Tibetan:གྲུབ་ཐོབ་བརྒྱད་ཅུ་རྩ་བཞིའི་རྫོགས་རིམ་རིན་ཆེན་ཕྲེང་བ་རྩ་འགྲེལ་

DOWNLOAD ABOVE:
Click the picture above to view the original manuscript.

གྲུབ་ཐོབ་བརྒྱད་ཅུ་རྩ་བཞིའི་རྫོགས་རིམ་རིན་ཆེན་ཕྲེང་བ་རྩ་འགྲེལ་
grub thob brgyad cu rtsa bzhi'i rdzogs rim rin chen phreng ba rtsa 'grel
Damngak Dzö Volume 16 (མ་) / Pages 149-200 / Folios 1a1 to 26b5

Volumes List > Volume 16 > Text #5 (No Translation) (Wylie)

Previous TextNext Text

Tibetan Text

XXX གྲུབ་ཐོབ་བརྒྱད་ཅུ་རྩ་བཞིའི་རྫོགས་རིམ་རིན་ཆེན་ཕྲེང་བ་རྩ་འགྲེལ་བཞུགས་སོ། །

XXX རྒྱ་གར་སྐད་དུ། རཏྣ་མཱ་ལ་ནཱ་མ། བོད་སྐད་དུ། རིན་ཆེན་ཕྲེང་བ་ཞེས་བྱ་བ། བཅོམ་ལྡན་འདས་ངག་གི་དབང་ཕྱུག་ལ་ཕྱག་འཚལ་ལོ། །དབུ་སྐྲ་ཁམ་ནག་གྱེན་དུ་བརྗེས། །སྤྱན་ནི་མཐོན་མཐིང་ཨུད་པལ་མདོག །འཇིགས་པའི་ང་རོ་སྒྲགས་པའི་སྐུ། །མི་གཡོ་ཁྱེད་ལ་རབ་བཏུད་ནས། །མངོན་དགའི་ཞིང་དུ་ལྷག་པ་ཡི། །གྲུབ་ཐོབ་བརྒྱ་ཅུ་རྩ་བཞི་ལས། །དྷ་མ་དྷུ་མས་ལེགས་སྤྱད་པས། །མཐོང་ཐོས་ལ་སོགས་འདིར་མ་བཀོད། །གནོད་སྦྱིན་མོ་ལ་གདམས་པ་ཡི། །རིན་ཆེན་ཕྲེང་བ་བཤད་པར་བྱ། །དངོས་མེད་རྒྱུན་མི་ཆད་པ་རུ། །མཐའ་དབུས་མེད་པར་ཁྱབ་བྱས་པའི། །དངོས་པོ་དེ་ཉིད་རབ་ཏུ་ཟབ། །མ་ལ་ཡ་ཡི་མེ་བཞིན་དུ། །ཁྱོད་ནི་ཇི་ལྟར་དངོས་པོ་ཡི། །མཚོ་ལས་སྐྱེས་ཤིང་འདམ་ལ་ཞེན། །བུང་བ་སྦྲང་རྩི་མེ་ཏོག་དང༌། །མི་ལྡན་པ་ནི་ཅི་ཞིག་མྱོང༌། །ཕྱི་ནང་སྣོད་བཅུད་ཚངས་པ་དང༌། །བུས་ཀྱི་དྲོད་དང་ཞོ་རྩི་དང༌། །ཉུངས་དཀར་ལ་ནི་མར་བཞིན་དུ། །ངེས་པར་རྟོགས་ན་ངེས་པ་ཡིན། །མི་མངོན་མི་སྣང་གསལ་བ་རུ། །ནམ་མཁའ་

XXX དེ་ཉིད་སྟོན་པར་བྱེད། །གང་གིས་བཟུང་བ་མེད་པའི་སྐུ་ནི་རབ་ཏུ་མཛེས། །བུམ་པ་བཟང་དང་དཔག་བསམ་ནོར་བུ་རིན་ཆེན་ལྟར། །གྲོང་ཁྱེར་ཐམས་ཅད་སྟོང་པ་ལ། །ཁམས་གསུམ་སྲིད་གསུམ་ལུས་ངག་གི །བྱེད་པོ་གང་ཡིན་བདག་ལ་དྲིས། །བདག་གི་བདག་ཉིད་སྟོང་པ་སྟེ། །གང་གི་མཐའ་ལ་མི་གནས་སོ། །གྲོང་ཁྱེར་ཐམས་ཅད་སྟོང་པ་ལ། །དངོས་པོར་གྲུབ་པ་ག་ལ་ཡོད། །སྣང་གྲགས་རྟོགས་པའི་གྲོང་ཁྱེར་ལ། །གཟུང་བའམ་ནི་འཛིན་པ་ཡིས། །སྲིན་བུ་མི་བདེ་ཁ་ཆུས་བསྡམས། །མ་བཟུང་བཏང་ན་བདེ་བར་འགྱུར། །མི་སྤངས་པ་དང་མི་ལྡན་པར། །ཤེས་པར་གྱུར་ན་གྲོང་མི་འཇུག །དགའ་བོས་ནོར་བུའི་འོད་བཞིན་དུ། །གྲོང་ཁྱེར་བདེ་བ་ཆེན་པོར་འགྱུར། །གང་ཞིག་ཆོས་རྣམས་ཅི་སྨྲ་བ། །སྨྲ་བ་དེ་དག་དྲན་པ་སྟེ། །ཅི་ལྟར་མྱ་ངན་འདས་སྨྲ་བ། །དྲན་པའི་དབང་མོ་མ་ཡིན་ནམ། །ས་ཆུ་མེ་རླུང་གར་སྣང་བ། །སྟོང་པ་ཉིད་དང་དུས་མཉམ་འགྱུར། །ཡེ་ཤེས་སྣང་བ་ལམ་མེ་བ། །

XXX དྲན་པ་གཅིག་པ་ཉིད་དུ་གྱུར། །ཉི་ཟླ་གཉིས་སྦྱོར་མ་ཤེས་པ། །ཆུ་ཡི་རླབས་ལྟར་རྣམ་པ་མང༌། །དེ་ཉིད་གཅིག་ཏུ་གྱུར་བས་ན། །འདི་ལ་ཐ་དད་འབྱུང་བ་མེད། །འདི་ལ་ཉེས་པ་རྡུལ་ཙམ་མེད། །སྦྱོར་བས་བྱུང་བ་མ་ཡིན་ནོ། །མི་རྟོག་པ་ཡི་རྒྱ་མཚོ་ལ། །རྟོག་པའི་རི་བོ་རྣམ་པར་ནུབ། །འཛིན་པའི་སྣང་བ་ཆོས་ཉིད་ལ། །གཟུང་བའི་རྟོག་པ་ག་ལ་ཡོད། །བུམ་པའི་ལུས་ལ་འབྱུང་བའི་འོད། །སྟེང་དུ་ལྷ་ཡི་བདུད་རྩིར་ཞུ། །ཆོས་ཉིད་ཀྱི་ནི་གོང་བུ་ལ། །ཚོགས་དྲུག་རྟོག་པ་རྣམ་པར་ཟད། །རིགས་དྲུག་རྟོག་པ་སྣ་ཚོགས་པ། །ལོག་སྲིད་བརྟས་པའི་མཐུ་ལས་བྱུང༌། །དེ་བཟློག་རིག་པའི་མཐུ་ལས་ནི། །སངས་རྒྱས་ཡིན་ཕྱིར་གང་འདོད་འབྱུང༌། །ཡུལ་རྐྱེན་སྣང་བ་འགག་པ་མེད། །ཆུ་ལ་ཆུ་བུར་ཇི་ལྟ་བུར། །རྗེས་ཀྱི་གཉེན་པོས་ལྡོག་པ་སྟེ། །ཆུ་ཡི་དབྱུག་པ་དེ་ལྟ་བུ། །གཞོན་ནུ་མཛེས་པའི་ས་བོན་ཅན། །འགྲོ་བ་ཀུན་ལ་ཁྱབ་པར་གནས། །དབང་པོ་རབ་སྣང་འཛིན་པར་འགྱུར། །ཡེ་ཤེས་གཅིག་གི་སྣང་བ་ཡིན། །ནམ་མཁའ་སྤྲིན་གྱི་གཟུགས་བྱེད་འཛིན། །མེ་ལོང་ལ་ནི་གཟུགས་བརྙན་སྣང༌། །རང་གིས་བརྟགས་ན་དེ་ལྟ་བུར། །མུན་པས་སྣང་བའི་དོན་བྱེད་མིན། །དེ་ཡང་གསང་བའི་སྟོབས་ཀྱིས་སྤྱད། །ཡེ་ཤེས་གསལ་བའི་ཕྱག་རྒྱ་ནི། །ཕྱོགས་གཅིག་ལུས་ཀྱི་གནད་ལ་བཅས། །སྒྱུ་མའི་འཁྲུལ་འཁོར་དེ་ལས་ནི། །དབང་པོའི་ནུས་པ་བརྟས་པར་བྱེད། །ན་རི་ཀེ་ལའི་ཤིང་བཞིན་དུ། །ཤ་དང་རུས་པ་རྐང་མར་རྣམས། །སྐྱེད་པར་བྱེད་པ་གང་ཡིན་པ། །དེ་བཞིན་རྩ་དང་རླུང་རྣམས་སོ། །རྒྱུ་མེད་འབྲས་བུ་མེད་པ་རུ། །ཀུན་གྱི་གསལ་བ་སྟོན་པར་བྱེད། །དཔེ་ཡིས་མ་ཡིན་ཐ་སྙད་མེད། །མ་བྲལ་བ་ལ་གསལ་ཅི་དགོས། །ཤོར་དང་གོལ་བས་མ་བསྐྱེད། །

XXX འཁྱམས་མེད་ལྟེངས་པ་དེ་ལས་ལོག །སྐྱེས་ནས་མ་ཤིའི་བར་དོ་རུ། །རྣམ་སྨིན་ལུས་ཀྱི་རྟོག་པ་ལ། །འདོད་ཆགས་འོད་གསལ་དག་ཏུ་འགྱུར། །བླ་མའི་གདམས་ངག་ངོ་མཚར་ཆེ། །སྦྱོར་བ་དང་ནི་དངོས་གཞི་ལས། །གཟུང་བ་དག་ནི་སྦྱོང་བ་དང༌། །སྒྱུ་མར་བསླབ་ཅིང་ཡ་ང་སྤང༌། །དེ་ཉིད་མི་འདའ་བསྒོམ་པར་བྱ། །རྣམ་ཤེས་འགྱུར་བའི་བར་དོ་རུ། །བག་ཆགས་ལུས་ཀྱིས་ཀུན་ནས་བསླངས། །མཚམས་སྦྱོར་མངོན་དུ་རྨི་ལམ་བྱ། །གཏི་མུག་འོད་གསལ་ཉིད་དུ་གྱུར། །འདུན་པ་དྲག་པོས་རབ་ཏུ་སྦྱོར། །རྣམ་སྨིན་ལུས་ནི་ཞིག་པ་ན། །བག་ཆགས་དང་བཅས་ཡིད་ཀྱིས་ལུས། །འདོད་ཆགས་འོད་གསལ་མངོན་དུ་བྱ། །ཕ་མ་ལ་སོགས་ཆགས་པ་སྤངས། །དུས་དང་ལུས་ཀྱི་བཅའ་བ་དང༌། །ཡུལ་ནི་དག་པོའི་སྦྱོར་བ་སྟེ། །གཏུམ་མོའི་གནད་ནི་རླུང་བཞིར་བཤད། །འོད་གསལ་བཞི་རུ་འདོད་པ་སྟེ། །འཆི་བ་བསླུ་བར་མ་ནུས་ན། །འཕོ་བ་རྣམ་པ་གསུམ་ཡིན་ཏེ། །དང་པོ་སྙིང་ཁ་ལྟེ་བའོ། །དང་པོ་སྦྱོར་བ་སྒོ་དགུ་དགག །ཁ་དོག་སེར་པོ་འོད་འབར་བའི། །ཀ་ཥ་ནིས་འགྱུར་ཡི་གེ་ནི། །དང་པོར་ལྡན་པའི་ས་བོན་གྱིས། །ཚངས་པའི་སྒོ་རུ་དེས་བསྲུང་ངོ༌། །དྲིལ་བུ་ཡི་གེ་མིག་ལའོ། །སྟོང་པའི་ས་བོན་ལྡན་པ་ནི། །རྣ་བ་སྣ་ཡི་དབང་པོར་བཞག །བདུད་རྩི་ཆུ་ཡི་ས་བོན་གྱིས། །ལྕེ་ཡི་དབང་པོའི་རྩེ་མོར་བཟུང༌། །སེང་གེའི་ས་བོན་བརྩེགས་པ་ཡིས། །སྤྲོ་བ་བསྡུད་སྒོ་ཡང་དེས་བསྲུང༌། །སྟག་མོའི་ས་བོན་བརྩེགས་པ་ཡིས། །ཐོང་ཀ་ཀུན་ཏུ་བཞག་པར་བྱ། །ལྕེ་སྤྱངས་ས་བོན་བརྩིགས་པ་ཡིས། །སྙིང་གའི་གནས་སུ་བཞག་པར་བྱ། །གནད་ཀྱི་ཚིགས་པའི་ལྟེ་བ་རུ། །ཤུགས་

XXX ཀྱིས་ས་བོན་གྱིས་བསྲུང་ངོ༌། །དེ་ནས་འོག་གི་སྒོ་ཡང་བསྲུང༌། །ཆུ་ཡི་ས་བོན་དཀར་སེར་པོ། །ཆུ་དང་ཆུ་མིན་ས་ཡི་ནི། །དེ་ཡིས་ས་བོན་འབར་བར་བྱེད། །ལུས་ལ་རླུང་གི་ས་བོན་དང༌། །སེམས་ཀྱི་རླུང་ནི་དཀྱིལ་འཁོར་ལ། །རླུང་གི་ས་བོན་རླུང་མཐོ་རྩར་བ་ནི། །ཐིག་པ་ང་རོ་ལྡན་པ་ཡིས། །སེམས་ཀྱིས་དེ་ནི་དྲང་བར་བྱ། །མ་ལུས་ཀུན་གྱི་མངོན་རྟོགས་ནི། །གནོད་སྦྱིན་མོ་ཡི་དོན་ཆེད་དུ། །དྷ་མ་དྷཱུ་མས་ལེགས་སྤྱད་པས། །འགྲོ་རྣམས་རྫོགས་པའི་ས་ཐོབ་ཤོག །གདམས་པ་རིན་ཆེན་ཕྲེང་བའི་གཞུང་ཆུང་རྫོགས་སོ། ། ༄༅། །བཅོམ་ལྡན་འདས་ངག་གི་དབང་ཕྱུག་ལ་ཕྱག་འཚལ་ལོ། །འགྲོ་བ་རྣམས་ལ་ཕན་པ་དང༌། །བདག་བློ་དད་པས་རྩེ་གཅིག་ཏུ། །བླ་མའི་གསུང་གི་རྗེས་འབྲངས་ནས། །རིན་ཆེན་ཕྲེང་བའི་བཤད་ཊཱིཀ་དགོད། །འདིར་མཁའ་འགྲོ་མ་དྷརྨ་ཝང་དང༌། ཀོ་ཀ་ལ་གཉིས་ཀྱིས་བསྡུ་བ་མཛད་པའི་གྲུབ་ཐོབ་བརྒྱ་ཅུ་རྩ་བཞིའི་རྫོགས་རིམ་ལ་ཚན་ལྔ་མཆིས་པ་ལས་འདིར་རིན་ཆེན་ཕྲེང་བ་སྟོན། །འདི་ལ་དོན་བསྡུས་བཤད་པར་བྱ་བ་ལ། དོན་གསུམ་གྱིས་བཤད་དེ། ཀླད་དང༌། གཞུང་དང༌། མཇུག་གི་དོན་གསུམ་མོ། །དེ་ལ་དང་པོ་ལ་གསུམ་གྱིས་བསྟན་ནོ། །མཚན་བསྟན་པ་དང༌། མཆོད་པར་བརྗོད་པ་དང༌། བཤད་པར་དམ་བཅའ་བའོ། །མཚན་བསྟན་པ་ནི། རྒྱ་གར་སྐད་དུ། །རཏྣ་མཱ་ལ་ནཱ་མ། བོད་སྐད་དུ། རིན་པོ་ཆེ་ཕྲེང་བ་ཞེས་བྱ་བས་མཚན་བསྟན་ཏེ། རྒྱ་གར་སྐད་དུ། ཞེས་པ་ནི། བོད་སྐད་དུ་ཞེས་པའི་དོད་པོ་ཡིན་ཏེ། འདི་དང་པོར་སྨོས་པའི་དགོས་པ་ཇི་ལྟར་ཡིན་ན། ལོ་ཙཱ་བ་སྐ་བ་དཔལ་བརྩེགས་ཀྱིས་ལོ་ཙཱ་བ་ཆུང་བ་རྣམས་ལ་གསུངས་པ། གཞན་ཡང་ཁྱད་པར་བཤད་པའི་ཆོ་ག་འདི་

XXX སྐད་བཤད་དེ། །ཁུངས་བཙུན་ཡིད་ཆེས་བླ་མ་དྲན། །བཀྲ་ཤིས་རང་བཟོ་མི་འཇུག་དང༌། །འཇུག་འདོད་རྟོགས་སླ་བསྟན་པའི་དོན། །སྒྲ་ཡི་ཡན་ལག་བརྒྱད་པོ་འདི། །བསྟན་བཅོས་འདི་ལུགས་ཤེས་པ་ཡིས། །མཁས་པ་རྣམས་ཀྱིས་བཤད་བྱར་འོས། །ཞེས་པས་ན་དང་པོར་སྨོས་པའོ། །བོད་སྐད་དུ། ཞེས་པ་ནི། མི་གོ་བ་གོ་བར་བྱེད་པ་སཾ་སྐྲྀཏ་ལྷའི་སྐད་ལས། རང་ཡུལ་གྱི་སྐད་དུ་བསྒྱུར་བས་ན། ལོ་ཙཱ་བའི་དྲིན་བཞག་པའོ། །ཇི་ལྟར་བསྒྱུར་ན་བྱས་པ་ལས། རཏྣ་ཞེས་པ་ནི་རིན་པོ་ཆེ་ཡིན་ལ། མ་ལ་ནི་ཕྲེང་བ་ཡིན། ནཱ་མ་ནི་ཞེས་བྱའོ། །འདིར་རིན་པོ་ཆེ་ཞེས་པའི་དོན་ནི། དཔེ་དོན་གཉིས་ཏེ། དཔེ་ནི་བསམ་འཕེལ་གྱི་ནོར་བུ་རིན་པོ་ཆེ་ཡིན་ཏེ། ནོར་བུ་དེ་ལ་མཆོད་པ་དང༌། རིམ་གྲོ་ཕུན་སུམ་ཚོགས་པ་བྱས་ན། ཡོན་ཏན་གྱི་རྣམ་དུ་མ་ཡོད་ཀྱང༌། བསྡུས་ན་གཉིས་ཡིན་སྐད། མི་འདོད་པའི་ཕྱོགས་མི་མཐུན་པ་སྤང་བ་ཡང་འབྱུང་སྐད། འདོད་པའི་ཕྱོགས་དགོས་པ་ཐམས་ཅད་འབྱུང་སྐད། ཕྲེང་བ་ཞེས་པ་ནི་ནོར་བུ་དེ་ཕྲེང་བར་རྒྱུས་པ་ལྟར་གྲངས་དང་གྲངས་སུ་བཅད་པ་ཡོད་ན། སེམས་ཅན་ཐམས་ཅད་ཀྱི་དོན་གོ་བར་བྱེད་པས་ངོ་མཚར་ཆེ་སྐད། དཔེ་དེ་བཞིན་དུ་གྲུབ་ཐོབ་རྣམས་ཀྱི་གདམས་ངག་རིན་པོ་ཆེའི་ཕྲེང་བ་དེ་ཡང་མི་མཐུན་པའི་ཕྱོགས་ཐམས་ཅད་སྤོང་ལ། མཐུན་པའི་ཡོན་ཏན་ཐམས་ཅད་ལྡན་པའི་གདམས་ངག་དེ་ཡང༌། དཔེར་ན་ཕྲེང་བ་བརྒྱུས་པའི་རྣམ་པ་ལྟར་ཡོད་པས། རིན་པོ་ཕྲེང་བ་ཞེས་བྱའོ། །དེས་མཚན་བསྟན་ནས། ད་མཆོད་པར་བརྗོད་པ་ལ་གཉིས་ཏེ། སྡུད་པ་པོ་པཎྜི་ཏ་ཡིས་མཆོད་པར་བརྗོད་པ་དང༌། བསྒྱུར་བྱེད་ལོ་ཙཱ་བའི་མཆོད་པར་བརྗོད་པའོ། །བཅོམ་ལྡན་འདས་

XXX ངག་གི་དབང་ཕྱུག་ལ་ཕྱག་འཚལ་ལོ་ཞེས་པ་སྟེ། བཅོམ་ལྡན་འདས་ཞེས་པ་བདུད་བཞི་བཅོམ་པས་ཡིན་ཏེ། ཉོན་མོངས་པའི་བདུད། །ཕུང་པོའི་བདུད། འཆི་བདག་གི་བདུད། ལྷའི་བུའི་བདུད་བཞིའོ། །གོང་མ་གསུམ་གྱིས་ཚེ་ལ་བར་དུ་གཅོད་པ་དང༌། ལྷའི་བུའི་བདུད་ཀྱིས་ཡོན་ཏན་ཁྱད་པར་ཅན་བར་དུ་གཅོད་པར་བྱེད་པས་ན། དེ་དག་བཅོམ་པ་དང་ལྡན་པའོ། །ཡང་དེ་ཉིད་འདུས་པའི་བཤད་རྒྱུད་ནས་གསུངས་པ། དབང་ཕྱུག་དང་ནི་གཟུགས་བཟང་དང༌། །དཔལ་དང་གྲགས་དང་ཡེ་ཤེས་དང༌། །བརྩོན་འགྲུས་ཕུན་སུམ་ཚོགས་པས་ན། །དྲུག་པོ་དེ་ལ་ལྡན་ཞེས་བྱ། །ཞེས་བཤད་པའོ། །ངག་གི་དབང་ཕྱུག་ཅེས་པ་ནི། སེར་སྣ་དང་ང་རྒྱལ་རྣམ་པར་དག་པའི་ཡེ་ཤེས་མཉམ་པ་ཉིད་ལ་མངའ་བརྙེས་ཤིང་དབང་བའམ། དེ་ལ་ལོངས་སྤྱོད་པས་ན། དབང་ཕྱུག་ཅེས་བྱའོ། །ཕྱག་འཚལ་བ་ནི་ཡུལ་ཁྱད་པར་ཅན་དེ་ལ་ཕྱག་འཚལ་བའོ། །གང་ཟག་གང་གིས་བཙལ་ན་སྡུད་པ་པ་སུརྻ་རསྨི་ཉིད་ཀྱིས་བཙལ་བའོ། །དགོས་པ་གང་གིས་ཕྱིར་བཙལ་ན། དབུ་ནས་ཞབས་སུ་བརྩམ་པ་ལ་བར་ཆད་མི་འབྱུང་ཞིང་གཞན་འཇུག་པའི་ཡན་ལག་ཏུ་འགྱུར་བའི་དགོས་པ་ཡོད་ཅེས་པའི་དོན་ཏོ། །གཉིས་པ་ནི། སྒྱུར་བྱེད་ལོ་ཙཱ་བས་ཡི་དམ་གྱི་ལྷ་ལ་ཕྱག་འཚལ་བའོ། །དེས་མཆོད་པར་བརྗོད་པ་བསྟན་ནས། ད་བཤད་པར་དམ་བཅའ་བ་བསྟན་པ་ནི། མངོན་དགའི་ཞིང་དུ་ལྷག་པའི་ཞེས་པ་ནས། རིན་ཆེན་ཕྲེང་བ་བཤད་པར་བྱ་ཞེས་པའི་བར་གྱིས་བསྟན་ཏེ། མངོན་དགའི་ཞིང་དུ་ལྷག་པ་ཡི། །ཞེས་པ་མངོན་དགའ་ནི་དུར་ཁྲོད་ཆེན་པོ་ས་མའི་འཚལ་ཏེ། མངོན་པར་ཅིས་དགའ་བྱས་པ་ལ། གྲུབ་ཐོབ་རྣམས་འདུ་བའི་གནས་ཚོགས་དཀྱིལ་འཁོར་བསྐོར་བའི་ཞིང་ཡིན་པས་

XXX ན། ལས་ཅན་རྣམས་ཀྱིས་ཐོས་པའམ་མཐོང་བ་ཙམ་གྱིས་དགའ་བས་ན། མངོན་དགའི་ཞིང་ཞེས་པའོ། །ལྷག་པ་ནི་ཚོགས་ལ་འདུས་པའོ། །གྲུབ་ཐོབ་བརྒྱ་ཅུ་རྩ་བཞི་ལ། །དྷ་མ་དྷུ་མས་ལེགས་སྤྱད་པ་ནི། །གསུངས་པའི་ཆོས་རྣམས་ལ་སྤྱད་པའོ། །ཅི་ལྟར་སྤྱད་ན། མཐོང་བའམ་ཐོས་པ་ལ་སོགས་པ་ཐམས་ཅད་འདིར་མ་བཀོད་སྐད། འོ་ན་ཅི་འདྲ་བ་ཅིག་བཀོད་བྱས་པ་ལ། གནོད་སྦྱིན་མོ་ལ་གདམས་པའི་རིན་ཆེན་ཕྲེང་བ་འདིར་བཀོད་ཅེས་པའི་དོན་ཏོ། །གནོད་སྦྱིན་མོ་ལ་གང་གདམས་བྱས་པ་ལ། དུར་ཁྲོད་དེ་ན་ཡི་དྭགས་ཀྱི་རང་བཞིན་ལོག་ནང་དུཿཁ་བྱ་བ་གཅིག་ཡོད་དེ། དེས་ཤ་དང་ཁྲག་གི་དྲི་ཚོར་ན། དཔག་ཚད་བརྒྱར་ཡང་སྐད་ཅིག་ལ་ཐོགས་པ་མེད་པར་རྒྱུ་གནས་འོངས་པས། དུས་ནམ་ཞིག་གི་ཚེ་ན། དུར་ཁྲོད་ཆེན་པོ་དེའི་བྱང་ཤར་ན་ཤིང་ཆེན་པོ་གཅིག་ཡོད་པ་ལ། དེའི་ཁོག་པ་སྟོང་པར་ཡོད་པས་དེའི་ནང་དུ་དྲེད་མོ་མ་སྨད་བདུན་ཉལ་ཞིང་རྟག་ཏུ་གནས་པ་ལ། དུས་ལན་ཅིག་བསེ་ཆེན་པོ་ཡང་དག་པ་གཅིག་གིས་ཤིང་དེ་ལ་བསྙེལ་ཏེ་ཉལ་ཙམ་ན། ཤིང་འགྱེལ་བས། དེའི་ནང་ན་གནས་པའི་དྲེད་རྣམས་ཀྱང་ཤི། བསེ་དེ་ཡང་འགྱེལ་ནས་ཡོད་པ་ལ། དེའི་དུས་སུ་གནོད་སྦྱིན་མོ་དེས་རྙེད་ནས། བསེ་ཡང་བསད། དྲེད་ཀྱི་ཤ་ཡང་ཡོད་པ་ལ། དེའི་ཚེའམ་དུས་ན་ནགས་དེའི་ལྷོ་ཕྱོགས་ནས། སྲིན་པོ་རཀྵ་ཀོ་ཊི་བྱ་བས། ཤ་དང་ཁྲག་གི་དྲི་ཚོར་ནས་ཕྱོགས་དང་ཕྱོགས་མཚམས་སུ་བཙལ་ཏེ། གནོད་སྦྱིན་མོ་ལ་ཤ་བསླངས་པས་མཁུགས་ནས། དེར་སྲིན་པོ་ཁྲོས་ཏེ། ལྷོ་ཕྱོགས་ཀྱི་བྲག་ཆེན་པོ་གཅིག་ལ་ཟངས་མ་མཇུ་བ་མང་པོ་ཡོད་པས་དེས་ཟངས་མའི་ཞུན་མ་བརྐུས་ནས་གནོད་སྦྱིན་

XXX མོ་ལ་བར་སྣང་ནས་མར་བླུགས་པས། གནོད་སྦྱིན་མོ་དེ་ལྟ་ཟུར་གཡས་པ་རུས་པ་ལ་ཐུག་པར་ཚིག་ནས། སྐྱེ་བ་སྔ་མའི་ལས་ཀྱི་དབང་གིས་སྲོག་མ་ཆད་པར་སྡུག་བསྔལ་གྱི་མེ་འབར་ནས་ཡོད་པ་ལས། དེ་རི་དུས་ན་མཁའ་འགྲོ་མ་དྷརྨ་དེ་ཝཱི་དང༌། ཀོ་ཀི་ལ་གཉིས་ཀྱིས་མཐོང་ནས་སྙིང་རྗེ་སྐྱེས་ནས་སྔགས་མང་པོ་བཏབ་ནས་ཤའི་རྨ་ནི་སོས། རུས་པ་སྐྱ་སེང་ངེ་ཡོད་པ་དེ་མ་སོས་པར། སྡུག་བསྔལ་ཞིང་ཡོད་པ་ལས། མཁའ་འགྲོ་མ་གཉིས་པོ་དེས་གྲུབ་ཐོབ་རྣམས་ལ་ཡུན་དུ་ཚོགས་ཀྱི་འཁོར་ལོ་བསྐོར་བའི་དུས་ཀྱི་ཚེ་དང་འཛོམ་པར་གྱུར་ནས། གནོད་སྦྱིན་མོ་དེའི་རྟོག་པ་ཟད་པར་བྱ་བའི་ཕྱིར་ན། བག་ལ་ཉལ་དང་མཐུན་པའི་ཞུ་བ་ཕུལ་བས། བླ་མ་རྣམས་ཀྱིས་ཀྱང་གོང་ལྟར་ཞུས་པ་ལྟར་གནང་ངོ༌། །དེ་དག་གི་དོན་ནི་རིན་ཆེན་ཕྲེང་བ་བརྒྱུས་པ་ལྟར་བྱུང་ངོ༌། །དེའི་གདམས་པ་ནི་རིན་ཆེན་ཕྲེང་བ་ཞེས་བྱའོ། །དེས་བཤད་པར་དམ་བཅའ་བའོ། །གང་ལ་བཤད་པར་དམ་བཅས་ན། ཕྱི་རབས་ཀྱི་གང་ཟག་སྐལ་པ་དང་ལྡན་པ་རྣམས་ལ་བཤད་པར་དམ་བཅས་སོ། །དགོས་པ་གང་གི་ཕྱིར་བཤད་ན། ཞི་བ་བདེ་བ་མྱ་ངན་ལས་འདས་པའི་ས་ཐོབ་པར་བྱ་བའི་ཕྱིར་བཤད་དོ། །དེས་ཀླད་ཀྱི་དོན་བསྟན་ནས། ད་གཞུང་གི་དོན་བསྟན་པ་ནི། དང་པོ་ལཱུ་ཨི་པས་སྣང་བ་ཐུག་ཕྲད་ཀྱི་གདམས་ངག་གཅིག་བསྟན་ཏེ། དེ་ཡང་འདི་ལ་ཕན་པའི་གདམས་ངག་གཅིག་ཞུ་བྱས་པས། བླ་མའི་ཞལ་ནས། རང་ངོ་མ་ཤེས་པས་ཉེས་པ་ཡིན། དེ་ཤེས་ན་སྣང་བ་མེད་པར་གཟུགས་ཀྱི་སྣང་བ་ཡང་གལ་ཅི་ཡོད་གསུངས་ནས། རང་ངོ་ཤེས་པ་གང་ལགས་ཞུས་པས། རྒྱུན་ཟད་འོད་གསལ་གྱི་ཡེ་ཤེས་གཅིག་ཡིན་གསུངས། མི་འཚལ་ཞུས་

XXX པས། དངོས་མེད་རྒྱུན་མི་འཆད་པ་རུ། །མཐའ་དབུས་མེད་པར་ཁྱབ་བྱས་པའི། །དངོས་པོ་དེ་ཉིད་རབ་ཏུ་ཟབ། །མ་ལ་ཡ་མི་ཡེ་བཞིན་དུ། །ཞེས་གསུངས་སོ། །དངོས་མེད་ཅེས་པ་ནི། དེ་གང་གིས་གང་ལ་དངོས་པོ་མེད་ཅེས་པ་ལ། གནས་ལུགས་དེ་ལ་དངོས་པོ་མེད་པ་ཡིན་ཏེ། དཔེར་ན་ནམ་མཁའི་མེ་ཏོག་དེ་ལ་བཏགས་པ་ཙམ་ཡོད་ཀྱང་དངོས་པོ་མེད་པས་དབྱིབས་དང་ཁ་དོག་ཏུ་མ་གྲུབ་པས། ནམ་མཁའི་མེ་ཏོག་གི་རྟོག་པ་ཟད་པའོ། །དཔེ་དེ་བཞིན་དུ། གནས་ལུགས་སྐྱེ་བ་མེད་པ་དེ་ལ། དངོས་པོ་གང་དུ་ཡང་གྲུབ་པ་མེད་པས་དངོས་མེད་ཅེས་པའོ། །གྲུབ་པ་མེད་ཙམ་ན། དངོས་པོའམ། སྣང་བའམ། སྟོང་པའམ། བློའམ། སེམས་སམ། སེམས་ལས་བྱུང་བའི་རྣམ་པར་རྟོག་པ་ཐམས་ཅད་ཀྱི་རྒྱུན་ཟད་པས་ན་དེ་ཀ་ལ་རྒྱུན་ཟད་འོད་གསལ་གྱི་ཡེ་ཤེས་ཟེར་སྐད། འོ་ན་རྟོག་པ་ཟད་པས་ཡེ་ཤེས་ཀྱང་ཟད་དམ་བྱས་པ་ལ། རྟོག་པ་ཟད་པ་ལ་ཡེ་ཤེས་བྱ་བའི་རྟོག་པ་ག་ལ་ཡོད་དེ། རང་བཞིན་འོད་གསལ་དུ་ནི་རྒྱུན་མི་འཆད་པ་ཡིན་གསུངས། དེ་ཡང་རྒྱུན་མི་འཆད་པ་རུ། །ཞེས་པ་སྟེ། གང་གིས་རྒྱུན་མི་འཆད་བྱས་པ་ལ། འོད་གསལ་དུ་རྒྱུན་མི་འཆད། དཔེར་ན་ནོར་བུ་རིན་པོ་ཆེ་ལ་གནས་པའི་འོད་དེ་རྒྱུན་མི་འཆད་པ་ལྟ་བུའོ། །འོ་ན་དེ་རང་གི་མཚན་ཉིད་གང་ཡིན་བྱས་པ་ལ། མཐའ་དབུས་མེད་པས་ཁྱབ་བྱས་པའི། །ཞེས་པ། དཔེ་འདུས་བྱས་ཀྱི་ནམ་མཁའ་ལྟ་བུ་ཡིན་ཏེ། ཕྱོགས་དང་རིས་མེད་པས་མཐའ་དང་དབུས་མེད་པ་ཡིན་ལ། ཁྱབ་པའི་ཞེས་པ་ནི་འདྲ་བ་དེས། མཐོ་སྲིད་པའི་རྩེ་མོ་ནས། དམའ་འཇིགས་ཚོགས་ཀྱི་དམྱལ་བ་ཡན་ཆད་དུ་ཁྱབ་པར་ཞེས་

XXX པའི་དོན་ཏོ། །དངོས་པོ་དེ་ཉིད་རབ་ཏུ་ཟབ། །ཅེས་པ་ནི། དངོས་པོ་ནི་གནོད་སྦྱིན་མོའི་ལུས་ཀྱི་ན་ཚ་དང་སེམས་ཀྱི་རྟོག་ཚད་དང༌། སྣང་འཛིན་ལ་སོགས་པ་རྣམས་དངོས་པོ་ཡིན་ལ། ཟབ་པ་ནི་དེ་དག་ཐམས་ཅད་དངོས་མེད་འོད་གསལ་དུ་རྟོགས་ན་ཟབ་ཅེས་པའི་དོན་ཏོ། །མ་ལ་ཡ་ཡི་མེ་བཞིན་དུ། །ཞེས་པ་ནི་དཔེ་ཡིན་ཏེ། མ་ལ་ཡ་ཞེས་པ་ནི་རི་བོ་ཡིན་ཏེ། རི་བོ་ཆེན་པོ་ལ་ཕྱོགས་བཞི་ནས་མེ་འབར་བའི་དབུས་སུ་རྩ་དང་ཤིང་དང་གེལ་བ་དང༌། ས་དང་རྡོ་དང་ཆུ་ལ་སོགས་པའི་དངོས་པོ་ཐམས་ཅད་སྣང་བ་ཐུག་ཕྲད་དུ་མེའི་གྲོགས་སུ་འགྱུར་བ་ལྟར། །དངོས་པོ་ཐམས་ཅད་ཟབ་མོ་འོད་གསལ་དུ་རྟོགས་པའི་དུས་ན། སྣང་བ་ཐམས་ཅད་ཐུག་ཕྲད་དུ་བཅོམ་ནས་འོད་གསལ་དུ་རྟོགས་པས། རྣམ་པར་རྟོག་པ་ཆོས་ཉིད་དུ་སད་པའམ། བཅོམ་པ་ཡིན་ཞེས་སྟོན་ཏོ། །དེ་དག་རྒྱུད་ལ་ཤར་བ་མ་གྱུར་ནས། ལཱི་ལ་ས་ལ་ཞུས་པས། བླ་མས་བསྟན་པ་ཇི་ལྟ་བུ། །འདི་ལ་ཇི་ལྟར་མཚོན་པར་ཞུ། །ཞེས་ཞུས་པས། ཁྱོད་ནི་ཇི་ལྟར་དངོས་པོ་ཡི། །མཚོ་ལས་སྐྱེས་ཤིང་འདམ་ལ་ཞེན། །བུང་བ་མེ་ཏོག་སྦྲང་རྩི་དག །མི་ལྡན་པར་ནི་ཅི་ཞིག་མྱོང༌། །ཞེས་གསུངས་པའོ། །དེ་ལ་ཁྱོད་ནི་ཞེས་པ་ནི། གནོད་སྦྱིན་མོ་ཁྱོད་ཇི་ལྟར་དངོས་པོའི་མཚོའམ། སྲིད་པའི་འདམ་ལ་ཞེན་ནས་འདུག །མ་ལེགས། ཁྱོད་དང་པོའི་དུས་ན་ཡང་སྐྱེ་རྒ་ན་འཆིའི་མཚོ་ལ་སྐྱེས། ད་ལྟ་ཡང་ལུས་དང་ན་བ་དང་ཚ་བས་དངོས་པོར་འཛིན་པ་ནི་སྲིད་པའི་འདམ་ལས་ཞེན་པས་སྡུག་བསྔལ་ལས་ཐར་བ་མ་ཡིན། མེ་ཏོག་དང༌། གེ་སར་གྱི་སྦྲང་རྩི་དང༌། བུང་བ་དང་གསུམ་འཛོམ་ན་མངར་བའི་རོ་མྱོང་བར་འགྱུར་གྱིས། དེ་དག་མི་ལྡན་ན་

XXX ཡུལ་སོ་སོ་བ་དེས་མྱོང་བར་མི་འགྱུར། དེ་བཞིན་དུ་འོད་གསལ་ཡང་མ་རྟོགས། ལུས་ལ་ཡང་ཆེད་དུ་བཟུང༌། དངོས་པོའི་འཛིན་པ་དང་མ་བྲལ་བར་གཉུག་མ་ལྷན་སྐྱེས་ཀྱི་རོ་བདེ་བ་མི་མྱོང༌། དེ་མ་མྱོང་བར་སྡུག་བསྔལ་དང་བྲལ་བར་ག་ལ་འགྱུར་ཞེས་གདམས་སོ། །དེ་རྒྱུད་ལ་བརྟེན་པར་བྱེད་པའི་ཐབས་ཀོ་ཀ་ལས་གསུངས་པ། ཕྱི་ནང་སྣོད་བཅུད་ཚངས་པ་དང༌། །དུས་ཀྱི་དྲོད་དང་ཞོ་རྩི་དང༌། །ཉུངས་ཀར་ལ་ནི་མར་བཞིན་དུ། །ངེས་པར་རྟོགས་ན་ངེས་པ་ཡིན། །ཞེས་གསུངས་སོ། །དེ་ལ་ཕྱི་ནང་སྣོད་བཅུད་ཚངས་པ་དང་ཞེས་པ་སྟེ། ཕྱི་སྟེ་སྣོད་ཀྱི་འཇིག་རྟེན་འདི་ལ་ཇི་ལྟར་དང༌། ཇི་སྙེད་པར་གནས་པ་དང༌། ནང་སྟེ་བཅུད་ཀྱི་སེམས་ཅན་ཇི་ལྟར་སྲིད་པ་འདི། གཞན་གྱིས་ཤེས་པར་དཀའ་ཡང༌། ལྷ་ཚངས་པ་ཉིད་ཀྱིས་དེ་དག་མ་ལུས་པར་མཁྱེན་པར་དེ་བཞིན་དུ། བླ་མས་བསྟན་པའི་སེམས་ཉིད་འོད་གསལ་གྱི་ངོ་བོ་དེ། དངོས་པོར་རང་གིས་ངོ་ཤེས་དགོས་པ་ཡིན་གསུངས། ཤེས་ནས་ཅི་བྱེད་བྱས་པ་ལ། ཤེས་ནས་རྒྱུད་ལ་བརྟེན་དགོས་པ་ཡིན་གསུངས། དེ་ཇི་ལྟར་བརྟེན་བྱས་པ་ལ། དུས་ཀྱི་དྲོད་དང་ཞོ་རྩི་དང༌། །ཉུངས་ཀར་ལ་ནི་མར་བཞིན་དུ། །ཞེས་པ། དེ་བཞིན་དུ་བརྟེན་དགོས་སྐད། ཕྱི་བཟུང་བའི་ཡུལ་ལ་མི་འཇུག་པ་དུས་ཀྱི་དྲོད་ལྟ་བུར་ཉམས་རྒྱུད་ལ་བརྟེན་དགོས་སྐད། དེ་རང་གང་ཡིན་ན། དུས་ཀྱི་དྲོད་ཅེས་པ་ནི་ལོ་གསར་ཤར་ནས་ཟླ་བ་གསུམ་ཚད་དུ་ཞུགས་ཙམ་ན་རླུང་ནང་དུ་བསུམ་ནས་ཚོགས་དྲུག་གི་རྟོག་པའི་རྗེས་སུ་འབྲེངས་པའི་ཕྱི་བཟུང་ཡུལ་ལ་མི་འཇུག་པར་གནས་སོ། །དཔེ་དེ་བཞིན་དུ། འོད་གསལ་རྒྱུད་ལ་བརྟེན་པའི་གང་ཟག་ནི། ཡུལ་ཚོགས་དྲུག་གི་རྟོག་པ་ལས་ལོག་ནས་

XXX ཡུལ་དེ་ཉིད་རང་འོད་གསལ་དུ་རྒྱུད་ལ་བརྟེན་དགོས་སྐད། དཔེ་བྱས་པ་ལ་ཞོ་རྩི་དང་ཞེས་པ་སྟེ། མ་ཧེའི་འོ་མ་དེ་ལ་ཞོ་རྩི་སོང་བས་འོ་མ་ཞོར་གནས་གྱུར་ནས། འོ་མ་རང་སྤངས་ལ་འོ་མ་རང་དང་མི་ལྡན་པར་ཞོར་གནས་གྱུར་པ། དཔེ་དེ་བཞིན་དུ་འོད་གསལ་རྒྱུད་ལ་ཤར་བའི་གང་ཟག་གི། ཚོགས་དྲུག་གི་རྟོག་པ་མ་སྤངས་ལ་མི་ལྡན་པ། ཚོགས་དྲུག་གི་རྟོག་པ་ཡེ་ཤེས་སུ་གནས་གྱུར་པ་གཅིག་རྒྱུད་ལ་བརྟེན་དགོས་གསུངས། འོ་ན་ཚོགས་དྲུག་གི་རྟོག་པ་ཡེ་ཤེས་ཡིན་པར་ཅིས་ཤེས་བྱས་པ་ལ། ཉུངས་ཀར་ལ་ནི་མར་བཞིན་དུ། །ངེས་པར་རྟོགས་ན་ངེས་པ་ཡིན། །ཞེས་པ་སྟེ། ཉུངས་ཀར་ལ་ནི་ཞེས་པ་སྟེ། ཉུངས་ཀར་དུ་འདུག་ཀྱང༌། ཁྱབ་པ་མར་གྱིས་ཁྱབ་པ་དེ་བཞིན་དུ། སེམས་ཅན་གྱི་དོན་ཀུན་གཞི་ལ་འདུག་ཀྱང༌། ཁྱབ་པ་གཉུག་མ་འོད་གསལ་གྱི་རང་བཞིན་གྱིས་ཁྱབ་ཅེས་པའོ། །ངེས་པར་རྟོགས་ན་ཞེས་པ་ཐེ་ཚོམ་མམ། སོམ་ཉི་མེད་པར་རྟོགས་ན་མ་ནོར་བ་ཡིན་ཅེས་པའི་དོན་ཏོ། །དེ་ལྟར་རྟོགས་ན་འབྲས་བུ་གང་ཡིན་ན། དེའི་དོན་རྩ་མ་རི་པས་གསུངས་པ། མི་མངོན་མི་སྣང་གསལ་བ་རུ། །ནམ་མཁའ་དེ་ཉིད་སྟོན་པར་བྱེད། །ཅེས་གསུངས་སོ། །མི་མངོན་མི་སྣང་ཞེས་པ་ནི། ཆོས་སྐུ་དེ་ནམ་མཁའི་མཚན་ཉིད་ལྟར། མི་མངོན་མི་སྣང་བ་ཡིན་ཏེ། དངོས་པོའམ། དངོས་མེད་དམ། བློའམ། སེམས་སམ། སེམས་ལས་བྱུང་བ་གང་གིས་ཀྱང་བརྟག་ཏུ་མེད་པས་ན། མི་མངོན་མི་སྣང་ཞེས་པའི་དོན་ཏོ། །འོ་ན་ཆོས་སྐུ་དེ་དངོས་པོ་མེད་པས་ཐུགས་རྗེ་རྒྱུན་ཆད་དམ་བྱས་པ་ལ། གསལ་བ་རུ་ཞེས་པ་དང༌། ནམ་མཁའ་དེ་ཉིད་སྟོན་པར་བྱེད་གསུངས་པ་སྟེ། ནམ་མཁར་དེ་ཉིད་དམ། དབྱིབས་དང་ཁ་དོག་གམ་

XXX མཚན་མའི་དངོས་པོ་མེད་ཀྱང༌། ཉི་ཟླ་གཟའ་སྐར་རམ། སྤྲིན་དང་ན་བུན་འཇའ་ཚོན་ལ་སོགས་པ་གསལ་བར་སྟོན་པ་དེ་བཞིན་དུ། ཆོས་སྐུ་མི་མངོན་མི་འགག་ཀྱང་ཐུགས་རྗེའི་རྒྱུན་མི་འགག་སྟེ། ལོངས་སྐུ་དང་སྤྲུལ་སྐུ་གཉིས་འགག་པ་མེད་པར་སྨོན་ལམ་གྱིས་འགག་པ་མེད་པར་ཤུགས་ལས་བྱུང་ཞེས་པའོ། །ས་ར་ཧའི་ཞལ་ནས། གང་གིས་བཟུང་བ་མེད་པའི་སྐུ་ནི་རབ་ཏུ་མཛེས། །བུམ་པ་བཟང་དང་དཔག་བསམ་ནོར་བུ་རིན་ཆེན་ལྟར། །ཅེས་གསུངས་སོ། །གཟུང་འཛིན་གྱི་རྟོག་པ་སྤངས་པའི་སེམས་ཉིད་དེ་རབ་ཏུ་མཛེས། དཔེ་ཅིང་འདྲ་ན། བུམ་པའམ་དཔག་བསམ་ཤིང་ངམ་ནོར་བུ་རིན་པོ་ཆེ་ལྟར་མཛེས་ཞེས་སོ། །དེ་ནས་སློབ་དཔོན་བིརྦ་པས་གདམས་པ་ནི། གྲོང་ཁྱེར་སྟོང་པ་བྱ་བ་གཅིག་གསུངས་ཏེ། །ཁམས་གསུམ་སྲིད་གསུམ་ལུས་ངག་གི །བྱེད་པོ་གང་ཡིན་བདག་ལ་དྲིས། །བདག་གི་བདག་ནི་མེད་པ་སྟེ། །གང་གི་མཐའ་ལ་མི་གནས་སོ། །ཅེས་པའོ། །ཁམས་གསུམ་སྲིད་གསུམ་ལུས་ངག་གི །ཅེས་པ་ནི། ཕྱི་འཇིག་རྟེན་པའི་ཁམས་ལ་སོགས་པ་གསུམ་པོ་དེའམ། སྲིད་གསུམ་ལ་སོགས་པའམ། ནང་ལུས་ངག་ཡིད་གསུམ་མམ། དུས་གསུམ་ལ་སོགས་པའི་གྲོང་ཁྱེར་འདི་དག་སྟོང་པ་ཡིན་གསུངས། དེ་ཇི་ལྟར་དུ་སྟོང་བྱས་པ་ལ། ཕྱི་སྣོད་ནི་རྒྱུའི་གཟུགས་བཞི་ཡིས་བསྐྱེད་པ་ཡིན་ལ། དེ་བཞིན་བསྐྱེད་པའི་རྟེན་ཅིང་འབྲེལ་བར་འབྱུང་བ་ཡིན་ཏེ། འབྲས་བུའི་གཟུགས་ཡིན། ལུས་ངག་གི་ཅེས་པ་ནི་ལུས་ངག་གི་ཁོངས་སུ་ཡིད་འགྲོ་སྟེ། ཡིད་ལས་བྱུང་བའི་དུས་གསུམ་ལ་སོགས་པའི་རྟོག་པའི་གྲོང་ཁྱེར་དེ་ཐམས་ཅད་སྟོང་པ་ཡིན་ཅེས་པའོ། །དེ་ཅི་སྟེ་བྱས་པ་ལ། བྱེད་པོ་གང་ཡིན་བདག་

XXX ལ་དྲིས་ཅེས་པ་སྟེ། དེ་དག་གི་བྱེད་པ་པོ་རྒྱུའི་གཟུགས་བཞི་ཡིས་བྱས་སམ། འོན་ཏེ་ཡིད་ལས་བྱུང་བའི་དུས་གསུམ་གྱི་བདག་དེ་ཡིས་བྱས། རྒྱུ་ཡི་གཟུགས་བཞི་ཡིས་བྱས་ན་ནི་གཟུགས་བཞི་པོ་དེ་རང་ཡང་གཅིག་ལ་གཅིག་གནོད་པས་མི་རྟག་ལ་སྟོང་པས་ན། དེ་ཡིས་བསྐྱེད་པའི་ཕྱིར་ན་ཁམས་གསུམ་གྱི་གྲོང་ཁྱེར་དེ་ཡང་མི་རྟག་པས་ན་སྟོང་པ་ཡིན་ཅེས་པའོ། །ཡིད་ལས་བྱུང་བའི་དུས་གསུམ་གྱི་བདག་དེ་ཡིས་བྱས་ན། དུས་གསུམ་གྱི་བྱེད་པ་པོ་དེ་དངོས་པོར་ཡོད་པ་གཅིག་གིས་བྱས་སམ། མེད་པ་ཞིག་གིས་བྱས། དངོས་པོར་ཡོད་པ་གཅིག་གིས་བྱས་ན། དངོས་པོ་ནི་རྫས་ཡིན། རྫས་ཐམས་ཅད་འདུས་བྱས་ཡིན། འདུས་བྱས་ཐམས་ཅད་མི་རྟག་པས་ན། དེས་བསྐྱེད་པའི་གྲོང་ཁྱེར་དེ་སྟོང་ཅེས་པའོ། །དངོས་མེད་གཅིག་གིས་བྱས་ན་དངོས་མེད་ཀྱིས་དངོས་པོ་བྱས་པས་ན། ནམ་མཁའ་ཡིས་ཀྱང་མེ་ཏོག་བྱས་པར་རིག་པ་ལམ་བྱས་པར་འདུག་པས་ན། དེ་དག་ཐམས་ཅད་ཀྱི་གྲོང་ཁྱེར་སྟོང་པ་ཡིན་གསུངས། དེ་ཡང་བྱེད་པ་པོ་གང་ཡིན་པ་དག་ལ་དྲིས་ཅེས་པ་དེ་དག་གི་བྱེད་པ་པོ་གང་གིས་བྱས་པའི་བདག་དྲིས་པས་བདག་མེད་པ་ནི་བདག་ཉིད་སྟོང་པ་སྟེ། ཅེས་པ་ནི་བྱེད་པ་པོའི་བདག་ཉིད་མ་རྙེད་པ་དེ་སྟོང་པའོ། །སྟོང་པ་གཅིག་རང་ཁོ་ན་ཡིན་ནས་བྱས་པ་ལ་དེ་མ་ཡིན་ཏེ། གང་གི་མཐའ་ལ་མི་གནས་སོ་ཅེས་པ་ནི་སྟོང་པའམ་མི་སྟོང་པའམ་གཉིས་ཀའམ་གཉིས་ཀ་མ་ཡིན་པའམ། གང་གི་མཐའ་ལ་ཡང་མི་གནས་ཅེས་པའོ། །དེ་ཉིད་ཀྱི་དོན་དོམྦི་པས་གསུངས་པ། གྲོང་ཁྱེར་ཐམས་ཅད་སྟོང་པ་ལ། །དང་པོར་གྲུབ་པ་ག་ལ་ཡོད། །ཅེས་གསུངས། དེའི་དོན་ནི། གོ་བར་གདའ་བས་འདིར་མ་བཀོད། གོ་རཀྵ་པས་གསུངས་པ།

XXX སྣང་གྲགས་རྟོགས་པའི་གྲོང་ཁྱེར་ལ། །གཟུང་བའམ་ནི་འཛིན་པ་ཡིས། །སྲིན་བུ་མི་བདེ་ཁ་ཆུ་བསྡམས། །མ་བཟུང་བཏང་ན་བདེ་བར་འགྱུར། །ཅེས་གསུངས་སོ། །དེ་ཡང་སྣང་གྲགས་ཞེས་པ་སྣང་བ་ནི་ཕྱི་ནང་སྣོད་བཅུད་ལ་སོགས་པ་ནི་དངོས་པོའི་ཆོས་ཡིན་ལ། གྲགས་པ་ནི་རྟོག་ཐུན་མཁན་གྱིས་བཏགས་པ་ཡིན་པས་ན། དེ་དག་ཐམས་ཅད་ཀྱང་རྟོག་པ་ལས་མ་འདས་པས་ན། རྟོག་པའི་གྲོང་ཁྱེར་ལ་ཅེས་པའོ། །དེ་ལ་ཡང་དག་པར་གཟུང་བའམ་འཛིན་པའི་དབང་གིས་རང་གིས་རང་བཅིངས་པའི་དཔེ་ནི་སྲིན་བུའི་ཁ་ཆུས་རང་ཉིད་བསྡམས་ལ། མ་བཟུང་བཏང་ན་བདེ་བར་འགྱུར་ཅེས་པ། མ་བཟུང་ཅེས་པ་ནི་ཕྱིའི་ཡུལ་ལ་བདེན་པར་མ་བཟུང་བ་ཡིན་ལ། བཏང་བ་ནི་དངོས་པོར་འཛིན་པ་དེ་བཏང་ནས་ཆོས་ཉིད་གཉུག་མར་གནས་ན་བདེ་བར་འགྱུར་ཞེས་པའོ། །ཏན་ཏ་པས་གསུངས་པ། མི་སྤངས་པ་དང་མི་ལྡན་པར། །ཤེས་པར་གྱུར་ན་གྲོང་མ་འཇུག །དགའ་བོས་ནོར་བུའི་འོད་བཞིན་དུ། །གྲོང་ཁྱེར་བདེ་བ་ཆེན་པོར་འགྱུར། །ཞེས་གསུངས་སོ། །དེ་ལ་མི་སྤོང་བ་ནི་ཕྱི་ནང་སྣོད་བཅུད་ལ་སོགས་པ་ཐམས་ཅད་མི་སྤོང་བའོ། །དེ་ཅི་སྟེ་མི་སྤོང་ན། སྣོད་བཅུད་དེའི་བྱེད་པ་པོའམ་བདག་ཉིད་དམ། སྤང་བར་བྱ་བའི་རྫས་དེ་མ་གྲུབ་པས་མི་སྤོང་ཞེས་པའོ། །འོ་ན་གོང་དུ་འཁྲུལ་པ་མི་སྤང་ངོ་བྱས་ན། ཤེས་པར་གྱུར་ན་འཁྲུལ་པའི་གྲོང་ཁྱེར་ལ་མི་འཇུག་པ་དེ་མི་འཐད་དོ་བྱས་པས། དེའང་ཡིན་ཏེ་འཁྲུལ་པ་རང་ཁ་མའི་གྲོགས་ལ་མི་འཇུག་པ་སྟེ། འཁྲུལ་པ་དེ་རང་ཆོས་ཉིད་ཀྱི་རང་བཞིན་བདེ་བ་ཆེན་པོའི་གྲོང་ཁྱེར་དུ་གྱུར་ཏེ། དགའ་བོས་ནོར་བུའི་འོད་བཞིན་དུ། །གྲོང་ཁྱེར་བདེ་བ་ཆེན་པོར་འགྱུར། །ཞེས་གསུངས་

XXX པ། དགའ་བོས་ནོར་བུའི་འོད་བཞིན་དུ་ཞེས་གསུངས་པ་དཔེ་ཡིན་ཏེ། དགའ་བོ་ཞེས་པ་ནི་ཀླུའི་རྒྱལ་པོ་ཡིན་ལ། ནོར་བུ་ནི་ནོར་བུ་རིན་པོ་ཆེ་ཡིན། དེའི་འོད་དེ་ཀླུའི་རྒྱལ་པོ་དེས་མཐོང་བ་ཡིན་ལ། གཞན་གྱིས་དེ་མཐོང་བ་མ་ཡིན་དཔེ་དེ་བཞིན་དུ་མི་སྤོང་མི་ལྡན་གཅིག་གི་དོན་ཤེས་པར་གྱུར་ན། རྟོག་པའི་གྲོང་ཁྱེར་རང་བདེ་བ་ཆེན་པོར་འགྱུར་ཞེས་པའོ། །དེ་ལྟར་སློབ་དཔོན་བི་ར་པས། གྲོང་ཁྱེར་བདེ་བའི་གདམས་ངག་བཤད་ནས། དེ་ནས་སློབ་དཔོན་ས་ར་ཧ་ཡིས་གནོད་སྦྱིན་མོ་ལ་གདམས་པ། གང་ཞིག་ཆོས་རྣམས་ཅི་སྨྲས་པ། །སྨྲ་བ་དེ་དག་དྲན་པ་སྟེ། །ཇི་ལྟར་མྱ་ངན་འདས་སྨྲ་བ། །དྲན་པའི་དབང་པོ་མ་ཡིན་ནམ། །ཞེས་གསུངས་པའོ། །འདིར་བྲམ་ཟེ་ཆེན་པོ་ས་ར་ཧ་ཉིད་ཀྱིས་དྲན་པ་གཅིག་པོའི་གདམས་ངག་གཅིག་བསྟན་པ་ཡིན་ཏེ། དེ་ལ་གང་ཞིག་ཆོས་རྣམས་ཅི་སྨྲས་པ་ཞེས་པ་ནི། གང་ཞིག་ནི་རྟེན་གྱི་གང་ཟག་གང་ཞིག །ཆོས་རྣམས་ཏེ་སྡེ་སྣོད་ཀྱི་ཆོས་ཐམས་ཅད༌། ཅི་སྨྲ་བ་ནི་དྲན་པ་གཅིག་པུ་ཡིན་སྐད། དེ་ཅི་སྟེ་སྨྲས་པ། འཁོར་བ་དང་མྱ་ངན་ལས་འདས་པ་དང༌། ཞི་གནས་དང་ལྷག་མཐོང་ངམ། མཉམ་བཞག་རྗེས་ཐོབ་བམ། སྣང་བ་དང་སྟོང་པའམ། དེ་ལ་སོགས་ཏེ་ཅི་སྨྲ་བ་དེ་དག་ཐམས་ཅད་དྲན་པ་ཡིན་ཏེ། ཇི་ལྟར་ན་མྱ་ངན་ལས་འདས་པ་ཞེས་སྨྲ་ཡང་དེ་ཚིག་ཡིན་ལ། ཚིག་དེ་ཐམས་ཅད་དྲན་པ་མིན་པ་མེད་པས་སྨྲས་པ་དེ་དག་དྲན་པ་སྟེ། ཇི་ལྟར་མྱ་ངན་འདས་སྨྲ་བ། །དྲན་པའི་དབང་པོ་མ་ཡིན་ནམ། །ཞེས་པའོ། །འོ་ན་ཇི་ལྟར་ཡིན་ན། ས་ཆུ་མེ་རླུང་གང་སྣང་བ། །སྟོང་པ་ཉིད་དུ་དུས་མཉམ་འགྱུར། །ཡེ་ཤེས་སྣང་བ་ལམ་མེ་བ། །དྲན་པ་གཅིག་པ་ཉིད་དུ་འགྱུར། །ཞེས་གསུངས་སོ། །དེ་ཇི་ལྟར་ཡིན་ན་

XXX ས་ཆུ་མེ་རླུང་གང་སྣང་བ་ཞེས་པ། འབྱུང་བ་དེ་དག་གིས་བསྐྱེད་པའི་ཕྱི་ནང་གི་དངོས་པོར་སྣང་བ་དེ་དྲན་པ་ཡིན་ཀྱང༌། སྣང་བའི་དུས་ཙམ་ན་སྟོང་པ་ལྷན་ཅིག་སྐྱེས་པ་དེ་དང་དུས་མཉམ་པར་ཡོད་པས་ན་དུས་མཉམ་པར་འགྱུར་ཞེས་པའོ། །དེ་ཡང་སྣང་བ་དེ་ཙམ་ན་སྟོང་པ་ཡང་བདེ་བས་དུས་མཉམ་ཞེས་པའོ། །དེས་ན་སྣང་བ་དེ་སྟོང་པ་ཉིད་ཀྱི་ཡེ་ཤེས་ཀྱི་སྣང་བ་ཡིན་པས་ན། ཡེ་ཤེས་སྣང་བ་ལམ་མེ་བ་ཞེས་པའོ། །དེ་ལྟར་དྲན་པའི་སྣང་བ་དེ་རང་རྒྱུད་ལ་མ་ཡིན་པར་ཡེ་ཤེས་ཀྱི་སྣང་བ་དང་གཉིས་སུ་མེད་པར་གཅིག་ཏུ་གྱུར་པས་ན། དྲན་པ་གཅིག་ཡིན་སྐད། ཤ་བ་རིས་གསུངས་པ། ཉི་ཟླ་གཉིས་སྦྱོར་མི་ཤེས་པ། །ཆུ་ཡི་རླབས་ལྟར་རྣམ་པ་མང༌། །དེ་ཉིད་གཅིག་ཏུ་གྱུར་པས་ན། །འདི་ལ་ཐ་དད་ནུས་པ་མེད། །ཅེས་གསུངས། ཉི་ཟླ་གཉིས་སྦྱོར་ཞེས་པ་ནི་ཉི་མ་སྣང་བ་ལ་བྱ་ལ། ཟླ་བ་སྟོང་པ་ལ་བྱ། ཡང་ན་ཉི་མ་ནི་ཐབས་ལ་བྱ་ལ། ཟླ་བ་ཤེས་རབ་ལ་བྱའོ། །གཉིས་སྦྱོར་ཞེས་པ་ནི་སྣང་སྟོང་ངམ། ཐབས་ཤེས་གཉིས་སུ་སྦྱོར་མ་ཤེས་ན་ཆུའི་རླབས་ལྟར་རྣམ་པ་མང་ཞེས་པ་ནི། ཆུ་རྒྱ་མཚོ་གཅིག་ལ་རླབས་དུ་མར་གྱུར་པ་བཞིན་དུ། དོན་གཉིས་མེད་གཅིག་ལ་རྟོག་ཚོགས་དྲན་པ་དུ་མར་འགྱུར་སྐད། འོ་ན་ཉི་ཟླའི་གཉིས་སྦྱོར་དེ་ཞེས་ན་བྱས་པ་ལ། དེ་ཉིད་གཅིག་ཏུ་གྱུར་པ་ན། །འདི་ལ་ཐ་དད་བཟུང་བ་མེད། །ཅེས་པ། དེ་ཉིད་ཅེས་པ་ནི་གཉིས་སྣང་གི་རྟོག་པ་གོང་དུ་བཤད་པ་དེ་ཉིད་དོ། །གཅིག་དུ་གྱུར་པ་ན་ཞེས་པ་ནི། གཉུག་མ་དེ་ཉིད་ལ་དྲན་པ་རང་རྒྱུད་པ་མེད་དེ། དྲན་པའི་ངོ་བོ་གཉུག་མ་དང་གཅིག་པར་གྱུར་པ་ན། འདི་ལ་ཐ་དད་འབྱུང་བ་མེད་ཅེས་གསུངས་ཏེ། འདི་

XXX ལ་ཞེས་པ་གང་ཡིན། ཆོས་ཉིད་གཉུག་མ་དེ་ཉིད་ལ་དྲན་པ་རང་རྒྱུད་པ་འབྱུང་བ་མེད་གཉུག་མ་ཆོས་ཉིད་ཀྱི་ངང་དུ་དྲན་པ་གཅིག་ཅེས་པའོ། །ཙོ་རང་གི་ཡིས་གསུངས་པ། འདི་ལ་ཉེས་པ་རྡུལ་ཙམ་མེད། །སྦྱོར་བས་བྱུང་བ་མ་ཡིན་ནོ། །ཞེས་གསུངས་སོ། །འདི་ལ་ཉེས་པ་རྡུལ་ཙམ་མེད་པ། གང་ལ་མེད་ན་ཆོས་ཉིད་གཉུག་མ་འདི་ལ་མེད་ཅེས་པའོ། །གང་གིས་ཉེས་པ་མེད་ན་གོང་དུ་བཤད་པའི་དྲན་པ་རང་རྒྱུད་པའི་ཉེས་པ་རྡུལ་ཙམ་ཡང་མེད་ཅེས་པའོ། །དེ་ཅིས་མེད་ན། སྦྱོར་བས་བྱུང་བ་མ་ཡིན་ནོ། །ཞེས་པ་སྦྱོར་བ་ནི། ཐབས་དང་ཐབས་བྱུང་གི་རྟེན་ཅིང་འབྲེལ་བར་འབྱུང་བ་མ་ཡིན་ཆོས་ཉིད་རང་ལུགས་ཀྱི་ཡོན་ཏན་ནམ་སྣང་བ་ཙམ་ཡིན་ཞེས་པའི་དོན་ཏོ། །བི་ན་ས་ཡིས་གསུངས་པ། མི་རྟོག་པ་ཡི་རྒྱ་མཚོ་ལ། །རྟོག་པའི་རི་བོ་རྣམ་པར་ནུབ། །འཛིན་པའི་སྣང་བ་ཆོས་ཉིད་ལ། །བཟུང་བའི་རྟོག་པ་ག་ལ་ཡོད། །ཞེས་གསུངས་སོ། །མི་རྟོག་པ་ཞེས་པ་ནི། ཆོས་ཉིད་དྲན་པ་ཙམ་བྲལ་དཀའ་ལ་རྒྱ་མཚོ་ཆེན་པོ་ལྟ་བུ་དེ་རུ། རྟོག་པའི་ཞེས་པ་དྲན་པ་རང་རྒྱུད་པའི་རྟོག་པ་རི་བོ་དང་འདྲ་བ་དེ་སྒྲོན་མར་བྱས་ནས། རྣམ་རྟོག་ཆོས་ཉིད་དུ་ནུབ་པས་ནུབ་ཅེས་པའོ། །ནུབ་པའི་རྒྱུ་མཚན་ཅི་ཡིན་ན། འཛིན་པའི་སྣང་བ་ཆོས་ཉིད་ལ་ཞེས་པ་སྟེ། འཛིན་པའི་སྣང་བ་དེ་ཆོས་ཉིད་དུ་ཤེས་ཙམ་ན། དངོས་པོར་བཟུང་བའི་རྟོག་པ་མེད་པས་ན་གཟུང་བའི་རྟོག་པ་ག་ལ་ཡོད། ཅེས་དེ་ལྟར་ས་ར་ཧས། དྲན་པ་གཅིག་པའི་གདམས་ངག་བསྟན་ནས། དེ་ནས་སློབ་དཔོན་མཱི་ན་པས། འབྱུང་བ་ཟས་ཟ་གོས་གྱོན་གྱི་གདམས་ངག་ཅིག་བསྟན་ཏེ། བུམ་པའི་ལུས་ལ་འབྱུང་བའི་འོད། །སྟེང་དུ་ལྷ་ཡི་བདུད་རྩིར་ཞུ། །ཆོས་ཉིད་འོད་ཀྱི་གོང་

XXX བུ་ལ། །ཚོགས་དྲུག་རྟོག་པ་རྣམ་པར་ཟད། །ཅེས་གསུངས་སོ། །བུམ་པའི་ལུས་ལ་འབྱུང་བའི་འོད། །ཅེས་པ་ནི། དང་པོ་བསྐྱེད་རིམ་གྱི་དབང་དུ་བྱས་པ་ཡིན་ཏེ། དང་པོ་ལུས་ཀྱི་གཞལ་ཡས་ཁང་བུམ་པ་ལྟ་བུ་གཅིག་ཏུ་གྱུར་པར་བསྒོམ། དེའི་ནང་དུ་འབྱུང་བའི་འོད་ནི་ཡཾ་ལས་མེའི་རླུང་ཉི་མའི་དཀྱིལ་འཁོར་ལྟ་བུ་ཁ་དོག་དམར་པོ་རྒྱང་གྲགས་ཕྱེད་དང་གཅིག་བསྒོམ། དེ་རླུང་རྩུབ་པའི་དྲག་ཤུལ་ལས་རྃ་དམར་པོ་སྤྲོས་བསྡུས་པ་ལས་མེའི་ཁ་དོག་དམར་པོ་རླུང་དང་མཉམ་པར་བསྒོམ། དེའི་རླངས་པ་དང་ཟིལ་པ་ལས་མེའི་ཆུ་ཁ་དོག་དམར་པོ་འོད་ཀྱི་ཚུལ་དུ་བསྒོམ། དེའི་སྤྲིས་མ་ལས་སུ་སེར་པོ་སྤྲོས་བསྡུས་པ་ལས། མེའི་ས་གོང་དང་མཉམ་པར་བསྒོམ། དེའི་སྟེང་དུ་ལྷའི་བདུད་རྩི་ཞུ་ཅེས་པ་ནི། འབྱུང་བའི་འོད་ཀྱི་གཞལ་ཡས་ཁང་དེའི་སྟེང་དུ། སེམས་ཉིད་ཀྱི་དྭངས་མ་ནི་ལྷའི་ངོ་བོ་ཅན་ཧཱུྃ་དཀར་པོ་གཅིག་སྤྲོས་བསྡུས་པ་ལས་བདུད་རྩིར་ཞུ་ནས། རིམ་གྱིས་བྱུང་བ་དེ་དག་ལ་ཐིམ་པས། འབྱུང་བ་དེ་དག་ཕྱི་སྣོད་ཀྱི་ལུས་ཀྱི་བུམ་པ་གཅིག་ཏུ་གྱུར་ནས། སེམས་ཉིད་ལྷའི་ངོ་བོ་ས་མེ་རླུང་གི་རང་བཞིན་ཅན་དེ་ཆོས་ཉིད་ཀྱི་རང་བཞིན་ནམ། རྣམ་འཁྲུལ་ཧཱུྃ་དུ་སྤྲུལ་ནས། འོད་དུ་ཞུ་ནས། འོད་ཀྱི་བུམ་པའི་ནང་དུ་ཆོས་ཉིད་ཀྱི་གོང་བུར་ཡོད་པ་ལ། རང་གསལ་ཉི་མའི་སྙིང་པོ་ལྟ་བུ་སེམས་གཏད་པས། ཚོགས་དྲུག་གི་རྣམ་པར་རྟོག་པ་རྣམས་ཟད་པའམ་འགགས་ནས། ཚོགས་དྲུག་ཁ་ནང་དུ་བལྟས་པ་འོད་གསལ་བུམ་པའི་ནང་གི་མར་མེ་ལྟ་བུའི་རྟོགས་པ་སྐྱེས་ནས། ཏིང་ངེ་འཛིན་དེའི་དྲོད་རྟགས་ཀྱིས་ཕྱིའི་འབྱུང་བ་ནི་ལུས་ཀྱི་དྲོད་དུ་གྱུར་པས་གོས་སུ་གྱོན་ལ། ནང་རིག་པའི་འབྱུང་བ་ནི་ཏིང་ངེ་འཛིན་ཟས་

XXX སུ་ཟ་བ་ཡིན་སྐད། དེ་ལྟར་འབྱུང་བ་གོས་སུ་གྱོན་པ་དང༌། བྱང་སེམས་ཟས་སུ་ཟ་བའི་ཏིང་ངེ་འཛིན་གནོད་སྦྱིན་མོ་ལ་རྒྱུད་ལ་སྐྱེ་མ་ནུས་པས། དེ་རྒྱུད་ལ་བརྟེན་ནས་མངོན་དུ་འགྱུར་པ་འཕགས་པ་ཀླུ་སྒྲུབ་ཀྱིས་གསུངས་པ། རིགས་དྲུག་རྟོག་པ་སྣ་ཚོགས་པ། །ལོག་སྲེད་བརྟས་པའི་མཐུ་ལས་བྱུང༌། །དེ་བཟློག་རིག་པའི་མཐུ་ལས་ནི། །སངས་རྒྱས་ཡིན་ཕྱིར་གང་འདོད་འབྱུང༌། །ཞེས་གསུངས་སོ། །རིགས་དྲུག་རྟོག་པ་སྣ་ཚོགས་པ་ཞེས་པ་ནི། རིགས་དྲུག་ནི་ཁམས་གསུམ་གྱི་སེམས་ཅན་ཡིན་པ་ལ། དེའི་རྟོག་པ་སྣ་ཚོགས་ནི་ལུས་ཀྱི་རྣམ་པ་མི་སྲིད་པ་མེད་པས། དེ་སྲིད་དུ་རྟོག་པ་ལ་སྣ་ཚོགས་སུ་སྲིད་པ་དེ་ཅི་ལས་བྱུང་ན། ལོག་སྲེད་བརྟས་པའི་མཐུ་ལས་བྱུང་ཞེས་པ། ལོག་སྲེད་ཅེས་པ་ནི་ཡང་དག་པའི་ལམ་ལས་ཕྱིན་ཅི་ལོག་གི་སྲེད་པ་དང་བཅས་པ། དེའི་མངོན་པར་ཞེན་པའི་མཐུ་བརྟས་པ་ལས་བྱུང་སྟེ། དེ་ཡང་རྟོག་པའི་རྒྱུ་སོ་སོ་བ་རེ་རེ་ཡོད་པ་མ་ཡིན། ལོག་སྲེད་ཀྱི་རྟོག་པ་ཞེས་པ་ཡང་བག་ཆགས་གཅིག་ལ་གཅིག་ཉིད་མཚམས་སྦྱར་བས། དེ་བཟློག་རིག་པའི་མཐུ་ལས་ནི། །སངས་རྒྱས་ཡིན་ཕྱིར་གང་འདོད་འབྱུང༌། །ཞེས་སོ། །དེ་བཟློག་ཅེས་པ་གང་བཟློག་ན། རིགས་དྲུག་གི་རྟོག་པ་ལོག་སྲེད་ལས་བྱུང་བ་དེ་བཟློག་པའོ། །གང་དུ་བཟློག་ན་ཡང་དག་པའི་དོན་གྱི་ཐོག་ཏུ་བཟློག་པས། དེའི་རིག་པའི་མཐའ་ལས་བདེ་བ་ཆེན་པོའི་ཡོན་ཏན་འབྱུང་སྐད། ཅིའི་ཕྱིར་འབྱུང་ན། སངས་རྒྱས་ཡིན་ཕྱིར་གང་འདོད་འབྱུང༌། །ཞེས་པ་སྟེ། གང་སངས་རྒྱས་ཡིན་ལ་སེམས་ཡིན་པའི་ཕྱིར་གང་འདོད་པའམ། གང་བསམ་པ་ལྟར་འབྱུང་ཞེས་པའོ། །དེ་ནས་

XXX གནོད་སྦྱིན་མོ་ཁྱོད་ཀྱང་ལོག་སྲེད་ཀྱི་རྟོག་པས་ལུས་དང༌། དེའི་ན་ཚ་ལ་སོགས་པ་མངོན་དུ་གྲུབ་ནས་འདུག་པ། དེས་ན་སེམས་ཉིད་འོད་ཀྱི་གོང་དུ་ཉི་མའི་སྙིང་པོ་ལྟ་བུར་མཐུ་བརྟས་ན། སྡུག་བསྔལ་བདེ་བར་འཆར་བ་ལ་ཐེ་ཚོམ་མེད་དོ་ཞེས་གདམས་སོ། །དེ་ནས་སློབ་དཔོན་ཤཱནྟི་པས་གདམས་པ་ནི། ཏོ་ལ་སྐྱེས་ཀྱི་ཤེས་པ་རྗེས་ཤེས་ཀྱིས་བཟློག་པར་བྱེད་པ། ཕྱི་ནང་གི་ལྟ་བ་དྲུག་ཅེས་པ་བསྟན་ཏེ། ཡུལ་གྱི་རྐྱེན་སྣང་འགག་པ་མེད། །ཆུ་ལ་ཆུ་བུར་ཇི་ལྟ་བུར། །རྗེས་ཀྱི་གཉེན་པོར་ལྡོག་པ་སྟེ། །ཆུ་ཡི་དབྱུག་པ་དེ་ལྟ་བུ། །ཞེས་པའོ། །ཡུལ་གྱི་རྐྱེན་སྣང་འགག་པ་མེད། །ཅེས་པ་ཡུལ་ནི་མིག་གི་ཡུལ་གཟུགས་ལ་སོགས་པ། རྣ་བ་དང་སྣ་དང་ལུས་དང་ཡིད་ལ་སོགས་པའི་རྐྱེན་གྱིས་སྣང་བའི་ཡུལ་འགག་པ་མེད་དེ། ཡུལ་ལ་བརྟེན་ནས་ཏོལ་སྐྱེ་བ་ཡིན་ཏེ། ཆུ་ལ་ཆུ་བུར་ཇི་ལྟ་བུར་ཞེས་པ། དཔེར་ན་ཆུ་ལས་ཆུ་བུར་ཏོལ་སྐྱེས་སུ་སྐྱེ་བ་མི་ཁེགས་པ་དང་འདྲ་བར། ཡུལ་གྱི་རྐྱེན་གྱིས་བྱས་པའི་སྣང་བ་མི་ཁེགས་པ་ནི། ཏོལ་སྐྱེས་ཀྱིས་ཤེས་པ་རྟ་པ་མདུང་ཐོགས་ཀྱིས་མེ་ཁེགས་པས་ན། དེ་ཕྱི་རོལ་གྱི་ཡུལ་དྲུག་གི་ལྟ་བ་ཡིན། ཡུལ་དྲུག་གི་ལྟ་བ་ཡིན་ན། དེ་ནི་ལོག་པའི་ཤེས་པ་ཡིན་པས་ལྟ་བ་ལོག་པར་མི་འགྲོའམ་བྱས་པ་ལ། དེ་མི་འགྲོ་སྟེ། ཡུལ་དྲུག་རང་རྒྱུད་པར་འཛིན་པ་ནི་ལོག་པར་ལྟ་བའི་ཕྱིར་དེ་ལས་བཟློག་ནས་རྗེས་ཀྱི་ཤེས་པས་ཏོལ་སྐྱེས་ཆོས་ཉིད་དུ་ཤེས་པ་ལ་ལྟ་བ་དུག་ཅེས་བྱའོ། །དེ་ཅིས་ཤེས་ན། རྗེས་ཀྱི་གཉེན་པོར་ལྡོག་པ་སྟེ། ཆུ་ཡི་དབྱུག་པ་དེ་ལྟ་བུ་ཞེས་པ་ནི། རྗེས་ཀྱི་གཉེན་པོ་རང་གང་ཡིན་ན། དེ་ནི་ཏོལ་སྐྱེས་ཀྱི་ཤེས་པ་རྟ་པ་

XXX མདུང་ཐོགས་ཀྱིས་མི་བཟློག་ཀྱང༌། ཚོར་བ་རྗེས་གཅོད་ཀྱི་ཤེས་པ་ཆུ་ལ་དབྱུག་པ་བརྒྱབ་པ་གཅིག་གིས་བཟློག་ནས། གཉེན་པོ་ཡེ་ཤེས་སུ་གནས་གྱུར་ཙམ་ན། ནང་གི་ལྟ་བ་དྲུག་ཅེས་བྱ་བ་ཡིན་ཏེ། དང་པོ་ཏོལ་སྐྱེས་དེ་རང་སྐད་ཅིག་མ་དང་པོ་སྤང་བྱ་ཉོན་མོངས་པ་རང་ཡིན། རྗེས་ཀྱི་ཤེས་པ་ལ་ཆུ་ལ་རལ་གྲི་བརྒྱབ་པ་ལྟ་བུ་དེ་སྤོང་བྱེད་གཉེན་པོ་སྟེ་ཡེ་ཤེས་ཡིན། དེས་སྤང་བྱ་སྤོང་བྱེད་གཉིས་མེད་དུ་རྟོགས་ཙམ་ན་ཡེ་ཤེས་འབའ་ཞིག་རང་ཡིན་པ་ལ། དེ་ལ་ནང་གི་ལྟ་བ་དྲུག་ཅེས་པ་ཡིན་པས། ཁྱོད་དེ་ལྟར་དུ་རྟོགས་པར་གྱིས་ཤིག་ཅེས་གདམས་པའོ། །དེ་ནས་མཁའ་འགྲོ་གཉིས་པོས་གྲུབ་ཐོབ་རྣམས་ལ་ཞུས་པའི་ལྷའི་དངོས་གྲུབ་རྣམ་པ་ལྔ་བསྒྲུབ་ཏུ་བཅུག་སྟེ། སློབ་དཔོན་ཁ་གརྦྷའི་འཕགས་པ་མི་གཡོ་བའི་སྒྲུབ་ཐབས་བསྡུས་པ་དང༌། ཀ་ན་རི་པས་ཕ་རོལ་ཕྱིན་མའི་སྒྲུབ་ཐབས་དང་གཉིས། ཌོམ་བྷི་པའི་བདེ་མཆོག་དགྱེས་རྡོར་གཉིས་མེད་ཀྱི་སྙིང་པོ་ཉ་སྙིང་གི་སྒྲུབ་ཐབས་དང་གསུམ། ཙ་ལོ་ཀའི་ཚེ་དཔག་མེད་དང་བཞི། ནཱ་རོ་པའི་ཡི་གེ་བརྒྱ་པའི་བཤགས་སྒྲུབ་དང་ལྔའི་གདམས་ངག་ཕོག་ནས་བསྒྲུབ་པ་བྱེད་དུ་བཅུག་པས། གནོད་སྦྱིན་མོས་དངོས་གྲུབ་མྱུར་བ་མོས་པའི་ཤུགས་ཀྱིས། ཡུལ་དང་ཡུལ་ཅན་རང་རྒྱུད་པར་བསྒྲུབ་པས་རྟགས་དང་མཚན་མ་ནི་རྨི་ལམ་གྱི་ཆ་ཙམ་གཅིག་ཀྱང་བྱུང་བར་མ་གྱུར་ནས། གནོད་སྦྱིན་མོས་ངག་ཏུ་བརྗོད་པ་ལྷ་དང་ལྷ་མོ་བྱ་བ་དེ་མེད་པར་གདའ། དངོས་གྲུབ་བྱ་བ་གཅིག་ཀྱང་མེད། །མེད་པའི་ལྷ་བསྒོམ་པ་དང༌། སྙིང་པོ་བགྲང་བ་དེ་ཤིན་ཏུ་ཚིག་པ་ཟ་བར་བྱུང་ཟེར་ནས། མཁའ་འགྲོ་མ་གཉིས་པོ་སྨྲས་པ། གོང་མ་ཀུན་ལ་དངོས་གྲུབ་བྱུང་

XXX ནས་ཁྱེད་ལ་མ་བྱུང་བ་དེ་རང་རྒྱུད་མ་འབྱོངས་པས་ཉེས་པ་ཡིན་ཞེས་སྨྲས་པ། རང་རྒྱུད་ཟེར་བ་དེའང་ད་རུང་མ་གོ་ཟེར། རང་རྒྱུད་ཀྱི་གོ་བ་བསྟན་པ། གཞོན་ནུ་མཛེས་པའི་ས་བོན་ཅན། །འགྲོ་བ་ཀུན་ལ་ཁྱབ་པར་གནས། །དབང་པོ་རབ་སྣང་འཛིན་པར་འགྱུར། །ཡེ་ཤེས་གཅིག་གིས་སྣང་བ་འཛིན། །ནམ་མཁའ་སྤྲིན་གྱི་གཟུགས་བྱེད་ཡིན། །མེ་ལོང་ལས་ནི་གཟུགས་བརྙན་སྣང༌། །རང་གིས་བརྟགས་ན་དེ་ལྟ་བུ། མུན་པས་སྣང་བའི་དོན་བྱེད་མིན། །དེ་ཡང་གསང་བའི་སྟབས་ཀྱིས་སྤྱད། །ཅེས་གདམས་སོ། །འདི་ལ་དོན་གཉིས་ཀྱིས་བསྟན་ཏེ། དང་པོ་བསྐྱེད་རིམ་ལྷའི་མན་ངག་གི་གཟེར་བུ་ཆུང་བསྟན་པ་དང་གཅིག །བརྡའ་དོན་ཐབས་ཀྱི་མན་ངག་དང་གཉིས་ཀྱིས་སྟོན་པ་ལ། དང་པོ་ནི་གཞོན་ནུ་མཛེས་པའི་ཆ་བྱད་ཅན། །འགྲོ་བ་ཀུན་ལ་ཁྱབ་པར་གནས། །དབང་པོ་རབ་སྣང་འཛིན་པར་འགྱུར། །ཡེ་ཤེས་གཅིག་གི་སྣང་བ་ཡིན། །ཞེས་པས་སྟོན་ཏེ། དེ་ལ་གཞོན་ནུ་མཛེས་པའི་ཞེས་པ་ནི། བསྐྱེད་རིམ་གྱི་ལྷ་དེ་ཡང་འདྲ་བ་གཅིག་ཡིན་བྱས་པས། གཞོན་ནུ་མཛེས་པའི་ཆ་བྱད་དམར་བཞིན་ཅན་ཡིན་ཏེ། དེ་ལ་འབྱུང་བའི་ལུས་མེད་པས་སྐྱེ་རྒས་དང་ལང་ཚོའི་དྲི་མ་མེད་དེ་གཞོན་ནུ་ཡིན། ཀུན་བརྟགས་ཀྱིས་མི་མཛེས་པ་མེད་པས་ན་མཛེས་པ་ཞེས་པའོ། །ས་བོན་ཅན་ཞེས་པ་ནི་གང་གི་གཞོན་ནུ་མཛེས་པ་དང་འདྲ་བ་གཅིག་སྐྱེད་པར་བྱེད་པའི་ས་བོན་དེ་གང་ཡིན་ན་བྱས་པས། འགྲོ་བ་ཀུན་ལ་ཁྱབ་པར་གནས། །ཞེས་པ། འགྲོ་བ་རིགས་དྲུག་ཀུན་ལ་སྟེ་མ་ལུས་པར་ཁྱབ་པར་གནས་པ་སྟེ། རིགས་ལ་བཟང་ངན་དང་

XXX གནས་ལ་མཐོ་དམན་མེད་པར་ལྷ་བསྐྱེད་པར་བྱེད་པའི་ས་བོན། བདེ་གཤེགས་སྙིང་པོས་འགྲོ་ཀུན་ཁྱབ་པར་གནས། །ཞེས་པའི་དོན་ཏོ། །དེས་ན་ལྟ་བ་འཛིན་པར་བྱེད་པ་ལ་ས་བོན་སེམས་ཉིད་སྣང་བ་ལས། དེ་མ་ཡིན་པའི་ལོག་པ་གཅིག་མེད་དེ། །དབང་པོ་རབ་སྣང་འཛིན་པར་འགྱུར། །ཞེས་པ། སེམས་ཉིད་ཀྱི་དབང་པོ་ཡིས། །བག་ཆགས་ཀྱི་རབ་ལྷའི་སྣང་བ་འཛིན་པར་འགྱུར་ཞེས་པའོ། །འོ་ན་བག་ཆགས་ཀྱི་རབ་ལྷའི་སྣང་བ་དེ་ཡིན་ནམ། དབང་པོའི་རབ་ཡིན་ན། དབང་པོ་ཡང་རབ་དེ་མཚན་མ་བསྒོམ་པ་ལ་ཟེར་རམ་བྱས་པས། དེ་མ་ཡིན་ཏེ། ལྷའི་གཟུགས་སྣ་ཚོགས་པ་དེ་རང་རྒྱུད་པ་མ་ཡིན་པར་སེམས་ཉིད་ཀྱི་རྣལ་འཕྲུལ་ལམ། རི་མོར་ཤེས་པ་དེ་ལ་དབང་པོ་རབ་སྣང་འཛིན་ཅེས་པའོ། །དེ་ཅི་སྟེ་བྱས་པས་ཡེ་ཤེས་གཅིག་གི་སྣང་བ་ཡིན་ཞེས་པ་སྟེ། ལྷ་རང་རྒྱུད་པ་ནི་མེད། ལྷ་སེམས་ཀྱི་རི་མོ་ལོངས་སྐུའི་བདག་ཉིད་ཅན་ཡིན་ལ། སེམས་ཉིད་མ་བཅོས་པ་ཆོས་སྐུ་ཡིན་ལ། དེ་ཉིད་ཅིར་སྣང་བ་མ་གྲུབ་ལ་ཅིར་ཡང་མ་འགགས་པས། སྐུ་གཉིས་ལ་ཁྱབ་སྟེ། དེས་ན་ཡེ་ཤེས་གཅིག་གི་སྣང་བ་ཡིན་ཞེས་པའོ། །དེ་ལྟར་ཤེས་ན་བསྐྱེད་རིམ་ལྷའི་མན་ངག་ཁོང་དུ་ཆུད་པ་ཡིན། །འོ་ན་དེ་ལ་བརྡ་དོན་ཐབས་ཀྱི་མན་ངག་གིས། བརྡ་གང་འདྲ་བ་གཅིག་གིས་བསྟན་ལ་དོན་ཅི་འདྲ་བ་གཅིག་མཚོན་བྱས་པས། ནམ་མཁའ་སྤྲིན་གྱི་གཟུགས་བྱད་འཛིན། །མེ་ལོང་ལ་ནི་གཟུགས་བརྙན་སྣང༌། །རང་གིས་བརྟགས་ན་དེ་ལྟ་བུར། །མུན་པས་སྣང་བའི་དོན་བྱེད་མིན། །དེ་ཡང་གསང་བའི་སྟོབས་ཀྱིས་སྤྱད། །ཅེས་པས་སྟོན་ཏེ།

XXX ནམ་མཁའ་སྤྲིན་གྱིས་གཟུགས་བྱད་འཛིན། །ཞེས་པ་ནི་དང་པོ་ནམ་མཁའི་བརྡ་ཡིས་བསྟན། དེ་ནས་སྤྲིན་གྱི་བརྡ་ཡིས་བསྟན། དེ་བཞིན་གཟུགས་བྱད་སྣང་བ་མེ་ལོང་གི་དཔེ་ཡང༌། གཟུགས་ཐ་དད་དུ་རང་རེ་ཡིས་གར་བལྟས་སུ་བརྡའི་དོན་ཤེས་པར་བྱའོ། །མུན་པས་སྣང་བའི་དོན་བྱེད་མིན། །ཞེས་པ་ནི་ནམ་མཁའ་དང་མེ་ལོང་ལ་སོགས་པའི་དཔེ་ཡིས་ཆོས་སྐུ་ལ་གསལ་བའི་དཔེ་བསྟན་ལ། ཆོས་སྐུ་དེས་སྐུ་གཉིས་པའི་རྟེན་དུ་འགྱུར་བའོ། །མུན་པའི་སྣང་བ་ནི་གཏི་མུག་དེ་ལ་མུན་པ་ཟེར་ལ། གཏི་མུག་དེས་སྐུ་གཉིས་པོ་སྣང་བའི་དོན་མི་བྱེད་པས་ན་དོན་བྱེད་མིན་ཅེས་པའོ། །དེ་ཉམས་སུ་ལེན་པའི་གང་ཟག་དམ་ཚིག་ཇི་ལྟ་བུ་གཅིག་གིས་ཉམས་སུ་བླང་བྱས་པས། དེ་ཡང་གསང་བའི་སྟོབས་ཀྱི་སྤྱད། །ཅེས་པ་སྟེ། གསང་བ་གང་ཡིན་ན། གསང་བའི་དོན་ནི་བཅུ་ཐམ་པ་སྟེ། རྟོག་པ་དང་པོའི་རྒྱུད་ལས། ཐོག་མར་བླ་མའི་མཛད་སྤྱོད་གསང༌། །དངོས་གྲུབ་སྟེར་བའི་འདོད་ལྷ་གསང༌། །བྱིན་རླབས་ཞུགས་པའི་དུས་ཚོད་གསང། །བླ་མས་བཏགས་པའི་གསང་མཚན་གསང༌། །གྲོལ་བྱེད་ལྷན་སྐྱེས་ཀྱི་ལྟ་བ་གསང༌། །ཉམས་ལས་བྱུང་བའི་དྲོད་རྟགས་གསང༌། །མཁའ་འགྲོས་ལུང་བསྟན་གྱི་མཚན་མ་གསང༌། །རྟོག་མེད་སྤྱོད་པ་ཤུགས་འབྱུང་གསང༌། །བདུད་རྩི་ལྔ་ཡི་དམ་ཚིག་གསང༌། །སྒྲིབ་པ་ཟད་པའི་དངོས་གྲུབ་གསང༌། །ཅེས་པའོ། །གསང་བ་བཅུའི་སྟོབས་ཀྱིས་མཐར་ཕྱིན་པའི་ལམ་མ་རྙེད་ཀྱི་བར་དུ་སྤྱད་ན་དངོས་གྲུབ་རྙེད་ཅེས་པའི་དོན་ཏོ། །དེ་ལྟར་བསྐྱེད་རིམ་ལྷའི་གཟེར་བུ་ཆུང་བསྟན་ནས། ད་ནི་རྩ་རླུང་གནད་ཀྱི་གདམས་

XXX ངག་གཟེར་བུ་ཆུང་བསྟན་པ་ནི། གནོད་སྦྱིན་མོའི་རྒྱུད་ལ། མཁའ་འགྲོ་མ་གཉིས་པོས་གྲུབ་ཐོབ་རྣམས་ཀྱི་རྩ་རླུང་གདམས་ངག་མང་དུ་བཤད་པས། མོ་ཡིས་སྦྱོར་བ་བྱས་པ་ཙམ་གྱིས་ཟུག་རྔུ་ལངས་ནས། བདེ་བ་སྐྱེ་བར་མ་གྱུར་པར་མཐར་སྐྱོ་བར་གྱུར་ནས། དེ་ལ་བླ་མ་ཏེ་ལོ་པས་གདམས་པ་གསུངས་པ། ཡེ་ཤེས་གསལ་བའི་ཕྱག་རྒྱ་ནི། །ཕྱོགས་གཅིག་ལུས་ཀྱི་གནས་ལ་བཅས། །སྒྱུ་མའི་འཁྲུལ་འཁོར་དེ་ལས་ནི། །དབང་པོའི་ནུས་པ་བརྟས་པར་བྱེད། །ཅེས་གསུངས་སོ། །ཡེ་ཤེས་གསལ་བའི་ཕྱག་རྒྱ་ཅེས་པ་ནི། དོན་གཉུག་མ་འོད་གསལ་གྱི་ཡེ་ཤེས་དེ་གསལ་བྱེད་པ་ལ། གསང་སྔགས་པའི་ལུགས་གཞི་བསྒྱུར་ལམ་པ་རྣམས་རྟོག་ཚོགས་ལྷ་དང་ལྷ་མོའི་རང་བཞིན་དུ་གནས་བསྒྱུར་ནས། དོན་ཡེ་ཤེས་རྣམ་པ་ལྔར་གསལ་འདེབས་སྟེ། ཕྱོགས་གཅིག་དེ་ལྟར་དུ་མ་མཚོན་ནོ། །ཆགས་ལམ་པ་རྣམས་དེ་དང་མི་འདྲ་བར་ལུས་ཀྱི་ཕྱག་རྒྱའི་གནད་ལ་བརྟེན་ནས་རྩ་དང་རླུང་གི་མངོན་པར་རྟོག་པ་གཅིག་གིས་གཏན་ལ་འབེབས། གྲོལ་ལམ་པ་ཡེ་ཤེས་སྒྱུ་མ་ཙམ་དུ་གཏན་ལ་འབེབས། གྲོལ་ལམ་ཆེན་པོ་པ་ཡེ་ཤེས་རང་ཡང་མེད་ལ་ཡེ་ཤེས་ཀྱང་མེད་སྟེ། ཉོན་མོངས་པ་དང་རྣམ་པར་རྟོག་པ་རང་ཡང་མེད་ལ་ཡེ་ཤེས་ཀྱང་མེད། དཔེར་ན་ནམ་མཁའི་མེ་ཏོག་བཞིན་ནོ་ཞེས་གཏན་ལ་འབེབས་པའོ། །དེས་ན་ཡེ་ཤེས་གསལ་བའི་ཕྱག་རྒྱ་ནི་གང་ལ་བརྟེན་ལ་འབེབས་ན། ཕྱོགས་གཅིག་ལུས་ཀྱི་གནད་ལ་བཅས་ཅེས་པ་ནི་དེ་ལ་བརྟེན་ནས་གཏན་ལ་འབེབས་པའོ། །འོ་ན་ལུས་ཀྱི་གནད་གང་ཡིན་བྱས་པ་ལ། ཐིག་ལེ་ནི་ཙཎྜ་ལཱི་དེ་ལུས་ཀྱི་གནད་ཡིན་ལ། གནད་དེ་ལ་བརྟེན་ནས་ཡེ་

XXX ཤེས་དེའི་དོན་གསལ་བར་བྱེད་པ་ཡིན། འོ་ན་དེའི་དཔེ་ཅི་འདྲ་བྱས་པས། སྒྱུ་མའི་འཁྲུལ་འཁོར་དེ་ལས་ནི། །དབང་པོའི་ནུས་པ་བརྟས་པར་བྱེད། །ཅེས་པ་ཡིན་ཏེ། དཔེར་ན་སྒྱུ་མ་མཁན་གྱིས་འཁྲུལ་འཁོར་ལེགས་པར་བཅས་པས། དེ་ལ་དེ་ནས་སྤྲུལ་པའི་རྣམ་པ་དུ་མ་བྱུང་བ་དེ་ཡིན་ལ་སྒྱུ་མ་ཡིན་ཀྱང་མིག་གི་དབང་པོའི་ནུས་པ་བརྟས་པར་བྱེད་པ་དེ་བཞིན་དུ། ལུས་ཀྱི་གནད་ཀྱི་འཁྲུལ་འཁོར་ལ་བརྟེན་ནས་ཡེ་ཤེས་དེ་གསལ་བར་བྱེད་པ་ཡིན། ཅེས་པའི་དོན་ཏོ། །རྩ་རླུང་གི་གནད་ཀྱི་གདམས་པ་དེ་ཡིན་ལ་པ། དེ་ལ་བརྡ་དོན་ཐབས་ཀྱི་གདམས་ངག་ཅི་འདྲ་བ་སྟོན་བྱས་པས། བླ་མས་གསུངས་པ། ན་རི་ཀེ་ལའི་ཤིང་བཞིན་དུ། །ཤ་དང་རུས་པ་རྐང་མར་རྣམས། །སྐྱེད་པར་བྱེད་པ་གང་ཡིན་པ། །དེ་བཞིན་རྩ་དང་རླུང་རྣམས་སོ། །ཅེས་པས་བསྟན་ཏེ། དང་པོ་བརྡ་ཇི་ལྟར་སྟོན་བྱས་པ་ལ། ཁྱོད་ཀྱིས་ན་རི་ཀེ་ལའི་ཕྱིའི་ཤ་དང་བར་གྱི་རུས་པ་དང་ནང་གི་རྐང་མར་གསུམ་པོ་དེ་ཇི་ལྟར་དུ་བསྐྱེད་ཆ་ཡོད་དམ་བྱས་པ་ལ། ཡོད་ན་ཡང་བརྡའམ་དཔེ་རུ་འདོད། མེད་ན་ཡང་བརྡའམ་དཔེ་རུ་འདོད་སྟེ། དེ་བཤད་ན་ཤ་བསྐྱེད་པར་བྱེད་པ་ནི་རྩའི་ཡན་ལག་རྒྱས་པ་དེ་ལས་བསྐྱེད། བར་གྱི་རུས་པ་བསྐྱེད་པ་ནི་སྡོང་པོ་ཡིན་ལ། ནང་གི་རྐང་མར་བསྐྱེད་པ་ནི་དེ་དག་གི་བཅུད་ལས་བྱུང་བའོ། །དེ་བཞིན་དུ་རྩ་དང་རླུང་རྣམས་སོ། །ཅེས་པ་ནི། བརྡའི་དཔེ་དོན་དེ་བཞིན་དུ། རྩ་བ་དང་སྡོང་པོ་ལ་བརྟེན་ནས་འབྲས་བུ་ན་རི་ཀེ་ལ་དེ་ཤ་དང་རུས་པ་དང་རྐང་མར་དུ་གྲུབ་པ་དེ་བཞིན་དུ། རྩ་དང་རླུང་གི་སྦྱོར་བའི་རྟེན་འབྲེལ་དེ་ལ་བརྟེན་ནས། འབྲས་

XXX བུ་ཡེ་ཤེས་ཀྱི་སྣང་བ་སྐུ་གསུམ་དུ་འཆར་ཞེས་པའི་དོན་ཏོ། །དེས་རྩ་རླུང་གནད་ཀྱི་གདམས་པ་བསྟན་ནས། དེ་ནས་དེ་ཐམས་ཅད་ཀྱི་དོན་ཆོས་ཉིད་ཐོབ་པར་བྱེད་པ་ཡིན་པས་ན། ལྟ་སྒོམ་གྱི་མན་ངག་བླ་མས་བསྟན་པ་ནི། རྒྱུ་མེད་འབྲས་བུ་མེད་པ་རུ། །ཀུན་གྱིས་གསལ་བར་སྟོན་པར་བྱེད། །དཔེ་ཡིས་མ་ཡིན་ཐ་སྙད་མེད། །མ་བྲལ་བ་ལ་གསལ་ཅི་དགོས། །ཤོར་དང་གོལ་བས་མ་བསྐྱེད་པའོ། །འཁྱམས་མེད་ལྟེངས་པ་དེ་ལས་ལོག །ཅེས་གསུངས་སོ། །འདིར་ལྟ་བའི་དོན་གང་ཡིན་བྱས་པས། ལྟ་བའི་དོན་གཉུག་མ་འོད་གསལ་གྱི་ཡེ་ཤེས་བྱ་བ་གཅིག་ཡིན་ཏེ་དེའི་དཔེ་གང་གིས་མཚོན་ན་རྒྱུ་མེད་འབྲས་བུ་མེད་པ་རུ་ཅེས་པ་དེས་བསྟན་ཏེ། རྒྱུ་མེད་པ་གང་ལྟ་བུ་བྱས་པས། ནམ་མཁའ་ལྟ་བུ་ཡིན་ཏེ། རྒྱུ་གང་གིས་བསྐྱེད་ན་བྱས་པས། གང་གིས་བསྐྱེད་པ་མེད། འོ་ན་དེ་ལ་འབྲས་བུ་ཡོད་དམ་མེད་བྱས་པས། རྒྱུ་མེད་པས་འབྲས་བུ་ཡང་མེད་སྐད། འོ་ན་ཅི་ཡང་མེད་པ་གཅིག་ཡིན་ནམ་བྱས་པས། དེ་མ་ཡིན་ཏེ། བསྐྱེད་བྱ་གཅིག་དང་སྐྱེད་བྱེད་གཅིག་གིས་བསྐྱེད་པའི་རྒྱུ་འབྲས་ལྟ་བུ་ཆོས་སྐུ་དེ་ལ་མེད་ཀྱང༌། འབྲས་བུ་གཟུགས་སྐུ་གཉིས་གསལ་བར་སྟོན་པ་ནི་འགག་པ་མེད་པ་སྟེ། དཔེར་ན་ནམ་མཁའ་ཆེན་པོ་དེ་ལ། བསྐྱེད་བྱ་དང་སྐྱེད་བྱེད་ཀྱི་རྒྱུ་འབྲས་བུ་དམིགས་པ་མེད་པ་རུ། ཀུན་གྱིས་གསལ་བར་སྟོན་པར་བྱེད་དེ། ནམ་མཁའ་རང་གི་ངོ་བོ་འདི་བྱ་བ་མེད་ཀྱང་ཐམས་ཅད་ཀྱི་གོ་འབྱེད་པར་བྱེད་པས་ན་ཀུན་གྱི་གསལ་བར་སྟོན་ཅེས་པའོ། །དཔེ་དེ་བཞིན་དུ་གཉུག་མ་སེམས་ཉིད་འོད་གསལ་དེ་ལ་ནམ་མཁའ་ཆེན་པོ་ལྟར། ངོ་བོ་

XXX འདི་བྱ་བ་མེད་ཀྱང་སྐུ་རྣམ་པ་གཉིས་གསལ་བར་སྟོན་པ་འགག་པ་མེད་ལ། ཆོས་སྐུ་རང་གི་ངོ་བོ་ནི་གང་གིས་ཀྱང་མཚོན་དུ་མེད་པས་ན། དཔེ་ཡིས་མ་ཡིན་ཐ་སྙད་མེད་ཅེས་པའོ། །འོ་ན་ཉམས་སུ་མྱོང་བར་མི་བཏུབ་བམ་བྱས་པ་ལ། དེ་ཉམས་མྱོང་མེད་པའི་ཉམས་ལེན། བསྒོམ་རྒྱུ་མེད་པའི་བསྒོམ་པ། རྒྱུན་མི་འཆད་པའི་བསམ་གཏན། ཐོབ་རྒྱུ་མེད་པའི་འབྲས་བུ་བྱ་བ་གཅིག་ཡེ་ནས་མི་འབྲལ་བར་ཡོད་པས། དེ་ལ་ཉམས་མྱོང་གསལ་མི་དགོས་པས་ན། མ་བྲལ་བ་ལ་གསལ་ཅི་དགོས་པ་ཞེས་བྱའོ། །འོ་ན་མ་བྲལ་བ་དེ་རང་ཅི་འདྲ་བ་གཅིག་མ་བྲལ་བར་ཡོད་བྱས་པས། དེ་ཤོར་སར་མ་ཤོར་བར། གོལ་སར་མ་གོལ་བ། བཏང་སར་མ་འབྱོམས་པ། བཞག་སར་མ་ལྟེངས་པ། བཏང་སྙོམས་ཀྱི་རྟོག་པ་ལས་ལོག་པ་གཅིག་མ་བྲལ་བར་ཡོད་ཅེས་བྱའོ། །ཤོར་དང་ཅེས་པ་ཤོར་ས་གང་ཡིན་བྱས་པས། ཤོར་ས་བཞི་ཡོད་དེ། དང་པོ་འོད་གསལ་སྟོང་པ་ཉིད་ཤེས་བྱའི་གཤིས་ལ་ཤོར་བ་བྱ་བ། མཚན་ཉིད་ཀྱི་ཐེག་པ་ཆེན་པོ་དབུ་མ་ལ་སོགས་པ་ཁ་ཅིག་གཅིག་དང་དུ་བྲལ་གྱི་སྟོང་པ་ཉིད་དུ་གཏན་ལ་ཕབ་ནས། སྟོང་ཉིད་ནམ་མཁའི་དཀྱིལ་ལྟ་བུ་དེ། རྣམ་རྟོག་གིས་བྱས་པས་རྟོག་པ་བསྒོམ་པ་ཡིན། སྔགས་པས་ཕྱི་སྣོད་བཅུད་ལ་རིམ་གྱིས་བསྡུས་པའམ། སྭ་བྷཱ་ཝའི་སྔགས་གྱི་སྒོ་ནས་བློ་ཡིས་སྟོང་པ་ཉིད་ནམ་མཁའ་རྣམ་པར་དག་པ་ལྟ་བུར་བྱས་ནས། དེ་ལ་བློ་འཇོག་པའོ། །དེ་གཉིས་ཀ་བློས་བྱས་ཡིན་པས་ཤོར་ས་ཡིན་ནོ། །འོད་གསལ་སྟོང་པ་ཉིད་རྒྱས་འདེབས་སུ་སྦྱོར་བ་ནི། སྦྱིན་པ་ལ་སོགས་པ་བཏང་བའི་ཡུལ་དང༌། གཏོང་བའི་མཁན་པོ་དང༌། བཏང་བྱའི་དངོས་པོ་ཐམས་ཅད་མི་དམིགས་པར་སྟོང་པ་ཉིད་དུ་རྒྱས་བཏབ་ནས་བསྒོམ་པ་ཡིན་ཏེ། དེ་ཡང་བློས་བྱས་

XXX སོ། འོད་གསལ་སྟོང་པ་ཉིད་ཉོན་མོངས་པའི་གཉེན་པོར་ཤོར་བ་ནི། འདོད་ཆགས་ཞེ་སྡང་ལ་སོགས་པ་གང་སྐྱེས་ཀྱང༌། དེ་དང་པོ་གང་ནས་ཀྱང་མ་སྐྱེས། ད་ལྟ་ཅིའི་ངོ་བོར་ཡང་མ་གྲུབ། ཐ་མ་འདིར་འགག་བྱའམ། འགག་པ་མེད་པར་སྟོང་ཉིད་དུ་བློ་འཇོག་པའོ། །འོད་གསལ་སྟོང་པ་ཉིད་ལམ་དུ་ཤོར་བ་ནི། ཆགས་ལམ་པས་འབྲས་བུ་བཟང་བ་གཅིག་ལོག་ན་ཡོད་པར་བྱས་ནས། དེའི་ལམ་མམ་ཐབས་སུ་སྟོང་པ་ཉིད་བློའི་ཡུལ་དུ་བྱས་ནས་བསྒོམ་པས་ཆོས་སྐུ་ཐོབ་དུ་རེ་བ་དེ་བློས་བྱས་པ་ཡིན་པས། གང་ཚེ་སྟོང་པ་ཐབས་མ་ཡིན། །གང་ཚེ་སྟོང་པ་ཐབས་ཡིན་ན། །རྒྱུ་ལས་འབྲས་བུ་གཞན་ཡིན་ཕྱིར། །ཐབས་ནི་སྟོང་པ་ཉིད་མ་ཡིན། །ཅེས་པའོ། །ཤོར་ས་དེ་བཞི་སྤངས་པ་གནས་ལུགས་ནི། རྟོག་པ་ཐམས་ཅད་དང་བྲལ་བ་བློའི་ཡུལ་ལས་འདས་པའོ། །བདེ་བ་སྐྱེས་ན་དགའ། མ་སྐྱེས་ན་མི་དགའ་བའི་ཉམས་ནི། རྟོག་པ་སྐྱེས་ནས་འདོད་ཁམས་སུ་གོལ་བ་ནི། མི་རྟོག་པར་ཡིད་ལ་བྱས་ན་ཡང་གཟུགས་མེད་པར་གོལ་བ་ཡིན། དབྱེར་མེད་ལ་ཆགས་ཤིང་ཞེན་ན་ཡང་ཉན་ཐོས་རང་རྒྱལ་དུ་གོལ་བ་ཡིན། བཞག་པར་ལྟེངས་པ་ནི། དེ་རྣམས་སྤངས་པའི་ཤེས་པ་མ་བཅོས་པ་ལ་བཞག་པས་མི་རྟོག་པ་སྐྱེ་མེད་དུ་ལྟེང་དེ་འདུག་པའོ། །བཏང་སར་འཁྱམས་པ་ནི་རྟོག་པ་གཅིག་རྟིང་ནས་གཅིག་བྱུང་བའི་བཏང་སྙོམས་གྱི་རྟོག་པ་ནི་བསྒོམ་མི་དགོས་འདི་ཉིད་ཆོས་སྐུ་ཡིན་ཟེར་བ་དེ་ཡིན། དེ་ལས་ལོག་པ་ནི་བཏང་སྙོམས་ཀྱི་རྟོག་པ་དེ་ལས་ལོག་པའོ། །དེས་ལྟ་བའི་འོད་གསལ་བསྟན་ནས། དེ་བསྒོམ་པའི་དོན་ནི། དེ་དང་མ་བྲལ་བ་གཅིག་ལ་བྱ་སྟེ། དེ་ལ་ལྟ་བ་སེམས་འོད་གསལ་དང༌། ལུས་སྒྱུ་ལུས། དེ་མཚམས་སྦྱོར་རྨི་ལམ་དང་བར་དོ། ཏིང་ངེ་འཛིན་འཕོ་

XXX བ་དང་གྲོང་འཇུག་ཅེས་པས་བསྟན་ཏེ། འདིའི་དོན་ནི། སློབ་དཔོན་ཏེ་ལོ་བ་ཉིད་ཀྱིས་གནོད་སྦྱིན་མོའི་རྒྱུད་ལ་ཇི་ལྟར་བསྟན་ཡང་གོ་བར་མ་གྱུར་ནས། དེ་ལ་གདམས་ངག་གི་ལམ་ཁྲིད་དུ་གསུངས་སོ། །དེ་ལ་ལྟ་བའི་འོད་གསལ་ནི་གོང་དུ་བསྟན་ན། དེ་ལུས་སྒྱུ་ལུས་མཚམས་སྦྱོར་རྨི་ལམ་བར་དོ་ལ་མཚམས་སྦྱོར་པ་གཉིས་ཇི་ལྟར་སྦྱོར་བྱས་པས། བར་དོ་གསུམ། སྒྱུ་ལུས་གསུམ། མངོན་དུ་བྱ་བ་གསུམ། བསྲི་བ་གསུམ། མཚམས་སྦྱོར་གསུམ། དེ་ལྟར་ཆོས་ལྔ་གསུམ་བཅོ་ལྔས་བསྟན་པ་ལ། དེ་ལ་དང་པོ་རྣམ་པ་ལྔ་ནི་འདི་སྐད་དུ་བཤད་དེ། སྐྱེས་ནས་མ་ཤིའི་བར་དོ་རུ། །རྣམ་སྨིན་ལུས་ཀྱི་རྟོག་པ་ལ། །འདོད་ཆགས་འོད་གསལ་དག་ཏུ་འགྱུར། །བླ་མའི་གདམས་ངག་ངོ་མཚར་ཆེ། །ཞེས་གསུངས་པའོ། །སྐྱེས་ནས་མ་ཤིའི་བར་དག་ཏུ། ཞེས་པ། སྐྱེ་ཤིའི་བར་དོའི་གོ་བ་ལ་བཞག་པ་ཡིན་ཏེ། སྐྱེ་ཤི་ནི་མ་ཤིའི་བར་དེ་ལ་སྐྱེ་ཤི་བར་དོ་ཟེར་བ་ཡིན་ཏེ། རྣམ་པ་རྟོག་པ་ཐམས་ཅད་མངོན་དུ་བྱེད་པའི་དུས་ཡིན། ལུས་གསུམ་གྱི་ནང་ན་འབྱུང་བ་ལས་བསྐྱེད་པ་རྣམ་པར་སྨིན་པའི་ལུས་ཡིན་པས་ན། རྣམ་སྨིན་ལུས་ཀྱི་རྟོག་པ་ལ། ཞེས་བྱའོ། །རྟོག་པ་དེ་ལ་མངོན་དུ་གང་བྱེད་བྱས་པ་ལ། མངོན་དུ་འོད་གསལ་བྱེད་པ་ཡིན། འོ་ན་བསྲེ་བ་གང་དང་བསྲེ་ན་ཉོན་མོངས་པ་འདོད་ཆགས་བསྲེ་བས་ན། འདོད་ཆགས་འོད་གསལ་དག་ཏུ་འགྱུར། ཞེས་པའོ། །འདོད་ཆགས་ཇི་ལྟར་བསྲེ་ན། བསྒྱུར་ལམ་པ་རྟོག་ཚོགས་ལྷ་དང་ལྷ་མོར་འདོད་པའམ། ཆགས་ལམ་པ་རྩ་དང་ཐིག་ལེ་ནཱ་ད་ལ་བརྟེན་པའི་བདེའམ། གྲོལ་ལམ་པ་གཏུམ་མོ་ལ་བརྟེན་པའི་བདེ་བ་སྟེ། གྲོལ་ལམ་ཆེན་པོ་པས་བདེ་བ་དེ་དག་ལ་མ་ཞེན་པར་འོད་གསལ་དུ་རྟོག་པ་ལ་འདོད་ཆགས་དང་བསྲེ་ཞེས་

XXX པའི་དོན་ནོ། །དེའི་མཚམས་གང་གིས་སྦྱོར་ན། བླ་མའི་གདམས་ངག་ངོ་མཚར་ཆེ་ཞེས་པ་སྟེ། དེའི་མཚམས་བླ་མའི་གདམས་ངག་གི་སྦྱོར་ཏེ། གོང་དུ་བཤད་པའི་དོན་ཐམས་ཅད་མཚམས་སྦྱོར་རོ། །འོ་ན་འདིར་རྨི་ལམ་དུ་སློང་བ་ཞེས་བྱ་བ་ཚེ་འདི་ལ་ལམ་དུ་སློང་བ་ཡིན་ཏེ། སྦྱོར་བ་དང་ནི་དངོས་གཞི་ལས། །གཟུང་བ་དང་ནི་སྦྱོང་བ་དང༌། །སྒྱུ་མར་བསླབ་ཅིང་ཡ་ང་སྤངས། །དེ་ཉིད་མི་འདའ་བསྒོམ་པར་བྱ། །ཞེས་བཤད་དེ། འདི་ལ་དང་པོ་སྦྱོར་བ་དང༌། དངོས་གཞི་གཉིས་ལས། དང་པོ་སྦྱོར་བ་བསྟན་པ་ནི། སྦྱོར་བ་དང་ནི་ཞེས་པས་བསྟན་ཏེ། དང་པོ་འདི་ལ་འཇུག་པའི་གང་ཟག་གིས། ལས་འཕྲོ་མེད་པ་དང༌། དམ་ཚིག་ཉམས་པ་དང༌། ཚོགས་མ་བསགས་པ་དང༌། བླ་མ་ལ་བརྙས་ཤིང་མ་མཉེས་པ་ཡོད་ན་རྨི་ལམ་མི་ཟིན་པས། དེས་བཤགས་པ་བྱ། ཡི་གེ་བརྒྱ་པ་གདོན། བླ་མ་དང་དཀོན་མཆོག་ལ་མོས་གུས་དྲག་པོ་བྱ་སྤོང་དག་དང་ཚོགས་སོགས་དྲག་པོ་བྱ་བ་ནི་དང་པོའི་སྦྱོར་བའོ། །དངོས་གཞི་བཞི་ཡོད་པ་ལས། དང་པོ་རྨི་ལམ་ངོས་བཟུང་བ། གཉིས་པ་སྦྱོང་བ། གསུམ་པ་སྒྱུ་མར་བྱིན་གྱིས་རླབས་ཅིང་ཡང་སྤང་བ། བཞི་པ་དེ་ཁོ་ན་ཉིད་བསྒོམ་པའོ། །དང་པོ་ནི་གཟུང་བ་དང་ཞེས་པས་བསྟན་ཏེ། གཟུང་བ་ནི་རྨི་ལམ་བཟུང་བར་བྱ་བ་ཡིན་ཏེ། ཇི་ལྟར་བཟུང་བར་བྱ་ན། སྔོན་དུ་རྨི་ལམ་ལ་མོས་པའི་དང་བ་དང་འདུན་པ་དྲག་པོ་ཡིད་ལ་བྱ། ཉིན་པར་གྱི་དུས་སུ་རྨི་ལམ་ལ་རྨི་ལམ་དུ་ཤེས་པར་བྱ་སྙམ་པའི་དྲན་པ་ཡང་དང་ཡང་དུ་བྱ། དེ་ཡང་དེ་བཞིན་གཤེགས་པའི་ཞིང་ཁམས་ལྟ་བ་ལ་སོགས་པ་སེམས་ལ་ཅི་མནོ་བ་རྨི་བར་བྱའོ་སྙམ་དུ་སེམས་སོ། །དེ་ནས་སྔགས་དང་སྟན་འབོལ་བ་མཐོ་བར་བྱས་ལ། གཞོགས་གཡས་པ་ས་ལ་ཕབ་སྟེ། ལག་

XXX གཡོན་པ་བརླའི་སྟེང་དུ་བརྐྱང་ཞིང༌། ལག་པ་གཡས་པ་འགྲམ་པ་ལ་སྦྱར་ལ་ཉལ་ལོ། །མགྲིན་པར་པདྨ་དམར་པོ་འདབ་མ་བཞི་པོ་གཅིག་བསམ། དེའི་ལྟེ་བ་ལ་ཨ་དཀར་པོ་གཅིག་བསམ་ལ་ཉལ་བས་ཐ་མལ་གྱི་གཉིད་དུ་མི་འགྲོ་བའོ། །དེ་ནས་གཉིད་དུ་འགྲོ་བའི་དུས་སུ་དྲན་པ་དུང་བ་བྱ། དེ་ནས་སྲོད་ལ་སྨིན་ཕྲག་ཏུ་ཐིག་ལེ་དཀར་པོ་གཅིག་ལ་སེམས་བཟུང་ཞིང་ཉལ་བས་གཉིད་ལོག་གོ །དེ་ནས་ཐོ་རངས་ཀྱི་དུས་སུ་མགྲིན་པའི་ཨ་ལ་སེམས་གཏད་ལ། རྨི་ལམ་ལ་རྨི་ལམ་དུ་མ་ཤེས་ན་སད་པ་དང༌། ད་ཅི་ཡང་རྨི་ལམ་དུ་ངོ་མ་ཤེས་པའི་འདུན་པ་དྲག་པོ་བྱའོ། །གཉིད་སད་པའི་དུས་སུ་སྣང་སྲིད་རྨི་ལམ་དང་འདྲ་བར་ཤེས་པར་བྱ་སྟེ། ཆོས་ཐམས་ཅད་རྨི་ལམ་ལྟ་བུ་སྒྱུ་མ་ལྟ་བུ་མིག་ཡོར་ལྟ་བུར་ཤེས་པར་བྱའོ། །དེ་བཞིན་དུ་ཉིན་མཚན་དུ་བྱས་པས་རྨི་ལམ་མ་ཟིན་ནོ། །ཟིན་པའི་རྟགས་ཇི་ལྟར་འོང་ན། ཆུ་དང་མེ་དང་གཡང་ས་དང༌། འདེད་པ་དང་གསོད་པ་ལ་སོགས་པ་བྱུང་ཡང་རྨི་ལམ་མ་ཡིན་སྙམ་པའི་ཤེས་པ་འགའ་འབྱུང༌། དེ་ལྟར་བྱུང་བ་དང༌། རྨི་ལམ་གྱི་དུས་སུ་ཆོས་ཐམས་ཅད་རྨི་ལམ་དང་འདྲ་ཞེས་བཤད་པ་དེ་རེ་བདེན་སྙམ་པའི་མོས་པ་དང་འདུན་པ་དྲག་པར་བྱའོ། །དེ་ནི་རྨི་ལམ་བཟུང་བའོ། །དེ་ནས་རྨི་ལམ་ཟིན་ནས་སྲོད་ཀྱི་དུས་རང་ནས་རྨི་ལམ་ལ་རྨི་ལམ་དུ་ཤེས་པར་བྱའོ་སྙམ་པའི་འདུན་པ་དྲག་པོ་བྱའོ། །དེ་ཡང་རྨི་ལམ་བཟུང་བ་བསྟན་ནས། སྦྱོང་བ་དང་ཞེས་པས་རྨི་ལམ་སྦྱོང་བ་བསྟན་ཏེ། རྨི་ལམ་ཇི་ལྟར་སྦྱང་བྱས་པ་ལ། རྨི་ལམ་ཡིན་པས་ཇི་ལྟར་ཡང་སྦྱང་དུ་བཏུབ་སྙམ་པའི་འདུན་པ་དྲག་པོ་བྱས་ལ། རྨི་ལམ་གྱི་དུས་སུ་ཆུར་མཆོང་བ་དང༌། མེར་བསྲེག་པ་དང༌། གཡང་ལ་འཛེགས་པ་དང༌། སུམ་ཅུ་རྩ་གསུམ་གྱི་གནས་ལྟ་བ་དང༌། རྒྱ་གར་གྱི་གནས་ཆེན་ཉི་ཤུ་རྩ་བཞི་ལྟ་བ་དང༌། ཉི་ཟླ་རྐང་པས་མནན་པ་དང༌།

XXX ཡི་དམ་ལྷའི་ཞལ་ལྟ་ཞིང་ཆོས་ཉན་པ་དང༌། དེ་བཞིན་གཤེགས་པའི་ཞིང་ཁམས་ལྟ་ཞིང་དེ་དག་ལ་ཆོས་ཉན་པ་དང༌། རང་གི་སེམས་ལ་ཅི་མནོ་བྱའོ། །དེ་བཞིན་དུ་གོམས་པར་བསླབ་པ་ནི། རྨི་ལམ་སྦྱོང་བའོ། །རྨི་ལམ་སྒྱུ་མར་ཤེས་པར་བྱ་ཞིང་ཡ་ང་བ་སྤང་བར་བྱ་བ་ནི། སྒྱུ་མར་བསླབ་ཅིང་ཡ་ང་སྤང༌། །ཞེས་པས་བསྟན་ཏེ། རྨི་ལམ་སྦྱང་བའི་དུས་སུ་ཆུར་མཆོང་པ་ལ་སོགས་པ་བྱས་པས། ད་རུང་བག་ཚ་བའམ་འཇིགས་པ་ཡོད་སྙམ་བྱེད་ན། དེ་ནི་རྨི་ལམ་ཡིན་ལ་རྨི་ལམ་ནི་མི་བདེན་པ་ཡིན་པས། དེ་ལ་འཇིགས་སུ་ག་ལ་ཡོད་སྙམ་པ་བསྒོམས་པས། དེ་ཡ་ང་སྤོང་བའམ། དེ་ཁོ་ན་ཉིད་བསྒོམ་པ་ནི། དེ་ཉིད་མི་འདའ་བསྒོམ་པར་བྱ་ཞེས་པ་སྟེ། རྨི་ལམ་ཡིན་པས་སྦྱང་དུ་ཡང་ཅི་ཡོད་དེ། དེ་རང་སེམས་ཀྱི་འཁྲུལ་པར་ཤེས་པར་བྱ་སྟེ་དེ་ཉིད་བསྒོམ་པའོ། །དེའི་སྒོམ་ཐབས་ནི་བླ་མ་རྣམས་ཀྱི་གདམས་ངག་ནང་གི་བློ་ལ་གང་ཤར་བ་དེ་དག་མི་འབྲལ་བར་བསྒོམ་པའོ། །དེ་དག་ནི་རྨི་ལམ་ལམ་དུ་འཁྱེར་བ་སྟེ། ཚེ་འདི་ལ་བསླབ་པར་བྱའོ། །དེ་ནས་བར་དོ་གཉིས་པ་ནི། རྣམ་ཤེས་འགྱུར་བའི་བར་དོ་རུ། །བག་ཆགས་ལུས་ཀྱིས་ཀུན་ནས་བསླང༌། །མཚམས་སྦྱོར་མངོན་དུ་རྨི་ལམ་བྱ། །གཏི་མུག་འོད་གསལ་ཉིད་དུ་འགྱུར། །འདུན་པ་དྲག་པོས་རབ་ཏུ་སྦྱོར། །དེ་ལ་འདིར་བར་དོ་ནི་རྨི་ལམ་བར་དོ། ལུས་བག་ཆགས་ཀྱི་ལུས། མངོན་དུ་རྨི་ལམ་བྱེད་ལ། བསྲེ་ན་གཏི་མུག་དང་བསྲེ། འཚམས་དྲན་པ་དང་འདུན་པས་སྦྱོར་བར་འདོད་པ་ལས། དེ་ལ་དང་པོ། རྣམ་ཤེས་འགྱུར་བའི་བར་དོ་རུ། ཞེས་པ་གང་ལ་བྱ་ན། དེ་ནི་རྨི་ལམ་བར་དོ་ལ་བྱ་སྟེ། རྣམ་ཤེས་ཇི་ལྟར་དུ་འགྱུར་བའི་བར་དོ་ཡིན་བྱས་པས། ཉིན་པར་གྱི་རྣམ་པར་ཤེས་པ་འགྱུར་ནས། བག་ཆགས་ཀྱི་རྗེས་སུ་འབྲངས་ནས། འཁྲུལ་

XXX པ་སྣ་ཚོགས་བྱུང་བས་ན། རྣམ་ཤེས་འགྱུར་བའི་བར་དོ་ཞེས་བྱའོ། །བག་ཆགས་ཀྱི་རྗེས་སུ་འབྲང་བའི་རྒྱུ་མཚན་གང་ཡིན་བྱས་པས། བག་ཆགས་ལུས་ཀྱིས་ཀུན་ནས་བསླངས་ཞེས་པའོ། །དེ་བག་ཆགས་དེ་འོད་གསལ་དུ་སློང་བ་མངོན་དུ་གང་བྱེད་ན། མཚམས་སྦྱོར་མངོན་དུ་རྨི་ལམ་བྱ་ཞེས་པ། དེའི་དུས་སུ་མངོན་དུ་རྨི་ལམ་བྱེད་པའོ། །བསྲེ་བ་གང་དང་བསྲེ་ན་གཏི་མུག་དང་བསྲེ་བས་ན། གཏི་མུག་འོད་གསལ་ཉིད་དུ་འགྱུར། །ཞེས་པའོ། །མཚམས་སྦྱོར་ནི་འདུན་པ་དྲག་པོས་བྱེད་པས་ན། འདུན་པ་དྲག་པོས་རབ་ཏུ་སྦྱོར་ཞེས་པའོ། །དེ་ལ་གང་གལ་ཆེ་ན་གཉིད་འོད་གསལ་དུ་གཞུག་པ་གལ་ཆེ། དུས་གཉིད་ཀྱི་དུས་སུ། ཡུལ་སྙིང་ཁ་ཡིན་པས། འཁོར་ལོ་པདྨ་བཞི་པ་གཅིག་ལ། ལྟེ་བ་ལ་ཧཱུྃ། མདུན་དུ་ཨ། གཡས་སུ་ནུ། རྒྱབ་ཏུ་ཏ། གཡོན་དུ་ར་བཞི་བསྒོམས་ལ། ཐ་མལ་གྱི་དུས་སུ་ཨ་ལ་སེམས་གཏད། དེ་ནས་ཕུང་པོ་དང༌། ཁམས་དང་སྐྱེ་མཆེད་ལ་སོགས་པ་རྟོག་པ་རང་སར་ནུས་པ་ན། གཉིད་ཧྲིབ་པ་འོད་དུས་ན་ནུ་ལ་སེམས་བཟུང་སྟེ། སེམས་སྣང་བ་ལ་རང་བཞིན་སྟོང་པ་ཞེས་བྱའོ། །དེ་ནས་ནམ་རྟོག་ཕྲ་བ་ནུབ་དུས་སུ་ཏ་ལ་སེམས་བཟུང་སྟེ། སེམས་སྣང་བ་མཆེད་པ་ཆེན་པོ་ཞེས་བྱའོ། །དེ་ནས་རྟོག་པ་ཤིན་ཏུ་པ་བ་ནུབ་དུས་སུ་གཉིད་ཧྲིབས་ཀྱི་དུས་ན་ར་ལ་དམིགས་ཏེ་སེམས་སྣང་བ་ཞེས་བྱ་བ་ཤིན་ཏུ་སྟོང་པའོ། །དེ་ནས་གཉིད་ཧྲུལ་གྱིས་འགྲོ་དུས་སུ་ཤེས་པ་ཧཱུྃ་ལ་བསྡུས་ཏེ། དེར་བདེ་སྟོང་གི་ངོ་བོ་ལྷན་གྱིས་ཉལ་བས་གཉིད་ཀྱི་རོ་བདེ་སྟོང་དུ་མྱོང་བའི་བདེ་སྟོང་འོད་གསལ་གྱི་ཉམས་མྱོང་འོང་ངོ༌། །བར་དོ་གསུམ་པ་ནི། རྣམ་སྨིན་ལུས་འདི་འཇིག་པ་ན། །བག་ཆགས་དང་བཅས་ཡིད་ཀྱི་ལུས། །འདོད་ཆགས་འོད་གསལ་མངོན་དུ་བྱ། །ཕ་མ་ལ་སོགས་

XXX ཆགས་པ་སྤང༌། །ཞེས་པས་བསྟན་ཏེ། འདིའི་དུས་སུ་བར་དོ་ནི་སྲིད་པའི་བར་དོ། ལུས་ནི་ཡིད་ཀྱི་ལུས། མངོན་དུ་འོད་གསལ་བྱ། བསྲེ་བ་ནི་ཞེ་སྡང་དང་བསྲེ། མཚམས་ཕ་མ་ཡབ་ཡུམ་གཉིས་ཀྱི་སྦྱོར་བར་ཤེས་པར་བྱ་སྟེ། རྣམ་སྨིན་ལུས་ནི་ཞིག་པ་ན་ཞེས་པ་ནི། དེའི་དུས་སུ་སྲིད་པའི་བར་དོ་ཡིན་ཏེ། རྣམ་པར་སྨིན་པའི་ལུས་འབྱུང་བས་བསྐྱེད་པས་ཕ་དང་མའི་ཁུ་ཁྲག་དང༌། སྲིད་པའི་རླུང་དང༌། ཀུན་གཞིའི་ཚོགས་པས་བསྐྱེད་པ་དེ། རྣམ་སྨིན་གྱི་ལུས་ཡིན་པས་དེ་ཞིག་གཞན་ཞིག་མ་བླངས་པའི་བར་དེ་ལ་སྲིད་པའི་བར་དོ་ཟེར་རོ། །དེ་ཙམ་ན། བག་ཆགས་དང་བཅས་ཡིད་ཀྱི་ལུས། །ཞེས་པ། ལུས་ནི་ཡིད་ཀྱི་ལུས་ཡིན་ཏེ། དེའི་མངོན་དུ་གང་བྱ་ན། འོད་གསལ་བྱ། གང་དང་བསྲེ་ན་འདོད་ཆགས་དང་བསྲེ་བས་ན། འདོད་ཆགས་དང་འོད་གསལ་མངོན་དུ་བྱ། ཞེས་པའོ། །དེ་དག་གི་དོན་གང་ཡིན་ན། བར་དོ་དེར་བག་ཆགས་དང་སྦྲགས་པའི་ཡིད་དེ་ཇི་ལྟར་གནས་ན་དབང་པོ་རབ་འབྲིང་གི་སྟོབས་ཀྱིས་ཤི་ནས་ཞག་གསུམ་མམ། ལྔའམ། བདུན་ཚུན་ཆོད་དུ་ཤེས་པ་བརྒྱལ་བ་བྱ་བ་རྟོག་པ་གང་ཡང་མ་སྐྱེས་པ་གཉིད་དུ་སོང་བ་ལྟ་བུར་གནས་སོ། །དེ་ནས་བརྒྱལ་སངས་ནས་རྨི་ལམ་གྱི་ཚད་ཙམ་དུ་རྟོག་པ་འགྱུ་སྟེ། ལུས་འཇིག་པའམ་ཤི་ནས་འདུག་སྙམ་པའི་རྟོག་པ་བཟང་རྟོག་ངན་རྟོག་གི་བག་ཆགས་ཐམས་ཅད་ལངས་ཀྱིས་ལྡང་སྟེ་དེའི་དུས་ན་སྐྱེ་བ་སྔ་མ་ནས་བག་ཆགས་ངན་པ་བསགས་པ་རྣམས། རྟོག་པ་གཅིག་རྟིང་ནས་གཅིག་ཉིད་མཚམས་སྦྱར་ནས་འགྲོ་ལ། བག་ཆགས་བཟང་པོ་བསགས་པ་རྣམས་ལ། ལྷ་རྗེས་སུ་དྲན་པ་དང༌། ལྟ་བ་རྗེས་སུ་དྲན་པ་བྱུང་ནས་དམྱལ་བ་ལ་སོགས་པ་ངན་སོང་གསུམ་མཐོང་བ་དང༌། དེའི་སྡུག་བསྔལ་ཉམས་སུ་མྱོང་བར་མི་འགྱུར་

XXX རོ། །དེ་ཙམ་ན་སྐྱེ་བ་སྔ་མའི་ཉོན་མོངས་པ་རང་ག་མར་མ་ཤོར་བས། རྨི་ལམ་གྱི་འཁྲུལ་སྣང་རང་ག་མར་མི་འཆར་རོ། །རྨི་ལམ་རང་ག་མར་མ་ཤོར་བས་བར་དོའི་རྟོག་པ་རང་རྒྱུད་པར་མི་འཆོར་ཏེ་འོད་གསལ་ཆོས་སྐུ་ཐོབ་པའོ། །དེ་ཙམ་ན་སྐྱེ་བ་མི་ལྟོས་པས་སྲིད་པ་གཅིག་ཡིན། ཆོས་སྐུ་རྒྱུན་མི་འཆད་པ་གཅིག་ཐོབ་པས་ན་ཟག་པ་མེད་པའི་བག་ཆགས་མཚམས་སྦྱོར་ཡིན། གཉིད་ཐུན་གཅིག་གིས་འོད་གསལ་རྟོགས་པས་ན་གདམས་ངག་ཉིང་ཁུ་ཡིན། ཕ་མ་ལ་སོགས་ཆགས་པ་སྤང་ཞེས་པ་ནི། བར་དོ་ཐ་མའི་ལུས་སུ་ཞེ་སྡང་དང་བསྲེ་བར་བྱ་སྟེ། ངོ་མཚར་མོ་ལ་འདོད་ཆགས་མི་བསྐྱོད་པར་འོད་གསལ་དུ་འཁྱེར་བའོ། །ཕོ་མཚར་པོ་ལ་ཞེ་སྡང་མི་བསྐྱེད་པར་འོད་གསལ་དུ་འཁྱེར་བའོ། །དེ་དག་ནི་ཚེ་འདི་ལ་ཤེས་དགོས་ཏེ། མ་ལ་པ་ནི་མིག་སེར་ཡིན་ཞེས་པའོ། །ནུ་ཟི་མ་ལ་ཡང་དག་ཏུ་འཛིན་པ་དེ་འཁྲུལ་པ་ཉིད་མཚམས་སྦྱོར་བ་ཡིན་མོད། དེ་ལ་འདོད་ཅིང་ཆགས་པ་དང༌། ཞེ་སྡང་མེད་ན་འོད་གསལ་ལམ་དུ་སློངས་པ་ཡིན་མོད། གདམས་ངག་ལོག་པ་གཅིག་གོང་ན་ཡོད་གསུངས། དེས་ན་དེའི་མཚམས་སྦྱར་ཕ་མ་ཡབ་ཡུམ་གྱིས་སྦྱར་རོ། །ལར་ནི་བར་དོ་གསུམ་དུ་ལམ་རིམ་ཆོས་ལྔ་ཡིས་བསྟན་པས་དེ་རིམ་གྱིས་ཉམས་སུ་མྱོང་བ་ཡིན་ནོ་གསུངས། ཐམས་ཅད་ཚེ་འདི་ལ་ཉམས་སུ་མྱོང་ནས་གཉིས་པ་ལ་མངོན་དུ་འགྱུར་གསུངས། དེས་རྨི་ལམ་དང་བར་དོ་དང་སྒྱུ་ལུས་དང་འོད་གསལ་བསྟན་ནས། ད་ཏིང་ངེ་འཛིན་འཕོ་བ་དང་གྲོང་འཇུག་བསྟན་པ་ནི། དོན་གཉིས་ཀྱིས་སྟོན་ཏེ། དང་པོ་བསྲེ་འཕོ་གཉིས་ཀྱི་དོན་རླུང་དང་འོད་གསལ་བསྒོམ་པ་བསྟན་པ་ནི། དུས་དང་ལུས་ཀྱི་བཅའ་བ་དང༌། །ཡུལ་ནི་དང་པོའི་སྦྱོར་བ་སྟེ། །གཏུམ་མོའི་གནད་

XXX ནི་རླུང་བཞིར་བཤད། །འོད་གསལ་བཞི་རུ་བཤད་པ་སྟེ། །ཞེས་བཤད་པའོ། །འདི་རུ་དུས་དང་ལུས་ཀྱི་བཅའ་བ་དང༌། ཞེས་པ་ནི། རླུང་སྦྱོར་བ་ལ་གནད་གསུམ་སྟོན་ཏེ། དང་པོ་ལུས་སྤྱོད། དེ་ནས་རླུང་བསྒོམ་པར་བྱ་སྟེ། དང་པོ་དུས་དང་ཞེས་པ་ནི་དུས་ཀྱིས་ནད་ཡིན་ཏེ། དེའི་དུས་ནི་རླུང་ཨ་བ་དྷཱུ་ཏིར་རྒྱུ་བའི་དུས་ཡིན་ཏེ། དེ་ཤེས་ན་རླུང་གང་ནས་རྒྱུ་བ་ལྟས་པས། རེས་གཡས་ནས་རྒྱུ། རེས་གཡོན་ནས་རྒྱུ་སྟེ། གཉིས་ཀ་ནས་རྒྱུ་དུས་སུ་བསྒོམ་ན་ཡེ་ཤེས་མི་སྐྱེ་མི་སྲིད་པས་དུས་ཀྱིས་གནད་དུ་ཞེས་པར་བྱའོ། །ད་ལུས་བཅོས་པའི་གནད་ནི་ལྔ་ཡོད། རེ་མིག་ལྟར་བསྣོལ་བ། མདའ་ལྟར་བསྲང་བ། ལྕགས་ཀྱུ་ལྟར་དགུག་པ། རྒྱ་མདུད་ལྟར་བསྡམ་པ། ལི་རི་ལྟར་བསྒྲིམ་པ་དང་ལྔའོ། །རེ་མིག་ལྟར་བསྣོལ་བ་ནི། རྐང་པ་གཡས་ཀྱིས་གཡོན་ལ་འཁྱུད། སྒོམ་ཐག་གམ་གོས་ཀྱིས་འཁྱུད། དེའི་དགོས་པ་ནི་འོག་རླུང་རང་ཤུགས་ཀྱིས་འགག །མདའ་ལྟར་བསྲང་བ་ནི། མདའ་འཁྱོག་པོ་འཕང་དུ་མི་བཏུབ་པ་དང་འདྲ་སྟེ། སྟེང་རླུང་རང་ཤུགས་ཀྱིས་འགགས་པའི་དགོས་པ་ཡོད། ལྕགས་ཀྱུ་ལྟར་དགུག་པ་ནི། མགྲིན་པར་ཅུང་ཟད་དགུག་པས་རྩ་གཡས་གཡོན་གཉིས་ནས་རླུང་དང་རྣམ་རྟོག་འཕྲོ་བ་དེ་བཀག་པས་མི་རྟོག་པ་སྐྱེ་བའི་དགོས་པ་ཡོད། རྒྱ་མདུད་ལྟར་བསྡམ་པ་ནི་ལྟེ་བ་ནས་སོར་བཞིའི་དཀྱིལ་དུ་ལག་པ་མཉམ་བཞག་གི་ཕྱག་རྒྱ་བཅས་པས་ཨ་བ་དྷཱུ་ཏི་ཁ་བྱེ་བའི་དགོས་པ་ཡོད། ལི་རི་ལྟར་བསྒྲིམ་པ་ནི། ཤེས་པ་དང་ལུས་ཆ་ནས་བསྒྲིམས་པས་རླུང་ཟིན་ཏེ་དྲོད་འབྱུང་བའི་དགོས་པ་ཡོད། ཡུལ་གྱི་གནད་ནི། སྤྱི་བོར་མགྲིན་པ་སྙིང་ཁ་ལྟ་བུ་དང་འཁོར་ལོ་བཞི་དབུས་སུ། ཨ་བ་དྷཱུ་ཏི་ཡོད་པ་ནི་ཡར་ཚངས་པའི་བུ་ག་ནས་རུས་པ་དང་ལྤགས་པའི་མཚམས་སུ་ཟུག །

XXX རླུང་རུས་པ་ཁྲུང་ཁྲུང་བར་དུ་རྒྱུ་ལ། མར་ལ་རྒྱུ་ཞབས་གཉེར་མ་ཆེན་པོ་ཚུར་ཡོད་པ་ནས་ཡར་ལ་འཁྱོགས་པས་ཨ་བ་དྷཱུ་ཏིའི་ནང་དུ་ཚུད། འོ་ན་དེ་བཞི་ལ་དམིགས་པ་གཏད་དམ་བྱས་པས་མི་གཏད་དེ། གར་ལ་གཏོད་ན་ལྟེ་བའི་འོག་སོར་བཞི་ནས་རྩ་གསུམ་འདུས་པ་དེ་རུ་གཏད། དེ་དམིགས་ལུགས་གསུམ་ཡོད་དེ། ཐིག་ལེ་ཉ་གང་བ་ལྟ་བུ་ལ་དམིགས་པ་ན། གང་ཡང་ཡིད་ལ་མི་བྱེད་དོ། །དེས་དང་པོ་སྦྱོར་བ་བསྟན་པ་ནི། ཡུལ་ནི་དང་པོའི་སྦྱོར་བ་ནི། །ཞེས་པའོ། །ད་གཏུམ་མོའི་གནད་ནི་རླུང་བཞིར་བཤད་ཅེས་པ་ནི། གཏུམ་མོའི་གནད་བཞི་ལ་བྱ་སྟེ། ཏེ་ལོ་པའི་གདམས་ངག་གིས། གོང་མ་གཉིས་པོ་ཤེས་བྱ་ཙམ་ཉམས་སུ་མི་བླང་གསུངས། ཁྱད་པར་གཏུམ་མོ་ཨ་ཐུང་གི་གདམས་ངག །ལྟེ་བའི་འོག་ན་མར་སོར་གཉིས། ཡར་སོར་གཉིས་ཀྱི་དཀྱིལ་དུ་མཉམ་བཞག་གི་ཕྱག་རྒྱ་བཅའ། ནུས་ཚད་དུ་ལྟེ་བ་སྒལ་པ་བཅར་ལ། དེས་སྒལ་པའི་ཕྱོགས་ཀྱི་རྩ་ཟུམ་པ་དེ་ཁ་བྱེ། དེས་ནང་རླུང་རྣམ་པ་བཞི་ནི་མར་ལ་བརྡེར། ལྟེ་བར་བསྐྱིལ་གམས་གཡོན་གཉིས་ཀྱི་རླུང་ལོག་པས་མེ་སྤར་ཏེ་ཕུས་བཏབ་པ་བཞིན་དུ་དམར་ནང་བྱུང་ནས། ཆིང་སྟེ་རིང་ན་སྙིང་ཁའམ་མགྲིན་པར་སླེབས། ཐུང་སྟེ་ཐུང་ན་མཐོ་གང་ཙམ འཕང་པ་ནི་སྣ་ནས་བསྲིང་ཞིང་རིམ་གྱིས་མ་ཚོར་བར་བཏང་ངོ༌། །བསམ་པ་སྤྱི་བོ་ནས་ཕྱིར་སོང་བར་བསམ་མོ། །ལྷག་མ་ཨན་རེ་ཡང་བཞག་ནས་ཡང་ཡང་བསྒོམ་པར་བྱའོ། །དེ་ལྟར་ཞག་བདུན་བསྒོམས་པས་དེས་སྔ་རྟགས་དྲོ་བ་འོང༌། བདུན་གཉིས་བསྒོམས་ན་དྲོད་ཆེར་སྐྱེས་ནས་གོང་རྐྱང་རེ་ཙམ་གྱིས་ཆོག་པའང༌། བདུན་གསུམ་བསྒོམས་ན་

XXX མི་རྟོག་པའི་མགོ་ཟུག་ནས། གཏུམ་མོའི་མེ་འདི་ཙམ་གཅིག་ལ་སེམས་ཟུང་ཟེར་བ་འོང༌། མེ་སྟག་ཙམ་ལ་ཡང་སེམས་བཟུང་དུ་བཏུབ། དེ་རེས་མངོན་སུམ་དུ་ཡོང་བས་མར་མེ་ཆེ་ཤོས་ཙམ་གཅིག་ལ་སེམས་བཟུང་ངོ༌། །དེ་རྣམས་ཀྱིས་མི་གོ་བ་གཅིག་ལ་གོ་བ་བསྐྱེད་པའི་ཡན་ལག་དུ་བཤད་པ་ཡིན་ནོ། །ཤེས་པ་གཅིག་ལ་དུས་ཀྱི་གནད་རླུང་ལྔ་དྷཱུ་ཏིར་རྒྱུ་བའི་དུས་སུ། ལུས་བཅོས་པའི་གནད་ལྔ་འདི་ལྟར་བཅོས་ལ། སེམས་འདི་ཡུལ་གྱི་གནད་འདིར་གཏུམ་མོའི་མེ་གཏོད་ལ་བསྒོམ་དང་ལར་ཡེ་ཤེས་མི་སྐྱེ་མི་སྲིད་བྱ་བ་ལས་མེད་གསུངས། དེ་ལྟར་གཏུམ་མོའི་ཉམས་སུ་མྱང་བ་དེ་ལ་བསྒོམས་པས། བརྩོན་འགྲུས་ཅན་ཚེ་འདི་ལ་འཚང་རྒྱ། ལེ་ལོ་ཅན་ཡང་བར་དོར་འཚང་རྒྱ་བས། འཆི་ཁར་མ་རིག་པ་ཡེ་ཤེས་དང་བསྲེ་བ་གལ་ཆེ། དེ་ལྟར་སྐྱེ་ཤིའི་བར་དོ་རུ། བསྐྱེད་རྫོགས་གཉིས་ལ་རྣམ་པར་མི་རྟོག་པའི་ཡེ་ཤེས་སུ་བསྲེ་བ་བསྟན་ནས། འོད་གསལ་བཞི་རུ་འདོད་པ་སྟེ། ཞེས་པ་ནི། རྨི་ལམ་བར་དོ་རུ་རྨི་ལམ་སྒྱུ་ལུས་བསྲེ་བའི་དོན་ལ། འོད་གསལ་བཞི་རུ་འདོད་པ་སྟེ་ཞེས་པ། དེ་ཡང་རྟེན་གྱི་གང་ཟག་གཅིག་གིས་ཉིན་མོ་གཏུམ་མོ་བསྒོམ་ནས། དོ་ནུབ་གཉིད་ཀྱི་དུས་ན། དང་པོ་གཉིད་ཀྱི་འོད་གསལ་ཟིན་ནས་བལྟའོ། །འོད་གསལ་རྣམ་པ་བཞི་ཡོད་དེ། རང་བཞིན་གྱི་འོད་གསལ། བསྒོམ་པའི་འོད་གསལ། གཉིད་ཀྱི་འོད་གསལ། འཆི་ཀའི་འོད་གསལ་དང་བཞིའོ། །དེ་ལ་རང་བཞིན་གྱི་འོད་གསལ་ནི། འཁོར་བ་དང་མྱ་ངན་ལས་འདས་པའི་ཆོས་ཐམས་ཅད་རང་བཞིན་གྱིས་རྣམ་པར་དག་པ། སྟོང་ཉིད་སྤྲོས་པ་དང་བྲལ་བ། འོད་གསལ་བ་ཡེ་ནས་གནས་པའོ། །བསྒོམ་པའི་འོད་གསལ་ནི། ཆགས་ཅན་བུད་མེད་ལ་བརྟེན་ནས་ཆགས་བྲལ་གཏུམ་མོ་

XXX བསྒོམ་པས། ད་ལྟར་གྱི་རྣམ་པར་རྟོག་པ་ནི་འགགས། རྗེས་ཀྱི་ཤེས་པ་རྟོག་དཔྱོད་ཀྱི་བློ་དང་བཅས་པ་དགའ་བྲལ་གྱི་དགའ་བ་ནི་མ་སྐྱེས་ཀྱི་བར་དུ། དངོས་གཞི་བདེ་བ་སྟོང་པ་འོད་གསལ་བ། བདེ་སྟོང་གཉིས་སུ་མེད་པའི་ཉམས་མྱོང་གཅིག་ཕྲིལ་གྱིས་སྐྱེས་པའོ། །གཉིད་ཀྱི་འོད་གསལ་ནི། གཉིད་འཐུག་པོ་ཐུམ་གྱིས་ལོག་པའི་དུས་སུ། ད་ལྟར་གྱི་རྣམ་པར་རྟོག་པ་རགས་པ་ནི་འགགས་ཤིང་རྨི་ལམ་སིལ་གྱིས་མ་རྨིས་པའི་བར་དུ་གཉིད་འོད་གསལ་སྟོང་པ་ཉིད་སྤྲོས་བྲལ་ལོ། །འཆི་ཀའི་འོད་གསལ་ནི་ལུས་ཀྱི་འབྱུང་བ་རྣམས་རིམ་གྱིས་བསྡུས་ནས། བར་དོ་དང་པོའི་དུས་ན། ད་ལྟར་གྱི་རྣམ་པར་རྟོག་པ་ནི་འགགས། བར་དོ་ནི་ད་རུང་རླུང་མ་ལངས་པའི་དུས་ན། ཤི་བའི་འོད་གསལ་སྤྲོས་བྲལ་སྟོང་པ་ཉིད་ཀྱི་སྐུ་ཇི་ལྟ་བ་གཅིག་སེམས་ཅན་ཐམས་ཅད་ཀྱི་རྒྱུ་ལ་འབྱུང་སྟེ། དེ་ཐ་མལ་པ་ལ་རྣམ་རྟོག་གིས་ངོ་མ་ཤེས་པས་ཡང་ཡང་འཁོར་བར་འཁོར་བའོ། །དེ་ལྟར་བཞི་ཡོད་པ་ལས། འདིར་གཉིད་ཀྱི་འོད་གསལ་ཟིན་ནམ་བལྟའོ། །དེ་ལ་དུས་ཀྱི་གནད་ནི་དུས་སུ་སྟན་བདེ་བ་ལ་སེང་གེའི་ཉལ་སྟབས་ཀྱིས་ཉལ་ལོ། །དང་པོ་བདག་གིས་གཉིད་ཀྱི་འོད་གསལ་སྤྲོས་བྲལ་སྟོང་པ་ཉིད་ཟིན་པར་བྱའོ། །ཟིན་ནས་ཀྱང་ངོ་ཤེས་པར་བྱའོ་སྙམ་པའི་འཕེན་པ་དུང་དུང་པ་ཡང་ཡང་བྱའོ། །དེ་ནས་གཉིད་ཐུམ་ཐུམ་བྲོ་བའི་དུས་དང༌། ཡུལ་གྱི་གནད་ནི་ཨ་ནུ་ཏ་ར་བཞི་ལ་སེམས་བཟུང་བས། གཉིད་ཀྱི་འོད་གསལ་བདེ་སྟོང་དབྱེར་མེད། འོད་གསལ་གྱི་ཉམས་མྱོང་ཕྲིལ་བ་སྐྱེས་པའོ། །དེ་ལྟར་གཉིད་ཀྱི་འོད་གསལ་དེ་ཟིན་ནས། བརྩོན་འགྲུས་བྱས་ནས་བསྒོམ་ན་ཚེ་འདི་ལ་འཚང་རྒྱའོ། །ལེ་ལོ་ཅན་བར་དོར་

XXX འཚང་རྒྱ། འདའ་ཀ་མ་རིག་པའི་འོད་གསལ་དང་གཉིད་དུ་བསྲེ་བ་འབྲེལ། གཉིད་དང་བསམ་གཏན་བསྲེ་བ་འོད་གསལ་གྱི་རྫོགས་རིམ་མོ། །གདམས་ངག་བསྲེ་འཕོ་གཉིས་ལས་དེས་བསྲེ་བ་བསྟན་ནས། ད་འཕོ་བ་བསྟན་པ་ནི། འཆི་བར་བསླུ་བར་མ་ནུས་ན། །འཕོ་བ་རྣམ་པ་གསུམ་ཡིན་ཏེ། །དང་པོ་སྙིང་ཁ་ལྟེ་བའོ། །དང་པོ་སྦྱོར་བ་སྒོ་དགུ་དགག །ཁ་དོག་སེར་པོ་འབར་བ་ཡི། །ཀ་ཥ་གཉིས་འགྱུར་ཡི་གེ་ནི། དྲང་པོར་ལྡན་པའི་ས་བོན་གྱིས། །ཚངས་པའི་སྒོ་རུ་དེས་བསྲུང་ངོ༌། །དྲིལ་བུའི་ཡི་གེ་མིག་ལའོ། །ཞེས་པ་ནས། ལུས་ལ་རླུང་གི་ས་བོན་དང༌། ཞེས་པའི་བར་གྱིས་སྒོ་དགག་པ་བསྟན་ནོ། །དེ་ལྟར་རབ་འབྲིང་དགུ་ཡི་སྒོ་དགག་པ་བསྟན་ནས། དེ་ནས་དངོས་གཞི་ལ། སྙིང་ཁ་ནས་འཕོ་བ་དང༌། ལྟེ་བ་ནས་འཕོ་བ་བསྟན། དེས་འཕོ་བ་དང་པོ་བསྟན་ནས། གཉིས་པ་ཉལ་ཐབས་ཀྱི་འཕོ་བ་དང་རྩོལ་བས་འཕོ་བའོ། །གྲོང་འཇུག་ནི་སྦྱར་བ་དང་གཅིག །ལས་ལ་སྦྱར་བ་དང་གཉིས། ལས་ལ་སྦྱར་བ་ལ་གསུམ། རྣམ་ཤེས་ཐོང་གཞན་དུ་འཇུག་པ་དང༌། དེ་ཉིད་གཞན་གྱི་སེམས་ཤེས་པའི་མངོན་ཤེས་བསྒྲུབ་པ་དང༌། རྒྱལ་པོ་ལ་སོགས་པ་དབང་བྱ་བའོ། །དེ་དག་གི་དོན་ཞལ་ནས་བླང༌། དེ་ཡན་ཆད་དུ་ལྟ་བའི་དོན་གདམས་ངག་རྣམ་པ་ལྔ། གནད་ཀྱི་གཟེར་བུ་ཆུང་བཞི་སྟེ་དགུ། བསྲེ་ཕོ་ཡན་ཆད་དུ་བདུན་ཏེ་བཅུ་དྲུག་དེ་གཞུང་ནན་ཡོད་པའི་ཆོས་ཚིག་ལགས་སོ། །གོ་ཆ་བཞི་མ་རིག་པ་རྩད་གཅད་པ་ལྔ་ནི་ཞལ་ལ་བླང་ངོ༌། །གནོད་སྦྱིན་མོ་ལ་བསྲེ་ཕོའི་གདམས་ངག་དེ་མངོན་དུ་གྱུར་ནས། ལུས་ངན་པ་སྤངས། རྣལ་འབྱོར་མ་སུ་མ་ཏི་བྱ་བའི་ལུས་ལ་འཕོ་བ་བྱས་ནས་གནས་ཆེན་

XXX ཐམས་ཅད་དུ་རྒྱུ་ཞིང༌། བླ་མ་རྣམས་ལ་བསྙེན་བཀུར་བྱེད་པའི་དུས་སུ། ནུབ་ཕྱོགས་ཁ་ཆེར་ནཱ་རོ་པ་ལ་ལུང་བསྟན་ཏེ། །གཏི་མུག་ཟད་ཅིང་ལྟ་བ་རྟོགས་པ་འདོད་པ་དང༌། །ལམ་མེད་ལམ་ལ་སྦྱོར་བར་འདོད་པ་རྣམས། །ཤར་ཕྱོགས་ཏེ་ལོ་ཞེས་པའི་གྲོང་ཁྱེར་དུ། །རྡོ་རྗེ་འཆང་ཆེན་སངས་རྒྱས་ཏེ་ལོ་པ། །ལམ་འབྲས་མངོན་དུ་གྱུར་བྱེད་དེ་ལ་བཏུག་ན་རུང༌། །ཞེས་ལུང་བསྟན་ནོ། །གནོད་སྦྱིན་མོའི་མིང་དུ་ཡང་རྣལ་འབྱོར་མ་སུ་མ་ཏི་བྱ་བར་གྱུར་ནས་དུར་ཁྲོད་ས་ལའི་ནུབ་ཕྱོགས། སར་རེ་བར་ཐ་བྱ་བའི་གྲོང་དུ། རྣལ་འབྱོར་ཕོ་བདུན་མོ་བདུན་ལ་ཉམས་ཐམས་ཅད་ནོར་བུ་ལུགས་སུ་གསུངས་པས་དེ་ཐམས་ཅད་ཀྱང་གྲོལ་ཞིང་སྨིན་པར་བྱས་སོ། །དེ་ལྟར་གཞུང་ཆུང་དུ་བཅུ་དྲུག་བསྟན་ནོ། །མཇུག་གི་དོན་དགེ་བའི་རྩ་བ་ཆ་ཕྲ་བ་མ་ཡིན་པར་བླ་ན་མེད་པའི་དོན་དུ་སྔོ་བ་བསྟན་ཏོ། །རིན་པོ་ཆེའི་ཕྲེང་བའི་བཤད་ཊཱི་ཀ་རྫོགས་སོ། །བླ་མ་ཨ་བྷ་ཡ་ཤྲཱིས་གསུངས་པ། མེ་ཉག་ལོ་ཙཱ་བས་བསྒྱུར་བའོ།། །།གནོད་སྦྱིན་མོའི་རྟོགས་པ་རིན་ཆེན་ཕྲེང་བའི་ཞལ་གདམས་བཞུགས་སོ། །བླ་མ་རྣམས་ལ་ཕྱག་འཚལ་ལོ། །ཆོས་ཀྱི་ཕྱག་རྒྱ་ལ། བདག་བྱིན་གྱིས་བརླབས་པའི་ཆོས་བཞི་ལས། དང་པོ་རྨི་ལམ་ལམ་དུ་འཁྱེར་བའོ། །དེ་ལ་སྦྱོར་བ་དང་དངོས་གཞི་གཉིས་ལས། དང་པོ་སྦྱོར་བ་ནི། བླ་མ་དང་དཀོན་མཆོག་ལ་དད་གུས་བྱ་བ་དང༌། ཡི་གེ་བརྒྱ་པ་བཟླས་པ་ལ་སོགས་པ་དམ་ཚིག་ཉམས་པ་བཤགས་པར་བྱའོ། །དངོས་གཞི་ལ་བཞི་སྟེ། དང་པོ་རྨི་ལམ་བཟུང་བ་དང༌། གཉིས་པ་སྦྱང་བ་དང༌། གསུམ་པ་སྒྱུ་མར་བསླབ་ཅིང་ཡང་བསླང་པ་དང༌། བཞི་པ་དེ་ཁོ་ན་ཉིད་བསྒོམ་པའོ། །དེ་ལ་བཟུང་བའི་དུས་སུ་སྔོན་དུ་དད་པ་དང་འདུན་པ་དྲག་པོ་ཡིད་ལ་བྱའོ། །

XXX དེ་རྣམས་མལ་སྟན་འབོལ་བ་སྔས་འབོལ་བ་མཐོ་བར་བྱས་ལ། གཞོགས་གཡས་པ་ས་ལ་ཕབ་སྟེ། ལག་པ་གཡོན་པ་བརླའི་སྟེང་དུ་བརྐྱང་ལ། ལག་པ་གཡས་པ་འགྲམ་པ་ལ་སྦྱར་ལ་ཉལ་ལོ། །མགྲིན་པར་པདྨ་དམར་པོ་འདབ་མ་བཞི་པ་བསྒོམ། དེའི་ལྟེ་བ་ལ་ཨ་དཀར་པོ་གཅིག་བསམ་སྟེ། དེ་ཡང་སྲོད་ལ་སྨིན་པར་དུ་ཐིག་ལེ་དཀར་པོ་གཅིག་ལ་ཤེས་པ་གཏད་ལ་གཉིད་ཉལ་ལོ། །དེ་ནས་ཐོ་རངས་ཀྱི་དུས་སུ་ཨ་ལ་སེམས་བཟུང་སྟེ། རྨི་ལམ་ལ་རྨི་ལམ་དུ་མ་ཤེས་ན་སད་པ་དང༌། ད་ཅི་རྨི་ལམ་ལ་རྨི་ལམ་དུ་མ་ཤེས་སྙམ་པའི་འདུན་པ་དྲག་པོ་བྱའོ། །ནང་པར་གྱི་དུས་སུ་ཡང༌། སྣང་སྲིད་ཐམས་ཅད་རྨི་ལམ་དང་འདྲ་བར་ཤེས་པར་བྱ་སྟེ། མདང་གི་རྨི་ལམ་དང་ཁྱད་མེད་སྙམ་དུ་བསམ་ཞིང་ཉིན་པར་གྱི་དུས་སུ། དོ་ནུབ་རྨི་ལམ་ལ་རྨི་ལམ་དུ་ཤེས་པར་བྱ་སྙམ་པའི་འདུན་ཡང་དང་ཡང་དུ་བྱའོ། །དེ་ལྟར་ཉིན་མཚན་དུ་བྱས་པས་རྨི་ལམ་ཟིན་ཏེ་འོང༌། ཟིན་པའི་རྟགས་ནི་རྨི་ལམ་དུ་མི་འཚམ་པ་ལ་སོགས་པ་འབྱུང་སྟེ། དེ་ཡང་ཆུ་ཆེན་པོ་དང༌། གཡང་ལ་མི་ཐར་བ་དང༌། ཁྱིས་དེད་པ་དང༌། ལུས་ལ་འོད་འབྱུང་བ་དང༌། དེ་ལ་སོགས་པ་སྣ་ཚོགས་པ་རྨི་བ་འབྱུང་སྟེ། དེའི་རྐྱེན་གྱིས་རྨི་ལམ་ཡིན་སྙམ་པའི་ཤེས་པ་འགའ་འབྱུང་ངོ༌། །དེ་ལྟར་འབྱུང་བ་དང་རྨི་ལམ་གྱི་དུས་སུ་ཆོས་ཐམས་ཅད་རྨི་ལམ་དང་འདྲ་ཞེས་བཤད་པ་དེའི་བདེན་སྙམ་པའི་འདུན་པའམ་མོས་པ་དྲག་པོ་བྱའོ། །ནང་པར་མདང་གི་རྨི་ལམ་དྲན་པར་བྱ་སྟེ། མདང་གི་རྨི་ལམ་དེ་དག་ད་ལྟར་གྱི་ཤེས་པ་འདི་ལ་ཁྱད་ཅི་ཡོད་སྙམ་པའི་འདུན་པ་དྲག་ཏུ་བྱའོ། །རྨི་ལམ་ཟིན་ནོ། །དེ་ནས་ཟིན་ནས་སྲོད་ཀྱི་དུས་རང་ནས་རྨི་ལམ་རྨི་ལམ་དུ་ཤེས་པར་བྱའོ་སྙམ་པའི་འདུན་པ་དྲག་པོ་བྱའོ། །དེ་ནས་

XXX རྨི་ལམ་སྦྱང་བ་ནི། རྨི་ལམ་ཡིན་པས་ཇི་ལྟར་ཡང་བྱར་བཏུབ་སྙམ་པའི་འདུན་པ་དྲག་པོ་བྱ་སྟེ། རྨི་ལམ་གྱི་དུས་སུ་ཆུར་མཆོང་བ་དང༌། མེར་མཆོང་བ་དང༌། གཡང་ལ་འཛེགས་པ་དང༌། སུམ་ཅུ་རྩ་གསུམ་གྱི་གནས་བལྟ་བ་དང༌། རྒྱ་གར་གྱི་ཡུལ་ཐམས་ཅད་བལྟ་བ་དང༌། ཉི་ཟླ་རྐང་པས་མནན་པ་དང༌། ཡི་དམ་ལྷའི་ཞལ་ལྟ་ཞིང་ཆོས་ཉན་པ་དང༌། དེ་བཞིན་གཤེགས་པའི་ཞིང་ཁམས་ལྟ་ཞིང་དེ་དག་ལ་ཆོས་ཉན་པ་དང༌། རང་གི་སེམས་ཅི་མནོ་བ་ཐམས་ཅད་བྱའོ། །དེ་བཞིན་དུ་གོམས་པས་བསླབ་པ་ནི་རྨི་ལམ་སྦྱོང་བའོ། །དེ་ནས་རྨི་ལམ་སྒྱུ་མར་ཤེས་པར་བྱ་ཞིང་ཡ་ང་བ་སྤང་བ་ནི། སྦྱོར་བའི་དུས་སུ་ཆུར་མཆོང་བ་བྱས་པས། ད་རུང་དུ་ཡ་ང་དང་བག་ཚ་བའི་འཇིགས་པ་ཡོད་པ་སྙམ་བྱེད་ན། རྨི་ལམ་ཡིན་སྒྱུ་མ་ཡིན་པས་དེ་འཇིགས་རྒྱུ་ག་ལ་ཡོད་སྙམ་དུ་བསྒོམ་པས་ཡ་ང་བ་མེད་པར་བྱའོ། །དེ་ནི་རྨི་ལམ་སྒྱུ་མར་ཤེས་པར་བྱའོ། །དེ་ནས་དེ་ཁོ་ན་ཉིད་བསྒོམ་པ་ནི། རྨི་ལམ་ཡིན་པས་སྦྱང་དུ་ཡང་ཅི་ཡོད་དེ་རང་སེམས་ཀྱི་འཁྲུལ་པར་ཤེས་པར་བྱ་སྟེ། དེ་ཁོ་ན་ཉིད་བསྒོམ་པའོ། །དེ་བསྒོམ་ཐབས་ནི་རང་གིས་སྔར་གང་བསྒོམས་པ་དེ་བསྒོམ་ལ། དེ་མིན་ན་རང་གི་དཔྲལ་བའི་ཐིག་ལེའམ་གསང་བའི་ཐིག་ལེ་གང་ཡང་རུང་བར་ཤེས་པ་གཏད་དེ་བདེ་སྟོང་ལ་མོས་པ་བྱས་པ་ཙམ་གྱིས་ཤིན་ཏུ་བདེ་བ་ཆེར་འབྱུང་ངོ༌། །དེ་ནི་རྨི་ལམ་དུ་དེ་ཁོ་ན་ཉིད་བསྒོམ་པའོ། །དེ་ནི་རྨི་ལམ་དུ་འཁྱེར་བ་སྟེ་ཚེ་འདི་ལ་བསླབ་པའོ། ། ༈ གཉིད་འཐུག་པོར་འོད་གསལ་དུ་གཞུག་པའི་མན་ངག་ནི། དང་པོར་གཉིད་ཉལ་བ་སྟེ། དེ་ཡང་དང་པོ་ཞག་གསུམ་ཙམ་དུ་ལུས་ཐང་ཆད་དུ་བཅུག་ལ། དེའི་དུས་སུ་ནུབ་མོ་གཉིད་བསྲུང་སྟེ། དགེ་སྦྱོར་ཅི་ནུས་ཀྱང་བྱ། དེ་ནས་ལུས་ལ་བསྐུ་མཉེ་ཡང་

XXX བྱ། ཁམས་བརྟས་སུ་ཡང་བཅུག་ལ། ལུས་ཀྱི་གཞོག་གཡས་པ་ས་ལ་ཕབ་ལ་ཉལ་བར་བྱའོ། །དུས་ནི་གཉིད་ཀྱི་དུས་སོ། །ཡུལ་ནི་སྙིང་ཁ་སྟེ། སྙིང་གའི་འཁོར་ལོ་པདྨ་བཞི་ལ་ཨ་ནུ་ཏ་ར་བཞི་བསྒོམ། ཧཱུྃ་དབུས་སུ་བསམ་ཏེ་ཐ་མལ་གྱི་དུས་སུ་མདུན་གྱི་ཨ་ལ་སེམས་གཏད་དོ། །དེ་ནས་ཕུང་པོ་ཁམས་དང་སྐྱེ་མཆེད་ལ་སོགས་པའི་རྟོག་པ་རགས་པ་ནུབ་པར་གྱུར་ནས། གཉིད་ཧྲི་བ་ཡོང་དུས་སུ་ནུ་ལ་སེམས་བཟུང་སྟེ་སེམས་སྣང་བ་ཞེས་བྱའོ། །དེ་ནས་རྣམ་རྟོག་ཕྲ་བ་ནུབ་དུས་སུ་ཏ་ལ་དམིགས་ཏེ་སེམས་སྣང་བ་མཆེད་པ་སྟོང་པ་ཆེན་པོའོ། །དེ་ནས་རྟོག་པ་ཤིན་ཏུ་ཕྲ་བ་ནུབ་དུས་གཉིད་ཧྲི་བ་བྱུང་དུས་ན་ར་ལ་དམིགས་ཏེ་སྣང་བ་ཐེབ་པ་ཞེས་བྱ་སྟེ། ཤིན་ཏུ་སྟོང་པའོ། །དེ་ནས་གཉིད་ཧྲུལ་གྱིས་འགྲོ་དུས་སུ་ཤེས་པ་ཧཱུྃ་ལ་བསྡུ་སྟེ། དེར་བདེ་སྟོང་གི་ངོ་བོ། ལྷན་གྱིས་ཉལ་བས་གཉིད་ཀྱི་རོ་བདེ་སྟོང་དུ་སྐྱེད་པའི་བདེ་སྟོང་འོད་གསལ་གྱི་ཉམས་འོང་ངོ༌། །དེའི་དུས་སུ་རྨི་ལམ་ནི་བསྲུང་སྟེ་འདིའི་འགལ་རྐྱེན་དུ་བཞེད་དོ། །དེ་ནས་གཉིད་ཐུན་གཅིག་ལོག་ལ་སློང་དུ་བཅུགས་མ་རིག་པའི་གཉིད་དུ་སོང་ངམ་མ་སོང་བལྟ་བར་བྱས་ལ་སྔར་བཞིན་ཉལ་ལོ། །དེའི་ནུབ་མོ་ཐུན་བཞིའམ་ལྔ་ཅི་རིགས་པར་ཉལ་ལོ། །དེ་ནས་ཕྱིས་ཐུན་གཉིས་སམ་གསུམ་ལ་སོགས་པར་བསྒོམ་པར་བྱ་ཞིང་ཉལ་ཏེ། སྔར་བཞིན་དུ་ཕུང་པོ་ལ་སོགས་ནི་ཁམས་ཕྲ་བ་འཇུག་གོ །ཁམས་ཕྲ་བ་སེམས་ལ་གཞུག་གོ །སེམས་ནི་ཡང་སེམས་ལ་གཞུག་གོ །སེམས་པ་ཡང་མ་རིག་པ་ལ་གཞུག་སྟེ། དེ་ལྟར་གཉིད་ལོག་པས་མ་རིག་པ་ངང་གིས་འགགས་ཤིང་རྣམ་རྟོག་གི་དྲན་པ་བརྗེད་པ་འོང་ངོ༌། །དེའི་འབྲས་བུ་ནི་ཡེ་ཤེས་ཀྱི་རང་བཞིན་འོད་གསལ་བར་འཆར་བར་འོང་ངོ༌། །མ་རིག་པའི་

XXX གཉིད་ལྕགས་ཀྱུ་དང་འདྲ་བ་དེ་བཟུང་ནས་བདེ་སྟོང་གི་ངང་དུ་ཉལ་བས་རྣམ་པར་ཤེས་པ་གང་ལ་ཡང་འདྲེ་བར་མི་བྱེད། འོད་གསལ་གཉིད་མངོན་སུམ་དུ་ཉམས་སུ་མྱོང་བར་འགྱུར་ཞེས་སོ། །དེ་ནས་གཉིས་སད་པའི་རྗེས་ཐོབ་ནི་འདི་ལྟར་བསྒོམ་སྟེ། མདུན་དུ་ཡི་དམ་ལྷའི་ཐང་ཀ་བཀྲམ་ལ། དེ་ལ་སེམས་རྩེ་གཅིག་པས་བལྟས་ལ། དེ་རང་ཉིད་ལ་ཚུལ་གསལ་བར་བསྒོམ་མོ། །གསལ་བར་འདུག་ན་གསལ་བ་དེ་ཉིད་བདེ་སྟོང་དུ་ལྷན་གྱིས་མི་དམིགས་པར་བསྒོམ་ལ། ཡང་སླར་གསལ་བར་བྱ་བ་སྟེ་ཐད་ཀ་ལ་བལྟ། དེ་ནས་ཐད་ཀ་ཁོ་ན་བཞིན་གསལ་བར་བསྒོམ་ལ་དེ་ཉིད་བདེ་སྟོང་དུ་ལྷན་གྱིས་བསྒོམ་སྟེ། དེ་ཡང་སྟོང་ཉིད་ངང་ལས་རོ་བདེ་བར་ཕྲིལ་ཕྲིལ་ཤར་བར་བསྒོམ་མོ། ད་ལྟར་དེ་རང་བདེ་སྟོང་དུ་བསྒོམས་པས། གོམས་པའི་ཚད་ནི་རང་ཉིད་བདེ་སྟོང་སྐྱེ་མེད་དུ་གནས་ལ་རོ་བདེ་བར་ཤར་བའོ། །དེའི་དུས་སུ་ནུབ་མོ་ལ་སོགས་པ་གཉིད་ཉལ་དུས་སུ་གཉིད་ལ་བསྒོམ། རྗེས་ཐོབ་ལ་དེ་ལྟར་བསྒོམས་པས་ལུས་ཡངས་བདེ་བ་ལ་སོགས་པའི་རྟགས་ཡོང༌། སྣང་བ་ཐམས་ཅད་བདེ་སྟོང་དུ་ལྷང་ལྷང་ཤར་བ་འོང་ངོ༌། །ཚེ་འདི་ཉིད་ལ་འོད་གསལ་དུ་གནས་ཏེ་མཆོག་གི་དངོས་གྲུབ་ཐོབ་པར་འགྱུར་རོ། །གལ་ཏེ་ཚེ་འདི་ལ་མ་ཐོབ་ཀྱང་བར་དོར་ཤེས་པ་འོད་གསལ་དུ་ཟིན་པ་འོང༌། དེ་ནས་བར་དོ་ནས་སངས་རྒྱས་ཏེ། རང་ལ་དབང་མེད་པར་མངལ་དུ་འཇུག་མི་སྲིད་དོ། །གལ་ཏེ་མངལ་དུ་ཞུགས་ཏེ་ལུས་ལན་དུས་ན་ཡང་གཞན་གྱི་དོན་དུ་རང་ལ་དབང་ཡོད་པས་རང་དགར་ཞུགས་ཏེ་ལུས་ལེན་པ་ནི་སྒྱུ་ལུས་བསྒོམ་པའི་གང་ཟག་དང་གཉིད་འོད་གསལ་དུ་བསྒོམ་པའི་གང་ཟག་དང་ལྡན་པ་གཉིས་སྲིད་ཀྱིས་དེ་མ་ཡིན་ན་ལུས་ལེན་མི་སྲིད་གསུངས། སློབ་

XXX དཔོན་ལྭ་བ་པས་ཀྱང་ལོ་བཅུ་གཉིས་ཀྱི་བར་དུ་གཉིད་ལོག་པས་མཆོག་ཐོབ་གསུངས། དེ་ནི་སྒྱུ་ལུས་དང་གཉིད་འོད་གསལ་དུ་གཞུག་པ་གཉིས་ཆར་གྱི་བསྒོམ་པའོ། ། ༈ ན་མོ་གུ་རུ། བར་དོ་གསུམ། སྒྱུ་ལུས་གསུམ། མངོན་དུ་བྱ་བ་གསུམ། བསྲེ་བ་གསུམ། མཚམས་སྦྱོར་གསུམ། དེ་ལ་སྐྱེ་ཤི་བར་དོ། ལུས་རྣམ་སྨིན་གྱི་ལུས། མངོན་དུ་འོད་གསལ་བྱ། བསྲེ་བ་ནི་འདོད་ཆགས་དང་བསྲེའོ། །དེ་ལས་འདོད་ཆགས་དང་བསྲེ་བ་ནི། གྲོལ་ལམ་པས་གཏུམ་མོ་ལ་བརྟེན་ནས་བསྒོམ་པས་ལུས་བདེ་བས་རྒྱས་ཏེ། དེ་ལ་མ་ཞེན་པར་འོད་གསལ་དུ་འཁྱེར་བའོ། །མཚམས་ནི་བླ་མའི་གདམས་ངག་གི་སྦྱར་བའོ། །བར་དོ་རྨི་ལམ་གྱི་བར་དོ། ལུས་བག་ཆགས་ཀྱི་ལུས། མངོན་དུ་རྨི་ལམ་བྱ། བསྲེ་བ་གཏི་མུག་དང་བསྲེ་བའོ། །གཏི་མུག་དང་བསྲེ་བ་ནི་གཉིད་ཐུག་པོའམ། ཟང་ཟིང་དུ་བཏང་བར་སྲ་བ་འཐུག་དྲན་པ་ལ་རྨི་ལམ་སྦྱང་ངོ༌། །མཚམས་ནི་དྲན་པ་དང་འདུན་པས་སྦྱར་རོ། །བར་དོ་ནི་སྲིད་པའི་བར་དོ། ལུས་ནི་ཡིད་ཀྱི་ལུས། མངོན་དུ་འོད་གསལ་བྱ༌། བསྲེ་ན་ཞེ་སྡང་དང་བསྲེ། ཞེ་སྡང་དང་བསྲེ་བ་ནི་བར་དོ་ཐ་མའི་དུས་སུ། ཕ་ལ་ཞེ་སྡང་མི་བསྐྱེད། མ་ལ་འདོད་ཆགས་མི་བསྐྱེད་པར་འོད་གསལ་དུ་འཁྱེར་བའོ། །བླ་མ་དང་ཡི་དམ་སྔར་བཞིན་ནོ། །མཚམས་ནི་ཕ་མ་ཡབ་ཡུམ་གཉིས་ཀྱིས་སྦྱར་རོ། ། ༈ ན་མོ་གུ་རུ། ཤོར་ས་བཞི་དང་གོལ་ས་གསུམ་སྤངས་ནས། བཞག་པར་མ་ལྟེངས། བཏང་བར་མ་འབྱམས། བཏང་སྙོམས་ཀྱི་ཤེས་པ་ལས་ལོག་པའི་ཤེས་པ་མ་བཅོས་པ་ལ་གཡར་བ་བག་ཐོན་པར་བྱས་ལ་བསྒོམ་པས་རྣལ་འབྱོར་རྣམ་པ་བཞི་བསྐྱེད་གསུངས་ཏེ། དེ་ལ་དང་པོ་ཤོར་ས་གཞི་ལ་

XXX སྟོང་པ་ཉིད་ཤེས་བྱའི་གཤིས་ལ་ཤོར་བ་ན། མཚན་ཉིད་པའི་ལུགས་གཅིག་དང་དུ་བྲལ་གྱིས་སྟོང་ཉིད་དུ་གཏན་ལ་ཕབ་ནས། སྟོང་པ་ཉིད་ནམ་མཁའི་དཀྱིལ་ལྟ་བུ་དེ། རྣམ་རྟོག་གིས་བྱས་པས་རྟོག་པ་བསྒོམ་པ་ཡིན། སྔགས་པས་ཕྱི་སྣོད་ནང་བཅུད་ལ་རིམ་གྱིས་བསྡུས་པའམ། སྭ་བྷཱ་ཝ་ལ་སོགས་པ་སྔགས་ཀྱི་སྒོ་ནས་བློས་སྟོང་པ་ཉིད་ནམ་མཁའ་རྣམ་པར་དག་པ་ལྟ་བུར་བྱས་ནས་དེ་ལ་བློས་འཇོག་པའོ། །དེ་གཉིས་ཀ་བློས་བྱས་ཡིན་པས་ཤོར་ས་ཡིན་ནོ། །གཉིས་པ་སྟོང་པ་ཉིད་རྒྱས་འདེབས་སུ་ཤོར་བ་ནི། སྦྱིན་པ་ལ་སོགས་པ་གཏོང་བའི་ཡུལ་དང༌། གཏོང་མཁན་དང༌། དངོས་པོ་ཐམས་ཅད་མི་དམིགས་པར་སྟོང་པ་ཉིད་དུ་རྒྱས་བཏབ་ནས་བསྒོམ་པ་ཡིན་ཏེ། དེ་ཡང་བློས་བྱས་ཡིན་པས་སོ། །གསུམ་པ་སྟོང་པ་ཉིད་ཉོན་མོངས་པའི་གཉེན་པོར་ཤོར་བ་ནི། འདོད་ཆགས་ལ་སོགས་པ་གང་སྐྱེས་ཀྱང༌། དེ་དང་པོ་གང་ནས་མ་སྐྱེས། ད་ལྟ་ཅིའི་ངོ་བོར་ཡང་མ་གྲུབ། ཐ་མ་འདིར་འགགས་བྱ་བའི་འགགས་པ་མེད་པར་སྟོང་པ་ཉིད་དུ་བློ་ཡིས་འཇོག་པའོ། །བཞི་པ་སྟོང་པ་ཉིད་ལམ་དུ་ཤོར་བ་ནི། གང་ཚེ་སྟོང་པ་ཐབས་ཡིན་ན། །དེ་ཚེ་སངས་རྒྱས་ཉིད་མི་འབྱུང༌། །རྒྱུ་ལས་འབྲས་བུ་གཞན་ཡིན་ཕྱིར། །ཐབས་ནི་སྟོང་པ་ཉིད་མ་ཡིན། །ཞེས་པ་སྟེ། འབྲས་བུ་ཆོས་སྐུ་བཟང་པོ་གཅིག་གུད་ན་ཡོད་པར་བྱས་ནས། དེའི་ལམ་དུ་སྟོང་པ་ཉིད་བློ་ཡིས་བྱས་ནས་བསྒོམ་པས་ཀྱང་ཆོས་སྐུ་དེ་མི་ཐོབ་པའོ། །ཤོར་ས་དེ་བཞི་སྤངས་བའི་གནས་ལུགས་ནི་རྟོག་པ་ཐམས་ཅད་དང་བྲལ་བའི་བློའི་ཡུལ་ལས་འདས་པའོ། །གོལ་ས་བཞི་ནི། བླ་མ་དམ་པ་གཅིག་གིས་སྤྱན་སྔར་བསྒོམ་ཁྲིད་པས། བདེ་བ་ཉམས་སུ་མྱོང་བ་སྐྱེས་ནས། བླ་མ་འདི་བསྒོམ་ལགས་སམ་མ་ལགས་ཞུས་པས།

XXX དེ་ཡིན་པས་སྐྱོང་ཤིག་གསུངས་ནས་སྐྱོང་བའི་ཚེ། བདེ་བ་ཕྲིལ་ཕྲིལ་བྱུང་ན་དགའ་མི་དགའ་གཉིས་དང་བཅས་པའི་ཚུལ་གྱིས་ཉམས་སུ་བླངས་པས་འདོད་ཁམས་སུ་གོལ། དེ་བཞིན་དུ་མི་རྟོག་པ་གོང་མ་བཞིན་དུ་ཉམས་སུ་བླངས་པས་གཟུགས་མེད་དུ་གོལ། དེ་བཞིན་དུ་གསལ་བ་སྐྱེས་ནས་ཉམས་སུ་བླངས་པས་གཟུགས་ཁམས་སུ་གསོལ། དེ་གསུམ་དབྱེར་མེད་ལ་ཆགས་ཤིང་ཞེན་ན་ཉན་ཐོས་དང་རང་སངས་རྒྱས་སུ་གོལ་ཏེ་བློས་བྱས་པ་ཡིན་པས་སོ། །དེ་རྣམས་སྤངས་པའི་ཤེས་པ་མ་བཅོས་པ་ལ་བཞག་པས་བཞག་པར་ལྟེངས་པ་ནི་མི་རྟོག་པ་ལྟེང་ངེ་འདུག་གོ །བཏང་སར་འབྱམས་པ་ནི། རྟོག་པ་གཅིག་རྟིང་ནས་བརྒྱུད་མར་བྱུང་བའོ། །བཏང་སྙོམས་གནོད་སྦྱིན་རྟོག་པའི་ཞལ་གྱི་གདམས་ངག། དགེའོ། །

Other Information

Information about Unicode Tibetan and the digitization of this text

As the only available unicode Tibetan text at the time, Nitartha International's version of the Gdams ngag mdzod Paro Edition of the gdams ngag mdzod is provided here. However, note that it has not been thoroughly edited and that there may also be mistakes introduced through the conversion process. Eventually we will provide a fully edited version of the entire Shechen Edition, entered and edited multiple times by Pulahari Monastery in Nepal, but as of spring 2015 that project has not been finished. Note that the ཤོག་ལྷེ་ numbers that appear throughout were added by Nitartha Input Center at the time of input. Provided by Nitartha International Document Input Center. Many thanks to Person:Namdak, Tenzin and Person:Wiener, G. for help with fonts and conversion.