Wylie:Dzam bha la ser po'i khrid dngos grub char 'bebs

From gDams Ngag mDzod
Jump to navigation Jump to search


Upload a file
Click the picture above to view the original manuscript.

ཛམ་བྷ་ལ་སེར་པོའི་ཁྲིད་དངོས་གྲུབ་ཆར་འབེབས་
dzam bha la ser po'i khrid dngos grub char 'bebs
A Shower of Accomplishments: Instructions of the Yellow Jambhala

Damngak Dzö Volume 16 (མ་) / Pages 467-483 / Folios 1a1 to 9a7


Property "Author" has a restricted application area and cannot be used as annotation property by a user.


[edit]
XXX ཛམ་བྷ་ལ་སེར་པོའི་ཁྲིད་དངོས་གྲུབ་ཆར་འབེབས་བཞུགས་སོ། །
XXX ཚོགས་གཉིས་རྒྱ་མཚོ་ཡོངས་སུ་རྫོགས་པའི་མཐུས། །འགྲོ་ལ་དགོས་འདོད་ཆར་ཆེན་རྟག་འབེབས་པ། །དགེ་བའི་ལོ་ཏོག་འབྲས་བུ་སྨིན་མཛད་པའི། །ཆུ་དབང་མགོན་པོའི་སྐུ་ལ་ཕྱག་འཚལ་ལོ། །གང་ལ་གསོལ་བ་བཏབ་པས་སྐད་ཅིག་ལ། །བཀྲ་ཤིས་བདེ་ལེགས་ཕུན་སུམ་ཚོགས་པ་ཀུན། །འབད་མེད་ལྷུན་གྱིས་གྲུབ་པར་སྩོལ་མཛད་པའི། །བཅོམ་ལྡན་ཛཾ་བྷ་ལ་དེས་བདག་སྐྱོངས་ཤིག །དེ་ཉིད་མན་ངག་བསྒོམ་པའི་རིམ་པ་རྣམས། །སྙན་བརྒྱུད་དགོས་འདོད་ཀུན་འབྱུང་གདམས་པ་མཆོག །འགྲོ་ལ་ཕན་ཕྱིར་ཡི་གེར་བཀོད་པ་ལ། །བླ་མ་མཁའ་འགྲོ་ཛཾ་ལྷས་བྱིན་གྱིས་རློབས། །འདིར་འཕགས་པ་ཛཾ་བྷ་ལའི་ཁྲིད་དངོས་གྲུབ་ཆར་འབེབས་ཞེས་བྱ་བ་འདི་ལ་དོན་གསུམ་སྟེ། སྔོན་འགྲོ། དངོས་གཞི། རྗེས་དང་གསུམ་མོ། །དང་པོ་ལ་གསུམ་སྟེ། བླ་མ་བརྒྱུད་པའི་བྱུང་ཚུལ། ཐུན་མོང་གི་སྔོན་འགྲོ། ཁྱད་པར་གྱི་སྔོན་འགྲོ་དང་གསུམ་མོ། །དང་པོ་ནི།
XXX རྣལ་འབྱོར་གྱི་དབང་ཕྱུག་མི་ཏྲ་ཛྭོ་ཀི་དེ་ཉིད། དུར་ཁྲོད་སོ་ས་གླིང་དུ་ཐུགས་དམ་ལྷ་ལྔ་བསྒྲུབས་པས། གྲུབ་པ་བརྙེས་ཏེ། ལྷ་སོ་སོའི་ཞལ་བསྟན་ནས། ཁྲིད་ཀྱི་རིམ་པ་རྣམས་གནང་ཞིང༌། མི་རབས་བདུན་གྱི་བར་དུ་བྱིན་གྱིས་རློབ་པར་ལུང་བསྟན། དེའི་ཚེ་བཅོམ་ལྡན་འདས་འཕགས་པ་ཛམ་བྷ་ལའི་ཁྲིད་འདི་དག་ཉམས་སུ་ལེན་པའི་རྣལ་འབྱོར་པ་རྣམས་ལ། དགོས་འདོད་ཆར་ལྟར་བདག་གིས་འབེབས་ཤིང༌། ཕྱི་མའི་མཐར་ཐུག་གི་བར་བདག་གིས་དགོས་འདོད་བསྒྲུབ་པར་བྱའོ། །ཡོངས་སུ་བསྲུང་ཞིང་བདེ་ལེགས་དང་ལྡན་པར་འཚལ་ལོ། །ཞེས་གསུངས་ནས་བསྐྱེད་རྫོགས་ཀྱི་ཁྲིད་ཀྱི་རིམ་པ་གསུངས་སོ། །རྣལ་འབྱོར་གྱི་དབང་ཕྱུག་མི་ཏྲས་རྗེས་སུ་བཟུང་བ་ནི། པཎ་ཆེན་ཤྲཱི་པུ་ཏྲའོ། །དེ་ཉིད་ཀྱིས་རྗེས་སུ་བཟུང་བ་ནི། མཚུངས་མེད་གཱིརྟི་རཏྣའོ། །གཉིས་པ་ལ་བཞི་སྟེ། དལ་འབྱོར་རྙེད་པར་དཀའ་བ་བསྒོམ་པ་དང༌། འཆི་བ་མི་རྟག་པ་བསྒོམ་པ་དང༌། ལས་རྒྱུ་འབྲས་ཀྱི་
XXX དོན་བསྒོམ་པ་དང༌། འཁོར་བའི་ཉེས་དམིགས་བསྒོམ་པ་ནི་སྤྱི་དང་མཚུངས་སོ། །གསུམ་པ་ལ་བཞི་སྟེ། དང་པོ་ཅི་བྱས་བྱང་ཆུབ་ཀྱི་ལམ་དུ་འགྲོ་བ་སྐྱབས་འགྲོ་སེམས་བསྐྱེད་ཀྱི་ཁྲིད་ནི། མདུན་གྱི་ནམ་མཁར་རིན་པོ་ཆེ་དུ་མ་ལས་ཀུན་ནས་གྲུབ་པའི་ཁྲི་ཡངས་ཤིང་རྒྱ་ཆེ་བའི་སྟེང་དུ་རང་གི་རྩ་བའི་བླ་མ་རིན་པོ་ཆེ་ལ་བླ་མ་རྒྱ་མཚོས་བསྐོར་བ། མདུན་དུ་ཡི་དམ། གཡས་སུ་སངས་རྒྱས། རྒྱབ་ཏུ་དམ་ཆོས། གཡོན་དུ་དགེ་འདུན་རྒྱ་མཚོས་བསྐོར་བར་བསམ་ལ་སྐྱབས་སུ་འགྲོ་བྱ། མཐར་སྐྱབས་གནས་རང་ལ་བསྟིམ་ལ་མི་དམིགས་པར་བཞག་གོ །གཉིས་སྡིག་སྒྲིབ་དག་བྱེད་རྡོ་རྗེ་སེམས་དཔའི་བསྒོམ་བཟླས་ནི་སྤྱི་དང་མཐུན་ནོ། །གསུམ་པ་ཆད། མཆན། བཞི་པ་བྱིན་རླབས་མྱུར་དུ་འཇུག་པར་བྱེད་པ་བླ་མའི་རྣལ་འབྱོར་གྱི་ཁྲིད་ནི། སྤྱི་བོར་རིན་པོ་ཆེའི་ཁྲི་དང་པད་ཟླའི་སྟེང་དུ་རང་གི་རྩ་བརྒྱུད་ཀྱི་བླ་མ་ཡི་དམ། སངས་རྒྱས། ཆོས། དགེ་འདུན། མཁའ་འགྲོ་ཆོས་སྐྱོང་ཀུན་འདུས་སུ་བསྒོམ་ལ། མཎྜལ་ཕུལ། དགོས་འདོད་ཆར་ལྟར་འབེབ་པར་གསོལ་བ་བཏབ། དབང་བསྐུར་རྣམ་གསུམ་ཞུ། མཐར་བླ་མ་རང་ལ་བསྟིམས། མ་བཅོས་པའི་ངང་ལ་མཉམ་པར་བཞག་གོ །སྔོན་འགྲོ་འདི་དག་རྒྱས་པར་མི་ཏྲའི་ཁྲིད་ལྔ་ལྟར་རོ། །དངོས་གཞི་ལ་གཉིས་ཏེ། བསྐྱེད་རིམ་གྱི་ཁྲིད་རྫོགས་རིམ་གྱི་ཁྲིད་དོ། །དང་པོ་ལ་གཉིས་ཏེ། བསྐྱེད་རིམ་དང་བཟླས་པའོ། །དང་པོ་བསྐྱེད་རིམ་ལ་ཡང་གསུམ་སྟེ། དང་པོ་བསྙེན་པའི་ཁྲིད་ནི། གནས་དབེན་ཞིང་ཉམས་དགའ་བར། ཚངས་པའི་གནས་བཞི་ལ་གནས་པས། ཆོས་ཐམས་ཅད་སྟོང་པ་ཉིད་དུ་བསྒོམ། སྟོང་པའི་ངང་ལས། ས་གཞི་རིན་པོ་ཆེ་སྣ་ལྔ་ལས་གྲུབ་པའི་གཞལ་ཡས་ཁང་གྲུ་བཞི་སྒོ་བཞི། རྒྱན་རྟ་བབས་བང་རིམ་
XXX བཞི་པ། ཆོས་འཁོར་གདུགས་ཏོག་དང་བཅས་པ། དབུས་ཕྱུར་བུར་གྱུར་པའི་སྟེང་ནོར་བུའི་ཏོག་གིས་མཚན་པ། ལྕགས་རི་དང་ལྕོག་གིས་བསྐོར་བ། རྡོ་རྗེའི་ཕྲེང་བ་དང༌། སྐྱེད་མོས་ཚལ་གྱི་ནང་དུ་བཀྲ་ཤིས་རྟགས་བརྒྱད། རྒྱལ་སྲིད་སྣ་བདུན་གྱིས་བསྐོར་བའི་གཞལ་ཡས་ཁང་གི་དབུས་སུ། རིན་པོ་ཆེ་དུ་མ་ལས་ཀུན་ནས་གྲུབ་པའི་ཁྲི་ཡངས་ཤིང་རྒྱ་ཆེ་བ། རིན་པོ་ཆེ་སྣ་ལྔ་བཀང་བའི་བུམ་བསྣོལ་གྱིས་བརྒྱན་པ། དེའི་སྟེང་དུ་སྣ་ཚོགས་པདྨ་འབུམ་ལྡན། ཨ་ལས་ཉ་རྒྱས་པའི་ཟླ་བའི་སྟེང་དུ་ནོར་བདག་སེར་པོ་གན་རྐྱལ་དུ་འགྱེལ་བའི་སྟེང་དུ། ཛཾ་ཡིག་གསེར་གྱི་མདོག་ཅན་ལས་དཔག་ཏུ་མེད་པའི་འོད་ཟེར་སྣ་ལྔ་ཕྱོགས་བཅུར་འཕྲོས་ཕྱོགས་བཅུའི་རྒྱལ་བ་སྲས་བཅས་ཐམས་ཅད་མཆོད་པའི་སྤྲིན་ཕུང་གིས་མཆོད། སེམས་ཅན་ཐམས་ཅད་ལ་ཕོག་པས་སེར་སྣ་ལ་སོགས་པའི་སྡིག་སྒྲིབ་ཐམས་ཅད་སྦྱངས། རིན་ཆེན་འབྱུང་ལྡན་གྱི་གོ་འཕང་ལ་བཀོད། ཚུར་འདུས་ཡོངས་སུ་གྱུར་པ་ལས་ཛཾ་ལས་བཱི་ཛ་པུ་ར་ཛཾ་གྱིས་མཚན་པ། དེ་ཡོངས་སུ་གྱུར་པ་ལས་རང་ཉིད་ཛཾ་བྷ་ལ་སྐུ་མདོག་གསེར་བཙོ་མའི་མདོག་འོད་འབར་བ། ཞབས་གཉིས་རྒྱལ་པོ་རལ་པའི་སྟབས་ཀྱིས་བཞུགས་པ། དར་སྣ་ཚོགས་ཀྱིས་སྨད་གཡོགས་ཅན། གསེར་གྱི་སྐུ་རགས་ལ་ལྟེ་བ་ནོར་བུས་མཚན་པ་བཅིངས་པ། སུས་ཁྱིམ་ཆེ་ཞིང་ཡན་ལག་དང་ལྷུ་ཚིགས་རྒྱས་པ། ཕྱག་གཡས་མཆོག་སྦྱིན་པུས་མོའི་སྟེང་དུ་མཛད་ནས་ཤིང་ཐོག་པཉྩ་པུ་ར་ཀའི་ལྟེ་བ་ཡིད་བཞིན་ནོར་བུ་འོད་འབར་བས་མཚན་པ་འཛིན་པ། གཡོན་པས་རིན་པོ་ཆེ་སྣ་ཚོགས་སྐྱུགས་པའི་ནེའུ་ལེ་འཛིན་ཅིང༌། ཞལ་ཅུང་ཟད་ཁྲོ་ཞིང་ཡིད་ཙམ་འཛུམ་པ། ཉི་མའི་དཀྱིལ་འཁོར་ལྟར་རབ་
XXX ཏུ་རྒྱས་པ། དབུ་སྐྲ་རོལ་པའི་ཐོར་ཅོག་གྱེན་ལ་བཅིངས་ཤིང༌། ལྷག་མ་ཐུར་དུ་འཕྱང་བ། མེ་ཏོག་གི་ཕྲེང་བས་སྐྲ་ཆིངས་དང༌། ཡིད་བཞིན་ནོར་བུ་འོད་འབར་བ་ལྔའི་རྩེ་བྲན་གྱིས་བརྒྱན་པ། རིན་པོ་ཆེ་དུ་མས་སྙན་ཆ་དང་མགུལ་རྒྱན། དཔུང་རྒྱན་དང་ཕྱག་གདུབ། རྐང་རྒྱན་དང་ཞབས་གདུབ། ཨུཏྤལ་སྣ་ལྔའི་ཕྲེང་བ་བཟང་པོ་འཕྱང་བ། མུ་ཏིག་སྣ་ལྔའི་ཕྲེང་བ་དང༌། དར་གྱི་ཅོད་པན་གྱིས་མཛེས་པ། འོད་ཟེར་སྣ་ལྔའི་ཕྲེང་བས་བསྐོར་བའི་དབུས་ན་བཞུགས་པ། པདྨ་འདབ་བརྒྱད་ལ་ནོར་བདག་བརྒྱད་ལ་རང་ལྟ་བུའི་ཆ་ལུགས་ཀྱིས་བཞུགས་པ། གཞན་ཡང་འཁོར་ལྷ་དང་ཀླུ། གནོད་སྦྱིན། དྲི་ཟ། ཉི་མ། ཟླ་བ། སྲིན་པོ། ནོར་ལྷ་ལ་སོགས་པའི་ཚོགས་དུ་མས་བསྐོར་བའི་བདག་ཉིད་དུ་བསམ་ལ། དེ་དག་རྣམས་ཀྱི་སྤྱི་བོར་ཨོཾ་དཀར་པོ། མགྲིན་པར་ཨཱཿདམར་པོ། ཐུགས་ཀར་ཧཱུྃ་སྔོན་པོ་ལས་འོད་འཕྲོས། ལྕང་ལོ་ཅན་ནས་རང་ལྟ་བུའི་ཡེ་ཤེས་པ་སྤྱན་དྲངས། དབྱེར་མེད་དུ་བསྟིམ། སླར་འོད་འཕྲོས། རིགས་ལྔ་སྤྱན་དྲངས། དབང་བསྐུར། སྡིག་སྒྲིབ་དག །བདུད་རྩིའི་ལྷག་མ་ཡར་ལུད་པ་ལས་རིན་འབྱུང་ལ་སོགས་པ་རིགས་ལྔས་དབུ་བརྒྱན་པར་བསམ་ལ། ཐུགས་ཀར་པད་ཟླའི་སྟེང་དུ། ནོར་བུ་ཛཾ་སེར་པོས་མཚན་པ། དེ་ལ་ཡི་གེ་བཅུ་པ་བསམ་ལ། སྤྱི་བོར་ཨོཾ། དཔྲལ་བར་ཛཾ། ལྕེ་ལ་བྷ། མགྲིན་པར་ལ། སྙིང་ཁར་ཛ། ལྟེ་བར་ལེན། བརླ་གཡས་པ་ལ་དྲ། གཡོན་པ་ལ་ཡེ། རྐང་པ་གཡས་སུ་སྭཱ། གཡོན་དུ་ཧཱ། ཞེས་པའི་སྔགས་རྣམས་པད་ཟླའི་སྟེང་དུ། དམར་སེར་འོད་འབར་བ་ལས་འོད་ཟེར་འཕྲོས། འོད་ཟེར་གྱི་རྩེར་འཕགས་པའི་
XXX སྐུ་རེ་རེ་བཞུགས་ཤིང༌། དེ་དག་རྣམས་ཀྱི་ཕྱག་ན་རིན་པོ་ཆེ་དང་ནེའུ་ལེ་ལས་རིན་པོ་ཆེ་སྣ་ལྔའི་ཆར་བབས་པར་བསམ་ལ་བསྙེན་པ་བྱ་བ་ནི། ཨོཾ་ཛམྦྷ་ལ་ཛ་ལེནྡྲ་ཡེ་སྭཱ་ཧཱ། ཞེས་པའི་བསྙེན་པ་བསྐྱལ་བའི་ཚེ། སྔགས་རྣམས་ལས་འོད་འཕྲོས། ཕྱི་སྣོད་ལ་ཕོག །གཞལ་ཡས་ཁང་དུ་བྱས། ནང་བཅུད་ལ་ཕོག །ཛཾ་བྷ་ལར་བྱས། ཐམས་ཅད་ཀྱི་ཞལ་ནས་སྔགས་ཀྱི་སྒྲ་སྒྲོག་ཅིང༌། རིན་པོ་ཆེ་སྣ་ལྔའི་ཆར་ཆེན་པོ་བབས་པར་བསམ་ལ་སྙིང་པོ་འདྲེན་ནོ། །མཐར་སྣོད་བཅུད་རང་ལ་བསྡུ། རང་ས་བོན་ལ་བསྡུ། དེ་དམིགས་མེད་ཀྱི་ངང་ལ་བཞག་གོ །གཉིས་པ་རིགས་ལྔ་ལ་བརྟེན་ནས་བསོད་ནམས་དང་ཡེ་ཤེས་ཀྱི་སྟོབས་རྒྱས་པར་བྱེད་པའི་ཁྲིད་ནི། རང་གི་བསྙེན་པའི་དུས་ཀྱི་ལྟར་ཛཾ་བྷ་ལར་བསྐྱེད་པའི་སྤྱི་བོར་པད་ཟླའི་སྟེང་དུ། རྣམ་པར་སྣང་མཛད་སྐུ་མདོག་དཀར་པོ། གཡས་འཁོར་ལོ་ཐུགས་ཀར་འཛིན་པ། གཡོན་དེས་ཡུ་བ་བྱས་པའི་དྲིལ་བུ་དཀུ་ལ་བརྟེན་པའི་ཐུགས་ཀར་པད་ཟླའི་སྟེང་དུ་ནོར་བུ་དཀར་པོ་ཨོཾ་ཡིག་དཀར་པོས་མཚན་པ། མགྲིན་པར་པད་ཟླའི་སྟེང་དུ་འོད་དཔག་མེད་དམར་པོ་གཡས་པདྨ་ཐུགས་ཀར་འཛིན་ཅིང༌། གཡོན་དེས་ཡུ་བ་བྱས་པའི་དྲིལ་བུ་དཀུ་ལ་བརྟེན་པའི་ཐུགས་ཀར་པད་ཟླའི་སྟེང་དུ་ནོར་བུ་དམར་པོ་ཧྲཱིཿས་མཚན་པ། སྙིང་ཁར་པད་ཟླའི་སྟེང་དུ་མི་བསྐྱོད་པ་སྔོན་པོ་གཡས་རྡོ་རྗེ་ཐུགས་ཀར་འཛིན་པ། གཡོན་དེས་ཡུ་བ་བྱས་པའི་དྲིལ་བུ་དཀུ་ལ་བརྟེན་པའི་ཐུགས་ཀར་པད་ཟླའི་སྟེང་དུ་ནོར་བུ་སྔོན་པོ་ཧཱུྃ་གིས་མཚན་པ། ལྟེ་བར་པད་ཟླའི་སྟེང་དུ་རིན་ཆེན་འབྱུང་ལྡན་སེར་པོ། གཡས་ནོར་བུ་ཐུགས་ཀར་འཛིན་ཅིང༌། གཡོན་དེས་ཡུ་བ་བྱས་པའི་དྲིལ་བུ་དཀུ་ལ་བརྟེན་པའི་ཐུགས་
XXX ཀར་པད་ཟླའི་སྟེང་དུ་ནོར་བུ་སེར་པོ་ཏྲཱཾ་གྱིས་མཚན་པ། གསང་གནས་སུ་པད་ཟླའི་སྟེང་དུ་དོན་ཡོད་གྲུབ་པ་སྐུ་མདོག་ལྗང་ཁུ་གཡས་རྒྱ་གྲམ་ཐུགས་ཀར་གཏོད་དེ་འཛིན་པ། གཡོན་དེས་ཡུ་བ་བྱས་པའི་དྲིལ་བུ་དཀུ་ལ་བརྟེན་པའི་ཐུགས་ཀར་པད་ཟླའི་སྟེང་དུ་ནོར་བུ་ལྗང་ཁུ་ཨཱཿས་མཚན་པ། ཐམས་ཅད་ཞལ་གཅིག་ཕྱག་གཉིས། ཞབས་རྡོ་རྗེ་སྐྱིལ་ཀྲུང་མཛད་པ། དར་དང་རིན་པོ་ཆེའི་རྒྱན་དུ་མས་བརྒྱན་པ། ལོངས་སྤྱོད་རྫོགས་པའི་ཆ་ལུགས་ཅན་དུ་བསྒོམ་པའི་ཡིད་བཞིན་ནོར་བུ་ས་བོན་དང་བཅས་པ་ལྔ་ལས། འོད་ཟེར་དཀར་དམར་སྔོ་སེར་ལྗང་ཁུ་ལྔ་འཕྲོས་པས་ཕྱོགས་བཅུའི་རྒྱལ་བ་སྲས་བཅས་ཐམས་ཅད་ལ་མཆོད་པའི་སྤྲིན་ཕུང་བསམ་གྱིས་མི་ཁྱབ་པས་མཆོད། མཆོད་པས་མཉེས་པར་བྱས་ནས། དེ་དག་གི་སྐུ་གསུང་ཐུགས་ཡོན་ཏན་ཕྲིན་ལས་ཡེ་ཤེས་ལྔ་བསོད་ནམས་ཀྱི་སྟོབས་ཐམས་ཅད་འོད་ཟེར་དཀར་དམར་སྔོ་སེར་ལྗང་ཁུ་ལྔར་བསྡུས་ནས། རང་གི་གནས་ལྔའི་ཐུགས་ཀའི་ནོར་བུ་དང་ས་བོན་ལ་ཐིམ་པས། རང་ཉིད་བསོད་ནམས་དང་ཡེ་ཤེས་ཀྱི་སྟོབས་རྒྱས་པར་བསམ་ལ་རླུང་བུམ་པ་ཅན་བཟུང་ངོ༌། །སླར་ཡང་འོད་ཟེར་དཀར་དམར་སེར་ལྗང་ཁུ་ལྔ་འཕྲོས། རིགས་དྲུག་གི་སེམས་ཅན་ལ་ཕོག །དེ་དག་རྣམས་ཀྱི་འདོད་ཆགས། ཞེ་སྡང༌། གཏི་མུག །ང་རྒྱལ། ཕྲག་དོག །ལྔ་སྦྱངས། རིགས་ལྔའི་གོ་འཕང་ལ་བཀོད། དེ་དག་གི་ཚེ་དང་བསོད་ནམས་དཔལ་དང་གྲགས་པ་སྟོབས་དང་གཟི་བརྗིད་འོད་ཟེར་དཀར་དམར་སྔོ་སེར་ལྗང་ཁུའི་དབྱིབས་སུ་བསྡུས་ནས། རང་གི་གནས་ལྔར་ཐིམ། རང་གི་ཚེ་དང་བསོད་ནམས་དཔལ་དང་གྲགས་པ། སྟོབས་དང་གཟི་བརྗིད་ཐམས་ཅད་རྒྱས་པར་བསམ་ལ་རླུང་བུམ་པ་ཅན་བཟུང་ངོ༌། །
XXX སླར་ཡང་གནས་ལྔའི་ནོར་བུ་དང་ས་བོན་ལས་འོད་ཟེར་ལྔ་འཕྲོས། གཟུགས་ཁམས་ཀྱི་ལྷའི་ནོར་བུ་དང༌། འདོད་ཁམས་ཀྱི་ལྷ་དང༌། ལྷ་མིན། ཀླུ། གནོད་སྦྱིན། དྲི་ཟ། མིའམ་ཅི། མི་རྣམས་ཀྱི་ནོར་བུ་དང༌། མདོར་ན་ཉི་ཟླའི་འོད་དང༌། འབྱུང་བ་ལྔའི་བཅུད་དང༌། བཀྲག་དང་གཟི་མདངས་ཡོན་ཏན་ཐམས་ཅད་འོད་ཟེར་ལྔར་བསྡུས་ནས། གནས་ཁང་དང༌། ཡུལ་འཁོར་ཐམས་ཅད་དུའང་རིན་པོ་ཆེ་དང་ལོངས་སྤྱོད་ཀྱི་ཆར་ཆེན་པོ་བབས་པར་བསམ་ལ་རླུང་བུམ་པ་ཅན་དུ་བཟུང༌། དེ་ལ་རྩ་འཁོར་ལྔ་ལ་དམིགས་ཐེབས་གསུམ་རེ་རྫོགས་པར་བྱའོ། །རྒྱས་པར་བསྒོམ་ན་རྩ་འཁོར་རེ་རེ་ལ་དམིགས་ཐེབས་རེ་རེ་བྱ་སྟེ། དམིགས་ཐེབས་ལྔའོ། །སྦྱོར་བ་འདིས་ནི་བསོད་ནམས་ཀྱི་སྟོབས་རྒྱས་ཤིང༌། ལོངས་སྤྱོད་ཀྱི་ཆར་ཆེན་པོ་འབབ་པར་འགྱུར་རོ། །འོད་ཟེར་གྱི་སྣ་ལ་ལྷ་བསྒོམ་པ་ནི་ཞལ་ལས་ཤེས་སོ། །གསུམ་པ་ཞི་རྒྱས་དབང་དྲག་གི་སྒོ་ནས་དམིགས་ཡུལ་དབང་དུ་བྱས་པའི་སྦྱོར་བ་ནི། རང་ཉིད་ཛཾ་བྷ་ལ་སྔར་བསྙེན་པའི་དུས་ལྟར་བསྐྱེད་པའི་གནས་ལྔར། རང་ལྟ་བུའི་ཛཾ་བྷ་ལ་རིགས་ལྔ་ནི། སྤྱི་བོར་རྣམ་སྣང་ཛཾ་བྷ་ལ་དཀར་པོ། མགྲིན་པར་པདྨའི་ཛཾ་བྷ་ལ་དམར་པོ། སྙིང་གར་རྡོ་རྗེའི་ཛཾ་བྷ་ལ་སྔོན་པོ། ལྟེ་བར་རིན་འབྱུང་ཛཾ་བྷ་ལ་སེར་པོ། གསང་གནས་སུ་དོན་གྲུབ་ཛཾ་བྷ་ལ་ལྗང་ཁུ་རྣམས། རིན་པོ་ཆེའི་ཁྲི་དང༌། པད་ཟླའི་སྟེང་ན་རང་ལྟ་བུའི་ཆ་ལུགས་ཀྱིས་བཞུགས་པའི་ཐུགས་ཀར་པད་ཟླའི་སྟེང་དུ། ནོར་བུ་དཀར་དམར་སྔོ་སེར་ལྗང་ཁུ་ལྔ་གནས་པར་བསྒོམ། དེ་ལ་དང་པོ་ཞི་བའི་སྒོ་ནས་དབང་དུ་བྱ་བ་ནི། སྤྱི་བོར་རྣམ་སྣང་ཛཾ་བྷ་ལའི་ཐུགས་ཀར་པད་ཟླའི་སྟེང་དུ་ཡིད་
XXX བཞིན་གྱི་ནོར་བུ་དཀར་པོ་འོད་འབར་བ་ལས། འོད་ཟེར་དཀར་པོ་ཞགས་པ་དང་ལྕགས་ཀྱུའི་དབྱིབས་ཅན་དཔག་ཏུ་མེད་པ་འཕྲོས། གྲུབ་པ་ཐོབ་པ་དང༌། མཁའ་ལ་སྤྱོད་པ་དང༌། རིག་པ་འཛིན་པ་དང༌། གནས་ལྔ་རིག་པའི་མཁས་པ་རྣམས་དང༌། མདོར་ན་བླ་མ་ཐམས་ཅད་ཀྱི་སྨིན་མཚམས་སུ་ཕོག །ཐུགས་རྒྱུད་མཉེས་ཤིང་བདེ་བས་གང་ནས། རང་དབང་མེད་པར་སྤྱི་བོར་བཀུག་ནས། བླ་མ་དབང་དུ་འདུས་ནས་བདག་ལ་རབ་ཏུ་མཉེས་ཤིང་རང་རྒྱུད་སྐུ་གསུང་ཐུགས་ཀྱིས་བྱིན་གྱིས་བརླབས་པ་བསམ་པ་ནི་བླ་མ་དབང་དུ་བྱ་བའོ། །གཉིས་པ་ཡི་དམ་དབང་དུ་བྱ་བ་ནི། འོད་ཟེར་དཀར་པོ་ཞགས་པ་དང་ལྕགས་ཀྱུ་ལྟ་བུ་དེས། ཡི་དམ་གྱི་ཐུགས་ཀར་རེག་པས། ཡི་དམ་ཐུགས་རྒྱུད་བདེ་གསལ་གྱིས་གང་ཞིང༌། ཐུགས་བརྩེ་བ་ཆེན་པོ་དང་ལྡན་པས་རང་དབང་མེད་པར་བྱོན་ནས། རང་གི་སྤྱི་བོའི་ནོར་བུ་ལ་ཐིམ་པས་མཆོག་ཐུན་མོང་གི་དངོས་གྲུབ་ཐོབ་པར་བསམ་པ་ནི་ཡི་དམ་དབང་དུ་བྱ་བའོ། །གསུམ་པ་དགེ་བའི་བཤེས་གཉེན་ལ་སོགས་པ་བཙུན་པ་དབང་དུ་བྱ་བ་ནི། འོད་ཟེར་དཀར་པོ་ལྕགས་ཀྱུ་དང་ཞགས་པ་ལྟ་བུ་དེས། དགེ་བའི་བཤེས་གཉེན་རྣམས་ཀྱི་སྤྱི་བོར་ཕོག་ནས། རང་དབང་མེད་པར་བཀུག་ཅིང་སྤྱི་བོའི་ནོར་བུ་ལ་ཐིམ་པར་བསམ་པས་བཙུན་པ་དབང་དུ་འགྱུར་རོ། །བཞི་པ་རྒྱལ་པོ་དབང་དུ་བྱ་བ་ནི། འོད་ཟེར་དཀར་པོ་ཞགས་པ་དང་ལྕགས་ཀྱུ་ལྟ་བུ་དེས། རྒྱལ་པོའི་ཐོད་པ་ལ་སོགས་པ་སྤྱི་བོར་ཕོག་སྟེ་ཛཾ་བྷ་ལར་བྱས། རང་དབང་མེད་པར་བདག་ལ་དགའ་ཞིང་མདུན་དུ་འདུས་ནས། སྤྱི་བོའི་ནོར་བུ་ལ་ཐིམ་པར་བསམ་མོ། །ལྔ་པ་བློན་པོ་ལ་སོགས་པ་མི་སྐྱེ་དབང་དུ་བྱ་བ་ནི། འོད་
XXX ཟེར་དཀར་པོ་ལྕགས་ཀྱུ་དང་ཞགས་པ་ལྟ་བུ་དེས། བློན་པོ་ལ་སོགས་པ་རྣམས་ཀྱི་སྙིང་ནས་བཟུང་སྟེ། བདག་ལ་བདུན་པ་དང༌། དད་པ་དང༌། དགའ་བ་དང་བཅས་ནས་རང་དབང་མེད་པར་དབང་དུ་འདུས་ནོར་བུ་ལ་ཐིམ་པར་བསམ་མོ། །དྲུག་པ་བཙུན་མོ་ལ་སོགས་པའི་བུད་མེད་དབང་དུ་བྱ་བ་ནི། འོད་ཟེར་དཀར་པོ་ཞགས་པ་དང་ལྕགས་ཀྱུ་ལྟ་བུ་དེས། བཙུན་མོ་དང་བུད་མེད་རྣམས་ཀྱི་ལྟེ་བ་དང་པདྨའི་ཟེའུ་འབྲུ་ནས་བཟུང་ཞིང་རང་དབང་མེད་པར་བདག་ལ་དགའ་བཞིན་དུ་དབང་དུ་འདུས་ནས་སྤྱི་བོའི་ནོར་བུ་ལ་ཐིམ་པར་བསམ་མོ། །བདུན་པ་ལོངས་སྤྱོད་དབང་དུ་བྱ་བ་ནི། སྤྱི་བོའི་ནོར་བུ་ས་བོན་དང་བཅས་པ་ལས། འོད་ཟེར་དཀར་པོ་ཞགས་པ་དང་ལྕགས་ཀྱུ་ལྟ་བུ་འཕྲོས། འཇིག་རྟེན་ཁམས་ཀྱི་ནོར་བུ་ཐམས་ཅད་དང་རིན་པོ་ཆེ་སྣ་ལྔ། འབྲུ་ཐམས་ཅད་དང༌། གོས་ཐམས་ཅད། ཟས་ཐམས་ཅད། ནོར་ཞིང་ཡུལ་གྲུ་ཐམས་ཅད་འོད་ཟེར་གྱིས་བསྡུས་ནས་ནོར་བུ་ལ་ཐིམ་པར་བསམ་མོ། །བརྒྱད་པ་ཐམས་ཅད་དབང་དུ་བྱ་བ་ནི། སྤྱི་བོའི་ཛམྦྷ་ལའི་ཐུགས་ཁའི་ནོར་བུ་ལས། འོད་ཟེར་དཀར་པོ་ཞགས་པ་དང་ལྕགས་ཀྱུ་ལྟ་བུ་འཕྲོས་ནས། བླ་མ་དང་རྒྱལ་བ་སྲས་བཅས་ཐམས་ཅད་ལ་ཕོག །མཆོད་པས་མཉེས་པར་བྱས། སེམས་ཅན་ཐམས་ཅད་ལ་ཕོག་པས་ཛཾ་བྷ་ལར་བྱས། ཕྱི་སྣོད་ལ་ཕོག་པས་རིན་པོ་ཆེ་སྣ་ལྔ་ལས་གྲུབ་པའི་སངས་རྒྱས་ཀྱི་ཞིང་ཁམས་རྣམ་པར་དག་པར་སྦྱངས། དེ་ནས་དེ་དག་ཐམས་ཅད་འོད་ཟེར་གྱིས་བསྡུས་ནས་སྤྱི་བོའི་ནོར་བུ་ལ་ཐིམ་པར་བསམས་པས་ཐམས་ཅད་དབང་དུ་འགྱུར་རོ། །ལས་ཚོགས་བརྒྱད་པོ་ཐམས་ཅད་ཀྱི་ཐོག་མར་རླུང་རོ་ལན་
XXX གསུམ་བུས་ལ། སེར་སྣ་ལ་སོགས་པའི་སྒྲིབ་པ་ལྔ་དག་པར་བསམ། རླུང་ཚུར་འཛིན་པའི་ཚེ། བསྒྲུབ་བྱ་དེ་དག་འོད་ཟེར་དཀར་པོ། ལྕགས་ཀྱུ་དང་ཞགས་པ་ལྟ་བུས། གནས་སོ་སོར་ཕོག་པའི་ཚེ། དེ་དག་གི་ལུས་སེམས་ཐམས་ཅད་དགའ་བ་དང་བདེ་བ་ཆེན་པོས་ཁྱབ་ཅིང༌། རང་ལ་དད་པ་དང༌། མོས་པ་དང༌། བརྩེ་གདུང་དྲག་པོ་དང་བཅས་ནས་རང་དབང་མེད་པར་མདུན་དུ་འདུས་ནས། ཐམས་ཅད་རྣམ་སྣང་ཛཾ་བྷ་ལར་གྱུར་ཏེ་མདུན་དུ་འཁོད་པ་ལ། སླར་ཡང་འོད་ཟེར་གྱིས་རེག་པ་ཙམ་གྱིས། ཐམས་ཅད་འོད་དཀར་པོ་ཞུ་ནས་སྤྱི་བོའི་ཛཾ་བྷ་ལའི་ཐུགས་ཀའི་ནོར་བུ་ལ་ཐིམ་པའི་ཚེ། སྤྱི་བོའི་ཛཾ་བྷ་ལའི་ནོར་བུ་དང་ཕྱག་མཚན་ལས་དགོས་འདོད་ཀྱི་ལོངས་སྤྱོད་ཆར་ཆེན་པོ་བབས་པས། ལུས་ཀྱི་ནང་དང་རང་གི་གནས་ཐམས་ཅད་གང་བར་བསམ་ལ་རླུང་བཟུང༌། དེ་ནི་ཞི་བའི་སྒོ་ནས་དབང་དུ་བྱེད་པའོ། །གཉིས་པ་དབང་གི་སྒོ་ནས་དབང་དུ་བྱེད་པ་ནི། རང་ཉིད་ཛཾ་བྷ་ལར་གནས་པའི་མགྲིན་པ། རིན་པོ་ཆེའི་ཁྲི་དང༌། པད་ཟླའི་སྟེང་དུ། རང་ལྟ་བུའི་ཛཾ་བྷ་ལ་དམར་པོའི་སྙིང་གར་ནོར་བུ་དམར་པོས་མཚན་པ་ལས་འོད་ཟེར་དམར་པོ་ཞགས་པ་དང་ལྕགས་ཀྱུ་ལྟ་བུ་འཕྲོས། བླ་མ་ལ་ཕོག་ནས་དབང་དུ་བྱ་བ་དང་གཅིག །ཡི་དམ་དང་གཉིས། དགེ་བའི་བཤེས་གཉེན་དང་གསུམ། རྒྱལ་པོ་དང་བཞི། བློན་པོ་ལ་སོགས་མི་སྐྱ་དང་ལྔ། བཙུན་མོ་ལ་སོགས་བུད་མེད་དང་དྲུག །ནོར་རྫས་ལ་སོགས་ལོངས་སྤྱོད་དང་བདུན། མདོར་ན་ཐམས་ཅད་དབང་དུ་བྱ་བ་དང་བརྒྱད་དེ། སྔར་ལྟར་སོ་སོའི་གནས་ལ་ཕོག་པས། ལུས་སེམས་ཐམས་ཅད་དགའ་བ་དང་བདེ་བ་ཆེན་པོས་
XXX ཁྱབ་ཅིང༌། རང་ལ་དད་པ་དང་མོས་པ་དང༌། བརྩེ་གདུང་དྲག་པོ་དང་བཅས་ནས། རང་དབང་མེད་པར་དབང་དུ་འདུས་ཏེ་པདྨའི་ཛཾ་བྷ་ལར་གྱུར་ནས་མདུན་དུ་འཁོད་པ་ལ། སླར་ཡང་འོད་ཟེར་གྱིས་རེག་པས། དགའ་བ་ཆེན་པོ་སྐྱེས་ནས། འོད་ཕུང་དམར་པོར་ལྟེམས་གྱིས་ཞུ་ནས་མགྲིན་པའི་པདྨའི་ཛཾ་བྷ་ལའི་སྙིང་ཁའི་ནོར་བུ་ལ་ཐིམ་པས། མཆོག་ཐུན་མོང་གི་དངོས་གྲུབ་རྣམ་གཉིས་ཐོབ་ཅིང༌། རང་གི་ལུས་ཀྱི་ནང་དང༌། གནས་ཐམས་ཅད་དུ་ཡང་ལོངས་སྤྱོད་སྣ་ཚོགས་ཀྱི་ཆར་ཆེན་པོ་བབས་པར་བསམ་ལ་རླུང་བཟུང་ངོ༌། །དེ་ནི་དབང་གི་སྒོ་ནས་དབང་དུ་བྱེད་པའོ། །གསུམ་པ་རྒྱས་པའི་སྒོ་ནས་དབང་དུ་བྱ་བ་ནི། རང་ཉིད་ཛཾ་བྷ་ལར་གནས་པའི་ལྟེ་བར། རིན་པོ་ཆེའི་ཁྲི་པད་ཟླའི་སྟེང་དུ། རིན་འབྱུང་ཛཾ་བྷ་ལ་རང་ལྟ་བུ་སྙིང་ཁར་པད་ཟླའི་སྟེང་དུ། ནོར་བུས་སེར་པོ་ཛཾ་སེར་པོས་མཚན་པ་ལས། འོད་ཟེར་སེར་པོ་ཞགས་པ་དང་ལྕགས་ཀྱུ་ལྟ་བུར་ཕྱོགས་བཅུར་འཕྲོས། ཕྱོགས་བཅུའི་བླ་མ་ལ་སོགས་ཐམས་ཅད་ལ་ཕོག་སྟེ། སྔར་ལྟར་རང་དབང་མེད་པར་དབང་དུ་འདུས་ནས། རིན་འབྱུང་ཛཾ་བྷ་ལར་གྱུར་ཏེ་མདུན་དུ་འཁོད་པ་ལ་སླར་ཡང་འོད་ཟེར་གྱིས་རེག་པས། དགའ་བདེ་ཆེན་པོ་སྐྱེས་ནས་འོད་ཀྱི་ཕུང་པོ་མེར་གྱིས་ཞུ་ནས། ལྟེ་བའི་རིན་འབྱུང་ཛཾ་བྷ་ལའི་ལྟེ་བའི་ནོར་བུ་ལ་ཐིམ་པས། མཆོག་ཐུན་མོང་གཉིས་ཀྱི་དངོས་གྲུབ་ཐོབ་ཅིང་ལུས་ཀྱི་ནང་དང༌། གནས་ཁང་ཐམས་ཅད་ལོངས་སྤྱོད་ཀྱི་ཆར་ཆེན་པོ་བབས་ནས་གང་བར་བསྒོམ་ནས་རླུང་བུམ་པ་ཅན་བཟུང་ངོ༌། །དེ་ནི་རྒྱས་པའི་སྒོ་ནས་དབང་དུ་བྱེད་པའོ། །བཞི་པ་དྲག་པོའི་སྒོ་ནས་དབང་དུ་བྱ་བ་ནི། རང་ཉིད་ཛཾ་བྷ་ལར་གནས་པའི་གསང་
XXX གནས་སུ། རིན་པོ་ཆེའི་ཁྲི་པད་ཟླའི་སྟེང་དུ་ལས་ཀྱི་ཛཾ་བྷ་ལ་ལྗང་ནག་གམ། ནག་པོའི་སྙིང་གར་པད་ཟླའི་སྟེང་དུ་ནོར་བུ་ལྗང་ཁུ་ཛཾ་ནག་པོས་མཚན་པ་ལས་འོད་ཟེར་ལྗང་ནག་ཞགས་པ་དང་ལྕགས་ཀྱུ་ལྟ་བུ་ཕྱོགས་བཅུར་འཕྲོས། ཕྱོགས་བཅུའི་བླ་མ་སོགས་ཐམས་ཅད་ལ་ཕྱོགས་པས། དབང་དུ་བྱ་བ་རྣམ་པ་བརྒྱད་དེ། སྔར་ལྟར་སོ་སོའི་གནས་ལ་ཕོག་པས། ལུས་སེམས་ཐམས་ཅད་དགའ་བདེ་ཆེན་པོས་ཁྱབ་ཅིང༌། ཁྱད་པར་བསྒྲུབ་བྱ་ཐམས་ཅད་སྐྲག་ཅིང་འདར་བ་དང༌། སྔངས་པ་དང༌། རྨོངས་པ་བཅས་ནས། རང་དབང་མེད་པར་དབང་དུ་འདུས་ཏེ། ལས་ཀྱི་ཛཾ་བྷ་ལར་གྱུར་ཏེ་མདུན་དུ་འཁོད་པ་ལས། སླར་འོད་ཟེར་གྱིས་རེག་པས། དགའ་བདེ་ཆེན་པོ་སྐྱེས་ནས་འོད་ལྗང་ཁུའི་ཕུང་པོར་མེར་གྱིས་ཞུ་སྟེ། གསང་གནས་ཀྱི་ཛཾ་བྷ་ལའི་སྙིང་ཁའི་ནོར་བུ་ལ་ཐིམ་པས་མཆོག་ཐུན་མོང་གི་དངོས་གྲུབ་ཐོབ་ཅིང༌། ལུས་ཀྱི་ནང་དང༌། རང་གི་གནས་ཐམས་ཅད་ན་ལོངས་སྤྱོད་སྣ་ལྔའི་ཆར་ཆེན་པོ་བབས་པས་གང་བར་བསམ་ལ་རླུང་བུམ་པ་ཅན་བཟུང་ངོ༌། །དེ་ནི་དྲག་པོའི་སྒོ་ནས་དབང་དུ་བྱ་བའོ། །ལྔ་པ་ལས་སྣ་ཚོགས་པའི་སྒོ་ནས་དབང་དུ་བྱ་བ་ནི། རང་ཉིད་ཛཾ་བྷ་ལར་གནས་པའི་སྙིང་ཁར་རིན་པོ་ཆེའི་ཁྲི་པད་ཟླའི་སྟེང་དུ་མི་བསྐྱོད་པ་ཛཾ་བྷ་ལ་སྔོན་པོ་རང་ལྟ་བུའམ། ཡང་ན་ཛཾ་བྷ་ལ་ནག་པོ་ཁྲོས་པར་བསྒོམ་ཀྱང་རུང་གསུངས། དེའི་སྙིང་ཁར་པད་ཟླའི་སྟེང་དུ། ནོར་བུ་སྔོན་པོ་ཛཾ་སྔོན་པོས་མཚན་པ། དེ་ལས་འོད་ཟེར་དཀར་པོ་དང་དམར་པོ་སྔོན་པོ་སེར་པོ་ལྗང་གུ་སྣ་ཚོགས་ཏེ། ཁ་དོག་སྣ་ལྔ། ཞགས་པ་དང་ལྕགས་ཀྱུའི་དབྱིབས་ཅན་དཔག་ཏུ་མེད་པ་ཕྱོགས་བཅུར་འཕྲོས། ཕྱོགས་བཅུའི་བླ་མ་རྣམས་དང༌། ཡི་
XXX དམ་ཐམས་ཅད་དེ་བསྒྲུབ་བྱ་བརྒྱད་ལ་སོགས་པས། དབང་དུ་བྱ་བ་རྣམ་པ་བརྒྱད་དེ། སྔར་ལྟར་དེ་དག་སོ་སོའི་གནས་ལ་ཕོག་པས། ལུས་སེམས་ཐམས་ཅད་དགའ་བདེས་ཁྱབ་ཅིང༌། རང་ལ་བྱིན་གྱིས་བརླབ་པ་དང༌། དད་མོས་བརྩེ་གདུང་དྲག་པོ་དང་བཅས་ནས། རང་དབང་མེད་པར་དབང་དུ་འདུས་ཤིང་མི་བསྐྱོད་པ་ཛཾ་བྷ་ལར་གྱུར་ཏེ་མདུན་དུ་འཁོད་པར། སླར་འོད་ཟེར་སྣ་ལྔས་རེག་པས་དགའ་བདེ་ཆེན་པོ་སྐྱེས་ནས། འོད་ཀྱི་ཕུང་པོ་སྔོ་མེར་གྱིས་སོང་བར་བསམ། དེ་དག་འོད་ཟེར་ཁ་དོག་སྣ་ལྔའི་རང་བཞིན་དུ་ཞུ་ནས་སྙིང་ཁའི་ཛཾ་བྷ་ལའི་སྙིང་ཁའི་ནོར་བུ་ལ་ཐིམ་པས། མཆོག་ཐུན་མོང་གི་དངོས་གྲུབ་རྣམ་གཉིས་ཐོབ་ཅིང༌། ལུས་ཀྱི་ནང་དང་གནས་ཁང་ཐམས་ཅད་དུ་རིན་པོ་ཆེ་སྣ་ལྔ་དང་ལོངས་སྤྱོད་ཀྱི་ཆར་ཆེན་པོ་བབས་པས་གང་བར་བསམ་ལ་རླུང་བུམ་པ་ཅན་དུ་བཟུང་ངོ༌། །དེ་ནི་ལས་སྣ་ཚོགས་པའི་སྒོ་ནས་དབང་དུ་བྱའོ། །འདི་དག་གི་སྐབས་སུ་འོད་ཟེར་གྱི་རྩེ་ལ་ལྷ་བསྒོམ་པ་ནི་ཞལ་ལ་ཡོད་ཅིང༌། ནོར་བདག་བརྒྱད་ལུས་ལ་བཀོད་པ་ཡང་ཞལ་ལས་ཤེས་སོ། །གཉིས་པ་བཟླས་པ་གསུང་གི་ཁྲིད་ལ་གསུམ་སྟེ། ཕྱི་ནང་གསང་གསུམ་མོ། །དང་པོ་ནི། རང་ཉིད་ཛཾ་བྷ་ལར་གནས་པའི་སྤྱི་བོར་ཨོཾ། དཔྲལ་བར་ཛམ། དཔུང་པ་གཡས་པ་བྷ། གཡོན་དུ་ལ། སྙིང་ཁར་ཛ། ལྟེ་བར་ལེན། བརླ་གཡས་པ་ལ་དྲ། གཡོན་དུ་ཡེ། བོལ་གཡས་ལ་སྭཱ། གཡོན་ལ་ཧཱ་བསྐྱེད་དོ། །དེ་དག་གི་འོད་འཕྲོས་པའི་རྩེར། ཡི་གེ་བཅུ་པ་ལས་རིན་པོ་ཆེ་སྣ་ལྔའི་ཆར་བབས་པར་བསམ་ལ་སྔགས་འདྲེན་ནོ། །གཉིས་པ་ནི། རང་ཉིད་ཛཾ་བྷ་ལ་སྔར་ལྟར་གསལ་
XXX བའི་གནས་ལྔར། ཛཾ་བྷ་ལ་རིགས་ལྔའི་སྙིང་ཁར་ནོར་བུ་ལྔ་ཛཾ་ལྔས་མཚན་པ་ལས། སྔགས་ཀྱི་ཁ་དོག་དེ་ལྟ་བུ་ལྔ་འཁོར་བར་དམིགས་ནས་སྔགས་འདྲེན་ནོ། །གསུམ་པ་ནི། རང་ཉིད་ཛཾ་བྷ་ལར་གསལ་བའི་གནས་ལྔར་ཛཾ་བྷ་ལ་རིགས་ལྔའི་སྙིང་ཁར་པད་ཟླའི་སྟེང་དུ། ནོར་བུ་ཛཾ་རིགས་ལྔས་མཚན་པ་ལྔ་ལས། སྔགས་ཕྲེང་ཁ་དོག་སྣ་ལྔས་བསྐོར་བ་ལས་འོད་ཟེར་འཕྲོས། འོད་ཟེར་གྱི་རྩེ་ལ་ཛཾ་བྷ་ལ་རིགས་ལྔ་འཕྲོས། ལུས་ཀྱི་ནང་ཐམས་ཅད་ཛཾ་བྷ་ལ་རིགས་ལྔས་ཐེམ་འགགས་སུ་གང༌། ཕྱིར་འཕྲོས། བ་སྤུའི་རྩ་བ་ཐམས་ཅད་ཀྱི་ཛཾ་བྷ་ལས་གང༌། སྣོད་ཀྱི་འཇིག་རྟེན་ལ་ཕོག །སངས་རྒྱས་ཀྱི་ཞིང་དུ་བྱས། ནང་བཅུད་ཀྱི་སེམས་ཅན་ཐམས་ཅད་ལ་ཕོག་པས་ཐམས་ཅད་ཛཾ་བྷ་ལར་བྱས། འོད་ཟེར་གྱིས་བར་སྣང་གང་ཞིང༌། འོད་ཟེར་དེ་དག་གི་རྩེ་ལ་ཛཾ་བྷ་ལ་རིགས་ལྔ་བཞུགས་ནས་ཐམས་ཅད་ཀྱི་ཞལ་ནས་སྔགས་སྒྲ་དི་རི་རི་སྙན་པའི་དབྱངས་དང་བཅས་ནས་བགྲངས་པས། རིན་པོ་ཆེ་སྣ་ལྔ་དང་ལོངས་སྤྱོད་ཀྱི་ཆར་ཆེན་པོ་བབས་པར་བསམ་ལ་ཡིད་ཀྱིས་བཟླས་པ་བྱའོ། །དེ་ནི་གསང་བའི་བཟླས་པའོ། །དེ་དག་གིས་བཟླས་པ་གསུང་གི་ཁྲིད་སོང༌། གཉིས་པ་རྫོགས་རིམ་གྱི་ཁྲིད་ལ་གསུམ་སྟེ། ཞི་གནས། ལྷག་མཐོང༌། འཕོ་བ་སྟེ་གསུམ་མོ། །གོང་མ་གཉིས་པོ་ནི་སྤྱན་རས་གཟིགས་ལམ་རིམ་དང་འདྲ་བར་འདུག་པས་འདིར་མ་བྲིས། གསུམ་པ་འཕོ་བ་ནི། རང་ཉིད་ཛཾ་བྷ་ལ་བསྒོམ་པའི་སྤྱི་བོ། མགྲིན་པ། སྙིང་ཁ། ལྟེ་བ། གསང་གནས་ལྔར། ཛཾ་བྷ་ལ་རིགས་ལྔ་བསྐྱེད་ལ། གསང་གནས་ཀྱི་ཛཾ་བྷ་ལ་ཐིག་ལེ་ལྗང་ཁུར་གྱུར་ནས་ལྟེ་བའི་ཛཾ་བྷ་ལ་ལ་ཐིམ། དེ་ཐིག་ལེ་སེར་པོར་གྱུར་
XXX ནས་སྙིང་ཁའི་མི་བསྐྱོད་པ་ལ་ཐིམ། དེ་ཐིག་ལེ་སྔོན་པོར་གྱུར་ནས་མགྲིན་པའི་སྣང་བ་མཐའ་ཡས་ལ་ཐིམ། དེ་ཐིག་ལེ་དམར་པོར་གྱུར་ནས་སྤྱི་བོའི་རྣམ་པར་སྣང་མཛད་ལ་ཐིམ། དེ་ཐིག་ལེ་དཀར་པོ་འོད་འཕྲོ་བར་གྱུར་ནས་སྤྱི་བོ་ནས་རྒྱངས་ཀྱིས་ཐོན་ནས། སྤྱི་བོར་བླ་མ་རིན་འབྱུང་དུ་བསྒོམ་པའི་ཐུགས་ཀར་ཐིམ། དེ་ནམ་མཁའ་ལ་འཇའ་ཚོན་སྣ་ལྔ་གྱུར་ནས། འོད་དང་འཇའ་ཚོན་གྱིས་ནམ་མཁའ་གང་བར་བསམ་ལ། དམིགས་མེད་ཕྱག་རྒྱ་ཆེན་པོའི་ངང་ལ་མཉམ་པར་བཞག་གོ །དེ་ནི་འཕོ་བ་འཇའ་ཚོན་མ་ཞེས་བྱ་སྟེ་སྦྱང་བ་དང་ལས་སྦྱོར་སྟབས་སུའོ། །དེས་ཁྲིད་ཀྱི་དངོས་གཞི་སོང་ནས། གསུམ་པ་རྗེས་ནི། བསྔོ་བ་དང་སྨོན་ལམ་གྱིས་རྒྱས་འདེབས་བྱ་ཞིང་དུས་རྒྱུན་དུ་ཉམས་སུ་བླངས་པས་མཆོག་ཐུན་མོང་གི་དངོས་གྲུབ་ལྷུན་འགྲུབ་ཏུ་འབྱུང་བར་འགྱུར་རོ། །ཁྲིད་འདི་ནི་རྒྱུད་པ་འཛིན་པ་དང༌། སྣོད་དང་ལྡན་ངེས་པ་མ་གཏོགས་པ་སྣོད་མིན་ལ་མི་སྦྱིན་པའི་བཀའ་རྒྱས་བཏབ་བོ། །གང་ཞིག་དགོས་འདོད་འབྱུང་བའི་ཡིད་བཞིན་ནོར། །གང་གི་གདམས་པ་དངོས་གྲུབ་གཉིས་འབྱུང་བ། །གང་དེ་བླ་མའི་དྲིན་གྱིས་ལེགས་མཐོང་བས། །གང་གང་འགྲོ་ལ་ཕན་ཕྱིར་ཡི་གེར་བཀོད། །དགེ་བས་འགྲོ་ཀུན་འཁོར་བའི་རྒྱ་མཚོ་ལས། །བརྒལ་ནས་སེམས་ཉིད་ཡིད་བཞིན་ནོར་རྙེད་ནས། །རང་གཞན་འཁོར་བའི་སྡུག་བསྔལ་ལས་གྲོལ་ཏེ། །བདེ་ཆེན་མཆོག་གི་གོ་འཕང་འགྲུབ་གྱུར་ཅིག །བཅོམ་ལྡན་འདས་འཕགས་པ་ཛམ་བྷ་ལྷའི་ཁྲིད་དངོས་གྲུབ་ཆར་འབེབས་ཞེས་བྱ་བ། བླ་མའི་གསུང་ལས་བྱོན་པ་བཞིན་རྣལ་འབྱོར་པ་འོད་དཔག་རྡོ་རྗེས་ཡི་གེར་བཀོད་པ་རེ་ཞིག་རྫོགས་སོ།། །།དགེའོ། །དགེའོ། །དགེའོ། །


XXX dzam b+ha la ser po'i khrid dngos grub char 'bebs bzhugs so/ /
XXX tshogs gnyis rgya mtsho yongs su rdzogs pa'i mthus/ /'gro la dgos 'dod char chen rtag 'bebs pa/ /dge ba'i lo tog 'bras bu smin mdzad pa'i/ /chu dbang mgon po'i sku la phyag 'tshal lo/ /gang la gsol ba btab pas skad cig la/ /bkra shis bde legs phun sum tshogs pa kun/ /'bad med lhun gyis grub par stsol mdzad pa'i/ /bcom ldan dzaM b+ha la des bdag skyongs shig_/de nyid man ngag bsgom pa'i rim pa rnams/ /snyan brgyud dgos 'dod kun 'byung gdams pa mchog_/'gro la phan phyir yi ger bkod pa la/ /bla ma mkha' 'gro dzaM lhas byin gyis rlobs/ /'dir 'phags pa dzaM b+ha la'i khrid dngos grub char 'bebs zhes bya ba 'di la don gsum ste/_sngon 'gro/_dngos gzhi/_rjes dang gsum mo/ /dang po la gsum ste/_bla ma brgyud pa'i byung tshul/_thun mong gi sngon 'gro/_khyad par gyi sngon 'gro dang gsum mo/ /dang po ni/
XXX rnal 'byor gyi dbang phyug mi tra dz+wo ki de nyid/_dur khrod so sa gling du thugs dam lha lnga bsgrubs pas/_grub pa brnyes te/_lha so so'i zhal bstan nas/_khrid kyi rim pa rnams gnang zhing*/_mi rabs bdun gyi bar du byin gyis rlob par lung bstan/_de'i tshe bcom ldan 'das 'phags pa dzam b+ha la'i khrid 'di dag nyams su len pa'i rnal 'byor pa rnams la/_dgos 'dod char ltar bdag gis 'bebs shing*/_phyi ma'i mthar thug gi bar bdag gis dgos 'dod bsgrub par bya'o/ /yongs su bsrung zhing bde legs dang ldan par 'tshal lo/ /zhes gsungs nas bskyed rdzogs kyi khrid kyi rim pa gsungs so/ /rnal 'byor gyi dbang phyug mi tras rjes su bzung ba ni/_paN chen shrI pu tra'o/ /de nyid kyis rjes su bzung ba ni/_mtshungs med gIrti rat+na'o/ /gnyis pa la bzhi ste/_dal 'byor rnyed par dka' ba bsgom pa dang*/_'chi ba mi rtag pa bsgom pa dang*/_las rgyu 'bras kyi
XXX don bsgom pa dang*/_'khor ba'i nyes dmigs bsgom pa ni spyi dang mtshungs so/ /gsum pa la bzhi ste/_dang po ci byas byang chub kyi lam du 'gro ba skyabs 'gro sems bskyed kyi khrid ni/_mdun gyi nam mkhar rin po che du ma las kun nas grub pa'i khri yangs shing rgya che ba'i steng du rang gi rtsa ba'i bla ma rin po che la bla ma rgya mtshos bskor ba/_mdun du yi dam/_g.yas su sangs rgyas/_rgyab tu dam chos/_g.yon du dge 'dun rgya mtshos bskor bar bsam la skyabs su 'gro bya/_mthar skyabs gnas rang la bstim la mi dmigs par bzhag go_/gnyis sdig sgrib dag byed rdo rje sems dpa'i bsgom bzlas ni spyi dang mthun no/ /gsum pa chad/_mchan/_bzhi pa byin rlabs myur du 'jug par byed pa bla ma'i rnal 'byor gyi khrid ni/_spyi bor rin po che'i khri dang pad zla'i steng du rang gi rtsa brgyud kyi bla ma yi dam/_sangs rgyas/_chos/_dge 'dun/_mkha' 'gro chos skyong kun 'dus su bsgom la/_maN+Dal phul/_dgos 'dod char ltar 'beb par gsol ba btab/_dbang bskur rnam gsum zhu/_mthar bla ma rang la bstims/_ma bcos pa'i ngang la mnyam par bzhag go_/sngon 'gro 'di dag rgyas par mi tra'i khrid lnga ltar ro/ /dngos gzhi la gnyis te/_bskyed rim gyi khrid rdzogs rim gyi khrid do/ /dang po la gnyis te/_bskyed rim dang bzlas pa'o/ /dang po bskyed rim la yang gsum ste/_dang po bsnyen pa'i khrid ni/_gnas dben zhing nyams dga' bar/_tshangs pa'i gnas bzhi la gnas pas/_chos thams cad stong pa nyid du bsgom/_stong pa'i ngang las/_sa gzhi rin po che sna lnga las grub pa'i gzhal yas khang gru bzhi sgo bzhi/_rgyan rta babs bang rim
XXX bzhi pa/_chos 'khor gdugs tog dang bcas pa/_dbus phyur bur gyur pa'i steng nor bu'i tog gis mtshan pa/_lcags ri dang lcog gis bskor ba/_rdo rje'i phreng ba dang*/_skyed mos tshal gyi nang du bkra shis rtags brgyad/_rgyal srid sna bdun gyis bskor ba'i gzhal yas khang gi dbus su/_rin po che du ma las kun nas grub pa'i khri yangs shing rgya che ba/_rin po che sna lnga bkang ba'i bum bsnol gyis brgyan pa/_de'i steng du sna tshogs pad+ma 'bum ldan/_a las nya rgyas pa'i zla ba'i steng du nor bdag ser po gan rkyal du 'gyel ba'i steng du/_dzaM yig gser gyi mdog can las dpag tu med pa'i 'od zer sna lnga phyogs bcur 'phros phyogs bcu'i rgyal ba sras bcas thams cad mchod pa'i sprin phung gis mchod/_sems can thams cad la phog pas ser sna la sogs pa'i sdig sgrib thams cad sbyangs/_rin chen 'byung ldan gyi go 'phang la bkod/_tshur 'dus yongs su gyur pa las dzaM las bI dza pu ra dzaM gyis mtshan pa/_de yongs su gyur pa las rang nyid dzaM b+ha la sku mdog gser btso ma'i mdog 'od 'bar ba/_zhabs gnyis rgyal po ral pa'i stabs kyis bzhugs pa/_dar sna tshogs kyis smad g.yogs can/_gser gyi sku rags la lte ba nor bus mtshan pa bcings pa/_sus khyim che zhing yan lag dang lhu tshigs rgyas pa/_phyag g.yas mchog sbyin pus mo'i steng du mdzad nas shing thog pany+tsa pu ra ka'i lte ba yid bzhin nor bu 'od 'bar bas mtshan pa 'dzin pa/_g.yon pas rin po che sna tshogs skyugs pa'i ne'u le 'dzin cing*/_zhal cung zad khro zhing yid tsam 'dzum pa/_nyi ma'i dkyil 'khor ltar rab
XXX tu rgyas pa/_dbu skra rol pa'i thor cog gyen la bcings shing*/_lhag ma thur du 'phyang ba/_me tog gi phreng bas skra chings dang*/_yid bzhin nor bu 'od 'bar ba lnga'i rtse bran gyis brgyan pa/_rin po che du mas snyan cha dang mgul rgyan/_dpung rgyan dang phyag gdub/_rkang rgyan dang zhabs gdub/_ut+pal sna lnga'i phreng ba bzang po 'phyang ba/_mu tig sna lnga'i phreng ba dang*/_dar gyi cod pan gyis mdzes pa/_'od zer sna lnga'i phreng bas bskor ba'i dbus na bzhugs pa/_pad+ma 'dab brgyad la nor bdag brgyad la rang lta bu'i cha lugs kyis bzhugs pa/_gzhan yang 'khor lha dang klu/_gnod sbyin/_dri za/_nyi ma/_zla ba/_srin po/_nor lha la sogs pa'i tshogs du mas bskor ba'i bdag nyid du bsam la/_de dag rnams kyi spyi bor oM dkar po/_mgrin par AHdmar po/_thugs kar hU~M sngon po las 'od 'phros/_lcang lo can nas rang lta bu'i ye shes pa spyan drangs/_dbyer med du bstim/_slar 'od 'phros/_rigs lnga spyan drangs/_dbang bskur/_sdig sgrib dag_/bdud rtsi'i lhag ma yar lud pa las rin 'byung la sogs pa rigs lngas dbu brgyan par bsam la/_thugs kar pad zla'i steng du/_nor bu dzaM ser pos mtshan pa/_de la yi ge bcu pa bsam la/_spyi bor oM/_dpral bar dzaM/_lce la b+ha/_mgrin par la/_snying khar dza/_lte bar len/_brla g.yas pa la dra/_g.yon pa la ye/_rkang pa g.yas su swA/_g.yon du hA/_zhes pa'i sngags rnams pad zla'i steng du/_dmar ser 'od 'bar ba las 'od zer 'phros/_'od zer gyi rtser 'phags pa'i
XXX sku re re bzhugs shing*/_de dag rnams kyi phyag na rin po che dang ne'u le las rin po che sna lnga'i char babs par bsam la bsnyen pa bya ba ni/_oM dzam+b+ha la dza len+d+ra ye swA hA/_zhes pa'i bsnyen pa bskyal ba'i tshe/_sngags rnams las 'od 'phros/_phyi snod la phog_/gzhal yas khang du byas/_nang bcud la phog_/dzaM b+ha lar byas/_thams cad kyi zhal nas sngags kyi sgra sgrog cing*/_rin po che sna lnga'i char chen po babs par bsam la snying po 'dren no/ /mthar snod bcud rang la bsdu/_rang sa bon la bsdu/_de dmigs med kyi ngang la bzhag go_/gnyis pa rigs lnga la brten nas bsod nams dang ye shes kyi stobs rgyas par byed pa'i khrid ni/_rang gi bsnyen pa'i dus kyi ltar dzaM b+ha lar bskyed pa'i spyi bor pad zla'i steng du/_rnam par snang mdzad sku mdog dkar po/_g.yas 'khor lo thugs kar 'dzin pa/_g.yon des yu ba byas pa'i dril bu dku la brten pa'i thugs kar pad zla'i steng du nor bu dkar po oM yig dkar pos mtshan pa/_mgrin par pad zla'i steng du 'od dpag med dmar po g.yas pad+ma thugs kar 'dzin cing*/_g.yon des yu ba byas pa'i dril bu dku la brten pa'i thugs kar pad zla'i steng du nor bu dmar po hrIHsa mtshan pa/_snying khar pad zla'i steng du mi bskyod pa sngon po g.yas rdo rje thugs kar 'dzin pa/_g.yon des yu ba byas pa'i dril bu dku la brten pa'i thugs kar pad zla'i steng du nor bu sngon po hU~M gis mtshan pa/_lte bar pad zla'i steng du rin chen 'byung ldan ser po/_g.yas nor bu thugs kar 'dzin cing*/_g.yon des yu ba byas pa'i dril bu dku la brten pa'i thugs
XXX kar pad zla'i steng du nor bu ser po trAM gyis mtshan pa/_gsang gnas su pad zla'i steng du don yod grub pa sku mdog ljang khu g.yas rgya gram thugs kar gtod de 'dzin pa/_g.yon des yu ba byas pa'i dril bu dku la brten pa'i thugs kar pad zla'i steng du nor bu ljang khu AHsa mtshan pa/_thams cad zhal gcig phyag gnyis/_zhabs rdo rje skyil krung mdzad pa/_dar dang rin po che'i rgyan du mas brgyan pa/_longs spyod rdzogs pa'i cha lugs can du bsgom pa'i yid bzhin nor bu sa bon dang bcas pa lnga las/_'od zer dkar dmar sngo ser ljang khu lnga 'phros pas phyogs bcu'i rgyal ba sras bcas thams cad la mchod pa'i sprin phung bsam gyis mi khyab pas mchod/_mchod pas mnyes par byas nas/_de dag gi sku gsung thugs yon tan phrin las ye shes lnga bsod nams kyi stobs thams cad 'od zer dkar dmar sngo ser ljang khu lngar bsdus nas/_rang gi gnas lnga'i thugs ka'i nor bu dang sa bon la thim pas/_rang nyid bsod nams dang ye shes kyi stobs rgyas par bsam la rlung bum pa can bzung ngo*/ /slar yang 'od zer dkar dmar ser ljang khu lnga 'phros/_rigs drug gi sems can la phog_/de dag rnams kyi 'dod chags/_zhe sdang*/_gti mug_/nga rgyal/_phrag dog_/lnga sbyangs/_rigs lnga'i go 'phang la bkod/_de dag gi tshe dang bsod nams dpal dang grags pa stobs dang gzi brjid 'od zer dkar dmar sngo ser ljang khu'i dbyibs su bsdus nas/_rang gi gnas lngar thim/_rang gi tshe dang bsod nams dpal dang grags pa/_stobs dang gzi brjid thams cad rgyas par bsam la rlung bum pa can bzung ngo*/ /
XXX slar yang gnas lnga'i nor bu dang sa bon las 'od zer lnga 'phros/_gzugs khams kyi lha'i nor bu dang*/_'dod khams kyi lha dang*/_lha min/_klu/_gnod sbyin/_dri za/_mi'am ci/_mi rnams kyi nor bu dang*/_mdor na nyi zla'i 'od dang*/_'byung ba lnga'i bcud dang*/_bkrag dang gzi mdangs yon tan thams cad 'od zer lngar bsdus nas/_gnas khang dang*/_yul 'khor thams cad du'ang rin po che dang longs spyod kyi char chen po babs par bsam la rlung bum pa can du bzung*/_de la rtsa 'khor lnga la dmigs thebs gsum re rdzogs par bya'o/ /rgyas par bsgom na rtsa 'khor re re la dmigs thebs re re bya ste/_dmigs thebs lnga'o/ /sbyor ba 'dis ni bsod nams kyi stobs rgyas shing*/_longs spyod kyi char chen po 'bab par 'gyur ro/ /'od zer gyi sna la lha bsgom pa ni zhal las shes so/ /gsum pa zhi rgyas dbang drag gi sgo nas dmigs yul dbang du byas pa'i sbyor ba ni/_rang nyid dzaM b+ha la sngar bsnyen pa'i dus ltar bskyed pa'i gnas lngar/_rang lta bu'i dzaM b+ha la rigs lnga ni/_spyi bor rnam snang dzaM b+ha la dkar po/_mgrin par pad+ma'i dzaM b+ha la dmar po/_snying gar rdo rje'i dzaM b+ha la sngon po/_lte bar rin 'byung dzaM b+ha la ser po/_gsang gnas su don grub dzaM b+ha la ljang khu rnams/_rin po che'i khri dang*/_pad zla'i steng na rang lta bu'i cha lugs kyis bzhugs pa'i thugs kar pad zla'i steng du/_nor bu dkar dmar sngo ser ljang khu lnga gnas par bsgom/_de la dang po zhi ba'i sgo nas dbang du bya ba ni/_spyi bor rnam snang dzaM b+ha la'i thugs kar pad zla'i steng du yid
XXX bzhin gyi nor bu dkar po 'od 'bar ba las/_'od zer dkar po zhags pa dang lcags kyu'i dbyibs can dpag tu med pa 'phros/_grub pa thob pa dang*/_mkha' la spyod pa dang*/_rig pa 'dzin pa dang*/_gnas lnga rig pa'i mkhas pa rnams dang*/_mdor na bla ma thams cad kyi smin mtshams su phog_/thugs rgyud mnyes shing bde bas gang nas/_rang dbang med par spyi bor bkug nas/_bla ma dbang du 'dus nas bdag la rab tu mnyes shing rang rgyud sku gsung thugs kyis byin gyis brlabs pa bsam pa ni bla ma dbang du bya ba'o/ /gnyis pa yi dam dbang du bya ba ni/_'od zer dkar po zhags pa dang lcags kyu lta bu des/_yi dam gyi thugs kar reg pas/_yi dam thugs rgyud bde gsal gyis gang zhing*/_thugs brtse ba chen po dang ldan pas rang dbang med par byon nas/_rang gi spyi bo'i nor bu la thim pas mchog thun mong gi dngos grub thob par bsam pa ni yi dam dbang du bya ba'o/ /gsum pa dge ba'i bshes gnyen la sogs pa btsun pa dbang du bya ba ni/_'od zer dkar po lcags kyu dang zhags pa lta bu des/_dge ba'i bshes gnyen rnams kyi spyi bor phog nas/_rang dbang med par bkug cing spyi bo'i nor bu la thim par bsam pas btsun pa dbang du 'gyur ro/ /bzhi pa rgyal po dbang du bya ba ni/_'od zer dkar po zhags pa dang lcags kyu lta bu des/_rgyal po'i thod pa la sogs pa spyi bor phog ste dzaM b+ha lar byas/_rang dbang med par bdag la dga' zhing mdun du 'dus nas/_spyi bo'i nor bu la thim par bsam mo/ /lnga pa blon po la sogs pa mi skye dbang du bya ba ni/_'od
XXX zer dkar po lcags kyu dang zhags pa lta bu des/_blon po la sogs pa rnams kyi snying nas bzung ste/_bdag la bdun pa dang*/_dad pa dang*/_dga' ba dang bcas nas rang dbang med par dbang du 'dus nor bu la thim par bsam mo/ /drug pa btsun mo la sogs pa'i bud med dbang du bya ba ni/_'od zer dkar po zhags pa dang lcags kyu lta bu des/_btsun mo dang bud med rnams kyi lte ba dang pad+ma'i ze'u 'bru nas bzung zhing rang dbang med par bdag la dga' bzhin du dbang du 'dus nas spyi bo'i nor bu la thim par bsam mo/ /bdun pa longs spyod dbang du bya ba ni/_spyi bo'i nor bu sa bon dang bcas pa las/_'od zer dkar po zhags pa dang lcags kyu lta bu 'phros/_'jig rten khams kyi nor bu thams cad dang rin po che sna lnga/_'bru thams cad dang*/_gos thams cad/_zas thams cad/_nor zhing yul gru thams cad 'od zer gyis bsdus nas nor bu la thim par bsam mo/ /brgyad pa thams cad dbang du bya ba ni/_spyi bo'i dzam+b+ha la'i thugs kha'i nor bu las/_'od zer dkar po zhags pa dang lcags kyu lta bu 'phros nas/_bla ma dang rgyal ba sras bcas thams cad la phog_/mchod pas mnyes par byas/_sems can thams cad la phog pas dzaM b+ha lar byas/_phyi snod la phog pas rin po che sna lnga las grub pa'i sangs rgyas kyi zhing khams rnam par dag par sbyangs/_de nas de dag thams cad 'od zer gyis bsdus nas spyi bo'i nor bu la thim par bsams pas thams cad dbang du 'gyur ro/ /las tshogs brgyad po thams cad kyi thog mar rlung ro lan
XXX gsum bus la/_ser sna la sogs pa'i sgrib pa lnga dag par bsam/_rlung tshur 'dzin pa'i tshe/_bsgrub bya de dag 'od zer dkar po/_lcags kyu dang zhags pa lta bus/_gnas so sor phog pa'i tshe/_de dag gi lus sems thams cad dga' ba dang bde ba chen pos khyab cing*/_rang la dad pa dang*/_mos pa dang*/_brtse gdung drag po dang bcas nas rang dbang med par mdun du 'dus nas/_thams cad rnam snang dzaM b+ha lar gyur te mdun du 'khod pa la/_slar yang 'od zer gyis reg pa tsam gyis/_thams cad 'od dkar po zhu nas spyi bo'i dzaM b+ha la'i thugs ka'i nor bu la thim pa'i tshe/_spyi bo'i dzaM b+ha la'i nor bu dang phyag mtshan las dgos 'dod kyi longs spyod char chen po babs pas/_lus kyi nang dang rang gi gnas thams cad gang bar bsam la rlung bzung*/_de ni zhi ba'i sgo nas dbang du byed pa'o/ /gnyis pa dbang gi sgo nas dbang du byed pa ni/_rang nyid dzaM b+ha lar gnas pa'i mgrin pa/_rin po che'i khri dang*/_pad zla'i steng du/_rang lta bu'i dzaM b+ha la dmar po'i snying gar nor bu dmar pos mtshan pa las 'od zer dmar po zhags pa dang lcags kyu lta bu 'phros/_bla ma la phog nas dbang du bya ba dang gcig_/yi dam dang gnyis/_dge ba'i bshes gnyen dang gsum/_rgyal po dang bzhi/_blon po la sogs mi skya dang lnga/_btsun mo la sogs bud med dang drug_/nor rdzas la sogs longs spyod dang bdun/_mdor na thams cad dbang du bya ba dang brgyad de/_sngar ltar so so'i gnas la phog pas/_lus sems thams cad dga' ba dang bde ba chen pos
XXX khyab cing*/_rang la dad pa dang mos pa dang*/_brtse gdung drag po dang bcas nas/_rang dbang med par dbang du 'dus te pad+ma'i dzaM b+ha lar gyur nas mdun du 'khod pa la/_slar yang 'od zer gyis reg pas/_dga' ba chen po skyes nas/_'od phung dmar por ltems gyis zhu nas mgrin pa'i pad+ma'i dzaM b+ha la'i snying kha'i nor bu la thim pas/_mchog thun mong gi dngos grub rnam gnyis thob cing*/_rang gi lus kyi nang dang*/_gnas thams cad du yang longs spyod sna tshogs kyi char chen po babs par bsam la rlung bzung ngo*/ /de ni dbang gi sgo nas dbang du byed pa'o/ /gsum pa rgyas pa'i sgo nas dbang du bya ba ni/_rang nyid dzaM b+ha lar gnas pa'i lte bar/_rin po che'i khri pad zla'i steng du/_rin 'byung dzaM b+ha la rang lta bu snying khar pad zla'i steng du/_nor bus ser po dzaM ser pos mtshan pa las/_'od zer ser po zhags pa dang lcags kyu lta bur phyogs bcur 'phros/_phyogs bcu'i bla ma la sogs thams cad la phog ste/_sngar ltar rang dbang med par dbang du 'dus nas/_rin 'byung dzaM b+ha lar gyur te mdun du 'khod pa la slar yang 'od zer gyis reg pas/_dga' bde chen po skyes nas 'od kyi phung po mer gyis zhu nas/_lte ba'i rin 'byung dzaM b+ha la'i lte ba'i nor bu la thim pas/_mchog thun mong gnyis kyi dngos grub thob cing lus kyi nang dang*/_gnas khang thams cad longs spyod kyi char chen po babs nas gang bar bsgom nas rlung bum pa can bzung ngo*/ /de ni rgyas pa'i sgo nas dbang du byed pa'o/ /bzhi pa drag po'i sgo nas dbang du bya ba ni/_rang nyid dzaM b+ha lar gnas pa'i gsang
XXX gnas su/_rin po che'i khri pad zla'i steng du las kyi dzaM b+ha la ljang nag gam/_nag po'i snying gar pad zla'i steng du nor bu ljang khu dzaM nag pos mtshan pa las 'od zer ljang nag zhags pa dang lcags kyu lta bu phyogs bcur 'phros/_phyogs bcu'i bla ma sogs thams cad la phyogs pas/_dbang du bya ba rnam pa brgyad de/_sngar ltar so so'i gnas la phog pas/_lus sems thams cad dga' bde chen pos khyab cing*/_khyad par bsgrub bya thams cad skrag cing 'dar ba dang*/_sngangs pa dang*/_rmongs pa bcas nas/_rang dbang med par dbang du 'dus te/_las kyi dzaM b+ha lar gyur te mdun du 'khod pa las/_slar 'od zer gyis reg pas/_dga' bde chen po skyes nas 'od ljang khu'i phung por mer gyis zhu ste/_gsang gnas kyi dzaM b+ha la'i snying kha'i nor bu la thim pas mchog thun mong gi dngos grub thob cing*/_lus kyi nang dang*/_rang gi gnas thams cad na longs spyod sna lnga'i char chen po babs pas gang bar bsam la rlung bum pa can bzung ngo*/ /de ni drag po'i sgo nas dbang du bya ba'o/ /lnga pa las sna tshogs pa'i sgo nas dbang du bya ba ni/_rang nyid dzaM b+ha lar gnas pa'i snying khar rin po che'i khri pad zla'i steng du mi bskyod pa dzaM b+ha la sngon po rang lta bu'am/_yang na dzaM b+ha la nag po khros par bsgom kyang rung gsungs/_de'i snying khar pad zla'i steng du/_nor bu sngon po dzaM sngon pos mtshan pa/_de las 'od zer dkar po dang dmar po sngon po ser po ljang gu sna tshogs te/_kha dog sna lnga/_zhags pa dang lcags kyu'i dbyibs can dpag tu med pa phyogs bcur 'phros/_phyogs bcu'i bla ma rnams dang*/_yi
XXX dam thams cad de bsgrub bya brgyad la sogs pas/_dbang du bya ba rnam pa brgyad de/_sngar ltar de dag so so'i gnas la phog pas/_lus sems thams cad dga' bdes khyab cing*/_rang la byin gyis brlab pa dang*/_dad mos brtse gdung drag po dang bcas nas/_rang dbang med par dbang du 'dus shing mi bskyod pa dzaM b+ha lar gyur te mdun du 'khod par/_slar 'od zer sna lngas reg pas dga' bde chen po skyes nas/_'od kyi phung po sngo mer gyis song bar bsam/_de dag 'od zer kha dog sna lnga'i rang bzhin du zhu nas snying kha'i dzaM b+ha la'i snying kha'i nor bu la thim pas/_mchog thun mong gi dngos grub rnam gnyis thob cing*/_lus kyi nang dang gnas khang thams cad du rin po che sna lnga dang longs spyod kyi char chen po babs pas gang bar bsam la rlung bum pa can du bzung ngo*/ /de ni las sna tshogs pa'i sgo nas dbang du bya'o/ /'di dag gi skabs su 'od zer gyi rtse la lha bsgom pa ni zhal la yod cing*/_nor bdag brgyad lus la bkod pa yang zhal las shes so/ /gnyis pa bzlas pa gsung gi khrid la gsum ste/_phyi nang gsang gsum mo/ /dang po ni/_rang nyid dzaM b+ha lar gnas pa'i spyi bor oM/_dpral bar dzam/_dpung pa g.yas pa b+ha/_g.yon du la/_snying khar dza/_lte bar len/_brla g.yas pa la dra/_g.yon du ye/_bol g.yas la swA/_g.yon la hA bskyed do/ /de dag gi 'od 'phros pa'i rtser/_yi ge bcu pa las rin po che sna lnga'i char babs par bsam la sngags 'dren no/ /gnyis pa ni/_rang nyid dzaM b+ha la sngar ltar gsal
XXX ba'i gnas lngar/_dzaM b+ha la rigs lnga'i snying khar nor bu lnga dzaM lngas mtshan pa las/_sngags kyi kha dog de lta bu lnga 'khor bar dmigs nas sngags 'dren no/ /gsum pa ni/_rang nyid dzaM b+ha lar gsal ba'i gnas lngar dzaM b+ha la rigs lnga'i snying khar pad zla'i steng du/_nor bu dzaM rigs lngas mtshan pa lnga las/_sngags phreng kha dog sna lngas bskor ba las 'od zer 'phros/_'od zer gyi rtse la dzaM b+ha la rigs lnga 'phros/_lus kyi nang thams cad dzaM b+ha la rigs lngas them 'gags su gang*/_phyir 'phros/_ba spu'i rtsa ba thams cad kyi dzaM b+ha las gang*/_snod kyi 'jig rten la phog_/sangs rgyas kyi zhing du byas/_nang bcud kyi sems can thams cad la phog pas thams cad dzaM b+ha lar byas/_'od zer gyis bar snang gang zhing*/_'od zer de dag gi rtse la dzaM b+ha la rigs lnga bzhugs nas thams cad kyi zhal nas sngags sgra di ri ri snyan pa'i dbyangs dang bcas nas bgrangs pas/_rin po che sna lnga dang longs spyod kyi char chen po babs par bsam la yid kyis bzlas pa bya'o/ /de ni gsang ba'i bzlas pa'o/ /de dag gis bzlas pa gsung gi khrid song*/_gnyis pa rdzogs rim gyi khrid la gsum ste/_zhi gnas/_lhag mthong*/_'pho ba ste gsum mo/ /gong ma gnyis po ni spyan ras gzigs lam rim dang 'dra bar 'dug pas 'dir ma bris/_gsum pa 'pho ba ni/_rang nyid dzaM b+ha la bsgom pa'i spyi bo/_mgrin pa/_snying kha/_lte ba/_gsang gnas lngar/_dzaM b+ha la rigs lnga bskyed la/_gsang gnas kyi dzaM b+ha la thig le ljang khur gyur nas lte ba'i dzaM b+ha la la thim/_de thig le ser por gyur
XXX nas snying kha'i mi bskyod pa la thim/_de thig le sngon por gyur nas mgrin pa'i snang ba mtha' yas la thim/_de thig le dmar por gyur nas spyi bo'i rnam par snang mdzad la thim/_de thig le dkar po 'od 'phro bar gyur nas spyi bo nas rgyangs kyis thon nas/_spyi bor bla ma rin 'byung du bsgom pa'i thugs kar thim/_de nam mkha' la 'ja' tshon sna lnga gyur nas/_'od dang 'ja' tshon gyis nam mkha' gang bar bsam la/_dmigs med phyag rgya chen po'i ngang la mnyam par bzhag go_/de ni 'pho ba 'ja' tshon ma zhes bya ste sbyang ba dang las sbyor stabs su'o/ /des khrid kyi dngos gzhi song nas/_gsum pa rjes ni/_bsngo ba dang smon lam gyis rgyas 'debs bya zhing dus rgyun du nyams su blangs pas mchog thun mong gi dngos grub lhun 'grub tu 'byung bar 'gyur ro/ /khrid 'di ni rgyud pa 'dzin pa dang*/_snod dang ldan nges pa ma gtogs pa snod min la mi sbyin pa'i bka' rgyas btab bo/ /gang zhig dgos 'dod 'byung ba'i yid bzhin nor/ /gang gi gdams pa dngos grub gnyis 'byung ba/ /gang de bla ma'i drin gyis legs mthong bas/ /gang gang 'gro la phan phyir yi ger bkod/ /dge bas 'gro kun 'khor ba'i rgya mtsho las/ /brgal nas sems nyid yid bzhin nor rnyed nas/ /rang gzhan 'khor ba'i sdug bsngal las grol te/ /bde chen mchog gi go 'phang 'grub gyur cig_/bcom ldan 'das 'phags pa dzam b+ha lha'i khrid dngos grub char 'bebs zhes bya ba/_bla ma'i gsung las byon pa bzhin rnal 'byor pa 'od dpag rdo rjes yi ger bkod pa re zhig rdzogs so// //dge'o/ /dge'o/ /dge'o/ /


Footnotes[edit]



Research Information
Translator's notes
Note from Ringu Tulku
The Instructions on Yellow Dzambala Called: "The Rain of Siddhis" by Eupa Dorje.
Notes on the text itself
Notes on authorship
Notes on individuals related to text
Other notes
Genre from Richard Barron's Catalog
Instruction manual
Genre from dkar chag
khrid phran
BDRC Link
VolumeI1CZ3979
BDRC Content Information
No note on contents


Related Content
Recensions
Other Translations
Commentary(s) of this Text in the DNZ
Text(s) in the DNZ of which this is a commentary
Related Western Publications
Related Tibetan Publications
Other Information

Information about Unicode Tibetan and the digitization of this text

As the only available unicode Tibetan text at the time, Nitartha International's version of the Paro Edition of the gdams ngag mdzod is provided here. However, note that it has not been thoroughly edited and that there may also be mistakes introduced through the conversion process. Eventually we will provide a fully edited version of the entire Shechen Edition, entered and edited multiple times by Pulahari Monastery in Nepal, but as of fall 2017 that project has not been finished. Note that the folio numbers that appear throughout were added by Nitartha Input Center at the time of input.

Provided by Nitartha International Document Input Center. Many thanks to Lama Tenam and Gerry Wiener for help with fonts and conversion.

View JSON

JSON Export