལ་གསུམ་སྟེ། རབ་ཀྱིས་མཉམ་གཞག་ཏུ་བདེ་གསལ་མི་རྟོག་པ་གསུམ་དུས་གཅིག་ཏུ་སྐྱེ་བ་དེ་ཡང་ཉམས་ཕྱི་ནང་འཆར་བ། སེམས་ནང་དུ་ཡོད་སྙམ་པ་ལྟ་བུ་མ་ཡིན་པར། རང་གི་སེམས་དེ་ཉིད་ངོ་བོ་ཉིད་ཀྱིས་བདེ་བ། རང་བཞིན་གསལ་པ་གཉིས་སུ་མེད་པར་ཐག་ཆོད་པའི་ངང་ལ། ཤེས་པ་རྩེ་གཅིག་ཏུ་གནས་པ་འབྱུང་བ་ནི། སྔར་ཐོས་བསམ་གྱི་བློ་དང་མི་འདྲ་བར། དོན་ཉམས་སུ་མྱོང་བའི་ངེས་ཤེས་ཀྱི་དགའ་སྤྲོ། དོན་གཉེར་མིས་དོན་གྲུབ་པ་ལྟ་བུ་འབྱུང་ངོ་། །སེམས་རང་བཞིན་འོད་གསལ་བའི་མཉམ་གཞག་ཚེ་ན་འབྱུང་བ་སྟེ། ཉམས་སྒྲོན་ལས། མཉམ་ཉིད་ཡུལ་བྲལ་ཏིང་

༣༣༡འཛིན་ལ། །མ་ཡེངས་ངང་གིས་གནས་པར་བྱ། །སྐྱེས་བུ་རབ་ཀྱི་སྤྱོད་ཡུལ་ཡིན། །ཞེས་གསུངས་སོ། །འབྲིང་གསལ་དྭངས་སུ་འཆར་ཞིང་། །དེ་ཉིད་རང་གི་སེམས་ཀྱི་རང་བཞིན་དུ་ཤེས་ཀྱང་རྣམ་རྟོག་དང་འོད་གསལ་སོ་སོར་འཛིན་པ་འབྱུང་ངོ་། །དམ་པས། འབྲིང་གིས་སེམས་ཉིད་འོད་གསལ་ལ། །ཡུལ་དང་ཤེས་པའི་ཚུལ་དུ་མཐོང་། །ཞེས་སོ། །ཐ་མ་ནི་ལུས་བདེ་སེམས་དགའ་བའི་ངང་ནས་ཤེས་པ་མི་འཕྲོ་བར་ལྷན་ནེ་གནས་པ་འབྱུང་སྟེ། དམ་པས། །ཐ་མ་རྟོག་པའི་བསླད་བྲལ་བར། །མི་གཡོ་ཙམ་དུ་གནས་པ་ཉིད། །ཅེས་སོ། །རྗེས་ཐོབ་ཏུ་ནི། རབ་དྲན་པ་ཟིན་དུས་སེམས་རང་སྣང་ཡིན་པ་དང་། མ་ཟིན་དུས་ཀྱང་ཐ་མལ་གྱི་དངོས་འཛིན་ཆུང་བ། །འབྲིང་དྲན་པ་ཟིན་དུས་སྒྱུ་མ་ལྟ་བུ་རང་བཞིན་མེད་པ་ཡིན་སྙམ་པ་དང་། མ་ཟིན་དུས་ཐ་མལ་དུ་འགྲོ། ཐ་མ་དངོས་འཛིན་རང་ག་མའོ། །ཉམས་སྒྲོན་ལས། རྗེས་ཤེས་དྲན་པ་མ་ཟིན་ནས། །ཐ་མལ་འཆོལ་བ་བཏང་སྙོམས་གནས། །དྲན་ཟིན་ཐ་མལ་ཨ་འཐས་ལོག །གཟུང་འཛིན་ལོག་པར་འཕྲུལ་པ་ཤེས། །ཐུག་འཕྲད་ཤར་དང་རང་ལོག་འབྱུང་། །ཞེས་སོ། །གསུམ་པ་མཉམ་གཞག་གི་ཏིང་ངེ་འཛིན་དེ་རྒྱུན་དུ་རང་གི་རྒྱུད་ལ་བཙའ་ཐབས་གསུམ་ནི། །དཔེར་ན་ནོར་ཡོད་པའི་མིས་སྐྱོང་བྲན་དགོས་པ་དང་འདྲ་བས། །རབ་ཀྱིས་ཟ་ཉལ་འགྲོ་འདུག་སྤྱོད་ལམ་རྣམ་བཞི་ཐམས་ཅད་དུ་ལྟ་བས་སྣང་སྲིད་ཐམས་ཅད་སེམས་སུ་ཐག་བཅད་ཅིང་། །སྒོམ་པས་ཡུལ་སེམས་གཉིས་མེད་རིག་པ་རང་གསལ་གྱི་ནང་ལ་རྒྱུན་ཁྱེར་བྱའོ། །གསང་སྒྲོན་ལས། །སྤྱོད་ལམ་རྣམ་བཞི་ཅི་སྤྱོད་ཀྱང་། །སེམས་ཀྱི་རྩི་ཡིས་ཟིན་པས་ན། །འདི་ནི་བཞག་ཐབས་དམ་པ་སྟེ། །དགོངས་པ་སངས་རྒྱས་ཐུགས་དང་མཉམ། །ཅེས་སོ། །འབྲིང་གིས་མཉམ་གཞག་དུས་ཀྱི་འོད་གསལ་དེ། ད་ལྟའི་རང་གི་ཤེས་རིག་གི་

༣༣༢ངོ་བོ་གསལ་སྟོང་འདི་ཡིན་པ་ལ་འགྱུར་བ་མེད་པར་ངོས་བཟུང་ཞིང་། གང་ཤར་གྱི་སྟེང་དུ་མ་ཡེངས་པར་རིག་པ་ཅོག་བཞག་བྱའོ། །མ་ཡེངས་ལམ་དུ་ཁྱེར་དགོས་པས། ཉམས་སྒྲོན་ལས། དཔེར་ན་རྨུ་རྒོད་རྟ་འདུལ་ལྟར། །མ་ཡེངས་པར་ནི་བསྒོམ་པར་བྱ། །ཞེས་སོ། །ཐ་མལ་ལུས་ངག་ཡིད་གསུམ་གྱི་གཡེང་བ་ཐམས་ཅད་བཙན་ཐབས་སུ་བོར་ཞིང་། ཡུན་རིང་ཐུང་ཆེ་ཆུང་ཅི་ནུས་པས་ཁོང་སྙོམས་སུ་མཉམ་པར་གཞག་པ་ལ་བརྩོན་པར་བྱའོ། །དམ་པས། ཕྱི་ནང་གཡེང་བས་མ་གོས་པའི། །གནས་སུ་ཡང་ཡང་བསྒོམ་པར་བྱའོ། །ཞེས་སོ། །བཞི་པ་ཐུན་ཚད་ལ་གསུམ་སྟེ། ཁམས་བདེ་ཞིང་ཏིང་ངེ་འཛིན་གསལ་བའི་དུས་སུ་ཐུན་རིང་བར་བྱ། ཁམས་ཉོག་ཅིང་མི་གསལ་བའི་དུས་སུ་ཐུན་ཆུང་ལ་གྲངས་མང་བར་བྱའོ། །ཉིན་མཚན་གྱི་གུང་གཉིས་དང་མཚམས་གཉིས་བྱིང་རྒོད་ཀྱི་དུས་ཡིན་པས་སྲོད་ཐོ་རངས་སྔ་དྲོ་ཕྱི་དྲོ་བཞི་ལ་བརྩོན་ནས་བསྒོམ་གོམས་ནས་སྤྱོད་ལམ་ལ་ཁྱེར་ནུས་པ་དང་། ཐུན་ལ་བཅད་དུ་མེད་པར་རྒྱུན་དུ་ཏིང་ངེ་འཛིན་དང་མི་འབྲལ་བར་བྱའོ། །ཉམས་སྒྲོན་ལས། །ཐུན་ཚད་རབ་འབྲིང་གསུམ་དུ་བཅད། །ཁམས་བདེ་ཐུན་ནི་རིང་བར་བྱ། །མི་བདེ་ཐུན་བཞིར་བཅད་པར་བྱ། །ཐུན་ཆེན་གོམས་པའི་རྣལ་འབྱོར་བྱ། །ཞེས་སོ། །ལྔ་པ་བོགས་དབྱུང་བ་ལ་གསུམ་སྟེ། རབ་རྟོགས་པས་བོགས་དབྱུང་བ་ནི། སྣང་སེམས་ལ་བཟང་ངན་དང་བདེ་སྡུག་གི་འཆར་ཚུལ་ཅི་བྱུང་ཡང་། བློ་མ་བཅོས་པར་གང་ཤར་དེ་ཉིད་ཀྱི་ངོ་བོ་ལ་བལྟས་པས། མཚན་འཛིན་གྱི་རིག་པ་ཉིད་རང་བཞིན་སྐྱེ་མེད། རོལ་པ་འགག་མེད། མཚན་ཉིད་དབྱེར་མེད་དུ་གྲོལ་བས། སྣང་བ་དང་རང་རིག་དགེ་བའི་བཤེས་གཉེན་དུ་འགྱུར་རོ། །འབྲིང་གིས་སྤྱོད་ལམ་ལ་ལྟ་སྒོམ་གྱིས་རྒྱས་གདབ་ཅིང་། སྐབས་སུ་རྒྱུད་ལུང་ཟབ་མོའི་ལྟ་བ་དང་། བསྐྱེད་རིམ་དང་། ཐབས་ལམ་དང་། འཁྲུལ་འཁོར་ལ་སོགས་པས་

༣༣༣བོགས་འདོན་ཏེ། མདོ་རྒྱུད་དགེ་བའི་བཤེས་གཉེན་དུ་འགྱུར་རོ། །ཐ་མས་འཆི་བ་མི་རྟག་པ་བསམ་ཞིང་། བླ་མ་ལ་ཡང་ཡང་ཞུ་གཏུགས། །གྲོགས་པོ་ལ་གསལ་འདེབས་ཞུ་བ་དང་། ཏིང་ངེ་འཛིན་ལ་བརྩོན་འགྲུས་ཀྱིས་བོགས་འདོན་ཏེ། བླ་མ་དགེ་བའི་བཤེས་གཉེན་བསྟེན་པར་བྱའོ། །སྤྱིར་རབ་འབྲིང་ཐ་མ་གསུམ་ཀ་ལ་ཡང་། བླ་མ་ལ་སངས་རྒྱས་དངོས་ཀྱི་འདུ་ཤེས་བསྐྱེད་ལ་རྒྱུན་དུ་གསོལ་བ་གདབ་པ་དང་། སེམས་ཅན་ཐམས་ཅད་ལ་ཉེ་རིང་མེད་པར་ཕ་མའི་འདུ་ཤེས་ཀྱིས་བྱམས་སྙིང་རྗེ་བསྒོམ་པ་དང་། ཉམས་སུ་བླངས་པའི་བརྩོན་འགྲུས་ཡེངས་པ་མེད་པ་དང་། ཚེ་འདིའི་བདེ་སྐྱིད་སྙན་གྲགས་ཟས་ནོར་ཉེ་དུའི་ཞེན་པ་ཐམས་ཅད་བཙན་ཐབས་སུ་བཅད་ན་མྱུར་ཏུ་ཡོན་ཏན་ཆེན་པོ་འོང་ངེས་སོ། །ཉམས་སྒྲོན་ལས། ལུང་ཟབ་བླ་མ་ཉམས་ཅན་སྤུན། །བལྟ་དང་ལྟ་འབུལ་ཉམས་བསྡུར་དང་། །མི་རྟག་འཆི་བསམ་བརྩོན་འགྲུས་བསྐྱེད། །གནས་ལུགས་དྲན་པའི་རྩིས་ཟིན་པས། །གསང་སྤྱོད་ཐབས་ལ་བསྟེན་པ་དང་། །རླུང་ངང་བདེ་བའི་མན་ངག་དང་། །དམིགས་མེད་སྙིང་རྗེ་བསྒོམ་པ་དང་། །གདམས་པའི་གནད་དང་ཤེས་རབ་ཀྱིས། །རིག་པ་རྩལ་སྦྱང་ཉམས་སོགས་འདོན། །ཅེས་གསུངས་སོ། །གཉིས་པ་ཏིང་ངེ་འཛིན་སྐྱེས་པའི་དཔེ་ནི། དཔེར་ན་སྐྱེས་བུ་འཇིགས་བཅས་ཞིག །ལམ་ལ་བགྲོད་པར་གྱུར་པའི་ཚེ། །རང་ཡུལ་སྣང་བ་མཐོང་སླེབས་དང་། །འཇིགས་པའི་རྟོགས་པ་མེད་དང་མཚུངས། །ཞེས་པས་ལྟ་སྒོམ་མཐར་ཕྱིན་ནས་རེ་དོགས་མེད་པའི་དཔེ་ནི་འདིར་མ་ཡིན་ལ། ཉམས་རྟོགས་སྐྱེས་པའི་གནས་སྐབས་སུ་དབུགས་དབྱུང་པའི་དཔེ་སྟེ། རབ་སྣང་སེམས་དབྱེར་མེད་ཆོས་སྐུར་རྟོགས་པས་ཐེག་པ་འོག་མའི་རྒྱུན་རྩོལ་བ་ལ་ལྟོས་པའི་འཇིགས་པ་མེད། འབྲིང་རིག་པ་རང་གསལ་དུ་གནས་པའི་བྱིང་རྨུགས་རྒོད་འཐོར་གྱི་འཇིགས་པ་

༣༣༤མེད། ཐ་མ་ལུས་སེམས་དགའ་བདེའི་ངང་ལ་རྩེ་གཅིག་ཏུ་ལྷག་པར་གནས་བས་དབུགས་ཕྱིན་པའོ། །གསུམ་པ་ཏིང་ངེ་འཛིན་སྐྱེས་པའི་རྟགས་བསྟན་པ་ནི། རྩ་ཚིག་ལས། འཁོར་བའི་ཆོས་ལ་སྐྱོ་བ་དང་། །སེམས་ཅན་རྣམས་ལ་སྙིང་རྗེ་སྐྱེ། །རང་གི་གནས་ལ་མི་ཆགས་ཤིང་། །ཐག་རིང་གཞན་དུ་འགྲོ་བར་འདོད། །ཅེས་པས། དྲོད་རྟགས་ཕྱི་ནང་གསང་གསུམ་སྟེ། །གསང་བའི་རྟགས་ནི། ཉམས་སྒྲོན་ལས། རླུང་གི་མཚན་མ་ལྔ་མཐོང་ནས། །ཤུགས་སྣང་བརྒྱད་སོགས་ཉམས་སྣང་དག །གཡོ་ཐོབ་ཙམ་དུ་འབྱུང་བ་སྲིད། །ཅེས་པ་ནི། སེམས་དང་རླུང་གཉིས་མེད་བརྟན་པ་ཡིན་པས་སེམས་གནས་པའི་ཚེ་རླུང་ཟིན་ཅིང་། རླུང་ལ་ས་ཆུ་མེ་རླུང་ནམ་མཁའི་རླུང་ལྔ་སྟེ། དེ་རྩ་རོ་རྐྱང་གཉིས་ལ། ལྔ་གཉིས་བཅུ་ནང་དུ་རྒྱུ་བ་དེ་ནང་དུ་ཟིན་པའི་རྟགས་སུ་རྣལ་འབྱོར་པའི་མཐོང་སྣང་དུ། དུ་བ་ལྟ་བུ་ཁ་དོག་མ་ངེས་པ་དང་། སྨིག་སྒྱུ་ལྟ་བུ་ཆུའི་རིགས་དང་། སྲིན་བུ་མེ་ཁྱེར་དང་། མེ་སྟག་ལྟ་བུ་མེའི་རིགས་དང་། མར་མེ་འབར་བ་ལྟ་བུ་གཅིག་ནས་མང་པོའི་བར་དང་། སྤྲིན་མེད་པའི་ནམ་མཁའ་ལྟ་བུ་རྒྱ་ཆེ་ཆུང་མ་ངེས་པ་དང་། དཀར་པོ་དམར་པོ་སེར་པོ་ལམ་ལམ་པ་དང་། སྣང་བ་མེད་པའི་མུན་ནག་ལྟ་བུ་དང་། ཉི་མ་དང་ཟླ་བའི་འོད་ཅན་དང་། འོད་མེད་དང་། ཕྱེད་པོ་དང་། བར་སྣང་སྦྲང་འདབ་ལྟ་བུ་སྐྱ་ཙིག་ཙིག་པས་གང་བ་དང་། འོད་ཀྱི་ཐིག་ལེ་ཁ་དོག་ལྔ་གང་རུང་ལ། འོད་ཟེར་གྱི་ཐག་པ་བརྐྱང་བ་ལྟ་བུ་དང་། འོད་སྣ་ལྔ་ཅི་རིག་པ་མཐོང་སྟེ། ཉམས་སྒྲོན་ལས། རླུང་གི་མཚན་མ་རྣམ་ལྔ་ཡང་། །དུ་བ་ལྟ་བུའི་ལོང་ལོང་ལ། །སྨིག་སྒྱུ་ལྟ་བུའི་གྱ་གྱུ་དང་། །སྲིན་མེ་ལྟ་བུའི་དམར་འགྲོ་དང་། །མར་མེ་ལྟ་བུའི་དམར་ཀན་དང་། །མཁའ་ལ་ཉི་ཤར་ལྟ་བུར་སྣང་། །ཤུགས་སྣང་བརྒྱད་པོ་སྣང་བ་ཡང་། །གྲུར་ཞུགས་འགྲོ་བ་སྙམ་བྱེད་དང་། །སྣང་བ་མུན་པར་འགྱུར་བ་དང་། ནམ་མཁའ་

༣༣༥རྡུལ་གྱིས་གང་བ་དང་། །མཁའ་ལ་འོད་དུ་འབར་བ་དང་། །ལུས་དང་འབྱུང་བ་སྣང་མེད་པར། །སེམས་ཉིད་གསལ་སྟོང་དྭངས་པ་དང་། །མེ་ལོང་སྐར་མས་བརྒྱན་པ་མཐོང་། །ཞེས་སོ། །གཞན་ཡང་སེམས་ནི་འཁོར་འདས་ཐམས་ཅད་ཀྱི་ཀུན་གཞི་ཡིན་པས། ཐོག་མེད་དུས་ཀྱི་ཤེས་བྱའི་བག་ཆགས་ཐམས་ཅད་ཀུན་གཞི་ལ་ཡོད་པ་དང་། ཀུན་གཞི་དེས་བསྐྱེད་པའི་ལུས་འདི་ལ་སྣང་སྲིད་འཁོར་འདས་ཀྱི་ས་བོན་ཐམས་ཅད་རྩ་མདུད་ལ་ཡི་གེའི་ཚུལ་དུ་དོད་པའི་ནང་དུ་རླུང་སེམས་ཚུད་པའི་རྟེན་འབྲེལ་གྱིས། ཕྱི་སྣོད་ནང་བཅུད་སྐྱེ་འགྲོ་རིགས་དྲུག །བེམ་པོ་དང་རིག་པ་ཅན་ལ་སོགས་པའི་གཟུགས་དབྱིབས་ཁ་དོག་སྣ་ཚོགས་པ་ཞེས་བྱ་ལ་ཅི་སྲིད་པ་གང་ཡང་སྣང་དུ་རུང་བ། །རྣལ་འབྱོར་པའི་བསྒོམ་པའི་ཉམས་སྣང་ཡིན་པས་བཟང་ངན་གྱི་རྣམ་པ་གང་ལ་ཡང་ཆགས་སྡང་མི་བྱ་བར་ཉམས་སྣང་དེ་ཉིད་ཀྱི་སྟེང་དུ་སེམས་གཏད་ཅིང་སྣང་སེམས་བསྲེ་བར་བྱའོ། །ཉམས་སྒྲོན་ལས། འགྲོ་དྲུག་རྒྱ་གནས་རླུང་ཚུག་དང་། །ཐོག་མེད་བག་ཆགས་སྣ་ཚོགས་དང་། །སེམས་ཉིད་ཅིར་ཡང་འཆར་བའི་ཕྱིར། །འགྲོ་དྲུག་སྣང་ཚུལ་སྣ་ཚོགས་དང་། །ལྷ་དང་ལྷ་མོ་ལ་སོགས་དང་། །སྐྱེད་མོས་ཚལ་དང་ཞིང་ཁམས་སོགས། །ངན་སོང་གསུམ་གནས་སྡུག་བསྔལ་དང་། །འདོད་ཁམས་ལྷ་མིའི་སྣང་ཚུལ་དང་། །གཟུགས་ཁམས་གཟུགས་མེད་བསམ་གཏན་དང་། །པདྨའི་ཚལ་དང་སངས་རྒྱས་ཞིང་། །ཉམས་ཀྱི་སྣང་བ་ཅིར་ཡང་འཆར། །དེ་ཀུན་སེམས་ཉིད་རང་སྣང་ལ། །མི་གཡོ་དེ་བཞིན་མ་བཅོས་བཞག །ཅེས་སོ། །ནང་གི་དྲོད་རྟགས་ནི། ཉམས་སྒྲོན་ལས། དྲོད་ནི་བཟོད་པ་ཕྲ་ཐོབ་དང་། །ལུས་ཡང་བདེ་བ་འབྱུང་བ་དང་། །དབུགས་ཀྱི་རྒྱུ་བ་མི་ཚོར་དང་། །སེམས་ཉིད་རྣལ་དུ་ཕེབས་པ་ཡི། །གསལ་ལ་ཡུལ་མེད་མི་རྟོག་གནས། །ཞེས་སོ། །ཕྱི་རྟགས་ནི། ནོར་

༣༣༦རྫས་གཉེན་འདུན་ལ་སོགས་པ། །ཚེ་འདིའི་བྱ་བ་ཐམས་ཅད་བློས་ཐོངས་ནས། །ཅི་ལ་ཡང་ཆགས་ཞེན་ཆུང་བ་སྟེ། རྩ་ཚིག་ལྟར་རོ། །གཞན་ཡང་། ཕྱི་རྟགས་ལུས་ནི་ཡོད་མི་ཚོར། །ནང་རྟགས་དབུགས་ནི་རྒྱུ་མི་ཚོར། །གསང་རྟགས་དངོས་པོའི་ཞེན་པ་ཆུང་། །ཉམས་ནི་མིང་དུ་མི་ཐོགས་ཤིང་། །ཤེས་པ་ཁོང་ནས་དགའ་བ་འབྱུང་། ལུས་ནི་འདར་ཞིང་སྤྲུགས་པ་དང་། །འཕག་དང་རྒྱུག་པའི་ལས་རྣམས་བྱེད། །ངག་ནི་རྒོད་ཅིང་ངུ་བ་དང་། །ཁ་ནས་སྒྲ་སྐད་སྣ་ཚོགས་འབྱུང་། །སེམས་ནི་འཛིན་མེད་བཏང་དཀའ་ལ། །ཕྱི་ནང་ཤེས་པ་མི་རྒྱུ་བ། །ཞེས་པས། རྣལ་འབྱོར་པ་བསྒོམ་པའི་དུས་སུ་ལུས་ལ་འཕྲ་འདར་མཆོང་རྒྱུག་ཚ་བྲད་ན་སྲི་ཤ་འགུལ་སྣ་ཚོགས་དང་། ངག་ཏུ་རྒོད་པ་དང་དུ་བ་དང་། གླུ་དབྱངས་ལ་སོགས་སྐད་སྣ་ཚོགས་དང་། སེམས་བདེ་སྡུག་གསལ་མི་གསལ་མེས་ཚིག་ཆུས་ཁྱེར་ཁྱི་དང་གཅན་སྦྲུལ་ལ་སོགས་གྱིས་གཙོས་པའི་སྣང་བ་ལ་སོགས་ཉམས་ལ་མི་འབྱུང་མེད་པ་མེད་ཅིང་། ལུས་ངག་ཡིད་གསུམ་ལ་ཅི་བྱུང་ཡང་ཉམས་ཡིན་པས་བཟང་བ་འདྲ་ལ་དགའ་བ་དང་། ངན་པ་འདྲ་ལ་མི་དགའ་བ་དང་ཐེ་ཚོམ་མི་བྱ་ལ། ཉམས་གང་བྱུང་དེ་ཉིད་ཀྱི་སྟེང་དུ་སེམས་བསྐྱེད་དོ། །རྨི་ལམ་གྱི་རྟགས་མང་དུ་གསུངས་མོད་ཀྱི། རྣལ་འབྱོར་པ་བདེན་འཛིན་འཕེལ་བའི་རྒྱུ་ཡིན་པས་ཉམས་སྣང་ཐམས་ཅད་ཀྱང་བདེན་མེད་སྒྱུ་མ་ལྟ་བུར་ཤེས་དགོས་ན། རྨི་ལམ་ལ་བདེན་མེད་དུ་ཤེས་པར་བྱའོ། །གསང་སྒྲོན་ལས། གང་ལ་ཞེན་པ་མེད་ཅིང་ཆགས་པ་ཆུང་། །མ་ནོར་དོན་ལ་ཀུན་གཞི་འགྱུར་མེད་གསལ། །རྟགས་ཆེན་དེ་ཡོད་གཞན་གྱི་ཁར་མ་ལུས། །ཞེས་གསུངས་པས། ཚེ་འདིའི་བྱ་བ་ལ་སོགས་སྣང་བ་མངོན་ཞེན་ཆོད་ན་རྟགས་གཞན་མ་བྱུང་ཡང་བཟོད་ལ་རྟགས་ཐམས་ཅད་འཛོམ་ཡང་མངོན་ཞེན་ཆེ་ན་དུ་བ་བྱུང་

༣༣༧རན་མེ་བསད་པ་དང་འདྲའོ། །བཞི་པ་འབྲས་བུ་བསྟན་པ་ནི། རྩ་ཚིག་ལས། རྣལ་འབྱོར་པ་དེ་འགོག་པའི་ཚེ། །ངེས་པར་མི་ལུས་ཐོབ་ནས་སུ། །ཆོས་སྤྱོད་པ་དང་ལྡན་འགྱུར་ཏེ། །དེ་ཚེ་ཆོས་ཉིད་བདེན་པ་མཐོང་། །ཞེས་པ་ལ་གཉིས་ཏེ། རྒྱུ་མཐུན་གྱི་འབྲས་བུ་ནི། རྣལ་འབྱོར་པ་གནས་པའི་ཉམས་དེ་ཙམ་ན་ཚེ་འཕོས་ན་གོང་དུ་བསྟན་པ་ལྟར། ཏིང་ངེ་འཛིན་རབ་ལ་ཕྱིན་པ་དེ་བར་དོའ་འོད་གསལ་ངོས་ཟིན་ནས་ཏིང་ངེ་འཛིན་རྩལ་རྫོགས་ཏེ། སངས་རྒྱས། འབྲིང་སྒྱུ་ལུས་བར་དོར་ལྷའི་རིག་པ་འཛིན་པར་བརྫུས་ཏེ་སྐྱེས་ནས་ཏིང་ངེ་འཛིན་རྩལ་རྫོགས་པར་འགྱུར། ཐ་མ་མི་ལུས་ཐོབ་ནས་གདམས་ངག་ཟབ་མོ་དང་འཕྲད་ནས་ཆོས་ཉིད་བདེན་པའི་དོན་མཐོང་བར་གསུངས་ཏེ། ཉམས་སྒྲོན་ལས། རང་འབྲས་རྣལ་འབྱོར་འཕོ་བའི་ཚེ། །གདམས་པའི་གནད་དང་ཤེས་རབ་ཀྱིས། །འགགས་མེད་ཡེ་ཤེས་ཆོས་སྐུར་སྤྱོར། །འགགས་མེད་སྒྱུ་ལུས་བར་དོ་ནས། །ལྷ་མི་རིག་འཛིན་དེ་ནས་གྲོལ། །ཕལ་ཆེར་བག་ཆགས་རྟོག་པའི་མཐུས། །ངེས་པར་མི་ལུས་ཐོབ་ནས་སུ། །ཆོས་སྤྱོད་པ་དང་ལྡན་གྱུར་ཏེ། །དེ་ཚེ་ཆོས་ཉིད་བདེན་པ་མཐོང་། །ཞེས་སོ། །སྐྱེས་བུ་བྱེད་པའི་རྣམ་སྨིན་གྱི་འབྲས་བུ་ནི། གནས་པའི་ཏིང་ངེ་འཛིན་དེས་ཉོན་མོངས་བ་དང་གཟུང་འཛིན་གྱི་མཚན་མ་ཆེ་རགས་གྲོལ་ནས་མི་གཡོ་བའི་ཏིང་ངེ་འཛིན་ཐོབ་པར་གསུངས་ཏེ། ཉམས་སྒྲོན་ལས། རྟོགས་པའི་ངང་གནས་རྣལ་འབྱོར་པས། །གསལ་ལ་ཡུལ་མེད་གོམས་པ་ཡིས། །ཉོན་མོངས་ཀུན་བརྟགས་འབྲིང་བཅོམ་ནས། །བརྟན་པའི་ཆ་ལ་མི་གཡོ་ཐོབ། །ཅེས་སོ། །གཉིས་པ་ལྷག་མཐོང་རྟོགས་པ་མི་གཡོ་བའི་རྣལ་འབྱོར་ལ་བཞི་སྟེ། ཏིང་ངེ་འཛིན་ལ་མཉམ་པར་གཞག་པའི་ཐབས། ཏིང་ངེ་འཛིན་གྱི་དཔེ། དེའི་དྲོད་རྟགས་དང་།

༣༣༨འབྲས་བུ་བསྟན་པའོ། །དང་པོ་ནི། རྩ་ཚིག་ལས། ཇི་སྲིད་མཉམ་པར་གཞག་པའི་ཚེ། །སྐྱོན་གྱི་རྣམ་པ་བཀག་ནས་ནི། །རང་བྱུང་ཡེ་ཤེས་དྲོད་དང་ལྡན། །ཉིན་མཚན་འདས་ཀྱི་བར་དུ་གནས། །ཞེས་པས། མཉམ་པར་གཞག་ཐབས་སྐྱོན་ངོས་བཟུང་ནས་ཡེ་ཤེས་སྦྱོར་ཐབས། རྟོགས་པའི་ཡེ་ཤེས་ངོས་བཟུང་བ། ཏིང་ངེ་འཛིན་ལ་གནས་པའི་ཡུལ་དང་བཞིས་སྟོན་ཏེ། བཞག་ཐབས་ནི། གསང་སྒྲོན་ལས། རྣམ་ཤེས་འདུ་བའི་གནས་དག་ཏུ། །བག་ཕེབས་ལུས་སེམས་ཀློད་པར་བྱ། །རྟོག་པ་བློ་ཡི་ཞེན་པ་བཟློག །ཕྲ་རགས་ཡུལ་ལ་བློ་མི་བཟུང་། །རང་སེམས་ཐབས་ཀྱིས་མཐོང་བྱས་ཏེ། །ཡང་དག་ཤེས་རབ་མིག་གིས་བལྟ། །ཞེས་པ་དེ་ལ་ཡང་གསུམ་སྟེ། དང་པོ་ཕྱི་ནང་གསང་བའི་རྣམ་གཡེངས་མེད་པའི་གནས་སུ་ལུས་ངག་ཡིད་གསུམ་བདེ་བར་བྱས་ལ་ཚོགས་དྲུག་གི་ཡུལ་ལ་ཤེས་པ་ཕྱིར་མི་འཕྲོ་བར་རང་གི་སེམས་ལ་ནང་དུ་ཡང་དག་པར་བལྟས་ཏེ། དེ་ཡང་ད་ལྟའི་སེམས་འདི་འགྱུ་བ་དང་། གནས་པ་དང་། གསལ་བ་དང་། བདེ་བ་ཅི་ལྟར་འདུགས་བརྟག་ལ། གང་དུ་འདུག་པ་དེ་ལ་ལྟ་བའི་རྒྱས་འདེབས་དང་། འདི་ཡིན་གྱི་བློ་བཟོ་མི་བྱ་བར་བདེ་གསལ་མི་རྟོག་པའི་ངང་ལ་གནས་འདུག་ན། གང་ལྟར་འདུག་པ་དེ་ཉིད་ལ་བྱུང་ས། གནས་ས། འགྲོ་ས། ངོ་བོ། གཟུགས་དབྱིངས། ཁ་དོག་ཅི་སྣང་། སྒོམ་མཁན་གྱི་སེམས་དང་ཉམས་དེ་ལ་ཁྱད་པར་ཅི་སྣང་བརྟག་ཅིང་ཁོ་རང་གི་སྟེང་དུ་བཞག་གོ །ཉམས་སྒྲོན་ལས། མ་སྐྱེས་རང་བྱུང་སྐྱེ་བ་མེད། །སྐྱེ་བ་མེད་པའི་ཆོས་ཉིད་ལ། །མ་བཅོས་རང་བྱུང་ལྷུག་པར་བཞག །ཞེ་འདོད་མི་བྱ་ཕྱལ་བར་བཞག །ཅེས་གསུངས་སོ། །དེའི་དོན་ཆོད་ན་ཚོད་ཚུལ་འོག་ནས་འབྱུང་། གནས་པ་ཡོན་ཏན་དུ་མི་ལྟ། འགྱུ་བ་སྐྱོན་དུ་མི་ལྟ་བར་རྣམ་རྟོག་འགྱུ་བ་གང་བྱུང་ངོས་བཟུང་ནས། ད་ལྟ་དྲན་བདོའི་

༣༣༩རྣམ་རྟོག་དེ་ལ་བྱུང་གནས་འགྲོ་གསུམ། ངོ་བོ། དབྱིབས། ཁ་དོག་ཅི་བྱུང་ཅི་སྣང་། ཉམས་བདེ་གསལ་མི་རྟོག་པ་དང་། འགྱུ་བ་དེ་ལ་ཁྱད་ཅི་འདུག །རྒྱུ་རྐྱེན་གྱི་བྱས་མ་བྱས། དྲི་མ་ཡོད་མེད་ཁྱད་ཅི་སྣང་། སེམས་ཀྱི་ངོ་བོ་དེ་གང་བྱུང་བརྟག །སོ་སོར་ཕྱེས་ཤིང་བརྟག །གཅིག་ཏུ་བསྲེ་ཞིང་བརྟག །འགྱུ་གནས་གང་བྱུང་དེ་ཉིད་ཀྱི་སྟེང་དུ་འཚོ་ཞིང་བརྟགས་ཏེ། གསང་སྒྲོན་ལས། ཞི་གནས་བསྒོམས་པས་ལྷག་མཐོང་སྐྱེ། །རྣམ་པར་རྟོག་ལས་ཡེ་ཤེས་སྐྱེ། །སྟོང་པ་ཉིད་ལ་སྙིང་རྗེ་སྐྱེ། །ཞེས་སོ། །སེམས་ཀྱི་དོན་ཆོད་ན། གཉིས་པ་ནི། སྔར་བཤད་པའི་དྲོད་རྟགས་མེ། དུ་བ། སྨིག་རྒྱུ་ནས་བཟུང་སྟེ། སངས་རྒྱས་གྱི་ཞིང་ཁམས་སྐུ་གཟུགས་ལ་སོགས་མཐོང་སྣང་བཟང་ངན་ཅི་བྱུང་ཡང་དེ་ཉིད་ལ་སེམས་བསྲེ་ཞིང་འཚོ། ཉམས་སྣང་དེ་ལ་བྱུང་གནས་འགྲོ་གསུམ་དངོས་པོ་གྲུབ་མཐའ་ཅི་སྣང་ཡང་སེམས་དང་གཅིག་གམ་ཐ་དད་བརྟག་གོ །གསང་སྒྲོན་ལས། ཟུང་དུ་འཇུག་པའི་ཡེ་ཤེས་ནི། །རྒྱུ་དང་རྐྱེན་ལ་རག་མ་ལུས། །ཐུགས་ཕྲད་ཤུགས་ཀྱིས་ལྷུག་པར་འཆར། །ཅེས་སོ། །འདིའི་དོན་ཆོད་ན། གསུམ་པ་ནི། གཟུགས་སྒྲ་དྲི་རོ་རེག་བྱ་ལ་སོགས་པའི་ཡུལ་དུ་སྣང་བ་ཐམས་ཅད། ཉོན་མོངས་པ་དུག་ལྔ་དང་། བདེ་སྡུག་གི་ཚོར་བ་དང་། འཁོར་འདས་ལ་རེ་དོགས་ལ་སོགས་སེམས་ལ་བྱུང་ཚད་ཀྱི་སྟེང་དུ་བཞག་ཅིང་། ངོ་བོ་དབྱིབ་ས་ཁ་དོག་བྱུང་གནས་འགྲོ་གསུམ་སེམས་དང་སེམས་བྱུང་ཁྱད་ཅི་སྣང་བརྟག་གོ །ཉམས་སྒྲོན་ལས། ཆོས་སྐུ་སྤྲོལ་བྲལ་རང་རིག་གསལ། །སྐུ་གསུམ་རང་ཆས་རྩོལ་མེད་ལས། །བྱར་མེད་སྐྱེས་བུ་ཅི་བཞིན་དུ། །ལུས་སེམས་ཁོང་ཀློད་གང་དགར་བཞག །ཅེས་སོ། །དེ་ལྟར་སེམས་ལ་གང་ཤར་གྱི་ཉམས་བསྐྱང་དགོས་པ་ཡང་། བང་མཛོད་ལས། འདོད་ཆགས་

༣༤༠ཞེ་སྡང་གཏི་མུག་ཀྱང་། །རྣམ་རྟོག་རླུང་གིས་མི་བསྐྱོད་ན། །དེ་ཉིད་རང་བྱུང་ཡེ་ཤེས་ཡིན། །རང་བྱུང་ཡེ་ཤེས་ཆེན་པོ་ཡང་། །རྣམ་རྟོག་རླུང་གིས་བསྐྱོད་པ་ན། །འདོད་ཆགས་ཞེ་སྡང་གཏི་མུག་ཡིན། །ཞེས་གསུངས་སོ། །གཉིས་པ་སྐྱོན་ངོས་བཟུང་ནས་ཡེ་ཤེས་སྦྱར་བ་ལ། དམ་པས། མི་མཐུན་ཕྱོགས་ཀྱི་སྐྱོན་བསྟན་པ། །གོལ་སྒྲིབ་སུམ་ཅུ་སོ་དྲུག་སྟེ། །ནོར་དུ་དོགས་པ་ལྔ་བཤད་ན། །ཆད་པར་དོགས་དང་རྟག་པར་དོགས། །ཕྱལ་བར་དོགས་དང་བྱིང་བར་དོགས། མེད་པར་དོགས་དང་དེ་ལྔའོ། །སྒྲིབ་པ་ཆེན་པོ་བཅུ་བཤད་ན། །མི་གཡོ་གསལ་དང་བདེ་སྡུག་བསྔལ། །སེམས་ལ་ཤེས་འབྱུང་མངོན་ཤེས་དང་། །མཚན་མའི་རྫུ་འཕྲུལ་འབྱིན་པ་དང་། །འདི་ལ་བླ་མེད་མཆོག་འཛིན་དང་། །བདག་གི་ལྟ་བ་སྙེམས་པ་དང་། །གཞན་གྱི་ལྟ་བ་ཁྱད་དུ་གསོད། །འདི་དག་སྒྲིབ་པ་ཆེན་པོའོ། །མངོན་ཤེས་མཚན་མར་འཛིན་པ་བདུད། །མི་བཟད་དུག་འཐུང་འདྲ་སྟེ་སྐྱོན། །ཞེས་གསུངས་པས། ལྟ་སྒོམ་ལ་ཐུན་མོང་པའི་དྲི་མ་ལྔས་གཏིང་དུ་མི་ཕྱིན་ཅིང་། ཡོན་ཏན་ལ་མངོན་པར་རློམ་པ་བཅུས་གོང་དུ་མི་འཕེལ་བ་སྟེ། དེ་ལྟར་བཅོ་ལྔའོ། །རྣལ་འབྱོར་དང་པོར་བཤད་པའི་སྐྱོན་དྲུག །བར་དུ་གཅོད་པ་བཅུ་དྲུག་དང་སུམ་བཅུ་རྩ་བདུན་དུ་འགྱུར་ཡང་། སྐྱོན་དྲུག་སྒྲིབ་བཅུས་ལྟ་བ་སྙེམས་གཉིས་གཅིག་ཏུ་བརྩི་བས་གོལ་སྒྲིབ་སོ་དྲུག་པོ་དེ་དག་གིས་རྣལ་འབྱོར་དང་པོའི་ཏིང་ངེ་འཛིན་མི་སྐྱེ་མི་འཕེལ་བས་སྤང་བ་ཡིན་ལ། འདིར་སྣང་སྲིད་སེམས་སུ་རྟོགས་ཤིང་སེམས་ཉིད་ཆོས་སྐུར་རྟོགས་པའི་ཚེ། གོལ་སྒྲིབ་ཀྱི་སྐྱོན་དྲུག །སྒྲིབ་པ་བཅུ། དོགས་པ་ལྔ། བར་ཆད་བཅུ་དྲུག །བྱིང་རྨུགས་རྒོད་འཐོར་གང་བྱུང་ཡང་དེ་ཉིད་ཀྱི་སྟེང་དུ་བཞག་ཅིང་ངོ་བོ་ལ་བལྟས་པས། གོལ་སྒྲིབ་ཐམས་ཅད་རིག་པའི་རྩལ་མ་འགག་པ་ལས་ཅིར་ཡང་སྣང་ཞིང་། རིག་པ་ཉིད་གཞི་མེད་རྩ་བྲལ་

༣༤༡དུ་སྐྱོན་ཡོན་གྱི་མཐའ་ལས་འདས་པར་རྟོགས་པས་སྐྱོན་ཐམས་ཅད་ཡེ་ཤེས་སུ་འཆར་བའོ། །སྐྱོབ་པས། ཐམས་ཅད་བདག་ཏུ་རྟོགས་པས་ཉོན་མོངས་སྐྱོ་ཡུལ་མེད། །བདག་ཉིད་བསམ་མི་ཁྱབ་པས་ཉོན་མོངས་སྐྱེ་མཁན་མེད། །ཉོན་མོངས་མ་བཅད་རང་ཚོད་སངས་རྒྱས་དགོངས་པ་ཡིན། །ཞེས་པ་དང་། དམ་པ་ཉིད་ཀྱིས་སྐྱེན་སེལ་གསུངས་པ། སྟོང་པ་ལྟ་མེད་ཆད་མ་སོང་། །ཐེར་ཟུག་ལྟ་མེད་རྟག་མ་སོང་། །བསམ་རྗེས་མ་འབྲངས་ཕྱལ་མ་སོང་། །རྨུགས་པ་མེད་ན་བྱིང་མ་སོང་། །རང་རིག་ཤེས་རབ་གསལ་ཡོད་པས། །མེད་པར་མ་སོང་དེ་དག་གོ །ཞེས་སོ། །གསུམ་པ་རྟོག་པའི་ཡེ་ཤེས་ངོས་བཟུང་བ་ལ་བཞི་སྟེ། །རྟོགས་པ་སྐྱེ་ཚུལ་གྱི་རིམ་པ་དང་། རྟོགས་པ་རང་གི་ངོ་བོ། དེ་རང་གི་རྒྱུད་ལ་བཙའ་ཐབས། གོང་དུ་བོགས་འདོན་པའོ། །དང་པོ་ནི། སེམས་ལ་འཆར་སྒོ་གང་བྱུང་གི་སྟེང་དུ་བཞག་ཅིང་། དེའི་ངོ་བོ་ལ་བལྟས་པས་མཉམ་པར་གཞག་ཐབས་གསུམ་ལས། རྣམ་རྟོག་སྐྱེ་ཚུལ་གསུམ་འབྱུང་སྟེ། དང་པོ་རྣམ་པར་རྟོག་པ་ཕྲ་རགས་གང་བྱུང་ཐམས་ཅད་རང་བྱུང་རང་ཞི་གསལ་སྟོང་དུ་གྲོལ་ནས། གསལ་སྟོང་དེ་ཉིད་རང་རིག་པའི་ཡེ་ཤེས་སུ་རྟོགས་པ་ནི། རྟོགས་པའི་ཡེ་ཤེས་མགོ་གཡོ་བ་ཞེས་སོ། །མཉམ་གཞག་རྟོག་པ་རང་གྲོལ་དང་། །གསལ་སྟོང་བདེ་ལ་མི་རྟོག་གནས། །ཞེས་སོ། །དེ་ནས་ངར་འཛིན་རྣམ་པར་རྟོག་པ་གྲ་མ་ཆགས་ཟུར་མ་ཉམས་པ་དེ་ཉིད་རྒྱུན་ཆད་མེད་ཅིང་འདུས་མ་བྱས་པའི་རང་བྱུང་གི་ཡེ་ཤེས་དྲི་མེད་ཆོས་སྐུར་ལྷག་གིས་རྟོགས་པ་ནི་རྟོགས་པའི་ངོ་བོ་ཐོབ་པ་ཞེས་བྱའོ། །ཀློང་གསལ་ལས། རང་བྱུང་ཡེ་ཤེས་རང་ལས་བྱུང་། །དེ་ཤེས་ཡེ་ཤེས་ཙམ་དུ་བརྗོད། །ཅེས་སོ། །ཀུན་བྱེད་ལས། རང་བྱུང་རྒྱུ་རྐྱེན་མེད་པར་འབྱུང་བ་ཡིན། །ཡེ་ཤེས་འགག་པ་མེད་པར་གསལ་བ་ཡིན། །ཞེས་

༣༤༢སོ། །དེ་ནས་ཉམས་སྣང་གང་བྱུང་བ་ཐམས་ཅད་རྒྱུན་ཆད་མེད་པར་འགག་མེད་རིག་པ་རང་སྣང་དུ་རྟོགས་ལ། གཞན་སྣང་སྲིད་ཤེས་བྱའི་ཆོས་ཐམས་ཅད་སེམས་ཉིད་རང་སྣང་དུ་རྟོགས་ཤིང་སྣང་སེམས་གཉིས་མེད་དུ་འདྲེས་ནས་ཡུལ་མེད་རང་གསལ་གྱི་ངང་དུ་གནས་པ་ནི། རྟོགས་པ་བརྟན་པོར་ཞུགས་པ་ན། །ཡུལ་མེད་རང་གསལ་ཉམས་ཀྱི་གཏིང་། །ཞེས་སོ། །ཆོད་ཚུལ་གསུམ་པོ་དེ་ལ། སེམས་ཉིད་འོད་གསལ་ཆེན་པོ་ལ། །ཇི་སྲིད་མཉམ་པར་གཞག་པའི་ཚེ། །རྣམ་པར་རྟོག་པ་སྔོན་ལ་འབྱུང་། །ཡེ་ཤེས་ཆེན་པོ་ཕྱི་ན་ཤར། །སྐྱོན་བཅོས་གཡོ་བའི་ཉམས་ཞེས་བྱ། །གསལ་བའི་ངང་ལ་རྟོག་པ་འབྱུང་། །འབྱུང་བ་དེ་ཉིད་དབྱིངས་སུ་རིག །སྐྱོན་བཅོས་ཐོབ་པའི་ཉམས་ཞེས་བྱ། །སྣང་གསལ་དྲན་རིག་ཡེ་ཤེས་ཀློང་། །ཅིར་སྣང་འགག་མེད་འཛིན་ཆགས་མེད། །གཉིས་མེད་རིག་པ་ལྷུན་གྱིས་གྲུབ། །རྟག་ཏུ་དེ་ལྟར་གནས་པ་ནི། །སྐྱོན་བཅོས་བརྟན་པའི་ཉམས་ཞེས་བྱ། །ཞེས་གསུངས་པས་མངོན་ནོ། །གཉིས་པ་རྟོགས་པ་རང་གི་ངོ་བོ་ལ་རབ་འབྲིང་ཐ་གསུམ་སྟེ། རབ་ཀྱི་མཉམ་གཞག་དུས་སུ་སེམས་ཉིད་སྐྱེ་བ་མེད་པ་གསལ་སྟོང་ཀ་དག་ཆོས་ཀྱི་སྐུ་ལས་མ་གཡོས་བཞིན་རྒྱ་མཚོ་ལ་གཟུགས་བརྙན་འཆར་བ་ལྟར། འགག་པ་མེད་པའི་རོལ་པ་ལས་ཤེས་བྱ་ཐམས་ཅད་མ་འདྲེས་ཡོངས་རྫོགས་ལྷུན་གྱིས་གྲུབ་པ་ལ་མ་སྐྱེས་མི་འགག་སྔ་ཕྱི་མེད་པར་མཚན་ཉིད་དབྱེར་མེད་དུ་ཉམས་སུ་མྱོང་ཞིང་། མྱོང་མཁན་གྱི་རིག་པ་ཉིད་གཏན་ཚིག་གསུམ་གྱི་ངོ་བོར་རང་གྲོལ་པ་ནི་སྐུ་གསུམ་དབྱེར་མེད་ཀྱི་དགོངས་པ་ཞེས་བྱའོ། །སྐྱོང་བ་ལས། མ་བཅོས་སྤྲོས་བྲལ་ཆོས་ཀྱི་སྐུ། །མ་འགག་རང་བྱུང་ལོངས་སྤྱོད་རྫོགས། །མཚན་ཉིད་སྣ་ཚོགས་སྤྲུལ་པའི་སྐུ། །སེམས་དང་ཆོས་སྐུར་འདྲེས་པ་ནི། །སྐུ་གསུམ་ངོ་བོ་དབྱེ་བ་མེད། །ཅེས་སོ། །རྗེས་ཐོབ་ནི། དྲན་

༣༤༣པས་ཟིན་ཚད་ཀྱི་སྣང་བ་ཐམས་ཅད་སེམས་ཉིད་རང་སྣང་སྒྱུ་མར་འཆར་ཞིང་། མ་ཟིན་དུས་བཏང་སྙོམས་སུ་གནས་ཏེ་ཐ་མལ་གྱི་འཁྲུལ་སྣང་མེད་དོ། །ཉམས་སྒྲོན་ལས། དྲན་ཟིན་གཉིས་མེད་གསལ་འདབས་ཤིང་། །རང་སྣང་སྒྱུ་མར་གསལ་བ་དང་། །རྩོལ་མེད་བཏང་སྙོམས་ཆེན་པོར་གནས། །ཞེས་སོ། །འབྲིང་གི་མཉམ་གཞག་ཏུ་སྣང་རིག་གི་ཆོས་ཐམས་ཅད་ཡུལ་མེད་རང་རིག་པ་རང་གསལ་རང་སྣང་དུ་གཅིག་པའི་ངང་དུ་གནས་པས་རེ་དོགས་གཉིས་འཛིན་ལ་སོགས་པའི་ལྟ་སྒོམ་གྱི་སྐྱོན་མི་མངའ་སྟེ། ཉམས་སྒྲོན་ལས། མཉམ་གཞག་མི་མཐུན་གཉེན་པོ་བྲལ། །མ་གཏད་ཡེངས་མེད་མི་གཡོར་གནས། །བདེ་གསལ་མི་རྟོག་སྤྲོས་དང་བྲལ། །ཞེས་སོ། །རྗེས་ཐོབ་ནི། དྲན་པ་ཟིན་དུས་རིག་པ་རང་སྣང་དུ་ཤེས་ཤིང་། མ་ཟིན་དུས་ཐ་མལ་དུ་འགྲོ་ཡང་འཕྲལ་དུ་ཟིན་ནོ། །ཉམས་སྒྲོན་ལས། རྗེས་ཤེས་དྲན་པས་མ་ཟིན་ན། །ཐ་མལ་འཆོར་དང་བཏང་སྙོམས་དང་། །སྐབས་སུ་རང་ལོག་ཐུག་འཕྲད་འབྱུང་། །ཞེས་སོ། །ཐ་མ་ནི། མཉམ་གཞག་ཏུ་རྣམ་པར་རྟོག་པ་ཉིད་རང་བྱུང་གི་ཡེ་ཤེས་སུ་རྟོགས་ཤིང་། རིག་པ་རང་གསལ་གྱི་ངང་ལ་གནས་པས་འགྱུ་གནས་གཉིས་ལ་ཁྱད་པར་མེད་ཅིང་། བང་མཛོད་ལས། རིག་པ་ཕྱི་ནང་མེད་པར་གསལ་བས་ལྷག་མཐོང་ཡིན། །གསལ་བའི་དོན་ལ་མ་ཡེངས་ཞི་གནས་ཡིན། །ཞེས་སོ། །རྗེས་ཐོབ་ནི། དྲན་པས་ཟིན་དུས་ཐ་མལ་གྱི་ཞེན་པ་མེད་པ་བཏང་སྙོམས་སུ་འདུག་ལ། །མ་ཟིན་དུས་ཐ་མལ་འཁྲུལ་སྣང་དུ་འཆར། །ཉམས་སྒྲོན་ལས། ཐ་མལ་འཆོར་དང་བཏང་སྙོམས་གནས། །ཞེས་སོ། །གསུམ་པ། ཉམས་རྟོགས་ཟུང་དུ་འབྲེལ་བ་དེ་རང་གི་རྒྱུད་ལ་སྦྱོར་ཞིང་བཙའ་ཐབས་ནི། བྱང་ཆུབ་སེམས་རྫོགས་པ་ཆེན་པོའི་དོན་སེམས་ཀྱི་རང་བཞིན་རྟོགས་པའི་དོན་

༣༤༤ལ་ཏིང་ངེ་འཛིན་དང་ལྡན་ན། དེའི་བཙའ་ཐབས་ལ་རྣམ་པ་དྲུག་སྟེ། ཕྱི་ནང་གི་དམ་ཚིག་ཉམས་ན་གཡེང་བ་བྱུང་ནས་བསྒོམ་མི་ཁོམ་པ་དང་། འཇུག་དཀའ་བ་དང་། །སེམས་གནས་མི་ཐུབ་པ་དང་། ལུས་སྡོད་མི་ཚུགས་པ་བྱུང་ན་ལྟ་བ་ཁ་འབྱམས་སུ་འགྲོ། ཏིང་ངེ་འཛིན་གྱི་དྲོད་རྟགས་ཐམས་ཅད་རྗེས་ཡལ་དུ་འགྲོ་བའི་མཐར་ངན་སོང་ཁ་བརྒྱུད་ནས་འགྲོ་བས། དམ་ཚིག་ཐམས་ཅད་མ་ཉམས་པ་བསྲུང་བ་གལ་ཆེ་སྟེ། ལུང་ལས། དེ་ལ་དམ་ཚིག་ཕྱི་དང་ནང་། །རང་བཞིན་ཕུང་པོ་ཁམས་བཞི་གནས། །ཞེས་སོ། །གཉིས་པ་ནི། སྒོམ་པའི་དུས་བསམ་དཔྱོད་དྲག་པོ་མང་ན་ཆུ་རྙོགས་པ་དང་འདྲ་སྟེ། ཡུན་དུ་བསྒོམས་ཀྱང་ཏིང་ངེ་འཛིན་གྱི་རྙོགས་མ་མི་དྭངས་པས་སེམས་ཀྱི་རང་བཞིན་ཆོས་ཀྱི་དབྱིངས་ལ་མ་ཡེངས་བག་གིས་བལྟ་བར་བྱའོ། །ལུང་ལས། སྣང་བ་མེད་པའི་ཆོས་ཉིད་ནི། །མ་བཙལ་བཞག་ན་སྒོམ་པ་ཡིན། །དེ་དང་དེ་ནི་རྣམ་བཙལ་ན། །དེ་ལ་དེ་བཞིན་མི་སྣང་ངོ་། །གསུམ་པ་ནི། ཏིང་ངེ་འཛིན་ཤིན་ཏུ་གསལ་ཡང་ཡུན་རིང་ན་སྔར་གོམས་ཤས་ཆུང་བའི་དབང་གིས་བྱིང་རྒོད་བྱུང་ཡང་ངོས་མ་ཟིན་ཏེ། ངོས་བཟུང་བྲལ་བའི་རིག་པ་རྒྱས་འདེབས་སུ་སོང་ནས་བདེན་པ་མཐོང་དུ་མི་གཏུབ། ངེས་ཤེས་དང་བརྩོན་འགྲུས་ཆུང་ངུ་འགྲོ་བས། ཏིང་ངེ་འཛིན་མ་དུབ་ཙམ་དུ་བཞག་ནས་ཁམས་གསོ་བར་བྱས་ལ་བསྒོམ་མོ། །བཞི་པ་ནི། རྣལ་འབྱོར་པའི་ཏིང་ངེ་འཛིན་གྱི་ཤུགས་དང་ལྟ་བའི་རླབས་མཐོང་བའི་དབང་གིས་སྣང་སྲིད་ཡེ་ཤེས་སུ་འཆར་ཞིང་མཐོང་སྒོམ་གྱི་དྲོད་རྟགས་ལྟར་དུ་འཆར་བའི་དུས་ན་ཉམས་དང་རྟོགས་པའི་ང་རྒྱལ་སྐྱེས་ནས། ད་ནི་བདག་ལ་ཏིང་ངེ་འཛིན་གྱི་འགལ་རྐྱེན་མེད་སྙམ་སྟེ། འཇིག་རྟེན་གྱི་ཁེ་དྲག་དང་། འདུ་འཛི་དང་། འདོད་ཡོན་དང་། བཀུར་སྟི་དང་། ཉེ་འཁོར་གྱི་རྗེས་སུ་འབྲངས་ནས། ཆོས་བརྒྱད་ཀྱི་མགོ་ཡང་མ་འཇིལ་བར་བདག་ཅག་རྣལ་

༣༤༥འབྱོར་པ་ཡིན་ཟེར་ཞིང་སངས་རྒྱས་པར་གདོན་མི་ཟ་བར་སྐད་པ་དེ་ནི་ཤིན་ཏུ་འཁྲུལ་ཏེ། འབྱུང་བའི་ལྷག་མ་མ་ཟད་པས་ལུས་ལ་ཞེན་ཅིང་། འདུ་ཤེས་ཀྱི་ལྷག་མ་མ་ཟད་པས་ཆགས་སྡང་འབྱུང་བ་ཡིན་ཏེ། སླར་ཡང་དེའི་བག་ཆགས་ཀུན་གཞི་ལ་བསགས་ནས་མཐོ་རིས་ཀྱང་མི་ཐོབ་ན་ཐར་པ་ལྟ་སྨོས་ཅི་དགོས། དེས་ན་རྟག་ཏུ་དགོན་པ་བསྟེན་ཅིང་འཇིག་རྟེན་གྱི་འབྲེལ་བ་བཅད་དེ་ཆོས་བརྒྱད་ཀྱི་ཁུར་པོ་སྤང་བར་བྱའོ། །ལྔ་པ་རྣལ་འབྱོར་པ་ལ་མངོན་ཤེས་སམ་ཡོན་ཏན་ཕྲ་མོ་བྱུང་ནས་དེ་ལ་རང་ཡང་རློམ་པ་སྐྱེ་ཞིང་གཞན་ལ་ཡང་སྒྲོགས་པ་དེ་ནི། བདུད་ཀྱི་ལས་བར་ཆད་ཐམས་ཅད་འཇུག་པའི་རྒྱུ་ཡིན་པས། མངོན་ཤེས་རྫུ་འཕྲུལ་ཡོན་ཏན་ཅི་ཡོད་ཀྱང་དོམས་པ་དང་། དོམ་པོ་མི་བྱ་ལ་སྦེད་ཅིང་། ཡོན་ཏན་གོང་འཕེལ་ལ་བརྩོན་པར་བྱའོ། །དྲུག་པ་ནི། གདམས་ངག་དང་པོ་ཐེབས་ནས་སངས་རྒྱས་མ་ཐོབ་ཀྱི་བར་དུ་གདམས་ངག་གི་འདེབས་ལུགས། ཏིང་ངེ་འཛིན་གྱི་དམིགས་ཁྲིད། དབྱིངས་ཀྱི་སྣང་ལུགས། ཡེ་ཤེས་ཀྱི་འཇུག་ལུགས། ཉམས་རྟོགས་ཀྱི་མཚན་མ་ཐམས་ཅད་སྙིང་སྒོར་ཡང་དབྱུང་བར་མི་བསམ་ན་ཁར་དབྱུང་བ་ལྟ་སྨོས་ཀྱང་ཅི་དགོས། གལ་ཏེ་སྨྲས་ན་ལས་དང་པོ་པའི་ཉམས་དང་དྲོད་རྟགས་གཏན་ནས་མེད་པར་འགྱུར་ཞིང་། གདིང་ཐོབ་ནས་ཀྱང་སངས་རྒྱས་མྱུར་ཏུ་མི་ཐོབ་པར་བྱེད་དོ། །ལུང་ལས་ཀྱང་། རྒྱ་མཚོའི་མཇིང་གི་ཕ་བོང་བཞིན། །བསྐལ་པ་འཁྲུགས་ཀྱང་ཁར་མི་དབྱུང་། །ཞེས་སོ། །ཐོག་མ་ནས་ཐ་མའི་བར་དུ་བླ་མ་ནི་རྟག་ཏུ་ཡིད་ཀྱི་ཏིང་ངེ་འཛིན་དུ་བྱ་ཞིང་། ཡུད་ཙམ་ཡང་འབྲལ་བའམ། འཕྱ་བའམ། ངན་སེམས་སམ། མི་དགོས་པར་མི་བལྟའོ། །གལ་ཏེ་སྐྱོན་དེ་དག་བྱུང་ན་བསམ་གཏན་ཇེ་མེད་དུ་འགྲོ་ནས་ངན་སོང་གསུམ་དུ་ཁ་བརྒྱུད་པར་བྱེད་དོ། །ཞེས་གསུངས་པས། དེ་ལ་དང་པོར་གནས་ཞིང་།

༣༤༦ཟག་མེད་མངོན་དུ་མ་གྱུར་གྱི་བར་དུ་དྲན་ཤེས་བག་ཡོད་དང་ལྡན་པས་བརྩོན་པར་བྱའོ། །བཞི་པ་ཉམས་རྟོགས་ཐོགས་འདོན་པ་ལ་གསུམ་སྟེ། རབ་ཡོན་ཏན་གྱིས་ངོམས་ནས་འདི་བས་ཡོན་ཏན་གོང་ན་མེད་སྙམ་ནས། རློམ་པ་དང་ཁེངས་པས་བཅིངས་ཏེ་བོགས་མི་ཐོན་པ་ཡིན་ཏེ། རང་ལ་སྐྱོན་དེ་ལྟ་བུ་ཅི་འདྲ་འདུག་ཡང་ཡང་ངོས་བཟུང་ཞིང་། སངས་རྒྱས་ཀྱི་སྐུ་གསུང་ཐུགས་ཡོན་ཏན་ཕྲིན་ལས་མ་ལུས་པ་རང་སེམས་ལ་ཚང་ནས་ཡོད་པ་མངོན་དུ་མ་གྱུར་ཅིང་། ས་བཅུའི་བྱང་ཆུབ་སེམས་དཔའི་དགོངས་པ་ཡོན་ཏན་ཐམས་ཅད་སངས་རྒྱས་དང་མཉམ་པར་ཡོད་ཀྱང་རྡོ་རྗེ་ལྟ་བུའི་ཏིང་ངེ་འཛིན་ལ་སྙོམས་པར་འཇུག་པ་དང་ཤེས་སྒྲིབ་ཀྱི་བག་ལ་ཉལ་སྦྱང་དགོས་པ་ལ། རང་ལ་ད་ལྟ་ཟག་བཅས་ཀྱི་ཉམས་བན་བུན་སྐབས་རེ་ཡོད་ཀྱང་རྐྱེན་དང་འཕྲད་དུས་ཐ་མལ་རང་དུ་ཤོར་བ་འདི་ལ་ང་རྒྱལ་ནས་ཏིང་ངེ་འཛིན་ལ་མི་བརྩོན་པ་བདུད་དབང་དུ་སོང་ངེས་སྙམ་པ་བྱས་ལ། ང་རྒྱལ་དང་རློམ་པ་བྱེད་མཁན། ཉམས་སུ་མྱོང་མཁན། རྟོག་མཁན་དེ་ཚུར་སེམས་ལ་རྩད་བཅད་ཅིང་། རྟོག་མཁན་གཞི་མེད་རྩ་བྲལ་དུ་ཡང་ཡང་དུ་གྲོལ་པ་གལ་ཆེའོ། །ཉམས་སྒྲོན་ལས། རྫུ་འཕྲུལ་སྣ་ཚོགས་སྟོན་མཛད་ཅིང་། །འཇིག་རྟེན་གྲགས་པ་སྒྲོགས་པ་དང་། །ལོངས་སྤྱོད་གཡེང་བས་བྲིད་པ་དང་། །དྲོད་རྟགས་བྱིན་རླབས་སྟོབས་སྐྱེས་ནས། །དགའ་བྲོང་རློམ་སེམས་ང་རྒྱལ་ན། །བདག་མེད་ཐར་པའི་བར་དུ་གཅོད། །དེ་ཀུན་སེམས་ཉིད་རང་སྣང་ལས། །མ་གཡོས་གཉིས་མེད་ངང་དུ་གཞོམ། །ཅེས་སོ། །འབྲིང་མཉམ་རྗེས་ཐུན་མཚམས་སོང་ནས་མཉམ་གཞག་དུས་སྣང་སེམས་ཕྱོགས་རེ་ལ་འདྲེས་ཀྱང་གདལ་ཁྱབ་ཏུ་མ་སོང་ཞིང་རྗེས་ཐོབ་ལྟ་སྒོམ་དང་མ་འདྲེས་ན་བོགས་མི་ཐོན་པས་མཉམ་རྗེས་ཐམས་ཅད་དུ་ཤེས་པ་ཧུར་བཏོན། སྣང་བ་རྒྱ་བསྐྱེད། རིག་པ་ངར་བསྐྱེད་ནས་སྤྱོད་ལམ་ཐམས་ཅད་དུ་ལྟ་སྒོམ་གྱིས་

༣༤༧ཟིན་པར་བྱས་ལ་གཙང་བཙོག་དང་བདེ་སྡུག་ཐམས་ཅད་བླང་དོར་མེད་པར་ཚོགས་དྲུག་རོ་སྙོམས་རིག་པའི་རྩལ་སྦྱང་བར་བྱའོ། །དགོངས་པ་སྐྱེད་ཆུང་འཐས་པ་ན། །རྟོགས་པའི་ངང་ནས་མ་ཡེངས་པས། །གསང་སྤྱོད་སྤྱོད་པ་སྣ་ཚོགས་བྱ། །རྗེས་ཤེས་དྲན་པའི་ཐག་པ་ཡིས། །རྟ་རྒོད་བཞིན་དུ་བསྒྲིམས་ལ་བཙའ། །དེ་ལྟར་ལྟ་སྤྱོད་སྤེལ་མ་ཡིས། །མི་གཡོ་རྒྱུན་གོམས་བརྟན་པར་བྱ། །ཞེས་སོ། །ཐ་མ་ནི་ཉམས་རྟོགས་ཆ་རེ་ལ་ཆགས་ནས་བོགས་མི་ཐོན་པས། རིག་ངོར་བྱུང་ཚད་ཀྱི་ཤེས་བྱ་ཡུལ་སྣང་དང་། ཤེས་བྱ་ཡུལ་ལ་འཇུག་ཚད་ཀྱི་ཤེས་བྱེད་ཀྱི་རིག་པ་འཆར་ཚད་ལ་ཕར་བཞག་ཚུར་ལེན་མི་བྱེད་ནས་གང་ཤར་དེ་ཉིད་ཀྱི་སྟེང་དུ་གཅིང་། སྣང་སེམས་གཉིས་གཅིག་གམ་ཐ་དད་བྱུང་། གཅིག་ན་ཡུལ་སེམས་སོ་སོར་སྣང་ཞིང་དུས་གཅིག་ལ་ཡང་གཟུགས་སྒྲ་དྲི་རོ་རེག་བྱ་དུ་མར་སྣང་བ་ཅི་ཡིན། ཐ་དད་བྱུང་ན་གང་ཟག་གཅིག་ལའང་ཉམས་སྣང་ཉིན་སྣང་མཚན་རྨི་ལམ་སྣང་བ་དང་གནས་སྐབས་གསུམ་དུ་བརྗོད་ཀྱིས་མི་ལོང་པར་སྣང་བ་དེ། གཅིག་ཡོད་པའི་དུས་གཉིས་པོ་དེ་གང་དུ་སྣང་བརྟག་ཅིང་། སྣང་བ་རྣམ་གསུམ་ལ་ཕྱིར་གྲུབ་པ་ཅི་སྣང་། འདས་པའི་སྣང་བ་ཐམས་ཅད་གང་དུ་སྣང་། མ་འོངས་གར་ཡོད། ད་ལྟའི་སྣང་བ་ལ་དངོས་པོ་ཅི་འདུག །སྣང་བའི་རིག་པ་ནང་དུ་གྲུབ་པ་ཅི་འདུག །འདས་པ་གར་སོང་། མ་འོངས་པ་གང་དུ་ཡོད། །ད་ལྟ་བའི་རིག་པ་དེ་གང་དུ་གནས། གཞན་ཡང་འཁྲུལ་གྲོལ་ལམ་གསུམ་གང་ཟག་གཅིག་གི་སེམས་རྒྱུད་ལ་འཆར་བ་དེ་ཇི་ལྟར་བྱུང་། ད་ལྟ་ཡང་བདེ་སྡུག་ཐམས་ཅད་སོ་སོར་མ་འདྲེས་པར་མྱོང་བ་དེ་ཅི་ཡིན། ལེགས་པར་བརྟག་ཤིང་དཔྱད་པས། སྣང་བ་རྣམ་གསུམ་ཇི་ལྟར་སྣང་ཡང་། སེམས་འགག་མེད་ཀྱི་རོལ་པར་རང་སྣང་ཞིང་སེམས་ཉིད་གཞི་

༣༤༨མེད་རྩེ་བྲལ་གདོད་ནས་ཀ་དག་ཆེན་པོ་རྟོགས་པའི་བོགས་དབྱུང་ངོ་། །དམ་པས་ལྷུན་གྲུབ་མངོན་དུ་མ་གྱུར་བར། །གོལ་སྒྲིབ་གདར་ཤ་གཅོད་པ་གཅེས། །ཞེས་བསམ་གཏན་སྤྱི་འགྲེལ་དུ་སེམས་ཀྱི་གདར་ཤ་གཅོད་པའི་ཐབས་མང་དུ་གསུངས་པའི་དོན་ཡིན་ནོ། །བཞི་པ་ཏིང་ངེ་འཛིན་མཐར་ཕྱིན་པའི་ཚད་དང་ཡུན་ནི། རྟོགས་པ་རབ་འབྲིང་ཐ་མ་གང་རུང་གི་ངང་ལ། རབ་ཉིན་མཚན་འཁོར་བ་རེ་ཙམ། འབྲིང་ཉིན་རེ་ཙམ། ཐ་མ་ཐུན་རེ་ཙམ་དུ་བར་མི་ཆོད་པ་སྟེ། ཉམས་སྒྲོན་ལས། རང་བྱུང་ཡེ་ཤེས་དྲོད་དང་ལྡན། །རྒྱ་མཚོའི་གཏིང་ལྟར་མི་གཡོ་ལ། །ཉིན་ཕྱེད་ཉིན་དང་ཉིན་ཞག་ནས། །ཞེས་སོ། །གཉིས་པ་ཏིང་ངེ་འཛིན་དེའི་དེའི་དཔེ་ནི། རྩ་ཚིག་ལས། མི་རྟོག་མི་དམིགས་ཐིག་ལེ་བདེ། །མི་བསྐྱོད་དྭངས་པའི་རྒྱ་མཚོ་ལྟར། །མི་གཡོ་གསལ་བའི་མར་མེ་འདྲ། །དེ་ནི་ཡེ་ཤེས་བདེ་པའི་དྲོད། ༈ །ཅེས་པའི་དཔེ་བཞི་སྟེ། དང་པོ་ནི། ཐིག་ལེ་གཅིག་ལ་གྲྭ་ཟུར་མེད་པའི་ཟླུམ་པོ་གཅིག་ཏུ་ཡོད་པ་ལྟར་འཁོར་འདས་ཀྱི་ཆོས་ཐམས་ཅད་ཅི་ལྟར་ཡང་ཡུལ་དུ་མི་རྟོག་སྟེ། སེམས་ཉིད་རང་བྱུང་གི་ཡེ་ཤེས་རང་སྣང་ཞིང་སེམས་ཐིག་ལེ་ཉག་གཅིག་ལ་བདེ་སྡུག་གཉིས་སུ་མི་དམིགས་པའི་ངང་དུ་གནས་པ་ངོ་བོ་ཉིད་ཀྱི་བདེ་བའོ། །ཀློང་ཆེན་ལས། ཐིག་ལེ་གཅིག་ལ་གྲ་ཟུར་མེད། །གདལ་བ་ཆེན་པོ་ཆོས་ཀྱི་སྐུ། །ཞེས་སོ། །གཉིས་པ་ནི། དཔེ་རྒྱ་མཚོ་ཆེན་པོ་རླུང་གིས་མ་བསྐྱོད་པ་ལ་གཟུགས་བརྙན་ཐམས་ཅད་མ་འདྲེས་ལ་གསལ་བ་ལྟར། སེམས་ཀྱི་ངོ་བོ་འོད་གསལ་བ་ལ་མཚན་མའི་རྟོག་པས་མ་བསྐྱོད་པ་ལ། སྣང་སྲིད་མ་འདྲེས་ཡོངས་རྫོགས་སུ་རང་སྣང་བའི་ངང་ལ་གནས་པའོ། །དཔེར་ན་རྒྱ་མཚོ་དྭངས་པ་ལ། །སྐར་ཚོགས་གཟུགས་བརྙན་མང་སྣང་ཡང་། །ཉིད་ལས་མི་གཞན་ས་ལེར་སྣང་། །དེ་བཞིན་སྣང་བས་ཆོས་རྣམས་ཀུན། །ཆོས་དབྱིངས་དྭངས་པའི་དཀྱིལ་འཁོར་ན། །མ་འདྲེས་ཡོངས་སུ་རྫོགས་པར་གསལ། །ཞེས་གསུངས་སོ། །གསུམ་པ་ནི། མར་མེ་ཕྱི་ནང་མེད་པར་གསལ་བ་ལྟར། །ཆོས་

༣༤༩ཐམས་ཅད་ཡུལ་མེད་རིག་པ་རང་གསལ་གྱི་ངང་ལ་གནས་པའོ། །ལྟ་མེད་རིག་པ་རང་གསལ་ནི། །ཡུལ་མེད་སྤྲོས་བྲལ་ཇི་བཞིན་ཉིད། །རང་སྣང་རིག་པའི་འཁོར་ལོ་ལ། །ཡུལ་མེད་རང་གསལ་རིག་པས་མཐོང་། །ཞེས་སོ། །བཞི་པ་ནི། དེས་དོན་གསུམ་པོ་དེ་གནས་པའི་ཉམས་རབ་འབྲིང་ཐ་གསུམ་དང་མི་གཡོའི་ཉམས་རབ་འབྲིང་ཐ་གསུམ་འདྲེས་པར་གྱུར་པའི་ཞི་གནས་དང་ལྷག་མཐོང་ཟུང་དུ་འཇུག་པ་ནི། དཔེར་ན་མེ་དང་དྲོད་མཚུངས་པར་ལྡན་པ་བཞིན། རྟོགས་པའི་ཡེ་ཤེས་ཉམས་མྱོང་དང་མཚུངས་པར་ལྡན་པའོ། །གསུམ་པ་དྲོད་རྟགས་བསྟན་པ་ནི། རྩ་ཚིག་ལས། །ཟས་དང་གོས་ཀྱི་འདུ་ཤེས་ཆུང་། །ཉོན་མོངས་ལ་སོགས་ཆགས་སྡང་ཆུང་། །སྙིང་རྗེ་ཕན་སེམས་རབ་ཏུ་ཆེ། །རྨི་ལམ་རྟགས་བཟང་རབ་ཏུ་བྱུང་། །ཞེས་པས། ཕྱི་ནང་གསང་བ་གསུམ་སྟེ། གསང་བའི་དྲོད་རྟགས་ནི་གོང་དུ་དཔེ་བཞིས་བསྟན་བའི་ཉམས་རྟོགས་མཚུངས་ལྡན་དེ་ཉིད་དོ། །ནང་གི་དྲོད་རྟགས་ནི། ལུས་མངོན་ཞེན་ཆོད་པས་ན་ཆེ་དྲག་པོ་ལ་སོགས་པའི་བདེ་སྡུག་རོ་སྙོམས་པ་དང་། ལུས་ཡང་ཞིང་བདེ་བར་གནས་པ་དང་། སེམས་ལས་སུ་རུང་བའི་ཏིང་ངེ་འཛིན་ལ་རྒྱུན་དུ་གནས་པའི། །ཉམས་སྒྲོན་ལས། དྲོད་ནི་ཤིང་བལ་ལྟར་ཡང་དང་། །ལུས་ཀྱིས་བཟོད་པ་ཆེར་ཐོབ་དང་། །ཁམས་སྙོམས་རང་ལུས་བདེ་བ་རྒྱས། །འགྱུ་བ་ཅན་དང་ཐེ་ཚོམ་བྲལ། །གསལ་བ་ཡུལ་ལ་མི་གཡོར་གནས། །ཞེས་སོ། །ཕྱི་རྟགས་ཆོས་ཐམས་ཅད་སེམས་ཉིད་རང་སྣང་དུ་རྟོགས་པས། །གཟུང་འཛིན་རང་སར་གྲོལ་ཏེ། ཆགས་སྡང་གཞི་མེད་དུ་མེད་དུ་གྲོལ་ནས་རང་གི་ཟས་གོས་ཀྱི་ཞེན་པ་དང་། གཞན་ལ་ཕྱོགས་རིས་ཀྱི་རྩོད་འཐེན་དང་། ཁེ་གྲགས་དོན་དུ་གཉེར་བའི་ཆོས་བརྒྱད་ཀྱི་བྱ་བ་རང་རྒྱུད་ལ་མི་འབྱུང་ཞིང་། སེམས་ཅན་ལ་ཕྱོགས་རིས་མེད་པའི་སྙིང་རྗེ་དང་ཕན་སེམས་འབྱུང་ངོ་། །ཉམས་སྒྲོན་ལས། ཏིང་འཛིན་རླུང་

༣༥༠ཟིན་དྲོད་ལྡན་པས། །ཟས་དང་གོས་ཀྱི་འདུ་ཤེས་ཆུང་། །ཉོན་མོངས་ངར་འཛིན་ཕྱོགས་ཆ་དང་། །ཆོས་བརྒྱད་ཆགས་སྡང་ཀུན་བརྟག་སོགས། །ཤིན་ཏུ་ཆུང་ཞིང་ཕྲ་རབ་གནས། །འཁྲུལ་པ་ཡ་མཚན་ཐུགས་བརྩེ་བའི། །ཚད་མེད་ཐུགས་རྗེ་ཆེན་པོ་འབྱུང་། །ཞེས་སོ། །རྨི་ལམ་དུ་ཡང་སྒྲན་མོར་ཕྱུང་ནས་ཁྲུས་བྱེད་པ་ལ་སོགས་སྒྲིབ་པ་དག་པའི་རྟགས་དང་། མུན་ཁུང་དང་འདམ་རྫབ་ནས་ཐོན་པ་ལ་སོགས་ངན་སོང་ནས་ཐར་པའི་ལྟས་དང་། རང་ལས་འོད་བྱུང་ནས་སྣང་སྲིད་གསལ་བ་ལ་སོགས་བདེན་པ་མཐོང་བའི་ལྟས་དང་། ཡི་དམ་ལྷའི་ཞལ་མཐོང་གསུང་ཐོས་ལ་སོགས་འབྱུང་བར་བཤད་ཀྱང་དེ་ལ་དགའ་ཞིང་བདེན་པར་འཛིན་ན་བདུད་དུ་འགྲོ་བར་གསུངས་པས་རང་སྣང་སྒྱུ་མར་ཤེས་པར་བྱའོ། །གསང་སྒྲོན་ལས། ཐམས་ཅད་སེམས་སུ་ཤེས་པ་བདུད་ཀྱི་གླགས་མི་རྙེད། །ཅེས་སོ། །གཞན་ཡང་ཟག་མེད་མངོན་གྱུར་ནི་མ་ཐོབ། རྩ་ཁམས་ཉམས་སྣང་བཟང་པོ་ཡོད་པའི་རྣལ་འབྱོར་པ་ལ། ཉིན་དང་རྨི་ལམ་དུ་ཉམས་སྣ་ཚོགས་འབྱུང་བ་ལ་བཟང་ངན་དུ་ཞེན་ཅིང་བདེན་པར་འཛིན་ན་བདུད་ཀྱི་དབང་དུ་འགྲོ་ཞིང་། གང་ལ་ཡང་ཆགས་སྡང་མེད་པར་རང་སྣང་དངོས་མེད་དུ་ཤེས་ན་ལམ་རྟགས་ཡིན་ཏེ། དམ་པས། རྟགས་ནི་གཉིས་སུ་ཤེས་པར་བྱ་སྟེ། ཕྱི་རྟགས་བདུད་ཀྱི་མཚན་མ་བཅོ་བརྒྱད་དེ། སངས་རྒྱས་བྱང་སེམས་མཐོང་བ་དང་། འཁོར་དུ་བདག་གིས་ཆོས་ཉན་པ་དང་། རང་ཉིད་འཕགས་པའི་གཟུགས་སུ་སྣང་ནས་འཁོར་ལ་ཆོས་བཤད་པ་དང་། སྐད་ཅིག་མ་ལ་བསྐལ་པ་གྲངས་མེད་འགྱེད་ནུས་པ་དང་། རྒྱུད་སྡེ་ཐམས་ཅད་ཆགས་ཐོགས་མེད་པར་འཆད་ནུས་པ་དང་། རིགས་དྲུག་གི་སེམས་ཅན་མཐོང་བ་དང་། དེ་དག་གི་ཚེ་དང་ལས་བཟང་ངན་ཤེས་པ་དང་། དེ་ལ་སྙིང་རྗེའི་སེམས་སྐྱེ་ཞིང་དོན་བྱ་བར་འདོད་པ་དང་། རང་གི་ལུས་ལ་འོད་ཆེན་པོ་ཉིན་མཚན་མེད་པར་འབྱུང་བ་དང་། རི་དང་རྩིག་པ་ལ་མི་ཐོགས་པ་དང་། ནམ་མཁའ་ལ་འཁུར་བ་དང་། ཕྱོགས་

༣༥༡བཅུའི་སངས་རྒྱས་ཀྱིས་ཕྱག་སྤྱི་བོར་འཇོག་ནས་དབང་བསྐུར་བ་དང་། ལུང་སྟོན་པ་དང་། ཕྱོགས་གར་འདོད་དུ་ཐོགས་ཆགས་མེད་པར་འགྲོ་ནུས་པ་དང་། སེམས་ཅན་ཐམས་ཅད་ཀྱི་སྐད་དུ་ཆོས་སྟོན་ནུས་པ་དང་། ལྷ་ཀླུ་མཐུ་བོ་ཆེ་རྣམས་ཀྱིས་བདག་བཀུར་ཞིང་བཀའ་སྒྲུབ་པ་དང་། སེམས་ཅན་ཐམས་ཅད་ཀྱི་སྐད་གོ་བར་འབྱུང་སྟེ། དེ་ལ་མཚན་མར་བཟུང་ན་བདུད་ཀྱི་ལས་ཡིན་ཏེ། ཅིའི་ཕྱིར་ན། མཚན་མར་འཛིན་པ་ལ་བདུད་ཀྱིས་སྐབས་ཚོལ་ལ། མི་འཛིན་པ་ལ་སྐབས་མི་རྙེད་དོ། །ནང་ཡོན་ཏན་གྱི་རྟགས་ཆེན་པོ་བརྒྱད་དེ། སངས་རྒྱས་དང་མཉམ་པར་གཏམ་ཡང་རློམ་པ་མེད་པ་དང་། འཇིག་རྟེན་གྱི་ཁམས་མ་ལུས་པ་སྐད་ཅིག་ལ་མཐོང་ཡང་ངོམ་པ་མེད་པ་དང་། བདུད་ཀྱི་རྒྱལ་པོ་འོང་ཡང་འཇིགས་སྐྲག་མེད་པ་དང་། །ལྷ་ཡི་བུ་མོ་མཐོང་ཡང་ཆགས་སེམས་མེད་པ་དང་། ཆོས་ཉིད་བསམ་དུ་མེད་པའི་ངང་ལ་གནས་ཀྱང་ཆོས་སྤྱོད་བཅུའི་བར་མི་ཆད་པ་དང་། སྤྱོད་ལམ་ཐམས་ཅད་དུ་ཏིང་ངེ་འཛིན་དང་མི་འབྲལ་བ་དང་། འདོད་ཡོན་ལྔ་ལ་སྤྱོད་ཀྱང་ཞེན་ཆགས་མེད་པ་དང་། སྡུག་བསྔལ་གྱི་རྐྱེན་བྱུང་ཡང་ཏིང་ངེ་འཛིན་གྱི་གྲོགས་སུ་འགྲོ་བའོ། །ཞེས་གསུངས་པར་ལྟར་ཤེས་པར་བྱའོ། །བཞི་པ་འབྲས་བུ་ནི། རྩ་ཚིག་ལས། དེ་ལྟ་བུ་ཡི་རྣལ་འབྱོར་པ། །འབྱུང་བ་ལྔ་པོ་ཞིག་པའི་ཚེ། །ལྷ་ཡི་རིག་འཛིན་ཆེན་པོ་ཐོབ། །དེ་ཚེ་དེ་ལ་སངས་རྒྱས་སོ། །ཞེས་པ་ལ་གཉིས་ཏེ། རྒྱུ་མཐུན་གྱི་འབྲས་བུ་ནི། རབ་གོང་དུ་བསྟན་པ་ལྟར་མི་གཡོ་བའི་ཉམས་རྟོགས་པ་མ་བྲལ་བར་དེ་མཐར་ཕྱིན་ནས་རྣལ་འབྱོར་པ་ཚེ་འཕོས་ན། བར་དོའི་འོད་གསལ་གྱིས་བསུ། ད་ལྟའི་འོད་གསལ་གྱིས་སྐྱེས། འཆི་ཁའི་འོད་གསལ་གྱིས་མཚམས་སྦྱར་ནས་འོད་གསལ་མ་བུ་འདྲེས་ཏེ་སྐད་ཅིག་མ་ལ་འཚང་རྒྱའོ། །ཉམས་རྟོགས་འབྲིང་གི་ཚད་ནི། ཕུང་པོ་ལེན་པར་བྱེད་པའི་རྒྱུ་ལས་དང་ཉོན་མོངས་པ་རང་གྲོལ་ཏེ།

༣༥༢སྐྱེ་བ་མི་ལེན་པར་ལྷའི་རིག་འཛིན། ཅེས་པ། ལྷ་ནི་གཉིས་འཛིན་བྲལ་བའི་རིག་པ་རྣམ་པར་དག་པ་ཡིན་ལ། འཛིན་པ་མི་གཏོང་བ་སྟེ། གཉིས་འཛིན་བྲལ་བའི་རིག་པ་དྲི་མེད་དེ་ཉིད་ཏིང་ངེ་འཛིན་དུ་ཤར་ནས་སྟོབས་རྫོགས་ཏེ། སངས་རྒྱས་ཞེས་ཆོས་རྗེ་གཙང་པས་འབྲུ་བརྣན་ཏོ། །ཐ་མ་ནི། ཞི་གནས་ཀྱི་སེམས་ཅུང་ཞིག་ལས་སུ་རུང་བས་འདོད་ཁམས་སུ་མ་སྐྱེས་ལ། གཟུགས་ཁམས་དང་གཟུགས་མེད་ཀྱི་ཁམས་གང་རུང་གི་རྟེན་ལ་མཉམ་པ་ཉིད་ཀྱི་ཏིང་ངེ་འཛིན་མཐར་ཕྱིན་ཏེ། སངས་རྒྱས་སར་སེམས་སོ། །ཉམས་སྒྲོན་ལས། མི་གཡོ་ངང་ལ་རྣལ་འབྱོར་པས། །འབྱུང་བ་ལྔ་པོ་ཞིག་པ་དང་། །རབ་ནི་ཡེ་ཤེས་ཆོས་སྐུར་སྦྱོར། །འབྲིང་ནི་ཡེ་ཤེས་བར་དུ་གནས། །སྟོང་གསལ་སེམས་ལ་དབང་ཐོབ་ཅིང་། །ལྷ་ཡི་རིག་འཛིན་ཆེན་པོ་ཐོབ། །དེ་ཚེ་ཉིད་ལ་མངོན་སངས་རྒྱ། །ཞེས་སོ། །སྐྱེས་བུ་བྱེད་པའི་རྣམ་སྨིན་གྱི་འབྲས་བུ་ནི། མཉམ་པ་ཉིད་ཀྱི་ཏིང་ངེ་འཛིན་ཡིན་ཏེ། །ཉམས་སྒྲོན་ལས། མི་གཡོ་དང་གནས་རྣལ་འབྱོར་པའི། །ཐུགས་རྗེས་སྤྱོད་པ་སྣ་ཚོགས་དང་། །མི་རྟོག་ཐིག་ལའི་ཀློང་གནས་པའི། །དགོངས་པ་ཉོན་མོངས་ཀུན་བརྟགས་སྒྲིབ། ཕྲ་བ་བཅོམ་ནས་མཉམ་ཉིད་ཐོབ། །ཅེས་སོ། །གསུམ་པ་མཉམ་པ་ཉིད་ཀྱི་རྣལ་འབྱོར་ལ་བཞི་སྟེ། རང་གི་ངོ་བོ། །དཔེ། དྲོད་རྟགས། འབྲས་བུ་བསྟན་པའོ། །དང་པོ་ངོ་བོ་ནི། རྩ་ཚིག་ལས། འཁོར་དང་མྱ་ངན་འདས་པའི་ཆོས། །ཇི་ལྟ་བུར་ཡང་མི་གཟིགས་ཏེ། །ཐམས་ཅད་མཁྱེན་པ་ཉིད་དུ་གསལ། །ལོ་ཟླ་འདས་ཀྱང་དེ་བཞིན་གནས། །ཞེས་གསུངས་སོ། །གོང་གི་རྣལ་འབྱོར་གཉིས་པོའི་ཞི་ལྷག་ཉམས་རྟོགས་གཅིག་ཏུ་འདྲེས་ན་མཐར་ཕྱིན་པའི་འབྲས་བུ་ཡིན་པས། འཁོར་འདས་སྣང་སྲིད་སྣོད་བཅུད་བཟང་ངན། རྟག་ཆད། ཡོད་མེད། བདེ་སྡུག །རེ་དོགས། ཡིན་མིན་ལ་སོགས་པ་གཉིས་འཛིན་གྱི་མཚན་མ་ཐམས་ཅད་རང་གྲོལ་ཏེ།

༣༥༣ཡུལ་ཕར་སྣང་གི་རྟོག་པ་མེད་པར། རིག་པ་རང་བྱུང་གི་ཡེ་ཤེས་ཉིད་ཆོས་ཐམས་ཅད་དུ་ལྷུན་གྱིས་གྲུབ་ཅིང་། ཡུལ་ཉིད་རིག་པའི་ངོ་བོར་ཀ་དག་པ་སྟེ། སྣང་སེམས་གཉིས་མེད་ཀྱི་མཉམ་གཞག་ཆེན་པོ་མངོན་དུ་གྱུར་པའོ། །འཁོར་བ་མྱ་ངན་འདས་པའི་ཆོས། །མ་སྐྱེས་རང་སྣང་དམིགས་མེད་ཕྱིར། །ཡུལ་མེད་རང་གྲོལ་ཅིར་མི་གཟིགས། །ཐམས་ཅད་མཉམ་པ་ཉིད་དུ་གསལ། །ཞེས་སོ། །དེ་ལྟར་མཉམ་གཞག་ཏུ་ཆོས་ཐམས་ཅད་མཉམ་པ་ཉིད་མངོན་དུ་གྱུར་པའི་ངོ་བོ་ལ། །རབ་འབྲིང་ཐ་མའི་དབྱེ་བ་མེད་ཅིང་། བཞག་ཐབས། སྐྱེ་ཚུལ། བཙའ་ཐབས། བོགས་འདོན་རྣམས་ལ་འོག་མ་ལྟ་བུ་ཡུལ་ཡུལ་ཅན། མཚན་མའི་བརྟགས་དཔྱད་དང་ཉམས་ལེན་གྱི་རིམ་པ་མེད་ཀྱང་། ད་རུང་སྒོམ་པའི་ལམ་ཡིན་པས་རྗེས་ཐོབ་མཉམ་གཞག་ལ་ཁྱེར་དགོས་པ་ལ། མཉམ་རྗེས་འདྲེས་མ་འདྲེས་ཀྱི་རིམ་པ་ཡོད་དེ། མཉམ་ཉིད་ངང་ལ་མཉམ་རྗེས་ཐོབ། །ཅུང་མངའ་ཚུལ་བཟུང་རྩོད་པ་ཅན། །ཅེས་གསུངས་པས་མཉམ་གཞག་གིས་མ་ཟིན་པའི་སྤྱོད་ལམ་ཅི་འབྱུང་ངོས་བཟུང་ནས། རང་རིག་གི་འཆར་སྒོ། གཉིས་འཛིན་གྱི་རྟོག་པ་གང་བྱུང་ཁོ་རང་གི་སྟེང་དུ་མཉམ་པར་གཞག་སྟེ། གསང་སྒྲོན་ལས། ཏིང་འཛིན་རབ་ཏུ་གྱུར་པ་ན། །མ་བཅོས་སོ་མ་ལྷུག་པར་བཞག །ཅེས་སོ། །ཉིན་པར་མཉམ་རྗེས་མེད་ཀྱང་གཉིད་མ་གཉིད་ཀྱི་མཚམས་སུ་བག་ཆགས་ཀྱི་སྣང་བ་བན་བུན་འབྱུང་བ་དང་། གཉིད་དུས་སུ་རྨི་ལམ་གྱིས་མཉམ་གཞག་བར་ཆོད་མ་ཆོད་ཀྱི་ཚད་བཟུང་ཞིང་མ་ཡེངས་པའི་ངང་ལ་ཁྱེར། ཉིན་མཚན་དང་མཉམ་རྗེས་ཀྱི་དབྱེ་བ་མེད་པར་རྒྱུན་ཆགས་ནས་ཀྱང་མཉམ་པར་གཞག་མཁན་དང་། སྒོམ་པའི་བརྩོན་པ་བྱེད་མཁན། རྟོག་ཅིང་ཉམས་སུ་མྱོང་མཁན་ཁོ་རང་གི་སྟེང་དུ་བཞག་དགོས་ཏེ། རེ་ཞིག་ཡིན་ཚུལ་ཤེས་པས་མི་ཕན་ནོ། །གསང་སྒྲོན་ལས། གདགས་སུ་མེད་པའི་ཆོས་ཉིད་ལ། །མཚན་མར་བཏགས་པ་བློ་ཡིན་པས།

༣༥༤ཆོས་ཉིད་བློ་ལས་འདས་པ་ཡིན། །བློ་ཡི་བློ་གྲོས་ངོ་མཚར་ཆེ། །འདི་ནི་བློ་གྲོས་དམ་པའི་རྒྱུད། །ཅེས་སོ། །སྐྱེ་ཚུལ་གསུམ་ནི། ཟག་མེད་ཀྱི་རྟོགས་པ་དང་པོར་སྐྱེས་པ། བར་དུ་མཉམ་རྗེས་བསྲེ་བ། ཐ་མ་འདྲེས་པ་གསུམ་ལ་གཡོ་ཐོབ་བརྟན་གསུམ་དུ་ཕྱེའོ། །བཙའ་ཐབས་བོགས་འདོན་ནི། གོང་གི་ཁྱེར་ཐབས་དེ་བས་ལོགས་སུ་མེད་དོ། །སྐྱོན་སེལ་ནི་འདིར་མི་དགོས་ཏེ། ཉམས་སྒྲོན་ལས། ཁྱད་པར་ཉམས་རྟོགས་ཅིར་སྣང་ཡང་། །ཉོན་མོངས་རྩད་ཆོད་མཉམ་ཉིད་ཕྱིར། །བརྟགས་པའི་བྱེ་བྲག་འདི་ལ་མེད། །ཅེས་སོ། །ཏིང་ངེ་འཛིན་མཐར་ཕྱིན་པའི་ཚད་ནི་ལོ་ཟླ་གྲངས་ཀྱིས་བགྲངས་ཀྱང་མཉམ་གཞག་ལ་རྐྱེན་ཅིས་ཀྱང་མི་ཆོད། བརྒྱལ་ཞིང་ར་རོ་བ་དང་འདུ་ཤེས་ཐམས་པ་མི་འབྱུང་། འབྱུང་བཞིས་བསྡུས་པའི་ལུས་ལ་འཕོ་འགྱུར་བྱུང་ཡང་ན་ཚ་ལ་སོགས་པའི་རྐྱེན་ཉིད་མཉམ་གཞག་གི་ཏིང་ངེ་འཛིན་དུ་འཆར་བར་གསུངས་སོ། །གསང་སྒྲོན་ལས། སྐྱེས་བུ་གོམས་པས་གར་རྒྱུག་ལྷུང་མེད་ལྟར། །སྐྱེ་མེད་རྟོགས་ཤིང་འདྲིས་པའི་རྣལ་འབྱོར་པས། །གང་ལྟར་སྤྱད་ཀྱང་མཉམ་པ་ཉིད་ཀྱི་ངང་། ཞེས་སོ། །གཉིས་པ་དཔེ་བསྟན་པ་ནི། རྩ་ཚིག་ལས། མཉམ་ཉིད་མི་གཡོ་ཆོས་སྐུའི་ངང་། །བཟུང་བས་མི་ཟིན་ཆུ་ཟླ་འདྲ། །རྟོག་མེད་མཉམ་པ་དེ་ཉིད་ནི། །ཁྱུད་ཆེན་ནམ་མཁར་ལྡིང་དང་མཚུངས། །ཞེས་པས། དགོངས་པ་རང་གི་ངོ་བོ་དང་། རྩོལ་བ་མེད་པར་སངས་རྒྱས་ཀྱི་ས་ལ་ཕྱིན་པའི་དཔེ་གཉིས་སྟོན་ཏེ། རང་གི་ངོ་བོ་ནི་དཔེར་ན་ཆུ་དྭངས་པའི་ནང་དུ་ཟླ་བའི་གཟུགས་བརྙན་སྣང་ཡང་ཆུ་ཉིད་ལས་མ་གཡོས་པ་ལྟར། མཉམ་ཉིད་ཀྱི་དགོངས་པ་ལ་ཆོས་ཐམས་ཅད་ཡེ་ཤེས་རང་སྣང་དུ་ལྷུན་གྱིས་གྲུབ་པའོ། གཉིས་པ་ནི། དཔེར་ན་ནམ་མཁའ་ལྡིང་ལ་བྱ་བྲན་ལྟ་བུའི་རྩོལ་བ་དང་། ངམ་གྲོག་ལྟ་བུའི་གཡང་ས་ལ་དོགས་པ་དང་། འགྲོ་སར་མི་ཕྱིན་དོགས་པའི་འདུ་ཤེས་མེད་པར་ཡུད་ཙམ་གྱིས་གར་འདོད་ཕྱིན་པ་ལྟར། མཉམ་ཉིད་རྟོགས་པའི་རྣལ་འབྱོར་པས།

༣༥༥རྣལ་འབྱོར་འོག་མ་ལྟ་བུའི་རྩོལ་བ་དང་། འོག་མར་ལྟུང་གིས་དོགས་པ་དང་། །འཚང་མི་རྒྱ་དོགས་པའི་འདུ་ཤེས་མེད་པར་རྩོལ་མེད་ཀྱི་ངང་ནས་སངས་རྒྱས་ཀྱི་ས་ལ་གཤེགས་པའོ། །གསུམ་པ་དྲོད་རྟགས་བསྟན་པ་ནི། རྩ་ཚིག་ལས། ཡོ་བྱད་འདུ་ཤེས་ཐམས་ཅད་འགོག །དགེ་དང་མི་དགེ་རྣམ་རྟོག་མེད། །ཉོན་མོངས་སྒྲིབ་པ་རྣམ་པར་དག །ཉམས་ཀྱི་རྨི་ལྟས་སྣ་ཚོགས་འབྱུང་། །ཞེས་པས། ཕྱི་ནང་གསང་བ་གསུམ་ལས། གསང་བའི་དྲོད་རྟགས་ནི། ཉོན་མོངས་དང་ཁམས་དང་སྐྱེ་གནས་ཀྱི་ཟག་པ་གསུམ་དང་བྲལ་བ། །དགེ་སྡིག་གཉིས་ཀྱི་འབྲས་བུ་བདེ་སྡུག་གཉིས་ལ་རེ་དོགས་གཉིས་མེད། སྐྱེ་རྒ་ན་འཆིའི་ཆུ་བོ་བཞི་བརྒལ། བདུད་བཞི་བཅོམས་ནས་ཟག་མེད་མཉམ་ཉིད་ཀྱི་ཏིང་ངེ་འཛིན་རྒྱུན་ཆད་མེད་པར་རང་ངོ་ཤིན་ཏུ་རྣམ་པར་དག་གོ །ཉམས་སྒྲོན་ལས། མཉམ་ཉིད་ཀུན་བྲལ་ཀུན་དངོས་ཕྱིར། །ཟག་མེད་ཟས་གོས་ཞེན་པ་གྲོལ། །ཀུན་བརྟགས་ཉོན་མོངས་ཆགས་སྡང་དང་། །ངར་འཛིན་ཕྱོགས་ཆ་རེ་དོགས་དང་། །ཆོས་བརྒྱད་ལ་སོགས་རྩད་ནས་ཆོད། །འཇིགས་པ་ལྔ་བྲལ་བདུད་བཞི་བཅོམ། །འདུ་འབྲལ་མེད་པའི་དགོངས་པ་ལ། །དུས་ཕྱེད་བཏང་སྙོམས་ཆེན་པོར་གནས། །ཞེས་སོ། །ནང་རྟགས་ནི། མངོན་བར་ཤེས་པ་སྤྱན་ལྔ་དང་དྲུག་སྟེ། མ་བསྒྲིབས་རང་གསལ་མཉམ་ཉིད་ཀྱི། །ཟག་མེད་ཤེས་རབ་སྤྱན་མངའ་བས། །མངོན་པར་ཤེས་པ་རྣམ་པ་དྲུག །གསལ་དང་རྒྱུན་གྱིས་ཁྱད་པར་འཕགས། །ཞེས་སོ། །ཕྱི་རྟགས་ནི། གཞན་སྣང་གི་རྫུ་འཕྲུལ་སྣ་ཚོགས་པས་འགྲོ་བ་འདུལ་བ་སྟེ། མཉམ་ཉིད་ངང་ལས་མ་གཡོས་བཞིན། །ཞིང་ཁམས་སྟོང་གསུམ་བརྒྱ་སྟོང་ཕྲག །ཐུགས་རྗེས་རང་བྱུང་སྤྲུལ་པ་ཡི། །རྔོན་དང་སྨད་འཚོང་ཤན་པ་དང་། །ལྷ་མིའི་བསོད་ནམས་ལྡན་ལ་སོགས། །གང་ལ་གང་ལྟར་འདུལ་བ་བཞིན། །མངོན་ཤེས་རྫུ་འཕྲུལ་སྣ་ཚོགས་དང་། །

༣༥༦སྤྲུལ་པའི་ལུས་ཀྱིས་འདུལ་བར་བྱེད། །རང་བྱུང་ཆོ་འཕྲུལ་བཞིར་སྣང་བ། །ཉི་ཟླ་ཞོན་ནས་མཁའ་ལ་འགྲོ། །རི་བྲག་ལ་སོགས་ཐོགས་མེད་དང་། །ཆུ་ལ་མི་བྱིངས་མེས་མི་ཚིག །དུག་དང་མཚོན་དང་ནད་མི་ཚུགས། །ཆུ་རྒྱུན་བཟློག་དང་རླུང་མི་འགུལ། །སྲེག་པའི་བསྐལ་པ་གཞིལ་ལ་སོགས། །ཉི་མའི་དཀྱིལ་འཁོར་འབུམ་འབྱེད་དང་། །སྐམ་པར་ཆུ་ཕྱུང་བྱེ་མ་གསེར། །སོལ་བར་ལྗོན་ཤིང་དུག་ལ་སྨན། །མི་སྣང་བ་དང་མངོན་པར་སྤྲུལ། །རི་རབ་བཀྱག་ནས་གསོར་བ་དང་། །འཇིག་རྟེན་རྒྱང་མར་འཕེན་པ་དང་། །སྟོང་གསུམ་ཡུངས་འབྲུ་ཤོང་བ་དང་། །ཡུངས་འབྲུས་སྟོང་གསུམ་ཁེངས་པ་དང་། །གཞན་ཡང་ཇི་ལྟར་འདོད་པ་བཞིན། །ཚེ་དང་དུས་ལ་བསྲིང་བསྟུང་དང་། །འགུགས་དང་གཏད་དང་འཆིང་དང་དགྲོལ། །གསོ་གསང་ཕམ་རྒྱལ་ཐོགས་མེད་འགྲུབ། །རང་བྱུང་ཐུགས་རྗེས་བྱིན་གྱིས་བརླབ། །འགྲོ་བ་རིགས་དྲུག་མུ་སྟེགས་དང་། །ལམ་དང་ས་ལ་གནས་བ་དག །སོ་སོའི་སྐད་དང་ཆ་མཐུན་པས། །གང་ལ་གང་འཚམས་ཆོས་སྟོན་ནས། །རྣལ་འབྱོར་ཏིང་འཛིན་རྩལ་སྟོབས་ཀྱིས། །འཇིག་རྟེན་བརྒྱ་སྟོང་གཡོས་ནས་ཀྱང་། །ངོ་མཚར་ཆེར་སྐྱེད་དགའ་ཞིང་མགུ། །ནང་གཡོས་པ་ཡང་རིམ་གཡོ་བྱེད། །གསང་བ་སྔགས་ཀྱི་སྒྲ་བསྒྲགས་པས། །ཀུན་ཀྱང་རྨད་བྱུང་སྔགས་ཀྱི་སྒྲར། །གྲགས་པས་བདུད་འདུལ་ངན་སོང་སྤྱོད། །ཐེག་ཆེན་ལམ་འཛུད་འགྲོ་དོན་མཛད། །ཅེས་སོ། །བཞི་པ་འབྲས་བུ་ནི། མཉམ་པ་ཉིད་ཀྱི་ངོ་བོ་ལ། །ལམ་དང་ས་ཡི་རིག་འཛིན་ཐོབ། །དེ་ཡང་བགྲོད་དུ་མེད་པ་སྟེ། །དེ་ཚེ་ཉིད་ལ་སངས་རྒྱས་ཐོབ། །ཅེས་པ་ལ། ལམ་དང་སའི་རིག་འཛིན་ཟག་མེད་ཀྱི་རྟོགས་པ་མངོན་གྱུར་མཐོང་ལམ་ཡིན་ཅིང་། སྒོམ་ལམ་ལ་གསང་སྔགས་ནང་པས་ལམ་གྱི་རིག་འཛིན་བཞི་དང་། ཕ་རོལ་ཏུ་ཕྱིན་པས་འཕགས་པའི་ས་བཅུར་བཞེད་པ་གང་ཡང་མཉམ་གཞག་ཏུ་ཆོས་ཉིད་མངོན་

༣༥༧སུམ་དུ་རྟོགས་པ་དེའི་རྒྱུན་གོམས་པར་བྱེད་ནས། རྗེས་ཐོབ་ཏུ་ཤེས་སྒྲིབ་ཕྲ་རགས་མངའ་བ་དེ་སྦྱང་བའི་རིམ་པ་ཡིན་པ་ལྟར། འདིར་ཡང་ཟག་མེད་མཉམ་པ་ཉིད་མངོན་སུམ་དུ་རྟོགས་པའི་ངང་ལ་གོམས་པར་བྱེད་ཅིང་། རྗེས་ཕྲ་རགས་མཉམ་གཞག་ལ་བསྐྱལ་བ་ཡིན་པས། རང་གི་ངོ་བོ་ལམ་གྱི་རིག་འཛིན་བཞི་དང་འཕགས་པའི་ས་བཅུའི་ཐད་ཡིན་གསུངས། འོག་མའི་ས་ལམ་གྱི་རིག་འཛིན་དང་། འཕགས་པ་རྣམས་བསྐལ་པའི་གྲངས་དང་མི་ཚེའི་དུས་ལ་ལྟོས་ནས་ཤེས་སྒྲིབ་རིམ་གྱིས་སྦྱོང་བ་དང་མི་འདྲ་སྟེ། འདིར་ཤེས་སྒྲིབ་གཉིས་ཅན་གཟུང་འཛིན་གྱི་ཆོས་ཐམས་ཅད་གཉིས་མེད་རང་བྱུང་གི་ཡེ་ཤེས་སུ་རྟོགས་ཤིང་། དེའི་ངང་ལ་རྒྱུན་གོམས་པར་བྱེད་ཅིང་། རྗེས་ཤེས་མཉམ་གག་ལ་བསྐྱལ་བ་ཁོ་ན་ཡིན་ལ། །འདི་ལ་རབ་འབྲིང་གཉིས་ཏེ། རབ་མཉམ་རྗེས་མེད་པ་ནི། རྒྱུ་མཐུན་དང་སྐྱེས་བུ་བྱེད་པའི་འབྲས་བུ་ཉིད་ཚེ་ལྷུན་གྱིས་གྲུབ་པའི་ཏིང་ངེ་འཛིན་ཐོབ་ནས། རང་ངོ་ལ་སྐྱེ་འཆི་མེད་པ་རྡོ་རྗེའི་སྐུ་བརྙེས་ནས་རྣམ་སྨིན་གྱི་འབྲས་བུ་སངས་རྒྱས་པའོ། །འབྲིང་མཉམ་གཞག་ཏུ་ཟག་མེད་ཀྱི་ཏིང་ངེ་འཛིན་ཡོད་ཀྱང་རྗེས་ཐོབ་ཏུ་མཚན་མའི་རྟོག་པ་ཡོད་པ་ཙམ་ལ་ཚེ་འཕོས་པ་ནི། འཆི་ཀའི་གནད་གཅོད་ལ་སོགས་པའི་རྐྱེན་གྱིས་བྱས་ཏེ། ཏིང་ངེ་འཛིན་ཅུང་ཞིག་བརྗེད་སོང་ཡང་ཕྱི་དབུགས་སོང་ནས་ནང་དབུགས་མ་སོང་གི་བར་རམ་ཐ་མ་ཡང་ལུས་སེམས་བྲལ་མ་ཐག་ཏུ་རྒྱུ་མཐུན་ནམ། སྐྱེས་བུ་བྱེད་པའི་འབྲས་བུ། རྗེས་སུ་དྲན་པ་དྲུག་འབྱུང་སྟེ། སྐབས་འདིར་བར་དོ་ཡིན་པར་དྲན་པ། དེར་བླ་མ་དམ་པ་དྲན་པ། དེས་བསྟན་པའི་གདམས་ངག་དྲན་པ། སྔར་གྱི་ཉམས་ལེན་རྟོགས་པ་དྲན་པ། དེ་མ་ཐག་ཏུ་ཆོས་ཉིད་མ་བུ་འབྲེས་པའི་སྐད་ཅིག་མ་དེ་ལ་གཟུང་འཛིན་རང་གྲོལ་ཀ་དག་ཆེན་པོར་སངས་རྒྱས་པ་དང་། སྤྱན་ལྔ་མངོན་ཤེས་དྲུག་ལ་སོགས་པའི་ཡོན་ཏན་མ་ལུས་རྫོགས་

༣༥༨པ་ནི་རྣམ་སྨིན་གྱི་འབྲས་བུའོ། །ཉམས་སྒྲོན་ལས། མཉམ་ཉིད་ངང་གནས་དགོངས་སྤྱོད་དང་། །དགོངས་པའི་ངང་གནས་ཤེས་རབ་ཀྱིས། །ཤེས་སྒྲིབ་རགས་དང་འབྲིང་བཅོམ་ནས། །བཙལ་བ་མེད་པར་ལྷུན་འགྲུབ་ཐོབ། །ཅེས་པ་དང་། །མཉམ་པ་ཉིད་ཀྱི་ངོ་བོ་ལ། །ཟག་པ་ཀུན་བྲལ་རིན་ཆེན་འཛིན། །སྐྱེ་འཆི་འཕོ་འགྱུར་མེད་པའི་ཕྱིར། །དེ་ཚེ་ཉིད་ལ་མངོན་སངས་རྒྱས། །ཞེས་པའི་ལུང་གཉིས་པོ་འདི་རབ་འབྲིང་གཉིས་ཀའི་ལུང་ཐུན་མོང་མ་ཡིན་ནོ། །བཞི་པ་ཡེ་ཤེས་ལྷུན་གྲུབ་ལམ་མཐར་ཕྱིན་པའི་རྣལ་འབྱོར་ནི། རྩ་ཚིག་ལས། རང་གི་ངོ་བོ་ཆོས་ཀྱི་སྐུ། །དཔེ་ནི་དཔེ་མེད་ནམ་མཁའ་འདྲ། །རྟགས་ནི་སངས་རྒྱས་ཆོ་འཕྲུལ་འབྱུང་། །འབྲས་བུ་སངས་རྒྱས་དེ་ཉིད་དོ། །ཞེས་པས། ངོ་བོ་དང་། དཔེ་དང་། རྟགས་དང་། འབྲས་བུ་བཞིའོ། །དང་པོ་ངོ་བོ་ལ་གཉིས་ཏེ། རྣམ་པ་ནི། སྐུ་ལྔ་ལྷུན་གྲུབ་སངས་རྒྱས་ཀྱི་རྒྱལ་ཚབ་ཆེན་པོར་བཞུགས་པ་སྟེ། ལྷུན་གྲུབ་རིག་འཛིན་ཅེས་པའི་དོན་ནོ། །ཉམས་སྒྲོན་ལས། རང་བྱུང་ལྷུན་གྲུབ་ཆོས་ཀྱི་སྐུ། །རང་གི་རྒྱལ་ཚབ་སྟོན་པར་བྱེད། །ཅེས་སོ། །དགོངས་པ་ནི་རང་སྣང་ལྷུན་གྲུབ་ཆོས་ཀྱི་སྐུ་སྟེ། སྐྱེ་མེད་རང་བྱུང་མངོན་བྱས་པའི། །རྩོལ་མེད་བདེ་ཆེན་ལྷུན་གྲུབ་ལ། །མཐའ་དབུས་སྐྱེ་འགག་རྣམ་དག་དབྱིངས། །སྐུ་ལྔ་མ་འདྲེས་ཀུན་ཏུ་བཟང་། །ཞེས་སོ། །གཉིས་པ་དཔེ་ནི་ཆོས་ཅན་མཚན་མའི་དཔེས་མཚོན་མི་ནུས་ཏེ། ཆོས་ཉིད་ལྷུན་གྲུབ་ཀྱི་ནམ་མཁའ་ནི་མཐར་ལམ་ཆེན་པོ་དེ་ཉིད་དང་། སངས་རྒྱས་མ་གཏོགས་པ་གཞན་གང་གིས་ཀྱང་ཤེས་པར་མི་ནུས་པའོ། །ཕྱོགས་རེའི་ཆ་ནས་དགོས་འདོད་འབྱུང་། ཅི་བསམ་འགྲུབ། ཡེ་ཤེས་གསལ། མ་རིག་སེལ་བའི་དཔེ་དུ་མ་སྟེ། དེ་ཉིད་ལས། ནམ་མཁའི་དཔེ་ལྟར་མཚོན་དུ་མེད། ཆ་ཙམ་དཔག་བསམ་རིན་ཆེན་ཤིང་། །མེ་ལོང་ཉི་མའི་སྙིང་བོ་འདྲ།

༣༥༩ཞེས་གསུངས་སོ། །གསུམ་པ་རྟགས་ཕྱི་ནང་གསང་གསུམ་ནི། སངས་རྒྱས་དང་མཚུངས་ཏེ། གསང་རྟགས་སྒྲིབ་གཉིས་བྲལ་བའི་ཡེ་ཤེས་རྒྱས། །ནང་རྟགས་ཟག་མེད་ཀྱི་མངོན་ཤེས་དང་། རྫུ་འཕྲུལ་ཡོན་ཏན་མཐའ་ཡས་པ་ལ་དབང་འབྱོར། ཕྱིའི་རྟགས་སྐུའི་རྫུ་འཕྲུལ། གསུང་གི་ཆོས་བརྗོད། ཐུགས་རྗེས་སུ་བསྟན་པའི་ཆོ་འཕྲུལ་སྣ་ཚོགས་མཛད་པས་ནམ་མཁས་ཁྱབ་ཚད་ཀྱི་སེམས་ཅན་ཐམས་ཅད་ཀྱི་དོན་མཛད་པའོ། །ཉམས་སྒྲོན་ལས། རྟགས་ནི་སངས་རྒྱས་རྫུ་འཕྲུལ་དང་། །ཡོན་ཏན་སྣ་ཚོགས་རང་བཞིན་རྫོགས། །མ་བསྒྲིབས་ཀུན་གསལ་མངོན་ཤེས་དྲུག །རྒྱུ་རྐྱེན་མེ་ལོང་ཚུལ་གཟིགས་པའོ། །ཡུལ་དང་མཁྱེན་ཚད་རྒྱལ་བ་དང་། །འདྲ་ལ་བག་ལ་ཉལ་བས་ཕྱེ། །ཞེས་སོ། །བཞི་པ་འབྲས་བུ་ནི། སངས་རྒྱས་དང་དགོངས་པ་ཡོན་ཏན་ཐམས་ཅད་འདྲ་ཡང་བག་ལ་ཉལ་ཡོད་མེད་ཀྱི་ཁྱད་ཡོད་དེ། འདི་འབྲས་བུ་དངོས་མ་ཡིན་མཐར་ལམ་ཡིན་པའི་དོན་གྱིས་བག་ལ་ཉལ་ཞེས་བྱ་བའི་ཕྲ་བ་གཉེན་པོ་ཡེ་ཤེས་དང་མི་འབྲལ་བ་དང་། གོང་དུ་བསྙེན་བཀུར་བའི་གནས་སངས་རྒྱས་དང་། མར་དོན་བྱ་བའི་གནས་སེམས་ཅན་དུ་སྣང་ཆ་ནམ་མཁའི་འཇའ་ལྟ་བུར་མཚན་མའི་སྒྲིབ་གཡོགས་མེད་ཀྱང་རང་སྣང་ཙམ་གཅིག་མངའ་བ་དེ། གཞན་རྐྱེན་ལ་མི་ལྟོས་པར་རང་རིག་པའི་ཡེ་ཤེས་ཆེན་པོས་སྐད་ཅིག་མ་ལ་རྟོགས་པ་གྲོལ་བ་དུས་མཉམ་སྟེ་སངས་རྒྱས་པས། གཡོ་ཐོབ་བརྟན་གསུམ་དུ་ཕྱེའོ། །ཉམས་སྒྲོན་ལས། ལྷུན་གྲུབ་ཆེན་པོའི་དགོངས་སྤྱོད་དང་། །མཐའ་བྲལ་འོད་གསལ་འདུས་མ་བྱས། །དམིགས་མེད་རང་རིག་ཤེས་རབ་ཀྱིས། །སྐད་ཅིག་ཉིད་ལ་ཐ་མ་ཡི། བག་ལ་ཉལ་བཅོམ་དེ་བཞིན་གཤེགས། །ཞེས་སོ། །དོན་གསུམ་པ་རྗེས་སུ་འབྲས་བུ་ཐོབ་ཚུལ་ནི། རྣལ་འབྱོར་པས་གོང་དུ་བསྟན་པ་ལྟར་སྔོན་འགྲོ་རྣམས་ཀྱིས་རྒྱུད་སྣོད་དུ་རུང་བར་བྱས་ནས། དངོས་

༣༦༠གཞི་རྣལ་འབྱོར་བཞི་ལ་གཡོ་ཐོབ་བརྟན་གསུམ་དུ་ཕྱེས་པས། རིམ་པ་དང་པོ་གཞི་གནས་ལམ་བརྟེན་ན། ཐོས་བསམ་གྱི་གོ་བ་བཟང་པོ་ཡོད་ཀྱང་སེམས་ལས་སུ་མི་རུང་བས། འགལ་རྐྱེན་སྤང་བ་ལ་སོགས་རྣལ་འབྱོར་དང་པོར་བསྟན་པའི་རིམ་པ་ལྟར་ཉམས་སུ་བླངས་པས་སེམས་ལས་སུ་རུང་པའི་ཞི་གནས་ཁྱད་པར་ཅན་སྙེན་ལ། དེ་ཡང་རང་རིག་རྟོགས་པའི་ཡེ་ཤེས་ཀྱི་མ་ཁྱབ་ན་འཇིག་རྟེན་པའི་བསམ་གཏན་དུ་གོལ་བས། རྣལ་འབྱོར་གཉིས་པར་ཅི་ལྟར་བསྟན་པའི་རིམ་པ་སོ་སོར་དཔྱོད་པའི་ཤེས་རབ་ཀྱིས་སྣང་སྲིད་ཆོས་སྐུར་རྟོགས་པར་བྱེད་ཅིང་། དེ་ཡང་ཟག་མེད་མངོན་དུ་མ་གྱུར་ན་ཟག་བཅས་ཀྱི་ཉམས་རྟོགས་ཐམས་ཅད་མི་རྟག་ཅིང་འགྱུར་བས། རྣལ་འབྱོར་གསུམ་པར་ཅི་ལྟར་བསྟན་པ་བཞིན། །ཡེང་མེད་ཀྱི་ངང་ལས་མཉམ་གག་ཆེན་པོར་གོམས་པ་མཐར་བསྐྱལ་ཏེ། རྣལ་འབྱོར་བཞི་པའི་བག་ལ་ཉལ་གྱི་སྒྲིབ་པ་རང་གྲོལ་ནས་གཞི་སེམས་ཉིད་རང་བྱུང་གི་ཡེ་ཤེས་ལ་རང་སྣང་ལ་སྐུ་ལྔ་ལྷུན་གྱིས་གྲུབ་པ་མངོན་དུ་བྱས་ཏེ། རང་བཞིན་སྐྱེ་བ་མེད་པ་ཆོས་ཀྱི་སྐུ། །རོལ་པ་འགགས་པ་མེད་པ་སྤྲུལ་པའི་སྐུ། །མཚན་ཉིད་དབྱེར་མེད་ལོངས་སྤྱོད་རྫོགས་པའི་སྐུ། །ཐམས་ཅད་རིག་པ་རང་བྱུང་གི་ཡེ་ཤེས་ལས་མ་གཡོས་པ་ངོ་བོ་ཉིད་ཀྱི་སྐུ། འཁྲུལ་གྲོལ་ལམ་གསུམ་དུ་འཕོ་འགྱུར་མེད་པ་རྡོ་རྗེའི་སྐུ། སྐུ་ལྔ་ཡོངས་རྫོགས་དཔལ་ཀུན་ཏུ་བཟང་པོ་མངོན་དུ་གྱུར་པའོ། །ཉམས་སྒྲོན་ལས། ཀུན་སངས་ཀུན་དངོས་རྫོགས་སངས་རྒྱས། །རང་བྱུང་ཡེ་ཤེས་མངོན་བྱས་པས། །སྤང་ཐོབ་གཉིས་མེད་དེ་བཞིན་ཉིད། །སྐུ་དང་གསུང་ཐུགས་ཡོན་ཏན་ལས། །བསམ་གྱིས་མི་ཁྱབ་མ་འདྲེས་རྫོགས། །འབྲས་བུའི་ཀློང་དུ་ཤེས་པར་གྱིས། །ཉམས་རྟོགས་སྣ་ཚོགས་སྣང་བ་དང་། །མཐར་ཕྱིན་ཡོན་ཏན་ཀུན་རྫོགས་ཀྱང་། །ཆོས་དབྱིངས་འཕེལ་འགྲིབ་མེད་པའི་ཕྱིར། །གཞི་ལས་གཡོས་པ་རྡུལ་ཙམ་མེད། །ཅེས་སོ། །དེ་ལྟར་སྔོན་འགྲོ་དང་དངོས་གཞི་རྗེས་གསུམ་

༣༦༡གྱིས་རྫོགས་པ་ཆེན་པོ་ཉམས་སུ་བླང་བའི་ཡི་གེ་འདི་ནི། རྩ་ཆོག་ཉམས་རིམ་བཞི་པ་དང་། དེའི་རྒྱ་བསྐྱོར་དགའ་རབ་རྡོ་རྗེ་ཉིད་ཀྱིས་མཛད་པའི་ཉམས་སྒྲོན་དང་། རྩ་ཚིག་གི་རབ་དབྱེད་འཇམ་དཔལ་བཤེས་གཉེན་གྱིས་མཛད་པར་བཞེད་པ་དང་། དམ་པ་བདེ་གཤེགས་པའི་ཡིག་ཆུང་ཉམས་ཀྱི་མན་ངག་གོལ་སྒྲིབ་སུམ་བཅུ་རྩ་དྲུག །བཙའ་ཐབས་དྲུག་པ། བསམ་གཏན་སྤྱི་འགྲེལ། ཆོས་རྗེ་གཙང་པས་མཛད་པའི་དོན་གསལ། རྟོགས་ལྡན་ཤཱཀྱ་རྡོར་བའི་ཐེག་པ་སྤྱིའི་ནང་དུ་རིམ་སྐྱེས་པའི་ཉམས་ལེན་བཞིའི་སྐབས་རྣམས་ཀྱི་ཚིག་དོན་གང་མཁོ་སྐབས་སུ་མ་ནོར་བླངས་ཤིང་། ཉམས་ལེན་གྱི་རིམ་པ་དངོས་གཞི་སྙན་བརྒྱུད་ཐོར་བུར་ཡོད་པ་རྣམས་ལེགས་པར་བསྒྲིགས་ཏེ། མན་ངག་གི་རྒྱུད་གཞན་ནས་ཀྱང་ལུང་གིས་ཁ་བསྐངས་ཤིང་རང་གིས་ཉམས་སུ་མྱོང་ཚུལ་ལ་བརྟེན་ནས། ངེས་པའི་དོན་ལ་བློ་གཅིག་ཏུ་གཞོལ་བའི་སྤྲང་པོ་ནམ་མཁའ་རྡོ་རྗེས་ཕྱི་རབས་ཀྱི་གང་ཟག་གདམས་ངག་ཉམས་སུ་ལེན་པ་རྣམས་ལ་ཕན་པའི་བློས། ཆུ་མོ་བྱ་ལོ་ཟླ་བ་ལྔ་པའི་ཡར་ཚེས་ལ་བླ་མ་དམ་པའི་བཞུགས་གནས་དཔལ་གནམ་སྟེང་རི་ཁྲོད་དུ་སྦྱར་བ་འདིས། སེམས་ཅན་ཐམས་ཅད་བདེ་བླག་ཏུ་རང་གྲོལ་ནས། སྐུ་ལྔ་ལྷུན་གྱིས་གྲུབ་པ་དཔལ་ཀུན་ཏུ་བཟང་པོ་མངོན་དུ་བྱེད་པར་གྱུར་ཅིག །མངྒ་ལམ།། །།

༣༦༢

Other Information

Information about Unicode Tibetan and the digitization of this text

As the only available unicode Tibetan text at the time, Nitartha International's version of the Gdams ngag mdzod Paro Edition of the gdams ngag mdzod is provided here. However, note that it has not been thoroughly edited and that there may also be mistakes introduced through the conversion process. Eventually we will provide a fully edited version of the entire Shechen Edition, entered and edited multiple times by Pulahari Monastery in Nepal, but as of spring 2015 that project has not been finished. Note that the ཤོག་ལྷེ་ numbers that appear throughout were added by Nitartha Input Center at the time of input. Provided by Nitartha International Document Input Center. Many thanks to Person:Namdak, Tenzin and Person:Wiener, G. for help with fonts and conversion.