Wylie:Rtogs pa brjod pa sum cu pa'i do ha rdo rje'i tshig 'bru rnam par bshad pa

From gDams Ngag mDzod
Jump to navigation Jump to search


Upload a file
Click the picture above to view the original manuscript.

རྟོགས་པ་བརྗོད་པ་སུམ་ཅུ་པའི་དོ་ཧ་རྡོ་རྗེའི་ཚིག་འབྲུ་རྣམ་པར་བཤད་པ་
rtogs pa brjod pa sum cu pa'i do ha rdo rje'i tshig 'bru rnam par bshad pa
An Explanation of the Words of the Vajra Song Thirty Verses Expressing Realization

Damngak Dzö Volume 16 (མ་) / Pages 512-523 / Folios 8b1 to 14a2


Property "Author" has a restricted application area and cannot be used as annotation property by a user.


[edit]
512 ༈ རྗེ་བཙུན་སྐུ་དྲིན་རྣམས་ལ་ཕྱག་འཚལ་ལོ། །ཐུགས་རྗེའི་དབང་ཕྱུག་སྤྱན་རས་གཟིགས་དཔལ་དང༌། །ཤེས་རབ་མཐར་ཐུག་རོ་གཅིག་རལ་གཅིག་མས། །བྱིན་རླབས་གྲུབ་ཆེན་རྒྱལ་པོ་མི་ཏྲ་ཤྲཱིའི། །ཞབས་པད་རྡུལ་ལ་རབ་གུས་སྤྱི་བོས་འདུད། །རྣལ་འབྱོར་གྱི་དབང་ཕྱུག་བརྒྱད་ཅུ་རྩ་ལྔ་པ་དེའི་རྟོགས་པ་བརྗོད་པ་འདི་ནི་རེ་ཞིག་ཐོག་མ་ཁོ་ནར། །གཙུག་ལག་ཆེན་པོ་དཔལ་ཁ་སར་པ་ཎིར་སྤྱན་རས་གཟིགས་དབང་ཕྱུག་ལོ་བཅུ་གཉིས་སུ་སྒྲུབས་པའི་ཚེ། མཐར་རྡོ་རྗེའི་ཤིང་གཏན་སྐུ་ཁྲུས་ཀྱི་མེ་ལོང་དང་བཅས་པའི་སྟེང་དུ་འཇིག་རྟེན་མགོན་པོ་རྡོ་རྗེའི་སྐུ་བྱད་བསམ་གྱིས་མི་ཁྱབ་པའི་གཟི་བརྗིད་འབར་བ། ཁྲུ་དོ་མཛུབ་གང་ཙམ་གྱི་ཚད་དངོས་སུ་གཟིགས་ནས། དེས་སེམས་ངལ་སོས་པར་བྱེད་པའི་དོ་ཧ་ཚིགས་སུ་བཅད་པ་ཉི་ཤུ་རྩ་ལྔ་པ་གསུངས་སོ། །དེའི་ཚེ་དེ་མ་ཐག་སྟོང་པ་དང༌། སྙིང་རྗེ་ཟུང་དུ་འཇུག་པའི་རྟོགས་པ་བླ་ན་མེད་པ་འཁྲུངས་ཏེ། འོན་ཀྱང་སྤྱན་རས་གཟིགས་ཀྱི་སྐུ་གཟུགས་མི་སྣང་བར་གྱུར་བ་ལ་ཡིད་ལ་གདུང་བ་སྐྱེས་པ་ལས། ལྷར་ནང་དུ་རང་ལ་རང་གིས་བལྟས་ཏེ། མཉམ་པར་བཞག་པས། སྔར་ཐོབ་པའི་གསུང་དབྱངས། དོ་ཧ་རྡོ་རྗེའི་མགུར་གྱིས་ཉམས་མྱོང་སྐྱེད་པའི་མངོན་རྟོགས་པ་ནི་དཔེར་ན་ཆུ་མཚོ་དྭངས་པ་ལས་ཟླ་བའི་གཟུགས་སམ། རྒྱས་བཏབ་པ་ལས་འབུར་བཞིན་དུ་གསལ་ཞིང་སྒྲིབ་པ་མེད་པར་སྣང་བ་དང༌། ཟག་པ་མེད་པའི་དགའ་བ་དེས་ཐུགས་ཚིམ་ཞིང་རངས་ཏེ། སྤང་ལ་ཤ་མོ་རྡོལ་བ་བཞིན། རྟོགས་པ་བརྗོད་པའི་ཚིག་ཤ་ལོ་ཀ་སུམ་ཅུ་པོ་འདི་དག་ཐུགས་ལ་ཤར་ནས་ཞལ་དུ་ཕྱུང་བ་ཡིན་ནོ། །དེའང་དོན་གསུམ་གྱི་ངེས་པར་བྱ་སྟེ། དང་པོ་བཀའ་དྲིན་དྲན་པའི་རྟོགས་པ་བརྗོད་པ་
513 པ་དང༌། བར་དོ་ངོ་འཕྲོད་པའི་རྟོགས་པ་བརྗོད་པ་དང༌། ཐ་མ་སྒྲུབ་པ་མཐར་ཕྱིན་པས་དོན་ཆེན་སྒྲུབ་པའི་རྟོགས་པ་བརྗོད་པའོ། །དང་པོ་ནི། རྡོ་རྗེ་འཛིན་པ་ཞེས་པ་ལ་སོགས་པས་བསྟན་ཏེ། སྤྱི་བོར་བླ་མའི་རྣལ་འབྱོར་དང་མ་བྲལ་བར། དམ་པ་གསུམ་ལྡན་གྱིས་གསོལ་བ་བཏབ་པས། བླ་མའི་བྱིན་རླབས་ཞུགས་ཤིང༌། ཆུ་སྐྱེས་ཞེས་པས་སྙིང་གར་ཡི་དམ་ལྷའི་རྣལ་འབྱོར་དང་མ་བྲལ་བ་བསྐྱེད་རྫོགས་ཟུང་འབྲེལ་གྱི་བཟླས་སྒོམ་བར་མ་ཆད་ཀྱི་མཐུས། ཐུགས་རྗེ་ཆེན་པོའི་དངོས་གྲུབ་ཐོབ་པ་དང༌། འོད་ཟེར་རྒྱུན་གྱིས་ཞེས་པས། བླ་མ་དང་ལྷ་གཉིས་ཀ་ལས་གསལ་ཞིང་དྭངས་པའི་འོད་ཟེར་བྱུང་ནས། བདག་ལ་སྐུ་གསུང་ཐུགས་ཀྱི་དབང་བསྐུར་བས་ཞེས་པ་དང༌། མཚན་མ་དང་སྣང་བའི་དྲི་མ་གསུམ་དག་པར་མཛད་པ་ངོ་མཚར་རྨད་དུ་བྱུང་སྟེ་ཐུགས་ལ་བཏགས་སོ། །ཞེས་བྱ་བའི་ཐ་ཚིག་གོ །གཉིས་པ་ནི། རྩ་བ་ངོ་འཕྲད་པའི་རྟོགས་པ་བརྗོད་པ་དང༌། ཡན་ལག་ངོ་འཕྲད་པའི་རྟོགས་པ་བརྗོད་པའོ། །དང་པོ་ནི། བརྟན་པའི་ལུས་ཞེས་པ་ལ་སོགས་པས་བསྟན་ཏེ། བསམ་གཏན་གྱི་ཕྱག་རྒྱ་བདུན་ལྡན་གྱིས། ལུས་རི་ལྟར་བརྟན་པར་བྱས་ནས་སེམས་མ་ཡེངས་མ་བཅོས་པ་ནམ་མཁའ་ལྟར་སྤྲོས་བྲལ་དུ་མཉམ་པར་བཞག་ཅིང༌། གཡོ་བའི་དབུགས་རྔུབ་པ་དང༌། དགང་བ་དང༌། གཞིལ་བ་དང་མདའ་ལྟར་གྱེན་དུ་འཕང་བའི་ཚུལ་སྦྱོར་བ་བཞི་ལྡན་གྱིས་ལྟེ་བར་བཅིངས་ཏེ། དེ་ལྟར་རྒྱུན་ཆགས་སུ་བསྒོམ་པས། རང་སེམས་མ་བཅོས་པའི་དོན་ཇི་ལྟར་གནས་པ་ངོ་འཕྲད་དོ་ཞེས་བྱ་བའི་དོན་ཏོ། །གཉིས་པ་ལ་གཉིས་ཏེ། ལམ་གཅིག་ཆར་པའི་སྒོ་ནས་རྟོགས་པ་བརྗོད་པ་དང༌། ལམ་རིམ་གྱིས་སྒོ་ནས་རྟོགས་པ་བརྗོད་པའོ། །དང་པོ་ནི། ཡིད་ནི་ཁྱབ་འཇུག་ཅེས་པ་ལ་སོགས་པ་སྟེ། ལམ་གཅིག་ཅར་པས་འཁྲུལ་འཁོར་ཉམས་སུ་ལེན་པ་ལས། རེ་ཞིག་ཡིད་ཀྱི་འཁྲུལ་
514 འཁོར་རྒྱ་ཆེ་བས་ཐམས་ཅད་སྤྲོ་བ་ཁྱབ་འཇུག་ལྟ་བུ་དང་ཟབ་པ་རང་བཞིན་སྟོང་པ་ཉིད་ནམ་མཁའ་ལྟ་བུར་བསྒོམ་པའོ། །ལུས་ཀྱི་འཁྲུལ་འཁོར་ལ་འཁོར་ལོ་ལྔ་སྟེ། སྤྱི་བོ་བདེ་ཆེན་གྱི་འཁོར་ལོ་དང༌། མགྲིན་པ་ལོངས་སྤྱོད་ཀྱི་འཁོར་ལོ་དང༌། སྙིང་ག་ཆོས་ཀྱི་འཁོར་ལོ། ལྟེ་བ་སྤྲུལ་པའི་འཁོར་ལོ་དང༌། གསང་བ་ལས་ཀྱི་འཁོར་ལོ་དང་ལྔའོ། །རྣམ་ཤེས་སྒོ་ལྔའི་རྟེན་དབང་པོ་ལྔ་ནང་དུ་བཅིངས་པས། རྣམ་ཤེས་ལྔ་ཤུགས་ལས་འཆིང་བའི་ཐབས་སོ། །ངག་གི་འཁྲུལ་འཁོར་སྲོག་སེམས་དང་རྩོལ་བ་རླུང་གཉིས། བྱང་སེམས་དཀར་དམར་ཉི་ཟླ་གཉིས་དབང་དུ་བྱེད་པ་ལ་མཁས་པའོ། །དེ་ལྟར་འཁྲུལ་འཁོར་གསུམ་དབང་དུ་བྱས་པས། བདེ་སྟོང་དབྱེར་མེད་ཀྱི་ཉམས་མྱོང་གིས་ལམ་གཅིག་ཅར་དུ་རྟོགས་པ་སྐྱེས་ཏེ། བདེ་ཆེན་རྡོ་རྗེ་ཞེས་སྨོས་སོ། །གཉིས་པ་ལམ་རིམ་གྱིས་པ་ལ་གསུམ་སྟེ། དབང་པོ་ཐ་མའི་དབང་དུ་བྱས་ཏེ་ཐུན་མོང་གི་རྟོགས་པ་བརྗོད་པ་དང༌། འབྲིང་གི་དབང་དུ་བྱས་ཏེ་ཐུན་མོང་མ་ཡིན་པའི་རྟོགས་པ་བརྗོད་པ་དང༌། རབ་ཀྱི་དབང་དུ་བྱས་ཏེ་ཁྱད་པར་རྟོགས་པ་བརྗོད་པའོ། །དང་པོ་ལ་དགུ་སྟེ། སྣང་བ་རང་གྲོལ་གྱི་རྟོགས་པ་བརྗོད་པ་དང༌། ཐབས་འབར་འཛག་གི་དང༌། དུག་གསུམ་རྩ་བྲལ་གྱི་དང༌། གཏུམ་མོ་ཡེ་ཤེས་ཀྱི་དང༌། འཁོར་ལོ་གསུམ་འདུས་ཀྱི་དང༌། གཉིས་འཛིན་སོར་བཞག་གི་དང༌། རང་སེམས་མཁའ་མཉམ་གྱི་དང༌། བསླུ་བྲིད་ངོས་བཟུང་གི་དང༌། བདེ་ཆེན་ལམ་ཁྱེར་གྱི་རྟོགས་པ་བརྗོད་པའོ། །དང་པོ་ནི། དྲི་མ་ལྡན་ནི་ཞེས་པ་ལ་སོགས་པ་སྟེ། ཕྱི་ལྟར་ན་ཕུང་པོ་ལྔའི་ཉེས་པ་རྒྱལ་བ་རིགས་ལྔས་སྦྱང་བ་དང༌། ནང་ལྟར་ན་སྒོ་ལྔའི་རྣམ་ཤེས་ལྔའི་རང་ངོ་ཤེས་པས་སྦྱང་བ་དང༌། གསང་བ་ལྟར་ན་ཉོན་མོངས་པ་དུག་ལྔ་ཡེ་ཤེས་སུ་རང་དག་པར་ཤེས་པས་སྦྱངས་ཏེ། དེའི་དྲི་མའི་སྣང་བ་རང་སར་གྲོལ་བའོ། །ལུས་ལྷ་སྐུར་གྲོལ། ངག་སྔགས་སུ་གྲོལ། ཡིད་ཐུགས་སུ་གྲོལ་ཏེ།
515 དེ་ནི་སྒོ་གསུམ་རང་སར་གྲོལ་བའོ། །གྲོལ་ལུགས་ནི་དེ་དག་མ་བཅོས། །ཞེས་གསུངས་པས། གདོད་མ་ནས་རང་བྱུང་ལྷན་ཅིག་སྐྱེས་པའི་ཡེ་ཤེས་སུ་དག་པས་བསྒོམ་བྱ་བསྒོམ་བྱེད་ཡེ་སྟོང་ཡེ་བྲལ་ལོ། །གཉིས་པ་ནི། རྒྱ་མཚོའི་སྙིང་པོ་ཞེས་པ་ལ་སོགས་པ་སྟེ། རང་གྲོལ་རྟོགས་པའི་ཐབས་སུ། ལུས་རང་བྱུང་ལྷན་ཅིག་སྐྱེས་པའི་ཡི་གེ་གཉིས་ལས་འབར་འཛག་བསྒོམ་པ་སྟེ། རླུང་ལྟེ་བར་བཟུང་བས་དེ་འོག་རྒྱ་མཚོའི་སྙིང་པོ་བཾ་ཡིག་ལས་གཏུམ་མོ་ཡེ་ཤེས་ཀྱི་མེ་འབར་ནས་རི་རབ་ཀྱི་སྲོག་ཤིང་ཨ་ཝ་དྷཱུ་ཏིའི་སྦུགས་ནས་བརྒྱུད་དེ། ཚངས་དབང་གི་གཙུག་གི་ཧཾ་ཞུ་ནས་འཁོར་ལོ་ལྔའི་རྩ་སྦུགས་ཐམས་ཅད་གང་ཞིང་ཟིམ་པར་བྱས་པས། བདེ་གསལ་སྟོང་པའི་ཉམས་མྱོང་ངང་གིས་སྐྱེའོ། །དེ་ལ་ཐབས་ལས་བྱུང་བའི་ཐབས་བྲལ་རྟོགས་པ་འབྱུང་སྟེ། དེ་ལ་བལྟས་ན་ཡ་མཚན་ཆེའོ། །ཞེས་བྱའོ། །གསུམ་པ་ནི། གང་མ་རིག་པ་ཞེས་པ་ལ་སོགས་པ་སྟེ། སེམས་ཅན་ཐམས་ཅད་གང་གིས་འཆིང་བའི་རྒྱུ་ཉོན་མོངས་པ་དུག་གསུམ་ཡིན་པ་ལས། མ་རིག་པ་རང་ངོ་ཤེས་པས་ངོ་བོས་སྟོང་ཉིད་དུ་རྟོགས་པ་འཆར་ལ། འདོད་ཆགས་རང་ངོ་ཤེས་པས་ཀུན་ནས་དཀྲིས་པ་རང་སར་དག་སྟེ། བདེ་ཆེན་དུ་འབར་ཞིང༌། ཞེ་སྡང་རང་ངོ་ཤེས་པས། ཀུན་ཏུ་འཁྲུག་པས་རང་སར་དག་ནས་འོད་གསལ་དུ་འགྱུར་བས་བཅིངས་པ་ཐམས་ཅད་རང་གྲོལ་དུ་རྟོགས་སོ། །ཞེས་བྱའོ། །བཞི་པ་ནི། ལྟེ་བའི་མར་མེས་ཞེས་པ་ལ་སོགས་པ་སྟེ། ལུས་ཐབས་མགལ་གྱི་ཕྱག་རྒྱ་བཅས་ལ། རླུང་བུམ་པ་ཅན་བཟུང་སྟེ། ཡིད་རྡོ་རྗེ་འབྲུ་གསུམ་ལ་བློ་ཁྲིད་ནས། ལྟེ་བའི་ཨ་ལས་གཏུམ་མོའི་མེས་རོ་སྨད་གང་བར་འབར་བས་འོད་གསལ་གྱི་ཉི་མ་འཆར། སྤྱི་གཙུག་གི་ཧཾ་ལས་བདུད་རྩིའི་རྒྱུན་བབས་པས་བདེ་ཆེན་འབབ། སྙིང་གའི་ཧྲཱིཿའམ་ཧཱུྃ་ལ་རྩེ་གཅིག་ཏུ་ཡིད་གཏད་པས། མི་རྟོག་པ་ཤེས་རབ་ཀྱི་པདྨ་ཁ་ཕྱེ་བར་འགྱུར་བས་རང་
516 ལུས་རང་གི་དངོས་གྲུབ་ཐོབ་བོ་ཞེས་བྱའོ། །ལྔ་པ་ནི། རྩ་གསུམ་ཞེས་པ་ལ་སོགས་པ་སྟེ། ལུས་ལ་རྩ་དབུ་མའི་མགོ་བོར། རོ་རྐྱང་གཉིས་ཀྱིས་སྤྱི་བོར་འཁྱུད་པ་བདེ་ཆེན་གྱི་འཁོར་ལོ་དང༌། སྙིང་གར་འཁྱུད་པས་ཆོས་ཀྱི་འཁོར་ལོ་དང༌། ལྟེ་བར་འཁྱུད་པ་སྤྲུལ་པའི་འཁོར་ལོ་དང་གསུམ་དབང་དུ་བསྡུས་པས། ཞོ་དཀྲོགས་པ་ལས་མར་གྱི་སྙིང་པོ་བཞིན་དུ། བྱང་སེམས་ཀྱི་རྩ་བ་དྭངས་མའི་ཐིག་ལེ་འདུས་ནས་དྷཱུ་ཏིར་མེ་ལོང་དྭངས་པ་ལ་གཟུགས་བརྙན་འཆར་བ་ལྟར་རྣམ་པར་མི་རྟོག་པའི་ཡེ་ཤེས་རང་འཁྲུངས་སུ་སྐྱེ་བས། ཡེ་ཤེས་མིག་གཅིག་དྲི་མེད་དུ་འཆར་རོ། །ཞེས་བྱའོ། །དྲུག་པ་ནི། གཟུང་འཛིན་ཞེས་པ་ལ་སོགས་པ་སྟེ། ཡུལ་གཟུང་བ་ལ་བློ་འགྱུས་པ་དང༌། བློ་འཛིན་པ་མཚན་མར་ཞེན་པ་གཉིས་ཀ་རང་ངོ་རང་གིས་ཤེས་པས་གཉིད་སད་པའི་རྨི་ལམ་དང་རྨི་ལམ་གྱི་ཡུལ་གཉིས་ཀ་མ་གྲུབ་པར་ཐག་ཐོད་པར་ལྟར། གཟུང་འཛིན་གཉིས་སྤང་མ་དགོས་པར་རང་སར་དག་སྟེ། སྤྲིན་མེད་པའི་ནམ་མཁའ་ལ་ཉི་མ་ཤར་བ་ལྟར། རྟོགས་པའི་འོད་ཀྱིས་མ་རིག་པ་དང༌། ཡེ་ཤེས་གནས་དེར་ཡང་མི་གནས་ཤིང༌། གཞན་དུའང་སོང་བས་ཤིན་ཏུ་ཟབ་པ་ཡིན་ནོ། །ཞེས་བྱ་བའོ། །བདུན་པ་ནི། འཇིག་རྟེན་ཐམས་ཅད་ཞེས་པ་ལ་སོགས་པ་སྟེ། འདི་ལྟར་སྣང་བའི་སེམས་ཅན་རྣམས་ནི། རང་སེམས་ནམ་མཁའ་དང་འདྲ་བས་བཅིངས་ལ། ནམ་མཁའ་དེའང་སྤྲིན་དང་འདྲ་བའི་འཁྲུལ་པས་བསྒྲིབས་པ་ལས། སྒྲིབ་བྱེད་རྟོག་པའི་སྤྲིན་རང་སངས་སུ་གྱུར་པས། མ་བཅོས་པ་ནམ་མཁའ་ལྟ་བུ་ལ་བཟང་ངན་གྱི་སྣང་བ་ཅི་ཡང་མི་འབྱུང་ངོ་ཞེས་བྱའོ། །བརྒྱད་པ་ནི། སྒྱུ་མས་ཞེས་པ་ལ་སོགས་པ་སྟེ། གཉེན་པོས་སྤང་བྱ་བཅོམ་པ་ནི། སྒྱུ་མའི་དམག་གིས་སྒྱུ་མའི་གྲོང་བཅོམ་པ་དང་འདྲ། ཉོན་མོངས་པ་སྟོང་པའི་སེམས་ཀྱིས་ཉོན་མོངས་ཅན་གྱི་སེམས་བསླུ་བ་སྟེ། འདིར་བླ་མའི་སྐུ་དྲིན་གྱིས་བསླུས་པའི་དུས་སུ་བསླུ་བ་མེད་པར་རྟོགས་པས། བསླུ་བྲིད་ཡེ་ཤེས་སུ་
517 ངོས་ཟིན་ནོ། །ཞེས་བྱའོ། །དགུ་པ་ནི། འོག་ནི་ཞེས་པ་ལ་སོགས་པ་སྟེ་གསང་སྒོ་ལས་ཀྱི་འཁོར་ལོ་འོག་ཏུ་བསྡམ་ཞིང༌། བར་དུ་རྡོ་རྗེའི་རྒྱ་མདུད་ལྟེ་བར་བཅིངས་ལ། སྟེང་ཚངས་པའི་ཡི་གེ་གྱེན་དུ་བསྒྱུར་བས་གཞན་ལུས་ལ་མ་ལྟོས་པར་རང་ལུས་ལ་བདེ་སྟོང་དབྱེར་མེད་རྙེད་དོ་ཞེས་བྱའོ། །དེ་ལྟར་དགུ་ཕྲག་གཅིག་པོ་དེ་དག་ཀྱང་དབང་པོ་ཐ་མའི་ཐ་མ་དང༌། ཐ་མའི་འབྲིང་པོ་དང༌། ཐ་མའི་རབ་དང་གསུམ་གྱི་དབང་དུ་བྱས་ནས་རིམ་པ་ལྟར། ཚིག་ལེའུ་གསུམ་གསུམ་བརྗོད་པ་ཡིན་པར་ཤེས་པར་བྱའོ། །གཉིས་པ་དབང་པོ་འབྲིང་གི་དབང་དུ་བྱས་ཏེ་ཐུན་མོང་མ་ཡིན་པའི་རྟོགས་པ་བརྗོད་པ་ལ་ཡང་དགུ་སྟེ་སྒོ་གསུམ་ལས་ལ་སྦྱོར་བའི་རྟོགས་པ་བརྗོད་པ་དང༌། བརྟན་གཡོ་དབང་དུ་སྡུད་པ་དང༌། ནམ་མཁའ་ངལ་གསོ་དང། རང་སེམས་རྡོ་རྗེ་ཀུན་རིག་གི་དང༌། སྙིང་པོ་བཅུད་ལེན་གྱི་དང༌། གང་ཤར་རྫུན་སྣང་གི་དང༌། འགལ་རྐྱེན་གཞི་བྲལ་གྱི་དང༌། སྙེམས་བྱེད་རང་སར་དག་པའི་དང༌། དུག་གསུམ་གནས་གྱུར་གྱི་རྟོགས་པ་བརྗོད་པའོ། །དང་པོ་ནི། ལུས་ཞེས་པ་ལ་སོགས་པ་སྟེ། ལུས་ཀྱི་རྡོ་རྗེ་སྐྱིལ་ཀྲུང་རི་བོ་ལྟར་གཡོ་འགུལ་མེད་པ་དང༌། ངག་རླུང་རྒྱུན་རྐྱལ་པར་བསྡམ་པར་ལྟར་ནང་དུ་བཅིངས་དང༌། སེམས་ནམ་མཁའི་དཀྱིལ་འཁོར་ལྟར་ཡོངས་སུ་ངོས་བཟུང་མེད་པ་ཆོས་ཐམས་ཅད་ཀྱིས་ཆོས་ཉིད་ལ་མཉམ་པར་འཇོག་གོ །ཞེས་བྱའོ། །གཉིས་པ་ནི། ལུས་བརྟན་ཞེས་པ་ལ་སོགས་པ་སྟེ། ལུས་ཐབས་མགལ་གྱི་ཕྱག་རྒྱས་ཤིང་རྟ་ཆས་སུ་བཅུག་པ་ལྟར་བཅའོ། །གཡོ་བ་དབུགས་ཀྱི་རེངས་བུ་སྲོག་ཤིང་དབུ་མའི་ནང་དུ་བཅུག་པས། འབྲལ་མེད་འོད་གསལ་གྱི་ཏིང་ངེ་འཛིན་རང་དབང་དུ་གྱུར་པ་འཆི་མེད་ནམ་མཁའ་ལྟ་བུའི་དངོས་གྲུབ་ཐོབ་བོ། །ཞེས་བྱ་བའོ། །གསུམ་པ་ནི། ནམ་མཁའི་ཞེས་པ་ལ་སོགས་སྟེ་ནང་རྣམ་པར་མི་རྟོག་པ་ནམ་མཁའི་ངང་དུ་ངལ་གསོ། ཕྱི་ཡང་དག་ལྷའི་རྣལ་འབྱོར་བདེ་བ་ཆེན་པོའི་ངང་དུ་ངལ་གསོ། བདེ་སྟོང་ཟུང་འཇུག་ལྷན་ཅིག་
518 སྐྱེས་པའི་གདངས་གསལ་བ་འོད་གསལ་ངང་དུ་ངལ་གསོ། ངལ་གསོ་གསུམ་གྱིས་འཁོར་བ་ཐོག་མེད་ནས་དུབ་པ་རང་སངས་དུ་གྱུར་ཏོ། །ཞེས་བྱ་བའོ། །བཞི་པ་ནི། རྡོ་རྗེ་འཛིན་ཞེས་པ་ལ་སོགས་པ་སྟེ། དང་པོ་མ་བཅོས་པར་གློད་པས་རྡོ་རྗེ་འཆང་རང་འཁྲུངས་སུ་སྐུ་བལྟམས། དེ་ཉིད་ཀྱི་ངང་ལས་སྣ་ཚོགས་སུ་སྣང་བ་རྡོ་རྗེ་རྒྱལ་པོ་ཆོས་ཉིད་ཡུལ་ལ་ཁ་འབྱམས། གང་སྣང་ཐམས་ཅད་རང་སར་གྲོལ་བས། རྡོ་རྗེ་སེམས་དཔའ་སེམས་དཔའ་སྟོང་སྟེ། དེ་ཉིད་ཀུན་རིག་ཏུ་སངས་རྒྱས་སོ། །ཞེས་བྱ་བའོ། །ལྔ་པ་ནི། མེ་ཏོག་ཅེས་པ་ལ་སོགས་པ་སྟེ། གཞན་ལུས་མེ་ཏོག་ལྟ་བུ་ལས་བདེ་སྟོང་སྦྲང་རྩི་ལྟ་བུར་བླང༌། རང་སེམས་ཆབ་རོམ་ལྟ་བུ་ལ་སྟོང་ཉིད་ཆུར་ཞུ་བ་ལྟ་བུར་གོམས་པར་བྱ། ལུས་ལ་ལུས་མེད་ཀྱི་བདེ་གསལ་ཟུང་འཇུག་གིས་སྨན་བཅུད་ཀྱིས་ལེན་ལྟ་བུ་བསྒྲུབ་པས། རང་སེམས་རང་གིས་རང་མཐོང་བ་མེད་པའི་ཚུལ་གྱིས་མཐོང་བས་ཆོས་ཉིད་མཐོང་བ་མཐར་ཐུག་ཏུ་འགྱུར་རོ། །ཞེས་བྱ་བའོ། །དྲུག་པ་ནི། ཆུ་ནང་ཞེས་པ་ལ་སོགས་པ་སྟེ། གང་ཤར་ཤར་གྱི་ངོ་བོ་སུས་ཀྱང་མ་བསྐྱེད་པ་ཆུ་ནང་གི་སྐྱེས་བུ་ལྟ་བུ། དེའི་རྟེན་དབང་པོ་ལ་བདག་མེད་པ་རྨི་ལམ་གྱི་གྲོང་ཁྱེར་ལྟ་བུ། ཤར་བ་གནས་ཀྱི་རྟེན་དང་བྲལ་བ་མེ་ལོང་ནང་གི་གཟུགས་བརྙན་ལྟ་བུར་རྟོགས་པས་སྐྱེ་འགྲོ་ཐམས་ཅད་བརྫུན་སྣང་དུ་ཐག་ཆོད་དོ། །ཞེས་བྱ་བའོ། །བདུན་པ་ནི། གང་ན་ཞེས་པ་ལ་སོགས་པ་སྟེ། ཆོས་ཐམས་ཅད་མི་གནས་པའི་ཡུལ་སད་པ་རྨི་ལམ་གྱི་སྐྱེས་བུ་ལྟ་བུ། སྐྱེ་བའི་རྒྱུ་མེད་པ་སྒྱུ་མའི་ལོག་རྟོག་ལྟ་བུ། འགག་པའི་དུས་མེད་པ་རྨི་ལམ་གྱི་མར་མེ་ལྟ་བུ། ནམ་མཁའ་ཐམས་ཅད་རང་བཞིན་གྱིས་སྟོང་པར་རྟོགས་པས་འགལ་རྐྱེན་བར་ཆད་ཀྱིས་འཇིགས་པ་མེད་དོ། །ཞེས་བྱ་བའོ། །བརྒྱད་པ་ནི། འདི་དག་ཅེས་པ་ལ་སོགས་པ་སྟེ། ཡུལ་བདེན་བརྫུན་གང་ཡང་སྣང་སྟོང་དང༌། རིག་པའི་བདེ་སྡུག་གང་ཤར་ཡང་རིག་སྟོང་ཡིན་པས་
519 ཡུལ་སྣང་བ་གང་དེར་ཀྱང་ཤེས་སྙམ་ཡིན་ལ། བློ་རིག་པས་ཅི་རིག་ཀྱང་རིག་སྙམ་དུ་ཐག་ཆོད་དེ། སྙམ་པ་དེ་ཉིད་སྙམ་པས་སྟོང་པས་བྱེད་རང་སར་དག་གོ་ཞེས་བྱ་བའོ། །དགུ་པ་ནི། སྐྱེས་བུ་ཞེས་བྱ་བ་ལ་སོགས་པ་སྟེ། ཉོན་མོངས་པ་ཞེ་སྡང་ཉི་མ་ལྟར་འོད་གསལ་བས་འོད་གསལ་རྡོ་རྗེར་གནས་གྱུར་པ་དང༌། འདོད་ཆགས་ཟླ་བ་ལྟར་བདེ་ཉམས་ཀྱིས་སྣང་བས་བདེ་ཆེན་རྡོ་རྗེར་གནས་གྱུར་པ་དང༌། གཏི་མུག་སྒྲ་གཅན་འཛིན་ལྟར་མི་རྟོག་པས་ཆོམས་པས་རྟོག་མེད་རྡོ་རྗེ་འཆང་དུ་གནས་གྱུར་ཏོ། །ཞེས་བྱ་བའོ། །དགུ་ཕྲག་གཅིག་པོ་འདི་དག་ཀྱང༌། དབང་པོ་འབྲིང་གི་དབང་དུ་བྱས་ནས། དབང་པོ་འབྲིང་གི་ཐ་མ་དང༌། འབྲིང་གི་འབྲིང་དང༌། འབྲིང་གི་རབ་གསུམ་ལ་རིམ་པ་ལྟར། ཚིག་ལེའུ་བྱས་པ་གསུམ་གསུམ་སྦྱར་བ་བྱའོ། །གསུམ་པ་དབང་པོ་རབ་ཀྱི་དབང་དུ་བྱས་ཏེ་ཁྱད་པར་གྱི་རྟོགས་པ་བརྗོད་པ་དགུ་སྟེ། དཔེ་དྲུག་ཐབས་ལྡན་གྱི་རྟོགས་པ་བརྗོད་པ་དང༌། མཚན་མ་རང་གྲོལ་དང༌། ཐབས་ཀྱི་ཐབས་ལྡན་གྱི་དང༌། འཛིན་པ་རང་སར་དག་པའི་དང༌། ཡི་གེ་དང་ཡི་གེ་མེད་པའི་དང༌། འགྲོ་གནས་འགག་མེད་དང༌། རང་སེམས་གཏེར་རྙེད་ཀྱི་དང༌། སྒྱུ་མ་བདེན་བྲལ་གྱི་དང༌། སྒྱུ་མ་སྒྱུ་བྲལ་གྱི་རྟོགས་པ་བརྗོད་པའོ། །དང་པོ་ནི། ནམ་མཁའི་ཞེས་པ་ལ་སོགས་པ་སྟེ། དཔེ་དྲུག་ལས། དང་པོ་ནི། ནམ་མཁའ་སྟོང་པ་ལས་སྤྲིན་གློ་བུར་དུ་བྱུང་བ་ལྟར། ཆོས་ཉིད་སྟོང་པ་ལས་རྣམ་རྟོག་གློ་བུར་དུ་བྱུང་བའོ། །གཉིས་པ་རྒྱ་མཚོ་ལས་རྦ་རླབས་བྱུང་ཡང་རྦ་རླབས་དེ་ཉིད་དུ་ཐིམ་པ་ལྟར། སྐྱེ་མེད་ལ་སྐྱེ་བའི་ཉམས་ཅི་སྣང་ཡང་དེ་ཉིད་དུ་ཐིམ་པའོ། །གསུམ་པ་མེ་ཏོག་ལས་སྦྲང་རྩི་བླང་དུ་ཡོད་པ་ལྟར་ལུས་ལ་བདེ་སྟོང་བླང་དུ་ཡོད་པའོ། །བཞི་པ་ག་བུར་དང་དྲི་དབྱེར་མེད་པ་ལྟར་སྣང་བ་དང་སྟོང་པ་དབྱེར་མེད་པའོ། །ལྔ་པ་མེ་ལོང་དྭངས་པ་ལ་གཟུགས་ཤར་བ་ལྟར། རིག་པ་དྲི་མ་མེད་པས་རིག་ཆོས་སྣ་ཚོགས་སུ་འཆར་
520 བའོ། །དྲུག་པས་ཤེལ་དཀར་པོ་གཞན་གྱི་ཁ་དོག་གིས་མི་འགྱུར་བ་ལྟར་མ་བཅོས་པ་རྐྱེན་སྟོབས་ཀྱིས་གཞན་དུ་མི་འགྱུར་བ་སྟེ། ཞེས་བྱ་བའོ། །གཉིས་པ་ནི་འགྲོ་བ་ཞེས་པ་ལ་སོགས་སྟེ། སྐྱེ་འགྲོ་མཐོ་རིས་དང༌། ངན་སོང་བའི་བདེ་སྡུག་ཐམས་ཅད་ནི་ལས་ལས་སྐྱེས། ལས་དཀར་ནག་ནི་ཉོན་མོངས་པ་ལས་བྱུང༌། དེའི་རྒྱུ་ཚུལ་བཞིན་མ་ཡིན་པ་ཡིད་ལ་བྱེད་པ་ལ་སོགས་པའི་མཚན་མ་ཡིན་ཏེ། མཚན་མ་དེ་ཉིད་རང་ངོ་ཤེས་ན་མཚན་མེད་ཡིན་པས། བདག་གིས་མཚན་མ་དེ་རང་སར་གྲོལ་བར་རྟོགས་སོ། །ཞེས་བྱ་བའོ། །གསུམ་པ་ནི། རྟོགས་པའི་རྒྱུ་ཚུལ་བཞིན་མ་ཡིན་པ་ཡིད་ལ་བྱེད་པ་ལ་སོགས་པའི་མཚན་མ་ཡིན་ཏེ། མཚན་མ་དེ་ཉིད་རང་ངོ་ཤེས་ན་མཚན་མེད་ཡིན་པས། བདག་གིས་མཚན་མ་དེ་རང་སར་གྲོལ་བར་རྟོགས་སོ། །ཞེས་བྱ་བའོ། །གསུམ་པ་ནི། རྟོགས་པའི་གླང་ཆེན་ཞེས་པ་ལ་སོགས་པ་སྟེ། ཐབས་ཀྱི་ཁྱད་པར་བཞིས་ཐབས་ལྡན་གྱི་ཉམས་མྱོང་བདེ་བླག་ཏུ་བསྐྱེད་པ་སྟེ། ཡུལ་སྣ་ཚོགས་ལ་འཕྲོས་པའི་རྟོག་མཁན་རང་ངོ་ཤེས་པས་དགུག་པ་གླང་པོ་ཆེ་ལྕགས་ཀྱུས་བཀུག་པ་ལྟ་བུ་དང༌། རང་ལུས་གཞན་ལུས་ཀྱི་བདེ་བས་ཉམས་མྱོང་གི་རྟེན་བྱེད་པ་མེ་ཏོག་གི་རྩི་ཡིས་བུང་བ་བསྡུད་པ་ལྟ་བུ། འོད་གསལ་གྱི་ཏིང་ངེ་འཛིན་བདེ་བ་ཆེན་པོའི་ངང་དུ་བརྩེ་བ་དང་བ་མཚོན་བརྩེ་བ་ལྟ་བུ། གསོལ་འདེབས་ཀྱིས་བར་ཆད་སེལ་ཞིང་རྟོགས་པའི་པདྨ་ཁ་འབྱེད་པ་ཉི་ཟེར་གྱིས་འདམ་སྐྱེས་ཁ་འབྱེད་པ་ལྟ་བུ་སྟེ། ཐབས་ཀྱིས་ཐབས་ལྡན་ལམ་དུ་སློང་བའི་མན་ངག་བདག་གིས་རྟོགས་སོ་ཞེས་བྱའོ། །བཞི་པ་ནི། ཡིད་ཀྱི་ཞེས་པ་ལ་སོགས་པ་སྟེ། དེ་ལྟར་ཁྱད་པར་གྱི་ཐབས་བཞི་པ། ཐབས་ལྡན་གྱི་ཉམས་མྱོང་གོམ་པའི་ཕན་ཡོན་མངོན་སུམ་དུ་འབྱུང་སྟེ། གླང་ཆེན་ལྕགས་ཀྱུས་བཀུག་པ་ལྟ་བུའི་ཐབས་ཀྱིས། རིག་པ་རང་གསལ་གྱི་མར་མེ་ཡིད་ཀྱི་མུན་པ་སེལ། བུང་བ་སྦྲང་རྩིའི་སྡུད་པ་ལྟ་བུའི་ཐབས་ཀྱིས་བདེ་བའི་སྦྲང་རྩིའི་རྟོག་པའི་བུང་བས་འཇིབ། ངང་པ་མཚོ་ནང་རྩེ་བ་ལྟ་བུའི་ཐབས་ཀྱིས་འཛིན་པའི་རྦ་རླབས་རྒྱ་མཚོར་ཐིམ།
521 པདྨ་ཉི་ཟེར་གྱིས་འབྱེད་པ་ལྟ་བུའི་ཐབས་ཀྱིས་བདེ་སྡུག་གི་སྤྲིན་ཚོགས་སྤྲོས་བྲལ་གྱི་ནམ་མཁར་དེངས་ཞེས་བྱ་བའོ། །ལྔ་པ་ནི། ཡི་གེ་གསུམ་ཞེས་པ་ལ་སོགས་པ་སྟེ། ཡི་གེ་གསུམ་ནི། ཨ་དང༌། ས་དང༌། ཀ་དང་གསུམ་སྟེ། ཨ་ཨ་མ་ནི་ཞེས་རྟོགས་བྱེད་ཀྱི་བློ་ཡིད་བྱེད་པ་དང་བྲལ་བའོ། །པ་པ་ར་མཱརྠ་ཞེས་པ་རྟོགས་བྱ་དོན་དུ་མ་གྲུབ་པ་དོན་དམ་པ་སྟོང་པ་ཉིད། ཀ་ཀརྫ་ཞེས་པ། རྟོགས་བྱེད་བློ་ཡིས་རྟོགས་བྱའི་དོན་རྟོགས་པ་གྲུབ་པའི་འབྲས་བུས་མཚན་མ་རང་སར་གྲོལ་བ་སྟེ། དེ་ལྟར་ཡི་གེ་གསུམ་གྱིས་ཡི་གེ་མེད་པར་བསྟན་པས་ཡི་གེའི་རྒྱལ་པོ་ཡི་གེ་མེད་པར་བདག་གིས་རྟོགས་ཞེས་བྱ་བའོ། །དྲུག་པ་ནི། གང་དུ་ཞེས་པ་ལ་སོགས་པ་སྟེ། རྨི་ལམ་གྱི་མ་ཤི་བ་གང་དུ་ཡང་འགྲོ་རྒྱུ་མེད་པ་ལྟར་རྣམ་རྟོག་ཐམས་ཅད་ཡུལ་དང༌། ཡུལ་དུས་འདི་ནས་ཡུལ་དུས་གཞན་དུ་འགྲོ་རྒྱུ་མེད་ལ། རྨི་ལམ་གྱི་ཕ་འོང་ལ་གནས་མེད་པ་ལྟར་རྣམ་རྟོག་ལའང་ཕྱི་ནང་བར་གསུམ་གྱི་གནས་མེད་ཅིང༌། གང་གི་གནས་པ་ཆོས་ཀྱི་དབྱིངས་ཡིན་པས་ནམ་མཁའ་འགགས་པ་མེད་པ་ལྟར་རྣམ་རྟོག་ལ་འགག་པ་མེད་དེ། དེ་ལྟར་འགྲོ་གནས་འགག་མེད་གསུམ་གྱི་དོན་བདག་གིས་རྟོགས་སོ། །ཞེས་བྱ་བའོ། །བདུན་པ་ནི། རྟག་ཏུ་ཞེས་པ་ལ་སོགས་པ་སྟེ། གཏི་མུག་གཏི་མུག་གིས་རྣམ་པར་དག་པས་སྒྲིབ་པ་མེད་པའི་གཏེར་ཆེན་ཡིན་ཏེ། གཏི་མུག་གི་བྱེད་པ་མི་ཤེས་པར་སྒྲིབ་པ་ཡིན་ལ། རྨི་ལམ་གྱི་མུན་པ་ལྟར་བསྒྲིབས་པའི་དུས་སུ་སྒྲིབ་མཁན་མེད་པའི་ཕྱིར་རོ། །ཁོང་ཁྲོ་ཁོང་ཁྲོས་རྣམ་པར་དག་པ་འཁྲུགས་པ་མེད་པའི་གཏེར་ཆེན་ཡིན་ཏེ། ཁོང་ཁྲོའི་བྱེད་པ་སེམས་ཀུན་ནས་འཁྲུགས་པ་ཡིན་པ་ལ། སྒྱུ་མའི་མེ་ལྕེ་འཁྲུགས་པ་བཞིན་དུ་འཁྲུགས་པའི་དུས་སུ་འཁྲུགས་མཁན་མེད་པའི་ཕྱིར་རོ། །བག་ཆགས་སམ་འདོད་ཆགས་ཀྱིས་རྣམ་པར་དག་པ་ཞེན་ཅིང་དཀྲིས་པ་མེད་པའི་ཕྱིར་
522 གཏེར་ཆེན་ཡིན་ཏེ། འདོད་ཆགས་ཀྱི་བྱེད་ལས་ཞེན་ཅིང་དཀྲིས་པ་ཡིན་པ་ལ་སྦྲུལ་མདུད་པ་རང་སར་གྲོལ་བ་བཞིན་དུ། དཀྲིས་པའི་དུས་སུ་དཀྲི་མཁན་མེད་པའི་ཕྱིར་རོ། །དུག་གསུམ་རྣམ་དག་དེ་ཉིད་ཞི་བ་མྱ་ངན་འདས་ཀྱི་གཏེར་ཡིན་པས། དེ་ཉིད་གཞན་ན་ནི་མེད་ཀྱི་རང་ལ་ཡོད་པ་ཤེས་པར་གྱིས་ཤིག །ཅེས་བྱའོ། །བརྒྱད་པ་ནི། འཇིག་རྟེན་པ་ཞེས་པ་ལ་སོགས་པ་སྟེ། འདི་ལྟར་སྣང་བའི་འཇིག་རྟེན་ནི་སྒྱུ་མ་ལྟ་བུའི་ལས་ཀྱིས་བསྒྲུབ་པ། སྒྱུ་མའི་ལས་དེའང་སྒྱུ་མ་ལྟ་བུའི་ཡིད་ཀྱིས་བསྒྲུབས་ཏེ། རྐུན་པོ་ངོས་ཟིན་ན་དེས་རྐུ་མི་ནུས་པ་ལྟར། སྒྱུ་མར་ཤེས་པས་བདེན་ཞེན་ལོག་པ་ནི་སྡུག་བསྔལ་རང་སར་ལྡོག་གོ །ཞེས་བྱ་བའོ། །དགུ་པ་ནི། སྒྱུ་མར་རྟོགས་ཞེས་པའི་ཚིག་རྐང་གཉིས་ཏེ། ཤེས་རབ་ཟབ་མོས་སྒྱུ་མར་རྟོགས་པས་བདེན་རྟོག་དང་བྲལ་ལ། སྙིང་རྗེ་ཆེན་པོས་སྒྱུ་ཙམ་ཡང་མི་གནས་ཏེ། སེམས་ཅན་གྱི་དོན་རྒྱ་ཆེར་བྱེད་པས་ཤེས་རབ་དང་སྙིང་རྗེ་ཟུང་འཇུག་སྒྲུབ་པ་ལ་མཁས་སོ། །ཞེས་བྱ་བའོ། །དགུ་ཁྲག་གཅིག་པོ་འདི་དག་ཀྱང༌། སྐྱེས་བུ་དབང་པོ་རབ་ཀྱི་དབང་དུ་བྱས་ཏེ། དབང་པོ་རབ་ཀྱི་ཐ་མ་དང༌། རབ་ཀྱི་འབྲིང་དང༌། རབ་ཀྱི་རབ་རྣམས་ལ་གོ་རིམ་ལྟར། ཚིག་ལེའུར་བྱས་པ་གསུམ་གསུམ་སྦྱར་བ་ཡང་ཤེས་པར་བྱའོ། །སྤྱི་དོན་གསུམ་པ་སྒྲུབ་པ་མཐར་ཕྱིན་པས་དོན་ཆེན་གྲུབ་པའི་རྟོགས་པ་བརྗོད་པ་ནི། མི་གནས་ཞེས་པའི་ཚིག་རྐང་གཉིས་ཏེ། སྔར་སྨོས་པ་ལྟར་ཤེས་རབ་དང་སྙིང་རྗེ་ཟུང་འཇུག་གི་རྟོགས་པ་སྐྱེས་པ། ཡུན་རིང་པོ་ནས་བསྒྲུབས་པའི་འབྲས་བུས་དག་དོད་མཐར་ཕྱིན་ཏེ། ཐབས་ཤེས་རབ་གཉིས་ཀྱིས་འཁོར་འདས་གཉིས་ལ་མི་གནས་པར། རང་དོན་དང་གཞན་དོན་ཕུན་སུམ་ཚོགས་པས། ནོར་བུ་རིན་པོ་ཆེ་དབང་གི་རྒྱལ་པོ་རྙེད་པ་དང་མཚུངས་སོ་ཞེས་བྱ་བའོ། །འཇིག་རྟེན་མགོན་པོས་རྣམ་འདྲེན་རྒྱལ་པོ་ལ། །དོ་ཧ་
523 རྡོ་རྗེའི་གླུ་གསུངས་དེ་མ་ཐག །རྒྱ་ལས་འབུར་བཞིན་ཐུགས་ལ་ལེགས་འཁྲུངས་ཉམས། །རྟོགས་བརྗོད་སུམ་ཅུའི་རྣམ་བཤད་མདོ་ཙམ་བཀྲོལ། །དགེ་བ་འདི་ཡི་རྗེས་འཇུག་སྙིང་དཀྱིལ་དུ། །ལྷན་ཅིག་མ་རིག་འཐིབ་པོའི་མུན་བསལ་ནས། །དེ་རྗེས་མཁའ་ཁྱབ་མ་རྣམས་རང་རིག་ལའང༌། །རང་བྱུང་མངོན་རྟོགས་དྲི་མེད་འབར་བ་ཤོག །རྟོགས་པ་བརྗོད་པ་སུམ་ཅུ་པའི་དོ་ཧ་རྡོ་རྗེའི་ཚིག་འབྲུ་རྣམ་པར་བཤད་པ། དགེ་སློང་དཔལ་གྱི་མིང་ཅན་གྱིས་སྦྱར་བ་རྫོགས་སོ།། །།


512 !_rje btsun sku drin rnams la phyag 'tshal lo/_/thugs rje'i dbang phyug spyan ras gzigs dpal dang*/_/shes rab mthar thug ro gcig ral gcig mas/_/byin rlabs grub chen rgyal po mi tra shrI'i/_/zhabs pad rdul la rab gus spyi bos 'dud/_/rnal 'byor gyi dbang phyug brgyad cu rtsa lnga pa de'i rtogs pa brjod pa 'di ni re zhig thog ma kho nar/_/gtsug lag chen po dpal kha sar pa Nir spyan ras gzigs dbang phyug lo bcu gnyis su sgrubs pa'i tshe/_mthar rdo rje'i shing gtan sku khrus kyi me long dang bcas pa'i steng du 'jig rten mgon po rdo rje'i sku byad bsam gyis mi khyab pa'i gzi brjid 'bar ba/_khru do mdzub gang tsam gyi tshad dngos su gzigs nas/_des sems ngal sos par byed pa'i do ha tshigs su bcad pa nyi shu rtsa lnga pa gsungs so/_/de'i tshe de ma thag stong pa dang*/_snying rje zung du 'jug pa'i rtogs pa bla na med pa 'khrungs te/_'on kyang spyan ras gzigs kyi sku gzugs mi snang bar gyur ba la yid la gdung ba skyes pa las/_lhar nang du rang la rang gis bltas te/_mnyam par bzhag pas/_sngar thob pa'i gsung dbyangs/_do ha rdo rje'i mgur gyis nyams myong skyed pa'i mngon rtogs pa ni dper na chu mtsho dwangs pa las zla ba'i gzugs sam/_rgyas btab pa las 'bur bzhin du gsal zhing sgrib pa med par snang ba dang*/_zag pa med pa'i dga' ba des thugs tshim zhing rangs te/_spang la sha mo rdol ba bzhin/_rtogs pa brjod pa'i tshig sha lo ka sum cu po 'di dag thugs la shar nas zhal du phyung ba yin no/_/de'ang don gsum gyi nges par bya ste/_dang po bka' drin dran pa'i rtogs pa brjod pa
513 pa dang*/_bar do ngo 'phrod pa'i rtogs pa brjod pa dang*/_tha ma sgrub pa mthar phyin pas don chen sgrub pa'i rtogs pa brjod pa'o/_/dang po ni/_rdo rje 'dzin pa zhes pa la sogs pas bstan te/_spyi bor bla ma'i rnal 'byor dang ma bral bar/_dam pa gsum ldan gyis gsol ba btab pas/_bla ma'i byin rlabs zhugs shing*/_chu skyes zhes pas snying gar yi dam lha'i rnal 'byor dang ma bral ba bskyed rdzogs zung 'brel gyi bzlas sgom bar ma chad kyi mthus/_thugs rje chen po'i dngos grub thob pa dang*/_'od zer rgyun gyis zhes pas/_bla ma dang lha gnyis ka las gsal zhing dwangs pa'i 'od zer byung nas/_bdag la sku gsung thugs kyi dbang bskur bas zhes pa dang*/_mtshan ma dang snang ba'i dri ma gsum dag par mdzad pa ngo mtshar rmad du byung ste thugs la btags so/_/zhes bya ba'i tha tshig go_/gnyis pa ni/_rtsa ba ngo 'phrad pa'i rtogs pa brjod pa dang*/_yan lag ngo 'phrad pa'i rtogs pa brjod pa'o/_/dang po ni/_brtan pa'i lus zhes pa la sogs pas bstan te/_bsam gtan gyi phyag rgya bdun ldan gyis/_lus ri ltar brtan par byas nas sems ma yengs ma bcos pa nam mkha' ltar spros bral du mnyam par bzhag cing*/_g.yo ba'i dbugs rngub pa dang*/_dgang ba dang*/_gzhil ba dang mda' ltar gyen du 'phang ba'i tshul sbyor ba bzhi ldan gyis lte bar bcings te/_de ltar rgyun chags su bsgom pas/_rang sems ma bcos pa'i don ji ltar gnas pa ngo 'phrad do zhes bya ba'i don to/_/gnyis pa la gnyis te/_lam gcig char pa'i sgo nas rtogs pa brjod pa dang*/_lam rim gyis sgo nas rtogs pa brjod pa'o/_/dang po ni/_yid ni khyab 'jug ces pa la sogs pa ste/_lam gcig car pas 'khrul 'khor nyams su len pa las/_re zhig yid kyi 'khrul
514 'khor rgya che bas thams cad spro ba khyab 'jug lta bu dang zab pa rang bzhin stong pa nyid nam mkha' lta bur bsgom pa'o/_/lus kyi 'khrul 'khor la 'khor lo lnga ste/_spyi bo bde chen gyi 'khor lo dang*/_mgrin pa longs spyod kyi 'khor lo dang*/_snying ga chos kyi 'khor lo/_lte ba sprul pa'i 'khor lo dang*/_gsang ba las kyi 'khor lo dang lnga'o/_/rnam shes sgo lnga'i rten dbang po lnga nang du bcings pas/_rnam shes lnga shugs las 'ching ba'i thabs so/_/ngag gi 'khrul 'khor srog sems dang rtsol ba rlung gnyis/_byang sems dkar dmar nyi zla gnyis dbang du byed pa la mkhas pa'o/_/de ltar 'khrul 'khor gsum dbang du byas pas/_bde stong dbyer med kyi nyams myong gis lam gcig car du rtogs pa skyes te/_bde chen rdo rje zhes smos so/_/gnyis pa lam rim gyis pa la gsum ste/_dbang po tha ma'i dbang du byas te thun mong gi rtogs pa brjod pa dang*/_'bring gi dbang du byas te thun mong ma yin pa'i rtogs pa brjod pa dang*/_rab kyi dbang du byas te khyad par rtogs pa brjod pa'o/_/dang po la dgu ste/_snang ba rang grol gyi rtogs pa brjod pa dang*/_thabs 'bar 'dzag gi dang*/_dug gsum rtsa bral gyi dang*/_gtum mo ye shes kyi dang*/_'khor lo gsum 'dus kyi dang*/_gnyis 'dzin sor bzhag gi dang*/_rang sems mkha' mnyam gyi dang*/_bslu brid ngos bzung gi dang*/_bde chen lam khyer gyi rtogs pa brjod pa'o/_/dang po ni/_dri ma ldan ni zhes pa la sogs pa ste/_phyi ltar na phung po lnga'i nyes pa rgyal ba rigs lngas sbyang ba dang*/_nang ltar na sgo lnga'i rnam shes lnga'i rang ngo shes pas sbyang ba dang*/_gsang ba ltar na nyon mongs pa dug lnga ye shes su rang dag par shes pas sbyangs te/_de'i dri ma'i snang ba rang sar grol ba'o/_/lus lha skur grol/_ngag sngags su grol/_yid thugs su grol te/
515 de ni sgo gsum rang sar grol ba'o/_/grol lugs ni de dag ma bcos/_/zhes gsungs pas/_gdod ma nas rang byung lhan cig skyes pa'i ye shes su dag pas bsgom bya bsgom byed ye stong ye bral lo/_/gnyis pa ni/_rgya mtsho'i snying po zhes pa la sogs pa ste/_rang grol rtogs pa'i thabs su/_lus rang byung lhan cig skyes pa'i yi ge gnyis las 'bar 'dzag bsgom pa ste/_rlung lte bar bzung bas de 'og rgya mtsho'i snying po baM yig las gtum mo ye shes kyi me 'bar nas ri rab kyi srog shing a wa d+hU ti'i sbugs nas brgyud de/_tshangs dbang gi gtsug gi haM zhu nas 'khor lo lnga'i rtsa sbugs thams cad gang zhing zim par byas pas/_bde gsal stong pa'i nyams myong ngang gis skye'o/_/de la thabs las byung ba'i thabs bral rtogs pa 'byung ste/_de la bltas na ya mtshan che'o/_/zhes bya'o/_/gsum pa ni/_gang ma rig pa zhes pa la sogs pa ste/_sems can thams cad gang gis 'ching ba'i rgyu nyon mongs pa dug gsum yin pa las/_ma rig pa rang ngo shes pas ngo bos stong nyid du rtogs pa 'char la/_'dod chags rang ngo shes pas kun nas dkris pa rang sar dag ste/_bde chen du 'bar zhing*/_zhe sdang rang ngo shes pas/_kun tu 'khrug pas rang sar dag nas 'od gsal du 'gyur bas bcings pa thams cad rang grol du rtogs so/_/zhes bya'o/_/bzhi pa ni/_lte ba'i mar mes zhes pa la sogs pa ste/_lus thabs mgal gyi phyag rgya bcas la/_rlung bum pa can bzung ste/_yid rdo rje 'bru gsum la blo khrid nas/_lte ba'i a las gtum mo'i mes ro smad gang bar 'bar bas 'od gsal gyi nyi ma 'char/_spyi gtsug gi haM las bdud rtsi'i rgyun babs pas bde chen 'bab/_snying ga'i hrIH'am hU~M la rtse gcig tu yid gtad pas/_mi rtog pa shes rab kyi pad+ma kha phye bar 'gyur bas rang
516 lus rang gi dngos grub thob bo zhes bya'o/_/lnga pa ni/_rtsa gsum zhes pa la sogs pa ste/_lus la rtsa dbu ma'i mgo bor/_ro rkyang gnyis kyis spyi bor 'khyud pa bde chen gyi 'khor lo dang*/_snying gar 'khyud pas chos kyi 'khor lo dang*/_lte bar 'khyud pa sprul pa'i 'khor lo dang gsum dbang du bsdus pas/_zho dkrogs pa las mar gyi snying po bzhin du/_byang sems kyi rtsa ba dwangs ma'i thig le 'dus nas d+hU tir me long dwangs pa la gzugs brnyan 'char ba ltar rnam par mi rtog pa'i ye shes rang 'khrungs su skye bas/_ye shes mig gcig dri med du 'char ro/_/zhes bya'o/_/drug pa ni/_gzung 'dzin zhes pa la sogs pa ste/_yul gzung ba la blo 'gyus pa dang*/_blo 'dzin pa mtshan mar zhen pa gnyis ka rang ngo rang gis shes pas gnyid sad pa'i rmi lam dang rmi lam gyi yul gnyis ka ma grub par thag thod par ltar/_gzung 'dzin gnyis spang ma dgos par rang sar dag ste/_sprin med pa'i nam mkha' la nyi ma shar ba ltar/_rtogs pa'i 'od kyis ma rig pa dang*/_ye shes gnas der yang mi gnas shing*/_gzhan du'ang song bas shin tu zab pa yin no/_/zhes bya ba'o/_/bdun pa ni/_'jig rten thams cad zhes pa la sogs pa ste/_'di ltar snang ba'i sems can rnams ni/_rang sems nam mkha' dang 'dra bas bcings la/_nam mkha' de'ang sprin dang 'dra ba'i 'khrul pas bsgribs pa las/_sgrib byed rtog pa'i sprin rang sangs su gyur pas/_ma bcos pa nam mkha' lta bu la bzang ngan gyi snang ba ci yang mi 'byung ngo zhes bya'o/_/brgyad pa ni/_sgyu mas zhes pa la sogs pa ste/_gnyen pos spang bya bcom pa ni/_sgyu ma'i dmag gis sgyu ma'i grong bcom pa dang 'dra/_nyon mongs pa stong pa'i sems kyis nyon mongs can gyi sems bslu ba ste/_'dir bla ma'i sku drin gyis bslus pa'i dus su bslu ba med par rtogs pas/_bslu brid ye shes su
517 ngos zin no/_/zhes bya'o/_/dgu pa ni/_'og ni zhes pa la sogs pa ste gsang sgo las kyi 'khor lo 'og tu bsdam zhing*/_bar du rdo rje'i rgya mdud lte bar bcings la/_steng tshangs pa'i yi ge gyen du bsgyur bas gzhan lus la ma ltos par rang lus la bde stong dbyer med rnyed do zhes bya'o/_/de ltar dgu phrag gcig po de dag kyang dbang po tha ma'i tha ma dang*/_tha ma'i 'bring po dang*/_tha ma'i rab dang gsum gyi dbang du byas nas rim pa ltar/_tshig le'u gsum gsum brjod pa yin par shes par bya'o/_/gnyis pa dbang po 'bring gi dbang du byas te thun mong ma yin pa'i rtogs pa brjod pa la yang dgu ste sgo gsum las la sbyor ba'i rtogs pa brjod pa dang*/_brtan g.yo dbang du sdud pa dang*/_nam mkha' ngal gso dang/_rang sems rdo rje kun rig gi dang*/_snying po bcud len gyi dang*/_gang shar rdzun snang gi dang*/_'gal rkyen gzhi bral gyi dang*/_snyems byed rang sar dag pa'i dang*/_dug gsum gnas gyur gyi rtogs pa brjod pa'o/_/dang po ni/_lus zhes pa la sogs pa ste/_lus kyi rdo rje skyil krung ri bo ltar g.yo 'gul med pa dang*/_ngag rlung rgyun rkyal par bsdam par ltar nang du bcings dang*/_sems nam mkha'i dkyil 'khor ltar yongs su ngos bzung med pa chos thams cad kyis chos nyid la mnyam par 'jog go_/zhes bya'o/_/gnyis pa ni/_lus brtan zhes pa la sogs pa ste/_lus thabs mgal gyi phyag rgyas shing rta chas su bcug pa ltar bca'o/_/g.yo ba dbugs kyi rengs bu srog shing dbu ma'i nang du bcug pas/_'bral med 'od gsal gyi ting nge 'dzin rang dbang du gyur pa 'chi med nam mkha' lta bu'i dngos grub thob bo/_/zhes bya ba'o/_/gsum pa ni/_nam mkha'i zhes pa la sogs ste nang rnam par mi rtog pa nam mkha'i ngang du ngal gso/_phyi yang dag lha'i rnal 'byor bde ba chen po'i ngang du ngal gso/_bde stong zung 'jug lhan cig
518 skyes pa'i gdangs gsal ba 'od gsal ngang du ngal gso/_ngal gso gsum gyis 'khor ba thog med nas dub pa rang sangs du gyur to/_/zhes bya ba'o/_/bzhi pa ni/_rdo rje 'dzin zhes pa la sogs pa ste/_dang po ma bcos par glod pas rdo rje 'chang rang 'khrungs su sku bltams/_de nyid kyi ngang las sna tshogs su snang ba rdo rje rgyal po chos nyid yul la kha 'byams/_gang snang thams cad rang sar grol bas/_rdo rje sems dpa' sems dpa' stong ste/_de nyid kun rig tu sangs rgyas so/_/zhes bya ba'o/_/lnga pa ni/_me tog ces pa la sogs pa ste/_gzhan lus me tog lta bu las bde stong sbrang rtsi lta bur blang*/_rang sems chab rom lta bu la stong nyid chur zhu ba lta bur goms par bya/_lus la lus med kyi bde gsal zung 'jug gis sman bcud kyis len lta bu bsgrub pas/_rang sems rang gis rang mthong ba med pa'i tshul gyis mthong bas chos nyid mthong ba mthar thug tu 'gyur ro/_/zhes bya ba'o/_/drug pa ni/_chu nang zhes pa la sogs pa ste/_gang shar shar gyi ngo bo sus kyang ma bskyed pa chu nang gi skyes bu lta bu/_de'i rten dbang po la bdag med pa rmi lam gyi grong khyer lta bu/_shar ba gnas kyi rten dang bral ba me long nang gi gzugs brnyan lta bur rtogs pas skye 'gro thams cad brdzun snang du thag chod do/_/zhes bya ba'o/_/bdun pa ni/_gang na zhes pa la sogs pa ste/_chos thams cad mi gnas pa'i yul sad pa rmi lam gyi skyes bu lta bu/_skye ba'i rgyu med pa sgyu ma'i log rtog lta bu/_'gag pa'i dus med pa rmi lam gyi mar me lta bu/_nam mkha' thams cad rang bzhin gyis stong par rtogs pas 'gal rkyen bar chad kyis 'jigs pa med do/_/zhes bya ba'o/_/brgyad pa ni/_'di dag ces pa la sogs pa ste/_yul bden brdzun gang yang snang stong dang*/_rig pa'i bde sdug gang shar yang rig stong yin pas
519 yul snang ba gang der kyang shes snyam yin la/_blo rig pas ci rig kyang rig snyam du thag chod de/_snyam pa de nyid snyam pas stong pas byed rang sar dag go zhes bya ba'o/_/dgu pa ni/_skyes bu zhes bya ba la sogs pa ste/_nyon mongs pa zhe sdang nyi ma ltar 'od gsal bas 'od gsal rdo rjer gnas gyur pa dang*/_'dod chags zla ba ltar bde nyams kyis snang bas bde chen rdo rjer gnas gyur pa dang*/_gti mug sgra gcan 'dzin ltar mi rtog pas choms pas rtog med rdo rje 'chang du gnas gyur to/_/zhes bya ba'o/_/dgu phrag gcig po 'di dag kyang*/_dbang po 'bring gi dbang du byas nas/_dbang po 'bring gi tha ma dang*/_'bring gi 'bring dang*/_'bring gi rab gsum la rim pa ltar/_tshig le'u byas pa gsum gsum sbyar ba bya'o/_/gsum pa dbang po rab kyi dbang du byas te khyad par gyi rtogs pa brjod pa dgu ste/_dpe drug thabs ldan gyi rtogs pa brjod pa dang*/_mtshan ma rang grol dang*/_thabs kyi thabs ldan gyi dang*/_'dzin pa rang sar dag pa'i dang*/_yi ge dang yi ge med pa'i dang*/_'gro gnas 'gag med dang*/_rang sems gter rnyed kyi dang*/_sgyu ma bden bral gyi dang*/_sgyu ma sgyu bral gyi rtogs pa brjod pa'o/_/dang po ni/_nam mkha'i zhes pa la sogs pa ste/_dpe drug las/_dang po ni/_nam mkha' stong pa las sprin glo bur du byung ba ltar/_chos nyid stong pa las rnam rtog glo bur du byung ba'o/_/gnyis pa rgya mtsho las rba rlabs byung yang rba rlabs de nyid du thim pa ltar/_skye med la skye ba'i nyams ci snang yang de nyid du thim pa'o/_/gsum pa me tog las sbrang rtsi blang du yod pa ltar lus la bde stong blang du yod pa'o/_/bzhi pa ga bur dang dri dbyer med pa ltar snang ba dang stong pa dbyer med pa'o/_/lnga pa me long dwangs pa la gzugs shar ba ltar/_rig pa dri ma med pas rig chos sna tshogs su 'char
520 ba'o/_/drug pas shel dkar po gzhan gyi kha dog gis mi 'gyur ba ltar ma bcos pa rkyen stobs kyis gzhan du mi 'gyur ba ste/_zhes bya ba'o/_/gnyis pa ni 'gro ba zhes pa la sogs ste/_skye 'gro mtho ris dang*/_ngan song ba'i bde sdug thams cad ni las las skyes/_las dkar nag ni nyon mongs pa las byung*/_de'i rgyu tshul bzhin ma yin pa yid la byed pa la sogs pa'i mtshan ma yin te/_mtshan ma de nyid rang ngo shes na mtshan med yin pas/_bdag gis mtshan ma de rang sar grol bar rtogs so/_/zhes bya ba'o/_/gsum pa ni/_rtogs pa'i rgyu tshul bzhin ma yin pa yid la byed pa la sogs pa'i mtshan ma yin te/_mtshan ma de nyid rang ngo shes na mtshan med yin pas/_bdag gis mtshan ma de rang sar grol bar rtogs so/_/zhes bya ba'o/_/gsum pa ni/_rtogs pa'i glang chen zhes pa la sogs pa ste/_thabs kyi khyad par bzhis thabs ldan gyi nyams myong bde blag tu bskyed pa ste/_yul sna tshogs la 'phros pa'i rtog mkhan rang ngo shes pas dgug pa glang po che lcags kyus bkug pa lta bu dang*/_rang lus gzhan lus kyi bde bas nyams myong gi rten byed pa me tog gi rtsi yis bung ba bsdud pa lta bu/_'od gsal gyi ting nge 'dzin bde ba chen po'i ngang du brtse ba dang ba mtshon brtse ba lta bu/_gsol 'debs kyis bar chad sel zhing rtogs pa'i pad+ma kha 'byed pa nyi zer gyis 'dam skyes kha 'byed pa lta bu ste/_thabs kyis thabs ldan lam du slong ba'i man ngag bdag gis rtogs so zhes bya'o/_/bzhi pa ni/_yid kyi zhes pa la sogs pa ste/_de ltar khyad par gyi thabs bzhi pa/_thabs ldan gyi nyams myong gom pa'i phan yon mngon sum du 'byung ste/_glang chen lcags kyus bkug pa lta bu'i thabs kyis/_rig pa rang gsal gyi mar me yid kyi mun pa sel/_bung ba sbrang rtsi'i sdud pa lta bu'i thabs kyis bde ba'i sbrang rtsi'i rtog pa'i bung bas 'jib/_ngang pa mtsho nang rtse ba lta bu'i thabs kyis 'dzin pa'i rba rlabs rgya mtshor thim/
521 pad+ma nyi zer gyis 'byed pa lta bu'i thabs kyis bde sdug gi sprin tshogs spros bral gyi nam mkhar dengs zhes bya ba'o/_/lnga pa ni/_yi ge gsum zhes pa la sogs pa ste/_yi ge gsum ni/_a dang*/_sa dang*/_ka dang gsum ste/_a a ma ni zhes rtogs byed kyi blo yid byed pa dang bral ba'o/_/pa pa ra mAr+tha zhes pa rtogs bya don du ma grub pa don dam pa stong pa nyid/_ka kardza zhes pa/_rtogs byed blo yis rtogs bya'i don rtogs pa grub pa'i 'bras bus mtshan ma rang sar grol ba ste/_de ltar yi ge gsum gyis yi ge med par bstan pas yi ge'i rgyal po yi ge med par bdag gis rtogs zhes bya ba'o/_/drug pa ni/_gang du zhes pa la sogs pa ste/_rmi lam gyi ma shi ba gang du yang 'gro rgyu med pa ltar rnam rtog thams cad yul dang*/_yul dus 'di nas yul dus gzhan du 'gro rgyu med la/_rmi lam gyi pha 'ong la gnas med pa ltar rnam rtog la'ang phyi nang bar gsum gyi gnas med cing*/_gang gi gnas pa chos kyi dbyings yin pas nam mkha' 'gags pa med pa ltar rnam rtog la 'gag pa med de/_de ltar 'gro gnas 'gag med gsum gyi don bdag gis rtogs so/_/zhes bya ba'o/_/bdun pa ni/_rtag tu zhes pa la sogs pa ste/_gti mug gti mug gis rnam par dag pas sgrib pa med pa'i gter chen yin te/_gti mug gi byed pa mi shes par sgrib pa yin la/_rmi lam gyi mun pa ltar bsgribs pa'i dus su sgrib mkhan med pa'i phyir ro/_/khong khro khong khros rnam par dag pa 'khrugs pa med pa'i gter chen yin te/_khong khro'i byed pa sems kun nas 'khrugs pa yin pa la/_sgyu ma'i me lce 'khrugs pa bzhin du 'khrugs pa'i dus su 'khrugs mkhan med pa'i phyir ro/_/bag chags sam 'dod chags kyis rnam par dag pa zhen cing dkris pa med pa'i phyir
522 gter chen yin te/_'dod chags kyi byed las zhen cing dkris pa yin pa la sbrul mdud pa rang sar grol ba bzhin du/_dkris pa'i dus su dkri mkhan med pa'i phyir ro/_/dug gsum rnam dag de nyid zhi ba mya ngan 'das kyi gter yin pas/_de nyid gzhan na ni med kyi rang la yod pa shes par gyis shig_/ces bya'o/_/brgyad pa ni/_'jig rten pa zhes pa la sogs pa ste/_'di ltar snang ba'i 'jig rten ni sgyu ma lta bu'i las kyis bsgrub pa/_sgyu ma'i las de'ang sgyu ma lta bu'i yid kyis bsgrubs te/_rkun po ngos zin na des rku mi nus pa ltar/_sgyu mar shes pas bden zhen log pa ni sdug bsngal rang sar ldog go_/zhes bya ba'o/_/dgu pa ni/_sgyu mar rtogs zhes pa'i tshig rkang gnyis te/_shes rab zab mos sgyu mar rtogs pas bden rtog dang bral la/_snying rje chen pos sgyu tsam yang mi gnas te/_sems can gyi don rgya cher byed pas shes rab dang snying rje zung 'jug sgrub pa la mkhas so/_/zhes bya ba'o/_/dgu khrag gcig po 'di dag kyang*/_skyes bu dbang po rab kyi dbang du byas te/_dbang po rab kyi tha ma dang*/_rab kyi 'bring dang*/_rab kyi rab rnams la go rim ltar/_tshig le'ur byas pa gsum gsum sbyar ba yang shes par bya'o/_/spyi don gsum pa sgrub pa mthar phyin pas don chen grub pa'i rtogs pa brjod pa ni/_mi gnas zhes pa'i tshig rkang gnyis te/_sngar smos pa ltar shes rab dang snying rje zung 'jug gi rtogs pa skyes pa/_yun ring po nas bsgrubs pa'i 'bras bus dag dod mthar phyin te/_thabs shes rab gnyis kyis 'khor 'das gnyis la mi gnas par/_rang don dang gzhan don phun sum tshogs pas/_nor bu rin po che dbang gi rgyal po rnyed pa dang mtshungs so zhes bya ba'o/_/'jig rten mgon pos rnam 'dren rgyal po la/_/do ha
523 rdo rje'i glu gsungs de ma thag_/rgya las 'bur bzhin thugs la legs 'khrungs nyams/_/rtogs brjod sum cu'i rnam bshad mdo tsam bkrol/_/dge ba 'di yi rjes 'jug snying dkyil du/_/lhan cig ma rig 'thib po'i mun bsal nas/_/de rjes mkha' khyab ma rnams rang rig la'ang*/_/rang byung mngon rtogs dri med 'bar ba shog_/rtogs pa brjod pa sum cu pa'i do ha rdo rje'i tshig 'bru rnam par bshad pa/_dge slong dpal gyi ming can gyis sbyar ba rdzogs so//_//



Footnotes[edit]



Research Information
Translator's notes
Notes on the text itself
Notes on authorship
Notes on individuals related to text
Other notes
Genre from Richard Barron's Catalog
Instruction manual
Genre from dkar chag
khrid phran
BDRC Link
VolumeI1CZ3979
BDRC Content Information
No note on contents


Related Content
Recensions
Other Translations
Commentary(s) of this Text in the DNZ
Text(s) in the DNZ of which this is a commentary
Related Western Publications
Related Tibetan Publications
Other Information

Information about Unicode Tibetan and the digitization of this text

As the only available unicode Tibetan text at the time, Nitartha International's version of the Paro Edition of the gdams ngag mdzod is provided here. However, note that it has not been thoroughly edited and that there may also be mistakes introduced through the conversion process. Eventually we will provide a fully edited version of the entire Shechen Edition, entered and edited multiple times by Pulahari Monastery in Nepal, but as of fall 2017 that project has not been finished. Note that the folio numbers that appear throughout were added by Nitartha Input Center at the time of input.

Provided by Nitartha International Document Input Center. Many thanks to Lama Tenam and Gerry Wiener for help with fonts and conversion.

View JSON

JSON Export