Wylie:'phags pa spyan ras gzigs kyis grub chen mi tra dzo ki la gsungs pa'i phyag rgya chen po sems nyid ngal gso'i gzhung 'grel snying po bsdus pa

From gDams Ngag mDzod
Jump to navigation Jump to search


Upload a file
Click the picture above to view the original manuscript.

འཕགས་པ་སྤྱན་རས་གཟིགས་ཀྱིས་གྲུབ་ཆེན་མི་ཏྲ་ཛོ་ཀི་ལ་གསུངས་པའི་ཕྱག་རྒྱ་ཆེན་པོ་ ་ ་ ་
'phags pa spyan ras gzigs kyis grub chen mi tra dzo ki la gsungs pa'i phyag rgya chen po sems nyid ngal gso'i gzhung 'grel snying po bsdus pa
The Quintessence: A Commentary on the Root Text of the Great Seal Resting in the Nature of Mind That Noble Avalokiteshvara Taught the Mahāsiddha Mitrayogin

Damngak Dzö Volume 16 (མ་) / Pages 525-552 / Folios 1a1 to 14b7


Property "Author" has a restricted application area and cannot be used as annotation property by a user.


[edit]
XXX འཕགས་པ་སྤྱན་རས་གཟིགས་ཀྱིས་གྲུབ་ཆེན་མི་ཏྲ་ཛ་ཀི་ལ་གསུངས་པའི་ཕྱག་རྒྱ་ཆེན་པོ་སེམས་ཉིད་ངལ་གསོའི་གཞུང་འགྲེལ་སྙིང་པོ་བསྡུས་པ་ཞེས་བྱ་བ་བཞུགས་སོ། །
XXX ཨོཾ་སྭ་སྟི་སིདྡྷཾ། འཇིག་རྟེན་མགོན་པོ་སྙིང་རྗེའི་གཏེར། །བླ་མ་མཆོག་ལ་གུས་བཏུད་ནས། །རང་གི་སེམས་ཉིད་ངལ་གསོ་བའི། །གཞུང་འགྲེལ་སྙིང་པོ་ཅུང་ཟད་བསྡུ། །འདི་ལ་གཉིས། ལོ་རྒྱུས་དང༌། གདམས་པ་དངོས་སོ། །དང་པོ་ནི། འཕགས་པ་སྤྱན་རས་གཟིགས་ཀྱི་རྣམ་པར་འཕྲུལ་པ་གྲུབ་ཆེན་མི་ཏྲ་ཛོ་ཀི་ཞེས་འཇིག་རྟེན་ན་ཡོངས་སུ་གྲགས་པ་དེ་ནི་རྒྱ་གར་འཕགས་པའི་ཡུལ་གྱི་ཤར་ཕྱོགས་ར་ཌཱའི་ཡུལ་གྱི་གྲོང་ཁྱེར་ཆེན་པོ་རྒྱལ་རིགས་སུ་སྐུ་འཁྲུངས། ཆུང་ངུའི་དུས་ནས་དམ་པའི་རིགས་ཡོངས་སུ་སད་དེ་རྒྱལ་སྲིད་མཆིལ་མའི་ཐལ་བ་བཞིན་དུ་བོར་ཏེ་ཆོས་ལ་བྱོན། དེའི་ཚེ་གྲུབ་པ་བརྙེས་པའི་གཏམ་ངོ་མཚར་བ་ཉི་ཤུ་ཞེས་འཕགས་དང་མཁས་པ་རྣམས་ཀྱི་རྣ་བའི་རྒྱན་དུ་གྱུར་པ་ནི་འདི་ཡིན་ཏེ། ཐོག་མར་ཏིལླི་པ་དངོས་ཀྱི་སློབ་མ་རོལ་པའི་རྗེས་སུ་བཟུང་ནས་ཁ་སར་པ་ཎིར་ལོ་བཅུ་གཉིས་སུ་བསྒོམ་པས་རྡོ་རྗེའི་ཤིང་གི་མཎྜལ་མེ་ལོང་ལྟར་འཇམ་པའི་སྟེང་དུ་འཕགས་པ་སྤྱན་རས་གཟིགས་འཁོར་དང་བཅས་མངོན་སུམ་དུ་བྱོན་ནས་ཆོས་བསྟན་
XXX པས་གྲུབ་པ་བརྙེས་པ་ནི་དང་པོ་སྟེ། མཚན་ནི་ཨ་ཛི་ཏ་མི་ཏྲ་གུཔྟ་སྟེ་མི་ཕམ་སྦས་པའི་བཤེས་གཉེན་ཞེས་བྱའོ། །རལ་གཅིག་མས་ཐབས་ལམ་བསྟན་ཏེ་གང་འདོད་ཐམས་ཅད་ཤིང་སྟན་མདུན་དུ་བྱས་ནས་གསོལ་བ་བཏབ་པས་འབྱུང་བ་ནི་གཉིས་པའོ། །ཨོ་ཏནྟ་པཱུ་རི་ན་དགེ་འདུན་སྟོང་ཕྲག་བཅུ་གཉིས་གནས་པ་ནང་མ་མཐུན་པ་ལས་གཅིག་གི་ཕྱོགས་བུར་ཤིང་རྒྱལ་པོས་བྱས་ཏེ་དམག་དྲངས་པ་འཁོར་ལོ་འཕངས་པས་དམག་ཐམས་ཅད་སྐྲག་པར་གྱུར་ཏེ་བྲོས། དགེ་འདུན་དང་གཙུག་ལག་ཁང་ལ་གནོད་པ་མེད་པ་ནི་གསུམ་པའོ། །རྒྱལ་པོ་ཤིང་རྟ་ཅན་གྱི་རིང་ལ་བ་ར་ཎཱ་སའི་དཔུང་ཚོགས་རྡུལ་གྱིས་ཉི་མ་འགྲིབ་པ་ལྟ་བུས་མ་ག་དྷའི་སངས་རྒྱས་ཀྱི་བསྟན་པ་གཞོམ་པར་རྩོམ་པ་ལ་སྐུ་ཅེར་བུས་བྱས་ནས་གད་རྒྱངས་བསྒྲགས་པས་ས་གཡོས་ཤིང་ཕྱུགས་ཐམས་ཅད་རེངས་པར་མཛད་པས་རྒྱལ་པོས་བཟོད་པ་ཕུལ་ཏེ་རེངས་པ་སླར་ཡང་ཕྱིར་བཟློག་པ་ནི་བཞི་པའོ། །རྒྱལ་པོ་གྲགས་པ་སྡེ་བཞི་དཔང་དུ་བཙུགས་ཏེ་ཤིང་སྟན་གུལ་ནས་གསེར་སྲང་སྦྱིན་ཞིང་
XXX སངས་རྒྱས་པ་མུ་སྟེགས་པ་ལ་འཇུག །བསྒུལ་མ་ནུས་ན་མུ་སྟེགས་པ་སངས་རྒྱས་པ་ལ་འཇུག་པའི་ཆད་བྱས་ནས་ཐང་ཡངས་པར་ཤིང་སྟན་བོར་བས་ཅུང་ཟད་ཀྱང་བསྒུལ་མ་ནུས་ཏེ་མུ་སྟེགས་པ་རྣམས་བསྟན་པ་ལ་བཙུད་པ་ནི་ལྔ་པའོ། །རྒྱལ་པོ་ཨུ་པ་ཏྲ་ཞེས་བྱ་བས་མི་གཙང་བའི་དོང་གི་ཁ་གོས་ཀྱིས་གཡོགས་ཏེ་དེར་བླ་མ་བཞུགས་སུ་བཅུག་པས་དོང་དུ་ལྷུང༌། ཁ་ཤིང་དང་རྡོ་བ་མང་པོས་བཅད་པ་ལ་བླ་མ་ཚོང་དུས་བྱོན་ནས། ང་འདི་ནས་རྒྱལ་པོའི་ཕོ་བྲང་དུ་སྤྱན་དྲངས་ཤིག་གསུངས་པ་ལ་རྒྱལ་པོ་འགྱོད་ནས་ཞབས་སྤྱི་བོས་བླངས་པ་ནི་དྲུག་པའོ། །སླར་རྒྱལ་པོ་དེས་ཤིང་སྲེག་ཏུ་བཅུག་ནས་དེའི་སྟེང་དུ་བླ་མ་བཞུགས་ཏེ་ཞག་གསུམ་དུ་མེ་སྦར་ཡང་མ་ཚིག་པ་ནི་བདུན་པའོ། །ཝ་ར་ཎཱ་སའི་རྒྱལ་པོ་ཟབ་མོའི་ཚིགས་སུ་བཅད་པ་ལྔ་པ་བཀའ་སྩལ་པས་ནམ་མཁའ་ལས་མེ་ཏོག་གི་ཆར་ཕབ། ལྷའི་བུས་བདུད་རྩིའི་བུམ་པ་འདྲེན་པའི་སྣང་བ་བསྟན་ཏེ་བརྒྱད་པའོ། །རྒྱལ་པོས་དབང་ཞུས་བས་རྡུལ་ཚོན་ཐམས་ཅད་རིན་པོ་ཆེ་ལས་བྱ་དགོས་པར་བཀའ་སྩལ་པ་ན། རྒྱལ་པོ་སྒྱུ་མས་བསླུས་ཀྱིས་དོགས་པས་འགྱོད་པ་སྐྱེས་པ་ན་ནམ་མཁའ་ལ་འཕགས་ཏེ་སྤྲིན་གྱིས་དབུས་ན་བཞུགས་པ་བསྟན་པ་ནི་དགུ་པའོ། །དེ་ནས་འགྱོད་པ་དྲག་པོས་ཞག་བདུན་དུ་གསོལ་བ་བཏབ་པས་རྫིང་བུའི་སྟེང་དུ་བཞུགས་པ་ནི་བཅུ་པའོ། །དེ་ནས་རྒྱལ་པོས་གྲོང་ཁྱེར་འབུམ་ཕྲག་བཅུ་དྲུག་བླ་མའི་ཆ་རྐྱེན་དུ་ཕུལ་བས་བླ་མས་སྦྱིན་གཏོང་གི་ཁང་པ་བརྩིགས་ནས་ལོ་གསུམ་དུ་སྦྱིན་གཏོང་མཛད། ལོ་གསུམ་སོང་བ་དང་གར་བཞུད་ཆ་མེད་པ་ནི་བཅུ་གཅིག་པའོ། །དེ་ནས་ལྷོ་ཕྱོགས་ཀུ་རུ་བི་ཧཱ་ར་ཉེ་བའི་གནས་ན་གནོད་སྦྱིན་གཉིས་ཀྱིས་ཉིན་རེ་བཞིན་གྲོང་ཁྱེར་གྱི་རྒན་པ་རེ་དང་གཞོན་པ་རེ་ཟ་བ་ཡོད་པ་བཏུལ། ལྷ་ཁང་ཡང་བཞེངས་ཏེ་བཅུ་གཉིས་པའོ། །དགེ་འདུན་རྣམས་ཀྱི་དད་པ་འཕེལ་བའི་དོན་དུ་ལྟ་སྟངས་མཛད་དེ་ནམ་མཁའི་བྱ་ཐམས་ཅད་ཕྱག་ཏུ་འཕེབས་
XXX བཀའ་བསྒོ་བ་ཡང་ཉན་པ་ནི་བཅུ་གསུམ་པའོ། །ཝ་ར་ཎཱ་སའི་གཙོ་བོ་རྒྱལ་པོ་བརྒྱད་ཅུ་རྩ་བཞི་ལ་གསུང་མ་གནང་ཡང་ཐུགས་གཏད་པ་ཙམ་གྱིས་ཀེང་རུས་སོགས་འདུ་ཤེས་སྐྱེས་ནགས་སུ་ཕྱིན་ཏེ་འཇིག་རྟེན་པའི་འདུ་ཤེས་ལས་སེམས་རྣམ་པར་གྲོལ་བ་ནི་བཅུ་བཞི་པའོ། །དེ་ནས་རྒྱལ་པོ་་ཛ་ཡ་སེན་དང་པཎྜི་ཏ་ཨཱ་ནནྡ་གཉིས་མ་དད་ཅིང་སྐུ་ལ་བསྡོ་བ་ལ་མཉམ་པར་བཞག་པའི་ཕྱག་རྒྱ་འཆར་རུ་བཅུག །ཚིགས་བཅད་གཅིག་གི་དོན་ལ་ཐུགས་གཏད་པས་སྟན་དེ་ཉིད་ལས་མ་ལངས་པར་གྲོལ་བ་ནི་བཅོ་ལྔ་པའོ། །ཝ་ར་ཎཱ་སའི་རྒྱལ་པོ་ལ་ཁྱོད་ང་ལ་ཐེ་ཚོམ་ཟོས་པས་ཚེ་འདིར་དངོས་གྲུབ་མི་འཐོབ་ཀྱང་བར་དོར་དངོས་གྲུབ་འཐོབ་ཐོབ་ཞེས་ལུང་བསྟན་པ་ནི་བཅུ་དྲུག་པའོ། །ཝ་ར་ཎ་སའི་རྒྱལ་པོས་བླ་མ་འདི་གཞན་དུ་མི་གཏང་སྙམས་ནས་གཙུག་ལག་ཁང་གི་ནང་དུ་བཞུགས་སུ་བཅུག །སྒོ་རྒྱས་བསྡམས་པ་ལས་ཕྱིར་ཕ་བོང་གི་སྟེང་དུའང་རྩེད་མོ་མཛད། གཙུག་ལག་ཁང་ན་བཞུགས་པའང་མཐོང་བ་ནི་བཅུ་བདུན་པའོ། །དེ་ནས་ཏ་པ་སིའི་གྲོང་ཁང་དུ་བཞུགས་པ་ན་དགེ་སློང་གཉིས་ཀྱིས་ཕྱིར་བྱུང་བ་དང་ནང་དུ་བཞུགས་པ་གཉིས་ངེས་པར་བྱུང་བ་བུ་གཞིག་ནས་བལྟས་པ་ན་སྡེ་བརྒྱད་ལ་ཆོས་སྟོན་པར་མཐོང་བ་ནི་བཅོ་བརྒྱད་པའོ། །འོད་མའི་གླིང་དུ་དེ་བ་ཌཱ་ཀིས་རྗེས་སུ་བཟུང་ནས་སྤྱན་རས་གཟིགས་དང་མཇལ། རིགས་ཀྱི་བུ་མ་འོངས་པའི་སེམས་ཅན་གྱིས་དོན་དུ་རྒྱུད་སྡེ་བཞིའི་དབང་རྣམས་ཕྱོགས་གཅིག་ཏུ་སྐུར་ཅིག་རྗེས་སུ་གནང་བ་ལྟར་ཕྱག་ལེན་དུ་བཏབ་པས་ད་ལྟའི་བར་དུའང་རྒྱུད་སྡེ་ཆེན་པོ་བརྒྱ་དང་རྩ་བརྒྱད་ཀྱི་དབང་གི་ཆུ་བ་མ་ནུབ་པར་བྱུང་བ་ནི་བཅུ་དགུ་པའོ། །ཝ་ར་ཎཱ་སའི་རྒྱལ་པོས་ཞག་བདུན་དུ་གསོལ་བ་བཏབ་པས་དཀྱིལ་འཁོར་གཅིག་ཏུ་རྒྱུད་སྡེ་ཐམས་ཅད་ཀྱི་དབང་དུས་གཅིག་ལ་བསྐུར་བའི་གསུང་རྡོ་རྗེ་རྣམ་པ་ཐམས་ཅད་པའི་རྫུ་འཕྲུལ་བསྟན་པ་ནི་ཉི་ཤུ་པའོ། །དེ་ལྟ་བུའི་ངོ་མཚར་དང་ལྡན་པའི་གྲུབ་ཐོབ་ཆེན་པོ་དེ། ཁྲོ་ཕུ་ལོ་རྩ་བ་བྱམས་པའི་
XXX དཔལ་པཎྜི་ཏ་བུདྡྷ་ཤྲཱིའི་སྤྱན་སྔ་ན་ཆོས་གསན་པའི་ཚེ་འཕགས་པ་ཤིང་ཀུན་བྱོན་པར་ཐོས་ནས་ཏཱ་མྦོལ་ཁྱེར་ཏེ་ཕུལ་ཞིང་བསྙུན་རྨེད་པས་ལེན་མ་གནང༌། ཞལ་བོད་དུ་ཕྱོགས་པར་བཞུགས་འདུག་པས་བོད་དུ་སྤྱན་དྲངས་ན་འབྱོན་ནས་སྙམ་ནས་བོད་དུ་འབྱོན་པར་གསོལ་བ་བཏབ་པས་ཞལ་གྱིས་མ་བཞེས། སེམས་པ་སྐྱེད་པ་བསྡུས་པ་གཅིག་གསན་དེར་ལོ་ཙཱ་བ་འགྲོངས་ལ་ཐུག་པའི་ཚད་ནད་ཀྱིས་བཏབ། གྲུབ་ཐོབ་ཆེན་པོ་རྒྱ་གར་ལ་དལ་གྱི་ཐེགས། དེར་བསྙུན་དྲག་འཕྲལ་ལ་ལོ་ཙཱ་བས་ལུས་མ་སོས་ཀྱང་ཕྱིར་བསྙེགས་ཏེ་བྱོན། ས་མཐའི་མཁར་ཞིག་ན་བཞུགས་པ་ལ། ཏི་རཧུ་ཏི་བའི་སྤྱན་འདྲེན་པ་འཇིགས་རུང་བའི་དམག་གིས་སྐོར་འདུག །དེར་ཨ་ཙ་ར་ངོ་ཤེས་ཤིག་གིས་ཁྲིད་དེ་ནང་དུ་བྱོན་མཁར་དེའི་ཐོག་ན་བཞུགས་པ་ལ་འཇལ། དེར་ཡང་བོད་དུ་འབྱོན་པར་གསོལ་བ་བཏབ་པས་ཞལ་གྱིས་མ་བཞེས། དེར་ལོ་ཙཱ་བའི་བསམ་པ་ལ་འདི་ལྟ་བུའི་གྲུབ་ཐོབ་དང་མཇལ་ནས་སྤྱན་མ་འདྲོངས་བར་བོད་དུ་ལོག་འགྲོ་བ་བས་ཤི་ན་རུང་སྙམས་ནས། སྐྱེ་བ་ཕྱི་མ་ལ་རྗེས་སུ་འཛིན་པའི་སྨོན་ལམ་མང་པོ་བཏབ། ཐེ་ཚོམ་མེད་པར་མཁར་གྱི་རྩེ་ནས་མཆོངས་པས་གྲུབ་ཐོབ་ཆེན་པོའི་ཕྱག་གིས་བཟུང་ནས་ཧ་ཧ་དེ་འདྲ་མ་བྱེད་གསུངས་ནས་སྐུ་དྲུང་དུ་བཞག་སྟེ། ང་བོད་དུ་འགྲོ་བ་ལ་ཁྱོད་ཀྱི་སྒྲིབ་པ་དག་དགོས་ཏེ། ཚད་ནད་དེས་སྒྲིབ་པ་མང་པོ་དག །ད་ལན་ང་ཡི་ཆེད་དུ་སྲོག་བཏང་བས་སྒྲིབ་པ་མ་ལུས་པ་དག་པས་ད་ནི་བོད་དུ་འགྲོ་གསུང་ཞལ་གྱིས་བཞེས། དེ་ནས་བོད་དུ་བྱོན་ནས་གཙང་སྟོད་དུ་ཟླ་བ་བཅོ་བརྒྱད་བཞུགས་མཁས་བཙུན་མང་པོ་ལ་ཆོས་གསུངས། ཁྲོ་ཕུའི་གཙུག་ལག་ཁང་དང་ལྷ་ཆེན་བཞེངས་པའི་ས་ཡང་བྱིན་གྱིས་བརླབས། ཁྱད་པར་རྗེ་ཉིད་ཀྱིས་འཕགས་པ་འཇིག་རྟེན་དབང་ཕྱུག་ལ་དངོས་སུ་གསན་པའི་རང་གི་སེམས་ངལ་གསོ་བའི་མན་ངག་ཚིགས་སུ་བཅད་པ་ཉི་ཤུ་རྩ་ལྔ་པ་འདི་ཉིད་
XXX ལ་བརྟེན་ནས་ལོ་ཙཱ་བ་ལ་ཉམས་ཁྲིད་ཡུན་རིང་དུ་བསྐྱར་ཞིང༌། དཔལ་གུ་ལང་གསེར་ཁང་གི་ནག་ཁྲོད་ཨམྦ་རའི་བསིལ་དུ་ལེགས་པ་བསྒྱུར། ལོ་ཙཱ་བ་ཆེན་པོས་ཀྱང་རང་གི་ཐུགས་སྲས་ཁྲོ་ཕུའི་སེམས་དཔའ་ཆེན་པོ་ལ་སོགས་ལ་གནང་ཞིང༌། དེ་ནས་ཁྲོ་ཕུ་བ་མཁས་མཆོག་ཚད་མའི་སྐྱེས་བུ་བསོད་ནམས་མགོན། བླ་མ་ཡང་རྩེ་བ་རིན་ཆེན་སེང་གེ་དེ་ལས་རྩོད་པའི་དུས་ཀྱི་ཐམས་ཅད་མཁྱེན་པ་བུ་སྟོན་རིན་ཆེན་གྲུབ་ཀྱིས་གསན་ཏེ་ཐུགས་ཉམས་སུ་བཞེས། སློབ་མའི་མཆོག་རྣམས་ལ་སྙིང་གཏམ་གྲོས་འདེབས་ཀྱི་ཚུལ་དུ་རྩལ་བ་ནས་བཟུང་ད་ལྟའི་བར་ཉམས་ཁྲིད་ཀྱི་བརྒྱུད་པ་བར་མ་ཆད་དུ་བྱུང་བའི་གདམས་པ་ཁྱད་པར་འཕགས་པ་ཡིན་ནོ། །གྲུབ་ཆེན་ཉིད་ནི་སླར་ཡང་རྒྱ་གར་དུ་བྱོན། སྒྱུ་མ་ལྟ་བུའི་རྣམ་འཕྲུལ་སྣ་ཚོགས་པ་བསྟན་ནས་མཐའ་ཡས་པའི་གདུལ་བྱའི་དོན་མཛད་དེ། འཆི་མེད་ཡེ་ཤེས་ཀྱི་སྐུ་བརྙེས་ཏེ་ད་དུང་ཡང་བཞུགས་པ་ཡིན་ལ། མདོར་ན་བོད་དུ་བྱོན་པའི་རྒྱ་གར་གྱི་གྲུབ་ཐོབ་ཞིག་ལ། གྲུབ་པའི་རྟགས་མངོན་གྱུར་དུ་སྟོན་པའི་ཚུལ་བསྟན་པ་སྔར་དར་གྱི་དུས་སུ་སློབ་དཔོན་ཆེན་པོ་པདྨ་སཾ་བྷ་བ་དང༌། ཕྱི་དར་གྱི་སྐབས་ཆེན་འདི་ལ་འགྲན་ཟླ་འོས་པ་ནི་འགའ་འང་མ་བྱུང་ཞེས་མཁས་པ་ཆེན་པོ་དག་གསུངས་པ་དོན་ལའང་གནས་པ་ཉིད་དོ། །གཉིས་པ་གཞུང་དོན་དངོས་བཤད་པ་ལ་གསུམ། ཀླད་ཀྱི་དོན། གཞུང་གི་དོན། མཇུག་གི་དོན་ཏོ། །དང་པོ་ལ་གཉིས། མཚན་བསྟན་པ་དང༌། འགྱུར་གྱི་ཕྱག་གོ །དང་པོ་ནི། རྒྱ་གར་སྐད་དུ། སྭ་ཙིཏྟ་སོགས་བོད་སྐད་དུ་བསྒྱུར་ན། རང་གི་སེམས་ངལ་གསོ་བའི་མན་ངག་ཚིགས་སུ་བཅད་པ་ཉི་ཤུ་རྩ་ལྔ་པ་ཞེས་བྱ་བ་སྟེ། དོན་ནི། རང་གི་སེམས་ཉིད་ལྷན་ཅིག་སྐྱེས་པའི་ཡེ་ཤེས་གདོད་མ་ནས་རང་བཞིན་གྱིས་རྣམ་པར་དག་ཀྱང་དེ་ལྟར་མ་རྟོགས་པས་བཟུང་
XXX འཛིན་གྱི་གཞན་དབང་ལ་བརྟེན་ནས་འཁོར་བའི་རྒྱ་འཚོ་ཡུན་རིང་དུ་དུབ་པར་གྱུར་པ་གཉུག་མ་ཕྱག་རྒྱ་ཆེན་པོ་རིན་པོ་ཆེའི་གླིང་དུ་ངལ་གསོ་བར་བྱེད་པའི་གཞུང༌། ཚིག་ཆུང་ངུས་དོན་ཆེན་པོ་དཔག་པར་དཀའ་བར་བདེ་བླག་ཏུ་སྟོན་པའི་མན་ངག །གཞུང་གི་ཚད་ཚིགས་སུ་བཅད་པ་ཉི་ཤུ་རྩ་ལྔ་ཡོད་པས་ན་དེ་སྐད་ཅེས་བཏགས་པའོ། །གཉིས་པ་ནི། དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །ཞེས་པ་སྟེ་གོ་སླའོ། །གཉིས་པ་ལ་གཞུང་གི་དོན་ལ་གཉིས། གཞི་གཉུག་མ་ངོ་སྤྲད་པ་དང༌། ལམ་རྣམ་རྟོག་ལམ་དུ་ཁྱེར་བའོ། །དང་པོ་ལ་གཉིས། སྤྱིའི་དོན་དང༌། ཡན་ལག་གི་དོན་ཏོ། །དང་པོ་ནི། སྤྱིར་གདམས་པ་ཟབ་མོ་ཉམས་སུ་བླང་ཞིང་ངོ་སྤྲོད་པའི་ཚུལ་སྙིང་པོར་དྲིལ་བ་ལོ་ཙཱ་བ་ཆེན་པོ་ཉིད་ཀྱི་ཞལ་སྔ་ནས་འདི་ལྟར་གསུངས་ཏེ། འདིའི་དོན་ངོ་སྤྲོད་པ་ལ་རེ་ཞིག་སྔོན་འགྲོ་དང༌། དངོས་གཞི་དང༌། རྗེས་ཀྱི་བྱ་བ་གསུམ་མོ། །དང་པོ་གསུམ་ལས། ཐུང་མོང་གི་སྔོན་འགྲོ་རྒྱུད་སྦྱོང་བ་ཡན་ལག་བདུན་པ་ལ་སོགས་པ་དང༌། ཐུན་མོང་མ་ཡིན་པའི་སྔོན་འགྲོས་བྱིན་གྱིས་རློབས་པ་རྡོ་རྗེ་སེམས་དཔའ་ཡི་གེ་བརྒྱ་པའི་སྒོམ་བཟླས་ལ་སོགས་པ་དང། ཁྱད་པར་གྱིས་སྔོན་འགྲོས་ཤེས་རྒྱུད་དབང་དུ་བྱ་བ་ནི་ཡེ་གེ་ལྔ་བཅུ་པས་གསོལ་བ་གདབ་པའོ། །གཉིས་པ་དངོས་གཞི་ལ། ལུས་ཀྱི་ཕྱག་རྒྱ་གནས་དབེན་པར་སྟན་བདེ་བ་ལ་འདུག་ནས་བསམ་གཏན་གྱི་ཡན་ལག་དང་ལྡན་པར་བཅའ། ངག་གི་ཕྱག་རྒྱ་ནི་དབུགས་འགྱུ་བ་སོར་བཞག །ཡིད་ཀྱི་ཕྱག་རྒྱ་དང་པོ་ལྷོད་ཀྱིས་གློད། བར་དུ་ཧྲིག་གེ་བཞག །མཐའ་མ་ཕྱམ་ཙེར་བཏང་ངོ༌། །དང་པོ་ཀློད་པ་ལ་གསུམ་སྟེ། ཀློད་པའི་ཡོན་ཏན་དང༌། མ་ཀློད་པའི་སྐྱོན་དང༌། ཇི་ལྟར་ཀློད་པའི་ཚུལ་ལོ། །ཀློད་པའི་ཡོན་ཏན་ནི་སེམས་ཀྱི་གནས་ལུགས་ཀྱི་འདུག་ཚུལ་ནི་མ་བཅོས་པ་ཉིད་ཡིན་པས་གློད་ན་འདུག་ཚུལ་དེའི་སྟེང་དུ་གྲོ་བས་གནས་ལུགས་ཇི་ལྟར་
XXX ཡིན་པ་རྟོགས་པའི་དགོས་པ་ཡོད་དོ། །མ་ཀློད་པའི་སྐྱོན་ནི་དེ་ལས་བཟློག་པ་སྟེ། ཡིན་ཚུལ་ལས་རང་གི་ནན་ཏན་གྱིས་མ་གློད་པས་ཕྱིན་ཅི་ལོག་གི་སྣང་བ་འབྱམས་ནས་རང་ལ་རང་དབང་མེད་པར་འཁོར་ཞིང་འཁྲུལ་པ་ལ་ལོངས་སྤྱོད་པར་འགྱུར་བའོ། །ཇི་ལྟར་ཀློད་པའི་ཚུལ་ལ་གཉིས་ཏེ། ཀློད་ནས་གཞག་ཐབས་དང༌། ཞར་ལ་གེགས་བསལ་བའོ། །དང་པོ་ནི། འཇིག་རྟེན་གྱི་བྱ་བ་བརྒྱབ་ཏུ་དོར། ཏིང་ངེ་འཛིན་འོང་དུ་རེ་བ་དང༌། མ་བྱུང་གིས་དོགས་པ་ཡེ་མི་བྱ། བློས་རྟོག་དཔྱོད་གང་ཡང་མི་བཏང༌། དགའ་མི་དགའ་མཚན་རྟགས་ཅི་ཡང་མི་བཟུང༌། རྟོག་དཔྱོད་རེ་མ་ཡང་རྣམ་རྟོག་ཉིད་འཁྲུལ་ཡིན་པས་སེམས་ཉིད་རང་གི་ཐོག་ཏུ་རང་ཀློད་དོ། །རང་ལ་རང་ཀློད་དེ་བཞག་པས་ཁོ་ན་ཉིད་ལ་འཆར་ལུགས་གཅིག་ཡོད། འཆར་ལུགས་དེ་གང་ཡིན་ན་བཅའ་བཅོས་ཕྱར་མེད་པ་ཉིད་ཡིན། མ་བཅོས་པ་རྟོག་པ་ལ་མ་བཅོས་པར་ཀློད་པ་ཐབས་ཟབ་པའི་རྒྱུ་མཚན་ཡང་དེ་ཡིན་ནོ། །བཅོས་སུ་མེད་པ་ལ་ཀློད་པས་ཀྱང་ཅི་ཕན་ཞེས་ནི་མི་བསམ་སྟེ། མདའ་འབེན་དུ་ཕོག་པ་ལ་མདའ་ཚ་བར་བརྗོད་པ་ལྟར་མ་བཅོས་པའི་ཐོག་ཏུ་ཀློད་པ་ལ་འབབ་པ་ཞེས་བྱའོ། །དེ་ལྟར་ཡང༌། མ་བཅོས་ཆོས་རྣམས་ཀུན་གྱི་གཞི། །དེ་ཉིད་མཉམ་པར་རྟོགས་འདོད་ན། །ཡུལ་ལ་ཡིད་ནི་མི་སྤྲོ་བར། །ལྷོད་ཀྱིས་ཀློད་ལ་ལྷན་གྱིས་ཞོག །ཅེས་འབྱུང་བ་ལྟ་བུའོ། །གཉིས་པ་གེགས་བསལ་བ་ནི། དེ་ལྟར་ཀློད་ནས་བཞག་པས་རྣམ་རྟོག་གི་འགྱུ་འཕྲོ་ཆད་ནས་ལྷན་ཆམ་གྱིས་མི་རྟོག་པ་རྐྱང་པར་འགྲོ་སྟེ། དེ་ནི་གཉིས་འཛོམས་བཀག་པའི་གླེན་སྒོམ་ཡིན་ནོ། །དེས་ན་དེ་ལ་མི་བཞག་པར་དེའི་གཉེན་པོར་རིག་པ་ཧུར་གདོན་ཏེ་རིག་གེ་ཡེར་རེ་སེང་ངེ་དཔང་གཏོད་ལ་བཞག་གོ །དེའི་ཚེ་ཡང་རིག་པའི་རང་གདངས་ཤར་བས་གསལ་ཆ་སྐྱེས་པ་ལ་འབྲལ་མི་ཕོད་པར་འགྱུར་ཏེ། དེ་ནི་གསལ་བ་མཚན་མར་
XXX འཛིན་པའི་གཉིས་ཆོས་ཡིན་ནོ། །དེས་ན་དེ་ལ་མི་བཞག་པར་དེའི་གཉེན་པོར་ཤེས་པ་འཕངས་སྨད་ལ་སྤུ་རིས་གང་དང་ཡང་མ་འདྲེས་པར་བཞག་གོ །དེའི་ཚེ་ཡང་རིག་པ་ཤེས་སྙོམས་པ་ཅིར་ཡང་མི་རྟོག་པའི་ངང་ན་བདེ་སོང་ངེ་འཆར་ཏེ། དེ་ནི་བློས་བྱས་རང་བྱུང་གི་བདེ་ཉམས་བྱ་བ་ཡིན་ནོ། །དེས་ན་དེ་ལ་ཡང་མི་བཞག་པར་བློ་ཉམས་ཅི་བདེར་རང་ཡན་དུ་བྱམས་ཙེར་བཏང་ངོ༌། །དེ་ཡང་བདེ་ཉམས་སྐྱེས་པ་ལ་མ་ཞེན་སྙམས་ཡང་བདེ་བའི་ཆ་ལ་འབྲལ་མི་ཕོད་པའི་ཞེན་པས་བཅིངས་རྒྱུ་གཅིག་བྱུང་ལ། ཞེན་ན་ཞེན་ཆོས་ཕྲ་མོ་ཁོང་དུ་ཞེན་ཅིང་འདོད་པ་ལས་སྲིད་པའི་ཉོན་མོངས་པ་རྒྱས་པར་འགྱུར་ཏེ། བདེ་ལ་ཞེན་པས་འདོད་པའི་ཁམས་སུ་ལྷུང་ཞེས་བྱའོ། །གསལ་བའི་ཉམས་སྐྱེས་པ་ལ་མ་ཞེན་ཡང་གསལ་བའི་ཆ་ལ་འབྲལ་མི་ཕོད་པའི་ཞེན་པས་བཅིངས་རྒྱུ་གཅིག་བྱུང་ལ། ཞེན་ན་ཞེན་ཆོས་ཕྲ་མོ་ཁོང་དུ་སོང་བས་ཞེན་པ་དང་བཅས་པའི་ལས་ལས་གཟུགས་ཁམས་ཀྱི་སྲིད་པ་འགྲུབ་སྟེ། གསལ་བ་ལ་ཞེན་པས་གཟུགས་ཁམས་དག་ཏུ་གོལ་ཞེས་བྱའོ། །མི་རྟོག་པའི་ཉམས་སྐྱེས་པ་ལ་མ་ཞེན་སྙམ་ཡང་མི་རྟོག་པའི་ཆ་ལ་འབྲལ་མི་ཕོད་པའི་ཞེན་རྒྱུ་གཅིག་བྱུང་བས་ཞེན་ཆོས་ཕྲ་མོ་ཁོང་དུ་མ་སོང་བའི་མི་སྲིད་པས། ཞེན་བཅས་ཀྱི་ལས་ཕྲ་བས་ཀྱང་གཟུགས་མེད་ཀྱི་སྲིད་པ་འགྲུབ་སྟེ། མི་རྟོག་བསྒོམ་པ་ལ་ཞེན་པས་གཟུགས་མེད་དུ་འགྲོ་ཞེས་བྱའོ། །དེ་ལྟར་བདེ་གསལ་མི་རྟོགས་པ་གསུམ་ལ་ཞེན་པ་དང་བཅས་ན་སྲིད་པ་གསུམ་ལས་ཐར་པའི་དུས་མི་སྲིད་པས། ཞག་ལ་འཆར་ཡང་འཆར་བར་མ་ཞེན་པས་རིག་པ་མ་བཅོས་པར་ལྷོད་ཀྱིས་འཇོག་པ་གལ་ཆེའོ། །བཞག་པས་བཞག་རྒྱུ་མེད་དེ་མ་བཞག་པའི་གནས་པ་ཆེན་པོ། གནས་ཀྱང་གནས་པ་མེད་དེ་མི་གནས་པའི་སྒོམ་པ་དམ་པ། བསྒོམ་ཀྱང་བསྒོམ་མཁན་མེད་དེ་མ་བསྒོམ་པའི་ཏིང་ངེ་
XXX འཛིན་བླ་ན་མེད་པའོ། །དེའི་རྗེས་གར་དུ་ཧྲིག་གེ་བཞག་པ་དང༌། ཐ་མར་ཕྱམས་ཙེར་བཏང་བ་ནི་སྔ་མའི་འགྲོས་ཀྱིས་ཤེས་པར་བྱའོ། །དེ་ལྟར་ལས་དང་པོ་པས་མཉམ་པར་འཇོག་པ་ལ་སྐྱེས་བུ་ཁ་ལ་གཉེར་བྱེད་པས་ཁ་ལ་བཅོས་པ་ལྟར་མཐོ་དམན་ཁད་ཀྱིས་མཉམ་ཞིང༌། གསེར་འཇལ་བ་ལེགས་པར་བྱས་པའི་སྲང་ལྟར། མཉམ་ཁད་དེ་གནས་པ་ལ་རང་སེམས་རང་བཞིན་མ་བཅོས་པའི་གཉུག་མ་ངོས་ཟིན་པར་འགྱུར་ཏེ། དེ་ཡང་བླ་མ་དམ་པའི་བྱིན་རླབས་གསུང་གི་བདུད་རྩི་དང་བཅས་པས་རྗེས་སུ་བཟུང་བ་དང་ཡུན་རིང་པོ་ནས་རང་གིས་ལེགས་པར་བསྒྲུབ་པའི་བསོད་ནམས་བསགས་པ་ལས་ངོ་འཕྲོད་པར་གསུངས་སོ། །གསུམ་པ་རྗེས་ཀྱི་བྱ་བ་གསུམ་ནི། ངོ་འཕྲོད་པའི་རྗེས་ཡུན་རིང་དུ་མི་འབྲལ་བའི་ཐབས་དང༌། སྣང་བ་ལམ་དུ་སློང་བའི་ཐབས་དང༌། ཅི་བྱས་གཞན་དོན་དུ་འགྱུར་བའི་ཐབས་དང་གསུམ་ལྡན་དགོས་པ་ལས། །དང་པོ་ནི། དངོས་གཞི་ངོ་སྤྲད་ཉམས་ཀྱི་རྩིས་བཟུང་ལ་སྣང་བ་སྣ་ཚོགས་གང་ཤར་ཤར་ལ་སྦྱར་ཏེ་ཉམས་སུ་བླང་ངོ༌། །གཉིས་པ་ནི། རང་ངོ་འཕྲོད་པས་རང་ངོ་ཤེས་པའི་ངང་ལ་བདེ་སྡུག་ལས་སོག་པ་ཅི་བྱུང་ཚད་དེ་ཉིད་ཀྱི་རྩལ་སྦྱོང་ཞིང་མི་འགོག་པའོ། །གསུམ་པ་ནི། རང་ངོ་ཤེས་པས་རང་གྲོལ་བ་ནི་སེམས་ཅན་ནམ་མཁའ་དག་མཉམ་པ་ཐམས་ཅད་ཀྱང་རང་གྲོལ་དུ་གྱུར་ཅིག་ཅེས་བསྔོས་ལ། ལུས་ངག་ཡིད་གསུམ་གྱི་བྱ་བ་ཐམས་ཅད་ཞེན་མེད་ཀྱི་ངང་ལས་འབྲལ་མེད་ཀྱི་སྙིང་རྗེས་གཞན་དོན་དང་དུ་ལེན་པའོ། །ཞེས་གསུངས་ཏེ། རྒྱས་པར་ཁྲིད་ཡིག་ཏུ་ཤེས་པར་བྱའོ། །གཉིས་པ་ལ། སྤྱིར་དབང་པོ་རབ་འབྲིང་ཐ་མའི་བྱེ་བྲག་གིས་ངོ་སྤྲོད་པའི་ཚུལ་སོ་སོར་གསུངས་པ་ལས། དབང་པོར་བ་ལ་སོར་བཞག་གསུམ་གྱི་ངོ་སྤྲོད་པའི་དང་པོ་ནི་འདི་ཡིན་ཏེ། ཨེ་མ་ཧོ། རང་སེམས་སོགས་ཚིགས་བཅད་གཅིག་གོ །དོན་ནི། འདི་ལྟར་སེམས་ཀྱི་གནས་ལུགས་མ་རྟོགས་པས་འཁོར་བར་འཆིང་ཞིང༌། རྟོགས་ན་གྲོལ་བར་བྱེད་པས་ན་ངོ་མཚར་བའི་
XXX ཕྱིར་ཨེ་མ་ཧོ་ཞེས་ཐོག་མར་གསུངས་སོ། །ངོ་མཚར་བ་དེ་གང་ཞེ་ན། རང་གི་སེམས་ཀྱི་གནས་ལུགས་འདོད་མ་ནས་མ་སྐྱེས་ཤིང༌། ཅིའི་ངོ་བོར་ཡང་མ་གྲུབ་པ་སྟེ། དུས་གསུམ་གྱི་སངས་རྒྱས་རྣམས་བྱོན་རུང༌། མ་བྱོན་རུང༌། བླ་མ་རྣམས་ཀྱིས་ངོ་སྤྲོད་རུང༌། མ་སྤྲོད་རུང༌། གང་ཟག་རྣམས་ཀྱིས་རྟོགས་རུང་མ་རྟོགས་རུང་དེ་ལྟར་དུ་གནས་པ་གང་ཞིག །མ་རྟོགས་ན་འཁོར་བ་དང༌། རྟོགས་ན་མྱ་ངན་ལས་འདས་པར་བྱེད་པའི་རྒྱུའམ་ས་བོན་ཅན་དེ་ནི། ངོ་བོ་རང་ལས་གཞན་ན་བཙལ་དུ་ཡོད་པ་མིན་ཏེ། ཡུལ་རང་གི་སྙིང་གི་དབུས་སུ། དུས་རིག་པ་གང་དང་གང་ཤར་བའི་ཚེ། ཐབས་བླ་མ་དམ་པའི་ཞལ་གྱིས་གདམས་པ་ལ་བརྟེན་ནས་ཉམས་སུ་བླངས་པ་ལས་ཤེས་པར་འགྱུར་རོ། །ཞེས་པའོ། །གཉིས་པ་ལ་གཉིས། ལམ་རིམ་གྱིས་པ་བརྡའི་སྒོ་ནས་གྲོལ་བའི་མན་ངག་དང༌། གཅིག་ཅར་བ་བྱིན་རླབས་དབང་གིས་གྲོལ་བའི་མན་ངག་གོ །དང་པོ་ལ་གཉིས། དབང་པོ་རབ་འགྱུ་བ་རང་སར་སད་པར་བྱེད་པ་དང༌། དབང་པོ་འབྲིང་དང་ཐ་མ་འགྱུ་བ་གཞན་གྱི་ཐབས་ཀྱིས་གྲོལ་བར་བྱེད་པའོ། །དང་པོ་ནི། སོར་བཞག་གསུམ་གྱི་ངོ་སྤྲད་གཉིས་ཏེ། དང་པོ་གང་སྐྱེས་གང་ཤར་དྲན་པའི་ངོ་སྤྲོད་ནི། གང་སྐྱེས་སོགས་ཏེ། རྟོག་པ་གང་སྐྱེས་ཀྱང་རླབས་ཉིད་རྒྱ་མཚོ་ལས་མ་འདས་པ་བཞིན་དུ། གཉུག་མ་འགྲོ་འོང་དང་བྲལ་བ་ཉིད་མ་འདས་པ་ཡིན་པའི་ཕྱིར། གང་ཤར་ཐམས་ཅད་རང་ངོ་ཤེས་པའི་དྲན་པས་མ་བརྗེད་ན། རྣམ་པ་དེ་དང་དེར་ཤར་ཡང༌། ངོ་བོ་སྟོང་པ་ཉིད་ཀྱི་བདག་ཉིད་ཅན་དུ་འགྱུར་ཏེ། རྣལ་འབྱོར་གྱི་རྒྱལ་པོར་གདོན་མི་ཟ་བ་སྟེ་ཐེ་ཚོམ་མེད་པར་ངེས་སོ། །དྲན་པས་མི་བརྗེད་པའི་ཚུལ་ནི་གསུམ་སྟེ། དང་པོ་སྣང་མཁན་མ་བརྗེད་པ་དང༌། བར་དུ་འཛིན་མཁན་མ་བརྗེད་པ་དང༌། ཐ་མ་ཞེན་
XXX མཁན་མ་བརྗེད་པའོ། །གཉིས་པ་ནི། གང་ཤར་ཐམས་ཅད་སོགས་ཏེ། རྣམ་པར་རྟོག་པ་གང་ཤར་ཐམས་ཅད་དེ་ཁོ་ན་ཉིད་གཉུག་མའི་དོན་ལས་མ་གཡོས་པ་ཡིན་ཏེ། རང་སེམས་གཉུག་མ་དེ་ནི་ངོ་བོ་གང་དུའང་མ་ཤར་བཞིན། རྣམ་པ་ཅིར་ཡང་འཆར་བ་ཆུ་ཟླ་ལྟ་བུའོ། །དེའི་ཕྱིར་ན་འཁྲུལ་ངོར་གང་སྐྱེས་པ་ལྟར་སྣང་བའི་གསལ་སྣང་དེ་ནི། རིག་ངོར་མ་སྐྱེས་ཀྱང་མ་སྐྱེས་པ་དེ་ཉིད་སྐྱེ་བའི་ཚུལ་ལྟར་སྣང་བའང་མི་འགལ་ཏེ། རྨི་ལམ་དུ་བུ་མོ་སྐྱེས་པར་བདེན་ཀྱང༌། གཉིད་ཀྱིས་བསླད་པའི་ངོར་སྐྱེ་བ་ལྟར་སྣང་བའང་མི་འགལ་བ་བཞིན་ནོ། །འདི་ཡན་གྱི་ཚིགས་བཅད་གསུམ་ལ་རིམ་པར་གཉུག་མ་སྐྱེ་མེད་ཀྱི་ངོ་སྤྲོད། གློ་བུར་རྣམ་དག་གི་ངོ་སྤྲོད། དབྱེར་མེད་ཟུང་འཇུག་གི་ངོ་སྤྲོད་ཅེས་ཀྱང་གསུངས་སོ། །གཉིས་པ་ལ་གཉིས། དབང་པོ་འབྲིང་གི་ངོ་སྤྲོད་དང༌། དབང་པོ་ཐ་མའི་ངོ་སྤྲོད་དོ། །དང་པོ་ལ་གསུམ། དབང་པོ་འབྲིང་གི་རབ་ལས་གསུམ་གྱི་དཔེས་ངོ་སྤྲོད་པ། འབྲིང་གི་འབྲིང་ལ་ཕྱི་ནང་བར་གསུམ་གྱི་དཔེས་ངོ་སྤྲོད་པ། འབྲིང་གི་ཐ་མ་ལ་ཐོག་བབ་གསུམ་གྱིས་ངོ་སྤྲོད་པའོ། །དང་པོ་ལ་གསུམ་ལས། དང་པོ་ས་བླ་ཁྲོ་བོའི་རྣམ་འགྱུར་གྱི་དཔེ་ནི། གཡས་བརྐྱང་སོགས་ཏེ། དེ་ལ་གཡས་བརྐྱང་བ་ནི་ཐབས་སྙིང་རྗེ་ཆེན་པོའི་བློ་རྒྱ་བསྐྱེད་པ། གཡོན་བསྐུམ་པ་ནི་ཤེས་རབ་སྟོང་པ་ཉིད་ཀྱིས་བློ་ནང་དུ་དགུག་པ། སྡིག་མཛུབ་གཏད་པ་ནི་སྟོང་ཉིད་སྙིང་རྗེ་གཉིས་སྒོམ་མཁན་ངོས་བཟུང་བ། རྡོ་རྗེའི་ལྟ་བ་ནི་བལྟ་བྱ་བལྟ་བྱེད་གཉིས་སུ་མེད་པའི་དོན་ལ་དམིགས་པ་མེད་པའི་ཚུལ་གྱིས་བལྟས་ནས་ནི། རྣམ་རྟོག་གི་བཞོན་པར་གྱུར་པ་རླུང་གི་རྟ་མཆོག་ཕྱི་ནང་དུ་དལ་བུས་འགྲོ་བ་དང་འོང་བའི་ཚུལ་ལ་བསླབ་ཅིང༌། རྡོ་རྗེའི་བཟླས་པ་ཟབ་མོ་ལ་གནས་ནས་གློ་བུར་གྱི་རྣམ་རྟོག་དུ་མ་སེམས་ཉིད་
XXX གཉུག་མའི་ངང་དུ་རོ་གཅིག་ཏུ་ཉམས་སུ་ལེན་པར་བྱའོ། །གཉིས་པ་ས་འོག་ཀླུ་རྒྱལ་རོལ་པའི་དཔེ་ནི། རྐང་པ་རྒྱ་མཚོ་སོགས་ཏེ། འདི་ལྟར་ཀླུའི་རྒྱལ་པོ་དག་དུས་བཟང་པོ་ལ་རོལ་ཞིང་རྩེ་བ་ན། རྐང་པ་རྒྱ་མཚོར་བརྐྱངས། ལག་པས་ས་སྟེང་ཀུན་ཉུལ། མིག་ནམ་མཁར་བལྟས་ཀྱང༌། སེམས་རང་གི་གནས་ལས་མི་གཡོ་བ་བཞིན་དུ། རྐང་པ་རྒྱ་མཚོ་ཆེ་ལ་བཞག་པ་ནི། སེམས་མ་བཅོས་པའི་ངང་ལ་རྩེ་གཅིག་ཏུ་གནས་པའི་ཞི་གནས་བསྒོམ་པའོ། །ལག་པས་ས་སྟེང་ཀུན་ཏུ་ཉལ་བ་ནི། རྩལ་སྣང་མ་འགགས་པའི་རོལ་པ་སྣ་ཚོགས་སྣང་བ་ལ་སྣང་སྟོང་དབྱེར་མེད་དུ་རྟོགས་པས་ལོངས་སྤྱོད་པའི་ལྷག་མཐོང་བསྒོམ་པའོ། །མིག་ནི་ནམ་མཁར་བལྟ་བྱ་ཞེས་ཞི་ལྷག་ཟུང་འབྲེལ་གྱི་ངང་ནས་བྱ་བྱེད་ཀྱི་དམིགས་པ་ཅིའང་མེད་པ་ལ། ཅིར་ཡང་སྤྱོད་པའི་ཚུལ་གྱིས་མ་ཡེངས་པར་བལྟ་བ་སྟེ། དེ་ལྟར་ཉམས་སུ་བླངས་ནས། ཡིད་ནི་དུས་དང་རྣམ་པ་ཐམས་ཅད་དུ་བློ་འདས་བྱར་མེད་ཀྱི་རང་མལ་ལས་གང་དུའང་མི་གཡོ་བར་བྱའོ། །གསུམ་པ་ས་སྟེང་རྒྱལ་པོའི་མདུན་ན་འདོན་རྣམས་ཀྱི་དཔེ་ནི། སྒེག་མོའི་མེ་ལོང་སོགས་ཏེ། འདི་ལ་སྦྱོར་བའི་དཔེ་གཉིས། དངོས་གཞིའི་དཔེ་གཉིས། རྗེས་ཀྱི་དཔེ་གཉིས་ཏེ་དྲུག་གི་སྒོ་ནས་སྟོན་པའི་ཚུལ། རང་རིག་དྲི་མ་མེད་པའི་མེ་ལོང་ལ་ཡང་དང་ཡང་དུ་ལྟ་བ་སྒེག་མོས་མེ་ལོང་ལ་བལྟ་བ་ལྟ་བུ། མཚན་འཛིན་གྱི་རྣམ་པར་རྟོག་པ་ཐམས་ཅད་རང་གྲོལ་དུ་འཇོམས་པའི་སྟོབས་དང་ལྡན་པས་གྱད་ལྟ་བུ་དང༌། ཉོན་མོངས་པ་རྣམ་རྟོག་གི་འཆིང་བ་ཐམས་ཅད་ལས་ཐར་བར་འདོད་པའི་བསམ་པ་དང་ཉིན་མཚན་དུས་ཀུན་ཏུ་མི་འབྲལ་བས་ཁྲིམས་བཙོན་ལྟ་བུ་དང༌། ལུས་ངག་ཡིད་གསུམ་གྱི་སྤྱོད་པ་ཐམས་ཅད་སེམས་ཉིད་ཡེ་ཤེས་ཀྱི་རྒྱལ་པོ་ཉམས་ལེན་གྱིས་མཉེས་པར་འགྱུར་བའི་
XXX ཐབས་སུ་བྱེད་པ་ཡིན་གྱི། ཕལ་པའི་ཆོས་སྤྱོད་འབངས་ཕལ་པ་དང་འདྲ་བའི་ཉན་བཤད་ལ་སོགས་པ་དག་གི་ངོ་སྲུང་པ་ཅི་ཡང་མེད་པ་རྒྱལ་པོའི་བཙུན་མོ་ལ་བུ་དང༌། དགེ་སྡིག་ལ་སོགས་པའི་རྣམ་པར་རྟོག་པ་ཐམས་ཅད་བཟང་ངན་བྱེ་བྲག་མེད་པར་རང་གྲོལ་དུ་ཕྱགས་པ་ལ་བརྩོན་པ་ཕྱགས་དར་ལྟ་བུ་དང༌། སྣང་བ་ཐུག་ཕྲད་གང་ཤར་ལ་རྟོགས་པའི་རྩལ་སྦྱོང་བར་བྱེད་ཀྱི། ཆོས་ཆེ་ཆེ་དང་བཟང་བཟང་སོགས་ལྷག་པར་དོན་དུ་མི་གཉེར་བས་སྨད་འཚོང་མ་བཞིན་ཏེ་དྲུག་གོ །གཅིག་པུའི་གྲོགས་དང་འགྲོགས་པ་ནི། དྲན་པ་གཅིག་སུ་སྣང་བ་སྣ་ཚོགས་ཀྱི་གྲོགས་དང་འགྲོགས་ནས། ཏིང་ངེ་འཛིན་གྱི་རྩལ་སྦྱོང་བར་བྱོས་ཤིག་ཅེས་གདམ་པའོ། །གཉིས་པ་དབང་པོ་འབྲིང་གི་འབྲིང་པོའི་ངོ་སྤྲོད་པ་ལ་གསུམ་ལས། དང་པོ་ཕྱིའི་དཔེ་དགུ་ནི། རྟག་དང་སོགས་ཏེ། དེ་ཡང་ཏིང་ངེ་འཛིན་མ་སྐྱེས་པ་སྐྱེ་བར་བྱེད་པའི་ཐབས་གསུམ། སྐྱེ་བ་ལམ་དུ་འགྱུར་བའི་ཡན་ལག་གསུམ། ལམ་མཐར་ཕྱིན་པར་བྱེད་པའི་གནད་གསུམ་སྟེ། དཔེ་དགུས་བསྟན་པ་ཡིན་ནོ། །དེ་ལ་དང་པོ་རྟོག་པ་དང་ཉོན་མོངས་པ་ཐམས་ཅད་འཇོམས་པ་ལ་དཔའ་ཞིང་མ་ཞུམ་པས་སྟག་ལྟ་བུ་དང༌། བར་དུ་ཕྱི་ནང་གི་བར་ཆད་དང་ཉེ་བར་འཆི་བ་ཅི་བྱུང་ཡང་ཉམས་ང་བག་ཚ་མེད་པ་སེང་གེ་ལྟ་བུ་དང༌། ཐ་མར་བྱིངས་རྒོད་ལ་སོགས་པའི་འགལ་རྐྱེན་སྣ་ཚོགས་གང་གིས་ཀྱང་ལམ་ལས་མི་ལྡོག་པ་གླང་པོ་ཆེ་ཆུར་ཞུགས་ལྟ་བུ་དང་གསུམ་ནི་ཏིང་ངེ་འཛིན་སྐྱེ་བར་བྱེད་པའི་ཐབས་གསུམ་ཡིན་ནོ། །སྐྱེས་པ་དེ་ཡང་ཐེག་པ་ཆེན་པོའི་ལམ་དུ་འགྱུར་བ་ལ། གཞན་ཕན་ཐབས་ལ་མཁས་པའི་ཁྱད་པར་དགོས་ཤིང༌། དེ་ཡང་གཞན་ལ་ཕན་འདོགས་པའི་མཐུ་ལྷ་དང་བླ་མ་ལ་རག་ལས་པས། མོས་གུས་ཀྱི་གདུང་བ་དྲག་པོ་རྔ་མོ་ལྟ་བུ། གཞན་ལ་ཕན་པའི་བསམ་པས་སྙིང་རྗེ་དང༌།
XXX གིས་འབྱུང་བ་རི་དྭགས་ཁྲི་སྙན་ལྟ་བུ། གཞན་ལ་ཕན་པའི་ཐབས་གང་ལ་གང་འདུལ་གྱིས་སྤྲོས་པ་སྣ་ཚོགས་ལམ་དུ་ཁྱེར་བ་སྤྲེའུ་ལྟ་བུ་སྟེ་གསུམ་དང༌། ལམ་མཐར་ཕྱིན་པར་བྱེད་པའི་གནད་གསུམ་ནི། ཞེ་འདོད་ཀྱི་གདུང་བ་བསིལ་བ་དང༌། ཉོན་མོངས་པའི་ཚད་ནད་སེལ་བ་དང༌། ཆོས་ཆེན་པོ་རྣམ་ཀྱི་རྣམས་ཀྱི་ནང་ནས་མཆོག་ཏུ་གྱུར་པ་སྟེ། ཆོས་གསུམ་ལྡན་པ་ཙནྡན་ལྟ་བུ། འགལ་རྐྱེན་གྱིས་རྩ་བ་མི་གཡོ་བ་དང༌། མཐུན་རྐྱེན་གྱིས་རྩེ་མོ་མི་འཁྱོག་པ་དང༌། ཤེས་རྒྱུད་ཕལ་མོ་ཆེ་ཐམས་ཅད་ལས་མཐོ་བར་འཕགས་པ་སྟེ། ཆོས་གསུམ་དང་ལྡན་པས་ལྗོན་ཤིང་གི་སྡོང་པོ་ལྟ་བུ། མཚན་འཛིན་གྱི་དབང་པོ་འགགས་པ་དང༌། ཞེན་པའི་སྲོག་དང་བྲལ་བ་དང༌། བླང་དོར་གྱི་རྩིས་གང་བ་མེད་པ་སྟེ། ཆོས་གསུམ་དང་ལྡན་པས་མི་རོ་ལྟ་བུ་སྟེ་དེ་ལྟར་དཔེ་དགུས་མཚོན་ནས། དེས་དོན་ཟབ་མོ་ལ་སྤྱོད་པའི་མཁས་པ་རྣམས་ཀྱིས་སྟོང་བ་ཉིད་རྣལ་འབྱོར་དུ་བྱའོ། །གཉིས་པ་བར་གྱི་དཔེ་དྲུག་ནི། རི་གཟར་ཆུ་དང་སོགས་ཏེ། འདི་ལྟར་རྣམ་རྟོག་རིགས་མི་འདྲ་བ་དུ་མ་ཤུགས་དྲག་ཏུ་བསྐྱེད་པ་དང༌། རྟོག་མེད་དང་བཏང་སྙོམས་ཀྱིས་བར་མ་ཆོད་པ་དང༌། ཤིན་ཏུ་མྱུར་བ་གློག་འགྱུ་བ་ལྟ་བུ་སྟེ། ཆོས་གསུམ་དང་ལྡན་པས་རི་གཟར་གྱི་འབབ་ཆུ་ལྟ་བུ་དང༌། རྣམ་རྟོག་འགྱུས་ཚད་ཐམས་ཅད་ཆོས་ཉིད་ཀྱི་ངང་ལ་རོ་མཉམ་པ་དང༌། རྣམ་པར་རྟོག་པའི་ངང་ལ་གཡོ་བ་མེད་བཞིན་དུ་གནས་པ་དང༌། ཕྱིའི་འགྱུ་བ་སྣ་ཚོགས་ཅི་བྱུང་ཡང་མ་བཅོས་པའི་ངང་དུ་ཞི་བར་འགྱུར་བ་སྟེ། ཆོས་གསུམ་དང་ལྡན་པས་རྒྱ་འཚོ་ཆེན་པོ་ལྟ་བུ་སྟེ། དཔེ་དོན་གཉིས་པ་དེ་ནི་སེམས་གནས་པར་བྱེད་པའི་ཐབས་ཡིན་ནོ། །ཡང་དག་པའི་རྟོགས་པ་ལ་རང་གི་སྙིང་ལས་ལྷག་པར་འཛིན་པ་དང༌། རྟོགས་པ་དེ་དང་ནམ་ཡང་འབྲལ་མི་ཕོད་པ་དང༌། རྟོགས་
XXX པའི་རྩལ་གྱིས་ཅི་བྱུང་སྐྱོན་དུ་མི་བཟུང་བ་སྟེ། ཆོས་གསུམ་དང་ལྡན་པས་བུ་གཅིག་པའི་མ་ལྟ་བུ་དང༌། ཁོངས་གྲིམ་པ་དང༌། འཕྲལ་ལྷོད་པ་དང༌། འགྲོ་ལྡོག་གི་མཚན་ཉིད་ལ་མཁས་པ་སྟེ། ཆོས་གསུམ་དང་ལྡན་པས་གླང་པོ་ཆེ་སྐྱོད་པ་ལྟ་བུ་གཉིས་ནི་གནས་པ་བརྟན་པར་བྱེད་པའི་ཡན་ལག་གོ །ལྟ་བ་དམན་པ་ལ་མ་ཞེན་པས་འཕང་མཐོ་བ་དང༌། གཟུང་འཛིན་གྱི་གདུང་བ་བྲལ་བས་བསིལ་བ་དང༌། གེགས་སྐྱོན་ཅི་བྱུང་ཡང་འགྱུར་བ་མེད་པའི་སོ་ཚུགས་པ་སྟེ། ཆོས་གསུམ་དང་ལྡན་པས་གངས་རི་ལྟ་བུ་དང༌། མངོན་པར་ཞེན་པའི་དྲི་མ་དང་བྲལ་བས་གཙང་བ་དང༌། ཕྱིའི་ཡུལ་སྣང་དང་ནང་གི་རིག་ཆོས་གང་ཡང་མ་བསྒྲིབས་པར་གསལ་བ་དང༌། དད་པ་དང་སྙིང་རྗེ་ཐབས་ལམ་ལ་སོགས་པའི་རྐྱེན་གྱིས་གང་དུའང་བསྒྱུར་དུ་རུང་བ་སྟེ། ཆོས་གསུམ་དང་ལྡན་པས་ཤེལ་སྒོང་དག་པ་བཞིན་ཏེ་དེ་གཉིས་ནི་བརྟན་པ་མཐར་ཕྱིན་པར་བྱེད་པའི་གནད་ཡིན་ནོ། །དེ་ལྟར་གོམས་པས་ཆེད་འཛིན་གྱི་དམིགས་གཏད་དང་བྲལ་བར་སེམས་ངང་གིས་གནས་གྱུར་ན་ཏིང་ངེ་འཛིན་གྱི་གཞི་ཚུགས་པ་ཞེས་བྱའོ། །གསུམ་པ་ནང་གི་དཔེ་གཅིག་ནི། ཐོག་མར་སོང་སྟེ། འདི་ལྟར་འབྱུང་བའི་རྣམ་པར་རྟོག་པ་ཇི་སྙེད་པ་རྣམས་ནི། ཐོག་མ་དང་བར་དང༌། མཐའ་མར་རིམ་བཞིན་དུ། དམིགས་པ་དང༌། བདག་པོ་དང༌། རྒྱུ་དང༌། དེ་མ་ཐག་པའི་རྐྱེན་བཞིའི་རྩ་བ་དང་བྲལ་བས་སྒྱུ་མའི་རྟ་གླང་ལྟ་བུ། རང་གི་ངོ་བོ་དེ་དེ་བཞིན་དུ་མ་གྲུབ་པས་མིང་གིས་བཏག་པ་ཙམ་ལས་དོན་གྱིས་སྟོང་པ་མོ་གཤམ་གྱི་བུ་ལྟ་བུ་བྱེད་ལས་དང་བྲལ་བ་རྨི་ལམ་གྱི་སྟ་རེས་རྨི་ལམ་གྱི་ལྗོན་ཤིང་གཅོད་པ་ལྟ་བུ་སྟེ། མདོར་ན་འདི་ལྟར་སྣང་ཞིང་རྟོག་པའི་ཆོས་ཐམས་ཅད་ནི་རྨི་ལམ་གྱི་སྣང་བ་དང་མཚུངས་ཏེ། མཚུངས་ཆོས་ནི་རྨི་ལམ་
XXX གྱི་སྐབས་སུ་མར་མེ་གསལ་བར་སྣང་ནའང༌། དེའི་རྒྱུའམ་རྩ་བ་ཀོང་བུ་དང༌། སྡོང་བུ་དང༌། སྣུམ་དང༌། མེ་སྟེ་བཞི་དང༌། མར་མེ་རང་གི་ངོ་བོ་དམར་ལམ་ལམ་འབར་བ་དང༌། མར་མེའི་ཕྱེད་ལས་སེལ་བྱེད་ཀྱི་འོད་དང༌། བསལ་བྱའི་མུན་པ་སྟེ་དེ་ཐམས་ཅད་རང་བཞིན་གྱིས་མ་གྲུབ་པ་བཞིན་དུ་འདི་ལྟར་སྣང་ཞིང་རྟོག་པའི་ཆོས་ཐམས་ཅད་རང་བཞིན་གྱིས་མ་གྲུབ་པའི་སྟོང་པར་ཤེས་པའི་ངང་ནས་དམིགས་པ་མེད་པའི་སྙིང་བརྩེ་ཆེན་པོ་མི་གཡོ་བར་གོམས་པས་མཚན་མ་ཐམས་ཅད་རང་སར་གྲོལ་ཞིང༌། དག་པའི་ཕྲིན་ལས་ལྷུན་གྱིས་གྲུབ་པར་འགྱུར་རོ། །གསུམ་པ་དབང་པོ་འབྲིང་གི་ཐ་མའི་ངོ་སྤྲོད་ལ་གསུམ་ལས། དང་པོ་ཉམས་མྱོང་ཐོག་བབས་གསུམ་གྱིས་བསྒྲུབ་བྱ་བློ་གྲོས་དྲི་མ་མེད་པར་སད་པའི་ངོ་སྤྲོད་ནི། འགྲོ་འོང་སོགས་ཏེ། འདི་ལྟར་བསྒྲུབ་བྱའི་ཆོས་བདེ་གསལ་མི་རྟོག་པ་གསུམ་དང༌། ཆོས་གསུམ་གྱི་མཚན་ཉིད་འགྲོ་འོང་གནས་གསུམ་དང་བྲལ་བ་གསུམ་དང༌། དེའི་གནས་ལུགས་སྟོང་པ་ཉིད་དང༌། མཚན་མ་མེད་པ་དང༌། སྨོན་པ་མེད་པ་སྟེ་རྣམ་ཐར་སྒོ་གསུམ་མོ། །དེ་ཡང་རྣམ་པར་རྟོག་པ་འགྲོ་བ་དང༌། འོང་བ་དང༌། གནས་པ་གསུམ་ནི་དང་པོར་སྐྱེ་བའི་རྒྱུ། བར་དུ་གནས་པའི་ངོ་བོ། ཐ་མར་འགགས་པའི་འབྲས་བུའི་རྣམ་རྟོག་ཐམས་ཅད་ཀྱིས་སྟོང་པའི་སྟོང་པ་ཉིད་རྣམ་པར་ཐར་པའི་སྒོ་གསུམ་དུ་དག་པ་ལ། ཟག་མེད་ཀྱི་བདེ་བ་ཆེན་པོ་དང༌། རང་བཞིན་གྱིས་འོད་གསལ་བ་དང༌། གང་དུའང་རྣམ་པར་མི་རྟོག་པ་སྟེ། དེ་ལྟ་བུའི་བདེ་གསལ་མི་རྟོག་པའི་འབྲས་བུ་མངོན་དུ་གྱུར་པའི་ངང་དུ། ཟབ་མོ་དོན་ལ་བློ་གྲོས་ཀྱི་མིག་རྣམ་པར་དག་པའི་རྣལ་འབྱོར་པ་བཟང་པོ་རྣམས་ཀྱིས་རྟག་ཏུ་མཉམ་པར་བཞག་པར་བྱའོ། །གཉིས་པ་སྦྱོར་བ་ཐོག་བབས་གསུམ་གྱིས་སྒྲུབ་བྱེད་སྒོམ་པ་ཕུན་སུམ་ཚོགས་པར་ངོ་སྤྲོད་པ་ནི། སྙིང་རྗེ་ཆེན་པོ་སོགས་ཏེ། དང་པོ་ཐབས་ཀྱི་སྦྱོར་བ་ནི། ནམ་མཁའ་དང་མཉམ་པའི་འགྲོ་
XXX བ་ལ། རྒྱ་མཚོ་དང་མཉམ་པའི་བསམ་པ་སྙིང་རྗེ་ཆེན་པོ་མདུན་དུ་བཞག་པ་སྟེ་སྔོན་དུ་འགྲོ་བས། རི་རབ་དང་མཉམ་པའི་བྱང་ཆུབ་སེམས་དཔའི་སྤྱོད་པ་རླབས་པོ་ཆེ་རྗེས་སུ་བསྒྲུབ་པར་དམ་བཅའ། གཉིས་པ་ཤེས་རབ་ཀྱི་སྦྱོར་བ་ནི། བསམ་སྦྱོར་དེ་ཉིད་ཀྱི་ངོ་བོ་ལ་སོ་སོར་རྟོག་པའི་ཤེས་རབ་ཀྱི་དཔྱད་ཅིང་དམིགས་པར་ཤེས་པ་ལ་མ་ཡེངས་པར་རྟག་ཏུ་བལྟ་ཞིང༌། གསུམ་པ་བྱིན་རླབས་ཀྱི་སྦྱོར་བ་ནི། ཡིད་དམ་གྱི་ལྷ་བསྒོམ་པ་དང༌། བླ་མའི་རྣལ་འབྱོར་གྱི་སྒོ་ནས་གསོལ་བ་གདབ་པའོ། །དེ་ལྟ་བུའི་སྦྱོར་བ་ཡིས་སྒྲུབ་པ་པོ་རྣམས་རང་གི་སེམས་སྤྲོས་པས་དུབ་པ་བདེ་ཆེན་གྱི་ངང་དུ་ངལ་གསོ་བར་བྱའོ། །གསུམ་པ་རྣམ་རྟོག་ཐོག་བབས་གསུམ་གྱིས་སྒྲུབ་པའི་འགལ་རྐྱེན་ལམ་དུ་སློང་བ་ནི་བུ་ཉོན་སོགས་ཏེ། བུ་ཞེས་རང་གི་སྲས་ལ་ཉེ་བའི་མཚན་ནས་བོས་ཏེ་ཁྱོད་ཉོན་ཅིག་ཅེས་གཞན་དུ་མ་ཡེངས་པར་གདམས་ནས་གང་མཉན་པར་བྱ་བ། དང་པོ་ལམ་དུ་བསླང་བྱ་ནི། ཁྱོད་ཀྱི་རྒྱུད་ལ་གང་དང་གང་ཤར་བའི་རྣམ་པར་རྟོག་པ་ཐམས་ཅད་དོ། །གཉིས་པ་དེ་ལམ་དུ་བསླང་ན་ནུས་པའི་རྒྱུ་མཚན་ནི། རྣམ་པར་རྟོག་པ་དེས་འཁོར་བའི་རྒྱ་མཚོ་ཆེན་པོ་འདིར་ཐོག་མར་བདག་མ་བཅིངས། མཐར་བདག་མ་གྲོལ་བའི་ཕྱིར་ཏེ། དཔེར་ན་ཆུ་སྣོད་དུ་ཟླ་བའི་གཟུགས་བརྙན་ཤར་བ་ན་ཆུ་སྣོད་ཀྱིས་གཟུགས་བརྙན་བཅིངས་པའང་མེད། སྣོད་ཆགས་ནས་ཆུ་བོ་བ་ན་ཟླ་བའི་གཟུགས་བརྙན་གྲོལ་བའང་མེད་དེ་ནམ་མཁའི་ཟླ་བ་རང་བཞིན་ལས་མ་གཡོས་པ་བཞིན། རྣམ་རྟོག་ཤར་ཙམ་ནས་ཆོས་ཉིད་རང་མལ་ལས་གཡོ་བ་མེད་པའི་ཕྱིར་རོ། །གསུམ་པ་ཇི་ལྟར་སློང་བའི་ཉམས་ལེན་ནི། དང་པོ་མ་ཡེངས་པར་བཞག་པ་རལ་བསྐོར་མཁན་གཡུལ་དུ་ཞུགས་པ་ལྟ་བུ། བར་དུ་མ་བཅོས་པར་བཙའ་བ་ལ་མཁས་པ་གླང་རྫི་མཁས་པས་གླང་པོ་ཆེ་སྐྱོང་བ་
XXX ལྟ་བུ། ཐ་མར་རང་དགར་བཏང་བ་ལ་མཁས་པ་རྫིང་ཐོག་ནས་བྱ་འཕུར་བ་ལྟ་བུ་སྟེ། དེ་རྣམས་ནི་རྒྱས་པར་ཁྲིད་ཡིག་ལས་འབྱུང་བ་ལྟར་རོ། །གདམས་པ་འདི་ནི་གཞུང་འདི་ཉིད་ཀྱི་སྙིང་པོའི་སྙིང་པོ། རྣམ་རྟོག་ལམ་དུ་སློང་བའི་ཐབས་ཁྱད་པར་ཅན་ཡིན་པས་ན། ཀྱེ་ཧོ་ཞེས་ངོ་མཚར་བའི་ཚིག་གིས་མཚམས་སྦྱར་ནས། སེམས་ཅན་ཐམས་ཅད་ཐོག་མ་མེད་པ་ནས་རང་གི་སེམས་འཁོར་བ་སྡུག་བསྔལ་ཀྱི་རྒྱ་མཚོར་དུབ་པར་གྱུར་པ་ཐབས་འདི་ལྟ་བུ་ལ་བརྟེན་ནས་གཉུག་མ་རང་བཞིན་གྱིས་འོད་གསལ་བའི་དབྱིངས་སུ་ངལ་གསོལ་བར་གྱིས་ཤིག་ཅེས་གདམས་པའོ། །གཉིས་པ་དབང་པོ་ཐ་མའི་ངོ་སྤྲོད་ལ་གསུམ། དབང་པོ་ཐ་མའི་རབ་ལ་རིག་དྲི་མ་མེད་པར་བསྟན་པ་སྦྱོར་བ་གསུམ་ངོ་སྤྲོད། །ཐ་མའི་འབྲིང་ལ་གཟུང་བ་དང་འཛིན་པའི་རྩ་བ་བཅད་པ་སྒོ་མོ་གསུམ་གྱི་ངོ་སྤྲོད། ཐ་མའི་ཐ་མ་ལ་མཚན་མ་དབྱིངས་སུ་བསྟིམ་པ། དགག་སྒྲུབ་གསུམ་གྱི་ངོ་སྤྲོད་དོ། །དང་པོ་ལའང་གསུམ་ལས། དང་པོ་དཔེ་དོན་གསུམ་རོ་སྙོམས་ཞི་གནས་དང་ལྷག་མཐོང་ཟུང་འབྲེལ་དུ་སྟོན་པ་ནི། གཟུགས་བརྙན་སོགས་ཏེ། གཟུགས་བརྙན་དང་གཟུགས་དངོས་དང༌། བྲག་ཅ་དང་སྒྲ་དངོས། དབང་པོས་དངོས་སུ་མཐོང་བ་དང༌། རྨི་ལམ་གྱི་སྐབས་སུ་ཉམས་སུ་མྱོང་བ་རྣམས་རྗེས་སུ་དྲན་པའི་ཡིད་ལ་ལེགས་པར་དཔྱད་པས། རྣམ་པ་ནི་གཟུགས་བརྙན་སོགས་སྣང་ཞིང༌། ངོ་བོ་ནི་གཟུགས་དངོས་སོགས་ཀྱང་རང་བཞིན་གྱིས་མ་གྲུབ་པ་ཆོས་ཐམས་ཅད་སྣང་ཙམ་ནས་བདེན་པ་མེད་པར་ཤེས་པར་བྱས་ཏེ། ཆགས་སྡང་སྐྱེ་བའི་ཡུལ་ཐམས་ཅད་རང་བཞིན་གྱིས་མ་གྲུབ་པས་ཡུལ་ཅན་ཤེས་པས་བདེན་མེད་དུ་ཤེས་པ་ན་གཟུང་འཛིན་ཐམས་ཅད་རང་སར་གྲོལ་བར་འགྱུར་བ་ཡིན་ནོ། །དེ་ལ་བརྟེན་ནས་ཏིང་ངེ་འཛིན་རྩེ་གཅིག་ཏུ་གནས་པའི་ཞི་གནས་
XXX འགྲུབ་པས་ན་དེ་དང་དེ་བྱུང་གི་འབྲེལ་བར་གྲུབ་པ་དང༌། མཚན་མ་སྤོང་བྱེད་ཀྱི་ཐབས་ཟད་པར་ལྷག་མཐོང་བསྒོམ་པའི་སྦྱོར་བ་ཉམས་སུ་བླང་པར་བྱ་སྟེ། དང་པོ་བསྒོམ་བྱའི་དངོས་པོ་རྩེ་གཅིག་པས་མདུན་དུ་བྱ། བར་དུ་རྩེ་གཅིག་པ་ཉིད་རང་ངོ་ཤེས་པའི་སྒོ་ནས་སོར་བཞག །མཐར་དེ་ཉིད་ཀྱི་དམིགས་པས་བློའི་སྤུ་རིས་ཟད་པར་བྱའོ། །གཉིས་པ་ཤེས་རབ་གསུམ་གྱི་སྒྲོན་མེ་སྤར་བས་སྒྲིབ་གཡོགས་ཀྱི་མུན་པ་བསལ་བ་ནི། སོ་སོར་རྟོག་དང་སོགས་ཏེ། འགྱུ་བ་གང་ཤེས་ཐམས་ཅད་ལ་སོ་སོར་རྟོག་པའི་ཤེས་རབ་ཀྱིས་དཔྱད་པས་རང་བཞིན་མེད་པར་ཤེས་པ་དང༌། མཐར་སོ་སོར་རྟོག་པའི་ཤེས་རབ་ཉིད་ཀྱང་རྟེན་དང་བྲལ་བར་ཤེས་པ་དང༌། ཤེས་བྱ་དང་ཤེས་བྱེད་ཀྱི་བློའི་འཛིན་པ་ཞི་བའི་ངང་རྟག་ཏུ་རྒྱུན་མི་འཆད་པར་བསྒོམས་བྱུང་གི་ཤེས་རབ་རྒྱུད་ལ་བསྟེན་པ་སྟེ། དེ་ལྟ་བུའི་ཤེས་རབ་གསུམ་གྱིས་རིམ་པ་བཞིན་དུ། བསྲེགས་བཅད་བརྡར་བའི་གསེར་བཞིན་དང༌། བུད་ཤིང་ཟད་པའི་མེ་བཞིན་དང༌། སྤྲིན་དང་ཁུག་རྣ་ལ་སོགས་པས་འགྱུར་བ་མེད་པའི་ནམ་མཁའ་བཞིན་དུ་སྤང་བྱ་གཟུང་བའི་གནས་ལུགས་ཇི་ལྟ་བ་བཞིན་དུ་ཤེས་པར་བྱེད་པ་དང༌། གཉེན་པོའི་འཛིན་མེད་པའི་རྟོག་པ་ངང་གིས་ཞི་བར་བྱེད་པ་དང༌། གློ་བུར་སྒྲིབ་གཉིས་བག་ཆགས་དང་བཅས་པ་དག་པར་བྱེད་པ་ཡིན་ནོ། །གསུམ་པ་སྣང་བ་གསུམ་གྱི་ཡེ་ཤེས་སད་པས་ཡོན་ཏན་རིན་པོ་ཆེའི་སྒོ་དབྱེ་བ་ནི། སྣང་མེད་དེ་སྣང་སོགས་ཏེ། གཞི་རང་བཞིན་གྱིས་སྡང་བ་མེད་ཀྱང་ལམ་དེའི་སྟོབས་ཀྱིས་སྣང༌། འབྲས་བུ་རྐྱེན་གྱིས་བསྒྱུར་པས་སྣ་ཚོགས་སུ་སྣང་བ་གསུམ་གྱི་དཔེ་ནི་རིམ་པར། ནམ་མཁའ་རང་བཞིན་མེད་པ་དང༌། མེ་ལོང་ལ་གཟུགས་བརྙན་འཆར་བ་དང༌། ཤེལ་གོང་དག་པར་ཡུལ་གྱི་རྐྱེན་གྱིས་ཁ་དོག་སྣ་ཚོགས་སུ་སྣང་བ་བཞིན་ནོ། །དེ་ལྟ་བུས་
XXX ཚུལ་ཉམས་འོག་ཏུ་ཚུད་པས་མཉམ་པར་བཞག་པའི་སྟོབས་ཀྱིས་ཡོན་ཏན་རིན་པོ་ཆེའི་གཏེར་སྒོ་བྱེད་པ་ཡིན་ཏེ། སྣང་མེད་མ་བཅོས་པའི་ངང་དུ་སད་པར་བྱེད་པས་དེའི་ངང་ལ་རྩེ་གཅིག་ཏུ་ཏུ་གནས་པའི་ཏིང་ངེ་འཛིན་དང༌། དེ་སྣང་རང་སྣང་དུ་སད་པར་བྱས་པས་རང་སྣང་རང་སར་གྲོལ་བའི་ཡི་གེ་དང༌། རྐྱེན་སྣང་རྟེན་འབྲེལ་གྱི་སྣང་བ་སད་པར་བྱས་པས་རྟེན་འབྲལ་དག་པ་གཟུངས་ཀྱི་སྒོ་འབྱེད་པར་བྱེད་ཅིང༌། དེ་ལྟར་ན་ཏིང་ངེ་འཛིན་གྱི་གཞི་ལས་ཡེ་ཤེས་ཀྱི་ངོ་བོ་གྲུབ་སྟེ་གཟུངས་ཀྱིས་མི་འབྲལ་བར་འཛིན་ལ་དེ་མཐུས་མཐར་ཐུག་རིམ་པ་བཞིན་དུ། ཆོས་སྐུ་དང༌། ལོངས་སྐུ་དང༌། སྤྲུལ་པའི་སྐུ་སྟེ་དེ་རྣམས་ཀྱི་རྟོགས་པ་རྒྱུད་ལ་འཆར་བར་བྱེད་པ་ཡིན་ནོ། །གཉིས་པ་དབང་པོ་ཐ་མའི་འབྲིང་གི་ངོ་སྤྲོད་ལ་གསུམ་ལས། དང་པོ་ལུས་ཀྱི་སྒོ་མོ་དབང་པོ་ལྔ་ལ་བརྟེན་ནས་བཟུང་བ་དང་གཡེང་བ་རྡུལ་སྤོང་བ་ནི། མཐོང་བ་མཉམ་བཞག་སོགས་ཏེ། སྒོ་ལྔའི་དབང་པོ་ལ་བརྟེན་ནས་ཡུལ་ལྔ་མཐོང་བ་ན། མཐོང་མཁན་རང་གི་ངང་དུ་ལྷོད་ཀྱིས་གློད་ལ་ཧད་དེ་མཉམ་པར་བཞག་པས། སྣང་ཡུལ་མ་འགགས་ལ་དེར་འཛིན་དང་བྲལ་བའི་འོད་གསལ་འཆར་བ་ཡིན་ཏེ། དེ་ཚེ་མཐོང་བ་གང་ཡིན་པ་དང་དེ་དོན་གྱིས་མ་མཐོང་བ་ཡིན་པའི་རྒྱུ་མཚན། དེ་ལ་གཟུང་འཛིན་གྱི་ཞེན་པ་མ་སྐྱེས་པའི་ཕྱིར། དེ་ལྟར་ཤིན་ཏུ་རྣམ་པར་མི་རྟོག་པའི་འོད་གསལ་ལ་རྩེ་གཅིག་ཏུ་གནས་པས། མཚན་མའི་རྣམ་པར་གཡེང་བའི་རྡུལ་དང་བྲལ་བ་ཉིད་དོ། །གཉིས་པ་གང་གི་སྒོ་མོ་རླུང་ལ་བརྟེན་ནས་འཛིན་པ་ཡིད་ཀྱི་སྐྱེས་བུ་བསད་པ་ནི། རླུང་ནི་གར་འགྲོ་སོགས་ཏེ། སེམས་ནི་རླུང་གི་བཞོན་པ་ཅན་ཡིན་པས་རླུང་ནི་གར་འགྲོ་བ་དེར་སེམས་འགྲོ་ཞིང་གནས་པས། དེ་ཉིད་ལུས་ཀྱི་ཁྱིམ་དབུ་མའི་ནང་དུ་བུམ་ཅན་གྱི་སྦྱོར་བས་བཙོན་དུ་བཟུང་ནས། ཡིད་ཀྱི་སྐྱེས་བུ་རང་ངོ་
XXX ཤེས་པའི་མཚོན་གྱིས་བསྣུན་ནས་བྱེད་རྩོལ་དང་བྲལ་བའི་དབྱིངས་སུ་བསད་པར་བྱས་པས། རླུང་གི་བཞོན་པ་དེ་མེད་ན། སེམས་ནི་གང་དུ་འགྲོ་སྟེ་མི་འཕྱེ་བོ་བཞིན་དུ་རང་སར་གནས་པར་འགྱུར་རོ། །གསུམ་པ་ཡིད་ཀྱི་སྒོ་མོ་ཀུན་རྟོག་གི་རང་བཞིན་རྟོགས་པས་གཟུང་འཛིན་གཉིས་ཀའི་བག་ཆགས་གཞོམ་པ་ནི། ཐམས་ཅད་རང་བཞིན་སོགས་སྟེ། ཀུན་རྟོག་ཐམས་ཅད་ཀྱི་རང་བཞིན་ནི་མ་བཅོས་པའི་གཉུག་མའི་ངོ་བོ་ལས་མི་འདའ་བས། །རྣམ་པའི་ཀུན་རྟོག་ཐམས་ཅད་ནི་རྐྱེན་གྱི་གཞན་དབང་ལས་བྱུང་བ་ཡིན་ནོ། །དེས་ན་རང་བཞིན་གསུམ་གྱི་དེ་ཁོ་ན་ལེགས་པར་ཤེས་ན། ཀུན་རྟོག་ཤར་ཙམ་ན་ཀུན་རྟོག་ཉིད་རང་བཞིན་མེད་པར་བྱེད་དོ། །དེ་ལ་རང་བཞིན་གསུམ་ནི་ངོ་བོའི་རང་བཞིན་བཅོས་སུ་མེད་པ། རྐྱེན་གྱི་རང་བཞིན་དུ་མར་འཆར་བ། གཉིས་སུ་མེད་པའི་རང་བཞིན་རོ་གཅིག་པའོ། །གསུམ་པ་དབང་པོ་ཐ་མའི་ཐ་མ་ལ་ངོ་སྤྲོད་པའི་ཚུལ་གསུམ་ལས། དང་པོ་ནམ་མཁའ་བསྒོམ་པའི་རྣལ་འབྱོར་ལ་བརྟེན་ནས་གྲུབ་བསལ་གྱི་མཚན་མ་དབྱིངས་སུ་བསྟིམ་པ་ནི། མཐོང་བས་གྲུབ་དང་སོགས་ཏེ། ཤེས་བྱའི་ཡུལ་འདི་རྣམས་མཐོང་བས་གྲུབ་པར་འཇོག་པ་དང༌། ཤེས་རབ་ཀྱིས་གཞིག་པ་ན་མེད་ཅེས་འཇོག་པ་ནི་རྣམ་རྟོག་གིས་ཀུན་ཏུ་བརྟགས་པར་ཟད་ཀྱི། སེམས་ཉིད་ཀྱི་གཤིས་འདི་ལ་འདོད་ནས་ཅིར་ཡང་གྲུབ་པ་མེད་པས། བུ་ཀྱེ་ཞེས་ཉེ་བའི་ཚིག་གིས་བོས་ནས་ནམ་མཁའ་བསྒོམ་པར་བྱོས་ཤིག་ཅེས་གདམས་པའོ། །ནམ་མཁའ་སྒོམ་པའི་ཚུལ་ནི་གསུམ་སྟེ། ཕྱིའི་ནམ་མཁའ་སྒྲིབ་པ་མེད་པ་ལ་མིག་ཆེ་རེ་གཏད་པ་དང༌། ནང་གི་ནམ་མཁའ་སེམས་མ་བཅོས་པ་ལ་བློ་བཞག་པ་དང་གསང་བའི་ནམ་མཁའ་ཕྱི་ནང་ཅིར་ཡང་མི་དམིགས་པས་རང་དགར་བསྒོམ་པའོ། །གཉིས་
XXX པ་རང་དགར་བསྒོམ་པའི་རྣལ་འབྱོར་ལ་བརྟེན་ནས་རྐྱེན་བྲལ་གྱི་མཚན་མ་དབྱིངས་སུ་བསྟིམ་པ་ནི། ག་བུར་དང་ནི་སོགས་ཏེ། འདི་ལྟར་ག་བུར་དང་ནི་དེ་ཡི་དྲི་གཉིས་པོ། ཕན་ཚུན་གཅིག་ལ་གཅིག་བརྟེན་པས་ལྡོག་པ་སོ་སོར་ཕྱེ་འང༌། ངོ་བོ་དབྱེར་མེད་པ་ཡིན་ཏེ། ག་བུར་དེ་མེད་ན་དེའི་དྲི་འང་མེད་ལ། དྲི་མེད་ན་ག་བུར་དེ་ཡང་མེད་ཅིང་མི་དམིགས་པ་བཞིན། སེམས་ཀྱི་རང་བཞིན་ལ་རྐྱེན་སྣང་གློ་བུར་གྱི་འཁྲུལ་པ་དང༌། རྐྱེན་དང་བྲལ་བ་རང་བྱུང་སོ་མའི་ཡེ་ཤེས་གཉིས་ཀྱང་ཕན་ཚུན་སོ་སོར་མ་ཡིན་ཅིང་ཐ་མི་དད་པས་རང་དགར་སྒོམས་ཤིག་ཅེས་གདམས་པའོ། །རང་དགར་ཇི་ལྟར་སྒོམ་པའི་ཚུལ་ནི་གསུམ་སྟེ། གཤིས་གཉུག་མ་རང་དགའ་མ་བཅོས་སོ་མར་འཇོག་པ་དང༌། རྩལ་རྣམ་རྟོག་རང་དགའ་ཅི་སྐྱེས་སྐྱེར་གཏོང་བ་དང༌། ངོ་བོ་སྐྱེ་མེད་རང་དགའ་སྐྱེས་ཙམ་ནས་སྐྱེ་རྒྱུ་མ་དམིགས་པས་མ་སྐྱེས་པར་རོ་སྙོམས་པའོ། །གསུམ་པ་རྣམ་རྟོག་གསོད་པའི་རྣལ་འབྱོར་ལ་བརྟེན་ནས་མཉམ་པ་དང་མི་མཉམ་པའི་མཚན་མ་དབྱིངས་སུ་བསྟིམ་པ་ནི། མཉམ་པའི་སེམས་ཀྱིས་སོགས་ཏེ། དེ་ལ་ནང་མཉམ་ཉིད་ཁྱབ་བརྡལ་ཆེན་པོའི་སེམས་ཀྱིས་གཡོ་བའི་ཡིད་བློ་བུར་བ་འགོག །ཕྱི་མི་མཉམ་པ་དུ་མ་དང༌། སྨིག་རྒྱུ་ལ་སོགས་པའི་སྣང་ཉམས་སྣ་ཚོགས་ཀྱང་མཉམ་ཉིད་ཆེན་པོའི་གདམས་པ་དྲན་པའི་ཐག་པས་འཆིང་བར་བྱེད་དེ་ལྟར་ཉམས་སུ་བླངས་པས་ནམ་ཞིག་གི་ཚེ་མཉམ་པ་དང་མི་མཉམ་པ་གཉིས་ཀར་འཛིན་པ་དང་བྲལ་བ་ནི་མཉམ་བཞག་ཆེན་པོ་སྟེ། དེས་རྣམ་པར་རྟོག་པ་ཐམས་ཅད་གསོད་པར་བྱེད་དོ། །རྣམ་རྟོག་གསོད་པའི་ཚུལ་ལའང་གསུམ་སྟེ། ཐ་མལ་པའི་རྣམ་རྟོག་དྲན་པས་གསོད། དྲན་པའི་རྣམ་རྟོག་རང་ངོ་ཤེས་པས་གསོད། རང་ངོ་ཤེས་པའི་རྣམ་རྟོག་མཉམ་པའི་ཉིད་ཀྱིས་གསོད་པའོ། །
XXX རྩ་བའི་ས་བཅད་གཉིས་པ་གཅིག་ཅར་བ་བྱིན་རླབས་དབང་གིས་གྲོལ་བའི་ངོ་སྤྲོད་ཀྱི་མན་ངག་ལ་བཞི་ལས། དང་པོ་དག་བྱེད་བུམ་དབང་གིས་དྲན་རྟོག་དཔྱིས་ཕྱིན་པར་སྦྱང་བ་ནི། ཁྲུས་བྱས་སོགས་ཏེ། ཕྱི་བུམ་པའི་ཆུས་བཀྲུ་བ་དང༌། ནང་སྭ་བྷ་བ་སོགས་སྔགས་སྦྱང་བ་དང༌། གསང་བ་ཆོས་ཐམས་ཅད་ཀྱི་དེ་ཁོ་ན་ཉིད་ལ་མ་དག་པ་ཏིལ་འབྲུ་ཙམ་ཡང་མེད་པར་ཤེས་པའི་ཁྲུས་བྱས་ནས། རིག་པ་གཅེར་བུའི་ངང་དུ་སྦྱངས་པས་དག་པར་འཛིན་པའི་དྲི་ན་འང་བྲལ་བ་ནམ་མཁའི་གོས་གྱོན་ལ། རྣམ་པར་རྟོགས་པ་བརྟེན་མེད་དུ་བསྒོམས་པས་རང་གྲོལ་དུ་བསྲེགས་པའི་སྦྱིན་སྲེག་བྱ་ཞིང༌། བགས་ཆགས་ཕྲ་མོ་དྲན་པའི་ཐལ་བའང་བདེ་བ་ཉམས་སུ་མྱོང་གི་འཇུག་ངོགས། གསལ་བ་ཡེ་ཤེས་ཀྱི་འཇུག་ངོགས་མི་རྟོག་པ་ཏིང་ངེ་འཛིན་གྱི་འཇུག་ངོགས་སུ། བསམ་གཏན་གྱི་ཆུ་དང༌། ཡེ་ཤེས་ཀྱི་རླུང་གིས་ལྷན་ཅིག་ཏུ་སྦྱང་བར་བྱོས་ཤིག་ཅེས་གདམས་པའོ། །གཉིས་པ་ཕོ་ཉ་གསང་བའི་དབང་གིས་དམ་ཚིག་གི་ཕྱག་རྒྱ་དབང་དུ་བྱ་བ་ནི། སྣོད་བཅུད་སོགས་ཏེ། སྣོད་བཅུད་དང་འདྲ་བ་ནི་ལུས་དང་རླུང་སྟེ་རླུང་ལུས་ལ་བརྟེན་ནས་གནས་པས་སོ། །རླུང་དེ་དང་འགྲོགས་པ་ནི་སེམས་ཀྱི་རྒྱུན་ཏེ། དེ་ལྟར་ན་སྔ་མ་ལུས་ནི་བརྟན་པ་དང༌། ཕྱི་མ་རླུང་སེམས་གཉིས་ནི་གཡོ་བ། ནམ་མཁའ་ནི་རང་བཞིན་གྱིས་འོད་གསལ་བའི་དབྱིངས། ཉི་མ་གཏུམ་མོའི་མེ། ཟླ་བ་ཀུནྡ། སྒྲ་གཅན་འཛིན་ནི་རླུང་སེམས་ཁ་སྦྱོར། དེ་ལས་སྐྱེས་པའི་ཉམས་འོད་གསལ་ནི་མེ་ཁྱེར་ཏེ། དེ་ལ་སོགས་པའི་རྟགས་སྣང་འཆར་བའོ། །ཆར་ནི་མི་རྟོག་པ་སྟེ་སྤྲིན་ལས་ཆར་ཆེན་པོ་ཐོགས་མེད་དུ་འབེབས་པ་ལྟར་བདེ་བ་དང་འོད་གསལ་འདྲེས་པའི་རྩལ་ལས་བྱུང་བའོ། །བདེ་བ་ནི་བུང་བ་སྟེ། བུང་བས་སྦྲང་རྩིའི་བཅུད་ལེན་པ་ལྟར་འོད་གསལ་དང་མི་རྟོག་པ་ཟུང་དུ་འཇུག་པའི་དོན་
XXX ཉམས་སུ་མྱོངས་པ་ལས་བྱུང་བའོ། །དེས་མཚོན་པའི་གསང་བའི་དབང་གི་ཡེ་ཤེས་ཀྱིས་དམ་ཚིག་གི་ཕྱག་རྒྱ་རྩ་རླུང་ཐིག་ལེ་དབང་དུ་འགྱུར་བ་ཡིན་ནོ། །གསུམ་པ་ཤེས་རབ་ཡེ་ཤེས་ཀྱི་དབང་གིས་ལྷན་ཅིག་སྐྱེས་པའི་རོ་མྱོང་བ་ནི། སྣ་ཚོགས་ཡིད་ཀྱི་སོགས་ཏེ། སྣ་ཚོགས་པའི་ཡིད་ཀྱི་མེ་ཏོག་ནི་ཕྱི་ནང་གསང་བ་དེ་ཁོ་ན་ཉིད་ཀྱི་ཕྱག་རྒྱའོ། །དེ་ལ་ཚུལ་བཞིན་དུ་བསྟེན་པས་དགའ་བ། མཆོད་དགའ། ཁྱད་དགའ། ལྷན་སྐྱེས་ཀྱི་དགའ་བ་རྣམ་པ་བཞིའི་བཅུད་བླངས་ཏེ། ཞུ་བདེ་ལྷན་ཅིག་སྐྱེས་པའི་རོ་མྱང་བ་ལ་བརྟེན་ནས། སྒྲུབ་པ་པོའི་ཡིད་ཀྱིས་སྐྱེས་བུ་དཔེས་མཚོན་པའི་ཡེ་ཤེས་ཀྱིས་ཚིམ་པར་བྱེད་དོ། །བཞི་པ་ཕྱག་རྒྱ་རྣམ་པར་རོལ་པའི་དབང་གིས་ཀུན་སྤྱོད་རྒྱུ་ཡན་དུ་སྤྱོད་པ་ནི། ལུས་རླུང་སོགས་ཏེ། དེ་ལ་ལུས་ནི་དག་པའི་ལུས་ལྷའི་སྐུར་བསྒོམ་པ་དང༌། མཆོག་གི་ལུས་སྒྱུ་མར་མོས་པ་དང༌། ཕུན་སུམ་ཚོགས་པའི་ལུས་འོད་གསལ་དུ་དག་པའོ། །རླུང་ནི་གཡོ་བའི་རླུང་ལ་ལས་སྦྱོར་ནུས་པས་ཕྱི་ནང་འགུགས་འདྲེན་སོགས་གྲུབ་པ་དང༌། བརྟན་པའི་རླུང་རྡོ་རྗེར་ལྟར་འཛིན་ནུས་པས་འབྱུང་བའི་གནོད་པས་མི་ཚུགས་པ་དང༌། མི་ཕྱེད་པའི་རླུང་ནམ་འཛིན་པའི་ཚེ་བདེ་སྟོང་ཟུང་འཇུག་གི་ཡེ་ཤེས་འདྲེན་ནུས་པའོ། །རྩ་ནི་སྒྱུ་མའི་རྩ་ཆེན་ཨ་བ་དྷུ་ཏི་སྦྱངས་པ་དང༌། ནམ་མཁའི་རྩ་ཆེན་པོ་ཆོས་ཐམས་ཅད་ཀྱི་དེ་ཁོ་ན་ཉིད་བསྒོམ་པ་དང༌། བསམ་གྱིས་མི་ཁྱབ་པའི་རྩ་ཆེན་པོ་ཆོས་ཀྱི་དབྱིངས་མངོན་དུ་གྱུར་པའོ། །དེ་ལྟ་བུའི་ཕྱག་རྒྱ་དེ་ཡིས་ལུས་ངག་ཡིད་ལ་རྒྱས་གདབ་ཅིང་བཅིང་པར་བྱས་པས་དྲོད་ཐོབ་པ་ལ་ཐོགས་པ་མེད་པ་འབྱུང་བ་ཡིན་ནོ། །དྲོད་ནི་བཞི་སྟེ། བདེ་བ་དང༌། གསལ་བ་དང༌། མི་རྟོག་པ་དང༌། རོ་སྙོམས་པའི་དྲོད་དེ། དྲོད་ཐོབ་ནས་ཀུན་སྤྱོད་མཐའ་གཅིག་ཏུ་ངེས་པར་མི་བྱ་སྟེ། གཟའ་
XXX གཏད་མེད་པའི་སྤྱོད་པས་ཕྱོགས་རིས་མེད་པའི་ཕྲིན་ལས་མཁའ་ཁྱབ་ཏུ་བསྐྱང་བར་བྱའོ། །ཞེས་པའི་དོན་ཏོ། །གསུམ་པ་མཇུག་གི་དོན་ལ་གཉིས། གཞུང་གི་རྫོགས་བྱང་དང༌། ལོ་ཙཱ་བའི་འགྱུར་བྱང་ངོ༌། །དང་པོ་ནི། རྣལ་འབྱོར་པ་སོགས་ཏེ། ཐབས་དང་ཤེས་རབ་ཟུང་དུ་འཇུག་པའི་ཟབ་མོའི་དོན་ལ་བློ་སྦྱོར་བར་བྱེད་པའི་རྣལ་འབྱོར་པ་རྣམས་ཀྱི་རང་གི་སེམས་གཟུང་འཛིན་གྱི་སྤྲོས་པ་སྣ་ཚོགས་པས་དུབ་པ་ངལ་གསོ་བར་བྱེད་པའི་མན་ངག་ཚིགས་སུ་བཅད་པ་ཉི་ཤུ་རྩ་ལྔ་པ་ཞེས་བྱ་བ། བརྗོད་བྱ་ཆོས་ཐམས་ཅད་ཀྱི་གནས་ལུགས་དེ་ཁོ་ན་ཉིད་ཇི་བཞིན་པ་རྣལ་དུ་མཚོན་པ་བྱེད་པའི་ཐབས། རྗོད་བྱེད་མ་བཅོས་པའམ། ལྷུག་པར་བརྗོད་པས་ན་དོ་ཧ་སྟེ། དེ་ལྟ་བུའི་རྡོ་རྗེའི་ཚིག་གི་གཞུང་ལྷག་མ་མ་ལུས་པར་བསྟན་ཟིན་པས་ན་རྫོགས་སོ་ཞེས་གསུངས་སོ། །གཉིས་པ་ནི། ཇོ་བོ་སྤྱན་རས་གཟིགས་སོགས་ཏེ། ཇོ་བོ་ནི་ཨཱརྻ་ཞེས་པའི་སྒྲ་ལས་དྲངས་ན་འཕགས་པའི་རྗེ་བཙུན་སྟེ་རང་གི་ལྷག་པའི་ལྷ་ཞེས་པའི་སྒྲ་སྦྱར་བའོ། །དེ་གང་ཞེན། སྙིང་རྗེ་ཆེན་པོའི་སྤྱན་རས་གཟིགས་ཀྱིས་འགྲོ་བ་ཀུན་ལ་དུས་རྟག་ཏུ་གཟིགས་པའི་རྒྱལ་བའི་སྲས་པོ་རྣམས་ཀྱི་གཙོ་བོར་གྱུར་པས་ན་སྤྱན་རས་གཟིགས་དབང་ཕྱུག་ཅེས་ཡོངས་སུ་གྲགས་པ་དེས། ཤེས་རབ་ཀྱི་ཕ་རོལ་ཏུ་ཕྱིན་པའི་བརྗོད་བྱ་ཐམས་ཅད་ཆོས་འཕགས་ཀྱི་ལེའུར་ཏིང་ངེ་འཛིན་གྱི་སྒོ་ཉི་ཤུ་རྩ་ལྔར་བསྡུས་པ་དང་རྗེས་སུ་མཐུན་པར། དོ་ཧ་རྡོ་རྗེའི་ཚིགས་སུ་བཅད་པའི་ཉི་ཤུ་རྩ་ལྔ་འདི་ཉིད་དངོས་སུ་གནང་བའི་མོད་ནས་ཕྱག་རྒྱ་ཆེན་པོ་མཆོག་གི་གྲུབ་པ་བརྙེས་པའི་སྐྱེས་བུ། ཟུང་འཇུག་གི་དོན་ལ་བློ་སྦྱོར་བས་རྣལ་འབྱོར། དེ་རྣམས་ཀྱི་གཙོ་བོར་གྱུར་པས་དབང་ཕྱུག །དེ་ཡང་འཕགས་པའི་ས་བརྙེས་པས་ཆེན་པོ། ཤྲཱི་ཛ་ག་ཏ་མི་ཏྲ་ཨཱ་ནནྡ་
XXX སྟེ་དཔལ་འགྲོ་བའི་བཤེས་གཉེན་ཀུན་དགའ་ཞེས། རྒྱལ་པོའི་སྲས་སུ་སྐུ་འཁྲུངས་པའི་ཚེ་ཁྲོམ་ཆེན་པོའི་དབུས་སུ་ཡབ་སྲས་མཇལ་བས་ལྷ་མིའི་འགྲོ་བ་ཐམས་ཅད་རབ་ཏུ་དགའ་བས་མཚན་དེ་སྐད་དུ་བཏགས་པ་དང༌། གནུབ་ནམ་མཁའི་སྙིང་པོའི་དཔོན་བརྒྱུད་ལོ་ཙཱ་བ་སྟེ་འཇིག་རྟེན་གྱི་མིག་མཚན་བྱམས་པའི་དཔལ་ཞེས་གྲགས་པ་དེས། བལ་པོའི་ཡུལ་གྱི་བྱེ་བྲག་དཔལ་གུ་ལང་གསེར་ཁང་གི་ནགས་ཁྲོད་ཨམ་བྷ་རི་ཞེས་གྲགས་པའི་སའི་མཐོང༌། མཐོང༌། པརྤ་ཏའི་བསིལ་ཁང་དུ་ལེགས་སྦྱར་གྱི་གཞུང་ལས་བོད་ཀྱི་སྐད་དུ་བསྒྱུར་བའོ། །ཞེས་པའི་དོན་ཏོ། །དེ་ལྟར་གཞུང་འདི་ལ་ཁྲོ་ཕུ་ལོ་ཙཱ་བ་ཆེན་པོའི་རྣམ་བཤད་རྒྱས་བསྡུས་དང་ཀུན་མཁྱེན་བུ་སྟོན་རིན་པོ་ཆེའི་མདོ་རྒྱུད་ཀྱི་ལུང་སྦྱོར་དང༌། བར་སྐབས་ཀྱི་རྣམ་བཤད་འགའ་ཞིག་ཀྱང་སྣང་བ་ལས། ཁྲོ་ལོའི་གསུང་རབ་དག་གི་དོན་གྱི་སྙིང་པོའི་བཅུད་བསྡུས་ཏེ་འབྲུ་འགྲེལ་གཙོ་བོར་བཏོན་པའི་ཚུལ་གྱིས་བྲིས་པ་ཡིན་ལ། འགྲན་ཟླ་དང་བྲལ་བའི་གྲུབ་པའི་ཁྱུ་མཆོག་ཆེན་པོའི་བཀའ་སྲོལ་ལས་བྱུང་བའི་གདམས་ངག་ཁྱད་པར་དུ་འཕགས་པ་འདི་ཉིད་ཐོས་བསམ་གྱིས་གཏན་ལ་ཕབ་ཅིང་བསྒོམ་པས་ཉམས་སུ་བླང་བ་ནི་དལ་འབྱོར་གྱི་རྟེན་ལ་སྙིང་པོ་ལེན་པའི་ཐབས་མཆོག་ཏུ་ཤེས་པར་བྱའོ། །ཕྱག་ཆེན་གདམས་པ་ཀུན་གྱི་ཕུལ། །སེམས་ཉིད་ངལ་གསོའི་གཞུང་འགྲེལ་ལས། །སྙིང་པོ་བསྡུས་པའི་ལེགས་བྱས་ཀྱིས། །འགྲོ་ཀུན་ཟུང་འཇུག་མཆོག་བརྙེས་ཤོག། །ཅེས་པའང་མང་དུ་ཐོས་པའི་བྱ་བྲལ་སྤང་བ་པ་འཇམ་དབྱངས་བླ་མ་དགྱེས་པའི་འབངས་མཁྱེན་བརྩེའི་དབང་པོས་གཞུང་འགྲེལ་སྙིང་པའི་དགོངས་པ་རང་བཟོའི་རྙོགས་མས་མ་བསླད་པར་མདོར་བསྡུས་ཏེ་ཟིན་བྲིས་སུ་བགྱིས་པ་དགེ་ལེགས་འཕེལ་བར་གྱུར་ཅིག། །།


XXX 'phags pa spyan ras gzigs kyis grub chen mi tra dza ki la gsungs pa'i phyag rgya chen po sems nyid ngal gso'i gzhung 'grel snying po bsdus pa zhes bya ba bzhugs so/ /
XXX oM swa sti sid+d+haM/_'jig rten mgon po snying rje'i gter/ /bla ma mchog la gus btud nas/ /rang gi sems nyid ngal gso ba'i/ /gzhung 'grel snying po cung zad bsdu/ /'di la gnyis/_lo rgyus dang*/_gdams pa dngos so/ /dang po ni/_'phags pa spyan ras gzigs kyi rnam par 'phrul pa grub chen mi tra dzo ki zhes 'jig rten na yongs su grags pa de ni rgya gar 'phags pa'i yul gyi shar phyogs ra DA'i yul gyi grong khyer chen po rgyal rigs su sku 'khrungs/_chung ngu'i dus nas dam pa'i rigs yongs su sad de rgyal srid mchil ma'i thal ba bzhin du bor te chos la byon/_de'i tshe grub pa brnyes pa'i gtam ngo mtshar ba nyi shu zhes 'phags dang mkhas pa rnams kyi rna ba'i rgyan du gyur pa ni 'di yin te/_thog mar til+li pa dngos kyi slob ma rol pa'i rjes su bzung nas kha sar pa Nir lo bcu gnyis su bsgom pas rdo rje'i shing gi maN+Dal me long ltar 'jam pa'i steng du 'phags pa spyan ras gzigs 'khor dang bcas mngon sum du byon nas chos bstan
XXX pas grub pa brnyes pa ni dang po ste/_mtshan ni a dzi ta mi tra gup+ta ste mi pham sbas pa'i bshes gnyen zhes bya'o/ /ral gcig mas thabs lam bstan te gang 'dod thams cad shing stan mdun du byas nas gsol ba btab pas 'byung ba ni gnyis pa'o/ /o tan+ta pU ri na dge 'dun stong phrag bcu gnyis gnas pa nang ma mthun pa las gcig gi phyogs bur shing rgyal pos byas te dmag drangs pa 'khor lo 'phangs pas dmag thams cad skrag par gyur te bros/_dge 'dun dang gtsug lag khang la gnod pa med pa ni gsum pa'o/ /rgyal po shing rta can gyi ring la ba ra NA sa'i dpung tshogs rdul gyis nyi ma 'grib pa lta bus ma ga d+ha'i sangs rgyas kyi bstan pa gzhom par rtsom pa la sku cer bus byas nas gad rgyangs bsgrags pas sa g.yos shing phyugs thams cad rengs par mdzad pas rgyal pos bzod pa phul te rengs pa slar yang phyir bzlog pa ni bzhi pa'o/ /rgyal po grags pa sde bzhi dpang du btsugs te shing stan gul nas gser srang sbyin zhing
XXX sangs rgyas pa mu stegs pa la 'jug_/bsgul ma nus na mu stegs pa sangs rgyas pa la 'jug pa'i chad byas nas thang yangs par shing stan bor bas cung zad kyang bsgul ma nus te mu stegs pa rnams bstan pa la btsud pa ni lnga pa'o/ /rgyal po u pa tra zhes bya bas mi gtsang ba'i dong gi kha gos kyis g.yogs te der bla ma bzhugs su bcug pas dong du lhung*/_kha shing dang rdo ba mang pos bcad pa la bla ma tshong dus byon nas/_nga 'di nas rgyal po'i pho brang du spyan drangs shig gsungs pa la rgyal po 'gyod nas zhabs spyi bos blangs pa ni drug pa'o/ /slar rgyal po des shing sreg tu bcug nas de'i steng du bla ma bzhugs te zhag gsum du me sbar yang ma tshig pa ni bdun pa'o/ /wa ra NA sa'i rgyal po zab mo'i tshigs su bcad pa lnga pa bka' stsal pas nam mkha' las me tog gi char phab/_lha'i bus bdud rtsi'i bum pa 'dren pa'i snang ba bstan te brgyad pa'o/ /rgyal pos dbang zhus bas rdul tshon thams cad rin po che las bya dgos par bka' stsal pa na/_rgyal po sgyu mas bslus kyis dogs pas 'gyod pa skyes pa na nam mkha' la 'phags te sprin gyis dbus na bzhugs pa bstan pa ni dgu pa'o/ /de nas 'gyod pa drag pos zhag bdun du gsol ba btab pas rdzing bu'i steng du bzhugs pa ni bcu pa'o/ /de nas rgyal pos grong khyer 'bum phrag bcu drug bla ma'i cha rkyen du phul bas bla mas sbyin gtong gi khang pa brtsigs nas lo gsum du sbyin gtong mdzad/_lo gsum song ba dang gar bzhud cha med pa ni bcu gcig pa'o/ /de nas lho phyogs ku ru bi hA ra nye ba'i gnas na gnod sbyin gnyis kyis nyin re bzhin grong khyer gyi rgan pa re dang gzhon pa re za ba yod pa btul/_lha khang yang bzhengs te bcu gnyis pa'o/ /dge 'dun rnams kyi dad pa 'phel ba'i don du lta stangs mdzad de nam mkha'i bya thams cad phyag tu 'phebs
XXX bka' bsgo ba yang nyan pa ni bcu gsum pa'o/ /wa ra NA sa'i gtso bo rgyal po brgyad cu rtsa bzhi la gsung ma gnang yang thugs gtad pa tsam gyis keng rus sogs 'du shes skyes nags su phyin te 'jig rten pa'i 'du shes las sems rnam par grol ba ni bcu bzhi pa'o/ /de nas rgyal po dza ya sen dang paN+Di ta A nan+da gnyis ma dad cing sku la bsdo ba la mnyam par bzhag pa'i phyag rgya 'char ru bcug_/tshigs bcad gcig gi don la thugs gtad pas stan de nyid las ma langs par grol ba ni bco lnga pa'o/ /wa ra NA sa'i rgyal po la khyod nga la the tshom zos pas tshe 'dir dngos grub mi 'thob kyang bar dor dngos grub 'thob thob zhes lung bstan pa ni bcu drug pa'o/ /wa ra Na sa'i rgyal pos bla ma 'di gzhan du mi gtang snyams nas gtsug lag khang gi nang du bzhugs su bcug_/sgo rgyas bsdams pa las phyir pha bong gi steng du'ang rtsed mo mdzad/_gtsug lag khang na bzhugs pa'ang mthong ba ni bcu bdun pa'o/ /de nas ta pa si'i grong khang du bzhugs pa na dge slong gnyis kyis phyir byung ba dang nang du bzhugs pa gnyis nges par byung ba bu gzhig nas bltas pa na sde brgyad la chos ston par mthong ba ni bco brgyad pa'o/ /'od ma'i gling du de ba DA kis rjes su bzung nas spyan ras gzigs dang mjal/_rigs kyi bu ma 'ongs pa'i sems can gyis don du rgyud sde bzhi'i dbang rnams phyogs gcig tu skur cig rjes su gnang ba ltar phyag len du btab pas da lta'i bar du'ang rgyud sde chen po brgya dang rtsa brgyad kyi dbang gi chu ba ma nub par byung ba ni bcu dgu pa'o/ /wa ra NA sa'i rgyal pos zhag bdun du gsol ba btab pas dkyil 'khor gcig tu rgyud sde thams cad kyi dbang dus gcig la bskur ba'i gsung rdo rje rnam pa thams cad pa'i rdzu 'phrul bstan pa ni nyi shu pa'o/ /de lta bu'i ngo mtshar dang ldan pa'i grub thob chen po de/_khro phu lo rtsa ba byams pa'i
XXX dpal paN+Di ta bud+d+ha shrI'i spyan snga na chos gsan pa'i tshe 'phags pa shing kun byon par thos nas tA m+bol khyer te phul zhing bsnyun rmed pas len ma gnang*/_zhal bod du phyogs par bzhugs 'dug pas bod du spyan drangs na 'byon nas snyam nas bod du 'byon par gsol ba btab pas zhal gyis ma bzhes/_sems pa skyed pa bsdus pa gcig gsan der lo tsA ba 'grongs la thug pa'i tshad nad kyis btab/_grub thob chen po rgya gar la dal gyi thegs/_der bsnyun drag 'phral la lo tsA bas lus ma sos kyang phyir bsnyegs te byon/_sa mtha'i mkhar zhig na bzhugs pa la/_ti rahu ti ba'i spyan 'dren pa 'jigs rung ba'i dmag gis skor 'dug_/der a tsa ra ngo shes shig gis khrid de nang du byon mkhar de'i thog na bzhugs pa la 'jal/_der yang bod du 'byon par gsol ba btab pas zhal gyis ma bzhes/_der lo tsA ba'i bsam pa la 'di lta bu'i grub thob dang mjal nas spyan ma 'drongs bar bod du log 'gro ba bas shi na rung snyams nas/_skye ba phyi ma la rjes su 'dzin pa'i smon lam mang po btab/_the tshom med par mkhar gyi rtse nas mchongs pas grub thob chen po'i phyag gis bzung nas ha ha de 'dra ma byed gsungs nas sku drung du bzhag ste/_nga bod du 'gro ba la khyod kyi sgrib pa dag dgos te/_tshad nad des sgrib pa mang po dag_/da lan nga yi ched du srog btang bas sgrib pa ma lus pa dag pas da ni bod du 'gro gsung zhal gyis bzhes/_de nas bod du byon nas gtsang stod du zla ba bco brgyad bzhugs mkhas btsun mang po la chos gsungs/_khro phu'i gtsug lag khang dang lha chen bzhengs pa'i sa yang byin gyis brlabs/_khyad par rje nyid kyis 'phags pa 'jig rten dbang phyug la dngos su gsan pa'i rang gi sems ngal gso ba'i man ngag tshigs su bcad pa nyi shu rtsa lnga pa 'di nyid
XXX la brten nas lo tsA ba la nyams khrid yun ring du bskyar zhing*/_dpal gu lang gser khang gi nag khrod am+ba ra'i bsil du legs pa bsgyur/_lo tsA ba chen pos kyang rang gi thugs sras khro phu'i sems dpa' chen po la sogs la gnang zhing*/_de nas khro phu ba mkhas mchog tshad ma'i skyes bu bsod nams mgon/_bla ma yang rtse ba rin chen seng ge de las rtsod pa'i dus kyi thams cad mkhyen pa bu ston rin chen grub kyis gsan te thugs nyams su bzhes/_slob ma'i mchog rnams la snying gtam gros 'debs kyi tshul du rtsal ba nas bzung da lta'i bar nyams khrid kyi brgyud pa bar ma chad du byung ba'i gdams pa khyad par 'phags pa yin no/ /grub chen nyid ni slar yang rgya gar du byon/_sgyu ma lta bu'i rnam 'phrul sna tshogs pa bstan nas mtha' yas pa'i gdul bya'i don mdzad de/_'chi med ye shes kyi sku brnyes te da dung yang bzhugs pa yin la/_mdor na bod du byon pa'i rgya gar gyi grub thob zhig la/_grub pa'i rtags mngon gyur du ston pa'i tshul bstan pa sngar dar gyi dus su slob dpon chen po pad+ma saM b+ha ba dang*/_phyi dar gyi skabs chen 'di la 'gran zla 'os pa ni 'ga' 'ang ma byung zhes mkhas pa chen po dag gsungs pa don la'ang gnas pa nyid do/ /gnyis pa gzhung don dngos bshad pa la gsum/_klad kyi don/_gzhung gi don/_mjug gi don to/ /dang po la gnyis/_mtshan bstan pa dang*/_'gyur gyi phyag go_/dang po ni/_rgya gar skad du/_swa tsit+ta sogs bod skad du bsgyur na/_rang gi sems ngal gso ba'i man ngag tshigs su bcad pa nyi shu rtsa lnga pa zhes bya ba ste/_don ni/_rang gi sems nyid lhan cig skyes pa'i ye shes gdod ma nas rang bzhin gyis rnam par dag kyang de ltar ma rtogs pas bzung
XXX 'dzin gyi gzhan dbang la brten nas 'khor ba'i rgya 'tsho yun ring du dub par gyur pa gnyug ma phyag rgya chen po rin po che'i gling du ngal gso bar byed pa'i gzhung*/_tshig chung ngus don chen po dpag par dka' bar bde blag tu ston pa'i man ngag_/gzhung gi tshad tshigs su bcad pa nyi shu rtsa lnga yod pas na de skad ces btags pa'o/ /gnyis pa ni/_dpal rdo rje sems dpa' la phyag 'tshal lo/ /zhes pa ste go sla'o/ /gnyis pa la gzhung gi don la gnyis/_gzhi gnyug ma ngo sprad pa dang*/_lam rnam rtog lam du khyer ba'o/ /dang po la gnyis/_spyi'i don dang*/_yan lag gi don to/ /dang po ni/_spyir gdams pa zab mo nyams su blang zhing ngo sprod pa'i tshul snying por dril ba lo tsA ba chen po nyid kyi zhal snga nas 'di ltar gsungs te/_'di'i don ngo sprod pa la re zhig sngon 'gro dang*/_dngos gzhi dang*/_rjes kyi bya ba gsum mo/ /dang po gsum las/_thung mong gi sngon 'gro rgyud sbyong ba yan lag bdun pa la sogs pa dang*/_thun mong ma yin pa'i sngon 'gros byin gyis rlobs pa rdo rje sems dpa' yi ge brgya pa'i sgom bzlas la sogs pa dang/_khyad par gyis sngon 'gros shes rgyud dbang du bya ba ni ye ge lnga bcu pas gsol ba gdab pa'o/ /gnyis pa dngos gzhi la/_lus kyi phyag rgya gnas dben par stan bde ba la 'dug nas bsam gtan gyi yan lag dang ldan par bca'/_ngag gi phyag rgya ni dbugs 'gyu ba sor bzhag_/yid kyi phyag rgya dang po lhod kyis glod/_bar du hrig ge bzhag_/mtha' ma phyam tser btang ngo*/ /dang po klod pa la gsum ste/_klod pa'i yon tan dang*/_ma klod pa'i skyon dang*/_ji ltar klod pa'i tshul lo/ /klod pa'i yon tan ni sems kyi gnas lugs kyi 'dug tshul ni ma bcos pa nyid yin pas glod na 'dug tshul de'i steng du gro bas gnas lugs ji ltar
XXX yin pa rtogs pa'i dgos pa yod do/ /ma klod pa'i skyon ni de las bzlog pa ste/_yin tshul las rang gi nan tan gyis ma glod pas phyin ci log gi snang ba 'byams nas rang la rang dbang med par 'khor zhing 'khrul pa la longs spyod par 'gyur ba'o/ /ji ltar klod pa'i tshul la gnyis te/_klod nas gzhag thabs dang*/_zhar la gegs bsal ba'o/ /dang po ni/_'jig rten gyi bya ba brgyab tu dor/_ting nge 'dzin 'ong du re ba dang*/_ma byung gis dogs pa ye mi bya/_blos rtog dpyod gang yang mi btang*/_dga' mi dga' mtshan rtags ci yang mi bzung*/_rtog dpyod re ma yang rnam rtog nyid 'khrul yin pas sems nyid rang gi thog tu rang klod do/ /rang la rang klod de bzhag pas kho na nyid la 'char lugs gcig yod/_'char lugs de gang yin na bca' bcos phyar med pa nyid yin/_ma bcos pa rtog pa la ma bcos par klod pa thabs zab pa'i rgyu mtshan yang de yin no/ /bcos su med pa la klod pas kyang ci phan zhes ni mi bsam ste/_mda' 'ben du phog pa la mda' tsha bar brjod pa ltar ma bcos pa'i thog tu klod pa la 'bab pa zhes bya'o/ /de ltar yang*/_ma bcos chos rnams kun gyi gzhi/ /de nyid mnyam par rtogs 'dod na/ /yul la yid ni mi spro bar/ /lhod kyis klod la lhan gyis zhog_/ces 'byung ba lta bu'o/ /gnyis pa gegs bsal ba ni/_de ltar klod nas bzhag pas rnam rtog gi 'gyu 'phro chad nas lhan cham gyis mi rtog pa rkyang par 'gro ste/_de ni gnyis 'dzoms bkag pa'i glen sgom yin no/ /des na de la mi bzhag par de'i gnyen por rig pa hur gdon te rig ge yer re seng nge dpang gtod la bzhag go_/de'i tshe yang rig pa'i rang gdangs shar bas gsal cha skyes pa la 'bral mi phod par 'gyur te/_de ni gsal ba mtshan mar
XXX 'dzin pa'i gnyis chos yin no/ /des na de la mi bzhag par de'i gnyen por shes pa 'phangs smad la spu ris gang dang yang ma 'dres par bzhag go_/de'i tshe yang rig pa shes snyoms pa cir yang mi rtog pa'i ngang na bde song nge 'char te/_de ni blos byas rang byung gi bde nyams bya ba yin no/ /des na de la yang mi bzhag par blo nyams ci bder rang yan du byams tser btang ngo*/ /de yang bde nyams skyes pa la ma zhen snyams yang bde ba'i cha la 'bral mi phod pa'i zhen pas bcings rgyu gcig byung la/_zhen na zhen chos phra mo khong du zhen cing 'dod pa las srid pa'i nyon mongs pa rgyas par 'gyur te/_bde la zhen pas 'dod pa'i khams su lhung zhes bya'o/ /gsal ba'i nyams skyes pa la ma zhen yang gsal ba'i cha la 'bral mi phod pa'i zhen pas bcings rgyu gcig byung la/_zhen na zhen chos phra mo khong du song bas zhen pa dang bcas pa'i las las gzugs khams kyi srid pa 'grub ste/_gsal ba la zhen pas gzugs khams dag tu gol zhes bya'o/ /mi rtog pa'i nyams skyes pa la ma zhen snyam yang mi rtog pa'i cha la 'bral mi phod pa'i zhen rgyu gcig byung bas zhen chos phra mo khong du ma song ba'i mi srid pas/_zhen bcas kyi las phra bas kyang gzugs med kyi srid pa 'grub ste/_mi rtog bsgom pa la zhen pas gzugs med du 'gro zhes bya'o/ /de ltar bde gsal mi rtogs pa gsum la zhen pa dang bcas na srid pa gsum las thar pa'i dus mi srid pas/_zhag la 'char yang 'char bar ma zhen pas rig pa ma bcos par lhod kyis 'jog pa gal che'o/ /bzhag pas bzhag rgyu med de ma bzhag pa'i gnas pa chen po/_gnas kyang gnas pa med de mi gnas pa'i sgom pa dam pa/_bsgom kyang bsgom mkhan med de ma bsgom pa'i ting nge
XXX 'dzin bla na med pa'o/ /de'i rjes gar du hrig ge bzhag pa dang*/_tha mar phyams tser btang ba ni snga ma'i 'gros kyis shes par bya'o/ /de ltar las dang po pas mnyam par 'jog pa la skyes bu kha la gnyer byed pas kha la bcos pa ltar mtho dman khad kyis mnyam zhing*/_gser 'jal ba legs par byas pa'i srang ltar/_mnyam khad de gnas pa la rang sems rang bzhin ma bcos pa'i gnyug ma ngos zin par 'gyur te/_de yang bla ma dam pa'i byin rlabs gsung gi bdud rtsi dang bcas pas rjes su bzung ba dang yun ring po nas rang gis legs par bsgrub pa'i bsod nams bsags pa las ngo 'phrod par gsungs so/ /gsum pa rjes kyi bya ba gsum ni/_ngo 'phrod pa'i rjes yun ring du mi 'bral ba'i thabs dang*/_snang ba lam du slong ba'i thabs dang*/_ci byas gzhan don du 'gyur ba'i thabs dang gsum ldan dgos pa las/ /dang po ni/_dngos gzhi ngo sprad nyams kyi rtsis bzung la snang ba sna tshogs gang shar shar la sbyar te nyams su blang ngo*/ /gnyis pa ni/_rang ngo 'phrod pas rang ngo shes pa'i ngang la bde sdug las sog pa ci byung tshad de nyid kyi rtsal sbyong zhing mi 'gog pa'o/ /gsum pa ni/_rang ngo shes pas rang grol ba ni sems can nam mkha' dag mnyam pa thams cad kyang rang grol du gyur cig ces bsngos la/_lus ngag yid gsum gyi bya ba thams cad zhen med kyi ngang las 'bral med kyi snying rjes gzhan don dang du len pa'o/ /zhes gsungs te/_rgyas par khrid yig tu shes par bya'o/ /gnyis pa la/_spyir dbang po rab 'bring tha ma'i bye brag gis ngo sprod pa'i tshul so sor gsungs pa las/_dbang por ba la sor bzhag gsum gyi ngo sprod pa'i dang po ni 'di yin te/_e ma ho/_rang sems sogs tshigs bcad gcig go_/don ni/_'di ltar sems kyi gnas lugs ma rtogs pas 'khor bar 'ching zhing*/_rtogs na grol bar byed pas na ngo mtshar ba'i
XXX phyir e ma ho zhes thog mar gsungs so/ /ngo mtshar ba de gang zhe na/_rang gi sems kyi gnas lugs 'dod ma nas ma skyes shing*/_ci'i ngo bor yang ma grub pa ste/_dus gsum gyi sangs rgyas rnams byon rung*/_ma byon rung*/_bla ma rnams kyis ngo sprod rung*/_ma sprod rung*/_gang zag rnams kyis rtogs rung ma rtogs rung de ltar du gnas pa gang zhig_/ma rtogs na 'khor ba dang*/_rtogs na mya ngan las 'das par byed pa'i rgyu'am sa bon can de ni/_ngo bo rang las gzhan na btsal du yod pa min te/_yul rang gi snying gi dbus su/_dus rig pa gang dang gang shar ba'i tshe/_thabs bla ma dam pa'i zhal gyis gdams pa la brten nas nyams su blangs pa las shes par 'gyur ro/ /zhes pa'o/ /gnyis pa la gnyis/_lam rim gyis pa brda'i sgo nas grol ba'i man ngag dang*/_gcig car ba byin rlabs dbang gis grol ba'i man ngag go_/dang po la gnyis/_dbang po rab 'gyu ba rang sar sad par byed pa dang*/_dbang po 'bring dang tha ma 'gyu ba gzhan gyi thabs kyis grol bar byed pa'o/ /dang po ni/_sor bzhag gsum gyi ngo sprad gnyis te/_dang po gang skyes gang shar dran pa'i ngo sprod ni/_gang skyes sogs te/_rtog pa gang skyes kyang rlabs nyid rgya mtsho las ma 'das pa bzhin du/_gnyug ma 'gro 'ong dang bral ba nyid ma 'das pa yin pa'i phyir/_gang shar thams cad rang ngo shes pa'i dran pas ma brjed na/_rnam pa de dang der shar yang*/_ngo bo stong pa nyid kyi bdag nyid can du 'gyur te/_rnal 'byor gyi rgyal por gdon mi za ba ste the tshom med par nges so/ /dran pas mi brjed pa'i tshul ni gsum ste/_dang po snang mkhan ma brjed pa dang*/_bar du 'dzin mkhan ma brjed pa dang*/_tha ma zhen
XXX mkhan ma brjed pa'o/ /gnyis pa ni/_gang shar thams cad sogs te/_rnam par rtog pa gang shar thams cad de kho na nyid gnyug ma'i don las ma g.yos pa yin te/_rang sems gnyug ma de ni ngo bo gang du'ang ma shar bzhin/_rnam pa cir yang 'char ba chu zla lta bu'o/ /de'i phyir na 'khrul ngor gang skyes pa ltar snang ba'i gsal snang de ni/_rig ngor ma skyes kyang ma skyes pa de nyid skye ba'i tshul ltar snang ba'ang mi 'gal te/_rmi lam du bu mo skyes par bden kyang*/_gnyid kyis bslad pa'i ngor skye ba ltar snang ba'ang mi 'gal ba bzhin no/ /'di yan gyi tshigs bcad gsum la rim par gnyug ma skye med kyi ngo sprod/_glo bur rnam dag gi ngo sprod/_dbyer med zung 'jug gi ngo sprod ces kyang gsungs so/ /gnyis pa la gnyis/_dbang po 'bring gi ngo sprod dang*/_dbang po tha ma'i ngo sprod do/ /dang po la gsum/_dbang po 'bring gi rab las gsum gyi dpes ngo sprod pa/_'bring gi 'bring la phyi nang bar gsum gyi dpes ngo sprod pa/_'bring gi tha ma la thog bab gsum gyis ngo sprod pa'o/ /dang po la gsum las/_dang po sa bla khro bo'i rnam 'gyur gyi dpe ni/_g.yas brkyang sogs te/_de la g.yas brkyang ba ni thabs snying rje chen po'i blo rgya bskyed pa/_g.yon bskum pa ni shes rab stong pa nyid kyis blo nang du dgug pa/_sdig mdzub gtad pa ni stong nyid snying rje gnyis sgom mkhan ngos bzung ba/_rdo rje'i lta ba ni blta bya blta byed gnyis su med pa'i don la dmigs pa med pa'i tshul gyis bltas nas ni/_rnam rtog gi bzhon par gyur pa rlung gi rta mchog phyi nang du dal bus 'gro ba dang 'ong ba'i tshul la bslab cing*/_rdo rje'i bzlas pa zab mo la gnas nas glo bur gyi rnam rtog du ma sems nyid
XXX gnyug ma'i ngang du ro gcig tu nyams su len par bya'o/ /gnyis pa sa 'og klu rgyal rol pa'i dpe ni/_rkang pa rgya mtsho sogs te/_'di ltar klu'i rgyal po dag dus bzang po la rol zhing rtse ba na/_rkang pa rgya mtshor brkyangs/_lag pas sa steng kun nyul/_mig nam mkhar bltas kyang*/_sems rang gi gnas las mi g.yo ba bzhin du/_rkang pa rgya mtsho che la bzhag pa ni/_sems ma bcos pa'i ngang la rtse gcig tu gnas pa'i zhi gnas bsgom pa'o/ /lag pas sa steng kun tu nyal ba ni/_rtsal snang ma 'gags pa'i rol pa sna tshogs snang ba la snang stong dbyer med du rtogs pas longs spyod pa'i lhag mthong bsgom pa'o/ /mig ni nam mkhar blta bya zhes zhi lhag zung 'brel gyi ngang nas bya byed kyi dmigs pa ci'ang med pa la/_cir yang spyod pa'i tshul gyis ma yengs par blta ba ste/_de ltar nyams su blangs nas/_yid ni dus dang rnam pa thams cad du blo 'das byar med kyi rang mal las gang du'ang mi g.yo bar bya'o/ /gsum pa sa steng rgyal po'i mdun na 'don rnams kyi dpe ni/_sgeg mo'i me long sogs te/_'di la sbyor ba'i dpe gnyis/_dngos gzhi'i dpe gnyis/_rjes kyi dpe gnyis te drug gi sgo nas ston pa'i tshul/_rang rig dri ma med pa'i me long la yang dang yang du lta ba sgeg mos me long la blta ba lta bu/_mtshan 'dzin gyi rnam par rtog pa thams cad rang grol du 'joms pa'i stobs dang ldan pas gyad lta bu dang*/_nyon mongs pa rnam rtog gi 'ching ba thams cad las thar bar 'dod pa'i bsam pa dang nyin mtshan dus kun tu mi 'bral bas khrims btson lta bu dang*/_lus ngag yid gsum gyi spyod pa thams cad sems nyid ye shes kyi rgyal po nyams len gyis mnyes par 'gyur ba'i
XXX thabs su byed pa yin gyi/_phal pa'i chos spyod 'bangs phal pa dang 'dra ba'i nyan bshad la sogs pa dag gi ngo srung pa ci yang med pa rgyal po'i btsun mo la bu dang*/_dge sdig la sogs pa'i rnam par rtog pa thams cad bzang ngan bye brag med par rang grol du phyags pa la brtson pa phyags dar lta bu dang*/_snang ba thug phrad gang shar la rtogs pa'i rtsal sbyong bar byed kyi/_chos che che dang bzang bzang sogs lhag par don du mi gnyer bas smad 'tshong ma bzhin te drug go_/gcig pu'i grogs dang 'grogs pa ni/_dran pa gcig su snang ba sna tshogs kyi grogs dang 'grogs nas/_ting nge 'dzin gyi rtsal sbyong bar byos shig ces gdam pa'o/ /gnyis pa dbang po 'bring gi 'bring po'i ngo sprod pa la gsum las/_dang po phyi'i dpe dgu ni/_rtag dang sogs te/_de yang ting nge 'dzin ma skyes pa skye bar byed pa'i thabs gsum/_skye ba lam du 'gyur ba'i yan lag gsum/_lam mthar phyin par byed pa'i gnad gsum ste/_dpe dgus bstan pa yin no/ /de la dang po rtog pa dang nyon mongs pa thams cad 'joms pa la dpa' zhing ma zhum pas stag lta bu dang*/_bar du phyi nang gi bar chad dang nye bar 'chi ba ci byung yang nyams nga bag tsha med pa seng ge lta bu dang*/_tha mar byings rgod la sogs pa'i 'gal rkyen sna tshogs gang gis kyang lam las mi ldog pa glang po che chur zhugs lta bu dang gsum ni ting nge 'dzin skye bar byed pa'i thabs gsum yin no/ /skyes pa de yang theg pa chen po'i lam du 'gyur ba la/_gzhan phan thabs la mkhas pa'i khyad par dgos shing*/_de yang gzhan la phan 'dogs pa'i mthu lha dang bla ma la rag las pas/_mos gus kyi gdung ba drag po rnga mo lta bu/_gzhan la phan pa'i bsam pas snying rje dang*/
XXX gis 'byung ba ri dwags khri snyan lta bu/_gzhan la phan pa'i thabs gang la gang 'dul gyis spros pa sna tshogs lam du khyer ba spre'u lta bu ste gsum dang*/_lam mthar phyin par byed pa'i gnad gsum ni/_zhe 'dod kyi gdung ba bsil ba dang*/_nyon mongs pa'i tshad nad sel ba dang*/_chos chen po rnam kyi rnams kyi nang nas mchog tu gyur pa ste/_chos gsum ldan pa tsan+dan lta bu/_'gal rkyen gyis rtsa ba mi g.yo ba dang*/_mthun rkyen gyis rtse mo mi 'khyog pa dang*/_shes rgyud phal mo che thams cad las mtho bar 'phags pa ste/_chos gsum dang ldan pas ljon shing gi sdong po lta bu/_mtshan 'dzin gyi dbang po 'gags pa dang*/_zhen pa'i srog dang bral ba dang*/_blang dor gyi rtsis gang ba med pa ste/_chos gsum dang ldan pas mi ro lta bu ste de ltar dpe dgus mtshon nas/_des don zab mo la spyod pa'i mkhas pa rnams kyis stong ba nyid rnal 'byor du bya'o/ /gnyis pa bar gyi dpe drug ni/_ri gzar chu dang sogs te/_'di ltar rnam rtog rigs mi 'dra ba du ma shugs drag tu bskyed pa dang*/_rtog med dang btang snyoms kyis bar ma chod pa dang*/_shin tu myur ba glog 'gyu ba lta bu ste/_chos gsum dang ldan pas ri gzar gyi 'bab chu lta bu dang*/_rnam rtog 'gyus tshad thams cad chos nyid kyi ngang la ro mnyam pa dang*/_rnam par rtog pa'i ngang la g.yo ba med bzhin du gnas pa dang*/_phyi'i 'gyu ba sna tshogs ci byung yang ma bcos pa'i ngang du zhi bar 'gyur ba ste/_chos gsum dang ldan pas rgya 'tsho chen po lta bu ste/_dpe don gnyis pa de ni sems gnas par byed pa'i thabs yin no/ /yang dag pa'i rtogs pa la rang gi snying las lhag par 'dzin pa dang*/_rtogs pa de dang nam yang 'bral mi phod pa dang*/_rtogs
XXX pa'i rtsal gyis ci byung skyon du mi bzung ba ste/_chos gsum dang ldan pas bu gcig pa'i ma lta bu dang*/_khongs grim pa dang*/_'phral lhod pa dang*/_'gro ldog gi mtshan nyid la mkhas pa ste/_chos gsum dang ldan pas glang po che skyod pa lta bu gnyis ni gnas pa brtan par byed pa'i yan lag go_/lta ba dman pa la ma zhen pas 'phang mtho ba dang*/_gzung 'dzin gyi gdung ba bral bas bsil ba dang*/_gegs skyon ci byung yang 'gyur ba med pa'i so tshugs pa ste/_chos gsum dang ldan pas gangs ri lta bu dang*/_mngon par zhen pa'i dri ma dang bral bas gtsang ba dang*/_phyi'i yul snang dang nang gi rig chos gang yang ma bsgribs par gsal ba dang*/_dad pa dang snying rje thabs lam la sogs pa'i rkyen gyis gang du'ang bsgyur du rung ba ste/_chos gsum dang ldan pas shel sgong dag pa bzhin te de gnyis ni brtan pa mthar phyin par byed pa'i gnad yin no/ /de ltar goms pas ched 'dzin gyi dmigs gtad dang bral bar sems ngang gis gnas gyur na ting nge 'dzin gyi gzhi tshugs pa zhes bya'o/ /gsum pa nang gi dpe gcig ni/_thog mar song ste/_'di ltar 'byung ba'i rnam par rtog pa ji snyed pa rnams ni/_thog ma dang bar dang*/_mtha' mar rim bzhin du/_dmigs pa dang*/_bdag po dang*/_rgyu dang*/_de ma thag pa'i rkyen bzhi'i rtsa ba dang bral bas sgyu ma'i rta glang lta bu/_rang gi ngo bo de de bzhin du ma grub pas ming gis btag pa tsam las don gyis stong pa mo gsham gyi bu lta bu byed las dang bral ba rmi lam gyi sta res rmi lam gyi ljon shing gcod pa lta bu ste/_mdor na 'di ltar snang zhing rtog pa'i chos thams cad ni rmi lam gyi snang ba dang mtshungs te/_mtshungs chos ni rmi lam
XXX gyi skabs su mar me gsal bar snang na'ang*/_de'i rgyu'am rtsa ba kong bu dang*/_sdong bu dang*/_snum dang*/_me ste bzhi dang*/_mar me rang gi ngo bo dmar lam lam 'bar ba dang*/_mar me'i phyed las sel byed kyi 'od dang*/_bsal bya'i mun pa ste de thams cad rang bzhin gyis ma grub pa bzhin du 'di ltar snang zhing rtog pa'i chos thams cad rang bzhin gyis ma grub pa'i stong par shes pa'i ngang nas dmigs pa med pa'i snying brtse chen po mi g.yo bar goms pas mtshan ma thams cad rang sar grol zhing*/_dag pa'i phrin las lhun gyis grub par 'gyur ro/ /gsum pa dbang po 'bring gi tha ma'i ngo sprod la gsum las/_dang po nyams myong thog babs gsum gyis bsgrub bya blo gros dri ma med par sad pa'i ngo sprod ni/_'gro 'ong sogs te/_'di ltar bsgrub bya'i chos bde gsal mi rtog pa gsum dang*/_chos gsum gyi mtshan nyid 'gro 'ong gnas gsum dang bral ba gsum dang*/_de'i gnas lugs stong pa nyid dang*/_mtshan ma med pa dang*/_smon pa med pa ste rnam thar sgo gsum mo/ /de yang rnam par rtog pa 'gro ba dang*/_'ong ba dang*/_gnas pa gsum ni dang por skye ba'i rgyu/_bar du gnas pa'i ngo bo/_tha mar 'gags pa'i 'bras bu'i rnam rtog thams cad kyis stong pa'i stong pa nyid rnam par thar pa'i sgo gsum du dag pa la/_zag med kyi bde ba chen po dang*/_rang bzhin gyis 'od gsal ba dang*/_gang du'ang rnam par mi rtog pa ste/_de lta bu'i bde gsal mi rtog pa'i 'bras bu mngon du gyur pa'i ngang du/_zab mo don la blo gros kyi mig rnam par dag pa'i rnal 'byor pa bzang po rnams kyis rtag tu mnyam par bzhag par bya'o/ /gnyis pa sbyor ba thog babs gsum gyis sgrub byed sgom pa phun sum tshogs par ngo sprod pa ni/_snying rje chen po sogs te/_dang po thabs kyi sbyor ba ni/_nam mkha' dang mnyam pa'i 'gro
XXX ba la/_rgya mtsho dang mnyam pa'i bsam pa snying rje chen po mdun du bzhag pa ste sngon du 'gro bas/_ri rab dang mnyam pa'i byang chub sems dpa'i spyod pa rlabs po che rjes su bsgrub par dam bca'/_gnyis pa shes rab kyi sbyor ba ni/_bsam sbyor de nyid kyi ngo bo la so sor rtog pa'i shes rab kyi dpyad cing dmigs par shes pa la ma yengs par rtag tu blta zhing*/_gsum pa byin rlabs kyi sbyor ba ni/_yid dam gyi lha bsgom pa dang*/_bla ma'i rnal 'byor gyi sgo nas gsol ba gdab pa'o/ /de lta bu'i sbyor ba yis sgrub pa po rnams rang gi sems spros pas dub pa bde chen gyi ngang du ngal gso bar bya'o/ /gsum pa rnam rtog thog babs gsum gyis sgrub pa'i 'gal rkyen lam du slong ba ni bu nyon sogs te/_bu zhes rang gi sras la nye ba'i mtshan nas bos te khyod nyon cig ces gzhan du ma yengs par gdams nas gang mnyan par bya ba/_dang po lam du bslang bya ni/_khyod kyi rgyud la gang dang gang shar ba'i rnam par rtog pa thams cad do/ /gnyis pa de lam du bslang na nus pa'i rgyu mtshan ni/_rnam par rtog pa des 'khor ba'i rgya mtsho chen po 'dir thog mar bdag ma bcings/_mthar bdag ma grol ba'i phyir te/_dper na chu snod du zla ba'i gzugs brnyan shar ba na chu snod kyis gzugs brnyan bcings pa'ang med/_snod chags nas chu bo ba na zla ba'i gzugs brnyan grol ba'ang med de nam mkha'i zla ba rang bzhin las ma g.yos pa bzhin/_rnam rtog shar tsam nas chos nyid rang mal las g.yo ba med pa'i phyir ro/ /gsum pa ji ltar slong ba'i nyams len ni/_dang po ma yengs par bzhag pa ral bskor mkhan g.yul du zhugs pa lta bu/_bar du ma bcos par btsa' ba la mkhas pa glang rdzi mkhas pas glang po che skyong ba
XXX lta bu/_tha mar rang dgar btang ba la mkhas pa rdzing thog nas bya 'phur ba lta bu ste/_de rnams ni rgyas par khrid yig las 'byung ba ltar ro/ /gdams pa 'di ni gzhung 'di nyid kyi snying po'i snying po/_rnam rtog lam du slong ba'i thabs khyad par can yin pas na/_kye ho zhes ngo mtshar ba'i tshig gis mtshams sbyar nas/_sems can thams cad thog ma med pa nas rang gi sems 'khor ba sdug bsngal kyi rgya mtshor dub par gyur pa thabs 'di lta bu la brten nas gnyug ma rang bzhin gyis 'od gsal ba'i dbyings su ngal gsol bar gyis shig ces gdams pa'o/ /gnyis pa dbang po tha ma'i ngo sprod la gsum/_dbang po tha ma'i rab la rig dri ma med par bstan pa sbyor ba gsum ngo sprod/ /tha ma'i 'bring la gzung ba dang 'dzin pa'i rtsa ba bcad pa sgo mo gsum gyi ngo sprod/_tha ma'i tha ma la mtshan ma dbyings su bstim pa/_dgag sgrub gsum gyi ngo sprod do/ /dang po la'ang gsum las/_dang po dpe don gsum ro snyoms zhi gnas dang lhag mthong zung 'brel du ston pa ni/_gzugs brnyan sogs te/_gzugs brnyan dang gzugs dngos dang*/_brag ca dang sgra dngos/_dbang pos dngos su mthong ba dang*/_rmi lam gyi skabs su nyams su myong ba rnams rjes su dran pa'i yid la legs par dpyad pas/_rnam pa ni gzugs brnyan sogs snang zhing*/_ngo bo ni gzugs dngos sogs kyang rang bzhin gyis ma grub pa chos thams cad snang tsam nas bden pa med par shes par byas te/_chags sdang skye ba'i yul thams cad rang bzhin gyis ma grub pas yul can shes pas bden med du shes pa na gzung 'dzin thams cad rang sar grol bar 'gyur ba yin no/ /de la brten nas ting nge 'dzin rtse gcig tu gnas pa'i zhi gnas
XXX 'grub pas na de dang de byung gi 'brel bar grub pa dang*/_mtshan ma spong byed kyi thabs zad par lhag mthong bsgom pa'i sbyor ba nyams su blang par bya ste/_dang po bsgom bya'i dngos po rtse gcig pas mdun du bya/_bar du rtse gcig pa nyid rang ngo shes pa'i sgo nas sor bzhag_/mthar de nyid kyi dmigs pas blo'i spu ris zad par bya'o/ /gnyis pa shes rab gsum gyi sgron me spar bas sgrib g.yogs kyi mun pa bsal ba ni/_so sor rtog dang sogs te/_'gyu ba gang shes thams cad la so sor rtog pa'i shes rab kyis dpyad pas rang bzhin med par shes pa dang*/_mthar so sor rtog pa'i shes rab nyid kyang rten dang bral bar shes pa dang*/_shes bya dang shes byed kyi blo'i 'dzin pa zhi ba'i ngang rtag tu rgyun mi 'chad par bsgoms byung gi shes rab rgyud la bsten pa ste/_de lta bu'i shes rab gsum gyis rim pa bzhin du/_bsregs bcad brdar ba'i gser bzhin dang*/_bud shing zad pa'i me bzhin dang*/_sprin dang khug rna la sogs pas 'gyur ba med pa'i nam mkha' bzhin du spang bya gzung ba'i gnas lugs ji lta ba bzhin du shes par byed pa dang*/_gnyen po'i 'dzin med pa'i rtog pa ngang gis zhi bar byed pa dang*/_glo bur sgrib gnyis bag chags dang bcas pa dag par byed pa yin no/ /gsum pa snang ba gsum gyi ye shes sad pas yon tan rin po che'i sgo dbye ba ni/_snang med de snang sogs te/_gzhi rang bzhin gyis sdang ba med kyang lam de'i stobs kyis snang*/_'bras bu rkyen gyis bsgyur pas sna tshogs su snang ba gsum gyi dpe ni rim par/_nam mkha' rang bzhin med pa dang*/_me long la gzugs brnyan 'char ba dang*/_shel gong dag par yul gyi rkyen gyis kha dog sna tshogs su snang ba bzhin no/ /de lta bus
XXX tshul nyams 'og tu tshud pas mnyam par bzhag pa'i stobs kyis yon tan rin po che'i gter sgo byed pa yin te/_snang med ma bcos pa'i ngang du sad par byed pas de'i ngang la rtse gcig tu tu gnas pa'i ting nge 'dzin dang*/_de snang rang snang du sad par byas pas rang snang rang sar grol ba'i yi ge dang*/_rkyen snang rten 'brel gyi snang ba sad par byas pas rten 'bral dag pa gzungs kyi sgo 'byed par byed cing*/_de ltar na ting nge 'dzin gyi gzhi las ye shes kyi ngo bo grub ste gzungs kyis mi 'bral bar 'dzin la de mthus mthar thug rim pa bzhin du/_chos sku dang*/_longs sku dang*/_sprul pa'i sku ste de rnams kyi rtogs pa rgyud la 'char bar byed pa yin no/ /gnyis pa dbang po tha ma'i 'bring gi ngo sprod la gsum las/_dang po lus kyi sgo mo dbang po lnga la brten nas bzung ba dang g.yeng ba rdul spong ba ni/_mthong ba mnyam bzhag sogs te/_sgo lnga'i dbang po la brten nas yul lnga mthong ba na/_mthong mkhan rang gi ngang du lhod kyis glod la had de mnyam par bzhag pas/_snang yul ma 'gags la der 'dzin dang bral ba'i 'od gsal 'char ba yin te/_de tshe mthong ba gang yin pa dang de don gyis ma mthong ba yin pa'i rgyu mtshan/_de la gzung 'dzin gyi zhen pa ma skyes pa'i phyir/_de ltar shin tu rnam par mi rtog pa'i 'od gsal la rtse gcig tu gnas pas/_mtshan ma'i rnam par g.yeng ba'i rdul dang bral ba nyid do/ /gnyis pa gang gi sgo mo rlung la brten nas 'dzin pa yid kyi skyes bu bsad pa ni/_rlung ni gar 'gro sogs te/_sems ni rlung gi bzhon pa can yin pas rlung ni gar 'gro ba der sems 'gro zhing gnas pas/_de nyid lus kyi khyim dbu ma'i nang du bum can gyi sbyor bas btson du bzung nas/_yid kyi skyes bu rang ngo
XXX shes pa'i mtshon gyis bsnun nas byed rtsol dang bral ba'i dbyings su bsad par byas pas/_rlung gi bzhon pa de med na/_sems ni gang du 'gro ste mi 'phye bo bzhin du rang sar gnas par 'gyur ro/ /gsum pa yid kyi sgo mo kun rtog gi rang bzhin rtogs pas gzung 'dzin gnyis ka'i bag chags gzhom pa ni/_thams cad rang bzhin sogs ste/_kun rtog thams cad kyi rang bzhin ni ma bcos pa'i gnyug ma'i ngo bo las mi 'da' bas/ /rnam pa'i kun rtog thams cad ni rkyen gyi gzhan dbang las byung ba yin no/ /des na rang bzhin gsum gyi de kho na legs par shes na/_kun rtog shar tsam na kun rtog nyid rang bzhin med par byed do/ /de la rang bzhin gsum ni ngo bo'i rang bzhin bcos su med pa/_rkyen gyi rang bzhin du mar 'char ba/_gnyis su med pa'i rang bzhin ro gcig pa'o/ /gsum pa dbang po tha ma'i tha ma la ngo sprod pa'i tshul gsum las/_dang po nam mkha' bsgom pa'i rnal 'byor la brten nas grub bsal gyi mtshan ma dbyings su bstim pa ni/_mthong bas grub dang sogs te/_shes bya'i yul 'di rnams mthong bas grub par 'jog pa dang*/_shes rab kyis gzhig pa na med ces 'jog pa ni rnam rtog gis kun tu brtags par zad kyi/_sems nyid kyi gshis 'di la 'dod nas cir yang grub pa med pas/_bu kye zhes nye ba'i tshig gis bos nas nam mkha' bsgom par byos shig ces gdams pa'o/ /nam mkha' sgom pa'i tshul ni gsum ste/_phyi'i nam mkha' sgrib pa med pa la mig che re gtad pa dang*/_nang gi nam mkha' sems ma bcos pa la blo bzhag pa dang gsang ba'i nam mkha' phyi nang cir yang mi dmigs pas rang dgar bsgom pa'o/ /gnyis
XXX pa rang dgar bsgom pa'i rnal 'byor la brten nas rkyen bral gyi mtshan ma dbyings su bstim pa ni/_ga bur dang ni sogs te/_'di ltar ga bur dang ni de yi dri gnyis po/_phan tshun gcig la gcig brten pas ldog pa so sor phye 'ang*/_ngo bo dbyer med pa yin te/_ga bur de med na de'i dri 'ang med la/_dri med na ga bur de yang med cing mi dmigs pa bzhin/_sems kyi rang bzhin la rkyen snang glo bur gyi 'khrul pa dang*/_rkyen dang bral ba rang byung so ma'i ye shes gnyis kyang phan tshun so sor ma yin cing tha mi dad pas rang dgar sgoms shig ces gdams pa'o/ /rang dgar ji ltar sgom pa'i tshul ni gsum ste/_gshis gnyug ma rang dga' ma bcos so mar 'jog pa dang*/_rtsal rnam rtog rang dga' ci skyes skyer gtong ba dang*/_ngo bo skye med rang dga' skyes tsam nas skye rgyu ma dmigs pas ma skyes par ro snyoms pa'o/ /gsum pa rnam rtog gsod pa'i rnal 'byor la brten nas mnyam pa dang mi mnyam pa'i mtshan ma dbyings su bstim pa ni/_mnyam pa'i sems kyis sogs te/_de la nang mnyam nyid khyab brdal chen po'i sems kyis g.yo ba'i yid blo bur ba 'gog_/phyi mi mnyam pa du ma dang*/_smig rgyu la sogs pa'i snang nyams sna tshogs kyang mnyam nyid chen po'i gdams pa dran pa'i thag pas 'ching bar byed de ltar nyams su blangs pas nam zhig gi tshe mnyam pa dang mi mnyam pa gnyis kar 'dzin pa dang bral ba ni mnyam bzhag chen po ste/_des rnam par rtog pa thams cad gsod par byed do/ /rnam rtog gsod pa'i tshul la'ang gsum ste/_tha mal pa'i rnam rtog dran pas gsod/_dran pa'i rnam rtog rang ngo shes pas gsod/_rang ngo shes pa'i rnam rtog mnyam pa'i nyid kyis gsod pa'o/ /
XXX rtsa ba'i sa bcad gnyis pa gcig car ba byin rlabs dbang gis grol ba'i ngo sprod kyi man ngag la bzhi las/_dang po dag byed bum dbang gis dran rtog dpyis phyin par sbyang ba ni/_khrus byas sogs te/_phyi bum pa'i chus bkru ba dang*/_nang swa b+ha ba sogs sngags sbyang ba dang*/_gsang ba chos thams cad kyi de kho na nyid la ma dag pa til 'bru tsam yang med par shes pa'i khrus byas nas/_rig pa gcer bu'i ngang du sbyangs pas dag par 'dzin pa'i dri na 'ang bral ba nam mkha'i gos gyon la/_rnam par rtogs pa brten med du bsgoms pas rang grol du bsregs pa'i sbyin sreg bya zhing*/_bags chags phra mo dran pa'i thal ba'ang bde ba nyams su myong gi 'jug ngogs/_gsal ba ye shes kyi 'jug ngogs mi rtog pa ting nge 'dzin gyi 'jug ngogs su/_bsam gtan gyi chu dang*/_ye shes kyi rlung gis lhan cig tu sbyang bar byos shig ces gdams pa'o/ /gnyis pa pho nya gsang ba'i dbang gis dam tshig gi phyag rgya dbang du bya ba ni/_snod bcud sogs te/_snod bcud dang 'dra ba ni lus dang rlung ste rlung lus la brten nas gnas pas so/ /rlung de dang 'grogs pa ni sems kyi rgyun te/_de ltar na snga ma lus ni brtan pa dang*/_phyi ma rlung sems gnyis ni g.yo ba/_nam mkha' ni rang bzhin gyis 'od gsal ba'i dbyings/_nyi ma gtum mo'i me/_zla ba kun+da/_sgra gcan 'dzin ni rlung sems kha sbyor/_de las skyes pa'i nyams 'od gsal ni me khyer te/_de la sogs pa'i rtags snang 'char ba'o/ /char ni mi rtog pa ste sprin las char chen po thogs med du 'bebs pa ltar bde ba dang 'od gsal 'dres pa'i rtsal las byung ba'o/ /bde ba ni bung ba ste/_bung bas sbrang rtsi'i bcud len pa ltar 'od gsal dang mi rtog pa zung du 'jug pa'i don
XXX nyams su myongs pa las byung ba'o/ /des mtshon pa'i gsang ba'i dbang gi ye shes kyis dam tshig gi phyag rgya rtsa rlung thig le dbang du 'gyur ba yin no/ /gsum pa shes rab ye shes kyi dbang gis lhan cig skyes pa'i ro myong ba ni/_sna tshogs yid kyi sogs te/_sna tshogs pa'i yid kyi me tog ni phyi nang gsang ba de kho na nyid kyi phyag rgya'o/ /de la tshul bzhin du bsten pas dga' ba/_mchod dga'/_khyad dga'/_lhan skyes kyi dga' ba rnam pa bzhi'i bcud blangs te/_zhu bde lhan cig skyes pa'i ro myang ba la brten nas/_sgrub pa po'i yid kyis skyes bu dpes mtshon pa'i ye shes kyis tshim par byed do/ /bzhi pa phyag rgya rnam par rol pa'i dbang gis kun spyod rgyu yan du spyod pa ni/_lus rlung sogs te/_de la lus ni dag pa'i lus lha'i skur bsgom pa dang*/_mchog gi lus sgyu mar mos pa dang*/_phun sum tshogs pa'i lus 'od gsal du dag pa'o/ /rlung ni g.yo ba'i rlung la las sbyor nus pas phyi nang 'gugs 'dren sogs grub pa dang*/_brtan pa'i rlung rdo rjer ltar 'dzin nus pas 'byung ba'i gnod pas mi tshugs pa dang*/_mi phyed pa'i rlung nam 'dzin pa'i tshe bde stong zung 'jug gi ye shes 'dren nus pa'o/ /rtsa ni sgyu ma'i rtsa chen a ba d+hu ti sbyangs pa dang*/_nam mkha'i rtsa chen po chos thams cad kyi de kho na nyid bsgom pa dang*/_bsam gyis mi khyab pa'i rtsa chen po chos kyi dbyings mngon du gyur pa'o/ /de lta bu'i phyag rgya de yis lus ngag yid la rgyas gdab cing bcing par byas pas drod thob pa la thogs pa med pa 'byung ba yin no/ /drod ni bzhi ste/_bde ba dang*/_gsal ba dang*/_mi rtog pa dang*/_ro snyoms pa'i drod de/_drod thob nas kun spyod mtha' gcig tu nges par mi bya ste/_gza'
XXX gtad med pa'i spyod pas phyogs ris med pa'i phrin las mkha' khyab tu bskyang bar bya'o/ /zhes pa'i don to/ /gsum pa mjug gi don la gnyis/_gzhung gi rdzogs byang dang*/_lo tsA ba'i 'gyur byang ngo*/ /dang po ni/_rnal 'byor pa sogs te/_thabs dang shes rab zung du 'jug pa'i zab mo'i don la blo sbyor bar byed pa'i rnal 'byor pa rnams kyi rang gi sems gzung 'dzin gyi spros pa sna tshogs pas dub pa ngal gso bar byed pa'i man ngag tshigs su bcad pa nyi shu rtsa lnga pa zhes bya ba/_brjod bya chos thams cad kyi gnas lugs de kho na nyid ji bzhin pa rnal du mtshon pa byed pa'i thabs/_rjod byed ma bcos pa'am/_lhug par brjod pas na do ha ste/_de lta bu'i rdo rje'i tshig gi gzhung lhag ma ma lus par bstan zin pas na rdzogs so zhes gsungs so/ /gnyis pa ni/_jo bo spyan ras gzigs sogs te/_jo bo ni Ar+Ya zhes pa'i sgra las drangs na 'phags pa'i rje btsun ste rang gi lhag pa'i lha zhes pa'i sgra sbyar ba'o/ /de gang zhen/_snying rje chen po'i spyan ras gzigs kyis 'gro ba kun la dus rtag tu gzigs pa'i rgyal ba'i sras po rnams kyi gtso bor gyur pas na spyan ras gzigs dbang phyug ces yongs su grags pa des/_shes rab kyi pha rol tu phyin pa'i brjod bya thams cad chos 'phags kyi le'ur ting nge 'dzin gyi sgo nyi shu rtsa lngar bsdus pa dang rjes su mthun par/_do ha rdo rje'i tshigs su bcad pa'i nyi shu rtsa lnga 'di nyid dngos su gnang ba'i mod nas phyag rgya chen po mchog gi grub pa brnyes pa'i skyes bu/_zung 'jug gi don la blo sbyor bas rnal 'byor/_de rnams kyi gtso bor gyur pas dbang phyug_/de yang 'phags pa'i sa brnyes pas chen po/_shrI dza ga ta mi tra A nan+da
XXX ste dpal 'gro ba'i bshes gnyen kun dga' zhes/_rgyal po'i sras su sku 'khrungs pa'i tshe khrom chen po'i dbus su yab sras mjal bas lha mi'i 'gro ba thams cad rab tu dga' bas mtshan de skad du btags pa dang*/_gnub nam mkha'i snying po'i dpon brgyud lo tsA ba ste 'jig rten gyi mig mtshan byams pa'i dpal zhes grags pa des/_bal po'i yul gyi bye brag dpal gu lang gser khang gi nags khrod am b+ha ri zhes grags pa'i sa'i mthong*/_mthong*/_par+pa ta'i bsil khang du legs sbyar gyi gzhung las bod kyi skad du bsgyur ba'o/ /zhes pa'i don to/ /de ltar gzhung 'di la khro phu lo tsA ba chen po'i rnam bshad rgyas bsdus dang kun mkhyen bu ston rin po che'i mdo rgyud kyi lung sbyor dang*/_bar skabs kyi rnam bshad 'ga' zhig kyang snang ba las/_khro lo'i gsung rab dag gi don gyi snying po'i bcud bsdus te 'bru 'grel gtso bor bton pa'i tshul gyis bris pa yin la/_'gran zla dang bral ba'i grub pa'i khyu mchog chen po'i bka' srol las byung ba'i gdams ngag khyad par du 'phags pa 'di nyid thos bsam gyis gtan la phab cing bsgom pas nyams su blang ba ni dal 'byor gyi rten la snying po len pa'i thabs mchog tu shes par bya'o/ /phyag chen gdams pa kun gyi phul/ /sems nyid ngal gso'i gzhung 'grel las/ /snying po bsdus pa'i legs byas kyis/ /'gro kun zung 'jug mchog brnyes shog/ /ces pa'ang mang du thos pa'i bya bral spang ba pa 'jam dbyangs bla ma dgyes pa'i 'bangs mkhyen brtse'i dbang pos gzhung 'grel snying pa'i dgongs pa rang bzo'i rnyogs mas ma bslad par mdor bsdus te zin bris su bgyis pa dge legs 'phel bar gyur cig/ //


Footnotes[edit]



Research Information
Translator's notes
Note from Ringu Tulku
The Commentary to the Resting the Mind Mahamudra Instructions Given by Chenrezik to Mitra Yogi by Khyentse Wangpo.
Notes on the text itself
Notes on authorship
Notes on individuals related to text
Other notes
Genre from Richard Barron's Catalog
Instruction manual
Genre from dkar chag
khrid phran
BDRC Link
VolumeI1CZ3979
BDRC Content Information
No note on contents


Related Content
Recensions
Other Translations
Commentary(s) of this Text in the DNZ
Text(s) in the DNZ of which this is a commentary
Related Western Publications
Related Tibetan Publications
Other Information

Information about Unicode Tibetan and the digitization of this text

As the only available unicode Tibetan text at the time, Nitartha International's version of the Paro Edition of the gdams ngag mdzod is provided here. However, note that it has not been thoroughly edited and that there may also be mistakes introduced through the conversion process. Eventually we will provide a fully edited version of the entire Shechen Edition, entered and edited multiple times by Pulahari Monastery in Nepal, but as of fall 2017 that project has not been finished. Note that the folio numbers that appear throughout were added by Nitartha Input Center at the time of input.

Provided by Nitartha International Document Input Center. Many thanks to Lama Tenam and Gerry Wiener for help with fonts and conversion.

View JSON

JSON Export